رواية الهجرس الفصل التاسع عشر 19 بقلم رواء هادي
رجعوا أهلي جانوا قافلين على سلي شفت الوقت مو مناسب احجي وياهم خفت احجي ويكولون أنت ماتريدها
وأخاف مخوفها منك .
ثاني يوم رحت للمركز شفت سيارة سودة تابعني من وصلت فلان سيطرة اختفت بعد ومابينت أبد كلت محتمل هيج ومتوهم كاعد بنص الشغل وجتني رسالة
تهديد على الخط "
جهز نفسك أيام وينحفر قبرك هجرس
من كال هجرس عرفت بي مو غريب محد يعرف أسمي الثاني غير اهلي وعمامي وخوالي وصدقائي جواد وياسر وهذا الشخص ماكو غير خوالي .
يردون ينتقمون مني علمود شلت ابنهم طلال وابن نسيبهم والي اعرفه طلال راح ينعدم بعد شهر بطريق الرجعة نفس السيارة بيها ثلاث أشخاص
ملثمين بشماغ ماشفت شي بينت ....نفسي ماعرف بيهم ملاحكيني جريت المسدس سحبت أقسام وعفته بحضني واسوق بالسيارة وصلت قريب من السيطرة
رجعت السيارة حسيت بيهم يردون يقتلوني أو يخطفوني بس ماجاي يلكون الفرصة المناسبة عبرت السيطرة من
نفس الرقم اجتني رسالة ...
_اليوم عدت باجر تنشال بالتابوت
رديت عليهم "
جبناء
شمرت التلفون بكشن الصدر كل ... ثانية يرن توصلي رسالة ولاخليت بالي يمه بقيت بقلق أخاف يلكون الفرصة المناسبة ويقتلوني لو يخطفوني وانا ماخاف
على نفسي أخاف على جدي وجديتي وأبوي بس يصيرلي شي يموتون وراي وأبوي ماعنده ولد غيري بهاي الدنيا ماراح يتحمل فراقي وجدي روحه من الدنيا انا
وجديتي كذالك حفيدها الوحيد وكطع النفس عدها .
المهم وصلت بيت أهلي نزلت بوجهي على جدي سلمت عليه وعلى جداتي وأبوي وأمي وصعدت فوك فتحت الرسائل كلها تهديد والله ماكلت باطل فتحت الكنتور
طلعت الرشاش شمرتها فوك الجرباية وطلعت صندوق عندي بي قنابل يدوية باجر أخذهم وياي وبس المحهم من بعيد ارميهم ومستعد اقتلهم وماخليهم
يقتلوني 'بالليل طلعت خليتهم جوه كشن السيارة وانا محد يفتش سيارتي الكل تعرفني ضابط والمنطقة منطقتي المهم الصبح طلعت وصلت يم مكان
مقطوع ماكو لابيوت ولاشي شارع طويل ... وماكو سيارات يادوب تشوفلك سيارة فجأة طلعت كدامي نفس السيارة بسرعة مديت أيدي وشلت قنبلة يدوية
وكفت السيارة بنص الشارع وطلعت نص جسمي منالشباج ورميتهم بقنبلة يدوية جانوا بعيدين لمسافة بس أريد اخوفهم مني وابعدهم
صار الدوي عالي نزلت رأسي ولازمي بيدي الرشاش بعد ماختفى الصوت رفعت رأسي بحذر اباوع ماكو شي بس تراب وخفيف وهو ساقوا السيارة
بسرعة ورجعوا ارجوع بدربهم
جبناء هربوا هاي هم من يوم يومهم يخطفون ويقتلون بالناس الأبرياء وعبالهم انا بريئ مايدرون بي ملعب واعرف كل دروبهم ومتحزم لهم حزام .
رجعت شغلت السيارة وطلعت بسرعة عدل .... للمركز وأفكر بيهم اليوم عدت على سلامه باجر شلون لازم أبلغ عليهم الشرطة وخل يعوفون وراي مراقبة
وصلت المركز ساعة ماكو اجاني جواد "
فرقد شايل سلاح بسيارتك ؟
_اي شمدريك
_الجهاز مأشر على سيارتك أريد المفتاح
_ شسالفة تفتشون سيارات الضباط ؟
_ لابالصدفة مأشر وهاي الأوامر
_عوفك من الأوامر انا رايح للمسؤول واكوله ليش شايل اكثر من سلاح بسيارتي
_ اعرف والله بس م...
_مالك دخل جواد انا احل الموضوع
_براحتك
طلعت بوجهي للمسؤول دخلت ضربتله تحيه كالي تفضل كعدت كدامه وكلتله بسالفة السلاح وفلان سلاح وفلان سلاح وياي كال مايصير مسموح الك تشيل المسدس والرشاش هم لأن عسكري
غير ذني ممنوع ..
كلتله المنطقة مو أمان وأكثر من مرة تعرضت للخطف والقتل وانا شايلهم لحفظ سلامتي منهم وانت تدري عناصر داعش منتشرة بكثره بعده مناطق
من ديالى وأخاف على نفسي .
هم ماقبل وكال اكدر اخليلك حماية توصلك لباب البيت بس مال تشيل فلان سلاح ممنوع غير الأسلحة لمسموحلك بيهن تشيلهن سلم الأسلحة لعندك حالاً
عاندت وبقيت أقنع بي بالدفرات يله قنع وكال ماتشيلهن بعد وياك هاي أول مرة وآخر مرة ملازم فرقد تحمل كذا
وكذا وياك من ألاسلحة
كلتله تمام وطلعت ... كابلني ياسر اسألة بزعت منه وعفته وطلعت روحي لايجة ماعرف وين أروح وين انطي وجهي أخبر عليهم لو ابقى ساكت صوت
من داخلي يمنعني أبلغ عليهم .
المهم مر اسبوع رجعت من الدوام لكيت اخت امي عدنا وبتها ختام جانت لابسة بنطرون وقميص حالها حال الولد وحجاب شامرته شمر على رأسها
من شافتني أبتسمت سلمت عليها "
سلام عليكم
ردت بضحكة "
وعليكم السلام شلونك فرقد
_الحمدلله أنتي شلونج ؟
_دوم ان شاءالله بخير أني الحمدلله
هزيت رأسي وبقيت مبتسم دخلت سلمت على أمها وأبوها وصعدت عدل لغرفتي بوجهي للحمام سبحت وطلعت بدلت وكفت كدام المراية امشط بشعري
تلفوني رن رنه الرسائل رجعت المشط ورحت على التلفون شلته بيدي فتحته جانت من رقم غريب فتحت
الرسالة من قريتها أبتسمت .
