رواية بين الامس واليوم الفصل السابع والستون 67 بقلم الكاتبة انفاس قطر

بين الأمس واليوم/ الجزء السابع والستون

كانت عالية تنتهي من صلاة العصر وتريد أن تتمدد قليلا قبل أن تنزل لوالدتها لقهوة العصر..

حين وصلتها الرسالة التي جعلت عيناها تغيمان من الرعشة والتوتر:

" يعني ماكلمتيني ياصادقة الوعد؟؟

زين الملف اللي خليتيه أمس عندي

وعليه اسمش ومليان بخطش وتقاريرش

بيوصله لش عبدالله

وإلا تدرين بأعطيه إبي بعطيه ابيش أحسن !! "

عالية شعرت بالصداع يعاود التفجر في منتصف رأسها..

(ياربي وأنا من أمس أدور له ما أدري وين قلعته

الله يقلع دار العدوين.. مالقيت أخليه إلا عند الدب)

عالية تناولت هاتفها وأناملها ترتعش رغما عنها:

" يا النصاب أنا ما وعدتك..

أنا قلت بأكلمك بس عشان تخليني أروح..

وتكفى الملف عطه لجوزا..فيه شغل مهم واجد..

أدري إنه مايهون عليك تفضحني وتعطيه إبي أو عبدالله!!"

انتظرت أقل من دقيقة ليصلها رده:

" عادي مثل ماهنت عليش

وأنتي تكذبين علي وتسكتيني كني بزر تلعبين عليه

أنتي بعد بتهونين علي..

كلميني الحين مثل ماوعدتيني أو الملف بيوصلش الليلة مع أبيش..."

عالية غطت وجهها حين وصلها رده: صدق يامن شرا له من حلاله علة.. وش ذا اللزقة؟؟

أرسلت له بغيظها:

" أنت ليش تتأمر علي؟؟

تبي تكلمني كلمني.. هذا أنت جبت رقمي.. يعني السالفة مهيب صعبة عليك..

ليش ملزم أنا اللي أكلمك؟؟"

وصلها رده :

" لأنه أكثر شيء أكرهه في العالم الكذب..

ولازم تعرفين عني ذا الصفة..

أنا ما أرضى حد يكذب علي..

كلميني الحين ولا تزعليني.. لأن زعلي شين!!"

عالية بتوتر (ويهدد بعد الأخ!!.. بس ماظنتي يسويها مستحيل

لو وجهه مغسول بمرقة ومافيه مروءة إنه مايفضح مرته كذا..

وش عرفني يمكن الغيبوبة أثرت على عقله..؟؟

بس صدق لو هو بيسويها إنه طاح من عيني..

لا والله.. الدب مايهون علي!!"

عالية اتصلت به بتوتر..

جاءها ترحيبه دافئا عميقا وحنونا ومثقلا بنبرة رجولية خاصة به:

اشتقت لش من البارحة لين اليوم ما تتخيلين وش كثر..

عالية بتوتر: تكفى عبدالرحمن ملفي عطه جوزا..

عبدالرحمن بابتسامة دافئة: وهذا الحين كل اللي هامش وماكلمتيني إلا عشانه..

لا تخافين.. ملفش أصلا عطيته جوزا من قبل ما أكلمش.. يوم راحت من عندنا قبل شوي..

وحطيته في ظرف وماقلت لها أساسا وش هو.. بس قلت عطيه لعالية بدون ماحد يدري..

ومن أمس من يوم طلعتي.. قلت لأبي يعطيني إياه.. ماطلبته من أمجد لأني أعرفه ملقوف ويقرأ عربي وانجليزي زين..

بس إبي عطاني إياه بدون مايطل فيه حتى..

وعلى طول طلبت من الممرضات ظرف أحطه فيه.. وقبل مايوصلني الظرف.. كنت حاطه ورا مخدتي اللي ورا ظهري..

إذا عندش شك واحد في المية إني ما أحرص عليش حتى أكثر من نفسش فأنتي خبلة

يعني تصدقين إني ممكن أسويها يا الخبلة وأعطيه لأبيش أو أخيش عقب ماسويت ذا كله عشان ماحد يلمح اسمش حتى عليه..؟؟

عالية بصدمة متأثرة من لطف كل ماقاله: زين ليه تهددني فيه أساسا؟؟

عبدالرحمن بابتسامة: داري إني مالي خاطر عندش.. وأنش ماراح تكلميني إلا بالتهديد..

يعني أكون بأموت عشان أسمع صوتش.. وأنتي شاحة به علي..

عالية صمتت وحنجرتها تجف تماما.. ووجهها يشتعل احمرارا..

بينما عبدالرحمن أكملها عليها وهو يهتف بدفء عميق هز أعماقها هزا:

ها عالية أوعديني تكلميني.. أو على الأقل ردي على مكالماتي لا كلمت..

يعني صبريني شوي لين موعد عرسنا.. أشلون باستحمل يعني ياقلبي؟؟

عالية زاد وجهها احمرارا (وقلبي بعد.. الرجّال استخف!!) ريقها جاف تماما بالكاد ظهر صوتها مع كلماتها المبحوحة:

تبيني أكلمك.. لا تقول لي ذا الكلام.. ولا تكلمني بذا النبرة..!!

