رواية كفي والمنجمة الفصل الحادي والعشرين 21 بقلم الكاتبة Leo alfatlawi

رواية كفي والمنجمة الفصل الحادي والعشرين 21 بقلم الكاتبة Leo alfatlawi

كفي والمنجمه

للكاتبه leo Alfatlawi

الواحد والعشرين

--شنو مافهمت شدااتقصدين يعني فهد هذا الولد صديق مكرم يريد يتزوجني

--اي خيه غير صارله كم يوم سابينه ينام يكعد يسولف بيج بس والله رايدج بالحلال ماحجه بشغله موزينه بس كال روحي اسأليهه بالاول واخذي رايها ومااريد الجواب هسه خلي اتفكر ابراحتها

--بس اني ماافكر بالزواج ولاراح افكر اصلا لان كرهت شي اسمه زواج

--انتي موتجربه وحده اتحكمين على اثرها مااعرف ابيش مريتي من ضروف بس فهد شاريج دخلتي كليبه من اول يوم شافج بي وراح سال عنج منهو انتي لان يعرف مكرم ماعنده بس اخت ومتزوجه

--فدوه سدي الموضوع مووكتها واصلا لاتسولفين ابد بهيج شي

--اخذي كل وكتج حبيبه فكري على راحتج لاتحجين هسه وهذا رقم نقالي خلي يمج

--مااريده لان اصلا ماعندي فون

--ياا اشعجب عود جايه من امريكا تالي نقال ماعندج

--يعني موجايه من امريكا معناتها كلشي مسموحلي تره عادي حالي حالج وشي ثاني ميقبلون الولد يصير بيدي فون بس من اريد اتصل لوعندي شي اجهزتهم موجوده عادي ينطونياهن بس رقمج مااكدر اخذه لان عيب يصير يم الولد

--اي احسن والله امعدلين لان النقال مامن ورا بس المشاكل

--خلي انودي الاكل لان برد واسمعهم اجوي يمكن اتفضلي للغرفه بين مااصيح لمكرم

راحت للغرفه اشكد حشريه ولزكه اتكلها ثور اتكلك حلبه

مر اليوم واني افكر بفهد شنو شعور مؤتمن من يسمع بس والله حيل بي شنو شايف روحه خلي يموت بقهره العده بعدها ماطلعت حصلت واحد حلو وكيوت

زين اني لويش ماافكر بغير مؤتمن يجوز هذا مو نصيبي واراح اكمل ويه غيره

بس اجذب على روحي مشتاقتله حييل مشتاقه لضحكته ولصوته وحتى من يعصب عليه ياريتك اخذت ذكراك وياك من رحت

غمضت اعيوني اشوف صورته داخل اعيوني وصوته بذاني اتخيله بعده نايم يمي يحرك يصبعه على الفراشه اتذكرت اول مره من شافها وكال منو شايفها غيري

--مصطفى

--شنهو ولج

--لاوالله مشافها وين بس هو اقترح اكتب اسمك بيها وبعدين بس اخذت صوره للفراشه والله مابين المكان حتى ضحك كال الصقر اتحول فراشه شهالضلم

--غزل انتي هيج الله خالقج غبيه وثوله لو بعدين صرتي من صدمتج بعيشتنه

--مافهمت

--سكتي بويه خليج هيج لاتفتهمين احسن

--مؤتمن اتحبني

-- لا

--عزززا صدك دتحجي

--هههه اشبيج طفرتي تعالي بويه وحگ علي اعشكج موش احبج يعلة كلبي -خره ابااهلج شكد ترفه

اكيد نسه وهسه عايش بسعاده وياها لويش دااقهر بروحي شخص باعج لويش داتفكرين بي خلص غزل شيلي من عقلج لوجان صدك يحبج ماعافج حتى لو جنتي غلطانه هو غلطه جان اكبر

قطعت افكار عمه بدخولها للغرفه كالت شكو كاعده بحيدج

--هاعمه لعد وين اروح

--كومي يمه وياي انروح لبيت جدج صار اهواي مارايحيلهم

--مااروح اذا شافني جدو راح يجلب بيه واني مااريد ارجع استوني صرت زينه مع العلم مدااخذ العلاج اهواي

--اوووف ييمه هذا مرضج موش من العلاج عساها ابختهن لو باقيه اكثر جان كتلنج بسوالفهن

--شنو قصدج سحر

--عوفيهن يعمه لاتجيبين طاريهن الحمد الله من رجعتي لصحتج

--عزا والله عمه ابيوم الي كالتلي تهاني مؤتمن مأيس منج متت ابدمي صدكت حموت

--يبووو اشسوه مؤتمن لاتذكريني والله زوعها العافيه كلت ماتت بيده والله يعمه واحد يحجيها لله مؤتمن كتل روحه وراج من اجي اشوفه كاعد عالشط محتار يكلي عمه وين اوديها احسها تاكل ابكلبي من اشوفها تعبانه واني عاجر مابيدي شي

يووو ايام كاضيها للصبح مانايم ماخله دكتور ماراحله وده تقاريرج ماخله محافظه وراه

--امم عمه اخر شي عافني بفراش الموت وراح

--والله يعمه هاي اسوالف جدج كوه وديناه لوشايفه اشلون راح والله عينه بيج هو اصلا جان رافض الفكره خاصه بعد ماطلكج كال انتهت اسحب افلوسي واشتغل اهنا بس ابوي الله يسلمه لعب مالعب سواها مصيبه من سمع مؤتمن رافض يمشي

زعل عليه لان كسر چلمته وهاي اول مره يسويها اشكد حجينه ويا وقنعنا يسافر جان قافل اشكد اتوسلنه بي ماقبل بس مكرم دكله صدر بيج كله تبقه يمي واذا صار شي وداعت الاعزاز اخبرك وخليك ترجع قبل لاواحد يدري شنو الصار كوه قبل يروح من غير بيوم السفر هم قفل ماعرف اشكله خلاه يروح بكسره كلبه

--عوفج منه خلص هو والمرض ذوله صفحه وانطوت لااتذكريهم جايني عريس

--ياخير منهو وانتي خاتله بالغرفه وين شافج

--فهد

--يااا اشدراج ولج بسلا جاي اتصخمين مو ورانا

--لاوالله دز اخته وكال بس انطيني موافقتج واني احاجي مكرم يكول اخاف احاجي وهيه ماموافقه مااريد اخرب ويه صاحبي

--والله ييمه هو خوش زلمه بس مؤتمن اشلون

--عمه انسي مخلوق اسمه مؤتمن

--اني نسيته يلا وهو اشلون راح يعوفج لبالج راح يسكت حرام اذا دره هسه يجي وخلي طلقه ابروسكم

--لعد لاتكولين منا لمن تخلص العده اخاف يرجعني واني اصلا بعدني مامفكره ورافضتها بس حبيت اكولج اخاف اتكولين لويش مكلتيلي

--دكومي نطلع وسدي السالفه لاتحجين كدام احد انشوف وين تصفى بعدين خلي انروح بره نكعد

--اي هوه حكوم هم انضف البره صاير هوسه هذا مكرم يجيب ويكوم بالغراض كم مره اتعاركت ويا بس ميبطل

--وين يبطل بالعكس زاد كيف لكه من اليرتب ورا

--خلي يهوس بعد وشوفي شسوي اذا خليتله غتره صاحيه مااطلع غزل اله امسح بيهن البيت بس يوصخ

--اي والله بعد عمتج كومينا لان فشله اخاف واحد يجي

طلعنه وبلشنه اني وياهه ماخلينه شي مارتبنا هيه خطيه تعبت وكعدت واني كملت باقي الترتيب بس انهد حيلنه

اخر شي كنست اباوع صار المكان يخبل اشكد الواحد يفرح من يشوف نتيجه تعبه حتلو جان شي صغير بس اتحس بطعم فرحه انجاز

--صحت عممممه زوجيني

--ياشجاج يعمه

--لعد شوفي اشلون صار المكان يلمع يعني اتعلمت اشتغل هسه استحق اتزوج يلا بعد ماعدج اعتراض

--لايعمه يجي ابن الحلال ويشيل عليش اعترض

اندكت الباب جنت قريبه فتحتها شفت فهد سلم وهوه داير وجها بس اشوفه كوه كاتم الضحكه كال مكرم موجود

