رواية الهجرس الفصل الثاني عشر 12 بقلم رواء هادي
وره فترة قصيرة طلع الكل بقت بس حنونه بقيت اباوعلها بحسرة وقهر بقلبي راحت سدت الباب ورجعت قفلته استغربت تصرفها اندارت علية مبتسمة
_فرقدي حبيبي مشتاقتلك
_بعد وقت تشتاقيلي
_والقرآن الكريم مشتاقتلك كوماااات فرقدي
_لو صدك مشتاقتلي جان اجيتي لعندي ركض وسألتي مو هاملتني هي الهملة وماتقتربين صوبي روحي
حنونه مالي خلك أريد أنام
_والقرآن جنت أخاف
_تخافين مني انا
_لامو منك من الجنية سل
_بطلي أعذار الغريب أحسن منج طلع
_لافرقدي لتكول هيج ...بالقرأن احبك وأموت عليك بس شسوي أخاف وأنت ماتعرف شسويت البارحة وشلون زرعت الرعب بقلوب الكل مو بس انا
_شسويت ؟
اقتربت لعندي صعدت فوك الجرباية بدون كلام دحست نفسها بحضني وحضنتني قوي مابادلتها بقيت مكتفي بالنظر وأريد جوابي على سؤالي .
_ احجي شسويت البارحة ؟
_تخبلت اخبال وتهدد تنتقم مني
_عليش انتقم منج ؟
_علمود علكت قرأن كريم من تخبلت
_وهاي شوكت تخبلت ؟
_آخر شي تذكره شنو جان ؟
_بوقتها اجيت من الصيد وره الأذان وشفتج بالمطبخ جاي تطبخين بالعشا ودزيتلج بوسة بالهوى .. هذا
آخر شي اتذكره
_والله
_اي والله هذا آخر شي اتذكره بعد ماعرف شصار ماصار
_ تذكر شلون تعاركت ويه سلسبيل وحدة ضربت الثانية
_هاي شوكت تعاركتوا ؟
_وره العشا من رحتلها أنت أول ماجيت من الصيد
_شنو ؟!
_ اي والله
_شصخم رايح لبت الناس ولج احجي شسويت ماسويت البارحة وسلسبيل ليش راحت لبيت أهلها مو أكون
تبقى عدنه منا لعرس أبوي
_تحلم بعد تشوف وجه سلسبيل هنا
_ليش؟
_حلفت بعد ماتوصل لهذا البيت
_حنونه احجي شصار سويت انا ولج احجي ؟
_ أنت تخبلت
_اي وسويت ؟
_كمت تصيح وتعيط وتضرب هذا وهذاك وهي هم انضربت منك وانا هم ردت تضربني بس شردت وجدي كالي علكي قرأن كريم وسلسبيل من شافتك
تخبلت كال مستحيل أبقى بهذا لبيت لبي واحد مخبل مثل هجرس...وتعرف شكالت بعد
_شكالت؟
_كالت هذا دواه مصح للأمراض العقلية لتخلوا بالبيت خطر عليكم وانا ماسكتت الها وتعاركت وياها وطردتها من البيت كتلها انا قابله بي أنتي شعليج بعد
تحجين من يمج .
حضنتها كل قوتي ...وبستها برأسها فرحان علمود دافعت لي كدام سلسبيل هي هم بادلتني الحضن وبقت تبوس بي وتحجيلي على سلسبيل تكول وحدة
خبيثة جانت تحجي عليك وتسوي روحها بريئة كدام جديتي وتسأل عنك وهي تريد تشمرك بالمصح الأمراض العقلية ضجت منها أخاف غيرت نظرتي الها
بالاونة الأخيرة اما الآن رجعت نظرتي لها مثل قبل 'تصالحت انا وحنونتي حبيبه قلبي ونفس مالتي ثلاث أيام يله كدرت أداوم بعدني تعبان وصداع ملازمني
مايحل عني بس الحمدلله والشكر مرتاح لا اكو احجي وياي ولا اخترش من شكل هجرس ولا انبهر بجمال
سل الجنية
أجاني ياسر وكال ابن رجل الخلفتني محكوم ١٥ سنة لزمتني هستيريا مال ضحك ماكدر اوكف ضحك من الفرحة وأخيرًا راح تنذل الخلفتني من رجلها .
لأن الخلفته شال ابنه الواحيد وشمره بالسجن وابن خالي نقل لغير سجن بعد التحقيق ويا هناك راح يتكفلون بكل الإجراءات المطلوبة للأسف ماكدروا يسوون
شي عدنه كافة الأدلة علية "وتسجيل عترافاته وانا كل يوم جايني تهديد شكل من أهل الخلفتني الا نموتك والا نكسرك وانا مطنش الكل ولا معبرهم .
