رواية مملكة العشاق الفصل الرابع عشر 14 بقلم اسماء ابو شادي
الحلقة (14) رواية( مملكة العشاق)
بقلم:-أسماء أبوشادي Ana Amera Habeby
________________________________________
سبحانك ربي لا إله إلا أنت إني كنت من الظالمين
يوم جميل
هادي ولذيذ مليان صخب
كل القلوب بتنبض
حتى المجروحين قلبهم بينبض بعشق وبعزيمة وإصرار على هزيمة الجراح والنجاة من الفراق
خرجت سيلين من قصرها بعد مافطرت هي وأسر
والنهاردة شاركها محمود الفطار وهي عملت كل الأكل اللي هو بيحبه على الفطار
ودا علشان تسترضيه ويسامحها على الكلام اللي ازعجته بيه امبارح
وكان فطار ممتع وخاصة إنها عزمت هاجر معاه
صحيح هي حاجة بسيطة جدا ودايما بتحصل أنهم بيتجمعوا على سفرة واحدة
لكن أن سيلين تخصها بالدعوة وتطلب منها تحضر للفطور وتشاركها مع اخوها الفطار
دي كانت لفتة مهمة جدا من سيلين اسعدتها
( حاجة بسيطة ممكن نعملها بدون ماتكلفنا أي حاجة. لكن بالنسبة لغيرنا جميلة جدا واسعدته ورفعت معنوياته لعنان السما. ماتبخلش بالسعادة على حد. علشان ربنا يرزقك بيها )
أما سما. خرجت بعد مافطرت مع أنس. الأخ اللي ربنا رزقها بيه في حياتها علشان يكون جنبها دايما
وتالين الأخت ليها والصديقة والشريكة
وأوقات بتحس أنها أمها. أيوة بتحس ان تالين بنتها ومسؤولة عنها وياويله أنس لو فكر يزعلها
( لما تحسي انك وحيدة بصي لغيرك. اللي مفتقد ناس كتير في حياته. وقتها بس هتتأكدي انك محظوظة. سواء بالاخوة. بنت او ولد. أو بالحب. أو الصداقة أو الوالدين. في ناس خسرت كل دول. انت لو خسرت حاجة منهم أحمدي ربنا واطلبي منه العوض )
أما شمس.
خرجت من بيتها وهي مبسوطة جدا. في قمة السعادة
وليه ماتبقاش سعيدة.
مرت بتجارب صعبة. وأحيانا يأست لكن ربنا ما اتخلاش عنها أبدا
دعائها كان يارب. وهو ماردهاش ولا رد دعائها
عوضها. بسعادة يتعجب لها أهل الدنيا
اتحرمت من آلام في حياتها
لكن عوضها بأن كل الستات اللي يشوفوها اعتبروها بنتهم
ابوها القاسي
عوضها عنه بأب روحي كان بيضحي بنفسه وكل حاجة في سبيل سعادتها وحتى لما مات وحست أن خلاص سندها راح
بعتلها زوج يقف معاها طول العمر. ويكون كل هدفه في الحياة هو اسعادها وراحتها
والأب اللي كان قاسي. بقى أحن أب في الدنيا وخرج من قلبه حب ليها يضلل على الكون من حرارة الشمس
( اطلبوا العوض من ربنا وماتيأسوش من رحمته. وعسى أن تكرهوا شيئا وهو خيرا لكم )
@@@@@@@@@@@@@@@@@@@@
في المطعم المتفق عليه علشان يتقابلوا فيه ويقضوا الوقت مع بعض ويتعرفوا على بعض
وصلت داليا و معاها رودي
وكمان شمس وجميلة
وفي نفس الوقت. وصلت سما وتالين و نها وسيلين
وقعدوا يتعرفوا على بعض واكتشفوا أن كلهم شخصياتهم بتتشابه في بعض الأفكار
وكمان الظروف
يعني نها. نفس ظروف تالين ويشبهوا ظروف رودي
شمس نفس ظروف سيلين اللي هي حلم الحضن من آلام اللي ولدتهم وجابتهم للدنيا
( لكن دي حقيقة ماحدش يعرفها غير سيلين )
وقضوا يوم حلو مع بعضهم واتغدوا سوا. وكمان دخلوا مطبخ المطعم
( طبعا لا سيلين من أصحاب المطعم فكانوا واخدين راحتهم على الآخر ولا كأنهم في بيت ابوهم )
ادام المطعم كان في عربية سودة واقفة بعيد ومافيش إي حركة حواليها علشان ماتلفتش الأنظار ليها
وبعد شوية اجتمعت اكتر من عربية من نفس النوعية لكن متفرقين
وبمجرد ماظهروا البنات على باب المطعم. وهما خارجين بيضحكوا
وسيلين كانت في المقدمة
وبتتكلم معاهم.
شمس / دا احنا قلبنالهم المطبخ يا عيني
رودي / دا لو مااكنتش سيلين صاحبة المطعم كانوا طردونا
نها / ولا حد يقدر يتكلم. دا احنا ياما عملنا بلاوي هنا. فاكرة يا سيلين لما رامي كان هيولع في المطبخ
( سيلين كانت بتبص للعربيات بأستغراب وبتتمعن في التفاصيل )
نها / سيلين. سيليييين. سرحتي في ايه
( سيلين شافت أبواب العربيات بتتفتح وبيخرج منها أشخاص باجساد مريبة وملثمين )
سيلين بفزع وهي بتدفعهم لداخل المطعم / ارجعوا لورا بسرعة. ادخلوا تاني حررررررس. امنوا المكان بسرعة
وفي خلال لحظات كانت سيلين دخلت المطعم معاهم و الحرس الخاص بيها والخاص بشمس. كانوا بيتبادلوا طلقات الرصاص بالسلاح مع الرجال مجهولين الهوية وكمان أمن المطعم اللي بدأوا باتخاذ الإجراءات الأمنية
وبدأت الصرخات تعلى بخوف و رعب
وللأسف الأفراد المهاجمين عددهم كان أكبر من الحرس وقدروا يشغلوهم بالحرب اللي بتحصل ادام المطعم
ودخلوا من الباب الخلفي للمطعم الخاص بالعاملين فيه
وبدأوا بإطلاق النار على اللي بيعترض طريقهم من الطباخين أو العاملين
**********************
في شركة مهاب العدلي
مهاب في مكتبه بيراجع أوراق شغل في ايديه. وموبايله رن
وشاف اتصال من كبير الحرس إلى بيرافقوا شمس
رد عليه وبمجرد ما فتح الخط
كبير الحرس / مهاب باشا الحقنا بسرعة. ابعت حرس تاني ودعم لينا
( وصوت الرصاص حوالين الحارس واصل لمهاب )
وبمجرد ما سمع وقف وخرج من مكتبه بعد ماساب كل حاجة حتى مااخدش الجاكتة بتاعة بدلته
مهاب / انتوا فين بالظبط أنطق
الحارس / أنا بعتت لحضرتك تحديد موقع المطعم اللي احنا فيه قبل ما اكلمك
مهاب وهو لسه بيجري / في شمس. هي معاكوا صح وكويسة صح
( لكن للأسف الحارس ماردش عليه لأنه سمع صوته وهو بيصرخ وبعدها سمع صوت الرصاص بس )
مهاب بجنون وهو نازل على السلم لأنه ماقدرش ينتظر الأسانسير. / الووووو الوووو
@@@@@@@@@@@@@@@@@@@@
أسر في طريقه للمطعم اللي الحمد لله قريب منه وتقريبا قريب من كل شركات تاج الدين
طول الطريق عقله واقف. مافيش في دماغه غير جملة واحدة
سيلين في خطر
حبيبته اللي حامل في ابنه ممكن يخسرهم في الوقت ده
القلب دقاته عنيفه وخوف و رعب من الفراق اللي مش قادر يستوعب فكرته
وطبعا كل الحرس اللي موجودين في الشركة والحرس الخاص بيه. وراه
ومحمود هو والحرس الخاص بيه والخاص بالشركة وكل الحرس التابع لعيلة تاج الدين. اللي موقع شركاتهم قريب من موقع المطعم. كانوا اتحركوا في طريقهم للمكان
@@@@@@@@@@@@@@@@@@@@
نور اللي في شركته. حس بنغزه في قلبه و وجع
وبدون اي مقدمات مسك تليفونه علشان يتصل بحبيبة عمره
@@@@@@@@@@@@@@@@@@@@
في المطعم
سمعوا صوت ضرب النار اللي جاي من اتجاه المطبخ
سيلين
المشهد بيتكرر ادامها
صوت رصاص وصرخات أطفال. و كلام بلهجة لبنانية. ودم. أطفال بيموتوا. وبنت بيغتصبوها. و عدنان بيموت
وفي وسط كل ده. بتبص حواليها علشان تفوء نفسها من الذكريات. ولاحظت شمس اللي بتبكي وتصرخ وهي حاطة ايديها على بطنها
و نها اللي وشها بقى شاحب ولونه أصفر وايديها الاتنين على بطنها
وافتكرت أنها كمان جواها روح تانية. يوسف. حلمها اللي لسه بيكبر جواها. مش هتسمحله يضيع مرة تانية
سيلين / اهدوا. اهدوا خالص. اتحركوا معايا بسرعة بدون ماتعملوا صوت
( في نفس الوقت ده تليفون سما رن وشافت اسم نور. وخافت تكون آخر مرة.تسمع صوته فيها. فتحت الخط بسرعة وحطته على ودنها وهي بتتحرك مع الباقيين )
نور بلهفة / سما. كنت خايف ماترديش ( وسمع صوت الرصاص حواليها اتفزع ). سما انتي فين. وايه الصوت ده
سما بخفوت / الوداع يا نور
( وسابت التليفون يقع من ايديها لأنها أعصابها مش متماسكة ومش عارفة تمسكه )
( وخدتهم سيلين في اتجاه الحمامات بسرعة. لكن قبل ما تدخل كان في
4 داخلين عليهم وفي أيديهم السلاح وشافوهم وهما بيدخلوا الحمامات ولحقوهم. اتوقعت أنهم هيضربوا عليهم رصاص. لكن قربوا منهم. )
تجاهلوا كل البنات. لكن اتنين منهم قربوا. على شمس وداليا ومسكوهم. وسط صرخاتهم. و واحد راح باتجاه سيلين علشان يمسكها. والأخير رافع السلاح في وش الباقيين
نها بصراخ / سيليييييين. ابعدوا عنها يا كلاب
رودي بصراخ وبكاء / سيبوهم حرام عليكم سيبوهم
( شمس كانت بتقاوم. اللي ماسكها من ايديها وبتحاول تدافع عن نفسها. و داليا بتتوسل للي ماسكها أنه يسيبها وبتبكي بهيستريا
أما سيلين كانت في حالة هدوء عجيبة. وبتحاول تفكر أو تعمل اي حاجة تنقذ الموقف )
سيلين / انتوا مين وعايزين ايه
***** / اتحركوا معانا بهدوء بدل مانستخدم معاكوا العنف
شمس برعب / نتحرك على فين.
سيلين بثقة مصطنعة وبتحاول تكسب وقت / وانتوا فاكرين انكوا هتخرجوا من هنا عايشين اصلا
****** / بلاش تضييع وقت واتحركوا
شمس / أنا مش هروح معاكوا. عايزين تاخدوني يبقى تاخدوني جثة. وأنا واثقة أن مهاب العدلي هيحرقكوا حيين
( اللي قالته استفز الأخير اللي رافع السلاح وبيراقب الطريق علشان يخرجوا بيهم. فقرب منها وهو ناوي على الشر. لكن قبل مايوصل في لحظة كانت سيلين ضربت اللي ماسكها بالمهارة اللي اكتسبتها من الرياضة ومن تدريبات فارس أولا و أسر ثانيا وفلتت منه وبسرعة البرق كانت مسكت ايده قبل ماتنزل على وش شمس. وبدأت تصارعه بالأيد وبتتجنب الضربات علشان بطنها لكن اللي كان ماسكها وضربته تحت الحزام وقف ومسكها من شعرها . )
وفي دقيقة كان وقع في الأرض اللي بيحاول يضرب سيلين واللي ماسكها من شعرها كمان
وحصلهم الاتنين الباقيين
وأسر ومحمود ظهروا و معاهم حرس كتير.
محمود / سيلين انتي كويسة
سيلين / اطمنوا كلنا كويسين
أسر ماسألهاش لكن هو كان بيجري عليها وحضنها جامد
وهو بيحضنها بس وراها على اللي مرمين في الأرض وسابها
أسر بعنف للحرس / الاتنين دول عايشين خدوهم على أي مستشفى تبعنا وشوفوا الاتنين دول كمان لو حد عايش فيهم خدوه معاهم. ويكون عليهم حراسة شديدة. أنا عايزهم عايشين. فهمتوا
سيلين / واللي برة يا أسر. الحرس اللي كانوا معايا
محمود / اهدي وماتفكريش في حاجة دلوقتي
ودخل مهاب. وهو بيجري لأنه شاف منظر الدم برة والجثث.
وبمجرد ماشافوه شمس و داليا جريوا عليه. وهو حضنهم. برعب وهو بيتفحصهم
مهاب بلهفة / شمس. داليا.
