رواية يا اجمل الوحوش الفصل السابع والثلاثون 37 بقلم رسل فهد

رواية يا اجمل الوحوش الفصل السابع والثلاثون 37 بقلم رسل فهد 

ضميتك حِرز للدنيا خاف تعيل

تميل الگاع بيه و انتَ أبد متميل

شوصفك يا مِسچ يا هيل ؟

بوكت هَدنه الوكت انتَ النه صرت " الحَيل "

- رُسل فَهد

....

" جُمارة "

زِناد : ماكو شي بَس الشيخ رَماح مخابر شريك

گايله جيب المشية و تعالوا

جدة خانها التعبير و گامت تهلهل بنص الفرع و النسوان الي

يطلعن من بيت ربيعة كلهن يباوعن مبتسمات

مدت راسها ربيعة تباوع و أجتي تركض لجدة تشوف شكو

و زِناد يأشر لجدة عيب منا العالم و هو مبتسم و طلع

التليفون من جيبة و لزمه بيدةبكل ثانية يباوعله

فضة : و أخيراً خطية جثير تمرمر و تعب

ربيعة : دزيتلة خبرية ما أعتب باب بيتك إذا ما تطيها

و صدك ما وصلتلة و روحتي تصير وياكم بالشمية

زناد : ما تقصرين حجية انتن الحظ و البخت

باوعت لجدة بسرعة لگيتها خازرته و هو يسوي روحه ما شايفها

حتى ربيعة ما تحس ، هاي جدة على حفيدها هيج تغار و تگلي تبالغين من أغار على زِناد

طَبت جدة واني أخذت فضة ادفع بالكرسي حتى نطب

باوعتله مبتسمه ضحك بوجهي و مسح شواربه

ما گدرت اضم ضحكتي ضحكت على فرحتي بضحكته

البيت كله فرحان و يونس و مرت عمي فاخر راحوا يطلعون عدنان من المستشفى و اجوي ولد عمي عمار يبشرون جدة عبالهم ما تعرف

بقوا واكفين بالساحة ينتظرون شريك و جدة وياهم و اكثر

واحد يلوب زِناد لان شريك متعلق بي لابعد الحدود

و زِناد يعامل علي و شريك مثل ولدة

بهاي الأثناء و كلهم واكفين يسولفون و يضحكون

اني و فضة يم باب المطبخ نباوعلهم و البقية يطبخن للعشاء

لان كلهم راح يتعشون هنا ، صار صياح بصوت عالي صياح

بنية فتحوا الباب بساع و طبت حور تركض العباية طايحة من راسها

بس على جتافها و شعرها طالع ما ينعرف لونه من لون العباية

بس الدم تارس وجها من خشمها و حلگها

الولد من فتحوا الباب التموا كلهم حتى يطلعون و هي جانت واصلة تريد تطب و هم صاروا بوجهة طاحت عليهم لزمها خالد

و لفها بالعباية و يباوع لايدة يأشرلهم ترى هي طاحت عليه

موش أنا كضيتها

جدة ما تكدر تلزمها ركضت اني عليها فاقدة الوعي و شكلها يكسر باب الگلب و امجد هذا كله يمشي وراها يريد يكمل كتلتها بعد

اجتي نورس و رقية شالنها و هي حالها حال الجثة

طب امجد للبيت يصيح بصوت عالي جدة كامت تغلط عليه

و زِناد صار بوجهة بدون و لا حرف حِچة ويا واكفين متواجهين واحد

كبال الثاني و واحد خازر الثاني و امجد ايدة كلها دم

مد ايدة امجد على صدر زِناد يريدك يوخر حتى يطب ياخذها

و زِناد جاوبه بـ بوكس على وجهة جدة صاحت و راحت تلزم زِناد

و ولد عمي عمار صارو بالنص امجد ما سوه شيء لزم وجهة و هو يضحك و يضغط على مكان ضربة زِناد

زِناد : لك جبان گدرتك على مره تف أعلى الشوارب

الحاطهن اعلى وجهك يا خسيس

امجد : شلك غرض متتدخل مرتي و أنا حررر بيها أموتها أضربها ادفنها شلك غرض

زِناد : راسك اكسرة و اطيح حظ حظك إذا ما تجر عدل

ليش انتَ زلمة خاطر أمن بيدك مرة

امجد أنهار و صار الشر واضح على عيونه يخوف

و يريد يجي ياكل زِناد ، اجتي عجيبة تجر بأمجد تريد تأخذة و ولد عمي عمار يدفعوه

زِناد : اخذي خلفتج ألعايبة يالله و امشي مناااااا

عجيبة : ترى اخيك هذا اخيك ليش تخلص عمرك مفرق و ما تنصفلك واحد تضرب اخيك علمود مره

زِناد : و اكسرررر راسة أذبحة والله و اخليج تبجين على جنازته إذا ما تصير براسة غيرة شوية هذا الساقط

ولك مرتك تطلع كدام الوادم بهذا الحال و ما تهتز شواربك

إلا ازينهن على القندرة

زِناد يحجي و يريد بس يلزم امجد و امجد هم يريد يتعارك وي زِناد

جده كامت تلطم و ولد عمي عمار يصيحون و هم يشلعون زِناد من فوك امجد كون و الدم تارس چف ايدة الابيض درت وجهي على فضة بخوف رحت اركض وكفت يمها شفايفي ترجف ، لزمت ايدي

فضة : يستاهل امجد لازم يتأدب

و عجيبة تصرخ بالباب جرها من عبايتها و طببها

انلفت العباية عليها لف

زِناد : صوووتج إذا سمعتة اخفييي و الله اخفييييي

افتهمتي لو لااااااااااااا

بلعت ريگي و خفت لا ترد عليه و هم يسوي شي ثاني

بس خنست و لمت روحها بعبايتها بدون صوت گومت ابنها

و راح وياهم سلام و ولاء يوصلوهم للبيت

رهينة : ليش جدة هيج اخيك

زِناد : جدةةةةةةة كفي عنييي و جفوني شررررركم

حتى جدة سكتت و خافت و طبت جوه خابر شريك طلع حرگته بشريك و الولد كلهم طبوا للديوان فضة طَبت وياهن

بس اني واكفة يم باب اباوعله

وهو منهار وينفت يروح منا ويجي منا و يباوع لايدة

كلها عافته لا تطلع شضايا عصبيته عليهم و يصير ما يشوف

گباله جنت اباوعلة مقهورة عليه لان هم يطلعون أسوء شي بي

و بعدين كلهم يعوفوه و يبقى وحدة بحجة يخافون من عصبيته

باوعلي و شاف عيني على چف ايده المتروس دم راح فتح البوري مال المغسلة الموجود بالساحة و يغسل بأيدة و كل شويه يدير وجهة عليه يشوفني رحت لو بعدني واكفة

