رواية يا اجمل الوحوش الفصل الثامن والثلاثون 38 بقلم رسل فهد
لابُد الك يوم و تـرد
ديرتنه سَـدو بابهـا
والروح لمن إيست ، گالت تـرى
( اليتأخر إعله الفاتحة ما ينعد من احبابهـا )
- رُسل فَهد
....
" حور "
طلعت اركض اركض و عباتي براسي و أخافن أخافن
خايفة على فضة لا يعرف هي الشردتني و انطتني مفتاح الباب
الخلفي ، لان اليوم هو دمه فاير عَبن زِناد گدر ياخذ لشريك
اليريدها طب العصر ايدة اثنينهن على راسه
وهو يصيح زِناد كلشي يكدر يسوي زِناد احسن مني
و صعدت امه فوگ تهدي تالي كتلها بنص الغرفة و خنگها إلا أنا ضليت ابوي بأديه يالله هدها ، عجيبة الشيطانة
عجيبة اكبر شيطان على وجه الأرض
مشيت بنص الزرع اركض و ما ادري الأصوات منين تجيني لحد ما طر الفجر مشيت بسوگ و توها المحلات تفتح احاول ما ابين أنا شاردة
بس احس كل العيون كاشفتني
اشتريت لفة من رجال و رحت بعيد دورت مچان ما بي أحد
توني طلعت اللفة اريد اكل و اجه ابو الطلليام يسرح بيهن و أنا
اخاف منهن جثير خليت و شردت كعدت على الرصيف يم مره تبيع ماي و علوچ ايدي على خدي و أفكر منو عندي أمن روحي يمه و احسة صدك يستقبلني عصرت دماغي كله و ما اجه ببالي واحد
شردت شردت هاي المره شردت من سمعته يخابر يريد يأخذني
يبيع كليتي و يأكد على الدكتورة كون ما أموت لان هو ما يكدر يعيش بدوني !!!
ما يگدر يعيش بدوني وهو يريد يبيع كليتي حتى يدفع فلوس الفايز الاخذهن علمود يدفع مهر جُمارة و يتزوجها بس لان هي حب زِناد من الطفولة و زِناد يحبها و يريدها
درت وجهي على المرة الكاعدة
حور : خالة عليج موسى ابن جعفر شغلج شريف لو هم
تعرفين وادم ثانية و يأخذون فلوسج
- والله يخالة شريفة و شغلي شريف و يومية كاعدة بمچان
عبنهم محاربيني لان أنا مو منهم
حور : اريد أكعدلي بمچان أمان چم يوم و أنا ادفع فلوس
ضليت مقهورة و أنا أعاين لحالي ماكو غير الغربة اكعد يمها
عكب الأم و الأبو البنية محد بحالها
- شنهي سالفتج يخالة
بقيت ساكته و أعيان للدرب والعالم التمر كضيت عباتي و نويت اكوم
- ضلي هنا للعصر و أنا وياج اخذج
حور : هواي خل نرد هسة
لمت غراضها و أخذتنا كيات شمرتنا على الشارع و أنا و. المره نمشي
و ما نوصل لحد ما تكسرت رحليه جا اللع يساعدها إذا تمشي يوميه نفس الدرب وصلنه لبيوت خَرايب
- ضلي يمي اليوم و باجر اشوفنلج بيت
طبيت بلاية خوف أنا شردت من اكثر بشر يخوف بالدنيا
و كلشي غيرة ما يخوفني بعد
- أنا اليوم من الصبح صارتلي جثير عرضات وًكلت ما اروحن
تالي ختمتها بيج و رديت شنهي سالفتج يخالة
حور : خاله لا تسأليني عن سالفتي لأن أنا ما اريد أتذكرها
عليج الله
- هاي هي بكيفج
راحت للمطبخ البيت كله غرفة وحدة و كلشي بيها
دارت ماي من دبة كاتلها الوصخ لقوري اوصخ منها انقهرت
على الحجية هي تريد واحد يعينها
حور : خاله تعاي كعدي ترى انا توني ماكلة و ماشرب جاي
ما سمعتلي الظاهر تريد تسوي لروحها
- العصر اطلع للجيران و اشوفلج بيت قريب بي طابق ثاني
حور : خليني يمج و أنا ادفعلج إذا ما عندج احد
بقت ساكته معناها قبلت شربت كوب الجاي و اشرتلي على راسها
كالت راح انام سديت الباب وهو سرقي حتى مو قفل
أعاين للغرفة الضوه طاب من بين طابوگ الچينكو و الحديد
و داكين على الچينكو بطانيات و طايحات مچلب لو طرف لو طرفين
الحايط عبارة عن بلوك و دعاسيگ غراض مشمورة تارسة الغرفة
فراشها مفروش المرة اول ما تمددت كامت تشوخر
بقيت كاعدة الغرفة تفور و ما بيها بس البنكة تفتر
الظهر كعدت المره و كامت تلبس عبايتها برة
- شوية و اجي
حور : اروح وياج
اشرتلي يالله و هي راحت اشترت خبز و روبة
- عذريني يخالة بس والله هذا الموحود
حور : عليمن خالة والله احنه هذا اكلنه
رجعت للبيت وياها اكلت شوية و نامت ظلمت الدنيا و هي بعدها نايمه
احس روحي قفلت نعسانة فرشت عباتي و تمددت بالكاع
نمت عليها و غطيت روحي بيها
توني اريد أغفى و أعاين الباب انفتح و طفل بنص الغرفة اخترعت
صرخت و الحجية كعدت و الطفل شردت يركض
من بلوكه بالحايط موخرها وطاب من الفتحة مالتها
باوعت للمره بخزرة خطية رادت تبجي و و انفتح باب الغرفة .....
