رواية يا اجمل الوحوش الفصل الثالث والاربعون 43 بقلم رسل فهد

رواية يا اجمل الوحوش الفصل الثالث والاربعون 43 بقلم رسل فهد 

مـَا الـذي يـجري وراء الـزمن

حتى جعلهُ يركُض هـاربـاً

بهذهِ السُرعـة ؟

إمراً مُخيف بحق المُستقبل

- رُسل فَهد

....

" جُمارة "

طويل و ما ادري شوكت نوصل و كل درب نمر منه اني شايفته من جان يجيبني زِناد و ياخذني لحد ما طبينة مِيسان تُرحب بكُم

بقيت اباوع مستغربة باوعتلة ، عينه على الطريق ما يباوعلي

جُمارة : وين راح نروح

امجد : للبيت نسيت الجوازات هناك

زفرت نفس قوي و گلبي صار يدك سريع ما اريد اروح هناك و احد يشوفني اريد أسافر و محد شايفني لان شراح يصير

ما ادري إذا عرف زِناد

ضجت فوك الخوف و خليت راسي على جامة السيارة

لحد ما وصلنه شارع بيوت عمامي و اني حاطة گلبي بشيشة من الخوف همزين جانت دنيا العصر و كلهم بالمعمل

وگف السيارة كبال البيت

جُمارة : راح ابقى انتظر هنا

امجد : نزلي شنو تنتظرين نزلي

بلعت ريكي و نزلت من السيارة طبيت للبيت تخيلت من جنت اجي لفضة

گبل عيني صارت على غرفتها شفايفي ترجف و أتنفس سريع

امجد : يمممممـة

طلعت عجيبة من وحدة من الغرف مبتسمة ابتسامة شَر

اول ما شافتني ضحكت

عجيبة : هلا هلا بچنتي توه نور البيت

آمجد : خليها يمج أنا رايح أكضي جم شغلة

- بعيني

راح و هي تباوعلي عبالك أني اعظم انتصارتها محتارة شلون

ملامحها تعبر عن نظرتها

جُمارة : جا شوكت نروح

عجيبة : و عليش مستعجلة اول و تالي ترحون خلي يگضي حاجته و يجيج ياخذج

بقيت كاعدة يمها انتظر لا ساعة و لا ساعتين

جُمارة : تأخر امجد جا شوكت نروح

عجيبة : هسة على جية ما يتأخر بعد

وره شوية كمت من اسألها دگلي شو حتى انا ادك عليه ما يجاوبني

ان شاء الله يرجع بسلامه كامت تفتر بالهول عود خايفة و بالها يمه

عجيبة : نامي نامي إذا تردين و أنا من اجي اكعدج

- لا كاعدة

شوية و حسيت روحي بعد ما أقاوم من النعاس نمت على الكرويته

و هي غَطتني ما كعدت غير الفجر محد بالهول كمت بسرعة

اباوع للبيت بخوف و عيني كوه تروح لباب غرفة فضة

و البيبان كلها مقفولة

رحت لغرفة عجيبة دكيت الباب و فتحتها لكيتها نايمة كعدتها

جُمارة : امجد لسه ما اجة

عجيبة : لا اجة و صعد نام بغرفته

كعدت على طرف جربايتها لان خايفة احس روحي

خايفة من كومة أشياء طلعت من غرفتها تشبه غرفة اهل زِناد

بس مابيها الراحة الموجودة هناك و هذاك العطر الطيب

عجيبة : امجددد يمة يالله ما تروح للشغل

طلعت وراها للهول و هي بالمطبخ تغسل القوري

جُمارة : شنو يعني هم منسافر ؟

عجيبة : غير طلع اكو غلط بجوازج و البارحة اجة ضايج

و مقهور يكلولة اسبوع يالله يخلص

و هي تحجي نزل من فوگ درت وجهي عليه راح للمغسلة غسل وجهة

و يطلع أصوت مقززة لعبت نفسي و اني واكفة

امجد : البارحة ضربت السيارة بحايط و تفلشت من كدام

لازم اليوم أصلحها

عجيبة : هاي من العين يمه لو صاير بيك شي

باوعلها و سكت

جُمارة : إذا بعد اسبوع يالله يخلص الجواز أخذني لامي

و من يخلص تعال أخذني

عجيبة : لا شلون اكو وحدة اول ايام عرسها

ما تبقى يم رجلها

آمجد : باب الحوش ما اريد احد يلجحج وإذا اندك الباب

طبي لوحدة من الغرف بين ما يخلص الأسبوع

بقيت ساكته و هو تريك و راح و سوتلي ريوك عجيبة

نزل هدومي و غراضي كلهن بالكراج كال صعديهن اريد اخذ السيارة للتصليح و صعدتهن وياي امه

غرفة مرتبة أخشابها بس ما بيها و لا مراية حتى ميز المراية مابي مراية مبين جان احد نايم بيها قبل مو جديدة

كلشي جديد يبين جديد و كلت اكيد ما راح يشتري لان احنه نيتنا

جُمارة : هاي غرفة حور

عجيبة : اي الله لا يوفقها ام الزلم ام الربوع

على ذمتة و تتمعشگ خلته يكره حتى روحه يومية طلابة و يكتلها و ما تتوب حتى اخوتها تبروا منها

بقيت أقارن بين كلامها و كلام حور و ما ادري اصدگ منو

عجيبة : خلصنا العمر نصرف على الأطباء و الادويةً

و طلعت تشرب مانع و ما تريد منه بَزر

بقيت مصدومة اباوعلها و احس روحي ما مصدگتها

حطيت الجنط كلهن بمكان و بدلت لميت شعري و بقيت كاعدة بالغرفة حطيت كرسي يم الشباك و شوية دنيت البردة اباوع لبيت جدة رهينة

