رواية كفي والمنجمة الفصل الثالث والعشرين 23 بقلم الكاتبة Leo alfatlawi

رواية كفي والمنجمة الفصل الثالث والعشرين 23 بقلم الكاتبة Leo alfatlawi

بارت الثالث والعشرين

دخلنه على صوت الصريخ نركض

رجاء ابنص البيت كاعده مشگوگ ثوبها من فوك وتلطم وتصيح يبووو

منضرها وصوته كانو كفيلين بزرع الرعب داخل الشخص المقابل

رجليه ماتت مااعرف شنو صارلي اريد اوصل يمها مااكدر خفت من الصاير

سماح جانت سريعه ركضتلها واني وكفت مكاني اراقبهم من بعيد ماجان عندي الجراءه اوصل لان ما ماره عليه هيج شي من قبل وخاصتآ صرختها جانت اتخوف لدرجه جمدتني بمكاني

نزل مؤتمن على صوتها يركض كنبص كدامها يريد يفهم الصار

كم مره عاد عليها السؤال مترد كمش راسها خله ابحضنه يهديها بس هيه جانت مستمره بالبجي والصرخ

لمن صرخ بيها مؤتمن حيل كلها فهميني بويه اشصابج

واخيرا نطقت كلنه جنه واكفين انريد نفتهم

--احمد طگني يخوي اخيتك انهانت بوجودك

بهالحضه دخل احمد وراها يصيح وينججج

اندار مؤتمن على صوته وكامله اول ماوصل يمه رفعه من ركبته بالهوا صك على اسنونه

شراينه جانت ضاهره من كثر الغضب

اشلون اتمد ايدك عليها ماگال غير هاي الكلمه وبعدها دگه بالكاع

دنك عليه ورجع رفعه رگعه بوكس يمكن اتفلش وجهه

ركضت عمتي طلعت بره اتصيح مكرم لخاطر يخلص احمد من ايد مؤتمن لان مؤتمن اتولا ضرب يمكن اذا اتعطل مكرم بعد قايق يموت احمد

دخل مكرم يركض وره عمتي كلما يحاول يبعده عن احمد ميكدر لان مؤتمن ضخم يختلف عنهم وفوكاها معصب وناوي على موت احمد

عمتي تلطم اتكله مات الولد بيدك ولك هده ومكرم يحجي ويجر بي كوه وخرو من ايده لمن احمد كام يتقيئ دم من حلكه

هاي كلها وماعافه بعده يتهدد

مكرم جان واكف حاجر بينهم ومؤتمن يحجي بحركه

--عليش طكيتها

--تغلط على امي

--غلطت ماكفرت عليش ماجيت كلتنه شنو اتمد ايدك عليها ماوراها زلمم

--اكلك تغلط وسبتها من احاجيها اترادد وحاسبه الكل خدم جوه رجليها اختك مامتربايه

--اخت منو لك ماتمتربايه من انعل ابو عشيرتك اليوم

دفع مكرم وركض شاله من ركبته رفعه ليفوك كطع التنفس يمكن مات لان رفس وسكت

مكرم وعمتي سحبو سحب من ايده طاح بالكاع كوه يتنفس ويكح لان جان گاطعه التنفس

دفره وكله مالك مره عندي اطلع منا اذا لمحت ضلك صوب البيت اترسك بارود وانعل ابو اليوكف بوجهي

رجع لرجاء كومها واخذها لغرفه بيبي

مكرم گوم احمد اخذه وطلع يسحل بي لان جان منتهي هو ضعيف وطاح بيد مؤتمن

اشكد احتقرته شنو من بشر هذا

لعد البارحه موتني محد كله لويش كلهه واكفه جانبه

وهو ممنوع احد يوصل لخته وهيه اخته قمت القذاره والطياح الحظ ياربي هم يجي يوم واخلص من هاي العائله وضلمهم

عفيه راجاء البارحه اني انكتلت واليوم احمد شنو من ابنيه دخيل الله فوك حقارتها وجذبها سانده ضهرها بااخوها

الهبطه مالت المنظر احسها بعضامي وكلبي وجعني على احمد الي ماكدر يدافع عن روحه هو ضعيف وهذه اتكول وحش ماخذين جهالها جايه بحيل صدر يكتل بي

رحت لغرفه بيبي اريد اسمع عن شنو مضروبه لان بعدها اصواتهم طالعه جانت ومؤتمن يتوعد

لكيها كاعده ابصفه صايره ابحضنه وتبجي وهو يمسح بدموعها ويبوس براسه يريدها تسكت يكلها اذا زلمه يوصل صوبج بعد

بيبي تنعه اتكول ميتلها واحد مومكتوله حفيدها

امها كاعده يم رجليها تتوسل اتريدها تسكت

اباوعلها مابيها اثر ضرب اشلون ضاربها وهيج جايه مسبيه وخبصت العالم وراها وهذا مورجلها وتحبه اشلون خلت مؤتمن هيج يضربه اشلون هان عليها

اني وين من ذوله كلهم

حسيت روحي من صدك حيوانه ومالي اي قيمه بعد الضرب مالت البارحه الي حصلته منه لاهو رف كلبه ولاواحد دافعلي وخلصني من ايده حسيت العبره جرحت بلعومي واني اشوفهم اشلون خايفين عليها

انتجيت على الباب واباوعلهم شنو ديصير من شنو مخلوقين وين كلبي الجان يحن اله شوف كدامك بلكي تقنع وتحس من اتشوف اشلون يعامل اخته وخايف عليها وانتي بدون رحمه جنت بيده تترجي

اشكد بعد تطغي وين يوصل بيك الضلم اشكد احتقرتك

يمسح بدموعها ويكلها والله اجيب حقج بس سكتي

واني حقي منو يجيبه الله يلعنكم

شال راسه صارت عينه بعيني اخذ نفس وشال ايده من رجاء

درت وجهي مااريد اشوف وجهه يحجي يوم وتطلع حوبتي بي الك يوم ياضالم

عفتهم ورجعت للغرفه مالت هيفاء دخلت وسديت الباب قفلته

كعدت وره الباب كلبي معصور ومختنكه ادموعي وحدهن ينزلن شريد اتحمل لشوكت

اسمع خطواته يم الباب وصل اندكت الباب على كيف ورجع دكها حيل كال غزل فتحي الباب

مارديت اخر شي دفر الباب وراح بعد ماسمعتله صوت

ماطلعت للعصر حتى غده ماتغديت

دكت الباب هيفاء كمت فتحتها

گالت تعالي جدي يصيحج بس عرفتها جذب هو الدازها ماطلعت اشرتلها روحي تعبانه هيه هم مالحت راحت

للمغرب جعت احس بطني اتشنجت من البارحه بدون اگل هو مااسمع صوته امبين طالع

طلعت للمطبخ اكلي شي قبل لايجي وارجع غرفتي لان ماطايقه اشولفه واعرف روحي راح اشمرلي احچايه وبعدين انكتل خليني معتزله هيج احسلي

واكفه يم الثلاجه ودخلن رجاء وهيفاء يسولفن كالت وين يجي يشوف اخته اشلون امدلليها وهو ذالني

-لايسمعوج ويصدكون وخري خلي اخذ خبز من الثلاجه

-كون سم تاكلين

-ابكلبج ان شاء الله بس والله عاشت ايده احمد تستاهلين خوماقصر بالضرب ماسحك على راسج

-ماعاش اليسحك على راسي واني اخت مؤتمن

-عود باجر ولج انتي شفتي روحج من اجيتي لولا غيرمضحكه صايره

-غزززل حق الله اخلي مؤتمن يدوسج الصمي احسلج

-امم محجيت لويش تتضايقين لو ذكرتج بالكتله يلا يجوز جان ضايج خطيه وحب يتسله بخلقتج

--اذا ماخليت مؤتمن اليوم يسحلج مااطلع رجاء

---تعالي اكولج انتي ماعندج غير مؤتمن يكتلج مؤتمن يسحلج بنتي شوفيلج غيرها تره صارت ملل وقديمه

--صدك ماكلتلج مؤتمن راح يجيب تهاني حبيبت مكلبي ام البيت

--اي غير زوجته بالعافيه علي لويش دااتكليلي تره ميهمني لاتنسين اني الي اطلكت وغصبا عنه هم

اخذت اللفله وطلعت بره اضحك عفتها مشتعله بس جذب اني الراح اموت والنار ابكلبي مشتعله

حتى شهيني انكطعت كعدت على الدرج كلبي ميفور على شنو مااعرف لويش هيج دااحس لويش كلبي ميرضه يقتنع ويعوفه بعد الصار كله من اتخيل تهاني ترجع لحضنه اختنك هذا الشعور دمرني

