رواية يا اجمل الوحوش الفصل السادس والاربعون 46 بقلم رسل فهد
وأنتَ تُعرف هزةّ الشارب خسارة
وهَزة المفتاح نَغمة تصير للعاش بـ سجن
فِرصة وأنتَ الضيعتني
انا عافيتك صرتلك من أعوفك عُمرك تخلصة تونّ
- رُسل فَهد
.....
" عالية "
طلعت امي من الحمام و كعدت وراها انشف شعرها و امشطة
ام شريك : امس جنت يم جدتج
- ها
بلعت ريگي و ما سحبت المشط بقت ايدي ثابته براسها
ام شريك : شمالج صفنتي لا تخافين جدتج كالت أنا اعرف بيدمن أحطها هاي السالفة و هم رادت تشوفج
خطية جدتج جثير تحبجن دگول ما گدر لذراعي
لواني الزمن بحفيداتي
احس وگفت الدنيا بعيني من الخوف بقيت امشط لامي
و لميت شعرها و اني كل شوية اريد انطق كلمة و احجي بس أحس
موس حاشر بـ بلعومي ، خاف اكللها و لأنها متخربطة و واكعة عليه
و شريك مو هنا وين أنطي وجهي
و بسبب المشاكل و اجواء الديرة ياهو التكضة ضايج خلگة يومين يم امي كلت بس أعاين السالفة هدت اكللها لأن أنا ما اكدر اضل ساكته
احس السالفة هاي لازم احجيها و من كثر ما ادري بروحي غلطانة
اخاف حتى احط عيني بعين علي اعرفنه راح يشك بية
وهو ضايج من آخر سالفة سويتها كتله امي تريدني و هي ما رادتني
اجة شريك و بارود صاير ، مو بس هو كل واحد بيهم علاقتة قوية بزناد جان عبارة عن بارود و يمشي من كثر الأعصاب و امي تهدي بي
ام شريك : كلشي قسمة و نصيب يا يمة جا هي
لو ما تريد البت ما توافق بعد صارت و ما يفيد الحجي
شريك : يمة ترى جانت تحب زِناد هي مو ما تحبه
و هيج تحجين جا شلون غدرته هيج غدرة
ام شريك : جثير وادم عشكت و ما اخذت رادتها
بعد الله بكيفة يوزع الأرزاق و يغير الأقدار بين يوم و لليلة
شريك : بس هو جثير انتظرها و خسر عمر كامل لخاطرها
خل تروح تتزوج طبها مرض بس موش آخو
هذا امجد الجلب ابن الجلبة
ام شريك : صاير لسانك زفر حالك حالهم هاي عود انت الفقير
صدك اكلك اليوم اخذنا لجدتك والله ما ادري شلون رضت
زِناد يسافر و يهدها الله يكون بعون گلبها و گلبه
عالية : بس امجد ليش هيج قذر ما فكر بأخو
شريك : شنو هذا النگس
حجاها شريك و هو يصعد الدرج يريد يروح ينام
كعدت امي بالهول و رحت جبت الها ماعون خوخ اني وياها ناكل
بلعت ريكي و مسحت كصتي
عالية : يمة
ام شريك : دخيلج يمة ما بية حيل هبطاتچ ترى سالفتج
تاكل وتشرب وياي النوب كلها بارود تريدلك واحد هادي و تسولف ويا ماكو
عالية : يمة اني سديتها السالفة اطيتهم فلوس و خلصت
بعد محد منهم راسلني و لا هددوني
لطمت على وجهها وكمت بسرعة لزمت ايدها لا تتخربط عليه
و اشرلها على حلگها اسكتي لا تحجين شي خاف تصيح و تغلط عليه و شريك بعده كاعد
ام شريك : ولج عالية ولج يمكسورة الركبة شلون اطيتيهم فلوس ولج ثبتتي التهمة فوك راسج يطلكج رجلج والله يطلكج ولج و شريك توه صحة من فشختج الاولى
عالية :يمة اخاف والله اخاف دزولي صورة ارقامهم
وين أنطي وجهي و ابررلمن
ام شريك : اليوم اكول لشريك اليوم خل شيسوي
تردين تصخمين روسنا ولج عالية
عالية : يمة شبيج وياي ما تعاينين حالي جا
غير تسترين عليه
- ولج لازم يدري اخوج ولج يمصخمة يمكسورة الركبة
شوكت تكبرين هذا عقلج حاطته تعاينين عليه شوكت تستخدمينه
ضربتني على رجلي بعصبية كمت ابجي حتى انقهر عليه
و ما تضل تاكل براسي تغطيت و هي تغلط عليه و خايفة
تلوب تروح و تجي
ام شريك : جيبي تليفونج جيبي اخابرهم ولج منين اخذتي الفلوس و منو اخذهن منج
عالية : واحد ما شفته من الباب اخذهن و راح
- يبوووو يبووووو النوب يندلون بيوتنه
- نصي صوووتج يمه لا يكعد شريك
فتحت الباب وطلعت بالهول لحكتها و دموعي تجري أتوسل بيها ما تحجي لشريك و هي تريد تصعدلة تسولفلة
عالية : يمة دخيلج اني كوه سديتها السالفة و تردين
هسة تفضحيني
ام شريك : جيبي تليفونج جيبي حباية بكلبج عالية
كون على هاي العمايل
طببتها للغرفة بالكوة و دموعي تجري فتحت الها تليفوني و طلعت الها رقمهم دكيت و هي لزمت التليفون تفتر منتظرتهم يجاوبون ،
محد جاوبها دكيت ثلاث مرات و محد فتح خط
عالية : يمة داينيني خمس ملايين أرجعهن لفلوس علي
والله اسوي سلف و أرجعهن الج بعدين بس خل اخلص
بقت ساكته تضرب رجلها وتباوعلي و تتحسر
و اني كاعدة أبوس بيدها
صار الليل و نزل شريك يخابر و يحجي بصوت عالي
شريك : والله والله لا اتزوج و لا اودي المهر إذا ما ترجع
انعل ابو العرس لابو الزفة ما اريددد شيخ لا تحاوووول
... جا تيتمني مرتين مو تدري أنا أعاين ابوي بيك
شلون ما تحضر زفتي .. ابد ابد ابد والله
سد التليفون و صاح عالية جيبي النفاضة
ام شريك : خطية هذا زِناد يكلك عَرس
- اي بس ما اعرس لو اعرف انهي كلشي ، يعوف كلشي
و يخلينا هنا وحدنا علمود امجد العار و بت تغريد
ام شريك : جا ييمة شلون تفصخ خطوبتك بعد ذاك التعب كله و امها تشمرلي بسامير ساعة و هم سوولهم بلبلة
بقى ساكت يفرك بگصته و دك تليفونه ، شمعة حسبت ما يجاوب
بس صدك اخوي ما يقاوم
- ها حبيبتي شونج .. لا توني كاعد من النوم شلون صارت بلاعيمج جابولج دوة لو اجيبلج ... يالله هسة شوية و اجيج