سيلين سابت حضن أسر وخرجت على برة. تشوف الحرس اللي كانوا معاها برغم أنها عارفة ان المنظر عيون بشع لكن دول ناس هي بتعتبرهم أفراد من عيلتها
وخرجت بقت تتفحص الجثث وشوفت الحرس الخاص باسر ومحمود بيساعدوا زمايلهم
سيلين بخفوت / في حد مات مننا
الحارس بحزن / أيوة حضرتك. وفي مصابين كتير واحنا منتظرين الإسعاف. وفي اللي ماكنش أصابتهم خطر خدناهم المستشفى في عربياتنا
وفي واحد تبع مهاب العدلي أصابته خطيرة و. وتقريبا بيلفظ آخر أنفاسه
سيلين جريت على الراجل اللي هو شاور عليه وقريت منه
سيلين بخفوت / ماتقلقش الإسعاف في الطريق
الحارس / ارجوكي. قولي لمهاب بيه. ولادي أمانة في رقبته
سيلين بدموع / أن شاء الله هتعيش لولادك بس انت اجمد كدة. علشانهم
الحارس بآخر أنفاسه / دي رسالة. وصليها. وقوليله دول أمانة في رقبته وهسأله عليها يوم القيامة ادام ربنا
( ومات الحارس ادام سيلين )
نفس المشهد. دم. دم دم.
سيلين برجاء / لا لالا. الله يخليك. أستنى. استنى علشان خاطر عيالك. يا عم. يا عم استنى
وأسر قرب منها وهي قاعدة في الأرض. و رفعها من الأرض
وحضنها. وهي بتحاول تتماسك وماتظهرش ضعف وخوف وكمان علشان اللي في بطنها
لكن اتنفضت لما سمعت صرخات من داخل المطعم.
فدخلت بسرعة هي وأسر
وشافت نها بتصرخ و تالين و سما بيسندوها
نها بصراخ / الحقينييييي بولد يا سيييييليييييين
سيلين / اهدي يا حبيبتي اهدي
محمود بدون مقدمات شال نها وجري بيها على عربيته. وحطها على الكرسي اللي جنبه في العربية وربطلها الحزام
وسيلين ركبت ورا هي وسما وتالين
محمود وهو بيتحرك بالعربية / خليك انت هنا يا أسر مع الشرطة. بس اتصل بفارس يحصلنا على المستشفى
أسر / ماشي بس خلى بالك وأنا هبعت وراك حرس
( مهاب كمان اخد شمس و داليا وراح وراهم على المستشفى. علشان يطمن على شمس والجنين )
أسر واقف والشرطة وصلت والإسعاف كمان والمكان بقى مليان بالناس أما صحافة أو إسعاف أو شرطة. أو فضوليين من اللي سمعوا صوت الرصاص وشهدوا على الاقتحام
وصل نور بعد ما خلاص روحه كانت طلعت على ما عرف مكان سما أو بمعنى أصح مكان تليفونها.
واتفزع من المشهد
دم في كل حتى واسعاف كتير بتشيل ناس
وفي ناس ماتت و وشها متغطي
أول ما وصل قلبه وقف
حبيبته فين
في الإسعاف مع المصابين
ولا مع اللي وجوههم متغطية
لالالالالا. هي عايشة قلبه حاسس أنها لسه عايشة
ماهي لو ماتت هيكون معاها
مستحيل تسيبه ويمشي هو اه مايستهلهاش لكن هيعوضها عن اللي حصل ومش هيزعلها تاني أبدا
لوحصلها حاجة هو مش هيقدر يعيش. بس هو اللي غلطان. أيوة. ازاي يسيبها لوحدها. زعلانة منه. تزعل في بيتهم. هو يسيب البيت إنما هي لاء
وكان المفروض حتى لو هي رفضت الحرس. هو يمشيهم وراها بدون موافقتها. مش يسيبها على راحتها. وأهي ضاعت منه خالص. لالا ماضعيتش.
نور دخل بسرعة رغم أن الشرطة محاوطة المكان والصحافة
نور بعنف للعسكري / بقولك اوعى من ادامي
انتبه أسر للصوت العالي هو والظابط اللي واقف معاه
أسر بصوت عالي / سيبه يا ابني
نور جري بسرعة على أسر بمجرد ماشافه وافتكره فوراً
نور / فين سما. فين مراتي. حصلها ايه
أسر / اهدا يا استاذ نور.اطمن المدام كويسة
نور / فين. هي فيييين
أسر بتقدير لحالته / في المستشفى راحت م
قاطعه نور بنفس الفزع / مستشفى. مستشفى ايه
أسر / يا ابني اهدا واسمعني لما أكمل. نها صاحبتهم بتولد وراحوا معاها المستشفى إنما هما كلهم كويسين ماحدش فيهم حصله حاجة
وعلشان تتأكد هما في مستشفى ******* روح شوفها
@@@@@@@@@@@@@@@@@@
في المستشفى
عيلة تاج الدين كلها وصلت المستشفى. و فارس وعيلة العدلي كلها برضوه وصلت المستشفى بالإضافة للدكتور عمر والدكتور أحمد
الخبر انتشر بسرعة الرياح
( ما احنا عايشين في مسر ( مصر ) ومن عادات المسريين ( المصريين ). أنهم مافيش فولة بتتبل في بؤهم )
نها جوا بتولد وبتصرخ. وفارس أصر أنه يحضر معاها الولادة جوا.
وسيلين برة. سناء وخداها في حضنها ومش عايزة تسيبها من وقت ما وصلت المستشفى بعد ما سمعت الخبر
وسيلين قلقانة على نها. و رامي واقف على أعصابه. اطمن على سيلين بمجرد ماشافها لكن مرعوب على نها
لأنه زي ماسيلين تعتبر اخته نها كمان اخته الكبيرة. اللي بيحس أوقات أنه اخوها الأكبر منها ومسؤول عنها مع أنها اكبر منه
و مهاب بعد ما اطمن على صحة شمس و داليا
و كل واحدة فيهم واقفة و معاها جوزها جنبها
وكلهم واقفين علشان يطمنوا على نها و المولود بتاعها
و مهاب حاول يعرف ايه اللي حصل لكن نظرا لتوتر الأجواء. ألتزم بالصمت واكتفى بقرب حبيبته وسلامتها
احند / رودي انتي مش كويسة تعالي نشوف دكتور يكشف عليكي جاير الضغط بتاعك واطي
رودي بخفوت / أنا كويسة يا حبيبي ماتقلقش. دا من قلقي على نها بس
هاجر بصوت عالي / أن شاء الله هتبقى كويسة. واللي اتعرضلكوا دول هيتدفنوا صاحيين علشان اتجرأوا بالشكل ده على أسيادهم
محمد / من غير ماتقولي. أسر لسه مكلمني وقال إن كلهم اتصفوا مافيش حد فيهم عايش
داليا / لا دا اللي كانوا معانا جوا واتهجموا علينا كان في منهم عايشين و
قاطعها محمود بحزم / لا يا مدام. ماتوا. مافيش حد عايش فيهم خالص
رامي / يعني ايه. طب ماكدة مش هنعرف مين اللي ورا الهجوم ده
محمود ببرود / لا اطمن الحكومة هتشوف شغلها وياريت تبطلوا كلام في الموضوع ده وركزوا في اللي انتوا فيه حاليا
صافي / فعلا. بلاش كلام هنا علشان الصحافة في كل حتة حوالينا.
نور بصراخ / سمااااااااا
سما بصت وراها شافت نور جاي جري في الممر
وفي لحظة كانت في حضنه بقوة لدرجة أن ضلوعها أوشكت أنها تتكسر وصدر عنها صوت
سما دموعها نزلت وهي في حضنه. الأمان بتاعها. هي محتاجة لحضنه اوى. بادلته الحضن بقوة وبرغم قوة الحضن وألم جسمها إلا انها ماحستش بآلام ولا وجع الجسم كل اللي مسيطر عليها الرعب اللي عاشت فيه من شوية
نور / فيكي ايه. حصلك ايه انطقي بسرعة
( سما بعدت عنه بحرج من الناس اللي حواليهم )
سما بدموع / اهدا يا نور أنا كويسة الحمد لله
نور / حصلك ايه فهميني. مين اللي اتعرضلك
سما / معرفش. معرفش اي حاجة يا نور كل اللي اعرفه اني شوفت ناس بتموت. وصحابي كانوا هيتخطفوا ادام عينيا
نور / خلاص اهدي. اهدي المهم انك بخير. الحمد لله. الحمد لله ( وبص لمهاب اللي قاعد على الكرسي ومراته في حضنه )
مهاب. انت كمان هنا
( مهاب بصله وهز راسه بموافقة لأنه ماعندهوش طاقة يتكلم )
سما / أيوة علشان شمس كانت معانا و داليا.وسيلين كلنا كنا سوا
نور بعنف / سيلين. أيوة. طبعا مالازم ده يحصل. اكيد دول تبع المافيا اللي هي وقعت معاهم من فترة. وانتوا كنتوا هتموتوا بسببها
أحمد / انت يا بتاع انت ألزم أدبك وماتتكلمش كدة عن أختي
نور ساب سما و قرب من أحمد وعايز يطلع كل الغل والسلبية اللي وجواه عليه. وأحمد كمان قرب منه بنفس الطاقة اللي محتاج يفرغها
مهاب قام بسرعة ومسك نور ومحمد مسك احمد من دراعه
مهاب / بس يا نور مش وقته الكلام ده وبعدين احنا لسه مانعرفش ايه اللي حصل
محمود وهو لسه واقف مكانه / أحمد. ارجع مكانك
أحمد بضيق / يا محمود انت ماسمعتش قال ايه
محمود بحزم / ارجع أقف مكانك. وانت يا استاذ نور. اطمنت على مراتك. وهي ادامك أهي لو عايز تاخدها انتوا أحرار مع بعض. إنما بعد. الكلام اللي انت قولته ده وجودك غير مرحب بيه
مهاب بحرج من تصرف نور / هو مايقصدش الموقف صعب ودا غصب عنه
محمود / الموقف صعب علينا كلنا. وسيلين اللي بيتكلم عنها. تبقى البشمهندسة سيلين تاج الدين. ومعروف هي مين. والمافيا اللي بيتكلم عنهم
الحكومات ماقدرتش توقعهم ولا تعرفلهم طريق. لكن هي قدرت وبكل بساطة تعمل اللي الرجالة ماقدروش يعملوه
وكونه يقف في مكان فيه سيلين تاج الدين دا شئ يفتخر بيه. وكونه مراته صاحبتها دا شئ يشرفها. ويشرف اي حد
ولو هو قال اللي قاله بدون تفكير وبسبب ضغط الموقف. يبقى يفضل أنه يبعد حاليا. لأن كلنا تحت ضغط الموقف لكن حاليا في حاجات أهم من مين السبب ومين المقصود وهي الناس اللي أتأذت وماتت وأولادهم اتيتموا و اللي حاليا بتصارع الحياة هي واللي في بطنها
( عند آخر جملة نطقها محمود تخص الناس اللي ماتوا والأولاد اللي اتيتموا. افتكرت سيلين الرسالة اللي لازم توصلها. و وقفت بسرعة بعد ماسابت حضن سناء )
سيلين / بعد اذنك يا محمود لحظة واحدة
استاذ مهاب. في رسالة ليك معايا من واحد من الحرس اللي تبعك
بيقولك ولاده أمانة في رقبتك
مسؤولين منك و آخر حاجة نطقها قبل ما يموت أنه هيسألك عليهم يوم القيامة ادام ربنا
هيسألك عن أمانته
شمس ببكاء / ماتوا يا مهاب. ذنبهم في رقبتي
سناء / اهدي يا بنتي علشان اللي في بطنك انتي كمان. دا قدره وماحدش بيقدر يغير نصيبه ومكتوبه أنه يموت في المكان ده واللحظة دي
مهاب بحزن على اللي ماتوا / ونعم بالله. سامعة يا حبيبتي. وإذا جاء الأجل لا مفر منه ولا مهرب. ولا يصيبنا إلا ما كتب الله لنا.
سيلين بقوة لمحمود / محمود. حق الناس دي لازم يرجع. وأولاد كل اللي ماتوا أو اتصابوا وأسّرهم مايحتاجوش إي حاجة أبدا ومسئولين مننا. والمصاب يتعالج حتى لو هنسفرهم برة سواء من الحرس أو اللي شغالين في المطعم أو حتى ناس كانت موجودة في المكان بالصدفة
محمود قرب منها واخدها في حضنه / اطمني يا حبيبتي وهدي بالك انتي. كل اللي قولتيه بالفعل بيتنفذ وهيتنفذ . سلامتك عندي بالدنيا وما عليها يا قلب اخوكي
سيلين بأبتسامة / ماتقلقش عليا أختك قوية. ومافيش حاجة تقدر تكسرني.
نور بخفوت / أنا آسف يا بشمهندسة سيلين
سما / وأنا كمان اسفة يا سيلين علشان السبب في اللي قاله نور
سيلين / خلاص أ حبيبتي علشانك انتي أنا قبلت الأسف
( وفي اللحظة دي خرج فارس ومعاه بنوتة زي القمر وهو لسه باللبس المعقم )
فارس بفرحة / سيلين. نها بتقولك خودي شوفي سيلين الصغيرة
سيلين بفرحة كبيرة / . الحمد لله. الحمد لله هي عاملة ايه
فارس / الحمد لله كويسة.
