رواية كفي والمنجمة الفصل الحادي عشر 11 بقلم الكاتبة Leo alfatlawi

رواية كفي والمنجمة الفصل الحادي عشر 11 بقلم الكاتبة Leo alfatlawi

كفي والمنجمه

للكاتبه leo Alfatlawi

البارت الحادي عشر

--مترديها تجي لهنا صيريلي مره

غزل كلمه وحده منج انهي هسه كلشي

--صدك دتحجي لو ناصب عليه تره هاي حبيبتك الدتحجي عليها

--انتي لوجان عندج ذره احساس جان عرفتي منو الي امسبب عله الكلبي

-- مؤتمن هذه الاسبوع زواجك

--عوفج من زواجي الف طريقه اكلسنه بي بس انتي جاوبيني

--شنو اجاوب مااعرف يعني فاجئتني دااحس تضحك عليه

--هيج موضوع مابي ضحك مااريدج هسه اتردين الجواب فكري عدل والتردي يجرالج

كالها وكام طلع

احس بي متوتر كأنما اول مره يعترف لوحده بالحب هوه اصلا حتى مكلي احبج خلاني بحاله تعجب هذه مؤتمن المتسلط والكل يحسبله احساب ويخاف منه هيج خجول وميدبر كلمتين على بعض ضحكني من صدك متصورت توصل لهنا ويا

هذه اشحب بيه لو يريد يذل ماما بعد اخاف مااكتفه بسلا هوه كال اكنسل العرس عزااا وين تهاني تسمع تنجلط مكانها

خرب بغيرتج سماح صدك من كالت تهاني مكروصه منج اثاري منتبهه لمؤتمن وتصرفاته

هسه هذه شكله راح انهزم وانته اتفكر اكونلك زوجه وعايش بالاحلام والله لويدري يمكن يشنقني بكصيبتي

اندكت الباب دخلت عمتي ام مكرم كالت بعدج كاعده

--اي عمه كاعده تعالي هلابيج

--اشماله مؤتمن طلع من غرفتج عگله موش يمه احجي وياه يتصفن

--مااعرف عمه بس يمكن متعارك ويه تهاني

--غززل يمه خليني انصحج العدها مثل مؤتمن ماتفرط بي زلمه حوك وتستند عليه عمرها كله وهيه اماامنه صح عصبي ويغار بس ذني ميعملهن غير ويه الجاويه كلبه

--عمه اخاف هوه دازج من الاخير باجر مقرره اكوله لاوانهي الموضوع تره اني مااكدر اكمل وياه عمه مااتحمل اعيش عيشته وانوب متزوج 2 عليه لويش تره اني ماناقصني شي حتى ادمر روحي هيج

--وداعت جهالي مادزني بس من شفته طلع للشط يدخن عرفت وراه سالفه وهاي هسه اتااكدت شنهو طلب منج ابروح ابوج

--كال صيريلي مره واترك تهاني

--والله عرفته من قبل لايجيبج عالعموم اني نصحتج وانتي لاتخلين احد يااثر عليج انتي ييمه فكري حتى ماتندمين بعدين تراهم كلمن يريد مصلحته لاتمشين وره احد شغلي عقلج وسالي كلبج

--عمه دخيلج لاتخربطين مخي من اشويه اني افكر بشي ثاني فدوه عمه وشغله ثانيه لاتكولين لسماح راح تلطش هاي واذا لطشت بعد متفوت حالي وراها تعالي خلفي وربي وموبعيده مؤتمن يمل ويجيب تهاني دخيلج عوفي السالفه خاصه مؤتمن يغار من خياله عمه اني مااكدر مستحيل متعرفين اشكد عانيت بهالاشهر وياه

--على راحتج يمه بس ارجع واكلج لاتاخذين حجي احد خليج وره گلبج تره مؤتمن خوش زلمه راح اتعيشين بضله مرتاحه واليوصل صوبج يكسر ضهره

--مااعرف عمه خليها لوكتها مااكدر افكر هسه

--يلا جااني اكوم انام تصبحين على خير كالتها وطلعت خلتني محتاره شنو محتاره

غزل لااتفكرين ابد شنو اشو اتسألين واتجاوبين لاتتخبلين انتي وين وهوه وين ماراح ادبريها وخرت الفكره من راسي وغمضت اريد انام اخاف من عقلي يلعب عليه

استوني اغفه واسمع الشباج يندك

كمت فتحت لكيت مصطفى امجتف من البرد جان امدنك كلتله ها مصطفى

--هامرة اخوي امان اشيل راسي

--لويش لعد متشيل راسك

--مواخاف من مفاجأتج الكارثيه على العموم هاج النقال امج تتصل خبلتني

--انطانيا وراح هوه ومدنك ضحكت لان يخاف ملابسه ملابس محتشنه لكيت 6 مكالمات من ماما اتصلت بيها ابسرعه ردت هاحبيبتي قلقتيني ليش اتاخرتي

--ماما تره الفون مومالتي واتعرفين كوه يوصلي

--اعرف يابنتي بس خفت عليج لان هذه ميتأمن مااعون هالايام اتعدي على سلامه واترجعيلي

--خلي اكولج اليوم شنو طلب مني هسه اتموتين ضحك

--شنو ماما طلب بس لاحقه الشرعي

--تقريبا بس ابرضاتي رادني اكون ويا مقابل يعوف تهاني يعني يكنسل زواجه

--ايي وانتي شنو رديتي

--مرديت مارضه كال لاتردين هسه خليج على راحتج بس طبعا باجر گلت اول ميصير الصبح راح ارفض وافضها لان مبقى اسبوع على زواجه ليش يأخره

--لاماما غزل لاترفضين اياج

--عزا ماما لويش

--اسمعيني راح اتوافقين واتخلي يكنسل زواجه منا لمن تجين بس لااتخلي يدنالج اخاف هم تتورطين بطفل ويا

--ماما صدك دتحجين

--اي اسمعيني غزل سوي الاكلج علي اريدج تنطي امل كلش جبير واتخلي ميشوف غيرج قبل لاتجين اخذي ثارج يالثوله نسيتي السوه بيج هسه اجه دورج

--مااكدر ماما صح اذاني بالبدايه بس هسه زين وياي ومااكدر اضلم احد وراي خلي يتزوج ويستقر اني عايفته اول وتالي

--غزل اذا ماسويتي الكلتلج على تبقين مكانج اسمعتي لاتجيني وحتى الحجز الغي

--ماما صدك دتحجين

--ايي اريد شي يشفي غليلي بي لونسيتي اشلون نتوسل بي وهوه يذل بينه لان ماعدنه احد يوكف ابوجهه ولج نسيتي جان انتي هسه ميته لوهم نسيتيها اشكد ضربج واذاج

--مااعرف ماما

--لااتكولين مااعرف غزل باجر اتكعدين اتكليله اموافقه بس انطيني مجال كم يوم اتعلم عليك

--يااتعلم علي ماما مراح يصدك تره مؤتمن هذه موطفل صارلي ويا كم شهر هسه اتعلم عليه

--ايي يالثوله هذه معاشره لازم اتكون مشاعر بينكم وهيج اشياء من هالباب اخذيها

--اهاا ؤك اشوكت حنسافر

--السبت الطياره مالتنه انتي يجيبج مصطفى الخميس نطلع للشمال ومناك انسافر

--ؤك تمام يلا هسه لازم اغلق وياج لان اخاف على ساعه يجي

--غلقته ودكيت الشباج وفتحته لكيت مصطفى بس يباوعلي بنضره ماراضي اضن سمع كلامنه كال غزل تردين اتعوفي ميخالف بسلا اتاذي صح هوه كلب بس ميستاهل هيج اتسوين بي لاتخبلين الزلمه وراج