...
" عالية "
جاوب بساع شوية و وخر راسي بيدة عاينتله ضايجة
كام بساع ما يعاين دربة فتح الباب و طلع يركض طلعت ورا
لكيت اسلام و سلام جوه يردون يطلعون
ام سلام : شكو ولكم يمه شكو
نزل خالد يركض طلع وراهم هو و مصطفى و ما گالوا وين رايحين
طلع أبوهم وراهم و اخوتهم الصغار و احنه كلنه واكفين بره
محد يعرف شكو
ام سلام : خاف طلابة من طلايب زِناد لان احنه ما نهيد
دكت جدة على تليفون ام سلام بساع جاوبتها عود تريد تنفجر بوجها
ام سلام : يمة محمددددددد شجابة
جرت عبايتها و طلعت وراهم تركض
آريج : صخام الوجه شلون يجي بلاية ما يگول مو يدري دمة مهدور شني ما يريد روحة
عالية : يعني شنو هسة شراح يصير
سلوى : ان شاء الله ماكو شي
طبينه بالهول كاعدين نلوب و عَينه على الباب
تأخروا جثير صعدت للغرفة اخذت التليفون دگيت على علي ما جاوبني
بقيت اروح و اجي لحد ما صارت هوسة جوه نزلت اركض
اجوي كلهم و وياهم محمد أنا ما اتذكر شكله و لا اعرفة إلا من چنه صغار لان امي جانت ما تطلعني حتى من تروح ما تأخذني
كعد بنص اخوته و امه كلساع تبوسة و ترجع تكعد بمكانها
عمار : انتَ غبي من تجي غير تكول غير تفك حلگك
ام سلام : يالله كافي المهم رد النه سالم حاچي زِناد بلكي يروح الهم يشوفهم والله ابيع ذهبي و ذهب چنايني
محمد : شلونكم
يحجي و بيدة جهال اخوته بحضنه كلهم بس أبن آريج نسخة من عنده
وهو يسويله حركات الطفل يسنكر من الضحك
محمد : سلام هذا ابنك طالع عليه طبعاً ماكو شي بلاش
لو ما أنا ما يصير عندك هيج ولد حلو حَرك جيبك
مرتضى : هو بس انتَ حضك كاعد وي جدتي و طلعت عليها
يعني احنه ١٢ وي البنات ماكو غيرك طلعت عليها
محمد : چا طبعا الله يعرف شلون يقسم
خو ما يحط الشگار بوجهك شتطلع
- طاح حظك
بعدهم يحچون و محمد ضرب مرتضى عَلابية
محمد : اخوك الچبير و تاج راسك
كامت رحمة للمطبخ سوت شامية و كلساع تجيب الهم طاسة جبيرة و يخلصوها و راحوا هادي و حسين اخذوا من امهم فلوس و جابوا قواطي و حَب و لنص الليل كلهم كاعدين يسولفوون و يضحكون
احس روحي نعست كلش صعدت فوگ نمت بسرعة و فزيت
على لحيته تچكچك خدي
عالية : اممممم هسة مو نايمةةة
علي : النوم يروح و يجي بس شبگتك ما تتعوض
ضحكت و شبگته شوية و وخرت
عالية : وخر وجهك وليش ما مزين لحيتك ترى كلش تچكچك
علي : ولج من نريد ننزل گبلها بيوم ما نضربها موس لان ملينه تزينها اليوم تطلع ثاني يوم نگول راجعين للبيت
بعد عليمن ما ادري اكو ضابط هم ينتظرني بالغرفة
عالية : يعني ترى والله لان تضوجني هسة شواربك حلوة
بس لحيتك لا لو تزينها لو تطولها بس لا تجي يمي لحد ما تطول
علي : شو تتأمر انتَ
بسته بخدة و دفنت راسي برگبته ضِحك و لَمني بحضنه
عالية : ليش ما يسوولكم غرف و كل واحد يلتحق ياخذ مرته ويا يشتغل و يجي يمها هم هو ما يفارگها وهم هي
علي : وهاي هيج انتَ تشتاقلي