احس روحي بلاكرامه وحيوانه اني اشوكت اتعلقت بي هيج اشوكت حبيته هالحب لويش امسيطر على تفكيري وكلبي

كلمااكول اتعديت هالمرحله وخلصت منه بس اسمع ضحكته يرجع كلبي يدك من جديد اشلون

من اشوف تصرفاته اكرهه بس اسمع صوته ارجع احن ادري بروحي داادمر نفسي بيدي

غمضت اعيوني غزل هذا متوحش وميخاف من احد ولايحسب احساب لحد واحد ساحكج شمتانيه منه ولج حتى اخوج سحكه

منين راح يخاف واشلون راح يحسبلج احساب انتي اخذتي القرار الصح من تركتي كملي حياتج على هذا الشي لاتتراجعين

كاطع تفكري صوت مصطفى وهو يكول شنهو جاي اتحضرين ارواح شكو مغمضه لج

---ههه لاا دااتخيل روحي بعدني عايشه يم ماما صعدت الباص رحت للمدرسه وهياتني داانزل ويه اصدقائي واني واضحك

--غزل اذا اتضلين بالماضي خويه ماراح ترتاحين

--ؤك خليني بالحاضر شنو وينه شومدااشوف منه شي بس الكتل والضلم

--والله حقج خليج بعقلج وردي للماضي غمضي خويه غمضي و عيشي داخل احلامج لان الواقع راح بخبلج

--عوفك من الواقع والحلم احمد اشلونه

--مابي شي هنه كم بوكس ودفره ميأاثرن باجر كال اجي اعتذر بلكي مؤتمن يردله مرته

--وعلى شنو يعتذر صدك ماعنده كرامه فوك منضرب هيه كولها جنها بريعصي ياريت تسوه

--هسه تسوه متسوه بعد مرته يريدها على طاري البريعصي شوفي منو وراج

--انداريت واشوف تهاني داخله شاكه حلكها وبيدها جنطه تسحل بيها طايره هيه وعباتها اتكول بات مان

دخلت بدون سلام كبل لغرفه بيبي

مصطفى. خره بشكلج لاحكه على اللواكه

ردت اكوم اوخر عن الدرج لان اكيد راح تجي تصعد منا وجعتي بطني عصرت روحي رجعت كعدت

--خيرج شصابج يخوي

--اثار ضربت اخوك واخته اثنينهم اتكول ماخذين وكاله بنفس المنطقه

--يلا تكبرين وتنسين دتعالي خلي ناخذ فره عالبيت صبوحه ضايج نتسله اشويه

كمت ويا اول رحنه لغرفه بيبي شفنه تهاني يم رجلين بيبي تبجي وتتلوك اتريدها توكف جانبها

وبيبي اترد انتي ام بيته غصبا عنه يشيلج على راسه ام جهاله بس انتي هم هلتن هلا بي لاتشلعين اكليبه

اني عين بيهم وعين بمصطفى الدخل بلمح البصره اريد اشوف شنو يسوي

على خف ايده سحب فونها على السرير وطلع كال يلا عالبستان اهنا خنكه

--لافدوه حاره بره

--يابه متموعين لاتخافين تعالي يلا

طلعنه للبستان وكف على جهه طلع الشريحه خلاها الجيبه كال اتفيدني بالمستقل غمزلي وبتسم

راح وشمر الفون بالتنور لان جان معلوك عمتي ام مؤتمن خلت المعجنه مالت العجين وراحت اتجيب مي للتشنيك وكف باوع منا منا كلتله شنو بيك شي شدااتدور

اشرلي اشش راح جهت جلكان النفط

خله اصبعه واجه يم المعجنه نكثه باوعلي وابتسم كال يلا امشينه خلصنه خلي ياكلون بيت صبوحه الف عافيه

اشكد نسوان فاهيه كم مره امنبهين عليهن يغسلن اديهن قبل لايخبزن مال الثول

وكفت صافنه عليه انته شنو اتجذب واتصدك الجذبه

--منو ولج امجذب يالفاهيه عليش اتخليني اخربط ملامج وجهج

--صدك لويش حركت الفون مالتها تره موقحط هسه يشتريلها مؤتمن غيره

--من اكلج ثوله اتزعلين غير راح تخبصكم بصورها وطلعاتها هسه بح حلم وانتهه هم الاقامه طارت وهم الصور انمحت وبعيدن ماعدنه مره اتضيع النقال هاي فضيحه بعد كم يوم تنشر صورها على المواقع التواصل غير غبي اخوي اشلون خال نقال بيد هاي المعيديه

--عزا ابليس ديبجي بالزاوي ويباوعلك- اكول اني جوعانه لعد اشلون الخبز خرب

--بايه لاتبجين هسه اسمطج بالفه كص تسوه راس شعشبونه ورجلها

--صدك ابوك وين اشو مختفي

--كامشي يتسول وشاكين بي ارهابي

شعرفني متولين هسه هذا هم يسوه الواحد يذكره

وين انروح هسه اشو احس روحي امعوز اشويه بعدني ماامرتاح كلش

--نحرك مؤتمن

--لاولج ننكشف وين اندفنه بي مترين

--اكول صدك اشوكت ينقرض ونخلص منه

--اسمطج كف هسه على جهرتج على هالثوله الشايلته شنو فار وينقرض بس صدك مؤتمن من زمان مالاعبين على اعصابه

--شنو حتسويله كون شغله اتجلطه

--مواني الاسويله انتي بس كون بيج حظ وادبريها وحگ الكفل زينب اتجلطي مكانه اتخليج تشفين غليلج واتنعلين ابو اصله

--فدوه صافو حبيبي كول شنو اسوي حسوي بدون تفكير

--اعرفج رب مال ثول ادري بلا تفكير دوكفي مكانج هسه اجي لاتتحركين اغزيلان تره اشمرج بالمجاري

--لاابد ولااتحرك

راح مصطفى واني بقيت انتضر اباوع لعمه اتشنك واتشتم كل شنكه شاكه بالوضع وترجع اتشنك

گوه كمشت ضحكتي ياربي راح انفضح واذا انفضحنه يطلعونه بالدفراته على كوله مصطفى ويمكن صدك بشمرني بالمجاري يسويها هذا

اشويه واجه اجه بيده شيشه دوه كال هاج هاي ضامها للاعزاز بس متغله عليج

اول مايدخل مؤتمن اتفتحين قبق بانزين السياره واتشمرين بي والباقي على البنيد بس ديري بالج يلوح ايدج تره يهرطها

اخذته وخليته بجيب الكلبيه باوعلي كال وين انروح هسه

--مااعرف بس موكافي

--عليش مناخذ فره عالمطبخ

--خطيه الطبخ اليوم على سماح هيه حتتعاقب

--يلا عوفيها امشينه جوه لان زهرمتي راح يتبدل جلدج طلعين جنج صرصر مصلوخ قبق راسه

دخلنه جوه رحنه لغرفه بيبي كعدنه وتهاني بعدها اتسولف على السفره وين طلعو اشلون اتونست بس اشوفه اتحوص اتريد الفون ومتدري وين خلته

اتريد اتراوينه الصور صدك من كال مصطفى راح تخبصكم

عاشو صفاوي اثاري يعرفها كوه كامشه ضحكتي واني اشوفها مخبوصه اتدور

لمن دخل مؤتمن وجدي

غمزلي مصطفى اكوم همستله اخاف يحس

--مالج شغل بس انتبهي لاتخلين واحد يشوفج بره اهنا اني راح اعلكها ومااخلي احد ينتبه

كمت طلعت مؤتمن لباله لان دخل طلعت شال راسه باوعلي راد يحجي عفته ومشيت

طلعت للكراج امتانيه الصوت اشوكت يعلكهه علمود اسوي الكال عليه

اشويه وصدك وسمعت اصواتهم علت وخاصه صوت مؤتمن وين وصل

ركضت للسياره فتحت غطه البانزين درت اشويه من الشيشه وسديته والباقي شمرته على البنيد مثل مكلي بس عزا اني ادير والون يختفي ينصهر يطلع الحديد الاصلي شنو هذا بقه اشويه

درت على القماره خلصت الشيشه اخذتها وشمرتها بره اسمعها انكسرت

دخلت للمطبخ ولااحد بي امبين ملتمين على الهوسه الصارت جوه غسلت اديه ورحت لغرفه هيفاء اتمددت بس كلبي يركض مو يدك

عزا مصطفى معجون هالولد بالخباثه ومتعرفه ويامن صاف يعني البارحه ماكل كومه ضرب وهو يدافع عنه واليوم يخبث عليه

