رواية يا اجمل الوحوش الفصل الرابع والاربعون 44 بقلم رسل فهد

رواية يا اجمل الوحوش الفصل الرابع والاربعون 44 بقلم رسل فهد 

أعرفك وأعرف بـ كلشي

الـ يضحكك هَم والـ يبچيك

من أكول شبيك ؟ جاوبني

لتچذب ع المَربيك

- رُسل فَهد

......

"عالية"

كمت بساع كلت اكيد هو مسحت دموعي بساع و وگفت اهفي

وجهي بأثنين ادية فتحت التليفون لكيت رسايل من نفس الرقم

و راجعين دازين الصور و نفس الكلام عايدي

بلعت ريكي و خايفة المن اكول و احجي

علي اخاف منه اخاف أعاين لأيدي ترجف و بطني توجعني

عضيت اصابيعي اكل بروحي اكل بقيت افتر بالغرفة

لا نزلت للخبر و لا تغديت بقيت حابسة روحي بالغرفة و امه حارت

شغلطت عليه

قررت اروح لاهلي واكول لامي تشوفلي صورة حل و تخفف هذا القهر عليه ، من الخوف أعاين دشداشتي بيها اثر دم كامت دموعي تجري

على خدي احس روحي راح اخسر الاول و التالي ما حجيت لاحد

بساع بدلت و كلت لخالد يأخذني لامي كبل لا يروح للمعمل

أخذني ويا و بس اريد رجلية توصلني لامي

حتى التليفون عفته بالغرفة ما اخذته من الخوف و خالد يعاينلي

خالد : شمالج مضيعتلج ضايعة شني

عالية : لا ما بية شي

طبيت لبيت امي لكيتها مخبوصة بالمطبخ

و شريك وياها انخطف لوني بالزايد تلگتني و حطتلي

كرسي كعدت يمها و شريك يخلط اللبن

عالية : شنو يمة ليش هلكد طابخة

ام شريك : راح يجون اهل شمعة لازم نقوم بالواجب يمة

عالية : غير تخابريني لو تدزين عليه اساعدج

ام شريك : ماعندي شي ولج هذا الاكل و خلصته

امج سبعة ما ينخاف عليها و شريك بعد عمري ما خلاني

اتعب وياي وياي

صرفنت رداني و وكفت اطبخ وياها شريك يمشي

و يقرأ إشعار لامي و هي تضحك

شريك : هذا خالد الملطلط يحجيهن گبالي و احفضهن

ام شريك : هم ساعة و راد يعرس احفاد رهينة ما بيهم

اليصبر

- بس زِناد

ام شريك : اي صحيح بس زِناد

من عاينت شريك راح للهول شاورت امي على الدم لطمت على وجهة

خفت فوك ما أنا الخوف ياكل بية

ام شريك : عزه بعينج يمعزاية ولج و واكفة ولا همج

عالية : شمدريني شمعرفني

كامت امي تفتر و تلوب تروح منا و تجي منا تالي ما تحملت عافت شريك يم الجدورة و أخذتني وياها للدكتورة بساع

اول ما طبينه ازدحام و النسوان تارسات العيادةً

أمي كامت تصيح دخيلجن حالتها خطرة و رجلها بالعسكرية

النسوان انقهرن عليها و خلنها تفوفت اول وحدة امي بعد شوية و تبجي

عالية : شبيج يمة هاي لو أنا طايحة منج ما تسوين عليه هيجي

ام شريك : انجبي ولج ما سامعة ولد الولد اعز من الولد

طببتني للدكتورة حجتلها قصة حياتي حتى على عمتي و اسلوبها

- لازم ما تتحرك و تبقى نايمة على ظهرها لان مهددة بالإسقاط

ام شريك : لا والله وداعت امي ما اخليها تتحرك حتى لعيالها بعد ما اوديها منا لمن تجيب

رجعنا للبيت و اريد بس انفرد بيها و اسولف الها

نيمتني بغرفتها و راحت تكمل طبخ اجوي اهل شمعة و هي وياهم

هي و امها ويانه بالهول و ابوها و اخوانها بالمضيف

و شمعة واكفة بنص المطبخ ، شريك يروح ويجي ياخذ صحون يودي

للمضيف و يوكل يسولف وياها لحد ما يبرد الصحن و امي تطردة

و ام شمعة تنطي لامي وصفات و أعشاب تجيبهن الي اشربهن

حتى ما انزف بعد

ام شمعة : شلونكم ما لونكم

ام شريك : والله شلونه يخية بهذا الضيم من ماتت مرت الشيخ لليوم و احنه ما مرتاحين و مية الف حسبة بروسنه

ام شمعة : الله يهدي سركم ان شاءالله عود أنا شمعة ردت

اجهز الها و صارت المصيبة بعد بطلت كلت زحمة منا لسنة الله كريم

ام شريك : لا يخية ما نضل سنة ما عدن هيج بالعادة حتى لو يسوون العرس سكتاوي ، منا لسنة مية عمامة مگلوبة

شمعة : عمة شريك من يجي عليج الله ينام هواي صدك

لو يحجي وي بنات غيري ، كرصتها امها

ام شريك : تخونين ابني ولج شحال ما بقى ينتظرج عمر

و يركض وراج بيدة و رجلة

ام شمعة : خل ياخذها يخلصني منها الله وكيلج سابيتني سباية بشريك بس من يخابرها تنزل تضحك و اخلص منها و من نگها

ام شريك : هسة يجي و تگابلي النوب يروح للدوام تگلبيها

عليه مناحة ترى ما الي خلگج اوديج لاهلج

شمعة : لا عمة ما اروح لاهلي ابقى يمج طبعا و اكيد

اباوعلها مبتسمة ، الفرحة ما سايعتها

راحت للمطبخ هي تسويلهم چايات و شريك كل شوية جايب ستكان و جاي حتى يصيحلها و تجي للمطبخ تصبله و يسولف وياها

راحوا و شريك طَب يبوس بأمي من راسها

شريك : تعبتج حياتي

ام شريك : شعندي غيرك أحبل أجيب

عالية : لا ما عندج

بقينه كاعدين نسولف و نضحك و امي كلساع تأشرلي كومي نامي

طبت للغرفة ردت اسولف الها عاينتها جثير تعبانة بس تريد تنام و ترتاح

انقهرت عليها و كلت الصبح ، كعدت على صوتها و هي مسويتلي ريوك طب شريك انطاها علاكة الدوه مالتي جايبها من الصيدلية