عبدالرحمن ضحك: الحين حلال عليش وحرام علي.. يعني كنتي مذوبة قلبي وانا في الغيبوبة بكلامش واحترق إني ما أقدر ارد..

والحين مستكثرة علي أعبر شوي..

حينها همست عالية بيأس خجول: عبدالرحمن إنت صدق متذكر وش كنت أقول

وإلا تبي تجلطني؟؟

عبدالرحمن بابتسامة: أول الأيام ما أتذكر شيء.. بس أتذكر همسش الدافئ قريب مني ويهز أوتار قلبي..

لكن عقب لو تبين أقول لش سوالفش بالتفصيل قلتها..

عالية تكاد تجن: عبدالرحمن أنا قلت لك أسرار واجد ما أبي حد يدري فيها..

عبدالرحمن بأريحية حميمة: ومستحيل حد يعرف سر أنتي قلتيه لي.. اعتبري نفسش أساسا ماقلتي شيء..

بس فيه سوالف مستحيل أنساها وبحاسبش عليها وحدة وحدة..

ثم أردف وهو يبتسم بغيظ: خصوصا سالفة ولد عمش أبو عيون عسلية.. هذي لها حساب خاص..

عالية شعرت كما لو كان صدمها قطار في منتصف وجهها.. وهي تغلق الهاتف في وجهه وتلقي الهاتف بعيدا عنها..

ثم تدفن وجهها في المخدة لأنها شعرت أنه اشتعل واحترق بكل معنى الكلمة..

لذا لم تشعر بدخول جوزاء عليها التي حسبتها نائمة وهي تضع ظرفا بنيا ضخما قريبا منها ثم تغلق الباب خلفها..

*************************************

كانت كاسرة نائمة لأنها لم تكن تصلي لعذرها الشهري الشرعي..

سمعت رنين هاتفها ولكنها كانت عاجزة عن الرد..

سمعت الرنين للمرة الثانية فنهضت من نومها.. وكانت على وشك الرد لولا أنه سكت

لتصلها هي أيضا رسالة.. ولكن رسالتها جعلت دخانا يطلع من أذنيها لشدة غضبها:

" جبانة كالعادة..

وأنا اللي كنت مخدوع فيش كل ذا الشهور وأحسب أنش شجاعة!!

لا يكون بأكلش في التلفون يعني؟!!

ردي علي ياجبانة.. أبيش في موضوع مهم

ولا تخافين.. موضوع مايخصنا"

كانت على وشك الاتصال به.. حينما عاود هاتفها الرنين باسمه..

فهي مازالت لم تبرد نارها فيه لما فعله بها بالأمس وهو يحرجها هكذا أمام والدتها..

وبالفعل كانت تريد أن تكلمه لتسمه قليلا كما هي مسمومة منه لدرجة شعورها بمرارة السم تتصاعد مع أنفاسها..

ولكنها لم تكلمه حتى لا يعتقد أنه نجح في استفزازها.. ولكن هاهو يأتي لها بنفسه..

ردت على الهاتف وبدون مقدمات ببرود احترافي: هلا والله..

تصدق اشتقت لك وكنت باقول لك تعال تعلبش على الدرايش عشان أشوفك؟؟

كساب ببرود أكثر احترافية: اطلبي وشوفي أنا بأنفذ وإلا لأ.. ما أحب أخلي في خاطرش شيء..

كاسرة بذات البرود: تصدق أسمع بالناس اللي مافي وجيههم سحا..

بس مثل وقاحتك ما تخيلت إني ممكن أشوف في حياتي كلها..

ماكفاك اللي سوته أمي فيك؟؟

كساب بتهكم: ترا ماكنت في التهزئية بروحي لو أنتي ناسية.. أنتي خذتي نصيبش معي

ثم أردف بثقة: وعلى العموم عمتي عبارة أمي وما حد يزعل من أمه..

وخصوصا إنها تشوف السالفة من زاويتها.. أنا ما أشوف نفسي سويت شيء غلط.. هذا حقي..

كاسرة مازالت تحتفظ ببرودها الواثق: صدق وقح.. أي حق هذا اللي تشوفه لنفسك وأنت هاجم على بيوت الناس؟؟

كساب بثقة أشد: والله لا صار عند الواحد مرة مخها معووج ماتنفع معها الطرق المستقيمة..

وش يسوي؟؟ لازم يستخدم طرق معووجة مثلها..

كاسرة بثقة: هذا والله اللي ركبني حمارته وعيرني بعيارته ..

وعلى العموم دامني عوجا ومخي معووج.. وش حادك علي..؟؟

طلقني واخلص مني..

كساب بحزم: قلت لش طلاق ماني بمطلق .. وبتطخين ..واللي في رأسش بيطيح وبترجعين من ورا خشمش..

كاسرة بدأت تنتفض من الغضب الذي لم يظهر في صوتها المتحكم:

أنت ماتفهم.. الحياة معك بالغصيبة؟؟ قلت لك ما أبيك.. نفسي طابت منك..

كساب بجبروت: بس أنا نفسي ماطابت منش.. وأنا اللي أقرر مهوب أنتي..

ثم أردف بتلاعب مثير:وعلى العموم أنا قلت لش ..أنا أبيش في موضوع مايخصنا..