عمامي راحوا يتمشون و احفاد ربيعة يحرثون بگاعهم و كل نخلة عدهم

صاعد بيها فلاح يكص الزايد من السعف

بقيت اباوع الهم و حايرة بروحي لحد ما تعبت و نمت ، فزيت

على طبگة باب الغرفة امجد طَب باوعلي بطرف عينة

امجد : شعندج هنا

جُمارة : ها ؟

امجد : نزلي جوة

نزلت و كل شوية أدير وجهي عليه اريد اشوفة صاحي لو لا

لكيت امه تصب بالغده كعدت بالهول وهو نزل و امه اجتي بس عيونه

تخوف كلها شر و اعصاب اول ما لزم الخبزة

امجد : إذا ما ادوش راسة برجلي و اهينة كدام الوادم كلها

ما اطلع أنا امجد

عجيبة : يولي والله و لا تخلي بالك يمه

امجد : هو شنو لا تخلي بالك لا تخلي بالك جااااااا منو

خلى برااااااسي

مدت ايدها على اجتافة تهدي و تباوعلي بأحراج بلعت ريكها

عجيبة : انتَ احسن منه ما تعاين الله شسوه بي

نزله اسفل السافلين و هذا انتَ هيبة و صدر ديوان وًما تلوك الشيخة غير الك لا والله

امجد : گتله يطيني وجبة طحين يكلي ما عندي و المخزن مالته متروس متروسسسس و التجار كلها ما ترضى تطيني

لان كلهم متدلين منهن و إلا اسدد الحساب يالله

عجيبة : مو عندك هاي الفلوس الرجعنهن روح تسوك بيها

امجد : إذا تسوكت من واحد الديانة كلها تجيني تريد فلوسها و هذا اذا سمع بيه مطلوب يسد حتى المعمل

عجيبة : ووشني يسده بكيفة مالته مال الخلفوه انتَ مأجر بفلوسك

امجد : حتى ابو الايجار كال هذا آخر شهر الك صار

٦ اشهر ما دافع

لطمت على وجهة

عجيبة : جا وين فلوسك ولك وين

امجد : وين يمج يمججج نصهن يمج سألي روحج ما تدرين بنفسج يومية شكد تردين و شكد اجيبلج يالله اسد حلگج

عجيبة : ولك امجد أنا امك هيج تسوي بيه

لزم راسة بأثنين اديه عاف الغده و صعد فوگ

جُمارة : ليش هيج مطلوب ؟

عجيبة : من وره زِناد هذا الخسيس النذل الما ناصف أخيه دوم خيرة يالله لولد عمار و شريك يعس بحلوگهم ملايين

جُمارة : و شعليه زِناد بالدين

عجيبة : شلووووون شعليه لو مخلي اخو ذراعة اليمين جا ما صار كل هذا هو اخو الجبير و لازم الشيخة اله

جُمارة : بس هو ابوهم انطاها لزناد

عجيبة : و انتِ شكو تدافعين منو يمج خالة ولد عمة بنية

جُمارة : ما مدافعة بس شلون يسافر وًهو هلكد مطلوب

خلي يرجعني لامي ما اريد حتى أسافر

بعدني احجي و نزل من فوگ يخوف شكلة

امجد : و انتِ منو ماخذج لج شنو فددد قندرة انتِ

لزم ركبتي بأثنين اديه يحجي ويهز بجسمي اختنكت و امه جرتني منه

عجيبة : تخبلت ولك امجد تخبلت لا يسمع صوتها احد

عافني و أخذتني امه وياها للغرفة وهي تغلط على زِناد و عمايلة

و تغلط على امجد لان صار عصبي عليه

جُمارة : رجعوني لامي

عجيبة : نامي يمة نامي كسر بأيدة ان شاء الله

صرت عصبية عليها و اصيح بس ما جاوبتني عينها بالتلفزيون تباوع

و طلعت من القاصة شدات مال فلوس

عجيبة : خلي اوديهن اله يسد بيهن عازة بعد كلبي اليوم حتى ما تغده منهار من وره الدين هو هذا الزلمة كلشي ولا الدين عندة

طلعت و قفلت الباب وراها بقيت بالغرفة و ما جاي استوعب الي يصير

انفتح باب الغرفة و طَب هو مبتسم كوه عليه ، لزم ايدي. جريتها بعصبية

امجد : صحيح اذيتج و حقج عليه بَس جنت عصبي لان صارت جثير امور أجلت سالفة السفر و أنا اريد اخذج ونطلع من كل هاي الهوسة

جُمارة : انتَ مديون شلون نكدر نسافر

امجد : لا اني بعدني ما مستلم فلوس حصتي من هذا البيت

راح اخذها هاي الأيام من زِناد و اصفي الدين و الباقي نسافر بي حتى افتح مشروع هناك

جُمارة : جا ليش كلت لامي مخلص كلشي وراح نسافر

امجد : جنت ناوي أسافر بلا ما اسدد الوادم بس من عاينت عليج كلت شلون أوكلها حرام و اخلي الناس تدعي عليه و هي تتأذة اصفي كلشي يالله اروح

بلعت ريكي و باوعتله احتاريت اصدك مَـن

بقى يمي شوية و طلع ، طلعت ورا لكيته كاعد يم امه يسولفون

عجيبة : يعني فاخر أيسوا منه ؟

امجد : كال الدكتور بعد غسلة وحدة ويموت ما يتحمل

جُمارة : انطيني تليفونك اخابر امي

امجد : خابرتني الصبح و كلت الها سافرنة ماريدها تضوج

ضجت لان كاللها هيج و اكو احساس بداخلي دائماً يخوفني و يعيشني شعور الأشياء الي اريدها تصير ، لَمن متصير

