رواية الهجرس الفصل الحادي والعشرين 21 بقلم رواء هادي
بعدنه بره وصوت سيارات الشرطة اجت شلت التلفون واتصلت بواحد من ربعي
اليوم خفارة عنده
_الوو هلاو ابراهيم شلونك
_الحمدالله وأنت
_على الله خير ان شاءالله سيارات الشرطة طلعت ؟
_والله واحد بلغ وگال تفجرت ابيوت بالمنطقة
_هاا ابيوت منو ؟
_ماعرف بس قريبة عليكم لمسافة ربع ساعة
_عود طمني مو تنسى
_ان شاءالله
فصلت الخط بارق وعمي ايهم طكوها بضحكة "
ههههههه
ايهم _هههه الحلو يستفسر عن الموضوع
بارق _تنطبق عليه عبارة يقتل القتيل
ويمشي بجنازته ههه
هجرس_امم
بارق_ سبحان الله هي من تلتم
تلتم كلها بيوم واحد
ايهم _اي والله مناه جدوع انجلط منا
هجرس جان انقتل ونكشفت
حقيقة امه
رن تلفون عمي ايهم شاله وگال "
الوو هلا وفاة ... ليش شكو صاير عدهم .. والله قلبي نبزني وعرفت راح يصير شي هسه جااايين
فصلت الخط "
عمك جدوع متعارك هو ولده وكاتلين رجل حنين وحنين ويردون يذبحوها امشي بارق صيح
لجدك وعمك بسرعة
طفر بارق بسرعة للبيت وانه طاير من الفرحة اليوم ضربت اكثر من عصفور بحجر واحد اليوم كلها انصادت وصار وقت تصفية الحسابات
_شمسووين ؟
_شمدريني شمسوين من مكسورة
اكون الله ماكاتلينهم
طلع جدي بطرك الدشداشة ابوي وراه ... كلها راحت انا بقيت واكف بالباب وانتظر مرت ساعة وساعة الثانية والثالثة وماكو طارش وصلني
منهم رفعت ايدي
باوعت للساعة صارت بال ١٢ ضبط
بزعت روحي وتصلت بارق يرن وماكو يرن وماكو اتصلت ثلاث مرات يلا رفع خط:
_وينك صارلي ساعة اتصل
_مليوصة الشغلة
_شكو ؟
_من صخام براسك حنونه جانت تخونك وي حبيبها احمد وهسه اهلها يردون يذبحونها هي زوجها وجدي دمه فاير طب عليها نهاها نهي من الكتل
_منو گاللهم هذا الكلام
_متعاركة هي وعدوية وكايله العدوية أنتِ كحبة وام الولد وام الشوارع رحتي خطبتي واحد كواد وكوتي ويا بالجامعة وهاي كومي كتليها وفضحي
كلشي وهسه صور ومقاطع طلعت
الها وي احمد بالجامعة
_وشحكم جدي ؟
_گال تبروا منها وخلوها تولي هي ورجلها ومالها خط رجعه لهناه بعد بس تجي تنكتل هدر دمها هي وزوجها ..أنت شلونك هسه
_زين
_نكسر كلبك بعد هذا الخبر
_ولامهتم
_شنو ؟
_مادام طلعت من ذمتي خلص لااعرفها ولاتعرفني وشسوي خل تسوي مالي شغل بيها
_جانت على ذمتك قبل وتخونك
_موشريفة وشسويلها انه احمد الله واشكره طلكتها وخلص منها شوكت ترجعون ؟
_بس يولون نجي
_اروح انام لعد
_شكد بارد ياربي
_گلتلك ماهتم لامرها انه اليوم فرحان
وماريد اخرب فرحتي
_فرحان لامك
_اي امي الأساس كله ومن غير امي انهديت وهسه راح ارجع اوكف من جديد بوجودها
_ان شاءالله يارب
سديت الخط وابتسمت براحة وأخيرا نفضحت وكسرت عين أهلها وتبروا منها خلها منو الها بعد البنية من غير اهلها تنذل والرجال مابي أمان
ساعة الساعة يكلب عليها .
بوجهي لغرفتي لفيت رأسي ونمت..... كعدت الصبح سوتلي ريوك هباوي مرت ابوي ماكو لاهي ولا بت اختها ختام ام عيون الصلفة ابوي
كاعد جدي وجداتي
تلاثتهم يجرون جكاير من وجه الصبح جدي راد يفتح الموضوع رفعت ايدي امنعه يحجي "
هجرس_ابوس ايدك لتجيب طاريها
جدي_براحتك
ابوي_خفارة عندك اليوم ؟
هجرس_اي خفارة
حلوة_لتخلوا يطلع الوحدة دز ويا ولد
عمامة يوصلوا للمركز
جدي_اي گتلهم ينتظروا بره
هجرس_ماكو داعي
جدي_اكو داعي بعد لشفته البارحة مامن عليك
تطلع الوحدك لراس الشارع
هجرس_ترى رجال موطفل
حلوة_لا تكسر كلام جدك
هجرس_براحتكم
رحت بوست جدي وجداتي وأبوي وطلعت شفت بارق مبدل بعده مارايح للدوام
وكفت بصفى "
_صباح الخير
_صباح النور شصار البارحة
_عد عيناك كاسرين رجلها وايدها ورجلها مطيحين حظه وحظ الخلفوه لكيناه فاقد الوعي لما
تدخلنه جان مكتلينهم اثنينهم
_اي وبعد
_بعد لا نعرفهم ولايعرفونه ونهدر دمهم
_هه
_عديم المشاعر والاحساس
_أحسن في امان الله
_الله وياك هجيرس ههههه
_شبيك ؟
_تخيل يفتحون ويا موضوع هدم البيوت وانت الهدمتهن شنو راح تكون رد فعلك
بهاي الحالة
_عادية
_طبعا عادية هو العاشر الجن مايكدر
يلعب على الانسان
_اي
والله مرت الأيام وعلاقتي بامي زينة وتعرفت على جهالها يصيحولي عمو گتلهم گولولي فرقد اخوي انه اخوكم مو عمكم وجديتي حلوة اجت شافتها
وعرضت بيتها للبيع گالت ابيعه واشتري بيت يم أختي اكعد بي ماريد أبعد بعد وانه بالي ارجعها لأبوي واهلها مالهم لاخبر ولاحس اختفوا عن الوجود
عافوا حالهم ومالهم وشردوا حتى عمامهم تبروا منهم ورجل امي نحكم بالعدام ولد خوالي هم نحكموا وحكمهم خفافي مو قوي جان المهم
تعلموا مايندكون بي
وحنين انكطعت رجلها واخبارها ارتاحيت كلش واهل سلي بعد شهرين يرجعون لديالى واهلي متحزمين لسلي حزام يردون يخطبونها لي وانه اضحك
وساكت كلمة وحدة ماحجي ولا اگول وختام تروح وترد وي اهلها كلما تبات عدنا انه اطفر بيت عمي ايهم عاد من شافتني مابقى بالبيت كامت
ماتبات بس تجي
ويا اهلها وترد .