سده منها و كام للمطبخ يغسل وجهة
ام شريك : راح تروحلها
شريك : اي يمة اشوفها مريضة صارلها يومين ثولة
تشرب بارد و تنام على المبردة بلاية تنشيف
شمحتاجين اجيبلكم وياي
- سلامتك يمة
- و انتِ عالية ، صدك مو رجلج هنا جا ليش هنا خو ماكو شي
عالية : لا خوية بس مريضة كال ارتاحي يم امج
شريك : هلا بيج البيت بيتج حبيبتي
عاينت لامي خازرتني
ام شريك : صدك ييمة دريت بالسالفة الجديدة هاي الصايرة
هالايام من وره هذا الانترنيت يهددون البنات بصورهن وياخذون فلوس شايف بالله
شريك : و صورهن شعدهن يمهم ، مستهترات
- والله مادري عايزة مصايب الوادم
شريك : جا هي الوادم عايشة على المصايب
و كلها مستهترة لا الولد و لا البناويت تتأمن ولو هسة المصايب كلها للمتزوجات
ام شريك : يمة اسم الله الله يجفينا الشر
حجتها وباوعتلي خايفة سكتت عنه وهو عدل ينطرونة و راح
امي تعض بأصابيعها و تضرب على وجها سمعته يسولف بره ويضحك
بالباب اجيت يم باب المطبخ سمعت صوت علي ويا انخطف لوني
و طبيت جوه شوية و صاحلي شريك طلعت للساحة
شريك : تعال طب جوه واكف بره والله ما تستحي
يالله أنا شوية و اجي
طلع شريك و طَب علي طبگ الباب رحتله بساع اركض و هو يأشرلي
على كيفج شبگته و هو يضحك
علي : شلولو تعرفين شلون تقشمرين
عالية : احبك
علي : شونج لا رساله لا مخابرة وين ملتهية
عالية : مو دزيتلك و ما جاوبتني
- ما اجاوبج لان ما عاجبتني هالايام بس اكول حامل
- تعال فوت جوه ليش واكف هنا
سلم على امي و ما قبل يطب للهول طبينه للديوان
علي : يالله بدلي امشي وياي بعد يومين التحق
عالية : يالله هسه احضر جنطتي
عاين لبطني و كض ايدي
علي : لا ابقي بطنج جثير كبرانة ابقي يم امج والله خايف عليكم أنا و امي مغتاضة بسبب محمد لان عاقد على أخت تغريد
عالية : يعني هسة ابدل لو لا
علي : لا و تعاي بحضني
- امممم خاف متريدني اجي عاشكلك وحدة و مخليها بالغرفة مالتي
- هذا تفكير عقلج وحدج لو ابنج وياج
عالية : اكلك صدك شو لسه ما تحرك خاف معوق
كفخني على راسي بأيدة
علي : طاح حظج بيمن طالبة الطفل
عالية : لا اسم الله ان شاء الله يطلع لو تطلع مثلي
اكيد يطلعون على امهم جا على ابوهم هو وين بحالهم
علي : هاه ؟؟
- ولو انتَ بحال امهم حتى بحالهم
ضحك و قربني لصدرك باسني براسي
علي : كومي بدلي يالله امشي وياي شيخلصني من لسانج
عالية : ابدددددا والله ما اروح عود بيوم التلتحق مر عليه اشوفنك مو ما تعاول تشرد
علي : طبعاً اجيج ، يعني هسة من نفسج ما تردين
ترحين بدون زعل ترى أنا كتلج امشي
- و عليمن ازعل
جان لازم ايدي و يحرك إصبعة الابهام عليها و أنا أعاين عليه
شال ايدي باسها و اني اكول بگلبي والله يحبيبي لو تدري بية شسويت
لزم حنجي بأيدة و باس خدي
علي : كل يوم اول ما أفز اول شي يجي على بالي انتِ
و من أعاينج بأسمي و ابني ببطنچ گبل تحلى الدنيا
بعيني
بِست خدة و خليت راسي على صدرة و مچلبة بي بكل قوتي حسبالك راح يجي واحد ويشلعني منه وهو حَس عليه گعد يسولفلي من يصير
عدنا بيت شلون راح تصير حياتنا
علي : بس كون زِناد هم يرتاح والله مستكثرين اعلى ارواحنا
الفرحة من نعاين الصار بي
عالية : الله يهدي
علي : شنو يهدي مسودن هوَ
عالية : ها لا والله مو هيج يعني الله يهدي امره و هيج
ابتسم و ضربني على ايدي
عالية : شبيك ترى اعرف احجي بس انت تفتهمني غلط
علي : صحيح أنا غلطان عمي
رمش عليه محمد فتح التليفون يريد يدگ عليه دزلة رسالة
فتحها و ما خلاني أعاينها شوية و وخرني من حضنه باس راسي
علي : يالله حبيبتي اروح و گبل لا التحق اجيج
عالية : ما ضليت جثير حتى ما شبعت منك
- اجيج حبيبتي ولا يهمج
حجاها و كرص خدي و باسة
طلع و أنا لازمة ايدة باس ايدي و هدها فتح محفظته انطاني فلوس
و فتح الباب و طلع طبيت لامي لكيتها بالمطبخ تعاينلي من الشباك
ام شريك : شو ما تأخر رجلج
عالية : مادري اخو دزلة رساله و تخربطت كل أحواله
- خاف عليج يمصخمة
عالية : لا يمة شبيج كتلج السالفة خلصت أصلا باسني
و انطاني مصرف لو عليه الرسالة جا ذبحني غير
ام شريك : والله گلبي لاعب يعالية خاف اضل ساكته و أتندم و خاف احجي و أتورط
- تتورطين يمة اكيد وعلي يذبحوني شريك و علي
النوب امجد صاير شيخ و هذا ضرباته تكسر حتى العظم
بقت صافنة امي و ساكته تفكر طبيت للغرفة
دزيتلة رسالة محتواها كلمتين " أحبك علي "
وصلت بس ما شافها
اجه شريك بالليل متغير كل كيانه يصفن و يبتسم
ام شريك : لو ادري من الصبح دازتك الها و هيج
أعاين ضحكتك شاگة حلگك
شريك : موش مره يمة ضيم تروح الها محمل حزن تجي فارغ و الصعبات كلهن سهلات يصيرن
ام شريك : يمة شسوت ذاك اليوم من انتَ زعلان عليها اكلت راسي كتلها اريدة يصالحج بس خاطر اخلص منج
شريك : ههههه تنهار من ما احجي وياها و أنا لان ما اريد أأذيها بـلساني ما أجاوبها
عالية : ليش زعلت عليك الله
باوعلي يضحك
شريك : بعدج صغيرة بابا
عالية : يا جا مو تزوجت و راح اخلف شني صغيرة
شبية ما اعجب