جانت دشداشته لونها بيجي و هو واكف ينكث بيها و يشمر عليها مي بس من جهة الردن الي بأيدة اليسره هواي متدمر و هو ما يشوفه مشيت يمه و اني متأكدة هو ما يعصب عليه بسالفة ما تخصني اشرتله على ردانه

جُمارة : منا اكو هواي تراب على الدشداشة

شمر عليها مي و هو يحاول يبين روّحه هادئ

زِناد : طبي جَـوه اخاف عليج

جُمارة : منك ؟ شلون تخاف عليه منك و انتَ اكثر واحد بالدنيا يخاف عليه

زِناد : أنا أخاف عليج من الدنيا

ضحكت و شلت مي بيدي بديته على ردانه

جُمارة : أنعل ابو الدنيا ما دام انتَ موجود شيخ

شال مي و شمره على وجهه مبتسم ، ما ادري هيج بساع اكدر

اغير كيانه رغم ملامحة كلها تقره مو مال ابتسامة

زِناد : يلوموني ليش أحبك لك انتَ وين هُمَ وين

جُمارة : خيولون اهم شي اني

زِناد : جُمارة گلبي انتِ

اندك باب الشارع و طبيت جوه اركض اجه عمي عمار

و زِناد بعده بره يلوب على شريك رحت لغرفة جدة لكيت حور كاعدة

و جدة تحجي وياها بس هي ما تجاوب

كعدت يمها ايدي على رجلها حسيتها انلچمت وخرتها بساع

جُمارة : بعد ما نخليج ترجعين ابقي يم جدة

رهينة : اي مو جاي اكللها ما ترجعين تبقين يمي و اكسر ضلوعة لو اجه عليج هذا عجيبة طلعت عينه بدلالها

اسمع صوت شريك يصيح جدة طلعت جدة تركض و رحت وياها

هو بنص الهول يريد يجي لجدة للغرفة و ما يدري بولد عمي بالديوان كاعدين ينتظرونة ، حضن جدة بفرح و يبوس بيها

شريك : جدة ضميني زِناد متحلفلي

زِناد : وين تضمك جدتك وين

ضحكوا بصوت عالي كلهم و هو اجه لزناد يحضنه

و يوخر و يرجع يحضنه راد يبوس ايدة زِناد ما خلاه

شريك : بس انتَ تحملتني

زِناد : چا شلون شعندي غيرك ، صحيح انتَ ما تنجرع

و مستهتر بس أكول جاهل تكبر و تعقل

يحضن بي و هو يضحك و كلها تضحك

شريك : يالله شيخ يالله خل نروح بعد وكت الساعة بـ ثمانية

زِناد : كتلك باجر وره الغده جاهل انتَ وين اكو مشيه بنص الليل

شريك : مو خاف يغير رأيه ابوها

- لا ما يغيره شني بكيفة أنا غير آمس وديتلة شيوخ من الناصرية گتلهم إذا گال ما أنطي و عوفوني بحالي طگوا چيلة و الفصل عليه

شريك : اي دريت انتَ شيخي و تاج راسي و راس

الديرة كلها والله بدونك نضيع ابو يوووسف

من بين ذيج الهوسة كلها من كاله ابو يوسف صارت عينه عليه

عمار : بعديش وافق ابوها بعد هاي المذلة كلها و احنه الوادم تحلف بصيتنا وهيبتنا بالعمارة

زِناد : جثير لازم أتحمل سوالف الكبار و الصغار يومية

واحد منهم جايني بمصيبة مجبورين نتنازل ولو العقل من گد ما كبرنا راح ينفجر

عمار : انتو لو بيكم خير صدك چان خابرتوا هسة و دكلولة لا ما نريد بعد منك مرة موش احنه التذلنه مره

زِناد: العين بالعين و السن بالسن هم أجوك و طردتهم

موش بس احنه شيوخ و عدنا كرامة وما نرضى بالذلة

عمار : بعد ما يفيد الحجي دام انتَ الشيخ

زِناد : چا لازم اصير أنا منو يگود هاي الجيوش كلها

إذا انتَ الجبير و اجيتني دمك بطولك و مأخذين ابن

اخوك من إيدك أسير ، ههههه شلون تسيطر

على عشيرة كاملة

عمار: احتررررم نفسك لا أحچي حچاية

ما تعجبك و تخزيك كدام الكل

زِناد : أحجي كل الحچي يعجبني حالياً أنا مرتاح

رهينة : ان شاء الله هاي فرحة و فرحة شيخ العشيرة بَعد

والله لأسوي سواية أخلي العمارة كلها دگول جدته تسودنت

عمار : ضلي انتِ ضلي محد طلع عينه غيرج

رهينة : بعد عيني و عين عيني تروحلة فدوة عيون الديرة كلها لو كل التطلع عينه هيج يصير مَهيوب مرجفها الدنيا

جا كلكم طلعت عيونكم

ولد عمي عمار يضحكون و يصوفرون

زِناد : يالله تعشوا و باچر الغدة هنا على سلامة عدنان جثير وادم تريد تجي و جماعتي حتى نكف الغدة و نروح للمشية

شريك : و شرفي شيخ بعرسك شاجورري و شواجير صحباني كلها أفرغها لعيونك و إذا ما تكفي

نجيب المدفع و نجي

زِناد يضحك بصوت عالي و اجواء البيت كلها حلوة كلها مبتسمة

حتى لو اكو شكم وجه مسموم مثل دمعة و رقية بس الوجوه لاتضحك

طاغية عليهن

لارا : عن جد يعني زُناد ما بيتزوج لحتى ترضى امها

لأم خُصر منحوت ، كتير سامعة بالوفا و هاي اول مره بشوفوا

جُمارة : اسمه مو زُناد ، زِناد زِناد

لأرا : زُناد لابقلولوا اكتر و الا بتغاري ؟

ابتسمت بوجهة و نورس و حياة يضحكن

رقية : مرة جدته خطبتلة من هاي جانت صغيرة

و بدوا يتزوجون ولد عمار گالولها أبنكم انتو ما متحملي

تردونه ننطيكم بتنة و جان توه محترگ محد يرضى يناسبه

حياة : ليش هو داز جدة مو من دره گلب الدنيا عليها هنا

رقية : أي بعديش بعد ما سمع الحچي عليه

نورس : لا شو هي من طبينا لهذا البيت ليهسة احنه ندري زِناد ما يرضى غير بجمارة

رقية : شلون حبيتي ؟ حجتها و عوجت حلگها مشمئزة عود

جُمارة : تدرين ليش حبيته لان حتى المتزوجات يحلمن رجولتهن تصير مثله و تحبـهن مثل ما هو يحبني

و إذا تشوفينه مخيف و عصبي كبالكم ترى بـ حچاية مني

يتغير كل كيانه

رقية : و أديه ؟

جُمارة : إذا انتِ شايلة همي تطمني لان انتِ ما تشوفي بعيني و ايدة المحترگة على گولتج و تلعب نفسج منها

