رواية نارك جنة الفصل الثالث عشر 13

رواية نارك جنة الفصل الثالث عشر 13

فخري : شن أسمك أنتي ..ومن وين تعرفي جنات

مودة : مافيش داعي تعرف .مش ضروري .وخشت بسرعة 

فخري أبتسم : ياريتك قلتي أسمك ممكن كنت فتك ...بس مادام ماتبيش أتقولي ..أنا حطيتك في رأسي 

وقعد ايصب في مية للسيارة ويوتي فيها عشان يبوا يمشوا

سفيان صبا : خلاص زي مافهمتك ..وأنا توا نتصل بيك تمام

جلال صبا امعاه : خلاص تم ..وأنا انراجي منك في مكالمة

سفيان : جنة

جلال ايبحت فيه ومستغرب الاسم ..وجنات طلعت : نعم

سفيان : هيا بنمشوا مازال ورانا طريق ..واتية أنتي

جنات : واتية أنا

سفيان طلع : أنا برا مع فخري ..جيبي شنطتك واطلعي

جنات : سفيان

سفيان نعم

وجلال طلع برا وسيبهم

جنات : سفيان شكرأ لانك طلعت جلال ..ماكنش في داعي والله

سفيان : كيف كنتي تبيه يبقى محبوس

جنات : لا مش قصدي ..بس أنت مازلت تبي منه فلوس اصلا ومشيت طلعته اخرى 

سفيان : طلعته عشانك بس

جنات بحتت فيه بصدمة : همم

سفيان : قصدي عشان تركزي في علاج توفيق ..مانبيش حاجة تشغل تفكيرك اخرى ..وجلال وعدني ايردهن ليا

جنات : اها باهي ...غير اعبى عليه 

سفيان : نعم ؟!!

جنات : شي سلمتك 

سفيان ابتسم وطلع برا

وجنات تلبس وتحكي مع مودة وسليمة ..واطلعن من الدار وجنات اتسلم عليهن قبل تمشي وسليمة زي عادتها اتوصي فيها

مع خشت جلال بكاس لامية : جنات هيا سقدي روحك الراجل يراجى فيك

جنات : هيا اني طلعت

مودة من وراء جنات : خير جلال شن أخبارك 

جلال : اهلااا ..أنتي هنا ..يامئة مرحبا ..وحق ربي نقتلك

مودة انطمرت وراء جنات : لا ورأس جنات ..ورأس جنات ..حرام عليك

جنات افتحت ايديها قدام جلال : خلاص عشان خاطري ورأس جلال ما تكلمها ..سامحها

سليمة : خليها عنك ..كنك أمعاها

جلال وقف : وربي عندك حظ ..المرة هذه طلعتي منها ..مرة اخرى تكذبي عليا انوريك 

مودة : باهي ...الحمدالله ..على السلامة 

جلال : باهي خلاص لمي فمك  ..وأنتي اطلعي بسرعة

جنات تسلم عليهم : هيا مع السلامة

سليمة ومودة يمشوا وراها : بالسلامة ..إن شالله توصلوا طيبيين

وجلال خش عشان يرقد ..نايض بدري طبعا 

جنات ركبت في السيارة ..وطلعوا من درنة ... لكن المرة هذه سفيان هوا اللي يسوق ..وطبعا طول الطريق نظرات في مراية السيارة ..وجنات حست روحها عايشة علاقة مع سفيان وبادية فيها من جديد 

فاتوا نص المسافة من الطريق ..وسفيان فونه ايرن ..لاقها نصراء 

سفيان : ايوا

نصراء : نعم ..شن اخبارك ..باهي حصلتك ..روحت والا مازلت في تونس

سفيان : تمام ..لا روحت في الطريق لبنغازي

نصراء : تمام الحمدالله على السلامة ..شن صار امعاك

سفيان : في شنو

جنات اتبحت فيه عادي ..تسمع في صوت بنت بس مش عارفة من تحسابها صالحة

نصراء : قصدي مش أنت ماشي مراجعة على اعيونك ..شن صار ..في أخبار طيبة

سفيان : لا تمام ..تعرفي مش وقت كلام توا قاعد انسوق ..انكلمك مرة أخرى

نصراء : باهي تمام براحتك ..والحمدالله على السلامة

سفيان : الله يسلمك

صكر سفيان وفخري سأله : من ..صالحة ؟!

