رواية الهجرس الفصل الخامس عشر 15 بقلم رواء هادي
حيلي كله صار يرجف وادعي الله مايرد هو بقيت بس ابلع بريجي واباوع للتلفون بيد فرقد يباوعله ينتظر يرد الشخص من انفتح خط ردت احجي
خله صبعه على حلكه يمنع يطلع صوتي راح الخوف بلحظة من ردت تبو "هاا حنونه شرايده ؟
باوعت الفرقد أبتسم تك خد وفصل الخط أخذت التلفون من ايده بسرعة.. ارتاحيت هسه
_اسمعي من اليوم ماكو اتصالات تالي الليل
ويه كائن مايكون
_ هاي شبيك فرقد
_انا شكلت
_شبيك تعصبت وصاير ماعندك ثقه بي
_تعرفين بي أكره إتصالات تالي الليل وأنتي زعجتيني باتصالج ويه صديقتج كلتلج راح أنام ليش
تطلعين صوت
_اسفة والله ماعيدها بعد
_يله كدامي طفي الضوه وتعاي احمي
_هدي
رجع نام بالفراش يباوع للسكف خفت منه بسرعة قفلت التلفون وطفيت الضوه ونمت بصفه خايفة لايهيض بي
سديت اعيونه سمعته يحجي وياي
_هاي منين تبو
_من شهربان
_مزوجة لو لا
_لا
_شنو اسمها ؟
_بتول
_اممم جم اخو عدها واخوانها صغار اكبار
_ماعرف
_هه شلون ماتعرفين وهي صديقتج؟
_ماسألتها عن عائلتها
_شعجب مو عاتج هاي
_ماحب اتدخل بخصوصيات العالم وثاني شي شعلي بأخوانها اني علية بيها وبس
_امم عندج بعد غيرها صديقات
_اي عندي تلاثة
_منو ومنو ..؟
صار يسأل عن صديقاتي وصار يدقق بالأسئلة خفت لا أفضح نفسي بكلمة هو ذكي وصعب ينضحك عليه ومنا
ضابط وهذا شغلة التحقيق .
آخر شي سويت روحي نايمة هو يحجي "
نمتي ...حنونه مو احجي وياج
صار ينده بي واني سويت نفسي جنازة ..
امممم .. عوفني اااءء امممم
_تمام نامي قلبي بعدين نكمل الكلام .
كعدت ويه اذان الفجر سويت ريوك لنفسي تريكت وراها صليت ورحت بدلت وخليت مكياج وخليت كم قطعة ملابس بالجنطة علمود هناك أغير ملابسي مايقبل
البس على كيفي كله طويل ومحتشم .
فزيت من شفت انعكاسه بالمراية كاعد ويباوعلي ..
سم الله الرحمن خرشتني
_ انداري
_شكو
_كلت انداري
نادريت عليه صار يباوعلي من فوك ليجوه ...
لتكثرين بالمكياج
_ماكثر اني اطمن
_وديري بالج ترحين هناك تغيرين بجهرتج
_شنو قصدك
_تطلعين منا شكل وترحين هناك شكل تره
ماتلومين له نفسج
_لو اريد منا اغير مو هناك اروح اغير مثل الحرامية
_ديري بالج
_شنو ماتوثق بي
_حذرتج بعد
_الله أكبر منك صاير شكوك لدرجة مايستوعبها العقل
مارد راح فات للحمام طلع يمسح بيديه فرش سجادة الصلاة وصار يصلي كمل صلاة واني اباوعله بعصبيه أتمنى اخنكة واموته واخلص منه
ملامت امي من كالت مخبل ويجي يوم ينشمر بالمستشفى أمراض العقلية واني الثولة الغبية رحت اركض وراه مثل المخبلة عبالي ماكو زلم من بعده من رحت
للجامعة وشفت هناك عالم ثاني
تخبلت وصرت اطم بنفسي على قسمتي البايخة وحظي المصخم لخلاني أحب فرقد المخبل ابو
الشياطين والهجارس .
عدلت حجابي هو رجع نام بالفراش ويباوعلي "
اريد اشوف صور صديقاتج
_مو عيب عليك
_وين العيب بالموضوع اريد اتعرف على صديقاتج
_محلفاتني محد يشوف الصور
_تشوفين لو امنعج من الجامعة
_شنووو تمنعني تخبلت فرقد؟
_لتعلين صوتج ... جيبي التلفون خل اشوفهن
لو تصير موزينة حنين
اجت بالي اتعارك وياه وشيصير خل يصير بعد ماتحمل اني هيج أنسان ممل وشكوك تعوذت الشيطان ورحت جبت التلفون وفتحت القفل وانطيته له
صار يكلب بالصور ويسأل... عنهن وحدة وحدة ومنين ذني البنات واني أجاوب بحركة أعصاب كمل شمر التلفون وطلع بره اخذت التلفون
وخليته بالجنطة وطلعت لأن ابو الخط جاء لكيته واكف بره يم ابو الخط صعدت بالسيارة اشوفه يباوع بتركيز خفت منه كلش وقررت اليوم مابدل
بالجامعة ولا اخلي ....مكياج أخاف يخلي وراي احد يراقبني كلشي أتوقع من فرقد ساعة ونص تقريبآ يله وصلنا للجامعة نزلت بوجهي للقسم
مالتي هناك شفت تبو كاعدة بالقاعة رحت كعدت بصفها
_جان نكشف البارحة
_والله؟
_اي والله
_شلون ولج ؟
_مو حجيت ويه احمد وكلتله ماكدر احجي وياك زوجي موجود زوجي بهاي الاثناء جان كاعد وسمع نهاية الكلام على ماعتقد وكالي جيبي التلفون
_عزززة
_اي والله متتت بدمي احمدالله والشكرة انتي
جاوبتي بدل احمد
_همزين خله التلفون يمي على الشحن وطلع
_الحمدلله الله رحم بحالي
_يمة جان شخلصج من فرقد جان ذبحج على قبله اليهود والنصارى
_اي حيلي كله يرجف
_اني اكوله لايتصل بيج بعد بس بالجامعة يحجي وياج
_خوب كلتله هو مايسمع وعناد
_اي عناد هسه احجي وياه وافهمه مابينه حيل يلزمج زوجج المخبل ويروح يسويلج شي
_اي لما الله يفرجها واشوف شلون اطلب الطلاق منه
_ان شاءالله تطلقين بأسرع وقت
_ان شاءالله يارب
والله اتصلت بأحمد وكالتله البارحة بالليل زوجي جان لازمني وياك تعذر منها وكاللها جنت مشتاقلها وتدرين بي مانام الاعلى صوتها ..
