رواية يا اجمل الوحوش الفصل الاربعون 40 بقلم رسل فهد
شَيب راس كلمن سمع سالفتي
البَلابل عافت التغريد
كامت تصرخ بـ وَنه
مايدرون انا مسولف السَهلات
الحچي الما ينحچي ما كشفت عَنه
- رُسل فَهد
....
"روز "
محمد : لك انتَ مو على ذمتي شلون تحجي هيج
ردت أضربه انفتح باب الكوستر مَيلت راسي حتى أشوف منو الصَعد
بخوف لگيت عالية فاتحة حلگها و تباوع علينه نزلت ايدي بأحراج
نكث الغترة الي على چتفة و گَح
محمد : خلصتوا بعدكم
عالية : لا بعدهم
تحجي ويا و تباوعلي بصدمة عافني و نزل و اجتي عليه تركض
ضربتني على ايدي دفعتها
عالية : ولج منين تعرفي و ما تكولين
روز : أعرفة من زمان و أحبة و راح نتزوج
حطت ايدها على حلگها صافنه و مدري شتتذكر
عالية : عزززززززه يعني انتِ حبيبته و ما يگول لامه
لان تكره اختج تغريد ، يبووو شراح يصير بيج بس لا تخافين أنا يمج
روز : خلفلة عليج خاف أني عايزة قهر
كعدت بصفي ساكته و كل شوية تتذكر شي و تضربني على رجلي
عالية : غرفتج بصف غرفتي هي غرفة رجلي وي خطيبته
بس لان احبج راح اخلي ينطيها الكم
- دنجبي شنو عايزة عليكم اني
- شبيج مو من هسة ادور سوالف أعيرج بيهن
غميتها و بدوا يصعدون و أنقهرت أكثر من محمد صعد وي زِناد و ما أجة ويانه عالية راحت يم رجلها و بقيت وحدي كاعدة عيني على الشباج
مادري لشوكت تبقى هيج يا وهمي تجي يوم و تغيب اشهر
وصلنه للبيت و اني ما ادري أحير بروحي لو أحير بحال جُمارة
الي صايرة مثل المخبلة ما تنعرف تصرفاتها طول الوكت صافنة و تبجي
و تاكل بروحها اكل من يوم موت فضة لليوم هي محملة نفسها المسؤولية
فوك ما هي حساسة
چان الكل يلومها بس لان اني اعرفها جُمارة شنو اكول الله يساعدها
لان چانت صغيرة تندل بيت النمل من تشوفهن يشيلن اكل و يمشن مسافة تجيب الاكل يم بيتهن و عدها خل تبقى تحرسهن لحد ما يخلصن حتى ما يجي امير يخرب بيتهن
مو هسة تشوف نفسها سبب بموت و خراب علاقة شخص
اخذت من خالة رهينة لصقة جرح و خليتها على كصتها و ماكو مثل
جدتها تلوب فوگ راسها و خايفة عليها
نامت و بقيت الوب و اكل بروحي اني شلون آمن يعالية و كلت الها
منو يكول ما راح دكول و تفضحني غير تغريد تعزم الكاظمية كلها
على جثتي كلها نامت الظهر و اني كاعدة افتر بلكي الكالي وحدة كاعدة اسولف وياها الهي روحي من هذا التفكير الذبحني
لحد ما نزلت حياة شفت دمعة تمشي وراها من فوك بس من شافتني اباوع الهن رجعت صعدت ما نزلت بعد ، اموت منها هاي دمعة
حياة : يا هلا شنو ماتعبانه من الطريق
روز : لا والله نعسانة بس بالي يم جُمارة خطية
حياة : ان شاء الله ترجع تصير زينة احسن من قبل
والله هاي الما جانت على البال فضة و وصيتها ولج شلون
هي بنفسها جانت تگلي شكد تتمنى تعاين زِناد متزوج و عندة جهال تشيل اسمه
روز : يجوز جانت تكابر محد ترضى تشوف رجلها متزوج
حياة : والله حيرة ، ولج شو هي گبل لا يعقد عليها تدري يحبمن و بعدين هو ياهو المايدري زِناد يحب جُمارة
و بلسانها والله بلسانها گبل لا يموت ابن اختج ايام عرس يونس حماي دكول لجدة
ما ترحين تزوجي شمنتظرة شو زف الديرة كلها وهو لسة
و جدة دكللها من يجي يگلي گومي أكومن شسويلة إذا هو ساكت
روز : جانت جُمارة تدرس سادس يجوز رادها تكمل
حياة : اي و بعد ما ندري الله يرحم فضة ماتت و مات السر وياها
بقيت صافنة حسبة تجيبني و حسبة توديني جبنه العمر كلها بس قهر و حسرة ما ندري شوكت نكول اجتي أيامنه الحلوة
عدنان : حياة هنا جيبي الاكل
مدت راسها للهول و كالتله صار و هي تصب الاكل بالصينية
و اني اتخيل يجي يوم أصب لمحمد الاكل مثلهن
ودت الصينية اله و اني مشيت وراها حتى أطب للغرفة
عدنان : ما سمعتي بعد شصار على سالفة محمد ابن عمي
حياة : والله گبل شوي چان زِناد هنا و گال راح أسفرة اليوم
- خل يروح لا ينچتل بعد حيل للفواتح ما بينه
- اي والله لا اسم الله عليه
بقيت حاطة ايدي على گلبي و واكفة يم باب الغرفة و دموعي تجري
احس برووحي تحترگ حرگ يمة جا تالي هاي مجازاتي و مجازاة
صبري ينكتل و يروح من ايدي اسم الله عليه ، خلي يسافر
اكول خلي يسافر و دموعي على خدي تجري وره هاي السفرة
شكد راح تروح و تخليني ابقى انتظر شكد راح يبقى القهر و الاشتياق
ياكل بيه من وراك و اني مثل بلاع الموس لا بية أعوفك و لا بية اكللهم منو انتَ و شتصير مني
طبيت للغرفة كلهن نايمات غطيت راسي و ابجي بصوت ناصي لا تسمعني وحدة ابجي بهضمة شكد انهضمت بحياتي بس هاي
اول مرة احس روحي من كل الجهات خسرانة
كعدت على صوت تغريد و هي دكول يالله راح نروح
غسلت وجهي و بدلت وصلت للشال البسه و اسمع تغريد تصيح اسم جُمارة بعصبية طلعت بساع لا يسون النه مصيبة و يتعاركن
طلعت للساحة و تغريد عتت جُمارة من. ايدها و طلعتها من المضيف
جُمارة عيونها غرگانه دمع بس ما تخلي دموعها تنزل كل ثانية و ماسحة عيونها