أني أبوسـها أصبع أصبع

طلعت من المطبخ بسرعة و احس عيوني مدمعة و البيت كله هوسة

حتى غرفة جدة طلعت للمخزن كعدت يم التنانير

حاضنه رجلي و راسي على رجلي اباوع للزرع و الكمر يضوي على المكان و صوت المي من الساگية واصل يمل

فرحانة حتى اني لشريك ما خلى سالفة تعتب عليه يالله حصلها

كون روز محمد هم يستقتل عليها و يتزوجها لان امي مستحيل توافق

يجوز تقبل بزناد و محمد ما تقبل الي أخو هو سبب بموت امير

انفتح الباب و صاحت نورس هاي هاي

كمت انكث بصايتي و طبيت لكيت جدة جاية عليه

رهينة : وين خاتلة ولج راح كلبي عبالي شو شصار

جُمارة : شيصير بعد جدة

باوعتلي مصغرة عيونها و عوچيتها بيدها

ضربتني بيها على كيف

- شرايحلج ولج شو گبل لا تنطقين الحاجة الترديها تجيج

عفتها و طبيت للغرفة فضة تسكت بحور تمددت على الجرباية و حور

كاعدة يم رجيلة تعشوا بس اني ما اشتهي من خلص العشا اجه زِناد يم جدة كعدت عدل و لبست شالي

زِناد : هاي مرت امجد خليها يمج حتى إذا اجه ياخذها لا تخلي خابريني و فضة تباتين ؟

فضة : لا أخذني وياك لغرفتي اريد ارتاح

كيفت لان حور راح تبقى ويانه و تخلص من امجد سحب

الكرسي مال فضة و وگف يم جدة طلع فلوس من محفظته و أنطاها

رهينة : بعد جدتك ان شاء الله التراب بيدك ينگلب ذهب

جُمارة : حتى الأنبياء ما صارت عدهم هيج معجزة

- هاي اخذها لتغريد أنا هسة عرفت بس تغريد دواها

جُمارة : شنو كاعدة عندج اني كاعدة بحصة أبويه

زِناد : يالله في أمان الله و إذا أحتاجيتوا شي دگوا

حجاها و عينه عليه اخذ فضة و طلع

رهينة : و انتِ باجر ترحين ويانه لاله حتى

ترحين تشترين هدوم الصبح

جُمارة : اروح طبعاً جا شنو تردين تخليني هنا و انتِ ترحين

رهينة : يالله أعاين ياهي تاخذج ام عدنان ، رقية

- لا ما اريد رقيه الحية

كمت من الجرباية و خليت حور تنام و فرشت الي بالكاع

جدة نامت و الغرفة هدوء حطيت راسي اريد أغفى و عاطت حور بخوف

جدة فزت و اني رحت يمها

رهينة : اسم الله الزهرة سور سليمان يحبوبة

حور : يذبحني والله يذبحني

جُمارة : شبيج حور ترى انتِ يمنه

اباوع لأيدها و ورجلها يرجفن جدة قرت على راسها ايات و راحت نامت

بقت حور كاعدة اجتي يمي كعدت بالفراش مديت ايدي لمخدة جدة اخذت المفتاح و طلعت حلويات من الخانة بالكوه قبلت تاكل

ركبتها كل آثار عض قوية بحيث اكو عضة من العضات طالع منها دم

اديها كلها ضرب بمثل السوط مادري حرام بس صايرة آثار بالطول

جُمارة : معقولة هو هيج يسوي علمود الأطفال

حور : جهال .... هو أصلا ما يحب الجهال ما يحب كلشي

غير الدم و الضرب و صوت البچي و الفلوس

جُمارة : هو هم يشرب

- مرات يجي بي ريحة شرب بس مو

جثير بالشهر لو مره لو مرتين

- خيولي ما شفتي زِناد شلون ضربة علمودج فلش خلقته

حور : هسة يذبحني

- لا شحده

احس روحي نعست تمددت بالفراش و هي راحت على الجرباية

كعدت الفجر على صوت جدة و امجد و صياحهم راسي يوجعني ما بيه حيل اكوم لحد ما راحوا و طبت جدة

رهينة : شسويلها إذا هي ردت ويا خل يرحون يحاجونها هي أنا شلي غرض

و الصبح جدة كعدتني حتى اكوم ابدل اروح ويا ام عدنان

ام شريك و عالية يمنه الفرحة مرسومة على وجوههن غسلت و اجيت ابدل جدة انطتها فلوس و خابرت امي كالت الها باجر تجي جُمارة

طلعت وي ام عدنان أخذتنا على الشارع حتى نأجر تكسي

و ام عدنان تحاسب على الألف عبرن سيارتين و ما صعدنا و من بعيد شفت سيارة زِناد دگ هورن و اجه علينه

صعدت ليوره و سديت الباب

زِناد : خير وين ان شاء الله

ام عدنان : عمتي نختني اخذ بت يعقوب اشتريلها هدوم

كالت باجر ترد لامها

زِناد : وين أنزلكم هسة

- للسوگ الجبير البنات هم يردن غراض

كاعدة وراها و كل ما ارفع عيني الگا بالمرايا يباوعلي

زِناد : ديري بالج عمة خلصي بساع و ردوا للبيت

ام عدنان : لا يضل بالك بعيني

وكف السيارة و نزلت ام عدنان فتحت الباب اريد انزل

مد ايدة بيها فلوس

- هاج و أنا اعلمج من تردين ، صايرة الطلعات سكتاوي

جُمارة : جدة اطتني و روح حاسب جدتك هي كعدتني

و كالت روحي

زِناد: دكمشيهن يالله و نزلي

جُمارة : ما اريد والله ضمهن هسة بس أتزوجك اكوم اركض وراك على المصرف ما تطيني

ضحك و فتح الجامة مد ايدة لمرت عمي فاخر و اشرلها عليه وراح

ام عدنان : اشتري و اصرفي قابل انتِ دوم وياهم

و امج المرة على كد حالها مو زين شايلين همج

- لا عادي بس لان جدة انطتج كلت عيب

- ماكو عيب خيرهم جثير

حطت بيدي الفلوس مال زِناد صرفتهن بس المشكلة هي مو مثل ذوقي و ما يعجبها الشيء اليعجبني تالي عفتها و اخذت على ذوقي

خلصت غراضي و هي بعدها تشتري لجناينها و زهرة

و رجعنا للبيت

ام عدنان : حالليني و واهبيني صرفت فلوس جدتج

لان انتِ خلصتي مشترى

- لا خاله عادي صدك جذب

حطت بيدي الباقي من فلوس جدة من وصلنه انطيتهن الها

جدة : جا شصارفه

جُمارة : حفيدج لحگني و انطاني فلوس

رهينة : انهجم بيتج كون وين لگاج

- لا والله اصلاً هو وصلنا

عوجت حلگها جدة و اني اباوعلها بشماته و أراويها هدومي

صار الغدة و اجت عالم شگد على سلامة عدنان و اول ما خلصوا الغده زِناد كال لجدة يالله لان الشيوخ كلها راح تروح وياهم للمشية