والله حيره هذا الولد بس بعدي عمري يسوه احمد اقلها ياخذ ثاري منهم

اشويه وهدت الهوسه صار هدوء يمكن حلت دخلت هيفاء كالت جدو يصيحج

--كليله نايمه

--غزل تره استوه صار اليل كومي هو امعصب

--مااكوم اعرفه شيريد روحي كليله ماتت خمدت ولي

--ابكيفج اني عليه كلتلج

--اكولج تعالي شنو الصار لويش اتعاركو

--يااا ولج هاي تهاني مبيوك النقال مالتها وبيها صورها خطيه ومؤتمن سواها هوسه حتى طكها هيه اتكول جبته وياي لهنا بس ماكو اتجذب اتريد اتلم السالفه ومصطفى الله يسلمه ضاف بهارات وعلكت

--وهسه شنو صار

--يكول مؤتمن بلكي اكدر اخابر الشركه اتغلقه مناك قبل لاننفضح

--عزا ابعينها اشكد فاهيه مومال فون

--هو مؤتمن هم كال بعد اذا لمحت بيدج نقال

احركج يلا غزل فدوه كومي شوفي جدي شنهو رايد لاتضلين هيج حاكرته

--بس اروح يكلي راح ارجعج لمؤتمن علمود العينتين يرجع لدبي تره اعرف شنو يريد واذا كالها هسه افلش راسه لجدج لان روحي طالعه فااختصريها احسن وروح كولي لكيتها نايمه

بعدنه نحجي ونسمع مكرم دخل يصح مؤتمن ولك سيارتك الحك

طلعت على صوته هيفاء همزين عافوني والتهو بسياره مؤتمن نسوه شغلتهم يمي شنو

هذا خطيه خبر وره خبر راح ينجلط

يمي الفون مالت هيفاء اخذته التهي بي للعشه اسمع اصواتهم بره وصوت مؤتمن محترك حيل بي يستاهل

شغلت فلم كارتوني وضليت اتفرج ساعتين واني على كعدتي متت جوع اني من الصبح بدون اكل وانوب حتى اللفه شمرتهه مااكلتها الضهر دزيت مسج لمصطفي يجيبلي اكل دزلي ؤك

رجعت شغلت غير فلم وكعدت اتفرج نص ساعه دخلت هيفاء بيدها علاكه كالت دزه مصطفى بس خلي اكعد اكل وياج لان ماعدنه عشه

--لويش مطابخين

--لاوالله سويه بس الخبز خطيه امي هالكد مامشاكل صارت اليوم يمكن اديه ماغاسلتهن عدل من النفط وعاجنه

--يلا تعالي جايب كومه خطيه لعد ماجابلهم ويا

--هو هذا وضلو يحجون عليش اكلكم من بره شنو ماعدكم نسوان تطبخ ومؤتمن اصلا شاك بمصطفى امسوي هذا الشي كله اشدراك الخبز خربان ورحت جبت الغزل اكل

--عزا وشنو كله بسلا هم سواله مشكله

--لاسكته كله جايبلك بت امريكيه واتريد اتوكلها عدس بهالحر اتسودنت غير اتحومر ومتلحك حتى اتكص اذانها اتموت مكانها

--فدوه بعد عمري صافو

--خلي يسمعج مؤتمن اتكولين عمري لخاطر يطلع عمرج بيده

--صدك شنو الصار من ساع سمعت مكرم يصيح

--يااامادريتي هاي مدري منو طافر السياج ومدمر سيارت مؤتمن حاركها حرك بعد متفيد فحصوها كالو حتى العقل تلفان انتهت هاي خطيه شال روحه ودكها بالكاع زين ماانجلط استوه مشتريها سوده عليه

هيه تحجي واني كوه كاتمه الضحكه واكل

دخلت رجاء جفت لكتنه ناكل واني اباوع بالفون وهيه صاحت تعال يمؤتمن تعال شوففف يخويه مرتك ويننن

طفرت من مكاني شنو اكو لويش دتصيحين عزا شنو الصار وين قابل هياتي دااكل

اني اتوسل تسكت وهيه مستمره ولك مؤتمننننن تعال اااااااالحك خايف من تهاني اتفضحك تعال شوف هاييي

--بنتي اشبيج شنو الصاير متشوفينه دناكل كاعدين اذا على لبسي فااريد انام يعني عادي اتراك محد حيشوفني

فدوه بس سكتي فهميني شنو اكوو على صوتها اجه مؤتمن يفرك ابراسه كال خير مصيبه جديده بالعباس متراهنين اتجلطوني اليوم شكوووو

--شوف مرتك شنهو بيدها المن اتخابر

--عزاا والله مدااخابر داباوع فلم

--منيلج هذا النقال كالها واخذه من ايدي يكلب بي

--مالت هيفاء بس والله مااخابر احد حتى شوف شنو بي بس جنت داباوع فلم التهي بي

وكف يباوع بي ويكلب اني كلبي واكف لايكتشف اخبر ماما منه بس لااني امسح اول بااول ماباقي بي بس مسج دزيت لمصطفى ياربي كون ماناسيه شي اي اخر شي البارحه مسحت مكالمه مكرم متاكده

اباوع ليده وكلبي عاصرتها مابيه بعد ضربه وهو يكلب بي واني اعيوني تترقب رد فعله انوب اليوم على حضي روحه طالعه يعني يشيلني ويدكني بالكاع بدون لايحجي

كلبي راح يوكف وهو بعده يكلب يمكن ماخله برنامج مادخل علي الرجفه كامشتني واني اترقب ردت فعله

اباوعله راد يضحك وبطل شمر الفون عليه وكال هسه شوفيلج فلم بي حظ هز ايده وطلع يضحك

يمه الحمد الله ارتاحيت خليت ايدي على كلبي واخذت نفس حتلو جنت ماسحه المكالمات والرسائل بس من وكفته شكيت ابروحي عايفه شي

شلت الفون لكيته داخل عالبحث واني ماخاله فلم دزني ماباحثته اخر شي خاتمتها ب سبونج بوب

يلا خليها على هذا الشي ولايكمشنه بشي ثاني

شلت راسي لكيت هيفاء بعدها جامده

---ضحكت كلتله امداج يالفاهيه البارحه بليل من كملت حجي ويه ماما مسحت المكالمه وشفت مكالماتج بالساعات ويه مكرم هم مسحتهن

--يمه دخيل الحمزه متت بدمي كلت اشمرها ابراس غزل ماكو غيرها

--عزا وغزل معوزه اطياح حظ وبعدين شكو احجي عن غزو الارض شخصم ساعات اسولف ويه مكرم

--مااعرف بس ماخطر ابالي غيرها

--يلا الحمد الله عدت على خير بس اختج والله اتفشلت فشله لبالها راح انكتل حيل بيها طلعت خجلانه

---لاتخافين عليها تاني للصبح ادبرلج شغله ماطولها اهنا ماراح اتعوفج

--عود لويش هيج دتسوي

--اتغار اتحس مؤتمن يحبج اكثر منها وهيه اتعودت على حب ودلال مؤتمن عدها نحاسه اتريده بس الها يحبها ويفضلها على الكل

--وين حب مؤتمن شو الكل شايفه واني مامحصله بس الضرب منه مدااشوف شي غير هذا

نحجي والفون رن جان مكرم يتصل

طفرت اخذت الجهاز وخبرته بالصار كال انوب اخذ احتياطي اخاف يلكفنه عفتها اتسولف ويا ونمت مااعرف اشوكت خلصو كلامهم

فتحت عيني الساعه 9 اشعجب محد كعدني لسه وين رجاء مااسوت انزال جوي شنو معقوله مصطفى سمهم كلشي اتوقع منه يسوي شو هدوء

كمت طلعت لكيتهن كلمن ملتهيه بشغله دخلت للمطبخ غسلت وجهي داافتح الثلاجه اطلع شي اكله دخلت سماح شعرها امبلل كمشتني الضحكه باوعلتي صفح امبين حاصرها البارحه ماكو فلته

لكيت خبز جديد خابزين من الصبح سويتلي لفه جبن وصبيت كوب جاي كعدت على الميز اكول دخلن غضب الله تهاني ورجاء وكل وحده كرشها كدامها حوامل بس وجوهن اثنينهن امزوركه من الكتل

كعدت رجاء على الميز وتهاني مقابيلي

وبدن يشمرن سمهم ويذب دنكت مالي شغل بيهن اكل ماخليت بالي وياهن بس من كالت رجاء خيه ضمي بطنج لاتنحسدين رفعت راسي هاي شنو تقصد وذيج ردت