أعرف بيهم بطرك الكلام ويخافون يقتربون صوبي يدرون بجدي موسى وساطة عالية عنده بالدولة وكل العالم تعرفه وتحترمه ويعرفون بي يحبنه
ويعزني ومعزتي غير معزة الكل عنده وبس ياذوني يهدم ابيوتهم فوك روسهم .المهم صادف يوم حنة أبوي اجوي اهل سلسبيل اعيوني تدور عليها ماكو مالها
أثر الكل جاي حتى محمد وعائلته ولا هي مالها طك سألت جديتي حلوة عليها ردت امها وكالت " بقت يم
بيت عمو شاكر
حلوة_شلون تأمنون تعوفوها بيت العالم ؟
امها_عمو شاكر مو غريب من الأهل وماعنده اولاد كل اولاده مزوجين وعازلين بس عنده ابنية وبعمر
سلسبيل وهي وياها ربع
حلوة_حتلوه الحذر يغلب القدر
امها_ماكو داعي أخاف عمو شاكر يحبها مثل مايحب بته ومرته ماري كذالك تموت عليها ناس
اوادم وذرة مال الله
حلوة_ماشي
رجعت للغرفة ... شفت حنونه مجهزة روحها ولابسة فستان أزرق طويل لابسة كعب طالعة طويلة ضحكت رفعت
حاجبها مستغربه ضحكتي
_تضحك فرقدي؟
_ياروح فرقدج ولج شنو هذا الطول
_ليش جنت قزومة تشوفني
_ههه من اشتعلت صفحتك ياسر غير جنتي
قزمتي وابنيتي هههه
_تره أزعل لتكول قزمة
_قزومتي لاحبها ولاموت عليها انا
_لاااا مو قزمة
_شو تعاي ام زعيله ماحب انا المره لتزعل وتموع تعاي
_ماا زعلت بعد
_اوووف
_انا موقزومة وطولي هاهية
شلتها بأثنين أيديه صارت اطول مني "
هههه وهاي صرتي اطول مني ومن
الخلفوني ههههه
_فرقدي نزلتي
_مانزلج وراح اطلع بيج هيج واكول للكل قزومتي طالت وصارت اطول منكم هههههه
_مااا نزلني فرقدي نزلني وين ماخذني ااااه نزلني ولك عيب مناك الخطار لعدنا .. نزلني ولك نزلنييي
_لتضربين ام عطوب
_اكطع اعطوبك احسلك نزلني
_انزل بس بشرط
_شنو شرطك ؟
_بوسة واكون طالعة من كل قلبج
_هاي وين لكيتها طالعة من كل قلبي ؟
_ماعلية انا بعد
_فرقدي شنو هاي
_شنو ؟
_شرطك ؟
_شبي ؟
_اووف نزلني
_ماا بوسة من كل قلبج لو اخذج واطلع وتدرين بي مخبل ماكو عقل برأسي واسويها صدك وهاا
اطلع كدام جدي ههه
_لااااا تعال خل ابوسك
جرت رأسي وباستني بوسة طويلة بعد وكالت"
وهاي بستك من كل قلبي
_أصلا مابيها طعم ولا حسيت بيها عيديها يله
_فرقدي شنوووو عيد ...باع شفايفك كلهن حمرة صاروا وتكول ماحسيت بيها
_والله ماحسيت بيها عيدي يله
_اووف تعال
عادت البوسة مرة ثاني وهم كتلها ماحسيت خبلتها خبال خليتها تبوسني فوك العشر مرات يله نزلتها وراحت مسحت حلكها وكفت بصفها حلكي كله حمرة حمرة دم
جريت الكلينس وصرت امسح بشفايفي "
وهاي مسحتها الج لتخلينها بعد
انداريت عليه "
شنو ؟
_لون الحمرة ماعجبني لتخلي هاج خلي من هاي حلوة
برطمت شفايفها بزعل "
ماا أحبه
_وانا ماحبه يله كبد مسحي وخلي منها هاي تطلع شفايفج حلوات
_جيب ابو دودة
_غير امريتي حبيبتي ويحقلي أغار عليها
اخذت الحمرة من أيدي رجعت.... بستها بوسة طويلة ام الطكة ضحكت عفتها وطلعت يم الزلم بالمظيف بارق متعارك ويه عيدان ورعد صايرين
ملخ من الروس جدي هايض بيهم ورايد يكتلهم بعد ماعرفت سالفة عليش متعاركين ؟ سألت كالوا هيج شغلة تافهة ماتسوى تعاركوا علمودها .
_ها بارق شبيك
_انعل ابوهم يابو الخلفوهم ولد القنادر ...
_هوووب عزيزي راح تعبر على الترابي ..كول شكو شبيك بختصار مو إلا تشعل اهل
اهلهم بالشتايم
_انعل عرضهم
_لابشرفك عرضهم عرضك هههه
_كافي هجرس تره لبي مكفيني
_شبيك ؟ منو محاجيك
_وتالي هجرس
_اشيل اعيوني وانطيهن الك بعد شتريد ابو التالي
_استغفرالله
_تعال وين رايح
_للكبور السودة رايح
_ولك تعال فهمني صار بينك وبين الربع
_هذولة ربع الهجارس
_قصدك ربعي ؟
_والله ربعك موربعك بعد من اليوم لا اعرفهم ولايعرفوني هذولة انغولة
_لابشرفك سويت ولد عمامك انغولة
_ولد @$%%@....
