رواية يا اجمل الوحوش الفصل الحادي والاربعون 41 بقلم رسل فهد

رواية يا اجمل الوحوش الفصل الحادي والاربعون 41 بقلم رسل فهد 

سَبب كل الوجع انتَ و أذا تمسحهن دموعي

منو يسكتهن أهاتي ؟ أحترگن بساتين الگلب

شيفيد زَرعك بَعد !!

طارن فَراشاتي

- رُسل فَهد

....

" عالية "

شهگت و ضربت على صدري

عالية : يمهههههه

نزلت امهم تركض رادت تروح وياهم بس ما اخذوها و أنا

الدنيا كلها طلعت من عيني وكعدت بالكاع و دموعي تجري

كلها تبجي و امه ملخت روحها

امي من سمعت اجتي علينه لزمتني و كل ثانية تذكرني

بالطفل هي ما تدري عشر جهال يرحون فدوة لسلامة أبوهم

ندك عليهم محد يجاوب و ينطون رفض آخر شي غلقوا التليفونات

عمي عمار اجه من المعمل يغلط على ولده لان محد موجود و عاين عمتي شلون تلطم و هي منهارة

عمار : ولجن شكو

ام سلام : ولك راح ابنك راح

طاح عمي و ركضت رحمة لزمته اجتي جدة يمنه و عجيبة

ام سلام : والله إذا صار بأبني شي ما أعديها لزناد

منو كاله يعينه احنه ناقصين مصايب

جدة انهارت و ضربتها بالعوچية

رهينة : يمن كون عمت عيونجن هاي الصلفة الما يترسها غير صم التراب حطيتن كورچن و گور زِناد لمن هجمتن حياته ولج ياهو اجه مو رجلج اجه يتوسل على تعيين للولد شيغزر بيج انتِ

ام سلام : ابني عاش مظلوم زِناد مسوي خدام يمة

و جابلة هاي الناهبة الدمرت حياته مخليته ما يشوف دربة من السحورة راح طلگ بت خالته تاج راسها

رهينة : يمن كون عمت عينج فوك ما هي معمية

لزمت جدة صدر دشداشتها ..

اريدج كون اشوفن بيج يوم مسودنة و عباتج بيد

تركضين ورا الولد تردين واحد يلفيج و ما تحصلين

عبنچ ما زارعتلج بگلب واحد خير يا ما تستحين يالزايعتج

الگاع و ما تريدج

ام سلام : مالج غرض بية و اخذي هاي الزبالة وياج

عبن من اجت لليوم ما عاينت الخير و لا شفته اجاني

رهينة : ما يجيج لان الخير ما يگرب يم الشر ، يالله عالية يمة كومي وياي و من يرد رجلج يجي ياخذج

كومتني امي و طلعت أنا وياها و جدة رحنه لبيت جدة

دموعي ما نشفت و بالي كله يم علي منو يجي يجيبلي اخبارة

نسيت سالفة الرسالة و الحساب كله هسة الأريدة بس أعاين طولة كبالي

ام شريك : عمة ام يوسف حاجي عالية تراها حبلة

لا يصير شي بيها و بالفرخ ان شاءالله زلمتها سبع و ما ينخاف عليه هسة يرد وي الويلاد

رهينة : حبلة يعالية گرت عينك يجدة ان شاء الله

تردلي سالم بجاه كلمن عنده جاه يومية محمرين أفادي ولكم شلكم عليه ما كافي عليه ضيم الچبير الجاي أعاينه

يوم يوم يخلص گبالي

ام شريك : خلي يحط عينه بعين الله چا شيسوي هو ما قصر وياها و المره مريضة جا هو الكاتلها

رهينة : لا هو يگول ما تنتحر فضة و اعرفها الخلصت عمرها تصلي و تصبرني على ما بلاني ، أعاينها بين يوم و لليلة چاتلة نفسها هذا شي ما ينحط بالعقل

ام شريك : يا ستار ان چان السالفة موش انتحار چا

هاي مصيبة جبيرة إذا غيمت علينه بعد ما تنزاح

عالية : جدة خابريهم خابريهم

اول ما طبينه البيت لگيت طلعت جدة تليفونها من جيبها حتى تدگ عليهم تلاگها العياط من البيت أنا طحت بالگاع و لزمتني امي تلطم على صدرها جدة طاحت عوچيتها من كثر ما رجفت اديها

رهينة : راح علاوي

نورس : لا اسم الله عمة الحگيلنه حياة طاحت من فوگ

الدرج و البيت انترس دمايه و ام عدنان موش هنا راحت الصبح لاخوتها

رهينة : يمة يمةةة دخيلك يا صبر زينب امشي اخذيها انتِ و رقية و ام شريك روحي وياهن

طبن شالن حياة كوة و جدة تبجي و تضرب على رجليها بوجع

و أنا كاعدة يمها أنوح على حالي و ما اريد اخلي و لا فكرة

براسي لأن أنا راسي راح ينفجر من القهر

دمعة واكفة تبجي و لارا ايدها على خدها تعاين علينه

لارا : خالتي لي هون الحزن كتير و المصايب ما عم تفارق

هذا البيت ليه ما بتروحي تسوي حجاب يشيل الهم من عند أحبابك

رهينة : أنا سامرتها على الله و احنه بينه بخت و نشور و ما يوم واحد عال بينه ما طاح حضة و اليمشي عوج ويانة تاليته ينكسر و ينكشف لو تمر مية سنة اعلة عملته

و إذا ع الحزن متعودين احنه بلا حزن منعيش

دمعة : خطية حياة ما عوّلت تحصل الها جاهل يلم كبرتها

تالي خسرته و طاح اوف والله تقهر النوب لا يطلع بيضة عگر و ما تخلف بعد

جدة تضرب على رجليها قوي و تبجي بصوت عالي

عالية : جدة تأخروا جدة يعني اكيد علاوي بي شي

تدك عليهم جدة محد يجاوب شالت التليفون و شمرته بنص الهول

رهينة : جاوبوا ولدددد القنادر حشه زِناد

ضليت الوب أطب للبيت و اطلع أفتر بالساحة عاضة اصابيعي

بس اريد النار المشتعلة بية تهيد شوية منها يمة علاوي حبيبي لا ما بيك شي أنا اعرفنك هسة تردلي سالم و اشبگك مثل مرة ترد من من الدوام ، مو كلت ديري بالج عليكم أنا سمعت كدامك جا غير انتَ هم تدير بالك اعلى روحك احنه ياهو النه وراك و هاي الدنيا غابة

