رواية الهجرس الفصل العشرين 20 بقلم رواء هادي
_ليش ماكتي ؟ ليش ماهربتي ؟ليش بقيتي ساكته إذا فعلآ كنتي مجبورة ؟ ليش هيج سويتي بي شلون
طاوعج قلبج وعفتيني
وأني بأمس الحاجة الج ؟! بيش أحسن مني لاخذتي ورحتي لبعيد ؟! هيج أني رخيص
بنسبة الج يم...
ردت اكوللها يمة بس ماتستحق هالكلمة رجعت ظهري على الكرسي ورفعت رأسي ليفوك وسديت اعيوني أريد استوعب لجاي يصير وياي؟
انا بحلم لو بعلم أمي تأمرت منورة ظهري وباعتني !!!
بلعت ريجي وكتلها بصوت ناصي "
ليش هيج سويتي بي ؟
ردت بصوت مبحوح "
جبروني
_جبروج على قتلي ؟ لو على تركي ؟
_قتلك
_وتركي
_من اراتي الكاملة تركتك
أبتسمت ونزلت رأسي اباوعلها كاعدة بالكاع وتباوعلي وتبجي " الله عليج من ياطين
مخلوقة أنتي؟
_ابوك جبرني اتركك
_لا أنتي تركتيني ابوي ماله دخل
_مو راد يتزوج ...
_اي وإذا تزوج مو اخذتي رجال متزوج
_لااا مرته ميته
_جذابة مرته عايشة من تزوجتي وراه أربع أشهر لكوها شانقة روحها وانا متأكد أنتي
ورجلج شنقتوها ..
_منو كالك ؟
_اعرف الصغيرة والجبيرة عنكم احسلك اعترفي شلون ماتت وليش عفتيني وليش بعتيني؟ تره والخالق الكون كله اشوفج شي بعمرج كله ماشفتي
احسلج اعترفي
رجعت تبجي خلت ايديها على وجهها وتشهك كمت رحت وكفت فوك رأسها اباوعلها شكد ذليلة صارت وتذكرت
نفسي من عافتني
وراحت جنت ابوس بديها ورجليها في سبيل تبقى عندي
نزلت ايديها بالكاع رادت تكوم بحاله أعصاب مني دست على اصابعها بحذائي قوي
_تعترفين لو انتقم منج
_ااااااه
شكد مابي قوة دست على أصابعها وشلت رجلي بهدوء لزمت ايدها بيدها الثانية وتنفخ عليها
بألم ودموت تكد ...
_اففففف ليش هيج مو امك اففففف ااااه يمة افففف
_امي دفنتها من زمان بنص المجاري
_حسبي الله ونعم الوكيل بيك هجرررس
_والله حسبي الله ونعم الوكيل بيج حنان مو بي أنتي وحدة ناقصة شرف وناقصة أخلاق وتربية ولج امثالج حرام تبقى عايشة بهاي الحياة حررررام
كعدت كدامها بسرعة مديت ايديه وخنكتها من اركبتها كل قوتي وهي لازمه أيديه بأيديها تريد تبعدني عنها قررت انهي حياتها هسه واخلص منها
وجهها ازرك انكطع النفس عنها عفتها بسرعة من رن تلفوني شكد مابي قوة دفعتها بالكاع وكعت تكح
بصوت عالي " الله ياخخذذذذج
كمت بسرعة رحت للمكتب جريت التلفون شفت المتصل جدي وأكيد عرف بالقضية فتحت خط هاض بي " ولك هاي صدك امك الناقصة واهلها ورجلها
رايدين يقتلونك صددددك ؟
_اييي
_اليوم منو يخلصهم مني
_كلهم بالسجن
_وامك الكحبة وياهم
_لا
_ولك ليش لااااا
_هي بلغتني وكالتلي يردون يقتلوك
_متعاونه وياك؟
_اي
_همزين طلعت منها شغلة برأسها خير
_اي
_انا جايك هسه للمركز واريد اعرف بالسالفة شنو وراح اسوي كعدة عشيرة وافضحهم بالعشيرة كلها واخليهم يندمون على اسوايتهم القذرة
_لشوفه سوي بس لا تجي راح اجي انا بعد ساعة
_ماشي انتظرك
_خوما دروا جداتي ؟
_لابس ابوك وبارق
_منو كاللكم ؟
_ابو ياسر أتصل بي وكالي
_هاا
_اي لا تتأخر
_ان شاءالله ماتأخر مرخصتك جدي
_الله وياك دير بالك على نفسك
_ان شاءالله هلأ بجدي هلأ
سديت الخط رجعت التلفون فوك الميز والتفتت عليها كاعدة وتبجي دموعها ماتشفوا أبد...
_هسه تحجين ؟
_ تريد تكتلني ؟
_اي والله اكتلج واخلص منج ِ
اندك الباب حجيت وياها ...
لمي نفسج بسرعة وتكعدي فوك الكرسي
بسرعة ...منووو ؟
ياسر_عندي خبر صادم
_دخل ياسر
_شدخل الباب مقفول تعال افتحه
_انتظر ...