رامي بفرحة / بقيت خال يا بشرررررررررر. وعندي سيلين تقولي يا خالوه
أحمد / هو في ايه انت هتعمل نفسك خالها بالعافيه
رامي / هششششششش مش هرد عليك لأني بصراحة مبسوط
( وبرغم الحزن اللي في قلوبهم على اللي ماتوا إلا ان سلامة نها وبنتها فرحتهم جدا. )
وبعد ما اطمنوا على نها والبنوتة كل واحد اخد مراته و مشي. معادا فارس ورامي و سيلين اللي بقيوا معاها
ورامي رفض رفض قاطع أنه يمشي وكان رافض أن أحمد يشيل سيلين الصغيرة. و فرحان بيها جدا
@@@@@@@@@@@@@@@@@@@@
في قصر نور عز
سما بصوت عالي / يا نور لو سمحت سيبني أمشي أنا مارضتش اتكلم معاك ادام الناس وانت بتسحبني وراك زي البهيمة
نور بتماسك / اهدي يا سما واسمعيني. عايزة تزعلي براحتك تبعدي عني برضوه براحتك. في بيتنا هنا وأدام عينيا مش بعيد عني
سما / انت ليه مُصر تضغط عليا انا مش عايزة أعيش معاك يا نور افهم بقى
نور / للدرجة دي يا سما. بقيتي تكرهيني وتكرهي وجودي معاكي
سما / انت عارف و متأكد اني بحبك. و علشان كدة عايزة أبعد لأن وجودي معاك في مكان واحد عذاب ليا انا يا نور وبيفكرني بكل اللي انت عملته معايا
نور / ارجوكي. ارجوكي سامحيني. حاولي. افتكري أي حاجة حلوة بينا وسامحيني علشانها. سامحيني علشان خاطر حبنا و بنتنا يا سمايا
انتي قولتى كتير اللي بيحب بيسامح. وأنا بقولك سامحيني و اقسملك بالله ماهجرحك تاني أبدا. بصي هسيبلك وقت زي ما انتي عايزة علشان تسامحيني لكن تفضلي هنا. ادام عينيا علشان اطمن ولو وجودي هيضايقك ويسببلك الحزن. قوليلي امشي. وأنا والله همشي واسيب البيت لكن هتفضلي برضوه تحت عيني ارجو
قاطعته سما بتأثر / بس يا نور خلاص. أنا اللي برجوك كفاية. أنا ماقدرش اتحمل كدة. أنا هعمل اللي انت عايزه. عايزني أعيش هنا. هعيش هنا. وإذا كان على اللي انت عملته او اني اسامحك سيبها للوقت وهو كفيل يداوي جراحي منك
نور قرب منها وباس دماغها / ربنا يخليكي ليا
سما / بس بشرط ماتقربش مني أبدا. وكمان تطلع تنام في الأوضة اللي فوق
نور بفرحة / انتي بتتكلمي جد
سما / وأنا اللي هنزل أنام في الأوضة اللي تحت. لأن دي اصلا اوضتي أنا. وهنرجع للفترة اللي كانت قبل جوازنا لحد مانقدر نتخطى الوضع ده
نور بإحباط / اوامرك سمايا. بعد اللي شوفته من شوية أنا راضي منك بأي حاجة
سما / الحمد لله. الحمد لله. أنا هروح أصلي واتصل بأنس أبلغه اني جيت على هنا. علشان لما جالي المستشفى واطمأن عليا قولتله اني هحصله
نور / ماتقلقيش أنا كلمته واحنا لسه هناك وقولتله انك هترجعي معايا على هنا. وهو قالي هيجيب نورسين و العيلة وييجي علشان قلقانين عليكي
سما / طب كويس هدخل أصلي على مايوصلوا
نور / براحتك حبيبتي. بس انا هروح مشوار مهم وهرجع علطول
سما / اللي كنت بتتكلم عليه انت و مهاب و محمود اخو سيلين
نور / أيوة. خلى بالك من نفسك ولو احتاجتي حاجة كلميني
@@@@@@@@@@@@@@@@@@@
في قصر مهاب العدلي
بمجرد مادخلوا الجناح بتاعهم
مهاب حضن شمس جامد برغم أنها طول الوقت كانت في حضنه
مهاب بخفوت/ كنت مرعوب اخسرك
شمس / وأنا برغم خوفي و الرعب اللي عيشته والمنظر البشع اللي شوفته إلا اني كنت واثقة ان ربنا معايا وهينجدني وأنك مش هتسيب حد يأذيني
مهاب / بس انا اتأخرت يا شمس وكان ممكن على ما اوصل ( وسكت بخوف حقيقي )
شمس / الحمد لله. أنا وأبني بخير يا مهاب متقلقش
المهم ماتنساش الكلام اللي سيلين قالته. والولاد و
قاطعها مهاب / من غير ماتقولي حبيبتي. دول أمانة في رقبتي وأنا مستحيل اخون الأمانة
شمس / ربنا يقدرك يا حبيبي ويقويك ويخليك لينا كلنا
مهاب / أنا مضطر اسيبك دلوقتي شوية. لكن تكون عندك بسرعة
شمس / روح يا حبيبي وماتقلقش بس خلى بالك من نفسك
الحلقة (15) رواية( مملكة العشاق)
بقلم:-أسماء أبوشادي Ana Amera Habeby
_____________________________________
اللهم صلي وسلم وبارك على سيدنا محمد وعلى آله وصحبه أجمعين بإحسان إلى يوم الدين
في شركة تاج الدين الخاصة بالأمن تحت إدراة أسر. المقدم أسر سابقاً
وصل نور و مهاب مع بعض
طلعوا فوق والسكرتير دلهم على قاعة الاجتماعات
ودخلوا
كان موجود فيها. محمود ومحمد وأحمد و عادل وسامي
منتظرين وصول أسر.
عادل / اتفضلوا.
مهاب بترقب/ وصلتوا لحاجة
عادل / منتظرين وصول أسر
محمد بضيق/ راح فين ده بس . مش اتصل وقال هنتكلم هنا علشان نفهم اللي حصل
محمود / ياريت نهدا شوية. هو مش بيلعب. واكيد تأخيره دلوقتي له سبب
نور / ماحدش من الكلاب دول اتقبض عليه
سامي / لسه مانعرفش تفاصيل ومفروض أن أسر هيقولنا دلوقتي
ودخل أسر وهما بيتكلموا. وكان شكله عنيف جدا و هدومه مليانة دم وملامحه مخيفة
عادل / كنت فين و اتأخرت ليه يا ابني احنا منتظرينك من بدري
أسر / اسف يا بابا . اتفضلوا اقعدوا
مهاب / يا ترى عرفت تفاصيل عن اللي حصل
أسر / عرفت تفاصيل كتير وتقريبا دي أهم حاجة.
اللي حصل كان مقصود منه خطف سيلين تاج الدين و شمس العدلي مراتك يا استاذ مهاب و داليا بنت عمك و زوجة الدكتور عمر
مهاب صعق برغم انه كان متوقع الكلام ده
أسر كمل كلامه وهو بيعرض حاجة من اللاب توب على شاشة عرض كبيرة مواجهه ليهم / و وجود الباقيين كان مجرد صدفة مش اكتر. وتجمعهم مع بعض كانت فرصة حلوة لتنفيذ أهدافهم التلاتة في وقت واحد وبسهولة لأنهم بعيد عن محيط الحراسة المشددة اللي بتحيط بيهم التلاتة تقريبا طول الوقت
( وبدأ الفيديو يشتغل ويتعرض عليه لحظة اقتحام المطعم. و وأعتدائهم على البنات )
وبعد مشاهدة الفيديوهات كاملة من داخل وخارج المطعم
أحمد / عرفت مين الأوساخ دول
آسر / في منهم مصابين في المستشفى وقدرت استجوب فردين منهم لكن ماكنش عندهم معلومات كتير
محمود / اللي كانوا جوا وعايزين يخدوهم مش لسه عايشين اكيد دول عندهم معلومات أكتر
أسر / الاتنين اللي انت ضربتهم ماتوا. أما الاتنين اللي انا ضربتهم الإصابة مش في مقتل. يعني عايشين وهنقدر نستفيد منهم
لكن مش دلوقتي لما يفوقوا الأول
نور / طيب ماقدرتش توصل لمعلومات تانية
أسر / المعلومات دى ممكن تكون عند مهاب العدلي
( مهاب كان بيفكر مين ممكن يعمل كدة من اعداءه أو منافسينه لكن انتبه على صوت أسر )
مهاب / أنا في احتمال عندي لكن لسه مجرد تخمين مش أكتر
محمود / حتى لو مجرد تخمين قوله. لازم ندرس كل الاحتمالات.
لأن اللي كان عايز يأزي اللي يخصك كان برضوه هيأذي اللي يخصنا
أسر / صحيح واحنا لازم نفكر في كل الاحتمالات سواء أعداء ليك أو لينا. ومين فيهم العداوة كبيرة للدرجة دي
ومين عايز يلوي الدراع بخطف اللي يخصنا ويهددنا بيهم
لأنهم نيتهم كانت واضحة جدا
مهاب / اكيد هعمل كدة. وقبل إي شئ انا عايز اقولكم ان اللي عملتوه ده هيفضل دين في رقبتي لحد ما اموت
عادل / ماتقولش كدة. ماحدش له افضال على حد
مهاب / انتوا ليكوا. انتوا انقذتوا روحي و البشمهندسة سيلين. الحركة اللي عملتها مع شمس وعدم سماحها للكلاب أنهم يلمسوها. عمري ماهنساها أبدا
أحمد / دي عادة سيلين. مابتحبش حد يتأذي ولا بتتسبب في أذية حد.
نور بحرج لأنه عارف ان الكلام موجه له / أنا اعتذرت من البشمهندسة وهي قبلت اعتذاري. واتمنى ماتكونوش لسه متضايقين من الكلام اللي قولته
محمود /. طلاما عرفت غلطك تمام يا استاذ نور وماتعتذرش تاني خلاص انتهى الأمر
مهاب / طيب نستأذن احنا. وأن شاء الله بكرة هموم مجمع كل المعلومات عن اللي أشك فيه واللي في محور الشبهه
أسر / وياريت تنتبه مش بس اللي تشك فيه. لأن غالبا الضربة بتكون كن حد مش متوقعينه ولا شاكين فيه
@@@@@@@@@@@@@@@@@@@@
في المستشفى
أسر وصل بعد ما خلص الاجتماع اللي كان في شركته
واخد شاور و بدل هدومه في الشركة
وصل الجناح اللي نها موجودة فيه
وشاف رامي واقف والبيبي بين ايديه وفارس واقف معاه في الصالون الملحق بالجناح
أسر / انتوا واقفين كدة ليه
فارس / الدكتورة بتطمن على نها و معاها يلين جوا واحنا منتظرينها تخلص كشف
رامي وهو بيعطيه البيبي/ خود شوف سيلين الصغيرة
أسر / بسم الله ماشاء الله انتوا هتسموها سيلين
فارس بأبتسامة / أيوة. احنا كنا مقررين كدة بس قولنا هنعملها مفاجأة
أسر / احلى مفاجأة. ربنا يباركلكوا فيها
فارس / عقبال مايوسف يوصل بالسلامة
أسر / يارب
الباب اتفتح وخرجت سيلين و معاها الدكتورة
سيلين / حبيبي اخيرا جيت
( أسر هز راسه بمعنى الموافقة. وفضل معلق نظره عليها وبس )
الدكتورة طمنتهم على نها وصحتها. ومشيت.
وفارس لاحظ نظرات اسر لسيلين فأخد منه البيبي وشاور لرامي وسابوهم ودخلوا عند نها وقفلوا الباب وراهم
أول مادخلوا وأسر سمع صوت الباب اللي اتقفل اخد سيلين في حضنه بقوة
أسر بخفوت و وجع / اااااااااه يا سيلين.لو تعرفي حسيت بأيه على ماوصلتلك وشوفتك
لو تعرفي العذاب اللي اتعذبته وأنا في طريقي ليكي. لو تعرفى الوقت مر عليا ازاي لحد ماشوفتك واقفة ادام عينيا
لو تحسي بالنار اللي جوايا لما شوفته ماسك شعرك اااااااااااه
سيلين / خلاص يا حبيبي الحمد لله. كان كابوس وانتهى
أسر / تعبان اوى يا سيلين. تعبان اوى ومحتاج انك تفضلي في حضني كدة
سيلين / أنا في حضنك يا حبيبي. وكويسة وابننا بخير ودا فضل من عند ربنا
أسر / أول جالي الخبر. وطول الطريق كان بيتردد في عقلي كلامك امبارح عن الموت والفراق. وقتها.شياطيني كلها طلعت. كنت بضرب بالرصاص وأنا برة في مقتل. عامل زى الآلة بدون شعور. اقتل وبس
ولنا اخيرا دخلت جوا و شوفتك بعينيا وهما بيحاولوا يمدوا ايديهم عليكي. كل اللي سيطر عليا العنف والأذى والغل لكن انتي كنتي اهم عندي من كل ده
و الاتنين اللي لمسوكي ماقتلتهمش. لأن القتل هيبقى ليهم رحمة عن اللي هيشوفوه مني
سيلين/ انت ماسلمتهمش للشرطة
أسر / الشرطة اخدت كل الجثث والمصابين إلا دول بالذات هما. اللي مايعرفوش عنهم حاجة اصلا
سيلين / طيب ليه يا أسر مش فاهمه
أسر / سيلين. مش وقته تفهمي ارجوكي. أنا مش قادر اتكلم.
