رواية نارك جنة الفصل الرابع عشر 14
خذت جنات كم تقرير من ليبيا ومصر ..حطتهم امعاها في دبشها ..وطفت ضي دار توفيق وطلعت بالشويا ...لكن باب الحوش انفتح وخشت هبة ومعتز 
سفيان طلع من داره وكان يبي يمشي لجنات ..وصل لعند باب دارها ..ويسمع صالحة تصرخ وتبكي
جنات يدها على قلبها وترجف ..ردت بالشويا للدار ..
هبة خشت وحطت شنطتها على الكرسي : خلاص أنا تعبت ..معاش عندي قدرة معتز
معتز تنهد : شن انديروا هذا نصيب من ربي
هبة : انحس في ربي ايعاقب فيا ..لاني سكتت وساعدتها
معتز حط يده على كتفها : شن تحكي ..ربي كريم هبوش ..غير اصبري
هبة صبت معصبة : لعند امتى تعبت من الادوية والعلاجات ..مليت معتز مليت ..أنا نبي انكون اااا..
وقفت هبة لما سمعت صوت صريخ واعياط : بسم الله هذا شنو
معتز طلع بحت برا : يستر الله ..الصوت جاي من حوش سفيان
هبة طلعت تجري : توفيق ..خويا
معتز طلع وراءها ...وجنات تسمع في الصوت وخافت . ..طلعت بالشويا وراهم ..مافيش حد ..مشت تجري للفيلا ..واطلعوا اعمام سفيان وكلهم قربوا من الفيلا
********************
سفيان برم على صوت لعياط مشى بسرعة لدار سليم خش لاقى صالحة تبكي ومقمعزة جنبه على السرير
سفيان مصبي ايبحت فيه ومنصدم : كنك صالحة ..ليش تبكي
صالحة منهارة وماسكة يد سليم : ..سليم سفيان ..سليم مات ..من بدري انحاول انوضه عشان دواءه مايبيش ..سليم مات سفياااان
سفيان زمط وقرب منه ..قمعز على طرف السرير اعيونه مليانة ادموع ..مسك يده مصقعة
..طبس على وذنه : سليم ...سليم حبيبي ..نوض هيا ...سليييم ...نوض سليم تربح ..ماتخوفنيش عليك ..
سلييم ...سليم .....سلييييييم
خشت عليهم ملاك وقعدت واقفة ومنصدمة
وقعد سفيان ايهز فيه ويعيط باسمه : سليم بالله عليك افتح اعيونك ..سليم اوخيي نوض ..نوض سليم تربح نوض ..سليم .. هات يدك انبوسها ..سليم ..ورحمة بويا نوض ...سلييييم ..لاااااااااااا..سليييييم
صالحة صبت مسكت سفيان من اكتوفه : خلاص سفيان ..خلاص ..خليه ..تريح المسكين ..ادعليه بالرحمة
سفيان ضمه ويبكي : وأنا امتى بنرتاح ..امتتتى ..تعبت وربي تعبت
ملاك اتهز في رأسها وتبكي بصوت ..وسفيان صبا خذاها في حضنه وقعدوا يبكوا
منى امصبية على باب دار توفيق من غير اي ردة فعل ..اما توفيق كان مطبس ومتأثر بصوت بكأهم
هبة ومعتز ..واعمام سفيان رقوا بسرعة وخشوا ..عليهم ..وكلهم قعدوا يبكوا ...جنات خشت للفيلا تجري ..رقت فوق ..تسمع في صوتهم يبكوا ..والخوف سيطر عليها ..خشت في وسط الزحمة ..خشت واعيونها ايدورو على سفيان بس ...لعند شافته يبكي ..والعائلة اتعزي فيه ..جنات خشت لدار ترجف بحتت في سليم ..على السرير كيف امغمض اعيونه ..كأنه راقد ..وجه ابيض وجامد....غابت نظرته المليانة ضحكة ..غاب صوته وهو ينادي عليهم عشان ايبوس يده
قربت منه مترددة ..قمعزت على طرف السرير ..مدت يدها ترجف ..ومسكت يده الصغيرة ..مصقعة ..مافيهاش حياة ..لمست خده ..وشعره ..خنقتها العبرة ..طبست وقعدت تبكي بصوت وتشهق ..سفيان بحت فيها ..وعض على فمه ونزل لوطى مع اعمامه
اشويا وصالحة طلعتهم كلهم من الدار وصكرتها..ملاك تبكي وجنات خذتها ونزلت لوطى ..واشويا والفيلا بدأت تعبى بأقارب سفيان
سفيان طلع وقمعز على دورج الفيلا ومطبس ..مع خشت فخري ايشوف في الزحمة ..نزل من السيارة مفجوع ..قرب منهم ..ويسأل وقالوله
قرب من سفيان وقمعز امقابلة : الله يرحمه شيباني ..عظم الله أجرك ..عزنا فيه واحد
سفيان رفع رأسه وبحت في فخري ..وفخري شد رأسه وضمه : الله غالب هاذ حال الدنيا ..صبي بالله عليك شد حيالك ..وخلي انشوف الناس قاعدة اتجي اتعزي
مسح سفيان وجه وصبا مع فخري ..وبدوأ يستقبلوا في الناس
عم سفيان قرب منه وعزاه : عظم الله أجرك ...ولاحول ولا قوة الا بالله ...الدنيا كل يوم بحال ..مازلنا مافرحنا بعمليتك وكيف رديت اتشوف ...لكن لااعتراض على حكم الله
سفيان تنهد بحزن وخلاص
الليل بطوله ..وكل مرة اتجي ناس اتعزي من اقاربهم والجيران ..وجنات معاش شافت سفيان بكل
جنات وقت اغلب الناس اللي في الفيلا بدأت ترقد ..خشت دارها ودست لاوراق ..غيرت دبشها ..ومشت نزلت اتساعد في صالحة ..واقفة امعاها لعند وقت متأخر ..رقدت اشويا جنب ملاك ..الصبح بدري ..ناضت ومشت للملحق ..خشت لاقت جلال راقد مايندري علي صاير
جنات اتهز فيه : جلال نوض ..نوض الناس عندهم حالة وفاة من امبارح وأنت ماتندري على شي .نوض
جلال فتح عين وحدة : تؤ تؤ تؤ ..شن في كنك على الصبح
جنات : نوض جلال بلا فضايح ..سفيان خوه توفى أمس في الليل وأنت قاعد راقد
جلال ناض فتح اعيونه : شن تحكي ..اي خوه ..قصدك فخري
جنات ضربته على كتفه : بعيد السو عليه ..مش فخري جلال ..أخ سفيان صغير حرام أمس توفى
جلال قمعز ايحك في اعيونه : سفيان عنده اخ صغير ..وينه ماشفت بكل
جنات : جلال مش وقت اسئلة نوض اغسل وجهك واطلع شوف سفيان عزيه واقعد امعاه ..عيب
جلال صبا : لا اله الا الله ..هيا ..هيا ..اشويا بس
جنات : أنا بنطلع جلال ..رد بالك اترد ترقد
جلال : لا هيا وراءك
طلعت جنات وخشت للفيلا ..ومشت اتساعد في صالحة عشان ايوتوا فطور للضيوف
جلال ناض غسل وغير دبشه ..وطلع لاقى سفيان وفخري عزاهم ..وقعد مع اعيال عم سفيان مع الرجالة
جنات طول الوقت اتحوس مع صالحة وباقي بنات العئلة ..عاد عزاء وأنتن عرفات الجو
**************************
مودة ناضت الصبح رنت على فخري ماردش عليها ..لابست وطلعت مشت لعند الصيدالية ..خشت وتعرفت على البنت اللي تشتغل فيها ..والبنت مجرد ماعرفت اسمها مودة ..عطاتها بوكس صغير مغلف . خذاته منها وطلعت بسرعة روحت للحوش ..خشت دارها وصكرتها ..افتحت البوكس ..كان عليه كرت صغير مكتوب عليه (( أسف لاني زعلتك مني أمس ..كان بودي انكون قريب منك ونعتذر ..بس برغم بعد المسافة ..حبيت نعتذر بشكل ايليق بعيونك الحلوات : فخري
))
مودة كانت تعرف كم واحد من قبل ..بس هذه اول مرة اتحس بهتمام حقيقي من شخص مازال تعرفها جديد ويعتذر من شي بسيط
ضحكت من قلبها وافتحت الهدية ..بوكس مليان ورد ..وفي وسطهم انواع شكولاطة اتهبل ..
لمت مودة البوكس وحاولت تتصل بفخري بس برضوا ماردش عليها وهي حست في حاجة غلط
****************************
جلال بعد الغداء ..مشى للملحق واتصل بمودة
مودة : نعم
جلال : مودة أنتي في الحوش
مودة : اكيد وين بنكون في الشارع
جلال : تي اسمعي نحكي جد ..كنك قاعدة في الحوش نبي حني ضروري تقدر تطلعي شورها
مودة كانت متكية قمعزت : خير شن في ..جنات فيها شي ..احكي جلال
جلال : لا لا جنات بخير مافيها شي ..لكن أخ سفيان توفى امبارح
مودة عظامها رقدن : قصدك فخري
جلال : فخري ولد عمه ...ومن وين تعرفيه أنتي اصلا
مودة : جلال مش وقتك من اللي توفى
جلال : أخ سفيان الصغير ..اسمه سليم
مودة : ياحرام ..كيف مات جلال
جلال : مانعرفش مودة ..حتى مازالت ماشفته بكل ..بس نسمع فيهم ايقولوا انه كان مريض
مودة : اااها ..عرفته .. جنات مرة حكتلي عليه
جلال بعصبية : مودة خلاص فكيني من كثرة الدوة .صبي فزي بسرعة عدي للحوشنا نبي حني
مودة صبت : هيا اشويا بس انقول لامي
صكرت مودة ..ومشت قالت لامها ..ومشن مع بعضهن لسليمة ..ومودة رنت على جلال كلمها ..وقاللها على خبر وفاة سليم ..وان لازم اتجي غادي عشان اتعزي ..وسليمة قالت توا انشوف خوالك
سليمة اتصلت بولدها عبدالله خال جنات عشان ايشيلها لبنغازي ..لكن هوا قاللها مش فاضي عندي شغل ..وخليها مرة اخرى ..ونفس الحال ولدها لاخر
سليمة تعصبت وتمت اتهزب ..وأم مودة قعدت اتهدي فيها
أم مودة : ماتزعليش روحك ..وكان على مشيت بنغازي ..تمشي امعانا
سليمة : ليش أنتوا تبوا تمشوا
أم مودة : أكيد نبوا انعزوا جنات ..والا لا يا دودي
مودة اتبحت في أمها وفرحت : قصدك نمشي امعاكم أكيد نجك ليا ..ياريت حتى عشان جنات قدام عربها ..عيب انخلوها بروحها
أم مودة : خلاص يا حاجة صبي لمي روحك وأنا نمشي انشوف الحاج كان اموافق نمشوا اليوم
سليمة : الله يربحك وانعني مانفقدكم ..جيراني وخير حتى من دمي ولحمي
أم مودة : الناس لبعضها وجنات تربت مع مودة وكيف بنتنا
*********************
جنات كان خاطرها اتشوف سفيان تبي تاخذ بخاطره وتعزيه برغم كل شي ..لانها عارفة كيف ايحب سليم ومتعلق بيه
الصبح كانت جنازة ...وسفيان طول اليوم مع ضيوف . لعند بعد العشاء والناس بدأت اتخف ..جنات طلعت من دارها بعد غيرت دبشها اللي كانت اتحوس بيه طول النهار ..شافت سفيان خش لداره لاحقاته ..وقفت على باب دقت وفتحت
سفيان كان واقف ومحول تيشرته بيخش ياخذ دوش ..بحت فيها ..وبرم فتح دولابه يطلع في دبش ..جنات خشت مترددة : سفيان
سفيان من غير مايبحت فيها : نعم
جنات : أنا عارفة أني مهما قلت ..مستحيل انخفف عنك ..بس أنت اكيد عارف أن هوا توا قاعد في مكان أحسن من هنا
سفيان بحت فيها وهز رأسه ..وكان واضح الحزن على ملامح وجه
جنات : أنا نعرفك ديما قوي ...بس لو تبي مني اي شي أنا حاضرة ...مستعدة ننسى كل شي ..ونوقف جنبك
سفيان بحت فيها بصدمة ..وكان قلبه يرجف ...برم بسرعة وخذا دبشه وخش للحمام ..من غير اي كلمة ..كان خايف ايطلع اللي في قلبه ...كان شاك ومش قادر ايقوللها خليك جنبي ...أنا قوي بيك ..أنا محتاجلك جنبي أكثر من اي وقت ..أنا معاش عندي الا أنتي ..نبيك جنبي اليوم وبكرأ وكل يوم
جنات اعيونها دمعوا وتنهدت بقهرة ...لانها مش عارفة كيف تتصرف ...المفروض تكره سفيان وتبعد عنه ...بس كل يوم اتزيد اتحبه ومش قادرة اتسيبه
صكرت الباب وطلعت انزلت لوطى ...تسمع في صالحة اتسلم على وحدات ..استغربت من جاءهم في الليل ..نزلت وكانت صدمة ..اجديدتها ومودة وأمها ..نزلت تجري وقعدت اتضم فيهن وتبكي ..وهن ايعزن فيها ويبكن امعاها
للحظات وخشن قمعزن في الصالة ..وقمعزت امعاهن ملاك وصالحة و هبة ..وصبايا اعمام سفيان ...وخالة سفيان هذه اول مرة اتشوفها جنات
سفيان ادوش ونزل ..وصالحة ناداته عشان ايسلم على اجديدة جنات وأم مودة ..عزوه ..وطلع على طول
جنات برغم حزنها على سليم ..بس فرحت بجية هلها ..أخيرا حست انها مش ابروحها
جنات مشت للمطبخ وامعاها مودة اطيب في قهوة ..ويهدرزن ...مع خشت فخري من باب المطبخ ..وانصدم اول ماشاف مودة
فخري : جنات في قهو...