عالية : جثير والله حتى الأيام الانتَ بيهن يخلصن بساع و من تروح يصير اليوم شطولة بالگوه اريدة يخلص ما يخلص
علي : أموت أنا على الشلولو مالتي
مشغلين مبردة و لان وجههة على الزرع يصير الهوى اليجي
من الزرع بارد و مسوية الغرفة جِلاب ، طرف اصابيعة يمشي على ظهري غمضت عيوني لان جسمي رِخى
علي : مو أكلك ما تتحمل انتَ تسيح بساع
يالله نام باردة
نمت و أنا شابگته شبگة مطلعة شوگ العشر ايام الراح بيهن
كعدت الصبح راسي على صدرة شعري مفتوح و هو نايم عليه
سحبته على كيف ما گدرت و لا يهون عليه اكعدة بقيت أعاين على الغرفة و جمالها الصبح
تحرك شوية و جريت شعري من جوه هو خفيف النوب تهلس لميته
و طلعت من الغرفة غسلت وجهي و طبيت لكيته كاعد
عالية : تتريگ هنا لو جوه
علي : جوه لان محمد هنا
حجاها و گام يبدل حتى ينزل فتح الباب راد يطلع رجع عليه
باسني و طلع
نزلت ورا و لكيت امه تصيبهم چـاي و فرحانه بيهم
ام سلام : ولك حميدان عاينت غرفتك شكثر حلوة ناقصها بس المره
محمد : اي والله يمه ما ضل شي لازم اتزوج بس أخاف عليها أنا لا ذولة يشمون ريحة خبر و لأني مچتول و تترمل اول ما
أخذها
صاحت بوجهة و ضربته على ايدة
ام سلام : كش و غدي منككككك على هاي الأفكار ولك اسم الله عليك ما يصيبك مكروه ان شاء الله
محمد : الله يحفظج يمه
ام سلام : اروح اخطبلك اليوم أنا بيومين اكف كلشي و أجهزها
محمد : لا يمة ما يحتاج أنا مجهزها وياي
ام سلام : شنهييييي يعني شني تعرفها
- جا شلون ما أعرفها انتظرتني طول هاي السنين وين
الگة مثلها وحدة
ام سلام : ياهي هاي و منين تعرفها مو گتلك أنا اخطبلك من خالاتك عود شبيهن خالاتكم ما تردون منهن
محمد : يا خالاتي يمة والله انتِ بطرانة
أگلج إذا يمر اسمي عليها و هي نايمة تفز و تردين اخذ غيرها شنو مخبل عاقل أنا
ام سلام : شني لا والله أنا كل أملي بيك انتَ ما تكسر حچايتي و هم تجيني عاشگ ولكم انتو شنو
محمد : شبيج يمة اليوم لازم ابوي آمس مقصر
علي : لا هاي يومية امك هيج
محمد : جا أبوية خلصان ينرادلة طبيب انتو شبيكم اغبياء
ما تشوفون امكم تجاوش و تريدلها عركة
ضربته امة و عضته من ايدة
ام سلام : والله فلا تستحي و لا تخجل
محمد : لا والله قصرتي لو مخابرتني و شاكيتلي
ام سلام : انجب شكثر دگيت عليك ما تجاوب
علي يضحك بصوت عالي و محمد يضحك وناصب على امه
و هي تحير تسكتمن
محمد : لا جا لو ادري هلكد الموضوع مهم چا
حاربت و جاوبتج
ام سلام : حاربت چـا وين جنت بالمعركة
محمد : لا والله بالسجن يمه
شهكت و كالتله والله صدك أنا كلبي جان حاسني انتَ بالسجن
علي : جذاب خيولي
محمد : لا صدك هسة عليمن أجذب شني خايف
ام سلام : ليش ولك بالسجن شسويت
محمد : والله چنتچ ضوجتها و سجنتني
ام سلام : شنهييي ولك أنتَ اليوم تضحك عليه لو تحجي صدك
علي : مو جاي اكلج جذاب
- والله موجذب اعرفنة هذا صلف و ما يچذب و ما تتزوجها لو تموت إذا طلعتها سالفتها صدگ إلا أنبشها و اعرفها ياهي