_الله ياخذك ابو الهجارس والشياطين الله لايوفقك الله لايهنيك بحياتك شتريد مني لاحكني وداز اهلك يخطبوني عبالك راح اوافق بيك بعد لسويته بي
لاتحلم اقبل بيك .
رديت عليها "
لعابتي موزين عليج العصبية
ردت بسرعة "
ولك شتريد بس فهمني شتريد ؟
_ اريدج
_ أني ماريدك
_مشكلتج هاي بعد
_شنو مشكلتي ولك افهم ماريدك هسه كوه تأكل أكله مايعجبك
_إذا اطر الأمر أجبر نفسي واكله
_أقسم بالله وراك سالفة
_سالفتي أنتي لعابتي
_ اوووف .. هجرس شتريد مني بالضبط
_موكلتلج اريدج ليش ماتفهمين
_مال تحبني وتريدني هاي جذبه أني اعرفك حق المعرفة تحب حنين الزركة وعندي يقين تام تريد تأخذني علمود تكسر عين حنين الزركة وره أيام
تتركني مو صح كلامي ِ
_أخر أخر همي حنين الزركة أصلا ناسيها وناسي أسمها حتى هو صح ماحبج بس أحب شكلج واحب لطافتج وبرائتج وصدقج ومحتمل إذا تزوجتج وتعلقت
بيج ماراح اعوفج وراح اكمل وياج حياتي
شوي واتصلت فتحت خط "
تريد زواج متعة مو ؟
_أنتي شتكولين
_اكول اي
_امممم
_لا تحلم اقبل بيك بالقران بس يرجعون اهلك يخطبوني مرة الثانية راح اقتل نفسي وابليك انت
وأهلك بموتي
_انتحري بحضني
_حقيييير
صاحت بصوت عالي زرفت اذاني زرف بعدت التلفون بسرعة وراها سدت الخط بوجهي صرت أضحك بصوت عالي ماتوقعت بيها هيج عصبية .
رجعت التلفون فوك الطبلة وتمددت على ظهري شوي وندك الباب صحت من مكاني " منو ؟
_أني
_تفضلي يمة
دخلت أمي تبتسم باوعتلها مبتسم "
هااا يمة ؟
_متغدي ؟
_الحمدلله
_تنزل لو تنام
_والله تعبان جان عدنه شغل خارج المركز وجسمي متكسر تكسر
_هاا ارتاح لعد
طلعت وسدت الباب توني نزلت رأسي على المخدة رجع اندك الباب " نعم
_فرقد ماما أريدك بشغلة
_تعاي يمة
فتحت الباب ودخلت وكفت بعتبه الباب "
تعرف ترد حساب متكهر ؟
_لا ليش ؟
_ختام حسابها متهكر مدري متعطل وماتعرف ترده كلت بلكت تعرف أنت
_لاماعرف
_ماشي
طلعت بقيت رافع رأسي ماريد انزله أخاف ترد مرة ثانية الحمدلله مارجعت بعد رجعت رأسي أفكر بسلي واضحك هسه شلون حالها خطية اكيد كاضيتها
عياط وصياح عاد هي شكد جبانة أتوقع هل مرة راح تتوب مني وماراح تقترب صوبي ولا تفكر بي حتى وهذا الريده انا ماتفكر بي ولا تحبني ولا تحلم بي
نمت بسرعة كعدت العصر نزلت ختام طلعت بوجهي جانت مبدلة ولابسة فستان قصير جون الركبة مطلعة الرجلين واليدين والشعر الحجاب شامرته
شمر ياربي أكره هذا النوع من البنات كره مو طبيعي احسها تستهزء بالحجاب هسه لو البس حجاب لو مالبس لبس مو محتشم ويه الحجاب وين رهمتيها
_ ممكن أخذ من وقتك
_نعم تفضلي أختي
_ماتعرف أحد يعرف يرجع حساب الانستغرام متهكر
_للأسف لا
_هاا آسفة إذا أزعجتك
_لاعادي أختي مصار شي
رادت تحجي طفرت بسرعة منها ماحب أبقى يم النسوان اتخبل منهن باربي وبالاخص هذا النوع يذكرني بحنين الزركة شردت شراده لبره
صادفني بارق رفع أيده وكال "
راحت سلي اجت ختام
هههههه
_انجب
_أهلها راحوا وعافوها يم أمك الحنون ههه
_أهلها راحوا،؟
_اي والله هههه
_ليش عافوها ؟
_يردونك تحس عليها وتأخذها يل ضابط ههههه
_بارق تنجب لو انزع الشحاطة اكطعها فوك راسك وراس الخلفوك انا بيا حال وانت بيا حال
_بيا حال أنت عزيزي الضابط
_جفيني شرك بارق
_وشبي شري ولك تعال أرجع وين مولي
جرني من أيدي تعصبت منه جريت أيدي قوي وصحت بي"
طاح حظك جاي تسوي؟
_أرجع حس بختام خطية راح تموت ههههه
_أستغفر الله
_والله العظيم مبينه تحبك وكل ساعة تسألني عليك
_أخر همي
_لعد شنو أول همك
_تتوقع شنو؟
_سلي لعابتك مو ؟
_هم أخر همي لعابتي
_من صخام براسك النسوان ذابحات نفسهن عليك وانت ولاهامك شي ولك شتريد بس فهمني
شتريد بالضبط
_اريد الانتقام
_ياانتقام
_أمي حنين
_رجعنا هجرس سوالف هجرس السابقة
_عار لينسى الثار
_هو شنو وعار أمك عافتك علمود أبوك تزوج وحنين أنت طلكتها وعفتها بعد انتقاميش تحجي بي
برب الكعبة ؟!
_ بعدين تعرف
قبل لايحجي صاحت أمي "
فرقد ماما عندك مجال تأخذ ختام وهباوي لبره تفرهم
باوعلي بارق كاتم ضحكته التفتت عليها وكتلها "
لو عندي مجال بعيني بس والله مشغولة
وعندي شغل خل بارق يأخذهم
_ماشي ماما
راحت بارق يرفع بحواجبه ويضحك "
هاا شكلنا مو كلنا يردونك تحس
وجه الدبس
_منو وجه الدبس تعال ناقص
_أنت ههههههه
_جلدك يحكك يرادلك كتله
_اخرب وتكهرب يابوي النسوان كاتلات نفسهن على وجه الدبس هو ولا حاس ولايمه هههههه
_اففففف
عفته يلغي وراي وطلعت عدل للمظيف من المظيف طلعت بره فتت من يم باب بيت عمي جدوع اجت بالي فكرة اطشرهم من زمان مامتعارك ومامخبث على
أحد عاد طلعت التلفون واتصلت على عدوية بسرعة ردت امشي واحجي وياها اتفقت تدزلي صور حنين الخاينة والمقاطع الفيديو قبل لا تنفصل عني
وكتلها ٥٠٠ ألف ادزلج باجر العصر .