بدلت و بقى الشال بيدها لحد ما كالت تغريد يالله طلعنه و خالة رهينة حاولت بكل طريقة تقنع تغريد تبقى لو تخلي جُمارة بس ما قبلت و حتى جُمارة ما رضت طلعنه من الباب و اني اباوع للبيوت عيني على بيت
عمار بلكي الله و ألچحة واكف بالباب هو و اخوته بس ماكو ولا واحد
جان زِناد واكف يسوي تاير سيارته رافع الردانات و نازع العباية و الغترة و احنه واكفات بالباب تغريد مدري شتنتظر
نكث دشداشته و باوع علينه ، آشر بأيدة على السيارة
زِناد : صعدوا يالله
فتح باب السايق و صارت عينه على الضوه مال سيارة كبال بيت عجيبة و تحركت السيارة اجت علينه وكفت بالباب و آمجد يسوق دگ هورن و اشر لتغريد يالله فتحت باب الصدر تغريد و صعدت يمة
صعدت جُمارة و اني يمها ليوره طبگت الباب و تحركت السيارة
و زِناد على نفس الوگفة ايدة على جامة باب السايق و يباوع علينه مصغر عيونه
اني مو جُمارة و النظرة قهرتني ، راسها على الجامة و تباوع للطريق
و حلگها ما يسكت من سورة الفاتحة كل ما تصفن تبقى تقره بيها
يمكن تحسها الطريقة الي تثبت لفضة بيها هي معليها بكلشي صار
وصلنة للبيت و كلها ساكته حتى تغريد و امجد محد حِجه شي
لحد ما وصلنه اني و جُمارة صعدنه بس تغريد بقت يم امجد بالهول
جُمارة رجعت نامت و اني بالي كله يمه طلعت التليفون اخابرة لكيته طافي شحن قفلت الباب و حطيته على الشحن
و بقيت بالغرفة افتر اريدة يشحن بسرعة ، دكت الباب تغريد و ضميته بسرعة و خربت فراشي عود جنت نايمة فتحت الباب و ممثلة ملامح النوم دفعت الباب قوي و فتحت الضوة
تغريد : شكو قافلات الباب
روز : جُمارة نايمة خطية و ماندري مقفول
احجي وياها وهي خازرتني تباوع لعيوني و اني خايفة لا على حظي
يدك التليفون و تسمعة ، سويت روحي ارجع انام و هي بقت بالغرفة
تفتر كل شويه تروح يم جُمارة تباوع الها و تندار تباوع للحيطان و ترجع لجمارة لحد ما طلعت
بقيت خايفة و حتى ما حطيت التليفون على الشحن لان بس اقفل الباب
تعرف عندي شي ضليت أفكر لحد ما نمت و غفيت كعدت على صياح جُمارة نزلت اركض لكيتها تبچي و تتعارك وي تغريد
روز : شكو شصار
جُمارة : كولي لاختج تأخذني للطبيب
رااااااسي راح ينفجر
روز : اخذيها تغريد صدك تحجين صار جم شهر راسها يوجعها خاف يطلع بيها شي
تغريد : ما بيها هاي من كثر ما تفكر بذاك الـ الله ينتقم منه و بعدين أني ما كاعدتلجن على بنك ينراد كراوي و كشفة و دوة
انهضمت جُمارة و مسحت دموعها لازمه راسها و صعدت ،
مديت ايدي على الگلادة مال امي برگبتي الي حلفت الف حلفة ما أبيعها بس خايفة على جُمارة هواي و احس روحي ما بقى شي ما خسرته ضلت على الگلادة
مرت جُمارة يمي بعصبية و هي تنزل بسرعة شمرت على الكرويته فلوس
جُمارة : هاي فلوس يالله كومي اخذيني
شالتهن تغريد بعصبية و شگتهن ، شمرتهن بالگاع
تغريد : ذني منين من زِناد چنتي تخلي يتصدق عليج
و تأخذين منه فلوس
جُمارة ساكته بس صافنة و تبجي و تغريد ما صدكت تنفتح سالفة بيها زِناد و رهينة جريت جُمارة من ايدها و صعدتها اسكت بيها
قفلت الباب و حطيت التليفون على الشحن ، اول ما شحن شوية
ضميته سوت النه تغريد عشا و اخذت جُمارة تنيمها يمها جوه
شوكت يجي الدوام بلكي تتداوم و شوية تصير زينه و ترجع مثل قبل
قفلت الباب وراهن بساع لگيته داك عليه دكيت بساع و احسب بالدگات
بيا دگة راح يجاوب و يكول الو
رادت تنتهي المكالمة و اجاني صوته
محمد : ها صديقي
روز : شنو صديقي ها شنو صديقي انتَ وين و وين تريد تشرد و تعوفني والله غصبا ما عليك تجي تطلگني و تروح لا افضحك فضيحة
- يايابة يا بوية افضحني ولك خاف أنا ما مفضوح
روز :اني كتلك و انتَ عود لا تسمع كلامي والله اروح
لأبوك و افضحكم و أخليك تتندم ع الساعة العقدت بيها عليه
محمد : كلشي أتندم عليه إلا انتَ
روز : صدك راح تسافر
محمد : بكيفك تريدني أموت ابقى هنا
- اني اريد اكتلك بيدي ما اريد هم يكتلوك
- تـؤ تـؤ تـؤ اموت ع الشرس
روز : لا تستفزني محمد اني جاي احجي وياك و گلبي محترگ
محمد : أنا اعرف شلون أطفي
سكتت أتنفس بحرگة كلب لان صدك راح يموتني هذا البشر
روز : شوف محمد ترى تعرفني كلش زين شكد احبك
و طببتك للسجن ترى هسة هم ما راح يوكف حبك بعيني
محمد : شتريد اجي اخطبك رسمي
يالله حضر روحك باجر جاييك
روز : لا و فضة اليوم أربعينها و تغريد كلش عصبية
محمد : جا شتريد فهمني
بقيت ساكته و مسحت دموعي و سديت التليفون بوجهة
بقيت بالگاع كاعدة و أنشغ اني خليت روحي اسيرة بحبك
نمت بالكاع و جريت الغطه تغطيت بي و يومية بية خوفة لا تغريد تغسلة و اني ما ادري كل ما تريد تاخذة تغسلة اطلع الها حجة و الحجة
هي عطرة من يوم الي نام بي لليوم جنت أتعجب على زِناد
اكول وين واصل بالحب و هم نايم يشم لحاف جُمارة تالي صرت مثله
ضل يدك عليه و اني ما جاوبته بس كوه لازمة روحي
اريدة بس ما ادري شأريد منه لحد ماعيوني احسها
من البجي مورمة ضميت التليفون و غفيت بالگاع ..
