رواية يا اجمل الوحوش الفصل الثاني والاربعون 42 بقلم رسل فهد
يا حَبيبي الماكو مِنه
بيك أتعب من اسولف
من ظلام الدُنيا صارت انتَ جيت الها گُمر
أنت يالـ تسوه أنتظاري
ولو بَعد عُمرين لأجلك أنتظر
كون بس اني أعرفك
اي شخص مايدري عنك
مثل سري الما أگوله لأي بَشر
-رُسل فَهد
....
أعاين الفيلق الطَب للغرفة شمدريني شچانن يحوكن من ثوب
مصيبة الي ، طبيت للغرفة و بيدي الوصلة امسح الأخشاب و هم قسم كاعد على الجرباية و قسم واكفات ما سلمت على كل وحدة بيهن
- دير بالك يخالة مو زين رديت النه سالم لو ميت
جان شگلنه و شحصلنه
علي : لا ماكو شي بسيطة ان شاء الله
رحمة : تريد چـاي
- اي حبيبتي
صعدت امه و هم كعدت و ضلن يمة لا ساعة و لا ساعتين
و أنا عود توني عاينته گبالي و تورشعنه
اشرت عليه وحدة منهن
- جا لو لسه لا ولد و لا تلد علاوي ابنج يـ ام سلام
صفگت اديها اثنينهن
ام سلام : أنا ادري يخية هذا عليوي كبالج و سألي
علي : هي بتي شسوي بالولد
هاي عود أنا حامل و انهضمت من كالن ليش لسه مو حامل الله يساعد
الما عدهن جهال على حلوگ الناس الما تسكت
اشرلي بيده على الكومدي الي بصفة وخر التيبلام و كعدت يمه
ما شفت مثلة واحد هيج حافضني حفظ
طلعن كلهن من صعد خالد گال زِناد جايه يريد يعاينك و يروح
گام وكف يريد ينزله اندك باب الغرفة بطرف اصابيعة و طب علينه
زِناد : اكعد اكعد بمچانك اكعد
علي : ليش صعدت أنا نازل
- أصعدلك شلون ما أصعدلك غير ابني انتَ
طلعت من الغرفة لان حسيت روحي أنا المصوبة و خالد و الولد كلهم صعدوا فوك أنا نزلت جوه لكيتهن يكولن لأمه عليه
شني هاي غرفة ابنج خايسه تمسح بالتوبات و ما تلحگ هسة يلتهب جرح ابنج نزلي جوه خلي ينام
ام سلام : طبعا طبعا خايسة جا هي وين لافيتلها
صارلها اسبوعين مخمخمة يم اهلها
رحت للمطبخ ساعدت سلوى فاطمة وياهن واكفة بالمطبخ
تبجي و ما كعدت يم امها و خالاتها
اريج : ولج خلي عينج بعين الله و خلي أملج بي جبير جا هاي النسوان بعينها تعاين جهالها من يطوها كيمياوي اسم الله و عدها امل يطيب و يصير زين
فاطمة : يعني يصير زين
عالية : اي يصير والله امي جابت شريك بشهر الثامن و جان عايش على الصوندة و كالت كلها آيستني و كالت تعبج بالشط ابنج رئاته ما كامله و ما يطول يموت و هسة ذاك شريك اسم الله عليه بنص الموت و التربان و امي ما خايفة علي دكول الزرعة بـ بطني هو يحفظة
فاطمة : امين يا ربي دخيلك ابني لا تعاقبني بي و لا تروايني بي شر و مكروه والله اموت ورا أنا ما اضل
سلوى : اسم الله يمعودة والله الطب تطور و اكيد يصير زين
لا ابر و لا عمامة راح يعوفوه
طب أبوه مرتضى هو و هادي شايلي نايم
مريض : خلي بفراشة و ديري بالج الابرة قوية و أوجعته
- سودة بوجهي
نزل زِناد ما طول ربع ساعة صعدت بساع گبل لا هم يصعدن ماعدهن مانع اول ما طبيت قفلت الباب و عيني عليه متمدد و متوجع
عالية : اسم الله ما ضل واحد ما شاركني بيك و انا بعدني
شبگه ما شابگتك
علي : هههههه طفي الضوه و تعاي تعبت جثير من الحجي
عالية : طبعا جيش خالاتك ينرادله خلگ ما مدشن بالله زِناد الرجال ما تأخر دقايق و راح
علي : شونك ابني شلونه مشتاقلكم والله
ضميت راسي برگبته و أعاين دموعي طاحت وهو يضحك
عالية : جثير اشتاقيتلك و محد يرضى يجيبني الك
الليل كله اخلصة أنوح عليك و ابجي حتى الدشداشه مالتي الشبكتني بيها آخر يوم ما غسلتها يومية بالليل البسها يالله اكدر انام
قَرب راسة على شعري يسحب نفس و باس شعري
علي : اووووف منك و اوووف من سوالفك
عالية : مو كتلك خليني يمك بالمستشفى
علي : كل عقلج اخليج هناك و أنا من الهوى الهاب إذا
حرك عباتج أغار
عالية : بعد ما تروح والله لو تموت ما تروح
علي : ههههه طبعا إذا اموت ما اروح
حطيت ايدي على حلگة بسرعة باسها
- والله إذا سمعتك تجيب طاري الموت بعد ما تلوم إلا نفسك
خوش لو لا
علي : تدلل سيدي
عالية : هاي شلون تحجي أنا مو سادة حلگك
- ههههه شربيني مَي حبيبتي
كمت من يمه صبيت مي ب الگلاص و أساعدة يگعد كلشي ما يخليني اسوي يخاف على ابنة أنا الزم ايدة عود أنا جريته و كعدته
شربته مي وأنا لازمة الكلاص بيدي تنكعت شواربة مسحتهن بطرف إصبعي ما نشفن كلش جريت دشداشتي و مسحت المي من حلكة و شواربة رجع نام و غطيته و دكدكت على صدرة
علي : شني جاهل ولج أنا بعد بس تلوليلي
عالية : جا مو زين والله انتَ مو مال رحمة باجر أداري ابنك
هيج و أخليك تشيل روحك و تشمرها بالكاع
علي : يا أشيل روحي هو غير أنا ويا نهجج من الديرة كلها
رفعت الغطة و تمددت يمه
عالية : عادي هججوني قابلة غير انتو جهالي
- طاح حظج و حظ جهالج ادبسز
عضيت شفتي و غطيت راسي شابگة اديهّ بأثنين ادية
لحد ما غفيت و فزيت بالليل على صوته يون متوجع كعدت بسرعة فتحت الضوه و أعاين عليه
عالية : شبيك علاوي انطيك دوة