--لاع مااسوي هيج شي

اخذ الفون وراح بس شكله مامقتنع بكلامي مهما يكون هذه اخو صح يكرها بس يضل سنده بالحياة ميرضه اذيته

رجعت لفرشتي واني افكر بكلام ماما اكوشي يمنعني ورافضه الفكره وارجع اتذكر كلامها صدك اهواي عذبني ليش ميحس ولو اشويه بالحسيته موطلكني وكتلني خلي هوه هم يطلك ويتأذه هم علمود ميعيدها بعد ويه غيري يعرف الدنيا دواره

الشمس بعيوني وشي ينغزني بخدودي قبل لاافتح اعيوني حسيت بنفاسه بركبتي دفعته عني كعدت لكيته متمدد يمي يباوعلي بشغف

--صباحوو

--صباح الخيرات يلابويه الساعه 8كومي

--امم شنو حنبديها من هسه اوامر تره والله مااشبع نوم لويش اتكعدون من الفجر شكو عدكم

--لاماعدنه شي عليش كاعدين اصلا الوكت كله مكضي نلعب شطرنج كومي غزل

--ؤك حكوم كلتها واتمغطت استغفر ومسح وجهه

اباوعله عنده حجي ومتردد يحجي كام وكف يم الميز وخال ادي بجيوبه ومتردد يريد يحجي وميعرف اشلون يبدي مااعرف انو خايف من جوابي لو يخاف كرامته تنهان لواصلا ميعرف اشلون يبدي الموضوع امبين اول مره يسويها لان العنتينه العنده هنه لاطشاتله

شفته يريد يحجي ومحتار اخر شي سحب جكاره ورثها عرفته متوتر حلو شكله من وهوه متوتر اباوعله يدخن برتباك ويحك كصته كلت خلي اني ابلش واشوف رد فعله

اول مكتله مؤتمن اشوكت حتكنسل زواجك اشوفه اخذ نفس وضحك اجه يمي سحبني لحضنه وكال اشوكت متامرين

--لعد واهلك شنو حتكلهم

--عوفج من اهلي اعرف اشلون احلها وياهم هسه خليني بعلة كلبي شنو تامرني

--مم مااعرف بس انطيني فتره علمااتعود عليك وهااا مااصيرلك اذا مااشوفك طلكتها

--سهله بعد

--وخر لان اختنكت والجكاره حتجويني احس حماوتها بضهري

ابتعد عني باوعلي وكال غزل مااريد احد يعرف لمن احلها اخاف يأاذوج خليج بعيده ولاتفتحين الموضوع كدام احد

--ؤك

--هاا ؤك المهم غزل اريدج تحتشمين لخاطر محمد وهذه شعرج مااريد احد يشوفه غيري

--لويش وتره محد يشوفني بس الولد وذوله اخوتي

--ولج بالعباس اشتعل اذا عمتي مشطتلج موانوب الولد يابه تره ينعل سلفاي من اشوفج كدامهم وطفرين وشعرج فاتحته

--ؤك بس هم انطيني مجال علمااتعلم لاتلح عليه فدوه

--يابه ياالح تره صارلج كم شهر يمنه اشوكت ناويه تتعلمين تره شعلتي عشيرتي ونعلتي ابو اصلي بلبسج

--شنو حتبدي من هسه اتحاسبني كلتها واني مبرطمه

--لايابه لاابدي ولاراح ابدي دخيل ربج لااتسوين هيج تره انعل ابو الاتفاق غزل بويه ستري على روحج تره للصبر حد واني صبري بده يودع

--لالا اطلع ابسرعه هسه تلكي جدو منتظرنه عيب

سحبتها من ايده وطلعت ابسرعه لان شفته حمه وهذه خطر سريع الاشتعال بعد شيطفي

رجعت غسلت وجهي لبست الحجاب وطلعت وراه

لغرفه بيبي شفت جدوه كاعد صبحت دخل مؤتمن سلم باس راس بيبي بعدنه استونه كعدنه كالت العجوز يمه حضرت امورك ماضل شي على زواجك

لان شافتنه دخلنه سوه لبالها راح اغار ودتقهرني مااعرف من شنو هاي المره مخلوقه باوعتله اريد اشوف شنو حيجاوب

-- دنك وكال جدي راح اجل العرس طلعتلي شغله

--اها عليش يبويه

--صارتلي شغله مفاجئه بشغل ومااكدر اعوفها لازم اكملها

--شنهو بويه الشغله شوماادري بيها لو شكلك هونت يمؤتمن

--لابس هسه مافارغ كلت ابعد الموعد اشويه

--موحددنه الوقت ويه اهل المره بيوي ذوله مخابيل تالي يبطلون اذا اخرته

--وعساهم مابطلو شنو بس همه عدهم نسوان هاي الديره كلها تتمنه ناخذ منهم

--عوف الديره ماراح تاخذ منها ماطول عينك ابيتك اتعلمني بيك تربات ايدي بس ياخوفي عشك جدك خنجر وتاليك امسودن

اباوع مؤتمن ضحك ودنك مااعرفت منو خنجر صار الفضوله شنو عدنه جد امخبل عزاا واني اكول مؤتمن موصاحي على ساعه تطبك يمه الكهرباء ويضل يوزع على البيت جدحات كلتله جدو منو هذه خنجر فدوه تره صار عندي فضول

--يبوي هذه جدج الخامس حبله وحده وتسودن

--لعد لويش اتخبل

--متزوج 3نسوان وعنده 8افريخات وعشك بت ديرته بس جانت فرخه زغيره تسودن عليها لمن اخذها البت بعدها زغيره وحليوه هوه جبيره ماتحملت مكايد حريماته ولاحبته رادت تطلج منه جان هوه يعشكها لوتكتله ميطلجها انهزمت لهلها رجع لبيته كالوله حرمتك انهزمت وهوه تسودن راح وارها يجيها كالتله ماارغبنك اريدك تطلچني هوه يحبها وميكدر بلاها وهيه راسها يابس رد عليها لوترديلي لوتنامين بالكبر مال اطلكج متصير

--واتخبل لان تركته

--لايجدي جتلها

--عزااا لويش

--كالتله كلما تاخذني لبيتك ارجع اشرد وافضحك ابديرتك مارايدتك لاتجبرني صعدت عدنه الاسودينه ودفرها اجت الدفره ابصدرها وكف كلبها وماتت هوه تخبل عليها

--عزا بعينه ان شاءلله مااتريدك شكو لاطش زين من ماتت هسه خطيه اشكد غبي

--يبوي هذه جدج ميصير تحجين هشكل

--العفو جدو بس نرفزني

عفتهم يسولفون هوه ومؤتمن ورحت للمطبخ اشوف جدو مامقتنع بعذار مؤتمن ويضحك ومؤتمن يحجي متوتر يريد بس يقنعه وبيبي هاي قضيه اخر يمكن حتنجلط من الحركه اتباوعلى اتريد تاكلني

دخلت للمطبخ لكيت سماح اتسوي مخلمه والبنات يحضرن باقي الريوك اليوم متاخرين مدري اشعجب يعني يوميه الساعه 7 الكل يتريك رحت يم سماح اول مباوعتلي ضحكت كالت خير غزل شوراج

--مفاجأه

--شنهو هيه

--بس خلي اسالج على مؤتمن البارحه هم خبر تهاني لولا

--والله مؤتمن من عقدها لسه وضعه موطبيعي حتى من تتصل تهاني ماله خلك يرد لمن اتضل اتلح هيه وهالايام بعد فرد مره تعبانه احواله يمكن عنده مشكله شاغله باله ولاهيته حتى على تهاني

--عوفنه منها هسه شنو حتنطيني واكولج خبر تتمنين اتسمعي

--شنهو ولج كولي

--بس فدوه كمشي اعصابج لاتفضحينه برد فعلج تالي تنكلب السالفه وننفضح لحد الان محد يدري

--غزل كولي شنو مو بطيتي جبدي

--مؤتمن حيكنسل زواجه من تهاني

بعدني مامكمله الحجي وشفت سماح ساحت روحها كمشتها اجن البنات يمها اني خفت تفضحني هنه يسالنها شنو بيج وهيه روحها رايحه خزرتها علمود لااتكول ابتسمت ماحجت كالت خفظ ضغطي

مصطفى.