كامت بسرعة كعدت فوك الكرسي مطيتنه ظهرها رحت فتحت الباب الياسر طبك الباب وكال "
_زوج امك طلع ارهابي ومطلوب من سنة ٢٠١٠
_اي ادري
_شمدريك
_قبل فترة جبت عنه معلومات
_ليش ماكلت.؟
_كلشي بوقته حلو هسه شتبين بالتحقيقات ؟
_ولد خوالك هاي اول عملية شاركوا بيها ورادوا يقتلوك اما زوج امك البطل ارهابي من طراز الأول وطلع هو شانق مرته وكايل للعالم هي منتحرة
_تعرفين بهذا الكلام
_لايمة منين اعرف من صخام برأسي ابو جهالي إرهابي
_الله حبج وخلصج منه
ياسر_اي والله هسه وين تودي امك ؟
حنان _ودوني لبيت اختي الجبيرة
هجرس_ماشي .. شعندك ؟
ياسر_ماعندي شي راح اطلع بعد ربع ساعة للبيت...تريدني اجي وياك ؟
هجرس_لامايحتاج
ياسر_اخاف يتعرضولك مرة للخ
هجرس_هسه لموا جوالاتهم وطفروا خارج ديالى
ياسر _جبناء
هجرس_هم لو مو جبناء مجان جبروا هالمسكينة وخلوها تتصل بابنها علمود يجيبونها لعدها
ويكتلونه كدام اعيونها
ياسر_مايدرون بابنها هجرس ههههه
هجرس_ مخابيل مايعرفون بيمن اندكوا هههههه
ياسر_اي والله يله انا طالع معتاز شي
هجرس_سلامتك حبيبي
طلع ياسر طبك الباب وراه رجعت كعدت كدامها "
حجي حنان شلون طاوعج قلبج
ونصبتيلي كمين ؟
_والله ماطاوعني بس هم جبروني شسوي يايمة
_بشنو جبروج ؟
_كالولي بس ماتتعاونين ويانه راح نقتلج ونقتل اولادج وانا ضحيت بيك علمود أنقذ نفسي واطفالي
_بارك الله بيج والله يكثر من امثالج ضحيتي بي بطفولتي وهسه من كبرت وصرت رجال بطول الباب وعرضى هم ضحيتي بي علمود نفسج ...
ولج فهميني يامحمد من ياطينة مخلوقة أنتي.... بس فهميني شلون هيج تكدرين تسووين .. تعاي علميني خل اتعلم منج اصير عديم المشاعر
والاحساس واقتل واضحي بأقرب الناس لي بدم بارد يله حنان علميني فدوة خل اصير مثلج داعشي
يله علميني شتنتظررررين
جريت ايديها حيل ملختهم ملخ صارت تعيط وتصرخ وانا صابتني هستيريا تخبلت خبال وفقدت عقلي وهذا انا بس اتعصب وانقهر ماشوف كدامي
عفت ايديها وكمت صارت تبجي وتتوسل بي اعوفها لخاطر اطفالها بعدهم اطفال اصغار ومالهم احد غيرها تعرف بمصير زوجها شنو أكيد العدام
مثل طلال ابن اخوها "
_خل يعيشون لعشته
_هم ماعدهم احد يعتني بيهم أنت عندك جداتك تلاثه وجدك وأبوك هم شعدهم بس كلي شعدهم
غيري انا امهم
_اي باجر يكبرون وتبعينهم مثل مابعتيني علمود نفسج
_والك والله متندمه بكد شعر رأسي تركتك ورحت تزوجت لو باقية عليك ولا هاي الذلة والإهانة تالي عمري ادخل مراكز الشرطة وبتهمة ...
قتل ابني ااااه يمة تعاي وشوفي شصار بحالي اااه يمة وين رحتي وعفتيني ووووين
_لعد أنتي وين رحتي وعفتيني وييين ؟
_الجهنم الحمرة رحت وعفتك الله لاينطيهم الله لايوفقهم ان شاءالله مايشوفون الفرحة بعيونهم مثل ما اني ماشفت الفرحة بعيوووني
ونحرمت منك
_منو لتدعين عليه
_اخواني منوووو
_شبيهم اخوانج وياج ؟
_هم جبروني اتطلك من ابوك واتزوج صاحبهم
_احلفي ؟
_وغلاتك وغلات تراب كبر امي وابوي هم جبروني اتطلق من ابوك واعوفك وأمشي
_جذابة ماصدك بيج
_ادري ماراح تصدك بعد لشفته مني اني بالعمدة رتك تكرهني وماتحبني لان اعرف بيك متعلق بي موشلون مجان ماردت افراقي يأثر بيك
رتك تكرهني وتنساني ولا اشوفك ميت أنت وابوك كدام اعيوني
رحت لعدها لزمتها من كتوفها قوي وكومتها "
شنو ميت انا وابوي ؟
_اخوي ابو طلال كالي بس ماتطلقين من وائل اقتله هو ابنه كدام اعيونج واجرج وازوجج لهشام اول يوم الفاتحة ضحيت بنفسي علمودكم
_ليش ماكتي لعد ؟
_ماكدرت اكول
_شنوو ماكدرتي شلون هيج ؟ يسوون بيج ؟ شلون يخلونج تطلقين من زوجج وتتركين ابنج المريض وزوجوج لواحد ساقط وكواد مثل زوجج فهميني شلون
_هو جان يريدني من زمان
_شنو يريدج ؟
_قبل لا اتزوج أبوك جان مخلي عينه علية ومن تزوجت ابوك كطع نفسه وره ١٦سنة شفته بيت أهلي ومن هذاك اليوم انكلبت حياتي جحيم
_يعني جان يهدد بيج ؟
_اي هددني اكثر من مرة اعوف ابوك واعوفك واتزوجه
_لايل ناقص ...واهلج الكواويد وين جانوا لعد ؟
_جان وياهم يشتغل إرهابي وصاحبهم من ايام قبل ويعرف بكل دروبهم لذالك مايكدرون
يرفضوله طلب ...