سيلين / خلاص يا حبيبي اسفة اني بضغط عليك وصدقني أنا هاين عليا اخدك في حضني وأفضل كدة طول الليل علشان تصدق اني كويسة لكن غصب عني ماقدرش اسيب نها
أسر / عارف. عارف. وبعدين مين قالك انك هتطلعي من حضني. أنا هفضل معاكي هنا. مش همشي
سيلين / حبيبي انت لازم تروح البيت علشان تنام وترتاح
أسر / راحتي في قربك
@@@@@@@@@@@@@@@@@@@@
في قصر نور عز
نور وصل للقصر
وقابل سلوى و أنس وهما خارجين
نور / انتوا ماشيين ليه
سلوى بجمود / اطمنا على سما و وصلنا نورسين. مافيش حاجة تانية نستنا علشانها
نور / انتي لسه زعلانة مني يا ماما
انس باقتضاب / ولا زعل ولا حاجة المهم سما جوا أهي في بيتك هي وبنتك. ياريت تحافظ عليهم بقى علشان مش كل مرة. هتيجي سليمة
سلوى / خلاص يا أنس ملهوش لازمة الكلام ده والحمد لله انها بخير
( نور قرب منها واخد ايديها و باسها. وراسها كمان )
نور / حقك عليا انا اسف. سامحيني والله ما هتتكرر تاني
سلوى / يا ابني أنا مش زعلانة. بس كمان انت من بعد وفاة والدك وانت اتغيرت خالص. يا حبيبي دي إعمار بيدي الله وكلنا هنموت
ذنبها ايه بنتي تتحمل كدة
واحنا ذنبنا ايه علشان ماتدخلش بيتنا وحتى لما كانوا هيباتوا تقولي سما تبات إنما نورسين لاء. من امتى الكلام ده ما أهي من يوم ما اتولدت وهي كانت بتيجي عندنا وتشبط وتنام في حضني وكان مرة انت وأمها تكونوا عندنا وتمشوا لوحدكم وتسيبوها معايا. ايه اللي اتغير دلوقتي
نور / اللي اتغير اني مابقاش ليا غيرهم. ومابقدرش أبعد عنهم أبدا. أنا وقتها بقولك خلي سما. كان علشانك. أيوة أنا غلطان وكنت أناني.بس غصب عني والله وياريت تسامحيني
سلوى / عيب عليك تقول مالكش حد. اومال احنا فين. مش دايما تقول عيلتك عيلتك. دلوقتي خلاص. مابقناش اد المقام يا نور
نور / لا والله العظيم ربنا يعلم. حقك عليا. واللي انتي عايزاه اعمله. بس تسامحيني و تدعيلي
سلوى بأبتسامة/ يا حبيبي أنا مسمحاك. وربنا يعلم أنا بدعيلك المهم خلي بالك من سما و نورسين
نور بفرحة / من عينيا. ربنا مايحرمنا منك أبدا
انس / يلا بقى علشان اتأخرنا
نور بحدة مرحة / وانت ياض هتفضل قالب وشك كدة كتير ولا ايه.
انس / نعم عايز ايه في حاجة. ولا جاي تتهمني بخطف مراتك وبنتك تاني
نور / انت عبيط يلاّ. انت اخرك تخطف قطة. دا أنا كل ما افتكر اني سألتك عليهم استعبط نفسي والله.
انس / كويس انك عرفت ان انت عبيط
نور مسكه من هدومه / قولت ايه سمعني كدة تاني
انس بخوف مصطنع/ ماقولتش حاجة. انتي سمعتي حاجة يا طنط
سلوى بضحك / ربنا يديم المحبة بينكم يارب.
انس / محبة ايه. انتي مش شيفاه ليعمل ايه معايا
سلوى / اخوك. ايه المشكلة. يعني
نور / تسلميلي يا قلبي
*****************
سما كانت سامعة كل كلامهم ومبسوطة جدا. ولما شافت نور داخل بعد ما هما مشيوا
راحت داخلة جوا بسرعة وقعدت على الكرسي
نور دخل وشاف سما وهي قاعدة قرب منها وراح حاضنها بشوق وحب
سما بتحاول تبعد عنه / نور احنا اتفقنا على ايه
نور.برجاء وهمس مغوي / مش أنا حبيبك ونور حياتك وأول واخر حب في عمرك
ارجوكي. أنا بموت ومحتاج أخدك في حضني اوى. صدقيني هموت لو نمتي النهاردة بعيد عني.
سما بارتباك / احنا اتفقنا يا نور
نور وهو بيحرك ايديه على تفاصيل جسمها / عادي يا حبيبتي. الاتفاقات اتعملت علشان تتلغي
بصي النهاردة نبقى مع بعض ونبدأ الاتفاق من بكرة
( وهمسة ثم لمسة. دابت سما بين ايديه و استسلمت لاشتياقها )
وقبل مايشيلها علشان يطلع اوضتهم. سمعوا صوت نورسين بتنادي على سما
نورسين / يا مامي. يا مامي
نور بصوت مبحوح / ايه يا سيلين. عايزه ايه من مامي يا حبيبتي
نورسين كانت خرجت من الأوضة اللي كانت أوضة نور سابقا واتفقوا تبقى أوضة سما وقربت منهم وحضنت نور اللي بعد فورا عن سما. و سما اللي فاقت وبتظبط هدومها وشكلها
نورسين / مستنياها علشان ننام يا بابي
نور / حبيبتي مش قولنا انتي شطورة وبتنامي لوحدك
نورسين / لا يا بابي ما خلاص. أنا ومامي هنفضل ننام مع بعض علطول
نور / نعم ودا مين اللي قال كدة إن شاء الله
نورسين ببراءة / أنا يا بابي.ليه انا انام لوحدي ومامي تنام لوحدها لما ممكن ننام أنا وهي مع بعض واخد مامي في حضني
نور بحزن مصطنع/ يعني تناموا مع بعض انتوا الاتنين وتاخدي مامي في حضنك وأنا انام لوحدي
نورسين / خلاص يا بابي ماتزعلش. مش هسيبك تنام لوحدك
نور / يعني هتروحي تنامي في أوضتك يا حبيبتي
نورسين / لاء. انت كمان هتنام معانا وفي حضني زي مامي
نور بإحباط / طيب. هو أنا أطول انام في حضن نورسين. قلب بابا
( سما كبتت ضحكتها على شكله وهو متضايق ودخلت الأوضة اللي هيناموا فيها وبتحاول تخبي فرحتها عنه )
سما غيرت هدومها ولبست بيجامة كت ببنطلون استيرتش لونها أصفر. ( وهي عارفة ان نور مش بيحب اللون ده أبدا )
نور نام بغيظ على السرير و سما نامت على الطرف التاني و نورسين نامت في الوسط
نور / حبيبة بابي ممكن تيجي تنامي جنبي هنا
نورسين م لا يا بابي هناك في الوسط علشان اكون جنبكم انتوا الاتنين واحضنكم سوا
نور / ما انتي بتحضني مامي كتير سيبيني أنا اح
قاطعته سما / نوووور. بس
نور بحنق / بقالك ساعة ساكتة ودلوقتي. نوووور بس
سما بضحكة مكتومة / بس يا نور علشان نورسين تعرف تنام
( بعد شوية نورسين نامت وهما الاتنين لسه صاحيين )
نور بهمس/ سما. سما
سما بهمس / ايه عايز ايه
نور / طيب لفي وشك بصيلي طيب طلاما صاحية.
سما لفت وشها / نعم
نور / بحبك اوى. وبرغم انك مش في حضني لكن كفاية انك جنبي على سرير واحد
سما / بس يا نور علشان نورسين هتسمعنا
( في حركة خاطفة كان نور جنب سما. و نورسين على الطرف واخدها في حضنه )
سما بخجل وتوتر / نور أبعد البنت
( نور اخدها في حضنه وحط شفايفه على شفايفها بجوع واشتياق. وفي خلال ثواني. حست بنفسها بين ايديه وشالها و بهدوء بدون ماشفايفه تسيب شفايفها وخرج بيها وطلع اوضتهم فوق
وقضوا ليلة من ألف ليلة وليلة
هي عاتبته وهو اعتذر وهي سامحته وهو احتفل بالبداية الجديدة. وهي شاركته الاحتفال
وزى ماقولنا قبل كدة
الحب بالحب
العشق بالعسق
الشوق بالشوق
النار بالنار
@@@@@@@@@@@@@@@@@@@
صباحا في قصر أسر تاج الدين
وصلوا كلهم من المستشفى بعد ما أصرت سيلين أن نها وفارس يفضلوا عندهم كان يوم لحد ميعاد السبوع. ويبقوا يروحوا يعملوه في بيتهم. زي ما أصر فارس
العيلة كلها كانت منتطراهم بفرحة كبيرة. وبيرحبوا بالمولودة الجديدة كأنه عيد للكل
و نها شافت اهتمام ورعاية بيها و ببنتها كأنهم أهلها فعلا مش بس أهل صديقتها وده المعتاد منهم
وخصوصا أخوات سيلين. مبسوطين بيها جدا وخصوصا ان اسمها على اسم أغلى انسانة عندهم
##############################
فات أسبوع
الحمد لله
الوضع مستتب
العشاق اتلاقوا من تاني في نقطة العشق
نور و سما
سما رجعت لشقاوتها وماشية على خطة سيلين ونصيحتها
نور أسعد عاشق في الأرض ومبسوط بشقاوة سما
بيتعصب وبيتضايق. لكن مجرد النظرة في عيونها ويشوف السعادة والشقاوة بيكون في دنيا تانية
مهاب وشمس
حياتهم جميلة هادية متفاهمه. لكن شمس بتزيد في الدلال و مهاب معاها. وبعد ما كانت بتشتكي من اهتمامه الزايد بقت عايزة اكتر. ومابتشبعش واستغلت الحادثة اللي حصلت في كدة
سيلين وأسر
سيلين احتوت أسر بعد الحادثة وبرغم وجود نها في بيتهم 5 أيام إلا أنها زي ما كانت بتهتم ب نها اهتمت بيه.
وأسر مبسوط جدا. واتخطا الموضوع اللي حصل وخوفه عليها و رعبه
و وجود نها وفارس عندهم. و سيلين الصغيرة كان بيعطيه طاقة جميلة جدا ومنتظر ابنه بفارغ الصبر
نها وفارس. قعدوا 5 أيام في بيت أسر و سيلين وبعدين رجعوا بيتهم علشان يعملوا السبوع هناك
وطبعا كل العيلة كانت بتساعدهم بفرحة حقيقية
هاجر. منشكحة جدا بدور مرات الكبير و اهتمامها بالنادي والجمعيات قل جدا واقتصر على التمويل بالفلوس ومساعدة المحتاجين
ولما اختاروها لرئاسة الجمعية. رفضت بكل كبرياء وترفع. وقالت إنها مش محتاجة لمنصب علشان تساعد الناس.
محمود افتخر من موقفها جدا وطبعا الكبرياء والغرور اللي جواه زادوا ومبسوط بأهتمامها بيه و بالعيلة
وببنتهم اللي تقريبا ماكنتش تعرف حاجة عنها. ودايما نورا هي اللي بتهتم بيها وطبعا الدادة وسناء
******************
الشباب اجتمعوا وبمعرفة أسر ومساعدة الشرطة. توصلوا لأن اللي عملوا الاقتحام رجال أعمال مشبوهه ليهم علاقة بالمافيا وشغلهم مشترك. كانوا على عداء مع مهاب العدلي بسبب أنه رفض يشتغل معاهم وفي صفقات رافضها وكانوا عايزين يضغطوا عليه بداليا و شمس
وكانوا عايزين سيلين علشان انتقام للي ماتوا و هما ماكنوش هيأذوها بس لما عرفوا أنها موجودة معاهم في نفس المكان و راقبوا تحركات شمس اللي كانت دايما معاها. وقرروا يستغلوا الفرصة وياخدوهم مع بعض
المخابرات بدأت شغلها وتحرياتهم علشان يقبضوا على الأشخاص الموجودين داخل مصر
وطبعا بمساعدة مهاب وأسر و سيلين. اللي هي كمان واخدة الموضوع انتقام
انتقام للبنات اللي كانوا بيتباعوا
انتقام للأطفال اللي اتخطفوا وماتوا
انتقام للي اتسرق اعضائهم
انتقام لعدنان.
انتقام لكل الشرور اللي ارتكبوها
#############################
النهاردة سبوع سيلين الصغيرة
الضيفة الجديدة.
وكان سبوع ماحصلش. وتقريبا الكمبوند كله. كان متزين والأطفال كلهم كانوا مبسوطين ورامي كان في حالة من الجنون بسبب الفرحة
بيغني ويرقص مع الأطفال ويهيص ويوزع فشار شوكولاتة على كل الكمبوند
طبعا العشاق كلهم اتجمعوا في السبوع وكانوا مبسوطين جدا
نور و سما أيديهم في ايد بعض
وبنتهم بتلعب مع الأطفال
و تالين طبعا بما انها انضمت للحزب النسائي جت هي وأنس وابنهم
و رودي و جوزها و داليا وجوزها وجميلة و جوزها
وشمس و مهاب.