طبيت لكيت جدة تخابر و تبجي و ما دكول غير يالله يالله عود تعالوا

موش كلكم هناك تضلون

عالية : بشري جدة بشري رجلي وين

رهينة : ان شاء الله زين تعاي تمددي ولج

- جددددددة علاوي شبي

- متصوب بس سبع سبع يگوم منها

حجتها و كامت تبجي كعدت بالكاع دموعي على خدي

و ابجي بصوت عالي و گلبي محترك

بطني كامت توجعني و رحت نمت بغرفة جدة ما بية النوب اخسر

حتى البطني و علاوي ينتظرة يوم يوم تمددت و دموعي على خدي تنزل حارة و أنا اتخيل الطلقة بيا مكان و شصار بيك يروحي

بساعة الهيست وجعها سودة بوجهي عليك

فزيت على امي تكعدني بغرفة جدة مسويتلي اكل

ام شريك : كومي يمة مو زين عليج و لا على ابنج

كومي رجلج يرد سالم ان شاء الله هاي و لا غيرها هذا اخيج

مو هم تصوب و گام منها ان شاء الله هم سباع و ما يمردون حلگ الموت

عالية : يمة الطلقة توجع هو وين مضروب

ام شريك : لا كومي صلي و تشكري ربج ان شاء الله بالريش منو كال يطلعون من حلگ الموت و يعيشون أنا كلت استشهد بس ما ردت اهبطج و لانج طايحة عليه وين اوديج

عالية : ما اريد يمة كلشي ما اريد ودوني لعلاوي

ام شريك : هسة هم بس يصحى يجيبونه لهاي المستشفى

كومي اكلي ترى ابنه امانة برگبتج هاي حياة المكرودة عايني حالها تنزف بقت بالمستشفى ما عوّلت تحصل الها جاهل المسكينه

رهينة : كتلها ياما و ياما كتلها نامي يمي انتِ وضعج صعب و حالتج تفرق عوفي عدنان ما يطير و بطلي الصعدة و النزلة اخ منجن ورمتن كلبي ولجن

ام شريك : خطية رجلها يكسر باب الگلب حاير يسكتها لو

يصبر بروحة بجاه كلمن عندة جاه يثبت هالطفل ببطنج يا حياة و يطلع سالم و مابي شي

كعدت عدل أعاين عليهن جدة تصلي و تسبح و دموعها على خدها

امي يمي كعدت و تسويلي لفات اخذت تليفون جدة ادك على رقمة

يرن بس ما يجاوبني ادري بيها ما يكدر يحجي بس عاد واحد من الموجودين يمه يجاوبني يطمن گلبي شويه و للفجر ادك محد جاوبني و اني القهر و الخوف ماكلني اكل

كعدوا للصلاة الجامع قريب علينه و من يأذن الصوت عالي كلها تكعد

طلعت وي جدة و امي للهول لكيتهم كلهم كاعدين عمامي

رهينة : بشروني ما اجه خبر على علاوي ما صحى

هاشم : لا صحى و بعد شوية يجيبونه بالاسعاف لهنا

رهينة : يالله حتى اروحن أعاين طوله المدد يبعد طولي طولكم يجدة يوميه جارتلي واحد من حلگ الموت ولكم خبلتوني

فاخر : و عدنان خابرني ينوح مثل الطفل مات الجاهل

و مرته اضن ضهرها بي كسر

رهينة : سووووودة بوجه العدو يمه يا يمة

تعاي لحگيلي مامش اليشيل الحمل وياي

ضليت كاعدة و النعاس مسيطر عليه بس أريدن يطر الصبح و يأخذون جدة حتى أجلب وياها و اروح اعاينة

عالية : عمي علي بيا كتر صوابة

قاسم : بيه بخت الدكتور گال امس الطلقة نيشانها الگلب

شلون ما لاحته بس الله كاتبله عمر جديد فوگ الگلب بأصبع

بقيت كاعدة ابجي وعيني على الرايح والجاي حياة جابوها بغرفة جدة

نامت و كلها تتحمد الها على السلامة و تصبّرها ، بوكت الغده طبو ولد عمامي كلهم يسولفون لجدة حال علي و يطمنوها

رهينة : يالله صبن خل يتغدون حتى تأخذوني لعلاوي

يونس : حالته زينه جدة ما يحتاج خليها من يجي

رهينة : و انتو شلكم غرض تمنعوني من شوفة حفيدي

زِناد : تغدي هسة تغدي و أنا اوديچ

- لا انتَ نام عاين حالك شلون صاير هم غصبا ما عليهم واحد منهم يأخذني شني أنا جاهل و إلا توصلوني

كعدوا ياكلون و أنا رحت للغرفة حضرت عباتي و شالي اول ما عاينت جدة اجتي تبدل بدلت وياها بساع

رهينة : وين رايحة أنا أعاينه و اجي انتِ حبلة شيوديج

عالية : والله احرك روحي إذا ما تأخذيني وياج والله

سكتت و طلعت و أنا أمشي. وراها زِناد واكف منتظرها

هاشم : شعدج رايحة وين طبي بس جدتج تروح

عالية : لا اروحن

- وين المستشفى متروسة الردهة زلم مصاويب

شعدها رايحة

رهينة : كلبها جمر على زلمتها

جلبت بعباية جدة من عاينت عمي هاشم مخنزر عليه

زِناد : ديالله فضنها عاد

طلعت وي جدة و بقى عمي هاشم يدردم صعدت بالسيارة و أنا طول الطريق اتخيل شلون راح أعاين شكلة و هو ممدد و مجروح