--لابسه زركه ابكد روسهن لاتخافين يمه فدوه لبنيت مؤتمن بعد جبدي اشلون فرحان كال اسويلها الغرفه المقابيلنه وحجز غرفه مناك من دبي الها هسه محتار شنو يسميها

--خلي يسميها رجاء على اسمي

--هو يمكن هيج كال من الاربعين اريد بعد طفل مااريدج اتكعدين كل سنه طفل

--من حبه الج خيه يريد كلهم منج ولو اشطايح بيده اول وتالي منج ناس عكر وناس مكروهين انتي بقيتي الاول والاخير يمه كون بجاه النبي عشر جهال اتشبعينه عن السنين الراحن وبعد ميشوف غيرج

--يااا جاخيه من هسه ميشوف غيري لاتخافين للصبح كاعد ميقبل يغمض يكول مااريد افوت دقيقه من غير مااباوع بوجهج

هيه تحجي واني كلت عيع و غصبت دكت على ضهري سماح كوه كامشه روحها لاتضحك كوه سحبت نفس شربت ماي كالت يمه دخيل الله بسلا بتي تضربها عين

--على شنو عين اذا اسمها رجاء وتشبهلج لواتخليها ابطنج وترحمين العالم اهواي احسن

هيه عاطت وعمتي دخلت ام مؤتمن كالت كافي لغوه يلا كلمن تكمشلها شغله وانتن روحن ارتاحن لغرفه جدتجن

تهاني. اي والله عمه فدوه الغرفه كلها اتراب والفوك هم مابيه انضفه اتعرفين تعبانه ونسات ومؤتمن ضايج من الوصاخه بلكي اتصخرين البنات ينضفنها

--اي يعمه غزل تصعد اتنضفها

--لويش عيني غزل مااصعد ولاانضف خسيتهم لويموتون

--ياجامنهو ينضف

--صعدي انتي موغرفه ابنج وخايفه على جنتج اني شكو

--اتعاندين اغزيلان سهلا اكو من اليردج انتي مبينه نفس امج متجين غير بالضرب

--عززا من ذاك الوكت انتي ومكايدج ويه ماما والله عرفت واله بابا يحبها اشلون جان يضربها عززا متملين

--انتضري هسه اعرفج اشلون امل

شالت الفون ابسرعه اتكول مستعده والله شكيت بيهن متفقات لان ماكو هيج سرعه واستجابه للطلب

خبرت مؤتمن وبدت تشكي ولك يمه اني رجليناتي ومريتك بطنها توجعها متكدر اتنضف

--ماسمعنه شنو رد بس هيه كملت كالت ياا ---

غير سماح واكفه كامشه الطبخ وهيفاء تخبز عود كلت الغزل ساعديني وهيه بعد ميتلحك على السانها اتكلي انتي صعدي -----ولك ادري مالك شغل

بشغل النسوان يااا ولك يمه هاي تاليتك اكلك هيج تحجي اتكلي يمه حلنها بيناتجن هو اني لوكادرتلها اكلك حاجيها ----يلا هاك

فتحت الاسبيكر صاح غزل شهالكلام شنو انتي نضفي اشوكت تفتهمين تحجين

--تره موهيج السالفه مؤتمن

--كلتي لولا احجييي

--اي كلتلها بس ماقصدت لان كالتلي ----

كافييي بلا لغوه ترحين اتنضفين وحك علي اذا اجيت ولكيتج ماامخلصه الشغل انضف بيج البيت يلاولي

كالها وسد الجهاز رحت اخذت العده مالت التنضيف وابجي صعدت عفتهن يضحكن وراي متشمتات ربي متكلي اشوكت اتطلع حوبتي بيهن

الله ينتقم منك مؤتمن خلصت الدرج اباوع الغرف والممر صايرات مجزه من التراب رفعت كلبيتي من الاصفاح وذبيت قهري بالشغل ساعتين واني احس ضهري طك من التعب

امسح ادموعي واشتغل بس غصبا عني يرجعن ينزلن خلصت ردت انزل صعدت تهاني كالت

انتضري ذني ملابس مؤتمن عافتي ودخلت للغرفه طلعت كومه ملابس كالت غسليهن شمرتهن وراحت فتحت الباب الغرفه مالتي كالت هم نضفيها انريد انجيب الغرفه مالت بتي مؤتمن كال خلي اتنضفها عافتني ونزلت

استاهل حيل بيه اني جبتها لنفسي لبالج ترتاحين مو يلا اشتغلي حالج حال الخدم

خليت الملابس على صفحه دخلت للغرفه مااريد اتذكر اي شي غمضت اعيوني عن اي ذكره صارت بهاي الغرفه ماطول قبل انو ينشالن غراضي وهيج انذل انتهى انشالت ويا كل ذكره

كنستها ومسحتها بس كلبي محروك واحس انزرف من اشوفها خاليه هيج هنت عليك ودااتذلني لويش شنو من كلب شايل لويش اتحب اتشوفني مذلوله كدامك

اشتغل وامسح بدموعي ميرضن يبطلن الجو حار السبلت مطفي احس روحي رخت كوه كملت

بيها كن شغله سفطتها انداريت اريد اطلع شفته واكف يم الباب بس جان صافن على وضع الغرفه اريد اطلع كلتله بس سوي مجال دااطلع خلصت شغل

-شنهو هذا وين الغراض

--وخر مؤتمن خلصت تنضيف غرفك والممر بعد تؤمر بشي ثاني دنكت شلت الملابس مالته ودانزل اجه واري بسرعه كمشني باوعتله كال وحق كلام الله ماادري

--ميحتاج بعد نضفتهن خلص اقلها احلل لكمتي اهنا على سالفه امك موتاكلين بلاش

دفعته ونزلت ماخليته حتى يحجي شمرت الملابس على الغساله ودخلت للغرفه احس روحي اتريد تطلع كعدت بالكاع ضميت راسي بحضني بجيت من كل خاطري اريد اطلع القهر الي ابكلبي اذا بقى يمكن اموت

اسمع صوته وصل للقاره الثانيه يتعارك على الغرفه وينها

صارت عركه اشكبرها وصوتهم وين وصل اسمع حتى جدو صار عالي يتعارك ويا

وراها صار صوت تكسير مؤتمن من نوع اذاعصب لو يكسر لو يضرب

امبين ماحصل واحد يطلع غضبه بي اتجه للتكسير بس يمكن خلص البيت كله لان على طول الوقت الاتعارك بي اسمع صوت التكسير مستمر لمن طلع صوت صرخت تهاني اخذتلها كم صرخه وصار هدوء بعدها

مرت ربع ساعه ودخلت هيفاء للغرفه ادردم كعدت يمي كالت والله مااخلي ايدي ولاانضف خلي هنه السبب خلي ينضفن شنو اني ابتلي

--شنو الصار

--كولي شنهو الماصار شنو الخلا مؤتمن صاحي بالبيت غير گلبه كلاب ماخله شي ماكسره يتصرفن ابكيفهن خلنه يشيل روحه ويركعها بالگاع زين ماانجلط

--سمعت تهاني اتصرخ

--حيل بيها چا هو منين الصوج غير هيه كالتلهم مؤتمن يريد غرفه لبنته وهو كال بيعوها من عرف الصوج منها طكها طگ تسوه عمرها وابشرج كتل رجاء هم

--ياااالويش

--لان كالتله شكو كتلت روحك هسه غير تسوه حالها حال الخدامه اهنا

--لعد حيل تستاهل

--يمه اصخام ابوجها غير بلش راجديات بيها خربط ملامح وجها ورجع طگ تهاني يكلها شنو تخدم بيت ابوج اشلون اتخليها اتنضف غرفتج وحتى ويه امي هم سوها كربله عليها وروح عمي خفنه من عصبيته يطكها كام جدي كمشه حتى يمنعه لان فقد

--سكتي حبابه راسي يوجعني يطبهم مرض انطيني علاج وجع راس

كامت انطتني وكعدت يمي اني اتمددت وهيه تتوسل بيه اتكول مؤتمن والله ميدري والله شغل بالصار والله اتخبل من عرف ولج نزل من فوك متسودن حتى على امي اتجاوز

غمضت هيه تحجي واني احس راسي يريد ينفجر شافت ماجاوبتها عافتني

اتمددت على قريولتها اخذت عيني النوم من التعب كعدت على صوت احمد كمت شفت ماكو احد يمي بالغرفه بس بره صوت عالي عفيه بيت بس هوسات وعركات اشوكت يهدء

كمت طلعت لكيت احمد واكف يتوسل برجاء وهيه وامها نازلات عليه اخر شي كالته ولي منا لااخابر مؤتمن يرجع ياخذله سحله بيك