كل شوية اريد أحاجيها و اكول هسة لحد ما اجتني تلطم على خَدها

ام شريك : ولج بت يعقوب اليريدها زِناد

ماخذة امجد ابن عجيبة

شهكت بصدمة ما مصدكة

لحد ما شريك سولف النه من اجة و جانت هاي اقوى صدمة انصدمها بكل حياتي ، ما ادري راح تتلگاني الأقوى عافتني بالبيت امي بالليل و راحت لبيت جدة بقيت انتظرها تالي نمت

الصبح اول ما كعدت ما تحملت من كد ما ضامة السالفة بگلبي راح اموت من الخنگة سولفت الها الصبح و هي جاي تغسل وجها من غبشة

عالية : و هاي سالفتي يمة وًبسببها حتى النزيف صار

ام شريك : ولج هاي مصيبة ولج مو سالفة

منو هذا ولج عاليه بس لا النهبتي ويا

عاينتلها بقهر هاي عود امي و حجيتلها السالفة كلها هيج كالت

جا إذا عرفوا شريك و علي شيعملون بيه

النوب امي تخربط عليه قست سكرها بساع ٥٠٠ و هي ريوك بعدها ما متريكة ضليت حايرة أشيل هم روحي لو هم امي خابرت شريك بساع بتليفون اجة أخذها للمستشفى و عافوني وحدي

النوب عفت روحي و ضليت شايلة هم امي

علي يدك عليه كل يومين على امي شوية و يسدة لان عدهم واجب

و كتله نسيت تليفوني بالغرفة

جابها الظهر شريك ضلت أربع ايام ما تشرب غير المي و سكرها معلگ

ردنة نرجعها للمستشفى ماقبلت و كلًما تسوء حالتها اني تتخربط كل أحوالي من غير المصايب الكامت تتشامر علينه وحدة ورة الثانية

كعدت يم ايدها ابجي

عالية : يمة صيري زينة چـا تزيدين همي أنا وين أنطي وجهي غير اجيتج تحلين سالفتي مو تطيحين وياي

ام شريك : عالية ولج توه گلبي ارتاح منج

هاي مصيبتج وين اوديها

عالية : ليش يمة ما جاي تصدكيني شمالج مو تدرين بية احبن علاوي شلون احجي وي غيرة

ام شريك : ولج التصير عليها ندبة يعالية لو تحلف

بمية أمام بعد محد يصدگها و ذولة دمهم حار و ما يتفاهمون

عالية : غير هو كاتبلي رساله و حسبالي علي

ام شريك : وليش ماسحة الرسايل ليش ولج سالفتج

أنا امج و ما صدگتها ولج ثولج وين راح يودينا

عالية : جا شسوي فهميني اليوم لو باجر يرد علاوي

ام شريك : ردي وي رجلج و أنا راح اروح لجدتج تشوفلي صورة حل

و اني احجي وياها اندك باب الشارع بلعت ريكي وطلعت صحت منو

علي : أنا أنا

جريت نفس طويل و اول ما فتحت الباب شبگته شَبگة قوية

و دموعي تجري ما توكف چني ضامة دموع مال عشر ايام

و علي يبوس وجهي و ايدي و راسي احتار منين يبوسني حتى اسكت

علي : كافي ولج جاهلة شكثر تبجين وين ضامة هاي الدموع

عالية : ما كتلك من جنت بالدوام ترى تخربطت و كنت انزف وًامي أخذتني للدكتورة تعال طب خلي امي تفهمك

هد الجنطة بالكراج و الخوف احتلة يمشي وياي وعينه على بطني

امي متمددة بالكاع لان ما قبلت أنا انام بالكاع و هي نامت ببدالي

سلم عليها و كعد اشرلي شبيها

- سكرها صاعد

- شريك وين ناخذج للمستشفى حجية

ام شريك : لا يمة اختنك فوك ما أنا مخنوكة

عالية : شريك بعد شوية يروح يمه منو يبقى يمج

- مابية شي هسة اصير زينة

علي : شكالتلج الدكتورة حجية على عالية و الطفل

ام شريك : والله ييمة دكول مهددة بالإسقاط كون بس اعلى ظهرها نايمة اخذها يمك هنا ما تركد من تعاين عليه نايمة تكوم تشتغل

اخذها وياك حتى عينك عليها

علي : لا حجية خليها يمج بين ما يتحسن وضعج

تدرين أنا بالبيت ما كايل الهم حامل و من اطلع ما يرضون يعاينوها كاعدة

رحت للمطبخ صبيتلة غدة و هو كاعد يسولف وي امي

علي : هاي من تكلج ثبتي تصيرين نادرة

لو واحد مصخرج ما تشتغلين

عالية : والله عيب عليك نكون زيناتي كلها لا تخاف موش حسبالك ناسيتلك عملتك السويتها

علي : هههههه تعاي تعاي اكلي وياي

كعدت يمه ياكل و يوكلني امي عينها علينه مبتسمة شال الصينية

و راح للمطبخ صاحني طلعت ورا لكيته يغسل

علي : موش سالفة هاي ترى أنا شلون اكدر انام بالغرفة و انتِ مو يمي بس يالله خطية امج

عالية : مو تاكل كل حلوياتي الي بالثلاجة

علي : بالليل اجي واجيبلج تليفونج و حلوياتج

عايزة عليج أنا همزين هن بفلوسي

- و شني خايب تعيرني كتلك خل اشتغل ما ترضى

- وعلي اكضج هسة اطلع الطفل من حلگج إذا ما تستكتين

ضحكت وهو شال جنطتة باسني و طلع

و من الباب صاح هاااا شيخ شونك سديت الباب وراهم و اضن علي ما يدري بسالفة امجد لان يحجي بطلاقة

علي : شمالك ضايج شبيها العمارة مَغربة اليوم

صار صوته يبتعد و ما اسمعة منه شي طبيت لكيت امي واكفة تتوضى

كيفت و اشرتلي على الجرباية امشي نامي

امي من يوم السولفت الها لليوم وجها شايل هموم الدنيا كلها

كعدت على الجرباية و حطت الطبلة كدامها ما كدرت تصلي وهي واكفة

كعدت يمها و هي بدت تصلي

عالية : يمة اكول لعلي لو انتِ تكليلة علي احسن من شريك

ام شريك : الله اكبرررررر

بلعت ريكي و سكتت لحد ما عاينت امي تدعي و تبجي

خفت بالزايد واكول بلكي من عفت التليفون وبعد ما جاوبت يأيسون

مني وما يدزون رسالة و لا صوري

شريك اجه حَضر جنطتة وكَيف لان بقيت يم امي راح و هو من يوم عملة امجد بـ زِناد ما يتحاجه و شايل الدنيا كلها فوك راسة