وامي تطلقت واخذت حريتها .... وبعت بيتها وشتريتلها بيت بصف بيت أختها حايط على حايط واثثته الها وكعد وياها مهند ابن خالتي
لان مالها أحد
كاعد بالحديقة مخلي ايدي على خدي وافكر شلون اقنع ابوي واخلي يرجع يتزوج أمي وكفت كدامي مرته كعدت كبالي تماماً
_امك شلونها
_زينة
_جهالها شلونهم رتبت وضعها لا
_اي اليوم انتقلت بيتها وكعد وياها ابن خالتي مهند
_الحمدلله هواي صاير تروح وترد الها
_من ودي مارجع من عدها
_هواي مشتاقلها
_انحرمت منها ١١ سنة
_الله يعوضك
_آمين
_صدك سمعت ابوك يگول اهل سلي راح يرجعون
_اي هههه
_هههه واهلك يردون يخطبونها
_اهلي سالفة من سالفة والله البنية ماتقبل وهم لازكين بيها لو هي لو ماتزوج وتعال
جيب ليقنعهم
_الصراحة فرقد شبيها البنية ماتقبل بيها
شايف عليها شوفه لو بيها
عيب احجي الصدك ؟
_البنية خوش بنية وجنها ملاك لاعليها
لابالرايح ولابالجاي
_اي لعد ليش ماتقبل
_اخاف عليها مني
_هاي شنو تخاف عليها منك
_والله راح اذيها بس اتزوجها ودخلها بعالمي الكئيب
_قبل عالمك كئيب هسه الحمدلله والشكر حياتك حلوة ومستقرة ورجعت لامك واخذت بحقك وحتى مرتك السابقة طلعت كل عمايلها القذرة
وبينت انت المظلوم
وياها مو هي المظلومة وياك.
_ ماريد اذي سلي خطية
_فرقد احجي شبيك أنت
_ماناسبها يناسبها شخص محترم ويقدرها
ويحترمها ويحافظ عليها ويحبها
بارق_لعد انت شنو كاولي هههههه
هجرس_ولك منين طلعت
بارق_من تحت الأرض
هجرس_اي صاير جربوع تطلع من تحت الأرض
بارق_سلي سلي راح ترجع راح نعرس كللووووش
بعد ما تاثث البيت مالتنه بديالى قرر أخوي فاروق يروح يسكن قبلنا هناك اما أخواني الباقين راح يبقون بغداد مايرجعون لديالى لأن شغلهم
بغداد بس فاروق نقلوا بوساطة بالمركز يم هجرس هو شرطي المهم صادف يوم الخميس الظهر من رجعت من المعهد رحت وياهم حتى مابدلت .
بوجهي للسيارة كاعدة يم شباك السيارة وايدي على خدي واباوع من الجامة عالشوارع وافكر شراح يكون مصيري بعد ماراح ارجع لديالى
شلون راح تكون حياتي هناك ؟
راح اتعذب وي بيت جدو موسى وجديتي حلوة منورة هجرس واني ماخذه قرار نهائي مراح اقبل بي لو تنطبق السماء على الأرض لسواه بي موهين
أبد ويريدني زواج متعة مايريد زواج طبيعي.!!!؟
دخلنا المنطقة شميت ريحة طيبة ....تفتح النفس ريحة البساتين والخظار ترد الروح واني احب هيج أجواء من وصلنا كدام بيتنا قلبي انقبض قبض
شفت هجرس هو وبارق وعباس وجدو موسى واكفين بره من شافنه ابتسم وشعل جكارة بقيت بس ابلع بريجي وحيلي كله يرجف من الخوف .
امي_ سلي مو تخزيني ماتسلمين
سلي _ليش اخزيج
امي_عبالي يلا انزلي سلمي على
جدج وبوسي ايده وراسه
سلي _ماشي
وكف السيارة ابوي بعد مانزل اخوي فاروق ومرته وجهاله سلموا عليهم نزلنا خليت رجليه بالكاع
صاروا اخيوط مابي حيل امشي
من مكانه هجرس حجه "
هسه يلا نورت المنطقة بجيتكم
عمي ههههه
بارق_اي والله جانت ظلمة وهسه نورت
وراح تنور البيوت المعتمه
نبز هجرس بارق هو كتم ضحكته عرفت شنو المقصود المقصود اني من كلامهم المهم بدون كلام رحت سلمت على جدو موسى وبست ايده
وراسه وهو هم باسني وگال "
ربي يحفظج ابنيتي شو باوعيلي
خل اشوفج عدل
رفعت رأسي باوعتله رسمت إبتسامة خفيفيه ابتسم ورد گال "ماشاءالله عليج جنج كمر ويضوي
تعاي انطيني بوسة بعد جدج
بارق_ ههههه
باسني مرتين كدامهم ذبت من الخجل وهم يضحكون هجرس يشرب جكاير ويضحك ولاهامه شي سلمت عليهم سلام واحد " السلام عليكم
ردوا كلهم "وعليكم السلام
بارق_شلونج سلي اخبارج
سلي _على الله زينة انت شلونك
هباوي سيوفي شلونه
بارق_الحمدالله كلنا بخير مادامج بخير
سلي _دوم ان شاءالله مرخصتكم
هجرس_مرخوصه يابة
بلعت ريجي من رد عليًّ هو واضحك بوجهي اخذ نفس طويل من الجكارة وشمرها بعيد ونفخ الدخان وره ظهره عود مايريد الدخان يوصل
يم جدو موسى قليل أدب واحترام.
سحبت انظاري .... بسرعة من شافني اباوعله غمز عين ورفع تك حاجب بارق شافه وضحك من فشلتي عفتهم ومشيت سريع عدل للبيت اجوي امي
ومرت فاروق وراي ..
امي_على كيفج لا توكعين
سلي_ماوكع
امي_هسه توكعين
سلي_انتِ بس لا تنبهين بي اني اصير بخير والله
امي_شبيج تخبلتي
سلي_مابي شي تعبانة من الدوام لديالى شيبقى بي
مرت فاروق_ حقج والله هسه
تشوفين غرفتج وترتاحين
سلي _غرفتي القديمة نفسها مو ؟
مرت فاروق_اي نفسها
فتحت الباب امي دخلنا للبيت صلت على محمد وآل محمد ولبيت متغير هواي عن قبل وعبالك اول مرة ادخله مو لبيت الي نولدت بي وعشت كل
طفولتي جان كله أثاث جديد
وترميم عبالك بناء.... حديث موقديم بوجهي لغرفتي فتحت الباب شف بيها غرفة نوم تركية بيضة وبرده وردية وبنصها برده ثالثه بيضة
عجبتني كلش الغرفة ومرتبه
ارتب من غرفتي بغداد .