مودة انحرجت ..وطبست وجنات اتبحت فيهم وابتسمت : نعم فخري
فخري مد يده : اهلين شن اخبارك
مودة سلمت : بخير الحمدالله ...شن اخبارك ..وعظم الله أجرك
فخري : تمام ..الله يسلمك
فخري يحكي ومش عارف ايباعد اعيونه من على مودة ..اخر شخص توقع ايشوفه هنا بصراحة : جنات نبي قهوة لو في امعايا شباب برا
جنات : حاضر ..لحظة بس انكمل اللي في يدي وانطيبلك
فخري : تمام ..رني عليا بعد اتكملي
بحت في مودة قبل يطلع وابتسم ...وهي قبل طاحت : يانعليا ..يقتل ياجنات ..ايهبل ..شكلي كبدت فيه خلاص
جنات ضحكت ..وكملت اطيب في قهوة ...ومودة قعدت اتساعد فيها
بعد شويا جنات رنت على فخري بفون مودة عشان ياخذ القهوة ..وطلعت خلت مودة ابروحها في المطبخ ..ومشت اتقدم في قهوة لاهلها ..والضيوف .. فخري خش على طول كأنه كان قاعد برا يستنى في رنة بس
فخري خش ولما شافها ابروحها قرب منها ومودة مدت السفرة ومنحرجة : تفضل
فخري مسك السفرة وشد امعاها يد مودة ويبحت في اعيونها : شنو المفاجاة هذه ..ليش ماقلتيلي
مودة ترجف : كلمتك من الصبح بس أنت مارديتش عليا
فخري : ماكنتش فاضي ..شن اخبارك
مودة تبي تسحب يدها من تحت يد فخري لكن هوا شدها أكثر : تتمام ...فخري خلاص توا ايشوفونا
فخري قرب منها وطبس عليها : مش مصدق اعيوني أنك واقفة قدامي ..مودة نبي انهدرز امعاك ضروري
مودة قربه منها لاخبطها زيادة وتوترت أكثر : فخري خلاص بعدين ..خليني نمشي
فخري حرك صبعه على يدها : عدي توا لكن نبيك ..نبي ندوي امعاك ..كنت ناوي نمشي لدرنة عشان انشوفك ..بس أنتي جيتي هنا
مودة سحبت يدها : اوكي ..نبي نمشي
وطلعت من المطبخ بسرعة ..وفخري عض على فمه وضحك ..وطلع بالقهوة
مودة قمعزت جنب أمها ومعاش تحركت ..وجنات اتهدرز امعاهن
في الليل بكل بعد روحوا الناس ..جنات فرشت لجديدتها وأم مودة ..وفرشت لمودة وحتى هيا امعاهن ..تبي ترقد جنب مودة وسليمة رايفت عليهن
صالحة اتحوس في المطبخ ..خش عليها سفيان تاعب ونعسان : صالحة نبي نرقد ...خلي ملاك تطلع برا اتلم حوسة المربوعة ..وقدام الحوش
صالحة : معاش في حد خلاص
سفيان يده على رقبته ايحرك فيها بتعب : لا خلاص روحوا كلهم ..هنيني نبي نرقد مرات الصبح ايجوا ضيوف
صالحة : عدي ارتاح ..وماتشيلش هم ..شوري ماعليك فيها
سفيان : وين جنة
صالحة : قاعدة مع هلها فرحانة بيهم ..تبي ترقد امعاهن
سفيان ابتسم بلا نية وطلع رقى فوق ...يبي ايخش داره وبعدها ..رد وخش دار سليم ..ولع الضي ..وقلبه انكسر من سرير سليم فاضي
غمض اعيونه وزمط ريقه وتنهد ..طلع وصكر الباب ..ومشى لعند دار جنات فتحها ..مظلمة ..خش ..قرب من سريرها قمعز ايبحت فيها ..كلها ذكريات مع جنات ...عزق روحه على سريرها ..ضم مخدتها ...شم ريحة عطرها
زاد حضنها أكثر ..وغمض اعيونه
**************************
صالحة خشت على ملاك اتهدرز مع جنات ومودة : ملوكي اطلعي لمي المربوعة وقدام الحوش
ملاك تنهدت بتعب وصبت : اوووفه عليك سريب
جنات صبت امعاها : توا انجي انساعدك
ملاك : صاح نجك ليا
مودة : خذاني امعاكن ماتسيبنيش ابروحي ..أمي واجديدة رقدن
جنات : هيا مع بعضن نساعدوا
صالحة : ايوا هكي خير ..كملنا وخشنا صكرن الباب ..أنا انكمل المطبخ وبنخش نرقد
طلعن جنات ومودة وملاك وبدن ايلمن في المربوعة ومدخل الفيلا
جنات : ملوكي عدي جيبي مناديل انلمعوا الطاولات
ملاك : تمام ..هيا
طلعت ملاك ..وتلاقت مع جلال بيخش الملحق فنصت فيه وتبي اتخش ..لكن جلال لاحقها : اسمعي تعالي
ملاك : نعم شن تبي
جلال : كنك شن صارلك
ملاك : خطاني مانبيش انشوف وجهك
جلال مستغرب : ليش ..شن درت أنا
ملاك : واللهي ..ماتعرفش شن درت ...مش منك لانك تافه ماتفكرش الا في نفسك
جلال عصب وشدها ليه : شن تحكي أنتي ..ملاك كنك الزح ..ليش الكلام هذا
ملاك : اطلقني جلال ..شن تبي مني
جلال : كنت نبي نعزيك بس وبنقولك شن صار في فونك ..لكن ماعرفتش ليش قلتي عليا هكي
ملاك انفضت يدها منه : مانبيش منك شي ..لاتعزية ولا غيرها ..وحتى فوني خليه عندك ..عطيني المومري امتاعي بس
جلال : مش امعايا توا ..بس شن فيا ملاك ..شن درت ردي عليا
ملاك اعيونها دمعوا ومشت خشت جوا وسيباته
جلال مشى للملحق ومش عارف شن في ...حاول يتذكر ..بس مافيش الا صورة ملاك في حضنه وخايفة ..وهوا يحساب روحه كان يحلم بيها
جنات تحكي مع مودة ..وخش عليهن فخري : احمم شن اخباركن
مودة ماتت ..وجنات ردت عليه : اهلين
فخري : جنات ممكن دقيقة بس مع مودة
جنات بحتت في مودة وجهها احمر وخايفة ..واتقوللها لا ماتسيبينيش امعاه
جنات : أنا برا انشوف ملاك كنها طولت
طلعت جنات شافت ضي الملحق مشت لجلال خشت عليه
فخري قرب من مودة : ليش خايفة مني ..نبي انهدرز امعاك بس
مودة اعيونها في الارض وشابكة ايديها يرجفن في بعضهن : خايفة حد ايشوفنا
فخري قرب ورفع وجهها : شوفيلي هنا ..ماتخافيش ..مافيش حد ..كلهم روحوا
مودة : باهي
فخري : تختلفي عن جنات بكل ...خوافة بكل
مودة ابتسمت : جنات تربت ابروحها ..واعتمدت ديما على نفسها ..عشان هكي شخصيتها اقوى مني
فخري حط يده على خدها : وأنا تعجبني البنت اتكون خوافة ومرعوشة كيفك ..وخدودها يقعدوا بلون أحمر كيف توا
مودة خلاص معاش تقدر ..رفعت اعيونها فيه ..وهو ايجنن ..طول وعرض واعيونه السود يلمعوا ..كيف ايشوفلها
مودة ترجف : نبي نعدي
فخري مسك يدها : وين بتمشي ..مازال ماقلت شي أنا ..خليك اشويا اسمعيني
مودة : فخري خليني نمشي خايفة
فخري شدها وقمعزها على الكرسي ..وقمعز جنبها : ماتخافيش قتلك ..وربي مافي حد
قعدت مودة خايفة ..وفخري ايهدرز امعاها ..ويحكيلها على حاجات في حياته ..طبعا مودة كانت تختلف على باقي البنات اللي عرفهم في حياته ...بخوفها ..وكيف على طبيعتها تتصرف امعاه
************************
جنات خشت على جلال : خييير
جلال : اهلين
جنات : شفت اجديدة ومودة
جلال : اها شفتهم لما وصلوا للمزرعة
جنات : كنك جلال ..في شي
جلال تنهد ومتحرج من جنات : جنات نبيك في شي
جنات : شن تبي ..جلال
جلال : نبي فلوس جنات ..نبيهن ضروري
جنات خافت : ليش جلال عندك مشكلة ...شن درت
جلال صبا : لا والله مافي مشكلة ..بس محتاج فلوس ضروري
جنات : رد بالك تبي تشري بيهم سم اللي تشرب فيه
جلال : لا واقسم بالله مانبي نشري شي غلط ...جنات دين وانردهم لك اول مرتب
جنات اتبحت فيه : باهي ...بس أنا ماعنديش فلوس ...نعطيك خاتم اتبيعه
جلال تنهد بقهرة : مانبيش انبيع حاجة ليك جنات
جنات مسكت ايديه : مش مشكلة توا تشريلي غيره ..المهم اوعدني ماتشريش حاجة غلط بس
جلال : وربي مانكذب عليك ..نبيهم لشي مهم ..وانردهم لك ..وعد
جنات : خليك هنا نمشي اتجيبه وانجيك
طلعت جنات وخشت رقت فوق ...وملاك طلعت وخشت للمربوعة
فخري : كم يوم تبوا تقعدوا هنا
مودة : مش عارفة ..بس أكيد يومين بالكثير وانروحوا ...بويا عنده عمل اكيد بيجي ياخذنا
فخري : ياريت تقعدوا أكثر ...خاطري نتعرف عليك وانهدرز امعاك ..زي توا
مودة : ياريت
فخري قرب منها ومسك يدها : مودة أنا مش صغير ..ومش مراهق خلاص ...بس أنا من يوم شفتك وأنا انفكر بيك بشكل غريب ...وتوا لما قعدت امعاك ..شديتيني ليك أكثر ...مازلت مانعرفكش واجد ...بس قلبي ملهوف عليك ..مانبيش نمشي وانسيبك
مودة ساكتة وخلاص
فخري : مودة ارفعي وجهك ..شوفيلي ...نبي انشوف اعيونك
مودة صبت ترجف : فخري خلاص عدي ..والا خليني نمشي
فخري صبا وتنهد : خلاص أنا توا نطلع ..بس أكيد نبي انشوفك تاني قبل تمشي
مودة هزت راسها : حاضر
فخري ابتسم وبرم يبي يطلع ومودة نادته : فخري
فخري : اعيونه
مودة عضت على فمها وطبست :
فخري قرب منها وطبس عليها : نعم شن تبي ..ادوي
مودة رفعت وجهها فيه : شكرا عشان الهدية ..اتهبل
فخري : حاجة بسيطة عشان غلست عليك في اول مكالمة
مودة :
فخري بحت فيها بنظرة شلتها في مكانها ..وابتسم ..مع خشت ملاك ...: فخري
مودة : اهيييي حي عليا
فخري : كنك ليش عيطتي اتقول شايفة عفريته
ملاك : اممم ..استغربت بس ...شن ادير هنا مع مودة
فخري طلع : خشي بلا حركات ..مازال أنتي بس تحاسبيني
طلع فخري ومودة وجهها أحمر منحرجة من ملاك ...لكن ملاك ضحكت وتبصر مع مودة وتضحك
*************************
جنات رقت افتحت باب دارها ..وانصدمت من سفيان راقد في سريرها
خشت وصكرت الباب ...قربت منه راقد ...شكله ايجنن وهوا هادي ...شعره لاسود لمخلط بالشيب نازل على وجهه ..كيف لاف جسمه الضخم على مخدة جنات وراقد ..اعيونه اللي فيهم قسوة لما ايعصب منها ...كيف ايهبلوا ..