علي : لا رجعي نامي يابة رجعي
بقيت واكفة يمه محتارة الوب و هو كل شوية يكلي رجعي نامي
يون و احس الوجع بيه مو بي
عالية : اصيحلك خالد
- لا شيسويلي خالد هذا الجرح من يوجعني يريد يطيب
كعدت يمه امرغله ظهرة و ايدة و هو يگلي اركدي ونامي
عالية : شلون انام و انتَ تتوجع شبيك مخبل
علي : خل أطيب اول شغله أسويها أعيد تربيتج
عوجت حلگي و مرغتله قوي صاح بيه وخرت
علي : نامي لج يالله تغطي و نامي
شفته يحجي صدك تغطيت و طلعت بس عيوني من الغطة
و كل شوية يدير وجهة عليه يعاينلي صفح صدك هاي الزلم مو مال عيني و آغاتي غُفيت و كعدت على صوته يريدني اطلعلة هدوم
باوعتله بنظره معناها تحتاجني تحتاجني
علي : دكومي لا افگسهن
عالية : هو انتَ حط عينك بيهن بالأول النوب أفگسهن
- بسيطة جاي أعدهن الج وحدة وحدة
- عود إذا نسيت أنا أذكرك
هو واكف وحاصرته الضحكة بس ما يريد يضحك
اخذته للحمام اساعدة يسبح
علي : ديري بالج لا تزلگين
عالية : كون يغزر باجر تطيب و تنسى هاي أفضالي
علي : ولج بعدني ما تگرمت الله لا يخلي واحد جوه رحمتج
عالية : اسكت اسكت لا يطب صابون بعيونك النوب تبجي
شيخلصني
علي : امشي طلعي بره لج و صيحيلي خالد
عالية : فوكاها بعدني ما طالعة من الحمام و نكرت فضلي
مسح وجهة يصبر بروحة وديته للغرفة و اجه خالد يضمدله الجرح
خالد : يالله نتريگ و نروح يم جدة اليوم الغده بالمضيف
يحجي ويا و يضمده داس عليها حيل و علي صرخ بصوت عالي
عالية : شماااالك غير على كيفك
عاينوا عليه ثنينهم بصدمة حرت وين أنطي وجهي من الفشلة
خالد : هاي عليه
علي : اي غير على كيفك اكو وحدة ما تخاف على رجلها
خالد : تعاي انتِ ضمديله يالله تعاي
عالية : اي عادي علمني و أنا اضمده
علي : ابددد لو تموتين أنا أخلي حياتي
بيدج دير بالك تعلمها
ضحكت و نزلت اسويله ريوك رتبت الصينية و صعدت لكيت امه يمه
عالية : اكل يالله حتى تشرب دواك
ام سلام ؛ والله أنا ما اريد اروح لبيت رهينة بس لخاطرك
عالية : اكل يالله شو ما تاكل
- و انتِ شلج غرض بس ما تعوفي
علي : لان متأذي تريدني اكل حتى اخذ دوه
ام سلام : ما خليتي امج تاخذج لطبيبة تكشف عليج ليش لسه ما حبلتي البگدج من اول شهر يحبلن و انتِ لسه
تعرفين بس تجذبين و تصيحين حبلة
عالية : يجوز ما اخلف شمدريني كلشي بيد رب العالمين
ام سلام : جا إذا عاگر شعندي جايبتج هنا أعاين عليج لو على خلقتج فوگ الضيم النوب ما تخلفين
علي : اخوتي مناك يرحون مو
- اي من المعمل و يجون لهناك أنا راح اخذ نسوانهم وياي
هم نساعدهن هناك ماعدهم احد حياة و عد اهلها
و مرت ولاء زعلانة رقية و نورس يزابرن
علي : يالله هاي هي
طلعت و هو كعد يتريك و شرب دوه
- روحي وي امي و البنات لو ما تردين ترحين
عالية : لا اروحن بس وياك موش وي امك
- شنو الفرق ما فهمت
عالية : ماكو فرق بس اخافن عليك ما أمن بعد
علي : شني تخافين عليه أضيع طاح حظج يا شلولو
- تضيع جا كلشي يصير
تريكت و بدلت هن راحن البيت فرغ و خالد راح مدري وين
طلعت أنا و علي بس رحمة بقت بالبيت ما راحت
هو گايدني و أنا اضغط على إيدة قوي عود أنا گايدته
علي : ولچ وعلي الفچ بعباتج هسة و اشمرج گبل للغرفة
عالية : وين بيك حيل هو انتَ نص روح
عض شفته مبتسم و ساكت لان سَلم عليه رجال جبير يتحمدلة بالسلامة وصلنة للبيت الهوسة للضالين و جدتي و عمتي يتعاركن بالحجي وحدة ترفع و الثانية تكبس
طَبت امي و ما سلمت على عمتي كامت عمتي تمشي و تدردم
ورود : الله يساعدج يَـ عالية على عمتج
عالية : اوف اسكتي لا تهيجين مواجعي خية
جابت معجنة الخضرة وكعدت الكط وياها بالخضرة
ام سلام : كومي عالية يالله للخبز مو تقشمرينه
حاطه معجنة الخضرة و كاعدة
امي عاينت لجدة بساع
رهينة : دام الطبخ عليجن الخبز يجيبونه جاهز
اكعدي يمه اكعدي سوي الخضرة
عالية : جدة ما تجي عمة تغريد و روز
- لا يجدة هاي النحسة ما تجي رحت اجيب جُمارة
و ما خلتها تجي وياي
عالية : خطية لو يجون يعيشون هنا
عجيبة : مغرورة جثير حتى أنا تعبت اقنع بيها بلاية فايدة
ام سلام : عليمن مغرورة غير نفهم شعدها
ام شريك : هسة المرة كافية خيرها و شرها محد عاين منها
المو زينة شلنة غرض بيها
عفتهن و رحت اجيب كلاص مي لجدة لان عاينتها كاعدة على الكرويته تگح فزيت على الراشدي الضربه عدنان لدمعة ضلت لازمة خدها وهو طلع من المطبخ اخذت كلاص المي و وديته لجدة
من صارت هوسة الغده عاينت وحدة وراي لزمت خصري
دمعة : مو تحجين الشافته عيونج
عاينتلها و ما جاوبتها
ام عدنان : ام سلام بيتج الله يعمره شلون مكفيكم
ام سلام : لا واسع الحمدلله يغص و يبلع ولدي ما يرضون يعوفوني متعلقين بية يكولون لو ولدنا يتزوجون نطلعهم وأحنه ما نطلع بعد عمري
رقية : جا و ذولة الصغار إذا تزوجوا
ام سلام : نشوف لو يكبرون البيت لو نبني بعد فوگا
رهينة : شتبنين أربع طوابق ما تخلين الزلم تاخذ نسوانها و تطلع