وطبعا عيلة تاج الدين كلها موجودة وهما المستضيفين
وعيلة فارس وأهله كلهم موجودين هما كمان
والفرحة دخلت القلوب
@@@@@@@@@@@@@@@@@@@
انتهى اليوم السعيد
وأحمد و رامي الثنائي المشاكس اخيرا اتفقوا على حاجة وقرروا ينفذوها بمجرد مايوصلوا البيت
تاني يوم الصبح. كان يوم الجمعة إجازة للعيلة. وكالعادة عيلة تاج الدين اتجمعت كلها ويقضوا اليوم سوا والمرة دي التجمع كان في قصر عادل تاج الدين
وبعد الغدا
أحمد و رامي في نفس الوقت/ احنا عايزين نتجوز
بقلم:-أسماء أبوشادي Ana Amera Habeby
________________________________________
سبحانك ربي لا إله إلا أنت إني كنت من الظالمين
يوم جميل
هادي ولذيذ مليان صخب
كل القلوب بتنبض
حتى المجروحين قلبهم بينبض بعشق وبعزيمة وإصرار على هزيمة الجراح والنجاة من الفراق
خرجت سيلين من قصرها بعد مافطرت هي وأسر
والنهاردة شاركها محمود الفطار وهي عملت كل الأكل اللي هو بيحبه على الفطار
ودا علشان تسترضيه ويسامحها على الكلام اللي ازعجته بيه امبارح
وكان فطار ممتع وخاصة إنها عزمت هاجر معاه
صحيح هي حاجة بسيطة جدا ودايما بتحصل أنهم بيتجمعوا على سفرة واحدة
لكن أن سيلين تخصها بالدعوة وتطلب منها تحضر للفطور وتشاركها مع اخوها الفطار
دي كانت لفتة مهمة جدا من سيلين اسعدتها
( حاجة بسيطة ممكن نعملها بدون ماتكلفنا أي حاجة. لكن بالنسبة لغيرنا جميلة جدا واسعدته ورفعت معنوياته لعنان السما. ماتبخلش بالسعادة على حد. علشان ربنا يرزقك بيها )
أما سما. خرجت بعد مافطرت مع أنس. الأخ اللي ربنا رزقها بيه في حياتها علشان يكون جنبها دايما
وتالين الأخت ليها والصديقة والشريكة
وأوقات بتحس أنها أمها. أيوة بتحس ان تالين بنتها ومسؤولة عنها وياويله أنس لو فكر يزعلها
( لما تحسي انك وحيدة بصي لغيرك. اللي مفتقد ناس كتير في حياته. وقتها بس هتتأكدي انك محظوظة. سواء بالاخوة. بنت او ولد. أو بالحب. أو الصداقة أو الوالدين. في ناس خسرت كل دول. انت لو خسرت حاجة منهم أحمدي ربنا واطلبي منه العوض )
أما شمس.
خرجت من بيتها وهي مبسوطة جدا. في قمة السعادة
وليه ماتبقاش سعيدة.
مرت بتجارب صعبة. وأحيانا يأست لكن ربنا ما اتخلاش عنها أبدا
دعائها كان يارب. وهو ماردهاش ولا رد دعائها
عوضها. بسعادة يتعجب لها أهل الدنيا
اتحرمت من آلام في حياتها
لكن عوضها بأن كل الستات اللي يشوفوها اعتبروها بنتهم
ابوها القاسي
عوضها عنه بأب روحي كان بيضحي بنفسه وكل حاجة في سبيل سعادتها وحتى لما مات وحست أن خلاص سندها راح
بعتلها زوج يقف معاها طول العمر. ويكون كل هدفه في الحياة هو اسعادها وراحتها
والأب اللي كان قاسي. بقى أحن أب في الدنيا وخرج من قلبه حب ليها يضلل على الكون من حرارة الشمس
( اطلبوا العوض من ربنا وماتيأسوش من رحمته. وعسى أن تكرهوا شيئا وهو خيرا لكم )
@@@@@@@@@@@@@@@@@@@@
في المطعم المتفق عليه علشان يتقابلوا فيه ويقضوا الوقت مع بعض ويتعرفوا على بعض
وصلت داليا و معاها رودي
وكمان شمس وجميلة
وفي نفس الوقت. وصلت سما وتالين و نها وسيلين
وقعدوا يتعرفوا على بعض واكتشفوا أن كلهم شخصياتهم بتتشابه في بعض الأفكار
وكمان الظروف
يعني نها. نفس ظروف تالين ويشبهوا ظروف رودي
شمس نفس ظروف سيلين اللي هي حلم الحضن من آلام اللي ولدتهم وجابتهم للدنيا
( لكن دي حقيقة ماحدش يعرفها غير سيلين )
وقضوا يوم حلو مع بعضهم واتغدوا سوا. وكمان دخلوا مطبخ المطعم
( طبعا لا سيلين من أصحاب المطعم فكانوا واخدين راحتهم على الآخر ولا كأنهم في بيت ابوهم )
ادام المطعم كان في عربية سودة واقفة بعيد ومافيش إي حركة حواليها علشان ماتلفتش الأنظار ليها
وبعد شوية اجتمعت اكتر من عربية من نفس النوعية لكن متفرقين
وبمجرد ماظهروا البنات على باب المطعم. وهما خارجين بيضحكوا
وسيلين كانت في المقدمة
وبتتكلم معاهم.
شمس / دا احنا قلبنالهم المطبخ يا عيني
رودي / دا لو مااكنتش سيلين صاحبة المطعم كانوا طردونا
نها / ولا حد يقدر يتكلم. دا احنا ياما عملنا بلاوي هنا. فاكرة يا سيلين لما رامي كان هيولع في المطبخ
( سيلين كانت بتبص للعربيات بأستغراب وبتتمعن في التفاصيل )
نها / سيلين. سيليييين. سرحتي في ايه
( سيلين شافت أبواب العربيات بتتفتح وبيخرج منها أشخاص باجساد مريبة وملثمين )
سيلين بفزع وهي بتدفعهم لداخل المطعم / ارجعوا لورا بسرعة. ادخلوا تاني حررررررس. امنوا المكان بسرعة
وفي خلال لحظات كانت سيلين دخلت المطعم معاهم و الحرس الخاص بيها والخاص بشمس. كانوا بيتبادلوا طلقات الرصاص بالسلاح مع الرجال مجهولين الهوية وكمان أمن المطعم اللي بدأوا باتخاذ الإجراءات الأمنية
وبدأت الصرخات تعلى بخوف و رعب
وللأسف الأفراد المهاجمين عددهم كان أكبر من الحرس وقدروا يشغلوهم بالحرب اللي بتحصل ادام المطعم
ودخلوا من الباب الخلفي للمطعم الخاص بالعاملين فيه
وبدأوا بإطلاق النار على اللي بيعترض طريقهم من الطباخين أو العاملين
**********************
في شركة مهاب العدلي
مهاب في مكتبه بيراجع أوراق شغل في ايديه. وموبايله رن
وشاف اتصال من كبير الحرس إلى بيرافقوا شمس
رد عليه وبمجرد ما فتح الخط
كبير الحرس / مهاب باشا الحقنا بسرعة. ابعت حرس تاني ودعم لينا
( وصوت الرصاص حوالين الحارس واصل لمهاب )
وبمجرد ما سمع وقف وخرج من مكتبه بعد ماساب كل حاجة حتى مااخدش الجاكتة بتاعة بدلته
مهاب / انتوا فين بالظبط أنطق
الحارس / أنا بعتت لحضرتك تحديد موقع المطعم اللي احنا فيه قبل ما اكلمك
مهاب وهو لسه بيجري / في شمس. هي معاكوا صح وكويسة صح
( لكن للأسف الحارس ماردش عليه لأنه سمع صوته وهو بيصرخ وبعدها سمع صوت الرصاص بس )
مهاب بجنون وهو نازل على السلم لأنه ماقدرش ينتظر الأسانسير. / الووووو الوووو
@@@@@@@@@@@@@@@@@@@@
أسر في طريقه للمطعم اللي الحمد لله قريب منه وتقريبا قريب من كل شركات تاج الدين
طول الطريق عقله واقف. مافيش في دماغه غير جملة واحدة
سيلين في خطر
حبيبته اللي حامل في ابنه ممكن يخسرهم في الوقت ده
القلب دقاته عنيفه وخوف و رعب من الفراق اللي مش قادر يستوعب فكرته
وطبعا كل الحرس اللي موجودين في الشركة والحرس الخاص بيه. وراه
ومحمود هو والحرس الخاص بيه والخاص بالشركة وكل الحرس التابع لعيلة تاج الدين. اللي موقع شركاتهم قريب من موقع المطعم. كانوا اتحركوا في طريقهم للمكان
@@@@@@@@@@@@@@@@@@@@
نور اللي في شركته. حس بنغزه في قلبه و وجع
وبدون اي مقدمات مسك تليفونه علشان يتصل بحبيبة عمره
@@@@@@@@@@@@@@@@@@@@
في المطعم
سمعوا صوت ضرب النار اللي جاي من اتجاه المطبخ
سيلين
المشهد بيتكرر ادامها
صوت رصاص وصرخات أطفال. و كلام بلهجة لبنانية. ودم. أطفال بيموتوا. وبنت بيغتصبوها. و عدنان بيموت
وفي وسط كل ده. بتبص حواليها علشان تفوء نفسها من الذكريات. ولاحظت شمس اللي بتبكي وتصرخ وهي حاطة ايديها على بطنها
و نها اللي وشها بقى شاحب ولونه أصفر وايديها الاتنين على بطنها
وافتكرت أنها كمان جواها روح تانية. يوسف. حلمها اللي لسه بيكبر جواها. مش هتسمحله يضيع مرة تانية
سيلين / اهدوا. اهدوا خالص. اتحركوا معايا بسرعة بدون ماتعملوا صوت
( في نفس الوقت ده تليفون سما رن وشافت اسم نور. وخافت تكون آخر مرة.تسمع صوته فيها. فتحت الخط بسرعة وحطته على ودنها وهي بتتحرك مع الباقيين )
نور بلهفة / سما. كنت خايف ماترديش ( وسمع صوت الرصاص حواليها اتفزع ). سما انتي فين. وايه الصوت ده
سما بخفوت / الوداع يا نور
( وسابت التليفون يقع من ايديها لأنها أعصابها مش متماسكة ومش عارفة تمسكه )
( وخدتهم سيلين في اتجاه الحمامات بسرعة. لكن قبل ما تدخل كان في
4 داخلين عليهم وفي أيديهم السلاح وشافوهم وهما بيدخلوا الحمامات ولحقوهم. اتوقعت أنهم هيضربوا عليهم رصاص. لكن قربوا منهم. )
تجاهلوا كل البنات. لكن اتنين منهم قربوا. على شمس وداليا ومسكوهم. وسط صرخاتهم. و واحد راح باتجاه سيلين علشان يمسكها. والأخير رافع السلاح في وش الباقيين
نها بصراخ / سيليييييين. ابعدوا عنها يا كلاب
رودي بصراخ وبكاء / سيبوهم حرام عليكم سيبوهم
( شمس كانت بتقاوم. اللي ماسكها من ايديها وبتحاول تدافع عن نفسها. و داليا بتتوسل للي ماسكها أنه يسيبها وبتبكي بهيستريا
أما سيلين كانت في حالة هدوء عجيبة. وبتحاول تفكر أو تعمل اي حاجة تنقذ الموقف )
سيلين / انتوا مين وعايزين ايه
***** / اتحركوا معانا بهدوء بدل مانستخدم معاكوا العنف
شمس برعب / نتحرك على فين.
سيلين بثقة مصطنعة وبتحاول تكسب وقت / وانتوا فاكرين انكوا هتخرجوا من هنا عايشين اصلا
****** / بلاش تضييع وقت واتحركوا
شمس / أنا مش هروح معاكوا. عايزين تاخدوني يبقى تاخدوني جثة. وأنا واثقة أن مهاب العدلي هيحرقكوا حيين
( اللي قالته استفز الأخير اللي رافع السلاح وبيراقب الطريق علشان يخرجوا بيهم. فقرب منها وهو ناوي على الشر. لكن قبل مايوصل في لحظة كانت سيلين ضربت اللي ماسكها بالمهارة اللي اكتسبتها من الرياضة ومن تدريبات فارس أولا و أسر ثانيا وفلتت منه وبسرعة البرق كانت مسكت ايده قبل ماتنزل على وش شمس. وبدأت تصارعه بالأيد وبتتجنب الضربات علشان بطنها لكن اللي كان ماسكها وضربته تحت الحزام وقف ومسكها من شعرها . )
وفي دقيقة كان وقع في الأرض اللي بيحاول يضرب سيلين واللي ماسكها من شعرها كمان
وحصلهم الاتنين الباقيين
وأسر ومحمود ظهروا و معاهم حرس كتير.
محمود / سيلين انتي كويسة
سيلين / اطمنوا كلنا كويسين
أسر ماسألهاش لكن هو كان بيجري عليها وحضنها جامد
وهو بيحضنها بس وراها على اللي مرمين في الأرض وسابها
أسر بعنف للحرس / الاتنين دول عايشين خدوهم على أي مستشفى تبعنا وشوفوا الاتنين دول كمان لو حد عايش فيهم خدوه معاهم. ويكون عليهم حراسة شديدة. أنا عايزهم عايشين. فهمتوا
سيلين / واللي برة يا أسر. الحرس اللي كانوا معايا
محمود / اهدي وماتفكريش في حاجة دلوقتي
ودخل مهاب. وهو بيجري لأنه شاف منظر الدم برة والجثث.
وبمجرد ماشافوه شمس و داليا جريوا عليه. وهو حضنهم. برعب وهو بيتفحصهم
مهاب بلهفة / شمس. داليا.