محمد : لا عليمن تنبشين انا راح أجيبها و اجيج
ام سلام : والله لو تموت على جثتي ما تجيبها أنا حاطتلك وحدة ببالي تلوگلك جثير و تستاهلك
محمد : محد تستاهلني غير ذيج
امهم انهارت عليهم تحجي و أنا كيفت حتى تهد ياخة مني و الله
يساعد الچنة الجديدة الراح تاخذ محمد منا لمن يتزوج خالد
كعدت بالمطبخ اعجن لان شيخلصني منها اليوم
آريج : الظاهر راح تنفتح صفحة جديدة بكتاب هذا البيت
و تطب الضحية الخامسة
عالية : الخامسة السادسة المهم أنا اخلص و ارتاح
آريج : و ياهو كال انتِ ضحية عمي انتِ ياهو يكدرلج
بقو بالبيت ما طلعوا حتى علي شلت المعجنة و صعدت شكد اكره الخبز بالصيف ما ينجرع النار تشب من كل الاكتار
علي : اوكفي أنا صاعد
شال المعجنة مني و صعد وگفت أشنگ و اشرتله افتحلي التنور
راد ينزل بس من عاين عليه شلون أخبز و اصفگ الشنگة بيدي گعد على الدچة و صافن عليه
عالية : انتَ صافن و أنا جذي مسموط بالحر
علي : اجي اخبز وياج يالله وخري
ضحكت أهز بيدي و اطلع الخبز من التنور اجه اخذ من الصينية
كرصة ياكل بيها
عالية : هسة امك دگول صعدلها للسطح يسد عليها وحشتها
علي : ههههههه و عاينت مصعد المعجنة
نزل و انا ورا كملت الخبز و نزلته صعدت اركض فايرة روحي عاينت حتى الغرفة ما مرتبتها سبحت بساع و طلعت نظفت الغرفة و عطرتها
و وكفت أمشط و أرسم بالكحلة من يوم الحطيتها حبيتها
و هي شكد تبچيني
حطيت عطر و خليت الشال على راسي اجيت اريد افتح الباب
انفتح گبل لأ امد ايدي طَب هو يريد يشحن تليفونه
عاينلي مصغر عيونه و يعاين لعيوني
علي : دهر فَـرچ
عالية : تسبح لو وره الغده
علي : اليوم اتغدة بيج أنا
ضحكت و بقيت واگفة يم الميز راح شحن التليفون و اجاني مَد ايدة على الباب سَدة و جَرني من خصري يم الباب
عالية : شو ما زينت لحيتك
علي : و انتِ شنو تحاسبيني
عالية : أحاسبك طبعاً غير اني مرتك
بعدني أحجي و سِكت حَلگي بـ بوسة منه ادفعة بأثنين اديه
و هو و لا يَمة لحد ما هدني من أختنگت
عالية : شمالك
علي : عطشان و جابوله گلاص ماي
فتح الباب و ايدة على ظهري قفلت الباب و نزلت ويا
جَاي يصبن و رحمة تنگل
ام سلام : بالليل خالاتكم هنا عشاهن أنطوني كل واحد عشرة ما عندي
خالد : هلا بيهم ولو هن يكعدن هنا اكثر من بيوتهن
عمار : انجب متستحي باجر تكبر هيج ترحب بضيوفك
آريج : لا هلا و لا مرحبا كون
اني آكل و شايلة هم لا تجي هدى و ذيج خالته الصغيرة
اكلت شوية و صعدت فوگ هو تأخر يالله صعد لان كلهم جوه
اخذ هدومة و راح يسبح و أنا احاول ما أشيل هم بس ما اكدر
اجه تمدد بصفي شال ايدي و خلاها على خدة
علي : زينتها سيدي
ضحكت و بقت ايدي احركها على وجهة و أعاين لعيونه
عالية : اليوم تعشى بره انتَ مو ما تحجي وي خالاتك
علي : ليش ما احجي وياهن لا أحجي
عالية : اي بس اطلع وي جماعتك شعندك هنا اصلاً انتَ
اليوم ما طلعت حتى الصبح