ام سلام : شلي غرض بيهم هم ما يردون
رهينة : لا يردون بس غير نايمة على خوانيگهم انتِ مثل ما اخذتي رجلج و طلعتي و كعدتي وحدج كل مره تريد بيتها وحدها
رقية : اي والله كلنا
رهينة : خل رجلج ياخذ حصته ويطلع شمنتظر
لارا : لا خالتي العيشة هون احلى من العزلة
رهينة : أنا اول ما تهدى الأمور و نرتاح و تنزاح هاي الغيمة يتزوج زِناد جُمارة اروح يمهم اكعد و البيت هذا يتقسم الما اخذوا حصصهم يأخذوها
عجيبة : ام سلام أنا سمعت ولدج مأخذين كيعان ما ادري بيوت صدك هذا الحجي
أعاين لسلوى و اريج وحدة تعاين للثانية
ام سلام : يمة لا طبعا منيلهم مگاريد الله يأخذهم الفجر و يردهم الظهر و الليل يومياتهم يا دوب تكفي نسوانهم و جهالهم ويدفعون الكهرباء و الانترنيت و يشيلون جثير مسؤوليات ويا ابوهم
رهينة : جاي يدور زِناد على راعي على القطع بلكي يحصل منه اثر يكول حتى الولد كلها تكعد هنا واحد بصف الثاني
ام شريك : الله يهديهم و يضلون هيج گلب على گلب للموت
رهينة : دام فوگاهم زِناد ما يتخاربون هو إذا اثنين منهم تلاغوا يضل شايل همهم يكول من يطول الزعل يصير حقد
و الحقد لو جاس الكلب ما يهده
ام سلام : أنا ولدي اخيوة واحد كلبة على الثاني لأن أنا
مربيتهم على الحنية
رهينة : كون بجاه هاي الظهرية و يرد يعگوب صگد
اووووف يا يمة و يشيل هذا الحمل الثجيل عن ابن اخو
سفينه كاملة وهو يگود بيها
عجيبة : عمامة هواي و بيهم البركة هو مستبد براية و ما يدنيهم صوبه قصص وروايات عراقية كرار صلاح و لا ياخذ شور احد
رهينة : شورمن ياخذ ، عمار ابو المصايب الراد يكتل الويلاد
لو هويشم ابو السفر و النسوان فاخر مريض و هو
يگول محد يلزم الديرة غير زِناد و قاسم ما يحب هاي السوالف و لا يعرف الها دوم
رقية : لا شبي هاشم والله يكول لو اخذ الشيخة امشيها كلها على السراط المستقيم
رهينة : خلي يمشي روحة على السراط هذا ابو المكسرات
كليلة امك دكول وين الأمانة الاخذتها
من صار العصر يالله رحنه و اول ما وصلنه صارت عركة شكبرها بين عمتي و سلام و اسلام من كالولها مقررين بس بعدنا ما مشترين
ام سلام : عمار جااااي تسمع ولدك يردون
يطلعون انتَ ما الك راي عليهم
عمار : طبهم ١٦ الف مرض يالله حتى ازوج خالد و البقية
ام سلام : مو كتلي اليوم اخذج لحسن يمة وليدي اندفع كبش الفداء لحظرة جناب تغريد الخايسة الحية
خالد : اويلي عليك محمد
ام سلام : ومحمد المكرود ما حاجيت الشيخ مالتكم ها عرض افادة ما يروح يحاجيهم يسويلنه صورة حل وليدي
اريد ازوجة و أعاينه كبالي و افرح بي
صعدت علي و فتحت الباب
عالية : چا احنه شلون بينه إذا ردت نشتري بيت
علي : هي صارت بوجه سلام و اسلام احنه بعد عادي
اني بس منتظر سالفة محمد رفض لو تبقى على حطتها
حتى اقرر وين اشتري
عالية : شعليه محمد
علي : إذا محمد رجع نشتري بيت شريك و نقسمة نصين كل واحد اله طابق أنا ويا و إذا ما يرجع لا اشتري بصف اخوتي و شريك حتى عينهم على البيت من أنا ألتحق
عالية : وشني نيتك تبقى بالعسكريه علاوي ترى أنا
كلبي موجر منك بس اكول مريض خطية
علي : ههههههه اموت على الشلولو هاي
نَيمته و رشيت الغرفة و عطرتها رتبت الهدوم بالكناتير و مسحت المري
و رحت اسبح طبيت للغرفة عاينت تليفوني مشمور من امس ما كاضته ، فتحته و صغرت عيوني مصدومة أعاين لأيدي ترجف طفيته بساع و تمددت بمكاني النوب اخذته مسحت المحادثات بساع
و كلبي يدك سريع احس من صوته حتى علي راح يكعد
صوري و جواهن رسالة إذا ما تجيبين 5 ملايين
فضيحة ال سرهيد تصير بكل مكان
غمضت عيوني و دموعي تجري ان شاء الله حلم
ان شاء الله جاي اتخيل ياربي أنقذني بطني كامت توجعني بشكل مو طبيعي بقيت لازمتها و ابجي ما تحملت الوجع
كعد علي على صوتي يعاينلي مستغرب و خايف عليه
علي : شبيج عالية حبيبتي
عالية : بطني توجعني ما ادري ليش كلش قوي
سحب ايدي و خله راسي على رجلة غطاني و طلع بس عيوني
علي : هاي سبحتي و بردتي انتِ ما تنتبهين على روحج
مو تدرين بوضعج شنو
من حسيته يمي و خايف عليه غمضت بساع و غفيت كعدت بالليل لكيته يلعب بتليفونة بقيت مچلبه بأيدة شابگتها من الخوف و هو كل شوية يطبع بوسه براسي و يتلمس بطني مرت الأيام و من ما عاينت رساله بعد صار الخوف يروح شوية شوية بس تعلقي بعلي يزيد
حسبالك جاهلة و چلبت بحاجة طول الليل شابكته و طول النهار مگابلته لان ما يطلع جثير باليوم يطلع ساعة ساعتين و يرد
امه عايفتني بحالي حتى على الخبز ماتصيحلي يمكن هو كايل الها
و لان هو هنا ما تكول امشي خبزي انعصر گلبي من گال الاسبوع الجاي تخلص إجازتي و حطيت دمي بشيشه هو عاين عليه شلون طنگرت بالليل أخذني للدكتورة و كتبتلي علاج و ثاني يوم أخذني لبيت جدة و للمطعم بس يريدني اضحك و ما أطنگر
و اجه اليوم الباجر الصبح يلتحق بي و أنا من الليل ناصبتها مناحة