--لاع تكدر تتصل تتاكد قبل لاتجي تره اكو اختراع اسمه فون

--بس اعصابج والله اتصلت بس مغلق كلت اكيد نايم

--هئ طلع من الصبح من يجي حكوله اجه عليك راح يخابرك تامر اكو شي لخ

--اشرلي وهو داير وجهه لا ردت اسد الباب بس استوقفني من اندارلي و كال ابن الحلال التاخذي بس لخاطر اترتبيله البيت بالنسبه للطبخ لو ناويه متوچلي غير المخلمه

جان يحجي وهوه رافع حاجبه بعدين هز راسه وهو يضحك وراح ماخلاني حتى اجاوب

عزا هذه سمعني شنو كلت اشكد استحيت هسه شيكول عليه اشكد متستحي اتريد رجل سديت الباب واني عاضه شفتي عزااا اشكد فشله هسه اشحجاني

اجت عمتي كالت منو اجه اشبيج صايره حمره

--عمه هذه فهد

--اي وفهيدان شكو جاي كام كل يوم يلفي بيتنه

--يريد مكرم يكول الفون مغلق لبالي نايم

--لاراح لبيت جده تلكي اهناك هذا شامره صرته بغرفه وحده كون عاد اتصير من نصيبه ومينشلع كلبه ابنيي

--لعد عمه خطبيها خطيه

--ييمه كم مره طلبتها من جدج بس قافل واتعرفين جدج اذا قفل يكول ماانطيها مكرم ابني واني ربيته صح بس اهله موخوش عالم

--لعد هو اشدخله شهالتخلف العايش بي جدو

--غزاله يمه بس كلامج ثمني قبل لاتشمري عيب ويلا خلي شي على راسج خلي نلطلع بره للبستان وهااا غزيلان عوفي غتره مكرم لبسي غيرها هسه يجي يضل يحجي مالي خلگه

--اي عمه انتي طلعي واجي وراج

رحت عمتي لبست غترة مكرم اشكد احب البسها احسها اتلوگلي خاصه من الفهه تطلع اتخبل واذا حجه قحط عنده كومه لو هيه اعناد لان اطلع احله منه يغار

طلعت عمتي شافتني ضحكت وهزت ايدها كالت تعالي

رحت يمها كعدت بدت اتسولف على ايام زمان كالت نفس اعناد امج انتي اهواي ماخذه منها اشياء حتى غيرتج متشوف ولاتعرف اتميز الغلط من الصح

ضلت اتسولف عن القديم بس اشكد احب اسوالفها احس عايشه وياهم من تحجي بذيج الايام اشكد جان الحب احلو من جان اليعشگ يعشگ من صدك مومثل هسه

اتربع يمها اني اسال وهيه تنطلق ضلينه بالساعتين انسوالف لمن كالت ها مامليتي بعد اتسالين

--لاوالله عمه اتمنى متخلصين تستمرين بالحجي

--بعد الايام طويله يمه اتشبعين سوالف وذكريات بس اخافنج هم اتملين وتضوجين منه

--لا والله احلى ايام دااكضيها اهنا اشكد حنونه انتي والله عوضتيني عن ماما ماخليتيني احس بغيابها عنها ونسيتيني القهر

--ياولج غير اني امج شهالحجي تره موش شفتي بيت جدج لبالج العيشه موش حلوه ييمه والله ديرتنه حلوه وناسنه طيبه بس تتعودين اشويه اتحسين روحج ساكنه بجنه صح ويلادنه ضاغطين عليج بس ييمه راح تتعودين وتعرفين من كثر خوفهم عليج وحبهم الج

--لاعمه والله مضاغط عليه اصلا مكرم حاسبني حالي حال سماح والله مرات احس اكثر لان اشوفه يشاركني اسراره ويسولفلي عن تعبه وعلى حبه لهيفاء

--سوده عليه مكرم هم مثل حالج ييمه ماچلين حقه

--اي والله عمه البارحه كسر كلبي جان يحجيلي بقهر ويشكيلي من جدي اشلون رافضه ومتيه تعبه وحتى حقه ماينطيهيا مااحاسبه من احفاده لان مومن نسلهم

--اتكول جايبته من الشارع موش بزر بطني ابوي الله يسلمه يكره ابو مكرم لان وكف ابوجها وطلگني فشله بين ازلام ديرته بس هذا ماله ذنب وجدج يشوف ابوه بي

--عمه صح مترضين بس جدو باطل يعني يحاسبنه ويشوف اهلنه بينه مااعرف شيحس

--مايشوف يمه بس اكو من الي يلعب بعقله شغلهن ييمه يصحي الميت موش لسبالج لعب اي تركينه منهن البارحه اسمع مكرم يحجي وياج بصوت عالي على شنهو

-- لاموصوت عالي بس شافني صافنه جنت كاعده ضايجه وهو دخل ضل ينصحني اني ماافكر بالماضي واشوف حياتي ضل يحجي وياي على حياتكم و يعلمني اشلون اتصرف يريدني اصير مثل اخته هيج ملتزمه يكول انتي ازغيره بعدج تتعلمين بعدين صعدت عنده الحماوه بده يغرد لاباله ماراح اتعلم

--ييمه هذا هم اشوفنه راح يعجز ويتخبل مثل الي گبله بت فريال اتسودنين ديره بكاملها ومتتعلمين اتعلميني بيج امج كم سنه بگت ومعتصم ماخله شي ماعمله وهيه مصره على خربطتها موش يريد بكم شهر يعلمج هذا هم مدري شكو بعقله

--عمه تره داتهينيني صح اشويه اشلع كلبه بس دااتعلم اشويه اشويه

--دكومي صار الغروب خلي انحضر العشه

بديت احب الحياة من جديد من شفت تعاملهم وخوفهم عليه وحب الي

اعتبرت الماضي انتهى صفحه وطويتها كمت اشوف الحياة بصور ثانيه من عيون عمتي وحبها النه

بس جان المضوجني من اشوفه مكرم كلبه يوجعه على هيفاء واكف عاجز

قررت اساعده لان بطبعه خجول ولو يبقى الف سنه ماراح يعترفلها بالحب اعرفه

هو مجان يتجرء يحاجيها يخجل منها بس اشويه اشويه سحبتهم للطريق عن طريف الفون خليتهم يتقربون البعض اول شي افتح اسبيكر واحجي وياها وهو كاعد اتحارش بي اتصير سالف وضحكه بعدين اتحولت لكلام عالطاير اشويه و خليتهم يسولفون سوه بس ميتجرئون اله اكون موجوده

اطورو اشويه حاليا غاطين لروسهم بالطين سالفه مصطفى من جان يسولف على مؤتمن اشلون اتورط وعشك

عمه اتسوي مكانس من السعفه واني يمها اعدل بالزرع عمممه اشكد حلو طالعات ازغار

--اي يعمه لاتتعورين بعدي

اجه مكرم اول مشافني كال انوب اخذ افلوس عالغتر ماكو بلاش

--اي لعد اني هم ماراح اتصل بعد عادي اروح اجيب كم غتره من صافو

--لايابه غير اتشاقه اشبيج متتحملين اشعندي غير غزاله

--اي عفيه هيج صير

رن جهازه راح يم عمتي وفتح كام اني جنت بعيده اشويه يمكن سماح لان سلامهم حار جان وضحكهم عالي بس الصوت ميوصل واضح لان بعيده عنهم

دااكوم وتزحلكت اجيت اطيح صاح مكرم ثول لج غبيه لاتنكسرين طلعي منا

--بس انطيني مجال هاي خطيه مكسوره خلي اعدلها

--خويه دعدلي روحج لاتغطين بالطين وتعالي لاتبليني تركيها

عمتي. غزاله يمه تركيها بعد متنعدل هسه اكوم اشلعها

--ؤك عمه اني حشلعها لاتعبين روحج وتجين لعد عليمن اني اهنا

هز ايده مكرم لباله ماراح ادبرها ورد يسولف بس جان يضحك حسيته عليه يسولفون بس ماخليت بالي يمهم لان عيني بيها

كابلتها امكابل لواني لوانتي اليوم ضليت ساعه اجر بيها بعد معركه طاحنه دامت ربع ساعه جانت نتيجتها 3وكعات ولسعتين من دنابيسها انشلعت واخيرا