سيلين سابت حضن أسر وخرجت على برة. تشوف الحرس اللي كانوا معاها برغم أنها عارفة ان المنظر عيون بشع لكن دول ناس هي بتعتبرهم أفراد من عيلتها
وخرجت بقت تتفحص الجثث وشوفت الحرس الخاص باسر ومحمود بيساعدوا زمايلهم
سيلين بخفوت / في حد مات مننا
الحارس بحزن / أيوة حضرتك. وفي مصابين كتير واحنا منتظرين الإسعاف. وفي اللي ماكنش أصابتهم خطر خدناهم المستشفى في عربياتنا
وفي واحد تبع مهاب العدلي أصابته خطيرة و. وتقريبا بيلفظ آخر أنفاسه
سيلين جريت على الراجل اللي هو شاور عليه وقريت منه
سيلين بخفوت / ماتقلقش الإسعاف في الطريق
الحارس / ارجوكي. قولي لمهاب بيه. ولادي أمانة في رقبته
سيلين بدموع / أن شاء الله هتعيش لولادك بس انت اجمد كدة. علشانهم
الحارس بآخر أنفاسه / دي رسالة. وصليها. وقوليله دول أمانة في رقبته وهسأله عليها يوم القيامة ادام ربنا
( ومات الحارس ادام سيلين )
نفس المشهد. دم. دم دم.
سيلين برجاء / لا لالا. الله يخليك. أستنى. استنى علشان خاطر عيالك. يا عم. يا عم استنى
وأسر قرب منها وهي قاعدة في الأرض. و رفعها من الأرض
وحضنها. وهي بتحاول تتماسك وماتظهرش ضعف وخوف وكمان علشان اللي في بطنها
لكن اتنفضت لما سمعت صرخات من داخل المطعم.
فدخلت بسرعة هي وأسر
وشافت نها بتصرخ و تالين و سما بيسندوها
نها بصراخ / الحقينييييي بولد يا سيييييليييييين
سيلين / اهدي يا حبيبتي اهدي
محمود بدون مقدمات شال نها وجري بيها على عربيته. وحطها على الكرسي اللي جنبه في العربية وربطلها الحزام
وسيلين ركبت ورا هي وسما وتالين
محمود وهو بيتحرك بالعربية / خليك انت هنا يا أسر مع الشرطة. بس اتصل بفارس يحصلنا على المستشفى
أسر / ماشي بس خلى بالك وأنا هبعت وراك حرس
( مهاب كمان اخد شمس و داليا وراح وراهم على المستشفى. علشان يطمن على شمس والجنين )
أسر واقف والشرطة وصلت والإسعاف كمان والمكان بقى مليان بالناس أما صحافة أو إسعاف أو شرطة. أو فضوليين من اللي سمعوا صوت الرصاص وشهدوا على الاقتحام
وصل نور بعد ما خلاص روحه كانت طلعت على ما عرف مكان سما أو بمعنى أصح مكان تليفونها.
واتفزع من المشهد
دم في كل حتى واسعاف كتير بتشيل ناس
وفي ناس ماتت و وشها متغطي
أول ما وصل قلبه وقف
حبيبته فين
في الإسعاف مع المصابين
ولا مع اللي وجوههم متغطية
لالالالالا. هي عايشة قلبه حاسس أنها لسه عايشة
ماهي لو ماتت هيكون معاها
مستحيل تسيبه ويمشي هو اه مايستهلهاش لكن هيعوضها عن اللي حصل ومش هيزعلها تاني أبدا
لوحصلها حاجة هو مش هيقدر يعيش. بس هو اللي غلطان. أيوة. ازاي يسيبها لوحدها. زعلانة منه. تزعل في بيتهم. هو يسيب البيت إنما هي لاء
وكان المفروض حتى لو هي رفضت الحرس. هو يمشيهم وراها بدون موافقتها. مش يسيبها على راحتها. وأهي ضاعت منه خالص. لالا ماضعيتش.
نور دخل بسرعة رغم أن الشرطة محاوطة المكان والصحافة
نور بعنف للعسكري / بقولك اوعى من ادامي
انتبه أسر للصوت العالي هو والظابط اللي واقف معاه
أسر بصوت عالي / سيبه يا ابني
نور جري بسرعة على أسر بمجرد ماشافه وافتكره فوراً
نور / فين سما. فين مراتي. حصلها ايه
أسر / اهدا يا استاذ نور.اطمن المدام كويسة
نور / فين. هي فيييين
أسر بتقدير لحالته / في المستشفى راحت م
قاطعه نور بنفس الفزع / مستشفى. مستشفى ايه
أسر / يا ابني اهدا واسمعني لما أكمل. نها صاحبتهم بتولد وراحوا معاها المستشفى إنما هما كلهم كويسين ماحدش فيهم حصله حاجة
وعلشان تتأكد هما في مستشفى ******* روح شوفها
@@@@@@@@@@@@@@@@@@
في المستشفى
عيلة تاج الدين كلها وصلت المستشفى. و فارس وعيلة العدلي كلها برضوه وصلت المستشفى بالإضافة للدكتور عمر والدكتور أحمد
الخبر انتشر بسرعة الرياح
( ما احنا عايشين في مسر ( مصر ) ومن عادات المسريين ( المصريين ). أنهم مافيش فولة بتتبل في بؤهم )
نها جوا بتولد وبتصرخ. وفارس أصر أنه يحضر معاها الولادة جوا.
وسيلين برة. سناء وخداها في حضنها ومش عايزة تسيبها من وقت ما وصلت المستشفى بعد ما سمعت الخبر
وسيلين قلقانة على نها. و رامي واقف على أعصابه. اطمن على سيلين بمجرد ماشافها لكن مرعوب على نها
لأنه زي ماسيلين تعتبر اخته نها كمان اخته الكبيرة. اللي بيحس أوقات أنه اخوها الأكبر منها ومسؤول عنها مع أنها اكبر منه
و مهاب بعد ما اطمن على صحة شمس و داليا
و كل واحدة فيهم واقفة و معاها جوزها جنبها
وكلهم واقفين علشان يطمنوا على نها و المولود بتاعها
و مهاب حاول يعرف ايه اللي حصل لكن نظرا لتوتر الأجواء. ألتزم بالصمت واكتفى بقرب حبيبته وسلامتها
احند / رودي انتي مش كويسة تعالي نشوف دكتور يكشف عليكي جاير الضغط بتاعك واطي
رودي بخفوت / أنا كويسة يا حبيبي ماتقلقش. دا من قلقي على نها بس
هاجر بصوت عالي / أن شاء الله هتبقى كويسة. واللي اتعرضلكوا دول هيتدفنوا صاحيين علشان اتجرأوا بالشكل ده على أسيادهم
محمد / من غير ماتقولي. أسر لسه مكلمني وقال إن كلهم اتصفوا مافيش حد فيهم عايش
داليا / لا دا اللي كانوا معانا جوا واتهجموا علينا كان في منهم عايشين و
قاطعها محمود بحزم / لا يا مدام. ماتوا. مافيش حد عايش فيهم خالص
رامي / يعني ايه. طب ماكدة مش هنعرف مين اللي ورا الهجوم ده
محمود ببرود / لا اطمن الحكومة هتشوف شغلها وياريت تبطلوا كلام في الموضوع ده وركزوا في اللي انتوا فيه حاليا
صافي / فعلا. بلاش كلام هنا علشان الصحافة في كل حتة حوالينا.
نور بصراخ / سمااااااااا
سما بصت وراها شافت نور جاي جري في الممر
وفي لحظة كانت في حضنه بقوة لدرجة أن ضلوعها أوشكت أنها تتكسر وصدر عنها صوت
سما دموعها نزلت وهي في حضنه. الأمان بتاعها. هي محتاجة لحضنه اوى. بادلته الحضن بقوة وبرغم قوة الحضن وألم جسمها إلا انها ماحستش بآلام ولا وجع الجسم كل اللي مسيطر عليها الرعب اللي عاشت فيه من شوية
نور / فيكي ايه. حصلك ايه انطقي بسرعة
( سما بعدت عنه بحرج من الناس اللي حواليهم )
سما بدموع / اهدا يا نور أنا كويسة الحمد لله
نور / حصلك ايه فهميني. مين اللي اتعرضلك
سما / معرفش. معرفش اي حاجة يا نور كل اللي اعرفه اني شوفت ناس بتموت. وصحابي كانوا هيتخطفوا ادام عينيا
نور / خلاص اهدي. اهدي المهم انك بخير. الحمد لله. الحمد لله ( وبص لمهاب اللي قاعد على الكرسي ومراته في حضنه )
مهاب. انت كمان هنا
( مهاب بصله وهز راسه بموافقة لأنه ماعندهوش طاقة يتكلم )
سما / أيوة علشان شمس كانت معانا و داليا.وسيلين كلنا كنا سوا
نور بعنف / سيلين. أيوة. طبعا مالازم ده يحصل. اكيد دول تبع المافيا اللي هي وقعت معاهم من فترة. وانتوا كنتوا هتموتوا بسببها
أحمد / انت يا بتاع انت ألزم أدبك وماتتكلمش كدة عن أختي
نور ساب سما و قرب من أحمد وعايز يطلع كل الغل والسلبية اللي وجواه عليه. وأحمد كمان قرب منه بنفس الطاقة اللي محتاج يفرغها
مهاب قام بسرعة ومسك نور ومحمد مسك احمد من دراعه
مهاب / بس يا نور مش وقته الكلام ده وبعدين احنا لسه مانعرفش ايه اللي حصل
محمود وهو لسه واقف مكانه / أحمد. ارجع مكانك
أحمد بضيق / يا محمود انت ماسمعتش قال ايه
محمود بحزم / ارجع أقف مكانك. وانت يا استاذ نور. اطمنت على مراتك. وهي ادامك أهي لو عايز تاخدها انتوا أحرار مع بعض. إنما بعد. الكلام اللي انت قولته ده وجودك غير مرحب بيه
مهاب بحرج من تصرف نور / هو مايقصدش الموقف صعب ودا غصب عنه
محمود / الموقف صعب علينا كلنا. وسيلين اللي بيتكلم عنها. تبقى البشمهندسة سيلين تاج الدين. ومعروف هي مين. والمافيا اللي بيتكلم عنهم
الحكومات ماقدرتش توقعهم ولا تعرفلهم طريق. لكن هي قدرت وبكل بساطة تعمل اللي الرجالة ماقدروش يعملوه
وكونه يقف في مكان فيه سيلين تاج الدين دا شئ يفتخر بيه. وكونه مراته صاحبتها دا شئ يشرفها. ويشرف اي حد
ولو هو قال اللي قاله بدون تفكير وبسبب ضغط الموقف. يبقى يفضل أنه يبعد حاليا. لأن كلنا تحت ضغط الموقف لكن حاليا في حاجات أهم من مين السبب ومين المقصود وهي الناس اللي أتأذت وماتت وأولادهم اتيتموا و اللي حاليا بتصارع الحياة هي واللي في بطنها
( عند آخر جملة نطقها محمود تخص الناس اللي ماتوا والأولاد اللي اتيتموا. افتكرت سيلين الرسالة اللي لازم توصلها. و وقفت بسرعة بعد ماسابت حضن سناء )
سيلين / بعد اذنك يا محمود لحظة واحدة
استاذ مهاب. في رسالة ليك معايا من واحد من الحرس اللي تبعك
بيقولك ولاده أمانة في رقبتك
مسؤولين منك و آخر حاجة نطقها قبل ما يموت أنه هيسألك عليهم يوم القيامة ادام ربنا
هيسألك عن أمانته
شمس ببكاء / ماتوا يا مهاب. ذنبهم في رقبتي
سناء / اهدي يا بنتي علشان اللي في بطنك انتي كمان. دا قدره وماحدش بيقدر يغير نصيبه ومكتوبه أنه يموت في المكان ده واللحظة دي
مهاب بحزن على اللي ماتوا / ونعم بالله. سامعة يا حبيبتي. وإذا جاء الأجل لا مفر منه ولا مهرب. ولا يصيبنا إلا ما كتب الله لنا.
سيلين بقوة لمحمود / محمود. حق الناس دي لازم يرجع. وأولاد كل اللي ماتوا أو اتصابوا وأسّرهم مايحتاجوش إي حاجة أبدا ومسئولين مننا. والمصاب يتعالج حتى لو هنسفرهم برة سواء من الحرس أو اللي شغالين في المطعم أو حتى ناس كانت موجودة في المكان بالصدفة
محمود قرب منها واخدها في حضنه / اطمني يا حبيبتي وهدي بالك انتي. كل اللي قولتيه بالفعل بيتنفذ وهيتنفذ . سلامتك عندي بالدنيا وما عليها يا قلب اخوكي
سيلين بأبتسامة / ماتقلقش عليا أختك قوية. ومافيش حاجة تقدر تكسرني.
نور بخفوت / أنا آسف يا بشمهندسة سيلين
سما / وأنا كمان اسفة يا سيلين علشان السبب في اللي قاله نور
سيلين / خلاص أ حبيبتي علشانك انتي أنا قبلت الأسف
( وفي اللحظة دي خرج فارس ومعاه بنوتة زي القمر وهو لسه باللبس المعقم )
فارس بفرحة / سيلين. نها بتقولك خودي شوفي سيلين الصغيرة
سيلين بفرحة كبيرة / . الحمد لله. الحمد لله هي عاملة ايه
فارس / الحمد لله كويسة.