عالية : ترى ما عولتك تطيب ما عولتك و تريد هسة ترجع
علي : المكان مو خطر مثل ذاك الواجب وداعتج
اروح و ارجع ما أتأخر
- شنو شنو متتأخر عشر ايام شنو متتأخر
يضحك و يمسح بدموعي عَلگ البدلة على باب الكنتور
علي : تعاي حضريلي جنطتي تعاي
عالية : والله ما احضرلك كلشي والله و ما تروح لو تموت
- ههههه ولج عالية حبيبتي كولي يا الله
لفيت روحي بالغطة و دموعي تجري و هو مبتسم
يغيضني و يحرگ بگلبي
عالية : يعني عود الدوام احسن مني
علي : مو احسن منج طبعا بس كلشي إله حَقة
عالية : لا احسن مني و ما تروح والله إلا
اخليهم يبطلوك والله
اجه لزم ايدي يقنعني و يبوس بيها و يستغفر كل ما يعاين عليه قافلة
أختنگت من البجي و زَوعت
علي : لج انتِ زعطوطة تخبلتييييي
أخذني للمغسلة يغسلي و هو نظف الغرفة و غير دشداشتي
علي : ولج راح تخبليني انتِ شبيج تكبرين لو تصغرين
عالية : متروووح يعني متروووح
- ما اروح يالله هاي هي بس اسكتي
طَفة الضوه و التلفزيون و خلاني بحضنه
يمسح دموعي و يبوس عيوني
عالية : اخاف عليك تروح و اني حامل ابقى يمي
يعني إذا ما أهمك أنا ليش ما تخاف على ابنك
علي : سبع ما اخاف عليه
شبكته بأثنين اديه قوي
عالية : شبگتك قوي حتى ما تغافلني و تروح
علي : نامي ما اروح
نمت بخوف من الصبح لا يكعد و يكول اروح بس ما جنت اضن
اكعد و الگه مكانه خالي لا جنطته و لا بدلته و لا بسطاله
فتحت الباب و نزلت اركض لكيتهن جاي يتريكن
عالية : علي راح ؟
ام سلام : صح النوم من الفجر راح وي اخوته
يالله نزلي خبزي
انهضمت جثير شلون يروح بدون ما اودعة صعدت فوك مقهورة
و الدمعة بعيني فتحت التليفون لكيته دازلي رساله و هو بعده هنا
- حبيبتي راح اروح و ما گعدتج مو ما اريد اودعج بس ما اريد أعاين دموعج گلبي ينمرد مرد ديري بالج عليكم
وأنا اجيج ما اتأخر عليج شوكت ما تردين ترحين لاهلج
روحي خلي خالد يوصلج
ردت ادك عليه بس دموعي تجري ما ردت اضوجة قفلت الباب
و نمت على مخدته ترستها دموع اجاني من تليفوني صوت رسالة
كمت بساع كلت اكيد هو مسحت دموعي بساع و وگفت اهفي
وجهي بأثنين ادية فتحت التليفون ..
يالراسمتك بعيني حِلم وردي
باچـر هم تحد سچينتك ضدي ؟
....
" حور "
حور : لا شتريد منهم
- والله اريدج على سنة الله و رسولة
عاينت عليه مصدومة بحياتي كلها ما ضنيت انحط بهيج سالفة
حور : والله انتَ ما تستحي
خالد : ليش ما استحي عمي احنه وادم شيوخ وومن نعشگ ندگ بيبان
حور : وأحنه بابنه مخلوعة چفينا شرك و روح غادي
خالد : مو مشكلة نصلحها و تدللين
حور : اكلك عوفني بحالي ليش ما تفهم أنا أدري الزلم من حچاية تنهز شواربها و تروح انتَ ما مليت
خالد : اول شي أنا الشوارب واللحية مو رفيجاتي
و هسة الشوارب مخليها على أعصابي لان عدنا ابن عمي الجبير اليعاينه مزين شواربة يكرهة بعيشته لحد ما يردن يطلعن
حور : شو أخذتك السوالف يالله عيني امشي منا لا يلچحك واحد شيكول عليه
خالد : عايف اخوي مصَوب و جايچ و تالي انطرد
حرامات والله
حور : اخوك شمالة
خالد : تصوب بالواجب والله و انكتبلة عمر جديد
- خطية
- يالله حضري روحج من نسويلة غده لسلامتة اجيج
اخذ كل الخبز العندج
حور : الله كريم ان شاء الله يكوم بالسلامة
راح و سديت الباب الورا منين الله سلطك عليه يومية يجيني بالليل يأخذ الخبز الباقي و خبز اهل الدكاكين وره يومين اجاني الصبح كال
اليوم نريد ٢٠٠ گرصة الظهر
حور : يا ما الحگ
خالد : أنا اخبز وياج لا تخافين
حور : ترى صدك أنا جاي احجي
خالد : ديالله سوي شكد ما تكدرين و الباقي
نشتري غير اريد افيدج
- مشكور
مدري هذا البشر مرزوق لان من يوم الي صار يساعدني لليوم الله كان يرزقني من جميع الأبواب سويت نص الطلب و اخذه و راح مستعجل
بس جايبلي ويا جدر صغير بي اكل من يوم الي شردت لليوم ما اكلت مثلة و بالليل اجاني انطاني فلوسهن
و تمر الأيام ما بيها غير خالد معاوني على رزقي و مسهلها عليه
تلثمت و طلعت للسوك اشتريلي دشداشتين لان هاي حتى قماشها جرد من كثر الغسل أعاين للسوك و الهدوم الحلوة
و أعاين للمكياج بحسرة امنية حياتي جانت اخليلي
كحلة لو حمرة بحلگي حتى لو بالغرفة جان يمرد حلگي و يمسحها بطرف دشداشتي و إذا كحلة يطبب اصابيعه بنص عيوني
عطر إذا اشتمّ بيه يسحلني للحمام حتى اسبح
صدك صارن عمايلك سوالف يا امجد و ينذكرن ما ينعادن
شكد رب العالمين رحيم
لجحت مرت اخوي بنص السوك طلعت اركض بساع اجرت تكسي و اتلفت طبيت للمنطقة باد حيلي و انشلت رجلية من عاينت سيارة براس الفرع عالية و جهال المنطقة كلها تعاين الها متعجبة شوية
و نزلت منها امجد وكف يم البنيد و يدخن طَب لوحدة من البيوت
الي بالفرع بقيت متعجبة شعندة هنا
خليت و شردت من الديرة كلها و دموعي تطيح على اللثام
شوكت اخلص من كابوسك شوكت ارتاح منك حتى هنا لحگتني
حتى هنا ..