حسبالي علي يجي بالليل ما اجة و حتى ما دگ

ثاني يوم الظهر اجه وره الغدة سديت الباب على امي نامت و كعدت يمه

بالهول انطاني تليفوني حطيته بالغرفة و هو كل شوية يذب حسرة

عالية : ليش ما جبتلي الحلويات

بقى ساكت و ايدة على راسة خِفت و كل دقيقة يشمرلة حَسرة و يضرب راسة بالحايط على كيف و بطريقة مستمرة عبالك واحد يريد يسكت الهوسة الصايرة براسة

كعدت يمة حطيت ايدي على صدرة

عالية : شمالك اليوم چنك ضايج

علي : هذا امجد العار شلون اله نَفس بيها ويدري شكثر

زِناد يحبها و هي الچلبة بت تغريد شلون قبلت

عالية : ما ادري حتى احنه لسه مصدومين

هز راسة بأسف سحب المخدة و تمدد كال مرغيلي راسي مرغتلة لحد ما نام رحت للغرفة لكيت التليفون مقبط شحن فتحته

ما لكيت ولا رساله بيني وبينهم حتى الأخيرات ممسوحات

جريت نفس بخوف و عفت التليفون

العصر هو راح و بالليل دگ عليه بس ضايج يتطمن عليه و يسدة

قبل لا أغفى قصص وروايات عراقية كرار صلاح اجاني صوت رسايل خفت لان علي توني سديته منه وًالمسافة بين الجرباية و الميز صارت شطولها وهي متر

نفس الرقم مكتوب الظاهر هواي صبرنالج

باجر الصبح نهايتج

كتبت بسرعة وايدي ترجف

- عفية شتردون مني اني ما عندي فلوس

- مشكلتج دبري

- مو مشكلتي و أنا ما سويت شي انتو ضحكتوا عليه و أخذتوا صوري و شتردون تسوون سوو اني أصلا راح اكول لرجلي

دزولي صورة بيها ارقام الفايبر علي و زِناد و شريك و و امجد و لاء و سلام و اسلام و مرتضى و عدنان كلهم اسم جوه اسم

و وراها دازين صوري و صور محادثات على رقمي بيني وبينهم

اني اسولف حبچيات و منطلقة و اضحك

كتبت الهن ودموعي على خدي

- بس هاي مو اني شلون هيج تسوون

- الج مهلة للصبح

امي نايمة و خلصت الليل دموعي على خدي تجري واصيح يا اللهي

أنقذني يا ربي طلعني من هاي المصيبة الطاحت على راسي

و للصبح ما مر النوم على عيوني و لا كلت لامي لان هي بدون شي مريضة اول ما صار الصبح دزوا

- فضيحة ال سرهيد

- لا لا

- شنو لا

- أنطيكم انطيكم بس أنطوني صبر

- لليل

- شلون تاخذوهن

- اول شي دبريهن و هاي سهلة

كلت لامي علاوي يريدني و خابرت علي كتله تعال أخذني

لميت غراضي و رحت ويا سلمت عليهم و صعدت بساع للغرفة و دموعي تجري احس روحي عايشة بكابوس و ما ادري شوكت راح اخلص منه

البيت عبارة عن صياح و مشاكل ما ادري عليمن

علي بالليل يالله اجه و أنا من امس النوم ما مر على عيوني من الخوف

تغطيت و جسمي يرجف جاي احس بروحي انوكل شوية شوية

لحد ما تخلص انفتح الباب وطَب علي غمضت عيوني بساع

اجه تمدد بصفي و خلاني بحضنه الغرفة جانت ضلمة لزم ايدي

و كعد عدل فتح الضوه

علي : عالية !!! ليش ترجفين و رجليج ثلج

عالية : بردانة

لزم حنچي و دار وجهي عليه يعاين لعيوني و مصغر عيونة

علي : تبچين ؟ شبيج حبيبتي

عالية : لا ما بية شي بس مقهورة على امي

باس راسي و غطاني

- لا تبجين شوكت ما يعجبج ترحين اخذج ، روحيلها باجر

بقيت كاعدة للصبح و هو نَام انتظرت الأذان يأذن كعدوا صَلوا و راحوا

كلت بلكي يروح وياهم بس ما راح رجع نام وكعد بالعشرة نزل تريگ و راح بقيت أراقبة من الشباك شوكت يطلع من البيت اول ما طلع قفلت الباب و سحلت الميز على كيفي لحد ما طلعت الكاشية شلتها بطلعان الروح

اخذت خمس ضبات فلوس و رجعت الميز لمكانة النوب بقيت ادور على علاكة ماكد بالغرفة وين اخليهن جريت دشداشة حطيتهن بيها و لفيتهن ضميتهن بجنطتي الاروح بيها لاهلي

فتحت التليفون و عبالك يعرفون كل توقيت بحياتي اول ما طالع علي كاتبين اليوم بالليل آخر يوم

خابرت علي كتله امي تريدني يمها كال من اجي اخذج

سفطت جنطتي وضليت انتظرة اجه كبل العشاء

عالية : يالله تأخذني

- تعشي و روحي

- لا هسة وصلني خل اروح

علي : دمشي يالله امشي ضل

نزلت و امه تصيح بصوت عالي منهارة و شافتني لابسة العباية انفجرت

ام سلام : وهاي العروس شوكت يخلص عرسها ٢٤ ساعة اديها محناية و نايمة ومحد يشوف خلقتها گبعتها براسها