ماصدكت وباعت حنين بسرعة "
ثواني ويكونون عندك
_ تمام انتظرج عدوية
_ولا يهمك فرقد
_صدك شعجب بقيتي كلشي وانا كلتلج قبل احذفي
_مو عدوية لتحذف هيج دليل على الزركة
_بوية مشتعلة الحرب بيناتكم
_اي وانا اعلمها
_ادبيها بعد بيتي عدوية
_شوف شراح اسوي
_انتظر ونشوف شراح تسوين عدوية
_إذا ماخليتها تندم على سواياتها فلا اطلع عدوية
_عفية عليج
_هسه يوصلوك
_تمام
نهيت الاتصال ....منها فتحت انترنت وصلوني الصور على التيليكرام والمقاطع بقيت اباوع بالصور وأضحك أريد انتقم منهم بس لازم الوص كلشي بالأول
بينها وبين أهلها يله اضرب ضربتي بيها وبزوجها الساقط ماريد احد يشك بي أعرف بيها خانتني وانا رأس البله كله اريد انتقم بصمت وادمر بصمت .
المهم قبل الغروب رجعت للبيت دخلت للبيت ختام كاعدة بنص جداتي بمكان حنين وسلي القديم أعتقد حنين جانت تغار من سلي وتقلدها بكلشي وحتى هسه
جاي تقلد بيها حتى بقصة الشعر واللبس وهاي هم جاي احس بيها جاي تقلد بيهن توني صعدت اول بايات الدرج صاحت بي جديتي جوري
_تعال جدة اكعد
_عندي شغل
_شكو اليوم شغل بشغل
_اي مشغول
عفتهم وصعدت فوك عدل لغرفتي قفلت الباب وكعدت طلعت تلفوني الثاني سويت رقم وهمي أمريكي سويت عليه تيليكرام وراسلت عمي جدوع ...
_هلاوو جدوع شلونك أخبارك.. تعال أشوفك عرضك وين جان قبل لا تطلك زوجها ابن عمه فرقد ... باع عرضك
ويامن جان باع باع ...
دزيتله كل الصور والمقاطع وبقيت أنتظر ساعة يله شاهد كلشي وماكو رد منه أبتسمت ورجعت كتبت الها " راح اروح اشوف كل هاي الصور والمقاطع
الفرقد ولابوك خل يرحون يذبحونها ويغسلون عارهم .
شاهد وماكو رد اريده يرد ماكو رد أختفى وانا هم رحت حذفت المحادثة من الطرفين والحساب هم حذفته وشمرت التلفون من أيدي تمددت على ظهري
أنتظر تكب العيطة .
ساعتين تقريباً اندك الباب صحت"
منو ؟
_ولك عمي جدوع مجلوط وماخذي للمستشفى
نهضت جسمي بسرعة وفتحت الباب "
صدك تحجي ؟
_اي والله مجلوط وماخذي للمستشفى هسه اتصل بي عيدان وكال حالته خطرة و بالنعاس جدي دز عليك
وكال خل يبدل ويجي بسرعة
_ماشي
نزل بارق بدلت بسرعة أخذت المحفظة والمسدس بيدي وطلعت كابلتني جديتي خديجة قلبها مفرفح على
ابنها "طمني عود جدة
_ان شاءالله جدة
جريتها وبستها بكصتها جانت تبجي خطيه "
ان شاءالله مابي شي
_قلبي مثل النار أخاف يموت
_قلبي مطمن ناحيته هباوي يمة ديروا بالكم عليها
امي_ان شاءالله
عفتهم وطلعت ويه جدي وأبوي وبارق هم راح ويانه هذا الحجي قبل العشا رحنى للمستشفى الأمه مكلوبه هناك عمامي ولدهم ولد عمام أبوي كلها هناك
سألنه ابن عمي الجبير عن حالته وشجاه تخربط ...
والله مادري أمي كالت جان كاعد بالديوان ولازم التلفون اجيت جبتله كلاص جاي اشو هذا وكع التلفون من ايده ولزم صدره مكان قلبه وتخربط
هجرس_اخاف تعاركتوا وياه بالتلفون ؟
_لاوالله محد متعارك وياه
هجرس_شوف شكو بالتلفون وكع عمي مجلوط
جدي_جيبوا التلفون
عيدان_بالبيت
جدي_من ترجع للبيت جيبلي التلفون وياني وياك تفتح وتشوف شبي
عيدان _أصلا محد يعرف الرمز غير ابوي
جدي_امك تعرف بي
عيدان _شمعرفها
جدي_ شكلت انا عيدان
عيدان _صار جدي تدلل هسه أتصل وخل يودون التلفون لجديتي خديجة
جدي_بساع
عيدان باك طن ..هوى اتصل وكال ودوا تلفون ابوي لجديتي خديجة هم مايدرون حذفت كلشي مني ومن عمي وحذفت الحساب وطلعت بس شوفته حذفت
اريد من يطلع من المستشفى يروح ينتقم منها ومن زوجها الكواد المهم العالم صارت تروح وانا بقيت وجدي هم بقى أولاده هم بقوا بارق رجع وأبوي هم
وحاله عمي نفس الشي غير مستقرة .للساعة بال١٠ طلعنا من المستشفى وحال عمي غير مستقرة ماكو تحسن بات عنده عيدان جدي متأثر حيل بي
برغم مايتحاجة وياه من يوم انطه حنين بدون علمه أريد ذرة شفقة لو رحمه عليه ماكو قلبي أسود عليهم كلهم واريد افضح بته واخلي يتبرى منها وانا اعرف
عمي جدوع شكد حقير واناني وادعي الله مايموت ويعيش وبلكت الله يذبحها واخلص منها ِ رجعنا للبيت سألت جديتي خديجة ماحبيت اخوفها وكتلها
هجرس_الحمدالله صار احسن
خديجة _الحمدالله والشكر شوكت يطلع
هجرس _ماعرف والله
خديجة _باجر إذا ماطلع اخذوني أشوفه
جدي_محد يوصل من النسوان للمستشفى
خديجة _حجي ليش تمنعني من شوفه ابني
جدي_ما امنعج المستشفى كلها عالم غربة وانا ماقبل على نفسي العالم تتفرج على نسوانه يطلع من المستشفى واشبعي منه شوف عود
هجرس_كلام جدي صح
خديجة _بكيفك حجي
جرني على صفحة بارق "
