رواية الهجرس الفصل السادس عشر 16 بقلم رواء هادي
من سمعت الكاله حسيت طلقة وفاتت بنص صدري كمت بسرعة من مكاني وصحت بي "
فرقد_شلووووون ؟
_انخطبت البارحة كاطعة مهر سيد وأنت أبقى جر حسرات وصفات خلصت العدة مناه طلع الرجال مناه والله حظ الزركة كاعد مو مثل حظك .
_ولك شلون انخطبت بس فهمني شلون ؟
_أول أرجع بمكانك وخل أفهمك
_ردت وارجع حنونتي راحت من ايدي راحت لغيري شلون تريدني اهدي ياسر شلون ؟!!
_دكعد انعل ابو حنونه يابو الخلف حنونه يابو منين ماطلعت اشووو اكعد
رجعت كعدت بمكاني كوه لازم دمعتي ماريدها تطفر كدام ياسر ويكول هجرس طلع رقيق مثل النسوان ويبجي علمود مرته أو طليقته علمود تزوجت .
_اي عفية ..
_منو كالك أنت؟
_مناوي قبل شوي أتصلت بي وكالتلي
_النذال ماكالوا ولاجابوا طاري
_ايد ماتدري بهل اليد مسوينها سكتاوي بيناتهم
_منو طايح الحظ
_وحد موظف بالمحافظة ويستعينون بي بالجامعة
_بالجامعة؟
_اي يدرس فلان مادة بفلان قسم ومرحلة الثانية
_هاا
_اي تشك بلي اشك بي
_شنو قصدك ؟
_حساسي مايخيب أبد حنونتك مكبله ويه العينتين
_الزم حدك ياسر
_آسف بالغلط طلعت مني
_ماريدها تتكرر مفهوم
_اي .. يله عندي شغل انا اكضي وأمر بيك نكمل حجينه
طلع وعافني الواحدي أتصلت بمناوي أول سلام وكلام عادي وفتحت وياها الموضوع جانت مقهورة على حالي علمود عافتني وراحت شافت غيري بسرعة
_شسمه ومن وين وشكد عمره ومنين تعرفه ؟
_اسمه احمد عمره ٣٧ سنة من بغداد ويجي هنا يدرس بالجامعة بالأسبوع مرة ويبات بيت عمه ...
.وبت عمه تصير صديقه حنين
_شسمه صديقتها ؟
_بتول من شهربان
_هاا متزوج مطلق ارمل عزب
_ارمل مرته ميته بنتل كهرباء
_الله يرحمها
_أنت شلونك خوما متأثر
_لاعليش اتأثر هي هاي سنه الحياة الله يهنيهم
_مبين من نبره صوتك مخنوك ومقهور
_متوهمه مناوي يله عيني انا اترخص عندي شغل
_أخذ راحتك حبيبي باي
_بايات يقلبي
_الله وياك ..
سديت الخط مناه نزلوا دموعي مناه ماكدرت اسيطر على دموعي سوت اسويه امي من عافتني وراحت شافت غيري ماجنت متوقع بيوم ماضي اهلي راح ينعاد بي وراح ارجع أعيش نفس الشعور
ساعة زمان هديت شوي ورحت يم جواد شوي وكالوا عدنا مهمة إلقاء القبض على واحد ابوه مشتكي عليه علمود يضربه ويهدده بالسلاح
والله رحنا وصلنا للبيت طلعت المره من شافتنه صاحت بعلوا صوتها "علييي اشرد الشرطة بالباااب
ياسر_دخيلك يابو فاضل مو إنذار عندج هههه دخلوا
عاندت وكفت بنص الباب دفعها احد العناصر جوه البيت ودخلنا طلع شارد بره بالزرع ركضوا وراه وجابوا مكلبشين ايديه جان سمين وشوي بي دبه قصر اكرع
شعره وحدة ماكو برأسه
ياسر يضرب على صلعيته ويكله '
ليش ياعار ليش هاي جزات ابوك الك كبرك وزوجك وسواك رجال تهادد عليه بالسلاح وتريد تكتله
ياحسافة بيك هذاك التعب
كلمة وحدة ماطلع شمروه بدي السيارة رجعنا صعدنا بالسيارة ياسر دمه فاير على الرجال وانا هدي تمامآ كلمة وحدة ماطلعت صوتي أختفى من القهر
انا سالفتي سالفة ويه الحزن والقهر عبالك مكتوب لي أعيش بس الهم والغم والحزن اعيشة بدنياي
مامكتوبلي الفرح بيوم.
وصلنا للمركز شمروا الرجال بالسجن ياسر يمشي ويسولفلي قصته يكول متعاركين علمود الماي ابوه ماخذ الماي هو يريد يسكي الزرع وصايرين ملخ بشرفك شايف هيج همجية شايف هيج ناس متخلفة بس فهمني شايف
_عندي الانكس منهم
_اي وضعك متخربط مو عاتك هاي
_ضل بي وضع
_خلها تولي رحمه لأهلك
_عوفني
_وين رايح ولك تعال فرقد
مارديت عليه طلعت خارج المركز روحي ممرودة مرد من القهر بقيت اجر جكارة وره جكارة وحيلي كله يرجف شلون تأخذ بهاي السرعة شنو جانت عدها علاقه بي
لو اجاها من طرف صديقتها ليش جانت باردة وياي وتخاف من أخذ التلفون ؟! هل الاسئلة بقت تحوم برأسي حوم رجعت للمركز بقيت كاعد يم بقيه الضباط اريد
انسى واطلع من حاله الاكتئاب
لصابتني بهاي الاثناء .
جان عندي خفارة وتلفوني كل ساع يرن من الأهل جدي نازل على جدوع دوسة ونص يكول انطه بته بهل السرعة
لاجاء لاسأل لاكال هذا
أبوي لازم اشيره واخذ برأيه هيج صار رأيي مايهمه بسيطة جدوع بطن عيني ...