رحت العمتي فرحانه شايلتها صحت عمه مودااكلج زوجيني شوف اتعلمت كلشي هياتها شلعتها

--اي يعمه عليش لا ازوجج جا قابل العمر كله تبقين مگابلتني

مكرم. وتوكلي بس مخلمه وياريتها طيبه حشى نعمت الله

--اشعدكم ويه المخلمه وتعال انته منو كلك عليها لازم سامعها منه تره ماموافقه شوفلك غيره صح هوه كيوت وحلو بس يدور اكل واني مااعرف اطبخ كله غزل ماموافقه

جنت مستمره احجي وهوه يااشرلي اسكت

--لويش اسكت متريد سموحه تدري اخاف اتكول للمعقد الاملح مالتها

-- لج سماحح اجاني واحد يخبل احلى من زوجج شوف الله اشلون عوضني

بس صدك اخاف عيب بعد عمري مصاير17واني متزوجه 3 مو بالله عيب

سدت الفون مكرم وكال منو هذا التحجين عنه ولج

--ابو المخلمه الدتحجي عليه نفسه

--غزل منهو هذا

كامت عمتي كالت يمه اشبيك تضحك هاي اجوارينه اجت كالت لبن اختها وراوتها صورته بس كلتلها متزوجه وسديت السالفه

--تره اني لامتزوجه ولاشي وكلتلج عمه اذا عدتها ازعل وياج وانته مكرم موكل كلمه والثانيه راح توكفلي نفس الوكفه ادري هو عزيز عليك بس اني من حقي اعيش لويش اتشوفوه اهواي وياي هذه الشي

--خويه موقضيه اهواي واني وياج بس مووكتها وانتي بعدج بالعده وانتي امانه يمي يعني اليسمعج يكول خالها على حل شعرها

--لاولله موهياتني لابسه غتره

--ياطلابت الغتره دخيل الخلقج شهالثول الانتي بي دوخري خلي اشوف هذا اشلون اقنعه بعد هالمصيبه

عافنه وراح لان جان على طول ماهوه يحجي وياي الفون يضوي ويرفضه همزين نسه شغله المخلمه اشكد ثوله اني واذب حجي استغفر الله موكالتلي عمتي سدي السالفه محد يدري

كعدت يم عمه اتعلمني اشلون اسوي مثلها اشكد عادت وياي يالله اتعلمت لان صعبه بس اشويه عرفتلها انتبهت منين تنسجها سويتلي مهفه اصغيره اتخبل اشكد فرحت بيها

اجه مكرم مغثوث كالب وجها عمتي سالته شكو

كاللها خره بقسمتي ساعتين احجي ويا تاليته يشمر الصوج ابراسي نعل ابو اصلي مايرضه يقتنع

--يووو ييمه عوفه خلي يحمس يستاهل هو الجابها ليده

--حقج لو شايفته اشلون جان يكمز من الحركه ماحجيتي هيج كلت راح ينجلط يابه ماكو هيج شي يكول ادري بيكم ادكون الناقصه بيه ويحلف ويتكفر اذا صار هذا الشي راح يچتل جدي

--يااا وتايهيله يچتل جده عوفه يمه هذه يحجي شاطي باطي جاشنهو لباله كلها اله هم يجي يوم وتروح لحال سبيلها خومو نضلمها بعد كافي الشافته منهم البت بااول عمرها ودمروها

-- يلا كومن جوه صار الغروب

اتذكرت كتله يااا صدك تره صديقك اجه كال خلي يخبرني مغلق الفون مالته

عقج گصته كال منو هذه ابو الفون

--فهد هذه الي يجيك يوميه

--اشوكت اجه جا ليش ماخابر بعد

--مواني كلتله بس يجي اكوله يخابرك

--عليش اطلعيله انتي يمه وينج عنها صدك تحجيين

عمه. ياولك من ورا الباب حاجته واني ابسرعه اجيت ماخليتها

--غزل بعد ممنوع انتي توصلين للباب خلي امي اتفتحه لويجي جدي مااتفتحي انتي اسمعتييي

--اي ميخالف مراح افتحها بس اهدأ

عافنه وراح يخابر على جها عمتي سحبتني كالت تعالي اتباوعلي بضوجه رحنه حضرنه العشه وعمتي ضلت اتعلم وتنصح بيه موش تحجين اي شي لازم اتعلمين اشلون اصيرين ثچيله ومااتحجين ويه احد انتي ابنيه وعليج سمعه اتصير لازم اصونين اهلج واتحسبين الهم احساب لان ناس الهم سمعتهم بالديره معروفين

--فهمت عمه

--يمه الابنيه كلما اتكون ثچيله ورزنه راح الناس اتقدرها وتحسب احسابها

اهواي ضلت تحجي

عمتي حنونه وصبوره وعدها ايمان جبيره كولش خيره

اهواي اتعلمت منها اشياء حتى على الصلاة كمت وياها وقت الصلا اوكف اصلي الحجاب هم علمتني اضبطه من اطلع

اشترتلي كلبيات وتراكات اعراض حتى الميكب كمت اقلل منه بس شي خفيف اخلي

علمتني اعمال يدويه دائما اكعد التهي بيهن

وخلصتني من اكبر هم وهو شعري

كلما اسبح تكعد اتمشطلي واتضفره حتى دهون واعشاب كامت اتجيبلي مرتين بالاسبوع لازم اخلي اجبارلي بس شعري صدك صار رطب وحلو بعد ماتعب من السحب رجعت بي الحيويه كاعده اتمشطلي وذكرنه سماح كلتلها دوم سموح اتكول ضفري

--اي يعمه حتى ميقصف جنت دوم اضفره الها من جانت زغيره

--اشتاقيتلها واشتاقيت لمكاني عمه اشكد اريد اشيل ذاك المكان من كلبي مااكدر غصبا عني يرجع كل مااغمض عيني اشوفه كدامي مع العلم ولايوم ارتاحيت اهناك

--فتحيلي كلبج ييمه احجي لاتكتمين ادري بيج تحبين مؤتمن

--لاعمه نسيته

--امم يغزيلان من لمعت اعيونج امبين ناسيته

--عمه والله اهواي احاول بس مااعرف دوم يجي على بالي خاصتا بليل اشكد احاول اشيله من راسي بس غصبا عني اتخيله بعد يمي يلعب بشعري ويسولف وياي وو--

--واتحسين بدوفو حضنه اعرفن يعمه والله بس هاي قسمتكم مامقسوم اتكملون سوه

-- عمه من اذكره كلبي يعصرني مااعرف اشلون اطلعه من راسي

-- يعمه هذا اول حب الج فتحتي عينج عليه صعب يطلع من كلبج اول واحد اتحاميتي بضهره صح جان يضربج بس من غيرته عليج حسيته بالامان وانتي يمه

--بس بعد ماامنتله وحبيته اختفى

--من عقلج الزغير كتلتج الغيره ردتي بس الج حتى يوم واحد لتهاني ماقبلتي تتعاركين عليه

--امم وشنو هسه تركني وصار بس الها مو هيج قصدج

خلص عمه لاتذكريني فدوه هاي هيه قررت بعد ماافكر ابد وراح اوافق على فهد حتى انساه من صدك

--احسلج ييمه وداعت مكرم ماراح ترتاحون سوه ماراح يتركوكم بس تتعذبون هيج اهواي افضل كلمن ابجهه ويشوف حياته يلا يعمه كومي غسلي وجهج خلي احضر الغده

مسحت ادموعي وكمت غسلت وجهي لكيت عمه صابه الغده مكرم ماكو بعد بالمصنع اتغدينه وحدنه وكفت اغسل اماعين وعمتي راحت اتنام

ضليت وحدي كملت الاماعين وكعدت البيت هدوء وحشه حسيت روحي مختنكه بعد ذيج طلعاتي وسهراتي هسه كاعده وحدي اتصفن

غمضت صافنه بحالي شنو شضامتلي الدنيا بعد وين راح تصفى بيه

حتى ماما بعد مااريد اخابرها احسها اتذكرني بي اي شي يذكرني بي كمت ابتعد عنه متأامله يجي يوم ويطلع من گلبي صار العصر واني بعدني اتكلب مااجاني النوم بس عقلي امشوش

كطعت تفكيري عمتي وهيه اتكول وين عقلج اشحجينه يلا كومي اتحضري خبرت سماح كالو اليوم عشانه يمكم اشكد فرحت من سمعتها جايه لان ميته على شوفتها