صدك صار زين
_لاوالله بعده لايد ولا رجل بس نفس بي
_لعد ليش جذبت على جديتي
_ماتشوفها شلون حالها تريدني اجلطها
_هاا
_دير بالك تكوللها روح طلع بطارية جهازها وجهاز جديتي جوري بدون علمهن علمود لا يتصلن ويسألن
أمشي شبيك واكف
_ماشي
شوي وطلع بارق من الغرفة سوالي ... حركة اوكي عود تمت المهمة أبتسمت وصعدت فوك بوجهي للفراش بسرعة نمت كعدت الفجر صليت وتصلت بعيدان
_بشر عيدان شلون صار
_الحمدلله تعدى مرحلة الخطر
_الحمدلله والشكر
_جديتي خديجة شلونها اتصل بيها يطلع جهازها مغلق
_انا غلقت جهازها خطية قلبها مثل النار على إبنها خفت لا احد يتصل بيها ويكللها بعده حالته خطرة
وانا كتلها صار زين
_زين سويت روح بشرها خطية
_اي هسه وأنت هم كلما يصير وياك شي اتصل بي
_ماشي
_أخذ راحتك عيدان
_ انت هم باي
_الله وياك
زفرت برتياح عفت التلفون فوك الطبلة وطلعت البيت جان منور بالكامل بوجهي لجديتي خديجة دخلت غرفتها بدون مادك الباب شفتها كاعدة تقرأ قرآن
ودموعها عشرة على عشرة انقهرت عليها تحب ولدها برغم هم حقراء وقاسين وياها ولايسألون عنها بقيت واكف واباوعلها كملت سدت القرآن وباسته
وخلته على كصتها "
تقبل الله جدة
_مناه ومنكم صالح الأعمال جدة بشر شلون صار عمك
_هسه اتصل بي عيدان وكال صار احسن
_الحمدلله والشكر .. تكدر تتصل بعيدان أريد احجي وياه
_التلفون فوك
_تلفوني يمك
رحت على تلفونها شلته بيدي فتحته شفت البطارية مقلوبة عدلتها ورجعت سديته فتحته انتظر يفتح فتح طلعت رقم عيدان واتصلت بي بسرعة رد
_هلا جدة شلونج
_انا فرقد جديتي تريد تحجي وياك هاكياها
_انطينياها
صارت تحجي وياه ودموعها تصب أريد دمعة مني تنزل ماكو قلبي مثل الحجر صار تطمنت عنه شوي كعدت يمها وطلعت بوجهي أبوي مبين يعرف بالخبر ..
_تمر بالمستشفى الصبح
_من أرجع أمر بي
_براحتك جديتك شلونها
_زينة
_الحمدلله بشرت أبوي خطية قلبه مثل النار
_قلب أب بعد
_اي ...لحظة يابة
_حجي
_ختام باجر تروح
_لاتبقى اسبوع هنا
_شدعوة
_ليش مسببة إزعاج الك ؟
_تريد الصدك اي متقيد
_شمسويتلك البنية؟
_ ماحب ابنية مامزوجة تبات عدنه وانا عزابي وعدنه بارق ولد عمامي يطبون ويطلعون وهي ابنية حمرة زركة احجي ويه امي وخل تدزها لأهلها
_فرقد شبيك
_يابة ابوس ايدك دزها لأهلها ولاتخليها تبات عدنه بعد
_اكو شي
_لاماكو بس تدري بي ماحب
_لعد سلسبيل مو جانت تبات وعادي عندك
_سلي غير عن ختام
_وشنو الإختلاف بيناتهم
_سلي عاشت طفولتها بهذا البيت ومن اهل البيت ونعرف شبيها مابيها مو مثل ختام يانعم تصير بت اخت مرتك وهم ناس غربة صار ماصار بالبنية باجر عكبة
توكع برأسه
_قابل شيصير
_خلي كلشي بالك هاي ابنية ومسؤولية
_تخاف عليها من نفسك
_انا رجال عزابي والشيطان خبيث وكلشي محتمل يطلع مني وإذا ماطلع مني انا محتمل يطلع من غيري دز البنية لبيت أهلها وجفي الشر يابة
_ لا حولة ولاقوة إلا بالله العلي العظيم يصير خير
_دزها ويصير كل الخير
_باجر الصبح أخذها لأهلها
_ماشي يابة
عفت أبوي وصعدت فوك اخلص من سلي تطلعلي ختام من جهة ياربي وين انطي وجهي مادري انا كاره الزواج وكاره النسوان كل يوم مطلعيلي وحدة شكل .
دخلت غرفتي أريد أنام ماكو نوم تفكير بتفكير أنتظر خروج عمي من المستشفى وجية حنين لعنده شنو راح تكون رد فعله من يشوفها كدامه بله ؟
متحمس لهاي الفقرة.
نزلت الصبح شفت ختام مبدله ومكياج مبين عليها راح تتروح لأهلها أبتسمت بوجي درت وجهي عنها حتى ماصبحت عليها طلعت بوجهي لبره
أخذت السويج سيارة جدي وطلعت كدامي بارق "
سويتها ودزيتها لأهلها
_ابنية حمرة زركة شسوي عدنه
_ماكلت على سلي قبل
_وهي سلي شوكت باتت عدنه اشو تبات ويه أهلها ومرة وحدة باتت وانا تخربطت وراحت وثاني شي سلي من اهل البيت مو مثل هاي غريبة واهلها ناس غربة
صار ماصار بالبنية مو بوجهنا
_ طبعا سلي من اهل البيت
_بارق كافي مالي خلكك
_يابة البدلة راح تتفدك هههه
باوعت على بطني صدك الدكم راح تفلت لأن مشنج جسمي جنت اخذت نفس وزفرت رجعت طبيعي "
_وجه البومة لتخلي عينك علية
_جسمك حلو
_يالله تونا صبحنا
_طولك هيبة شكلك صاك وتحبه البنات مو مثلي
_تفوووو على اعيونك هسه تصوبني بعين
_باع المسدس بالفخذ شادة باع العضلات باع الطول باع الرزانة امدة حظي شبي لعد عصفور مهلس كاتله البرد الله من انطاك هل هذا الجمال ليش
ماانطاني شوي منه
_قل أعوذ برب الفلق من شر ما خلق
_طبعآ تتعوذ
_بارق ولك كل هذا عندك وتحسدني على العندي
_وشعندي خر...