وراها بارق نفس الكلام أبوي ... يكلي لتشيل هم الها ازوجك احسن النسوان واجملهن لمونه قحط نسوان أبوي
يهدي بي حاجتني امي هم
شوي خلتني أضحك من كالتلي اخذك لاخواتي واخليك تتخير زينة البنات وإذا ماعجبوك اخذلك لعابة سلي بت ابو محمد شلونها تخبل جنها أميرة
_سلي ههههه
_اي شبيها ماعلجبتك
_اي والله ماتعجبني
_امده حظي ماتعجبك الحلوة تعجبك الجكمة ههههه
_هو شطيح حظي غير الجكمة
_ هذا حظك ونصيبك من الدنيا والحمدلله على كل حال
_الحمدلله
_اي صدك ابو محمد عدنه
_خير ان شاءالله
_جاي خطابه عليك لسلي ههههه
_ بارق انجب هههههه
بارق_اي هسه صار يضحك انا اعرف من ليضحك ويفرحك سلي الحلوة لعابة ههههه
_ولك انجب لتجيب طاري البنية
_والله مشتاقيلها الجلبة ماتقبل تجي
_صدك عود ليش ماتقبل تجي ؟
_هاا مادري
_الله يعلم شبيها البنية
_اي بيها انت العشق فرقد ههههه
_طاح حظك ولك لتجيب طاري البنية خطية تربطها بي
_ وين الله وعلي ابو الحسن تربط بيك
_انجب بيش طالبها
_امده حظي يخاف عليها من نفسه
_اي اعرف نفسي بوما مشؤمة ليش اشيل خطية ابنية واربطها بي وانا حياتي كلها تعاسة وحزن
_انجب ابو الحزن والتعاسة ...
_روح مالي خلك
_روح مالي خلك كضه عمره يتبجبج مثل عمتي سعدية
_هههههه
_عمتك سعدية جانت عدنه وتكول رجل حنين اشمره على الجلب يزوع من يمه هههههههه
_لابشرف
_بالقرأن هي كالت
_ليش شبي ...$@$
_من خرر.. بالعشيرة منورة دكتك هاي ههههه
_قابل مجذب هههه
_لاوين ههههه
_اففف بارق كافي عليك الله والله قلبي صار يوجعني
_هذا بدايه حب لسلي ههه
_انجب ياسلي من الضحك مالتك
_اي أبقى أضحك افتح انترنت خل اشوفك
البطل مالتي سيوفي
_مشتاقله بكد رحمة الله
_يله لعد افتح
_ثواني وافتح
سديت الخط فتحت ... انترنت دزلي صور لسيوفي ابنه على التيليكرام وراها اتصلت بي فتح كاميرا وشوفني سيوفي يضحك ويناغيلي متعلم
علية ساكنه الليل والنهار .
شوي نفسيتي ... ستعدلت من حجيت وياهم ثاني يوم رجعت للبيت هلكان من التعب بوجهي لسيوفي اخذته بحضني أكلته اكل بالبوس وعضعضت
خدودة على كيفي هو خربان من الضحك رجعته لهباوي وطلعت لغرفتي بدلت وسبحت شوي ودخلوا عندي جداتي وجدي حجوا وياي وانا أضحك
سويت نفسي ... مامهتم ماردتهم يشيلون همي اعرفهم راح يتعذبون من يشوفوني مقهور المهم ثلاث أيام وانا نفس الحال اروح وارجع اعيوني
على بيت عمي جدوع انتظر حنونه تطلع علمود اشوفها وهي ماكو والله كاعد بره بالكاع وصافن بضيمي رن تلفوني
جانت رسالة من بارق
_افتح انترنت بسرعة
فتحت انترنت وصلني إشعار من بارق على التيليكرام دازلي صورة فتحت الصورة شفت رجال أبيض البشرة عنده لحية وشوارب وشعر رأسه خفيف
وجسمه متروس وطوله مثل طول عيدان كصيرون استغربت منو هذا ؟ دزيتله رسالة...
_منو هذا ؟
_ماعرفته
_لا والله
_هذا لحنونه فضلته عليك هههههه
_لابشرفك
_وغلات هباوي وسيوفي هذا تعيس الحظ هههه
_صدك لو كالوا جكمة واخذت اجكم
_الحمدلله والشكر هسه يله عرفت بيها جكمة
_والله من زمان ادري بيها جكمة بس حبيتها
_مالومك اعيونك حول وماتشوف عدل
_اي ... ولك شافت بي وقبلت ؟
_شافت "@$"&
_هههههههه
_وعلي هالضحكة طالعة من كل قلبك هجرس ههههه
_اي وعلي من كل قلبي هههه
_ اي وين ماوين
_بالكاع
_شكو بالكاع ماتكلي
_راحتي بيها
_جاي تصيد ؟
_لا افتر
_صدك عمي ابو محمد سأل عنك
_ليش هو هنا
_مو كالتلك عمتي هو هنا البارحة شنو نسيت
_عبالي تشاقون
_لا مانتشاقه جاي يرمم بالبيت راح ينتقلون هنا بس تكمل سلي دراسة
_هاا مو اكون يجون قبل لا تكمل دراسة
_اي يكول هي ماقبلت وكالت بس ترحون اروح وياكم واترك الدراسة ماكمل
_هاي شبيها ؟
_تخاف
_سلي تخاف والله بطران انت
_صارت بيها خوفه منك ...
رجع حذف الرسالة وكتب ...
انطيها حقها ابنية وين تبقى بغداد الواحدها
_كتبت صارت بيها خوفه منك .. شنو قصدك ؟
_هاي الكيبورد كتب تلقائي نفسه
_بارق شصار بهذيج الليله
_يالليله ؟
_لتخربطت بيها وسلسبيل عافت البيت وراحت ويه اخوها من هذاك اليوم ماشفناها بعد برغم أبوي اتزوج وانت ومناوي نخطب وهي مالها حس
_كلشي ماصار
_ابقو ضموا علية أنتو
_قابل شنضم عليك يافرقد
سديت الانترنت وكمت رجعت للبيت شفت جديتي حلوة كاعدة بره بالحديقة كعدت كدامها اريد أعرف شصار وياي وليش سلي بعد ماوصلتنه ولا سألت ؟
_جدة
_هاا عيني
_تسلم عينج اريد اسألج سؤال
_اسأل جدة
_صدك يوم لتخربطت من سلسبيل باتت عدنه وضربتها وهي صارت تحجي عني وتكول مخبل هذا اشمروا بالمستشفى أمراض العقلية
_صخام براسك منو كالك هذا الحجي ؟
_سمعت
_انعل ابو لكالك هذا الجذب منين يجيبون هذا الجذب بس فهمني منين
_يعني ماكو هيج كلام ؟
_والله العظيم ماكو هيج حجي وهذا لكالك هذا الحجي هذا جذاب ويريد يخرب بيناتكم ويشوه
سمعه البنية بنظرك
_حنونه سوت
_حنونه لعبت جوله
_سوت ؟
_تخبلت من شافتك فقدت عقلك صارت تعيط وتكول ماريده ودوني لامي لو ادري بي هيج يتخبل فلا قبلت اتزوجه تورطت من تزوج هجرس تورطت
تعاركت وياها سلسبيل خوب البنية جانت بحاله صدمة بس والله ماقبلت عليها علمود تحجي عليك وكالتلها حسبي الله ونعم الوكيل بيج
وحنونه كبت بيها وكالتلها اخذي مني الج انا ماريده ومتنازله مني الج بس ودوني لأهلي ماريد هجرس ماريده وهذا الحجي لصار واذا ماتصدك اسئل بارق
كلشي صار كدامه .