أنا احجي وهو مبتسم كوه ضام ضحكته
علي : ما تحبيهن چي طَرحن أبنج
عالية : خاف النوب أنا چي چذبت بسالفة الخلفة
الله يعاقبني و يحرمني من الجهال
ضحك و ضربني علي رجلي
علي : لا هسة يعوضج ببدال ابنج الراح
عالية : اهو هسة كافي
يگلب بالتليفون و يضحك رفعت راسي و مديت ايدة خليت راسي عليها
سحبني اله أكثر و أعاين ويا بالتليفون
طبع بوسة برگبتي ، قربت راسي على رگبتي حتى أبوسنه
عاينلي مصغر عيونه سويت روحي ما لچحته اول ما عضيته
لزم حنچي بيدة و وخرني طَفة التليفون و عض خدي صيحت و حطيت ايدي على خدي
علي : تردين تسويلي آثر ولج شَلولو
عالية : لا بس أبوسك شمالك
- عليه ولج تمشيهن ذني عليه
حط ايدة على بطني يفرقوني و أنا اضحك النوب خله راسة
بركبتي و أنا حايرة بين الضحك والوجع لحد ما هدني نمت بساع
كعدت لكيته يمشط يريد يروح
عالية : شوكت تجي
- گبل العشه غير
- جيبلي وياك حلويات
- صار
فتح الباب و طلع بره كعدت عدل اسمع هوستهن جوه
كمت بساع الم بشعري اخذت الحمرة من الميز فتحت القبق اريد اخلي
شهگت و أنا أعاين لرگبتي صايرة نياشين
هديت حتى الحمرة و أنا أتلمس رگبتي مخترعة
حطيت الشال على راسي و ادردم على علي دكيت عليه بساع جاوبني
علي : هااا
- سلامتك من الـ ها أستاذ علاوي هاي شني رگبتي
- ليش شبيها
- يعني ما تعرف
- ههههههه يالله لفي الحجاب زين
سدة بوجهي و انا متحلفتلة حَطيت حُمرة و نزلت جوه ما سلمت عليهن كلهن رحت للمطبخ آريج و سلوى متحزمات يطبخن و فاطمة راجعة وياهن
- جا وينه محمد ما شفنا
ام سلام : نايم كبل شوية صعد اخوته چانوا يمه
هسة يكعد و ينزل رجع البيت نَور من إمس لليوم
- زوجي حتى ما يسافر
رحمة : خالة هو يحب وحدة ويريدها راح نزوجها اله
ام سلام : انجبيييي والله لو يموت ما اخذها اله ابو گال
روحي خطبيلة و ينچب ويسكت النوب يجيبلي وحدة مدري منين و تعاي تحملي الناهبة و الصلفة و المگطمة
اريج و سلوى وحدة دارت وجهة على الثانية
عالية : انا الناهبة تذكرني اول وحدة لازم
انفتح باب المطبخ و طبت هدى و اخوها الصغير راحت تركض شبكت خالتها و كامت تبجي
ام سلام : اجيتي يبعد خالتج و عمرها امج ما اجت
هدى : لا ما رضت زعلانة و ما خلتني اجي وي فاطمة
تالي هسة رضت و دزتني
ام سلام : يالله أنا اجيب محمد و اجيها باجر
ما الي حظ بيجن يخالة جلبت بدية و رجليه و رحتن من ايدي
- طبعا جا ذني فقيرات وين يصمخن وي ولدج
انتِ ولدج عدهم الشريفة و يچلبون بيها هاي التدزدز
صور بالگرويات
حجيت و أنا واكفة بالمطبخ
عالية : خو ما حفظتن الصورة عفية أحذفنها لان علاوي ما يرضى واحد يشوفها و أنا دزيتها لان ادري بيجن ثقة
- الزلمة راد من الدوام و انتِ حاشرة روحج بحضنة
ما دري مشربته منوم
عالية : هههههههه لا حُبي أصلا يريد يلتحق چان مو توه راجع بَس هو ما يگدر عليه يعني ليش ما تقتنعن
ام سلام : عابت هاي الخلقة و بِلت ولجن والله لا بحالها