امي_عجبتج
سلي _اي كلش
مرت فاروق_على ذوقي اثثتها الج
سلي_عاشت ايدج حياتي
مرت فاروق_تدللين حبيبتي اهمشي عجبتج
سلي_كلش عجبتني بس ناقصها غراضي
مرت فاروق_هو فاروق راد يجيبلج جبيرة واني ماقبلت گلتله عدها مرسم كامل وين تودي جيبلها صغيره علمود تكفي الغرفة غراضها
سلي_اي والله خل افتح البرده
امي_ارتاحي احنه نروح نكمل شوف
سلي_خذوا راحتكم
فتحت الباردة فاتت بعيني أشعة الشمس رفعت ايدي وخليتها فوك عيني احجب أشعة الشمس رحت من الجهة الثانية أشوف أشجار برتقال وشجرة ياس
ونخل كلش مرتبه الحديقة ورة البيت وكدام البيت هم بعد أحلى معتني بيها فاروق كلش ومرتب كلشي رجعت سديت البردة وكعدت فوك الجرباية
نزعت حذائي شميت ..... بيهم ريحة كريهة من الصبح مانازعه الحذاء والجو حار كلش عاد نزعت الجواريب خليتهم بطن الحذاء وشلته بايدي
وطلعت عفته بالطرمة وابوي ... واخوي والجهال بعدهم بره فزيت من سمعت صوت ضحك هجرس ومن گال "غير اشكه بالنص بس يندك بي هههههه
بارق_ تسويها والله
ماعرف عليمن يحجون دخلت جوه بوجهي للحمام جان الحمام مقسوم قسمين قسم للغسالة
وقسم للسبح مرتب كلش
المهم غسلت رجليه اجت بالي اسبح كتلني الحر كتل والماي يشهي واحد يسبح بي عاد طلعت
لأمي لكيتها بالمطبخ
سلي _ملابسي وين يمة
امي_بالسيارة
سلي_اووف اريد اسبح هسه شلون ؟
امي_روحي جيبيهم
سلي _السيارة بره وكلها واكفه يمهم
مرت فاروق_هو منو غريب بيهم
روحي جيبي الأغراض
امي_ماترحين شبيج واكفه وتباوعين ؟
سلي_روحي انتِ جيبيهن
امي_امشي تريدني اني اجيبهن
بي حيل اشيل جنط
سلي_لعد شلون؟
امي_روحي جيبي الجنط وتعال
ضجت وطلعت كل الأغراض هناك حتى انعال ماكو برجلي أرجع البس الحذاء المعفن واني غسلت رجليه عاد طلعت حافية وكفت وره الباب اسمع
بيهم يسولفون وهجرس ترخص وگال "
مرخصتكم عندي اتصال مهم
ابوي_اخذ راحتك..اي بارق كملت بيتك بعدك ؟
بارق_لاوالله بعد
فاروق_شبقالك بي ؟
بارق_الارضية
فاروق_مابقاله شي
بارق_اي مسألة أيام ويكمل
ابوي_ان شاءالله
طلعت بسرعة حافية الحمدلله السيارة فوك الصبه كدام الباب فتحت الباب شلت الجنطة بجتفي والجنطة الثانية بايدي وطلعت من السيارة
وكفت على صوت ابوي "
جاية حافية ؟
باوعت لابوي اضحك "
اي مو اغراضي كلهن بالسيارة
جدي موسى _ لا تمشين حافية بعد الكاع مو نظيفة
سلي _جنت مستعجلة
جدي موسى _حتلوه
فشلت فشله شكبرها وشكدها بارق يباوعلي ويضحك لمحت هجرس دخل للمظيف وأخيرا خلصت منه قبل لا ادخل جدو موسى گال لابوي
جدي موسى _عشاكم عدنه اليوم
ابوي_ليش تكلف روحك عمي
جدي موسى _كلف شنو انتو خطار عدنه وتوكم اجيتوا للبيت شتلحكون تطبخون حتى مسواك مابي وثاني شي أحنه اهل مو غربة علمود
ماتتفضلون عدنه
ابوي_ان شاء الله عمي سلي بابا ودي الأغراض وتعال سلمي على جديتج حلوة
سلي_ روح انت ابدل واجي
ابوي_مو تتاخرين
سلي_لا ماتأخر
دخلت جوه بسرعة طلعت دشداشة جويتي بردان طوال و مخصرة وبيها حزام ينشد منورة ظهري المهم سبحت بسرعة وبدلت ورحت
للغرفة طلعت مكياج
خليت ورشيت عطر لما شعري نشف
لبست الحجاب وطلعت امي
بوجهي صارت" وين ؟
سلي _صدك معزومين على العشا بيت جدو موسى
امي_ هاا زين وين رايحة انتِ هسه
سلي_وره ابوي وفاروق والجهال
اسلم على جديتي حلوة
امي_انتظري خوب المغرب نروح كلنا
سلي_عيب ابوي گالي تعاي وراي
كدام جدو وبارق وعباس
امي_روحي لعد واريدج تكعدين عاقلة مو تتخبلين اذا جابت طاري زواجج من فرقد
خليج هادية ماشي
سلي _ماشي
طلعت بره امشي على الطريق دفعت باب البره ودخلت للمضيف اباوع اخاف هجرس موجود والحمدالله مجان موجود باوعت
للحديقة كلها ورد والورد
يرد الروح واني بي دودة مال ورد من اشوف ورد ماتحمل الا احوش "اقطف " رحت للحديقة بقيت اشم بالورد ماتحملت حشت وردة
حمرة دم تأخذ العقل
ورجعت حشت ورده وردية ورده بيضة صاروا تلاثة وخليت بيهم اغصان علمود من أرجع للبيت اخليهم بالماي باوعت ماكو احد بوجهي لبيتنه
عدل للمطبخ
شافتني امي "
اشو رجعتي ؟
سلي _هاي الوردات خليهم بالماي
امي_ماتجوزين من حوش الورد
سلي_دودة بي مال ورد خليهم يمة
فدوة ماريد يذبلون
امي_ماشي
عفتهم فوك ميز الطعام وطلعت دخلت للمظيف أمشي فوك الطريق هم عدهم طريق مبلط مثل الشارع يودي للبيت والبيت بي باب ثاني يلا ندخله
لان معزول البيت عن المضيف .