يعني دراستي من تأجلت عقلي قافل على انُ بعد ما أداوم ابد

و ابقى اكل بروحي من القهر

شوية و راح و اني صعدت للغرفة ما جاي احس روحي مرتاحة

اكو شي قابض على روحي و بعده خيال فضة ما جاي يفارگني

تمددت على الجرباية فزيت على صوته بنص الغرفة يفتر و الغرفة ظلمة

امجد : حور حور إذا الزمج اذبحج ، لا ما اذبحج تعاي

شلون تعوفيني و تشردين انتِ ما تسويها لا انتِ فقيرة

هاي فضة الساقطة شردتج ، تعااااي تعااااااااي مشتاقلج

جان يحجي بصوت مخيف سديت اذاني بأثنين اديه و صرخت

اجه سد حلگي بساع

امجد : اشششششش اشششششش لج لا يسمعج

جُمارة : عوفني عوفني

عجيبة : شبيكم يمة اسم الله الرحمن جُمارة شبيج

- ابنج ابنج يحجي بصوت يخوووف

عجيبة : مقهور يمة مقهور و حلمان خطية على كيفج ويا

شمالج جا المره ستر و غطه لرجلها

جانت تحاجيني اني بس تهدي بي هو لحد ما نيمته و غَطته

بسرعة غُفة و هو يردد كلمات مدري شنو

نزلت وياها خايفة ارجف نمت يمها بالغرفة و حتى هي خايفة منها

بقيت كاعدة للفجر لمن راح دورت بغرفتها على تليفون ما لگيت

الضحى ردت اطلع بالكراج

عجيبة : تعاي طبي عيني لا يلچحوچ

و هذا زِناد شَر الله وكيلج

طبيت و اني ضايجة ما ادري شوكت يخلص الاسبوع و اخلص من هذا الوضع لو اشوف نفسي شنو اتصرف بوكتها

بعدني بنص المطبخ و صار صياح بصوت عالي بالكراج درت وجهي و عجيبة لطمت على خدها رادت تطلع بس من شافتني بقت واكفة محتارة

تطلع للكراج لو تجرني تطببني جوه

زِناد نايم فوگ امجد و يضربة بوحشية اني خفت كل ضني عرف بي متزوجني اجه ولاء يحاول كل قوته يوخر زِناد بس ما يكدر

عجيبة : طبي طبي جوه

بقيت واكفة و اجت هي جرتني من ايدي لغرفتها و طبگت الباب شوية وًسمعت دعاويها بصوت عالي على زِناد و ولاء يصيح عليها تالي طردتة

طلعت من الغرفة لكيتها تمسح بدم امجد

و آمجد من الأعصاب يريد يأكلها

- الله ينتقم منك يزناد دنيا و اخرة ان شاء الله

امجد : إلا اذبحة والله إلا اذبحة إلا امرد گلبة مرددد

عجيبة : طبة مرض فوك مرض هذا الوحش والله إلا اخزي

افضحة و اشهرة اليومممم

جُمارة : ليش هيج سوه

راد يجاوبني بصياح حطت ايدها على حلگه

عجيبة : ما يرضى ينطي حصته عايش الدور يريد الوادم كلها تحت امره و سيطرته

اباوع لأمجد الدشداشة مشكوكة من جهة الدكم و الدم تارسها النازل من خشمة و الي جوه عينه مورم يتنفس سريع و يحجي بصوت ناصي

امجد : اذبحة والله إلا اذبحة

بقيت كاعدة يمهم اباوعلة بيومها ما طلع ابد اجوي عمار و هاشم

يشوفونه و جدة بالليل اجتي تالي تعاركت هي و عجيبة و طلعت من البيت ردت اروح الها احضنها اكوللها جدة اني هنا

بَس مادري ليش خايفة

ثاني يوم من الصبح كاعدة عجيبة تحومي بالبيت و تفتر

نزل امجد بالعشرة الصبح يضحك و يباوعلي و يبتسم

عجيبة : تروح اليوم للغدة لو لا

امجد : اروح ليش ما اروح و انتِ و جُمارة ترحن وياي

فتحت عيوني بصدمة و باوعتلها بتوسل دكول لا ابتسمت

عجيبة : والله انتَ مو هَين تعجبني دوم

امجد : تربيتج

حضرتله الهدوم بساع و بس تريده يطب يسبح تلوب اول ما طب

طلعت للباب الخلفي الي وره البيت و ضامه بصدرها علاكة مال فلوس اني امشي وراها أجاها رجال يشبها هواي اخذ الفلوس و راح

طبيت اركض قبلها

عجيبة : يالله بدلي بساع و اكشخي خوش كشخة و لبسي ذهبج اريد الدنيا كلها تتعجب بچنة عجيبة

جُمارة : لا ما اروح اني

- مو بكيفج يالله بدلي انتِ مرته بعد اول و تالي يعرفون

هزيت راسي بـ لا انفتح باب الحمام باوعلي بخزرة تخوف

امجد : منيه متريد تروح

عجيبة : لا كلنه نروح ليش منروح

صعدت فوك وًهو اجه يبدل و يمشط شعره و الابتسامة ما فارگت وجهة ابد يتعطر على كيف دار وجهة عليه

امجد : شو لسه ؟

بلعت ريكي و هزيت راسي نزل جوه و صعدت امة

عجيبة : ولج يالله فضيها ماضل وكت

جُمارة : لا ما اروح لبيت جدة لا حبابة كليلة مريضة

- لا عيني اعفيني من هاي السالفة دام مخلي براسة ياخذج يعني ياخذج و انتِ شني مستحية الناس تعرف هذا رجلج لو شني ما فهمت ليش ما تردين ترحين