_هوووب هوووب ولك عبرت الترابي ودخلت بنص البيوت وخليت الكل تطافر ههههه
_جوز منييي
_اويلي يابة المحرك حامي اليوم على كيفك يمعود
لايكوم ههه
_هجرس كافي كافي الخاطر الله
_وجعععة من الله شبيك انكرصت
_اكرههم والله اكرههم واموت من عدهم
_اي وانا شعلي
_ جوز مني
عافني وراح حامي فووول والكل ملتهية بالحديقة جاي تجهز للحنة النسوان راحوا يحنون العروسة من وقت لان الطريق طويل لما يوصلون بيت العروس يطول فوك
الساعة ونص وانا مارحت
رحت لبيت عمي فواز كابلت بارق وكعدت أريد أراضي واجيبه لعندي خطية واحبه كلش هذا لعزيز مالتي ورفيق دربي كعدت بصفه خليت
أيدي فوك جتفه هو مطنكر وزعلان "
من عمت عينك تخلي النغولة على كولتك تحبسك بالبيت مثل النسوان وهم يسرحون ويمرحون
بنص المضيف
_لتذكرني
_دحجي شسوولك؟
_تقبلها رايحين كايلين لأبوي خابر كحاب وافتح كاميرا واسوي شغلات غير أخلاقية
_هاي شوكت صار هذا الحجي
_ قبل لا نتعارك بساعة
_هذولة يتهموك بشرفك ..ولك كوم خل اروح انعنع ضلوعهم الالك وخليهم مثل الجلاب
يعترفون لابوك كووم
_وين
_للمظيف اليوم اسويهم صدك تخابر كحاب كوم يله جم مرة كلتلك خليك سبع ولاتخلي الجلاب تنبح وراك وتخوفك دكوم عاد مو شلعت قلبي كوووم
جريته من أيده وكومته "
شراح تسوي هجرس
_اخليهم يبوسون القنادر يله
_دخيلك راح تكلب عرس ابوك فاتحة
_وان يكن
_هجرس اكعد راحة ادري بيك تخرب عالحنات اكعد خل يولون لتكبر راسهم
_هذا مو تكبير راس هذا تأديب يله وراي
طلعت قبله حامي عليهم الله أخرب على رب المشاكل وراح اوصلها الجدي موسى من زمان مامتعارك ومخبث عليهم وهاي اجت الأيدي اليوم
بارق يمشي وراي ويتوسل وصلت .... حديقة المظيف شفت رعد وعيدان كاعدين مخلين رجل فوك رجل واحد مكابل الثاني ويضحكون
صحت من مكاني "
رعد عيدان وراي للمظيف
رعد _خيرك ؟
عيدان _ شكو شتريد هجرس
هجرس_تعالوا وراي وراح تعرفون
عيدان _كوم رعد خل نشوف شيريد
رعد _يله
دخلت للمظيف دخل.... وراه بارق جان المظيف كله ولد عمامي وعمامي الصغار كاعدين أصغر عم
عندي عمره ٣٥ سنة .
دخلوا واحد واكف بصف الثاني كعدت بمكان جدي موسى بنص الديوان خليت رجل فوك رجل وباوعلهم الكل شك بالموضوع تدخل عمي
أيهم الصغير " كعتك ماتبشر هجرس ؟
هجرس_ كل كعداتي بمكان جدي ماتبشر ..هاا ولكم شلونكم اخباركم سمعت لاكفين بارق يخابر بنات ويسوي شغلات غير أخلاقية عالتلفون شوكت لكفتوا بله ؟
يله احجوا شبيكم ساكتين ؟
أيهم _ ماتوقعت منك يابارق
بارق_ جذابين هم فتروا عليه علمود ماخليتهم
يصيدون سمج من الحقل
هجرس_وهم شوصلهم للحقل ؟
أيهم _مو عدكم حقل شجابكم على حقل هجرس
ابو حسن _ ابوي مو قسم الكاع وكلمن وكاعه شكو داخلين كاع هجرس وتصيدون من حقله هو داخل كلعكم
متصيد من حقولكم
بارق_اصلا يبوكون بالحقل ويبيعون
هجرس_اي كمل بارق
بارق_اكثر من مرة لكفتهم الفجر وتعاركت وياهم ومافاد كتلهم اليوم اوصلها لجدي ولالك هم سبقوني وتهموني بهاي التهيمة الباطلة علمود
من اكوللكم يكولون جذب جاي يفتري علية
علمود فضحنا
أيهم _بارك الله بيكم
رعد _جذاب جاي يطمطم على سالفته
عيدان _وشنو دليلك احنا نبوك بالحقل
هجرس_ وأنتو شنو دليلكم بارق يخابر كحاب ويسوي أشياء غير أخلاقية عبر التلفون ؟
رعد _ماعدنه بس شفناه
هجرس_ بارق عندك دليل
بارق_اي عندي أكثر من تصوير
هجرس_راوي دليلك خل نشوف منو الصادك ومنو الجذاب بيكم حسن عزيزي كوم صيح لجدي خل
يجي يحل الموضوع بنفسه
كام حسن وكال "
هسه
باكوا طن هوى كلمة وحدة ماطلعوا فتح التلفون بارق راوني تصوير شلون يطلعون بالشبج من الحقل وكله سمج أبتسمت بخفه رفعت عيني
باوعتلهم واحد بصف الثاني واكف ويرجفون من الخوف
دخل جدي وصاح " شكو شعدكم ؟
التفتت على جدي بالباب واكف رفعت أيدي له "
تعال جدي شوف بعيونك منو حرامي
حقل ومنو الجذاب
جدي_ياحقل؟
أيهم _حقل هجرس وتهام بارق باطل طلع
جدي_ شمدريكم
هجرس_تعال وشوف بعيونك واحكم بعد
جدي تفضل استريح
كمت من مكانه كعد كعدت بصفه انطيته التلفون شاف المقطع الفيديو وسعت اعيونه رفع رأسه باوع لرعد ولعيدان واحد بصف الثاني واكف
جدي _ هم حرامية وهم جذابة
رعد _والله عيدان كالي خل نبوك الحقل ونتهم بارق بهاي السالفة علمو...