_بسيطة انا اعلمه واعلم اهلج
عفتها وتجهت إتجاه الباب صاحت وراي "
وين رايح ؟
_اصفي الحسابات أبقي هنا لا تطلعين
_فرقد تعال
_أرجع والله بس اطفي نار قلبي
طلعت بسرعة سديت الباب وراه تجهت بتجاه مكتب جواد وصلت كدام الباب دكيته "تفضل ؟
فتحت الباب ودخلت ضربتله تحيه لأن شفت شرطة عنده"
سيدي رايدك موضوع ِ
جواد _ تفضل استريح ملازم فرقد
كعدت بقى يحجي ويه الشرطة كمل حجيه وياه ضربله تحيه وطلع "
_جواد أريد اشوف زوج امي
_هسه
_اي هسه ممكن
_ليش ؟
_كشفت أسرار وهل أسرار متعلقه بي وبأمي وأهلي وأريد اتأكد منها صحيحه لو لا
_بس تتأكد ماتسوي شي ؟
_قابل شسوي ؟
_أخاف تضربه لو تسويله شي
_لامطن ماراح اسوي شي بس احجي وياه يله كوم مابقى وقت راح ينتهي دوامي
_ماشي كوم
كام كمت وراه وداني عليه داخل السجن جان سجنه انفرادي حاطي الواحدة باوعتله كاعد مثل الذليل ومخلي راسه بين رجلي بعد بيتي كافرين بي كفران
جواد وحيدر "
_يله احجي ؟
_خل ادخل جوه
_لا احجي مناه
_مااخذ راحتي افتحولي الباب خل ادخل دقائق واطلع
_فرقد شنو بالك يدور
_أعرف الحقيقة
_اكدر أعرفها إذا ماتصير زحمة
_اي بس افتحلي الباب مابقالي غير ربع ساعة
وينتهي دوامي
_ماشي
فتحلي الباب زوج امي رفع راسه من شافني دخلت وراي جواد كام مرعوب أبتسمت بوجهه "
هجرس_ هاا شلونك ؟
زوج امي_شتريد مني ؟
هجرس_ طمن مو انا اخذ روحك القانون ياخذ روحك وياخذ بثار الأبرياء لقتلتهم .. المهم مو هذا موضوعنا
موضوعنا غير ....
زوج امي_موضوعيش ؟
هجرس_ ليش هددت امي انت واهلها وخليتها تطلق من ابوي وتتركني وتحجي علية كلام
قاسي علمود اكرهها ؟
زوج أمي _جنت أحبها واريدها
هجرس_يعني الكلام صح ٍ
زوج امي_اي صح انا جبرتها وخيرتها لو لو طلاق لو موتكم
هجرس_هاا منو جان متعاون وياك من اهلها ؟
زوج امي_ابو طلال وابو عمار
هجرس_ من شوكت خليت عينك على امي ؟
زوج امي_قبل لا يتزوجها ابوك بشهرين بوقتها طلعت خارج العراق ومن رجعت لكيتها مزوجه ومن هذاك
اليوم هي طابعة بالي
جواد _الله يلعنك من رجال ولك شلون تخلي عينك
على مره مزوجه
زوج امي_الحب مايعرف مزوجه لو ابنية وانا قبل ابوك جنت رايدها وحاجي ويه اخوها ابو عمار وانطانيها ابوك
اخذها مني وانا رجعتها منه بالقوة
كوه لزمت أعصابي وتذكرت زوج حنين احمد الناقص هم خله عينه على حنين واخذها مني التاريخ عاد نفسه بي بدون كلام جبته بوكس بنص وجه
وكعته للكاع لزم وجه بكفوف ايديه ويصيح بألم ردت انقض عليه دخلوا أثنين من عناصر الشرطة وجواد
وياهم لزموني ماخلوني
جواد_شتفقنه فرقد
هجرس_عوفني اخلص عليه عوفني جواد
جواد_ هو اليوم باجر خالصة حياته ليش توسخ ايديك بدمه القذر أمشي اطلع لاتوكعنه بمشاكل ويه المسؤول أمشي فرقد امشي شبيك لزكت
جروني جر وطلعوني بسرعة قفلوا باب الزنزانة لزمت باب الزنزانة قوي بيديه ألاثنين وهزيته هززز عليه " والله العظيم له اخليكم تبوسون القنادر على سويتوا بأمي
لا تحلمون اخليكم تتهنون ..تتفووو عليك ياكلب
ناقص انا اعلمك
مشيت من يمه سريع عدل لمكتبي دفتح الباب لكيت امي كاعدة مخليه ايدها على خدها طلعت مظلومه وانا ظلمتها بالزايد وقبل شوي ردت اموتها واخلص منها .
ياربي مرات الأنسان ينجبر يسوي أشياء خارج اراته وامي انجبرت وسوت أشياء وأفعال خارج ارادتها حكم
القوي على الضعيف .
وهي مره ماتكدر وعارض أهلها .