فرحت كلش يهتم بي وبكل تفاصيلي ويتغزل بي مو مثل فرقد المخبل بس كاضيها عياط ويصاح ورزايل وشتايم وشايف نفسه شوفه يكول بس
هو والباقي كلها هيج .
وراها انطته لي حجيت وياه بقيت احجي وياه لما التموا كل الطلاب نهيت المكالمة رجعت التلفون الها طول المحاظرة الأولى واني فرحانه
بي وانتظر الفرصة المناسبة علمود اطلب الطلاق من فرقد واتزوجه واطلع من المنطقة كلها واشوف حياتي ويه الأنسان لاحبه تأكدت مليون بالمية
ماجنت احب فرقد أبد جان موحب جان مجرد نزوه لان جنت طفلة ومراهقة وماعرف شنو الحب هسه
عرفته وعشته ويه أحمد حبيبي .
على كوله امي قطي فرقد واخذي منه فلوس وخل يشتريلج ذهب وقطعة ارض وراها اطلبي الطلاق اكلي
قبل لاياكلج ويشمرج علينه.
قبل لا ينتهي الدوام أنتهت كل المحاضرات طلعت الواحدي كعدت واتصلت باحمد بقى بس يتغزل بي وينطيني بيوت إشعار هو شاعر وكاتب خواطر
ساعة كاملة اني احجي وياه وكلتله لا تتصل بي أبد اني اتصل بيك من الكه الفرصة المناسبة فدوة رحتلك أصبر لما الكه الفرصة المناسبة واطلب الطلاق
من زوجي المخبل ..
_إلى متى تبقين متحمله رجال بدون عقل
_ماعرف والله تعبت منه البارحة من وده يشرب من دمي والصبح يباوعلي بنظرات تخوف وسحب التلفون
من ايدي وصار يشوف بصور صديقاتي
_الله يساعد قلبج حنونه شلون متحمله مادري
_شسوي هذا حظي المصخم
_لامو حظج هذا جدج لاخذج الحفيده المخبل بالغصب
_لتذكرني بهذاك اليوم المشؤم شلون اخذني بالجبار وزوجني له كلما اتذكر اليوم اشبع بجي
_لتبجين حنونه ان شاءالله الله يخلصج منه
_ياريت والله اخلص والله تعبت احمد وماجاي
اكدر اتحمل بعد
_عليج الله اخاف ضربج.
_لا
_مبين ضاربج الله يكسر أيديه الأثنين..بس كليلي مخبل وماكو عقل براسه شلون
خلوه صار ضابط ؟
_وساطات جدي خلت فرقد المخبل ضابط
_حسبي الله ونعم الوكيل منورة هالشكولات صارت الدولة بيدين المخابيل والفاسدين هسه مايخافون ينهار ويروح يكتل الكل بالمركز
_مخلي وراه ضباط تراقب سلوكة
_هو شنو تراقب سلوكة لازم احد يقدم بلاغ عليه هذا الإنسان مو صاحي وبي خللل بعقله .. شلون
هيج فهميني شلون ؟
_دير بالك تروح تقدم بلاغ تره يشمروك وره الشمس واني ماريد اخسرك احمد انت املي الوحيد
_لايابة ماعلية اني وماعايزني مشاكل كل همي تكدرين تحصلين على اوراق الطلاق وحريتج
علمود اجي اتقدملج
_ان شاءالله بأقرب وقت
_ان شاءالله يله قلبي اني اتخرص عندي شغل
_اخذ راحتك حبيبي امممح
_اويلي يابة دوختني هالبوسة
_ههههه تستاهل حمودي
_حمودي واهل حمودي وعشيرة حمودي تروحلج فدوة
_ههههه احبك
_واني اموووت عليج امممح امممح امممح امممح
_كافي يمعود هههههه
_ولج شوكت تصيرين بين أيديه واشبع منج بوس
وشم وحضون
_عن قريب
_أتمنى
_ان شاءالله يله باي
_بايات النفس مالتي بايات .
فصلت الخط الضحكة ... ماتفارق وجهي أبد كمت رحت يم تبو إنتهى الدوام رجعت للبيت طايرة من الفرحة شفت فرقد كاعد يم مرت ابوه بالحديقة
ويضحكون صايرة ربه عابدها عباده الليل والنهار يمها وهي هم يمه عبالك امه الحقيقية مو مرت ابوه رحت للغرفة سبحت وبدلت وطلعت يمهم
كعدت بصف فرقد ...
هجرس_ مبينه اليوم نشيطة
حنونه _اي
مرت عمي _ ان شاءالله دوم نشيطة
حنونه _اي .. اي حبيبي متغدي ؟
هجرس_لعد ترديني ابقى بله غدا ليهسه
حنونه _حبيت اسأل أخاف ماماكل
هجرس_لاقلبي اكلت بالمركز
حنونه _بالعافية قلبي
هجرس_الله يعافيج .. صدك جهزي نفسج
حنونه _وين ؟
هجرس_كعب باجر خطوبة مناوي
حنونه _ منو يخطبها؟
مرت عمي _ابن اختي ياسر
حنونه _ياسر !!
مرت عمي_اي ياسر
حنونه _هاا
هجرس_شبيج مصدومة
حنونه_تفاجأت والله عبالي عنده حبيبه وينتظرها
مرت عمي _اي هو يحب مناوي شافها بعرسكم وانعجب بيها وصارله فترة ينتظر الفرصة المناسبة
علمود يتقدم الها .