- هههههه لا طلعت بدون ما ادري
عالية : جا عادي خوية وذا هي بعدها ببيت اهلها عود من تجي لهنا ازعل عليها من تطلع والله خوش انتو الزلم بس تردولكم حجة
ضحك بصوت عالي و امي تعاينلة و تضحك
شريك : ماعندي مشكلة وين ما تروح وي اهلها بس موش
بيت ربيعة و أنا محرمة عليها بي جثير شباب
و كلهم عوينچية و مستهترين
عالية : اي عيني ماكو مثل احفاد رهينة لو عشگوا يقفلون
ام شريك : جا هو شيخهم شلونة شتطلع ولد عَمة
قابل سادة لو موالين
شريك : هههههه ها يمة شمالج
صعد فوك و امي تلوب تريد تصعد لشريك دكلة توصل
نص الدرج و تنزل تبقى تفتر بالهول لحد ما طبت نامت وهي تغلط
عليه تمددت و تَچت ظهرها على الكنتور
ام شريك : ام المصايب ام البلاوي ولج كون يصير
عندج بيت حتى تسيارة لا تجين بعد
عالية : خوش چان هيج يمة هسة اخابر علي يجي يأخذني
حجيتها و كمت سويت روحي ادور غراضي
ام شريك : انجبي نامي يالله فوك شينة گواة عينة
عالية : جا شسويلة يمة حضي جوه يا طابوگة نايم
بعدنا احجي وياها و اندك باب الشارع قوي عاينت لامي بخوف
ام شريك : يمة خاف شو شصار يم بيت جدتج رهينة
فتحت الباب طلعنه نركض و شريك تليفونه بيدة يدگ
ام شريك : ولج لا تركضين انتِ حبلة
عالية : يمة اخافن على علي خاف شو شيصير
- ماكو شي ان شاء الله
هي حجاية و هي چفتت علي للبيت فزيت يعاينلي بأعصاب
عالية : ها علاوي
شريك : هاي شنو علي غير أفتهم فهمني
ما جاوبه و لزم زندي قوي صرخ بوجهي درت وجهي على امي تخلصني ، اجت توخرني من ايدة تهدي عتني قوي و شريك
اجه لزم ايدي الثانية يريد يجرني من ايدة
و كل واحد يعتني من ايد الثاني و يتصايحون
ام شريك : حبلة يمة شجاكم وياها الطفل راح يطيح
علي : انعلللللللللل ابووووو
جرني من ايد شريك
شريك : شبيك فهمني غير اعرف شمسوية
علي : لك شنو الما مسويتهههه شنوووو لج عالية
شنووووووو هااااااي
حجاها و يفتح بالتليفون ايدة ترجف ، حسبالي راح يطلع صوري اكيد بس صدمني مو بس صوري حتى فيديو من يأخذون الفلوس من ايدي و باب بيتنه و ردان دشداشتي ، بقى شريك صافن و امي لطمت على وجههة
ام شريك : دخيلكم دخيلكم استروا عليه أنا أنا أفهمكم
والله يومية اريد اكولن بس الخوف كاضني
شريك : شتحجين يمةةةةة هو شكووو هاي ايد عالية
العلاااااااكة شبيها صور عالية هاي شنو
لج عاليةةةةة احجي فهمينييي
اعاينلهم اثنينهم واكفين كبالي و من الخوف اريد اطبگ حرفين
سوة عيني على امي اريدها تخلصني بس حتى هي تطگ سن بسن من الخوف سحلني شريك من طرف دشداشتي و هو ما يتفسر وجهة من العصبية و القهر
شريك : فهمني إذا انتَ تعرف كلشي لو تخليها تحجي
شنية هاي السالفة
مخنزر بوجهي علي و اشرلي احجي و شريك لازم راسة بأثنين
دموعي تجري و استنجد بأمي من آيست منها ما تكدر الهم
بلعت ريكي و كعدت اسولف الهم كلشي و هم بكل حرف يعيطون بوجهي و يحققون وياي و لا واحد منهم مصدگ بكلامي
شريك : يمةةةةة يعني تدرين انتييييييي شنو انتن
ترددددن تموتني
ام شريك : والله اخاف عليك تنجلط يمة والله ما عندي غيرك و حتى لجدتك رحت و حاجيتها أنا ما ضليت ساكته بس ما رضيت بسالفة الفلوس وحلفت إلا اكلك وهاي يمك و اسألها يمة بس والله هي تحب رجلها و تخاف لا تخسرة
يمة علاوي والله تحبك مريتك و جاهل الخوف عامي عيونها
علي : الخوف الخوووف هاي بتج تخاااااف هاي تدكككك دروب هاي مستهترة و ما تصيرلها چااااارة
لزمت ايدة و دموعي تجري و أعاين بعيونهم منو بيهم عيونه شوية
بيها رحمة حتى أجلب بي بس و لا وحدة بيها ذرة رحمة
لزم شريك حنچي و عصرة بيدة قوي يصيح عليه بصوت عالي
و علي واكف يخابر خالد طلع برة و بقى بس شريك يمي ضربني
راشدي و امي ركضت خلتني بحضنها تحميني منه
ام شريك : حرام يمة حرام أخيتك حامل على كيفك
شريك : لا تخبليييييني يمةةة جااااا أختي ما تفكر
بيةةةةةة شلونننن هيج تسوي شلوووون و صورتها بكل تليفون صاااااارت يمة شتحجين انتِ
عالية : والله أحبك أنا جثير وأفكر بيك والله خفت منهم
و ما ردت صورتي تنشر و انتَ و علي هيج يصير بيكم
شريك : جاااااا بدال ما تكولين ترحين تبوكين من رجلجججج ولج انتِ شنو انتِ
راد يجرني من ايدي و امي مچلبة بية ما تطيني اله
طَب علي و طبگ باب الحوش قوي و اجة عليه بركان من الأعصاب
لزم زنودي اثنينهم و يعياين لأثر الراشدي على خدي
علي : وووووين باقي الفلوس لج شكثرررر ماخذة مو بس خمسة عالية احجي الصدددددك
عالية : لا والله لا وروح ابوي خمسة وداعت الطفل الـ بطني
بس خمسة والله وداعتك و داعت امي
صفگني راشدي و أنهار يجرني يريد يأخذني
ويا و أنا مچلبة بيد امي
ام شريك : ولك يمة مرتك حامل لا تضربون ولكم لا تموت شجاكككككم الحامل ما تنضرب هيييييج
علي : ولججججح حسبالي انعدلتي شمدريني الاعوج
يبقى اعوج
عالية : والله ما اخذت منك اكثر والله علي ليش ما تصدكني
تليفوني بيد شريك يگلب بي و يضرب عصب راسة خفيف
شريك : عرف عرررف هذا عرررف
أندگ الباب قوييي و صوت صياح بَرة و علي عاين لشريك هدوني