كمت ويه عمتي حضرنه العشه ونضفت البيت على السريع اتكول شومنو جاينه وكل دقيقه اباوع للباب بلكي وصلو عمتي تضحك عليه اتكول ركدي هسه يوصلون جاماطولج هيج رايده شوفتهم عليش مترحيلهم

--مااريد عمه خليني هيج مرتاحه

--هم صدك شوفتها تگدر الروح

--مكرررررم

مكرم. وسم

--ماارد عليك اخلاقي متسمح

--اشتعلت ابو اخلاقج الي بس نسمع بيها ماشايفين منها شي

--هسه يجي صافو ويحجيلك عني وعن تواضعي

--خره بيج وبي اني اخلص منج اشرد للمصنع الكي لازك بجهرتي جنه قرد مايخلي واحد ميخبث عليه ارجع شارد للبيت اكابل خلقتج انكس

--عوفك من اخلاقنه الحلوه ندري ميت قهر منه منرد عليك عادي هسه روح جيب حبشكلات يلا حيجون

--اجيبلكم قز القرط

--اي والله صدك هيفاء مال قز القرط يلا عوفها عود اثرملها طماطه تلتهي بيها

--يمه ماشبعتي منها ابروح اخيج اذا اجو رديها بيدهم

عمه. هههههه بعد عمتها غير ماليه عليه البيت اشلون جان وحشه ميندخل

--عمه عوفي ميت غيره تعالي اني وياج انروح للبستان وانته اذا رجعت ولكيتك اموصخ اخلي ذولاك الناس اتنضف مكان مواتكول ماكالت اسحلهم سحل وروح بابا

--حتى اسحلج واشمرج بقرب ازباله ولي من جهرتي خلي اطلع اجيب المعتازي

بليل كاعدين واندكت الباب ركضت فتحته شفت مصطفى ضحك كال هاولج بذات رحتي وكلتي عدولي شكو ضاله اهنا

سلم ودخل ورا البنات هيفاء وسماح اشكد مشتاقتلهن

حضنت سماح وبعدين هيفاء اخذتهن للغرفه جنت فارشه محضرتها جنت اتصرف كأنما هذا بيتي موبيت اهلها لان عمه حسستني انو هيه امي واحن بعد جان وياي

سماح جانت ضايجه كالت العمتي ها يمه نسيتيني بعد ماتجين لكيتي غيري

--ياا ييمه والله ماانلحك يگضي اليوم ابسرعه

--لاعيني كولي غزيلان شاغلتني ونسيتج

--ياااغير ماليه البيت عليه ولج هاي ارويحتي

--اي شكو عليجن متونسات قابل مثلي امكابله المطبخ ودك شغل

ضحكت كلتلها لاعيني اهنا نطلع بالنهار وبليل نسهر ويه مكرم انسوي سهرايه يوميه اتخبل

شغل ماعدنه بس قليل على السريع انخلصه وكت الفراغ انروح للبستان نتونس والله تسوه عيشت صبوحه الف مره والله نصيحه عوفيهم وتعالي ويانا اهنا شكو باقيه اشو رجلج وماهو بعد شنو المانعج

--يببو لوباقيه على صبوحه ميخالف تعالي شوفي عمتي ام مؤتمن هالايام كالبتها عليه هوسات عمي بعد كطع رجله من يمنه باقي ويه ام مصطفى ومؤتمن ماكو باقيه امكابله على كولتج صبوحه وكل اشويه اتكب هوسه فوك هذه كله كل مايفرغ مصطفى يسويله مصيبه على خف ايده ويطلع يخليها اتشيل روحها وتركعها بالكاع

--اي مودااكلج تعالي

--لاعيني والمن اعوف البيت غير بيت رجلي المره الحوك تصونه بيت زلمتها وكت غيابه

--لعد ضلي تستاهلين هوه طاير اهناك وانتي خدمي طلعي مصطفى وشمر الباقي ميستاهلون الله اشكد مشتاقه لمغامرتنه

--يااحتى هوه والله يكول البيت كئابه صاير مينطاق وين ايام غزل وجفجيرها

--عزاا بعد يذكر ههههه والله صدك اشتاقيت لذيج الايام

--تره موبس هو مشتاق اكو ناس يوميه يذكرون اسوالفج مشتاقين اكثر وحتى مداليتج شفتها امشكله بمفتاح سيارتهم

--امم اكولج كومي دنحضر العشه اني كملته بس انصب

--غزيلان ولي اني خطار كومي وحدج

--لعد مراح اسولفلج منو خطبني

--اصخام ابوجهج منو خطبج ولج

--وحق الله غير يطك بالكاع هيبه وفوك كل هذه ينكط كياته وصوته هادء فرق شاسع عن رجلج بس صوته يطرم الاذن

--غزيلان صدك تحجين لولعبه

--لاوالله بس تخلص العده حيجي يخطبني من جدو

--وانتي شنو اموافقه

--طبعا لعد شنو خومواضل عمري هيج باقيه بس اشرط علي اخلص دراسه وانتي هيفاء اذا سمعت واصله لمؤتمن قبل لاتخلص العده تعرفين شنو عقوبتج

--عرفت شنو اقصد كالت لاوالله مااحجي ابد

--اي لعد خلي اكوم اجيبلكم العشه

كمت دااطلع ومصطفى يصيح وين عشاكم يابه

--انتضر هسه بس لحضه

--ولج ياهسه صار ساعه بالباب شتسوين

--دااشوف نعال على كدي البسه ماادري وين راح نعالي

--خره بشكلج بت المنغولي ولج دزيتج اتجيبين العشه موتشترين انعال شتسوين بي على كدج لبسي اي واحد و ولي ويكلك ليش اتكلها ثوله

البنات كامن مدن السفره واني وعمه حضرنه ونقله الاكل وتعشينه جان لمه اتجنن حتى طعم الاكل يختلف

خلصنه العشه وشربنه الجاي وسوينه اجواء مال كعده حلوه مكرم شغل منقله وخابر احمد اجه يمنه هوه والبنات حضرو الكهوه والجاي جبت الحبشكلات

طبعا متخلو الكعده من صوت مصطفى

يخلص من اغنيه يبلش بالخ وكل واحد يختاره وحده يغنيها النه اشكد اتونسنه اتجنن الكعده

ذكرو مؤتمن اشلون مكانه خالي بيناتهم

اتصلو بي اول مافتح الفيدو ضحك اسمعت ضحكته حيييل اشكد مشتاقتلها حسيت كلبي عصرني جان يضحك ويسولف وياهم منطلق وهمه يضحكون يسولفلهم على الاجواء اهناك واشلون ملل وحده ومشتاق لكعداته ويانه

جنت كوه كاعده مونسيتك لويش من اسمع صوتك كلبي يدك ويحن كل ضحكه اسمعها من اتزيد عدد دكات كلبي وتكتلني اكثر

مصطفى. هامؤتمن عينك وين شمتيه يخوي اشو ادور

--لاسلامتك ماكو شي بس اشعجب ذكرتوني

--والله ملتمين امسويلنه سهره بيت مكرم ذكرناك كلت اتصل

--اكيد غلط وسب مو اعرفكم نواقيص متذكروني بخير

--لاوداعتك اكو عالم امبين الشوك فاض بيها

اتحسر وضحك مارد ضل ساكت

ضل مصطفى يسولف ويا بالالغاز وهوه يرد امبين بينهم شفره لان منفتهم شنو يحجون بس انتبهتله يريد يدير الكام عليه كمت رحت للمطبخ مااريده يشوفني هوه هم حس بطل انطاه الفون لمكرم واحمد يسولفون ويا وهوه رجع يسوي كهوه جديده لان خلصت صاح غزززززاله

--هاا

--جيبيلي البن هذه خلصان

طلعت لكيتهم بعدهم يحجون ويا كلتله مكرم تره ماكو كهوه خلصانه

--لااكو البارحه جبت تلكي فوك الكاونتر

--لعد ماالوح تعال جيبه

--ولج خليلج طبله كرسي شيكومني

--تره عالي مراح الوحهه كوم يلا

كام وانطاه الفون المصطفى

جان مصطفى يكلب بالجمر خله الفون يمه ويدنن شافني واكفه يم الباب صافنه غمزلي وعله صوته يغني اغنيه حسيته يقصدني بيها