بس أنتي لا سمعتي صوتي أدري تفقدين الإحساس ومايصير في رأسش شيء غيري..

كاسرة رأسها يؤلمها من ثقته الوقحة (أي مخلوق متبجح هذا؟؟

وما الغريب فيما يقول؟؟

الغريب إنه محق.. ما أن أسمع صوته لا يعود في رأسي سواه!!"

كساب أكمل ببساطة واثقة: خلينا الحين من طاري الطلاق..

لأنه حن في طاري زواج..

إبي يبي يتزوج أمش..

كاسرة تصورت أن الموضوع قد يكون أي شيء.. لكن هذا الأمر لم يخطر أبدا ببالها.. أبدا.. أمها تتزوج؟!!!

همست بصدمة وصوتها مبحوح تماما: نعم؟؟ من؟؟ أمي وعمي زايد؟؟

كساب بثقة: ليه إبي مهوب قد المقام..؟؟

أدري إنش تحبينه أكثر مما تحبيني..

يعني ماتبينه يكون أقرب لش أكثر ويصير أب وعم..؟؟

كاسرة حينها همست بثقة: لو حبيته أكثر فهو يستاهل.. عطاني سبب أحبه عشانه.. حنان ورجولة وتفهم ..

لكن أنت على ويش أحبك أساسا..

وعلى العموم على قولتك الموضوع مايخصنا..

بس أنا متأكدة إنك تمزح.. وهذا موضوع ما ينمزح فيه لو سمحت كساب..

لين هنا ووقف خبالك..

كساب بثقة غامرة لا تخلو من نبرته الساخرة الحادة التي يتميز بها:

ليه هذي كلها أنانية منش.. تبين أمش لش بروحش..؟؟

أو يمكن كاسرة اللي مايهمها حد.. خايفة من كلام الناس لا يقولون شوفوا أمها أعرست..؟؟

ترا هذا زايد آل كساب اللي متقدم لأمش مهوب أي حد..

كاسرة بثقة غامرة: وزايد آل كساب على رأسي.. بس كلامك مهوب منطقي..

لو إبيك يبي أمي.. أمي صار لها أرملة أكثر من 15 سنة..

وأمك الله يرحمها لها أكثر من 17 سنة من يوم ماتت.. ليش ماخطبها وهم عادهم شباب..

يعني الحين في ذا العمر يبيها؟؟ اسمح لي كلام مايدخل الرأس..

كساب بثقة: وليه أنتي شايفة إبي وأمش شيبان.. بالعكس الأثنين شباب والله معطيهم الصحة..

وشيلي من رأسش إنه كلام مايدخل المخ...

يعني عمش زايد حبيبش مايستاهل منش تأزرينه وهو اللي بداش حتى على ولده..؟؟

يعني هذا بيكون ردش عليه عقب مابداش عليّ وخلاش تمشين شورش؟؟

أمش رفضت إبي مرتين.. بتسمحين لها تفشله مرة ثالثة..

والحين إبي مهوب مثل ماكان قبل 30 سنة.. لا مكانته العالية ولا سنه يسمحون إنه ينرفض.. والرفض بيكون إهانة له...

إذا انتي عادي عندش إنه ينهان.. اعتبري نفسش ماسمعتي مني شيء..

ولو جاكم إبي يخطب ردوه..

واستخسري في أمش فرصة إنها تعيش اللي باقي من عمرها جنب رجّال تدرين زين وش كثر بيحترمها ويقدرها ويعوضها عن شبابها اللي ضاع..

بعد دقائق..

كساب بعد أن أنهى اتصاله مع كاسرة.. قام بإجراء اتصال جديد..

كما لو كان ذهنه يعمل على عدة مستويات..

أو كما لو كان اخطبوطا أذرعه تعمل على عدة اتجاهات..

اتصل بسليم مرافق الجد جابر ليسأله عن مكان الجد..

فأخبره سليم أنهما في مجلس زايد ولكنهما لم يجدا أحدا وسيغادران بعد أن ينتهي الجد من شرب قهوته التي حلف عليه المقهوين أن يشربها قبل المغادرة..

فطلب منه كساب أن ينتظرا لأنه سيحضر حالا لهما..

وصل للمجلس خلال أقل من دقيقة لينحني كساب على رأس الجد ويتأخر سليم ليخلي الجو لهما وهو ينضم للمقهوين قريبا من دلال القهوة..

بعد أن انتهيا من السلامات المعتادة همس كساب باحترام مخلوط بالمودة: بشرني منك يبه..

الجد بنبرة مقصودة: أنا طيب وش العلوم اللي عند شيبة مثلي.. يقول يا الله حسن الخاتمة..

أنت اللي وش علومك.. عاجبك حالك أنت ومرتك؟؟

أنا حالف عليك تسمي الولد الثاني امهاب عقب ماتسمي الولد الأول زايد..

والظاهر إنه لا به زايد ولا امهاب..

كساب ابتسم: والله يبه الظاهر إن بنتك غرها الغلا.. وش أسوي بها ؟؟

الجد تنهد وهو يرسم شبح ابتسامة: هيييييييييه ...الظاهر ياأبيك إنك نسيت وصاتي لك وأنت صغير ..

قلت لك بنتي مهرة تعسف بس ما تكسر.. وأنا أشوف من وجيعتها منك إنك تبي تكسرها..