و لا يگلبها بس يگول يتيمةو جاهل دمعتها تكسرني
شني ما تعرفن علاوي انتن
- اي والله هاي المفلوگة نايمة بخوانيگ الزلمة مبينه
رحمة : حتى من يجي من الدوام توكفله بـ باب اهلها خاف
يجي و ما يمر عليها
ام سلام : اي والله صَدگني لا بحالها و لا يگلبها بت عمة
و ستر عليها چا شيسوي
وكفت الهن متخوصرة و أهز برجلي هن يحجن و يدرن بروحهن
وحدة تجذب على الثانية بس مستمرات
فتحت الشال لامه و اشرتلها على رگبتي
عالية : چا هاي منو مسويهن إذا ابنج مو بحالي
شهكت و هن حتى الكاعدات گامن يعاينن عفتهن و رحت للمطبخ
اريج و سلوى يخوطن بالجدورة و خربانات ضحك
هن سكتن و كامن يحجن بصوت ناصي
و أنا بالمطبخ الگط الخضرة
آريج : هسة دكللهن هاي هي حاطة ضلال بنفسجي برگبتها
سلوى : انهجم بيتج والله خوش توقيت
و أنا واكفة اجتي عمتي فايرة
ام سلام : يالله لج امشي عجني و خبزي ما يكفي هذا الخبز
عالية : وشني أنا مو الظهر عجنت و خبزت
- و تراددين فوكاها ، امشي يالله
فتحت البوري و خضيت ايدي بعصبية هي راحت حسبالها
راح اكعد انخل و اعجن خليت و صعدت فوك للغرفة
قفلت الباب و خابرته سويت صوتي مهضومة بساع جاوبني
علي : الو
عالية : علي عود شنو هاي شيسمونها
- شنو
- عاينت اليوم شكثر روحي فايرة من خبزت و محد بحالي
هسة امك دكلي الخبز ما يكفي امشي عجني و خبزي بعد
شنو أنا خدامة
علي : تــــؤ اصلاً إذا خبزتي اكسر راسج
كليلها علي راح يجيب ويا خبز
عالية : جثير احبك
- اموووت عليج
سديت و طلعت من الغرفة نزلت امه عاينتلي بساع
ام سلام : يالله شوكت يختمر العجين بعد
عالية : ما اخبز علاوي راح يجيب ويا و گالي أكسر
راسج إذا خبزتي ، إذا ما تصدكيني خابري
بقت تعاين لاخواتها تريد كوه تثبت الهن هي ذالتني
صبيت بالماعون من مرگة الطرشانة المسويتها آريج تخبل طبت امه
جرت الماعون من ايدي و رجعته بالجدر عوجت حلگي بس بداخلي
انهضمت جثير
هديت كلشي و صعدت فوگ گبل لا اوصل الغرفة نزلت دموعي
عَزت عليه نفسي شلون جرته من ايدي و هو شگدوته
نمت على مخدته و سالت كحلتي عليها و ما وخرت لحد ما انفتح الباب
فزيت من عاينته هوَ كعدت عدل أوخر بوجه مخدته لان انترس صخام
حط علاكة الحلويات على الجرباية و اجه علية لزم حنچي يعاين لعيوني
علي : شبيج منو وياج
هزيتله راسي بـ لا يعني محد
مد ايدة على عيوني يمسح دموعي و عاقد حواجبة
علي : حاجيني منو وياج و كومي غسلي يالله حتى تتعشين
عالية : ما أريدن و لا أكل والله
- ليش حبيبي
- كتلك ما اريدن يعني ما اريدن
جر ايدي و أخذني للمغسلة برة حتى اغسل وجهي و رحمة تدگ بـ باب
غرفة محمد لان لسه نايم وكفت غسلت عيوني و وجهي نشفتهن بشالي
و طبيت للغرفة هو وراي
علي : شبيج بداعتي
عالية : چنت جوعانة و صبيت شوية مرگة بالماعون
- اي وشكو ؟
- اجتي امك كدامهن جرت الماعون من ايدي و رجعته بالجدر
مسح وجهة يستغفر