بعدماسمعت غزل تحجي ويه امها اتراجعت عن فكرتي هاي ناويه اتخبل مؤتمن صح اريد اشردها بس مو بهالطريقه هيج راح يتسودن وراها

امها اهواي اماثره على عقلها وتصرفاتها ماعدها اي راي شنو اتكلها اترد تم وفريال مضروب المثل بكيدها ناويه على دمار مؤتمن هالمره بضربه قاضيه

حقي اخذه منه بغير طريقه متوصل لكسر كلبه وفضيحته كدام الديره

الصبح طلع واني فكره تاخذني وفكره اتجيبني وخاصا هالايام نومي قليل امراقب ام مؤتمن امتانيها اشوكت اتذب سحرها ووين اخاف انام وتشتغل مااندل مكانه واعرفها بليل شغلها لان هيه اذكه من انو تخطي هيج خطوه بالنهار صار الصبح طلعت اتريك دخلت لغرفه جدي لكيت مؤتمن وجدي يتناقشون بزواجه العرفته يريد يأاجله وجدتي معترضه عرفت غزل موافقه طلبه اول يوم اشوف مؤتمن الضحكه تارسه وجهه

جدي چلب حاس بي وكل اشويه شامرله كلمه يخلي يتبلعم يالاغم على شنو هيج متوتر وتتبلعم شنو اول واحد يعشك بس صدك انته شكلك مال دواوين عليش اتخربه بهيج شغلات

جدتي زعلت ماراضيه خايفه يبطل وهيه اتريد تخلص من فريال وبتها متدري بت فريال راح اتخربط كلشي ذيبه مثل امها خرب بغيرتهن سحبت جبير العائله وخلته مدوهن ميندل دربه

خلو الريوك طلعنه ناكل بس جدتي مارضت تطلع ندهت على ام مؤتمن تدخللها للغرفه عرفتهن راح يشتغلن عالثكيل

كعدت اكل وعيني بيهن اراقبهن لمن طلعت راحت وره البيت خلصت عالسريع وطلعت وراها لكيتها جايه من جهة البستان وتبتسم عرفتها جايه من بيت تهاني لان وجها يضحك دخيل الله اشلون ممسوخه موبشر بيدها جان علبه صغيره

درت وجهي مااريدها تنتبه اني امراقبها راحت عدل لغرفتها اشويه وطلعت ضليت على الدرج كاعد اراقب شنو راح اتسوي

ربي غير عائله ناس مكايد وناس سحر بيت فلم هوليود استغفر الله

طلعو للشغل كلها وهاي اطفر جنها سنفور امتيه جحره تروح منا وتجي منا ولاتثبت دقيقه اشحب بيها مؤتمن ماادري اشرتلها تعالي اجت

كلتلها غزيلان اتكدرين ادخلين غرفه ام مؤتمن

--اي لويش

--حلو اكو قوطيه بيضه ازغير هسه دخلتها اريدج اتجيبيها

--ؤك تمام بس وين الكاها

--ابجيبي بت المنغولي دوريها لوبس شاطره اتنقلين احداث اليوم لمج سويلج شي بي حظ فيدينا

--ؤك بس اخاف عمه اتشوفني

--لااني راح الهي الصخله بس يلا دخلي ماطولها طلعت للخبز

راحت الفاهيه دخلت ادري مدبرها بس لعله يطلع ابراسها خير

رحت يم عمتي تخبز واني اسولف وياها ماخليت طينه ماجفصت بيها يمكن تيهت حلكي خايف هاي الثوله تلزم واكيد تعترف من اول راجدي

اقل العشر دقايق اشوفها اتاشرلي من يم الباب مال البيت رحتلها لكيتها لاوالله بيها حظ جايبه القوطيه وياها شيشه عطر

--خرب بوجهج غزل كلتلج القوطيه هذه العطر المن

--ردت بفهاوه لعد مااعرف شفتهن سوه محطوطات جبتهن

--جيبي هم يفيد هسه اخليلها عطر يلوك لشكلها

--اخذه اني اذا ميفيدك

--بت الصخل بعدي لاارفسج شهالثوله الشايلته

ااخذتهن رحت روره المزرعه لكيت ابن حبيبه يركض صحتله تعالي اجه فرغت العطر

وكلتله بول بالشيشه يول وانطيك الف اخذها فرحان ترسها

فتحت القوطيه طلعت الريحه جايفه شتعلت جثتج شنو ناويه اتسوين المن هذه هالمره ناويه على اخبالمن شمرت المي الموجود وغسلت القوطيه عدل وترسته مي ردت ارش بعض قطرات البول بس اتذكرت شوالمن راح اتشربه اخاف هالثوله اتشربه وهيه ماامعوزه غباء بطلت

رجعت لغزل انطيتيها كلتلها رديهن ابسرعه مكانهن

--عزا مصطفى تره شفتك شنو خليت

--مالج شغل روحي رديهن مكانهن

--موخاف عمو خطيه يخلي منه

--اي واشبيها بولة ابن حبيبه والله تسوه راس ابوي ومرته ديلا لايجي احد

رحت اترد الغراض غير فاهيه دخيل ربها اني واكف على اعصابي وهيه تمشي بالجلب مالتها اتكول بحفله اتخاف يخرب الاتكيت مالتها خره بيج وبمؤتمن اشلون هاي راهمه ويا هاي مثل

اليثرد نساتل بتشريب

واكف على اعصابي لمن طلعت اجت فرحانه اتكول امسويه انجاز عضيم اتباوعلي ابفرح و كامشه اديها وحده بالثانيه واتمرجح بيهن امتانيتني اكلها عفيه

استغفر الله الله يطيح حظك مؤتمن يلا بابا عفيه ابنيتي السباعيه هسه ياشاطره ترحين ولااتكولين الواحد عالسويتي

صاح مكرم يلا ابو الصوف متطلع

--لاخويه جاي دفعت الثوله ورحت ويا للشغل

غزل.