كساب مازال مبتسما لا يعلم لماذا يشعر مع الجد بأريحية مطلقة كما لو أنك تتحدث إلى بئر عميقة صداها أكثر عمقا..:

يبه هي خلتني أعسف وإلا أكسر.. شلت شلايلها وهجت عندكم..

وعلى العموم يبه.. خل كاسرة شوي.. خلها لين يطيب خاطرها وبترجع..

الحين أبيك في سالفة أهم..

الجد بعتب: أفا يأبيك وش السالفة اللي أهم منك ومن مرتك..

ابتسم كساب: اللي أهم منا إبي وأمها..

الجد قطب جبينه بتساؤل قلق: زايد ومزنة.. عسى ماشر؟؟

حينها هتف كساب بمودة حازمة: مابه شر.. إلا خير.. نبي نزوجهم..

الجد حينها ضحك ضحة خافتة من القلب: الله يونسك بالعافية ياولدي.. لي شهور ماضحكت..

كساب يضحك معه ولكنه يعود ليهتف بجدية: ليه يبه لذا الدرجة متباعد الموضوع..؟؟ تراني أتكلم من جدي..

الرسول صلى الله عليه وسلم يقول: (ثلاث جدهن جد.. وهزلهن جد.. النكاح والطلاق والرجعة..)

يعني مستحيل أمزح في موضوع مثل هذا..

حينها قطب الجد جبينه: يأبيك.. من جدك ذا الحكي؟؟.. بروحك تقول مايجوز المزح في ذا السوالف..

كساب هتف بأكبر قدر من الجدية: والله العظيم يبه إنه من جدي..

إبي يبي يخطب عندك بنتك.. بس خايف تردونه.. وأنت داري قدر إبي مايسمح تردونه ثالث مرة..

حينها هتف الجد جابر بحزم: أجل قل له لا يخطب..

يا أبيك اللي مضى ماعاد يرجع.. أنا لو أنه بيدي كان قلت لك جيب المملك أملكه ذا الساعة..

بس مزنة ماقدرت عليها وهي أم 15 سنة.. أقدر عليها ذا الحين..

مزنة أم عيال ذا الحين.. ولا عاد لها في العرس حاجة.. جعل عمر تميم طويل..

كساب لم يتوقع مطلقا أنه قد يواجه هذه المعارضة من الجد الذي يحب زايد أكثر من ابن حتى..

لم يعلم أن معارضة الجد لم تكن معارضة في ذاتها.. فربما كان هذا الأمر من أكثر الأمور التي تمناها في حياته..

لكنه أراد أن يجنب زايد مرارة رفض ثالث يعلم أنه قادم لا شك..

فهو يعلم فعلا إنه إن كان لم يقدر على مزنة وهي صغيرة.. فكيف يقدر عليها الآن؟؟ كيف يقدر عليها الآن؟؟

تصاعد ضيق غريب في روح كساب.. إذا لم يسانده الجد.. فمشروع الزواج فاشل لا محالة..

حينها قرر تغيير الاستراتيجية واللعب على اتجاه آخر..

هتف كساب ببساطة حازمة: يبه ليه ظنك إبي يبي عمتي؟؟

الجد بنبرة قاطعة: وش يدريني يابيك.. يمكن عادها في خاطره من ذاك الزمان..

كساب بحزم وهو يقترب من الجد أكثر ليهمس في أذنه بنبرة اهتمام:

يبه عمتي مزنة لين الحين وهي حسرة في قلب إبي..

انتفض الجد: الحسرة في قلوب عدوين أبو كساب..

حينها ابتسم كساب: بس أنت تبي تخليها في قلبه لين يموت..

يبه ليه تباعد السالفة كذا.. بعيد الشر عنكم كلكم.. وجعل عمر تميم طويل في الطاعة..

حد ضامن عمره.. عمتي مزنة ماعندها إلا ذا الولد الله يخليه لها..

وبدون قصور في تميم.. لكن مهما كان بتحتاج لها حد يتكلم يسنع أمورهم ويخلص أشغالهم..

ولا خذت إبي بيصير عندها فوق الولد.. ثلاثة عيال..

الجد بدأ يشعر بالصداع من هذا التفكير.. هتف بذات تفكيره المحموم: هذا أنت ولدها..

كساب شعر بالانتصار لأنه علم أنه أثار بلبلة في ذهن الشيخ فهتف بثقة: يبه أنت عارف يباس رأس كاسرة.. لو مارضت ترجع لي..

أي ولد أنا... مهما كان مهوب طالبين مني اللي يبونه..

أنت داري إنه أول كنت أخلص لعمتي أشغالها وأكفي تميم.. لكن من عقب زعل كاسرة ماعاد طلبت مني شيء..

يبه طال عمرك..خل عمتي مزنة تضمن لها رجّال وعيال.. ولبناتها أب تدري إنه مهما صار لهم من عقبك إنه بيكون وراهم سند قوي..

يبه عمتي مزنة ماحد يقدر يغصبها.. بس على الأقل لا تقوي رأسها.. أنت عارف المصلحة وين ولازم تسويها...

*************************************

" يأمش ماتبين شيء؟؟"

جميلة بإرهاق وذبول وهي تحتضن زايد بين ذراعيها: لا يمه فديتش.. والله ما أبي شيء..