و تفتر منا و منا بس هي صوجها لو الصوج الرجلً

علي : امها مريضة و وحدها بالبيت يعني شلون يا يمة

ام سلام : و انت شايلتك الغيرة على امها و على امك ما تشيلك الغيرة

- تشلعين عيوني

أخذني و طلع دكيت الباب فتحته امي

ام شريك : يا هلا يمة مية هلا

علي : هلا بيج عمة يالله هاي عالية يمج

عاينتلي امي مستغربة

ام شريك : خير يمة عالية خوماكو شي

- لا

عاينت لعلي يباوعلي بس ما راد يحسسني بشي

كال يالله أنا رايح

سد الباب و طبيت وي امي صايرة احسن شوية

ام شريك : ليش عفتي رجلج أنا زينة يمة

بقيت ساكتة اخذت هدومها و كالت راح اسبح و اجيج

راسلتهم بسرعة كتلهم يجون اني ببيت اهلي و صاير اول بيت

- راح نجي بس اي حركة منج زايدة تتندمين

عالية : ما اسوي شي بس عوفوني بحالي

اول ما ردت اسدة اجتني رسالة من علي

- ما اضن امج دازة عليج و لا مريضة بس انتِ هاي الأيام

صاير امرج غريب عالية شني السالفة

عالية : لان حامل

شافها و ما جاوبني

بقيت لازمة التليفون بيدي و افتر امي من تسبح إلا تكعد بالكاع

و تسبح بالمعجنة ساعة كامله يالله تطلع ، من عاينتهم كاتبين يالله طلعي

احنه بالباب كلت اكيد جذب حطيت الشال على راسي و غطيت وجهي

اخذت علاكة من المطبخ حطيت بيها الفلوس

اندك الباب فتحتة و انمدت ايد انطيته العلاكة و راح مديت راسي

ردت الچح وجها ماكو ماكدرت داير وجهة و يمشي صعد بالدراجة

وراح

درت وجهي على بيوتنا كلها مسدودة لان وكت عشاء كلها نفس الترتيب

من كد ما عشت ضغط و خوف من ابو الحساب و الصور هاي اول مرة بحياتي أبوگ و الراحة اقوى من الخوف

كلت اكسر التليفون و اكله بعد ما اريد و اخلي امي تبيع كلادتها ارجع الفلوس و لا هذا الضيم العايشته انا بس نشتري البيت

اسوي سلف و ارجع لامي كلادتها

ما جنت ادري الانسان لو شمهما جانت سالفة التهديد تضره

لازم يتخلص منها ما يخضع الها لو يكلفة الأمر موته

عاد يموت مرة وحدة و لا يموت على البطيء كل يوم

لكن في عالم الروايات إن لَم يخطأ الابطال لن يتعلم القُراء

طلعت امي من الحمام و كعدت وراها انشف شعرها و امشطة

ام شريك : امس جنت يم جدتج

- ها

.....

" ورود "

- اني صديقة شراع سابقاً اسمي زُمرد اكيد سامعة بيه

عاينت لعمتي و عاينت لشيماء تضحك

ورود : لا مسامعة بيج بس تشرفت بمعرفتج

بقن كلهن يعاينن عليه رحت للمطبخ يم ريحانة اكلت برتقالة و صعدت

طبيت للغرفة احس روحي مختنگة و الدمعة بطرف عيني

ما تحملت كعدت على الجرباية وبچيت ما توقعت يوم بحياتي اشوفها

و هي اسمها جان يضوجني جثير

مسحت دموعي و طلعت للحمام اغسل وجهي اول ما فتحت البوري گبت العيطة جوه نشفت وجهي و طلعت شراع على الدرج لزم

شيماء كتلها و هي تصيح بصوت عالي و هو راشديات يضربها واحد اقوى من الثاني

شراع : لج تجيبيهم لبيتي لبيتي تطببيهم

شيماء : اي و غصبا ما عليك أبوية لو موجود ما جان هيج يسوي بينه انت ليش تدمر حياتي

أعاين عليه انهار بيها بيها و خواتها يبوسن بي حتى يعوفها

شمرها عليهن و صعد بعدين دار وجهة على امه

شراع : اذبحههههها هاي بنتج اذبحهههها يمة

كل عقلها انطيها لذولة والله لو تموووووت اني صوجي أنطيت بناتج مجال و طلعت عينهن

فِتنة : خلي تولي انتَ بكيفك يمة انتَ اخوهن و أبوهن

شراع : شيماء دواااام ما تداوم بعددد

عافهم و صعد للغرفة مر من يمي وطب ، عفته و نزلت جوه امه كاعدة

تبجي و ريحانة يمها

ريحانة : هسة بنتج ما تستحي عافتها كلها ما حبت إلا هذا

فتنة : بنتي ولكم مو بنتي هاي و حرامات بيها التعب

و لج اخوج يكلج مو خوش وادم تكسرين كلام اخوج

و تنفذين كلامج

ضليت اكثر من ساعة جوه بلكي يرجع ينام لان ادري هسة بس اصعد

نتعارك أنا ويا و هذا الشي الما اريدة لان متداخل المشاكل

أذن اذان المغرب توضيت و صعدت فـوگ لكيته يخابر و يتقصص

علمود قضية و ناثر الأوراق الابتوب مفتوح

لبست الچادر و فرشت السجادة سد الاتصال و كعد يبحث

باللابتوب لحد ما خلصت صلاة رجع اتصل رحت لمكاني تمددت و فتحت التليفون أكلب بي و هو يفتر بالغرفة يروح منا ويجي منا

اجه يمي اخذ التليفون من ايدي عاينتلي بعصبية شُمره على الأوراق

وشال من الكومدي كتاب و شمره بحضني

ردت اشمرة بس اجتني صحوة ضمير بأخر ثانية و ما شمرته كعدت

عَدل و فتحت الكتاب اقرا بي ما اريد احسسة شكد مهم موضوع زمرد بالنسبة الي و شكد أنا حاسبتلة حساب و يأثر بية

اول و تالي ما يعيش الوجع غيري

من شافني اقرا نَصة صوته و يروح و يجي عليه بأيدة قلم اشرلي على يا صفحة أوكف و اترك الكتاب و اجاني الواهس ورقة ورا ورقة لحد ما وصلت للتأشير رجعته و ردت اخذ كتاب ثاني

شراع : گومي بدلي ضايج

- ما بية حيل أطلع و لا اريد

- گوم عيني

ما جاوبته اجه يمي مَد ايدة سحب ايدي حتى اكوم شبگني بأيد وحدة

شراع : بدل حبيبي يالله بساع

اخذ هدومة و طلع يسبح بَدلت و وگفت الف الربطة

هو بدل و كمل و أنا بعدني ما مسوية الربطة مثل ما اريد

فتحتله الباب وصعدت ، طَلع السيارة و نزل يسد باب الشارع

يحاول يهدي روحة بس من اديه اعرفة هو شكثر مغتاض

نَزلنا بمكان جثير حلو حديقة و بيها ناس قليل

شراع : جاي امر بأصعب ايام حياتي

ورود : جثير احنه نكول هيج وكل ايام صعبة تجي الاصعب منها

شراع : يعني مية الف مَرة اكللها أنا ما اريد هذا الموضوع ينفتح و تفتحة لا و يجون يخطبوها بكل عين صلفة