جنات فتحت درج خذت خاتم منه وتبي تطلع ..لكن قلبها ماطاوعهاش ...ردت وقربت من سفيان ..قمعزت جنبه على السرير ...اتبحت في ملامحه اللي اتموت فيهم ..كل تفاصيله اللي تعشقهم ...الخطوط اللي في جبتهه ..شعرات الشيب الخفيفة اللي في للحيته ..ايديه والعروق البارزات فيهم ...كل شي ..كل شي وابسط شي فيه ..هيا اتحبه موت ...اتحبه كيفما هوا ...اتحبه بكل شي فيه
طبست جنات قربت منه ...لامست شعره ..حركات اصابعها في وسط شعره ...نزلت على للحيته ...لامست فمه وقربت تهمسله : ياريتك تسمعني ...ياريتك اتصدق أني مانقدرش نأذي حد ..حتى لو أذاني ..ياريتك تعطيني فرصة بس نحكيلك على حياتي وشن صار فيا سفيان....وربي مانبي شي من الدنيا لو تسمعني بس وتصدقني
انزلوا دموعها ...مسحتهم بسرعة وصبت ..تنهد وطلعت من دارها ..صكرت الباب وراءها ...ونزلت ..مشت لجلال عطاته الخاتم هدرزت امعاه اشويا ..ومشت ساعدت البنات ..وبعد كملن ..خشن المطبخ ..درن حاجة على السريع كلن ..وخشن فراشاتهن ايهدرزن
ملاك ساكتة وجنات تحسابها رقدت : شن صار امعاك
مودة : على شنو ..قصدك فخري
جنات : أكيد ...شن رأئك فيه
مودة : بصراحة مازلت نتعرف عليه ..بس بصراحة مش عارفة كيف
جنات : كيف يعني ..شنو ؟!!
مودة : يعني كلامه تصرفاته ..اتحسيه راجل ..ورزان مش زي باقي الشباب
جنات : أكيد ..فخري مش عادي ويعجبك ...وأنا اصلا كنت مستغربة كيف قاعد عازب لتوا
مودة : أسكتي عليش اتنقي عليه .. بالك من حظي
جنات : ياريت يا دودي ..تخيلي نقعدوا مع بعضنا هنا
مودة : بالشويا الله يربحك ...راني مش مصدقة ..ماترفعيش سقف احلامي مرات انطيح مرة وحدة
جنات : ياخية احلامي الحلم ب بلاش
مودة : ااااه ياريت والله
جنات تهندت : أنا بس خايفة على جلال ..إن شالله ربي حتى هوا يهديه وانتريح عليه
مودة : ليش شن دار اخرى
جنات : مادار شي ..بس ديما منشغلة عليه ..واليوم حسيت بيه مش عارفة كيف
مودة : كيف ..شن صار
جنات : يعني طلب مني فلوس ..وأنتي عارفة ديما ياخذ مني حتى من قبل . بس المرة هذه شكله غريب مش عارفة شن يبي فيهم
مودة : راه يبقى ااا
جنات : لا لا والله حلفلي انه يبيهم في شي اخر
مودة : إن شالله خير ...بالك يبي شي ماتنسيش انه بدأ يشتغل جديد وممكن محتاج مصاريف
جنات : اجديدة قالت عطاته مبلغ ايمشي بيه لعند يقبض بس مش عارفة شن يبي فيهم
مودة : لو في شي بكرا تسمعيه ..ارقدي توا ..اكيد الصبح انوضوا بدري
جنات تثاوب : اي والله ..انحس في روحي تاعبه
************************
ثاني يوم ناضوا مافيش احداث ..جنات اتشوف في سفيان من بعيد ..ونفس الجو ...مودة فخري حتى هما مكالمات وجو سمح
ملاك طلعت بعد الغداء لحوش عمها ..وهي رادة نادها جلال . وهيا ماتبيش لكن هوا قاللها عشان صورك
مشت وهيا خايفة ..خشت امعاه للملحق : نعم شن تبي
جلال طلع فونها : نبي نعطيك تليفونك صلحته
ملاك بحتت في فونها ..وتذكرت كلام جنات عشان لفلوس ..خذت الفون : بكم صلحته
جلال : مش مهم ..خلاص معاش تزعلي مني بس
ملاك : باهي وين صوري
جلال طلع محفظته ..وطلع المومري وعطالها : أمسكي ..ومرة اخرى افطني تعطي فونك لاي حد وفي صورك
ملاك خذاته وتبي تطلع وبعدها ردت وبحتت فيه : تبي تفهمني انك خايف عليا .. بلاش كذب جلال ..اللي كيفك مايعرفش ايخاف على حد ..أنت عايش لروحك وجوك بس
جلال كلامها صدمه ..كان متاكد أنه غلط امعاها بس مش عارف شن دار بالضبط : اسمعي ملاك ..بالله اسمعيني
ملاك اتوخر : مانبيش نسمعك جلال ..شن تبي اتقول
جلال مسكها وشدها ليه قربها منه ومسك وجهها بين ايديه وكان يرجف : ملاك وربي ماقصدي ..حتى أني مش عارف شن درت بالله سامحيني والله العظيم ماندري على روحي
ملاك تبكي : هذه المشكلة جلال ماتعرفش روحك شن درت ..لامتى بتعيش هكي ..حتى أختك طول الوقت بالها مشغول عليك
جلال : والله خلاص تبت المرة هذي ..ورحمة بويا وأمي حرمت ..ملاك سامحيني بالله عليك
ملاك : شن معنى المرة هذه ..شن الفرق يعني
جلال : لاني طول عمري نشرب واندير في مشاكل ..بس ولا مرة فكرت نغلط مع اي بنت ..حتى ولو كانت بنت مش محترمة ..لان عندي أخت واحدة وديما خايفة عليها ..أنجي هنا ونغلط امعاك أنتي
ملاك تبي تهرب منه لكن هوا شدها : ملاك ملاك .اسمعيني ..أنا نادم علي صار مني ..وبالذات امعاك
ملاك : بالذات أنا ..ليش ؟!!
جلال : اولا عشان خوك ..استقبلني في حوشه ..وأمني عليكم ...وحتى عشانك أنتي ..لانك بنت ..بنت ..
ملاك : بنت شنو ..
جلال : لانك بنت صغيرة ..وطفلة وأنا ..أنا ..
ملاك انقهرت منه كيف ايشوف فيها طفلة : أنت شنو
جلال : وأنا حمار وغبي ومش عارف كيف انخليك تسامحيني ..بس أنا ااا..
ملاك دفاته : أنت فعلا حمار وغبي....وأنا مش طفلة فاهم
وطلعت ملاك بسرعة وسيباته معصب من روحه ..لان مقدرش ايفهمها ويخليها اتسامحه
****************************
#تسريع_للاحداث
بعد يومين سليمة ومودة وأمها روحوا لدرنة ..وجنات تمنت يقعدوا اكثر امعاها
مودة طبعا حصلت فرصة تحكي مع فخري قبل تمشي ..وكانت العلاقة بينهم ..اتهبل ومختلفة
ملاك وجلال معاش تقابلوا واجد ..بس ملاك معصبه منه وهو مش عارف كيف يتصرف امعاها ..وقرر ايطلعها من رأسه بكل ..وخاصة انه بدأ في العمل وكان مركز فيه أكثر
منى مافيش عندها اي خطط جديدة ..لانها اتشوف في الوضع متوتر بين جنات سفيان ..وصلا هوا كان ملتهي مع ضيوفه ..ومعاش حكى مع جنات
بعد اسبوعين ..يوم بعد العشاء ...جنات امقمعزة اتهدرز مع صالحة وملاك ..وفخري وسفيان مش قاعدين ..ومنى كانت عند توفيق ونزلت مشت للحوشهم
دق الباب ومشت جنات افتحت ..مرأة غريبة اول مرة اتشوفها ..سلمت عليها ..وكانت تبكي ..واضح انها خايفة : سفيان موجود
جنات : لا مش قاعد ..تفضلي
المراة خشت وهي متوترة ...وجنات تمشي وراها لعند خشن للصالة
صالحة متكية : من جنات ؟
ملاك صبت بصدمة : ماما
صالحة صبت بسرعة وبحتت فيها : سعاااد
سعاد تبكي وتبحت في ملاك : ملوكي حبيبتي تعالي
ملاك وخرت لاوراء : شن جابك هنا
سعاد :
صالحة قربت منها : سعاد ليش جيتي ..شن تبي ..عدي قبل ايشوفك سفيان
جنات امصبية ومش فاهمة شي الا ان هذه أم سفيان
سعاد : نبي انشوفه ..نبي انشوفهم رايفت عليهم
صالحة : الله يخليك سعاد اطلعي قبل ايشوفك سفيان ..عشان خاطري ..وربي يقتلنا لو كان ايشوفك هنا
سعاد : لعند امتى صالحة وأنا بعيد ..خلاص والله مش قادرة رايفت عليهم نبي انشوفهم ..رايفت عليك ملوكي ..سيبتك صغيرة ..لكن صدقيني غصبا عني ..رايفت على سفيان ..ولدي بكري وحبيبي ..أنا ..
سفيان بصوت عالي : ماريفتيش على سليم ...والا هوا مش ولدك ...والا أنتي أم بالكيف ..اللي تبيه اولدك باهي واللي ماتبيش تمشي واتسيبيه
ملاك انطمرت وراء صالحة يرجفن : سفيان
سعاد اول ماشافت سفيان قلبها وجعها : شيباني حبيبي
سفيان خش وقرب منها وفخري وراءه مصدوم ..قرب من أمه ومسكها من ذراعها : شن اديري هنا من سمحلك اتخشي للحوش هذا ..الحوش اللي قعدت اسنين انظف فيها من عارك و فضايحك
سعاد خافت منه : سفيان اسمعني ..والله نادمة ..وربي قريب انموت من الندم والقهر ..نبي انشوفكم نبي ااا
سفيان : صكري فمك صكري فمك مانبيش نسمع صوتك ..معاش تحاولي تبرري شي ..اطلعي برا ...اطلعيييي براااا
سعاد : الله يخليك سفيان ..خليني انشوفكم بس خليني نا..