شمرتله الكهوه ودخلت للمطبخ هو هم غلق الفون ماكمل حجي ويا عرف اتضايقت من كلام الاغنيه

--صاح غزاله وينج

--هياتني

--تعالي ناوشيني الفناجين

طلعت يمهم انطيته الفناجين وكعدت يم سماح الجان حالها مواحسن من حالي امبين

كملنه السهره بس ضاعت ضحكتي والفرحه اتلاشت احس بخنكه ابصدري كتمت القهر جواي مابينته الهم اضحك جذب اجاملهم بس جواي جان لهيب اشتياق

اتاخر الوقت رادو يكومون احمد كال موكافي باقيه اهنا عليش متجين وياي

عمتي. موش ابكيفك جدك كال تبقى اهنا لحد ميجي مؤتمن

--ومؤتمن شنو موطلكها شكو بعد

--ميخالف عمه روح لجدك احجي ويا لاتحجي وياي مؤتمن امنها يمنه يرجع واتفاهم ويا

--عمه تره ماصايره سكتنه اول بدايه كلنه تعبانه هسه مابيها شي بعد كافي لوترجع لبيت جدها لوتجي وياي

--ياااحمد مارضيتها منك جااني موش امكم نسيت تعبي وياكم هيج ضاع تعبي بترباتكم

--عمه على راسي بس الناس كلت وجهي يلا غززل لمي غراضج وتعالي وياي

مصطفى. متتحرك للباب لبالك مااعرف بيك زمال اترديها وياك تخدم مرتك

--مالك شغل اختي وحر بيها عسما اشغلها خدامه وادوس راسها متدخل

--بالعباس يااحمد احطك هسه واني الي ادوس راسك اذا انته زلمه خليها تتحرك من الباب يلا

سكت ماحجه جبان خاف راح يم مرته وكف مااعرف اشحجت ابراسه اشويه واجه كال رايح لجدي احاجي واجي اخذج حضري يلا

مكرم. احمد اختصر السالفه واطلع ولي هاي امانت مؤتمن متتحرك على كص ركبتي

مصطفى. لاباين جلده يحكه ابن عمي

احمد. على شنهو جلدي يحكني البت بتنه عايشه ويه غريب اشلون ترضاها

--اني ناقص ارضاها كلش عادي غزل راجعتلي واطلع احسن مااطلعك سحل

--مصطفى من الاخير اتريدها تعقد عليها هسه متريدها اخذها وياي

--من اكول انته واحد ناقص وكلب ابن كلب تعترضون لك انته اززززمال هاي اختي من انعل ابو شرفك اليوم شو تعال

كالها ماشفنه غير مصطفى سحل احمد طلعه بره وبلش بوكسات كوه هده مكرم من ايده ودفعه كله العالم منا انفضحنه يلا احمد اخذ مرتك ولي

ماحجه اخذ مرته واخته وراح مكتول خوش كتله دخل مصطفى صاح يلا انتن فضني

--شبسرعه خلص الوقت مالحكت اشبع من كعدتكم واحمد خرب السهره

--موش هو الخربها اكو منهو دازه ولايصير زلمه الغسل اذانه بحلك النسوان يلا ولجن اتاخر الوقت

سماح. عليش متجين ويانه ماطول رايحين تعالي انكمل سهرتنه مثل قبل

--لامااروح انتن ابقن فدوه

--لاوالله اني مؤتمن مايقبل اعوفهم وحدهم تعرفين البيت منو اله بس شوفي اذا قبل خلي يمج هيفاء

--ايي عفيه خلي تبقى يمي والله ضايجه وحدي

--والله انتي وهمتج اذا وافقو ماعدنه شي اني اكمش الشغل مكانها خليها يمج

رحت المصطفى اتوسل بي يخليها يمي بس مارضه

اتوسلت بي اشكد وترجيته كلتله والله مشتاقتلها بس اليله حبابه

--يابه مشتاقتلها تعالي ويانه والصبح اردج صعبه تبقى البت اهنا

--هسه يسمعك مكرم يزعل يكلك شنو ماثاق بينه وبعدين مكرم جان عايش وياها نفس البيت لويش اتشوفها صعبه اتخليها يمنه لعد اشلون قابل ابقى اهنا

--جاهوه ابكيفي الحجي خايبه ماتنجبين غير اوامر من الجهات العليا وبعدين ماني ماعندي اعتراض

بس جدج غثه متعرفي

--مراح يدري هسه نايم والصبح يطلع من وكت

--ومنهو يردها الصبح عندي شغل

--عمه اتجيبها فدوه خليها والله بس اليله انريد نسهر اني وياها مشتاقه لسوالفنه القديمه

--يلا لاتبجين جنج غزيل بابا بس اعيون ولي من طريچي الصبح قبل لايرجع جدي خلي عمتي اتجيبها

طلعو وهيه بقت طايره من الفرح خطيه متطلع ابد عدها هاي فد طلعه جبيره هوه نفس الحال صرت حتى اني مثلهن بس حبس ماكو طلعه ممنوع وصناهم للباب رجعنا لمينه الصاله رتبناها على السريع كمناها

عمتي جانت بغرفتها واحنه انضف بره اول مكملنه رحنه يمها كعدنه وجبنه ماتبقى من الحبشكلات انكمل السهر بيها

اشكد سولفنا وضحكنه مااعرف منين انجيب السوالف بس هيه تطلع وحدها من صدك ونسه

اتاخر الوقت فرشنه وعمه نامت وحنه ضلينه كاعدين وحده فتحت كلبها للاخ واتشاركنه اسرارنه

طلعت اشكد اتحب مكرم ومتعذبه صار اسنين طبكت مخدتي وصافنه عليها وهيه تحجيلي اشلون واحد يحب الخ وشنو يحجون وعايشين مشاعر مشتركه وطايرين بالحب هيه تحجي عن مشاعرهم واني عايشه بحلمي بعدني ويه مؤتمن لمن شفتها بدت اتغفي كلتلها يلا حيصير الصبح كافي وراج كعده ترجعين لبيت جدو

--اي صدك بس خلي اروح للحمام

--يلا اني هم اريد للحمام علمود مااكعد الصبح اضل على نومتي

--خلي اروح اول وبعدين انتي تره حجزت قبلج

--هههه ديلا علمااطلع بعد غطه

هيه راحت بين مااطلع الغطه

طلعته وفرشته على افراشنه دخلت للغرفه عفتها اتريد اتنام ورحت للحمام طلعت اتذكرت الشباج مالت المطبخ رحت سديته و رجعت للغرفه بس اتفاجأت مالكيتها

شكيت بيها يم مكرم عزا العزاج اشكد رعنه ولااتخيلتها هيج جريئه بس هسه مصار دقايق اشلحكت تفلت

رحت وراها على كيفي اريد اكبسهم اضل كامشتها عليهم زله والله ووكع بيدي مكرم دخلت واني كوه كاتمه ضحكتي اريد افاجئهه بس اني الي اتفاجأت بمكرم لكيته حاصرها يم الحاط وهيه تتوسل بي يعوفها وهوه فاقد عليها استحيت من منضرهم رجعت ليوره طلعت من الباب

وكفت على جهه بس صوتهم بذاني خجلت رجعت للغرفه عزا ابعينك مكرم هاي عود انته المؤدب عزا بسلا يختصبها

بسلا متوصل بي لهنا بس اشلون هذا حامي عليها اخاف يغلط بدون ميحس يربي اني اشورطني وخليتها اهنا

اجه ابالي سيف من جان يحصرني كلبي وجعني عليها هسه اكيد داتدعي عليه لان ضلت اهنا ابسببي هسه اشوداها اله نص اليل عزا ابعينج هيفاء والله تستاهلين اليصيرلج بس كسرت كلبي من تتوسل

كل ماردت اشجع نفسي واكوم اسحبها منه ماكدرت ماعندي ذيج الجرءه ادخل عليه

استحي من مكرم ادخل علي وهوه بهيج حاله يربي اشلون

ضليت افتر بالغرفه مثل المطلكه اروح واجي واكل بضافيري كل اشويه واكول هسه تجي بس ماكو