امشي وره جدة و كلبي يدك سريع لحد ما وصلت يمه مدري شصار بية من عاينته على السدية و الأجهزة على صدرة و جهاز التنفس على خشمة يمة خالد و سلام و امه تمسح بگصته

اجتي جدة باسته وزِناد يسألهم على وضعه فاتح عيونه وجدة تحاچي

رهينة : ها يبعد جدتك شلونك زين

وخر خالد جهاز الأوكسجين منه حتى يحاچيها أنا وراها واكفة

و اسمع صوته المنتهي من يگول الحمدلله

رهينة : هاي مرتك ما سكتت من النوح عليك جبتها الك

وخرت جدة و صار وجهة كبالي ضاع كل الحجي من أعاينهم

كلهم واكفين اريد اكله شونك و ما تطلع من حلگي بس دموعي تجري

مديت ايدي وجهة و عيني على مكان صدرة المشدود

علي : شونكم

انهضمت و شفايفي ترجف اريد ابجي و كوه لازمه دموعي

ام سلام : وخري لا تنوحين فوگ راسة ما يصلح

رهينة : هسة ما تعوفين الطفلة چـا غير تحب رجلها و خايفة عليه

دموعي تجري على خدي وهو عينه عليه مسحتهن ما أريده

يضل باله عليه

اجتي الممرضة تخليلة دوه بالمغذي طلعت الكانولة مأوته و لازم جديدة

راح خالد يجيب وحدة جديدة وهي واكفة وخرت الاولى و لازمة ايدة تسوي بالثانية بعز ذاك القهر و أنا احس گلبي شَبت بي النار من الغيرة و هو من كثر ما حافظني اول ما رفعت عيني عليه لگيته يعاينلي

زِناد : يالله جدة وراي جثير مشيات

رهينة : يالله ما عندي شي

كعدت على الكرسي و قربت راسي يم راسة

- كللهم ابقى يمك ما اريد اروح وياكم

علي : روحي حبيبتي أنا يومين و اصير زين و اجي

عالية : جثير خايفة عليك و ما اكدر بدونك

علي : ما اتأخر عليج أنا اجيج والله بس يگلولي اطلع

ديري بالج على نفسج و لا تبجين گبالي ترى تفورين روحي

مسحت دموعي بساع و كلبي محترك كمت و جدة و زِناد منتظريني

علي : عدلي عباتج

عدلتها و درت وجهي ردت امشي انداريت عليه هديت المستحى كله على صفحة و غطيت وجهة بعباتي حتى أبوسة

بسته و طلعت جدة تعاينلي مصغرة عيونها من صار زناد شوية بعيد

رهينة : ولج والله مدبرة ما ينكدرلج

عالية : أحبنه جدة رجلي شعندي غيرة

رديت لبيت جدة و مناك رحت وي امي و شريك لبيت اهلي و ضليت يمهم الوب اسبوع كامل و علي ما طلعوه إلا باليوم الثامن العصر كاعدة بالساحة مالتنه و ايدي على خدي صار رمي بفرعنة

و امه هلهلت و سكتوها من عدها و عرفت هو هنا اجه

رحت لامي اركض

أم شريك : ولج شمالج يخوثة لا يطيح

الطفل ، هذا شني الرمي

عالية : يمة علاوي رجع

ام شريك : هلا بي بس أنا ما اريدج ترحين يمه رجلج ينرادله مدارات و انتِ حيلة و رچيچة لَن طايح الطفل

و تعاي اليطيح بچرها بعد ما تصحى

عالية : انعل ابو الطفل يمة جا غير رجلي شنو

ام شريك : انعل ابو ولج جا هو منو ابو امشي ولي

انتِ ما يفيد وياج الحجي

بقيت كاعدة منتظرة شريك يجي حتى يوصلني هسة إذا اكول اطلع وحدي امي تطلع مية الف سالفة و هي ما تريدني اروح يعني ما ترضى تأخذني تخاف على حفيدها اكثر من بتها

اندك الباب وكمت بساع صحت منو اجاني

صوت خالد وكفت وره الباب

خالد : شبساع طلعتي شني خاتلة وره الباب

عالية : اي كاعدة على الصبه

- يالله حضري روحج انا هنا منتظرج رجلج يريدج

- اي اي

عفت كلشي و طلعت بطرگ العباية و الشال بوست امي و طلعت

و هي تمشي وراي تنصحني و توصيني

طلعت وي خالد و طبيت علي كاعد بنص الهول و صايرين هوسة

و كلهم كاعدين سوه و امه بصفة تحاجي يجاوبها بس بين حجاية و حجاية يبين على عيونه الوجع خزرتني اول ما عاينتني

تدنه شوية و رفع ايدة بالجهة الما متصوب بيها يأشرلي تعاي

رحتله اركض كلبي يمشي قبل صرت بينه وبين امه

علي : شونج شلون صرتي

- انتّ شلون صرت مو كتلي يومين و ارجع

ام سلام : وهو شني جان يلعب غير مريض

عاينتله مبتسمه ما اريد ابين الهضمة تحملت منها الما ينحمل

و ما أثرت بية هسة شمالني من اقل حجابه انهضم

علي : يالله صعدي أنا جاي

صعدت بساع المفتاح بيدي و امه تقنعة ينام جوه لان راح يجون خطار بس هو همزين ما قبل أعاين المفتاح ما يفتح القفل شعجب

بقيت واكفة احاول بكل طريقة ما انفتح

نزلت اريد اكله انطيني المفتاح العندك دزيت جوجة تجيبه و خفت لا يطلع رايح بساعة التصوب بس همزين جابتلي نسخة

فتحت الباب انفتح و عفت النسخة العندي على الميز

اجت عيني على تليفوني بساع تذكرت الصور و الرقم الراسلني

فتحت التليفون ما لكيت كلشي بقيت أعاين متعجبة و حسبة تجيبني و حسبة توديني دگو الباب و طب خالد لازم علي

لحد ما نَيمة على الچرباية و طلع

طبت رحمة بيدها صينية الاكل ودتها اله و اني طلعت بيدي وصله اريد انكعها متروسة الأخشاب تراب بعدني ما دايرة وجهي

و أعاين الفيلق الطَب للغرفة شمدريني شچانن يحوكن من ثوب

مصيبة الي

وإذا عَنك مشيت أنا

آثر شبگات عايفلك

....