أحس كل البَشر ضدي
و هاي الگاع مو گاعي
يا گلبي تدگ ؟ شو حيل احسَن ما الك داعي
.....
" جُمارة "
لزمت دشداشتها احجي بهستريا و خوف
جُمارة : اني قابلة بأمجد قابلة
تغريد : شبيج ولج شبيج
لزمت راسي بأثنين ادية و دموعي تجري احس بروحي صرت
مخبلة لان ادري جاي اشوف أشياء محد غيري يشوفها
تمددت على الكرويته و مغطية راسي و جسمي كله مطلعة بس عين وحدة اباوع بيها على مكان امي نايمة بالكاع و ما رفعت عيني لأي
مكان ثاني من الخوف و لا كدرت انام حتى
جابتلي ريوگ و غده ما حطيت لگمة بحلگي بس دموعي تجري تعبانة
من روحي اول مرة بحياتي اكره روحي و اكره الساعة الي اجيت
بيها و صلت بيه أكول ليش أنخلقت ليش ، بعد ما جنت راسمة
أشكال الأحلام بحياتي و لازم أحققها عشت عمري رغم ضعف المادة
بالبيت بس ما مهتمة اكول باجر اشتغل اني و أعوض نفسي
هسة احس حتى نفسي خسرتها
صارت الأيام اكثر رعب من تمر شكل فضة ما يفارگني و لا عقلي دقيقة
يوگف عن التفكير بيها تأنيب الضمير ملاحقني و اني اتخيل الوصية بصوتها تقراها هي مرة وحدة شفتها و حفضتها على الغيب
عقلي مقتنع بفكرة هذا الكابوس راح يبقى يلاحقني طول العمر
و يرن كلام امي ب أذني وهي شكد جانت تحاول تبعدني عنهم تبعدني عن زِناد تبعدني عن زِناد بس اني جنت متمسكة بيهم و بالعيشة هناك
زِناد .. زِناد ما راح أسامحة لان هو الوحيد الي جان يعرف فضة و حافضها جذب عليههه هوااااي هواااي حتى اقتنع و اقبل
معقولة توصل بي جان يكول الها ما تحجي عن حبها بي اكيد تحبه
و تريدة وين اكو وحدة ما تحب رجلها
مسحت دموعي و غمضت عيوني ، انشغ بصوت مسموع
أندك باب الهول طلعت امي من المطبخ كاشخة صحيح دشداشة سودة
بس هاي قماشها راقي ما تلبسها بس بالمناسبات
فتحت الباب و اشرتلي على راسي
شالها مشمور على التخم اخذته لبسته باوعت طَبوا امجد و عجيبة
وجووهم تضحك صعدت فوك بسرعة بس امشي و عيني على باب غرفة امير ختمت القرآن لحد ما فتحت الباب و طبيت لروز لكيتها تبجي
و ساندة راسها على الحايط اول ما شافتني حضنتني بأثنين اديها
روز : جُمارة صيري زينة كافي عاد اريد اسولفلج
جُمارة : شبيج احجي
عافتني و كعدت على جربايتها تمسح بدموعها
روز : تغريد كسرت حتى التليفون و هو مسافر
جُمارة : عوفي روز عوفي
روز : شنو عوفي جُمارة تتذكرين من جنت اكلج عوفي زِناد
وهو مو رجلج و لا عاقد عليج و لا انتِ ويا علاقة بگد ما اني احب و متعلقة بمحمد و لو اموت ما اعوفة
جُمارة : أمي إذا عرفت عاقد عليج شلون
روز : شتسوي يعني تذبحني خل تذبحني و إذا مسويتلي راتب خل تكطعة امج مغرورة و مطبقة مثل لا انطيك و لا اخلي رحمة الله تنزل عليك احنه شنو حياتنا كاعدين بين أربع حيطان و ولا واحد ينكسر گلبه علينه روحي
شوفي البنات بهذا العمر شكد حلوة حياتهن
جُمارة : ماكو حياة حلوة
روز : لا اكو اني حياتي الحلوة تبدي من اخذ محمد و أعيش ويا وحدنا بعالم ثاني لان بس هو يدللني و يفهمني شأريد قبل لا احجي
- جان اجاج خطبج بدال هذا كله
- يجيني هو الي اجه بيوم خطوبتي و جازف بروحة توكل بعينه خطوبة بس غير الظروف ما جاي تجي عدلة ويا
هذا زِناد مو الدنيا كلها تدري بس شكد يحبج و يموت عليج ولسه ما كدر ياخذج لان الظروف اقوى منه و منج
درت وجهي على الشباك اباوع للشارع اني بجهة و كلبي بجهة و افكاري بجهة إنسان كل قطعة منه مشمورة بمكان ثاني
نزلت بالليل لكيتهم رايحين و امي تمسح الصور بالهول
تغريد : مو عيب تشوفيهم و تصعدين هو هيج الترحيب
سكتت ما جاوبتها
تغريد : امجد يكول اعقد عليها و اروح أصدقة بالمحكمة گبل حتى اطلع الها جواز و اول ما يطلع الجواز نسافر
جُمارة : بس اني ما اريد غيرت رأيي
جانت بيدها الوصلة شمرتها بوجهي بعصبية و نزلت من الكرويته
تغريد : اني شنو زعطوطة كبالج تضحكين عليه و العالم الخابرتهم و المهر الي دزه الرجال ولج انتِ شنو من بلاء
جُمارة : و انتِ شبسرعة ما مصدكة رحتي تركضين
تغريد : لان قسمة ما تتعوض جا شتردين انطيج لزناد
الي حتى الله من فوك كارهة ولو بعد شيسوي بي اكثر من الصار الله غسلة دنيا و اخره
باوعتلها بطرف عيني بدون ما أجاوب و لا حرف و هي انهارت
تغريد : بس لا لسه تردي
لزمت دشداشتها من جهتين الصدر
- اشگ دشداشتي والله هسة اشگها
درت وجهي عنها و هي نهارت بس مو بغضب كامت تروح وًتجي من الهول للمطبخ و ما حجت وياي و لا حجاية ، لبست عبايتها و راحت
ما تأخرت دقايق و اجتي جايبتلنه حلويات و مسواك اخذت نستلة و جبس ردت اصعدهن لروز صاحت بيه
تغريد. : و بيها زناف هي ما تنزل مو