مرت ساعه واني كلبي وكف كلت ماكو غير سواله مصيبه هذه ليش لسه ماهدها بعد مااتحملت راح يااذن الصبح وعمتي تكعد رحت كلت اجفتهم واليصير يصير واجيبها منه وارزله صدك ميستحي ولاحاسب احساب احد عود امنها يمه مصطفى اشكد بذات

وصلت للغرفه ردت ادخل اترددت اخر شي صحت على كيفي هيفاء هيفاء

مكرم. تعالي غزل

--وين اجي مكرم خلي هيفاء تجي عمتي حتكعود

--يابه تعالي اشبيج

دخلت وعاصره كلبي لااشوف شي موحلو لكيتهم كاعدين عادي يسولفون هيه كاعده عدل وهوه يمها منتجي على الجربايه طابك رجل وماد الثانيه حضرته ماخذ راحته واني صار ساعه متت رعب ماضل شي مااتخيلته صار

اشرلي تعالي كعدي اخذت نفس كلتله عزا ابعينكم وكفتو كلبي رحت كعدت يمهم

--شكو لج

--عزه متت لبالي شو شصار

دفرني بحاشبه رجله على كيف كال بت الثوله شيصير يعني كاعدين انسولف ليش عقلج شاطح

--امم صح شلت راسي جانت امدنكه مستحيه كلتله لعد اشبيها ركبتها

طفر صم حلكي خره بشكلج وين وصلت لركبتها غزل لاتسمعج امي

--لعد صار ساعه مشتوله متت رعب

--والله ضالمتنه اصلا ناس فقره كاعدين اباامان الله نسوالف سوالف بريئه

--ديلا كومي نعست يالحبابين الفقره

اخذت هيفاء وطلعت نمت وكمشت ايدها كلتلها موامان انتي اخاف اترجعين اتفلتين

--اسفه غزل بس والله احبه

--لعد متتزوجون

--جدي معترض كال مكرم بعد ماعندي صبر اجيب اشيوخ واروح لجدي بس اول لازم يرد علاقته اباابو

--اووف اشكد دكتاتوي جدو هسه شهالطياح الحظ العده بس ولج خو ماسويتو شي

--لالاوالله بس هيج يعني. اا

--اي شفتكم كم بوسه عالطاير بس تره شفتج فاضحتج مورمه

--اصخام صدك اشلون اخليها ترجع الصبح اخاف واحد يشوفني

--باله شفتج وانكول انضربتي ركبتج شنو حتكولليهم اشبيكم ماشايفين عزا ابعينكم

--طبعا خيه من الجفاف قابل غزل احنه واراح انجيت على الثالث

--هم صدك اني راح اضرب الرقم القياسي بالعائله ههههه دنامي والله اذا ماكمشتها سالفه على مكرم وكل اشويه اهدده

--مينخاف علي كلتله هسه غزل تعرف فشله خلي اروح كال تعرف ومغسله تلكيها كامشه حراسه لمي هاي ذيبه تعرف اشلون تصرف بهيج اشياء

--امم موخبره صرت ابسبب تعدد الازواج ديلا خلي انام

رحنه بالنوم حتى للصلا بعد ماكعدنه من التعب

كعدت على دكت باب البيت

ماكو سنطه البيت فارغ طالعين هاي يمكن عمه ماخذتها ورايحه وماانطاها كلبها اتكعدني اباوع الساعه 12 والباب مستمره بالدك

كمت غسلت وجهي على السريع صحت منو

--اني

--اي انته منو

--حرامي المتنكر بالخليجي

-- اهاا بس لحضه

فتحت الباب كوه فاتحه عيوني بعدهن النعسه بيهن والف ابشعري اشرتله شتريد

اشو هذه صفن

--لك عيني شنو اتريد تره نعسانه ومافارغه لصفنتك كولش اريد ارجع انام

انوب قراصتي ناسيتها رجعت عفته انفتح من جديد

--عندك شي لو اتروح

--لا بس جبت مسواك لان مكرم خبرني كال ماعدهم وامي مافارغه تطلع اليوم للسوك انته اتسوك

--بس عمه مموجوه شمره يمك واني اخذه

--غزاله

--همم

--انتي هيج بلاحجاب كدام العالم عادي

--هاا ياااعزا نسيت البس انتضر

رجعت اركض خليت شال ورجعت لكيته واكف ضايج

--اكولك وخر فدوه دااطلع اخذ المسواك

--يلا ابراحتج اخذي بس رحمه لدينج صح بعدني ماعندي سلطه عليج غزاله لاتطلعين لواحد هيج مره ثانيه خليج وره الباب لاتفتحي

--انته مالك دخل وبعدين احنه محد يجينه بس اخوتي وهمه اليجيبولنه الاشياء وحتى لو طلعت انته مالك دخل اذا تدخل مره لخ حشكيك لمكرم تره

--عندج اخوه

--اي طبعا لعد مكرم ومصطفى واحمد

--اهاا كالها وضحك يلا ابنيتي بس سويلي طريق ادخله

--لاع اتخلي اني اخذه

--وين تاخذي رحمه لمحمد ابنيتي اكلج لاتطلعين شو وخري

--وخرت وهو من الباب دخل المسواك واشر سلم وراح صعد سيارته هذه اشبي خبل الحمد الله لبالي بس العدي انوب اشرلي فوتي وهوه بعصبيه

عزاا دخلت وطبكت الباب هاي المنطقه كلها اتريدلك واحد عاقل ماكو

اخذت المسواك للمطبخ صفيته اندكت الباب مره لخ طلعت صحت منو

--فتحي يمه اني

فتحته ودخلت كلتلها هلو عمه لويش اتاخرتي

--والله يمه اخذتنه السوالف

--اجه فهد جاب مسواك

--بسلاطلعتي ولج

--لعد منو يطلع محد موجود

--لاتحجين كدام مكرم يعزيني اليوم اذا سمع وحدج بالبيت عايفتج لاتجيبين طاري

--لاع مراح اكول بس شنو انسوي غده تره راح الوكت

--يلا اني بس اذب عبايتي حضريلي المخضر والحمه واني جايه

رحت احضرهن بين مااجت كالت ها ولج كملتيهن

--اي عمه هياتهن اني طبخي واني حسوي الخضره بس اتعطلتي

--يبوو غير قايمه القيامه اهناك

--على شنو شصاير جديد

-- عمتج ام مؤتمن مخبره ابنها اذا مااجه وشافله حل ويه ابو تحرك روحه لان ابو تاركها وضال ويه ام مصطفى وجدج متعارك وياها اشلون اتريده يهد شغله لخاطر شغله متسوه

--وعالاساس ابنها يكت حنيه ابسرعه اجه ونقذها

-- تدري مايجي ولايعبرها بس من حركت كلبها خبرت جايه ام تهاني هم اتسولفلهم على بتها اشلون مرتاحه ومتونسه اهناك وحملها زين طلع عدهم ابنيه ماخذ سونار وفرحانين اتكول فرغو الغرفه المقابيل غرفتها اتريد اتجهزها للطفل بس جدتي ماموافقه اتكول لمن مؤتمن يكول يالله ميكدرون يتصرفون من كيفهم

--هسه شعشبونه اطكها بسحر اتخليها اتكلهم فرغو البيت للطفل موغرفه

-- لاعيني تالي صايره عركه وطالعه زعلانه ام منتهى كومي ياام مؤتمن كسري القفل وطلعي الغراض الي باعتهن والي سماح ضمتهن

--غراضي باعتهن اكيد مؤتمن كايللها

--لايمه وروح معتصم ميدري من كيفها

--لعد سماح اشومكالت البارحه

--مارادتج تكدر خاطرج بس والله اذا اجه مؤتمن راح يسويها مصيبه

--لويش بعد انفصلنه احنه اكولج عمه بعد اشكد للعده

--هااا ماضل بس هالشهر وتخلص

--عزززا هاي شبسرعه دتركض الدنيا

--يمه عمر يروح اشهر متعجبه عليهن ليش اتسالين

--ماكو بس اذا خطبني فهد راح اتوافقون

--يا عليش اتسالين هيج سؤال

--شنو ليش انتي اتكولين حباب وابن ناس اخاف يروح لجدو وجدو يوافق اني مااريد اتزوج تره جنت اجذب البارحه

اتعقدت من هالكلمه عمه اريد اعيش مثل قبل ابراحتي اريد اكمل دراستي مااريد ارجع لشلعان الكلب كافي السواه بيه مؤتمن شمرني وبعدني ماما بعد حتى مااكدر اوصللها كولش كافي عليه