سفيان ايقرب منها وهي توخر : اتشوفي من ..ااها اتشوفي من..عندك علم أني من كم يوم دفنت سليم وهو مايعرفش قشرة وجهك لانك سيبتيه قطعة لحم حمراء ..ومشيتي وراء راجل اخرى ...اتشوفي من ..اتشوفي ملاك اللي سيبتيها طفلة صغيرة ..وخليتيها من غير أم في عز ماهيا محتاجتلك ...اتشوفي من جايا اتشوفي فيا ..كيف كبرت قبل جيلي من الهم اللي سيبتيني فيه ..اتشوفي من قوليلي ..اتشوفي من
سعاد طاحت عند رجليه : سامحني يا أمي . سامحني يا حبيبي..سامحني الله يخليك ..والله لعند مرضت من شوقي لكم ..تحسابني كنت متريحة وأنا بعيد عنكم ..وربي كنت انعيش في اليوم بسنة ..سفيان أنا جيت اليوم بعد سمعت باللي صار للخوك وجيت عشا...
سفيان عض على فمه : شوفي مازلتي نفس ما أنتي ..بعد سمعتي باللي صار لخويا .لخويا .مش قادرة حتى اتقولي ولدي ..سليم ولدددك ...ولددك ...بس مش قادرة اتحسي بيه ..أنتي كيف متخيلة روحك أم ..الام يا مادام اتحب اعيالها كيف ماهما ..الام ترضى بيهم كيف ماخلقهم ربي ..ماتحسش بالعار منهم ..ماتنكسفش لما تحكي عليهم ..بس أنتي وين والامومة وين
ورفعها من يدها : صبي اطلعي برا ...اطلعي برا الحوش هذا ومعاش نبي انشوفك فيه مرة تانية ..برااااا
سعاد : سفيان سامحني الله يخليك سامحني
سفيان رفعها ويحكي بعصبية : عارفة مستحيل انسامحك ..حتى لو يطلع باتي من تحت التراب ويسامحك ...حتى لو تقدري اتخليه ايسامحك علي درتيه فيه ..أنا مستحيل انسامحك
ودفه سفيان لعند طاحت على الارض ..سعاد تبكي وملاك ضمت صالحة وتبكي ..وفخري مسك سفيان وخذا سعاد منه ايطلع فيها ..وسفيان ..يبرم معصب واعيونه نار والدم يغلي في اعروقه
وجنات واقفة مصدومة من اللي تسمع فيه
سعاد تبكي : يا فخري الله يربحك حاول تقنعه ..قوله يسمعني بس مرة وحدة ...والله أنا انتابع فيهم كل يوم .ونعرف عنهم كل شي ..وخاطري نتلاقى امعاهم ..حتى مرة وحدة في الشهر بس
فخري وصلها لباب : للاسف مانقدرش اندير شي ..سفيان لو ايجيه عمي حي توا ويقوله سامحها ..مستحيل يرضى ايسامحك ..أنتي تعرفي سفيان اكويس ..مانقدرش انساعدك
طلعت سعاد وهي تبكي ومكسورة ..ونادمة علي دارته ..بس مرات الندم ايجي متأخر بكل ..ومرات حتى لو جاء في وقته ماعاد ينفع المسامحة مع كبر الذنب
سفيان بحت في فخري : مشت؟؟
فخري هز رأسه : مشت
سفيان يرجف من العصبية : هذه من سمحلها اتخش هنا ...صالحة أنا شن قايل ..من خلها اتخش صااااالحة
جنات : ااناااا
صالحة قاطعتها بسرعة : خشت ابروحها سفيان الباب كان مفتوح وخشت ....نحن قاعدين هنا وخشت علينا
جنات بحتت في صالحة وفمهت عليها ..وجنات اصلا مش ناقصها مشاكل مع سفيان سكتت
سفيان رفع صبعه يهدد : اخر مرة نلقها في الحوش هذا ..واللي يبي يكسر كلامي ..يلقى روحه مطرود امعاها معاش نبي انعاود كلامي
وطلع سفيان ورقى فوق بسرعة ...الجو تما متوتر لوطى ...وبعدها كل واحد خش في داره
جنات مقمعزة في سريرها واتفكر في اللي صار اليوم ...زعما شن صار وخلا سفيان يكره امه بالطريقة هذه
اشويا وجنات تسمع في الاغنية صوتها عالي عرفت سفيان ايتمرن ..لما يعصب هذا المتنفس الوحيد
طلعت من دارها ..ومشت لداره فتحت الباب ..الصوت عالي ..خشت لاقاته لابس سروال بس وقاعد كله عرق ..ويتمرن بشكل عنيف
جنات خشت وطفت الاغنية : سفيان
سفيان وقف وعصب بزيادة : جنة ولعي الخرا واطلعي برا
جنات قربت منه : سفيان ليش ادير في روحك هك ..حرام عليك
سفيان صبا : جنة اطلعي برا
جنات اتوخر : مانبيش نطلع لعند توقف
سفيان ايقرب منها وشكله ايخوف : جنة اطلعي برا مانبيش نأذيك باي شكل ..أطلعيييي
جنات التفتت وصكرت الباب وقلبها يبي ايوقف من الخوف ..بس بحتت فيه : أذيني لو تبي ..عصب عليا وعيط ..بس أنا مانبيش انسيبك تأذي نفسك أكثر
سفيان قرب منها بسرعة وهيا غمضت اعيونها ..خبط الباب برجله بالقوة ..وهيا صكرت ذانها ..سفيان ماعرفش ايقرب منها مايبيش يأذيها ..مش قادر ..حط اعصابه في الدار وبدأ ايكسر في أثاثها
جنات واقفة واتبحت فيه ..وعلى قد ماكانت خايفة على قد ما وجعها قلبها من الالم اللي عايش فيه سفيان
سفيان خبط وكسر واجد ..وفي الاخير تعب وقمعز على الارض وحط رأسه بين ايديه وعيط باعلى صوته اااااااااه وبعدها طبس ساكت
جنات اتقرب منه وخايفة ..قمعزت امقابلته وحطت يدها على شعره وهيا ترجف ..بس سفيان رفع رأسه فجاة
سفيان والدموع في اعيونه : كيف تبيني انسامحها ..كيف جاية ومتخيلة أني نقدر انسامح ..انسامحها على شنو والا شنو
جنات : بس في الاخير مهما كان هيا أمك سفيان
سفيان عض على فمه وضحك بهزوا وسط ادموعه : أمي ..هه ..الام مش كلمة ..الام مش مجرد أسم والا لقب ..الام فعل ..الام كل شي في حياة اعيالها ..الام مش هيا اللي اتسيب اعيالها اصغار وأكبر واحد فيهم مازال شاب مراهق ..الام ماتكرهش حياتها عشان عندها ولد مريض ..الله غالب عليه مسكين مش ذنبه شي ..الا أن أمه طلعت وحدة رخيصة تمشي وراء رغباتها
جنات :
سفيان طبس ويحكي بغصة : ماتعرفيش كم لليلة وأنا نسمع في باتي يبكي من الفضيحة ..والعار بعد ما هربت وسيبتنا ...ماتعرفيش كيف شاب في عمري مش قادر يطلع للشارع ..عشان أمه جابتله العار
ماتعرفيش كيف باتي مرض وقعد طريح لافراش وأنا شلت المسؤلية بعده ...حتى وحالتنا كانت اكويسة ..بس مش كل حاجة فلوس
لما كان سليم يبكي وأنا مانعرفش كيف نتصرف لاني مانعرفش شي ..لما ملاك تبكي واتقول نبي ماما ..وأنا مش قادر انفهم طفلة في عمرها ..أمها وين
ماتعرفيش كيف شعورك لما تدفني بوك وهو ميت بالقهر من شي هوا ماليهش فيه ذنب ...ماتعرفيش ..كم لليلة وأنا نسهر على سليم طول الليل يبكي ...وأخر شي بعد جاءه الصرع ..وقعد الالم مضعف
وكأن الدنيا بعد هذا كله مش سادها عذب فيا ...اندير حادث ونفقد البصر ...عشان تبقى المعاناة مضاعفة ..بعد هذا كله بالله عليك مازالت تبيني انسامحها ..بعد اللي عشته بسببها هيا ..اتقوليلي مهما كان هذه أمك
سفيان يمسح في وجه : هذه مستحيل اتكون أم ..الام أكبر من هكي بواجد
جنات ادموعها على خدها وقربت منه وضماته بالقوة ...وهو معاش تحرك ...جمد في مكانه ...اصلا كان محتاج لحضنها هيا بالذات ..لف ايديه وراء ظهرها ودفن وجه في شعرها ..وقعدوا هكي قريب عشر دقائق ..وجنات حاضنته ..وتمسح بيديها على ظهره وشعره
باعدت من عليه وبحتت في اعيونه متورمات وحمر من البكاء وجسمه كله يرجف : تعال صبي سفيان
سفيان : وين
جنات صبت وماسكة يده : تعال صبي بس
سفيان صبا امعاها ..وجنات خذاته لعند الدش : سفيان ادوش عشان ترتاح ..جسمك كله مرهق وتاعب
سفيان برم وفتح لامية وخش تحت منها وجنات طلعت وصكرت الباب ..مشت خذت منشفة وسروال بيجاما حطتهم على الباب وقمعزت تستنى فيه ..لعند كمل وخذا السروال لابسه ..وطلع يجفف في شعره
جنات صبت اتبحت فيه ..وهو جاء قمعز على سريره وحط المنشفة على اكتوفه ..وساكت
جت وراه وبدأت اتجفف في ظهره ..وشعره ..وطبست باسته على كتفه وهو بحت فيها وبرم رقد على السرير ومسك يدها : جنة خليك جنبي ..نبي نرقد في حضنك لو سامحتي أنسي كل شي وخليك امعايا
جنات ابتسمت وقربت منه اول مرة من غير خوف ..ورقدت جنبه وهو حضنها بقوة ..وحط رأسه في رقبتها وغمض اعيونه ..ورقد ..رقد بعد طلع تعب وكمت سنين من العذب ..رقد من غير مايفكر في اي شي ..الا أنه يبي يرتاح في حضنها وبس
جنات طول الليل اتبحت في وجه سفيان كيف راقد ..تلمس في شعره ..اعيونه ..فمه للحيته ..كل ملامحه وطبست باسته على خده ..ورقدت وجهها في وجه
الصبح سفيان ناض على احلى ريحة ايحبها ..ناض على عطر جنات ..ناض لاقى روحه في حضنها ..ارتفع اشويا وقمعز ايبحت في ملامحها ...وقرب منها باسها على خشمها ..وجنات تحركت وحطت يدها على وجهها ..وسفيان قرب منها يضحك ..وباسها على فمها ..ورفع وجه بحت فيها ..وهيا فتحت اعيونها على اعيون سفيان ..ابتسمت ..وسفيان حط وجه على وجهها : صباح الخير
جنات مسكت وجه : صباح النور
سفيان حط وجه في رقبتها شم عطرها بقوة ..وبحت فيها : كل يوم نبي انوض على ريحتك جنتي
جنات ابتسمت وهو قرب من فمها وباسها بوسة ناعمة ..وحط يده في شعرها وبحت في اعيونها : تمشي امعايا جنة
جنات : وين ؟؟
سفيان : تمشي امعايا والا لا
جنات ابتسمت وهزت راسها : نمشي امعاك وين ماتبي
سفيان ابتسم حرك خشمه على خشمها : بنأخذك للجنة ..ياجنتي
*******نهاية الحلقة #14
سفيان طلع من داره وكان يبي يمشي لجنات ..وصل لعند باب دارها ..ويسمع صالحة تصرخ وتبكي
جنات يدها على قلبها وترجف ..ردت بالشويا للدار ..