و طلعوا بساع و امي تلطم على خدودها ، طبت جدة و امجد و عمي عمار يصيح على علي
عمار : وينها هاي الحرامية علگها زناد برگبتك تالي هدكم
و سافررر ، طلگهاااا يالله طلگهاااا خلي اخوها يغسل عارها
امجد : وينها جيبوها ، جيبهااا شريك
رهينة : بسسسس و لا چلمة سترونة ما عايزين فضايح
امجد : مووووش زِناد أنا و أسترّ للناهبات
جيبووووها وينها
طب عمي عمار يريد يسحلني وگفوا شريك و علي گبالي و هو أنهار
عمار : وووووووولك علي
علي : حاااااامل حااااااااامل
بقوا عمي و امجد خازرين علي و شريك يعاينلي بكسرة
ام شريك : والله خوافة والله خوافة و ثولة ما تفتهم
امجد : ويين الفلوووووس
عمار : شكدددددد هن شكددد. بالضبط
علي : خمسة
امجد : أمده غيرتك ولسه ما ذابحهااا
و هي تتمخطر على شواربك تبوگ فلوسك و توديهن لعشيگها ولو انتَ مربيك زِناد المگررن
رهينة : اكللللللللل نعل تاج راسك ورأس الخلفوك
امجد : اششششششششششش لا تغلطين
جدة تعاين عليهم مهضومة و عمي حتى ما سَكت امجد
و مصدومة شلون علي و شريك هالكثر حاسبين حساب لأمجد
ام شريك : أنا أنا اردلك فلوسك يمة
و خلوها اخوها يأدبها الله يخليكم
امجد : اي وأحنه هنا نلگط خضرة الجن و لمكسراتجن
انااااا هاي من زمان لو بيدي كاتلها و غاسل عارها
بس زلم ماكوووو
علي : أنا و شريك نحلها محد منكم يتدخل
عمار : انججججججججب و الله إذا تنفست بيها تنذبح
والله
دار وجهة عليه و هو معاني الحيرة كلها بوجهة عفته و چلبت بقميص شريك ابچي لان ادري علي حتى لو خلصني هسة ما يخلصني بعدين من امه و اهلة
عالية : شريك لا تخليهم يسوولي شي شريك
دار وجهة عليه لزم ايدي بعصبية كعدت بالكاع حتى اصير ثكيلة و محد بيهم يجرني و صوت البجي مالتي واصل لبيت جدة
امجد دفع عمي عمار و راد يجيني صرخت امي بوجهة و علي كعد كبالي ركبة و نص لازم ايدي قوي
علي : ولج هيج تسوين بيـة
شريك دفع امجد و علي صاح لامي و أعاين عينه على ثوبة
يعاينلة و يرد يعاينلي من شفت الدم على دشداشتي مسحت
عاينتلة بخوف
صاح لامي و امي لطمت على خدها و طلع امجد و عمي برة
أخذتني امي و جدة للمستشفى بساع بس هم ويانة
اثنيهم شريك و علي و بين هوسة المستشفى و الخبصة ذيج
و الدكتورات حايرات بية و علي وشريك برة ما راحوا لحد ثاني يوم
من كتبولي خروج من المستشفى بس جدة راحت و بقت امي
ام شريك : الله يثبته كون ببطنج بجاه محمد و ال محمد
محد منهم كال شكالوا بس جدة خابرت امي و امي
تحجي بصوت عالي ادري بيها تريد تسمع علي
- والله جثير مو زينة دكول الطفل بالقدرة مچلب چنه يريد الدنيا مايريد يعوفها و عالية بيها وليد
ما جاوبها واحد بيهم و ردينه للبيت اول ما طبينه للبيت علي و شريك كعدوا بالهول و امي أخذتني للغرفة تلطم على خدها
ام شريك : لا تصحين سوي روحج مواته بختج بهذا الجاهل
توني غفيت من التعب و فزيت على صوت الصياح بالهول
امي تعيط و تبجي و شريك يصيح
صوت امجد و عمامي و كلهم اصواتهم ترن بأذاني
احس رجلية خيوط صارت من الخوف غطيت راسي و لزمت بطني بأثنين ادية و دموعي تجري
امجد : شريك تذبحها لو رجلها يذبحها
وإذا مو زلم انتو انااااا اغسل عارها بيدي
سچاچيـن الدَهر نبتن بنص حشَاي
أصيحك و انتَ مو وَياي ..
...
" جُمارة "
هدني يومين من الفرحة من سمع زِناد صدك سافر
گام يطب يومية من باب المطبخ يكابل امه و يرگص و يصفگ
و امة ترگص ويا
عجيبة : أولها سفر ان شاء الله و تاليها موت
امجد : عاف كلشي كلشي و سافرررر ههههههههه
كلشي صار الي
عجيبة : هن كلهن الك من البداية بس هو مسموم
امجد : أخذج نعيش بـ بيته ليش كاعدين هنا بهذا الكبر
- لا يمة لا چفينه شره لا تفتح الحلوگ علينه
خليها العافية بالتداريج
يباوعلي و يضحك كل ما تجي عينه بعيني يضحك بصوت عالي
و يجيب لامه يومية سفطات فلوس يكعدون يحسبون بيهن و كل ما يلتهي شوية تاخذ من الفلوس و تضمهن جواها
وهو ما يدري
تعوفني بنص الهول و كلمن يروح لغرفته من عرفت وصلت لاعلى مراحل العجز ولو بيني وبين الباب متر ما راح اكدر احرك روحي و اخلص روحي آثار الضرب بس الي على ايدي اكدر اشوفهن الباقيات ما
اكدر أشوفهن و رجلية خَف الورم بيها بس الوجع زاد
و الليل اخلصة اون اسكت من أعاينه ينزل
نزل و طب الها جوه للغرفة
امجد : عجيبةةةةة تعاي لج شلون راح تفض سالفة شراع
خاف حسبالج راح أشيل السالفة علمود خلقتج
هذا داك عليه اليوم يريدني
عجيبة : ياكل نعل و ينجب ما يسدون السالفة و يسكتون
هسة فضة اهلها ما سائلين عليها
امجد : و أنا شلي غرررررض ما تحاجين روحج شني أنا كفيل خسار بعمايلج لو شني
عجيبة : ترى أنا وياك دافنيها سوه لا تتبرة مني
لان ما يفيدك
امجد : باعي ترى حتى روحي أنا اتبرة منها ماعندي لحية مسرحة
عجيبة : نصي صوووتك ولك صرت شيخ بس موش عليه
ترى أنا امك لا تنسى و أنا السويتك
امجد : يا ام هاي شني مچذبة الچذبة و مصدكتها
انتِ
عجيبة : لا لا يمة أنا امك ليش هيج تحجي وياي
اول ما فتحت باب الغرفة غمضت عيوني حتى ما تدري بيه سمعت
رجعت طبت و سدت الباب تحجي ويا و تعاركوا