_حنين هيج سوت كدام سلسبيل
_اي وأكثر
_شلون لعد تكول انا تعاركت ويه سلسبيل
علمود حجت عليك
_كول سلسبيل تعاركت وياها من هي هيج سوت
_أستغفر الله العظيم واتوب إليه..هاي شكد جذابة رب الكعبة كل حجيها جذب بجذب وانا حكمت على سلسبيل المسكينة وغضبت عليها
_مكرودة سلي كل المصايب والبلاوي توكع برأسها عمل فقيرة ماتحجي كلها تحجي عليها
_جنت قشمر
_لا موقشمر جنت رجال بس مرتك جانت عايقة وبربوك وقليله أصل وتربية وأخلاق وتوصلك حجي
كله جذب بجذب الله يلعنها .
_ اففففف لا حولة ولاقوة إلا بالله العلي العظيم
_الله حبك وخلصك منها
_اي والله الله حبني وخلصني من هيج وحدة
_افرح بدل ماتحزن
_ان شاءالله
_ولايهمك من الصبح اشوفلك زينة البنات المنطقة
_ماريد
_ليش جدة ماتريد
_لعبت نفسي من النسوان
_فرقد
_بالقران كرهت جنس حواء كله
كمت تباوعلي رادت تحجي عفتها ومشيت ادري بيهم يردون يزرعون سلسبيل برأسي وانا مستحيل اخليها برأسي ماتعجبني هيج وحدة واصلا
ماريد ادمرها وياي وانا اعرف نفسي شنو ومنومستحيل أسعدها وانطيها كل الحب والاهتمام راح
اظلمها وياي لامحال .
جاء ابو ياسر وحدد ...موعد العرس كال أسبوع الجاي راح نزف جدي قبل وعمي هم قبل ثاني يوم الصبح راحوا يجهزون للعرس وانا بره واكف
كدام المظيف شفت عيدان يباوعلي ويخزر شعلت جكارة وابتسمت بخفه وكلتلها "
هجرس _عود مسوي نفسك ثكيل كدام الخانس المنطقة
عيدان _ على نفسك مو علينا
هجرس_غصب على راسك انا خانسك وخانس الخلفوك
عيدان _جفني شرك
هجرس_جبان
عيدان _ابعد للشر وغنيله
هجرس_ تدري شنو يدور بالي ..
عيدان _ اعوذ بالله رجع هجرس لو سل رجعتلك
هجرس_الاثنين سوه رجعوا واريد اتفضل عدكم للعشا
عيدان _ قل اعوذ برب الفلق من شر ما خلق...
هجرس_شركم مو شرنا
عيدان _ولك شتريد ؟
هجرس_اريد أخذ روحكم
عيدان _ لا إله إلا الله
عافني ومشى سريع ادري بي جبان بس كدام ابوه واخوانه يصير سبع صحت بي " عيدان سلملي على قسيمة وكللها هجرس رجع مثل قبل وراح يلعب بيج جوله
عيدان _ولك شتريد من امي
هجرس_ حاب العب من زمان مالاعب لعب حلوة
عيدان _ اعوذ بالله من الشيطان الرجيم بسم الله
الرحمن الرحيم
صار يتعوذ من الشيطان الرجيم ويسمي بأسم الله عباله صدك هجرس وسل رجعولي هسه راح اصكرهم واخليهم يخافون من ظلي مو مني شخصيا
المهم يوميا مروا وسمعت حنين متزوجة بغداد مامسويه عرس ولاشي سكتاوي خربت من الضحك هيج انا اخوف ومادري خطوبة سكتاوي وعرس سكتاوي
والله العصر اجتني عدوية ....تفاجأت بيها هاي جابها لعندي وطلبت تحجي وياي على النفراد اخذتها وطلعت بره بالحديقة وره البيت
كعدت بالمرجوحة هي كدامي واكفه ...
_اي عدوية احجي شعندج وياي ؟
_مو تعصب لو تضرب
_شكو ولج ؟
_حنين تره جانت تخونك
_شكلتي ؟
_لتخزر بي اخاف منك والله
كمت بسرعة صرت كدامها اخزر بيها ...
عيدي شكلتي ؟!