توني ردت افتح الباب وادخل للحوش وكفت على صوت هجرس" ماتبطلين من عاتج القديمة
مال بوك الورد ؟
انداريت بسرعة اشوفه واكف كدامي
كاتف أيديه ويباوعلي "
ورديش ؟
_ثلاث وردات بكتي من الحديقة وهاي عادة عندج من صغيرة تبوكين بالورد بطلي عاتج يابة عيب
تبوكين ورد الحديقة
_وانت تراقبني ؟
_لعد ترديني اخلي الحرامي يشرد من ايدي
_وليش ماصحت بي لعد ؟
_ قلبي ماطاوعني اصيح بيج گلت خل تاخذهم خطية نفسها ضعيفة كدام الورد وانه
كريم موبخيل
_ابخل عباد الله انت
_متوهمة ..والله ومتغيرة وحليانة أكثر من قبل
_ولك شنو من بشر انت؟
_بشر حالي حالج شنو قابل
_دير بالك هجرس تشمر حجي
ترى واصله لهناه وياك
خليت صبعي كدام خشمي حك ارنبه
خشمه بايده وگال "وانه لعد
_انت شنو ؟
باوعلي بنظرات خبيثه خلتني ارتعش من الخوف "
وانه قلبي راح ينفجر من وراج
_واني شعلي ؟!
_سألي نفسج سويتي بي من طفولتج لحد الأن
_بالقرأن الكريم كلشي مامسويه بيك انت لجنت تسوي بي وكل مرة اسامحك بس هل مرة مراح اسامحك أبد ولا ابريك الذمة على لسويته بي
_ليش سويت ؟
_اسأل نفسك سويت بي
_كلشي مامسوي ؟
_فوكاها تنكر عينك عينك ؟
_إذا قصدج على أيام قبل فايام قبل ولت وي أيامها وصارت ماضي وإذا على الحاظر كلشي مامسوي وهسه سويتي بوكة وماكشفتج وما
صحت بيج تقبلتها بكل
روح رياضية .
_بكل سهولة تگول أيام قبل ولت ؟
_اي المات مات والله يرحمه وأهلا وسهلا بالجاي
_ياجاي هذا ؟
_ الأيام الجاية انه ارحب بيها بكل روح رياضية
_شقصدك ؟
_ماقصد شي بس اقصد الأيام لراح تجي انه ارحب بيها بكل روح رياضية مرحه وأنتِ هم صيري مثلي وركعي الماضي جلاق وحضني الحاظر بكل حب
_ ولك شتقصد بكلامك ؟
_من يوم يومج غبية شسويلج انه يلا فوتي
_احجي ؟
_وانه شعندي واحجي
شفت نظراته محلوة لي صارت يباوعلي من فوك ليجوه ويبتسم بسرعة انطيته ظهري وخليت ايدي ادفع بالباب توني دفعته گال بضحكة .
_سمنانة لعابتي
فكيت عيوني بصدمة ونداريت عليه
بسرعة "موعيب عليك ؟
_وانه شگلت وعيب عليًّ گلت سمنانة
وهالكلمة مابيها عيب
_لابيها لان دا تباوع لجسمي
_نسيت والله ماسديت عيوني من مريتي
_قليل أدب
_تعاي وادبيني
_الله يأخذك
_آمين
_الحجي وياك عيب ابو الهجارس والشياطين
_اي والله كلش عيب
انطيته ظهري وفتحت الباب ودخلت صاح وراي "
تطكين بالكاع صايرة لعابتي هههههه
رديت عليه"
صدك من گالوا عين الضباط زايغة
_اي والله وين شايفين أحنه هيج لعابات
كاضينها بالدوام والواجبات
_ولك عيب عليك عيب
_انعل ابو العيب غير جنج العافية وأهلها لعابتي
_تخبلت ؟
_قابل عاقل انه يقلبي انتِ
_خل اولي اشرفلي
_بكيفج بعد بس لو تبقين شوي
انكلب شاعر الج ههههه
_صير شاعر للزركة
_للأسف عيوني ماتشوف غير لعابتي
تعال سلي اريد اگلج حجاية
تعااي شبيج ؟
دخلت بسرعة دخل وراي مثل الملهوف خفت منه وتذكرت شسوي بي هذيج المرة
من اجيتهم "
_وخر عني
_دوكفي شبيج
_مااريد حل عني شبيك لاحكني
_مو صوجج صوجي انه والله
_اي صوجك بعد لا تحجي وياي
_بكيفج امشي
_اييي امشي لعد ابقى كدامك واكفة
_وجعييي صوتج لا ترفعي كدامي
_ارفع ونص
_واجي انه بوسة وحدة انصيج ههههه
_ادبسززز
_مو صوجج صوج ليتغزل بيج انتِ مو مال
غزل انتِ مال رزايل وشتايم
_قليل أدب وأخلاق مالومك محد مربيك
_تعاي وربيني
_موصوجك صوج لتحجي وياك
_صراحة فرحانة انتِ بس جاي
تبيعين ثكل براسي
_افففف
نفحت هوى ومشيت بسرعة متعصبه منه بس واحد يحجي وياي انفجر بوجهه بقيت واكفه بالطرمة اجر نفس وارجع ازفر درت وجهي شفته
واكف بمكانه وعلك
جكارة بعده يباوعلي اشرلي ادخل جوه دخلت بسرعة شفت ابوي واخوي والجهال وجداتي تلاثتهم ومرت عمو وائل وعمو وائل سلمت
على الكل ردت اكعد
يم اخوي فاروق لزمني من ايدي عمو وائل وگال "
تعاي يمي اكعدي والله كبرانه وحليانة
خجلت كلش واخدودي صاروا يطلعون نار ياهو ليشوفني يگول كبرانة كعدت بصفه خجلانة
جديتي حلوة گالت بضحكة
حلوة_والله سمنانة وطاكاتلج خدود
ابوي_اي ههه
عمو وائل باوع بوجهي گال"
اي صدك ولايكاتلها الخدود
مرت عمو_هي حلوة من قبل وهسه من سمنت صارت احلى عين الباردة عليها
لساني ربط ربط بارق واكف بصف تعبه الباب المطبخ ويضحك بوجهي اجت هباوي سلمت عليها الحمدالله خلصت منهم ولتهيت بيها هم التهوا
بسوالف عادية جدي سأل على هجرس "
ولكم هجرس وين راح ؟
بارق_طار وي الطيور الطايرة هههه
جدي_روح شوفه وين صار ؟
بارق _هاهو اجه