هبة خشت وحطت شنطتها على الكرسي : خلاص أنا تعبت ..معاش عندي قدرة معتز
معتز تنهد : شن انديروا هذا نصيب من ربي
هبة : انحس في ربي ايعاقب فيا ..لاني سكتت وساعدتها
معتز حط يده على كتفها : شن تحكي ..ربي كريم هبوش ..غير اصبري
هبة صبت معصبة : لعند امتى تعبت من الادوية والعلاجات ..مليت معتز مليت ..أنا نبي انكون اااا..
وقفت هبة لما سمعت صوت صريخ واعياط : بسم الله هذا شنو
معتز طلع بحت برا : يستر الله ..الصوت جاي من حوش سفيان
هبة طلعت تجري : توفيق ..خويا
معتز طلع وراءها ...وجنات تسمع في الصوت وخافت . ..طلعت بالشويا وراهم ..مافيش حد ..مشت تجري للفيلا ..واطلعوا اعمام سفيان وكلهم قربوا من الفيلا
********************
سفيان برم على صوت لعياط مشى بسرعة لدار سليم خش لاقى صالحة تبكي ومقمعزة جنبه على السرير
سفيان مصبي ايبحت فيه ومنصدم : كنك صالحة ..ليش تبكي
صالحة منهارة وماسكة يد سليم : ..سليم سفيان ..سليم مات ..من بدري انحاول انوضه عشان دواءه مايبيش ..سليم مات سفياااان
سفيان زمط وقرب منه ..قمعز على طرف السرير اعيونه مليانة ادموع ..مسك يده مصقعة
..طبس على وذنه : سليم ...سليم حبيبي ..نوض هيا ...سليييم ...نوض سليم تربح ..ماتخوفنيش عليك ..سلييم ...سليم .....سلييييييم
خشت عليهم ملاك وقعدت واقفة ومنصدمة
وقعد سفيان ايهز فيه ويعيط باسمه : سليم بالله عليك افتح اعيونك ..سليم اوخيي نوض ..نوض سليم تربح نوض ..سليم .. هات يدك انبوسها ..سليم ..ورحمة بويا نوض ...سلييييم ..لاااااااااااا..سليييييم
صالحة صبت مسكت سفيان من اكتوفه : خلاص سفيان ..خلاص ..خليه ..تريح المسكين ..ادعليه بالرحمة
سفيان ضمه ويبكي : وأنا امتى بنرتاح ..امتتتى ..تعبت وربي تعبت
ملاك اتهز في رأسها وتبكي بصوت ..وسفيان صبا خذاها في حضنه وقعدوا يبكوا
منى امصبية على باب دار توفيق من غير اي ردة فعل ..اما توفيق كان مطبس ومتأثر بصوت بكأهم
هبة ومعتز ..واعمام سفيان رقوا بسرعة وخشوا ..عليهم ..وكلهم قعدوا يبكوا ...جنات خشت للفيلا تجري ..رقت فوق ..تسمع في صوتهم يبكوا ..والخوف سيطر عليها ..خشت في وسط الزحمة ..خشت واعيونها ايدورو على سفيان بس ...لعند شافته يبكي ..والعائلة اتعزي فيه
..جنات خشت لدار ترجف بحتت في سليم ..على السرير كيف امغمض اعيونه ..كأنه راقد ..وجه ابيض وجامد....غابت نظرته المليانة ضحكة ..غاب صوته وهو ينادي عليهم عشان ايبوس يده قربت منه مترددة ..قمعزت على طرف السرير ..مدت يدها ترجف ..ومسكت يده الصغيرة ..مصقعة ..مافيهاش حياة ..لمست خده ..وشعره ..خنقتها العبرة ..طبست وقعدت تبكي بصوت وتشهق
..سفيان بحت فيها ..وعض على فمه ونزل لوطى مع اعمامه اشويا وصالحة طلعتهم كلهم من الدار وصكرتها
..ملاك تبكي وجنات خذتها ونزلت لوطى ..واشويا والفيلا بدأت تعبى بأقارب سفيان سفيان طلع وقمعز على دورج الفيلا ومطبس ..مع خشت فخري ايشوف في الزحمة ..نزل من السيارة مفجوع ..قرب منهم ..ويسأل وقالوله
قرب من سفيان وقمعز امقابلة : الله يرحمه شيباني ..عظم الله أجرك ..عزنا فيه واحد
سفيان رفع رأسه وبحت في فخري ..وفخري شد رأسه وضمه : الله غالب هاذ حال الدنيا ..صبي بالله عليك شد حيالك ..وخلي انشوف الناس قاعدة اتجي اتعزي
مسح سفيان وجه وصبا مع فخري ..وبدوأ يستقبلوا في الناس
عم سفيان قرب منه وعزاه : عظم الله أجرك ...ولاحول ولا قوة الا بالله ...الدنيا كل يوم بحال ..مازلنا مافرحنا بعمليتك وكيف رديت اتشوف ...لكن لااعتراض على حكم الله
سفيان تنهد بحزن وخلاص
الليل بطوله ..وكل مرة اتجي ناس اتعزي من اقاربهم والجيران ..وجنات معاش شافت سفيان بكل
جنات وقت اغلب الناس اللي في الفيلا بدأت ترقد ..خشت دارها ودست لاوراق ..غيرت دبشها ..ومشت نزلت اتساعد في صالحة ..واقفة امعاها لعند وقت متأخر ..رقدت اشويا جنب ملاك ..الصبح بدري ..ناضت ومشت للملحق ..خشت لاقت جلال راقد مايندري علي صاير
جنات اتهز فيه : جلال نوض ..نوض الناس عندهم حالة وفاة من امبارح وأنت ماتندري على شي .نوض
جلال فتح عين وحدة : تؤ تؤ تؤ ..شن في كنك على الصبح
جنات : نوض جلال بلا فضايح ..سفيان خوه توفى أمس في الليل وأنت قاعد راقد
جلال ناض فتح اعيونه : شن تحكي ..اي خوه ..قصدك فخري
جنات ضربته على كتفه : بعيد السو عليه ..مش فخري جلال ..أخ سفيان صغير حرام أمس توفى
جلال قمعز ايحك في اعيونه : سفيان عنده اخ صغير ..وينه ماشفت بكل
جنات : جلال مش وقت اسئلة نوض اغسل وجهك واطلع شوف سفيان عزيه واقعد امعاه ..عيب
جلال صبا : لا اله الا الله ..هيا ..هيا ..اشويا بس
جنات : أنا بنطلع جلال ..رد بالك اترد ترقد
جلال : لا هيا وراءك
طلعت جنات وخشت للفيلا ..ومشت اتساعد في صالحة عشان ايوتوا فطور للضيوف
جلال ناض غسل وغير دبشه ..وطلع لاقى سفيان وفخري عزاهم ..وقعد مع اعيال عم سفيان مع الرجالة
جنات طول الوقت اتحوس مع صالحة وباقي بنات العئلة ..عاد عزاء وأنتن عرفات الجو
**************************
مودة ناضت الصبح رنت على فخري ماردش عليها ..لابست وطلعت مشت لعند الصيدالية ..خشت وتعرفت على البنت اللي تشتغل فيها ..والبنت مجرد ماعرفت اسمها مودة ..عطاتها بوكس صغير مغلف . خذاته منها وطلعت بسرعة روحت للحوش ..خشت دارها وصكرتها ..افتحت البوكس ..كان عليه كرت صغير مكتوب عليه (( أسف لاني زعلتك مني أمس ..كان بودي انكون قريب منك ونعتذر ..بس برغم بعد المسافة ..حبيت نعتذر بشكل ايليق بعيونك الحلوات : فخري
))مودة كانت تعرف كم واحد من قبل ..بس هذه اول مرة اتحس بهتمام حقيقي من شخص مازال تعرفها جديد ويعتذر من شي بسيط
ضحكت من قلبها وافتحت الهدية ..بوكس مليان ورد ..وفي وسطهم انواع شكولاطة اتهبل ..
لمت مودة البوكس وحاولت تتصل بفخري بس برضوا ماردش عليها وهي حست في حاجة غلط
****************************
جلال بعد الغداء ..مشى للملحق واتصل بمودة
مودة : نعم
جلال : مودة أنتي في الحوش
مودة : اكيد وين بنكون في الشارع
جلال : تي اسمعي نحكي جد ..كنك قاعدة في الحوش نبي حني ضروري تقدر تطلعي شورها
مودة كانت متكية قمعزت : خير شن في ..جنات فيها شي ..احكي جلال
جلال : لا لا جنات بخير مافيها شي ..لكن أخ سفيان توفى امبارح
مودة عظامها رقدن : قصدك فخري
جلال : فخري ولد عمه ...ومن وين تعرفيه أنتي اصلا
مودة : جلال مش وقتك من اللي توفى
جلال : أخ سفيان الصغير ..اسمه سليم
مودة : ياحرام ..كيف مات جلال
جلال : مانعرفش مودة ..حتى مازالت ماشفته بكل ..بس نسمع فيهم ايقولوا انه كان مريض
مودة : اااها ..عرفته .. جنات مرة حكتلي عليه
جلال بعصبية : مودة خلاص فكيني من كثرة الدوة .صبي فزي بسرعة عدي للحوشنا نبي حني
مودة صبت : هيا اشويا بس انقول لامي
صكرت مودة ..ومشت قالت لامها ..ومشن مع بعضهن لسليمة ..ومودة رنت على جلال كلمها ..وقاللها على خبر وفاة سليم ..وان لازم اتجي غادي عشان اتعزي ..وسليمة قالت توا انشوف خوالك
سليمة اتصلت بولدها عبدالله خال جنات عشان ايشيلها لبنغازي ..لكن هوا قاللها مش فاضي عندي شغل ..وخليها مرة اخرى ..ونفس الحال ولدها لاخر
سليمة تعصبت وتمت اتهزب ..وأم مودة قعدت اتهدي فيها
أم مودة : ماتزعليش روحك ..وكان على مشيت بنغازي ..تمشي امعانا
سليمة : ليش أنتوا تبوا تمشوا
أم مودة : أكيد نبوا انعزوا جنات ..والا لا يا دودي
مودة اتبحت في أمها وفرحت : قصدك نمشي امعاكم
أكيد نجك ليا ..ياريت حتى عشان جنات قدام عربها ..عيب انخلوها بروحهاأم مودة : خلاص يا حاجة صبي لمي روحك وأنا نمشي انشوف الحاج كان اموافق نمشوا اليوم
سليمة : الله يربحك وانعني مانفقدكم ..جيراني وخير حتى من دمي ولحمي
أم مودة : الناس لبعضها وجنات تربت مع مودة وكيف بنتنا
*********************
جنات كان خاطرها اتشوف سفيان تبي تاخذ بخاطره وتعزيه برغم كل شي ..لانها عارفة كيف ايحب سليم ومتعلق بيه
الصبح كانت جنازة ...وسفيان طول اليوم مع ضيوف . لعند بعد العشاء والناس بدأت اتخف ..جنات طلعت من دارها بعد غيرت دبشها اللي كانت اتحوس بيه طول النهار ..شافت سفيان خش لداره لاحقاته ..وقفت على باب دقت وفتحت
سفيان كان واقف ومحول تيشرته بيخش ياخذ دوش ..بحت فيها ..وبرم فتح دولابه يطلع في دبش ..جنات خشت مترددة : سفيان
سفيان من غير مايبحت فيها : نعم
جنات : أنا عارفة أني مهما قلت ..مستحيل انخفف عنك ..بس أنت اكيد عارف أن هوا توا قاعد في مكان أحسن من هنا
سفيان بحت فيها وهز رأسه ..وكان واضح الحزن على ملامح وجه
جنات : أنا نعرفك ديما قوي ...بس لو تبي مني اي شي أنا حاضرة ...مستعدة ننسى كل شي ..ونوقف جنبك
سفيان بحت فيها بصدمة ..وكان قلبه يرجف ...برم بسرعة وخذا دبشه وخش للحمام ..من غير اي كلمة ..كان خايف ايطلع اللي في قلبه ...كان شاك ومش قادر ايقوللها خليك جنبي ...أنا قوي بيك ..أنا محتاجلك جنبي أكثر من اي وقت ..أنا معاش عندي الا أنتي ..نبيك جنبي اليوم وبكرأ وكل يوم
جنات اعيونها دمعوا وتنهدت بقهرة ...لانها مش عارفة كيف تتصرف ...المفروض تكره سفيان وتبعد عنه ...بس كل يوم اتزيد اتحبه ومش قادرة اتسيبه
صكرت الباب وطلعت انزلت لوطى ...تسمع في صالحة اتسلم على وحدات ..استغربت من جاءهم في الليل ..نزلت وكانت صدمة ..اجديدتها ومودة وأمها
..نزلت تجري وقعدت اتضم فيهن وتبكي ..وهن ايعزن فيها ويبكن امعاها للحظات وخشن قمعزن في الصالة ..وقمعزت امعاهن ملاك وصالحة و هبة ..وصبايا اعمام سفيان ...وخالة سفيان هذه اول مرة اتشوفها جنات
سفيان ادوش ونزل ..وصالحة ناداته عشان ايسلم على اجديدة جنات وأم مودة ..عزوه ..وطلع على طول
جنات برغم حزنها على سليم ..بس فرحت بجية هلها ..أخيرا حست انها مش ابروحها
جنات مشت للمطبخ وامعاها مودة اطيب في قهوة ..ويهدرزن ...مع خشت فخري من باب المطبخ ..وانصدم اول ماشاف مودة
فخري : جنات في قهو...