جُمارة : زِناد

عجيبة : انعل ابو زِناد شيريد يسوي مثلا ترى انتِ هسة مسجلة بأسم امجد و ما يكدر يفك حلگة بحچاية لا هو و لا غيرة

منين ما أجيبها ما جاي اكدر أتقبل الموضوع كاعدة على الجرباية وًعجيبة تقنع بيه و اني قافلة صاح من جوه يالله و هي كامت تضرب على وجها و تباوع للباب

عجيبة : ولج يالله ولج جُمارة لا يصعدلجً

رفعت جتافي بمعنى ما اكوم

و باوعتلها بخوف من اسمع خطواته يصعد الدرج باوعلي خازرني

امجد: شمنتظرررررررة مدكومين

جُمارة : ما اريد اروح انت مو كلت لامي مسافرين

- كووووووومي عاد

درت وجهي على الحايط اجه عليه لزم طرف ثوبي و امه دكله علكيفك

امجد : شنو تكسرين حچايتي انتِ

عجيبة : لا كامت كامت يالله عيني

مديت ايدي على عيوني امسح دموعي نزلته امه

و ضل جوه كل شوية يصيح يالله بسااااع

كمت و طلعت بالهدوم شي البسه و ما جاي استوعب روحي شلون

أطب يمهم و جدة و زِناد يشوفوني و الكل

لبست ثوب رصاصي و عجيبة واكفة تطلعلي بالذهب

لبستني الكلادة و اني لبست المحبس و السوار

عجيبة : يالله عباتج جوه هي مالتي جديدة بس انتِ بطولي

جمارة : اني ما البس عباية

- يمة شيخلصج من امجد هذا القنقينة

خزرتها بعصبية الف الربطة و ايدي ترجف و اني اباوع لحياتي هنا

لبست حذائي و ردت اطلع

عجيبة : جا مكياج ما تخلين وجهج اصفر

- لا ما اخلي

نزلت جوه وهي وراي راحت للغرفة جابت عباية

و هو واكف منتظرني البسها حطيتها على راسي و عيني عليهم

ضاغطة على شفتي من الخوف طلعت و دموعي تجري على خدي كل شوية امسحها ، جننت بس خايفة ماكو غير الخوف بداخلي

امشي وراهم و منزلة راسي كلبي يدگ سريع و اسمع صوت الهوسة

و حچي الزلم من باب بيت جدة رهينة و ولد عمي عمار يشتغلون ويصيحون

خالد : عدنان ما تجي تطبخ جا هي العزيمة مو لأبوك

من وصلنه الباب صار هدوء و كلها سكتت امجد سَلم محد رد عليه بس عمي عمار رفعت راسي اباوعلهم كلهم يباوعون علينه بصدمة عاقدين الحواجب

غسان : اكلك هاي مو بت عمي يعقوب

خالد : اي

بلعت ريكي همزين زِناد ما موجود وياهم

جنت واكفة بصف عجيبة طَبينه للمطبخ امجد دار وجهة عليه مبتسم مَد ايدة و لزم ايدي و طببني للهول

جانت جدة كاعدة و بصفها زِناد و عمي هاشم وقاسم

داروا وجووهم علينه و جدة گامت زِناد من سمع صوت امجد ما دار وجهة مَد ايدة لجيبة طَلع التليفون