_حنين جانت تخونك ويه احمد
_عدوية تعرفين نفسج جاي تحجين
_اي بالقران اعرف نفسي جاي احجي
_متأكدة من كلامج ؟
_اي
_شمدريج ؟
_وحدة من البنات سولفت لي وكالتلي دائمآ تشوفها ويه الدكتور أحمد بالجامعة واقاربها بتول كايله اخذها عن حب طلكها من رجلها واخذها
_عدوية
_والله العظيم مجاي اجذب وعندي دليل
_انطيني دليل
_انتظر
طلعت تلفونها بسرعة فتحت الرمز وشوفتني صور الصدمة لي جانت حنين هي وياه كاعدين بحديقة واحد بصف الثاني وصورة بالكفتريا بعيد ميلادها
هي وياه محتفلين
جريت التلفون من ايدها واكلب بالصور أكثر من صورة جانت اعيوني برأسي صاروا انطيتها التلفون
وكتلها بهدوء
_ليش فضحتيها
_ صارلي فترة متعاركه وياها وهي تحجي عليها وتحجي عليك وتكول أنت مخبل وماكو عقل براسك وجدك جابرها عليك وتكتل بيها الليل والنهار
وتحجي عليك حجي ماينحجي بالجامعة
_حذفي الصور وديري بالج تكولين الكائن مايكون عن السالفة والله بس اسمع طالعة السالفة احفر
كبرج بيدي واطمج
_بالقرأن ماكول بس الك كلت
_تمام يله روحي لاهلج
_اي
عافتني وراحت حيلي كله انهد إلا شوي صارت بي سكته قلبيه حنونه حبيبتي ومرتي جانت تضحك عليه وتخوني ويه رجال وهي على ذمتي ؟
شلون تجرأت وسوتها شلووون ؟ شلون تخون رجلها بس اريد اعرف شلون تجرأ وتخون انا رجال ماتجرأت وخنتها بالتلفون مو بالواقع هي شلون ؟
عقلي ماستوعب الكلام لسمعته من عدوية والصور اريد اجذب اعيوني واذاني ماكدر قلبي صار يدك قوي
احسه راح يوكف بيى دقيقة
بقيت بره جكارة ورة جكارة وحيلي كله يرجف وأفكر بكلامها قسمت بالله إلا اخليها تندم على خياتها لي واخليها تبوس القنادر فلا اطلع هجرس
إذا مامارست بيها كل أساليب هجرس الخبيثه فلا اطلع ابن أبوي وابن حجي موسى انا فرقد تخوني مرتي وتستغلني وتريد تاكل حالي ومالي وتودي للكو...
... مالتها ياحسافة والله
مرت الأيام وانا ضام كلشي بقلبي وماحجي بس مبين عليها العصاب وروحي بخشمي صايرة ماحجي ويه احد وحتى سيوفي تركته ماروحله
دخلت للغرفة كرهت الغرفة ولبيها والمابيها وانطيتها الواحد من ولد عمي جاء بالليل فتحها وأخذها والله رجعت
لغرفتي القديمة فوك .
شوي ارتاحيت هنا وشوي كدرت أنسى الخاينة ام الزلم تذكرت الصندوق القديم مالتي بي هواي أشياء جنت
الكاها بالكاع واضمها
جريته من جوه الجرباية وخليته .. كدامي جان بي قفل صغيرون كمت دورت على المفتاح لكيته بنص
كتاب قصة قديم عندي
فتحت القفل وفتحت الصندوق اباوع بالغراض صاير صار فترة كلش طويلة ماشايفهن كعدت اطلع بيهن واتذكر أيام وزمان وين جنت وين صرت
أكثر شي بي حصو وقطع فخار جان عندي واهس بيهن واحب اجمع بالاشياء القديمة شفت اسوار خرز شلته بيدي تذكرت هدية من سلسبيل
بوقتها جت تسأل عني من امي عافت لبيت وراحت وكالت هذا تذكار مني الك تذكرني عود أبتسمت من اجت بالي حضنتني ورادت تكلي
شي بس تراجعت بالآخر وراحت .
والله العظيم جنت أعمى ماشفت اهتمامها وحبها لي برغم جانت طفلة بس تهتم بي وتحاول تقترب مني وانا بكل برود اتعارك وياها واطردها لو اسمعها كلام موحلو ولاهي بي كله الخاطر الزركة
والزركة مجانت تسأل عني ابد لو انا اسأل لو ماكو " هسه تأكدت الأنسان من أنسان ثاني يحترمه ويحبه ويقدره هو مايقدر كل هذا ولا راح يشوفه كدامه " بس من الأنسان ثاني يهينه ومايعبره ولا يسأل عنه راح يحبه ويتعمق
بحبه وانا هيج صرت
عفت لي تسأل عني وتحبني ورحت وره الماتحبني ولما تسأل عني ولماتخاف من الله " الليل كله ابجي على
حالي شلون ضحكت عليه
وخانتني وياريت وره ماطلقتها راحت حبت لا حبت وهي على ذمتي وجانت تشارك نفسها ويه رجال غريب بدل ماتشاركها ويه زوجها بالحلال .
غضبت عليها ....مو شلون مجان الليل يمر علية وانا اكضيها لوعات وحركه أعصاب اكدر بسهولة اسويلها عمل شيطاني واخبلها لو اكتلها لو اكتل رجلها العار
بس ماريد ادخل بالسحر والشعوذة اريد أخذ حقي بيدي
ماريد استعين بالسحر والجن واخليهم هم ياخذولي حقي لا انا اخذلي حقي بنفسي وجه لوجه
راح يكون الإنتقام
وراح اجرلها خلك أيام أشهر سنين يله انتقم منهم اريد اموت قلوب هسه واخليهم يامنون يله ابلش بيهم بهدوء واريد اتلذذ بالانتقام تلذذ .
ثاني يوم صادف حنه مناوي رحت شفتها وباركتلها عزمني ياسر ماحبيت افشله ورحت لبيته بالحنة طلب مني اركص وياه انا ماعرف اركص عاد ركص شلون مجان
ماردت افشله خطية هواي ركص بعرسي الكشر وذب لحم تعبت ورجعت شفته جر جواد جر وخلاه يذب لحم شبعت ضحك عليهم ربعة ولد عمه ذبوا لحم
بالركص وره مانتهت الحفله ردت ارجع ماقبلوا وكالوا تبات عنده وباجر عرس ماتروح لاهلك لتكول انا اخوها للعروس تره اخوها بالرضاعة مو اخوها من امها وابوها
_هاي شلون ورطة وياك ياسر
_والله ماتروح بس تروح ازعل
_يابة كلشي ولازعلك ابقى نايم على قلبك ارتاحيت هسه
_ايييي تعال خل ابوس هههه
_لتجي عليك الله والله نفسي تلعب من تبوس
بي ولك واخرر ...
تهجم عليه هو قاطة وصار يبوس بي بحاله أعصاب شلته وردت اشمره بالكاع صاحوا بي انتبهت على نفسي خربت من الضحك ورجعت حضنته اضحك ههههه
ياسر_جان كسرت ظهري بدل ماعرس يصير عرسي بالمستشفى
هجرس_مادري والله ههههه
ياسر_كضيت عمرك ماتدري
هجرس_أنت ماتكعد راحه تدري بي اكره شخص يبوسني قوي اتخيل نفسي كحبة .