مودة انحرجت ..وطبست وجنات اتبحت فيهم وابتسمت : نعم فخري
فخري مد يده : اهلين شن اخبارك
مودة سلمت : بخير الحمدالله ...شن اخبارك ..وعظم الله أجرك
فخري : تمام ..الله يسلمك
فخري يحكي ومش عارف ايباعد اعيونه من على مودة ..اخر شخص توقع ايشوفه هنا بصراحة : جنات نبي قهوة لو في امعايا شباب برا
جنات : حاضر ..لحظة بس انكمل اللي في يدي وانطيبلك
فخري : تمام ..رني عليا بعد اتكملي
بحت في مودة قبل يطلع وابتسم ...وهي قبل طاحت : يانعليا ..يقتل ياجنات ..ايهبل ..شكلي كبدت فيه خلاص
جنات ضحكت ..وكملت اطيب في قهوة ...ومودة قعدت اتساعد فيها
بعد شويا جنات رنت على فخري بفون مودة عشان ياخذ القهوة ..وطلعت خلت مودة ابروحها في المطبخ ..ومشت اتقدم في قهوة لاهلها ..والضيوف .. فخري خش على طول كأنه كان قاعد برا يستنى في رنة بس
فخري خش ولما شافها ابروحها قرب منها ومودة مدت السفرة ومنحرجة : تفضل
فخري مسك السفرة وشد امعاها يد مودة ويبحت في اعيونها : شنو المفاجاة هذه ..ليش ماقلتيلي
مودة ترجف : كلمتك من الصبح بس أنت مارديتش عليا
فخري : ماكنتش فاضي ..شن اخبارك
مودة تبي تسحب يدها من تحت يد فخري لكن هوا شدها أكثر : تتمام ...فخري خلاص توا ايشوفونا
فخري قرب منها وطبس عليها : مش مصدق اعيوني أنك واقفة قدامي ..مودة نبي انهدرز امعاك ضروري
مودة قربه منها لاخبطها زيادة وتوترت أكثر : فخري خلاص بعدين ..خليني نمشي
فخري حرك صبعه على يدها : عدي توا لكن نبيك ..نبي ندوي امعاك ..كنت ناوي نمشي لدرنة عشان انشوفك ..بس أنتي جيتي هنا
مودة سحبت يدها : اوكي ..نبي نمشي
وطلعت من المطبخ بسرعة ..وفخري عض على فمه وضحك ..وطلع بالقهوة
مودة قمعزت جنب أمها ومعاش تحركت ..وجنات اتهدرز امعاهن
في الليل بكل بعد روحوا الناس ..جنات فرشت لجديدتها وأم مودة ..وفرشت لمودة وحتى هيا امعاهن ..تبي ترقد جنب مودة وسليمة رايفت عليهن
صالحة اتحوس في المطبخ ..خش عليها سفيان تاعب ونعسان : صالحة نبي نرقد ...خلي ملاك تطلع برا اتلم حوسة المربوعة ..وقدام الحوش
صالحة : معاش في حد خلاص
سفيان يده على رقبته ايحرك فيها بتعب : لا خلاص روحوا كلهم ..هنيني نبي نرقد مرات الصبح ايجوا ضيوف
صالحة : عدي ارتاح ..وماتشيلش هم ..شوري ماعليك فيها
سفيان : وين جنة
صالحة : قاعدة مع هلها فرحانة بيهم ..تبي ترقد امعاهن
سفيان ابتسم بلا نية وطلع رقى فوق ...يبي ايخش داره وبعدها ..رد وخش دار سليم ..ولع الضي ..وقلبه انكسر من سرير سليم فاضي
غمض اعيونه وزمط ريقه وتنهد ..طلع وصكر الباب ..ومشى لعند دار جنات فتحها ..مظلمة ..خش ..قرب من سريرها قمعز ايبحت فيها ..كلها ذكريات مع جنات ...عزق روحه على سريرها ..ضم مخدتها ...شم ريحة عطرها
زاد حضنها أكثر ..وغمض اعيونه **************************
صالحة خشت على ملاك اتهدرز مع جنات ومودة : ملوكي اطلعي لمي المربوعة وقدام الحوش
ملاك تنهدت بتعب وصبت : اوووفه عليك سريب
جنات صبت امعاها : توا انجي انساعدك
ملاك : صاح نجك ليا
مودة : خذاني امعاكن ماتسيبنيش ابروحي ..أمي واجديدة رقدن
جنات : هيا مع بعضن نساعدوا
صالحة : ايوا هكي خير ..كملنا وخشنا صكرن الباب ..أنا انكمل المطبخ وبنخش نرقد
طلعن جنات ومودة وملاك وبدن ايلمن في المربوعة ومدخل الفيلا
جنات : ملوكي عدي جيبي مناديل انلمعوا الطاولات
ملاك : تمام ..هيا
طلعت ملاك ..وتلاقت مع جلال بيخش الملحق فنصت فيه وتبي اتخش ..لكن جلال لاحقها : اسمعي تعالي
ملاك : نعم شن تبي
جلال : كنك شن صارلك
ملاك : خطاني مانبيش انشوف وجهك
جلال مستغرب : ليش ..شن درت أنا
ملاك : واللهي ..ماتعرفش شن درت ...مش منك لانك تافه ماتفكرش الا في نفسك
جلال عصب وشدها ليه : شن تحكي أنتي ..ملاك كنك الزح ..ليش الكلام هذا
ملاك : اطلقني جلال ..شن تبي مني
جلال : كنت نبي نعزيك بس وبنقولك شن صار في فونك ..لكن ماعرفتش ليش قلتي عليا هكي
ملاك انفضت يدها منه : مانبيش منك شي ..لاتعزية ولا غيرها ..وحتى فوني خليه عندك ..عطيني المومري امتاعي بس
جلال : مش امعايا توا ..بس شن فيا ملاك ..شن درت ردي عليا
ملاك اعيونها دمعوا ومشت خشت جوا وسيباته
جلال مشى للملحق ومش عارف شن في ...حاول يتذكر ..بس مافيش الا صورة ملاك في حضنه وخايفة ..وهوا يحساب روحه كان يحلم بيها
جنات تحكي مع مودة ..وخش عليهن فخري : احمم شن اخباركن
مودة ماتت ..وجنات ردت عليه : اهلين
فخري : جنات ممكن دقيقة بس مع مودة
جنات بحتت في مودة وجهها احمر وخايفة ..واتقوللها لا ماتسيبينيش امعاه
جنات : أنا برا انشوف ملاك كنها طولت
طلعت جنات شافت ضي الملحق مشت لجلال خشت عليه
فخري قرب من مودة : ليش خايفة مني ..نبي انهدرز امعاك بس
مودة اعيونها في الارض وشابكة ايديها يرجفن في بعضهن : خايفة حد ايشوفنا
فخري قرب ورفع وجهها : شوفيلي هنا ..ماتخافيش ..مافيش حد ..كلهم روحوا
مودة : باهي
فخري : تختلفي عن جنات بكل ...خوافة بكل
مودة ابتسمت : جنات تربت ابروحها ..واعتمدت ديما على نفسها ..عشان هكي شخصيتها اقوى مني
فخري حط يده على خدها : وأنا تعجبني البنت اتكون خوافة ومرعوشة كيفك ..وخدودها يقعدوا بلون أحمر كيف توا
مودة خلاص معاش تقدر ..رفعت اعيونها فيه ..وهو ايجنن ..طول وعرض واعيونه السود يلمعوا ..كيف ايشوفلها
مودة ترجف : نبي نعدي
فخري مسك يدها : وين بتمشي ..مازال ماقلت شي أنا ..خليك اشويا اسمعيني
مودة : فخري خليني نمشي خايفة
فخري شدها وقمعزها على الكرسي ..وقمعز جنبها : ماتخافيش قتلك ..وربي مافي حد
قعدت مودة خايفة ..وفخري ايهدرز امعاها ..ويحكيلها على حاجات في حياته ..طبعا مودة كانت تختلف على باقي البنات اللي عرفهم في حياته ...بخوفها ..وكيف على طبيعتها تتصرف امعاه
************************
جنات خشت على جلال : خييير
جلال : اهلين
جنات : شفت اجديدة ومودة
جلال : اها شفتهم لما وصلوا للمزرعة
جنات : كنك جلال ..في شي
جلال تنهد ومتحرج من جنات : جنات نبيك في شي
جنات : شن تبي ..جلال
جلال : نبي فلوس جنات ..نبيهن ضروري
جنات خافت : ليش جلال عندك مشكلة ...شن درت
جلال صبا : لا والله مافي مشكلة ..بس محتاج فلوس ضروري
جنات : رد بالك تبي تشري بيهم سم اللي تشرب فيه
جلال : لا واقسم بالله مانبي نشري شي غلط ...جنات دين وانردهم لك اول مرتب
جنات اتبحت فيه : باهي ...بس أنا ماعنديش فلوس ...نعطيك خاتم اتبيعه
جلال تنهد بقهرة : مانبيش انبيع حاجة ليك جنات
جنات مسكت ايديه : مش مشكلة توا تشريلي غيره ..المهم اوعدني ماتشريش حاجة غلط بس
جلال : وربي مانكذب عليك ..نبيهم لشي مهم ..وانردهم لك ..وعد
جنات : خليك هنا نمشي اتجيبه وانجيك
طلعت جنات وخشت رقت فوق ...وملاك طلعت وخشت للمربوعة
فخري : كم يوم تبوا تقعدوا هنا
مودة : مش عارفة ..بس أكيد يومين بالكثير وانروحوا ...بويا عنده عمل اكيد بيجي ياخذنا
فخري : ياريت تقعدوا أكثر ...خاطري نتعرف عليك وانهدرز امعاك ..زي توا
مودة : ياريت
فخري قرب منها ومسك يدها : مودة أنا مش صغير ..ومش مراهق خلاص ...بس أنا من يوم شفتك وأنا انفكر بيك بشكل غريب ...وتوا لما قعدت امعاك ..شديتيني ليك أكثر ...مازلت مانعرفكش واجد ...بس قلبي ملهوف عليك ..مانبيش نمشي وانسيبك
مودة ساكتة وخلاص
فخري : مودة ارفعي وجهك ..شوفيلي ...نبي انشوف اعيونك
مودة صبت ترجف : فخري خلاص عدي ..والا خليني نمشي
فخري صبا وتنهد : خلاص أنا توا نطلع ..بس أكيد نبي انشوفك تاني قبل تمشي
مودة هزت راسها : حاضر
فخري ابتسم وبرم يبي يطلع ومودة نادته : فخري
فخري : اعيونه
مودة عضت على فمها وطبست :
فخري قرب منها وطبس عليها : نعم شن تبي ..ادوي
مودة رفعت وجهها فيه : شكرا عشان الهدية ..اتهبل
فخري : حاجة بسيطة عشان غلست عليك في اول مكالمة
مودة :
فخري بحت فيها بنظرة شلتها في مكانها ..وابتسم ..مع خشت ملاك ...: فخري
مودة : اهيييي حي عليا
فخري : كنك ليش عيطتي اتقول شايفة عفريته
ملاك : اممم ..استغربت بس ...شن ادير هنا مع مودة
فخري طلع : خشي بلا حركات ..مازال أنتي بس تحاسبيني
طلع فخري ومودة وجهها أحمر منحرجة من ملاك ...لكن ملاك ضحكت وتبصر مع مودة وتضحك
*************************
جنات رقت افتحت باب دارها ..وانصدمت من سفيان راقد في سريرها
خشت وصكرت الباب ...قربت منه راقد ...شكله ايجنن وهوا هادي ...شعره لاسود لمخلط بالشيب نازل على وجهه ..كيف لاف جسمه الضخم على مخدة جنات وراقد ..اعيونه اللي فيهم قسوة لما ايعصب منها ...كيف ايهبلوا ..