عيدان _جذاب مو أنت كلتلي تعال نبوك الحقل
رعد _جدي بالعباس ابو فاضل هو ورطني انا مالي دخل
عيدان _فوكاها تنكر ياكلب
رعد _والله أنت الكلب هم تورطني وهم تنكر
جدي _ تعالوا
رعد _ شراح تسوي
جدي_تعالوا اكوووول
اباوعلهم كوة كاتم ضحكتي بارق .....خرب من الضحك منطينه ظهره ويضحك فطير اقل زلة يكلبها فرجة تقدموا كدام جدي كام جدي
وماشاء الله على جدي طويل وطوله هيبة رخه ايده وضرب رعد راشدي شمره بالكاع رعد ضعيفون اضعف من بارق وايده تكسر رجله
وعيدان سمين وقصيرون جابه براشدي من ضربه كبيت من مكاني صوت الراشدي مو طبيعي جان رجع صاح برعد " كوووم كلب ابن الكلب هم حرامي وهم تتهم ابن
عمك باطل انعل ابوكم يابو
الخلفوكم على هاي سوايتكم صيحوا الجاسم ولجدوع خل يجون يشوفون عمله ولدهم ..
كام رعد لازم خدة رجع جابه براشدي ثاني كلت تخربط ورجع عيدان هم جابه براشدي انوب ستلمهم كدام الكل كتل طيح حظهم كلمة وحدة ماطلعت
بقيت اباوعلهم بصمت محد تدخل وكام فازع كلها كاعدة وتراقب موتهم من الكتل وكف كتل من جوي عمامي
وكاللهم على سوايتهم
انوب كدامنا طيحوا حظهم طيح بارق سوه نفسه ذليل وصار يألف من عنده سيناريوهات ويحجي لعمامي من سمعوا هيج وهيج يسووون
خلوهم يحبون حبي مثل الجهال بالمظيف يعيطون مثل النسوان ويتوسلون بقيت أراقب وتلذذ بتعذيبهم أفرح من اشوف شخص خاين وكذاب يتعذب
كدامي فضت الشغلة طلعت بارق طلع وراي يضحك باوعتله بطرف عيني " صير مثلي ولا تسكت
عن الحق أبد
_شجابني عليك
_صير أحسن مني
_ماكدر اوصل لصبع رجلك
_انجب تصير احسن مني بس خليك هدي وراقب كلشي بحذر ودقة وهجم من تسمحلك الفرصة المناسبة بس ضيعت الفرصة الأولى راحت عليك
_ نكدر نصنع فرصة ثانية
_اي نكدر بس الأولى أفضل من الثانية
_اي بس هم ماكدر اصير مثلك أنت ضابط وانا مدرس
_اكو أشخاص عادين تفكيرهم أقوى من تفكير الضباط ومخططين عباقره وأريدك تصير مثلهم وتأخذ حقك من حلك السبع ماريدك تصير جبان ياهو ليجي يدوس على راسك ويمشي خلي من يجيبون طاريك يرجفون من
الخوف ويحسبولك ألف حساب
_يهفوني ألف قندرة ونعال ههه
_طاح حظك
_طايح حظي ألف مرة مو مرة ومرتين سكت يمعود تريد تورطني وياهم وهم انكس من هجرس سمهم كاتلهم كتل لتشوف نفسك قوي الشخصية
والكل تهابك وتخافك عبالك راح يخافون مني من اصير مثلك لايابه يشحطوني شحط
_جبان
_عمي جبان مو مثلك لاعب دعبل ويه سل وهجرس
_تدري مستفقدهم
_لابشرفك
_اي بالقرأن جانوا يحجولي كلشي وياهو ليمر من كدامي يفصلونه لي تفصل ويقرون المستقبل هسه باع رجعت انسان عادي وكلشي ماكو
اطرش بالزفة ههههه
_صدك تحجي يقرون المستقبل جانوا
_اي بالقرأن كالتلي سل ابن رجل الخلفتني راح ينسجن ١٥ سنة وراح نلزم ابن اخو الخلفتني بعد ثلاث أيام وفعلا طلع كلامها صح
_عززة العزاها هاي شنو من جنية
_الجن يعلم كلشي والله منطيهم قدرات خارقة
_اي ..زين ماكالتلك عني وعن مستقبلي
_لا
_عليك الله عليمن حجت بعد
صفنت وتذكرت سلسبيل جريتها بأبتسامة عريضة ومشيت هو يمشي وراي ويصيح" ولك احجي شكالتلك وماتحجي شبيك توزع ابتسامات
هجرس احجي ؟!