حنونه _صدك تحجين ؟
مرت عمي_اي وجيتنه وره العرس اجينه علمود نشوفها بحجه نبارك الكم
حنونه _والله طلع مو هين ياسر
هجرس_رجال ونعم منه لو غير واحد دخل من الشباج مثل الحرامية والكواويد ويدور كبلات بالحرام الزلم من تحب وتعشق اكون تدك بيبان بيوت مو
تدك بيبان شبابيج .
مرت عمي_صح كلامك
خرسيت للأبد كلامه ضرب بمعتي وسوه بي مقص ماعرف ليش احسه شكوك صاير بي شوي وكمت للغرفة قفلت الباب وكعدت احجي ويه امي
بالتلفون فهمتها كلشي وكتلها مايقبل يشتري قطعة أرض ويخليها باسمي انطيني حل يمة بسرعة
ماتحمل بعد أبقى وياه .
_الحل الوحيد نسوي مثل المطي
_شلون ؟
_هسه اتصلج بخالتج وخل تخيطله واحد معدل
_بسرعة يمة
_ولا يهمج يومين تلاث تعاي مري بي واخذي
_ماشي
_ماكو حسبة ثلاث أيام أربعة يصير مطي كدامج وشتكليله يلبي طلباتج
_والله ياريت
_انا امج ولايهمج
_بالقرأن الكريم تعبت منه ونفسي لاعبة ماتحمل أبقى كاعدة يمه ساعة وحدة ماعرف
شلون باقية يمه
_تستاهلين مو كلتج مايفيدج مو كلتلج مخبل وبي خيوط اليوم باجر متخبل وشامري بالشماعية سمعتي مني ااخخخ منج حنونه دمرتي نفسج بنفسج
_شمدريني اني
_انجبي طول عمرج عوبة شفتي حلو وطويل ومعضل وضابط وكتلتي نفسج عليه انا ادري بفتولج اخذتي علمود تكسرين اعيون جم ابنية
وانتي أصلا مالج نفس بي جانت مجرد رغبة ونزوه
مراهقة وهسه أنتهت
_عادي الحياة تجارب
_خررر...بهيج تجربة ويه ابو الهجارس
_شسوي الفاس وكع بالرأس بعد
_نطلع الفاس ونخيط الأثر بس مانطلع وايدينه خاليه اريدج تأكلي لحم وتشمري عظم فهمتي .. ماريدج تجيني
ايد وره وايد ليكدام
_هه شوف منو تجي ايد وره وايد ليكدام
_ياريت والله تطلعين بت امج
_بت امي اني هالمرة وماراح افوت كل لحظه خالي بلاش
_عفيه عليج حنونه .
وره العشا طلع فرقد ويه بارق واني كعدت بالغرفة أجهز نفسي اليوم عندي غاية ولازم اوصللها راح استغله الليله واخلي يغيرلي أساور مالاتي
ويسويلي اضخم منهن وأغلى.
لبست سيت نوم أحمر قصير وصلوخ ومخليت مكياج ورشيت عطر وكعدت كدام الميز أخذ صور لنفسي دزيت كم صورة لأحمد ماشفت الرد بعد سجلت تسجيل
الخروج من التيليكرام وفتحت
عندي حسابين بالتلفون هذاك مخليته بس للمراسلة ويه احمد ومحد يعرف بالرقم بس هو واني المهم اتصلت بي عدوية وكعدت احجي وياها وأضحك
خطية جايينها خطابة من مكان بعيد كلش وبنص العرب وهيمة سودة المكان ويخوف وهي ماتقبل وامها تريدها تقبل تكول بالدفرات يله خليت ابوي يقنع أمي ورفضت الولد وانا احب ولد وياي بالجامعة .
وانتظر يكمل الجامعة علمود يجي يخطبني.
_انتي واثقه من الكبل
_طبعآ واثقه
_وطيب ليش مايخطبج هسه
_يكول انتظر اخواني لأكبر مني يخطبون يله انا يجي دوري واجي اخطبج
_هذا عذر لا أكثر
_ولج لا والله مو هم مايزوجون الصغار إلا يتزوجون الكبار
_قصدج بالسرة
_اي
_على الله يطلع صادك
_لا صادك وانا اثق بي
_شريد أحنه يطلع صادك وفي الالج
_ان شاءالله ...اي شلونج ويه هجرس
_اوووف اوووف
_هاا
_روحي طالعة بالقرأن
_شكو؟
_مسوي حياتي جحيم
_شجاج مو جان يموت عليج ؟!
_هذاك زمان يموت عليه هسه متخبل فدمرة صاير وشكوك لدرجة ماتتخل بالعقل وفوك كلشي مسوي عليه حصار تام ربع دينار ماينطيني
_عزززة العزاج هذا شجاه
_بين على حقيقته خية
_استغفرالله وهسه شلون أنتي جامعة ويحتاجلج مصاريف كل يوم مصرف ١٠ ألف فلوس
الكروة ولاكل
_خيه ١٠ ألف شتكفي اني يوميتي ٢٠ الف
_شعندج عشرين ألف انا مو وياج بنفس المنطقة الكروة ستالاف واربع تالاف للأكل شنو توكلين البنات
لوياج على حسابج ؟
_واني شعلي بيهن هذي مصاريف الجامعة
_كافي عيارة ونبص حنونه الكروة مبينه ستالاف ولفة الكص لو الكباب بألفين وقوطية البيبسي بخمسمية وبطل الماي بربع شعندج بعد ماتكليلي عشرين
ألف تصرفين
_والله اني اكل
_وشتاكلين قابل أربع وجبات لو خمس وجبات
_اووي شعليج أنتي ليش تدخلين بي
_مامدخله بس ماحب الجذب والنبص
_ومنو مجذب
_انتي الفيالة مالتج طاروا من بيتج وكعوا على
بيتنه هدوا
_انجبي ولج اني اجذب لو انتي ام الجذب والعيارة
_عمري كله مامجذبه مو مثلج انتي من صغرج تجذبين لحد كبرج وكلامج كله جذب بجذب
ماعندج كلمة الصدك
تعاركت اني وياها وفصلت الخط بوجهها وحدة حقيرة وتغار مني صايرة بهاي الفترة المهم حظرتها من كل تواصل الاجتماعي وشمرت رقمها بقائمة
السوداء بقيت انتظر فرقد عالساعة بال ١٠ ونص جاء فرقد دخل للغرفة شافني أبتسم وسد الباب ورجع قفله بالمفتاح صرت اتمايل له بجسمي
واضحك رفع تك حاجب وكال "
من البداية شتردين ؟
_زعلت
_وليش تزعلين طلبي لترديه
_منو كال اريد اطلب
_اعرفج واعرف حركاتج شنو
_وغلاتك عندي فرقدي كلشي ماريد غير رضاتك
_عليمن حنونه
_فرقدي لتزعلني صارلي ساعات كاعدة أجهز نفسي ليش تخرب كلشي وتخليني اندم
_على شنو تندمين ؟
_جهزت نفسي
_هههه
_ايي ليش تضحك ؟
جرني من خصري قوي لعنده ونحنى ظهره علية مبتسم الوجه واني اباوعله واضحك بخجل..