بين النايمة و الگاعدة فزيت احس روحي حلمانه من أنرفع الغطة
و تمدد آحد وراي بلعت ريكي و غمضت عيوني اخاف حتى أدير وجهي ، جُمارة ما عدها هيج سولف تحضني هي تعبر عن حبها بغير طريقة
من ألعطر فَز گلبي و درت وجهي بساع بصدمة من لگيته نايم بصفي
ورث الجكارة و سحب نفس و اباوع الضوة بدة يطلع يعني دنيا الفجر
لطمت على وجهي
محمد : تـؤ تـؤ تـؤ شلون هيج تضرب وجهك ادبسز
روز : شلون طبيت منو كلك تجي ولك و تغريد
محمد: لدكول لك لا افلش سنونك بحلگك
- محمد تحجي صدگ
- طبعا جا أعوف ابني يبچي و ينام مهضوم
ضربته على صدرة ضِحك و گعد رحت للباب اركض لكيته قافلة
روز : شلون طبيت للبيت
محمد : هههههه هذاك اليوم من طلعت أخذت نسخة
گلت تفيدني و صدك فادتني
روز : لك شلون ما خفت شلون ما شافتك تغريد
محمد : لو شايفتني يا غبية چا ما هسة أنا يمج
- هسة تكعد و تشوفك وحق الله تموتني
- ليش ما تخلوني أكتلها و آريح الكوكب
لزمت راسي بأثنين ادية من الخوف و التفكير و اباوعلة
سميناك وهمي هو ما تطبق الاسم بالحقيقة
روز : بس فهمني شلون كدرت تطب
محمد : گبل جانت أمي دگول عليه يبوگ الكحلة من العين
يعني أنا خاطفك من ايد تغريد تريدني ما اصعدلك
بقيت الوب افتر بالغرفة و خايفة اكثر من ذيج المرة
وكفت يم باب الغرفة خليت اذاني اسمع إذا تغريد لو جُمارة كعدن
و هو متمدد بالكاع و متغطي
محمد : تعال جوعان بس ما أكلت أريد اكل وياك
باوعتله بعصبية اريدة يحس على الغلط الي غلطة
بس و لا تنكسر عينه ولا يحس
محمد : تعال يمي ترى دقايق و اروح
روز : تسافر
- اي والله بس كلت شلون اروح وما مراضيك
- ترى اني ما أصالحك حتى لو جاي تراضيني
كام من مكانه و اجه عليه جَر ايدي و يبوس بخدي كل شوية من جهة
روز : ترى اني مو عندك مضحك افتهمت لو لا
محمد : لو هيج المضاحك لو ختولي
كعدت بحضنه و هو ياكل أكلته مدري أكلتي المفضلة
المهم إذا جابها ما تضل منها و لا قطعة شال اول قطعة يوكلني درت وجهي خله ايده على بطني يقرقرني ضحكت و حط القطعة بحلگي
ضربته بأيدة و اخذتها منه ، يوكلني فنكر و وي كل قطعة يبوسني
روز : وين لگيت مطعم مفتح بهذا الوكت
محمد : معليك لخاطرك افتحهم كلهم
باوعتلة بطرف عيني اريد اكله استقر
روز : يعني سويتها صدك و تسافر و تعوفني وحدي
ترى تغريد على اي لحظة تسحلني تريد تزوجني
محمد : جا أنا غشيم من عقدت عليك
- و عبالك حلوة سوايتك
- ها لازم تريد تروح تتزوج
روز : اتزوج طبعا لعد اضل انتظرك و اضل مكفخة عندك و عند تغريد لعبت نفسي منكم
قَرب راسة على رگبتي باسني و خَلة شعري وره اذاني
محمد : اموت على ربك
خلصت الاكل و ضميت العلاكة جوه الجرباية
محمد : نضل كاعدين على الوسخ
روز : اي طبعاً لعد شتريد خاف عبالك انزلك تغسل عايش اللحظة شنو البيت بيتك
ضحك و هو يمسح وجهة عدل المخدة و شمر روحه عليها
تمدد يمه و احنه اثنينه أدينه بيها ريحة بيتزا أندگ و شهگت
لزم ايدي مبتسم يأشرلي على كيفج و اني تشاهدت
جُمارة : روز فتحي الباب
تنفست على كيف و اشرتله على وره الباب و هو يسوي روحة مابي حيل
يگوم جريته قوي واني اديه ترجف فتحت الباب و اقرا ايات بكلبي
لكيت بس جُمارة واكفة بالباب و مستغربة ليش اني ما اخليها تفوت
جُمارة : اريد انام بچربايتي
- لا
- شنو لا
رادت تفوت طلعت الها و طلبتها لغرفة امير لان القفل مكسور
جُمارة : شبيج شكو
- محمد هنا حبابة جُمارة لا تكولين لتغريد
- شجابة و شلون طببتي للبيت و شكو لسه تحجين ويا
ما شفتي اني شجاي يصير بيه
روز : مابيج شي و زِناد يحبج و تحبي لا تكولين هيج
هسة ابقي هنا بين ما يروح حبابة
هزت راسها بـ اي طلعت بساع و طبيت للغرفة لكيته متمدد و يدخن
روز : هاي جمارة الحمدلله اشوه من تغريد
- حبيبة زِناد شكد كتله أعقد عليها و خلي تغريد كدام الأمر الواقع ما يرضى يكول أنا مو مستهتر مثلك
روز : ترى تغريد إذا عرفت تموتك
محمد : بيمن تموتني سلاح لو بيدها
- لسانها كافي عليكم
- و علي أكصة بس أنا غير اخاف عليك منها
روز : يالله يالله امشي روح قبل لا تكعد
مد ايدة على ظهري و شالني من الكاع بأيد وحدة تذكرت لمن جنت ويا
بهذاك البيت باس رگبتي واني حضنته بأثنين اديه دموعي
تجري على ياخة قميصة
محمد : تعبتك وياي و انتَ هم تعبتني
روز : خلصت عمري انتظرك و انتَ يمي
ايد شايلني بيها و ايد الثانية على راسي و يجر نفس
طويل من رگبتي و من يزفرة حار يچويني
محمد : جوه مخدتك فلوس اشتري شيعجبك
و أنا كل فترة اخلي زِناد يدزلك بيد جُمارة
- ما اريد منك شي
- ادري بيك تريدني
ضربتي على ظهرة نزلني و لزم حنچي باس خدي قوي و عضني
و وگف يعدل بقميصة و يضم غراضة بجيوبة
راد يضم تليفونه ، فتح الشاشه و الكاميره نَزل روحة لمستواي باس خدي و مخلي ايدة بعيدة طَگ صوره باسها و ضمها
روز : ما اريد عرس أخذني وياك
محمد : كتلك أعوضك و لازم أوفي بهذا الوعد
مسحت دموعي و بقيت ساكته مد ايدة على وجهي
يمسح عيوني بردن قميصة
محمد : لا تبچي و تخليني أروح مهموم والله أجيك
زِناد كال أفضها وياهم و إذا ما فضها أجيك اعقد عليك اطلعلك جواز و آخذك وياي و هناك اسويلك زفة حتى لو بس اني وياك تقبل مو
كرص خدي و باسة واني احاول الزم دموعي بس ما اكدرلهن
مد ايدة على الباب راد يطلع لزمت قميصة دار وجهة عليه مبتسم
يريد يطمني شفايفي من القهر ترجف
محمد : ها حبيبي
روز : خاف تروح و بعد ما تجيني
ضحك و حضني بأثنين اديه و يضمني حيل لصدرة
بس يريدني اصدك هو راح يرجعلي
محمد : وعد و من هذا الشارب
لزم شاربة و بَاس ايدي
...