رامي بفرحة / بقيت خال يا بشرررررررررر. وعندي سيلين تقولي يا خالوه
أحمد / هو في ايه انت هتعمل نفسك خالها بالعافيه
رامي / هششششششش مش هرد عليك لأني بصراحة مبسوط
( وبرغم الحزن اللي في قلوبهم على اللي ماتوا إلا ان سلامة نها وبنتها فرحتهم جدا. )
وبعد ما اطمنوا على نها والبنوتة كل واحد اخد مراته و مشي. معادا فارس ورامي و سيلين اللي بقيوا معاها
ورامي رفض رفض قاطع أنه يمشي وكان رافض أن أحمد يشيل سيلين الصغيرة. و فرحان بيها جدا
@@@@@@@@@@@@@@@@@@@@
في قصر نور عز
سما بصوت عالي / يا نور لو سمحت سيبني أمشي أنا مارضتش اتكلم معاك ادام الناس وانت بتسحبني وراك زي البهيمة
نور بتماسك / اهدي يا سما واسمعيني. عايزة تزعلي براحتك تبعدي عني برضوه براحتك. في بيتنا هنا وأدام عينيا مش بعيد عني
سما / انت ليه مُصر تضغط عليا انا مش عايزة أعيش معاك يا نور افهم بقى
نور / للدرجة دي يا سما. بقيتي تكرهيني وتكرهي وجودي معاكي
سما / انت عارف و متأكد اني بحبك. و علشان كدة عايزة أبعد لأن وجودي معاك في مكان واحد عذاب ليا انا يا نور وبيفكرني بكل اللي انت عملته معايا
نور / ارجوكي. ارجوكي سامحيني. حاولي. افتكري أي حاجة حلوة بينا وسامحيني علشانها. سامحيني علشان خاطر حبنا و بنتنا يا سمايا
انتي قولتى كتير اللي بيحب بيسامح. وأنا بقولك سامحيني و اقسملك بالله ماهجرحك تاني أبدا. بصي هسيبلك وقت زي ما انتي عايزة علشان تسامحيني لكن تفضلي هنا. ادام عينيا علشان اطمن ولو وجودي هيضايقك ويسببلك الحزن. قوليلي امشي. وأنا والله همشي واسيب البيت لكن هتفضلي برضوه تحت عيني ارجو
قاطعته سما بتأثر / بس يا نور خلاص. أنا اللي برجوك كفاية. أنا ماقدرش اتحمل كدة. أنا هعمل اللي انت عايزه. عايزني أعيش هنا. هعيش هنا. وإذا كان على اللي انت عملته او اني اسامحك سيبها للوقت وهو كفيل يداوي جراحي منك
نور قرب منها وباس دماغها / ربنا يخليكي ليا
سما / بس بشرط ماتقربش مني أبدا. وكمان تطلع تنام في الأوضة اللي فوق
نور بفرحة / انتي بتتكلمي جد
سما / وأنا اللي هنزل أنام في الأوضة اللي تحت. لأن دي اصلا اوضتي أنا. وهنرجع للفترة اللي كانت قبل جوازنا لحد مانقدر نتخطى الوضع ده
نور بإحباط / اوامرك سمايا. بعد اللي شوفته من شوية أنا راضي منك بأي حاجة
سما / الحمد لله. الحمد لله. أنا هروح أصلي واتصل بأنس أبلغه اني جيت على هنا. علشان لما جالي المستشفى واطمأن عليا قولتله اني هحصله
نور / ماتقلقيش أنا كلمته واحنا لسه هناك وقولتله انك هترجعي معايا على هنا. وهو قالي هيجيب نورسين و العيلة وييجي علشان قلقانين عليكي
سما / طب كويس هدخل أصلي على مايوصلوا
نور / براحتك حبيبتي. بس انا هروح مشوار مهم وهرجع علطول
سما / اللي كنت بتتكلم عليه انت و مهاب و محمود اخو سيلين
نور / أيوة. خلى بالك من نفسك ولو احتاجتي حاجة كلميني
@@@@@@@@@@@@@@@@@@@
في قصر مهاب العدلي
بمجرد مادخلوا الجناح بتاعهم
مهاب حضن شمس جامد برغم أنها طول الوقت كانت في حضنه
مهاب بخفوت/ كنت مرعوب اخسرك
شمس / وأنا برغم خوفي و الرعب اللي عيشته والمنظر البشع اللي شوفته إلا اني كنت واثقة ان ربنا معايا وهينجدني وأنك مش هتسيب حد يأذيني
مهاب / بس انا اتأخرت يا شمس وكان ممكن على ما اوصل ( وسكت بخوف حقيقي )
شمس / الحمد لله. أنا وأبني بخير يا مهاب متقلقش
المهم ماتنساش الكلام اللي سيلين قالته. والولاد و
قاطعها مهاب / من غير ماتقولي حبيبتي. دول أمانة في رقبتي وأنا مستحيل اخون الأمانة
شمس / ربنا يقدرك يا حبيبي ويقويك ويخليك لينا كلنا
مهاب / أنا مضطر اسيبك دلوقتي شوية. لكن تكون عندك بسرعة
شمس / روح يا حبيبي وماتقلقش بس خلى بالك من نفسك
الحلقة (15) رواية( مملكة العشاق)
بقلم:-أسماء أبوشادي Ana Amera Habeby
_____________________________________
اللهم صلي وسلم وبارك على سيدنا محمد وعلى آله وصحبه أجمعين بإحسان إلى يوم الدين
في شركة تاج الدين الخاصة بالأمن تحت إدراة أسر. المقدم أسر سابقاً
وصل نور و مهاب مع بعض
طلعوا فوق والسكرتير دلهم على قاعة الاجتماعات
ودخلوا
كان موجود فيها. محمود ومحمد وأحمد و عادل وسامي
منتظرين وصول أسر.
عادل / اتفضلوا.
مهاب بترقب/ وصلتوا لحاجة
عادل / منتظرين وصول أسر
محمد بضيق/ راح فين ده بس . مش اتصل وقال هنتكلم هنا علشان نفهم اللي حصل
محمود / ياريت نهدا شوية. هو مش بيلعب. واكيد تأخيره دلوقتي له سبب
نور / ماحدش من الكلاب دول اتقبض عليه
سامي / لسه مانعرفش تفاصيل ومفروض أن أسر هيقولنا دلوقتي
ودخل أسر وهما بيتكلموا. وكان شكله عنيف جدا و هدومه مليانة دم وملامحه مخيفة
عادل / كنت فين و اتأخرت ليه يا ابني احنا منتظرينك من بدري
أسر / اسف يا بابا . اتفضلوا اقعدوا
مهاب / يا ترى عرفت تفاصيل عن اللي حصل
أسر / عرفت تفاصيل كتير وتقريبا دي أهم حاجة.
اللي حصل كان مقصود منه خطف سيلين تاج الدين و شمس العدلي مراتك يا استاذ مهاب و داليا بنت عمك و زوجة الدكتور عمر
مهاب صعق برغم انه كان متوقع الكلام ده
أسر كمل كلامه وهو بيعرض حاجة من اللاب توب على شاشة عرض كبيرة مواجهه ليهم / و وجود الباقيين كان مجرد صدفة مش اكتر. وتجمعهم مع بعض كانت فرصة حلوة لتنفيذ أهدافهم التلاتة في وقت واحد وبسهولة لأنهم بعيد عن محيط الحراسة المشددة اللي بتحيط بيهم التلاتة تقريبا طول الوقت
( وبدأ الفيديو يشتغل ويتعرض عليه لحظة اقتحام المطعم. و وأعتدائهم على البنات )
وبعد مشاهدة الفيديوهات كاملة من داخل وخارج المطعم
أحمد / عرفت مين الأوساخ دول
آسر / في منهم مصابين في المستشفى وقدرت استجوب فردين منهم لكن ماكنش عندهم معلومات كتير
محمود / اللي كانوا جوا وعايزين يخدوهم مش لسه عايشين اكيد دول عندهم معلومات أكتر
أسر / الاتنين اللي انت ضربتهم ماتوا. أما الاتنين اللي انا ضربتهم الإصابة مش في مقتل. يعني عايشين وهنقدر نستفيد منهم
لكن مش دلوقتي لما يفوقوا الأول
نور / طيب ماقدرتش توصل لمعلومات تانية
أسر / المعلومات دى ممكن تكون عند مهاب العدلي
( مهاب كان بيفكر مين ممكن يعمل كدة من اعداءه أو منافسينه لكن انتبه على صوت أسر )
مهاب / أنا في احتمال عندي لكن لسه مجرد تخمين مش أكتر
محمود / حتى لو مجرد تخمين قوله. لازم ندرس كل الاحتمالات.
لأن اللي كان عايز يأزي اللي يخصك كان برضوه هيأذي اللي يخصنا
أسر / صحيح واحنا لازم نفكر في كل الاحتمالات سواء أعداء ليك أو لينا. ومين فيهم العداوة كبيرة للدرجة دي
ومين عايز يلوي الدراع بخطف اللي يخصنا ويهددنا بيهم
لأنهم نيتهم كانت واضحة جدا
مهاب / اكيد هعمل كدة. وقبل إي شئ انا عايز اقولكم ان اللي عملتوه ده هيفضل دين في رقبتي لحد ما اموت
عادل / ماتقولش كدة. ماحدش له افضال على حد
مهاب / انتوا ليكوا. انتوا انقذتوا روحي و البشمهندسة سيلين. الحركة اللي عملتها مع شمس وعدم سماحها للكلاب أنهم يلمسوها. عمري ماهنساها أبدا
أحمد / دي عادة سيلين. مابتحبش حد يتأذي ولا بتتسبب في أذية حد.
نور بحرج لأنه عارف ان الكلام موجه له / أنا اعتذرت من البشمهندسة وهي قبلت اعتذاري. واتمنى ماتكونوش لسه متضايقين من الكلام اللي قولته
محمود /. طلاما عرفت غلطك تمام يا استاذ نور وماتعتذرش تاني خلاص انتهى الأمر
مهاب / طيب نستأذن احنا. وأن شاء الله بكرة هموم مجمع كل المعلومات عن اللي أشك فيه واللي في محور الشبهه
أسر / وياريت تنتبه مش بس اللي تشك فيه. لأن غالبا الضربة بتكون كن حد مش متوقعينه ولا شاكين فيه
@@@@@@@@@@@@@@@@@@@@
في المستشفى
أسر وصل بعد ما خلص الاجتماع اللي كان في شركته
واخد شاور و بدل هدومه في الشركة
وصل الجناح اللي نها موجودة فيه
وشاف رامي واقف والبيبي بين ايديه وفارس واقف معاه في الصالون الملحق بالجناح
أسر / انتوا واقفين كدة ليه
فارس / الدكتورة بتطمن على نها و معاها يلين جوا واحنا منتظرينها تخلص كشف
رامي وهو بيعطيه البيبي/ خود شوف سيلين الصغيرة
أسر / بسم الله ماشاء الله انتوا هتسموها سيلين
فارس بأبتسامة / أيوة. احنا كنا مقررين كدة بس قولنا هنعملها مفاجأة
أسر / احلى مفاجأة. ربنا يباركلكوا فيها
فارس / عقبال مايوسف يوصل بالسلامة
أسر / يارب
الباب اتفتح وخرجت سيلين و معاها الدكتورة
سيلين / حبيبي اخيرا جيت
( أسر هز راسه بمعنى الموافقة. وفضل معلق نظره عليها وبس )
الدكتورة طمنتهم على نها وصحتها. ومشيت.
وفارس لاحظ نظرات اسر لسيلين فأخد منه البيبي وشاور لرامي وسابوهم ودخلوا عند نها وقفلوا الباب وراهم
أول مادخلوا وأسر سمع صوت الباب اللي اتقفل اخد سيلين في حضنه بقوة
أسر بخفوت و وجع / اااااااااه يا سيلين.لو تعرفي حسيت بأيه على ماوصلتلك وشوفتك
لو تعرفي العذاب اللي اتعذبته وأنا في طريقي ليكي. لو تعرفى الوقت مر عليا ازاي لحد ماشوفتك واقفة ادام عينيا
لو تحسي بالنار اللي جوايا لما شوفته ماسك شعرك اااااااااااه
سيلين / خلاص يا حبيبي الحمد لله. كان كابوس وانتهى
أسر / تعبان اوى يا سيلين. تعبان اوى ومحتاج انك تفضلي في حضني كدة
سيلين / أنا في حضنك يا حبيبي. وكويسة وابننا بخير ودا فضل من عند ربنا
أسر / أول جالي الخبر. وطول الطريق كان بيتردد في عقلي كلامك امبارح عن الموت والفراق. وقتها.شياطيني كلها طلعت. كنت بضرب بالرصاص وأنا برة في مقتل. عامل زى الآلة بدون شعور. اقتل وبس
ولنا اخيرا دخلت جوا و شوفتك بعينيا وهما بيحاولوا يمدوا ايديهم عليكي. كل اللي سيطر عليا العنف والأذى والغل لكن انتي كنتي اهم عندي من كل ده
و الاتنين اللي لمسوكي ماقتلتهمش. لأن القتل هيبقى ليهم رحمة عن اللي هيشوفوه مني
سيلين/ انت ماسلمتهمش للشرطة
أسر / الشرطة اخدت كل الجثث والمصابين إلا دول بالذات هما. اللي مايعرفوش عنهم حاجة اصلا
سيلين / طيب ليه يا أسر مش فاهمه
أسر / سيلين. مش وقته تفهمي ارجوكي. أنا مش قادر اتكلم.