ورود : هي تحبة و البشر من يحب ما يقتنع بـ حچي گلبة

- والله امد ايدي لگلبها أمردة ولا اخليها تدمر حياتها بيدها

ورود : عادي كلنه دمرنا حياتنا بيدنا

التفت عليه مصدوم بساع

شراع : يعني انتِ دمرتي حياتج بيدج

ورود : يأثنين اديه مو بأيد وحدة

- رحمة الله والديج

عبالي راح يتأثر بالحچي بس ما تأثر اخذنا للمطعم

ورود : ما تاكل أنا هم ما اكل لا تتعب روحك

شراع : صيري مثلي حتى ما نتعب

ورود : خوب أنا أسويك مثلي

- هههههه ياريت

اشترالي كلاص موطة كال اكل وياج صَدكته

بقى بيدة لحد ما رجعنه للحديقة بيها مراجيح حلوات عاينت عليهن

لزم طرف وحدة

شراع : صعدي

- لا عمي عيب منا العالم

- انعل ابو العالم دصعدي

ابتسمت و لزمت السلسلة رفعت عباتي و كعدت خايفة و مستحية كل شويه أدير وجهي عليه انطاني الكلاص

شراع : يالله اكلي حتى اكل وراج و ادفعلج المرجوحة شوية

مديت ايدي اكل و أعاين على الأشجار و الورد

انطيته الكلاص

غمضت عيوني من و درت وجهي عنه من كام يدفعني و الضحكة تارسة وجهي نسيت حتى ليش جنت ضايجة و الهوى من يدفعني يجيني بارد

ورود : ههههه كافي شراع كافي

شراع : ولج اني لو ما عيب منج و من العالم جان صعدت ببدالج

- هههههههه

وكفها و عاينت لايدة

شراع : طيبة هاي الموطة خل اخذ لامي وياي

ورود : اكلت واخيراً

- اي شلون لعد

- جذاب مبين من ضحكتك

- ههههههه احبج

صعدت بالسيارة وهو راح شوية و اجه جايب النه عشاء

خلاهن ليوره و صعد

شراع : اكلي انتِ و امي و اخواتي و من تخلصين

سويليلي بتيتة و طماطة

ورود : شحجي وياك مادري

و قبل لا نوصل للبيت وگفنا كال اجيب شاحنة من هذاك المحل

فتحت الچكمچة بيها علبة التليفون من انطيته اله و علبة الحلقة

و عطور صغار واحد أطيب من الثاني

اجه صعد ايدة فارغة

ورود : ما عدهم ؟

- لا هسة يجيبوها الي

بقيت كاعدة انتظر و هو يدگ بأطراف اصابيعة على الستيرن

شراع : غمضي عيونج

ابتسمت و غمضتهن انفتح الباب من جهتي فزيت و فتحت عيوني

انصدمت من عاينت باقة الورد شكبرها كل الألوان گبالي

حَطتها الموظفة بحضني مبتسمة وأنا أعاين عليها وعلى شراع

ورود : هاي شنو شكراً

شراع : ذني شبيهاتج ٣٩ وانتِ الـ الأربعين

احس روحي دمعت من الخجل سِحب خدي بَاسة و رجعنه للبيت بدون

كلام اني فرحانة و هو فرحان لفرحتي لحد ما وصلنه

للبيت عمامة طَبوا يركضون للبيت فتح تليفونه بساع خاف صامت

ما لگه و لا مكالمة

شراع : خررررب انا مآخذ التليفونات

عفنه كلشي و نزلنه من السيارة طبينه للبيت كلهن يبچن و خايفات

و شيماء نزل عمهم يركض شايلها ايدها تجري دم

فتنة : الحگ أخيتك يمة دخيلك

شراع : شسـوت

ريحانة : منتحرة بالحمام لگيناها

.....

" حور "

من الخوف ثاني يوم حتى ما خبزت لان كعدت حلگي مورم من حباية الصخونة و جسمي كله متكسر ولك امجد عاينتك و هيج سويت بحالي

جا إذا تكضني شيصير بية الله يخلصني منك كون

اندك عليه الباب بالليل عرفتة خالد ما فتحت الباب لحد ما راح

ثاني يوم كمت لعنت الشيطان و خليت حملي على الله

جريت كونية الطحين و كعدت اعجن خبزت و اجت الجيران تاخذ الخبز الحار اولً ما اشتموا ريحة الخبز

و الباقي كعدت احطة بالچياس مديت راسي

على البيت الحان واكف يمه امجد ما اعرفة و لا حتى بي جهاز

يجون يشترون مني و لا حتى المره بينت جريت الطبلة كبالي و كعدت أفلس تمر حتى اسوي كليجة اليوم إذا الله سهل

أندگ الباب لبست اللثام و كمت صار خالد بوجهي

خالد : يا هلا

- هلا بيك

- امس وين جنتي

- بگبور النجف

- ما دام وصلت للنجف يعني السالفة مكيسة

حور : هسة خوية تريد الخبز لو أنا اروحن اوزعة

خالد : خوية شني عمي عرف ولف أنا لو هاز كاروكج

حور : جا شتريد شصيحلك عمي

- خالد اسمي خالد صيحيلي خلودي

- والله ما تستحي و زايعها كلش

خالد : هههههه اتشاقة وياج والله صدك شسمج

حور : و انتَ شلك غرض بأسمي

مسح وجهة يضحك كوه يسكت بروحة

- جيبي الخبز يالله ، بس صدك امس وين جنتي

حور : خاب شعليك شعليك

خالد : شعر راسي وگف من يوم فرگاك

يسألوني و آكلهم هاي تسريحة

حضرتني الضحكة و ما ردت اضحك كبالة رديت الباب و لميت الخبز

حور : ذني ١٥ جيس بقن لان الجيران اليوم اجوي كلهم اشتروا

خالد : حتى الجيران مشتاقتلج وتكليلي شلك غرض

حور : اكلك والله عدك خلگ هنيال امك

خالد : يالله أنا بالليل اجيج اجيبلج فلوسهن و بعد من تردين تختفين كولي باجر اختفي حتى ما يضل بالي