طلعت بره يم عمه جانت تخبز وكلما اتذكرمصطفى سووه وياها هيج تكمشني الضحكه اليوم راح تتعطر بغير شي لعمو هسه انتي مره تستعملين بخور اشوداج للعطر يلا هيج احسلج دكليها

كعدت يمها اكل خبرز اشكد احبه من يطلع من التنور حار وخاصا اذا خبزو بالطين عمتي ام مؤتمن عكس عمه ام مكرم ذيج من تخبز

اتصير اخدودها حمر وهاي سوده محتركه حصرتني الضحكه استغفر الله شافتني كالت

--هاغزيلان اتضحكين يبت فريال ابدال هذه ضحكج كومي اتعلمي خبز بلكي اتصيرين مره

--لويش عمه المتعرف مومره دنحجي و تهاني دخلت اجت اتجاهنه

عمتي. هلابجنتي هلااباام بيتي

--هلابيج يعمه والله اشتاكيتلج ماكدر اكعد كلبي حسني كلت تعبانه عمتي وصدك هالشفتج عالتنور

--بعد طوايفي يعمي تعالي شوفتج كافي

--بعدي خلي اخبز مچانج

--لايبعد امج وخري لاتتوسخين تاني زلمتج اتلكي خلي يشوف النسوان الصدك اشلونها

--يبعد جبدي جاهوه وينه

--هسه على جيه راح عنده اشغيله

--خوش جاخلي اصعد غرفتي علماايجي اكمل كم شغله

--روحي يمه هذه بيتج

--هيه راحت صعدت واجت سماح اتلم الخبر اتباوعلها وصلت يمي كالت شنو لسه مادرت بالخبر

--لااكيد مؤتمن كال ارتبها على كيفي مااريد مشاكل بس لو ملحكه قبل اشويه على الاترحيب.من اتكلها هلا بالزفر هلا بالمكمله اسحورتي هلا بالراح يركعهاجلاق مؤمن

ضحكت وكالت سكتي لاتسمعج عمتي تالي اتخلينه احنه الي ننركع جلاق

عمتي. غزل وخري عن العجين لايصير شعرج بي

--عمه تره خبزتج هالكدوتها وشعري اطول من تنورج لاتضلين تتحججين

--وشكو خالته هالطوله كصي شحلات تهاني وشعراتها اتكول حرير من يشوفها مؤتمن يفقد

--طبعا يسرح اذا امشبعته قبل لااكمل احجايتي صمت حلكي سماح وكال غزل كومي بديتي اتخربطين جرتني دخلنه جوه وكت الغده لكيناهم صابين والولد يصلون

وكت الغده كاعدين ونزلت تهاني اجت يمنه سلمت وباست راس جدو وكعدت يم مؤتمن حشك بلشت بالاكل لمن كرفت شنو كدامها مصطفى جان كاعد على اعصابه امبين متعارك ويه مؤتمن لان يباوعله بغل وحتى اكل مااكل قليل دناكل واحمد كال لجدي اريد اعزل

جدو. عليش يبويه اكو واحد غاثك

-لابس بعد اتزوجت ولحدمن اخلي امي عد خوالي كلت اخذ بيت واخذ اختي وانعيش سوه

--ابكيفك يبويه ولو يعز عليه واحد من جهال معتصم يعوفني بس ابراحتك شوف اليريحك سوي شفتلك بيت لومؤتمن يشوفلك

--لاوالله جدي بس فكرت بعدني تعرف مااعندي امكانيه كلت استاجر

مؤتمن. لابيتك عليه هديه زواجك اعتبره

مصطفى. بس فتح حلكه انطيتو بيت ومنين من افلوس جدي وحنه اسنين كاضيها من بيت لبيت ليش هالتفرقه

--انته تنكتم واذا ع الفلوس اجان مني من جدي ذني اثنينهن مالك دخل بيهن مالك شي يمنه اركع راسك بالحايط

--جدي جاي تسممممع

--جان يحجي بعصبيه رد جدي بكل برود اكتم وحسك ماهيسه عليش بالشارع نايم لو الغل عماك من سمعت مؤتمن اخذ المصنع

--جدي تره باطل كلنه احفادك ليش سجلته بسمه

--انتي متفتهم كم كلتلك واعيد بعته ماانطيت

موفرخ جاي يعلمني على الحرام والحلال شنهو وحلالي اني حر بي عسمااتبرع بي محد اله شي يمي روح ذاك ابوك اطلب منه

--هوه ابوي لسه ياخذ مصرفه من مؤتمن

--مابها شي ابنه والله رازقه لحسن نيته ليش مياخذ وانته شوف راح اكلك ماطول كلبك شايل هالكد حقد مراح الله يرزقك ولااتشوف الخير ويلا كوم فارجني مااريد اشوف جهرتك

كام مصطفى وجهه محتقن حقى يعني شنو الفرق همه اخوه لويش هالكد هذه اميزه وينطي شنو يريد وذاك بس يرزل بي

سمعت ام مؤتمن وهلهلت كالت اجه الخير على عين جنتي الجديد صدك لوكال اكوتيجب الخير للدار واكو تجيب الفكر لوطار وتباوعلي

كلتها عمه صدك والله اني من اجيت جبتلكم تهاني وراي

مكرم وسماح يردون يسكتون ماكو هيه عود زعلت كامت عافت الاكل صاحت عمتي يااامؤتمن متشوف انته اشبيك مرتك عافت الاكل متسكت هاي

--عمه يااعافت الاكل بس الخاشوكه بقت وبعدين جدو موكال عيب اتعوفون الاكل قبل لايخلصون انداريت لجدو كلتله هاي متعرف العيب مو جدو

--كافي جدي لاتحجين بعد

بالمطبخ واكفين دنغسل جان مؤتمن واكف وابصفه مكرم امتاني يخلص وتهاني يم مؤتمن تتماوع كلتلها تره مؤتمن يدفع الفاتوره غسلي حبيبتي لاتضلين وسخه

اجه مؤتمن نكث مي ادي بوجهي وكال انكتمي

--شنو اسكت مؤتمن هاي لواتغسل ابكد ماساحله روحها وراك جان هسه صارت كرستال

سحبني وطلع انتي مااتسكتين لمن تنطكين اتعلميني بيج

--عوفني خلي اروح اغسل مااحجي بطلت

--ولي غسلي بغرفتج يلا كالها ودفعني راح للديوانيه يم جدو

رحت لغرفتي بقيت للعصر بيها لان مااريد مشاكل ويه تهاني اعرف روحي احجي اشياء موطبيعيه وتالي انبسط من مؤتمن كضيتها نوم كعدت وكت الغروب على صوتهم يضحكون حيل اشكد نايمه وماادري بروحي بسلا اثر عليه هذه الجبته المصطفى عزا بسلا لوامأاثر جان ماكعدت صرت من اصحاب الكهف

كمت غسلت وغيرت ملابس طلعت يمهم لكيتهم ملتمين يسولفون همزين حتى مصطفى متصالح ويه جدو وكاعد وياهم احمد شافني خزرني واشرلي رجعي للغرفه لان ملابسه حجاب ركضت كعدت يم مؤتمن اعرفه يخاف منه وميتجرء يحجي احجايه

عماتي كاعدات اجت سماح بيدها مي خلته بالنص كعدت يمهن عمتي كالت لسماح يمه شو هذه العطر موطيبه ريحتها خليت منه بس جايف

سماح. يمكن خالص وقته عمه تركي

شلت راسي اباوع لمصطفى غمزلي ودنك كوه كمشت ضحكتي خرب بغيرتك مصطفى ضلينه لوقت متاخر كاعدين همه مندمجين يسولفون واخذهم الوقت لحد مااتصل ابو تهاني على جدو يتاكد من خبر تاجيل الزواج

ردجدو كله اي عنده شغله بغير محافضه مستعجله لازم يروح يكضيها وان شاء الله اول ميرجع ناخذ المره يحجي ويباوع لمؤتمن صفح مؤتمن جان مدنك متوتر يسوي روحه يباوع بالفون مالته

خجلان منهم اشلون اخذ الزلم وراح كم مره الها ومن صارتله اتراجع عن كلامه كم مره سالته بيبي شنو عندك يكلها شغل طلعلي واجلته

--جايجده ماصدكنه الله يهديك وترد تطلبها اشمالك اتماطل هسه

--جده اكلج عندي شغل مااكدر اتركه

--يعني عندك سفر يجده لو شنهو

--لاماعندي سفر اشتغل اني واهنا

--جا موش جدك يكول عنده غير محافظه

مااعرف شيرد باوع لجدي جان جدو يباوعله ورافع احواجبه يريد يشوف شيجاوب ابتسم مؤتمن ودنك مارد