كلهن الي بالخلفي عافن الخبز و طبن يباوعن عجيبة و رقية تباوسن

ولد عمي عمار و فاخر طَبوا للمطبخ و عمامي گاموا يباوعون بصدمة

جدة تباوع لأيدي و لوجهي طاحت من ايدها العكازة

زِناد باوع لعكازتها و دار وجهة علينه

قاسم : هاي شني آمجد

احس كل رجلية صَكت ثلج و النفس ضاگ بصدري من شفت

نظرة زِناد شكد تخوف يباوع لوجهي و يرجع يباوع لامجد

النوب لـ ادية

جدة رادت تطيح و لزمها عمي قاسم

زِناد : آمجد

رفع ايدة اصابيعة مفتوحة و أشرلة بمعنى هاي شنو

امجد : ماكو شي تزوجت بدون زفة علمودك مرتك

بعدها ترابها اخضر

زِناد : لا ما تسويها انتَ

حَط تليفونة بجيبة و اجة علينه مديت ايدي على جف امجد اريدة

يهد ايدي حتى اشرد عَت ايدي قوي وضغط عليها

زِناد : ليش لك هاي ليش

امجد : ما أخذتها غَصب

دار وجهة عليه زِناد كمت احتار وين اودي عيوني المهم

ما تجي بعينة و دموعي تجري و ايدي على ايد امجد بس اريدة يهدني

رهينة : زِناد يمة تعال لَيه زِناد

ما دار وجهة على جدة و يباوع لامجد بدون ما ترمش عيونة

و امجد مبتسم يباوعلة َمد ايدة شريك على چتاف امجد

زِناد : تعال شريك

دفع امجد و لزم زِناد

رهينة : عساك بنار جهنم امجد بنار جهنم

الله يفرفح گلبج عجيبة الله ينتقم منج تغريددددد

وليدي يمة وليدي

كعد زِناد على الكرويته و شريك إندار ضرب امجد بوكس و صار صياح

جرت ايدي نورس من بينهم و عجيبة تعيط بعالي صوتها

نورس تباوعلي و تلطم على وجهها

نورس : شسويتي ولج شسويتي

زِناد : عوفوا

هدوا و دفعهم قوي دار وجهة زِناد عليه يباوعلي بنظرة بيها مية

الف سؤال بس ما يفيد جوابهن بعد

اجتي عجيبة جرتني من ايد نورس و طلعتني وياها

رهينة : عجيبة ولججججج ليش يا الخسة يالمگطمة

بالغسلت وجهج حليمة و لَفتج لديارنا هيج تسوين بأبنها

عجيبة : روحي سألي بت اختج گبل لا تسأليني

هي شمرت علينه مره و احنه ما نرد اليجينة

رهينة : انعل ابيج لابو تغريد لابو امجد لابو مرضعجن

الطايح حضة يا مكسورات العين

عدنان : زنااااد زناااااد أكلته شلون ما كتلته

شريك : خليني افوخ گلبي بي

عجيبة : والله اليگرب صوب ابني يعرف وين اردة

لنهاية المطبخ درت وجهي لگيته بعدة يباوع عليه

عجيبة تمشي و تسحل بية و اني كل شوية اعثر بالعباية و احس حتى العصافير الطايرة تباوعلي بأشمئزاز

امجد واكف بالباب مال البيت يضحك و لا همة من داروا عليه

و عجيبة طببتني للهول المكر و الحيلة كله بوجها

جُمارة : ودوني لامي ما ابقى هنا اني

عجيبة : اسكتي لا اكوملج هسة اطلع ضيم كلبي بيج

- ما خايفة منج و لا من ابنج انتو ضحكتوا عليه يالله رجعوني لأمي

- امداج انتِ و امج

بقيت اباوع الها بصدمة و هو يضحك بعالي صوته و امه تضحك

عجيبة : ههههههه عاد لو متغدين

امجد : انا عن نفسي شبعت

وكفت و اني أعصابي منهارة و روحي مشتعلة شعل

جُمارة : وديني لامي اني ما اريد ابقى هنا

يباوعلي و يضحك و يتقدم عليه

لزم وجهي بأثنين اديه دفعته ما اندفع

آمجد : اليوم شراح يصير بي اليوم

ههههههههههههه

عجيبة : هسة يصعد الضغط و ينجلط من عيونه

مبين عنده الضغط صعد

امجد : و يموووت و أطبخ بيدي لَحم فاتحته

و العگال على راسي و فنهههههه أليفك حلگة لو يتنفس

عجيبة : شحدهم و ياهو البي خير غيرك ياخذها

بس لا تنسى هي مو بس الشيخة و ورث زِناد كله النه

لان هو لا مره و لا ولد

يحجون ويضحكون بأصوات مخيفة

عفتهم و طلعت اركض للمطبخ اريد افتح الباب مقفول

جُمارة : فتحووووووو الباب اريد اطلع

اصيح بصوت عالي اجه جرني من ايدي صعدني فوگ شمرني بالغرفة

جر الكلادة من ركبتي و اخذ المحبس و السوار

و لزم حنچي قوي

امجد : باعي صوت واحد اسمعلج أنيم السچينة بگلبج

و عندي احلى من العسل

يحجي وياي و طلع سچينه من دشداشته قَربها لگلبي و صار يضغط قوي يعني صدك ماعندة مانع يكتلني

وخرت من عندة لازم مكان السجينة يحرگني كعدت على طرف الجرباية دموعي تجري ضحك و عافني وطلع ابجي بصوت ناصي و افرك مكان السجينة نزعت الثوب بسرعة لكيته جارحني و الوجع يشوغّ الروح

ما ادري عقلي بيا سالفة يفكر و صوت هوستهم بالشارع

و نظرة زِناد ما تروح من بالي ، على اي لحظة اكول هسة امي تجيني

بس تسمع تجي و تخلصني منا ، ولو محد غيرها ورطني

ضليت للعصر وحدي بالغرفة الباب مقفول ضليت ادك بي محد فتحة

من كثر الصدمة مدري من كد ما نشفت عيوني بعد ماكو دموع

باوعت من الشباك الشارع فارغ مديت ايدي اريد افتحة ما ينفتح

مقفول

بقيت ادك بالباب محد يفتحة رجعت وكفت يم الشباك

جدة نزلت من السيارة و عمي قاسم و غسان طببوها للبيت

ظلمت الدنيا و الشارع فارغ اجه عمي عمار طلع من بيتهم

على بيت عجيبة طلعت عجيبة حاجته و راح

كسرت الباب اصيح الها تفتحة الي بس عبالك ما تسمعني

ابد لحد ما تعبت و شمرت روحي على الجرباية صافنه بالسكف

انفتح قفل الغرفة كعدت عدل طَب امجد يباوعلي و يضحك

يضحك بعالي صوته مثل الي يمر بأعلى مراحل الفرح

نزع دشداشته و يباوعلي لميت شعري و اباوع للباب مال الغرفة

جُمارة : انت شتريد مني ليش هيج جاي تسوي اني مو

وثقت بيك و امي وثقت بيك

امجد : انعل ابوج لابو امج

جُمارة : احترم نفسك لا تخليني احجي حجي ما يعجبك

ترى مو عبالك اسكتلك

- ايييييي شتسوين بالله

لزم شعري قوي و ضربني راشدي

امجد : هسة شحال زناد ، ههههههههههه

لزمت خدي متوجعة و خازرته

جُمارة : حقها حور جانت تخونك و تستاهل لان انتَ حرامات تنحسب على الزلم الله ينتقم منك