سفيان : لا ..نصراء

جنات طبعا مجرد ماسمعت أسمها ونار في قلبها 

فخري : أكيد عندها العلم من معتز 

سفيان بحت في جنات وهي برمت وجهها  : أكيد

سفيان ايسوق ويبحت فيها في المراية ..يده على فمه ..ويبحت لكن جنات اقلبت عليه ومعاش بحتت فيه ..وهو عصب منها 

قبل المغرب بشويا ..نزل سفيان على محل وشراء عصير وشكلاطة وامية ..وركب ..وطلعوا من جديد ...ومد لجنات وهو يسوق لكن جنات : لا مانبيش شكرا 

سفيان : جنة أخذي ..من بدري ماكليتي شي

جنات : مانبيش ..ماعنديش نية في شي 

سفيان عض على فمه ..وطلع يجري بالسيارة ..كان معصب من جنات كيف اتفنص فيه ..ورافعة خشمها عليه 

بعد وقت اخرى وسفيان يجري بالسيارة ..سمع حاجة طربقت بصوت عالي ...هدأ سرعة السيارة اشوي اشوي ..لعند وقف عند محلات ..في مدينة قبل بنغازي

نزل سفيان وفخري ..لاقى العجلة مفلوقة 

سفيان ضرب السيارة برجله ومعصب

فخري : ساهلة مش مشكلة ..توا انغيروها

سفيان متنرفز ومشى فتح شنطة السيارة ..نزل العجلة والكريك وجاء لعند فخري ..

سفيان : اهو أمسك ..بسرعة لليل..تعال ساعدني

فخري بحت في سفيان وتنهد : تعرف الكريك هذا ماينفعش ..امبلد ..يبرم وخلاص 

سفيان بحت في الكريك في يده : شن تحكي فخري ..من جدك أنت ..كيف تطلع بسيارة مسافة طويلة من غير كريك ينفع

فخري طبس ايحك في شعره : ناسي عليه بكل ...قلت توا انغيره ..ومعاش تفكرته

سفيان ينفخ وزاد عصب : من جدك ياراجل 

..و عدا شور السيارة وكل مايبحت في جنات تبرم وجهها عليه 

فخري : مافيش مشكلة ..أكيد انحصلوا من اي حد من المنطقة

سفيان : وقت مغرب فخري ..حتى المحلات امصكرات من وين بتجيب 

فخري ايبحت وشاف محل ملابس فاتح وفي شاب امقمعز قدام المحل : اهو في شاب ..خلي انشوف عنده

سفيان ايفنص في الشاب ومش عاجابه كيف يضحك : تي شكله سنكوح فكنا منه الزح ..قاعد يسهوك من اول مانزلنا 

فخري : خلينا نسألوه مش خاسرين شي ..مافيش قدامنا الا هوا

فخري شير لشاب عشان ايجيهم ..وسفيان قاعد ايفنص فيه

فخري سلم عليه : خير ياشاب شن اخبارك

صدام : تمام ..تفضلوا

سفيان قرب منه : لو سامحت ..العجلة انفلقت ..وماعنديش كريك ..تقدر اتساعدنا

صدام ايديه في جيوب السروال ويبحت في السيارة و يضحك ;مش منها السيارة عجلتها تنفلق تجارو بيها تي من نهاية الشارع جت طايرة اطيارة

سفيان عض على فمه من اسلوب صدام المستفز : شوف مستعجل والدنيا لليل..ماعنديش وقت لابصارتك ..عندك كريك والا لا 

صدام : تي منيلي 

سفيان برم معصب وقرب من فخري : تفاهم امعاه أنت ..أنا اشوي ونضربه راه

فخري : أسس شن تضربه ....وقرب من صدام

فخري : باهي ماتقدرش اتساعدنا .نحنا مش من هنا ومازال طريق طويلة

صدام ايشوف في سفيان كيف معصب ويبي ايعصبه بزيادة  صدام ضحك:معقولة امعاك سيارة كيف هذي وماامعكش كريك

سفيان برم معصب وقرب من صدام ..وفخري جاء بينهم : عندك كريك والا لا ..فكني من السهوكة 