لحد ما سمعت صوت صرختها و هو طلع من الغرفة و طلع من البيت كله
اجتي ورا بساع قفلت البيبان و اثر الراشدي بوجها
صاير احمر
راحت سوت ريوك الها و سوتلي لفة وياها الوچ بيها كوه
اكلت هي بساع بساع و كامت تليفونها بيدها و تدك
تروح و تجي من غرفتها للهول لحد ما طبت مره من الباب الخلفي و طببتها لغرفتها وضلت لا ساعة و لا ساعتين لحد ما تعاركن
و طلعت المره زعلانة
- ولج عايني عجيبة خوش مضحك عندج أنا كتبلي خمسمية شو هذن ثلاثميه
عجيبة : ولج أجيبهن أجيبهن الج بيدي
- شتردين بعد مو ابنج اخذ الشيخة ما تاخذيها
عجيبة : اخذها والله اخذها بس اطيني مهلة هاي الأيام
اصفي الأمور صبرتي كل هاي السنين بقت على الجم يوم
- لان البت شكككككككت و صايرة حتى ما تخاف من أضربها تعيط بوجهي
عجيبة : وليش تضربيها مو كتلج لا تضربيها
- لا والله خاف ما ترضين ولج فوك حگة دگة كطعتها تكطع والله و كل ما تلعبين عليه بالفلوس اطگها و لو ما اخاف على رجلي و بزرتي جا من زمان رحت لزناد و كتله على عمايلج
عجيبة : لا تخافين على روحج لان هم تدرين اول الينچتلون انتِ ترى كلنه بالهوى سوى
- چا دام هيج اكلج و لا دكولين ما كلتي بس اعاينها شمت ريحة للسالفة أكتلها و ادفنها و لا دكولين ليش
عجيبة : اذبحججججج وراها
- اي فضحي روحج و ذبحيني عود
طردتها عجيبة و اني صافنة على الدرج اريد افهم عندي خيوط
كومه بس عقلي واكف ما يكدر يجمع شي
ضلت النهار كله عجيبة تلوب تالي العصر لبست عبايتها و طلعت من
الباب الخلفي ضليت بالبيت وحدي و غير فضة عيني متشوف
و لا عقلي يفكر
و اني كاعدة على الكرسي أتخيلها وراي واكفة و تريد تلزمني
احرك بالتاير مال الكرسي اريد اشرد
ما ادري شلون طحت من الكرسي و شاغت روحي صرخت بعالي صوتي و اني بالكاع
مرت فوك الساعة و طب امجد باوعلي ما سوه
شي ضل يصيح عجيبة ما موجودة
امجد : وينهااااااا
جُمارة : راحت
شوية و انفتح الباب الخلفي و طبت فزت من شافت امجد واكف
راح عليها جرها من عبايتها و كطعها يم الباب
و اجه عليه دفرني بخاصرتي و هو منهار
امجد: اندليييييت مكانها و شرررردت منو شردهااااا
عجيبة : كون كبل لا هم يلزموها انت تلزمها
و تفهمها تعترف النوب نطلعها ما عدنه غير هذا الحل
امجد : غير اكضهاااااا اريد اكضهااااا
عجيبة : دير بالك منها ما دام شردت يعني عدها واحد ساندها
- لاااااا اذبحها اذبحها والله إذا شميت ريحة هيج سالفة
إلا اخيسهااااا بالسجن و اخليها تبوس رجلي
حتى اطلعها
عجيبة : هاي الساقطة خل تولي أزوجك اغاتها هسة
انتَ الشيخ و مية الف وحدة تتمناك اجيبلك احلى وحدة
بالديرة
امجد : اي اي
يحجون و طريقتهم بالكلام مثل الشياطين من ينوون على سالفة
بالليل نايمة و ركبتي مكسورة من وره حافة الكرسي
انجريت من ايدي و ردت اطيح لزمني من ركبتي يسحل بية
امجد : امشيييييي
- ما اكدر ما اكدر والله
راد يخليني بكل طريقة امشي بس من آيس مني كلش
أخذني سحل لباب السيارة و الفرع كله فارغ شمرني بالسيارة
و ضل يرجع بالسيارة ليوره ما تقدم لحد ما وصلنه كبال بيت زِناد نزلني يسحل بيه و المفتاح بيدة فتح القفل وبأيد و لازمني بأيد
و هو يضحك
طبيت للبيت اباوع الغزالات بالقفص فَزن من طبگة الباب
البطة تلعب بنص الحديقة ما حابسيها و تفتر من الحديقة للكراج
اباوعلهن و مية الف حَسرة بگلبي طببني للبيت و عيني عليهن
امجد : جان يريد يعرس ههههههههه
صعدني فوك و طلعت روحي يالله خلصت الدرج لان بكل درجة تشوغ روحي و تنضرب بالحافة مد ايدة على بيبان الغرف كلها مقفولة
من هدني طحت بالكاع على ظهري صرخت و هو يضحك كسر باب
غرفة من الغرف و طب قبلي يعاين عليها و يضحك
اجة عليه من طرّف الدشداشه سحلني للغرفة اباوعلها
غرفة حلوة و ريحتها طيبة و اول ما اجت عيني على صورة مغطاية
فوك الجرباية بقماش ابيض و امجد واكف بنص الغرفة يباوع على كل قطعة و يضحك بصوت عالي
صورة عمي يوسف و مرته شايلة طفل الصورة قديمة
واضح هذا الطفل زِناد و هاي امه حليمة
و على الميز مشمورة غراض من ضمنهن الأسوار الي سويته اله
و قراصتي البيضة مال المدرسة
امجد : اوففف زِناد هسة انت وين و أنا وين
حققت حلمك لا تخاف و جبتها لغرفتك بس هي مو مرتك
ههههههههه
راح يم الكومدي و مد ايدة وخر القماش من الصورة و يضحك
فتحت عيوني بصدمة و سديت اذاني من ضحك امجد ،
فاتحة حلگي بصدمة من شفتها صورتي شكبرها
جرها من الحايط وشمرها بالگاع يدوس عليها برجلة لحد ما تشگگت
و يضحك
امجد : اكررررهك و اكرررره كلشي انتَ تحبة
مو بس اكرررهة ادمررررة لحد ما اعاينك كبالي متدمر
اناااا بس الشيخ و اناااا احسن منك
اي اي أنا احسن منه
كام كل شي يشوفة كبال عينة يشيلة و يشمره بالكاع
حتى للكنتور راح بين هدومة و دشاديشة الشتوية المعلگة
بدلتين صغار مال طفلة كلهن يشيلهن و يدوس عليهن
معقولة هيج مطمئنين زِناد بعد ما يرجع
شنو من روحة هاي
كعد كبالي ركبة و نص راد يلزم شعري و تلمسة ماكو
كام يضحك بصوت عالي
امجد : شفتيييي شلون جبان يخااااف مني عاف كلشي
و شررررررد