_لو كل يوم تجهزين نفسج هيج أنسى نفسي
بين ايديج ... اممح حنونتي
باسني بخدي وكال أسمي أبتسمت أريد مشاعر اتجاهه ماكو باردة كلش وجاي أمثل الحب كدامه علمود أخذ لريده واطفر للأبد من عنده واشوف حياتي
بعيد عن هاي المنطقة مليت الحياة بالريف اريد أعيش بالمدينة واطب واطلع هنا حسرة بقلبي اطلع بره باب الحوش اكلي رزالة لو
هانة معدلة من جدي لو فرقد لو بارق لو عمي وائل مايقبلون وكلشي عدهم عيب 'ماعرف شلون دبرت هالليلة وياه واني بالي وعقله كله يم احمد تمنيت بهاي
للحظات
مو بحضن فرقد بحضن أحمد
المهم بحضنه نايمه وحجايه جر احجاية وكلتله ...
فرقدي اريدك توديني للسوك
عندك مجال باجر
_اي من أرجع من الدوام اخذج
_اريد اغير اسواراتي موديلهن صار قديم
_اممم ..عندج فلوس
_اي عندي ٢٠٠الف جمعتهم من صروفي
_أخاف مايكفون
_اسوي على كد افلوسي قابل اسوي أغلى واني ماعندي افلوس واتفشل كدام ابو الذهب
_اخذي لترديه
_شلون اخذ واني ماعندي افلوس ؟
_شعليج بالفلوس انتي
_لافرقدي ماريد ازحم عليك واني ادري بيك تريد
تشتري سيارة
_يابة السيارة اشتريها على الموسم وعندي افلوس خير من الله واذا على مرتي حبيبتي ماصرف لعد
عليمن اصرف ماتكليلي
_مو..
_اسكتي حنونتي لتحجين وانا وياج جنه مزاعلين وكلشي ماسويتلج ولا طلعتج راح اخذج باجر للسوك وشيعجبج اخذي وماعليج بالسعر
_بكيفك بعد
حضنته قوي وبسته بخده هو فرحان بي وهاي اجت لايدي خل استغل حبه لي واخذ لريده واطفر بأسرع وقت كان الصبح مارحت للدوام
هو راح الظهر رجع طلعنا اني وياه للسوك العصر بدلت اسواراتي وسويت اسوارات بأربع ملايين جان شايل كومه افلوس وكلها ورق دخلت محلات الملابس اشتريت كومه ملابس هو يدفع بدون
وجع قلب ولاهامه الصرف كل همه يسعدني جان المهم رجعنا بالطريق صورت ايدي
باوعلي وضحك
_راح نزل استوريات هههه
_اي اضغط البنات مو كالولي رجلج جلد ومايحبج خل اشوفهم شكد يحبني زوجي
_ يابه ألف مرة كايلج ماعليج بكلام فلان وعلان انا وياج نعرف شكد نحب بعض العالم
شعليها تدخل
_هاي هم يتدخلون
_انتي مطيتهن مجال يتدخلن بحياتج
_لاا
_آخر مرة انبهج ماعليج بكلام الناس
_ماشي حبيبي ..باع يخبلون بيدي طالعين
_ايديج لمحليات الأساور
_ميلها ايدي زركة
_انجبي انا عاجبتني ايدج الزركة انطيني ايدج
مديت ايدي له اخذها بيده وباسها بوسة طويلة ضحكت بصوت عالي " سويتني
أميرة ههههه
_أميرة وملكة على عرش قلبي حنونتي
_اوووي فدوة فرقدي
_ههه اموت عليج حنونتي
_واني هم أعشقك فرقدي
طول الطريق لازم.... ايدي وكل ساعة يدنك يبوسها تخيلته احمد ومرات يتغزل بي ماصرت اشوفه فرقد صرت اشوفه احمد حبيبي المهم وصلنا للبيت شوفت الاسوارات
لجداتي ومرت أبوه وهباوي
عجبوهم وكالوا تتهنين بيهن ان شاءالله.
هو طلع بره واني دخلت لغرفتي اتصلت بأمي وكتلها كالتلي عفية وكل مايصيرلج مجال غيري شي بذهبج وسوي أغلى منه باضعاف ولتشردين هسه أبقي للموسم من
يحصد ويبيع الموسم راح تجيه
كومه افلوس ونامي عليهم وخلي يشتريلج قطعة أرض ماشي يمة راح أبقى وياه سنة كاملة واخذ لاكو والماكو منه بس اريد السحر بسرعة يوصل لعندي
_عين الباردة عليج يمة بدون سحر وساحرته انتي لو نسويله سحر شيسوي
_لهدم العلى جسمه ينزعه وينطينياه ههههه
_اي وعلي هههه
والله أيام ورحت لبيت أهلي جابتلي السحر امي وكالت ادفني بالحديقة جوه النخله لورة الغرفة ولتخلين احد يحس بيج " والله اخذت بكلامها وانطيتها افلوس تضمهن لي اجمع يم امي علمود كلما يكلي
عندي افلوس اكله لا ماعندي وخل ينطيني هو مايكول ولا يفتح حلكه ينطي بدون وجع قلب ايده مو له وراها رحت فتحت التيليكرام وشفت رسائل من احمد
ماتخلص راد على صوري بكلام غزل حذفت الصور ورديت عليه بسرعة رد بقيت احجي وياه فوك النص ساعة وراها اندك الباب حذفت التيليكرام
وكمت فتحته جانت امي وامي ماتدري بي عندي علاقة ويه ابن عم صديقتي موظف بالمحافظة وبالاسبوع مرة يجي يدرس بالجامعة كذا مادة .