حور : والله خبلتني انتَ شعليك

خالد : انا بلياك مثل الحمزة من مات

ما ضل واهس بفلم الرسالة

بألف يا علي يالله راح رجعت أفلس التمر و عاينت الحلقوم ما يكفي لبست عباتي الظهري و طلعت لابو الدكان جبتلي روبة

حبيتها وي الخبز من يوم الاكلتها وي المره بطريقي من رجعت دكيت الباب عليها ما فتحته لحد ما آيست و ردت ارجع فتحتة

شكلها مريضة

حور : وين خالة مختفية لا تجين لا تسألين

- مريضة يخاله يردولي كلية

- اسم الله عليج صدك

رحت للبيت جبت خبز و كعدت وياها سألتها على هذاك البيت

المن يعود عقدت حواجبها

- شلج بي يخالة عوفي يولي

حور : لا شسوي بي قابل بس خالة المصيبة لكيت رجلي واكف يمه شايفة حضي الزفت

- ذوله ناس تنطي بالفايز يخالة ينطوج شكد ما تردين بس

فايزهم يكسر الظهر على المليون يأخذون مليونين

يعني العشر ملايين يصيرن عليج ٣٠ مليون

حور : عزه يمه الله ينتقم منهم اي هو دوم جان ياخذ بالفايز

يريد و هو كاعد الدنيا تمطر عليه فلوس و من يجي راس الشهر يبقى خاتل بالبيت ما يطلع

- ما ترتاحين يخالة إذا ما يطلگج هسة انتِ على ذمته

على اي ساعة يلگاج شيعمل بحالج

حور : شسوي خالة فهميني وين اولي

شفت منة الضيم بكل انواعة و ردت أصلحة بكل طريقة كتله نسافر و كللهم الصوج بمرتي اخذها أعالجها و أجيبها

و يلزمني يتفنن بية

كتلة نسافر و نعيش وحدنا معلينا بالكل لان أنا أدري

ما دام يغار من اخو و الغيرة واصلة للكره

ما يرتاح و لا احنه نرتاح

- جا على يا حقد امهم مربيتهم

حور : كل واحد من ام

- هنا الحجي يخالة غيرة الخوان تكتل

اولاد يعقوب ابوهم نبي و غدروا بأخيهم من عاينوا احسن منهم بشواي و هاي عود بزمن النبوة جا هسة شيسوون

حور : هو ما خلى شي يعتب عليه هم ما سوى حتى يقهره

و كل مره يكشفة و يضربة و يرد يسامحه

و يقربة اله بس ما يفيد

- لا ما يفيد هذا عقلة مغسول هسة أنا عندي الج سالفة

جثير تفيدج ليش ما ترحين لشيخ دخيلة يطلگج منه

دام دكولين اخوتج مابيهم نخوة ما رحتي لشيخكم

حور : خالة صدك تحجين أنا جا شجاي احجي هوًيغار من اخو لان شيخ العشيرة النوب اروحلة دخيلة يمة اسكتي

أنا تصيبني الرجفة من أفكر بيها

- روحي غادي صوب الساگية جثير شيوخ ينحلف بيها

بقيت عاضة شفتي ما تدرين يخالة احنه كاعدين كبال الساگية

سلمت عليها و طلعت حتى اكمل الكليجة و حاجيت الجهال بالمنطقة اليوم بالليل تستوي الكليجة حتى بألف ابيع مو بس كيلوات ، كسرت ظهري و أنا كاعدة وحدي الف بيها اجتني المره ام حياة

تريد خبز و أنا ما عندي تعذرت منها و انقهرت لو ما تتعطل جا عجنت الها هسة و دليتها على ابو الدكان صوب ال سرهيد يبيع خبزي

- تبيعين كليجة انطيني يخاله انطيني بنتي يخالة حالتها حاله

ما تنطي روحها فكة حتى لو رادت تطيب من وره بجيها و نحيبها ما تطيب البكدها و الأصغر منها خلفت وهي تنتظر تالي من صار ببطنها طاح اوف ييمة سودة علية شبيدي عليج

حور : خطية والله الله يعوضها ان شاء الله و يترس حضنها جهال

- شفايتلي يخالة أمين النوب تحرگ أفادي دكلي بس تطيبن أكوم أخطبلة مره چـا ششاف من حياته لسه لا ولد و لا تلد

حور : جذابة هذا بس حجي هسة ان شاء الله تطيب

حطت شيلتها على حلگها

- هو هذا الزين ماله نصيب بهاي الدنيا دوم بس المصايب تطيح اعله راسة شايفة يخالة المصيبة الشيخ الجنت اسولفلج عليه ، يحبله بِت عمة من زمان گوم يـ اخو تزوجها

حور : امجددددددد ،

- اي اي اسمه امجد انتِ شني تعرفيهم

بقيت ساكته بلعت ريگي من الخوف و الصدمة على جُمارة ادري جانت هدفة بس كلت لو يموت ما يكدر يحصلها لان زِناد ما يفارگها

حور : اعرفهم اي مو كتلج سامعة بيهم بس شلون

عزه بعينه جا هو مو متزوج

- هم اثنينهم متزوجين بس الشيخ مرته ماتت خطية و هذا مرته ما تخلف سمعت كالن النسواااان

حور : شـ شـ شـنو ؟ منو ماتت

- مرت الشيخ تمرضت و ماتت خطية هاي المعوقة الله

يرحمها

بقيت صافنه دموعي تجري و المره. تسكت بيه لحد ما آيست و راحت

عفت كلشي و بقت تربط براسي الأحداث من لكيتهم حزينين عزه بعيني

و صخام بوجهي فضة حبيبتي صدگ عود انتِ ميتة

جانت صدگ هاي الصدمة الما كدرت أتخطاها طول حياتي

بقيت حاصرة روحي بالزاوية و ابجي ابجي و مقهورة من روحي لان ما عندي غير البجي اقدمة الها فضة الي خلصت عمرها تلبسني و توكلني

و هي بس هي شجعتني حتى اشرد من هذاك العذاب بعد ما عاينت

ماكو فايدة من البقاء تالي تفتحلي باب السجن و تموت هي ؟

شلون ماتت و بيمن تمرضت هي من شالت رحمها بعد ما تأذت و لا توجعت من شي ، لا لا لا لا فضة ما تموت