ياسر_ اويلي يابة شلون كحبة معدلة ههههه
هجرس_ولك كافي
ياسر _دعوفني فرحان بعرسي
هجرس_ماتفرح منو لازمك
ياسر_مو أنت ماتقبل اقتربلك
هجرس_انا خط أحمر لتقترب وتبوسني
ياسر_ماتكمل فرحتي بدونك
هجرس_ماتجوز ادري بيك
ياسر_ايي هههه
بقى ينكنك فوك رأسي وانا ماتحمل واحد ينكنك فوك رأسي تحملته علمود عريس انوب تذكرت أيام عرسي وتخبلت كضيتها بالجكاير جكارة وره جكارة
عفتهم وكمت رحت للبيت دزيت على امي اريد أنام بسرعة اجتني وكالت "تعال ادخل
_أخاف اكو احد
_ماكو احد غريب بس البنات
_تمام
ويه دخلتي.... للبيت طلعت بوجهي ابنية رشيقة وحلوة كلش شامرة الشال شمر على رأسها من شافتني أبتسم صاحت عليها امي
امي_ختام خاله جهزتي افراش الفرقد
ختام _اي خاله جاهز
امي_عفية ...تعال وراي
اخذتلي نظرها بيها من فوك .ليجوه هي خجلت من شافتني بسرعة مشت دخلت جوه يم البنات امي تمشي وانا امشي بصفها وصلنا للقاط الثاني
فتحت باب ... الغرقة دخلت وراها جانت الغرفة مرتبه وبيها جرباية ...
_غرفة منو ؟
_غرفة ياسر
_هههه
_ههه اي غرفته هاي
_من يجي يمي ينام بغرفتي الثانية وهسه انا نمت بغرفته الثانية باعي الصدفة الحلوة
_اي احلى صدفة وانتظر ساعة زمان نايم يمك
_دخيلج يمة ماريده
_ههه ليش يمة ماتريده
_يشلع قلبي شلع
_تحمله بس اليوم هههه
_ماريده
_مو هذا حبيب قلبك
_مابي حيل يتخيلني مناوي ويشب فوكي
_ههه مو لهل درجة
_بالقرأن متخبل ماريده يمة ماريده
_بكيفك بعد هاك المفتاح خلي يمك أخاف يجي عليك اقفل الباب ههههه ...والله عدكم سوالف
تخرب ضحك
_اي هههه
انطتني المفتاح ... وطلعت بس طلعت قفلت الباب اريد أبقى الواحدي وأبقى بضيمي وقهري قهري زاد أكثر من عرفت بيها خانتني وهي على ذمتي
تمددت على ظهري وانظاري للسكف بصفنه بس اجي للفراش
هواي ناس بكلبي تالي الليل تكعد وتهيج بجروحي جرح جرح جروح ماضي تنفتح وتنزف وجروح
الحاظر هم تنفتح ماعرف شكم جرح اخيط كلما اخيط جرح ينفتح جرح أعمق من الثاني امي لوعتها ابد ماناسيها ونايمة بنص قلبي ومحفورة حفر من دعت عليه وكالت ان شاءالله يجيبونك لابوك بالتابوت .
طلعت من شرودي على رنه التلفون كمت رحت للتلفون جان على الشحن مخلي شفت المتصل رقم
غريب فتحت خط .
_الووو
_هلاوو هجرس شلونك ؟
_منو وياي
_سلي
ضحكت من كل قلبي هاي شذكرها بي هسه "
هلأ سلي شلونج اخبارج عاش من سمعت صوتج الحلو وين ماوين ولج اشو كاطعة هي الكطعة لا
تجين لاتسألين ؟!
_على كيفك وياي انطيني وحدة وحدة
_والله جاي نعاتب
_والله حقكم علية بس ضروف صارت وان شاءالله ابات يمكم هاي الفترة
_والله
_اي والله هسه اني بيتكم
_نورتي والله
_بنورك .. اي شلونك اخبارك خوما متأثر بفراق الزركة
_ مو فرقد لتاثر بي فراق الزركة
_اي عفية هيج اريدك قوي
_اويلي يابة هههه
_دوام ان شاءالله اشوفك فرحان
_امم.. ماكتيلي شعجب ذكرتيني اليوم وأعتقد هاي اول مكالمة الج إلي ؟
_اي جنت ماريد اسوي مشاكل بينك وبين الزركة
_وهسه
_هسه ولت وان شاءالله ماترجع أبد
_هيج تكرهيها
_اموت منها بالقرأن الكريم وحدة أنانية وحقيرة وجذابة
_وأنتي
_اني حالي حال الطفل بالكماط لايهش ولاينش
_بريئة كلش
_احسن من ماصير شريرة وارشك سم الحياية
_ اموت على الحياية والعرابيد
_اي مو أنت هجرس تتغذا عليهم
_هههههه
_شوكت ترجع
_سلي جاي تحسسيني أنتي مرتي
_ مو صوجك صوجي اني لاسأل عنك باي
_ولج تعاي وين رايحة
_زعلت بعد
_وليش تزعلين
_ليش تكلي تحسسيني مرتي يعني كلمن يوكف وياك ويساعدك ويساندك تاخذه بغير نظره غير
نظرتك هجرس غيرها
_هسه تأكدت انا بعيد لقلبج
_ليش انت يايوم صرت قريب القلبي علمود تكول انا بعيد
_من تكليلي فرقد اصر قريب القلبج
_شنو هاي ؟
_أنتي كتيها لي تذكرين لو لا
_ماتذكر
_لا تذكرين بس جاي تقشمين بروحج
_وعليش اقشم بروحي
_مادري
_اكلك هجرس
_كولي
_ وين راح حبك للزركة هههههه
_خررر... بعمي جدوع ولج اكعدي راحة
_تذكر من جنت تكلي حنونه حبي الأول والأخير وراح ابقى وياها لاخر يوم بعمري هههههه ولكم انتو سالفة من سالفة حبكم طلع جذب بجذب وأصلا طلع لعب جهال من شبعتوا من اللعب عفتوا بعض هههههه
_مشمته بالقرأن الكريم هالبنية
_اي والله حيل مشمته بيك مو كلتلك ماتفيدك وحدة جذابة ماصدكت بي وطلعتني اني الجذابة
وهي الصادكة
_ سلي
_هاا
_مشتاقلج
_من اي ناحية ؟
_من كل النواحي
_سالمين ملازم فرقد لتحاول تزحف تره محجوزة
_شنو محجوزة ؟
_محجوزة لابن عمي ههههه
_تحجين الصدك ؟
_اي والله جاني خطاب قبل كم شهر وشفت الولد خوش وحلو ومعدل وقبلت بي
_كطعتوا مهر وماكتوا ؟
_لايابة ماكطعنه مهر بس حجي وان شاءالله بس اكمل جامعة نرسم العلاقة وبعد نتزوج
_ابن منو من عمامج
_عمي شاهين تعرف ابنه غدير مدرس رياضيات ويدرس بفلان مدرسة بعقوبة
_ اي عرفته خوش ولد
_اي احسن ماتزوج غريب ماعرف شبي مابي
_اي على اقل ابن عمج ومنج وبيج
_اي صحيح وانت
_شبي انا
_ماتزوج
_توبت بعد ما اتزوج أبد
_هاي شنو فرقد
_كرهت الزواج وكرهت النسوان ومالي رغبة بعد
لابالزواج ولا بالنسوان
_لتخلي حب حنين يأثر بيك
_مو بس هي لقبلها اثرت بي وخلتني اكره نفسي وهسه جملتها الزركة وطيحوا حظ حظي
_لافرقد عليك الله لتكول هيج ماتعودت اشوفك ضعيف الشخصية تعودت اشوفك قوي
وتتحمل كلشي
_جبل من كثر الزلازل لبي نهد شلون تردين كوم لحم مركبه بعظام تبقى صامدة بكثر الصدكات والضربات الموجعة وكلشي له حدود سلي وانا حدودي كلها وكفت بعد
وماعندي طاقة اتحمل صدمة جديدة .