أساسا بارقد زايد وأرقد معه..

عفراء بقلق: يأمش.. بسش رقاد..

جميلة هزت كتفيها بيأس: ومن قال لش رقدت.. يمكن الحين أقدر أرقد عشان زايد قريب مني..

عفراء تحمل حقيبها وتهمس بحنان: إن شاء الله ما احنا بمبطين.. وعقب بأرجع أنا ومزون هنا.. مزون تحاتيش واجد وتبي تشوفش..

جميلة بذات النبرة الذابلة: خير يمه.. أنتظركم..

عفراء خرجت.. وجميلة كما لو كانت تنتظر خروجها.. لتعاود الإنفجار في البكاء..

إحساس مرارة وخذلان عميق يلتهم روحها..

لم تتخيل أبدا أن يكون هذا ختام حكايتها مع خليفة..

أن يبيعها بهذا الرخص!!

" هو باعني وحن عادنا في المطار..

وش فرقت الحين؟؟

مهوب أنا اللي كنت أبي أعطيه فرصة للاختيار ..هذا هو اختار..

زايد الصغير انفجر في البكاء.. جميلة كفكفت دموعها بجزع:

آسفة حبيبي آسفة.. روعتك...

وش أسوي بأختك الخبلة اللي تبكي على المقفي.. وهو مادرا عن هوا دارها..

خلاص لا تزعل علي.. وعد علي ما أبكي.. بس لا تبكي أنت فديتك..

********************************

" السلام عليكم يمه..

وين البنات؟؟ "

مزنة تضع الحاسوب الذي كانت تعمل عليه جانبا وهي تهتف بجبين مقطب فهي مازالت عاتبة على كاسرة:

راحوا لشعاع يهنونها سلامة أخيها.. ويشوفون لو هي تبي شيء يسوونه نيابة عنها لأنهم قدموا عرسها.. ويمكن ماتلحق تجهز شيء..

كاسرة همست بإرهاق: إيه والله نسيت.. وضحى قالت لي أصلا..

مزنة بذات الجبين المقطب: اللي ماخذ عقلش يتهنا به.. ما ألومش ماعاد لقيتي حد يتعلبش على الدرايش عشانش..؟؟

حينها ابتسمت كاسرة وهي تجلس جوار والدتها وتحتضن عضدها:

بس يمه مهيب حلوة فكرة إن حد يتعلبش الدرايش عشانش؟؟

تحسين كأنش أميرة في قصة خيالية..

مزنة بذات تقطيبها ونبرتها المقصودة: لا والله.. تدرين إني متضايقة واجد..

عشان كساب مهوب عشانش.. أجعته واجد في الحكي.. وماخليت شيء ماقلته له..

حتى شوفته حرمت نفسي منها وأنتي عارفة زين غلاه عندي.. وكله من سبايبش يا الأميرة..

حرقتي قلب الصبي لين تعلبش على الدرايش وسوى المنقود..

حينها اتسعت ابتسامة كاسرة وهي تهتف بنبرة مقصودة:

دامش مشتاقة له.. ومهوب هاين عليش زعله.. خلاص أرضيه.. وتزوجي إبيه..

مزنة انتزعت عضدها من ذراع كاسرة وهي تستدير بجسدها كاملا نحو كاسرة وتهتف بغضب:

المزحة السخيفة ذي لو سمعتها من وضحى أو سميرة.. يمكن أبلعها.. بس منش عاد...

كاسرة بثقة: وفعلا ليش أمزح في موضوع ما ينمزح فيه..

مزنة بذات الغضب: كاسرة تلايطي.. وعيب عليش ذا الكلام..

كاسرة تنهدت ثم هتفت بجدية صارمة: يمه أنا أتكلم من جدي والله العظيم.. عمي زايد يخطبش..

وش رأيش؟؟

مزنة وقفت وهي تهتف بحزم: رأيي إنش استخفيتي.. وعمش زايد استخف كنه موافق على ذا الخبال..

******************************************

" شعاع يا الخبلة

قومي.. فيه وحدة عرسها عقب 3 أسابيع وتبكي كنه ميت لها ميت"

شعاع تمسح وجهها المحمر من البكاء والذي ازداد مع شفافية الدموع شفافية فوق شفافيته وتهتف باختناق:

زين وش تبوني أسوي.. حاسة إني مخنوقة من كل صوب..

كنت مأجلة التفكير في كل شيء لين أتخرج.. كبوا كل شيء فوق رأسي..

سميرة بحماس: قومي يا الخبلة.. خلينا نسوي مخطط لش للأشياء اللي تبينها..

وإحنا بنسوي كل شيء.. هذا إحنا صيع ماورانا شيء لا رجعنا من الدوام

وأنتي أبد لا تشغلين بالش شيء.. حطي همش في المذاكرة..

شعاع بذات النبرة المختنقة : والله العظيم مالي نفس في شيء..

ليش أشتري وأتزين وأتعدل.. لمن؟؟

ورجالي أساسا تعبان وبدل ما نروح شهر عسل.. رايحين رحلة علاج..

وضحى بتشجيع: تتعدلين عشانش وعشان نفسش وعشان تحسين إنش عروس صدق..

وحتى لو رجالش المسكين مريض ماراح تفتحين نفسه شوي وتحسسينه إنه مهما كان عريس..