_رجلج داز عليج
_اوووف
_مثل ماوصيتج وعلمتج
_اي .. يله باي
_ديري بالج على نفسج وبالليل ادفني ماشي
_صار يمة
ودعت امي واخواتي وطلعت وصلت للبيت سمعت سمعتهم يحجون بطاري خطوبة مناوي ضجت كلش هاي مناوي العوبة الثولة العانز راح تأخذ ياسر
الطاك ابن الطاك .
كعدت كدام مرت ابوه كوه بالعتها ماكدر اتحمل اكعد وياهم لاهي ولاهباوي احسهم مو من مستواي ومو من
مقامي هيج عالم .
_اممم ...هي راحت للسوك ؟
_باجر الصبح اروح اني وياها وامها واختي نشتري الها ملابس لحفله الخطوبة
_هاا همزين لعد شتريت ذهب وملابس
_اي تتهنين بيهن ربي يحفظلج فرقد وان شاءالله تحبلين وتجيبين ولد لو ابنية
غثتني بكلامها تريدني ابقى ويه فرقد المخبل واخلف منه طفل لو اموت ماخلف اووي هاي العايزة اخلف هجرس صغيرون ومخبل يطلع مثل ابوه يركضون وراه
الشياطين ويتعاركون علمودة .
اذا مابقى برأسي عقل اخلف طفل .. المهم خليت فرقد يطلع ويه بارق للمظيف جايهم خطار وطلعت حفرت جوه النخله بالفاس ودفنت السحر بجدع النخله
ورتبت كلشي ماخليت أثر مبين
ورجعت كعدت يمهن يسولفن على الخطوبة واني نار شابه بقلبي شلون هيج شلون حب مناوي بدل مايحب
وحدة من أخواتي لو بنات خالاتي
هم جانن حاظرات بالعرس لو إلا مناوي .... الحقيرة ام الهجارس هم مثل اخوها تركض وراها الهجارس "أصلا هذا البيت كلها مخابيل وبيها هجارس
ماكو واحد بيهم صاحي .
فرقد'رجعت بعد ماراح الخطار عدل للغرفة شفت حنونه نايمة ومطفيه الضوه شغلت الضوه بدلت ورجعت طفيته نمت بصفها مديت ايدي وجريتها لحضني .
مانطت رد فعل جانت نايمة من ودي مافاركها لحظة وحدة أحبها حيل واموت عليها صح مرات اعصب واحجي بس أبد مايخطر بالي أتركها
ثاني يوم الصبح ... من وجه الصبح ياسر وأهله عندي خطية فرحان كلش جان اليوم كطعان المهر العصر يصير جاب أمه علمود تأخذ مناوي
للسوك وتشتري الها ملابس ... وتجهيزات لكطعان المهر رحنا انا وياه للمركز كملنا شغلنا هو راح لبيته وانا جاء بارق أخذني للبيت العصر أجوي اهل
ياسر وعمامه وخواله وربع أبوه وربعة اغلبيتها ضابط وجايه بزي العسكري المظيف انترس عالم ياسر قاط اسود لابس طالع عريس من صدك
وداك ثكل هذاك ياسر الخفيف ماكو هذا غير واحد ثكيل ورزن وكاعد بنص ابوه وصديق ابوه ضابط جبير بالجيش والشيخ وياهم رفعت تك حاجب لياسر
كتم ضحكته ونزل رأسه
هسه أكدر باشارة وحدة اخلي ياسر يخرب من الضحك بس ماردت اطير الهيبة خله هيج هيبة وحلو يلوكله الثكل اكثر من الخفه والهرافة .
المهم ربع ساعة وكطعوا مهر .... باركناله وكام شحطني وياه شحط ماردت اروح إلا تروح وياي إلا تروح والله رحت وياه دخل سلم وكعد يم مناوي باوعت المناوي طالعة آية من الجمال صدك عروسة
طالعة فستان بيجي لابسة .... بردان طوال وتسريحة بسيطة هي شعرها جازي خصرها ولونه بني باوع لياسر يباوعلها ويضحك خطية مامصدك
وهي خجلانه اشرت لحنونتي أبتسمت وبقت كاعدة يم امها قسيمة اووف قسيمة من اشوفها قلبي
ينخطف والخوف
لبسوا الحلقات وجانوا جايبيلها تخم ذهب نازك هم لبسه الها فرحتلها كلش صبرت والله انطاها رجال معدل مثل ياسر يستاهلون اثنينهم كل خير
شفت ام سلسبيل جاية قلبي صارت بي وغزات ماعرف ليش واعيوني صارت تدور عليها بس ماكو مالها أثر فترة وانتهت الحلفة وجاء ابو ياسر شاف مناوي وبارك الها
وبارك الياسر وراها طلعوا .
اخذنه صور بحديقة المظيف ويه الجماعة وره ماتوكلوا لاهلهم رجعت للبيت البيت بعده هوسه وخطار لان الحفلة صارت بيتنا اباوع من بعيد قسمة
لازمه حنونه وتعبي براسها تعبي جت بصفي خيرية الجكارة صفح بحلكها جرت نفس طول ونفخت الدخان قوي وكال "ابشرك راح تبلش تخيطلك اخيوط دير بالك هجيرس
تنصاد بخيوط قسيمة
_علمود اخيطها بخيوطها
_ماينكدر لها
_ انا ماكدرلها
_اي ماتكدرلها اذا بلشت تخيط الك اخيوط
_ماتجرا
_تجرأ ونص
_لو تريد تخيط جان خاطت من زمان
_تخيط بالوقت المناسب
_وانا الها بالمرصاد
_خلي اعيونك على بتها
_حنونه ماتأذيني
_تأذيك وتأذي عشيرتك علمود مصلحتها
_غلطانة
_خيرية ماتغلط اعرف حنونه شنو ومنو
كامت حنونه راحت خيرية من يمي وكفت كدامي "
سلسبيل...