امجد : حور تخوني؟ حوررر منو كلج

- امكككك

امجد : ههههههه حتى تضحك عليج ، حور ما تخوني

مشتاقلها شوكت الگاها

عض اصبعة قوي

- اوووف وين رحتي وين عفتيني لج

حور إذا لزمتچ شسوي بيج

جُمارة : تحبها ؟ جا ليش تزوجتني

امجد : و انتِ قندرتيش أنا جايبج حتى احرگ گلب زِناد بيج

جُمارة : بس بس اني معلية بزناد ليش تدمر حياتي

جر ايدي يضحك لواها صرخت بصوت عالي و بأيدة الثانية لزم حنچي ضاغط على أسناني لحد ما حسيت اصابيعة زرفت حلكي و اصيح بس لان ضاغط على حلكي الصوت يطلع مخنوك

هدني و طلع من الغرفة اجة بأيدة كرسي جرني من شعري كعدت على الكرسي و يلف الحبل و يضحك بصوت عالي يفتر داير مدايري و يضحك لَف الربطة الجنت لابستها مشمورة بالكاع و خلاها بحلگي

غصيت و اصيح بعالي صوتي بس ما يطلع صوت

امجد: اعلى اعلى هههههههههههه

هي حجاية و برجله دفع الكرسي طحت أنا والكرسي بالكاع

و انفشخ راسي بالكاشي و اني بدون اكل من البارحة

اني ثابته بس احس الغرفة تفتر بيه عرفت صار بيه هبوط

و فقدت الوعي

فزيت الفجر و روحي مسلوحة كلبي يدك سريع و دايخة

و مختنكة و كلشي مو حلو بالدنيا جاي امر بي كمت اون اون بصوت

مسموع لحد ما طبت امة تكعدة

عجيبة : يمة هاي افلها لا

امجد : لاااااا خلي گلبي يبرد من زِناد

عبرت من يمي و طلعت

حاولت بكل طريقة اوخر الربطة من حلگي ادفعها بلساني و أسناني

و ما كدرت ضلت دموعي تصب لحد ما كعد يبدل و يعبر من قومتي و يضحك ما اجه بعيني غير أبوية يجي يطلعني منا

دنك عليه من راد ينزل وخر الربطة من حلكي و جر الكرسي

نزلني سحل اني و الكرسي

امجد : خليها بغرفة فضة ما اريد أعاينها بغرفة حور

عجيبة : ما سمعت عنها شي

- لا راح اتخبل ما ضل مكان يعتب عليه

عجيبة : و هاي تجيبلها حب لو تبقى هيج

امجد : لااااااا شعندي مصرف خفي هو الحب مالتها خلص فلوسي كلها

سحلتني لغرفة فضة واني أتوسل بيها ما تخليني بغرفة فضة

غرفة الميت تخوف حتى لو هي تجنن و ريحتها لسه بيها

عافتني بالغرفة و سدت الباب غمضت عيوني قوي

- فضة دخيلج فضة عوفيني

اباوع للمري و أتخيلها موجودة بكل مكان هو اني بـ بيتنا و أتخيلها مو النوب كاعدة بغرفتها احرك براسي يسار و يمين بس اريد الأفكار الي براسي تروح و اقرا ايات ياربي أنقذني أنقذني

و خلص اليوم وحدي بالغرفة و لا سمعت اثر لاحد

بالليل و حسيت على واحد يفك الحبال من ايدي فزيت من شفته امجد

امجد : اش ولا صوت

سحلني كوه امشي لان من البارحة ما واكفة طلعني من الباب الخلفي

و صعدني بسيارة ما تشبه سيارته لحد ما شمرني

بالجنطة ايدة على حلگي

من التعب و الهبوط حتى صياح ما اكدر اصيح وكف السيارة و فتح الجنطة شالني منها حبل و سجينته بيدة لحد ما طببني لبيت خرابة

مشتغل بي ضوه خفيف بس كاتلة الوسخ و رجلي لان حافية

احس بيها من تمشي على أشياء غريبة

امجد : شوكت تنكسر زِناد شوكت لك شوكت اعاينك مكسور

شد ايدية ليوره و رجلي و ييباوعلي منهار يلزم وجهي يعصره قوي يتمنى يشلع الجلد بيدة و كل ما اصرخ يحط ايدة على حلكي

و يضربني راشدي

جُمارة : وديني لامي وديني

زِناد : اني ميطيني حصتي اني

مص من ثوبي وصلة جبيرة و حطها بحلگي و كام يجر خصلة خصلة من شعري يعتها قوي و يكصها بالسجينة

دموعي تجري و شايغة روحي ضربني راشدي و طلع

اباوع لشعري بكل جهة مشمورة خصلة

ما ادري اني شنو ذنبي حتى يصير بية هيج ما ردت شي

بس ردت ارتاح والله بس ارتاح

بقيت يومين بهذا البيت اصحى و ارجع افقد الوعي

صحيت على نفسي اني بغرفة حور و عجيبة يمي

عجيبة : كومي كومي اكلي راح التعب أضنه بالشط

اخذت دولكة المي شربتها كلها و من الجوع اكل بيدي ما تحملت

عجيبة : سرطان كون بدم محمد ما مات و خلصنه

باوعتلها متعجبة تحجي وي روحها

...