" حور "
باوعت للمره بخزرة خطية رادت تبجي و و انفتح باب الغرفة
طَب واحد وجهة محفر و شعره كفشة مصبوغة الوان و شكلة يخوف
ريحتة التخرع من بعيد تنشم لفيت روحي بساع بالعباية
- ووووووين الفلوس
- ما طلعت يمة والله اليوم مريضة
اشر عليه و كال الها منو هاي
- مرة مريضة تريد تأجر و كعدت يمي بين ما تطلع تشتغل و تطيني فلوس و انطيهن الك
- يوميةةةةةة باجرررر جيبي الفلوس يالله
بقى يصيح عليها بصوت عالي من آيس منها ما عدها دفرها برجلة
و كعد ركبة و نص يفتشها كلشي ما لگه كام يكفر و يغلط و طلع هي بساعة قفلت الباب ترجف و لازمة خاصرتها
حور : منو هذا ابنج ؟
- اي والله حرامات
حور : وليش هيج يسوي
- يشرب و يا خالة اليشرب ينغسل حضة
بقيت ساكته خايفة ما نمت و عيني على البلوكة الشالها
الطفل و طب من الفتحة مالتها
حور : أنا ما ابقى هنا خالة شوفيلي مكان امن روحي بي
- هسة بس يطلع الضوه اكوم ادبرلج مچان
انتِ تردين تشتغلين
حور : اي لان اول و تالي الفلوس العندي تخلص
اول ما صار الفجر طلعنه ندور و نفتر حصلنه بيت صغير هو هم خرابة
بس اشوه من بيت المره عاد بي سگف و مبني مو مال تنشال بلوكة من الحايط و بابه صغير ما يتجاوز ٢٥ متر هن كلهن البيوت بهذا الفرع هيج بقيت بي بس اجذب لو كلت ما خايفة دفعت ايجار مال شهرين
وبقت عندي عشرين الف مصرف ، يعني لازم اشتغل
الله يخلي فضة هي انطتنياهن
نظفت المكان عبارة عن كراج صغير بي صحيات و مغسلة
و جوه هي غرفة وحدة مقطوعة نصين و اني انظف كتلت عگارب اثنين
صرت جهال تلعب بالفرع امنت و نسوان يسولفن بالبيبان
بالليل جعت كل اتسوك جم شغله حتى بعد ما اطلع
رحت و اتلفت الدرب كله صح اكو وادم بس الدرب يخوف المزابل صايرة أكوام تارسة المكان و سيارات مكسرة مشمرة على الدرب
امشي و اسأل على دكان راحت رجلية يالله حصلت
جبت وياي شموع لان ما عندي كهرباء و البيت اظلم
ضليت جم يوم على هذا الحال ما يرضى الحيوان بذاك الحر و الضيم و القهر بس كلها تهون و لا العيشة وي امجد
رحت للحجية اشوف شلونها كيفت من شافتني و كلت الها اريد شغل
كالت ادورلج ثاني يوم كالت لو تطلعين تبيعين لو تصيرين خبازة
بالبداية كلت الها اطلع ابيع بعدين خفت لا يلچحني واحد منهم
كلت اخبز بالبيت احسن الي و اشرف
بأذاني تراجي برغي جان كل ما يسألني اكله شبه حتى ما يبيعهن
جدة رهينة انطتهن الي من رحت ببداية عرسي زعلانه
اخذت الحجية ورحت بعتهن اشتريت تنور و قنينه و فلوس طحين ما بقتلي راحت الحجية تدكدك على البيبان دكول العندة طحين و يريد رم يخبز يروح لهاي المرة ودلتهم بالبيت مالتي اول يوم. وثاني يوم محد
تالي الحجية جابتلي طحين مالتها اخبز الها جانت فرحة كلبي شكبرها
و أنا اعجن و اخبز و ريحة الخبز ترست الفرع
اخذت كرصة من الحجية وانطتني خردة بيدي فرحت و انهضمت ،
فرحت من عاينت روحي اشتغل و انهضمت من أعاين كل هذا التعب
و الغاز و الحر و متجيك غير ٧٥٠ دينار
ثاني يوم جارتين دزن طحين بس أنطوني كل بيت الف
يوم وره يوم صارت تجيني الوادم حتى من غير فروع
ترست القنينة و جبت خمرة و صارت عندي خمسة جوه ايدي
و اكول نعمةما دام بتعبي و بديت اعزل للإيجار مال الشهر الوره الدافعتهن بس من الصبح لليل ما يوكف التنور
أديه صارت عبارة عن آثار چوي
رفعت رأسي السماء أتشكر رب العالمين على النعمة الأني بيها
و اخيراً خلصت من امجد و من هذاك البيت جنت اكول بس من تطلع جنازتي من هذاك البيت اخلص منه ، و وي كل دكة باب اطلع ملثمه اخذ الطحين من النسوان اخافن مشكلين بيه رعب ال سرهيد
و من يجن يمي النسوان يأخذن خبزهن مرات يتلاگن و يضلن يسولفن بالباب و بالكراج و يحجن على خبطات الوجوه و صبغ الشعر
حور : مامش علاج يوخر آثار الجسم
- چويات عورات لو شنهي
حور : اي چويات