اشكد وكف ضدي واشكد قهرني بس ماهان عليه اشوفه مذلول لخلفه شعشبونه كسر خاطري رحت يمه خطيه كله كدمات واكف يتوسل وهيه اتكول جلب بس تغلط واتهدده بمؤتمن اتكله كال مترحين ويا اذا ميجيب امه تعتذر منج

وكفت يمه باوعلي كال اشبي وجهج

--كتلني مؤتمن

--عليش طگج

--مرتك حالته عليه موتني لان يعرف ماوراي احد لويعرف اكواحد ياخذ ثاري جان ماسواها ومد ايده

--روحي لبسي وتعالي ويا وبتهم خليها يمهم والزلمه يوصل بيتي وياخذج

ام مؤتمن. وروح ابوي مؤتمن يچسر رجليها بس تطلع

--لااحمد والله جذب اتخاف يذل بتها ويردها لخاطر ارجعله

--روحي خويه بي حظ يجي يكسر رجلج يلا فضيني

احمد سواها اعناد بمؤتمن اتكول اجته من الله راد يحاربه بيه واني هم لعبانه روحي منهم ماصدكت يكلي يلا

ركضت للغرفه لبست جبه اشلون مجان والغراض عمتي جانت جايبتهم بالجنطه بعدني مامفرغتها سحلتها وطلعت شافني اجه شالها وطلعنه

اشكد صاحت شعشبونه ورانا سحكناهه

صعدت السياره على السريع واباوع للطريق اخاف مؤتمن يجي ويرجعني ماعونت احمد يحرك متت خوف وقلق علما وصلنه اوف واخيرآ

نزلت اتكول هم وخلصت منه دخلت للبيت اتلكتني خالتي واكفه تغسل بالطارمه باستني ورحبت بيه جانت اتباوع ابوجهي بااسف عرفتها شافت الضربات بس ماكالت

احمد. يلا عندي شغل معتازين شي

خاله. لايمه سلامتك روح امودع الله

دخلنه اني وخالتي للغرفه شفت سمر متلفلفه راد اتكعدها خاله كلتلها لاخطيه عوفيها

--يايمه اتكيف غير اخيتهه جايه

--عوفج منها كليلي لويش احمد ضرب رجاء

--اوووف يمه والله من البدايه ماردتها بس احمد الله يهدي اتسودن لوهيه لولا

--اكيد مشرباته لمن مثول اي وعلى شنو انضربت

--سولفت عليج اشلون خلت مؤتمن يطكج احتركت روحي كمت احجي عليها لان اعرفنها باطله هيه هم الله يسلمها بلشت بلسانها الينكط عسل تالي احمد كام اخذله كم راجدي على دفره كوه خلصتها من ايده

--عمه عرمه هاي مستسبعه بااخوها

--اووف يمه ولج والله لوتشوفين شتسوي بسمر خالتها خدامه جوه رجليها ومحد يكدر يردها وحتى طگ اطكهه

على صوتنه كعدت سمر بس موذيج سمر لاصايره سوده ورفيعه حيل وجوه اعيونها اسود يخوف اول شي صفنت ماحجت شكيت بيها شي

كمت بستها باوعتلي وضحكت يمكم رجعتلها ذاكرتها

خالتي جانت اتباوعلها ومكسوره عليها كعدت يمها كلتلها اشلونج سمور ماردت بس تبتسم خفت من تصرفها باوعت الخالتي كالت ييمه هذه حالها منعرف اشبيها

--خاله تره من اجيتكم ذيج المره عرفتها متغيره بيها شي لان صايره حبابه وسمر بطبيعتها مفترسه

--والله يخاله لانعرف شنهو علتها ولادواها بس كاتلها الخوف واكثر وقتها تكضي بالشغل

--عزاا خاله اخاف رجاء امسويتلها شي

--لاييمه شتسوي البت فوك بغرفتها متنزل حتى الاكل اني اصعده الها

--وانتو لويش هيج خايفين منها متسحليها وتخليها تنزل تشتغل حالها حالجن

--يبوو شيخلصنه من اخوها هاي عزيزته خليها يمه هو اكلها وانصعده منريد انشوف وجها

--والله مااعرف شكلج بس سمر موطبيعيه تره اني مريت بهاي الحاله اجيتهم كولشي مابيه واتمرضت وهم محد عرف شنو بيه صح عندي تعب بالقلب بس ولادي يعني عادي ماامأثر عليه بس كمت اختنك وصلت للموت عدهم تالي عمه اخذتني يمها كامت اتشربني مي قران وحتى اتخليني اسبح بي صرت زينه لويش متسويلها

--اسويلها سهله بس شنو هذه مي قران

--مااعرف بس اشوف عمه تاخذ مي واتزوره الامام وتجيبه تقره على ابطال السحر وسوره البقره واتخليني 3 ايام اشرب منه واسبح بي

--يمه اسويها ميخالف وترد العافيتها

سمر بس تتسنط مترد صافنه وين سمر العنفوانيه التتعارك خطيه اشصاير بيها

الجو حار عدهم مومثل بيت جدو ذاك تبريد مركز همه حالتهم على كدهم احس نفسي دبكت اريد اكلها اكوم للحمام واستحي ضليت اشويه كاعده بعد مااتحملت احس نار تطلع مني اخر شي كلتلها خاله اريد اسبح

--اي بعد خالتج كومي هذا الحمام

-- يصير ابكيفي البس لو هم حرام لان الجو حار يمكم

--لايخاله على راحتج ماعدنه بس اخيج وهذا حلال وميجي بس بليل بالشغل

--يعني ميحجي اذا لبس خفيف

--لايمه غير اخيته بس هم موكلش لازم تحترمي لبسي محتشم موش تتصلخين مثل اسويلفات امج

---هههههه عفيه ماما ماخاله ذكره حلوه وراها

--والله بس هيه دواهم لبيت جدج خلتهم على تك رجل واكفين يلا يمه كومي سبحي السوالف متخلص

--

فتحت الجنطه اخذت فانيله بلا ردن خفيفه وبجامه وخاولي اني رحت للحمام وخاله للمطبخ اتحضر العشه

موت عدهم احمر مو حر تسمط حتى المي يجي موبارد بي دفو بس اهون من بره اقلها تكعد جوه الدوش وخالتي هم فتحت الماطور اجه مي بارد ردت روحي ضليت ساعه بالحمام لمن ارتاحيت دكت الباب خاله كالت غزل يمه بيج شي

--لاخاله هياتني بس حاره بره خليني اهنا

--ياولج يمه طلعي كدام التبريد كعدي خومواتضلين بالحمام

--هسه حطلع يلا بس البس

لبست وطلعت ميهوني اطلع لان حدبك مره ثانيه شعري مانشفته اريد بروده اشويه

خره بيك جدو بيتك بارد مابي ميزه حلوه غير هذا الشي

طلعت اتمددت كدام التبريد اريد اشبع بروده ماشايفه هيج حر بحياتي يمكت درجه الحراره 300 عدهم جهنم ابرد منهم شلت رجليه على الميز واني نايمه اجت سمر تسحل ابروحها كعدت يمي هاولج سمور موطبعج هذا لعد اجيت اتفارس وياج

--اشلونج اهناك وياهم مؤتمن اشلون يعاملج

--لويش ماواضحات الضربات شوفي وجهي وانتي اتعرفين اشلون يعاملني

--بعده يطكج اكيد رجاء الي اتخلي يكتلج

--عفيه والله هيه الخلته يكتلني امم عوفج انتي اشلونج لويش هيج حالتج

--مابيه شي بس تعبانه من الشغل

--اشو دوم بالبيت لويش مطلعين اشومحبوسه شنو احمد ميرضه لو انتي معقده

--لاوالله ماله شغل احمد اني مابيه حيل اتحرك

دنحجي ودخل احمد بس دشداشته مشكوكه

ووجها امورم ويمكن عينه وحده منهن طافيه

شافته خالتي كامت تلطم على وجها كمناله انريد انشوف ليش هيج حالته ماحجه عافنه راح للحمام وكال لخالتي جيبي ملابس

رجعنه كعدنه امتاني يخلص بلكي يفهمنه سمر لمت روحها وكعدت على جها وحدها تتصفن هاي الابنيه شغلت بالي مااعرف اشبيها خوفتني عليها سبحان الله اشكد علاقتنه معقده بس غصبا عنك الدم يحن من اتشوف واحد من اخوتك متاذي وحدك تتاذه ويا لاارادي