"روز "

من كالتلي تغريد سافروا ما فرحت تمنيت يصير شي

و يخرب هذا المخطط كله هي جُمارة شمعرفها حتى تعيش بدولة وحدها

اباوع لتغريد فرحانة بشكل ما ينوصف ، انقهرت

ما ردت جُمارة هيج تتزوج زواج

و اني عيني على الباب انتظر اليوم الي يجي بس محمد يكول اني

اجيت كافي تنتظرين وره يومين احترم تليفون تغريد بالاتصالات

و هي ما ترضى تجاوب ولا رقم غلقت تليفونها

تغريد : خاف رهينة مغتاضة هي و حفيدها لان ما نفذت رادتهم حسبالهم تغريد إذا تحجي ما تنفذ

روز : يعني تنطيها لزناد شيخ

العشيرة لو لامجد الي محد يطيقة

تغريد : طبعا لامجد اني انطيها لزناد امداني اي والله

متت من القهر وأكول تغريد إذا بتها و هيج سوت بيها لعد أني

شراح تسوي بحالي و شراح تعمل بيه بالليل فتحت تليفونها حطته على الشحن و اني صعدت فوك من سمعت صوت باب الحمام انطبك

نزلت اتخنس جوه لان عايفة التليفون على الشحن

نزلت على أطراف رجليه و رهينة تدك اتصال ورا اتصال

جاوبتها بصوت ناصي وكفت يم البردة

رهينة : ليش ولج ليش يا ساقطة يا مستهترة ولج اليوم صگد تمنيت يعقوب هنا خاطر يذبحج و يطم عارج

ولج هيج تحرگين أفادي و افاد حفيدي ولج تزوجين جُمارة لامجد ولج تناسبين عجيبة و ما تناسبيني

ولج تغريد كون اكضج يا ام الزلم يالحية

روز : خالة اني روز جُمارة سافرت

رهينة : وين سافرت ولجن منو يسفرها امجد الخصي

ولج ليش لسه تغريد عايشة و ما كتلتيها هجامة البيوت هاي

روز : شسويلها خالة قابل اني اكدرلها

رهينة : تعاي يمي راح ادزلج واحط يجيبج ولج رجلج

جاي متحلف بأمجد يريد يكتله ولج راح تتكاتل الويلاد

خل تغريد تحني اديها

تغريد : روزززز هاي شجاي تسوين

روز : خالة رهينة

جرت التليفون من ايدي و كعدت على الكرويته أضرب برجلية و الوب

مثل المرة التطلگ لا بية احجي اليوجعني و لا بية ابقى ساكته

روز : جُمارة يمكن ما مسافرة لان رهينة كالت محمد جاي يريد يكتل امجد

تغريد : وين يجي براسها هاي المخرفة

على أساس هيج الدنيا تايهة ويكتله و وين يلكا اصلاً

امس خابرته نايمين بالفندق

روز : منو كلج هاااا منو كلج انتٍ شلون هلكد تثقين بأمجد وعجيبة حتى اكثر من عدنا ، حاجيتي جُمارة سمعتي صوتها

تغريد : هسة اخابرها كدامج

فتحت التليفون كامت تدك ع امجد ينطيها رفض تراسله من يجاوبها

تدك على عجيبة ما تجاوبها ، هسة هسة يجاوبوني

ضلينه للـ ٣ بالليل كاعدين و محد جاوبها تالي دكت على رهينة

رهينة : ها روز

- اني تغريد خيركم الدنيا مكلوبة

تغريد : انعل ابوج لابو الدنيا ولج لو ما ادري بأختي شريفة و جانت تحب رجلها جا گل عليج نغله و دمج موش من دمنا

تغريد : عوفي بنتي تعيش حياتها

رهينة : يا حياة ولج بيد امجد هذا المره هجت منه

ولج دمرتي بتج حتى تفوخين والله إلا اندمج يا تغريد

اريد ان شاء الله بخت حليمة يعثرج و إلا اطردج من حصة ابني و اخليج مثل الجلبة تتحسرين

تغريد : اني وياكم و المحاكم

رهينة : يا محاكم والله إلا اخلي زِناد يبيع المستحى وياج

محد عم عليه غير المستحى حسباله ادمية ولج تزوجيها لاخو يا عار يالماتستحين

تغريد : مو ردتي تزوجيني لعمار

رهينة : ولج يعقوب ميت و ازوجج لعمار مو عايش ويتحسر عليها اعلمج يتغريد بسيطة أنا اعرف شلون ابجيج

تغريد : ديالله يالله

سدته بوجهة و بقت كاعدة ما نامت للصبح تدك على عجيبة و امجد ما يجاوبوها تالي انطتني التليفون كالت كوليلها ليش ندك على عجيبة ماكو

اول ما دكيت على رهينة جاوبتني

رهينة : عساها بحظج و بختج يتغريد كون تحير بعلتج

الأطباء كلها

روز : خالة ليش عجيبة ما تجاوب

رهينة : راح رجلج يخايبة خل ترتاح تغريد الحية

- شنوووووو

جرت التليفون من ايدي تغريد و كانت تحاجي رهينة و اني دموعي على خدي و أضرب على رجليه يمة محمد شبي

تغريد : شبيج انتِ الثانية شبيج

روز : محمد مااااات لو شنو

- موتت الجلاب السود

دفعتها و صعدت اركض جبت الصاية و الشال لبست

نعالي و هي وكفت بالباب مصدومة مني

تغريد : وين ولج وين مولية وعلي اذبحج

روز : ذبحيني ذبحيني و خلصيني منج و من شرج وخري من وجهي ما تدمرين حياتي مثل ما دمرتي حياة جُمارة

تغريد : طبي لج ادبسززز

جريت ايدها اريد ادفعها تخبلت و ضربتني دفعتها و فتحت الباب

و طلعت بسرعة طلعت من الفرع و اجتي وراي تركض اجرت تكسي

ردت اصعد صعدت وياي و تليفونها بيدها

تغريد : أنا اعلمج

روز : دمرتي حياتنا

اديها ترجف و تدك على عجيبة و امجد ما يجاوبوها

تغريد : هذا مو كلي احنه سافرنه شو رهينة دكول موجودين

عيني على الطريق و الدرب صار شطولة من وصلنه الفرع هوسة صايرة كالتلة تغريد يمك و نزلنا بوجهنا لبيت خالة رهينة و كل تفكيري