_لتجيبين طاريها
_شبيك ؟
_مااريد اسمع أخبارها ويتعكر مزاجي ومزاجج
_بكيفك ..بس
_بعدين نكمل حجي جاي اطلع
_وين طالع ؟
_بره يم بارق والولد
والله مرت الأيام وياسر .... ومناوي كطعو مهر محكمة وجهزوا للعرس ويافرحة لمادامت استشهد ابن عم ياسر بحرب الموصل ويه أبوه جان وتأجل العرس
إلى شعار آخر .
والله جاء الموسم الحصاد حصدت الزرع والإنتاج خير من الله استغربت طلبات حنونه كثرانه خوب كل مرة تطلب طلب انفذه الها . اخر مرة نكطعت كلادتها
وبدلتها الها وجملتها ٨٠٠ألف
افلوس انطيها كل راتب ١٠٠الف من ..عده كروة السيارة كل يوم ١٠ألف مدللها دلال ومخليها تمشي على روس اصابعها مامخلي عليها قصور .
بس احسها باردة المشاعر ..وياي والله أستلمت افلوس الحنطة قسمتها بيني وبين بارق وجدي وشلت لابوي ٣مليون حقه وجداتي هم انطيتهم
والباقي كلت اشتري بي
سيارة جم يادوب أبقى على سيارة ابوي وجدي حنونه
عطلت وكعدت بالبيت مكابله وجي وتنكنك فوك رأسي اريد تأخذلي قطعة أرض وتخليها بأسمي
اني اريد حقي اريد أضمن مستقبلي ماعندي ضمان المشكلة ماكدر اردها وكتلها .
_صار تدللين
_يعني راح تأخذلي ؟
_اي
_والله
_اي والله شبيج عندي جم مليون بالمصرف واخذ من مالات السيارة واشتريلج قطعة أرض
حضنتني انا وكاعد صارت تبوس بي طايرة من الفرحة والله العصر شفتها راحت لأهلها وشفت بارق ورحاب
يحفرون داير مداير النخله
جاي يرتب بالحديقة والنخل والشجر شفت من بعيد
بارق شايل شي بيده ملفلف بعلاكة صار يفتح استغربت شنو هذا ؟ صحت بي من مكاني...
_هذا شنو ؟
باوعلي "
والله مادري خل افتحه واشوف شنو ؟
رحت يمه وكفت صار يفتح بي ماعرف ليش نفسي لعبت منه وجريته من ايده وصرت افتح بي فوك العشر علاليك جان ملفلف وراها طلع ورقة بيضة ملفلفة بتيب
أبيض عرفت بي عمل باوعلي
بارق وكال "
لمنو ؟
رحاب_لفرقد اكيد قسيمة سوته
هجرس_انطيني عود من يمج رحاب
دنكت للكاع جابتلي عود اخذته من ايدها وفتحت التيب
حيلي كله يرجف أتمنى مايطلع صدك قسيمة سوته لالي
والله نفتح والصدمة لي صورتي انا وصورة حنونه ورسومات طلاسم
مطي وراكبته مره ولازمة الحبل وكله حروف مامفهومة بس الفهمته اسمي واسم امي واسم حنونه وامها وطاعة والعجل العجل باوعلي بارق
بارق_ الله يلعنهن مسوياتك مطي وراكباتك وانا اكول كل اسبوع الزركة بالسوك وكل يوم مبدله ذهبها
اثاري راكبتك مثل المطي
رحاب_عزززة العزاهن مسوياتلك سحر طاعة
هجرس_انا اعلمهن
اعيوني صاروا برأسي ماتوقعت يطلع من حنونه هيج تسوي بي وتسويلي عمل سحر وشعوذة وانا أحبها ولبيلها طلباتها بدون هاي الشغلات.
المهم اتصلت بالشيخ وكلتله على العمل كال اخذله صورة ودزه لي بسرعة "والله اخذتله صورة ودزيته له شوي ورد كال هذا عمل طاعة مسويته الك مرتك علمود
تسمع كلمتها وشتطلب منها تسوي
رجع كتب ...مرتك مو نظيفه أبد وماشيه بهذا الدرب من زمان وتريد تأكل حالك ومالك
دير بالك منها
انا كالي هيج لو تخبلت .... خبال رحت كلت الجدي وشوفت العمل له تخبل جداتي تخبلوا دزيت على حنونه اجت سألتها شنو هذا نكرت وكالت مادري ..
هجرس_ولج شنو هذا ؟
حنونه_هذا اكيد مرت ابوك سوته علمود
تفرقنا عن بعض
مرت ابوي_الله أكبر منج اني شكو اني شعلي تتهميني انتي وامج مسويات العمل الفرقد لا
تتهمين العالم باطل
حنونه _اني اتهم العالم لو أنتي ام السحور سويتي العمل باسمي علمود تبعدين الشك عندج حقيرة الله لا ينطيج الله لايوفقج ان شاءالله...
جريتلها خلك طويل وجبتها براشدي شمرتها هناك ويه مرت ابوي صارت تبجي اعرف بيها مالها دخل ابوي تخبل على حنونه وراد يكتلها كتله عوفها انا اعلمها وادبها
واعلمها شلون تسوي سحورة
وتمشي بدروب امها .
قبل لا استلمها انا ...استلمتها جديتي خديجة نهتها نهي من الضرب ماخلت بيها شي صاحي ردت اضربها ماخلاني جدي جرها من شعرها
وصار يصيح عليها "
منو سوه العمل انتي لو امج
حنونه _اااااه مرت عمي هي سوته ااااه شعري
عوفني جدب عوفنييييي
جابها براشدي وبعده لازمها من شعرها '
فوكاها تنكرين عينك عينك ادبسزز قليله التربية والأخلاق هاي اخلاقج حنين هاي تسوي أشياء
قذرة وتشمريها براس العالم ...