- لميلچ جم فلس و روحي لطب العرب عرضيلهم المجان
ينطوج العلاج بالمجان
حور : ان شاء الله
جنت ناوية مو بس هو كل اثر منه امسحة من جسمي و حياتي شنو ذنبي و جسمي كله نياشين من ضربه و چوياته الجانت تخلي حتى الحمامة من صوت نحيبي تخاف توكف على شباج غرفتي
لو بالمگراضة من جان يشلع الحلد بجسمي و يعـوفة محفر
بس شعري الشغله الوحيدة الما تقربلها مدري شعجب و لو هو
من كثر ما يملخني ما بقن غير جم شعراية ثابتات براسي
و أنا اتذكر أعاين دموعي تطيح بحضني
الله لا يوفقك يا امجد
مرت الأيام و أنا كل يوم شكري لرب العالمين يزيد
خلصني و صرت أشوف الدنيا و العالم و اكل من تعبي
اندك الباب و تلثمت و طلعت جابتلي مره جبيرة معجنه طحين
كالت ما عندي احد بس أنا و رجلي و ابني و مابيه حيل اخبر
حور : شكد تنطيني على هاي المعجنة خالة لان جبيرة والله
- خمسة زين والله يخاله الحاله تعبانه
كيفت من كالت خمسة و كعدت اعجن و هي تباوعلي كل شويه دگلي
جني شايفتج لو سامعة صوتج حسبالها راح انزل اللثام
و بقيت خايفة منها لحد ما اخذت خبزها و راحت
صرت اخبز للحجية الي وكفت وياي بلاش لان لو ما هي
الله حطها بطريقي ما تجيني هيج فكره و مرات تجي يمي تجيب وياها
كلاص كيمر و نكعدت نتريك سوه
حور : خالة اريد اسألج لان انتِ مبينه من اهل الله
إذا أدزج على ديرة ترحين تشوفيلي شصاير ما صاير
- اي عادي تدللين
ردت اكول الاسم بس ما طلع من حلگي من الخوف و بقيت ساكته
- إذا تردين اشتري كونية طحين و خبزي و بيعي كل
خمس گرص بألف حطيهن بجيس و أنا هم اخذ منج ابيعلج بدربي حتى تلحكين على الايجار و تشتريلج مبردة
حتى لو مستعملة
يومية تجيبلي فكرة احسن من القبلات لميت فلوسي و رحت لابو
الحصة وياها جبت كونية طحين يومية اخبز أربعين كرصة كلهن يمشن
و خلصت الكونية رحت جبت غيرها و بيوم تلثمت و اخذت خمس جياس
وياي و رحت لفرع ال سرهيد بس الجني ما يعرفني
هاي أنا حتى جفوف لبست و الربطة على حواجبي و عيوني نزلتها
اللثام مغطي وجهي
أعاين على بيوتهم دكيت باب بيت ام شريك و اشترت مني جيس
و باب بيت زِناد خفت منه عبرته و ادري بي هو وحدة كاعد شيسوي بالخبز و باب بيت ام سلام دكيته طلعتلي امهم صاحت ما نريد و طبگت الباب بوجهي
ام سلام : هم عوز اشتري خبز جا هاي الچناين المن جايبتهن
درت وجهي و صاروا بوجهي كومة زلم صرخت من الخوف
- ها حجية شمالج
هزيت راسي بـ لا بمعنى مابية شي و طلعت من بيناتهم و هم فتحوا
الباب طَبوا
واحد منهم كال اوكفي اوكفي ما رفعت راسي أعاين هذا ياهو منهم
بس من الخوف اريد كون عندي جناحات و ارجع يم تنوري
- بيش الجيس
- بألف
الشغلة الوحيدة الما خوفتني هي محد بيهم سامع صوتي
لو حاجية وي واحد وياهم
أنطاني أربع آلاف و اخذ الخبز من ايدي
- روحي لبيتكم يالله دنيا الظهر و الدنيا ما تتأمن
هزيت راسي و رحت امشي سريع رجلية ترجف من الخوف وصلت نهاية الفرع و درت وجهي عليهم لگيته لسه واكف يعاين عليه هذا خالد
واحد من ولدهم الصغار
رحت للبيت و ضليت اسبوع كامل أنا بخوفة من دكة الباب
كمت ما اخبز بطحين العالم بس اخبز بطحيني و ابيع لان السالفة تصرفلي اكثر و تعبني طحينهم لو يطلع سيال لو كله دود و انخلة عشر نخلات و ما ينظف
بيوم من الأيام زادن عدي عشرين جيس و ما مشن لان اكو فاتحة بالديرة و الوادم الفقرة تركض وين ما تسمع اكو عرس لو فاتحة و الجهال يجيبون لامهاتهم و ما يطبخن و لا يشترن خبز كمت
تلثمت و لبست عباتي و اخذت العلاليگ و رحت صوب ال سرهيد
بلكي لن شريف منهم يشتريهم مني
اجة ابو الدكان اليمهم اشتره مني سبع چـياس يأخذهن يحطهن بالمجمدة و يبيع الجيس بـ الف و ربع و بقيت كاعدة مبسطة بالكاع
حاطة الجياس يمي و كل شوية اكول راح اكوم و اضل اصبر بروحي لحد ما صار المغرب اجوي يهفون من بعيد بس معجبني ليش لحاياهم