صاحلي جدو كال تعالي يمي بويه كمت رحت يمه كعدت حضني وباس راسي كال هسه ماريد منج بس اتجيبيلي حفيد هاي اكبر حلم عندي اريدج اتحققي

--لويش جدو موحيتزوج مؤتمن يجيبلك منها لويش مني

--مؤتمن يبويه وكع ومحد سمه عليه كون الله ميطلع مثل حظ عمه ويتهنه

--منو عمه ماكو غير بابا لويش هوه شنو صارله

--مصارله شي شبع ضيم ومذله من بت بغداد من صارتله راح مالحك يشوف شي

اباوع لجدو اعيونه امدمعه رجع حضني وباس راسي وكال الله عوضني بيج انتي ومؤتمن

بيبي. شنهو ماعندك احفاد غير هالصفره

مارد هز ايده وكام عافنه

احنه هم كل واحد كام لغرفته لان كعده بلا جدو متراد موحلوه والوقت اتاخر هم دخلت للغرفه رحت لفراشي بس امتانيه مصطفى اليوم مجابلي الفون ومخبرت ماما كلت خليني كاعده امتانيته بلكي اشويه ويجيبه

مليت من الكعده وهوه ماكو الوقت اتاخر وهوه ماكو نمت قبل لااخفه دخل مؤتمن عرفته مااجه لان امراقب مؤتمن لمن يصعد يالله يجيبليا

اشرتله لمؤتمن يطفي الضوه من يمه

مارد اخذ المشفه وراح للحمام رجعت نمت بس كلبي يريد طلع من مكانه خفت لاناوي على شي بس هوه وعدني كال من تكمل الشغله يالله

حتى لو رجع بحجايته مراح اخلي والله اسويها مناحه واضل اتوسل لمن يمل لان اعرف حظي من مره حيصير طفل وراح ابتلي وكل احلامي تتحطم

طلع من الحمام اراقب تحركاته واندعي ربي يهدي ويعوفني راح للميز خله عطر ونكث شعري عن المي يعني هاي الحاله ميبطلها ابد عنده منشفه بس مينشف شعره بس ينكثه اجه يمي ابسرعه غمضت دخل بالفرشه كرص خدي وكال شنو نوم مفاجئ عندج

--مؤتمن

--اعيونه

--انته كلتلي لمن اعوفها يالله ووعدتني

--اي واني عفتها مثل ماوعدتج

--لابس اجلت العرس ماطلكتها

--بويه ميصير اطلكها خليني فتره اشوفلي طريقه واطلكها هسه مترهم يسوولي اطلابه اهلها شبيها بتهم وطلكتها ولاتنسين هيه دخلاتها لبينه اهواي وحتى طلعتنه موبسهوله اخلص منها اهلها راح يفكرون غير شي

--اي واني مالي دخل بهذه الحجي انتي وعدتني وبعدين موكلتلك انطيني فتره اتعود فدوه كلتها بتوسل

--عصر اخدودي وكال يلله نصبر شورانه خلي انشوف اشوكت الله يهديج يعله كلبي

بس تعالي يمه هسه اقلها شي يصبرني على مابلاني الله

سحبني وخلاني بحضنه حسيت بدفو حضنه اتذكرت مبايلي شلت راس كلتله مؤتمن اريد الفون حباب قبل لايحجي كلتله امسح كلشي بس رجعليا

-- بس صيري حبابه وعقلي اجيبلج واحد عوفي هذه خلي يولي

--لافدوه موهذه حديث حرمات لاتكسره

--اجيبلج احسن منه بس نامي لان مااضمن روحي وياج بعد وانعل ابو الاتفاق

ابسرعه غمضت اعيوني وضميت راسي بحضنه اسمعه ضحك اسمع دكات كلبه ابسرعه

--مؤتمن كلبك يدك على السريع

--ليش تردي يوكف

--لاصدك دااحجي على السريع يدك مو مثل كلبي سحبت ايده خليتها على كلبي اريد يشوف دكات كلبه تختلف ليش ابسرعه وخر ايده وسحب نفس وغمض رجعني لحضنه وكال مو العله مالته نايمه علي بس احساس ماعدها

مرت الايام حبيت صبره عليه وتعامله وياي اهواي اتغير مؤتمن هالفتره وياي جان كلشي حنين واهواي يعبرلي اشياء اسويها غلط دائما يسوي روحه مامنتبه واني اعرف يشوفني

ومن يشكني اله عماتي لوبيبي ميسمعلهن ياخذني للغرفه ينصحني على كيفه بس جان دوم يحذرني من مصطفى لااتقرب يمه من اكله تره حباب يرد يكول انتي طفله متميزين االشخص شنو هذه خبيث وللئيم لاتوصلين يمه بس ماشفت مصطفى بهذه الشكل جان حباب ليش هالكد كراهيه بينهم مااعرف عكس مكرم ايده اليمنه لمؤتمن جان من احجي ويا لو اتشاقه ماله دخل ميمنعني منه بس للامانه واحد يكولها مكرم انسان جدا واعي ومثقف

عكس مصطفى ماخذ الدنيا گول اشوكت ماصحتله فرصه شوت وخالنه الناس تتطافر

كثرةالمشاكل ويه جدتي لان اتشوف مؤتمن ميحاسبني عن اي شي اسوي كاعده عالدرج نزل مؤتمن يعدل بسلاحه على متنه شافته بيبي كالتله تعال عندي شغيله وياك

--امري يالجبيره

--اشوفنك ساكن البيت چاوين شغلك

--جده كتلج شغلي اهنا

--جااعليش معطل عرسك البت تضايقت ليمته اتضل هيج

--جده بسلا اتلحون عليش اتخلوني حتى العرس ابطله

--اي هيج گول اريد ابطل چاحسبالك مااعرفنك يمؤتمن الفكره البراسك شيلها لاتخليني اجتل روحي

--جده اي فكره وحتى لوجانت اكو محد يكدر يعترض مالكم شي يمي

--يبووو موش عرفت فريال وره السالفه ولك مؤتمن هيج يجده اتعور كلبي ولك الاسود لسه مانزعته ومتانيتك تبرد كلبي تاليتك تشلعه بيدك

--استغفر الله جده ابروح ابنج عتقيني كافي البيه

--شوف خلي اكلك البراسك على موتي يصير لواعرف اخلي ايدي بدمها

--خلي بس واحد يكرب صوبها وسهلا وكتها نتحاسب

--اتحاسب جدتك ولك اتريد اتطكني

--جده جددده لاتسودنيني اتگوليني كلام ماكلته البت تركوها لاتوصلون صوبها بويه اعتقوني رحمه لدينكم كالها وطلع ضايج

اندارتلي كالت شوفي بت فريال وروح اوليدي الي حركه كلبي لسه مابردت اسودنج واخليج تفترين بالشارع بلاستر لمن يكتلج بيده ويخلص من عارج بعدي عن مؤتمن

--بيبي اني مالي دخل بي دتشوفين اصلا مدااحجي وياا

--يبوووو يبووو يضيم كلبي ربي موش طلبتك جاهيج تردني وين ام مؤتمن خلي تجيني للغرفه ابسرعه صيحنها كالتها وراحت للغرفه ودخلت وراها عمتي تركض

كاعدين بليل ودخل مؤتمن سلم واجه باس راس بيبي كالتله بعد عني

--ههههه جده صدك زعلانه عليه ينطيج كلبج تكدرين خاطري تعرفين ماارضه بزعلج واضل اكل بروحي