يشرد بالي من فكرة موت فضة وًيفكر بجمارة شلون قبلت بأمجد

و شنو ردة فعل زِناد

عفت الشغل كله اسبوع و الباب ما افتحة لليموت و خلصتها باليوم اكل قطعتين كليجة و لا الي نفس اكل حتى بقيت مثل السمجة الطالعة من الشط لا بيها ترجع و لا تكدر تعيش على الهوى

عيوني ورمت لان هن من الأساس بيهن اكياس دهنية متروسات الأجفان و إذا بجيت هواي تورم عيوني تضل ليوين يالله تطيب

ابو الايجار اجه يكسر بالباب و يصيح بصوت عالي فتحتلة

الباب انطيته الفلوس وسديته بقيت بطرگ فلوس كونية الطحين

شوية و اندك الباب عرفته خالد ما فتحته كعدت مكابلة التنور و ابجي على فضة كررررهت الدنيا كلها و احسها طلعت من عيني بعد ما

تهمني كلها ثاني يوم رحت جبت كونية طحين و وزعت خبر

للجيران كلها على روحها و الباقي انتظرت خالد يجي ياخذة وينطيني

الحساب القديم البقى حتى اشتري قنينة

اجه بالليل اخذ الجياس و انطاني الفلوس القديمات

خالد : وين عمي انتِ شني لا الباب تفتحي و لا تبيعين

جا شلون تردين تستفيدين شلون تعيشين

و هاي عيونج ليش هيج حمر و تعبانات

حور : الله يخليك روح منا و عوفني بحالي

خالد : ابد والله ليش ما تنطيني فرصة مو تعاينين عليه مشتريج و رايدج بالحلال و اخلصج من هذا التعب كله

انتِ بس كولي اي

- لاااا

حجيتها و طبكت الباب بوجهة هو ما يدري أنا

وين بالي و بيمن جاي أفكر

بعد ما اجه و لا وصل و دز الفلوس بيد واحد من الجهال

صرت اخبز قليل لان هو ما يجي ياخذ اليبقن و انقهرت بيوم

السديت الباب بوجهة الفلوس كامت ما تكفيني رجعت اطلع ابيع للعالم

رديت بيومها بالليل بوكت متأخر هم لگيت سيارة امجد بفرعنة

واگف يم البنيد لا بية امشي و لا بية ارجع

عدلت اللثام و مشيت احس روحي بالقدرة جاي امشي

و من مريت من يمة دموعي وحدها من الخوف تطيح

ردت اقفل الباب من طبيت لكيته يعاين عليه

ردت اختل بالتنور من الخوف الصابني و للفجر ما نمت كل شوية اتخيل الباب يدك

نمت بالكاع و فزيت على حلم يخوف بي امجد

و مقهورة جثير لان خالد عافني جان شايب حمل جبير عني و أنا ما منتبهة طلعت الصبح ادور على ابو الغاز صادفني خالد جاي صوبنه

عاينلي و عدل الغترة الـ على چتافة

خالد : وين مغبشة من الصبح

حور : هلا وين. شو ماكو

- شلج غرض بية

حور : رايحة ادور ابو الغاز ما عاينته بدربك

خالد : لا خوية

عاينتلة مستغربة و مستغربة اكثر من روحي ليش ما عاجبها

من يحجي وياها هيج

حور : شمالك صديتنة فرد مرة

خالد : لأن أنا ما أريد العب عليج اريدج على سنة الله و رسولة و انتِ ما تصفين على بَر يومية الج راي

- متزوجة

خالد : موش غمان احنه وين رجلج إذا انتِ وحدج شايلة الحمل كله لو هيج زايعها المراجل فد مرة

حور : والله متزوجة بَس .. خليها سكتة

خالد : بس شنو فهميني أنا اساعدج

عفته و مشيت حايرة بزماني وحدي و ما لكيت ابو الغاز

أدوره و ماكو يومية يفتر محد بحالة

حصلته بالكوة و ويومية يجيني طفل ياخذ الخبز بالليل و ينطيني الفلوس امد راسي الگه خالد واكفلة على صفحة بعيد عن البيت

بيوم ما خبزت لان جثير مريضة و احس التعب مال ذيج الأيام بده يطلع عليه يومية من الصبح لليل على نفس الوكفة و دموعي تصب على فضة فتحت الباب للطفل بالليل كتله

ما عندي خبز اليوم ما خبزت راح الولد شوية و اندك الباب

لكيته خالد عاينلي عاقد حواجبة

خالد : جا ليش اليوم ما خابزة

حور : مريضة و ما كدرت

- ما ترحين للطبيب ما يجي رجلج ياخذج

اهلج وين فهميني

حور : أنا الله كاتبلي أعيش وحدي و اموت وحدي

خالد : بس أنا رايدج و مشتريج و كل يوم أكولن هاي هي خالد عوف البنية و لا تگرب صوبها الگاني طاب بشارعكم

حور : أنا سالفتي سالفة و ما تتسولف خليها سكتة

خالد : أنا اريد اسمعها

حور : خالد لا تحط أملك بية روح الله يوفقك

خالد : والله لو ادري بيج متزوجة صدك ما أكرب صوبج

بس ليش جاي تصديني بهاي الحچاية و أنا الليل كله ما انامة من يوم العرفتج لليوم شلون بت بگدج

تنام بـ بيت وحدها و الدنيا هاي ما تتأمن

حور : لو ما الدنيا جابرتني موش هَينة عليه

خالد :شجابرچ فهميني أنا اليوم كاعدلج ركبة و نُص

مديت ايدي على اللثام و نزلته من وجهي

فتح عيونه كل وسعهن بـ صَدمة

....