ما مزينيها و هاي السالفة ما تصير عدهم غير من يموت واحد
عديتهم كاملين جا ياهو المات اسم الله على جدة رهينة لو ميته
جا كل الديرة درت ما ضل واحد ما يعرف
تخردلت من عاينت امجد نزل من سيارة عالية و طب للبيت منين جابها
اجوي وگفوا يمي كلهم ولد عمار و فاخر
عدنان : حجية انتِ منين شعندج هنانه
بلعت ريكي و بقيت ساكته
سلام : مو نحجي وياج خالة وين اهلج كاعدة بهذا الليل هنا
حور : على باب الله
سلام : كومي خوية كومي روحي لبيتج و لا تكعدين هنا
ما يمر واحد غريب الفرع مالتنه دگي الباب على الاهل
و احنه راح نوصيهم كل ما تدكين الباب يأخذون منج
- مشكورين
خالد : اليوم شكد جايبتلنه خبز ترى بس أنا خواردة
اشتري منج ذولة يموتون على الفلس
ضربوا و هم يضحكون اشتروا الخبز كله مني و رجعت للبيت
ما يهم الخوف العشته المهم الخبز خلص
و حلفت بعد ما اروح يمهم و لا اوصل لو على گص رگبتي
و الأيام تمشي و الحجية يومية جايتني بفكرة كمت اسوي كبه و أبيعها
للبيوت مشت و هم استفاديت منها خير من الله ردت اشتري مبردة بس بعدين كلت عليمن خلي اشتري طباخ و بس فرن زين اسوي كليجة قصص وروايات عراقية كرار صلاح و ابيع و هم صارت تمشي و كامت شغلة تشيل شغله إذا ما ابيع كبة ابيع كليجة و إذا ما مشن يمشي الخبز دفعت أجار الشهر الورا
و المغربية أندگ عليه الباب صوت رجال
تلثمت و طلعت بس عيوني تخردلت من عاينته
هذا خالد مادري شيريد مني ابن عمار و منين اندل البيت
- تفضل خوية
خالد: جثير صارلنه ما ماكلين خبزج
حور : باقيات عندي چيسين
- يالله جيبيهن
قفلت الباب و جبتهن اله و أنا اهدي بروحي ما اريد الخوف يبين عليها
انطيته الخبز و انطاني خمسة رجعتله الباقي
خالد : خليهن على غير مره هم اجي اخذ
حور : لا خوية النوب ما تجي و يضلن برگبتي
رديت مديت ايدي أخذهن مني
ردت اقفل الباب تحَمحم
خالد : انتِ وحدج لو اكو احد وياج
حور : و انتَ شلك غرض
حجيتها و طبگت الباب بوجهة بلكي يصير عندة احساس وما يجي بعد
بس إذا ضل يتردد يعني شاك بالسالفة و لازم اشرد بروحي العزيزة
مر اسبوع و هو ما اجة بعد تطمنت لبست عبايتي الصبح و طلعت
لازم اتسوك لان كل المسواك خلص و اشوف واحد يوصي ابو الغاز يمر عليه بترسلي القنينة مريت على ابو الحصة لكيته معزل رحت جبت باقي المسواك بين ما يفتح اخذت منه كونية طحين و بقيت منتظرة واحد ابو
عربانة يجي يشيل الغراض و صلت للبيت لچحت خالد مَر من يم البيت
خزرته و طبيت
كعدت ابجي على حظي منين اجاني هذا هسة لازم أشيل بغير
مكان و منو يكول الوادم تشتري مني مثل هسة وًتعرفني و منو يكولً
ألكه بيت نفس سعر هذا الايجار ضليت اسبوع كامل ادور على بيت يالله لكيت و الحجية مقهورة عليه و ما تدري سالفتي شنو
شلت غراضي و حولت هناك و الحجية ما عافتني هم راحت تدك بيوت العالم و تدليهم عليه و حلفت ما اطلع لأي مكان خلي ابقى
قابله بالمقسوم مر اسبوع و محد اشترى مني بس جيسين و يومية بالليل ابجي
اندك الباب طلعت و من عاينته هو ردت اكله بسنوني من صدك
خالد : ليش شلتي مناك ترى هنا مو جثير اكو شغل
حور : امشي عليك ابو فاضل ما تعوفني بحالي
و تچفيني شرك
حچيتها بحرگة گلب هو بقى مصدوم يعاينلي
خالد : شني مار بعرضتج أنا عمي شمسويلج
حور : لا تضل تركض وراي و حتى من الشغل بطلت عوفني
- ردي لمكانج والله و بعد ما تلمحين اثر مني
مادري أنا هذا كله من وراي عمي نعتذر
حور : لا تعتذر و لا تجي روح خوية و جفيني شرك
خالد : لا ما اجفيج شري ردي لمكانج و استرزقي
أنا شينومني الليل بعد ضميري يضل ياكل بية
- اريد اعرف انتَ اكو احد دازك عليه
حَك خشمة و كام يعاين بالدرب منا و منا
خالد : تردين الصدگ اي اكو احد دازني عليج
بلعت ريكي منتظرته بس يكول منو و تنتهي هاي المسرحية كلها
....