_يمة
باوعتلي بتسمت ونزلوا دموعها "
صار سنوات ماسامعتها منك
_راح تسمعيها هواي مناه وجاي
ماكدرت الزم دموعي نزلوا بسرعة كامت حضنتها كل قوتي وابجي وهي تبجي ماصدك طلعت بريئة وراح ارجع أشوفها واسمع صوتها وأنام بحضنها
فراق جبير داخل قلبي صار من يوم الفارقتني شكد حاولت املي هذا الفراق بعالم غيرها مامله أبد شبعت بجي من كيفي وراها بعدت عنها امسح بدموعي
وأضحك "
شكد جنت قشمر لعد
_مو قشمر اني خدعتك من وراهم
_بعد ماكو خداع بينت الحقيقة وراح ياخذون جزاهم
_ان شاءالله
_هم يله نطلع من المركز وين تردين اخذج لما اضبط أموري
_بيت اختي الجبيرة
_ماشي عدلي حجابج وعباتج علمود نطلع
_ماشي
دقائق وطلعنا انا وياها من المركز خليتها تقطي وجهها ماريد احد يتعرف عليها المهم اخذتها وطلعت بالطريق اسأل بيها وهي تجاوب اخر شي سألتها
_ليش ماخبرتيني ناصبيلي كمين
_ماكدرت
_شلون ماكدرتي عندج تلفون وجان اتصلتي او دزيتي رسالة
_اخذوا التلفون مني وحبسوني بالغرفة حتى جهالي اخذوهم مني
_حسبي الله ونعم الوكيل زين جهالج وين ؟
_يم اختي الجبيرة
_شعجب يم اختج ؟
_وداهم ابوهم وكاللها طالعين لزيارة وماريد اخذ جهال وياي
_ناقص ماعلية عتب ... زين هو مو اكون يطلقج
_منو كال ؟
_سمعت
_جذب ماكو هيج كلام
_مو جنتي بيت اختج وابن عمج سوالج وساطة واشتكيتي علية بالمحكمة علمود النفقة
_منين يطلعون هذا الكلام ؟
_يعني ماكو هيج كلام
_اي والله ماكو من يوم لاخذته مارحت زعلانة لبيت أهلي بالعكس جان مدللني وشريد يجيبه وحتى بيته سجله بأسمي ومحلات هم باسمي
_املاكه باسمج
_اي
_وبعد شنو باسمج ؟
_هو البيت ومحلات خمسة باسمي
_ماعنده غير هالملاك
_لاماعنده غير ذني وعنده فلوس بالمصرف كلها باسمي
_والله ملعون هذا سجل كلشي باسمج أخاف ينكمش ويصدرون املاكه للدولة لان تاجر
مخدرات وارهابي
_وهو مديون تره
_لمن
_ساحب فلوس من الصريفة قبل سنتين وهسه يركضون وراه
_وين وده الفلوس ؟
_هو هم اشتغل بالصريفة واكلوه العالم
_ناس تأكل ناس هو هذا شغل الصريفة حرام كله ربه
_اي
_زين شعجب ماطلع من فلوس المصرف ودفع
_شوف منو يدفع للعالم هو شغله يأكل العالم مو العالم تأكله
_ضحك على العالم وسحب افلوسها
_اي جم مرة جوه تعاركوا وياه هددهم بالقتل
_هه مليشيات
_الله يلعنه ويلعن اخواني وياه
_انا اعلمهم اليوم
_شراح تسوي
_إذا ماهديت ابيوتهم فوك روسهم فلا اطلع هجرس
_دخيلك يمة لا تسوي هيج وتذبح العالم
_شردوا هسه ومحد ماكو بالبيوت
_شمدريك ؟
_توها وصلتني رسالة من بارق كال رحنالهم هداده مالكينه أحد مقفلين البيوت وشاردين
_جبناء
_هم لما موجبناء مجان شتغلوا رهابية ويخطفون ويسلبون ويقتلون بالعالم البريئة
_اي والله حتى اني بتهم ماسلمت من شرهم
_هاي هم مثل الدواعش بكلشي يضحون
_اي
_واشك منظمين لداعش
_مادري والله سد سيرتهم بعد ماريد اسمع بيهم
_براحتج يمة صدك شلون علاقتج باختج الجبيرة
_نعمة من الله
_زين شوفي انا ماراح اخليج يمها بس اضبط أموري اطلعج من يمها واخذج ...
_وين تأخذني ؟
_اممم محتمل اجيبج عندي بالبيت
_مخبل أنت
_ليش مخبل امي واريدها كدامي كل ساعة وثانية اريد اعوض لراح واشبع منج
_لا يمة مايصير ارجع لبيتكم اني مره مطلقة من ابوك وعلى ذمة رجال شلون تقبلها اجي اعيش وياكم
_هالكواد راح اطلقج منه بس خل اضبط أموري
_شنو بالك فرقد
_هواي أشياء بالي هاي وصلنا
_ماتنزل
_لا والله مانزل امر عليج عود بغير وقت
_شوكت تمر ؟
_باجر عندي خفارة محتمل عكب باجر إذا ماعندي
شغل أمر بيج
_ماشي يمة دير بالك على نفسك
_وأنتي هم ديري بالج على نفسج والجهال
_يهمك امرهم ؟
_طبعآ هذوله اخواني من امي
_عبالي تكرههم لان أخذوا مكانك
_شنو ذنبهم هم اكرههم وحتى أنتي ماكرهتج جنت احاول اكرهج واكول اكرهج كدام هذا وهذاك هو كله
جذب الليل كله يمر بطاريج
_لو ميته ولا عايفتك
_بيش طالبه روحج بالموت الحمدلله والشكر بينت الحقيقة ورجعتي لعندي وانا رجعت لعندج وراح اعوضج عن كلشي وانتي هم تعوضيني عن كلشي فات
_الله كريم
_ايدج خوما تاذيج
_شوي
_الله يكسر رجلي ش...