اخذت ربطتي و صعدت فوگ يم لارا كوتها ، الصَاية لون ماروني

طوخ مايل للسواد و الربطة سودة و بيها ورد احمر نَاعم

قفلت باب غرفة جدة و وكفت البسهن دنگت البس الكعب اندك الباب

صوت جدة بره فتحته و شافتني لطمت على خدها

رهينة : صخام الوجه ولج ياهو اليخليج تطلعين بهذا

اللبس و لج جُمارة زِناد يكطعج و ما ياخذج

جُمارة : شنو ما يأخذني بكيفة و شبي

لبسي جدة شنو مو حلو ترى هو نفس الشي صاية و ربطة

رهينة : ولج هو بالأسود و ياكل راسي مو النوب يعاينج

بهذا اللون

جدة تحجي وتلبس بجواريبها صاحوا جدةةةة

و جدة تلطم على خدها تكلي امشي لبسي صايتج السودة

من سمعت صوت زِناد بعصبية بالهول بوجههم ويكول اي حركة ثانية ما اريد بس نعقد ونسلم و نرد

زِناد : جدددددة وين صرتي جدددة

صار صوته يقترب للغرفة بلعت ريكي و باوعت لجدة بخوف

رفعت ايدها بمعنى معليه

زِناد : جدة يعني صدگ تحـ

جان يباوع لجدة و دار وجهة عليه

- هاي شلابسة انتِ شمسوية شعاملة

جُمارة : بعد أخذوني للسجن احكموني ٤ ارهاب

بقى ساكت يباوعلي

رهينة : هو احنه غير من الباب للباب يجدة خليها توها

فرحانة بالالون و نزعت الاسود

زِناد : وحگ ابن البدوية هسة حتى المشية أخربها

تحجن صدگ انتن لو شني اريد افهم أنا

جُمارة : يالله ما أروح چـا و لا عبالكم زعلت ما زعلانة

راح ابقى بالغرفة بين ما تجين جدة ما اروح لا منا و لا منا

رهينة : لبسي جبتج الاشتريتها من رحتي ويا

لو لبسي فوكاهن عباية

زِناد : لا مووو عيب جُمارة تلبس عباية ليش تكفرين جدة

باوعتلة بطرف عيني و كعدت انزع الكعب عبالي راح ينقهر عليه و يكول يالله امشي بس ماكو واكف منتظر جدة تكمل و جدة تأشرله عليه

رهينة : كومي لبسي ذيج يالله

عافنه و طلع و جدة تبوس براسي البس الصاية السودة و هم يصيحون

برة انقهرت على جدة و لو جدة حجة اني من الأساس اريد اروح

طلعت و جدة بالصدر صعدت و ام شريك و عالية وره باوعلي خازرني

رهينة : وفضة

زِناد : رحت الها ما قبلت تجي

لحد ما وصلنا وگفو السيارات بره و طبينا

لا ديوانهم و لا الاستقبال و لا الساحة كفت الزلم تالي نصبوا

كراسي بالشارع

كلهن نسوانهم فرحانات و بالاخص امها

جُمارة : جدة جا اليوم مو الحفلة

رهينة : لا المشية و العقد اليوم يومين

و نجي نجيب النيشان و الذهب

بقيت كاعدة يم جدة لحد ما خلّصت المشية و صار العقد

شهگت جدة من سمعنه برقم الحاضر و الغايب حتى هي شمعة

فزت و امها تباوع لجدة بفشلة بقت جدة كاعدة على نار لحد ما گمنه

و الهلاهل ترج الحيطان

جدة حطت بيدها فلوس و باستها و طلعنا الزلم وجوههم ما تبشر بخير

كلها مخنزرة صعدنه بالسيارة

رهينة : يمن كون انفگست عينه اعله هالرقم شني شماخذين

بت بنية خوىا بت بنية

ام شريك : خلي يعمة جا شنسوي أعاين ابني يروح من ايدي شريك من زمان گال حتى لو يرضى يحط مهر

يكسر الظهر

زِناد : هذا مو مهر هذا انتقام

وصلنا عالية و امها بـ باب بيتهم و طبينه عمامي يتصايحون بالكراج

واصلين كبلنا و شريك واكف وحدة و هم يرزلون بي

شريك : هسة من أجي امد ايدي الكم لا تنطوني

هاشم : لك بابا طرحوك زوج تعرف شني زوج

- مالكم غرض شني داك باب واحد أنا

عمار : منيلك هاي الملايين ولك گلي شو تحجي مترهي

زِناد : هسة شكو شيفيد الحجي بعد غير صارت برگبته

عمامي يرعدون وجدة ضايجة نمت و على أساس ثاني يوم يأخذني لامي بس گالوا راح للبصرة بقيت ضايجة و خايفة من امي لحد ما

اجة بالليل

زِناد : كولي يالله حجية هسة مو زين رضى يطيها

رهينة : صگد تحجي يزناد منيلنه هاي الفلوس فهمني

- هم يردون بيت اصغر هذا جبير عليهم

خل يشتري قريب منا جا شيسوي هو شعندة بس مرته و امه

رهينة : وين يشيل جريب منا يجدة و هو بالعسكرية

زِناد : يشيل جدة لان سلام و اسلام اشتروا كل واحد

نص قطعة خمسين متر بذاك الحي جا وين يرحون و هاي الكيعان صاحبها ما موجود

رهينة : جا و علي مو كلت يريد يطلع هاي عالية غادية مسلوله من ضيم امه و طلايبها

زِناد : علي دفّان اكثر من اخوته الكبار خل أعاين محمد

لو يشترون هو ويا بيت شريك و يقسمونه بالنص

رهينة : و دمة يجدة المهدور

زِناد : تفض ان شاء الله

حجاها و گام راد يروح اشرلي تعاي طلعت

ورا و اني مسوية روحي ضايجة ، هسة إذا ضايجة عليمن طالعة

طلع بالساحة و وصل لباب الحوش هم طلع

جُمارة : انتَ وين ماخذني

زِناد : لـ گلبي

فتح جنطة السيارة و اشرلي تعاي طلعت وكفت يمه بيها صندوگ خشب

و مخطوط عليه اسم عروسة الشيخ زِناد باوعتلة مبتسمة و مستغربة

زِناد : فتحي

ايد لازمة بيها الشال و الثانية مديتها افتح الصندوگ

فتحت عيني كل وسعها من الجمال

فستان مدري قماش ما واضح عدل بس لونه ابيض و عبارة عند شذر بكل الأحجام و الألوان مديت ايدي تلمسته احس من جمالة مصنوع بس للنظر حرامات ينلبس