درت وجهي عني و بقيت ساكته ضربني راشدي أفتر
وجهي حسيته
بقى ساعات هو بالغرفة ما خلى شي ما كسرة لحد ما تعب
جرني من طرف الدشداشة نَزلني الدرج سحل فقدت حتى الوعي من كمية الوجع فزيت على مي بوجهي شهكت و جسمي كله يصل عليه
امجد : كومي لججج
- ما ماكدر
لزم ايدي يريد يكرمني يشوفني اطيح ما يصدك و كل طيحة
اشوف شريط حياتي كبال عيني
تالي أخذني يجر بية بأيد وحدة اباوع للبيت من جوه ما انتبهت عليه من طبيت الهول و المطبخ مرمميهن و ماكو ولا قطعة اثاث البيت
فارغ و الحديقة احلى شي بس الأشجار بعدهن نبتات صغار
بس النخلة العالية مغطية البيت بسعفها و التمر تارس الكاع
الطايح من العثوگ
رجعنا للبيت و مواقف هووواي مَرت على العين الذاكرة رفضت تشيلها
و لو أنكتبت ما راح يصدگها غير جُمارة و حور
لان بس الي مَر عليه هذا الوجع راح يصدكة
جان اليوم شوكت يبدي و شوكت يخلص بعد ما تدري بي جُمارة
و لسانها ما يلهج غير بـ فضة و جانت جُمارة عند امجد
هي مكان تفريغ كرهة و حقده لزناد الي مستحيل ينتهي
من أنسانة عاطفية تشيل هَم الحيوان إذا تأذة
بـ قرار سريع و خاطئ تحت نار هادئة جداً
إلى أنسانة بنصف عقل تقريباً لكل شخص يشوفها من بعيد
امجد : هاي وين اوديها خلصيني من وحدة
حور الساقطة لسه محد لزمها
عجيبة : هي هاي مخبلة لو توديها لمستشفى المخابيل احسن حتى إذا ماتت تموت هناك
امجد : اي و يضلون يومية داكين عليه بحجة انت رجلها
عجيبة : طلگها شتسوي بيها و اشمرها هناك
قابل احنه شلنه غرض و شنسوي بيعه بعد
امجد : اريد زِناد يشوفنها بهذا الحال
عجيبة : خلي يووولي بعد زِناد ما يجي ولك
هسة حالة حال الميت على ساعة و نسمع خبرة
راح يتمرض مثل مرضته من ماتت امـه
بس هاي ما يصحى منها
امجد : و رهينة و امها شيخلصني منهن
عجيبة : طبهههههن مرض هو أنا اريد أموتهن
و ادوس ع كبورهن هالرس الوسخ شكد اكرهن و اكره أساميهن
كاعدة عجيبة يمها صينية بيها ماعون فواكه و سچينة
تكشر بالتفاح و البرتقال و تاكل انطتني شيف تفاح لان عيني عليها
و على الماعون كامت للباب يدك اول ما حسيتها طلعت شمرت روح للكاع عضيت ايدي قوي حتى لا اصرخ من الوجع و جريت السجينة
و اباوع لأيدي اشك الوريد لو اسوي مثل ما صار بفضة
و اخلص من كل هذا العذاب
و اني ما ابري الذمة كل واحد وصلني هاي المرحلة
بَس مو زِناد لان زِناد ماله دخل، احجي وي روحي و اتذكر فضة
و الوصية الي دمرت حياتي
اتذكر عيطة عجيبة من بعيد و هي جاية ركض عليه
و السجينه على الوريد من شفت الدم على ايدي دخت و فقدت
الوعي جنت فرحانة هاي آخر مرة راح اشوف وجووهم بيها
و اخلص من كلشي مريت بي لان ما عندي واهس للدنيا كلها
بعد و ضگت من الر اقوى جرعة
السيارة تمشي و عجيبة بالصدر و اني ليوره متمددة فتحت عيني
عجيبة : صحت ام المصايب
مد ايدة وهو يسوق راد يلزمني ، بس عافني من صاحت امه
و صار صوت هورنات قوي
عجيبة : جااااان دعمتنه يمصخمممم
تمشي السيارة و هم يحجون و بالي مابي غير فكرة ليش ما متت
اني مو كصيت الوريد ضلمت الدنيا و وصلنه مكان غريب
يخوف نزلوني حارس واكف بالباب و عجيبة تسحل بيه بالكرسي
و امجد يدك على واحد منتظرة يجي
اجة واحد اكرع يخوف و سلاح بجيبة من جوه لابس مثل هدوم الحارس
تشابكوا هو و امجد سوالف و ضحك لحد ما اندار علية
امجد : هاي السولفتلك عليها
- تدلل حبيبي خليها و روح
شو اباوع شوية و امجد اخذ عجيبة و راح و هذا طببني جوه يدفعني بالكرسي و كل ما نفوت جوه اكثر كل ما تتقرب اصوات العياط
جُمارة : احنه وين
- بالمستشفى هسة تصيرين زينة و ترجعين احسن من قبل
بدون كلشي فتح باب و طببني لغرفة كلها عجايز و نسوان كبار
كل وحدة بجهة و حركاتهن تخوف مو طبيعية اول مازطبيت كامن يصفكن و يفرن بية بالكرسي اني أعيط من الخوف و هن صوت ضحكهن اقوى من صياحي
طبت وحدة بيدها عودة كامت تصيح عليهن سكتن
- اشششششش كافي
جُمارة : حبابة خلصيني أني وين هاي شنو من مستشفى
- انتِ منو النوب
- مادري هذاك الرجال الأسود جابني
- يا هلاااااااا يالله صيري حبابة بدون وكاحة
عافتني و طلعت و سدت الباب و أني مصدومة بهذا المكان الحايط كله شخابيط و وسخ و الأسرة وحدة فوك الثانية الفراشات وسخة و كلشي بالمكان وسخ و مو نظيف
اجتي وحدة رادت تنزعني الشال
- نزعي نزعي خل أشوف شعرج احلى من شعري
لزمت الشال بيدي و اشرت الها لا اجت وحدة بصفها صارت وراي
يردن ينزعني الشال و اني أعيط لحد ما صاحوا عشاء راحن يركضن
يم الباب طبت وحدة توزع الهن حطت بيدي ماعون و صمونة
من الجوع أكلتهن و هن يلعبن النفس و ادك بالباب اريد احد صاحي يجيني ماكو لان حسيت روحي بغرفة مال مجانين صدك
النوب تمددن حتى ينامن خزرني و اني ادك الباب
خفت منهن و نزلت ايدي بقيت كاعدة على الكرسي للصبح
انفتح الباب و اجه هذا الحارس ويا وحدة بيدها أوراق
اشرت عليه كالت هاااايةً
جُمارة : انتو وين جايبني اني ما مابية شي و اهلي موجودين والله كلشي ما بية هذا امجد النذل جابني لهنا