يا الله قومي قومي.. خلينا نسوي الجدول.. أنتي بس عطينا الميزانية.. والله لنخربها ونسوي لها اختلال..

**************************************

" يبه أنا أبي أسوي عرس للرياجيل بعد!!"

زايد يلتفت لعلي ويهتف باستغراب: نعم؟؟ تبي تسوي عرس؟؟

يأبيك أنت داري إنه أفرح ماعلي شوفتك بالبشت وأسوي لك عرس أعزم عليه خلق الله ومن خلق..

بس أنت فيك حيل تقعد قدام الرياجيل...؟؟

ابتسم علي بإرهاق: على قولت عمي اللي قالها لك (فيه شيء أبدى من شيء)

وهذا أنا الحين أحسن..

هذا أنا قاعد معك على الكراسي ماني بعلى السرير..

ومن يوم دخلت المستشفى وأنا أحسن لأنهم على طول مركبين على المغذي ويعطوني إبر فيتامينات وفاتح شهية..

يعني على وقت العرس بأكون أحسن بعد..

ويبه ربعي كلهم منتظرين عرسي.. وحتى الوزير كان يسألني يقول لي متى عرسك؟؟

مايصير الحين أعرس سكيتي.. مهيب حلوة في حق منظري قدام شغلي.. ولا حتى معارفك الواجدين..

ابتسم زايد: جعلك إن شاء الله في زود.. وقدرك كبير في عيون ربعك..

أبشر بالعرس اللي ماصار في الدوحة مثله..

والحين بأتصل في مدير مكتبي يستعجل طباعة الكروت...

وماراح يكون فيه مشكلة عنده لأن أسماء المعازيم مسيفة عنده من أيام عرس كساب..

معازيمي ومعازيمك ومعازيم عمك وكساب وجماعتنا اللي هم هم جماعة أبو عبدالرحمن.. كلها مخزنة عنده..

***********************************

" الحين تميم من البارحة لين اليوم وأنت منشف ريقي

قصدي تعبت إيدي عشان أطلع بسالفة تونسني منك"

تميم ابتسم وهو يشير لها: ليه أنتي خليتي لي مجال أتنفس..

أول مرة أشوف حد ممكن يهذر بالإشارة كذا..

هذا وأنتي باقي إشارات ماتعرفينها .. بكرة لا عرفتي كل الإشارات أشلون بألحق عليش..

سميرة تكبر في وجهه بطريقة كوميدية وتشير: الله أكبر.. تبي تطسني عين..

وإلا هذا كله عشان أساسا ماعندك سالفة أرز وجهي فيها..

حينها اقترب تميم منها أكثر ليمسح على خدها بسبابته.. لتتراجع هي بخجل ويكف يده وهو يشير بتقصد:

إذا أنتي طليتي في وجهي واحنا بزران ببراءتهم.. وتبين تحاسبيني عليها..

مهوب كافيش تغترين ذا الشهور كلها اللي حرقتي قلبي فيها وأنا ساكت..

أشوف عيونش وأتنهد.. واشوف شفايفش وأتنهد.. واشوف زولش وأتنهد......

سميرة قاطعته وهي تشير بخجل عميق وإحمرار وجهها الشفاف بدا كإحمرار الدم:

بس تميم خلاص..

تميم مستمر في الإشارة بذات التقصد وعيناه تطوفان بها:

لا مهوب خلاص..

تقولين لي وسع الخاطر.. زين باوسع الخاطر والله يصبرني..

بس بعد أنتي لا تصيرين صكة.. وأقل لمسة مني تجفلش..

تحسسيني كني وحش........

وأنهى إشارته بأن مد يده ليحتضن كفها.. حاولت أن تمنع دقات قلبات من التصاعد..

لا تعلم ما الذي يحدث لها ما أن تشعر بدفء أنامله.. أما حين شعرت بدفء أنفاسه على أناملها..

لم تستطع إلا أن تشدها وهي تشير له بدقات قلبها المتصاعدة:

طيب أنا أوعدك ما أصير صكة.. بس خلنا نسولف أول..

أبي أسألك عن شيء؟؟

تميم تنهد: إسأليني..

سميرة بإشارة مقصودة: وش رأيك في فكرة إن أمك تتزوج؟؟

ضحك تميم: أدري دمش خفيف وراعية نكت.. بس مهوب لذا الدرجة عاد.. تبين تزوجين أمي..

ومن تزوجينها؟؟ شايب في السبعين تخدمه أمي؟؟

سميرة بذات الإشارة المقصودة: خلنا نتكلم جد شوي.. وهي مجرد فكرة..

لا مهوب شايب.. وواحد توه في الخمسين وبصحته ومايبي أمك تخدمه..

تميم حينها أشار بضيق: ترا فيه أحيانا سوالف حتى الأخذ والعطا فيها يضيق الخاطر..

سميرة حاصرته أكثر: هذا كله تتهرب من الإجابة؟؟

تميم أشار لها بشكل مباشر: وليش أتهرب؟؟ طبعا لا.. مستحيل أوافق أمي تتزوج..

حينها تغير وجه سميرة وقطبت جبينها وهي تسأل تميم: وليه؟؟ شنهي أسبابك؟؟

تميم بجدية: مافيه رجال فيه خير يرضى أمه تتزوج..