--جامن عملت هيج ماحسبت احسابي

--جده اشعملت متكليلي هاي اني كدامج منعول ابو اصلي والهم ينهش بيه بروح اعزاز كلبح لاتزيدينها عليه بالعباس ماضل حيل عندي

عمه. يمه خبرو اهل تهاني راح يجون مسيرين

بيبي. هلابيهم جاهذه بيتهم وانته يمه مؤتمن انجان زعل ابينكم صالحه تره هاي حبيبت روحك ميهون زعلها عليك

جدو. اذا على الزعل سهله بس خوفج من الشغله الاكبر خليج بعيده لاتنجلطين

مؤتمن. هاا جدي راح تعلكها خليك محضر خير

جدو. اي يبن ابني جذبني

ابتسم مؤتمن ورجع دنك على الفون

اجو بيت تهاني كمزت صاحت بيبي غزل على غرفتج انتي

--لويش بيبي تره بس نسوان

--لاتجسرين احجايتي على غرفتج

--مااروح يمها رايحه ويه مصطفى العب شطرنج

مصطفى كام كال تعالي خويه احنه عالم ماامرغوب بينه امشي وياي

--امم مضغوطين لان احله اثنين بالعائله يخافون على مشاعر الجلحان العدهم هسه لوبس جلحان ميخالف فوكاها وصخين عيع

مصطفى طلع يضحك مؤتمن جان كاعد يمها على القريوله ومجتف ادي يباوعلي بس اتحسه غير عالم ادري محتار اشلون يحلها وياها

دااطلع وماحسيت غير بيبي شمرتني بالعصه والله لومامؤتمن يلكفها عني جان هسه راسي نصين طلعت ابسرعه رجعلها العصه بس ضايج منها عفتهم همه يعرفون اشلون يتعاركون ماادخل روحي

رحت وره مصطفى لكيته كاعد هوه ومكرم واحمد والبنات يمهم ومشغلين منقله نار وخالين كهوه وجاي اشكد احب هيج اجواء وخاصه مصطفى من يغني صوته كولش حلو اشرلي تعالي يمي رحت يمه صاح احمد غزل كومي خفت دااكوم سحب ايدي مصطفى رجعني لمكاني كال كعدي الزلمه خلي يفك حلكه

مارد احمد اشكد جبان مع العلم كولهم ازغر منه بس اكبر جبان هوه

دخلن تهاني وامها واختها هالمره اجت وياهن وجه جديد عدل على غرفه بيبي كلتله مصطفى هاي الك

--انكتمي لاالبس القوري ابراسج

--اكولك

--كولي خويه

--مؤتمن يمها هسه كاعد

--غزل اصفيلج على راي اشتم ريحه غيره

--هاا لابس دااكول شوهذه لطش يمهن اضن كيف

--اي عليش ميكيف چوم نسوان تتعارك عليه وين ميدير وجهه يلگي غزاله

--شنو دقصدك

--لاتخنزرين لج اعيونج افكسهن امني ميشوف بس غزالته هسه اخذلج ثارج انتضري

كام صب كهوه كله احمد صبلي وياك شال راسه باوعله بستهزاء وشال راوا بيده 2 وكام رجع يمي انطاني واحد وبده يشرب من مالته

--عزا مصطفى هسه يكتلنه

--اي بي حظ خلي يجرب يمد ايده حرام اكسرها والبسها ابركبته

جان يباوعنله يريد يكوم ياكلنه

اجه مؤتمن هم صب كهوه وكعد كدامنه يشرب اتسرسحن الحبابات يمنه بقت بس امهن يم بيبي كعدن وهيه كعدت يم مؤتمن الحلوه جان ساحكها وميباوعلها وهيه تسحل ابروحها ندسني مصطفى انداريت باوعتله غمزلي واشر

كال بصوت عالي العالم عاشكه وطامسه بالطين لراسها وناس تتامل بعدها

شال راسه مؤتمن يباوع لمصطفى ورافع احواجبه

رجع كال شنو رايج غزاله اغنيلج

--مم خلي اختارلك وحده حلو بعدني ماكلتله الاغنيه بده يغني بس صوته يخبل بي بحه جان يغني ويباوع لمؤتمن

حبيبي حبه موعادي. يغازل غزل بغدادي

بحضنه ريحه ابلادي حبيبي من اهل بغداد حبيبي من اهل بغداد

ابعيني ماشفت مثله الوكت ويا صدك يحله

حنين مثل مي دجله حبيبي من اهل بغداد

اغازل اعيوني بسلوبه رقيقه وحيل محبوبه اگله عيدها النوب حبيبي من اهل بغداد حبيبي من اهل بغداد

كلام ايجنن ايگلي ويحبني مثل اهلي علي يغار من ضلي حبيبي من بغداد حبيبي من اهل بغداد

هوه يغني اباوع لتهاني معصوره قهر وجهه اسود ومؤتمن يباوع لمصطفى ويضحك يعرف خباثته

خلص الاغنيه كلتله تره موحلوه شوف غيرها

ضرب كصته كال گومي من يمي

ضحك مؤتمن وكام اشرلي اروح ويا كمت ويا عفت وراي تهاني تتعارك ويه ضغطها اتريده بثبت

رحت ويا قبل لانطلع نزع الغتره وخالاها على راسي كال لوبس اعرف اشوكت تلتزمين بالحجاب ارتاح

--حلتزم بس خلي اتعود لان كلما اطلع من غرفتي انساه

مارد بس حسب ايدي وطلعنه رحنه ورا المزرعه مكان هدوء وحلو كعدنه

--لويش اجينه اهنا

--وين انروح بعد وكت النوم خليني اهنا علمايطلعون

--صدك شنو حجيتو بالغرفه من عفتكم

--اعتذرت منها وكلتها اشتاقيتلج

--بعد ماحضنتها اخذتلك كم بوسه

--هوه اني من اليمي صارلها كم شهر ماامحصل هيج وبيه حظ اخذ من بت الوادم

--مؤتمن صدك انته اتحبني

--شتكولين انتي

--مااعرف بس مواعرفك اتحب تهاني لعد اشلون بدلت ابسرعه اخاف تضحك عليه وبعدين تتزوجها

--اني اذا اريد شي اخذه غزل انجان برضاتج اوغصبا عنج

زلمه امشوربه مااخاف منها اخافلي من وحده ابكدج عوفج مني انتي شنو ماالله هداج

--هاا

--شنو ها غزل لحدمن اضل تره فاض الصبر بيه بويه انتي شنو فلمج متفهميني من جهه اتغارين ومن جهه نافرتني

--مااعرف هوه اني مااعرف شنو اريد اتريدني اكلك

--شنهو المتعرفي يابه مارايد منج اتحبيني بس لاتكرهيني

--اني مااكرهك صدك جنت هيج بس هسه لاوالله بس والله اخاف منك كلتها ونزلت ادموعي

حظني وكال عليش البجي يابويه على شنو اتخافين مااكل بشر جربي قربي منج واذا ضليتي على هاي حالتج وعد ماادنالج لمن انتي اطلبين بنفسج

--لاحباب موهسه كم يوم فدوه

--كافي يابه بطلت لاتبجين اتاني وامري لله الي اتحمل هذه الوقت كله ميصبر على كم يوم

جنت ابجي مومن خوفي منه لالان افكر انو اتركه واني بدت عندي مشاعر اله حسيت كلبي ينبض ابحضنه مؤتمن موذاك الجان ماذيني لااهواي اتنازل من جبروته لخاطري اهواي يتحمل منهم حجي ويسكت ميرد علمودي