"حور"

خالد : تردين الصدگ اي اكو احد دازني عليج

بلعت ريكي منتظرته بس يكول منو و تنتهي هاي المسرحية كلها

خالد : گلبي والله

عاينت عليه فاتحة عيوني من الصدمة لطمت على خدي

حور : عمت عينك و عين گلبك صدك ما تستحي

خالد : اي والله عيونج عمت حتى عيوني

حور : والله فلا تخجل و لا تستحي يالله منا

حجيتها و ردت أطبگ الباب مد ايدة على الباب

خالد : هسة عايني ، ارجعي لمچانج هنا ماكو شغل

و أنا وعد زلم ما تعاينين وجهي حتى بالحلم

طبكت الباب بوجهك و طبيت جوه الهث و حالتي حالة هذا يحجي صدگ لو يريد يضحك عليه و يختبرني لا مستحيل اصدك بي

عفت حتى الشغل و ما طلعت لأي مكان أوصي المره من تجي ثاني يوم تجيبلي وياها الغراض احتاجهن

و على كل دگة باب اتخيل أعاين وجه امجد واكف گبالي

شراح يسوي بية و شراح يتفنن بتعذيبي الا يخليني انتحر بعد هذا

التعب كله و إذا خالد جاي ينصبلي كمين شمنتظر لسه ما لزموني

و لا اجوي عليه

كلت ابيع كلشي و اشرد كمت ردت ابيع الطباخ

- ليش خالة مو انتِ الله رزقج و فتحها بوجهج ليش هيج تسوين بروحج

حور : خاله خصم الحجي أنا شاردة من رجلي

و هسة ابن عمه يخوني وراي و إذا كضوني يذبحني

رجلي بحجة غسل عار

- يااااع ولج اكو وحدة تشرد من رجلها

حور : خالة والله موتني والله ما شردت إذا ما عاينت هذا آخر حل وصلت بي يريد يبيع كليتي حتى يتزوج وحدة غيري

- يا يمة سترك ربي و جهال ما عندج منه

حور : لا خالة هو اصلاًً مريض يعني مو رجال بس والله ما همني هذا الشي و عشت ويا أنا أصبره و اكله تتعالج اني وياك بس ما يفيد ويا هو عقلة قافل يصير احسن من آخو

و يكسر اخو الشيخ

- يا دهر كون جا هذا عود آخيه

حور : و هسة خاله ابن عمة چنه حاط عينه عليه هو لچح بس عيوني لو كلامه صدك لو جاي يضحك عليه حتى يلزموني

- لو شاكين بيج يخالة ما يخلوج لهسة چا شالوج من زمان

بس ما ادري والله امرج عجيب و عجبتيني

حور : خاله نصحيني شسوي اشرد من الديرة كلها

أنا كلت اصفي كلشي و اشرد بس خاف الدنيا ما تطيحني بوحدة بت حلال مثلج

- تأني يخاله و لا تشردين الدنيا غابة و متروسة ذياب

النوب تگومين تحمدين ربج على ايام رجلج ضلي هنا

هو ما دام بس واحد يعني ما اضن مراقبيج

هم عاينتي غيره ؟

حور : لا هو بس واحد مره اشتره مني كل الخبز و وراها

اجاني للبيت اشتره مني و النوب كام يلحگني و حتى هنا اجاني يكلي ردي اشتغلي و وعد زلم ما تعاينين وجهي بعد

- هذا يخالة حاط عينه عليج لان دامج دكولين آخو رجلج شيخ يعني صوب البساتين و ذولة وادم دمهم حار ما اضن يعرفوج تباتين بيت وحدج و يسكتون و حتى لو يراقبوج

ما يضلون كل هذا الوكت يراقبونج

حور : والله ما ادري هسة هو من يوم الاجة لليوم

بعد ما دك الباب و لا أنا طلعت

- ردي هناك ردي وياي إذا ما لچحتي يخاله يعني يعرفج

و إذا رد يشتري منج يعني لو لمحتي معناها الزلمة عينه عليج و ما يعرف شتعوديلة لان الزلم إذا هامر بمرة ما تكدر تلزم روحها

حور : ششاف مني خاله ما دكليلي

و أنا حتى صوتي مغطيته

- لو ما بيج شي ينشاف چـا ما چلب بيج ذاك زلمتج

- لا دكولين زلمتج لا دكولين خليني ناسية

درت وجهي و اتذكر من چان يعلگني بالبنكة يوم كامل و أنا راسي على الگاع و يروح و يرد يدوس على شعري بحذائة و من يفلني

اضل يومين معدتي مگلوبه ما يطب بيها اكل

مسحت طرف عيني لان هيست دمعتي تريد تنزل

و بقيت بعد يومين بالبيت لمن حسيت الدنيا ضاكت بيه توكلت على الله

و كمت قفلت الباب و رحت لـ صاحب البيت القديم تلثمت و مشيت

ما قبل إلا ادفع ايجار شهرين حتى يضمن فلوسه

دفعتله مال شهر و كتله يومين ثلاثة اجيبلك الشهر الثاني

الله هداه عليه

اخذت غراضي و حولت للبيت القديم بس أنا حاطة دمي بشيشة

افتريت على الجارات كلت الهن رديت للشغل ما كسرن بخاطري بيومها كلها اجتي اشترت مني خبز و بفلوسهن رحت تسوكت للكبة

خمس ايام اشتغل و ردت الوادم نفسها الجانت تجيني من بعيد

حتى الحجيه الكالت أنا مدري وين سامعة صوتج اجت اخذت كبه و خبز و و رادت بعد جيسين أنا جنت اشنگ كلت الها انتظريني بين ما اخبز و اخذيهن