_خايب ماكو شي بس تذكرت سالفة وابتسمت
_شتذكرت
_شغلة خاصة يله روح لبيتكم بدل وتعال
_مثل الصاروخ ابدل واجي هههه
_دير بالك ليعط صاروخك بنص الطريق ههههه
_انجب ولك
_مو اجي اوكلك حب ههه
_شكد ناقص ابن وائل
_وعاد أنت مفول ابن فواز ههههه
_خررر..بيك هجرس
_ههه يله دعبل عزيزي لو ادعبلك بطريقتي
_نفوو عليك
_تعال اخذ تفلتك وياك وروح
_انعل عرضك ...
_كافي ابن سراب
_ابن حنان ام الزلم
_اويلي على حنان ام الزلم مايكفيها زلمة
واحدة إلا أثنين
_ لسانك متبري من حنان
_لا أعرفها ولا تعرفني وان شاءالله باجر تجي أمي الجديدة بعدها بالباكيت ههههه
_اي بالباكيت وابوك اول واحد يفتحها ههههه
_ههههههه خرر.. بتفكيرك بارق
_شسويلك أنت ناقص وتفكيرك ناقص مثلك طفر لبعيد تره نيتي سليمة جانت
_واضح واضح سليمة ابن سريبة
_انجب ابن حنان
_يله ولي لا اطفر على النسوان تدري لساني زفر
_هو هاي أنتو الضباط زفرين وسخين
_توك يله تدري هههه
_من زمان ادري بيكم وسخين وقذرين واهل النسوان وماتشبعكم مرة وحدة إلا عشيرة مال نسوان
وعشقكم ثلاثينية الجادة
_وهاي جبت لأبوي ثلاثينية جادة ههههه
_هههه خرب بعشيرتك كلها على هل دكة الناقصة
_لاوالله دكة كاملة
_خل أروح اشرفلي
راح وانا رجعت للبيت يصفر طير الطاير ماكو بي جداتي كلهن رايحات كعدت خليت رجل فوك رجل لازم التلفون بيدي اجت بالي أشوف
سلسبيل ماعرف ليش حبيت اعرف أخبارها برغم ماتهمني المهم دخلت حساب الانستغرام مالتها حسابها عام وعادي تنزل صورها أهلها قابلين شفت منشور منزلته
قبل أربع ساعات
ويه صديقتها كاعدات بمرسم وجاي يرسمون فراشات دخلت على التعليقات جانوا قليلين لان ماعدها متابعين غير ٣٧٩ متابع وتعليقات فقط ١٢
واحد منهم جان دلشاد كاتب "
ملعونات ترسمن بدوني ؟" راده علية سلسبيل " من دزيتلك مسج وكلتلك تعال بيت عمو شاكر دا أرسم العتب
عليك مو علينا..
راجع كاتب"
للأسف طالع مو بالبيت
_وليش تعتب لعد؟
_حبيت استفز لعابة مالتنه
_جم مرة كلتلك لتكول لعابة
_هو أنتي تشبهين لعابات ههههه
تنفزت كلش شلون.... يتجرأ يكوللها لعابة بس انا يحقلي اكوللها لعابة نصحتها أكثر من مرة تبتعد عن دلشاد وهي ماتقنع طلعت بسرعة من حسابها رجعت انطيتها حظار ماريد ادخل حسابها واعرف اخبارها
وطبعا مرض شيصير وياها خل يصر ماتستاهل واحد ينصحها ويرشدها عالطريق الصح خلها
تمشي بطريق الخطأ .
مناوي جنت خايفة كلش أروح للحنة ماريد أشوف ياسر كدامي هو منا مصورني وعنده صوري وسلسبيل ماكو من يوم لراحت من عدنه كاطعة
علاقتها اراسلها ماتجاوب وانوب حظرتني ماعرف ليش برغم كلشي مامسوية وياها ؟ المهم رحت وشفت عروسة عمي وائل طالعة كيكة تجننن سلمت عليها ردت السلام وبقت مبتسمه بوجهي
اجت ام ياسر باستني ماعرف ....شبيها طايرة من الفرحة بشوفتي وشوف شعبالك شايفة كدامها مو ابنية غريبة ويا نعم زوج اختها يصير عمي
الهم بداية الحنة ... شفت ابنية تصور بي وتبتسم درت وجي عنها وقطيته مانطيتها لزمة أبد راحت طلعت بره شوي ورجعت متعصبه جرتني من أيدي قوي
وكالت بعصاب "أمشي وياي
جريت ايدي منها "
عوفيني شتردين مني ؟
_مو أني لاريد هو لايريد صكع رأسي صعك بيج
_منو ؟
_ابن خالتي ياسر صديق اخوج فرقد
_صخام برأسي شيريد مني ؟
_يريد يكبل وياج
_ادبسزز شنو هذا الكلام ماتخجلين على نفسج ؟
_لزمي حدج احسلج لو اخليج تندمين بالحسين مو صوجج صوج ياسر لمكبر راسج ويريد يكضي وياج
شويه وقت ممتع
_شايفيني كحبة ويكضي وياي وقت ممتع ؟
_ديله عاد صارت شريفة براسي وامشي فوك لغرفته
_انا اشرف منج ومن الخلفوج فهمتي لو لا وإذا تردين ابن خالتج يكضي وقت روحي وكضي وقت ويا وريحي وريحي نفسج قليله أخلاق وتربية
عفتها ومشيت صارت قصة بقلبي وخنكتني العبرة ماتصورته يطلع أنسان فاسد اخلاقيا وهاي بت خالته فاسدة من الأساس الله ينتقم منها ومنه خرب
واهسي كلش بالحفلة .