رفعت رأسي شفته دخل بايده التلفون ابتسم من شافني اباوعله راساً دنكت راسي وگال "
هجرس_ هاا جدي شمعتاز ؟
جدي_وين رحت صارلك ساعة
هجرس_جان عندي اتصال مهم من الشغل
جدي_شنو شغلك مايخلص
هجرس_لامايخلص ... بارق عندك ورق بند ؟
بارق_اي شلك بيهن ؟
هجرس_دزلي ٢٠ ورقة
بارق_ادزلك بس شلك بيهن ؟
هجرس_عندي شغل
جدي_شغليش بالورق عندك ؟
هجرس_يخص شغلي ..امشي جيبلي بسرعة
بارق_ماشي
هجرس_مرخصتكم عندي شغل لازم اكمله قبل الليل
ابوي_اخذ راحتك
دخل بارق للغرفة طلع بايده ورق بند اخذهن من أيده مشى كم خطوة ورجع گاله "اقلام
حبر عندك؟
بارق_اي
هجرس_جيبلي اهمشي احمر واسود
بارق_ادري جاي ترسم لو شنو ؟
هجرس_لا تدخل بشغلي جيبلي بسرعة
بارق_امري الله
رجع جابله سيت أقلام اخذهن وصعد للدرج بدون مايلتفت صاح هو يمشي على الدرج" هباوي
فدوة جيبيلي كلاص جاي
هباوي_تدلل عيوني
هجرس_تسلم عيونج أخيتي
قربت لهباوي وكتلها بهمس "
هذا شبي؟
هباوي_اكيد عنده مهمة ودا يخطط الها كومي وياي للمطبخ علمود نأخذ راحتنا
سلي_ماشي
كمت وياها للمطبخ هي طلعت كلاص
وصبت جاي "منو يخدمه ؟
_قصدج على فرقد ؟
_اي
_أني وامه
_ماتملون من طلباته
_وليش نمل أصلا فرقد مايطلب هواي مرات يطلب واني افرح من يطلب مني شي ومعتبرته حاله
من حال اخواتي الولد
_بارك الله بيج هباوي
_وبيج حبيبتي بس اوديله الجاي وارجعلج
_ماشي قلبي
طلعت كعك وخلته بصحن ورجعت خلت كلاص الجاي بالصينية وراها كلاص ماي واخذتها وصعدت
لعنده بسرعة رجعت وگالت
_راسم مخططات ماعرف مال شنو؟
_ليش هو يعرف يرسم ؟
_والله مادري بس رسمه جان حلو
_شراسم بالضبط ؟
_شوارع وأماكن وكاتب أسماء فلان شارع وفلان مكان ومنطقة مافهمت شنو المقصود
دخل بارق وگال "
اكيد عدهم مهمة ودا يخططون هلأ بسلي
هلأ ومية هلأ بلجاينة من ابعيد
سلي_هههه والله ضحكتني بارق
بارق_دوم ان شاءالله اضحكج اي اخبارج ؟
سلي_والله سلامتك ماكو شي
هباوي _شوكت تتخرجين ؟
سلي_بعد ١٣ يوم
بارق_واخيراً راح ترجع الأميرة للقصر مالتها ههههه
سلي_مو رجعت اليوم هههه
هباوي _تستقرين قصده هههه
بارق_اي
سلي_مابقى شي ان شاءالله وارجع وراح تملون مني
بارق_مانمل والله أصلا راح نفرح مو هباوي
هباوي_اي والله اريد ولف لي بالبيت
سلي_مو عندج خاله وجداتي
هباوي_ذني كبار بالعمر اريد وحدة بعمري مثلج حلوة وكيوت وحبابة ومن جيلي وتفهمني وافهمها
واشكيلها وتشكيلي
بارق_ديري بالج تشكين عني هباوي
هباوي_لعد عليمن اشكي هههههه
بارق_شمسويلج ولج وتشكيني لغيرج ؟
هباوي_مايتعارك وياي
بارق_تدورين عرايك ؟
هباوي_اي والله بارد كلش من يوم لاخذته مامتعارك وياي انبز اريد ماكو رد فعل منك
بس تتمضحك
سلي_الله ربج محمد نبيج الله انطاج هيج رجال ذرة مال الله النسوان يكيفن عدهن هيج زلمة وأنتِ ماترديه وتشكين والله سالفة انتِ هباوي
بارق_تدور واحد مثل فرقد بصيحه وحدة
منه يبولها على روحها ههههههه
سلي _اعوذ بالله هههههه
هباوي_ اني گلتلك صير مثل فرقد گلتلك شوي صير عصبي وتعارك وياي خوما گلتلك صير ضابط
وروحك بخشمك وماتتحاجه
بارق_ لعد شتردين يمة ؟
هباوي_شوي اضوج وصيح
بارق_اووي انجبي هباوي ههههههه
سلي _هههههه
هباوي_تافه من يوم العرفتك بي ابد
ماتصير مثل بقيه الزلم
زعلت ومشت اباوع لبارق خربان من الضحك "
بلا هاي شتحجين وياها
_شوي حسسها برجولتك هههههه
_انه اخوج اليوم اعلمها شلون يصير
الصياح على أصوله
_اي تعارك وياها وخوفها خطية
تريد تحس بيك عصبي
_عود ليش من الله انتو البنات تحبون الرجال العصبي والمغرور والمايتحاجه
_والله أبد اني ماحب هذا النوع من الزلم
_لعد شتحبين ؟
_أحب الرجال المثلك روحه مرحة وطيوب
_لعد ليش ماحبيتيني ؟
_للأسف ماعندي قلب يحب
_جا شعندج لعد بصدرج ؟
_كوم مال احجار متكوم
_بلكت الله يتحول لكوم مال للحم
ويحس على مخبلنه
_عوزي لو احب هجرس
_وشبي يمة ؟ اعور اعرج اجكم اشو ينكرط كرط بس شواربة ينحلف بيهن هههههه
_هو شطيح حظنه غير شواربه
جنهن شوارب ابو الزمير
_ ههه ديري بالج تحجين كدامه هيج ترى
بالقران يعلكج بالجنكال بدل البنكة
_مخبله احجي
_اي ديري بالج مخبل من طراز الأول
_ادري
_صدك سلي ليش ماتقبلين بي ؟
_مايعجبني
_اروحلج فدوة شنو ليعجبج لعد؟
_مادري
_رب الكعبة بيش تدرين لعد ؟
_واني شمدريني هو الزواج قسمة ونصيب وشوف الله شكاتبلي ويامن اكضي حياتي واتزوج منو محتمل اتزوج شخص غريب محتمل اتزوج شخص كدامي اربعة وعشرون ساعة واني ماشوفه
ترى العالم عند الله .
