رواية عشق الثأر الفصل الرابع عشر 14 بقلم مينة طلال

رواية عشق الثأر الفصل الرابع عشر 14 بقلم مينة طلال

{بس انت العزلتك من بين هاي الناس

ورممتك وانة بيوت اهلي مهجومة ..}

______

عائشة : سكتت من عرضة وهوه يباوع بااتجاهي ينتضر الاجابة اجاه صوت مُروج : عموو راح اروح

عافني وطلع يمها ثرمت بسرعة واني اتنفس احاول اهدء روحــي رجع دخل من جديد

قاسم : ليش ساكتة عائشة ؟

- شكول يعني؟

- تقبلين بية ؟

- يـعني؟

- نزوج ونكمل الباقي من عمرنا سوة ..

- انت متأكد من قرارك؟

- اني من زمان جاي ابيع المواد العدي والسلاح حتى اصفي واطلع من العراق وانتي جنتي ضمن خطة المستقبل

- مافتهمت؟

- راح تصيرين انتي بيتي الي راح اعيش بي

- مااعرف شجاوب

- شيكول كلبج ؟

- يكول قبلي لان ياما جان يدك الك واني اسكتة ..

باوعلي بنظرة عجزت افسرها وكال : حضري روحج

- وين ؟

- نروح نزوج

- بهل سرعة بس شلون ليش ؟

- كافي عمرنا الراح روحــي حظري روحج

طلع واني ضليت افتر بمكاني متوترة خايفة صاح : يلا الج نص ساعة ..

جيكت الطباخ ركضت لغرفتي عدي هواي ملابس بس حسيت روحــي ماعدي شي من مستواه كعدت بالغرفة صافنة ..

- شجاي تسوين عائشة انتي وين هوة وين ؟

نزلت دموعي واني كاعدة بمكاني ماتحرك دك الباب وفاتح حجة مبتسم : خلصت العروس

بس شافني بمنظري كاعدة بنص الملابس وابجي كعد بمستواي : شـَڪو شبيج المن هل بجي ؟

- قاسم انت تسرعت انت وين اني وين ..

قاسم : هشش مااريد اسمع هل حجي بعد تمام ؟ انت احسن مني بااضعاف على الاقل انتي مو مجرمة ..

- بس اني مو من مستواك

- عدج حقج سح انتي مو من مستواي .. لان انتي احسن مني

مسح دموعي وباسني براسي : يلا بدلي

عافني وطلع اختاريت قيص رصاصي وبنطرون اسود رهمت ويا جنطة بيضة وحذاء ابيض وشال رصاصي رتبت وجهي لبست وحطيت من عطري استخدمت احسن عطر عدي استخدمة بس بالمناسبات ..

طلعت من غرفتي لكيتة كاعد منتضرني بس شافني كام

قاسم : ها نروح

- اي استاذ

- شكلتي؟

- احم قاسم

ابتسم مدلي ايدة حتى الزمها واسم ريحة الدجاج طلع عفتة ورحت اركض بكعبي..

- يبووي نسيتها نسيتها ..

قاسم: مو مشكلة ناكل برة

- ومُروج؟

- اطيها خبر تاكل برة هم يلا امشي

مدلي ايدة لزمتها ومشينا سوة جاي يفتح الباب ردت اجر ايدي جلب بية

قاسم : شبيج ؟

- الحرس مو كدام الباب لا يشوفونا

- واذا شافونا ؟ انتي من اليوم مرتي وحبيبتي وصاحبة كلشي املكة ..

- قاسم

- ديري بالج تعوفين ايدي بعد عائشة حتى لو اني اوخر ايدي منج لاتعوفيني ..

ابتسمت خجلانة متوترة فرحانة عدي هواي مشاعر وكلهن سوة فتح الباب وركضو علية الحرس واحد جاب السيارة والثاني فتح الباب راد يسرق ماقبل اخذ هوة السويج فتحلي الباب صعدت بمة صعد وطلعنا من المنطقة كال : عادي اخذج للكاظم ؟

- ها ؟

- اذا ما تقبلين تزورين عادي بس نعقد هناك..