رحت كعدت بصف جديتي جوري قربت لعندي ..
كومي اركصي كومي صوري
شبيج مطنكرة
_مالي خلك شوكت نرجع
_هاي شبيج مناوي شنرجع غير تونه اجينه
_مليت
_أجواء حلوة ومفرحة وأنتي تحبين هيج أجواء ليش مليتي
_ماعرف
_هاج اشربي ماي
_ماريد
_بكيفج جدة
دحست نفسي دحس بيها البنية واكفه وتخزر بي وساعة تطم بي بأثنين ايديها وماجازت صورتني كم صورة وطلعت خارج الاستقبال أكيد راحت ودت الصور له .
نزلت دمعتي بسرعة مسحتها والخوف ذبحني ذبح أخاف اكول لاحد هيج وهيج صاير وياي أخاف يكولون أنتي السبب أنتي بعلاقة ويا اكيد جنتي ياربي شلون ورطة تورطت انا وشراح يخلصني
منها أنتهت الحلفة طلعنا بره والصدمة لي ياسر واكف بره بصف عمي وائل ويباوعلي بنظرات تخوف عبالك شخص متحلف صافح عمي بقوى ورجع خله أيده على صدره هز راسه مثل يكلي اصبريلي .
صعدت بسرعة للسيارة أرجف مثل السعفة من الخوف ماكدر ابجي كدام الكل واخليهم يشكون بي المهم وصلنا لبيت تعبانة وشغل ومالي خلك ذبيت نفسي بالشغل والبنات كلها تشتغل وياي كومه خطار عدنه
والأغلبية على العشا باقين وره ماكملنه الشغل راحوا البنات بدلوا للحلفة وانا تكومت بالفراش لايد ولا رجل تصوبت صوب من الخوف بطبعي جبانة
واقل خوفه اتمرض .
اجت امي لعندي تنده بي "
مناوي كومي شبيج انطمرتي
_تعبانة
_شبيج تعبانة قبل شوي مثل الصل تركضين هنا وهنا
_موتني الشغل
_محد كالج صيري نادرة واشتغلي كل الشغل ماخليتي البنات تشتغل جم مرة كلتلج لتشتغلين هواي وهن يستغلن الوحدة من يشوفنها تشتغل يله كومي بدلي
_مابي بالقرأن
_مناوي كومي
_ماااا اكوم عوفيني راح اموت
كمت ابجي بفراشي جريت ... البطانية وقطيت رأسي ابجي بحركة جرت البطانية حيل من فوك رأسي وصاحت بي "
وج شبيج شيوجعج ؟
_جسمي كله يوجعني
_ضربوج عين منورة هرفتج تشتغل مثل المطي وماتنطي مفكة لنفسها ارتاحيتي هسه هن يدكن ويركصن وأنتي هنا مطمورة بفراشج بس يخلص
العرس يوم السبعة ماخذتج ليلة كشرة ماعوفج لمن اخوفج خدامة لحنين الزركة ومرت عمج المعلمة شنو جايزة منج انا جم مناوي عندي ارتاحي
مسحت على رأسي بيدها وطلعت بس طلعت وسدت الباب كمت ابجي بحركة أعصاب قلبي انقبض ساعة الساعة انجلط واموت من الخوف ساعة زمان اجني
جداتي طمنوا عليه .. وانا نفس الشي حالتي اللاسوء صارت من الخوف جابولي علاج على أساس أخذت برد هو الجو حلو ماكو برد ولا حار المهم لصبح وانا ماكو نوم وكل ساعة تجي حنين وغيرها ماصرتي
زينة مناوي وانا اكول لا تعبانة ...