_اي هو كدامج وماتشوفي
_منو ؟
_فوكاها تغشم روحها
_عليك الله لاتجيب طاريه من تجيبون طاريه
قلبي يصير يرجف من الخوف
_هاي رجفه حب
_ياحب رب الكعبة
_حب هجرس
_لاموحب خوف
_هو شنو وتخافين منه ؟
_شايف طوله شطوله وشكبره وشكده راشدي واحد منه يلزكني بالحايط ماجايزة من روحي اني اتزوج هيج واحد لا وفوك كلشي نفسيه روحه بخشمه
اربعة وعشرون ساعة متعارك وي الذبان
الطاير شلون تريدني اتزوجه ؟!!
_ميله طويل هو كله طوله ١٩٤ وزنة ١١٢
_أنا الله وأنا إليه راجعون
_ها شبيج انخطف لونج
_تحجي الصدك هذا طوله وزنه ؟
_اي والله
_طوله ١٩٤ وزنه ١١٢
_هاي شبيج راح تموتين
_واني طولي كله يلا ١٦٥ وزني ٥٣
شلون رهمتوها ويا
_احلى وزن وانسب رجال الج
_انسب موت لي والله العظيم ماجنت ادري هذا طوله وهذا وزنه انصدمت
_ترى هسة ضعفان
_ليش شكد جان وزنه؟
_١٢٠ قبل كم يوم
_عمي روحوا شوفوله وحدة طولها
١٧٠ بما فوق تناسبه
_أحنه نريدج
_مافيده والله
_ولج ترى عادي وإذا ضخم كلنا نفس الشي
_والله ماجايزة من روحي أني رايحة لبيت اهلي
_وين سلي تعاي
_اروح لبيت اهلي المغرب اجي عود
_اطلعي منا عليش مناك
_هسه تشوفني جديتي حلوة وتجلب بي
_تخافين ؟
_اي والله ماكو امان عدكم ديناصور بالبيت
_ديناصور ههههه
_اي
عفته وطلعت بسرعة وكفت بره حسيت شخص يباوعلي رفعت رأسي اشوف هجرس فاتح شباك غرفته وبايده كلاص ماي جبه بنص وجي
وگال _أقسم بالله كصيتيني جوه وهذا ردي
فزيت وبعدت بسرعة امسح بوجهي بكف ايدي بس ماردت ابجي صحت بي " الله ياخذك
شكد خبيث ؟
_من الله امممح
رفعت راسي دزلي بوسة ورجع دخل وعاف الشباك مفتوح اجت بالي اشيل كوم حصو من الكاع واشمره عليه على امل وحدة تجي بي
طلع بارق "
شبيج تصيحين ؟
_شوف الخبيث شسوه بي ؟
_هاي منو جاب عليج ماي ؟
_ابو الهجارس والشياطين
_وين لكاج ؟
_فتح شباك غرفته وجبه عليًّ
_صدك جذب احنه نريدها تقبل بيك
لو انت تخبث عليها
رجع طلع راسه وگال "
هذا انه تريدني تتحملني بكامل عيوبي ماتريدني هذلك هو الباب وخل تتوكل بالله
بارق_شبيك فرقد ؟ عدل اسلوبك
هجرس_ماعدل ليريدني يتحملني
ولمايريدني يولي
سلي_هو مخبل وبي جني شيعدل
هجرس_ وشجابج على ابو الجني يلا ولي لبيتكم
سلي_ماجاية اشوف شكولاتك الزفرة
هجرس_والله جاية تشوفين طولج
علمود انعجب بيج
بارق_من صخام براسك ولك انجب انجب فضحتنه
هجرس_راح انزلك من الشباك واسويك شركتين انت وياها يلا ولو منا لوثتو الجو بريحتكم القذرة
سلي_ بارق هذا شبي ؟
بارق_اندري شبي تخبل
سلي_الجني اليوم هايج وسترك الله منك
هجرس _ولي منا
سلي_ولي منا ابو الزركان والهجارس
هجرس_راح انزلج
سلي_وعاد شكد خايفة منك
هجرس_من انزل عود گولي شكد خايفة منك
سلي_ بصيحة وحدة اخليهم
ينزلوك لاسفل السافلين
هجرس_من انزل عود خوش
اسويج اسفل السافلين
بارق_ولك شبيك تخبلت ؟
هجرس_وخرها من خلقتي لو انزل
واسوي مصيبة بيها
سلي_ من عابتلك وعابت عيونك تفوووو عليك
تفلت عليه ومشيت صاح وراي "
اضمها الج والله إذا مارديتها الج فلا اطلع
فرقد بس اصبريلي شرشبيل
سلي _من ترد على الزركة بهذلك الوقت فكر ترد على تفلتي عليك واحد جبان ماكادر غير
عليًّ اني المكرودة
سكت بعد مارت التفتت ... عليه يباوعلي بعصبيه بارق يخرمش بوجه ادري بروحي ليصتها وجفصت جفصه بكد راسي وراس الخلفوني .
بلعت ريجي وطفرت بسرعة لبيتنه عدل لغرفتي كعدت فوك الجرباية أفكر بكلامه اخاف صدك يردها لي هو مايسكت ابد وايده والرد
واني الغبية عيرته بالزركة يبوووة يبوووة من صخام براسي وبراس الخلفوني اجيب الطلايب لايدي واني ادري بي مخبل وشاخط وماكو عقل
برأسه نزعت الحجاب ونمت ....بالدشادشة لمبلله من الخوف انوب بسرعة استسلمت للنوم شوي وكعدتني مرت فاروق "سلي حياتي يلا كومي
فتحت عيوني بثكل مابي حيل
افتحهم نعسانه "
هااا
_كومي بدلي هم يلا نروح لبيت جدو موسى
_رحوا انتو اني ماروح
_كووومي شنو ماترحين وين تبقين واحدج
بالبيت كومي يلا كومي ولج
_شكو عليًّ
_لاعيني كلشي ماعليج بنية حمرة زركة وين باقية الواحدها بنص بيت لاوالحلو بنص الليل يلا كومي بدلي ننتظرج بالصالة
طلعت مرت فاروق كعدت افرك بعيوني احس بيهم رمد فزيت من صاحت بي امي
_وين صرتي ؟
_دا ابدل شبيكم مستعجلين ؟
_راح تغرب الشمس وأنتِ نايمة
بسرعة بدلي وتعاي
_ماشي
كمت بسرعة ... مطفيه فتحت الكنتور جريت للجنطة طلعت تراك طويل بدلت بسرعة ولفيت الشال على ركبتي ورحت بوجهي للمغسله
غسلت وجهي ... ولفيت الحجاب شلون مجان وطلعت مطفيه امي قفلت باب البيت
وگالت"شبيج مطفيه ؟
سلي_جنت نايمة
مرت فاروق_ عدلي حجابج شعرج كله طالع
عدلت حجابي أصلا مابي حيل اجت هي سوته لي وعدلته وطلعنا امي تنبه بي ديري بالج تشمرين بالحجي وتحجين حجاية اموتج كتل ترى
سلي_شايفتني يمة
امي_ادري بسوالفج من تحجين
ماتندلين حلكج وين صاير
سلي_خل ارجع لعد
امي_وين راجعة
سلي_علمود ترتاحين من لساني
امي_بس ترجعين ارجع اكسر رجلج امشي يلا
ردت ارد عليها .... اشرتلي مرت فاروق اسكت سكتت مارديت سألت على ابوي وفاروق والجهال "
سلي_وين ابوي وفاروق والجهال ؟
امي_مارجعوا بقوا هناك
سلي_حلت لهم الكعدة
امي_اي لمة الأهل حلوة
سلي _الله يديمها
دخلنا بعدنه بالحوش البيت طلع بارق وهباوي تلكونه دخلنا جوه ويه دخلتنه بالصالة نزل هجرس يتثاوب وباوعلي خزرني بلعت ريجي وبسرعة كعدت
بصف جديتي حلوة خنسيت للأبد أني غبية اجيب المشاكل لايدي اعرف بي مخبل ويدورها دواره
للمشاكل شلون اعيل بي
سلم على امي ومرت فاروق واجه كعد بصف جديتي حلوة جديتي حلوة صارت بيناتنه متت بدمي خاف يمد ايده من وره ظهرها ويعيل بي
اريد بس الكه فرصة واكوم .