جُمارة: خطية مريضة بس
- صيحيلها خل تنزل ياااااااالله
صعدت اصيحلها ما قبلت تنزل و طبگت باب الغرفة
لان امي حتى القفل شالته من غرفتنه وره ما عرفت بيها
عندها تليفون و تخابر
سوت النه امي صينية اني وياها كعدت اكل و مثل كل مرة
موضوعها و الطبق الرئيسي زِناد و ظُلمة ، بعدها تنتقل تسولف عن جمال حياتي إذا قبلت بأمجد و شنو من نعيم راح يعيشني
تغريد : ولج بس مهر دفعلج ٤٠ مليون
جُمارة : و شبساع دفع المهر اني يمته وافقت
- لا هو ما دفع بس حددلي الرقم و كال إذا تريد اكثر تدلل و لا حسبالج الفلوس الشفتيهن بالكاونتر هن منه لا ذني مال جارتنا ام مرام ضمتهن يمي تريد تدزهن لابنها بالخارج
بقيت ساكته و عفت الاكل تمددت على الكرويته
جان حالي يشبه الانسان المخطوف الي شمروه بجزيرة مسكونة
و ما يعرف شي عنها و كل الي يريدة يخلص روحة من الاشياء المخيفة الي جاي يشوفها ، اي بشر يجي حتى يطلعة راح يصدك بي ويأمن
لان ماكو شي أسوء من وجودة بهاي الجزيرة
نمت و كعدت الم راسي فضيع روز ما تحجي وي امي من تنام امي هي تنزل تسوي لفة و تسبح و تصعد و بعد ما تنزل إلا من امي تطلع لو تنام و حالها مو احسن من حالي الحزن ر القهر مسيطر على كل ملامحها
أندگ الباب العصرية و امي يم جاراتها بقيت انتظر روز تنزل ما نزلت
و اني ما بية حيل اكوم لحد ما استسلمت مسحت وجهي و حطيت الشال على راسي و گمت صِحت منو محد جاوبني فتحت الباب و مديت شوية من راسي
ما ادري شصار بية و لا اجة على بالي راح اشوفة اصلاً
اكبر توقع الي جان هو احد من الجيران بلعت ريگي و عدلت حجابي
اني ساكته و هو ساكت عينه عليه بس اني احاول أديرها لغير جهة
رغم هو ساد الباب بـ وگفته بس ما حطيت عيني بعينه
طبب بأيدة المسواگ و اني واكفة وره الباب
زِناد : شونج
اريد احجي بس ما ادري شبيه مترددة و خايفة و كارهة كلشي
سكتت ما جاوبت
زِناد : بعدج تكرهيني لو غيرتي قرارج
- بعدني
- جُمارة لا توصليني لمرحلة ما أريد أوصلها و انتِ اكثر وحدة تعرف زِناد شنو
جُمارة : و شتريد يعني تكتلني لو تتزوجني غصب
ياريت الاولى لان إذا حاولت تتخذ قرارك بالثانية اني راح اكتل نفسي
زِناد: و انتِ تعرفين أنا اثنينهن ما أسويهن لا قبل و لا هسة
و لا بعدين
جُمارة : جا عوفني بحالي و اطلع من حياتي لان بسببك من
راحت فضة لليوم خاليها ما جاي يفارگني و على ساعة اتخبل بسببكم
زِناد: چا امشي وياي عندي حجي وياج
جُمارة : كل حجي وياك ماعندي عوفني اريد ارتاح
- ماشي أرتاحي و أجيج بعدين
- لا تجي
هي حچاية و هو خَنزر بوجهي و بأيدة لَم شالي و عَتني قوي
زِناد : عايني جُمارة من طوري لا تطلعيني حتى ما أتندم
جُمارة : ليش تطلع حقيقتك الي كلها تسولف بيها
و بس اني ما شايفتها مو ؟
- عفية
جُمارة : ما جنت اصدك من يگولون عنك وحش
و من ماتت فضة تأكدت
زِناد : لا صدگي منا و جَاي
رفعت عيني عليه خازرته نزلتها من شفته شلون خازرني دار وجهة
طلع و طبگ الباب قوي بقيت واكفة لحد ما سمعت صوت السيارة من تحركت
بقيت كاعدة على الكرويته لحد ما اجتي امي تعجبت
من شافت المسواك
تغريد : منين هذا ولج
جُمارة : زِناد اجه جابه
تغريد : منووو عاتب عليه و شعندة جاي شحجة وياج
غطيت راسي و سديت اذاني من امي هي ما تدري اني روحي ما طايقتها لحد ما امي نامت روز ما نزلت رحت للمطبخ حطيت الها فواكه بالماعون و صعدت امشي على الدرج و اقرا ايات
طبيت للغرفة لكيت روز نايمة بالكاع اجيت جستها مصخنه كعدتها
بالكوه مادري شتحجي كله يخص الوهمي
نزلت جبت الها مي و صعدت و رجلية من كد ما سريعة توصل قبلي
شربتها مي و غسلت وجها بي هي مو صاحية و تبجي
روز : شوكت ارتاح جُمارة شوكت
جُمارة : هسة اكلي انتِ مريضة
بقيت كاعدة يمها و راسها على رجلي وبأيدي امسح شعرها دموعها توكع على رجلي نگعت ثوبي و عيوني
امسح بشعرها و اقرا ايات كل شوية عيني على الشباج و البردة لو على الباب لو جوه الچرباية لحد ما حسيت روز نامت لان خنست
و اني اريد أكوم ، غمضت عيوني قوي من صارت طگطگة يم الباب
بقيت مغمضة عيني و اتخيل كل ما اريد افتحها فضة واكفة فوگ راسي
أهز بروز بلكي تكعد بس ماكو جنها جثة و لا تتحرك
دموعي على خدي تجري هديت روز و طلعت اركض من الغرفة اردد
فضة عوفيني حبابة فضة عوفيني
نزلت اركض من الدرج و طحت من ثالث درجة للكاع لان درجنة بدون محجر خلصنه العمر نطيح منه ، من شفت فضة نايمة بمكاني على الجرباية و تأشرلي تعاي
فزت امي و اجتني تركض فوك الوكعة كفختني على راسي لان صعدت