_عندك هباوي تسوه كل هذا لعندي وعندك سيوفي يسوه الدنيا ومابيها والله لو عندي مره مثل مرتك وطفل مثل ابنك أستغني عن الدنيا ومابيها
_هااا مخلي عينك على عائلتي
_ربي يحفظهم الك ويخليك خيمة فوك روسهم
_تسلم
عفته ومشيت ساعات بالمركز شغل في ....شغل اليوم المركز مخبوص خبص صاير هجوم داعشي على افلان منطقة ومذبحين العالم ذبح كاعد بالمكتب
أتصل بي رقم غريب فتحت خط "
الووو
_فرقد يمة شلونك ؟
_منو وياي ؟
_ماعرفتني
_لاوالله ماعرفتج منو حظرتج ؟
_أمك
انقطعت أنفاسي للحظات جريت نفس بحسرة طويلة "
بعد وكت ذكرتي عندج ابن ؟
_والله ذاكرتك بكل لحظة
_اممم المهم شرايدة ؟
_سلامتك يمة مارايده شي
_اممم شلونج ويه زوجج ؟
_زينة
_اطفالج شلونهم ؟
_الحمدلله بخير
_اهلج شلون علاقتج بيهم ؟
_كطع
_ليش ؟
_من يوم لاخذت بي طلال هم كطعوا بي
_وأنتي شعليج
_علمود أنت ابني
_زمان جنت ابنج وهسه مو ابنج انا
_لا تكول هيج يمة أنت ابني وانا أمك
_وين جنتي قبل لعد ؟
سكتت ماردت أبتسمت وكتلها"
ماعندج جواب مقنع وتعرفين نفسج سويتي وشجنتي تحجين عني المهم إذا تعتازين اي شي اتصلي بي
وعتبريني فاعل خير لا أكثر ولا أقل ...
_أشكرك
_الشكر الله ام منو صدك؟
_ام فرقد
_هههههههه
_لا تضحك هيج ضحكتك ترعبني
_ليش ترتعبين ؟ لا تخافين انا ماذي لحبلت بي تسع أشهر وربتني طفل بالكماط مهما سويتي وياي تبقين أمي
وابن حرام لينكر أمه
_تريد تنتقم مني
_لو اريد انتقم منج جان انتقمت من زمان
_كلامك بي لغز
_لا
_ماعرف احسك كاعد على أعصابك وهاي أول مرة تفتح أتصال وياي وتحجي بكل هدوء وراحة وكلامك مابي أذية بالعكس بي حنية
_انا حنين من يوم يومي بس أنتي قاسية جنتي
_ياريت لو اشوفك واحجي وياك وافهمك ليش عفتك والله ضميري يانبني من يوم العفتك اروحلك فدوة فرقد خلني اشوفك واحجيلك اريد ارتاح
_حددي اليوم المناسب واجي اشوفج
_والله
_اي والله
_تمام تكدر تجي باجر لبيتي
_خوما زوجج موجود
_لا باجر يطلع لبغداد
_تمام الصبح عندج
_انتظرك
_وانا هم مرخصتج عندي شغل
_أخذ راحتك
_في أمان الله
_الله وياك يمة
فصلت الأتصال أضحك من كل عقلها عبالها أحبها وأريد أشوفها انا ادري بيها متفقة ويه أهلها علمود تجيبني لبيتها بحجه مشتاقتلي وراح يأذوني
لو يكتلوني هم ناس سفاحة وارهابية المهم كمت بلغت عليهم وكتلهم حياتي مهددة بالقتل راح أروح بفلان مكان واريد وراي تطلع دورية اكون من انطي
إشارة يداهمون المكان ويلقون القبض عليهم .
ياسر يباوعلي مصدوم لأن يعرف مكان بيت الخلفتني هذا بقى صافن بي وانا احجي ويه المسؤول كملت حجي واتفقت وياه و طلعت طلع وراي اخذني على
صفحة "
_صدك تحجي ؟
_اي
_أمك تريد تموتك
_للأسف
_هاي شنو من ام بس فهمني
_هي لو ام من صدك مجان تخلت عني وراحت تزوجت
_اوووف والقرآن مصدوم وماجاي استوعب
_استوعب أنت ضابط وكل يوم تشوف هيج شكولات زفرة ام تقتل ابنها اب يقتل ابنه لو يعتدي على بته هذا عالمنا عالم موحش صار وماكو رحمه بقلب
الأم على ضناها أو خوف اب على بته من الضياع .
_اي والله
_يله الحمدلله على كل حال
_الحمدلله عرفتهم
_انا من زمان أعرفهم وشاك بيهم جاي يراقبون بي
_احلف
_قبل أسبوع تبعوني من رجعت من المركز حاولوا يتعرضولي بس ماكدروا شافوا دورية شرطة واكفه
بالشارع ورجعوا
_وليش ماكلت ؟
_شكول
_شنو شتكول حياتك مهددة بالقتل وأنت ساكت
_طبعآ ماراح اسكت
_لعد شسوي هاي ؟
_امد الحبل لا أكثر وهسه راح اقطعه بيهم واخليهم كلهم
بنص السجن تعفن
_أولهم الخلفتك
_اكيد أول الناس هي ...بس دير بالك تجيب طاري وتكول
_طمن ماراح احجي
_اي لا تحجي خلها بيناتنه
جاء ذياب يركض "
عدنه شكوة يريدكم المسؤول بسرعة
هجرس_شكوة شنو ؟
ذياب_مرة مشتكيه على ابنها معتدي على أخته ومغتصبها
هجرس_استفاد
ياسر_والله عجيب ماتنكلب الدنيا بينى بعد
ذياب _تكول يتعاطى مخدرات وهسه حابسته بالغرفة
هجرس_ مدمن مايعرف بفعاله شنو ضاعت الشباب منورة النذال والحقراء أمشي ياسر خل نجيبه ونعلمه
شلون يعتدى على شرفه .
استلمته القضية وطلعنا انا وياسر بكل قضية انا وياسر طلع ماكو مسافة جدآ قصيرة وصلنا البيت بنص السوك جان دخلنا للبيت طلعت المرة تبجي
وتدعي على ابنها معتدي على أخته فتحوا باب الغرفة طلعوا جان شاب بعمر العشرينيات ضعيف أيده تكسر رجله اعيونه حمرة دم بحاله أعصاب جابه ياسر
براشدي فر وجه فر وتفل بنص وجه هو كلمة وحدة مايطلع مدنك رأسه ويبجي ويردد "والله مادري والله مادري
شلون هيج سويت مادري ...