كفر بيها كفران طيح حظها ودز على اهلها امها جت عينك عينك تنكر وتكول مو انا ولا بتي هاي مرت ابوك سوته تريدك تعوف حنونه وتزوج من أقاربها
ذبوا الصوج بامرت ابوي المسكينة وانا ماصدك بيهم أبد ادري بدروبهم مرت ابوي كالت تعالوا احلفوا كلام الله مو انتو لمسوينه قسمة ماقبلت تحلف
حنونه قبلت تحلف
امها ضربتها على حلكها وجرتها من ايدها وكال"
مادام الشغله صارت هيج طلكوا بتي
هجرس_من اليوم حنين ماتصيرلي مره اخذي
بتج واطلعي برررره
حنونه _هاي تاليتك فرقد تتهمني باطل وتوكف ويه مرت ابوك بدل ماتوكف وياي
هجرس_اعرفج جذابة ومع الأسف مشيتي بدروب امج دروب السحورة من مشيتي بدرب السحر خربتي وخربت اخلاقج وانا ماريد مره بدون أخلاق .
. اطلعووو برره ...
قسيمة_والله انت بله أخلاق امشي عوبه كلتلج مايفيدج ابو الهجارس والشياطين كتلني نفسج عليه امشي لو اطيح حظج امشيييي
حنونه _فرقد اني احبك مالي دخل لتعوفني
صارت تبجي وتتوسل فقدت اعصابي وشلت الطبلة وركعتها بنص الصاله وصرت اصيح واغلط عليها من شافني انهاريت عمي جدوع جر حنين جر وطلعها بره قسمة
صارت تدعي عليه
والله ياخذ حوبه بتي المظلومة منك ابو الهجارس والشياطين لعبت بتي لعب ومن شبعت منها عفتها تفوو عليك وعلى جهرتك هجيرس ...
ماخلت.... من غلط وفشر عليه جدي كاملها من كاملها جدي شردت ماكعدت يمهم صعدت فوك بغرفتي منهار تمامآ ماتوقعت يجي يوم وتوصل ويانه لهذا الشي جنت
مخلي كل امالي واحلامي بيها
ليش هيج سوت بي ومشت بدروب امها شلها بفلوسي انا مامقصر عليها بشي ماتحملت وجع رأسي والأفكار تحوم برأسي اتصلت بالشيخ وكلتله اريد
اعرف منو لسوه العمل
والله استخار وكال "
ام مرتك لمسويته بطلب من مرتك علمود تطيعها بعيون مسدودة مسويتك مثل المطي تكلك دييي تتحرك
وماترفض الها أوامر وطلبات
_انا بدون سحر مارفض الها طلب وكلشي تريده اجيبه الها ليش هيج سوت ؟
_مرتك مو نظيفه
_شنو مو نظيفه ؟
_راقب مرتك وراح تعرف في أمان الله
_شيخ وين رحت تعال فهمني
سد الخط بوجهي رجعت اتصلت بي مارد دزلي رسالة وكال " راح أسافر بعد ساعات ماكدر احجي وياك انا بالمطار من نرجع عود نحجي بس راقب مرتك .
عافني بحيرة من آمري يومين وانا حاير بزماني وصلني كلام من عمي لو تطلك لو ترجع بزعت روحي
وكلتله بحاله اعصاب
_باجر من الصبح انا بالمحكمة اطلك
جدوع_بعد أحسن لانريدك ولا تريدنه
هجرس_تعالوا اخذوا غراضها
عفته ودخلت للغرفة اخذت الذهب كله لمشتري الها من جيبي الخاص وعفت الها افلوس ذهب نيشانها فقط مو فرقد الي يضحك عليه وتاكله قسيمة وبتها .
اجت قسيمة من ماشافت الذهب ماكو تخبلت وتعاركت وياي كتلها اخذي فلوس ذهب النيشان وطلعي لو بالقرأن حتى افلوس مانطيها وحتى الملابس احركها وكلشي
ماتشوف مني وارفع عليها
قضية سرقة سارقتني انتي وياها وسارقات ٧٠ مليون واشمرجن وره الشمس من سمعت هيج خافت والله اخذت الفلوس والملابس والمكياج وطلعت جدي ماقبل على تصرفي كال تصرفك خطأ
رجع الها الذهب هذا حقها ...
والله مارجع قطعة ذهب هذا الذهب ذهبي مو جيسي طالع مو من جيسها لو جيس الخلفوها
جدي_هجرس مو احجي وياك
هجرس_ ماكو حجي ينحجي بي بعد المره جذابه وتجذب عينك عينك وانا من زمان جارلها خلك منورة جذبها وصلت لحدها وياها باجر أرفع قضية
طلاق وانعل ابو الخلفوها .
خديجة _مو كنالك ماتفيدك ليش هيج لعبت بروحك
هجرس_ لعب بعد وخلص
حلوة_تعوذ ابليس ولا تستعجل بالطلاق
جوري_عوفي الولد براحته يريد يطلق خل يطلق ليش توكفين بنص قراراته
حلوة_هذا زواج مو لعب جهال ويطلق منورة سحر
جوري_اليوم سوت سحر وجذبت وتهمت مرت ابوه المسكينة هي مسويه باجر عكبة كلشي تسوي لماتخاف من
الله ماتخاف من وليها .
خديجة _ كلام جوري صدك لتبقيها بالبيت وطلقها هاي جذابة واستغلالية جاي تستغلك علمود افلوسك
طماعة مثل امها
الوحيدة جديتي حلوة دافعت الها جدي كال تطبك مرض شسوي سويت تعبت منك كلتلك لتأخذها كلتلك اخذلك سلسبيل خوش ابنية ومتربية وتعرف الأصول وفقيرة وماعليها لابارايح ولابالجاي
لو الزركة لو ماريد دكلها ابو الزركة خوش جابتك بواحد معدل حيل وابو زايد بيك والله اول العالم
شماته بيك هو انا يعيط عليها
مثل النسوان لو هي لو ماتزوج من حورها ابن القندرة ربع دينار ماتسوى لاجمال بيها لاطول بيها لا أخلاق بيها تغلط وتفشر مثل الزلم لاخجل بيها ماتكلي شفت
بيها وحبيتها .