طلع احمد اجه كعد كال غزل رجعه لمؤتمن بعد ماكو

--لاماراح ارجع امن هو ماعونت اخلص

خالتي.- عليش يمه اشصاير

احمد. -ماكو شي رحتله للشغل كلتله اختك يمك واختي اخذتها يمي خلي نخلص من المشاكل كلمن اهله يمه واذا اتريد اطلكها مثل ماطلكت غزل هم ماعندي مانع كول التريده واني جاهز

خالتي-. اي يمه وشكال

--انكلب علي ثور كال غزل ارجع الكاها بالبيت لاامحيك من الكاع

-- عززا وبعدين شنو الصار كتلك مو اعرفه حيوان

--خلي يولي عوفي المهم مترجعيله هاي اكبر اهانه بحقه خلي هيج مذلول

--اكولك لويش متتزوج وتعوف هاي البريعصي الدوم تتعيقل وهيه متسوه شوز

--شنهو شوز ولج

--عوفك من الشوز وكلي شنو رايك تتزوج وتكسر خشمها

--منيلي افلوس اشخلت على حالي وهذت جدج دينار مينطي

--اني انطيك اشكد متريد بس شرط كون تاخذ وحده حلوه وصغيره

--منيلج انتي افلوس

--عندي تره نسبه جبيره من مصنع مؤتمن بسمي من غير الكاع والبستان ذني كولهن بابا امسجلهن بسمي

--منيلج هذا الحجي عليش يابه بس بسمج مواحنه هم جهاله لو شنو وبعدين الكاع والبستان ملات جدي اشلون كدر يسجلهن بسمج اكيد جدي مينطيج شي منهن

--موابكيفه ذني ملاتي ولااتكول اشلون لان مااعرف بالصدفه عرفت حالي حالك وهنه اصلا كدامكم شنو تردن اتنازل عنه اخذو ميهمني اصلامااريدهن

بس هسه عوفك من هذا كوله انته تكدر اتصير الوكيل عني ونسحب افلوس من الحساب لوانبيع وحده من ذني وتزوج وهم من هذا كله سوي تبريد مركزي فدوه راح اموت وتالي الورث يروح لماما وانتو متستفادون

--سهلا انتي مولينه وحنه بالخدمه بس والله امج طلعت نغله مكوشه على كلشي

--والله متدري ماما ولحد الان ماكلتلها واصلا ماناويه اكول هو اصلا حذروني اكولك خافو اتصير مشكله

--شنهو الجان ابراسك يمعتصم سويت كل هذا وانتحرت شنو الصار اووف لو بس اعرف مؤتمن شضام

--هسه شنو حتتزوج لولا من الاخير تره مااطلع افلوس

--اتزوج عليش لا واذا اتريد ترجع غرفتها فوك هلابيها اتضل ام ابني شنو حلال عليهم وحرام على غيرهم اتريد تطلك ماعندي مانع بعد العملته اني هم مااريدها

--عفيه هسه انته اخوي خاله انتي تدوريه مره بسرعه

--يااا والله ولاالي شغل شيخلصنه من مؤتمن غير يسود عيشتنه

--انتو لويش هيج خايفين منه تره هذا بوخه بس صوت

--امبين من وجهج انتي واخوج شوفو حبيبه هيه نفس اخبالكم اني لاتدخلوني

--لعد احمد خبر حبيبه

--خليها باجر هسه تعبان اريد انام انتو كملتو عشاكم لولا تره كاتلني الجوع

كامت خاله اتسوي واني ضليت احوص بكل احوال اريد شي يبرد كلبي بمؤتمن واخته وماكوشي يطيح حضهم غيز الزواج الثاني ياربي كون اتصير واخذ ثاري بيهم رحت كعدت اتوسل بي يتصل بحبيبه ساعه اتوسل ياله قبل عاد اتصل كالها تعالي عندي شغله وياج

هاي الهوسه كلها صارت وسمر على كعدتها ماشاركت ولاحجت شي

صبت خالتي العشه كمت حضرته وياها لان سمر مامنها لاكومه ولاكعده جامده مكانها تصفن

خلينه الاكل دناكل دخلت حبيبه سلمت وكعدت ويانه للعشه همزين كاظم وصلها وراح لبيت جدو

فاتحناها بالموضوع اول شي صفنت كالت ومؤتمن وجدي راح يزعلون وانته منيلك افلوس اشو حتى سيارتك امطعطعه

--اني حنطي مني وجدو مؤتمن خلي يطيرون شنو ابكيفهم خومو انخلي اخونه هيج باقي برحمه هاي السلبوح

--غزيلان هاي فكرتج ميلام مؤتمن من يكول بعدوها عن مصطفى صدك صرتي نسخته

--لعد ابكيفج شوفي وجهه اذا يعجبج هيج امج تخدم واخوج شابع كتل شنو والله الاميره ضاجت

--والله تجين للحق هيه تستاهل بس موبهاي الطريقه زين منين انجيبله مره

--لعد احنه موخواته غير انروح نخطب وكون هيج حلوه كون ادقها اريدها اتموت وشنو تطلب انجيب كون عرس رنان بلكي تنجلط هيه واخوها الله واخيرا راح يصير عدنه عرس

--والله يغزل اذا ضلينه وره افكارج راح نرجع ورا

اتوسنله اتبات يمنه وهيه هم خايفه جانت على سمر جهالها اول مااجه كاظم انطاهم احمد اله كله اليوم اهنا ملمومات يردن يلغن ابراحتهم خطيه هو مااعترض اخذ جهاله وراح هاي لو مؤتمن جان سحلني من شعري ورا

كعدنه بليل انسولف اشكد ردنه سمر اتسولف ويانه ماكو بس تصفن حبيبه اتكول هاي امشربه لمن طالع من اذانها لازم انشوف علويه انوديها قبل لاتسودن

ضلت تقره قران يمها هيه نايمه وتنزنز اعوذو بالله منهن شنو من بشر اشكد يحبن ايأذن العالم

ضلينه للصبح انسولف اشكد نصحتني ارجع لمؤتمن اتكول لاتثقين بااحمد صح هو اخوي بس انتي هم اختي ومتعرفين عن حياتنه شي ديري بالج تتنازلين عن شي اله

ساعدي ميخالف واني اخطبله بيدي لان تستاهل رجاء عبنها موش ادميه بس لااتسويله وكاله ترا امره موبيده امره بيد رجاء

--لعد اشلون انزوجه اذا امره بيدها

--لااذا زواج انتي متعرفين زلمنه يموتون على تعدد الزوجات لواطيح بديهم يربعوهن بس الفلوس تكمشهم

--ؤك احنه مالنه دخل بس ننطي افلوس ونزوجه بعد هو يدبر روحه وياها اهم شي خلي اتحس بالحسيته

--خيه تره مؤتمن مومثل احمد ذاك احجايته وحده ومحد يكدر يمشي كلمته علي بس احمد كلمه تاخذه وكلمه اتجيبه

--لويش موامه كالتله اتزوج تهاني راح جابها

--مم اغزيلان سكتي كلنه نعرف هون عنها وبعدين اتزوجها راد يكسر خشمج بيها ترا موبحالها ولحد هسه خايفات اترجعيله وتطلكيها

--اكولج عوفج من ذني خاي نطلع والله ضايجه

--خليها لبالجر العصر ناخذ سمر للعلويه وبليل انروح للشط اهناك ونسه ويلانامي لان طفيت

خليت راسي على المخده وضحكت اندارت باوعتلي كالت هاغزل اتخبلتي خيه

--هئ ولج جنت اتمنه يصير عندي اخت مجنت ادري عندي اهل وماما كبرت عايشه دوم بوحده اتمنه احد اشاركه اسراري فجأه طلع عندي كومه اخوه

--لااحنه ندري عدنه اخت من ابوي بس جنه كارهيج قبل لانشوفج لبالنه مثل امج خبيثه عذريني خيه بس امج صدك خبيثه

---ههه لاعادي ابراحتج اعرف بيت جدو كلهم يكرهوها بس والله من عشت وياهم عذرتها يستاهلون السوته بيهم

--يلا المهم رجعتيلنه وطلعتي طيبه مومثل مامتوقعيج بس غزل حلوه الحياه اهناك مو

--هيه حلوه وموحلوه. الحلو الحريه اهناك بس كئابه اتحس جمود ماكو اهل ولااصدقاء كولش قليل

--اتمنه اسافر واشوف الدنيا

--ولويش متسافرون شنو المانعكم

--خيه ينرادلها افلوس احنه مؤتمن يقطر علينه تقطير بالراتب ولااتكولين اني اطيكم تره هيج حجيت اريد افضفض