سيلين / خلاص يا حبيبي اسفة اني بضغط عليك وصدقني أنا هاين عليا اخدك في حضني وأفضل كدة طول الليل علشان تصدق اني كويسة لكن غصب عني ماقدرش اسيب نها
أسر / عارف. عارف. وبعدين مين قالك انك هتطلعي من حضني. أنا هفضل معاكي هنا. مش همشي
سيلين / حبيبي انت لازم تروح البيت علشان تنام وترتاح
أسر / راحتي في قربك
@@@@@@@@@@@@@@@@@@@@
في قصر نور عز
نور وصل للقصر
وقابل سلوى و أنس وهما خارجين
نور / انتوا ماشيين ليه
سلوى بجمود / اطمنا على سما و وصلنا نورسين. مافيش حاجة تانية نستنا علشانها
نور / انتي لسه زعلانة مني يا ماما
انس باقتضاب / ولا زعل ولا حاجة المهم سما جوا أهي في بيتك هي وبنتك. ياريت تحافظ عليهم بقى علشان مش كل مرة. هتيجي سليمة
سلوى / خلاص يا أنس ملهوش لازمة الكلام ده والحمد لله انها بخير
( نور قرب منها واخد ايديها و باسها. وراسها كمان )
نور / حقك عليا انا اسف. سامحيني والله ما هتتكرر تاني
سلوى / يا ابني أنا مش زعلانة. بس كمان انت من بعد وفاة والدك وانت اتغيرت خالص. يا حبيبي دي إعمار بيدي الله وكلنا هنموت
ذنبها ايه بنتي تتحمل كدة
واحنا ذنبنا ايه علشان ماتدخلش بيتنا وحتى لما كانوا هيباتوا تقولي سما تبات إنما نورسين لاء. من امتى الكلام ده ما أهي من يوم ما اتولدت وهي كانت بتيجي عندنا وتشبط وتنام في حضني وكان مرة انت وأمها تكونوا عندنا وتمشوا لوحدكم وتسيبوها معايا. ايه اللي اتغير دلوقتي
نور / اللي اتغير اني مابقاش ليا غيرهم. ومابقدرش أبعد عنهم أبدا. أنا وقتها بقولك خلي سما. كان علشانك. أيوة أنا غلطان وكنت أناني.بس غصب عني والله وياريت تسامحيني
سلوى / عيب عليك تقول مالكش حد. اومال احنا فين. مش دايما تقول عيلتك عيلتك. دلوقتي خلاص. مابقناش اد المقام يا نور
نور / لا والله العظيم ربنا يعلم. حقك عليا. واللي انتي عايزاه اعمله. بس تسامحيني و تدعيلي
سلوى بأبتسامة/ يا حبيبي أنا مسمحاك. وربنا يعلم أنا بدعيلك المهم خلي بالك من سما و نورسين
نور بفرحة / من عينيا. ربنا مايحرمنا منك أبدا
انس / يلا بقى علشان اتأخرنا
نور بحدة مرحة / وانت ياض هتفضل قالب وشك كدة كتير ولا ايه.
انس / نعم عايز ايه في حاجة. ولا جاي تتهمني بخطف مراتك وبنتك تاني
نور / انت عبيط يلاّ. انت اخرك تخطف قطة. دا أنا كل ما افتكر اني سألتك عليهم استعبط نفسي والله.
انس / كويس انك عرفت ان انت عبيط
نور مسكه من هدومه / قولت ايه سمعني كدة تاني
انس بخوف مصطنع/ ماقولتش حاجة. انتي سمعتي حاجة يا طنط
سلوى بضحك / ربنا يديم المحبة بينكم يارب.
انس / محبة ايه. انتي مش شيفاه ليعمل ايه معايا
سلوى / اخوك. ايه المشكلة. يعني
نور / تسلميلي يا قلبي
*****************
سما كانت سامعة كل كلامهم ومبسوطة جدا. ولما شافت نور داخل بعد ما هما مشيوا
راحت داخلة جوا بسرعة وقعدت على الكرسي
نور دخل وشاف سما وهي قاعدة قرب منها وراح حاضنها بشوق وحب
سما بتحاول تبعد عنه / نور احنا اتفقنا على ايه
نور.برجاء وهمس مغوي / مش أنا حبيبك ونور حياتك وأول واخر حب في عمرك
ارجوكي. أنا بموت ومحتاج أخدك في حضني اوى. صدقيني هموت لو نمتي النهاردة بعيد عني.
سما بارتباك / احنا اتفقنا يا نور
نور وهو بيحرك ايديه على تفاصيل جسمها / عادي يا حبيبتي. الاتفاقات اتعملت علشان تتلغي
بصي النهاردة نبقى مع بعض ونبدأ الاتفاق من بكرة
( وهمسة ثم لمسة. دابت سما بين ايديه و استسلمت لاشتياقها )
وقبل مايشيلها علشان يطلع اوضتهم. سمعوا صوت نورسين بتنادي على سما
نورسين / يا مامي. يا مامي
نور بصوت مبحوح / ايه يا سيلين. عايزه ايه من مامي يا حبيبتي
نورسين كانت خرجت من الأوضة اللي كانت أوضة نور سابقا واتفقوا تبقى أوضة سما وقربت منهم وحضنت نور اللي بعد فورا عن سما. و سما اللي فاقت وبتظبط هدومها وشكلها
نورسين / مستنياها علشان ننام يا بابي
نور / حبيبتي مش قولنا انتي شطورة وبتنامي لوحدك
نورسين / لا يا بابي ما خلاص. أنا ومامي هنفضل ننام مع بعض علطول
نور / نعم ودا مين اللي قال كدة إن شاء الله
نورسين ببراءة / أنا يا بابي.ليه انا انام لوحدي ومامي تنام لوحدها لما ممكن ننام أنا وهي مع بعض واخد مامي في حضني
نور بحزن مصطنع/ يعني تناموا مع بعض انتوا الاتنين وتاخدي مامي في حضنك وأنا انام لوحدي
نورسين / خلاص يا بابي ماتزعلش. مش هسيبك تنام لوحدك
نور / يعني هتروحي تنامي في أوضتك يا حبيبتي
نورسين / لاء. انت كمان هتنام معانا وفي حضني زي مامي
نور بإحباط / طيب. هو أنا أطول انام في حضن نورسين. قلب بابا
( سما كبتت ضحكتها على شكله وهو متضايق ودخلت الأوضة اللي هيناموا فيها وبتحاول تخبي فرحتها عنه )
سما غيرت هدومها ولبست بيجامة كت ببنطلون استيرتش لونها أصفر. ( وهي عارفة ان نور مش بيحب اللون ده أبدا )
نور نام بغيظ على السرير و سما نامت على الطرف التاني و نورسين نامت في الوسط
نور / حبيبة بابي ممكن تيجي تنامي جنبي هنا
نورسين م لا يا بابي هناك في الوسط علشان اكون جنبكم انتوا الاتنين واحضنكم سوا
نور / ما انتي بتحضني مامي كتير سيبيني أنا اح
قاطعته سما / نوووور. بس
نور بحنق / بقالك ساعة ساكتة ودلوقتي. نوووور بس
سما بضحكة مكتومة / بس يا نور علشان نورسين تعرف تنام
( بعد شوية نورسين نامت وهما الاتنين لسه صاحيين )
نور بهمس/ سما. سما
سما بهمس / ايه عايز ايه
نور / طيب لفي وشك بصيلي طيب طلاما صاحية.
سما لفت وشها / نعم
نور / بحبك اوى. وبرغم انك مش في حضني لكن كفاية انك جنبي على سرير واحد
سما / بس يا نور علشان نورسين هتسمعنا
( في حركة خاطفة كان نور جنب سما. و نورسين على الطرف واخدها في حضنه )
سما بخجل وتوتر / نور أبعد البنت
( نور اخدها في حضنه وحط شفايفه على شفايفها بجوع واشتياق. وفي خلال ثواني. حست بنفسها بين ايديه وشالها و بهدوء بدون ماشفايفه تسيب شفايفها وخرج بيها وطلع اوضتهم فوق
وقضوا ليلة من ألف ليلة وليلة
هي عاتبته وهو اعتذر وهي سامحته وهو احتفل بالبداية الجديدة. وهي شاركته الاحتفال
وزى ماقولنا قبل كدة
الحب بالحب
العشق بالعسق
الشوق بالشوق
النار بالنار
@@@@@@@@@@@@@@@@@@@
صباحا في قصر أسر تاج الدين
وصلوا كلهم من المستشفى بعد ما أصرت سيلين أن نها وفارس يفضلوا عندهم كان يوم لحد ميعاد السبوع. ويبقوا يروحوا يعملوه في بيتهم. زي ما أصر فارس
العيلة كلها كانت منتطراهم بفرحة كبيرة. وبيرحبوا بالمولودة الجديدة كأنه عيد للكل
و نها شافت اهتمام ورعاية بيها و ببنتها كأنهم أهلها فعلا مش بس أهل صديقتها وده المعتاد منهم
وخصوصا أخوات سيلين. مبسوطين بيها جدا وخصوصا ان اسمها على اسم أغلى انسانة عندهم
##############################
فات أسبوع
الحمد لله
الوضع مستتب
العشاق اتلاقوا من تاني في نقطة العشق
نور و سما
سما رجعت لشقاوتها وماشية على خطة سيلين ونصيحتها
نور أسعد عاشق في الأرض ومبسوط بشقاوة سما
بيتعصب وبيتضايق. لكن مجرد النظرة في عيونها ويشوف السعادة والشقاوة بيكون في دنيا تانية
مهاب وشمس
حياتهم جميلة هادية متفاهمه. لكن شمس بتزيد في الدلال و مهاب معاها. وبعد ما كانت بتشتكي من اهتمامه الزايد بقت عايزة اكتر. ومابتشبعش واستغلت الحادثة اللي حصلت في كدة
سيلين وأسر
سيلين احتوت أسر بعد الحادثة وبرغم وجود نها في بيتهم 5 أيام إلا أنها زي ما كانت بتهتم ب نها اهتمت بيه.
وأسر مبسوط جدا. واتخطا الموضوع اللي حصل وخوفه عليها و رعبه
و وجود نها وفارس عندهم. و سيلين الصغيرة كان بيعطيه طاقة جميلة جدا ومنتظر ابنه بفارغ الصبر
نها وفارس. قعدوا 5 أيام في بيت أسر و سيلين وبعدين رجعوا بيتهم علشان يعملوا السبوع هناك
وطبعا كل العيلة كانت بتساعدهم بفرحة حقيقية
هاجر. منشكحة جدا بدور مرات الكبير و اهتمامها بالنادي والجمعيات قل جدا واقتصر على التمويل بالفلوس ومساعدة المحتاجين
ولما اختاروها لرئاسة الجمعية. رفضت بكل كبرياء وترفع. وقالت إنها مش محتاجة لمنصب علشان تساعد الناس.
محمود افتخر من موقفها جدا وطبعا الكبرياء والغرور اللي جواه زادوا ومبسوط بأهتمامها بيه و بالعيلة
وببنتهم اللي تقريبا ماكنتش تعرف حاجة عنها. ودايما نورا هي اللي بتهتم بيها وطبعا الدادة وسناء
******************
الشباب اجتمعوا وبمعرفة أسر ومساعدة الشرطة. توصلوا لأن اللي عملوا الاقتحام رجال أعمال مشبوهه ليهم علاقة بالمافيا وشغلهم مشترك. كانوا على عداء مع مهاب العدلي بسبب أنه رفض يشتغل معاهم وفي صفقات رافضها وكانوا عايزين يضغطوا عليه بداليا و شمس
وكانوا عايزين سيلين علشان انتقام للي ماتوا و هما ماكنوش هيأذوها بس لما عرفوا أنها موجودة معاهم في نفس المكان و راقبوا تحركات شمس اللي كانت دايما معاها. وقرروا يستغلوا الفرصة وياخدوهم مع بعض
المخابرات بدأت شغلها وتحرياتهم علشان يقبضوا على الأشخاص الموجودين داخل مصر
وطبعا بمساعدة مهاب وأسر و سيلين. اللي هي كمان واخدة الموضوع انتقام
انتقام للبنات اللي كانوا بيتباعوا
انتقام للأطفال اللي اتخطفوا وماتوا
انتقام للي اتسرق اعضائهم
انتقام لعدنان.
انتقام لكل الشرور اللي ارتكبوها
#############################
النهاردة سبوع سيلين الصغيرة
الضيفة الجديدة.
وكان سبوع ماحصلش. وتقريبا الكمبوند كله. كان متزين والأطفال كلهم كانوا مبسوطين ورامي كان في حالة من الجنون بسبب الفرحة
بيغني ويرقص مع الأطفال ويهيص ويوزع فشار شوكولاتة على كل الكمبوند
طبعا العشاق كلهم اتجمعوا في السبوع وكانوا مبسوطين جدا
نور و سما أيديهم في ايد بعض
وبنتهم بتلعب مع الأطفال
و تالين طبعا بما انها انضمت للحزب النسائي جت هي وأنس وابنهم
و رودي و جوزها و داليا وجوزها وجميلة و جوزها
وشمس و مهاب.
وطبعا عيلة تاج الدين كلها موجودة وهما المستضيفين
وعيلة فارس وأهله كلهم موجودين هما كمان
والفرحة دخلت القلوب
@@@@@@@@@@@@@@@@@@@
انتهى اليوم السعيد
وأحمد و رامي الثنائي المشاكس اخيرا اتفقوا على حاجة وقرروا ينفذوها بمجرد مايوصلوا البيت
تاني يوم الصبح. كان يوم الجمعة إجازة للعيلة. وكالعادة عيلة تاج الدين اتجمعت كلها ويقضوا اليوم سوا والمرة دي التجمع كان في قصر عادل تاج الدين
وبعد الغدا
أحمد و رامي في نفس الوقت/ احنا عايزين نتجوز