ماميتات علية ميتات ......على شغلي ادري بيهن جايفات "فاهيات " وكل العتماد واكع برأسي انا المهم للظهر وانا بفراشي اجاني فرقد وكال كومي
خل اوديج للدكتورة
_مو مال دكتورة
_شنو مو مال دكتورة شايفه حالتج شلونها ؟
_ عادي فرقد
_هو شنو عادي مناوي راح تموتين كومي بدلي انتظره باسيارة
_والله ماكو داعي
_مناوي ليش تعاندين
_ما اعاند الشغلة عادية تره
_اول مرة اسمع واحد يتمرض عادي
_أنت متزوج وتعرف المره شبيها ومابيها وانا بي هذا الشي ومن تجي اتمرض ونام بالفراش
_حتلوه كومي خل تكتبلج الدكتورة علاج بلكت
الله يهدي الوجع لعندج
_عندي علاج
_مناوي
_والله ماروح شبيك الشغلة عادية كلتلك
_خليج بعنادج لما تموتين
خله وطلع متعصب دخلت أمي جذب عليها وكتلها الدورة اجتني وهل مرة بوجع اجت ماعرف ليش وكلتني رزالة مال غسل ولبس كله من الشغل تشيلين ثكل
وتركضين بي ولج مو زين المره تشيل ثكل يأثر على رحمها وأنتي بعدج ابنية بالقرأن إلا اخذج وشيصير خل يصير مجايزة من عندج
_اروح والله بس سكتي
_لمصلحتج احجي يالعوبة
لفيت رأسي ونمت بقت تحجي فوك رأسي وحجيها كله صدك انا اشتغل مثل المطي بيت جدي وحنونه بالرزايل من جدي وفرقد وجداتي يله تكوم تعاون بشي بسيط وانا قنينة غاز اشيلها واركض بيها ولا اهتم لروحي
المهم جاء وقت الزفة جاني فرقد يله كومي راح نروح نجيب العروس بقيت بفراشي اباوعله "مابي
_كومي بدلي خل اوديج للدكتورة
_اكعد مني فرقد
_مناوي لتعاندين وكومي خل اوديج للدكتورة
_عرس ابوك اليوم تبقى ويه ابوك لو وياي
_العرس مو احسن من أختي كومي يله
_أخذت علاج ساعة واصير زينة
_ياربي مو عناد شايله عناد المطي ولج كووومي
_مااا اكوم شبيك تريد تفضحني مناوي عليها الدورة ونايمة بالفراش واخذت فرقد وياها للدكتورة مخبله اطلع لا والله ماطلع جوز مني فرقد
_ابقي مطمورة بالفراش وتحملي الوجع والوجع مايتحمله غير صاحبة وتعرفين شكد يألم الوجع وانا احس بالوجع شنو وماتحمل اشوف شخص يتوجع
_تره لوجع لبي غير لوجع لبيك
_اعرف ويمكن الوجع لبيج أقوى من لجان بي يله كومي بدلي وخل اوديج بلكت تكتبلج مسكنات شي يهدي الوجع هاي من البارحة أنتي بالفراش لحد الأن
_شوي احسن صرت
_مناوي
_شبيك والله احسن صرت ويمكن ساعة زمان يختفى الوجع
_رايح للزفة وإذا رجعت ولكيتج بالفراش بالقران اشحطج انتي والوسخ مالتج واوديج للدكتورة
فعذر من أنذر مناوي
_تلكاني مثل الحصان
_ياريت
خله وطلع فرحت بي .... أهلي مالحوا علية مثله بس كالوا شبيها أمي كالت مريضة فرقد حنون لدرجة احن من أهلي علية اجت بالي أكله على ياسر وبت خالته هيج وهيج كالتلي بلكت الله يخلصني منهم
ليش أبقى أتحمل ...كل هذا الوجع والمرض وانا مالي ذنب وكعت ضحية أنسان قذر وفاسد والله كمت من الفراش بوجي للحمام سبحت وبدلت وخليت مكياج
بس جسمي تعبان وعلامات .... المرض واضحة على وجي وحيلي كله يرجف مثل السعفة المهم ساعتين يله رجعت الزفافة طلعت بوجهي فرقد أبتسم
من شافتي كايمة من الفراش رحت وكفت يم حنونه نبزتني وكالت "سويتي نفسج جنازة علمود
ماتشتغلين خبيثة
_ ماتنجبين أنتي والشغل ماهامج صحتي هامج الشغلي
عفتها ومشيت من يمها رحت يم أختي رحاب وكالت "
بت اخت العروس سألت عنج
_شتريد؟
_ماعرف بس طلبت حسابج على الانستغرام
_خوما انطيتي
_اي
_ليش انطيتي
_شكو بيها
_شنو شكو بيها غير تكوليلي يله تنطينه
_شمدريني راح تضوجين
_اوووف ربي اوووف
عفت أختي ورحت كعدت صفح اباوع الكل فرحان ويركص فرقد يركص ويه أبوه ونوب ويه العروسة فرحان كلش لابوه خطية حنونه هم ركصت ويا قادر الله
اليوم صاير بيها طول واصله لصدره باوعت لرجليها لابسة كعب طوله بالشبر كلت هسه توكع وتتكسر والله ولاوكعت فوك هذا الدك والركص ماوكعت متعودة
الستغلالية المهم كمل العرس شوي أكلت صاحولي البنات بشقا عود تعاي اشتغلي وين شاردة سويتي نفسج جنازة علمود ماتشتغلين حنونه من عتبه
الباب تكول "ادري بفتولها سوت نفسها جناوة علمود
لا تعين بالشغل
قبل لا ارد دخلت أمي وردتها "
صدك لو كالوا الوجع مايوجع غير راعية ..وثاني شي بتي موخدامة لالج وللخلفوج افتهمتي لو لا وهذا لبيت بيتج موبيتها أنتي اشتغلي وتنجبي وبتي من هاي
لحظة ماخذتها ورايحة
حنونه _اءء
سراب_ولاكلمة لتخليني اجي واخليج بالجدر امشي مناوي امشي .. رحاب اعوفي من ايدج وامشي
وراي بسرعة .