اكول الحمدلله ماكو جادر يعني مابي شي

تغريد خافت تطب لبيت رهينة ضلت واكفة بالباب من طبيت اجتي وراية

والبيت هوسة صوت صياحهم واصل للباب

طبيت للمطبخ و عيني على الهول كلهم كاعدين ادور بالوجوه و دمعتي بعيني ما لكيته و الكاعدين بس عمامة حتى الولد ولا واحد

نورس : هلا تردين عمتي رهينة بغرفتها

النوب طبت تغريد كلها تباوعلها صفح ولد رهينة

ركضت لغرفة رهينة فتحت الباب فزت و زِناد متمدد يمها نايم

و هي واكفة تباوعله و تبجي

باوعتلي متعجبة النوب شافت تغريد لزمت العكازة و هدت عليها

اول ما تريد تضربها طبت ام سلام تعيط و تضرب على خدها

ام سلام : يمة محمد بالمستشفى و محد يكلي أنا شنو ويلادي دافعتهم نذر لتغريد ولج تغريد ما تجفينا شرج

تغريد : احترمي نفسج عاد شلون اطيقج لو أطيق ولدج أنا

ام سلام : واحد بالسجن مشمور حتى انتِ ترضين و هسة على محمد لحگتيني شلنا غرض بـ بناتج عسى ما تطيهن للجلاب

تغريد : ماكو جلاب غير ولدج شسويلة ابنج إذا لوكي

حتى يرضى عليه زِناد

رهينة : موش لوكي بس الزلم ما شايلة الحقد الشايلاته

انتن

ام سلام : لو ميت ابني أنا شحصل هسة جُمارة لو امها

هن يتعاركن بالحجي و كلها واكفة تتفرج طبوا الولد من باب المطبخ

شايلين محمد حَطوا على الكرويته و امه تلطم على صدرها و تصيح بصوت عالي

ام سلام : يمة ابني يمة راح من ايدي

رهينة : ليش لسه ما گعد

خالد : جان كاعد بس بالطريق رَد تخربط

اباوع بالوجوه ما ادري شأنتظر منها

عفتهم كلهم و رحت وكفت يم راسة اريد أشوفه خليت ايدي على گصتة و دموعي تجري امه خازرتني ، فتح عيونه من رشوا عليه

مي رفع راسة شافني واكفة. فوك راسة

وكف بساع لازم راسه جَرني لحضنه

محمد : شلونك لتخاف لتخاف مابية شي

و دار وجهة عليهم

ام سلام : ولك محمد هد البت تسودنت

تغريد : وخررر شو وخرررر

خلاني ورا و دفع تغريد

محمد : مرتي شني وخر انتِ طلعي بره منا يالله

تغريد : جيب روز ولك اخلص من واحد يجيني الثاني

محمد : مرتي بابا مرتي عاقد عليها

امه لطمت على وجهة

تغريد : طلگتها ولك شنو انت تضحك عليه

محمد : ما طلگتها و لسه على ذمتي اضحك عليج طبعا جا انتظرج تضحكين عليه

تغريد : ولج رووووووز هذا شيحجي مو طلگج

روز : لا ما طلگني

تغريد و امه لطمن بنفس الوكت على وجوههن

تغريد واكفة مصدومة مدت ايدها تريد تجرني منه قوي

طّبوا سلام و عدنان من بره

سلام : جدة امجد موجود بس جُمارة ما لگيناها

رهينة : يمة وينها

تغريد طاحت بطولها للكاع رشيت عليها مي اهز بيها ابد ما تكعد

تذكرت من صارت بيها جلطة و دخلت بغيبوبة هم هيج طاحت

من آيسنا منها ما كعدت اخذناها اني و محمد و خالد

و انخبصت المستشفى عليها سحبوا منها دم و هي فاقدة الوعي

ابد ما بيها و لا گعدة كمت ابجي ر اباوع الها إذا. صار بيها شي

شراح يخلصني من ضميري

بقيت واكفة بحرگة و خوف منا تغريد و منا جُمارة

و محمد امة و ابو حرگوا التليفونات عليهم هو و خالد ما يجاوبوهم

محمد : بشر دكتور

- للإنعاش

....

" جُمارة "

- شبي محمد

ما جاوبتني بس بيومها ما شفت امجد لحد الليل اندك الباب

قوي اجه امجد فتح الحبال من ايدي و جر دشداشة من الهدوم مالتي

و باوع لامة

امجد : لبسيها شال و دشداشة خل تفتحلة الباب

عجيبة : خاف ياخذها

- لا

بدلت بسرعة و كلي امل انزل و افتح الباب لأي واحد واكف

بس اخلص من عذابهم نزلت الدرج اسحل بروحي سحل و هم يمشون وراي اول ما نزلت آخر بآية لزم ايدي فتح التليفون

شهگت من شفت صورة امي على السدية و الأجهزة

و الوايرات تارسة راسها

امجد : اي حركة زايدة منج اطفي الجهاز على امج

هزيت راسي بـ لا لا لا

امجد : طلعي لزناد و كليلة شتريد

إذا كالج وين امجد كليلة نايم

بلعت ريكي و بقيت واكفة بمكاني هز جسمي قوي

و فتح باب المطبخ

دفعني و بديت أتقدم لباب الشارع ما ببالي غير صورة امي

و شلون صار بيها هيج أتقدم خطوة و التفت عليهم واكفين وره باب المطبخ مديت ايدي للسرقي فتحت الباب و عدلت الشال

فتحت الباب و ايدي ترجف

...

گتلك كلش يتعبوك

هدهم راحتك يمي

ولك سَممتة

الرابع والاربعون من هنا

تعديل المقال