جُمارة: يمة فضة فضة بكل مكان تطلعلي فضة
تغريد : اي ما تعوفج ما تعوفج مو كالت المره إذا ما تتغير حياتها ما تعوفها
حضنت امي و بقيت مچلبة بثوبها للصبح من كامت فزيت و ضليت امشي وراها النهار كله و بالليل انام بصفها و لازمة طرف دشداشتها و لو اموت من العطش و الجوع ما اكوم من مكاني حتى سبح صارلي يومين ما سابحة ما تفارگني فضة لا بالواقع و لا بالأحلام
آيست من كلشي بهاي الدنيا و ما صار بوجهي غير القرار الغلط
القرار الي قبل لا اقبل بي اعرفة غلط بس المشكلة ماكو غيرة
جُمارة : خل يجي امجد اني قبلت
تغريد : بس مو تفشليني من يجون و هم تنگلب موازينج
- لا اني اريد ارتاح
احجي و دموعي على خدي امي فرحانة راحت بسرعة خابرت عجيبة
تغريد : باجر يجون و يجيبون الج النيشان و تعقدون هنا
و ياخذج عكبة يعقد عليج محكمة و يسويلج جواز
جُمارة : اكمل دراسة
- طبعااااااًً طبعاااااااااً
بقيت ساكته و كاعدة بمكاني وامي الفرحة ما سايعتها ما ادري ليش
هلكد تحب عجيبة و ابنها و من جهة ثانية أشوف كلشي ما ترضى عليه امي بي صالح زِناد شكد جان يحبني و هي ما تريدة و لا قبلت بي
و هسة هاي النتيجة
و روز هم امي ابد ما قبلت بـ الوهمي و هي هسة حياتها كلها متدمرة بسببه و الضابط الي راد يتزوجها هسة مرتة عايشة ملكة
بقيت متأملة بأمجد خير ما دام امي هيج حابته
و لو اني ما أطيق شكله بس ان شاء الله راح اكدر أتقبله
بعد ما يصير زوجي .. زوجي !!!
ما فتحت الموضوع وي روز لان ادري بيها راح تخرب واهسي و اني
ما عايزة اضطرابات ثانية تسيطر على عقلي لان بدون شي احس روحي خسرته
فزيت ثاني يوم على امي بيدها ثوب الوان
تغريد : كومي يالله كومي لبسي و نزعي الاسود ما يصلح
تعقدين بـي
جُمارة : ما اسبح
- شنو ما اسبح ولج امشي انا اوكفلج بالباب
بالكوه قنعت وسبحت شلون ما جان كل شوية اصيح يمه أشوفها
بعدها واكفة لو لا ، بدلت و هي وكفت تمشطلي شعري
و خلت الشال يمي و مخبوصة هي بالمطبخ تحضر العصير و الكيك
حطت الطبلة بالنص و اندك الباب طبو امجد و امه بالبداية
و بيدها علاليگ هواي خلتهن يم الدرج
و امجد مخبوص يخابر طلع شوية و اجه و يا شيخ و اثنين زلم
احنه وكفنه بالمطبخ و هم يحجون ، بده السيد يقره ايات
و أحاديث و اني معركة بداخلي شي يجر بشي و عقلي و گلبي واحد يمرد بالثاني
- جُمارة يعقوب سرهيد موافقة على الزواج من
آمجد يوسف سرهيد على المهر الآتي
قولي نَعم و انتَ وكيلي
كرصتني امي و امه تهز بچتفي
تغريد : دكول اي اي نعم
- معليج انتِ هي تحجي اريد اسمع صوتها
رجع عاد الكلام من جديد بلعت ريكي و ردت أجاوب
- بابا هاي آخر مرة إسألج بيها ما تكولين نعم اعوف كلشي و أكوم اطلع معناها انتِ مجبورة
عاد الكلام مره ثالثة
جُمارة : نَعم و انتَ وكيلي
- الحمدلله
رفعت راسي على الدرج لكيت روز واكفة يم باب الغرفة تباوعلي بصدمة ما تكدر تنزل لان الزلم واكفين بالهول خلص العقد و راح الشيخ و الزلم الي ويا باوعت لامي بحيرة ضحكت بوجهي و نزلت روز تباوع بصدمة
روز : لأمجد ولج جُمارة ؟؟؟ جا و زِناد
تغريد : معليج انتِ بيها لج احسن منج اختارت سعادتها
عجيبة : ليش يخالة جا احنه منعجب
روز : اي ما تعجبون جا مو تدرون زِناد يحبها وين اكو واحد تدني نفسة على وحدة يحبها اخو
عجيبة : ولج هي ما تريد زِناد قابل احنه جبرناها و عادي جا مو جثير نسوان من تموت رجولتهن يتزوجن اخوتهم شو ما نكول شلون دنت نفسة
لزمت روز راسها بأثنين اديها
روز : راححح تخبلوني انتو تخبلوني لج جماااارة شلون قبلتي ضحكت عليج تغريد ، امداج
بلعت ريكي و عيني عليها طب امجد و امي جرتها فوك تسحل بيها و هي تدردم بصوت عالي و امي ايدها على حلگها تسكتها
شوية و نزلت امي و عجيبة فتحت علب الحلقات
عجيبة : حتى حلقته أنا جبتها هم كولي مو خوش عمة
باوعتلها و درت وجهي باوعت لامي و لأمجد
تغريد : دير بالك عليها و لو أنا مطمئنة منك و حاطة ايدي بمي ثلج جُمارة هاي وحيدتي لا تضوجها
امجد : لا تدللين انتِ و هي هم تدلل
اخذ الحلقة من ايد امه و اشرلي انطيني ايدج اريد ارفعها ما اكد
احس چتفي مشلول ابتسم و هو سحب ايدي و لبسني الحلقة
و اني عيني على ايدي ما مصدگة اخذ حلقته هو لبسها و گعد
عجيبة : عيني الفلوس يمج انتِ اخذيها تختار الذهب على ذوقها و تجهز روحها و باقي الفلوس خليهن الها مناك تشتري إحلالها
تغريد : اي اخذها اليوم و باجر
امجد : هي ما تحتاج تجي وياي لعقد المحكمة انطيني بس جنسيتها و بطاقة السكن اني عندي معارف هناك
تغريد : ها يصير يعني ؟ جا خوش بعد احسن حتى الصبح اخذها للسوك