--هههه والله افلوس وباقيات بخت جدج لويش متاخذوهن اقلها استفادو منهن

--انتي كل عقلج اتحصلين منهن دينار ذني ولج من راد يزوجج اول شي قبل العقد حضروعقود يخيلج اتوقعين على تنازل ووكاله والله بطرانه وفقيره تره هذا جدي ماتعرفينه صح يحبج ويميزج علينه لان انتي عزيزته من جنتي ازغيره بس يحب الفلوس اكثر منج

--والله يحلم بالدينار خلي يصير عمري 18 اسحب كلشي ومااخلي شي مااسوي اول شي ابني هذا البيت اخلي يخبل احلى من بيته واشتري سياره لاحمد ونتي شنو تردين كولي

--اني اريدج اتعقلين وترجعين لرجلج لان مؤتمن خوش زلمه ويحبج حرامات اتضيعي من ايدج ويلا اتكدرين اتكدرين اتكملين العملته امج يلا نامي ولاتحجين هذا الشي كدام احد

للصبح راحت حبيبي كالت امر عليكم العصر انروح للعلويه ناخذ سمر

واني وخاله كمشنه البيت تنضيف

الحمد الله البس ابراحتي ماكو ممنوع احمد يطلع ويه جدي من الصبح وميرجع غير الغروب وماعدنه احد اخذت راحتي من صدك ماكو تقييد بس الحر يصهر كملت تنضيف الجوه

اجيت ارتب ملابسي بكنتور سمر اخذت باب فتحته اشتميت رحه موطيبه كلت يجوز لان محد فاتحه من زمان ارتب والريحه تقوه على اثر الريحه فتحت كنتور سمر اهدومها امسفطه عدل وامرتب لعد منين جايه هيج ريحه كلبت ملابسها هم مالكيت

رجعتهن ماكانهن رتبتهن بس تكتل متنطاق

الكنتور بي مجرات فتحت المجر بس ملابس شتويه بس حركتهن اكو شي خنكني بي سديت خشمي وسحبتهن طلعت وصله بيضه ملفوفه بس اكو شي ابداخله مثل الفطيسه

شمرتها وركضت صحت لخالتي اجت شافتها كالت يمه ولج منين هاي

---خاله هسه طلعتها منا ريحتها تكتل

--ولج اول البارحه نضفت ماشفت شي منين اجت

--تلكين البارحه خالتها رجاء لان امبينه جديده

--بعدي خلي اخليها بعلاكه وقره ايات وانتي ركضي غسلي واتوضي منعرف شنو هذا ناخذه للعلويه وانشوف

رحت داتطلع اشوف سمر تتلوه اجيت يمها فتحت اعيونها وصاحت بس صوتها رعبني ابسرعه كمت متت خوف منها

عفت يمها امها ورحت للحمام شهالعائله الغريبه

كل بيت مصايبه شكل غسلت على السريع واتوضيت طلعت اسمع الباب تندك شعري بعدني حتى مامنشفته ينكط مي رحت فتحت الباب صار ابوجهي مؤتمن

وكفت متصنمه خفت انسحل بس جان شكله هادئ امبين

كال سويةمجال اريد ادخل

--ماكو احد ادخل سمر بالغرفه

--غزل شنو هذا البس مقتنعه بي ولاتوكفين هيج يم الباب غلقي

سديته ووكف ساكته مارديت

--موجاي احجي وياج

--ماكو اهنا بس احمد

--وشنو احمد مطي موزلمه انتي اشوكت تكومين تفتهمين

--تره احمد اخوي يعني موحرام انتضر اهنا هسه اصيحلك خالتي

--اكوفي ماجاي على خالتج هاج ذني

انطاني الفون جديد وانطاني ضرف بي افلوس كال اشكد تردين بعد كولي اجيبلج

--مااريد اني اسحب اذا اعتازيت

--متسحبين شي ولاتلعبين لعب جهال كلتلج اشكد تردين اني انطيج

مارديت ضليت واكفه مااعرف شنو احجي اخف افلتلي شي واتطير ملامج وهي ابسببه لمن سمعته اتحسر شلت راسي شفته يباوعلي كال شنو التريدنه اسوي وترجعيلي

--مااريد كلشي اريد اضل يم اخوي هيج مرتاحه

--بس اني مامرتاح ومااكدر انام

--لعد اشلون جنت اتام من سافرت نفس الطريقه اتبعها

--غزل وحك داحي باب خيبر اعز من روحي انتي اشوكت تحسين ولج راح اموت بدونج كالها واجه يمي حصرني يم الحايط صار قريب كمش اخدودي بيده ورفع راسي كال حسي يبوي حسي موكالبي مانبظ بس الج عليش هيج نافرتني غزل رجعيلي وحق المعصومين انطيج حتى روحي وادوس على اكبرواحد بس يوصل صوبج

--مؤتمن كرهت العيشه وياك اني ماشفت شي يخليني افكر ارجعلك

--مااكدر بدونج وحق الكفل زينب ليلي ماانامه ونتي مو يمي لاتكولين ماارجع كولي سويلي هيج وارجعلك لخاطر محمد لاتسديها بوجهي

--مااراح اتسوي الايريده مؤتمن اعرفك راح ترجع تحبسني وتكتلني على اقل شي ونفس الشي حتعيده وياي اني ماعونت اتركك شنو اتخبلت ارجعلك

اخذ نفس و كال امج ترجع و ترجعين للمدرسه وبعد شنو التردي

--اطلك تهاني

--تهاني حامل ميصير بس خليها مااوصل صوبها اعتبريها مويمج

--لاقبل كلتها ورجعت بحجايتج وحتى عفتني علمودها اتريد اثق بيك بعد اشلون

--ماكلت كلمه ورجعت بيها وماعفتج انتي الطلبتي وانطيج كلمه واذا رجعت بيها موش زلمه سوي التردي

--وين اترجعني مؤتمن انته حتى غرفتي اخذتها لبتك

--انعل ابوبتي احسن غرفه تجيج

--ماارجع مؤتمن اذا تهاني على ذمتك اني هيج اعتبرني نحسه مااحب احد يشاركني بحاجتي وبعدين اني من حقي ماناقصني شي حتى اخذ واحد عنده نسوان غيره اريد واحد يحبني بس الي وماعنده غيري

--بوبه مااختلفنه وتدرين مواحبج اعشكج وحك علي بس تهاني حامل ميصير الطلاق يكون باطل

--لاتكول باطل كول مااكدر بدونها اكولك اي خلص مؤتمن لاتحجي وبعدين انته دومك امعصب وتضربني تره موحيوانه اني كل اليكلك كلمه تجي تكتلني شحاسب روحك استوني كملت الكلمه وماحسيت غير سحبني من شعري وجرني لمن انطكيت ابصدره ابسرعه ضميت وجهي بديه احمي

اسمعه يحجي من بين اسنونه لان اخاف اباوع بوجها كال صوتج متعلي وايدي ماامدها عليج واطكج لوماتسويلج مصيبه اكبر من راسج مالها حل غير الطگ لان متنعدلين بغير طريقه اواذا اريد اردج غصبا عنج اردج بس لبالي ادميه واجت احجي وياج مثل البشر غزل انعدلي بويه

--ماارجعلك لويصبوك ذهب ماطول تهاني على ذمتك وحتلو طلكتها هم ماارجعلك دااكلك كارهه العيشه وياك اشبيك متحس وها اول واحد يخطبني راح اقبل بس لخاطر اخلص منك لان انته هاي الله خالق هيج دزاينك مراح تتغير

--سهلا بويه سهلا خليج يم اخوج بس الزلمه اليوصل صوبج ويطلبج حرام بالحرمه اترس حلكه بارود وانتي ادفنج مكانج

راد يطلع بس رجع جرني من شعري كال هاي ملابسج اذا شفتج مره ثانيه احركج اسمعتي دفعني وطلع

خبل والله خبل موطبيعي هذا شنو بالله عود جاي يكول مشتاكلج هذا فاهم طرقه الحب بالمگلوب استغفر الله

رجعت دخلت لكيت عمه كاعده وخاله سمر يمها

-- غزل يمه خابرت حبيبه راح تجي تاخذ سمر للعلويه هسه اشلون تجين ويانه لو تبقين

--لاخاله عفيه اخاف وحدي اجي وياكم

--چا يلا يخاله لبسي بين متجي

رحت لبست على السريع ولفيت شعري حتى بلا تمشيط دااخرب كل تعب عمه خطيه اشلون جانت معتنيه بي دمرته هسه

اجت حبيبه اخذناها تسحل ابروحها وصلنه كاظم للعلويه نزلن داانزل كال خويه غزل ليش متلبسين عبايه

--والله مدااعرف بس حتعلم ميخالف

--ان شاء الله بس خليج اهنا بالسياره اجيبلج اجواريب لان الله يسلمج بدون جواريب طالع