زِناد : مادري تعجبج لا بس گلت گبل لا أضمها تعاينيها

- منين ؟

زِناد : مَرة جبيرة چانوا ماكلين حگها حموينها نختنا

و رحنالها ردينا الحگ لراعية و هي سافرت يم خوالها للبحرين بس دوم تخابرني و تعرف سالفتي

و امس من ردينه من المشية دازة هذا الج

جُمارة : جا شگد مسولفلها عني

زِناد : چا انتِ طلابتي الما فضت من أنا

جاهل لحد هاي اللحظة

جمارة : هسة الناس تكول الشيخ حل كل الطلايب و طلابته

لسه ما حلها

زِناد : يجي يوم و أحلها

جُمارة : ان شاء الله يجي لا تخاف

- منين أخاف

- مادري بس هم هيج يكولن يعني امن لا تخاف

زِناد : والله خايف منج أنا

جُمارة : ههههههه جُمارة طلابة الشيخ زِناد

زِناد : لو هيج الطلايب لو ما نريدها العگل اصلاً

اضحك و هو يسرح من يشوفني أضحك اشرلي بيدة على بيته

زِناد : جاي ارمم البيت كله حتى اسوية مچان بالحديقة

لرفيجاتج

- صديقاتي ؟؟

زِناد : اي الغزلان

ضحكت بصوت و حطيت ايدي على حلگي اباوع للبيت

و انفتح باب بيت عجيبة و طلعت عجيبة تركض بعبايتها متوجهة على بيت جدة و امجد وراها يركض طبيت للبيت بسرعة

و راح زِناد يشوف شكو

فرحت من سمعتها صاحت

عجيبة : الحگ النه حور شردت

لان ما چنت ادري منو الراح تاخذ مكانها

هضيمة چفوفك الحلوات راحن للـ يعذبهن

ولك و أنا صبرت سنين خَاطر بَس أبوسهّن

.....

"عالية "

- و أنا ما مفتحة دار ايتام خاطر اربيلچ بي بزرتچ

افتهمتي لو لا

عاينت لامي بساع هي مصدومة اكثر مني

و مغطية وجهه بالعباية

عجيبة : ولك عبود والله والله انتَ و مرتك امحي أثركم من الوجود ليش تخليني أحطك براسي و أنا اكول اخوي

- لا يعجيبة ذاك الزمان راح لا حسبالج تخوفينه

إذا اخوج طرطور و يخاف منج أنا لا و الف و رقية

اختي هم وياي شحصلت من ال سرهيد شو حط

فوكها لبنانية و هسة حتى ما يگلب أخيتي

و لا رجلها صار شيخ

و لا ابنج و زِناد باقي رضينا و الما رضينا

عجيبة : لا موش بكيفة انتِ ما تدرين أنا شمحضرتله هو من يمه يهد العكال و الشيخة و يمشي

امجد : ام شريك ها ها شعندج

امي دفعتني جوه و اجه امجد بالباب وكفلها هو و امه طبوا للكراج

شوية و طبت امي

عالية : يمة ذولة بلية

ام شريك : خيولون مالنه غرض بيهم ذولة شر أنا ما عندي

لحم زايد هو بس شريك و انتِ ويومية الدنيا صاگعتني بيكم صگعة

نسينا كلشي من طب علينا شريك يبوس بأمي حتى رجليها

و امي تهلهل حتى لو ما بيها حيل من عرف شمعة راح ينطوها

ام شريك : ولك و أعاين جهالك تلعب گبال عيني يمه شكثر بختي ينزار ساعتها

بـ ليلتها من الفرحة نمنه ثلاثتنه بالهول كعدت على شريك يغطيني

عالية : الساعة بيش اسويلك ريوك

شريك : لا بعد وكت نامي بس ما خليتينا ننام

اخذتي غطاي و غطا امي

درت وجهي اضحك غطيت راسي خاف حلمانة بعلاوي وما ادري بروحي كعدت الصبح على ريحة الچاي مال امي وهي تسويلنه

ريوگ و اني مدري شبية يومية ساتر عليه ذاك الرجال

واصله لنص الهول

شريك : عالية بعد شوية تطلع للشارع

ام شريك : جا شني هاي الجاهلة

صوتك الها يالله حتى نروح لبيت جدتك

كمت و لميت الفراش كعدنا نتريگ و رحنه لبيت جدة

ردينه العصر و شريك اجة ضايج من عمامي و امي تهدي

ام شريك : مالك غرض بيهم قابل لو احتاجيت راح يطوك

شريك : هم من البداية ما يردوها تفض

ام شريك : معليك يالله أنا حتى باجر اروح اجيب الها الذهب

و اعرض البيت للبيع حتى ناخذ الفلوس بين ما تلگانه بيت

جريب منا

بين ما شكثر فرحانة لشريك بس مقهورة عليه أعلى سالفة الحاضر

جثير تكسر الظهر بالله الغايب شريك ما يهدها لو اعلى جثتة

اسم الله على اسمه

فتحت التليفون و عاينت شكثر داك عليه علي و أنا ما مجاوبته

و آخر شي دازلي رسالة كاتب أنا اعلمج من اجي

عدلت كعدتي و دكيت عليه اول مره ما جاوب دكيت الثانية

جاوبني

علي : منو

عالية : شني منو أنا مرتك

- زين والله تذكرني عدج رجل

عالية : ليش حسبالك نسيتك شلون انساك

بس والله رحنه لبيت جدة و عفت التليفون و النوب لبيت

شمعة و تونه ردينا خابرتك

علي : اي من خلصتي كلشي خابرتي

عالية : اليوم شمالك تريدلك عركة

- فتحي كاميرة

دك عليه فتحت شعري و قفلت الباب عدلت التليفون و جاوبته

يعاينلي مصغر عيونه ضايج مني عود و أنا اضحك لابس الزي

العسكري و التيلفون بيدة وهو يمشي

عالية : جا شوكت تنام و تستريح

علي : من اجي يمج

ضحكت و حطيت التليفون على الميز و أنا كاعدة كباله

عالية : خلص يوم بعد ٩ ايام والله جثير

علي : اي والله جثير بس هايد راسي من الطلايب و الحجي و العرك أنا هسة من انزل شفتهم غير طلايبج انتِ و امي