بديت احب اسوالفي ويا وعيشتي قريبه منه حتى ابيوم الميجي بديت افتقده بس بنفس الوكت خايفه من مستقبلي ويا وبالاخص من اسمع الواحد يتزوج اكثر من وحده عدهم يعني يجي يوم يجيب وحده غيري وهم يحبها ويتركني جنت خايفه من هالشي صح كم مره مكرم ايأاكدلي مؤتمن مجان يحبها صدك بس شغلت اعناد صارت

هواها بدايت شبابه صح وماانطوها وعناده كبر من شرطت علي شرط الي محد عرفه شنو وعافها ابسببه هسه كال يريد ياخذها و يكسر خشمها بس ماامصدكه بحجي شعرفني مامؤتمن هوه الموصي هيج يكلي بس هوه صدك اذا يريد شي يسوي مؤتمن لايخاف ولايحسب احساب احد

احس عقلي امخربط مااعرف شنو افكر يوم بعد يوم يتعده وماضل شي للسفر بس كلبي مااعرف وين اموديني اكثر الاوقات اكول اتصل ابماما واكلها مااجي وبعدين اتراجع من اشوفهن اشلون مكرهن وسحرهن اني ماراح اكدر اتقايش وياهم من اشوف سمهن وخباثتهن وخاصا بيبي هاي امسيطره يعني اذا زعلت وطولت زعلها على مؤتمن يمكن يقبل يجيب تهاني بس لخاطر ترضه

كاعده بالمزرعه صافنه وين حتصفى بيه سمعت مصطفى غزاله وين صافنه

--مصافنه بس ملل

--يعني عندج مثل صبوحه وتحسين بالملل لا صدك هذه تبطر كالها وكعد يمي

كولي غزل اشبيج

--مااعرف بس محتاره مااعرف شنو اسوي

--سوي اليكول عليه كلبج

--شنو شوجنك رجعت بحجايتك

--عوفج من احجايتي ولج صايره تحجين مثلنه

--امم لعد اذا امكابله صبوحه اربعه وعشرين ساعه اشلون مااتعلم

--خره بشكل صبحه اكلج صدك اذا رحتي اتكدرين اتسحبيني لهناك

+-لاميصير بس القرابه من الدرجه الاولي بس اكو طريق لخ

--شنهو

--تتزوج وحده واتسحبك

--اشلون عندج صديقه تاخذني لو من النت اشوفلي

--لاديربالك كومه جانو ينفقدون اهناك ابسبب النت يسحبنهم ويبعنهم مالكم اي اوراق اصوليه تثبت انتو شنو تره جذابات ذني عصابات ومافيات يشتغلن

--الحل الثاني كالها وضحك يباوعلي

--هههههه اي عندي صديقه اكدر احجايها اخلها تاخذك ومن توصل تطلك

--وعليش اطلك حرمتي

--عزا مصطفى تره اهناك ماكو حرمتي يعني اذا شفتها ويه صاحبها تمشي ميصير تحجي يشمروك بالسجن هذه يتسمي ازعاج للحريه

--العب حلو لاعادي خلي اتجيبه للبيت هم قابل بس تخلص من وجه صبوحه

--لعد وامك خطيه

--هيه امي وين شويوم اهنا وعشره يم خوالي ولااتكول همه طردوني

--مؤتمن يكول انته صدك بايكهم اخوي واعرفه حقه ياخذه حتلو بالغلط

--جااذا يعرفني عليش مينطيني حقي ليش خالني متلطلط لو اله اسوي شي اخلي يندم علي طول عمره

--صدك انته لويش اتكرها

--اوووف خليج من هذه الموضوع لااتذكريني بالقديم صدك ملل تعالي نلعب شطرنج

كام جاب الشطرنج بس ماكال شنو الابينهم وليش واحد مطايق الثاني مع العلم اشوفهم واحد يحب الثاني بس من بعيد جاب الطبله وضليته نلعب بس والله انته اتزاغل تره والله حرام عليك مصطففففى انته غشاش

--ولي لج انتي ثوله هاج هذه كش ملك يلا طفري

--والله غشاش انته موهيج عيد واعلمك اشلون

--يلا

رجعنه نلعب صح يغش بس يونس بالعب اشكد ضحكني اجو مكرم ومؤتمن وكفو يمنه يباوعولنه اشويه وراحو يسولفون بجها المزرعه

كال مصطفى والله اخوي على اخره

--لويش

خره بشكلك ولج يلفاهيه يضحك على ضحكتج انتي الله مامنطيج عقل بس منطيج حظ والا واحد مثل مؤتمن ساحل روحه وراج ويريد بس رضاتج وين صايره هاي

--بس لااتصدك تره جان هم يحب تهاني

ياتهاني يالثوله ولج عافها بس طلبت منه ==

--شنو طلب

--عوفج من هالحجي كملي لعب

--الله عليك شنو طلبت

--غزل عوفج بس ثقي بمحمد مؤتمن عشكج

صح حب تهاني بس انتي عشك واليعشك عدنه بالديره من صدك ياكاتل يامكتول افتهمتيني

جان يحجي ويلمحلي بالراح اسوي ردت اغير الموضوع لان اني هم خايفه من هالموضوع كلتله تره تعبت مااريد العب سدينه العبه وطلع الفون طلعلي اسبونج بوب كال انتي هذه مستواج هاج باوعلي

صدك جانت الحلقه حلوه ضلينه نتفرج مصطفى عكس مؤتمن ومكرم كلش اسبورت وتصرفاته مريحه وتحسه انسان كلش مرح وبس شايل حمل وحزن اهواي ميضهره للمقابل دائما اتشوفه يضحك ميريد يبين انكساره دنباوع شفته فتح العبه طلع احصان وسدها ندسني كال باوعي شفت ام مؤتمن كدامنه تخبز خلاها اتدنك تاخذ شنكه من الصينيه وسمطها ابراسها ابسرعه رجع للفون وياي يباوع بس نسمع صرختها سوينه روحنه نضحك على المبايل

اجه مؤتمن لكانه بعدنه على كعدتنه وصل يمنه كال المصطفى حضر روحك اليوم العصر اتروح ويه الولد عدنه شحنه

دخلي مرتك تعتقني وتنطيني النقال واني اروح ابربك اتزوجت اتزوج وحده عاقله جايبها طفله وبليتني بتصرفاتها

-- شنو هاي

-- اسبونج بوب استلم

-- دكمل الفلم وياها لاتضل اتهوبز وانتي اجهل منها هز ايده ومشى جانت سماح يم عمتي واكفه اخذها وراحت ويا جوه

رجعنه انكمل الفلم اجه مكرم كال الله حيهم شباب اكلكم مؤتمن وين

--عزا مكرم يعني منكمل الفلم كل اشويه واحد مكاطعنه مؤتمن اخذ اختك وراح للغرفه

--والله مال اتفل ابوجهج غزل لاتحجين بويه من انتي ثوله ومتعرفين تحجن سكتي افضل ردي للفلم من الله يطيح حظج وحظوالمطي اليمج المسايرج

عافنه وراح اليعجبك ابمصطفى ميرد كلام يردهن افعال يعني يغلطون ويتحارشون بي بس هوه ساكت يردها بغير شي سالفته يكول اعرف اشلون اوجع كلبهم بالثكال

خلص الفلم اخذ الفون وكام اني دخلت جوه لان صار وكت الغده ولازم اساعدهن رحت ابوجهي للمطبخ

مصطفى.