ضربوا أيديه كلبشات وخلوا برأسه جيس أسود وطلعوا شمروا بدي السيارة بقيت صافن بزماني اخ يعتدي على أخته وأم تريد تقتل ابنها
أحنه عايشين بعالم مرعب وصايرين مثل الحيوانات بالغابة كلمن يقاتل من أجل البقاء المهم رجعنا استلمه حيدر وجواد تحقيق بي جواد اله يطيح حظه وحظ الخلفوه
بالكتل اتصلت بارق اطمن على عمي جدوع "
بشر شلون صار ؟
_زين وبعد ساعة يخرجوا من المستشفى
_زين شكو ماكو يمك
_والله الزركة توها اجت هي وبابا سنفور
_اممم
_شوكت ترجع
_ينتهى الدوام وارجع
_عبالي خفارة عندك
_كعب باجر عندي خفارة
_هاا زين
_صدك أبوي وده ختام
_هههههه
_هاا
_سيارة ابوك عطلانة وبقت ختام هنا ههههه
_هذا هم حظي
_اي حظك
_اتصلوا بأهلها وخل يجون ياخذونها
_فرقد شبيك تريد تخلص من البنية احجي سوتلك شي
_لا
_لعد ليش متخبل منها
_ماحبها من الله
_كضيت عمرك ماتحب هاي وهذيج
_اي هي المحبة من الله
_والله زارع بقلبك بس الكره
_يمكن
_انتظررر ... يله انا رايح بعدين احجي وياك
_ماشي
نهيت الأتصال ورجعت أشتغل اليوم تعبت بالشغل مو شلون مجان خلص الشغل رجعت للبيت أراقب بالطريق ماكو أحد يراقبني والسيارة لجنت أشوفها كل
اليوم اليوم ماكو اختفت وهسه تأكدت مليون بالمية مسوين تفاقية علية ويردون قتلي " وصلت لبيت سألت عن جديتي خديجة وجوري كالوا راحن يشوفن
عمي جدوع سمعت طكطكه مواعين بالمطبخ مديت رأسي شفت ختام نازعه الحجاب وتغسل بالماعين الغدا بسرعة رجعت رأسي شفت هباوي
_هباوي تعاي
_هاا فرقد
_هاي شسوي بالمطبخ
_جاي تغسل ماعين هههه
_هم صايرة مثل رجلج
_ههههه
_ والله جديات جاي احجي شسوي بالمطبخ وأصلا شسوي باقية عدنه
_ اسكت فرقد لا تسمعك امك وتزعل
_وماتسمع
_عيب
_لاوالله مو عيب
_ولك اسكت طلعت ختام
أصلا مالتفتت وره ظهري وشفتها عدل طلعت لغرفة جديتي حلوة دخلت بدون مادك الباب جانت متمددة على ظهرها وتخابر من شافتني أبتسمت واشرت
اجي لعدها_
تعال ياروحي تعال
رحت لعدها ....حضنتها وبستها بكصتها وخدودة وتمددت بطولها جريت أيدها نمت عليها وحضنتها وهي تحجي بالتلفون وتبوس برأسي كل ثانية
_توك جاي
_اي
_ مبين تعبان ومقهور
_تعبان
_هي وينها هسه .. هااا ادري بيها جاي تتهرب بس إلى متى تتهرب مو اليوم باجر جاية لهناه وانا الها إذا ماكطع اعطوبها فلا اطلع حلوة هههههه ادري ههههه
_جدة منو ؟
خلت ايدها على سماعة التلفون وكالت "
سلي
_اممم
سديت .اعيوني أريد أنام وارتاح القهر لبقلبي موطبيعي أبد ثواني وستسلمت للنوم بحضن جديتي ماحسيت على روحي بعد ورة فترة فتحت اعيوني
وانا بعدني حاضن جديتي ونايم وهي هم حاضنتني عبالك طفل وبحضنها نايم ضميتها أكثر من ودي اصرخ واعيط وابجي بحضنها واكوللها أمي الخلفتني
متأمرة ويه أهلها على موتي بس تمسكت نفسي وبعد ماكو دموع ولا شفقة ولاحنية على العالم لخانتني
باستني برأسي وكال
_طلع الحسرة لبقلبك
_خليها نايمة جدة
_موزين تبقى بقلبك نايمة طلعها .
_بس العار ليبجي على عالم خونه
_اففف شفتها
_لا
_سمعت بيها جاية
_قصدج حنين
_اي جاية يم اهلها هي وزوجها
_ماتهمني أصلا
_سلي
_شعليها هل مكرودة
_لعد منو وياك
_تذكرت الخلفتني
_صارلك شكد وماناسيها
_الأم صعب تنسي
_وعاد شلون ام جانت تعمى العيون عليها
_اففففف
_دكوم اسبح وبدل وخل اسويلك شي تأكله
_ماشي
كمت طلعت من الغرفة شفت ختام تضحك ويه هباوي فوك الدرج مال أرجع هسه للغرفة بس مجبور اصعد اسبح وابدل وكفت كدامهم " ممكن تبعدون عن الطريق
ختام _تدلل عين
كامت ختام كامت هباوي كاتمه ضحكتها خزرتها عضت شفايفها ماتريد تطلع الضحكة سبحان الله صايرة نسخة ثانية من زوجها بارق صعدت
وكتلها "
سيفو وينه ؟
ختام _يم بارق بره
كملت طريقي لغرفتي جهزت ملابس.... ودخلت اسبح كملت سبح بسرعة وطلعت نزلت جوه لكيت جديتي مسويتلي اكل أكلت وطلعت بره أتمشى
صادفني بارق وعباس ورعد ...
بارق_جاي تشوف عمي
عباس_هو موحالف مايدخل بيت عمي جدوع
رعد_مو رجال إذا دخل
هجرس_ جاي أتمشى
رعد_عرفت بيك ماراح تنزل نفسك وتروح تشوفه
هجرس_ مو مال انزل نفسي بس حالف مادخل بيتهم اما إذا تحجون على سالفة زواج حنين
أخر همي تره
عباس_هو أنت الطلقت اكيد أخر همك تصير
رعد _لو نشوف رجلها جنه بابا سنفور على كوله بارق هههه
بارق_من سالمته ردت اكسر ايده ههههه
هجرس_موعيب عليكم تستهزئون بالرجال
بارق_لاموعيب
رعد _أحنه جاي نكول الصدك يلعب النفس وعجوز وجايب نفسه بالحنة ام ألف دينار هههههه
عباس_عمي أنت وين هو وين
هجرس _ انا صغير بالعمر هو جبير بالعمر لتقارنون بين الشباب والشايب
رعد _ههههههه
بارق_لا عاب حلكك شايب و@$%!"
هجرس_استغفر الله
عفتهم ومشيت وكفت .... من شفت زوج حنين طلع يمشي بتجاه السيارة بقيت صافن بي من ودي اروح اشحطه وانعل ابو الخلفوه طلع وراه عيدان من شافني
صاح من مكانه "
هلا فرقد شلونك
رديت من مكاني "
تمام الحمدلله عمي شلون صار ؟
عيدان _الحمدلله احسن مو بعيد تعال وشوفه
هجرس_حالف كلام الله مادخل بيتكم
عيدان _والله نسيت ...احمد وين صافن
احمد _هاا
عيدان _وين صافن ؟
احمد _ماكو شي
زوج حنين جان صافن بي خزرته سحب انظاره بسرعة ..