عالية : ها هيج صارت يعني انتَ جزعت روحك مني

و هذا الجنت خايفة منه من حصلت التريدة هديتني

علي : انهجم بيتج كون ولج اعلى هاي القابلية

عالية : كول جذب كول

- جذب و نص انتَ وين ينشبع منك

عالية : والله إلا أهججك هاي المره من تجي أخليك تشرد

مني و تلتحق

- همزين كتيلي حتى ما اجي اخذج اروح يم امي

- اوييي عيني المدلع مال امه روح نام بحضنها خل تلوليك

علي : اي انام طبعا جا غير امي

عالية : اي روح اشبگها و نام يمها هي هم تحبك جثير

- و أنا اموت عليها

عالية : عدها عشرة و مچلبة بس بيك على حظي

علي : هههههههه لا هاي فرة عرس تصير كل ما يتزوج بينا واحد

عالية : وين الله يتزوج واحد من اخوتك و اخلص

علي : هههههه شونج خو ما يوجعج شي

- لا بس اليوم نومي عبث سودنت امي و شريك كلت

بكلبي شو يومية يمك زينة

علي : اي جا غير يومية شابگتني و كل ما تتحركين اعدلج

جا شحسبالج الدنيا كلها مثلي أنا

عالية : خطية جا بس أنا اشبگ على أساس انتَ ما تشبگ

علي : جا جاهلة و مجلبة برگبتي خطية خو ما اوخرها

عاينتله بخزرة هو يضحك يسوي روحة ما مهتم لكلامي

يفتح بكاسة المي يريد يشرب

عالية : اني ما اطلع اسمي عالية والله إذا اجيت و شبگتك

و إلا أخليك تتوسل بس حتى أبوسك

علي : ما تتحمل انتَ غير تشتاقلي

- اي على أساس انتَ ما تشتاقلي

- اي بس مو مثلك محد يلحگك بالاشتياق انتَ

احس نرفزني و صدك اغتاضيت سديته بوجها و طلعت من الغرفة شريك ما موجود بس امي

ام شريك : ها يمة شو مغيمة

عالية : لا بس جنت احجي وي علي ضوجني يمة يسوي

روحة ما يحبني عود بس أنا أحبة

ام شريك : هههههه شني انكلبت السالفة

عالية : و يسوي روحة يحب امه و هاي يغيضني

- جا اكو واحد ما يحب امه انهجم بيتجن هجامات البيوت

رحت للمطبخ اسوي عشا الهي روحي لان امي و علي نفس الصنف ما شاء الله

فرشت النا بالغرفة و شغلت المبردة و شوية صعدت نظفت غرفتة

ام شريك : ولج رجلج حرك التليفون

نزلت اركض فتحت خط اجاني صوته يرعد و يغلط لان سديته بوجهة

- لج اجي واعلمج بسيطة عالية إذا ما خليتج من تسمعين

الرنة تخافين بسيطة

عالية : شمالك شمالك

حجيتها و كمت ابجي صعدت فوك بغرفة شريك لأن استحي من امي

- شمالك وياي من خابرت لسه بس تصيح عليه

انتَ وين جنت تصيح بس أنا عرفتك ليش هيج

علي : تبجين ههههههههه افتحي كاميرة فتحي

جانت اكو دولكة مال مي يم جرباية شريك حطيت مي على خدودي

وفتحت الكاميرة سويت روحي أنشغ

عالية : شبيك وياي شبيك

علي : هاي انا شحاچيتج وين الصلافة اليوم صايرة فقيرة

يالله مسحي دموعج

امسح بخدودي و و انشغ و ما اعاينلة عود زعلانة

علي : شلولو وين اكو وحدة تسد التليفون بوجه رجلها

عالية : جا انتَ ليش تحرك بدمي ها

- هاي حرگته لان كلت تشبگيني

- لا تحاجيني مو مثل كل يوم و طبعاً اشبگك غير مشتاقتلك

بس انتَ احتاريت وياك

علي : خرب آنّه انعل ابو الدوام الما يخليني

اجي لخاطر شبگتـج

بقيت ساكته و اعاينلة

- شلون عيون حلوة دخيلك يابو فاضل

عالية : راح اروح وي امي للسوك من

تشتري ذهب لمرت شريك باجر

علي : اي روحي راح أدزلج بيد خالد فلوس

شوفي شتردين اشتري

هزيت راسي بـ نعم و انفتح الباب مال الغرفة طب شريك

فزيت بخوف لا بية اسدة بوجه علي و مستحية و خايفة من شريك

اشرلي بعيونه شريك منو هذا بلعت ريكي و كمت التليفون بيدي

علي : شبيج

عالية : هذا علي

هز راسة بـ اي و مسح راسي نزلت اركض حابسة حتى النفس

عالية : مو اني جنت بغرفة شريك و صعد و استحيت منه

- ديالله روحي نامي و من تكعدين دزيلي رسالة

بقيت كاعدة وي امي اسولف الها على خالاته لحد ما نمت و اجه الصبح خالد جابلي فلوس و رحت وي امي حاجيته قليل لان اجيت تعبانة بس فرحانة بالغراض الاشتريتهن و ثاني يوم الملجة

رحنه و امي اخذت ذهب العروس وياها ما ودينه الحاضر

لان زِناد كال لشريك ودي الذهب و گله الحاضر يم زِناد بين ما

يجي شراي للبيت

شمعة !!! صدك شمعة لابسة ثوب وردي و هي تشع

بيت اهلها يجنن و مرتب بشكل رايحة للصالون تسريحتها و المكياج

يخبلن و احنه كلنه رحنه وي بيت ربيعة و الهلاهل ما سكتت

و لا الچكليت خلص

امي و جدة تگابلن يهوسن

رهينة: و يا رماي التفگ جبنالك سلاحك

ام شريك : و هاي الرادها و هاي التمناها

بِت الشيخ لابن الشيخ جبناها

فتحن الباب و طَب شريك ذاك الحب كله وهو مستحي من كد النسوان ما رفع راسة لحد ما وصل يمها و الهلاهل وصلت لسابع جار

رهينة : الما ينزل و يهوس جاي مسير مو فرحان

كامن يهوسن جارات جدة كلهن و ربيعة قائدة الميدان

و شريك يضحك

جابت امي الذهب و وگف يلبسها و أعاين لعيونه

مثل العايش سنين يحارب و رفعوا الراية كالولة فزت

لبسها الذهب كله إلا التراچي ما عرف اجيت أنا لبستها

گامن يصيحن حبها ولك حبها لا تخاف من امها و امها تضحك

رهينة : حَبة شني و انتو كاسرين ظهرنه بمهر هاگدة

عضها يجدة و اخذ حيفك من الملوعين گلبك

ام شريك : زفينا الولد و نريد هلهولة

لو موجود أبية چـا لعب جولة

صارت الهلاهل بصوت عالي و شريك باسها بس بوسته طولت

و كلهن يعاينن امهات الولد فرحانات و امهات البنية ما رضن

رهينة : لا تخافين ما ناسية بتوتج بس أنا بالحنه البسج

سلمنه سوه و طلعنه ولد عمي كلهم واكفين بره يهوسون لشريك

جثير اجواء ملجتة حلوة لان كلها تدري شكثر انتظر

- انتَ من عضانـا و يومك نفرح بي

جدة و امي يردن يطلعن حيف الفلوس كامن يهوسن

وياهم بالشارع و ردينا للبيوت

ام شريك : والله خوش مره ام شراع تعرف الأصول جابت چنتها و اجت و احنه طاكين ابنها

رهينة : أخيتي دومها تعرف الأصول والله بس بناتها خبيثات يتحكمن بيها و هي ما تخوف بلكي لن ورود