جنات فتحت درج خذت خاتم منه وتبي تطلع ..لكن قلبها ماطاوعهاش ...ردت وقربت من سفيان ..قمعزت جنبه على السرير ...اتبحت في ملامحه اللي اتموت فيهم ..كل تفاصيله اللي تعشقهم ...الخطوط اللي في جبتهه ..شعرات الشيب الخفيفة اللي في للحيته ..ايديه والعروق البارزات فيهم ...كل شي ..كل شي وابسط شي فيه ..هيا اتحبه موت ...اتحبه كيفما هوا ...اتحبه بكل شي فيه
طبست جنات قربت منه ...لامست شعره ..حركات اصابعها في وسط شعره ...نزلت على للحيته ...لامست فمه وقربت تهمسله : ياريتك تسمعني ...ياريتك اتصدق أني مانقدرش نأذي حد ..حتى لو أذاني ..ياريتك تعطيني فرصة بس نحكيلك على حياتي وشن صار فيا سفيان....وربي مانبي شي من الدنيا لو تسمعني بس وتصدقني
انزلوا دموعها ...مسحتهم بسرعة وصبت ..تنهد وطلعت من دارها ..صكرت الباب وراءها ...ونزلت ..مشت لجلال عطاته الخاتم هدرزت امعاه اشويا ..ومشت ساعدت البنات ..وبعد كملن ..خشن المطبخ ..درن حاجة على السريع كلن ..وخشن فراشاتهن ايهدرزن
ملاك ساكتة وجنات تحسابها رقدت : شن صار امعاك
مودة : على شنو ..قصدك فخري
جنات : أكيد ...شن رأئك فيه
مودة : بصراحة مازلت نتعرف عليه ..بس بصراحة مش عارفة كيف
جنات : كيف يعني ..شنو ؟!!
مودة : يعني كلامه تصرفاته ..اتحسيه راجل ..ورزان مش زي باقي الشباب
جنات : أكيد ..فخري مش عادي ويعجبك ...وأنا اصلا كنت مستغربة كيف قاعد عازب لتوا
مودة : أسكتي عليش اتنقي عليه .. بالك من حظي
جنات : ياريت يا دودي ..تخيلي نقعدوا مع بعضنا هنا
مودة : بالشويا الله يربحك ...راني مش مصدقة ..ماترفعيش سقف احلامي مرات انطيح مرة وحدة
جنات : ياخية احلامي الحلم ب بلاش
مودة : ااااه ياريت والله
جنات تهندت : أنا بس خايفة على جلال ..إن شالله ربي حتى هوا يهديه وانتريح عليه
مودة : ليش شن دار اخرى
جنات : مادار شي ..بس ديما منشغلة عليه ..واليوم حسيت بيه مش عارفة كيف
مودة : كيف ..شن صار
جنات : يعني طلب مني فلوس ..وأنتي عارفة ديما ياخذ مني حتى من قبل . بس المرة هذه شكله غريب مش عارفة شن يبي فيهم
مودة : راه يبقى ااا
جنات : لا لا والله حلفلي انه يبيهم في شي اخر
مودة : إن شالله خير ...بالك يبي شي ماتنسيش انه بدأ يشتغل جديد وممكن محتاج مصاريف
جنات : اجديدة قالت عطاته مبلغ ايمشي بيه لعند يقبض بس مش عارفة شن يبي فيهم
مودة : لو في شي بكرا تسمعيه ..ارقدي توا ..اكيد الصبح انوضوا بدري
جنات تثاوب : اي والله ..انحس في روحي تاعبه
************************
ثاني يوم ناضوا مافيش احداث ..جنات اتشوف في سفيان من بعيد ..ونفس الجو ...مودة فخري حتى هما مكالمات وجو سمح
ملاك طلعت بعد الغداء لحوش عمها ..وهي رادة نادها جلال . وهيا ماتبيش لكن هوا قاللها عشان صورك
مشت وهيا خايفة ..خشت امعاه للملحق : نعم شن تبي
جلال طلع فونها : نبي نعطيك تليفونك صلحته
ملاك بحتت في فونها ..وتذكرت كلام جنات عشان لفلوس ..خذت الفون : بكم صلحته
جلال : مش مهم ..خلاص معاش تزعلي مني بس
ملاك : باهي وين صوري
جلال طلع محفظته ..وطلع المومري وعطالها : أمسكي ..ومرة اخرى افطني تعطي فونك لاي حد وفي صورك
ملاك خذاته وتبي تطلع وبعدها ردت وبحتت فيه : تبي تفهمني انك خايف عليا .. بلاش كذب جلال ..اللي كيفك مايعرفش ايخاف على حد ..أنت عايش لروحك وجوك بس
جلال كلامها صدمه ..كان متاكد أنه غلط امعاها بس مش عارف شن دار بالضبط : اسمعي ملاك ..بالله اسمعيني
ملاك اتوخر : مانبيش نسمعك جلال ..شن تبي اتقول
جلال مسكها وشدها ليه قربها منه ومسك وجهها بين ايديه وكان يرجف : ملاك وربي ماقصدي ..حتى أني مش عارف شن درت بالله سامحيني والله العظيم ماندري على روحي
ملاك تبكي : هذه المشكلة جلال ماتعرفش روحك شن درت ..لامتى بتعيش هكي ..حتى أختك طول الوقت بالها مشغول عليك
جلال : والله خلاص تبت المرة هذي ..ورحمة بويا وأمي حرمت ..ملاك سامحيني بالله عليك
ملاك : شن معنى المرة هذه ..شن الفرق يعني
جلال : لاني طول عمري نشرب واندير في مشاكل ..بس ولا مرة فكرت نغلط مع اي بنت ..حتى ولو كانت بنت مش محترمة ..لان عندي أخت واحدة وديما خايفة عليها ..أنجي هنا ونغلط امعاك أنتي
ملاك تبي تهرب منه لكن هوا شدها : ملاك ملاك .اسمعيني ..أنا نادم علي صار مني ..وبالذات امعاك
ملاك : بالذات أنا ..ليش ؟!!
جلال : اولا عشان خوك ..استقبلني في حوشه ..وأمني عليكم ...وحتى عشانك أنتي ..لانك بنت ..بنت ..
ملاك : بنت شنو ..
جلال : لانك بنت صغيرة ..وطفلة وأنا ..أنا ..
ملاك انقهرت منه كيف ايشوف فيها طفلة : أنت شنو
جلال : وأنا حمار وغبي ومش عارف كيف انخليك تسامحيني ..بس أنا ااا..
ملاك دفاته : أنت فعلا حمار وغبي....وأنا مش طفلة فاهم
وطلعت ملاك بسرعة وسيباته معصب من روحه ..لان مقدرش ايفهمها ويخليها اتسامحه
****************************
#تسريع_للاحداث
بعد يومين سليمة ومودة وأمها روحوا لدرنة ..وجنات تمنت يقعدوا اكثر امعاها
مودة طبعا حصلت فرصة تحكي مع فخري قبل تمشي ..وكانت العلاقة بينهم ..اتهبل ومختلفة
ملاك وجلال معاش تقابلوا واجد ..بس ملاك معصبه منه وهو مش عارف كيف يتصرف امعاها ..وقرر ايطلعها من رأسه بكل ..وخاصة انه بدأ في العمل وكان مركز فيه أكثر
منى مافيش عندها اي خطط جديدة ..لانها اتشوف في الوضع متوتر بين جنات سفيان ..وصلا هوا كان ملتهي مع ضيوفه ..ومعاش حكى مع جنات
بعد اسبوعين ..يوم بعد العشاء ...جنات امقمعزة اتهدرز مع صالحة وملاك ..وفخري وسفيان مش قاعدين ..ومنى كانت عند توفيق ونزلت مشت للحوشهم
دق الباب ومشت جنات افتحت ..مرأة غريبة اول مرة اتشوفها ..سلمت عليها ..وكانت تبكي ..واضح انها خايفة : سفيان موجود
جنات : لا مش قاعد ..تفضلي
المراة خشت وهي متوترة ...وجنات تمشي وراها لعند خشن للصالة
صالحة متكية : من جنات ؟
ملاك صبت بصدمة : ماما
صالحة صبت بسرعة وبحتت فيها : سعاااد
سعاد تبكي وتبحت في ملاك : ملوكي حبيبتي تعالي
ملاك وخرت لاوراء : شن جابك هنا
سعاد :
صالحة قربت منها : سعاد ليش جيتي ..شن تبي ..عدي قبل ايشوفك سفيان
جنات امصبية ومش فاهمة شي الا ان هذه أم سفيان
سعاد : نبي انشوفه ..نبي انشوفهم رايفت عليهم
صالحة : الله يخليك سعاد اطلعي قبل ايشوفك سفيان ..عشان خاطري ..وربي يقتلنا لو كان ايشوفك هنا
سعاد : لعند امتى صالحة وأنا بعيد ..خلاص والله مش قادرة رايفت عليهم نبي انشوفهم ..رايفت عليك ملوكي ..سيبتك صغيرة ..لكن صدقيني غصبا عني ..رايفت على سفيان ..ولدي بكري وحبيبي ..أنا ..
سفيان بصوت عالي : ماريفتيش على سليم ...والا هوا مش ولدك ...والا أنتي أم بالكيف ..اللي تبيه اولدك باهي واللي ماتبيش تمشي واتسيبيه
ملاك انطمرت وراء صالحة يرجفن : سفيان
سعاد اول ماشافت سفيان قلبها وجعها : شيباني حبيبي
سفيان خش وقرب منها وفخري وراءه مصدوم ..قرب من أمه ومسكها من ذراعها : شن اديري هنا
من سمحلك اتخشي للحوش هذا ..الحوش اللي قعدت اسنين انظف فيها من عارك و فضايحك سعاد خافت منه : سفيان اسمعني ..والله نادمة ..وربي قريب انموت من الندم والقهر ..نبي انشوفكم نبي ااا
سفيان : صكري فمك
صكري فمك مانبيش نسمع صوتك ..معاش تحاولي تبرري شي ..اطلعي برا ...اطلعيييي براااا سعاد : الله يخليك سفيان ..خليني انشوفكم بس خليني نا..