" جُمارة "

مديت ايدي للسرقي فتحت الباب و عدلت الشال

فتحت الباب و ايدي ترجف ما ببالي غير صورة امي شسوولها

شصار بيها حتى وصلت لهاي المرحلة نومتها هاي تجيب الكأبة لروحي

دفر الباب و صاح

زِناد : آمجددددد

جُمارة : نايم

سكت بسرعة و ما طَب للساحة اباوع لأيدي اثنينهن

يرجفن لازمة بيهن يدة الباب

زِناد : نايم مو ، خلي نَايم

حجاها و جَر الباب طُبگة و راح طبيت اركض للمطبخ اباوع لعجيبة

جُمارة : امي شبيها امي عليج الله شبيها

عجيبة : جلطة بالدماغ

- صددددك؟ اخذيني الها عليج الله خل أشوفها

ليش هيج صار بيها شلون صار

عجيبة : و ترحين شتسوين ترى هي ما صحت لسة

كمت ابچي بصوت عالي و أنشغ اريد أمي و عجيبة واكفة تخوط بالجدر و تدور بالبهارات صاح بصوت عالي من الهولً

امجد : اشششششششش لج

سكتت و عيني على عجيبة تسوي روحها ما تشوفني صعدت فوك محد منهم حاجاني اخذت هدوم و طبيت اسبح كلها بچفة و من عاينت على شعري بالمرايا بچفة كمت اعض ادية كل قوتي حتى ما أعيط بصوت عالي و يسمعني

طلعت من الحمام ردت اصعد

عجيبة : تعاي اكلي ترى ما اصعد صواني

ليفوگ أنا مو خدامة عند الخلفتج

اجيت كعدت يمها لان كاتلني الجوع احس روحي شكد ما اكل ما اشبع

امشي و اتلفت عليهم شعجب ما مچتفني و لا حابسيني

صعدت للغرفة لكيت غرفة حور مقفولة وكل غرفة امد ايدي عليها الكاها مقفولة بس وحدة فتحت الباب انفتح بس مو كله من كثر الغراض البيها كلها زوالي و صوبات بس ظلمة بدون شباك

بتخيلي شكل فضة بنص الغرفة

طبكت الباب بساع و نزلت اركض

عجيبة : شبيج شبيج شبيج

جُمارة : الغرف كلها مقفولة فوگ و فضة شفتها فوگ

عجيبة : فضة ؟ ههههههههههههههههههههه

امجد : ههههههههههههههههه

سديت اذاني من اصوات ضحكهم المخيف

جُمارة : أخذوني لامي والله ما اسوي شي بس اشوفها

احجي وياهم محد يجاوبني عبالك احجي وي روحي

كعدت على الدرج لحد ما غفيت و فزيت لكيت روحي بمكاني نايمة

احس عظامي متكسرة من الدرج و اديه من لف الحبل تحرگني

البيت فارغ رحت افتح باب المطبخ مقفول

طبيت للاستقبال مقفول

عجيبة : وين تشردين يعني و وين ترحين ارضي بالمقسوم

و ادعي كون زِناد ما يضوج امجد لان انتِ الضحية

جُمارة : ليش هيجي سويتي بينة امي مو جانت تحبج

عجيبة : حبتها حية ام سبع روس هاي العگربة

- انتِ عگربة

بيدها جان كلاص ما عبالي راح تشمرة بوجهي انكسر بگصتي

عجيبة : تغريد السَاقطة جنت كل ما أحاچي

يعددلي زينات تغريد عَبنه چان يريدها و هي ما رادته حَبت اخو و عشگته و أخذته

تغريد حلوة و تحب رجلها و گايمة بالواجب و نظيفة

و ما تسوي مشاكل وووو وووو وووو يومية تنعيل ما تفارك حياتي لحد ما مات و هي بنفسة راد يتزوجها ورة ما مات

يعگوب بس ما رادتهم و لبستهم كلهم

جُمارة : جا شسوتلج امي

عجيبة : ما أحبنهاااااااا تغريد موش احسسن مني

عفتها و غسلت كصتي هي كاعدة بالهول كعدت على الكرسي صافنة

و عيني على باب غرفة فضة و دموعي تجري على امي و على حالي

طفت الاضوية و كامت لغرفتها البيت صار يخوف

الاضوية طابة للبيت من الشبابيك بس زايدة البيت رعب

رحت لغرفتها فتحت الباب لكيت مرة كاعدة يمها تتعارك طردتني من الغرفة بقيت واكفة يم الباب اتصنت

عجيبة : ولج ما بقى شي إذا تغريد ماتت ناخذ حصة بتها كلها و نسافر أنا و امجد و اجي اخذها منج

جا أنا هينة عليه بني مو بحضني

- مو كتلج اريد فلوس السلفة و البت تريد هدوم و عباية

عجيبة : اي ذني جبتلها جا شلون ما اجيبلها و هاي فلوس

السلفة والله جديتهن جداوة من امجد

عقدت حواجبي ما جاي أفسر شيحجن مديت ايدي لباب الخلفي مقفول

رجعت كعدت بالهول و الدمعة لايحة بنيتي سمعت. البيان تطبگت

اني حاضنة روحي و ابجي

فزيت على عجيبة من لزمت متني و فزيت كامت تضحك بصوت عالي

عجيبة : حسبالج فضة ههههههههههه

انطبك باب الشارع قوي عجيبة ركضت لغرفتها و طب للمطبخ يغلط و يسب و يفشر كام يضرب و يفشر ويسب ما ادري عليمن

لزمني من ياخة الدشداشة و صعدني فوك بغرفة حور

امجد : وووين راحتتتتتت و وين عافتني

ردت اكوم من الكاع دفرني برجلة على بطني صرخت بصوت عالي

شَد حلگي قوي بالشال و كام يورث جگاير كل ما توصل للنص يطفيها

بمكان و تشوغ روحي وهو يضحك بعالي صوته

امجد : يمووووت ما يبقى عايش زِناد

هههههههه

مد ايدة على وجهي

امجد : خطية جان يتمنى يعيش اللحظة العايشها

هسة اني

كمت ارفس بأثنين رجليها و اصيح بصوت مكتوم بسبب الشال لان

أثار الچويات حرگني

شمرت روحي بالكاع و هو نام على الجرباية يردد اسم حوور

غمضت عيوني بس ما كدرت أغفى لحد الصبح و ياريتني غافية

عجيبة : امجد ولك ما تكوم شني عريس

- شكووووو

- كوم ولك خابرتني رقية دگول بتها سامعة زِناد يگول

لرهينة عجيبة الها ايد بموتت فضة

امجد : اي جا مچذب

عجيبة : ولك امجد

- ولي عني اريد اناااااااااام لا اروح أنا اكله

- ولك يعار شني تغشم روحك و تبليني چـا ياهو

الخلاها تكتب الوصية

امجد : اي أنا خليتها تكتب بس موش أنا دچيتها

لان كشفت ورقتج المضمومة صار سنين

الخامس والاربعون من هنا

تعديل المقال