تصحيها اعله زمانها

اول ما طبيت للبيت سبحت و نمت اليوم جثير حلوة الحفلة بس علاوي ما موجود حرامات من يرد اخليهم يتصالحون هو و شريك

غفيت و كعدت على صوت شريك

- عالية رجلج جثير دگ عليج شوفي شيريد

كعدت افرك بعيوني ساعة الكشرة الاشترالي بيها هذا التليفون

راح نخلصها جوايش واحد يتعارك وي الثاني

غسلت وجهي و لميت شعري و اجيت للغرفة امي نايمة الساعة

بـ ١١ بالليل فتحت خط حسبالي يصيح عليه بس صوته عادي

علي : هلا حبيبي وين اليوم

عالية : شونك حياتي هستوني كعدت من النوم

- صَح النوم

عالية : جثير مشتاقتلك

علي : مو بگدي مشتاگ للشلولو مالتي

- اليوم ردت اطگن صورة و ادزلك بس والله اخافن

من هذا التليفون

- انتِ تخافين يمعودة كولي غيرها ولج انتِ طشرتي العرض بگروب و ما خفتي تخافين تطكين بتليفونج

- اي والله بعد اجاني الخوف شسوي ماكدرت اصدة

علي : ركصتي زين

عالية : اي جا شلون اخوي الوحيد و اخذ حبيبته

- بعد زِناد اويلي مامش زلمة صبر مثلة

عالية : خليها لاحگة على الطگ و الكتل

- هههههههههههه لا وين يكدرلها كلجن بيجن رس جدة

جدي جان شيخ تهابة الدنيا و هو يرجف منها

شريك راد اكل و أنا هم جوعانه كعدت امي اكلت ويانه وًرديت نمت

يومية اخابرة شوية و ينسد منه لان هو عنده واجب وًيروح

النوب تضل روحي تلوب لحد ما يرد يتصل و شريك هم التحق ثاني يوم

الملچة و صفينه بالبيت بس أنا و اميً

مرت الأيام بالكوة و من صار الموعد باجر يجي بدون ما اخابره

حضرت نفسي و لميت هدومي حتى باجر أنا متجهزة شوكت ما يجي

خابرته بالليل بـ لهفة حتى اسمع منه كلمة باجر اجي و حضري نفسج

علي : على عگبة يجوز اجي بس مو باچر

عالية : صدددك شني هاي ترى هن الـ ١٠ كوه خلصتهن

علي : يوم واحد بعد حبيبي

بقيت ساكته و ضايجة لحد ما سدة نمت مطنگرة صحيح راح ارد لجوايش امه و طلايبها بس ما دام هو موجود كلشي عادي

كعدت الصبح رتبت البيت و اكوي شعري بالكاوية الجديدة الاشتريتها من يوم الاشتريتها لليوم يومية اكوي شعري العصر اريد اطلع فلوسها

ام شريك : جا رجلج ما يجي

- لا يمه باجر

- خطية هاي الزلم المگاريد بنص الموت تحارب الله يحفظهم

احس نهضمت و رحت للغرفة ابجي والله موش عشر ايام صارن شكثر هاي لان تعلقت بي لو شني السالفة أندگ الباب و امي راحت تفتحة

بقيت بالغرفة أعاين للمرايا و امسح دموعي عاينت التليفون راح يطفة شحن اجيت اشحنه يم الباب و انفتح الباب

شهگت بخوف لان ما حَسبت و لا تخيلت هو يجي

هديت التليفون و مسحت وجهي شبگته بأثنين ادية شالني و هو يضحك طب للغرفة و سَد الباب

عالية : ليش تجذب عليه ها ليش تجذب

علي : ههههه ردت أعاينج شتسوين

ضربته على ظهرة قوي وهو رأسه برگبتي يبوسني و يجر نفس

طويل من رگبتي

نزلني للكاع و أنا احس روحي بعدني ما شبعانه منه

بقيت كاضه بدلته بيدي مَد ايدة على وجهي يتلمسه بأثنين اديه

علي : امشي يالله بدلي خل أخذج

حجاها و باس خدي

طلع من الغرفة و اني اجهز روحي على السريع و اسمع شهكت امي من انطاها كلادتها باسته و تمدح بي أنا لامه كلشي بس

لبست العباية و الشال و طلعت حتى هو ضحك

ام شريك : اخذها چفيني شرها أنا هسة تيقنت

بس انتَ تصگرها

علي : لا عمي حتى أنا ما اكدرلها موگفتني تك رجل بتج

ام شريك : ولج عليمن طالعة ماكو غير اعلة جدتج رهينة

ضحكنه و بست امي و طلعت ويا هو جنطته على جتفة وحنطتي بيدة

و أنا كايدني بالإيد الثانية

طبينه للبيت اخذت المفتاح منه سلمت هو بقى و انا صعدت

فتحت عيني بصدمة من جمال الغرفة ضليت واكفة بالباب

نزلت اريج من فوك تضحك

اريج : رتبتها الج تستاهلين خوش اشتغلتي شغل

- هههههههه ،

طبيت أعاين و افتح بيبان الكنتور كلشي متغير بالغرفة جانت ساحه شكبرها كلها فارغة و هسة لا تجنن

نزعت العباية و وكفت افرغ الجنط حتى الرجال وهو جاي من الجبهة

جنطته مو بكدي بيها غراض أعاين لمكان الفلوس حاطين عليه الثلاجة

طب للغرفة عاينها و يعاين لعيوني

عالية : جثير حلووووة احلى من الصور

علي : بالعافية چم عاليه عندي

بسته و راح للحمام احضرله هدوم من طلع شمر روحة على الجرباية و امه كلساع تصيحلة نزل تعشه و صعد و هم صاحتله راد ينزل

قفلت الباب و نمت بحضنة

عالية : والله ما تنزل شني بس امك الها حصة بيك

ضحك و گرص خصري دفنت راسي برگبته دگ تليفونه

جاوب بساع شوية و وخر راسي بيدة عاينتله ضايجة

كام بساع ما يعاين دربة فتح الباب و طلع يركض ..

بقينه نخاف من باچر

و أحنه اليوم ما عشنا

....