سفيان ايقرب منها وهي توخر : اتشوفي من ..ااها اتشوفي من
..عندك علم أني من كم يوم دفنت سليم وهو مايعرفش قشرة وجهك لانك سيبتيه قطعة لحم حمراء ..ومشيتي وراء راجل اخرى ...اتشوفي من ..اتشوفي ملاك اللي سيبتيها طفلة صغيرة ..وخليتيها من غير أم في عز ماهيا محتاجتلك ...اتشوفي من جايا اتشوفي فيا ..كيف كبرت قبل جيلي من الهم اللي سيبتيني فيه ..اتشوفي من قوليلي ..اتشوفي من سعاد طاحت عند رجليه : سامحني يا أمي . سامحني يا حبيبي..سامحني الله يخليك ..والله لعند مرضت من شوقي لكم ..تحسابني كنت متريحة وأنا بعيد عنكم ..وربي كنت انعيش في اليوم بسنة ..سفيان أنا جيت اليوم بعد سمعت باللي صار للخوك وجيت عشا...
سفيان عض على فمه : شوفي مازلتي نفس ما أنتي ..بعد سمعتي باللي صار لخويا .لخويا .مش قادرة حتى اتقولي ولدي ..سليم ولدددك ...ولددك ...بس مش قادرة اتحسي بيه ..أنتي كيف متخيلة روحك أم ..الام يا مادام اتحب اعيالها كيف ماهما ..الام ترضى بيهم كيف ماخلقهم ربي ..ماتحسش بالعار منهم ..ماتنكسفش لما تحكي عليهم ..بس أنتي وين والامومة وين
ورفعها من يدها : صبي اطلعي برا ...اطلعي برا الحوش هذا ومعاش نبي انشوفك فيه مرة تانية ..برااااا
سعاد : سفيان سامحني الله يخليك سامحني
سفيان رفعها ويحكي بعصبية : عارفة مستحيل انسامحك ..حتى لو يطلع باتي من تحت التراب ويسامحك ...حتى لو تقدري اتخليه ايسامحك علي درتيه فيه ..أنا مستحيل انسامحك
ودفه سفيان لعند طاحت على الارض ..سعاد تبكي وملاك ضمت صالحة وتبكي
..وفخري مسك سفيان وخذا سعاد منه ايطلع فيها ..وسفيان ..يبرم معصب واعيونه نار والدم يغلي في اعروقه وجنات واقفة مصدومة من اللي تسمع فيه
سعاد تبكي : يا فخري الله يربحك حاول تقنعه ..قوله يسمعني بس مرة وحدة ...والله أنا انتابع فيهم كل يوم .ونعرف عنهم كل شي ..وخاطري نتلاقى امعاهم ..حتى مرة وحدة في الشهر بس
فخري وصلها لباب : للاسف مانقدرش اندير شي ..سفيان لو ايجيه عمي حي توا ويقوله سامحها ..مستحيل يرضى ايسامحك ..أنتي تعرفي سفيان اكويس ..مانقدرش انساعدك
طلعت سعاد وهي تبكي ومكسورة ..ونادمة علي دارته ..بس مرات الندم ايجي متأخر بكل ..ومرات حتى لو جاء في وقته ماعاد ينفع المسامحة مع كبر الذنب
سفيان بحت في فخري : مشت؟؟
فخري هز رأسه : مشت
سفيان يرجف من العصبية : هذه من سمحلها اتخش هنا ...صالحة أنا شن قايل ..من خلها اتخش صااااالحة
جنات : ااناااا
صالحة قاطعتها بسرعة : خشت ابروحها سفيان الباب كان مفتوح وخشت ....نحن قاعدين هنا وخشت علينا
جنات بحتت في صالحة وفمهت عليها ..وجنات اصلا مش ناقصها مشاكل مع سفيان سكتت
سفيان رفع صبعه يهدد : اخر مرة نلقها في الحوش هذا ..واللي يبي يكسر كلامي ..يلقى روحه مطرود امعاها
معاش نبي انعاود كلامي وطلع سفيان ورقى فوق بسرعة ...الجو تما متوتر لوطى ...وبعدها كل واحد خش في داره
جنات مقمعزة في سريرها واتفكر في اللي صار اليوم ...زعما شن صار وخلا سفيان يكره امه بالطريقة هذه
اشويا وجنات تسمع في الاغنية صوتها عالي عرفت سفيان ايتمرن ..لما يعصب هذا المتنفس الوحيد
طلعت من دارها ..ومشت لداره فتحت الباب ..الصوت عالي ..خشت لاقاته لابس سروال بس وقاعد كله عرق ..ويتمرن بشكل عنيف
جنات خشت وطفت الاغنية : سفيان
سفيان وقف وعصب بزيادة : جنة ولعي الخرا واطلعي برا
جنات قربت منه : سفيان ليش ادير في روحك هك ..حرام عليك
سفيان صبا : جنة اطلعي برا
جنات اتوخر : مانبيش نطلع لعند توقف
سفيان ايقرب منها وشكله ايخوف : جنة اطلعي برا مانبيش نأذيك باي شكل ..أطلعيييي
جنات التفتت وصكرت الباب وقلبها يبي ايوقف من الخوف ..بس بحتت فيه : أذيني لو تبي ..عصب عليا وعيط ..بس أنا مانبيش انسيبك تأذي نفسك أكثر
سفيان قرب منها بسرعة وهيا غمضت اعيونها ..خبط الباب برجله بالقوة ..وهيا صكرت ذانها
..سفيان ماعرفش ايقرب منها مايبيش يأذيها ..مش قادر ..حط اعصابه في الدار وبدأ ايكسر في أثاثها جنات واقفة واتبحت فيه ..وعلى قد ماكانت خايفة على قد ما وجعها قلبها من الالم اللي عايش فيه سفيان
سفيان خبط وكسر واجد ..وفي الاخير تعب وقمعز على الارض وحط رأسه بين ايديه وعيط باعلى صوته اااااااااه وبعدها طبس ساكت
جنات اتقرب منه وخايفة ..قمعزت امقابلته وحطت يدها على شعره وهيا ترجف ..بس سفيان رفع رأسه فجاة
سفيان والدموع في اعيونه : كيف تبيني انسامحها ..كيف جاية ومتخيلة أني نقدر انسامح ..انسامحها على شنو والا شنو
جنات : بس في الاخير مهما كان هيا أمك سفيان
سفيان عض على فمه وضحك بهزوا وسط ادموعه : أمي ..هه ..الام مش كلمة ..الام مش مجرد أسم والا لقب ..الام فعل ..الام كل شي في حياة اعيالها ..الام مش هيا اللي اتسيب اعيالها اصغار وأكبر واحد فيهم مازال شاب مراهق ..الام ماتكرهش حياتها عشان عندها ولد مريض ..الله غالب عليه مسكين مش ذنبه شي ..الا أن أمه طلعت وحدة رخيصة تمشي وراء رغباتها
جنات :
سفيان طبس ويحكي بغصة : ماتعرفيش كم لليلة وأنا نسمع في باتي يبكي من الفضيحة ..والعار بعد ما هربت وسيبتنا ...ماتعرفيش كيف شاب في عمري مش قادر يطلع للشارع ..عشان أمه جابتله العار
ماتعرفيش كيف باتي مرض وقعد طريح لافراش وأنا شلت المسؤلية بعده ...حتى وحالتنا كانت اكويسة ..بس مش كل حاجة فلوس
لما كان سليم يبكي وأنا مانعرفش كيف نتصرف لاني مانعرفش شي ..لما ملاك تبكي واتقول نبي ماما ..وأنا مش قادر انفهم طفلة في عمرها ..أمها وين
ماتعرفيش كيف شعورك لما تدفني بوك وهو ميت بالقهر من شي هوا ماليهش فيه ذنب ...ماتعرفيش ..كم لليلة وأنا نسهر على سليم طول الليل يبكي ...وأخر شي بعد جاءه الصرع ..وقعد الالم مضعف
وكأن الدنيا بعد هذا كله مش سادها عذب فيا ...اندير حادث ونفقد البصر ...عشان تبقى المعاناة مضاعفة ..بعد هذا كله بالله عليك مازالت تبيني انسامحها ..بعد اللي عشته بسببها هيا ..اتقوليلي مهما كان هذه أمك
سفيان يمسح في وجه : هذه مستحيل اتكون أم ..الام أكبر من هكي بواجد
جنات ادموعها على خدها وقربت منه وضماته بالقوة ...وهو معاش تحرك ...جمد في مكانه ...اصلا كان محتاج لحضنها هيا بالذات ..لف ايديه وراء ظهرها ودفن وجه في شعرها ..وقعدوا هكي قريب عشر دقائق ..وجنات حاضنته ..وتمسح بيديها على ظهره وشعره
باعدت من عليه وبحتت في اعيونه متورمات وحمر من البكاء وجسمه كله يرجف : تعال صبي سفيان
سفيان : وين
جنات صبت وماسكة يده : تعال صبي بس
سفيان صبا امعاها ..وجنات خذاته لعند الدش : سفيان ادوش عشان ترتاح ..جسمك كله مرهق وتاعب
سفيان برم وفتح لامية وخش تحت منها وجنات طلعت وصكرت الباب ..مشت خذت منشفة وسروال بيجاما حطتهم على الباب وقمعزت تستنى فيه ..لعند كمل وخذا السروال لابسه ..وطلع يجفف في شعره
جنات صبت اتبحت فيه ..وهو جاء قمعز على سريره وحط المنشفة على اكتوفه ..وساكت
جت وراه وبدأت اتجفف في ظهره ..وشعره ..وطبست باسته على كتفه
وهو بحت فيها وبرم رقد على السرير ومسك يدها : جنة خليك جنبي ..نبي نرقد في حضنك لو سامحتي أنسي كل شي وخليك امعايا جنات ابتسمت وقربت منه اول مرة من غير خوف ..ورقدت جنبه وهو حضنها بقوة ..وحط رأسه في رقبتها وغمض اعيونه ..ورقد ..رقد بعد طلع تعب وكمت سنين من العذب ..رقد من غير مايفكر في اي شي ..الا أنه يبي يرتاح في حضنها وبس
جنات طول الليل اتبحت في وجه سفيان كيف راقد ..تلمس في شعره ..اعيونه ..فمه للحيته ..كل ملامحه
وطبست باسته على خده ..ورقدت وجهها في وجه الصبح سفيان ناض على احلى ريحة ايحبها ..ناض على عطر جنات ..ناض لاقى روحه في حضنها ..ارتفع اشويا وقمعز ايبحت في ملامحها ...وقرب منها باسها على خشمها ..وجنات تحركت وحطت يدها على وجهها ..وسفيان قرب منها يضحك ..وباسها على فمها ..ورفع وجه بحت فيها ..وهيا فتحت اعيونها على اعيون سفيان ..ابتسمت ..وسفيان حط وجه على وجهها : صباح الخير
جنات مسكت وجه : صباح النور
سفيان حط وجه في رقبتها شم عطرها بقوة ..وبحت فيها : كل يوم نبي انوض على ريحتك جنتي
جنات ابتسمت وهو قرب من فمها وباسها بوسة ناعمة ..وحط يده في شعرها وبحت في اعيونها : تمشي امعايا جنة
جنات : وين ؟؟
سفيان : تمشي امعايا والا لا
جنات ابتسمت وهزت راسها : نمشي امعاك وين ماتبي
سفيان ابتسم حرك خشمه على خشمها : بنأخذك للجنة ..ياجنتي
*******نهاية الحلقة #14