- لا قاسم عادي واذا اني من غير مذهب مو معناه اني مااحب اهل البيت وماازورهم بالعكس .. اني نص الشددد الي عبرناها جنت انخاهم فدوة لاسمهم اني منو حتى ماازورهم اصلان هنيالي لو سمحوني اطب وازورهم..

- هنيالج عدج هيج نية وهيج صفاء اني راح افوت بس ماادري بيا وجه راح افوت..وشلون راح اوكف بابة

- قاسم مدامك نويت بداية جديدة عوف كلشي ورة ظهرك وابدي من جديد ابدي عبالك هسه نخلقت ابدي بنية صادقة وصدكني الله راح يتقبل ( ان الله يغفر الذنوب جميعا)..

- اخ اخ يا عائشة بس لو ضميري يصدك الله راح يسامحني بس لو اصدك ..

- ما الك حق تحكم على الله قاسم

- صحيح

سكتننا ثنينا وعم الهدوء شغل كاسيت لام كلثوم اغنية غلبني الشوق ..

اتجاهلت وجوده وجود اغنيتة وضليت اباوع للشوارع والناس لحد ما وصلنا يمكن هاي اول مرة راح اطب من بعد سجن قاسم لان اخر مرة زرت قبل لا يطلعونة افراج بسبوع ..

طبك السيارة وكال يلا نزلنا ومدلي ايده لزمتها وطبينا نتمشى بسوك الامام جانت الدنيا الظهر والناس قليلين لان دوام وكت غداء ضلينا نمشي لحد ما وصلنا للدخول ردت اشتري جادر صلاة هوه اشترالي وطبينا

ماادري ليش هيج صار سكوت بينا يمكن اني ضغطت علية بحجي او هوة بطبيعتة دائما ساكت وقليل الكلامة مرات اشوفة ساكت بس احس عقلة ماواكف يفكر بكلشي ويركز..

مشيت وحدي من بين النسوان جان اكو ترميم وهوه تغيرات مسوين اكيد يعني ١٥ سنة مو شي هين ..

دخلت من باب المراد ومشيت ويا نسوان لحد موصلت صحن الضريح المبارك دخلت وضليت بعيدة مسافة بس اباوع للشباك حجيت كلشي بكلبي ماخليت شي ..

مولاي معروف باب الحوائج وباب المراد وابو طلبة

محد اجاك ورديتة ولااحد طلب منك وفشلتة

اني مقصرة اجيتك قبل ١٥ سنة طلبت منك يطلع قاسم وطلع بس مارحعت تشكرتك تعرف مولاي الدنيا تلهي واخذتنا الدنيا وهمومها ومشاكلها ومااجيتك ..

هواي تغيرت امور اخر مرة اجيت جنت نقية وعدي خوف الله وجنت من اوكف يمك اوكف مظلومة بس هسه اني ظالمة مولاي

دخلنا بعالم قذر واذينة ناس هواي

الناس مالهم ذنب اذا احنا تاذينا بس ماادري شلون الدنيا بيوم وليلة حطتنا بهيج مكان ..

مولاي اليوم نوينا ننجمع اني وقاسم بعقد مبارك وعلى سنة الله ورسولة

مولاي قاسم نوة بداية جديدة اطلب منك تاخذ بيدة وتعينة على اختيار الطريق الصواب وتهدي وتبعد عنة كل شر وابن حرام وبت حرام ...

حاولت اطب بين النسوان بالكوة وصلت للشباك مسحتة بيدي وخرت من الهوسة نداريت بوجهي للامام ما التفت لحد مطلعت واني منحنية اجلالاً وتقديراً لمقام هذا الامام العظيم ..

صليت الزيارة والظهر والعصر وقريت زيارة الائمة وكملت طلعت امشي على كيف واني اتأمل جمال وراحة المكان يريت يكدر الواحد يعيش هنا ويبتعد عن كل زينة وزخرف الدنيا الدنية ..