اشكد فشله نزل الولد يجيبلي من الاسواق اباوع صدك طالعه بنعال ابو الاصبع وانوب امصبغه اضافيري وين مؤتمن جان شد شعري وره السياره وفتر بيها

جاب الجواريب لبستهن وهو مادخل السياره نزلت كلتله لبستهن وفرحانه عالاساس امسويه انجاز

باوعلي ضحك هز ايده ودنك كال تعالي اوصلج للبيت

رحت ورا دك باب العلويه طلعتله حبيبه لان دخلو قبلنه دخلت وياها البيت جان نضيف حلو بس اصغير كولش بي حنه املوخ وبي طلي مربوط هم املوخ حنه دخلنه غرفه شفنه مريه جبيره تقره على سمر وسمر تبجي وترجف رحت كعدت يم خالتي خالتي خلتني وراها همست على كيفها يمي لاتباوعين ديري وجهج

اشوي وسمر كامت اتصرخ وركضت حبيبه كمشتها خفت كمشت عبايه خالتي كالت يمه اسم الله عليج ديري وجهج لاباوعين

اشويه وهدأت بس طاحت مابيها روح بعد كامت امها غسلت وجها والعلويه شدتلها خيط كلتها گبل للامام تاخذوهه لبوفضل العباس

باوعتلي ابتسمت كالتها هاي منيلج ام احمد

--خيه هاي بتي الزغيره

--اول مره اشوفها بس حليوه متشبه خواتها متزوجه

-- طلعت على ابوها اي خيه ماخذه مؤتمن

--الله يخليها يستاهلها مؤتمن خوش زلمه

عافتني وضلت تحجي ويه خاله امبين طالبه اهواي افلوس وماعدهن لان اشوفهن احتارن كالتهن بعد يمجن لان هذا عمل اسود لااسهر للصبح علي

همزين جايبه الفلوس اللي انطاهن مؤتمن الي

طلعتهن انطيتهن لخالتي بالبدايه مارضت بس همستلها عيب المره دتباوع اخذت منهن وانطت للمره اخذنه سمر وطلعنه رجعنه للبيت اتحسن سمر اشويه كالت باجر ناخذ سياره ونروح كلنه

حبيبه اليوم هم ضلت يمنه انطيت افلوس الخاله طلعت جابت حبشكلات وطلبنه عشه من بره سوينه اجواء

اندكت الباب كام احمد فتحها واسمع صوت

مصطفى يابه يااهل الدارررر تستقبلون خطار لو نرجع

ضحك احمد وكله حي الله بيتك يخوي ادخل

دخل سلم على خالتي كعدنه اجه ورا كاظم وهذا لازم اتحجب ميرضه يدخل اذا مالابسه شال

كعدنه اتعشينه وراها سوت خالتي جاي وانوب كهوه سهره جانت حلوه شبعه ضحك على تصنيف

ماخله احد ماصنف علي اخر شي سمر كال بس اريد افتهم الجني ابن المطي اشاف منج واتلبسج ولج اخاف العكس يمعوده خاله ابربج طلعت بتج من الجني لو العكس

--يااا يخاله جااشبيها ابنيتي جنها كمر

--ياكمر لخاطر ربج احمد وشايل اشواربه

هو يصنف وسمر الخبله تضحك ولااتكول يحجي عليها هاي لواني جان هسه اكمز من القهر

خالتي. باجر انروح لكربله شوف جدتك تجي ويانه لان راح اتسويها مصيبه

--لامترهم عمه لازم الكل يروح اذا ازياره وانتى احمد ماتجي تاخذ مرتك

--خليها خويه عدكم لمن تشبع

--لاتصير ازمال مؤتمن محتار بمصيبته وهيه اتريد بس ترجع تعال اخذها ولاخرب علاقتك السبب النسوان

--خير شنو صاير عد مؤتمن

--هالمره ويه شيخ علوان ومحتار اشلون يفضها وحك علي اتورط ورطه مااعرف اشلون راح يطلع منها هسه على كلا باجر انروح ان شالله للزياره اترخص من جدي ورجع مرتك تراها موحلوه اذا طولت مو شتكولين غزل

جان يحجي ورافع احواجبه يقصدني بالحجي

سكتت مارديت

اتفقو يرحون وضلو يقنعون بااحمد يرجع مرته وهو وكاظم

حبيبه. حتى لو رجعت اعرس اخوي اله اكسر عينها بسيطه

احمد. اعرس يخوي عليش لا وين محصل مره ثانيه بس اتزوج بسكوت واجيبها للبيت واكسر راسها لبالها اردها وانسه السوته بيه

---اني امولكم افلوس اشكد متردون

بليل خاله راسي بحضن خالتي ومتمدده وخالتي تضفر بنهايه الكصيبه ويمي سمر كاعده

بت حبيبه اتصبغ بضافيري مكيفه لان اطوال فرحانه اتصبغ وتمسح تلعب حبيبه خله راسها على بطني كالت ماطول اخذتي حضن امنه لاتحجين بعد

انسولف واتصلت ماما هيه لحد الان متدري وين لوشنو دااسوي مااحجيلها مشاكلي لان خطيه كلبها يضل يمي هيه متعرف بشنو امر وميته قهر اذا عرفت الله اعلم شيصير بيها

رديت عليها فتحت كام واحجي نسيت اني وين نايمه راح عن بالي هاي اشريجتها شفتها صفنت لمن خالتي كالتلها اشلون فريال والله زمان هاي شنو متغيره

--ماكو واحد يضل على شكله الزمن اخذ مني مااخذ اخر شي ختمها ابتي

--بتج يمي لاتخافين خيه حالها حال ابنياتي ماافرق بينهن هاي ابنيتي الزغيره بت معتصم وعزيزته كالتها وباستني من راسي

شفت ماما استحت ماباوعت بس بجت كسرت خاطري ردتها اتبطل بجي وجهت الكامره على حبيبه كلتلها ماما شوفي اشلون مستغلاتني امسوياتني مخده ترضين باوعت وضحكت سلمت على حبيبه

ردت حبيبه خاله بطنها اتسوي واحس لحم ابيض اطبطب

ضليته انسولف شفتها امنت من لكت علاقتي هيج بينهم اشوف كل اشويه اتريد تسالني عن احمد وتستحي من امه جانت خايفه بس منه اني هم ماخليتها ابنفسه حاليا احمد ميكدر يردلي كلمه لان البنك بالنسبه الي صحتله حموددد تعال سلم على ماما

ماما ضلت قلقه من جوابه بس فاجئها من اجه يضحك دنك سلم عليها وعفس وجهي بيده وراح خطيه اخذت نفس ورتاحت

من اشوف ماما مرتاحه اني ارتاح لان كل حلمها جانت راحتي سولفنه وضحكنه حتى سمر شاركت ويا تضحك بقن يتذكرن هيه وخالتي الخباثه القديمه بصبوحه شنو جانت اتسوي ويضحكن

طفر ابن حبيبه كالها خاله بتج هم سوت خباثه هيه وعمو مصطفى خلوني ابول وشربو بيبي ام مؤتمن

شمرت الفون وصميت حلكه اسمع ضحكت ماما شلعت سماعت الفون وخالتي وحبيبه يباوعلي صفح عضيت شفتي اتفشلت بعدين ضحكن سلمت على ماما وسديت الفون لان اتاخر الوقت ورانا طلعه رحنه انام

اتمددت بس النومه ماجايني

ايدي اخذتني لصفحه مؤتمن لاارادي بحثتها طلعتها

اكلب ابصوره الناشرهن والاشعار الكاتبها اقره كلها اعتاب وحب وندم اقره وكلبي يدك

معقوله انضلمنه اثنينه ابسبب العادات مااعرفنه اشلون انحب وانحافظ على حبنه

اكثر صوره بالبس العربي واباوع لضحكته وكلبي ينبض اشكد مشتاقتلها ومشتاقه لحضنك وبنفس الوكت كارهه قربي منه ماعرف شديصير وياي ابتعد احن ارجع اكرهك

بالغلط انطيت لايك اريد اشيله بعد مااعرف انسبيت شلته ابسرعه وكلبي يدك اتكول شو شنو سويت مولايك

اجاني مسج فتحته كاتب اذا هيج هامتج الصوره مترحمين ابحال صاحبها وترجعين

ضحكت داارد

واتصلت سماح طلعت من المحادثه ورديت عليها اول مافتحت الفون

سمعتها تبجي كالت غزل لحكي مؤتمن راح يتزوج

بت شيخ علوان---

الرابع والعشرين من هنا

تعديل المقال