" روز "

كاعدة بالغرفة البيت وحشة بدون جُمارة فوگ ما هو كئيب

نزلت جوه تغريد ماكو اكيد رايحة يم الجارات صديقاتها

غسلت وجهي لان جنت أبجي فوگ و أحس عيوني مورومة

حطيت ايدي على عيوني افركهن بالمي حتى يخف الورم

احنه ليش البشر وره ما نسوي المكسورة يالله نحس بالندم

و من كد ما الندم ياكل بروحي كل ما اخلص من البجي و امسح دموعي اكول يالله زين سويتي حتى بعد يحسبلج حساب من يريد يسوي بيج شي

اندك الباب و صحت منو و اني ايدي على اليدة فتحتة لان ادري هاي تغريد ماكو احد غيرها يجي و ال سرهيد ما دام جُمارة يمهم

يعني محد منهم يجينة ، شهگت و هديت يدة الباب من باوعت

طولة طَب و طبگ الباب قوي يباوعلي مصغر عيونه

بلعت ريكي من الخوف و اديه ترجف امشي خطوة و ارجع خطوة

اريد احضنه و اخاف لا يريد ياخذ حيفة مني

بقيت اباوع لكلشي موجود إلا هو واگف گبالي بكامل أناقته

و جگارة جوزيه بيدة

عركة صوتها عابر الكاظمية بين عقلي و گلبي

لحد ما مثل كل مرة كلبي انتصر هديت كلشي و حضنته

مد ايدة على ظهري و حضني بالبداية بَس حط ايدة على ظهري

وراها بأثنين اديه عصر ضلوعي و دموعي نگعت قميصة

محمد : اخخخخ مشتاقلك لك مشتاااق

اني من الصدمة و الفرحة حتى ما اكدر أجاوبه بشي

بس اريدة يبقى و ما اريد شي ثاني

محمد : لك هيج تسوي بية شگد خسيس و نذل انتَ

بيك رس تغريد ، لا عمي تغريد ما غدرت برجلها

روز : انتَ هم عذبتني عذبتني موتتني

محمد : غرفتك وين

قفلت باب البيت بالقفل واخذته من ايدة و صعدته فوگ و اني اتلفت اخاف حتى من الحيطان

تفتن لتغريد و تكول الها منو اجه و اني حضنته

صعدته للغرفة يباوعلها و قفلت الباب بقى واكف عينه على الحايط الي

بي اسمي و اسمه مشخوط

محمد : شلونك ليش متغير

روز : شوكت طلعت من السجن صارلك هواي مو ؟

و هسة راح تسافر و تعوفني

- اليوم طلعت

روز : أخذني وياك متعوفني هنا حاچي تغريد من تجي و اني أتعارك وياها و اروح وياك

محمد : تـــؤ

روز : شنو تــؤ تــؤ لعد طلگنيييي

لزم زندي قوي و يباوعلي بعصبية خازرني

محمد : أشششششششش

بقيت ساكته و اباوعله نزع حذائة و شمر روحة على چربايتي دفر الغطة

برجله و وكع بالگاع فتحلي ايدة و اشرلي تعاي لميت شفتي اخفي الرجفة و الخوف الواضح عليه و مسحت دموعي بكل ثانية اتخيل الباب يدك

رجعت كذلتي وره اذاني و كعدت يمه عَت ايدي قوي و صار راسي

على زندة و اني متشنجة حتى النفس حابسته

محمد : خاف ناسي ترى الليل كله جنت تخلصة هيج

روز : ما مصدگة

ايدة على شعري يحركها و ساكت و اني هم ساكته فزيت على صوت دگة الباب شهگت و ايدي على گلبي و ارجف

محمد : اشتعلت عشيرة تغريد هاي هيچ مشكلة بيجن رعب

- اششش اششش

حطيت ايدي على حلگي اشرتلة يسكت و نزلت اركض فتحت الباب

و درت وجهي حتى اصعد

تغريد : هم راح تشردين بعدني ما اجيت عابت لخلقتج

خل اخابر على جُمارة يجيبوها

صعدت اركض و طبيت للغرفة قفلت الباب و رجليه كوه واكفة عليهن

هو متمدد و عايش اللحظة

محمد : تعاي نامي

- اششششششش

حجيتها و اجيت تمددت يمه كفخني على راسي

محمد : راح يصير بيك سكر چلب

حطيت ايدي على حلگة حتى يسكت باسها

حضنته و دموعي تجري مد ايدة لجيبه طلع ككو

انطانيا اخذته من ايدة و اني ساكته حتى هو ساكت

دگ تليفون بسرعة فزيت و ايدي على راسي من الخوف أدوره ويا

يجيوبه ضرب ايدي و طلعه من جيبة رفضة و قفل التليفون

و تغريد تصيح من جوه نزلت الها و قفلت الباب

وكفت أسوي عشا بيض و تغريد تغسل هدوم كملت

العشا و اخذت لفتي و سلة الهدوم

تغريد. : شعجب اليوم تأكلين

- جوعانة

أخذت السلة مال الهدوم و صعدت فوك شريتها و خلصت

نزلت جوه اشوف تغريد فرشت لو لا

من لكيتها فارشة تطمنت و صعدت للغرفة اخذتلةً

لفة لكيته غافي عفتها على الميز و نمت يمة بس اني بالكاع شوية

و كعد اكل اللفة و نزع قميصة و بإوعلي نزع قميصة و اشرلي على

الضوه كمت طفيته

نيمني على ايدة و بوساته تتجول برگبتي

محمد : نامت لو بعدها اريد اروح

روز : لا ما تروحً

حچيتها و چلبت برگبته باس خدي

فتحلي تليفوني أكلب بالصور مثل قبل وهو لامني بحضنه

روز : ابقى يمي

محمد : تضربك هواي تغريد

- مو هسة بهذيج الأيام لان جانت تشوف شكد اني احبك

و انتَ خطفتني تنهار و تضربني حتى أصحى

- و هسة صحيت بعدك

روز : لا ما أصحًى و لا راح اصحى يا وهمي

ضحك و لمني بحصننة بأيدة يلعب بشعري و اني فرحانة ما مصدكة

لزمت وجهة بأثنين اديه و اباوعله من عينه لأصغر شعرة بشاربه

محمد : ولك دللتك و اطبخلك و أنيمك

هذا كله و دكلهم خاطفني جا شكد ما يغزر بيك ملح

روز : غلطت اني بس انتَ تستاهل

حجيتها و حضنته و هو حاضني بس خايفة من تغريد

على ساعة و تدك الباب

شويه و صارت بوساته تنطبع على وجهي بست خده و نمت

نمت احلى نومة بحياتي حاضنته بأثنين ادية حتى من يكعد

احس عليه بكل ثانية يطبع بوسة بمكان بوجهي

بسته من چتفه

روز : مو تعوفني

نمت و احس بروحي اسعد إنسانه بالدنيا بعد شنو اريد

و حبيبي نايم بصفي ر طالع من السجن و راجع لحياتة الطبيعية كعدت

الصبح على صوت تغريد جوه فزيت بخوف لا تشوفه و ركضت للباب

أشوفه مقفول عدل لو لا

درت وجهي على الچرباية و الغرفة ما لگيت اله آثر

و الغرفة فارغة الباب المفتوح ، مديت ايدي على صدري المفتاح ماموجود

شلون وياك تاليها ؟

تجي تمسحهن دموعي

و عيني انتَ المبچيها !!

الثامن والثلاثون من هنا

تعديل المقال