- اي والله يخاله بتي اجتي يمي اسم الله على وجهج

طاحت من الدرج و ما تكدر تحرك ظهرها و طرحت وليدها

الصارلها اكثر من عشر سنين تتنطرة

حور : يا عيني الله يكرمها بالسلامه ان شاء الله

اهم شي هي

- اي والله بس لا تهيد و لا تسكت تنوح تفطر الصخر جابها رجلها يمي يكول يوجعني بجيها من تبجي

حور : الله يعوضهم ان شاءالله

- اي والله هو الولد خوش ولد و هم شيوخ ما تطلع منهم العيبة اخو الأصغر منه خلفت مرته و صار عنده وليد و شكد رادوا يزوجوه بس ما رضى كال أنا هي بتي و هي جهالي

و هي تحجي عاينتله بطرف عيني مدري ليش اجت ببالي حياة و عدنان

بيت جدة رهينة چنة فاخر و ضليت احوس

شلون اسألها بلاية ما تشك بية

- استعجليلي يخالة عفتها وحدها و هاي مسودنه

حور : هسة خالة خلصت ماضلن بس هذن أنا سامعة

نفس قصة بتج بذاك الصوب بيت ال سرهيد

- ياااااع يخاله هي بتي اخذها ابن فاخر الجبير اسمه عدنان

شلون وادم يمحون الجرح مو بس يطيبونه

حور : يا صدك الله يسعدها ان شاء الله

احجي وياها و ابلع بريكي همزين لابسة لثام و ما يبين الخوف على وجهي و الحجية بس تريد الها واحد تسولف ويا

حور : هاي آخر گرصة

- ان شاء الله ايدج المست نار التنور ما تمس نار جهنم

- الله يسلمج حجية

- والله يخالة عدهم شيخ لابد سامعة بقصته مره رادوا يحركون وجهة المايخافون الله بس احتركت اديه

حور : اي صحيح سامعة بي

- هذا يخالة زلمة وموش كل زلمة من تنگال عليه يطبقها احنه وادم فقرة اليقدم النه معروف لو للموت ما ننساه و نضل نذكر خيره كدام الوادم كلها

حور : صحيح خوش رجال

- تاج اعلى الزلم يخالة مره اجانه جاب لينه مسواگ و طب گعد ويانه يا طبة الخير ذيج الطَبها اخذ ابني شغله ويا

و كل اسبوع يدز ابني محمل علاليگ الدنيا حتى الاكل الما ضايگينه بعمرنه گمنه نطبخة

- الله يوفقة

- و من عاين ابونه مريض تكفل بدواه و طبيبه

و احنه لليوم ما ندري سعر كشفيته شكثر الله يحفظة لشبابة كون و يسهل دربة بجاه هاي المغربية

حور : امين

حجيتها و أنا اشد الها علاكة الخبز انطتني الفلوس وراحت و بقيت

صافنة أعاين الدنيا شكثر صغيرة و أعاين لحظي الگام يجيب عليه الوادم العرف بالسره

ضل حجيّ المره براسي و كل ما يمر يوم ما يجي بس ابن عمار

اخاف النوب بالزايد يا ربي دخيلك أنا تايهة و ما الي غيرك يدليني طريقي اوگف وياي و أبعدهم عني ،

طلعت الصبح اتسوك على برودة الجو كملت مسواگ و أهيس واحد يمشي وراي من الخوف ما درت وجهي لحد ما وصلت البيت

التفتت بساع لگيته خالد ، ابتسم بوجهي

خالد : ماريد شي عمي اريد خبز

تطمنت شويه و خفت جثير

حور : عندي بس بايت بعدني ما عاجنه

خالد : الساعة بيش اجيج يعني

حور : ساعة و نص ساعتين

خالد : يالله خوش و ترى عدنا معمل مال طحين إذا تحتاجين

نجيبلج احنه بخدمة الطيبين

حور : مشكور

حجيتها و طبيت و أنا فكرة تجيبني و فكرة توديني منين طلعلي ابن عمار هذا يا ربي

خبزت و عبرت الساعتين و ما اجه بعت الخبز و بقن قليلات طبيت اريد اغسل اندك الباب رحت فتحته و أنا البس باللثام

حور : تفضل

خالد : أنا أنا خبزتي خلصتي

- اي خلصت ما بقى شي منا لليل يخلصن

- جيبيهن كلهن

حطيتهن خمس چياس بالعلاگة و كتله خمسة مد ايدة انطاني

حور : موش گلت وعد زلم بعد ما تشوفيني

خالد : مو جانت عدنا فاتحة و هسة زينت راح الوعد وي الشوارب

هزيت ايدي عليه شكد يحشش

حور : ياريت تچفيني شرك هاي المره من صدك

أنا مره على باب الله

خالد : وداعتج غير الخير مني ما تشوفين

بس ردت أسألج ريحيني انتِ شني متزوجة

حور : آرملة أنا و برگبتي سبع جهال اصرف عليهم

ما تعاين اشتغل من الصبح لليل

خالد : اتكفلهم كلهم أنا ، هااا الله يحفظهم الج

حجاها و راح و كل يومين ثلاثة يجي ياخذ خبز و يروح و يشمرله حچاية

لحد ما صدگت هو ما يعرف أنا منو لان مستحيل يبقون ساكتين هلگد و ولد عمار مو صلح وي امجد دوم و بعد السر بيد الله

بيوم مثل كل يوم يجي بالأسبوع موعلى بالشهر مرتين يبقى الخبز نايم على گلبي و ما يمشي منه غير جيسين ثلاثة و أنا حالفة ما اروح. صوب ال سرهيد بدلت و تلثمت و طلعت ادكدك بالبيبان ابيع الخبز لما طاحت رجليه يالله بعته بقى بس جيس مشيت صوب النهر نگعت خبزتين للسمج و الباقية ثلمته و خليته يم الزرع حتى الصبح تأكله الحمامات

بطريقي للبيت اديه فارغة من الخبز و الفرحة تارسه گلبي

و جيبي متروس آلاف ، توني اريد أطب للبيت و انجريت من ايدي

طحت بالكاع و ايد صارت على حلگي أعاين ولد ثلاثة مراهقين واحد

لازم رجلي و الثاني ايدة على حلگي و الثالث يفتش بجيوبي طلع آلاف كلهن أخذهن و شرد و ذولة الاثنين هدوني و ركضوا ورا