_اششش يمة بيش طالب روحك بالكسر من حقك تصرف وياه هيج لو واحد غيرك طلقة برأسي وشمرني للجلاب ولا سأل ولاكال مو مثلك مثل المخبل
جنت تركض مناه وتركض مناه علمود تطلعني ..
_اوووف .. يمة
_عيوني
_أخاف يطلبج جدي عنده بالبيت عود تعال واحجي كلشي
_ليش يطلبني ؟
_راح احجيله كلشي
_لايمة لتحجي
_ماريد الكل تبقى ماخذه عنج نظره محلوة اريد أصلح صورتج كدام الكل
_مو أخاف تصير مشاكل
_هي المشاكل صارت واهلج شردوا ولد اهلج بالسجن يصوصون بعد عليش تضمين كلشي وتبقين مظلومة بيني الحقيقة ورجعي كرامتج وهيبتج
_بكيفك سوي لتريده
_هاهية لعد تكدرين تنزلين
نزلت دكيت هورن طويل انبه بي بيت خالتي انفتح الباب طلع ابن خالتي الصغير مهند من شاف امي جاها ركض يحضن بيها حركت السيارة وطلعت
عدل لبيتنه صح معصب من تصرف اهل امي بس بقلبي فرحان طلعت امي مظلومة وجانت مجبورة
تعوفني وبعدها تحبني .
المهم رجعت للبيت لكيت جدي وأبوي وعمامي كلها تنتظرني بره المظيف رحت سلمت عليهم استلمني جدي رزايل شلون ماتكول أنت مراقب ليش ماكلت حياتك
بخطر من يوم لشلت بي ابن زوج امك ويوم شلت طلال بالشفعات ياعلي يله قنع دخلنا جوه بالمظيف حجيتله كل القصة وشوي سويت امي بطله ماكلتله
انا عرفت بيهم ناصبيلي كمين كلتله هي كالتلي وتفقت وياها وخبرت عليهم الشرطة ولزمناهم وهسه زوجها بالسجن وطلع إرهابي مطلوب للدولة من سنة ٢٠١٠ .
أبوي نزل على أمي دوسة ونص قطعت كلامه "
امي مالها ذنب امي جانت مجبورة هو الكلب
جابرها تتركك وتتركني وتزوجه
ابوي_جاي تخربط فرقد.
جدي_سممت عقلك وضحكت عليك
فرقد_ لاسممت عقلي ولاشي هو عترف بكل جرائم لرتكبها حتى اعترف شانق مرته وكايل هي شانقه نفسها بالغرفة بعدماتعاركت ويه اهلها هذا الرجال
مجرم وكلشي استرجي منه
جدي_صخام براس امك مزوجة إرهابي
فرقد_اي صخام برأسها وراس الخلفوها شالوها وشمروها بحضن واحد مجرم
ابوي _ افففف وهسه
فرقد_ اطلقها منه
ابوي_ شطلق ؟
فرقد_امي اطلقها وبعد ماعوفها ترجع لأهلها
ايهم _ تريد ترجع لامك
فرقد_وابن حرام لينكر امه انا احب امي ومن يوم لعافتني بي وراحت ماشفت شي حلو على اقل ارجعها لعندي بلكت الله تنفرج بوجهي واشوف أشياء حلوة
عمي جاسم_بعد لسوته ترجعها ؟
فرقد_هي ماسوت شي جانت مجبورة وضحت بحياتها علمود تنقذني وتنقذ ابوي من الخطر
جدي_ماقتنع بهذا الحجي اريدها كدامي وتحلف كلام الله
فرقد_تدلل شوكت أجيبها الك
جدي_اليوم أريدها واريد اعرف كلشي
فرقد _ماشي بس ابدل واسبح اروح اجيبها الك
ابوي_لا تجيبها اخاف تصير مشاكل نروح لبيت خالتك ونحجي وياها هناك
فرقد_بعد أحسن شتكول جدي
جدي_ ماشي روح اسبح لما أجهز نفسي
كمت رحت للبيت صادفتني امي ....تحمدت على سلامتي وختام هم ياربي هاي شسوي باقيه عدنا ليهساها طنشتها ورحت لجداتي حجيت وياهم وكتلهم
هسه طالع لامي جدي يريد يحجي وياها .