جدي_كملت شغلك ؟
هجرس_اي
جدي_ طولت
هجرس_ يرادله تركيز وانه اركز بكلشي
قبل لا اخذ خطوة
جدي_ زين سوي
باوع لجديتي حلوة ابتسم بوجهها وگالتله "
شرايد جده ؟
هجرس_سلامتج
حلوة_سلامتي من سلامتك
هجرس_ماشي لعد ابقى زين علمود تبقين زينة
حلوة_وهذا اللي اريده
اشرتلي هباوي من المطبخ "
تعاي سلي ساعديني
سلي_جاية
مرت فاروق _اني هم جاية وياجن
كمت كامت وياي مرت فاروق وشوي واجت امي ومرت عمو وائل امي سالت على ام فرقد جاوبتها مرت عمو وائل بكل رحاب بدون ماتزعل او تنضغط
مرت عمو وائل _ الحمدلله والشكر نكشفت الحقيقة ورجع الها ابنها وهسه مرتاحة بجاه
امي_الحمدالله يروحلها ؟
مرت عمو وائل_كل يوم يمها
امي_ هواي يحبها ومتعلق بيها برغم
هواي اذته بفعالها قبل
مرت عمو وائل _مجبورة المرة تسوي
أفعال تغضب ابنها ورب العالمين
امي_بس هي غلطت غلطة حياتها من ضمت السالفة ومگالت ولاجابت طاري هي هيج دا يصير وياها السكوت والخوف يعم على البشر
مرت عمو وائل _اي والله السكوت هو دمار لصاحبة
امي_من ودي أشوفها واحجي وياها
مرت عمو وائل _اني هم گلتله اريد اروح
اشوفها واحجي وياها
امي_ خير ان شاءالله
مرت عمو وائل _ كل الخير خية حبيت اتعرف عليها لان هواي تحجي بيها عمتي حلوة وعماتي الباقيات يكولون خوش مرة جانت ومعدلة بس من
راد يتزوج ابو فرقد تخبلت ونكلبت طنطل علينا
امي _وهاي اجت لايدها الفرصة مال زواج أبوه وطلبت الطلاق علمود تخلصهم من شر اهلها وشر زوجها الملعون صدك هو وين صفى بي الدهر
هباوي_انحكم اعدام
سلي_مانعدم لحد الأن
هباوي_والله مادري وماسأله بعد
مرت عمو وائل _هي تطول مال الاعدام
ماينعدم بسرعة
سلي_وطلال انعدم ؟
هباوي_من زمان
سلي_ هاا اگول لعد رادوا يقتلون هجرس
علمود ينتقمون الطلال
هباوي_اي الله ينتقم منهم خليهم
بالسجن يصوصون
سلي_حيل وابو زايد بيهم
جهزنا العشا اذن رحنا صلينا ومد السفرة بارق نكلنه الاكل اني وهباوي ومرت فاروق الكل كعد على سفرة إلا فرقد جديتي حلوة استفدته
حلوة_وين فرقد ؟
بارق_صحتله گال ماشتهي اكل
حلوة _شنو مايشتهي هو شماكل من الصبح
الهسة ...كوم صيحه
بارق_ والله حجيت ويا گال مسوي رجيم
جدي_رجيم شنو مسوي هو من سمنه ويسوي رجيم
بارق _يگول سمنان واريد اصير ١٠٠ كيلو
حلوة_يريد يصير عصفور مهلس
بارق_اي ههههه
بارق يأكل ويضحك على هجرس واني اكل اباوعله خربان من الضحك گلت هسة يعيط بي جدو موسى بس الحمدلله مجان كاعد كدامه كملنا
اكل صعدت جديتي
حلوة بايدها صينية أكل بارق وكف بصفي وگال "
حالفة جديتي حلوة الا تكسر
الرجيم هههههه
سلي_ترى جسمه متناسق وي طوله
بارق_ يگول صايرلي كرش
سلي_محتمل
بارق_ترى صدك مكرش ماشفتي كرشه
سلي_تريدني اباوع لكرشه ؟
بارق_عبالي تباوعين
سلي_لاعيني أني مو من هذا النوع
بارق _انتِ من نوع المقروض والنادر وجودة
سلي_ممم ..صدك اخبار مناوي مجابت ؟
بارق_معوشرة ومايقبل يطلع ولي العهد هههه
سلي_ خطية شجاها
بارق_تاكل اكل من المطاعم ومحتمل اكلت لحم بعير
سلي_محتمل ماتبخرت بشعر البعير ؟
بارق_عمي تبخرت وماكو گالوا هاليومين إذا مجابت نسويها عملية ونطلع ولي العهد
سلي_ان شاء الله تجيب
بارق_ان شاء الله اروح اكعد سيفو اضحك عليه
سلي_هو صدك ماكو
بارق_نايم ونومة ثكيل ويطول
سلي_روح كعده فدوة خل اشوفه
بارق_عد عيناج هسه اجيبه الج
راح بارق يكعده نزلت جديتي حلوة وراها هجرس شايل صينية الأكل بقيت واكفه بمكاني ومجتفه ايديه نزلوا بالكاع جان ماكل كل الأكل
حلوة_تعال اخذي الصينية من ايده
سلي_اني ؟
حلوة_لا أني لعد منو تعاي اخذيها لتخلي هو يشيلها
سلي_وصار لو شالها
حلوة_سلي لتصيرين مثل حنين
وتعاي اخذيها من ايده
سلي_ماشي
رحت لعنده اخذتها من ايده خزرني وهمس "
عوفيها انه اوديها
اجر بيها ماينطيها جرها من ايدي قوي وگال "
انه اوديها ماعتمد على النسوان
اخذها ومشى جديتي تباوعله "
فرقد وين رايح؟
هجرس_اودي الصينية للمطبخ وارجع
حلوة_ ليش فاهية وبزعتي