_كول يالله
_افففف يالله
_اني واثقه راح تعيش حياة حلوة وسعيده وراح تلكه الانسانه لي تستحقك وتقدرك وتحترمك
مثل ماابوك لكه مرته الجديدة
_انا متأكد مامكتوبلي الفرح
_انجب مكتوبلك
_ولج عليمن انجب
_عليك واحد جبان طلعت من امداك هجيرس ليش هيج دمرت نفسك علمود الزركة ام الزلم دشوفها ماهامها شي كملت العدة مناه طلعت رجال من جوه البط مناه وتزوجت وعافتك بهمك وبغمك لو اني
بمكانك من الصبح اتزوج وطزز بالراح وطززز بلي جاء
والحياة مستمرة وماتوكف على أحد
_ ابقي رزلي بي
_متحزمتلك حزام اريدك تجي علمود اكسرلك احوالك تكسر
_يمعودة هو شباقي بي وتردين تكسريني
_اكسر لباقين بيك
_لاعليج الله
_ملعون هجيرس ومابيك أمان أبد
_شلون مابي امان
_اليوم مكسور وباجر الكاك هجرس بعينه تكضيها انتقامات
_لاا
_وغلاتك عندي ..
_ليش انا عندي غلات عندج؟
_لااا ولك لساني طفر بالكلام قصدي وغلات امي عندي
_اممم
_يله باي هواي حجيت وياك
_الحجي وياج حلو وماينمل
_وياك هم يله باي
_بايات سلي بايات .
سدت الخط ... قبل لا اسده بعدها مثل قبل تشمر كلام بدون قصد اتصالها حلو جان برغم مو بالوقت المناسب بس بعدها تسأل عني وعن احوالي برغم انا موخوش
ادمي وياها جنت
رجعت بفراشي حسيت بالغيرة علمود راح تزوج ابن عمها وحسيت شعور غريب موجع ضرب بنص قلبي شلون الجكارة وصارت تجوي بنص قلبي جوي
لوجه الصبح تفكير في تفكير وأغلب تفكيري جان بسلي ماستوعب فكرة راح تزوج ابن عمها برغم انا ماحبها وماهتم لامرها بس ماحب اشوفها متزوجه.
بدلت من وجه الصبح قررت أرجع ماابقى للعرس اريد اشوف سلي حتى ريوك ماتريكت نزلت شفت ياسر
واكفلي بداية الدرج وفاتح ايدينه
ياسر _وين رايح
هجرس_للبيت
ياسر_وحق علي ابطل ماعرس بس تعوفني وتروح
هجرس_ياسر شبيك
ياسر _حلفت بعد بس تعوفني ابطل
هجرس_ياسر كافي عيارة عندي شغل والله
ياسر_انعل ابو الشغل الشغل مو احسن مني انا صاحبك وكفت وياك بعرسك رد الجميل واكف وياي بعرسي ..ليش تخجلني كدام ربعي واقاربي
هجرس _افففف
ياسر_حذرت وتدري بي شاخط
هجرس_امري الله
ياسر_يله تعال تريك
نزلت وياه كعدنا بالاستقبال جابت الريوك نفس البنية لاسمها ختام أبتسمت بوجي وطلعت هم عدهم عادي يطلعون كدام النسابة مو مثلنا أحنه ماعدنه هذا الشي
بس مرات ياسر بالصدفة يلتقي بمناوي .
كملنا ريوك وجلب بي انت تسوق بالسيارة ماامن بيهم بس امن بيك وانا اريد اطفر مناك جلب بي وامي هم جلبت بي عاد ماكدرت أرفض وافقت
العصر طلعوا العروس من الصالون علمود ياخذون صور كال ماريد بالزفة تصير هوسة والله شفت مناوي طالعة آية من الجمال بقيت اسرق النظر عليهم
من الجامة بعدت انظاري من شفت ياسر حمه عليها وجابها بوسة من الشفايف هي خجلت ودنكت رأسها امه كاعده بصدر تعاركت وياه عاند امه وجرها لحضنه
ياسر _مرتب حلالي
ام ياسر_ادري مرتك بس عيب مناك اخوها
ياسر_واذا اخوها قابل بايك لو ناهب هاي مرتي وعروستي عوفيني فرحان بيها يمة
هجرس _الحجي وياه عيب عمه ههههه
ياسر _اي غير عروستي
ام ياسر_درينه عروستك بس خلي شوي خجل عندك
ياسر_انعل ابو الخجل امممح .. شتردون بعد
ام ياسر_صخام براسك فضتحنه ليشوفك يكول ماشايف مره
ياسر_وين شايف انا
هجرس_ استغفرالله عمه رحمه لاهلج عوفي مابينه حيل يطلع على الترابي .. مناوي عيوني من يمج كرصي
الرجال وخل يستجن ههههه .