امي_امك ؟
فرقد_اي طلعت بريئة
امي_هاا
وجهها انخطف ماعرف ليش ختام جرتها من ايدها واخذتها للغرفة هباوي وكفت بصفي وكالت بهمس "
هباوي_ختام راح تعبي برأس امك
فرقد _آخر همي ختام وكلامها المهم عندي امي بريئة
هباوي_والله فرحتلك بكد شعر رأسي وراس بارق
فرقد_اخيتي أنتي هباوي
هباوي_بعد أخوي فرقد
عفتها وصعدت فوك سبحت ونزلت حتى اكل ماماكل وداكني الجوع بس تحملت خاطر أمي واكشف الحقيقة طلعت بره بالمظيف عمامي أربعة راحوا ويانه
وابوي وجدي وبارق هم راح "
طول الطريق احجي ويه جدي كال رحنالهم هدادة مالكينه احد بالبيوت كل البيوت مقفلة وشاردين عاد اتصلت بأبن عمهم وكلتله بالسالفة تخبل عليهم
كال اتصل بيهم ولاواحد منهم يرد ماعرف وين شاردين هم ونسوانهم وجهالهم وانا حلفت بس أرجع بالليل اخذ بارق وعمي ايهم واروح افجر ابيوتهم .
وصلنا بيت خالتي نزلنا كدينه الباب طلع زوجها من شافنه عشيرة ارتعب سلمت عليه بوجه مبتسم عاد طمن سلمنا ودخلنا جوه كعدنا بالاستقبال
اجوي ولد خالتي سلموا وقدموا ماي وجاي جدي طلب أمي راح ابن خالتي الوسطاني وره شوي رجع وكال ..
_خالتي تكول ماكدر اطلع كدام وائل خل يطلع
وائل يله اطلع
جدي _كوم اطلع وائل بره
وائل _اريد اعرف الحقيقة
جدي_انت طليقها وحرام عليك تشوفها وتحجي وياها اطلع بره من تدخل اوكف بالباب
واسمع الحجي
وائل_ماشي يابة
كام ابوي كام وياه بارق طلعوا بره شوي ودخلت امي لابسة العباية سلمت وبقت واكفه...
جدي_اي حنان شلونج ؟
حنان_زينة عمي وأنت
جدي_موزين بعد سووه اهلج بحفيدي سمعت حجي غير من فرقد ويكول انتي جنتي مجبورة تعوفي
وتعوفين وائل صدك هالحجي ؟
حنان _اي صدك
جدي_تحلفين كلام الله على كلامج
حنان _اي احلف
جدي_ماشي جيبولي قرأن كريم وروحي توضي
وتعاي احلفي
حنان _ماشي عمي
طلعت امي شوي ودخل ابن خالتي الوسطاني شايل القرآن خلاه كدام جدي اجت امي كعدت كدام جدي وخلت ايدها على القرآن الكريم وحلفت
بكل كلمة تكولها صدك '
وحجت القصة كلها لجدي شلون جبروها اخوانها ابو طلال وابو عمار وزوجها النذل صارت تبجي كاللها ليش ماكتيلي ليش بقيتي ساكته وتحملتي كلشي
_خفت لايفجرونكم
_هذا خوفج لعم عليج وخله الكل تكرهج وتصير ضدج
_قابل شكد أسوي عمي حكم القوي على الضعيف
_لو كايلتلي جان عرفت شلون اتصرف وياهم
_صار ليصار بعد عمي والحمدالله على كل حال
_الحمدلله والشكر محد تأذه
_الحمدالله
_جهالج يمج
_اي
_ديري بالج عليهم ولا تسلمينهم لاهل رجلج مهما صار
_هو منياه اهل
_اهله وين ؟
_متبرين منه من سنة ٢٠٠٨ وشايلين خارج ديالى
_خفتن وراحة ديري بالج على نفسج وعليهم وانا راح اخذلج حقج من اهلج زوجج العار ابن العار
_شكرآ عمي تعبتك وياي
_لاعمي ماكو تعب حقج علينا أنت ام فرقد حفيدي
_الله يسلمك عمي .
طلعت قبل لا تطلع امي شفت ...ابوي واكف بالباب جريته للطرمة جان متعصب واعيونه برأسه صايرات
بعد ماسمع كلام امي
_ سمعت شكالت امك
_اي
_شلون الماي مشت من جواي وانا مادري شلون
_مشت وغركوا الكل بيها
_ماراح اسكت
_ ولا انا وراح حاسب كل شخص جان اله ايد
_اليوم باليل نهد ابيوتهم
_تفكيرك مثل تفكيري
_مثل مارادوا يهدون ابيوتنه فوك روسنه أحنه نسبقهم ونهد ابيوتهم
_تدلل
رجعنا امي جانت طالعة جدي كال باشروا بقضية الطلاق اليوم قبل باجر وطلقوا المره منه لاتخلوها على ذمة هيج رجل فاجر وفاسد وداعشي .
اباوع لأبوي تغيرت نظرته هواي ومبين يحب أمي بس مايحجي ولايكول وقبل قسمة واختها صبوحة عموه بسحورتهن ومخليتهن يتهنن
وهججتهن من البيت .