حتى يخلص مني والله مابية شي ادليكم بجدتي و عمامي
يجون يطلعوني
عافني احجي و اجه اشرلها على ايدي و شعري و رجلي
دفعته بيدي
جُمارة : ذني كلهن سواهن بيه امجد لان يكره زِناد اخو
و زِناد جان يحبني والله هو زين شعري وكسر رجلي
صحيح اني جرحت ايدي لان اريد اخلص من عذابة
- امجد زوجها كتلي لازم يجي أحقق ويا
- اي دكتورة يجي هسة اخابرة هي متعرضة لصدمة قوية مرت ابن عمها منتحرة و كاتبة وصية ما تبريها الذمة يكولون كامت تتخيلها
بكل مكان و تعذب بروحها هم ناس شيوخ سولفتلج عنهم تعرفيهم
و من وصلت للانتحار جابوها تدرين العالم كامت ما تصدك
عافوني و اخذها و طلع مر اليوم الاول و الثاني و الثالث و اني بنفس الغرفة يومية أعيط و أضرب راسي بالحايط اريد واحد يخلصني من الاني بي و النوب اشوف حركات ذني الوياي بالغرفة اتخبل بالزايد
عجوز عمرها فوك الخمسين من تجيها الحالة دكوم تطفر
من فوك الأسرة للگاع و إذا وحدة منهن تضحك تجي تخنگها
أخذوني لغير غرفة بيها چرباية زايدة و لو باقية بذيج احسن
هذن و لا طگة و من كثر ما اشوف كل اليمي مخابيل صرت حتى اني ما اصدك بروحي صاحية وحدة من كثر ما تنهار تلزمهن تكطعهن تكطع و يجون يضربوها ابرة حتى تنام
طبت الي تضربها ابر
صحت وراها دارت وجهة علية
جُمارة : حبابة شوفي رجلي
- مو هسة مو هسة يوم الخميس تجي الدكتورة
- والله توجعني
رادت تطلع وصلت للباب و رجعتلي طلعتني من الغرفة تدفع بية
لحد ما أخذتني لغرفة بيها دكتورة
- شسمك يا حلو
جُمارة : دكتورة اسمي جُمارة واني والله مو مخبلة اني رجلي جابني
لان عندة مخططات براسة و يريد يخلص مني هو أصلا كاتب مرت اخو هو و امه و اني اهلي شيوخ و الله روحي سألي عنهم
- عفية عفية بالبطلة لا انتِ شجاعة و تطيبين و تطلعين
هاي ليش رجليج هيج عييني اكيد وكيحة و وكعتي
جُمارة : لا هو كسر رجلي
خابرت دكتور ثاني و تطك صور لرجلي و توديلة
- اخذيها لغرفتها عيني دكتور محمد باجر يجي و يشوفها
أخذتني العاملة مرة جبيرة لابسة اسود
جُمارة : خالة خلصيني والله شتردين انطيج جدتي تنطيج
فلوس و ذهب بس كليلها حفيدتج وين
- اروح انطرد يخالة شحصل جدتج لو احصلج
جُمارة : والله مو مخبلة اني والله صاحية و شتردون
تسألوني اجاوبكم والله مو مخبلة
- شكد كبلج گالوها و هسة مخابيل جوه يخالة
يسمعون حسج
طببتني للغرفة كالت سوادين و سدت الباب و لا وحدة منهن على الجرباية بس الضربوها ابره بقيت صافنه ذني وين راحن
ردت وحدة توديني للجرباية ماكو دموعي تجري على خدي و اني
اتخيل خلصت من ضيم امجد و عجيبة راح ابقى هنا طول عمري
لحد ما اصير مخبلة حالي حالهن
و اني أفكر وي روحي طلعت كلهن من جوه الجرباية يخرعني
صرخت بعالي صوتي و هن خربانات من الضحك
و اجن عود يراضني حطن الكرسي بنص الغرفة و كامن
يفترن يسولي شدة يا ورد شعرهن كلهن كفشة ما ماشي بي المشط يخوف و دشاديشهن كلها طگع و مشككة
و أسنانهن مكسره اباوعلهن و من الخوف دموعي تجري
لحد ما تعبن و دكول باب الغرفة قوي راحن ينامن
جُمارة : متوديني لفراشي
كلهن عافني بس وحدة بقت كاعدة تباوعلي اجت شالتني من الكرسي
نمت على الجرباية احس ظهري تشنج من الوجع صارلي شكددد
ما متمددة و لا نايمة على جرباية هيج نومة
كعدت الصبح على هوستهن يلعبن بالكرسي وحدة تكعد و يكومن يسحلن بيها اجتي العاملة اخذتني للدكتور
و لكيت الحارس الأسود واكف يمهم
جُمارة : خابر اي واحد تعرفة من اهلي أحاجي حتى لو ام امجد بس دقيقة والله ما اطول
- تعذريني
جُمارة : دكتوووور هذا متفق وي رجلي والله والله
- متزوجة هي
- لا دكتور طلگها الرجال تصخم راسة يومية تنتحر
ويعالجها و ترد تنتحر
و اني احجي ضغط على رجلي الدكتور قوي صرخت
- يالله يالله بابا حتى تطيبين و ترجعين تمشين
ضربوني ابرة و انطاني مرهم
- إذا التزمتي بي اصدك بيج و اطلعج من هاي المستشفى
متفقين لو لا
هزيت راسي و اني مأيسة من الدنيا كلها لان مبين بس يريد
يسايرني حتى احط المرهم ، بالليل صافنة على روحي
معقولة معقولة محد منهم ذكرني و مريت على بالة
كل هاي الأيام التمر و ولا واحد منهم كال اشوفها
امي ما راح يرف گلبي عليج على كل الي صار بية
لان انتِ بأيدج وصلتيني لهذا الحال
نزلت دموعي و اني اريد اتذكر مشهد حلو بحياتي عقلي ما جاي
يتذكر غير عمايل امجد بية
الصبح لان متحركة بالنوم طايح الشال من راسي فتحت عيوني
و لكيتهن كلهن فوك راسي صافنات يباوهن لراسي و يتلمسن
غطيت شعري روحي و كمت أعيط و هن يضحكن
ابجي بصوت عالي عزت عليه روحي بذاك الحال
لا الدكتور بعد اجاني و لا رجلي طابت
تخربطت و طول الوكت اتقيء بالغرفة و العاملات بزعت روحهن
كامن يصيحن عليه و يضربني كل ما ازوع و خشمي يطگ دم
بحيث صار اسمي بذاك المكان معرووف الدكتورة كل ما تشوفني
تصيح من بعيد ، هم انتِ
أخذتني العاملة تغسلي و اني مشمئزة حتى من روحي و كارهتها
- شيصير منج الشيخ زِناد
بنص كل ذاك النسيان التفتت عليها بساع
جُمارة : وينة
2
تعال و شوف حَالي شصار بَعدك
يَـ شاريني بوكت أنا الخذلتك
...