مناوي_ياسر كافي عيب
ياسر_يمة فدوة طلع عندها صوت حلو هههههه امووت عليج
هجرس_احمد الله والشكره انا صرت السايق مالتكم لو مو انا جان هسه شهروك بالمنطقة ياسر مشوه
ماشايف مره ههههه
ام ياسر_لعد ماتشوف جلب بيك يعرف نفسه هريوف
ياسر_يمة شنو هريوف
هجرس_ماكلتي الا الصدك عمه هههههه
ياسر_ انتي ابقى انطي بي كسيرة كدام الرايح والجاي
ام ياسر_ولك غير اطباعك غير شبيك يمة شوي اكرص نفسك وشتريد سوي بالغرفة ويه عروستك مو كدام
الوادم خلي قيمة لنفسك .
ياسر_اهووو وين اكو عالم
ام ياسر _مو اخوها وياك
ياسر_فرقد اخوي وعادي كلشي اسوي كدامه ماتشوفي وياي اربعة وعشرون ساعة لا اخجل ولايخجل مني يمة ابوس ايدج رجلج عوفيني فرحان لتخربين فرحتي
هجرس_عوفي عمه
ام ياسر _ اشبع منها
ياسر_اي خليني اشبع من حبيبتي مناوي
ام ياسر_دشبع
وصلنا للمنطقة قلبي صار يدك حيل ملهوف على شوفه سلي وصلنا لبيت عمي نزلوا العروس نزلت بسرعة دخلت قبل العرسان سلمت ادوري سلي ماكو ماموجودة
سألت رحاب "
وين سلي ؟
رحاب_جوه بالحمام
هجرس_بعد وكت تسبح
رحاب_مو وكعت بالطين
هجرس _ياطين هذا ؟
رحاب_ بره بالحديقة طلعت تتمشى وزالكه واكعة بنص جوه الماي
هجرس_هذا ه...
ياسر_يله تعال
هجرس_جاي
طلعت وياهم رجعنا على بيت ياسر كل شوي طالعة كدامي البنية ختام وتبتسم ماعجبتني تصرفاتها عبالك جاي تشوف بروحها عاد خليت وطلعت كعدت يم الزلم
بعد مادخلت جوه بالبيت .
صارت الزفة رحنا على بيت عمي نزلت ويه ياسر واهله كلها تدك وتركص فرحانين وانا اعيوني تدور على سلسبيل ماكو مالكيتها شفت رحاب اشرت لها اجت تركض
لعندي "
هاا فرقد ؟
_سلي وين ماكو مامبينه
_موجودة وين راحت هاي .. ماكو اختفت ويه المعازيم
_هواي عالم
ماشفتها وماشفتها طلعوا العرسان وانا طلعت وراهم هم بعدني ادور عليها صعدوا العرسان بالسيارة رجعت صعدت حركت السيارة سمعت عمتي سراب
تصيح على سلسبيل...
ولج سلي جيبي الماي ورشي وراهم بسرعة
باوعت بالمراية الصغيرة شفت سلي لابسة فستان موروني طويل للكاع بردان أطوال ومخليه شال أبيض فوك رأسها رشت الماي بيدها وتضحك وانا هم اضحك
يايوم سلي تلبس حجاب وتلبس ملابس محتشمة؟ طول الطريق أفكر بيها وبتغيرها مستحيل تكون لبست حجاب الحجاب شمر جان على رأسها موحجاب كامل.
وصلنا بيت ياسر دخلت وياهم جوه ياسر وامه وخالاته وعماته ذبوا لحم كوموا مناوي كوه تركص وياهم خطية جانت خجلانة كلش شوي ركصت ورجت بمكانها كعدت اريد ياسر يكعد مايكعد بس يركص
جواد طبك بصفي وكال "
تزوجت الرقاصة هههه
_اي ههههه
_دباع من البارحة يدك ويركص عززة العزاة مايوكف قلبه
_ولايوكف
_نشيط هههه
_مثل الحصان ...يله تعال نطلع عيب بنات صاروا يركصون
_يله
طلعنا بره ساعة ... زمان اجوي كل الزلم من البيت وكعدوا بالاستقبال الاستقبال مالتهم جبير وخارج البيت جاء ياسر سلم على الزلم وكعد بصف أبوه
وره ماداروا العشا كمنا زفينه ياسر على العروس رحت لامي كتلها تجين "
_ اي اجي وياك شعندي باقية بعد ...بس انتظر خل يطلع العريس ونرجع اني والحبايب
_تمام من يطلع اتصلي بي
_ان شاءالله
طلعت بره كعدت ... يم جواد ربع ساعة شرف ياسر يضحك باركناله وراها اتصلت أمي بي كالت راح نطلع والله طلعت امي وعمتي خيرية وخاله مناوي
رجعنا على البيت الطريق ساعة ونص سويته ساعة امشي سريع وهن يصيحن راح تكلبنه وتموتنه تالي الليل ولا اسمع منهن اريد ارجع للبيت قلبي ملهوف لشوفه سلي
وصلنا أول بيت خاله مناوي نزلناها ونوب لبيت عمتي خيرية وراها رجعت للبيت انا وامي تسأل بي ..
_ماعجبوك وحدة من البنات
_ولاوحدة
_زين سلي
_سلي محجوزة
_محجوزة لمنو ؟
_لابن عمها غدير
_والله مادري حرامات راحت من ايدك فرقد
_ليش حرامات
_خوش ابنية وتنحط بنص القلب برغم ماعرفها بس شفتها بالخطوبتي كاعدة بصف ابوك وتخيلتها ابنيتي
تصير تمنيت اخذها الك ..
بس شنسوي هذا الزواج قسمة ونصيب .