بقيت كاعدة بالكاع محتارة بزماني و تعبي الانباگ كله مال يوم كامل

طبيت للبيت و الدمعة على خدي من القهر ثاني يوم حتى ما خبزت

و المره تصبر عليه و تغلط عليهم

بعد ما طلعت بعت ابيع بس البيت و إذا يبقى بايت ابيعة بنص السعر و إذا يابس أبيعه لابو الطليان و الحلال احصل على الكونيه ألفين

احسن من الماكو اندك الباب عليه صحت منو سمعت صوته

اصوات ال سرهيد كلها تتشابه نفس الموجة إلا العندي

رفعت اللثام و فتحت الباب

خالد : يابة السلام عليكم مشتهين خبزكم

حور : و عليكم السلام اي موجود شكد تريد

- الموجود كله شعجب شو صايرين ما تجون صوبنا

تعمدت احجي هيج حتى أفل اخر عكدة من الخيط

حور : ما تتأمن الدنيا والله طلعت ذاك اليوم و بالجية باگوني جهال صغار تگابلوا عليه و العوض على الله

خالد : صدك والله ، لا چا تولي الفلوس

شنو رايج اجي يومية بالليل اخذ الخبز الباقي ابيعة

للدكاكين اليمنه و اخليها كلها تسحب منج

حور : لا مشكور ما تقصر

- هاي هي أنا يومية اجي اخذ كل الباقي و ابيعة لأهل

الأسواق

حور : مشكور

خالد : ردت اسألج إذا عندج جهال ليش وحدجً عايشة

- احسن

طبيت و متعجبة بي صار يومية بالليل يجي ياخذ كل الإحساس وًينطيني حسابهن مقدماً تأكدت لآخر حد هو ما يدري أنا منو

دك الباب عليه بيوم جنت مخلصة كل الخبز و منظفة الساحة الصغيرةً

حور : اليوم مخلصة والله الف الحمدلله

خالد : هذا الحجي التوب عمي أنا ما أريد ابقى ادور ،وياج

اهلج وين واحد جبير عندج نكعد نحجي ويا

حور : لا شتريد منهم

- والله اريدج على سنة الله و رسولة

أنا شارد من محطة البيها موتي

و انتَ جاي تردني الها ؟

العَين تكره كل بشَر بچاها و مخرب كحلها

.....

"جُمارة "

جُمارة : هذا الوهمي ؟ ليش ما يشبه اخوانه

روز : لان هو محد يشبهة

- و شلون تطببي للبيت

روز : راح يسافر جُمارة عوفيني بحالي

بقيت واكفة اباوعلها عافتني و طبت للغرفة تبجي نامت بالكاع

عفتها و كعدت على چربايتي ردت أنام بس الم راسي

ما خلاني ، فتحت الباب الصبح امي و تباوعلي شوية و نزلت

نزلت وراها لكيتها تسوي جاي كعدت

هي بالمطبخ و اني بالهول منتظرتها اباوع للدرج فاتحة عيني

كل قوتها حضنت المخدة بأثنين اديه

جُمارة : يمههه يمهه

تغريد : ها شكو شكو

اشرت الها على الدرج دارت وجهة بسرعة مخترعة

جُمارة : هاي فضة

لطمت على خدها و لزمت راسي تقره ايات

تغريد : بسم الله بسم الله الرحمن الرحيم

نزلت روز تركض و اني اباوع للدرج مرة ثانية ما لگيت فضة

امي تقرا فوك راسي و اني دموعي تجري خايفة

روز : شبيج جُمارة شكو

جُمارة : شفتها والله شفتها فضة بهاي عيوني تريد

تصعد الدرج

روز نزلت من الدرج خايفة وكفت يمنه و تباوع للدرج

كامت تبجي و امي احتارت تسكتنه

تغريد : كااااااافي سكتن يالله شنو زعاطيط جُمارة عاينتها

انتِ شمالج هم تتباچين ، اريدها بحظ ال سرهيد و بختهم

عبن هجموا بيتي و خربوا حياتي

عيني ما وخرتها من الدرج و كل شوية اباوع و ارجع أغطي راسي

تمددت على الكرويته و دموعي تجري حتى روز ما صعدت بقت يمي

بالهول ما خليت لگمة بحلگي اباوع لامي بلكي ينكسر خاطرها

عليه و تأخذني للطبيب بس ماكو

تغريد : إلا اخذجن و أسافر بسيطة

روز : هو احنه بالعراق و ما كعد حضنه يكعد من نسافر

- اييييييي كلشي ما يوصلون آله إل سرهيد يكعد بي حضنة سنين يابو سنين عايشين زعلانين منهم و روسنه باردة

ساعة الكشرة النويت اصالحههم بيها

روز : هم ترى جانوا يراقبونة و ما ندري بيهم يعني مو جديدة عليهم السالفة و ما سوولنه شي أمير مات

قضاء و قدر يعني لو مو امير اكيد واحد ثاني منهم و هم

بالحالتين خسرانين بالعكس شكد چانوا يحبون امير و يحبهم و يتحسر على العيشة وياهم من كد ما يداروه

ضربتها امي قوي بالمخدة

تغريد : هذا عقلج مغسول من حمودي ابن عمار مو

ولج انتِ الما شالتج الغيرة و تتعمشگين وي اخو چتال ابني

روز : و هذا شعليه أصلا مهدور دمة و ما يجي يمهم

غير بالسنة حسنة

تغريد : ان شاء الله طلقة تايهة لا ليش طلقة كون انفجار

و يمحيلي أثرهم كلهم من الجبير للصغير

روز : اسم الله و ليش هيج تدعين و خابصتنه ليش عشگتن منهم على أساس انتِ ما عشكتي منهم و صارلج سنين