طلعت من باب السوك ادور بعيني ماكو قاسم ضليت واكف عيني على الزوار الي يطلعون مرت نص ساعة كلبي ضل يدك من الخوف وحتى ضغطي احسة هبط ضغطي كام الخوف يهد حيلــي وجان المحة من بعيد يمسح بوجهه ويطلع بجكاير بس شافني سرعة خطواتة تقرب مني وجهه احمر وعيونة مورمة عرفتة باجي هواي هوة كح وكال : شعجب طلعتي بسرعة اعرف النسوان تتأخر ..

- صليت وزرت وطلعت ماعدي شي

- تمام امشي نتغدة

مشيت ورة وهوه رسمي حتى مجاب طاري العقد اني لان عشت طول ؏ـَمريٰۛہ‏ بخوف وهم وقلق عقلي وكلبي مجاي يستوعبن الي جاي اعيشة وكساع افكر اكول بطل ..

رحنا لمطعم بنص السوك طلب مندي ثنين واني ساكتة منو راح ياكل هلكد ؟ هوه ضعيف ونايكمل صحنة بالبيت واني من اطلع استحي اكل نوب طالعه ويا يبوي..

راح الويتر وثنينة ساكتين كح هوة احسة يريد يحجي او مااعرف اني متوترة مدري هوة واخيرا كسر حاجز الصمت وهوه يكول : شدعيتي ؟

- دعيتلك من كل كلبي تكون هاي الخطوات الي راح تسويها بداية جديدة الك

- واني دعيتلج ..

ابتسمت فرحانة وكلتلة :- بشنو؟

- ماتندمين على قرارج انو قبلتي بية....

______

اسحاق...

دموع مدري شصاير وياها ابد مو اختي الاعرفها ..

بس لا الوقت مناسب ولا الضرف الي احنا بي يسمحلي اكعد احجيها وياها خاصتاً انو بيتنا بي النسوان ومرت عمي عينها علينا واحسها تنقل كلشي يصير ..

ورة ما تناكرنا بالحجي طلعت برة للطبخ كال يريد بعد غاز جاي اطب اخذ واسمع دموع تتوسل بـ يـٰس حتى ما يحجيلي ..

شـَڪو شي سيء اجة بعقلي لو ماطالعة عمة جان حطيت يـٰس ودست علية اخذتة وطلعنا جبرتة يحجي وكالي لبارحة مرت غايب تعاركت ويا دموع وهوه طب دافع عنها وهيه جانت تكلة لايحجيلي حتى لااتعارك وياهم ..

ماصدكت بس مشيت اليوم الثاني والناس اليوم اكثر من البارحة وهوسة عمامي نصبو جادر وماخلو احد مادزو علية ومايدفعون فلوس كل ضنهم راح اتفشل كدام الناس بس صدمتهم من نصبت جادر ثالث وجبت طباخين وذبحت ٤ ذبايح عن اهلنا

اباوع عليهم وجهم اصفر الولد حامد وعمران يضحكون عليهم جنا واكفين نضحك عليهم جان يجينا صوتة ..

سليم : ها بسرعة بدلتني

أسحاق : تضل الاصل وهذولة افرع...

حامد : يلا هم نعمة

عمران : اني مااريد اصير فرع

ضحكنا وحضنت سليم وهوه يتعذر مسحت على ظهرة وصاح الطباخ يصب رحنا ويا كلنا نساعدة حتى سليم مبين مال خلك بس لزم التشريب والثريب يثرد وينكع ..

صبينا غداء للناس بجادر وجيران كامو يدزون جداري سبحان الله الاكل يزيد عبالك صبينا للجدار والنسوان وكمنا نوزع بالباقي ..

كفينا الغداء وجايات وكهوة الولد لزمو الميوزة والصياني والجداري جلف جلف كساع يضحكوني بسوالفهم ولاعبالك جايبهم عزة عبالك جاين يتونسون

عمران : حامد اجلف مو من ورا حشمك

حامد : هوه انت وين توصل لشغلي العجوزي الجذاب

عمران : تعال شوف الصياني ماللاتي اذا مو يلمعن هسه ارجع اجلفهن كلهن

حامد : خايب دروح مني انريد نكمل شنو مال اهلك ؟

عمران : الريول يكول من عمل عمل منكم فليتقنه ..