سميرة بغضب: لا لا تقول مافيه رجال فيه خير.. قل مافيه رجال أناني ومظهره قدام الناس أهم عنده من أي شيء يرضى أمه تتزوج..

تميم أشار بغضب مشابه: أنتي تبين لش سبب تهادين عشانه؟؟... الحين أمي وش حاجتها تعرس.. الخير وواجد وعيال وعندها..

المرة تعرس لأنها تبي حد يضمها ويصرف عليها أو لأنها تبي عيال..

سميرة نظرت له بنظرة مباشرة: الحين أنا أشتغل وماني بمحتاجة إنك تصرف علي..

ويمكن الله ما يكتب إنه احنا نجيب عيال... نتطلق يعني بما إن هذا هو سبب الزواج الوحيد؟؟

تميم يتنهد وهو يحاول مجاراتها: لا طبعا.. لأنه الإنسان محتاج شريك روح قبل أي شيء..

حينها كما لو كانت سميرة أمسكت بصيد ثمين: وأمك يعني ماتستحق شريك حياة بعد مادفنت عمرها في تربيتكم..

مايحق لها تعيش اللي باقي من حياتها مع رجّال يكون فعلا سكن لروحها..

تعرف حالتك بتكون نعمة من رب العالمين... الناس بيتكلمون.. خلهم يتكلمون لأن كلامهم ماراح يوصلك ولا يوجعك..

تميم بغضب: ويعني عشاني ما أسمع.. أخلي أمي تتزوج.. وعادي خل الناس تأكل وجهي من وراي..

أنتي يعني عشان ماتبين تعطيني حقي.. سويتي هالمشكلة كلها عشان مجرد نظرية عمرها ماراح يصير..

خلاص قولي ما أبيك... بدل ما تحرقين أعصابي بذا اللفة الطويلة...

حينها وقفت سميرة وهي تهتف بتأثر فعلي عميق وتمنع نفسها من البكاء ليس لأجل موضوع زواج عمتها ولكن لأجلها:

تذكر في أول يوم لزواجنا لما ضربتني لأنك تشك فيني..

تميم شعر أن قلبه يعتصر بقوة.. لماذا تذكرت هذه الحادثة التي يريد نسيانها؟؟

ولكنها أكملت بذات التأثر العميق وصوتها يختنق بالعبرات وهي تستعد لمغادرته جالسا:

كنت تسأل نفسك.. ليش وحدة مثلي توافق عليك..؟؟

الحين أقول لك..وافقت لأني كنت أظن نفسي محظوظة فيك وأنا أحسبك رجّال مختلف..

كنت أحسب إن في داخلك عمق إنساني مافيه رجال ثاني يقدر يوصل له..

لكن أنت طلعت مثلك مثل الباقيين.. رجولتكم الرخيصة أهم عندكم من أي شيء ثاني..

منظرك طلع عندك أهم من أمك.. ومستعد تدوسها وتدوس مشاعرها عشان رجولة الخرابيط اللي لازم تحافظ عليها..

الرجّال صدق ما يظلم.. ولا يقهر.. ولا يشوف هله آداة لتغذية غروره..

ما أقول غير خسارة ظني فيك.. خسارة..!!

**************************************

كانت عالية نائمة حين رن هاتفها.. فقد اعتادت ألا تضعه على الصامت خوفا أن تحتاج والدتها شيئا وهي نائمة..

تناولت الهاتف بنعاس لتنظر للرقم المضيء في الظلام.. ردت بنعاس:

تدري إنك ماتستحي...

أجابها عبدالرحمن بابتسامة دافئة: وأنتي تدرين إن صوتش وأنتي نعسانة كذا يذبح..

أجابته بذات النعاس: وأنت شكلك تخرف والغيبوبة أثرت على مخك..

لاني يقولون لي إن صوتي مايفرق إن صوت أخواني..

إلا عاد لو صوت هزاع يذبحك هذا شيء ثاني..

عبدالرحمن ضحك: يا الخبلة فيه وحدة تقول لرجالها إن صوتها كنه صوت أخوانها..؟؟

عالية اعتدلت جالسة وهي تبتسم: والله أنا وحدة صريحة ..

وخصوصا إنه فيه ناس مخوفيني إنهم يكرهون الكذب وبيقصون رقبتي لو كذبت..

عبدالرحمن حينها هتف بدفء مقصود: أمانة عليش تقارنين صوتش اللي يذوب شرايين قلبي شريان شريان.. بصوت هزاع اللي كنه مكينة سيارة مخروقة..

عالية ضغطت جانبي رأسها بين إبهامها ووسطاها وهي تهتف بخجل طبيعي:

عبدالرحمن لو تبي تكلمني وأرد عليك قلت لك بلاه ذا الكلام وذا النبرة..

أو تدري بلاها تكلمني مرة وحدة.. تخيل منظري قدام هلي لو اكتشفوا إني أكلمك..

عبدالرحمن بابتسامة: الحين تبين أصدق إنش ماخفتي وأنتي تنطين عندي في المستشفى... بتخافين يكتشفون أنش تكلميني..

خلهم يكتشفون.. ماسويت شيء غلط.. أكلم مرتي وحلالي..