صدام:نسهوك اسمع راه امس كيف مشتغل مانبيش انروح الباتي بعركة من ثاني يوم

فخري : وسعوا بالكم شن صار ..عركة شن دوتها ...وأنت ياشاب عندك كريك او لا

صدام ضحك:مش تقعد عندي سيارة قبل بيش يقعد عندي كريك

سفيان هد عليه : حول اطلقني عليه ..حرقلي دمي 

فخري مسك سفيان واسحبه للسيارة ..وجنات اتبحت فيهم وحست الجو مش تمام شكلهم متعاركين

صدام : 

مع توقيفة سيارة قدام سيارة سفيان ونزل منها واحد : اوووه صدام

صدام : اوو يارفقة شن جوك

سعد : تمام يارفقة

سعد:خير ياشباب.كنها السيارة

صدام مشى شور سعد : شوفوهم شن يبوا ..أنا بنمشي انصلي المغرب

سعد ضحك : إن شالله خير من امتى اتصلي 

صدام فنص فيه : تسكت فضحت بينا الزح 

وعدا صدام للجامع وسفيان قرب من فخري : مش قتلك صايع وسنكوح

فخري : اششش

وعدا قرب من سعد : نبوا كريك ياشاب ..انحصلوا عندك ..غير اللي امعانا ماينفعش

سعد يفتح في شنطة سيارته : اوصلتوا ..مايهمك شي

وبدأ سعد وفخري ايغيروا في عجلة السيارة ....وسفيان قرب من روشن جنات ودق على القزاز

جنات نزلت القزاز : نعم 

سفيان طبس عليها : كنك ..شن صار ..عليش قالبة وجهك عليا 

جنات : هذا وجهي من يوم تزوجنا ..مافيش جديد 

سفيان : جنة ماتخلينيش انعصب عليك توا ...شن في ..ماكنتي تمام وجوك رايق ..شن صار وعصبك

جنات : شوف الشباب شكلهم كملوا ...نحكوا في الحوش 

وصكرت القزاز ..وسفيان يبي ايموت منها ..وفخري سلم على سعد واشكره عشان ساعده ..وغسل ايديه وركبوا في السيارة
وكملوا طريقهم لعند بنغازي ..وجنات بنفس الجو مع سفيان ..بس هو معاش حاول يحتك بيها ..حتى معاش بحت فيها ...وصلوا للحوش ونزلوا كانت قريب الساعة تسعة ونص ...عشرة الا

***********************

خشوا للحوش وامعاهم شناطيهم ...ومنى كانت مع توفيق ..وصالحة كانت مع سليم ...وملاك في دارها ...نزلت صالحة تسمع في صوتهم ..واول ماشافتهم جت تجري اتسلم عليهم

صالحة : الحمدالله على السلامة ..ليش ماقلتوا تبوا اتجوا اليوم 

فخري : عارفة سفيان مايحبش ايخلي حد ايفكر ومنشغل ..ماحبش ايقول لعند انجوا

صالحة : باهي المهم روحتوا بالسلامة ..شن اخباركم

جنات اتبحت في فخري وتضحك : الحمدالله بخير

صالحة : شن اخبارك شيباني ..شن قال الدكتور ..مازال نفس الكلام 

سفيان بحت في فخري مبتسم وقرب من صالحة : مازلتي دبدوبة نفس زمان

فخري ضحك وصالحة اتبحت فيهم : كنكم 

فخري قرب من سفيان وحط ايديه على اكتوفه : صلوحي سفيان دار عملية ورد ايشوف كيف قبل

صالحة اتبحت في سفيان ومنصدمة : تكذب ..والله جديات ..سفيان كلام حق ..أنت اتشوف فيا 

سفيان هز رأسه اها ...وصالحة قعدت تبكي ..وجنات قربت منها ضمتها : الحمدالله ياربي ..مش مصدقة اعيوني ..سفيان تحكوا جد ..راكم تقعدوا اتبصروا 

سفيان : وربي انشوف فيك ...ومازلتي زي مانعرفك زمان 

صالحة ضحكة بدموع ..وجنات تضحك ..وطلعت ملاك من دارها على صوتهم : صالحة من جاءااا

ملاك جاته تجري : شيباني حبيبي 

سفيان ضمها وبأسها على رأسها ومسك وجهها بين ايديه وقعد ايبحت في ملامحها : كبرتي ملاكي