--والله شكلج بعد ماادري انتي هم حقج بس ييمه انطي مجال خلي انشوف شيصير

--عمه رجعه ماراح ارجع لوشمايصير مؤتمن انتهى من حياتي وفهد هم مامقتنعه بي نفس اطباكات مؤتمن احس وباء منتشر بالمنطقه عدكم

--يالله يايمه لاتحركين ابروحج ماعونه اتصيرين زينه عوفيهم خلي يولون

--عفيه انتي كلتيها اتصيرين زينه يعني سدي السالفه راح ابقى اهنا واكمل دراستي

مرت الايام وخلصت العده واني بعدني يم عمتي مرتين دز جدو عليه بس مارحت كرهت ذاك البيت واهله من صدك مااريد ارجع

وقررت صدك مااتزوج بعد وابقى اهنا اشو امدلليني وطلعات وسهرات دوم مكرم ياخذنه على الشط اشكد ونسه نرجع لتالي اليل ونسهر بليل مرات انضل للصبح

احلى شي من يجي يتوسل بيه اتصل بهيفاء يخاف يتصل هو ويطلع احد لازم اني اتصل واحجي وياها اشويه وانوب هو ياخذه يكمل حجي خاصتا بليل ابيوم الميجي يكلي اتصلي كمت افتقده اني اروحله لبالي زعلانيين بس من اساله يكول لاماردت ازعجح لبالي نايمه

صار كم يوم مكرم يصفن خفت اكو شي اشوفه محتار بس ميحجي لحد مااليوم الصبح عالريوك كاعدين كال عندي صديق طلب ايدج شتكولين

--مكرم فدوه سد هيج موضوع بعد زواج مااتزوج لاتفتحون هيج موضوع وياي

--يلا عوفج انسي هذا الشي حضري روحج اليوم وره الضهر عدنه مراجعه

--هم مااروح

--غزل لاتشلعين كلبي صار اسبوعين حاجز بطلاع الروح وصلنه السره اجي وره الغده اشوفج متحضر اسحلج غصبا عنج

--بس اني مابيه شي صرت زينه

--ميخالف بس نطمن ماراح نتعطل يلا اني رايح غزل مواتعطلينه

طلع واني مثل كل يوم اكوم للشغل وعمه للسوك تسوك اكمل شغلي بين متجي عمتي اوكف اساعدها هم بالمطبخ

صار العصر كملنا عمتي اصرت تجي ويانه وصلنه لكينه مصطفى استوه راكن سياره ودينزل اجه اتجاهنه جان يخابر ويضحك وصل سلم دخلنا جوه

كعدنه علما يوصلنا السره صار اليل والسره مواصل وكل اشويه فون مصطفى يرن يرد يكله بعد ماوصلنا السره

ماعرفت منو يخبر بس يمكن جدو لان اهواي يضل سال وهو يجاوب اخر شي راح للسكرتير يمكن انطى رشوه اشو من رجع صاحو اسمنه كالو بس يطلع الرقم الجوه ادخلون وراهم

عمتي خطيه مره جبيره وكل اشويه تعتاز حمام ابسبب السكر كالت بين ميطلعون الجوه اروح للحمام

رحت وياها هم اعدل الشال الي كل دقيقه فالت مااعرف البنات اشلون يضبطنه اشكد اخلص وقت ويا وماكو فايده بس اطلع من البيت يتزحلك

وكتفت لفيته من جديد يم المرايه بين مخلصت عمتي طلعنه رجعنه لمكانه لكيت مصطفى فاتح كام ويسولف

كعدت اشويه عنه اسمع يكله اتورطت مالبالي هالكد راح اتعطل كل ضني شهر وارجع تالي اتعرقلت شغلتي وطاح حضي اقل شي سنه يالله تنحل واحصل اقامه

--اشتريت شقه

--لايخوي مااشتريت ضليت على الايجار جاي ادور بلكي احصلي وحده زين سعرها و هم اتعجلي بالاقامه وانتم اسويتو بمعاملات شيخ علوان

--ماشي شغله بس امتانيك اتكمل شغلك وانحولك الفلوس بس ها تره اقطع شكو افلوس صرفتها على ذولاك الناس نص افلوسي گضيتها تحاليل وعلاج

--يابه اخذ التريده واذا ماكفنك احولك منا بعد بس لاتقصر عليش لسه مادخلتو يابه كوم انطي كم فلس للسكرتير لاتضل جلف

--وحك العباس انطيته بس ازدحام وهم زين ذكرتني هاي هم اگطعهن يلا يمكن صاحو الاسم خلي انكوم يلا نترخص

--الله وياك اول ماتطلع دزهن لاتنسه واي علاج لاتشتري مناك اني ادزه

--عليش ماادزلكياها مو افضل

اخذ حسره اسمعها وصلت ليمي كله روح مصطفى وسد الفون

كامنه دخلنه للدكتور اول مادخلنه شافني ضحك كال اشلون صرتي بابا

--الحمد الله اتحسنت اهواي حالتي بعد ماتجيني نوبات يمكن مره وحده اجت بدايه الشهر وخلص

--اي الحمد وعلاجج بعدج مستمره عليه

--لابس نوعيه وحده اخذ العلاج القوي تركته من زمان

سكت مارد اخذلنه تحاليل وفحوصات وقاس ضربات القلب وووو كومه اشياء بالساعتين يالله كملنه وطلعت النتائج كعد يقراهن كال المسويته غلط لازم اترجعين لعلاجج القديم صح تعبتي بالبدايه بس اهواي امحسن من وضع القلب ماراح اكتبلج اي نوع نفسه الوصفه اترجعين عليها

طلعنه وكف مصطفى على صفحه صور التقارير الطبيه ودزهن عرفتهن المؤتمن ضلت يتراسل ويا اشويه وطلعنه كال مؤتمن راح يدزلج العلاج القديم لازم تاخذي

--اي موهوه ابكيفه مااخذ حبايه لايخسر روحه ولاابد من هسه اكلكم تره

--غزل بويه انتي زعطوطه جاي يكلج الطبيب لازم تاخذي

--مصطفى والله مراح اخذه لاتعب روحك وتحجي اصلا لومايلح مكرم مااجي

مارد بس اتصل بمؤتمن وصوت مؤتمن يطلع من الفون من يصيح وحق الكعبه اجي اسحلها خلي اتصير ادميه وتاخذه غصبا ماعليها راح ادزه وخلي اشوف اشلون اتعاند انوب رجع يرزك بمصطفى خطيه هذا هم اتصل واتورط بعد يريد يسكته ميعرف اشلون

اني عفتهم ورجعت لسياره مكرم رجعنه للبيت

اتكول شو وين جنه وصلت ميته تعب كبل شمرت روحي اريد انام دخل مكرم كال باجر الصبح حضرو روحكم جدي عازمنا على غده

عمه. يمه ماطول هيج جاانه اروحن للزياره راح اسجل بالحمله وانته اخذ غزل وروح

--ابراحتج بس اشكد تبقين

--موش جثير 4 ايام لو اقل واردن وانته جيب سماح تضل وياكم اهنا

--سهلا كالها وطلع

نمت من التعب ماكعدت ولافكرت لثاني كعدت على صوت عمتي اتكول يلا كومي عمه راح الوكت

كعدت وبعد النعاس ابعيني كوه كمت غسلت وغيرت ملابسي مكرم هم كعد وراي عمتي الله يسلمها امغبشه علينه من الصبح اتكول شو اشعدنه

كعدت اتمغط كال سويلي ريوك غزوله

--والله متشوفه ابعينك خلي امشط شعري اذا هيج بيه حظ

--ولج جوعان

--امم هسه انروح نلكي الريوك حاضر غمزلته وضحكت هوه غمني ومشه يغسل وجهه

صدك طلعنه بلا ريوك ناس تشمر على ناس وعمتي مستعجله لان وراها زياره

تالي طلعنه هيج وصلنه اول مادخلت اتكلتنه سماح والبنات طلعن كولهن اهناك مجتمعات امبينه العزيمه جبيره جانت الله اعلم شنو اكو