عالية أنا دكتور جامعة وداخل على 32 سنة وآخرتها تبيني أخاف أنه أحد يدري إني أكلم مرتي..

لو ذا السالفة مرعبتش خذت أذن من عمي خالد... وبلا ماتكونين مرعوبة لما تكلميني..

لأني مستحيل من الحين لين نتزوج أقعد ليلة وحدة ماسمعت صوتش..

عالية بجزع: لا عبدالرحمن تكفى.. ماتقول لأبي شيء.. مهما كان هذي عوايدنا..

عبدالرحمن بتلاعب: طيب ولو طلبت أشوفش... عمي خالد راعي دين.. ماظنتي يردني من شيء ربي حلله.. يعني شوفة شرعية مرة وحدة..

مع إنها المفروض قبل الملكة.. بس ماعليه.. على قولت المثل (العوض ولا الحريمة)

عالية تفجر وجهها احمرارا: تسويها عبدالرحمن من جدك؟؟ لا لا أكيد تمزح؟؟

عبدالرحمن بذات التلاعب الواثق: أفكر.. بصراحة فكرة مغرية يمكن ماتخليني أرقد الليلة من التفكير....

****************************************

صباح اليوم التالي

" هلا وش فيش صاحية بدري؟؟

مزون التي كانت ترتشف كوبها همست بمودة: بأمر خالتي ثم أبي أمر علي شوي.. وعقب أبي أخلص أشغالي.. لأنه العصر عندي محاضرة.. وماراح أخلص إلا عقب المغرب

ثم ابتسمت: ورانا عرس.. عرس.. لازم نلحق..

كساب ابتسم وجلس: شكلها عروس.. مهيب عرس واحد بس..

مزون تبتسم: لا ..ما نسينا إبيك.. بس هذا حالة سبيشل.. مابعد خلصت أنت جس النبض؟؟

كساب يتنهد: اليوم إن شاء الله أخلص.. وأنا يوم اتكلم عن عروس.. أقصد عرسش أنتي بعد.. ولا تتهربين مني..

ولا تظنينه خافي علي إنش تهربين.. ماتبين ولد الناس قوليها بصريح العبارة.. لا تعلقينه كذا..

شهر كامل تفكرين؟!!

مزون صمتت بخجل بينما كساب أكمل بجدية حازمة: البارحة كان غانم عندنا يزور علي..

والله العظيم وجهي منكسر منه...

اسمعيني.. لا تقولين علي وإبي.. هذا هم طيبين واثنينهم بيعرسون..

لكن لو سمعت خبالش بأفكر وافكر.. لين متى؟؟

عرس علي عقب 3 أسابيع وإبي بيسافر معه.. وما يندرى كم يقغدون..

خلاص الرجّال بيدري إن هذا رفض.. وليته حتى رفض بسنع.. سفهناه بدون رد..

اسمعيني تفكير... أدري إنش فكرتي بدل المرة ألف.. الحين تقولين لي ردش أبلغه فيه..

موافقة ..خلي ولد الناس يتملك قبل سفر إبي..

ما تبينه.. خلاص ابلغه ويشوف نصيبه..

الحين تقولين لي ردش.. الـــــحـــيـــن !!

*************************************

" سميرة وش فيش شكلش تعبانة؟؟"

سميرة بحياد مرهق: مافيني شيء؟؟

ثم أردفت بتساؤل: أنتي وش سويتي مع عمتي؟؟

كاسرة ابتسمت: رأسها يابس.. وأنتي مع تميم؟؟

تنهدت سميرة بألم: رأسه أيبس مرتين.. ماهقيته كذا..

حينها هتفت كاسرة بجدية: شكل ذا السالفة كلها مالها طريق.. مع إني والله العظيم تمنيت بشكل.. إنه صدق عمي يتزوج أمي..

سميرة حينها ابتسمت: أفا كاسرة تستسلم بذا السرعة.. تونا يا بنت الحلال مانزلنا بثقلنا في السالفة..

كاسرة بذات الجدية: ما استسلمت.. وتو الناس على ذا الكلام..

بس تدرين من اللي خايفة إنها تنسف السالفة كاملة ؟؟... وضحى..

لأني عارفة اللي بيصير.. إذا درت.. بتسوي مناحة وتبكي.. وأمي بتخليني..

وأمي لا شافت دموعها عصبت وحلفت مايصير شيء أساسا..

سميرة بقلق: ماظنتي وضحى عقلها صغير كذا؟!!

كاسرة بثقة: مهوب صُغر عقل.. لكن وضحى أصغر وحدة فينا.. الحشاشة.. وهي اللي حاسة إنها محتاجة لأمي أكثر شيء..

ولا تنسين إن وضحى حساسة واجد..

فاجئهن دخول وضحى عليهن وهي تهمس بابتسامة: سامعة اسمي.. وش تخططون علي..

ابتسمت سميرة: نبيش في سالفة!!

ضحكت وضحى: جايبين لي عريس... أخيرا بأودع العنوسة ؟!!

كاسرة بحزم باسم: ماعليه أنتي المرة الجاية.. الحين جايبين عريس لأمش!!

#أنفاس_قطر#

الثامن والستون من هنا

تعديل المقال

مدونة مكتبة حـــواء

رواية بين الامس واليوم الفصل السابع والستون 67 بقلم الكاتبة انفاس قطر