ملاك اتبحت فيه ومنصدمة وصالحة قربت منها : ملاك سفيان رد ايشوف ..دار عملية وانجحت وقاعد ايشوف كيف قبل 

ملاك : والله صاح  شيباني اتشوف فيا توا ..قولي والله مش مصدقة 

سفيان ضمها : انشوفك فيك يا احلى ملاك

ملاك وخرت اتبحت في اعيون سفيان ..وهو رفع وجهه ايبحت في الحوش ..بحت في كل مكان ..كان امرايف عليه ..رغم الذكرايات الصعبة اللي فيه ..بس هنا تربى سفيان وهنا عاش طول حياته

سفيان تنهد وبحت في ملاك : شن اخبار سليم ..راقد

صالحة : لا توا كنت عنده مازال نايض ...بس تعرف والله فقدك سفيان ..كل مايخش عليه واحد يرفع اعيونه يحسابه أنت 

سفيان عض على فمه ..ورقى يجري مع الدروج ..مشى فتح باب دار سليم وخش ...وسليم على طول قعد يضحك ويمد في يده لسفيان عشان ايبوسها
وسفيان قعد جنبه على السرير يلعب امعاه 

جنات شالت شنطتها وترقى مع الدروج وصالحة وملاك امعاها ...صالحة : شن اخباركم

جنات : تمام

صالحة : حسيت سفيان نفسيته أحسن والا لا

جنات : اها ..ماشفتيش كيف فرح بعد شاف اول مرة في تونس ..انقلب لشخص ثاني بكل

صالحة : قصدك رد لطبيعته

جنات بحتت في صالحة : قصدك هوا كان هكي من قبل

صالحة تنهدت : كان أحسن من هك ..بس الظروف خلوه يتغير

جنات وصلت عند باب دارها : اي ظروف

صالحة : للاسف ممنوع نحكي في الموضوع ...بس بصراحة سفيان زادت عصبيته بعد قصة توفيق

جنات طبست مقهورة وتنهدت : حايجي يوم وحيرد للطبيعته مادام غيرنا الظروف بس

ملاك : شنو جبتوا من تونس 

جنات : سفيان شرالك حاجات واجد ..أكيد بعد يطمن على سليم توا ايوريك

ملاك : نمشي انشوفه ..رايفت عليه

صالحة : خشي تريحي في دارك ...تعشيتوا والا اندير عشاء

جنات : نبي ندوش توا ...ماعنديش نية

صالحة : براحتك ..نبي انشوف سفيان وفخري 

افتحت باب الدار وخشت ...قمعزت على سريرها اتفكر في مصير علاقاتها مع سفيان ...هل حيرد كيف من قبل ..والا يبقى اكويس امعاها 

خذت دبش وخشت تدوش

************************
سفيان امقمعز جنب سليم ..وخشت عليه ملاك ..وبعدها جت صالحة ايهدرزوا امعاه ..مع طلعت منى من دار توفيق ..لاقتهم يحكوا ويضحكوا خشت عليهم

منى اتبحت في سفيان : الحمدالله على السلامة ..روحتوا

سفيان : الله يسلمك

صالحة : منى ...سفيان دار عملية ورد ايشوف 

منى بحتت في سفيان بصدمة : صااح 

سفيان صبا : صاح 

منى زمطت : باهي الف مبروك

سفيان مشى شورها : ايبارك فيك ..توفيق نايض

منى : اءاء ..قاعد مازال نايض 

سفيان : نبي انشوفه

وطلع خش على توفيق ..اللي كان راقد ...قرب منه ..وبحت في وجه ..كيف رايح ناقص ..والمرض امأثر عليه 

سفيان طبس عليه : كيف حالك توفيق

توفيق : تمام

سفيان : شن وصلك للحال هذا توفيق

توفيق بحت في سفيان وطبس 

سفيان : توفيق من دار فيك هكي ...ليش مرضت وتعبت ..من السبب توفيق

توفيق ايبحت في سفيان بخوف ويبي يحكي
منى خشت من برا : السبب مرأتك سفيان 

سفيان التفت عليها : إن شالله تطلع منها هيا 

منى : ليش عندك شك ...كل شي قاعد واضح سفيان ..والدلائل بين ايديك ...والا عرفت تضحك عليك في تونس بكلمتين 