المهم رجعنا وابوي سولف السالفة لجداتي اباوع لمرته مقهورة ماعرف ليش ختام كاعدة بصفها وتباوعلي اجت بالي اهفها بالمخدة ماتحمل اشوف وحدة تباوعلي
سلي لعابتي جانت تباوعلي اتخبل منها وخليتها تشرد بريشاتها مني هاي هم اكدر ادخلها إنذار بس هسه ماصافيلي
بال بالي كله يم امي وجهالها اريد اخلص هم
وراح اعمل المستحيل واخلي ابوي يرجعها على ذمته علمود تصير عندي بالبيت ورة فترة تعشينا وطلعنا انا وابوي وبارق وعمي ايهم وعباس .عمي ايهم
عنده قادفة وصلنا بيوت أهل أمي بالأول نزلنه دكينه البواب ماكو أحد بيهن طلعنا بسرعة اخذت القادفة من عمي ايهم وكعدت بالكاع عينت على بيت
عمي ابو طلال موبيت قصر قاطين بناء حديث بناء كله بدم الأبرياء والفقراء والمساكين المهم رميت والبيت انهد للكاع صوت الدوية موطبيعة جانت جابلي
انوب كمت رحت كعدت كدام بيت خالي ابو عمار جان بصف بيتهم هم هديته وكمت انطيت
القادفة لعمي ايهم
ابوي_هاي انهدت ابيوتهم علمود مايندكون بينه
هجرس _ههههههه
بارق_بعد بيتي بالهدف هجرس
ايهم_هذا شغله يله امشوا هسه تلتم العالم
بسرعة صعدنا بالسيارة نباوع للمنطقة صارت بيها اعياط ويصاح حسوا بارق ساق سريع طلعنا عدل لبيتنه أحنه جنه نفس المنطقة بس هم يبعدونه بمسافة
ربع ساعة وابيوتهم معزولة عن ابيوت الكل بنص كيعانهم جانت وهسه انهدت وهذا إنذار بسيط الهم رجعنا
للبيت كنه لجدي ماحجه
_سوه لبالكم
هجرس_اهمشي لبالك
جدي_لبالي هو بالكم انتقموا منهم وسووهم عبرة لغيرهم
هجرس _لتريده جدي
بارق_اويلي يابة يخرب على الحنات هجرس
هجرس_ اي والله
بعدنه بره وصوت سيارات .... الشرطة اجت شلت التلفون واتصلت بواحد من ربعي اليوم خفارة عنده
_الوو هلاو ابراهيم شلونك
_الحمدالله وأنت
_على الله خير ان شاءالله سيارات الشرطة طلعت ؟
_والله واحد بلغ وكال تفجرت ابيوت بالمنطقة
_هاا ابيوت منو ؟
_ماعرف بس قريبة عنكم لمسافة ربع ساعة
_عود طمني مو تنسى
_ان شاءالله
فصلت الخط بارق وعمي ايهم طكوها بضحكة "
ههههههه
ايهم _هههه الحلو يستفسر عن الموضوع
بارق _تنطبق عليه عبارة يقتل القتيل ويمشي بجنازته ههه
هجرس_امم
بارق_ سبحان الله هي من تلتم تلتم كلها بيوم واحد
ايهم _اي والله مناه جدوع انجلط مناه هجرس جان انقتل ونكشفت حقيقة امه
رن تلفون عمي ايهم شاله وكال "
الوو هلا وفاة ... ليش شكو صاير عدهم .. والله قلبي نبزني وعرفت راح يصير شي هسه جااايين
فصلت الخط "
عمك جدوع متعارك هو ولده وكاتلين رجل حنين وحنين ويردون يذبحوها امشي بارق صيح
لجدك وعمك بسرعة
طفر بارق بسرعة للبيت وانا طاير من الفرحة اليوم ضربت اكثر من عصفور بحجر واحد اليوم كلها انصادت
وصار وقت تصفية الحسابات
_شمسووين ؟
_شمدريني شمسوين من مكسورة اكون الله ماكاتلينهم
طلع جدي بطرك الدشداشة ابوي وراه ... كلها راحت انا بقيت واكف بالباب وانتظر مرت ساعة وساعة الثانية والثالثة وماكو طارش وصلني منهم رفعت ايدي
باوعت للساعة صارت بال ١٢ ضبط
بزعت روحي وتصلت بارق يرن وماكو يرن وماكو اتصلت ثلاث مرات يله رفع خط:
_وينك صارلي ساعة أتصل
_مليوصة الشغلة
_شكو ؟
_من صخام براسك حنونه جانت تخونك ويه حبيبها احمد وهسه اهلها يردون يذبحوها هي زوجها وجدي دمه فاير
طب عليها نهانها نهي من الكتل
_منو كاللهم هذا الكلام
_متعاركة هي وعدوية وكايله العدوية أنتي كحبة وام الولد وام الشوارع رحتي خطبتي واحد كواد وكوتي وياه بالجامعة وهاي كومي كتليها وفضحي
كلشي وهسه صور ومقاطع طلعت الها ويه احمد بالجامعة
_وشحكم جدي
_كال تبروا منها وخلوها تولي هي ورجلها ومالها خط رجعه لهناه بعد بس تجي تنكتل هدر دمها هي وزوجها .
.أنت شلونك هسه
_زين
_نكسر كلبك بعد هذا الخبر
_ولامهتم
_شنو ؟
_مادام طلعت من ذمتي خلص لااعرفها ولاتعرفني وشسوي خل تسوي مالي شغل بيها
_جانت على ذمتك قبل وتخونك
_موشريفة وشسويلها انا احمد الله واشكره طلكتها وخلص منها شوكت ترجعون ؟
_بس يولون نجي
_اروح انام لعد
_شكد بارد ياربي
_كلتلك ماهتم لامرها انا اليوم فرحان وماريد اخرب فرحتي
_فرحان لامك
_اي امي الأساس كله ومن غير امي انهديت وهسه راح ارجع اوكف من جديد بوجودها
_ان شاءالله يارب
_باي
_بايات هجرس بايات
سديت الخط وابتسمت براحة وأخيرا نفضحت وكسرت عين أهلها وتبروا منها خلها منو الها بعد البنية من غير اهلها تنذل والرجال مابي أمان ساعة الساعة يكلب عليها .