امجد : ان شاء الله و لا تتأخرين اني ثلاث ايام و يخلص العقد و الجواز اجي اخذها منا و نسافر هذا حسب طلبكم انتن ما تردن عرس
تغريد : لا شتسوي بالعرس والمصاريف اخذوهن سافروا بيهن منو يستاهل نعزمه اني هنا أحنيها و اخذها وياك
ما باوعت لامي ساكته لان حتى اني ما الي خلگ كل هاي الهوسة
بعد ما جنت راسمة أشكال الاشياء الحلوة الي أسويها بحنتي و عرسي و خطوبتي و اجة على بالي ذاك الفستان الي راوانيا زِناد
بكل ثانية تمر عيني على الحلقة ،
رُبما سَتكون تلك الحلقة هي الطريق إلى
هي الحلقة المفقودة في الرواية التي سَتصدم الجميع
اول ما راحوا نزلت روز تعاركت وي امي ما حجت وياي ولا حرف
ضربتها امي بالنعال و كامت الها هي عافت كلشي و صعدت
تغريد : كومي بدلي خلي اخذج اجهزج ما عندي وكت
كيفت لان بس اريد اخلص من البيت اريد اطلع أتحرر منه
بدلت و طلعت وياها اختارتلي احلى تخم ذهب و ملابس كله من الراقي
و رجعنه و اليومين الوراهن يومية تأخذني العصر و الصبح تروح وحدها
تجهزني و تجي
روز : لج جُمارة صدك تحجين لج تذكرين امجد شسوه بأمير
تتذكرين شلون جنتي تكرهي و شجان يسوي بمرته
جُمارة : اريد اخلص انتِ ما جاي تعرفين اني بشنو
جاي امر
روز : ولج جُمارة الدكتورة التعبت على نفسها تتزوج امجد
و تروح تخدم يم عجيبة ولج لو زين جان مرته ما شردت
جُمارة : ما اروح لبيتهم راح أسافر و اكمل دراستي هناك
بقت صافنة تباوعلي بحيرة كمت ابجي و هي هم تبجي
اجتي امي كانت تصيح دكول ما يصلح تبجين
و نمت الليلة الي جنت خايفة من صبحها و امي جابتلي كومة علاجات
شربت منهن و خلتهن بجنطتي ، صبح يوم إلاثنين أخذتني امي للصالون احف و أرتب شعري
تغريد : صبغي
- ما أصبغة والله ما أصبغة لا تلحين
رجعت الظهر جابت النه غده من المطعم
و احنه جاي ناكل دكوا على امي راح يجون هو و امه الخوف احتلني من كل الجهات عيني بعين روز تأشرلي لا
حضرتلي امي الثوب و فرحانة اول مرة بحياتي هلكد اشوفها فرحانة
لهاي الدرجة
تغريد : حطيلج حمرة كحلة من هذا المكياج الجديد الجبته
بدلت و خلصت و كعدت على الكرويته عيني على ادية الترجف
روز : عود هسة ياخذها تسافر و ليش ما سويتي عرس
تغريد : اي تسافر و شلها بالعرس يولي خلي تستقر و تخلص من فضة و الضيم الجاي تشوفة
جُمارة : يمة ما اريد
تغريد : ههههه اي هاي دوم چنة نحجيها يوم العرس من تصير صدك عادي النوب صرنه حتى لاهلنا ما نحب نجي
و نعوف رجولتنا
ساكته و عيني بالوجوه و لعابتي بيدي
لحد ما اجه بس بدون امه سلم على امي و باوعلي
تغريد : ما اجت امك شعجب
امجد : طالع گبل أنا للمطار و كلت إذا أجيبها شيرجعها
تعرفين ولاء زعلان اخذ مرته و طلع من البيت
- اي كالتلي يالله هو الخسران الما ترضى عليه امه لو يموت
ما يرتاح
امجد : شلونها جُمارة
تغريد : ههههه خايفة دير بالك عليها
- لا لااا لاتخاف ، انطيني الغراض البقية اصعدهن
صعد الغراض و اني حاضنه روز بأثنين اديه و افرفح
روز : لج جُمارة موتيني بهاي عملتج
ديري بالج على نفسج
امي تضم الفلوس بجنطتي و تباوعلي
تغريد : هذّني فلوسكم البقن مو تنسين ديري بالج عليها
جُمارة : يمة خلي يخليها ع باجر
- غير طيارتكم راح تطير روحي يا يمة و عيشي حياتج
بقيت حاضنتها ابجي و خايفة كل جزء بيه يرجف
و وكفتني حجاية روز لمن درت وجهي كالت لامي بصوت ناصي
روز : والله لو يدري زِناد
- اششش يالله اش
صعد بالسيارة و يدك هورن اني مجلبة بأمي لحد ما هي هدتني وًاشرتلي على السيارة صعدت ويا وگلبي ممرود
مرد دموعي تارسة خدي
امجد : عليمن هذا البچي قابل ماخذج للتعذيب
مسحت دموعي بأثنين اديه و النشغة ما عافتني اباوع للطريق و ساكته
و اني أفكر شلون يأخذنا للمطار و هو جاي بسيارته لعد سيارته وين يخليها
النوب صار قوس بغداد گبالي و طلعنا منها
امجد : الفلوس البقية وين
طلعتهن من الجنطة اخذهن من ايدي و دگ عليه رقم كل شويه و يكول
اني اعلمة بسيطة بسيطة بسيطة جايبله خوش هدية بسيطة
جُمارة : عطشانة
امجد : ماكو مي هنا عود من نوصل
- هو المطار وين ؟
سكت ما جاوبني ضليت اباوع و لا مر النوم بعيني و الطريق شكد طويل و ما ادري شوكت نوصل و كل درب نمر منه اني شايفته من جان يجيبني زِناد و ياخذني لحد ما طبينة مِيسان تُرحب بكُم
من شفتك صدگ عطشان
النَهـر من جِرفة جريـتة
و من بـ لساني رِدت الماي
و انتَ الماي بيدك چان
ما قَربته ذَبيته ..
شكثر شايل صلافة وياي
گَلبك ، ينهجم بيتـة
ولك ذَليت گلب شيوخ
عگال الچان فوگ الراس من عَملتك ذَبيته