سفيان قرب منها بعصبية لعند لاصقت في الباب : اعرفي شن اطلعي من فمك خيرلك ..ماتخلينيش انردك وين ماكنتي 

منى خايفة منه وترجف : ماقلت شي أنا 

سفيان بحت في توفيق وقرب من منى : خلي بالك من خوك بس ..الباقي مالكش فيه 

وطلع وعدا لداره ..عشان يدوش ..ونزل بعدها ..كسد مع صالحة وفخري وملاك ..تعشوا وعطاهم الهدايا

سفيان : وين جنة

صالحة : في دارها ..قالت ماعندهاش نية تأكل توا

سفيان هز راسه من غير مايتكلم ...بعد العشاء كل واحد خش في داره ..وسفيان مشى راقد جنب سليم لعند رقده

جنات ادوشت ..ومشطت شعرها ونظمت شنطتها .. ..ومقمعزة اتفكر ..بعدها حست بجوع ..كانت لابسة روب قطني لونه وردي كت ولعند فوق الركبة ..لابست ديشمبر ..ونزلت بالشويا لعند المطبخ ..الجو هادي كلهم مرقدين ..فتحت الثلاجة ..وادور في حاجة تاكلها ..لاقت حافظة ..طلعتها وجت عند رخام المطبخ ادور في كشيك ...وحست واحد خش عليها ..التفت لاقاته سفيان 

لابس توتة سوداء وطالع ايجنن ..شعره نازل على وجهه مش كيف ديما يمشط فيه فوق ..جنات قلبها ايدق بسرعة وانحرجت منه

سفيان واقف على الباب : ليش اتحبي اتعاندي وخلاص ..مش كنتي جيتي تعشيت امعانا بدال ماتطلعي بالسرقة نص الليل 

جنات برمت شوره : ماكنش عندي نية ..وتوا جعت شن المشكلة يعني 

سفيان ايبحت فيها ..شعرها مبلول ..الديشمبر مفتوح ..وجسمها باين .. قرب منها وجنات وخرت على المرمرة 

سفيان قرب منها لعند لاصق فيها : احكي شن صار وخلك اتعصبي مني ..ليش تغيرت تصرفاتك بعد مكالمة نصراء 

جنات : شن دخلني بيها ..اتكلمك او لا ..مليش دخل بيها او بيك 

سفيان حط يده تحت الديشمبر وشد خصرها وطبس عليها قرب وجهه من وجهها : قصدك أنا مانهمك في شي ..وأنتي ماتغاريش من نصراء 

جنات ادف فيه : حول سفيان ..باعد من عليا ..شن تبي مني 

سفيان حط ايديه لاثنين على خصرها وشالها قمعزها على الرخام ..وقرب منها خش بين رجليها ..يده في شعرها المبلول من لاوراء شده وقرب وجهها من وجه

سفيان ايحرك في خشمه على خدها : نبيك جنة ..قتلك من قبل أني نبيك مراتي

جنات اتقاوم فيه لكن هوا شدها ليه بالقوة : وأنا قتلك مانبيش انكون مرأتك وأنت شاك فيا ..ومش مصدقني

سفيان رفع وجهها وبحت فيه : يعني أنتي ماتبينيش ..ماتبيش اتكوني مراتي ..أنتي ماتبيش سفيان جنة

جنات زمطت وقلبها وجعها كان في خاطرها اتقوله حتى أنا نبيك زوجي ونبي انعيش امعاك لاخر عمري ..بس جنات كانت خايفة منه ايكون يضحك عليها عشان ياخذ اللي يبيه منها ..ويرد سفيان القديم

سفيان حط يده على خدها : ردي جنة ..قوليلي شن تبي

جنات دفاته بيديها : نبي نمشي للداري ..نبي نرقد سفيان 

سفيان عصب منها ..وخر عليها ونزل ايديه : براحتك ..مانبيش نغصبك على شي 

جنات بحتت في وجه ونزلت من فوق الرخام ..وطلعت من المطبخ بسرعة ..ورقت فوق ..خشت لدارها ..وصكرت الباب ..وانزلت لوطى على الارض تبكي .. اصعب شي اتكون مخيار بين حاجتين وماعندكش ثقة في خيارك ...وتفضل انك تنسحب بقلب مكسور 