حامد : جان ما لزموك الجماعة

سليم ضحك عليها وعمران كام يفشر علية واني بس ابتسم وادخن يمهم جان يدك مبايلي مُروج باوعت لسليم جان يدخن وينضف بمي وراهم كمت عنهم وجاوبتها ..

- ها ؟

مُروج :- عمي كال انت تاخذني

- ترة عدي فاتحة انتي لاذوق عدج ولا احساس ؟

مُروج :- اكلك انت مو سمعت عدي مشاعر الك كمت تشوف روحك علية الزم حدودك وياي ترة كلبي ادوسة واشوفك قيمتك ..

- باعي هسه ساعة وجاي واعلمج شلون تحجين عدل ..

سديتة بوجها كلبي محترك منها كل مااذكر شسوت ويا سليم طبيت للجادر الناس كامت تروح يسلمون علية ويطلعون وكف يمي يس واخو ثامر شـَڪد حاول يس يتقرب مني بس اني صادرة ما مرتاحة ماادري صدك هوة رايد يحذرني وخايف علية وعلى اختي لو همة دازي علينا ..

شوية هدأ الوضع الطباخ بدة يبدي العشاء والناس تتحضر للصلاة باوعت لسليم تعبان رحت يمة

- سليم ارجع لبيتك ارتاح ماقصرت

سليم : لا اسحاق شلون اعوفك هنا وحدك شو محد عدة احساس ويعاونك خليني مابية شي

- خوية ولله خايف عليك ماعدنا شي والشباب هنا

حامد عمران : روح استاذنا ارتاح احنا يما

حجينا شوية راح ركب سيارتة وراح للبيت وصيت الولد واخذت سيارة حامد ورحت للمطعم الي كاعدة بي مروج شفتها من بعد لابسة فستان احمر وشعرها يطيرة الهوه لابسة نظارات وعيونها للصفحة الثانية ..

صعدت يمها وصلت لطولتها وكفت كدامها جانت دايرة وجها من حست اكو واحد رفعت راسها

مُروج : تأخرت عبالي مراح تجي

أسحاق : عدي فاتحة مُروج ضغطت على روحــي واجيت

مُروج : ممكن تكعد مراح اكدر احجي وانت واكف هيج اكعد ومااخذ من وقتك

استغفرت الله وكعدت : احجي

- اول شي احنا جان نلتقي بغير ضرف وموضوع اذا تذكر

- اي علمود عمج بس مصارت فرصة وهم جان لان اشوفج قبل بس صار الي صار ..

- حبيت اوضحلك بخصوص هل موضوع ..

- تفضلي

- طلعت اني مفتهمة الموضوع كله غلط بغلط واعداء عمي خلوني اصير ضدة سنين واني اكرهه ومصدكة هوه السبب بس عائشة خادمتنا حجتلي كلشي ..

- حلو يعني نكدر نكول قاسم يحبج فعلاً وماعدج بعد مشكلة بحياتج مو ؟

باوعتلها رافع حاجبي دنكت تلعب باظافرها كالت : عدي

- شنو هيه ؟

- انت اسحاق

- شبيك اني ؟

- اني احبك ليش ماتفهم ؟

- ليش حبيتيني وشلون حبيتيني شنو السبب الي خلاج تحبيني شو كضيتها اركض وراج وتشردين .. كساع طافر لمكان جنج عتوي

ضحكت ومسحت وجها : جنت احب اشرد حتى تلحكني جنت احب احجي وياك بسيارة احب توصلني احب اباوع عليك احب اسمعك ..

أسحاق : مروج انتي تدرين سليم انتحر ؟

رمشت بوجهي هواي وشهكت بالكوة تجر النفس: شنو شنو شنو يـ؏ـني نتحر مات ؟ مات بسببي احجي اسحاق مات

استغربت ردت فعلها وكفت تكمز عبالك وحدة رايحة روحها وتبجي وتشهك كمت جلبت بيها : اش اش هوه انتحر بس ما مات لحكت علية اهدئي الناس تباوع اهدئي

وكفت جامدة وتشهك حسيت البنية راح تموت طلبت مي شربتها وكعدت وكفت على راسها : تنفسي مُروج شنو السالفة لو ما انتو مافيا

مُروج : واني شعلية بشغلكم شايفني شايلة سلاحي واكتل بالعالم اني اذا يموت حيوان كدامي انقهر مو بشر يتاذا بسببي ..