_اريد واحد منكم مايكلي تزوجها كلكم نفس التفكير
_اي موخوش البنية والبنية الزينة بيد منو تصح ماتكلي
_اي صح بس مو هي اكو غيرها ألف وحدة واحسن منها
_ اني ماتعجبني غير سلي
_يعني هسه اروح افسخ خطوبتها واخطبها واجيبها الج جنه
_لاا
_لعد اسكتوا ولتجيبون طاريها عوفوها بحالها
وعوفوني بحالي
_براحتك بس لتعصب_
_اكره طاري الزواج
_اني هم مثلك جنت أكرها طاري الزواج من اجت قسمتي لطمتني على حلكي هههه
_اي هههه
وصلت للبيت دكيت هورن بسرعة انفتح الباب جان بارق يضحك ويطك اصبعتين اليوم شيخلصني منه
خلصت من ياسر جاني بارق
_بارق حميان عليك هههه
_تعال ليخلصني منه
_تحمله ههه
_دفرة وجلاق وانعل ابو الخلفة
_لاخطية
_لعد انا موخطية يشلعون قلبي
_هههه مادري
فتحت الباب ونزلت نزلت غراضها وياها توني نزلت كدامي بارق يضحك" اختي شلونها
_زينة
_زين شلون الأجواء جانت
_حلوة
_شفت بنات
_خير من الله شفت
_ماعجبوك
_لا
_ادري اعيونك معمية ماتشوف ..المهم مرتك الثانية
هنا وتنتظرك هههههه
_انعل عرضك جوووز
توني ردت ادفره من السيارة طفر يضحك نزلت بسرعة طبكت باب السيارة قوي هو طفر للطرمة "
_وعلي صايرة كيمر عرب من ودك بس تاكل منها هههه
_بارق بارق لتخليني انعل شيب الخلفوك
_وعلي بوسة من خدها تنسيك ضيم سنين
_مشتهي كتله
_مشتهي أشوفك نايم بحضن مرتك سلي هههههه
ركضت وراه دخل للبيت يركض اسمع جدي صاح بي ..
من ثول الثولك جان جفصت بطن ابنك
بارق_موهجرس وراي يركض
جدي_هجرس توه رجع من العرس شيسوي يركض وراك
بارق_جفصت بنطه هههه
جدي_طاح حظك رجال متزوج ومخلف ماتبطل من سوالفك
بارق_لا احبهن يله تصبحون على خير
جدي_وين رايح
بارق_اروح انام نعسان هباوي تعاي
ختفى صوت بارق أخذت نفس طويل وراها زفرت ودخلت شفت ابو محمد ومرته وسلسبيل كاعدين سلمت
"السلام عليكم .. شلونك عمي
رحت باوست عمي ابو محمد وسلمت على عمتي من بعيد وسلسبيل هم ردت السلام بوجه مبتسم انا واكف كتلهم "
اترخص أسبح واجي
ابو محمد _اخذ راحتك
صعدت فوك بوجهي للحمام سبحت وبدلت وطلعت وكفت فوك الدرج خليت ايدي فوك صدري مكان قلبي يدك حيل ويريد يطلع من مكانه ماعرف ليش مشيت
كم خطوة وسمعت عمي ابو محمد كال "
هي صارت فجأة وانطيتها لابن عمها
حلوة _ عندي حجي وياك ابو محمد
ابو محمد _خير ان شاءالله
حلوة_ تعال وراي للغرفة
ابو محمد _ماشي عمه
نزلت بسرعة شفت عمي ابو محمد دخل للغرفة وره جديتي سدت الباب ماتحملت ورحت يم الباب وكفت أسمع حجيهم والصدمة لي من سمعت جديتي كالتله
حلوة_نسيت شنو جان الأتفاق
ابو محمد _لا مانسيت بس أنتو نسيتوا والبنية جاي تكبر والخطابة كثرانه عليها وانا خيرتها بين ابن عمها وبين صديقها دلشاد هي اختارت ابن عمها ..
حلوة_ شنو خيرتها انا مو كلتلك سلسبيل لفرقد من جان عمرها ١١ سنة وانت وافقت وامها وافقت شلون هيج تسوي وتخلف بالاتفاق هسه تتصل بي وتكله
بطلت مانطي بتي
ابو محمد _عمه ليش توكفين بنصيب البنية
حلوة_لو الفرقد لو ماصير الغيره
ابو محمد _فرقد مايريدها لو يريدها جان تقدم الها
حلوة_ماعليك انت يريدها مايريدها هذا الموضوع راجع لي
ابو محمد _عمه اروحلج فدوة خلي سلسبيل تمشي بحال سبيلها فرقد مايفيدها ولاهي تفيده بتي واعرفها
ماتكدر تعيش ويه فرقد
حلوة_ليش تعاندني وتدري بي ماتنازل عن سلسبيل والله بس تنطيها لابن عمها راح تشوف
شي مايعجبك
_تردين تدمرين حياة بتي عمه
_لا اريد سلسبيل لفرقد تدري بي من زمان كايلتلك بهذا الكلام ماريد وحدة مو من ثوبي لابن ابني وسلسبيل من ثوبي ومني وبي شوفت عينك راح
جاب بت عمه وشفت سوت بي دمرته دمار وخلته يحجي ويه روحه وانا ماتحمل اشوف حفيدي يتعذب منورة بت قسيمة وجدوع لدمروا أبوه
ابو محمد _عذريني ماكدر انطيها له
حلوة_ماتنطيها مالك رجعه لهذا البيت وبعد لا اعرفك ولا تعرفني وراح ادمر حياة سلسبيل واخليها طول
عمرها بله زواج
ابو محمد _ عمه شبيج تخبلتي ؟
حلوة_ من توصل يم فرقد اتخبل ابوي وامي ماشوفهم كدامي هذا حفيدي الوحيد شلون تريدني
اشوفه يتعذب بحياته
ابو محمد _اي بتي شعليها بي
حلوة_انا اريدها
ابو محمد _عمه ابوس ايدج رجلج عوفي بتي فرقد مايريدها ماله نفس بيها يتزوجها يوم يومين ويعوفها وانا اعرف بتي ماتتحمل وماتكدر تعيش ويه فرقد
حلوة _ولك شايف فرقد وحش جن ماتكلي
شماخذين عنه نظره
ابو محمد _فرقد يحب مرته حنين ومايكدر ينساها شلون ترديني انطي بتي الواحد عقله وقلبه يم وحدة ثانية ماكدر اشوف بتي الوحيدة تتعذب بحياتها
ويه أنسان مايريدها .