هجرس_ صدك حجيتوا ويه عمي ؟
عيدان _لا بعد خل يطيب ونحجي وياه
هجرس_اي ديروا بالكم عليه ولا تقهرونه وشيصير وياكم لا توصلوا له لما يطيب ويصير زينة
عيدان _ان شاءالله ...وين رايح
هجرس_يم عمي ايهم
عيدان _عدنه هو وجدي وابوك
هجرس_ هاا لعد اطلع للمحلات
عيدان _احنه رايحين تعال ويانه
هجرس_ لاشكراً ماريد ازحمكم
عيدان _يمعود زحمة شنو تعال
هجرس_ هو انا طلعت بدون السيارة أريد أتمشى
عيدان _شنو مسوي رجيم هههه
هجرس_اي شوي صايرلي كرش
عيدان _رحمه لاهلك وين الكرش ليشوف جسمك يكول عارض ازياء مو ضابط
هجرس_اعوذ بالله من اعيونكم
عيدان _ههه تحرك الخظر على اليابس
هجرس_اعرفكم مرخصتكم
عيدان _مرخوص
بالعمدة كلت طاكلي كرش لان زوجها كرشة كرش مره حامل بشهرها وانا ماعندي كرش و جسمي مرتب ومعتني
بي بقيت اباوعله تلقائي نفسي
ضحكت شافت بي هذا ؟ من كل عقلها حبته وأخذته؟ وانا كل هذا الجمال والجسم والمال والحال والأخلاق والحب لجنت اكنه الها ماشافته وشافت هذا
ابو كرش وحبته صدك لو كالوا الحب أعمى مثل ما انا عميت وحبيتها بكامل عيوبها. هي هم عمت وحبت
هذا المكرش الشايب ...
رحت للمحلات هم رجعوا اشتريت كم شغلة ورجعت ويه رجعتي شفت حنين واكفه بالباب لابسة دشداشة جويتي بردان أطوال صايرة ضعيفة كصبة
باوعتلي أبتسمت وبوجهها ودرت وجهي عنها صح حسيت بعصبيه بس ماحسيت بالغيرة أبد ولا اهتميت الها صارت ويه غيري عصبيتي كلها على خيانتها لي .
رجعت للبيت بارق طلع شايل تلفون عمي جدوع ماسألته بعد اكيد جاي يودي له "ثاني يوم الصبح أتصلت بالمركز واتفقت وياهم من اوصل بالبيت وأشوفهم
انطيهم إشارة راح أخذ وياي تلفون عادي بس أتصل بيهم يدخلون ويلقون القبض عليهم .سلمت على أهلي وطلعت اتصلت بي الخلفتني ..
_هاا يمة تجي
_اي جاي مسافة الطريق اكون عندج رجلج طلع
_اي الفجر طلع
_هاا زين لعد
_انتظرك لا تتأخر
_تمام
دخلت بالمنطقة مالتهم أتصلت بياسر "
وصلت المنطقة وين أنتو؟
_وراك أحنه
_تمام
_بس تشوف الأجواء مو تمام أتصل
_ماشي
قلبي انقبض قبض وصلت كدام .... باب البيت أخذت نفس طويل وزفرت وراها نزلت بيدي التلفون مخلي علر رقم ياسر بضغطه زر يتصل بي المهم وكفت
كدام الباب دكيت
وانتظر تفتح دكيت أكثر من مرة صاحت "
منوو ؟
_فرقد افتحي
_يايمة ماصدك اجيت تشوف امك بعد كل هالسنوات
_دفتحي بالأول
فتحت الباب من شفتها قلبي القبض قبض النفس كوة صرت أجره متغيرة هواي وكبرانه وسمنانة مبين من اعيونها جانت تبجي من شافتني نزلوا ادموعها
واجت تحضني بعدت عنها بسرعة "
ليش تتهرب مني
_تحجين هنا لو ندخل جوه
_مستعدل على الدخله ؟
_عندي شغل احجي بسرعة
_ماشي فوت جوه
دخلت بالحوش سدت الباب اعيونها ماوكفت دموع رادت تلزم ايدي جريت ايدي_لا تلمسيني
_فرقد شبيك يمة
_مابي شي تحجين هنا
_لافوت جوه هسه يشوفوك الجوارين ويفكرون بغير شي
_ماشي فوتي أول
فاتت قبلي لمحت البردة تحركت واحد جان يباوع تأكدت هم موجودين بس مانطيت إشارة دخلت وراها وكفت بالصالة هي سدت الباب وكالت ..
_سامحني يمة
من كالت سامحني يمة عرفت بي كمين رأسن ضغطت على زر الأتصال وانطيت إشارة لياسر وجريت المسدس طلعوا ولد خوالي أربعة وزوجها من الاستقبال
وهم نزلوا من فوك السطح بيدهم الأسلحة رأسن جريت أمي وخليت المسدس برأسها وصحت عليهم "
هجرس_اي حركة منكم اطشر رأسها
زوجها _عوفها ناقص
هجرس_ماكو غيرك أنت الناقص
نزلوا كلهم وكفوا سره واحد موجهين اسلحتهم ناحيتي وأمي بس تبجي وترجف بين ايديني ..
عادل _تريد تقتل امك
هجرس_هاي مو امي لو أمي صدك مجان باعتني
امي_فر.....
هجرس_اششش ولا كلمة حنان كلمة منج اطشر راسج
زوجها _ مو انطيتج إشارة اطلعي ليش ماطلعتي
عادل _من وراج عمه عطلتي علينا الشغل
هجرس_شغلكم وياي اليوم بالمركز ...
بعدهم ماناطقين بحرف واحد كبسوهم ياسر وذياب وعناصر الشرطة دفروا الباب كلها رافعه الاسلحة ويصيحون عليهم " ارموا الأسلحة وارفعي ايديكم
ليفوك بسرعة ...
بقيت حاضن امي ومخلي المسدس برأسها واباوعلهم شلون شمروا الأسلحة ورافعين ايديهم ليفوك كلبشوا ايدينهم اجت بالي أضغط على الزناد وافجر راس امي
اجوني عناصر الشرطة يردون ياخذونها مني "
عوفوها مالها دخل
ياسر _فرقد سلمها
هجرس_مو وياهم جانت وياي متعاونه
ذياب_ تسجل اقوالها بالمركز وراها تطلع
ياسر_شيل المسدس فرقد
جريت المسدس وبقيت حاضنها .... جاء ذياب راد يكلبشها اعيوني صاروا برأسي وصحت بي ...