سفيان رقى بعدها ..وطول وهو يتمرن ..وبعدها طاح رقد

مرن كم يوم من غير احداث ..والجو بين سفيان وجنات متوتر وجنات ردت تهتم بتوفيق اخرى 

لعند يوم الصبح جنات طلعت من دارها ..ونزلت فطرت امعاهم ...وبعد الفطور مشت للمطبخ لاقت فخري

جنات : تبي تطلع شكلك

فخري : اها عندي شغل

جنات : سفيان طلع

فخري : لا قاعد في مكتبه ..قالي نستنى في واحد

جنات : من ؟!!

فخري : مش عارف 

جنات بحتت فيه وابتسمت لانها عارفة فخري يعرف كل شي ايخص سفيان

جنات تبي تطلع وفخري نادها : اسمعي نبي نسألك

جنات : نعم

فخري : نبي نعرف من البنت اللي امعاك يومتها

جنات : اي بنت ؟!! ..اااها قصدك مودة 

فخري ضحك وطبس : اسمها مودة 

جنات : نعم ..ليش تسأل 

فخري : عادي يعني نبي انتعرف عليها ..تقدري تساليها ..نبي رقمها

جنات : حاضر توا انشوف ..مع ان هيا خوافة بكل مش عارفة شن اتقول 

فخري : ليش اتخاف نبي انهدرز امعاها بس

جنات : خلاص توا نسالها وانرد عليك 

فخري : تمام ..نستنى فيك ..لوطى

طلعت جنات فوق وكلمت مودة تسأل فيها ...ومودة في البداية خافت وانحرجت ..لكن جنات قالتلها فخري شاب اكويس شوفيه ..مش حتخسري شي ..مجرد مكالمة بس

وافقت مودة ..وجنات خذت فونها وانزلت لفخري لوطى ..عطاته النقال ياخذ الرقم ..ومشت للمطبخ تبي تغسل مواعين الفطور ...انكب من الفطور على دبشها ..رقت فوق اتغير فيه

سفيان نزل لاقى فخري يبي يطلع : وين ماشي

فخري : عندي شغل ..ليش تبي شي

سفيان : لا أنا ابروحي نبي نطلع انمر على العمال في المزرعة ..بعد اشوي

فخري : تم يا شيباني ..أنا طالع ..اي شي رن عليا

سفيان : تمام

طلع فخري وسفيان يبرم في الصالة ..وجاء قرب شاف جنات في المطبخ لكن هيا مش قاعدة ....رد قمعز على كرسي في الصالة ..يستنى في واحد يبي ايجيه

اشوي ورن فون ..سفيان ايبحت تليفون جنات على طاولة الاكل ...رن اول مرة ..ماعدلش ...المرة الثانية ..صبا ومشى شوره ...لكن ماطقش في المكالمة ..رفع الفون وتوصل رسالة
سفيان على طول فتحها
ورقى بسرعة فوق 

ملاك طالعة من دارها . واتصور في روحها سلفي ..وتمشي واتحكي ..وطلعت من الباب لجنان ..خبطت في واحد وطاح فونها

ملاك : اهييي فوني  شوف قدامك 

جلال : والله أنا انشوف ..أنتي وين اعيونك 

ملاك رفعت فونها الشاشة منكسرة 

تنفرزت وفنصت فيه : تريحت توا اهوا تكسر 

جلال : تشري واحد غيره شن المشكلة يعني 

ملاك : أنت من اصلا ..وشن جابك هنا 

جلال عزق الصاكو اللي شايله على كتفه وبحت فيها : جاي لحوش أختي عندك مانع 

ملاك بصدمة : أختك من 

****************************

سفيان رقى معصب فوق خبط الباب وخش على جنات اللي كانت اتغير في دبشها ..وانفجعت  وقربع الباب بعصبية

جنات : كنك 

سفيان قرب منها ومسكها من يدها ودفها على السرير لعند طاحت عليه ..ورقى على السرير ..ورفع فستانها فوق و.. 

*******نهاية الحلقة

الرابع عشر من هنا 

تعديل المقال