ما نسيتي شنو عليج حلال و علينه حرا

تغريد : شو زايدج زود انتِ ولج

كامت امي تريد تضربها و روز انهارت دفعتها و هي تبجي

صعدت فوك و قفلت باب الغرفة كسرتة امي و ما فتحته حتى انفضحنه

من اصواتهن

نزلت امي تمشي و تحجي بعصبية

تغريد : والله إلا أزوجها هاي المستهترة والله أنا من زمان مزوجتها لو ما طلعت عاشكتلي هذا المسربت الما مذكور

لا يم اهل و لا بديرة

جُمارة : يمة راسي سويلي چارة

تغريد : و انتِ شسويلج الثانية بزعتني و كرهتني حتى حياتي امدا حياتي الكضت وي هاي الخلق والله حرامات

جُمارة : لا تخافين ترى اني ما اريد زِناد بعد

ارأفي بحالي يمة انتِ مو امي

تغريد : ليش ما تتزوجين و تسافرين وتعيشين حياتج انتِ ششفتي من عمرج و كملي دراستج هناك أني ما اكدر

ازوجج هنا لان زِناد عينه عليج و عنده استعداد كلشي يسوي حتى ياخذج

جُمارة : ما يأخذني يمة هو ما يآخذني غصب

و اني بعد ما اريدة و لا اريد اي احد يتقربلي اني تعبانة

غطتني بالجادر و راحت للمطبخ جابت النه الريوك اكلت بس شوية و رجعت نمت صرت اتخيل وجه فضة بكل مكان بالبيت و حتى بأحلامي ما احلم حلم هي ما موجودة بي فكرة وجودها تلاحقني شكلت بية رعب

بحيث صرت من اسبح إلا الباب مفتوح و مخلية يمي ضوه إذا تطفى الكهرباء و كون لو امي لو روز وأكفاتلي يم الباب

اطلع و كلشي ما اسوي لحد ما روز تجي تفضرلي شعري

طول وصار ينضفر شوية و كل يوم بنص الليل اكعد و اصيح

من وره حلم بي فضة

كعدت بنص الليل امي نايمة و اني عطشانة كمت للمطبخ

فتحت البوري شربت و ترست الكلاص حتى اخلي يم راسي

إذا كعدت عطشانة ما اكوم للمطبخ

اول ما طبيت للصالة صارت كبالي فضة كاعدة على القنفة

صرخت و طاح الكلاص من ايدي و امي و روز نزلت مخترعة

يهدن بية

تغريد : ولج تخبلتي خبلوچ و ارتاحوا

روز : اخذيها سويلها جارة بنتج راح تموت

أخذتني غسلت وجهي و بقن كاعدات يمي يحجن و اني ساكته

لحد ما رجعن نامن و اني ضليت كاعدة ما مر عليه نوم

ثاني يوم امي من الصبح راحت ما أخذتني وياها و رجعت الظهر

جابت النه مسواگ و كعدت

تغريد : روززز امشي سوي غده على السريع

روز : وين جنتي اليوم

- رحت لعلوية سولفت الها على جُمارة تكول إذا ما تكون حياة جديدة و تستقر ما تطلع من هذا الكابوس

روز : شنو عود تتزوج ؟ هي بيا حال

- بيا حال شبيها شرايحلها هسة ترجع احسن من قبل

بقيت ساكته ومن سمعت بخبر علي متصوب كالت هاي حوبتنه

روز : حوبتيش هم شمسويلنا

تغريد : ولج وعلي إذا اجيج يمكسورة الرگبة

شوية و كامت روز صعدت فوگ و اني عيني على الباب

امي جانت بالحمام طلعت و اختفت صار صياحهن عالي

روز كتلتها امي و شمرت تليفون من فوك صار مية وصلة

لزمت راسي بأثنين ادية اريد اشرد ما جاي أتحمل كلشي يصير

اني تعبانة اني من صدك تعبانة اريد احد يجي يسحبني

من كل هذا الضلام وياخذني يم الضوه

تغريد : منين منين ولج هاي التليفونات منين ويامن تحجين بس لا نفسة محمد جا شكد ما عنده أحساس و كرامه إذا باقي وياج مو عفن بالسجن يالله طلع

روز : يحبني و يتحمل كلشي لخاطري و اتزوجة إلا اتزوجة

تغريد : اذبحج والله و اشمر جثتج بالبلوعة و امحي اثرج

و ما انطيج لبيت عمار ولج انتِ تحجين صدك

روز : و انتِ ما مسؤولة عني امي جبيرة و اعرف اقرر عن حياتي ذيج بنتج روحي احتاري بيها و سويلها جارة و جفيني شرج لان اني غير محمدددددد ما اخذ

صارت اصواتهن اعلى و حتى الجهال الي تلعب بره

سكتوا اكيد كلها واكفة تتصنت علينه ضغطت على راسي اقوى

و صيحت عليهن بصوت عالي اثنينهن خنسن و امي اجتي يمي تركض

تهدأني

جدة اجتي بالليل طبت وحدها محد وياها اني متمددة بالهول

باستني و كعدت يمي

- شلونج يبعد جدتج ولج روحي راحت من يوم المشيتي عني لليوم مشتاقتلج تعاي يمي اشمج

روز ما نزلت زعلانه من امي و يمكن نايمة

و امي عينها على التلفزيون تگلب بي

رهينة : خطية حياة راح الجاهل خسرته طاحت من فوك ليجوه

تغريد : خطية هسة يتزوج ما يضل

رهينة : لا يحبها لو يريد يتزوج جا من زمان شكثر إيسوها الأطباء و ما تزوج عليها ان شاءالله تصير زينه و هم تحبل

تغريد : ما يتأمنون

رهينة : يالله كومي يجمارة اخذج وياي يجدة والله جثير مشتاقتلج هناك وحدي محد يمي

- لا جدة ما اروح اريد ابقى هنا

قربت راسها يمي جدة

رهينة : امشي وياي زِناد يريد يعاينج ليش هيج حارمته من شوفتج چا فوگ ضيمة انتِ تچملي