رحاب شمرت المجلافة من أيدها وكامت غسلت حنونه تعوج بحلكها ماعاجبها العجب رجعت امي صاحت بيها "من اجي اعوجلج حلكج ادبسززز قليله تربية وأخلاق
مالومج طالعة على امج ام السحورة والخرز والخيوط
حنونه _ماسمح...
سراب _ الظاهر مشتهيه كتله بت قسيمة
حنونه_ عمي اخذي بناتج وروحي الله لايعوزنة لاحد
سراب_امشن
اخذتنه أمي ومشت كتلها بس اجيب ملابسي ماقبلت كالت باجر ادز رضاوي يجي ياخذهن امشي اخذتني بطرك نفنوفي من وره البيت جلبوا جداتي ماكو ماقبلت
الا اخذ بتي مسوين بتي خدامة لحنين الزركة وباجر تصير خدامة للمعلمة هي تطلع تدرس ومن تجي تلكه كلشي على الحاظر وحنين هم تروح للكلية ومناوي تغسل وتنظف
للكل عمي مسوين بتي خدامة
وانا مجايزة منها .
اخذتني ... للبيت حسيت بغربة بيت أهلي مامتعودة هناك تعودت على جدي وجداتي وفرقد الحنون ...صح ماحس بالراحة بيت اهلي مثل هناك بس على الأقل احمي نفسي من الخطر وابتعد عن ياسر وأهله.
ثاني يوم الصبح وانا نفس الحاله ريوك ماكلت راح يصيبني جفاف من يوم الحنة يادوب اكلي لكمة لكمتين وكل ساعة تجيني الدوخة واريد اتخربط .
العصر كعدت طلعت سيم كارت كسرته وحذفت الانستغرام وطلعت البطارية وضميت التلفون بالكرتون مالته وضميته ماريد اشيل تلفون بعد اخذوا حسابي
هسه كل دقيقة يراسلون ..... بي ويهددون بي خل اكطع التواصل كله علمود محد يوصلي والله مرت الأيام وجاء يوم السبعة أهلي راحوا انا مارحت بقيت
بالبيت يم ابوي وأخواني للعصر رجعت أمي حجت وكالت ام ياسر بس تسأل عليج وكتلها مريضة رادت تجي تشوفج بس ابنها ماقبل كاللها هم يله
نرجع عندي شغل .
ومرت عمج المعلمة مبينه خوش مره وحنونه كاعدة وساكته صايرة خطار أهلها عود ماشالته وابشرج
قسيمة جاية ههههه
_قسمة دخلت للبيت ؟
_اي والله هي وبناتها وكاعدة يم ام ياسر دك سوالف
_الله يديم المحبة
_تفاجأت من شفتها وفرقد زلق روحه زلق من شافها هههه
_يامسكين بفرقد
_اي والله مسكين هالولد مادام ام الخيوط دخلت للبيت راح تكلب حياته جحيم تكوم تحوك
خيوط وسحورة
_الله يحمي
_آمين يارب ...صدك يريد يجي يشوفج كال بالليل أمر بيها
_هلأ بي
والله بالليل وجاء فرقد الواحدة ...شافني تطمن علية وكال شتعتازين بس اتصلي بي لو تعاليلي ردت اكوله على صديقه ياسر وبت خالته بس وكفت بعين مرت أبوه خطية بعدها عروس جديدة وأخاف تصير
مشاكل الها منورة ابن أختها بلكت الله يجوز مني وينسى والله مرت الأيام والأيام وحنين داومت بالجامعة رادت تدخل قسم تمريض جدي ماقبل كال لو مدرسة
لو تبطل وتكعد بالبيت .
عاد راحت مدرسه أحياء داومت شهرين بالجامعة "وحبالة ماكو يسألونها تكول ماريد هسه أريد اكمل جامعة يله أخلف ويني وين الخلفة هسه الخلفة تريد مداراه
وانا لنفسي مابي أنوب للجهال.
المهم صادف يوم الخميس وجدي مسوي ثواب لأهله وعازم الكل وانا بين فترة وفترة اروح ويه أهلي طلعت بره بالحديقة افتر المغرب والصدمة لي شفت ابنية رشيقة جهامتها مثل جهامة سلسبيل واكفة
كدام شتله الورد وتشم بالورد عبالي سلسبيل صحت عليها سلي شجابج لعدنه ؟
ادرت وجهها عليه ملامحها مو ملامح سلسبيل وجهها ينور مثل الكمر أبتسمت وكالت " قلبي يؤلم ...
..لكنني سأنتقم...
رجعت جرت نفس طويل من الوردة واختفت متت بدمي رجعت ليورة كم خطوة انصدم ظهري بجسم شخص بسرعة ابتعدت والتفتت وره ظهري والصدمة
لي جانت .