علي : يالله لخاطري ما تعرفين امي من يجن خالاتي
عالية : لا أنا مو مجدية و لا ما ضايگة اكل تفشلني كدامهن
هو ماعون شگدوته
علي : امشي وياي هسة
هزيت راسي بـ لا وهو حلف إذا ما انزل اكل هو هم ما ينزل
و عاندت قصص وروايات عراقية كرار صلاح ما انزل صعدتلة امه كاللها ما اشتهي مأكل يمة هي ملت منه
و نزلت
وره ساعة يالله نزل سمعت صوت ضحكهم بالهول طلعت من الغرفة
نزلت جوه ضليت واكفة يم الدرج هو كاعد يم محمد و يلعبون بالتليفونات سَلموا على خالاتهم و رَاحوا لجدة
صعدت اكل من الحلويات و هو اجه متأخر
علي : داگني الجوع و هسة حتى لو اكلج ما اشبع امشي
سويلي اكل
نزلت اسويلة لكيت آريج ضامه حصتي مثل كل مره حميتها اله و هي
و محمد و رحمة كاعدين بالهول تقنعه تخطبلة هدى لو بت خالته الثانية
محمد : يمه انتِ صدك تحجين انتِ شايفة جمالها
شايفها فهاوتها من تحچي شايفة جسمها
صَوفـر و امه ضربته
- ولك ابوك نايم
محمد: و علي يمة هسة انا زعلان عليها جاي تدگ عليه ما أجاوبها بس هيج كوه لازم روحي گلبي ممرود مرد
رحمة : خل نعاينها خوية حباب
- لا ما عندي صورتها
ام سلام : ليش ما تحاجيها لان طببتك للسجن موووو
محمد : ههههههه اي و أخاف منها هم يمة هي فاهية
بس بطولاتها تطلع وياي اللسان هاطولة
- امدة حظي ييمة إذا كلكم تخافون من نسوانكم
ولك هاي بعدك ما مآخذها
اخذت الصينية و صعدت هو ياكل بس أنا ما مديت ايدي
لان شبعت حلويات
علي : وداعتج ذني كلهن يصيرن سوالف و أجي للغدة
الگاج انتِ مسويتلنا أنا وياج وجهالج نكعد سوه ناكل
عالية : هذا حلم و ما ضنه يتحقق
علي : افاااااااا والله عيب عليج
تمددت بعدة الموقف حاز بخاطري و هي شكد مسوية مثلة بس مدري ليش هسة أنا صايرة اتأثر اكثر من گبل نزل يودي الصينية و صِعد
فتح الكنتور و أنا أعاين للتلفزيون
اجه تمدد يمي و جر ايدي بَاسها و عاينت يخلي حلقة بأصبعي
هاي الحلقة مرة لچحتها من ردت أحرك گلبة و طشرت قمصانه
صغيرة و جثير حلوة و مچكنمة
علي : هاي من اول ما اشتغلت بالمعمل و گمت الم يومياتي
اول شي اشتريته بحياتي و ضميته هو الج
بلعت ريكي عاينتله و اني مدري وين أضمه لا انحسد عليه
عالية : اليوم يصيحن هو اصلاً ما يحبها
و أنا أشيل روحي و الطشها بالگاع
علي : هسة انتِ شعليج بيهن ما دام الج الصافي
عالية : مو يقهرني
علي : كل ما يقهرنك تعال اشبگني و معليك
- اي حتى من تلتحق تعيرني
ضحك بصوت عالي و مد ايدة على الريمونت يطفي التلفزيون
و انا اضحك لان ايدة على بطني يقرقرني
خَله ايدة الثانية على حلگي ...
جَر الغطى و خلاه علية
علي : لا تتمرضين
عالية : طفيها بردت
علي : هسة ادفيك
خنگني بالغطى و شبگني بأثنين اديه لحد ما غفيت
و أنا على ايدة فزيت على عياط و هو هم بساع فَز
الدنيا فجر و وي صوت العياط صار الأذان يأذن
انفتحت كل بيبان الغرف و كلها تصيح شَكو ..
ظلام العَم على الديرة
أضـن ما راح يتركها ..
...