سلمنه ودخلت لغرفه بيبي اسلم عليها صار الدرج كدامي عصرني كلبي اتخيلته بعد ينزل مثل كل مره مستعجل ويدكم بدكم اردان قميصه وبعده صوته ابااذاني ويكول وينن ريوكم

فززتني من الصفنه سماح كالت غزل جدتي امتانيتج يلا

اخذت نفس ودخلت لكيتها كاعده اتسبح سلمت من وره خشمها كوه عفتها على شنو اتكول كاتله ابوها طلعت للمطبخ ويه البنات اشكد مشتاقه لهيج اجواء كعدتنه وضحكنه وللمه

جانت ام مؤتمن واكفه تطبخ سلمت من بعيد اصلا ماردت السلام هم عفتها وكفت ويه البنات انحضر للغده اتذكرت مكرم خطيه بلاريوك كلت الهيفاء اتسويله دااحجي وياها دخل مصطفى بس وجهه اسود كال غزل تعالي جدي يريدج

--خير شنو رايد

--ماادري تعالي وسمعي ابنفسج

--لازم اكو شي لان وجهك موطبيعي

--اوو غزل فضيها تعالي

رحت ويا عاصره كلبي لان مصطفى جان امورث مشتعل نار دخلت للديوانيه لكيته كاعد هوه والولد بس مكان مؤتمن جان فارغ كمشتني العبره من شفت مكانه خالي سلمت على جدو كال تعالي بويه يمي

رحت يمه كعدت اول شي سال عن صحتي اشلونها

--تمام جدو

--ان شاء الله شوفي بويه انتي خلصتي العده وكعدتج بعد موخوش اتجيبلنه الاحجايه مؤتمن لايرضه يردج كم مره فاتحته بالموضوع سده قبل لااكمل

--تره حتى لوراد يرجعني اني ماارجع جدو والله ازعل منك اذا كلتله مره لخ

--لاماراح افاتحه لان ان شاء الله جايج نصيب خوش زلمه وابن ناس راح يصونج

--جدو اني مااريد اتزوج خلوني اشوف حياتي تره موكلشي الزواج

--انتي اصغيره ومتعرفين مصلحتج الزلمه خوش زلمه واحنه وافقنه بعد اي اعتراض مااريد

--شنو جدو تره موغصب ماراح اتزوج لاتوافقون لان والله حفشلكم ماراح اعقد اختصروها من الاخر ورفضو ليش منضركم يصير موحلو

--كمممممي ترفض غير اجسر راسج فنج اتفكين حلكج الولد خطب واحنه انطيناه العصر المشيه والخميس يملج واريد اشوف اشلون راح اترفضين حرام اخلي طلقه ابراسج اچتلج مكانج واخلص من مشاكلج شنهو ابتلينه عدنه بت مثلج امسوده اوجوهنه وجايبه روسنه لتحت

--جدو بس افهمني

--اشش حسج مااهيسه وجلمه زايده ادوس على راسج يلا فارجينه

--جدو زواج مااتزوج وشتردون اتسوون سوو

داندر اروح مااحس غير انضربت بالعصه اجت ابطني خلتني اطفر من الالم كام وسحب العصه راد يضربني بعد ركضو مكرم ومصطفي واحد بعدني

وواحد كمش جدو يبعده عني صاح بعلو صوته وروح ابني العقد الخميس وذا سمعت من نفس ادفنج واخلص من مصايبج واريد واحد يوصلها المؤتمن اله اخلي طلقه ابراسه

دفعني مصطفى طلعني من الديوانيه بره كال روحي منا غزل رحمه لدينج لايااذبج

--عزاا ابعيني ومؤتمن شنو مراح اتكله

--لاماراح اكله لان مرتين طلبنه من يردج مارضه كافي ذله شطلعت خلي يولي شوفي روحج

--صدك دتحجي مصطفى يعني مراح اتكوله راح اتخلي جدو يسوي اليريده

--مااكدر اكله شفتي جدي شنو كال ماعندي مانع ينفيني من الديره ويزوجج غصبا عن ابوي ماراح نستفاد شي العقد الخميس يعني بعد يومين ومؤتمن بين ميحجز ويرجع راد اقل شي اسبوع

رحت عفته امبين امكملين الشغله ومخلصين ولازم انفذ اليردو رحت لغرفه بيبي كعدت دخلت سماح وراي كالت ليش هالبجي ياعيني

--سماح راح يزوجوني

--والله خيه يكولون خوش زلمه

--يعني تدرين ومكملين كلشي واني اخر من يعلم شنو من اهل انتو لويش متخافون الله تره بشر اني لويش هيج دتسوون بيه ولكم حتى الحيوان هم محد يقرر مصيره هيح

صاحت بيبي وجع شكو تصارخين فوك ما لميناج بيت عاجبج يوميه بيت والله مال حرك انتي كالتها وكامت طلعت ضميت راسي ذوله اشلون راح اخلص روحي منهم سماح كاعده يمي مكسوره اكثر مني

--سماح فدوه شوفيلي جاره الخميس مابقالها يومي

--اشلون شنهو حسوي شطايح بيدي تراني مكسوره اكثر منج

-- خبري مؤتمن فدوه بلكي يجي يخلصني من جدو هو محد يكدرله غيره

--ولج هو هاي سواها كلها لخاطر مؤتمن لايفكر يرجع لهنا يريده يبقى اهناك يكبر شغله اتخبل من عرف شيخ علوان سانده كال كبر راسه عليه بعد مااكدرله احسن طريقه يبعده بيها هو انتي يعرف بعد ميلفي الديره وانتي بيها معرسه

--واني شنو ذنبي يدمرني لخاطر حفيده

--خيه بلكي يطلع خوش رجال ويعوضج عالشفتي وترتاحين ويا

مارديت عفتها وكمت رحت لغرفته هيفاء ذوله مقتنعين ومقررين واني لاشيى هيج دميه يحركون بيها وين اروح المن اشكي

للعصر وصدك اسمع هوسه مخبوصين اجت المشيه

احس روحي هالمره من صدك ضعت

عزا ابعيني اني اشسويت ابروحي

صار اليل واني على كعدتي ماطلعت جدو رفض ارجع ويه مكرم كال مابقى يومين للعقد يجون الناس ياخذوها منا

خليت راسي على المخده محتاره وين اروح اشرد لو وين اروح اي اشرد ماكو غيرها وين مااروح اروح بس ماابقى يمهم

كعدت مااكدر انام مصطفى طلع من العصر سمعتها اتعارك ويه جدو يمكن طرده طلعت بره اريد اتنفس حسيت روحي ضاگت سمعتهن بالمطبخ يضحكن اسمع صوت مؤتمن يسولف وياهن شلت شعري لفيته

ورحت يمهن اول مادخلت كالت رجاء تهاني حبيبتي اكيد مرتاحه مو بقالج مؤتمن بس الج

وذيج طكتها ضحكه اشعلاتها شعلت كلبي بيها رحت اخذت مي من الثلاجه واسمعهن كملن سوالفهن اتكلها يوميه يطلعني عايشه بنص السعاده

عساها ابختك مؤتمن جبتني لهنا وشمرتني وعشت انته

ضليت واكفه يم الثلاجه اباوعلهن كلمن عايش حياته ومرتاح اني وين صرت بينهم ليش هيج ادمرت

شنو الجنيته وهيج استاهل منهم الصارلي رجاء مستمره بالضحك وتهاني امشاركتها اتسولفلها اشلون طايره بالعيشه واشلون راح يستقرون كلها ماحركت كلبي بس من كالت كلمن اخذ جزاته ربي يعرف الحيايه كطع روسهن خلاهن بالمكان اليستحقنه

سمعت مؤتمن عاط بيها بيها بس مابرد كلبي احسه فورتني ركضت اخذت الفون من ايد رجاء شفتها كاعده ويمها مؤتمن امدنك على الفون مالته ملتهي يمها كلت

-- هلوو تهاني اشلونج حبيبتي

ابسرعه شال راسه مؤتمن باوعلي مادرتله بال رجعت اكمل كلامي وياها

تهاني - هلوو غزل اشلونج

--والله بنص الخير بس حبيت اعزمج على زواجي

شنوو

اي حبيبتي اليوم اجت المشيه مالتي سدت الديره كلها وباجر العرس

اشلون الله عوضني بشخص يسوه زلم الديره كلهم-

الثاني والعشرين من هنا

تعديل المقال