سلي_واني شعلي جدة هذا هو بسرعة يبزع
حلوة_من تشوفي شايل كلاص ماي فارغ تجين تاخذيه من ايده بدون ما اكلج مفهوم
سلي_واني شعلي بي اخدمه
حلوة_مو راح تصيرين مرته غير
تخدمين رجلج بنفسج
سلي_ منو يگول اصير مرته
حلوة_انه اگول تعاي اكعدي اريد احجي وياج بخصوص موعد الخطوبة
سلي_جدة ياخطوبة هاي ؟
حلوة_خطوبتج انتِ وفرقد
سلي_اني ماريد اتزوج هسة عوفوني فدوة
حلوة_شوكت تردين تزوجين لعد ؟
سلي_بعدين هسة اريد استراح من الدراسة
حلوة_اي تزوجي وارتاحي بجاه
فرقد وبجاهي انه جديتج
سلي_جدة ماريد
حلوة_شماتردين
سلي_زواج
حلوة_ جدة شكد عمرج صار ؟
سلي_ ٢٠ سنة
حلوة_٢٠ سنة وماتردين تزوجين لعد شكد
عمرج وتردين تزوجين ؟
سلي_ ٢٣ سنة
حلوة _يعني بعد ٣ سنوات
سلي_اي
حلوة_مناه لتلاث سنوات جاهلين بحضنج انه قررت بس تكملين منا نخطبج منا وره
ايام قليله نزف
سلي_جدة ابوس ايدج رجلج لا ماريد
حلوة_ ترى الزواج ماياكل بالعكس
أمان واستقرار للمره
سلي_ماريد هذا الأمان والاستقرار اريد حريتي
حلوة_منو حارمج من حريتج ؟
سلي_ جدة فدوة رحتلج عوفيني براحتي هسة خلوني أتنفس عاد واعرف راسي من رجلي مو تزوجوني وتورطوني بالزواج والمسؤولية
حلوة_گولي ماريد فرقد وخلص ليش تلفين ودورين
سلي_اي ماريده هي كوه اتزوجه
جلبت بزندي قوي وجرتني لغرفتها "
تعاي جوه احجي وياج ماريد
احد يسمع
توجعت من لزمها ... لي عنيفة جانت
دخلنه للغرفة عافتني وسدت
الباب تخزر بي
_شبي وماترديه ؟
_اخاف منه
_هو شنو وتخافين منه اشو حاله من حال الزلم
_هجرس يخوف وكل ساعة برأي ماعنده رأي ثابت وعصبي وروحه بخشمه ومايتحاجه أبد واني شخصيتي غير شخصيته
_متوقعة فرقد لحد الآن مخبل وبي مس
_اي
_متأكدة من كلامج ؟
_اي متأكدة من كلامي
_بنظرج فرقد مخبل وماكو عقل براسه
_اي ويسوي افعال من اجي اسأله يكول مامسوي
_ مثل شنو ؟
_تذكرين من بتت عدكم قبل عرس عمو وائل شلون تحرش بي وراد يغتصبني واسألي هسة يگلج ماتذكر وقبلها هم تحرش بي واليوم سألته يكول ماتذكر
شسمين افعاله جدة
_غير هذيج المرة تحرش بيج ؟
_اي
_هاي شوكت اشو ماحجيتي وماكلتي ؟
_خفت احجي
_ولج شنو خفت احجي احجي شسوالج ؟
اجت لعندي لزمتني من كتوفي قوي وهزتني قوي "
ماتحجين شسوالج ؟
كمت ابجي وگتلها "
تذكرين من بتت عدكم بعرس مناوي
_اي
_من لكيتوني ابجي هو گاللكم صديقتي ماتت
_من صخام براسج وبراسه ليش ماگتي تحرش بي ؟
_خفت منه جدة والله
_احجي شسوالج ؟
_سوه أشياء مقرفة وگال تعاي تزوجيني زواج متعة ترى مايريدني مره له يريدني بس للمتعة ومن يشبع مني يشمرني شلون تقبليها اقبل بي جدة
عافتني وصارت تلطم على اخدودها بأثنين ايديها قوي "عززة العزاني صخام برأسي حفيدي واحد طايش وطلع ويتحرش بت ابن أخوي
_مخبل مو طايش جدة عرضي لدكتور نفسي
تعصبت واجت لعندي ضربتني راشدي فرت وجي فرر" ليش ماگتي ليش ماحجيتي فرقد يتحرش بيج انتِ هم شريكة ويا مادامج ساكته
ومتحمله كلشي
لزمت خدي بايدي وصرت ابجي "
والله موشريكة بس خفت منه يسويلي شي بعد مافضحه وهسة تأكدت مايتذكر شي ؟
_شمايتذكر ؟
_هو متحرش بي مثل قبل من تحرش بي وراد يغتصبني مايدري بهاي السالفة أخاف رجعله الجن جدة ومايگول ترى افعاله مو طبيعية أبد
_كلشي مابي واعرف ليش هيج سوه
بسيطة انه اعلمه
_حجي جدة شعرفتي ؟
_صخام راسكم عرفت ماريد تحجين روحي للحمام غسلي لما اجيبه واجي اريد اواجهكم
واعرف الحقيقة .
_لاجدة عليج والله لتجيبي
_اليوم الا اجيبه واعرف الحقيقة كاملة
جم يادوب ابقى مضحكه الج وله
_والله ماعليًّ اني هو الملوم
_لازم اكو سبب وره هاي أفعاله
رايحة اجيبه انتظري هنا
_ماريد اواجهه اخاف
_كسري خوفج اليوم ودخلي بنص عينه وعرفي أسباب تحرشه بيج وليش طلب منج زواج متعة بدل
مايطلب زواج عادي وطبيعي
طلعت وعافتني الواحدي بالغرفة حيلي كله صار يرجف من الخوف كعدت اباوع الايديه يرجفون لزمتني رجافه قلبي يخفق بسرعة صرت
اسمع دكاته قلبي باذاني