" كتلكم عوفوهاااا
ذياب_ تمام لتصيح بس
ياسر_جيبها وياك يله بسرعة طلعوهم
المسدس بيدي وايدي الثانية لازمه ايدها امشي بيها تذكرت مالابسة عباية وكفت "
ياسر_اشو وكفت ؟
هجرس _ملابسة عباية
ياسر _خرب بعمي يفكر يسترها وهي رادت ت...
هجرس_ياسر روح جيبلها عباية
ياسر_اجيب بس اسكت
راح ياسر دخل للغرفة بسرعة طلع جاب عباية أخذتها منه وخليتها على كتوفها وطلعت بيها صعدتها يمي بالسيارة صارت بيني وبين ياسر شعلت جكارة
حيلي كله يرجف باوعتلها بس تبجي ومقطية رأسها بالعباية أمي حبيبتي لجنت أحبها وأموت عليها تبيعني لرجلها ولد اخوانها والله وكت ام تبيع ابنها لرجلها .
وصلنا المركز نزلوهم وانا بقيت مجلب بيدها ماسلمتها لأحد دخلنا للمركز راد يأخذها مني جواد ماقبلت كلتله تعالوا سجلوا اقوالها عندي بالمكتب
مال انطيها الكم مستحيل مجبورة جانت .
جواد_ فرقد اتفهم موضوعك بس لازم تسلمها خلنه نشوف شغلنا ولتعطلنه
هجرس_تعال وسجل اقوالها عندي
ياسر_مايصير سلمها
هجرس_راح تضربها وتأذيها ؟
جواد_لاوالله ماضربها
ياسر_لا لا مايضربها بس يحقق وياها يله انطيها له
فرقد_اقسم بالله العلي العظيم إذا مديت ايدك عليها اكسرها
جواد _وعد ماراح اضربها
فرقد _امنت بيك وامي أمانه عندك جواد
جواد _امك امي ولا يمهك وانا بيدي أخذها وماخلي احد يأخذها غيري علمود تأمن عليها
فرقد _ماشي بس اريدك تعلمها شتحجي وشتكول
أثناء التحقيق؟
جواد _صار تدلل
ماحبيت انطيها الهم بس مجبور اسلمها انطيتها لجواد وكتلها
روحي ويه جواد وحجي ليكله الج و
لتخافين راح يساعدج
أمي _والله جبروني
هجرس_والله ادري جبروج روحي هسه ويه جواد واحجي ليكله الج جواد وديري بالج تخربطين أثناء التحقيق وتليصين كلشي علينه
امي_خليك وياي يمة
هجرس_وياج والله بس تعاوني ويانه علمود نطلعج
جواد_يله خاله تعاي وياي
امي_فرقد تعال وياي
هجرس_مامسموح لي ادخل أثناء التحقيق جواد وياج موجود وراح يساعدج
أخذها جواد وراح كمت اشيل وادك بروحي شكول وشحجي امي بنص المركز ومتهمة بعملية قتيالي انا ابنها ياكاع انشكي وابلعيني مانطيت بيها كدام
ربعي أخاف ياخذون علية غير نظره وراح اعمل المستحيل واطلعها براءة وماخليها بالسجن تبات ليله وحدة أتصلت بأبو ياسر وحجيتله القصة وكتله ساعدني اطلع
أمي هسه وماخليها تبات بالمركز وتطلع براءة هي مالها دخل جبروها هيج تسوي وجانت متعاونة وياي وهي كالتلي عليهم يردون يقتلوني وناصبيلي كمين
تفهم الموضوع وكال أنت هم سجل أقوالك وانا راح أتصل بصاحبي واسويلك وساطة وره شوي اتصل بي
وكال سجلت أقوالك ؟
_اي سجلت
_ المهم أنت سجلت اقوالك واكون أقوالك
متطابقة ويه أقوال أمك
_علمها جواد شتحجي ماتحجي أثناء التحقيق وانا حجيت مثل كلامها علمود مايصير اختلاف
وتلاص الشغلة
_ زين سويتوا كم ساعة و تأخذ أمك
_أشكرك عمي هواي تعبتك وياي ماعرف شلون جازيك
_ولايهمك فرقد انا خادم
_خادم ربك عمي اخذ راحتك
_وأنت هم دير بالك على نفسك وامك
_ان شاءالله في امان الله
_الله وياك
سديت الخط باوعت لياسر يباوعلي مبين مقهور على حالي صرت مثل المخبل اركض مناه واركض مناه بس اريد وساطة اطلع بيها امي وماخليها تبات
بالسجن جابها لي ذياب أخذتها من أيده هواي باجية جانت من شافتني حضنتني وبقت تبجي بكل حركة وجع قلب ياسر من شاف الأجواء كئيبة خله وطلع وسد الباب وراه
جريتلها خلك بحركة أعصاب دفعتها وكعت بالكاع صحت بيها " عبالج أحبج؟ عبالج نسيت كلشي سويتي لا موهجرس لينسى سويتي بي
صارت تبجي وتصيح بحركة أعصاب "
فرقد لتسوي هيج انا امك
_لو صدك أنتي أمي مجان بعتيني لزوجج ولد اخوانج ولج شلون طاوعج قلبج وبعتي ابنج من دمج ولحمج ولج شنو من ام انتي بس فهميني شنووو
رحت للباب فقلته وبقيت اصيح واغلط عليها وعلى اخوانها وزوجها هي بكل كلمة مني تزيد بجي وصياح وتنكر عينك عينك لسوته بي وحتى أثناء التحقيق
ماعترفت وكالت الصدك كالت لعلمه الها جواد وانا واثق باعتني مثل ماباعتني قبل بطفولتي هي متعلمه على البيع والخذلان وهمشي عدها نفسها ومصلحتها
ومستعدة تبيع الكل علمود مصلحتها الشخصية .
جريت الكرسي وكعدت كدامها هي بالكاع كاعدة وتبجي بكل حركة وتصرخ بصوت عالي بقيت مستمتع بصراخها
وعياطها عبالك موسيقى
المفضلة عندي واستمتع بسماعها قطعت استمتاع ب كلمة منها " جبروني
سديت اعيوني ورجعت فتحتهم أريد اسيطر على أعصابي ماريد اتهور واكوم أمد ايدي عليها خليت رجل على رجل ورجعت ظهري للخلف
وشابكت أيديه واباوعلها بتركيز هي تباوعلي وتبجي
_ليش ماكتي ؟ ليش ماهربتي ؟ليش بقيتي ساكته إذا فعلآ كنتي مجبورة ؟ ليش هيج سويتي بي شلون
طاوعج قلبج وعفتيني
وأني بأمس الحاجة الج ؟! بيش أحسن مني لاخذتي ورحتي لبعيد ؟! هيج أني رخيص
بنسبة الج يم...