جُمارة : خل ينساني

رهينة : لو يگدر جا نساج من زمان ، حتى بيتج خلص

باوعتلها بعصبية

جُمارة : ما اريدة و لا اريد كلشي منه عوفوني بحالي

- عمت عينج و عين حالج ولج و انتِ تدرين راحتج يمنه

بقت شوية و كامت انطتني فلوس كتلها ما اريد

رهينة : ولج هاي جديدة من شوكت تردين جدتج

جُمارة : منا و جاي ، جدة

دارت وجهة زعلانة مني و طلعت تدري بية ما أرضى على زعلها بس هاي المرة قَسيت گلبي كلش و من راحت بقيت اكل بروحي شلون خليتها تطلع زعلانة

كعدت على الكرويته امي بيدها الريمونت

تغريد : زين سويتي ما اخذتي منها

جُمارة : لان انتِ عندج فلوس تكفي و توفي شفتهن

مره بالكاونتر

اندارت عليه عاقدة حواجبها

تغريد : شوكت شفتيهن

- من زمان

- اي ذني جابهن امجد هدية الج بس أني ما كتلج

يريد يسافر و يأسس حياته بره العراق و كال إذا وافقت اخذها وياي تكمل جامعة هناك و اني و امه نكعد هنا نروح و نجي عليكم لان روز تتزوج اول و تالي و ولاء يريد يطلع

راح يقسموه البيت

باوعتلها بطرف عيني بقت ساكته

تغريد : اني ما اجبرج بس تدرين بية من ما أرضى على شغلة شنو نتيجتها و اني شبقالي من الدنيا غيرج انتٍ و روز يعني تردين اشوفج خدامة بنص ذولاك الوحوش

لو اشوفج دكتورة و عايشة حياتج شلون ما تردين

و حتى مو بالعراق

هزيت ايدي و بقيت ساكته ما ادري امي شبيها عفتها و اخذت هدومي طبيت للحمام و فتحت الباب شويه لان روز زعلانة ما راح توكفلي يم الباب حطيت الشامبو على راسي و اتخيل اول ما افتح عيني فضة

واكفة گبالي كمت أعيط اجتي امي غسلتلي و بدلتلي

نمت بساع و فزيت صارت عيني على المطبخ اباوع فضة

نزلت من الدرج طبت للمطبخ بس ما تباوعلي بوجه القديم و نظراتها الي، لا تباوعلي بخزره و كره و نظرات مخيفة

كمت من فراشي و مشيت للمطبخ على كيف لان رجليه من الخوف ترجف لكيت المطبخ فارغ اخذت بطل مي من الثلاجة

و درت وجهي لكيتها واكفة يم السنك خازرتني و بدون كرسي متحرك واكفة

جُمارة : لا تباوعيلي هيج فضة والله مو اني السبب والله ما جنت احبة و لا اريدة هو خلاني أتعلق بي عاملني مثل الأبو

من يدلل بنتة فجأة لكيت روحي احبه اني شكد حجيت وياج ردت بس تبينين الي انتٍ تردي والله اعوفة و ما اقبل

بي والله اني ما ابني سعادة علىً تعاسة غيري

فضة عفته والله عفته لا تباوعيلي هيج

كل ما احجي تخزرني اكثر جريت السچينه من الكاونتر بعصبية

جُمارة : فضة عوفينييييي فضة راح اتخبل

و الله اكتل روحي والله

اجتي امي تركض اخذت السجينه من ايدي و تهدي بية طلعتني من المطبخ و روز رغم حالتها حاله و ما ترضى تاكل نزلت تبجي و تهدأني

تغريد : بسم الله الرحمن الرحيم دخيلك يا ربي

و كل يوم نفس المشاهد تنعاد امي و روز محتارات بيه

أخذتني امي لعلويه تقره على راسي و بأول ما رجعت لبيت

نفس الحالة و بقت امي حايرة بيه

اتخيل فضة بكل مكان و زمان و ما ابقى بمكان وحدي لو اموت

و لازم يومية الفجر اكعد أعيط من اشوفها تنزل من الدرج

و كلمات وصيتها ترن بأذني بصوتها

اجتي عجيبة لأمي و هي تحاول تتشاقة وياي وتضحكني

عجيبة : يالله وافقي حتى تسافرون

البيت قسموه و كلمن اخذ حصته بعد بس ينباع

و زِناد هم راد يبوكً فلوس اخوته

تغريد : جا هو حرامي من قامت الساعة

عجيبة : اي والله و امجد طلگ حور رسمي غير طلعت متزوجة حتى بدون عده و لا طلاگ رسمي ولج ذني حتى الله ما يخافن منه الله ما وكف بعينج

تغريد : كش و غدي الله خلصه منها

عجيبة : اي والله لان صامله خوش ضمه بنتج الدكتورة

شايفة هناك بالسويد الدراسة و الاحترام و الأجواء

تعيشين ملكة الملوك

تغريد : اني اشوفً وضعي إذا ما تأقلمت هنا

اروح يمها أسافر

عجيبة : اي عادي بعد احسن حتى من تخلف تبقى تداوم

و تضل عينج على جهالها

تغريد : اي طبعا

يومية انتظر امي تفتح موضوع زواجي واحد غير امجد

جان وافقت بسرعة وًخلصت من كلشي بس ماكو

من جهة راسي من جهة دوامي من جهة فضة و من جهة كلام العلوية

امي و حياتنا و حال روز و تأنيب الضمير و كلشي بالدنيا

يكول شردي و اطلعي من هذا البيت

صعدت الدرج اريد اروح اشوف روز تنزل تسولف وياي مشتاقتلها

باوعت لفضة طلعت من باب غرفة امير و اجتي تريد تنزل من الخوف طحت من الدرج و انلوت رجلي امي كامت تلطم على وجهه

تغريد : شجاااااج ولج شجاااااج

لزمت دشداشتها احجي بهستريا و خوف

جُمارة : اني قابلة بأمجد قابلة

هيج بساع تنساني ؟

و تبدلني بشخص ثاني ؟

ولك انا الصُبر عمرين خاطر ترضى بي انتَ

الما باقي سَلف ما عرف سالفته

الوَحش جُمارتة تعوفة ؟

هذا الما حسبت حساب يمر ع العين و تشوفة

الثاني والاربعون من هنا

تعديل المقال