" حور "
خالد: زِناد سافر و امجد اخذ الشيخة
و من حققوا ويا بقضية فضة انتِ اول وحدة حط اسمها
من المشكوك بيهم
حور : أناااا
خالد : ابقي هنا ولو الدنيا تحترگ برة ما الج دخل لو امجد يدك الباب لا تطلعين إذا ما أنا اجي
حور : خاف يلگاني
- ما يلگاج و كل ما يلگاج اغير مچانج
حور: والله موش أنا الموتتها شلون أكتلها و هي بيدها شردتني
خالد : امجد هو كاتلها و يريد ينيم السالفة براسج
كمت ابجي و نزعت اللثام بقت خالتة تعاينلي
- إذا ما تحجي شني السالفة اخابر امك هسة
خالد : بدون حجي زايد حالك ترى هسة اكتلج و ادفنج
ما عندج حتى واحد يداعي بيج
- ولك هاي ياهي منين جايبها
خالد : خالة امانة خليها يمج و اسكتي حرف ما اريد اسمع
دار وجهة عليه
- بس ادك على خالتي شيلي التليفون بساع و جاوبيني
هزيت راسي بنعم و دموعي تجري على خدي
عافنة و راح و خالته خازرتني
- بيمن مورطة الولد لا ينجتل بسببج ولجن انتن شنو
حور : خالة ترى البية مكفيني جفيني شرج
عاينتلي و سكتت النوب خفت لا يعرفون هو ضامني و تنگلب السالفة عليه للصبح ما نمت و اتخيل امجد بكل دقيقة يدك الباب
دك الصبح حاجته خالته و صاحتني
حور : خالد عوفني و روح لا تطيح بمصيبة من وراي أنا هذا حضي و اعرفة ما ارتاح
خالد : لا والله ما أعوفج انجبي و كعدي يم خالتي
الله يحلها
حور : شبيك شصاير
خالد : ما صاير ما صاير يالله انتبهي على نفسج
نفس ما وصيتج
حور : خالد هي صدك جُمارة اخذت امجد ؟
- اي و راح يخلفون
بقيت ساكته ما كدرت أحاجي
حور : احجي شصاير
خالد : طاح حضج شني اجذب عليج مو اكلج ما صاير
- شمالك اليوم شو تغلط
- هاي لغة الميانة عند احفاد رهينة
ضليت يم خالتة يومين انطتني دشداشة و تسويلي اكل بس هي ما هاضمتني و خفت منها لا تروح تخابرهم و دكللهم بس خالد يكول
امني منها
اندك الباب بالليل عاينتلي خالته و طببتني للغرفة طلعت صاحت من
شويه و اجت فتحت الباب طلعت بالهول لكيت خالد و ويا رجال
بيدة أوراق
بقيت أعاين للرجال مار عليه شكله
خالد : ها حور شونج هذا شراع نسيبنا
بلعت ريك و عاينتله بخوف
حور : بس والله موش أنا كاتلتها
شراع : تعاي كعدي هنا
عاينت لخالد و كعدت على الكرويتة
شراع : صارلج اكثر من سنة انتِ متحملة امجد ليش هسة
يالله قررتي تشردين
حور : راد يبيع كليتي حتى يدفع مهر لجمارة
و يكسر زِناد
شراع : شلون عرفتي هذا الشيء
- سمعته بالتليفون يحجي و جان بوكتها ما يضربني و أنا اعرفة من ما يضربني يعني يريد مني شي
شراع : شي مثل شنو
حور : يعني هو .. بلعت ريكي و دنكت
هو من تجي الحالة يصير بالبداية زين و مابي شيء
بس يعاين بديت اخاف منه يكوم يضربني و يچويني
اثنينهم واحد عاين للثاني
شراع : يا حالة بابا شنو مخبل هو لو شنو غير افتهم
اريد الحجاية تطلع من حلكي ما تطلع العرگ كام يصب على وجهي
صرخ بوجهي فزيت و عاينت لخالد
شراع : شنو الضامتهههه ليش ما جاي تحجين
خالد : على كيفك شبيك
- انجب انتتتتتتتتتتتتَ
حور : ما اكدر احجي
شراع : هو شنو الما تكدرين تحجي أنا شكتلك خالد مو كتلك
الها ايد هاي بكلشي
هزيت راسي بـ لا لا لا
حور : لا والله معلية
شراع : تحجين و تخليني اخذ اقوالج و اروح لو تجبريني اخذج للمركز هناك يحققون وياج
حور : غدرتني خالد
خالد : غدرتج شنو ولج غير امجد تاهمج
شراع : كومي وياي يالله كومي
حور : لا لا راح أشاور خالة و هي دكلك
شراع : المره هاي شعليها
خالة خالد رفعة ايدها و كالت مالي غرض خلت و طبت لغرفتها
خالد : تعاي خالة خل تشاورج شني السالفة شمالكم
ما رضت و بالكوه هو راح قنعها و جابها شاورتها و اديه ترجف من
المستحى صفگت اديها
- على هاي ولج صارلج ساااااعة أنا كلت راح تشاويني
على مكان الجثث
شراع : شنو الموضوع
- يخالة البت الماخذها موش رجال
خالد بقى صافن و شراع يعاين بأستغراب و يكتب و أنا امسح بدموعي
بقى يسألني على كلشي بخصوص و كل سالفة تصير هناك
حتى علاقة عجيبة وي مرت ولاء
شراع : منو اكثر شخص يتردد عليكم
حور : اخو عجيبة و مرته و من يجون امجد حتى امه يضربها
1
شراع : يالله خالد يالله وياي من الصبح انت و ولاء
لبيت خالة
خالد : شيفيدوك ذولة
شراع : لتصير غبي زِناد لعبها خوش لعبة من عافهم
يسرحون لان لو باقي جان كدروا يعالجون كل امر مشكوك
بي
خالد : بس فهمني
شراع : اكو بصمات ايد ثانية طلعت بالفحص
مال فضة إذا تطابقت وي احد من أفراد بيت عبود
يعني اكو شي مو طبيعي اكثر من الجريمة
خالد : شوكت يرجع زِناد منو گلك يرجع
شراع : يجيب صوغة و يجي
بـاچـر الغيمة تزول
و الشَمـس تطلع علـينة
باچـر يرد الذي راح من أدينة .. 
- رُسل فَهد 