بوجهي لغرفتي لفيت رأسي ونمت..... كعدت الصبح سوتلي ريوك هباوي مرت ابوي ماكو لاهي ولا بت اختها ختام ام اعيون الصلفة ابوي كاعد جدي وجداتي
تلاثتهم يجرون جكاير من وجه الصبح جدي راد يفتح الموضوع رفعت ايدي امنعه يحجي "
هجرس_ابوس ايدك لتجيب طاريها
جدي_براحتك
ابوي_خفارة عندك اليوم ؟
هجرس_اي خفارة
حلوة_لتخلوا يطلع الوحدة دز وياه ولد عمامة يوصلوا للمركز
جدي_اي كتلهم ينتظروا بره
هجرس_ماكو داعي
جدي_اكو داعي بعد لشفته البارحة مامن عليك تطلع الواحدك لراس الشارع
هجرس_تره رجال موطفل
حلوة_لا تكسر كلام جدك
هجرس_براحتكم
رحت بوست جدي وجداتي وأبوي وطلعت شفت بارق مبدل بعده مارايح للدوام وكفت بصفى "
_صباح الخير
_صباح النور شصار البارحة
_عد عيناك كاسرين رجلها وايدها ورجلها مطيحين حظه وحظ الخلفوه لكيناه فاقد الوعي لما تدخلنه
جان مكتلينهم اثنينهم
_اي وبعد
_بعد لا نعرفهم ولايعرفونه ونهدر دمهم
_هه
_عديم المشاعر والاحساس
_أحسن في امان الله
_الله وياك هجيرس ههههه
_شبيك ؟
_تخيل يفتحون وياه موضوع هدم البيوت وانت الهدمتهن شنو راح تكون رد فعلك بهاي الحالة
_عادية
_طبعآ عادية هو العاشر الجن مايكدر يلعب على الانسان
_اي
والله مرت الأيام وعلاقتي بامي زينة وتعرفت على جهالها يصيحولي عمو كتلهم كولولي فرقد اخوي انا اخوكم مو عمكم وجديتي حلوة اجت شافتها
وعرضت بيتها للبيع كالت ابيعه واشتري بيت يم أختي اكعد بي ماريد أبعد بعد وانا بالي ارجعها لأبوي واهلها مالهم لاخبر ولاحس اختفوا عن الوجود
عافوا حالهم ومالهم وشردوا حتى عمامهم تبروا منهم ورجل امي نحكم بالعدام ولد خوالي هم نحكموا وحكمهم خفافي مو قوي جان المهم تعلموا مايندكون بي
وحنين انكطعت رجلها واخبارها ارتاحيت كلش واهل سلي بعد شهرين يرجعون لديالى واهلي متحزمين لسلي حزام يردون يخطبونها لي وانا أضحك
وساكت كلمة وحدة ماحجي ولا اكول وختام تروح وترد ويه اهلها كلما تبات عدنا انا اطفر بيت عمي ايهم عاد من شافتني مابقى بالبيت كامت ماتبات بس تجي
وياه اهلها وترد .
وامي تطلقت واخذت حريتها .... وبعت بيتها وشتريتلها بيت بصف بيت أختها حايط على حايط واثثته الها وكعد وياها مهند ابن خالتي لان مالها أحد
كاعد بالحديقة مخلي ايدي على خدي وافكر شلون اقنع ابوي واخلي يرجع يتزوج أمي وكفت كدامي مرته
كعدت كبالي تمامآ
_امك شلونها
_زينة
_جهالها شلونهم رتبت وضعها لا
_اي اليوم انتقلت بيتها وكعد وياها ابن خالتي مهند
_الحمدلله هواي صاير تروح وترد الها
_من ودي مارجع من عدها
_هواي مشتاقلها
_انحرمت منها ١١ سنة
_الله يعوضك
_آمين
_صدك سمعت ابوك يكول اهل سلي راح يرجعون
_اي هههه
_هههه واهلك يردون يخطبونها
_اهلي سالفة من سالفة والله البنية ماتقبل وهم لازكين بيها لو هي لو ماتزوج وتعال جيب ليقنعهم
_الصراحة فرقد شبيها البنية ماتقبل بيها شايف عليها شوفه لو بيها عيب احجي الصدك ؟
_البنية ذرة مال الله وجنها ملاك لاعليها لابالرايح ولابالجاي
_اي لعد ليش ماتقبل
_اخاف عليها مني
_هاي شنو تخاف عليها منك
_والله راح اذيها بس اتزوجها ودخلها بعالمي الكئيب
_قبل عالمك كئيب هسه الحمدلله والشكر حياتك حلوة ومستقرة ورجعت لامك واخذت بحقك وحتى مرتك السابقة طلعت كل عمايلها القذرة وبينت انت المظلوم
وياها مو هي المظلومة وياك.
_ ماريد اذي سلي خطية
_فرقد احجي شبيك أنت
_ماناسبها يناسبها شخص محترم ويقدرها ويحترمها ويحافظ عليها ويحبها
بارق_لعد انت شنو كاولي هههههه
هجرس_ولك منين طلعت
بارق_من تحت الأرض
هجرس_اي صاير جربوع تطلع من تحت الأرض
بارق_سلي سلي راح ترجع راح نعرس كللووووش