جدي بده يصفي املاكه بس المن اكثرهن سجلهن ابااسم مؤتمن يكول يشتريهن واعرفه جذب صح مؤتمن يشتغل ويا بس ليش حقنه ضايع عنده من تحجي واطالب تنطرد واني ماعندي مكان اروحله ولااكدر اطلع الفلوس واشتري بيت راح انكشف ضال بالع سم وساكت بس هين مؤتمن اذا ماكرهتك بالفلوس خلي اشوف شتفيدك وانته راح تفكد اعز شي عندك

فكرت اهواي اشردها بس ارجع اكول خطيه صح اريد انتقم بس موبهالطريقه اني حقي يمهم مااذب هاي بمصايبي خاصتا هسه اشوفها بدت اتحب مؤتمن

خبرت ام غزل وسالتها على الطلعه من العراق دكتلي صدر انو اتزوجني واطلعني منا بس اجيبلها بتها ضليت محتار ودايخ بشغلتها

طلعت ويه الولد عنده شحنه وصلنه سلمناهم وقعو عالوراق الاستلام وانطونه الفلوس اباوعلهن خرب بلشتك مؤتمن اذا شحنه وحده هالكد كرفت افلوس جااشكد عندك

رجعنه واني ابالي مؤتمن يضيعن منه افلوسه ومرته شنهو راح يكون رد فعله شفت ضلمت سالت السايق اشكد بعد نوصل

--تقريبا ساعه عليش تسال

--الوقت اتااخر والطريق شبه مقطوع يعني اذا طلع واحد بالوجه انصير بخبر كانه

--اتعودنه هذه شغلنه جاشتكول بالصيف يكون اخطر واكثر الايام مؤتمن يطلع وحده

--حظ ماعليه لواني جا من زمان متت ادري شنهو هذه شارع طريق الي جهنم واني اكول كل اشويه منبهني على سلاحي

--هذاك اخوك امناطرك عالطريق

--خلي يكوم عالاساس حنين خايف عليه ابشرفي خايف على افلوسه

وصلنه يمه وكفت السياره صاح الحمد الله على السلامه شباب

شمرتله افلوسه كتله الكف جان تانيتني بالبيت على شنو مستعجل اني اذا اريد ابوك مو ذني اهبرلي هبره بيها حظ

من اكلج جاهل تزعل يخوي يلا اتحركو طالع كدامكم

وصلنه للبيت نزلنه لكينه غزل بالباب بهالبرد امشلها بجامتها واطبش بالمي ونعالها مشمور على صفحه وسماح اموعقل الجبير واكفه تغسل الزوليه نص اليل صدك الله بله مؤتمن بهالزوج الثولات

مؤتمن. شكو بهاليل مخابيل انتن

سماح. لخاطر تيبس للصبح وماكو اتراب

وين جدي

ردت تلثوله اتكله يم صبوحه خرب يومها تحجي بلاتفكير جان كوه كامش اعصابه عن لايضربها راح سحبها من كصيبتها ورا يكلها ازمال انتي متحسين بالبرد

--تره هذه موبرد انته لوعايش ويانه اهناك جان عرفت البرد الصدك اشلونه

--يلا على غرفتج غيري ملابسج

راح لغرفت جدي ورحت وره غزل لان امها صرعتني بالاتصالات انطيتها النقال كلتلها خبريها ابسرعه واني امتانيج يم الشباج

غزل.

انطاني الفون ركضت للغرفه وقررت هالمره اكول لماما لا اريد ابقى يم مؤتمن بطلت مااريد ارجع

دخلت وقفلت الباب علمود ميدخل احد خبرت ماما كالت غزل باجر تجون

--ماما مااريد اجي

--عزاا غزل ماما صدك تحجين شربنج سحر ذني

--لاماما والله مو اني مااكدر اترك مؤتمن

--ولج غزل تره مؤتمن يضحك عليج ماما اكص ايدي اذا مااتزوج عليج بعد كم يوم اتعلميني بيهم

--لاماما هوه وعدني ونتي تدرين اشلون عاف تهاني

--يالغبره يجذب عليج يريدج اتصيرين مثل سماح اطيعين واتسكتين لخاطر من يتزوج متحجين مثلها

--لاماما ميسويها

--غزوله ماما انتي نسيتي اشلون جنتي عايشه اهناك بحريه وينج وين ذوله ايخنكوج ويدمروج ياامي ياحبيبتي فهمي

--ماما ماتريد اعوفه والله دااحس عندي مشاعر اتجاها

--غزل من الاخير اني رايحه باجر تجين خوش متجين بعد انتهت لاتخابريني ولاتحجين وياي انتهت غزل لابعدين تتندمين وتخابريني لواتموتين ماارجع ولااخذج لان مثل هاي الفرصه لاتحلمين اتحصلين

--ماما فدوه بس فهميني وبعدين انتي لويش اتركيني عليمن رايحه ابقى هسه اضل اتوسل بجدو وراح يخليني اجيج وانتي اتفوتيلي

--غزل انتي حيوانه عقل ماعندج انضل عمرنه كله نتوسل ومؤتمن وجده يقررون اشوكت اشوفج صدك غزل ماما والله حركتي كلبي هاي كم شهر هيج نسيتيني روحي غزل لاتحجين بعد انتهت وياج

--لالاماما فدوه بس سمعيني

--شسمع غزل ماما والله هاي نزوه وانتي مراهقه راح اتمر ياامي وراح تتندمين واتعضبن اصابيعج هاي لان عاملج اشويه زين حسيتي روحج اتحبي تره بس يضربج راح اترجعين اتكرهي وكولي كالت امي وهاي بعدها عمتج وبيبيتج ميدرن ذني يسودن عيشتج لعد لويش اني اخذتج وانهزمت غير من وراهن

--لعد شنو اسوي

--تجيني باجر ماما نعلي الشيطان من وصلت وصارت صدك بطلتي نسيتي اشسوه بيج ولج اخذج بدمعتج منا نسيتي اشلون سقط الطفل وردتي اتموتين هاي تنعاد وتنعاد وياج لبالج مرت وخلصتي وهاي هيه تره مؤتمن رجال جنوبي يتحملج كم يوم ويمل يرجع لطبعه القديم

خوفتني ماما من كالت هيه عايشه وياهم وتعرفهم اكثر مني يجوز صدك مؤتمن هذه طبعه وميتغير بس كم يوم يريد يتسله هوه اني ماواثقه اصلا من حبي اله دكيت الشباج وفتحته طلعت بالبلكون لكيته واكف انطيته الجهاز وكلتله باجر الصبح انروح

--غزل لااتسوين شي اتندمين علي بعدين اخذي قرار صح اني ماعندي مانع تردين ترحين اوديج وانتي حالج حال اختي وخايف عليج يشهد الله عليه لاادور بيج انتقام ولارايد غير راحتج انتي مالج ذنب باليصير مااريد اضلمج اكثر من الي صارلج اتكولين لا هاي هيه اخذتي القرار الصحيح واني وياج مااعوفج

--لااخذت قراري راح احضر غراضي وباجر الصبح قبل الاذان اتوديني لماما بعد ماابقى خلص قررت ارجع لامريكا ويه ماما

--غزل خويه لاتستعجلين بالقرار بعد عدنه مجال شوفي عيشتج اهنا بلكي اترهمين

--شنو بسلا بطلت مصطفى انته وعدتني

--لاماارجع عن كلمه انطيتها بس مااريدج اتندمين

--لامراح اندم باجر قبل الفجر نطلع هاي هيه هذه قرار الاخير

--دااسد شباج للغرفه ولمحت احد واكف يسنطلنه درت وجهي وكف كلبي واني اشوف

الثاني عشر من هنا

تعديل المقال