كلمة وحدة ماطلعت قلبي يرفض الطلاق ويكلي سامحها ورجعها انا احبها وماكدر على افراقها بس كرامتي ماتسمح لي ارجعها إلا أطلقها واعلمها شلون تسويلي
سحورة وتجذب
كالت راح اصير خوش ادمية طلعت تشتغل بالسحورة ويه امها وتستغل بي اخذلها ذهب وتدور قطعة ارض اكيد وراها غاية مال الذهب وقطعة الأرض
بس لا تحلم تحصل مني شي .
ثاني يوم الصبح اخذت الذهب واخذت وياي بارق ورحنا للمحكمة لزمت محامي وانطيته وكاله اريد
الطلاق باسرع وقت كان
كلشي ماعدها لا مقدم ولامؤخر وطلعنا بوجها المحل ابو الذهب بعت الذهب كله طلع السعر ١٤مليون ٤٦٠الف بارق بقى فاك اعيونه بصدمة
_ ولك انت مخبل عاقل بس كلي شلون
تأخذلها ذهب هلكد ؟
_الذهب زينة وخزينة
_رحمه لاهلك ياخزينة يازينة لو ماخذته ورايحة لاهلها جان شقبضت بس كلي شقبضت ؟
_هههه ولايهمك انا حريص
_والله طلعت مطي هجرس ونضحك عليك من الزركة
_بسحورتها ضحكت علية
_خلف الله علية انا ورحاب حفرنه جدع النخله ولكيته الملفلف لالك المهم تنطينه مكافئة
_عمي انطيكم بس خل اخذ الفلوس واشمرهن
بالمصرف
_اي
اخذت الفلوس وطلعت بوجهي للمصرف شمرتهم ورجعت للبيت لكيت جدوع ولده عدنه يهددون رجع الذهب لو تصير موزينة تعاركت وياهم وجريت السلاح بعد ماجر السلاح عيدان بنص وجهي
صارت لاخت عسلة ناس تغلط على ناس تدخل جدي وعمامي وفكو المشكلة لبيناتنه كالوا انطيها الذهب
كلت على كص اركبتي وماانطي
الذهب الذهب مالتي مو مالتها وانطيتها حق ذهب نيشانها وأنتهى الموضوع لا اعرفهم ولايعرفونه
بيناتنه بعد المحاكم .
طلعوا يتحلفون بي جدي عمامي ماقبلوا كالوا رجع الذهب كتلهم الذهب بعته ودعت الفلوس بالمصرف والذهب مو مالتها الذهب اخذته الها ك زينة وقت الحاجة
اخذه وابيعه .
مالها حق تطالب بي .
والله مرت الأيام وكل يوم مشكلة وياهم وعرايك توصل للسلاح وتفض السالفة ومايكدرون يشتكون بالمحكمة هددت بس يشتكون اتهمهم بايكين افلوسي وذهب عندي
وانا عندي وساطة اطينهم
طيحت حظهم وكسبت القضية وطلقت حنين تعبت من المشاكل والجذب مالتها " مرت الأيام وجابت هباوي مرت بارق ولد الكل طاير بي اول الناس انا طاير بالفرحة
بي اروح للدوام اشوفه
ارجع من الدوام كبل للغرفة اشوفه تعلقت بي موشلون مجان جنت اتعلق بي علمود اكدر أنسى الصار وياي وحب حنين طابع يقلبي طبع مارضا ينشال شكد حاولت
اشيل حبها بس ماكدرت.
وصرت اشرب جكاير في حيث اكدر أنساها بس صعب أنساها حب الطفولة جانت وجانت كل امالي متعلقة بيها وصرت اسمع كلام يكول هاي حوبه خواله وامه
طلعت بي وطلق مرته
رجع عاد ماضي أبوه من ظلم امه وتزوج غيرها هجرس هم ظلم حنين واخذ الذهب وكلشي مانطاها وطلكها
وبعد وبعد تطلع حوبه البنية.
وسمعت اخبار تكول الخلفتني مامطلقة ليهساها ورافعة قضية نفقه على رجلها لمساعدها ابن عم أبوها محسن هذا عنده وساطة وشيخ وكل العالم تعرفه
ومزوج ثلاث نسوان بارق
يكول هسه امك تصير الرابعة بحيل الله وانا خربان ضحك والله تسويها وتزوج الثالث ماعدهااهل ينشد بيهم احزام الظهر . على اقل تزوج وتسكت
مرت أربع أشهر وانا حالتي صارت للأسوء بخلاف حنين ماعرف شجاني الليل والنهار تجي بالي انام تجي بالي وتنزل ادموعي على افراقها اجت بالي
ارجعها واصلح كلشي وتندمت بكد شعر راسي على السويته بيها برغم هي الغلطانة صرت اطلع نفسي الغلط وهي الصح بالدوام كدامي ياسر كاعد
هو يعرف ... شبي مابي بهاي الفترة ويعرف شكد متأذي بخلاف حنونه احجيله كلشي من احجيله يرتاح
قلبي هو يسمع وينصحني .
ياسر_ كافي مو لعبت بنفسك لعب انساها وخلها تولي
فرقد_ شكد سهلة بلسانك
ياسر_ إلى متى لعد تبقى هيج ملوع قلبك من وراها ولك ماتسواك وماتسوى تذكرها على لسانك
وتمر على بالك
فرقد _ماكدر ياسر
ياسر_تبقى مسجون بحبها ولك هي لو تريدك وتحبك ماسوت لسوته
فرقد_ ندمان والله ع لسويته بيها
ياسر_هههههه
فرقد_شبيك تضحك ؟
ياسر_ابشرك لندمان علمودها البارحة العصر جانت مشيتها
من سمعت الكاله حسيت طلقة وفاتت بنص صدري كمت بسرعة من مكاني وصحت بي "
فرقد_شلووووون ؟