" ورود "
طبن خواته يفتشن بالغرفة يدورن على التليفونات و من ما لگن اثر أخذن سويج السيارة و طلعن و أنا بمكاني أعاين الهن صافنه طلع من الحمام و اجه على الچرباية غمضت عيوني بخوف من دگ هورن السيارة و هو عاينلي بأستغراب بلعت ريكي
عافني و نزل جوه نزلت ورا اركض و امه طلعت لكيت امل و شيماء واكفات بالكراج اخذ السويج و طببهن جوه
شراع : هاي الصلافة منين جايباتها شلون تأخذن السويج
شيماء : ما بگنا مرتك جانت موجودة
- و اذااااااا موجودة شكو تأخذن السويججج
امل : شراع والله ضايجين
ضربتهن امهن على أديهمن و تحاول تهدي شراع
فتنه : عوفهن يمه يولن اخذ مرتك و اصعد لغرفتك
خزرهن و صعد و امهن تغلط عليهن نام ضايج و ايده على عيونه
و ثاني يوم راح جاب اخته جوري و هو يومية يرزلني حتى اقرا
على أساس نسافر بس من اجة صديقة محمد ابن عمي عمار أجلها
و يومية يطلعون سوه ما جنت ادري بيهم هلكد أصدقاء
و بيتنا يومية مشكله من وره شيماء الي قافلة ما تاخذ غير اخو زمرد
و النوب انصدمنا بخبر فضة الي ما جان لا على البال و لا على الخاطر
عمتي بقت وياي لابسة اسود ذبته وره الأربعين بس اني ما نزعته
طلع اسم امل هم و تعينت خلصت منهن الصبح و جوري لا كلش حبابة يومية تكعد اني وياها و عمتي نتريك وره ميرحون للدوام
طبخت الغده و اجوي الظهر نزلت لكيته واكف يسلم على امه
باسها و عاينلي جَر راسي باسة
شراع : اليوم ما خابرتوني على شي
فتنة : مرتك معدلة اليوم سوت الغده
شراع : ضوگي طبخها يمة جنت من اروح يم خالتي
ما اكل غير من ايدها
ريحانة :ما يحتاج اني صبيت ماعون و أكلته يخبل
راح يبدل و اني ريحانة نصب كعدنه ناكل و كلها دكول طيب إلا امل
و شيماء غسلت ايدي و صعدت
شوية و هو طب وراي
شراع : شلونك عُمر
ورود : زينه و انتَ دوامك
ضحك
شراع : مستلم قضية مثل هذا اليلعب بالنار كوه يريد
يحرگ روحة
ورود : وشنو مكيف تروح يصيرلك شي شنحصل
شراع : تخاف عليه
بقيت ساكتة وهو اجه يمي يضحك ايده على رگبتي و باس خدي
مَد ايدة على خصري و فتح شعري يعاينلي مصغر عينه
شراع : ما شبعان منك
ورود : شمالك ما شبعان ولو انتَ شيشبعك
ضحك بصوت عالي
شراع : راح انام و اگعد جهزي نفسج نطلع شوية
ورود : وين
- شعليج وين غير وياي
سكتت و هو ايدة على شعري نمت عليها و ما هد شعري
رفع الغطى و سحب راسي خلى على صدره و كل
شوية يطبع بوسة بخدي
شراع : اكلج فضة گبل منو جانت اقرب وحدة الها
عاينتلة بساع
ورود : شني بس لا تريد تتدخل بسالفة فضة
شراع : لا ولج بس اسأل هيج لا تخافين مو هاي القضية
المستلمها
ورود : والله هي ما تحب تطلع دومها بالبيت
يعني مرت ولاء و ومرت امجد و عمة عجيبة
شراع : محد عرف مرت امجد وين صارت
- لا يكولون فص ملح و ذاب
- ديالله نامي نامي
غفيت بحضنه و شعري مفتوح على الجرباية فزيت على دگة الباب هو نايم فتحته لكيت جوري وجهة مخطوف
ريحانه: عفية ورود كعدي شراع كليلة
عدنا خطار و زلم بالاستقبال
اجيت كعدته بسرعة بدل و نزل لميت شعري و غسلت وجهي
تعطرت و نزلت على الدرج لكيت شيماء كاشخة
و نسوان اثنين كبار و وياهن بنات اثنين
ورود : السلام عليكم
فتنة : چنتي مرت شراع
- اهلا اهلا
عاينت على وحدة من البنات خزرتني محد بيهن
محجبة و مبينين من عائلة من غير عاداتنا بس كلهن مرتبات
رحت للمطبخ و غفران تحضر كليجة و كهوة
اجه شراع اخذ الصينية خازرها رفعت اديها تأشرلة معلية
كعدت يم عمتي و هن يسولفن و حتى عمتي ما
راضية كل شوية تخزر شيماء
- اسمج ورود
- اي
- اني صديقة شراع سابقاً اسمي زُمرد
اكيد سامعة بيه
....
" عالية "
وره الأربعين رديت أنا جنازة ضليت يومين مكسرة عظامي
و علي يومين و يلتحق و الدنيا طالعة من عيني
كعدت العصر لكيته كاعد يعاين بالتلفزيون
علي : هاي نجف وهيج جا إذا سافرتي شوكت تكعدين
عالية : عود هاي إذا سافرت وأنا اقوى طلعة وياك
ماخذني للأسواق
نصة التلفزيون و هو يضحك
علي : هم تردين هذا الالتحاق ترحين لاهلج
عالية : طبعاً
- طبعاً بيها سيابة و تچخي "راحة " و نوم
كمت من الجرباية احرك روحي براحة و أغورة
عالية : اي خطية و انتَ لازم سلاحك و كاعد تحارب
علي : هي هاي الدنيا شتسوي احنه نتعب حتى انتن
ترتاحن
عالية : خلوني اشتغل و الله اجيبلكم كومة فلوس يومية اطببلكم شدة
اجه عليه سريع جر أذاني و اني رجعت أعيد بالكلام كلمة كلمة بگلبي
علي : شتشغلين ست عالية و تطببين يومية شدة
عالية : شبيك أشوفلي شغل منا منا
كفخني على راسي
علي : شلولو ما تصيرلج چارة
عوجت حلكي و كعدت اعاينلة على الجرباية فتح الكنتور يطلعلي الهدوم
اللازم اكويهن
عالية : صدك شو ما كتلي شوكت تصالحتوا انتَ و شريك
علي : بيوم الفاتحة
بقيت ساكته رتبت الجرباية و ردت اطلع من الغرفة
لزم ايدي و نظرته خوفتني
علي : عالية شو هاي المرة ماكو
- شنو
سكتت النوب استغربت مديت ايدي على بطني
عالية : ما ادري ناسية والله من وره المصيبة الصارت
علي : امشي اخذج للدكتورة
بقيت صافنة اعاينلة ما ادري شسوي
جر ايدي و اخذ الهدوم انطاهن لرحمة تكويهن و انا بدلت بس
احسن بروحي خايفة مدري شمالني و أعاين فرحة علي
خايفة لا اروح و دكول ماكو هاي فرحته وين انطي وجهي بيها
طلعنه ردنه ناخذ تكسي و زِناد جان طالع تالي هو وصلنه
ما اتذكر شلون طبيت للمختبر و سحبوا مني دم