- هسه كتلج مابي شي كافي اتنفسي شجاج اخذج للمستشفى؟

دارت وجها تتنفس وحاطة ايدها على كلبها : هسه اصير زينة

سكتنا ثنينا وكملت : مُروج شفت صاحبي شلون تاذا عليج وصل الموت وماهمتة روحة شلون تريديني احبج ، اني عدي سليم ماابدلة بدنيا كلها..

مُروج : اطيني فرصة وحدة اسحاق كل انسان يستحق فرصة بدنيا ..

- ليش مااطيتي فرصة لسليم لعد ؟

- لان الرجال يكدر يزوج اربعة ويحب اكثر من وحدة بنفس الوقت ، بس المرة لو حبت من صدك جيش زلم ما يهز شعره منها ..

- مااكدر اطيج كلمة مروج ، بـﻋـَدين اني وين هسه وانتي وين تدرين عدي عزاء واختي وحدها وعفت الجادر منصوب واجيت ..

- اسحاق لا تضل تهين بكرامتي لان حبيتك وتدوس علية صدكني ترة اوصلك مرحلة تحبني وتركض وراية وما اندار ولا اعبرك

ضحكت مستهزء : منو يركض وراج ؟

قربت وجها مني اليشوفنا من بعيد عبالة تبوسني همست: وحق هذني العيون الاحبهن اذا مااخليك تركض وراية وراح تشوف بعينك منو مروج ..

باستني من خدي وكامت اخذت جنطتها ومشت بثقة عابرتني نزلت الدرج وصعدت بسيارة استغربت شفتها اسوق مااعرف هيه تعرف شخطت السيارة ومشت ..

ضحكت على جراءتها وثقتها مسحت خدي وكمت رحت لسيارة مشيت للبيت واني طول الطريق صوتها وبوستها بجيها كله بعقلي بت ابليس دخلت بعقلي بحركتها هزيت راسي مجاهل الافكار هاي واني احلي بعقلي قاسم وسليم وكلشي ممكن يمنع هل علاقة ..

وصلت للجادر صفيت بالفرع الثاني جاي امشي لفرعنا طبك كدامي سيارتين مشغلات الضوة صار بعيني غمضت وايدي على ؏ـيونَي طفوهن ونزل قاسم منهن ..

كل الي اجة بالي جان مراقب مروجً واجاني بس كال ..

قاسم : اسحاق لازم نحجي

- تمام استاذ تتفضل وياي

- لا اولا البقية بحياتك الله يرحمها..

- تسلم استاذ ..

- ثانيا لو ما الله قسملي اغير طريقي جان مشفتني واكف هسه كدامك .. شوف اسحاق اني من اول يوم جابك سليم واني اعرف المستشفى الجابوك اهلك بيها واعرف من اصغر تفصيلة بحياتك لاكبرها وسليم كذالك ..

بس اني اطيتكم على مايكم لان جنتو عدلين وياي لا غشيتوني ولا لعبتو من ورا ظهري بس لهنا وكافي .. ا سحاق اني قررت اطلع من هذا العالم المظ البشع الجشع .. راح اخذ عائلتي واستقر برة العراق بس اني اعرف ڪُلـش زين ليش قبلت تشتغل عدي

وكونك جنت وفي ومخلص راح اقدملك عرض اخير راح يكون ختام شغلنا

- شنو استاذ

- هذولك عمامك كدامنا .. لو هسه ادز سيارتين مسلحة واعيد بيهم السوة بيكم .. لو انت تاخذ زلم وتخطفوهم وتصفوهم بصحراء وتدفنوهم ..

- استاذ انت اذا فعلا تعرف كلشي يخصني تعرف هذول عدهم عوائل وبنات ..

- لعد انتو مو جنتو عائلة ليش مافكرو بيكم ؟…

_____

يُتبع

الخامس عشر من هنا

تعديل المقال