و شكد ضليت كاعده انتظر و شَبگة علي و بوسته من گالت
التحليل إيجابي
ام التحليل تضحك و هو أخذني كبل للدكتورة بصف العيادة
و بقى منتظرني كاعد اليعاين علي يكول متزوج صارلة عشر سنين و ما عندة جهال
و انصدمت جثير من كالت بعد اسبوع و تطبين بشهر الثاني
كعـدنا بالمطعم و علي خاينة التعبير من الفرحة
علي : لا دكولين لأي احد بالبيت خليها هي بطنج من تكبر
تبين
عالية : اي اني هم كلت هيج
مرينا بمحلات اشتريت هدوم سود و فرشة للغرفة و رجعنه للبيت
علي : على كيفج من تصعدين الدرج
ضحكت و هو صعد كل العلاليگ ما خلاني أشيل كلشي
و الليل كله يعدل بنومتي و يغطيني
فزيت الصبح هو ما موجود وعياطهن تارس البيت
طلعت اركض عاينت ابن فاطمة سابح بدمة واكع من درج السطح للطابق الثاني اخذته بيبته و امه و راحن يركضن للمستشفى
لزمت بطني خايفة بقيت كاعدة بالغرفة اخاف من هيج مواقف و بالاخص الجهال خطية وين تتحمل وجع رجعن و بقى ابو ويا
جابه الظهر شوية الولد زين كلنه فرحنا
ام سلام : لزمن بزرجن احنه عايزين هبطات ترى ارواحنا خلصت
آريج : عمة هو البزر ينلزم ما تعاينيهم مچاليب
ابو مخلي بحضنه و عمامة كل واحد مخلي بيدة الف و يسولفون ويا ويضحكوه
خالد : بطل بطل جعفوري شنو حسيت
روحك سبايدر مان و طفرت
جُمارة : لا عمو كال أنا باتمان لابس عباية بس انتو ما تشوفوها إلا من اطفر تالي طفر و طاح جوه
كلها ضحكت و امها تأشرلها سكتي
فاطمة : جا ماكو غيرج طيحته هو فقير شمعرفة
جرها علي شبگها
علي : شلها غرض هي ، غير ابنج صار باتمان
خالد : طاح حضك هاي كله حتى تنعجب بيك
تالي لا حصلتها و لا حصلت راسك
مرتضى : ليش هي تتنفس بواحد غيرك
عوجت حلگها بحضن علي و كالت عوع و عمامها ضحكوا بصوت عالي
ردت اصعد الدرج و وكفت على ثالث بآية
ام سلام : علاوي مرتك لو تروح كبل لا تجي بخمس ايام
لو تأخذها و ترد كبل لا تجي بخمس ايام ماكو عشرتهن عِد اهلها شني هي على راسها ريشة
ما جاوبها و لا انا حجيت صعدت فوك تغطيت و ردت انام
طَب للغرفة ادري بي جاي يقنعني حتى ما تزعل امه و اما كلت بس يفتح وياي سالفة أتعارك ويا و اروح زعلانه المهم ما ابقى هنا اخدم
هو علي و يلتحق شعندي يمهم ياهو بيهم يحبني
وخر گذلتي من وجهي و ايدة على بطني
عالية : شقررت
- ترديلج عركة عرفتج اجتج من الله على الله
عالية : لا شنهي أنا المكان الما بي انتَ ما ابقى بي
علي : خرب عرضج شگد لوتية
بقيت ساكته مبتسمة بس دايرة وجهي ما يشوفني
علي : معليج انا اخذج و من انزل اجيج عود اكللهم مريضة
عالية : ترى علمود الخبز امك تريدني موش لسواد عيوني
علي : هسة كافي ابني شلونه
- و إذا بنتك
- بعد احلى لا تخافين مابية مجال للعركة باجر ملتحق
شبگته و هو يضحك
علي : گبل لا يجون جهالي و أعاين هذا الشعور
عندي جاهلة شلولو سوت كلشي گبلهم
عالية : هو انتَ الربحان بالحالتين
نمت و كل ما يدير وجهة للجهة الثانية اكعدة من النوم حتى يدير
وجهة عليه و بكل كعدة اكول راح يصفگني راشدي
بس طويل خلگة وياي فزيت الصبح على صوت امه الفجر بالغرفة
تحجي و تمشي بالهول
ام سلام : يالله كلجن كعدن حماة اختي ماتت و لازم نروح نعزيها وياهم يوم كامل
سلام : يوم كامل شني يمة سويهن وجبات
جا منو تبقى بالبيت
ام سلام : تبقى عالية و يمها الجهال
علي : مريضة يمة عاليه راح اخذها لامها توديها للطبيب
- شني يعني راحة نسوانكم اهم من حجي أمكم ولكم انتو شنو من بَزرة خبلتوني و مرمرتوا گلبي شبيها مرتك مو چنها صل كلشي ما بيها
علي : مريضة وداعتج اخذن الجهال وياجن و روحن
طب و سد الباب امه ضلت أشكال الغلط تغلط و ادري بي كله عليه بس
ما حجيت شي اهم شي اروح لامي تغده الظهر و كال يالله كومي
وصلني يم امي سَلم عليها و راد يروح چلبت برگبته شبگته
امي طبت و هو هد الجنطة شبگني و باسني
علي : يالله ديري بالج عليكم
- علينا
- انتِ و ابني
طبيت اضحك و امي من كلت الها حامل صَلت على النبي
ام شريك : والله لو ما الرايحة فضة چا طشيت واهلية
شلت جنطتي ارتب بغراضي و امي تتنافس وي علي حتى المي هي تجيبة الي و ما تخليني أتحرك يومين و اجت عمتي و عمي لأمي كالولها
ابن مرتضى يبجي عليها رجعت لان امي اكلت راسي دكول عيب دكيت على علي ما جاوبني و أنا ابن مرتضى حتى ما مقربته عليه
طبيت للبيت طلع الولد اصلاً بالمستشفى راجعين داخلين بي
بقوا داخلين بالمستشفى و يكولون الولد بعد ما يشوف عمتي طلعت حرگتها بالولد بينها طاحت النه دك دعاوي و غلط
و فاطمة هي و عمتي معارك يومية عمتي طابتلها للغرفة تسكتها
و علي ندك عليه ما يجاوبنه النوب ضليت حايرة بزماني
طَلعوا الولد من المستشفى و امي اجت عليه تبجي حتى شريك
من يوم الالتحق وره علي بثلاث ايام بعد ما حصلوهم
بعز ذاك القهر و الضيم و اجت رسايل لتليفوني
- هلا حبيبتي شلونج أنا علاوي
دزيلي صورج مشتاقلج غيرت رقمي و كاعد بمكان
ما بي إنترنيت قوي
جاوبته بلهفة و خوف
- شلونك أنت أنا مشتاقتلك موت شريك شلونه هم
ما حصّلناه علاوي أرجع إذا المكان خطر
- دزيلي صورتج مشتاقلج
مسحت وجهي بطرف الدشداشة بساع
و طكيت صورتين دزيتهن اله
شافهن و بعد ما جاوبني كعدت مرتاحة شوية على الأقل
تطمنت عليه
نزلت اريد اكللهم علاوي جاوبني صاح خالد
- سلام امشي وياي علاوي بالمستشفى و بس شريك ويا
شهگت و ضربت على صدري
عالية : يمهههههه