" جُمارة "
فرحت من سمعتها صاحت
لان ما چنت ادري منو الراح تاخذ مكانها بقيت طبيت يم جدة اركض
جانت متمددة و اخترعت من طبيت للغرفة
رهينة : ما تعرفين تفتحين الباب عدل ، شبيج شسوالج زِناد
جُمارة : شيسويلي يعني شحدة
- شنو شحدة تراه يكسر راسج و ما تحجين
- ديالله روحي شوفي حور شردت
لطمت جدة على خدها و كامت طلعت اني نمت مبتسمة و فرحانة
و كل شوية أفز على صوت جدة تلوب الليل كله
جُمارة : هسة شنو ما ننطمر جدة نامي يالله
خلي البنية ترتاح منكم و من قهركم
رهينة : ولج احنه شلنه غرض غير هي و رجلها
جُمارة : جا هو شون رجل والله لو ينطوني فوكا مليار
ما اخذة كش و غدي
رهينة : طبعا جا الينفتح كلبها على حب مثل حب زِناد وين
تحلى باقي الزلم بعينها عمت عين حظج
جُمارة : اني سامعة الأخوات بينهن غيرة و الجنانين
و الحموات بس جدة تغار من بت ابنها هاي اول مرة تمر عليه
رهينة : ولج جُمارة جفيني شرج أنا روحي تايهة
جُمارة : يالله جا فكري بصوت ناصي جدة اريد انامن
- نامت عليج طابوگة
- اسمها زِناد
جدة انصدمت من صلافتي على أساس اني ما طالعة عليها
شالت الكوشة و شمرتها على وجهي و اجتي شايلة عكازتها
رهينة : نامي ولج ما عاينت بت بصلافتج
خل اروح لتغريد تقنع تطيج لا تصخمين روسنة
جُمارة : لا لا تخافين شيخج ما تطلع منة العايبة
رهينة : إلا وياج ولج ادم نبي و مرته خلته يطيح
زِناد ما ينحلف فوگا هم يسوي الانكس
- والعباس إذا ما اكله اني مو جُمارة
- كليلة و أنا اكله اعلى الطابوكة التنام عليج شسمها
بقيت اباوعلها ساكته و خايفة لا صدك دكولها و تفشلني
جدة طلعت من الغرفة و اني رجعت نمت الصبح كعدت
على صوت صياح بالهول جريت الشال و طلعت لكيت عمامي كلها
و امجد و زِناد واكفين غسلت وجهي و اشرت لنورس شكو
- ولج غير حور شردت
هزيتلها راسي عبالي اكو شي جديد اطل على هاي خوش
مصيبة
ردت أطب لغرفة جدة و درت وجهي على صوت زِناد
- جُمارة يالله بدلي بساع امج تريدج
- اي
طبت جدة فتحت الكنتور و تحط النه غراض بالعلاليك اني و روز
رهينة : هذّني ثياب روز موش تنسيهن
هزيت راسي و اني خانكتني العبرة ما اريد اروح لبغداد
اريد ابقى هنانة يم امي راسي يهيج عليه و محد بحالي
حطيت هدومي بالجنطة و سديتها جدة فتحت السحابة و تحطلي حلويات من الخانة مالتها ابتسمت بوجها و جدة كامت تبجي
و نزلت دموعي وياها
رهينة : ولج خلصت عمرها تغريد تقنط عليه شوفتج
چي تدريني اشم بيج ريحة يعگوب
جُمارة : لا تتأخرين هم تعاي اخذيني مو تنسين
رهينة : صار والله تدللين
لبست الصاية الجديدة الما خلاني البسها بالخطوبة
و عدلت الربطة و بقيت كاعدة بالغرفة منتظرة يكول يالله
دزيت العلاليك و الجنطة بيد زهرة و سرى لان الكشخة
تخرب إذا تشيلين غراض هواي
زِناد : يالله
وكفت بساع عدلت روحي على المرايا و طلعت الكعب صوته عالي
حضنت جدة و بستها طلعت وراي عمامي منهارين و يباوعلي كلهم خازريني باوعت لزناد اشرلي يالله طلعت ورا و احس أطگ بالكعب على أعصابهم گبل لا اطلع من باب المطبخ سمعت عمي عمار صاح بجدة
علية
فتحت باب السيارة و صعدت الدنيا حارة تفور بين ما طلعت من البيت للسيارة و احس روحي بَوخت فتح البريد بالسيارة و اني اهفي لوجهي بأثنين ادية وَجه فتحة التبريد على وجهي و حَرك السيارة
زِناد : هذا اللون ما لگيتي غيرة
جُمارة : لا لكيت بس ما عجبني غيرة
بقى ساكت ما جاوبني يسوق و طول الطريق ما حِجة لحد ما غفيت
و كعدت على صوته احنه بـ باب البيت
زِناد : شني ما تشبعين نوم
جُمارة : سيارتك بيها سحر
فركت عيوني و نزلت نزل الغراض خلاهن بـ الباب و فتح محفضته
جُمارة : ترى اني أعرفك انتَ مو كريم بس لان جدة كالتلة جُمارة تحب الفلوس كمت تنطيني حتى احبك
لا تخاف ترى هسة وصلت مرحلة احبك بدون فلوس
ابتسم و وهو يطلع فلوس من محفظته و يحاول ما تبين اسنانة
لان هو ضايج على سالفة حور و شايل همها
زِناد : دخذيهن و طبي يالله
جُمارة : و شرفي ما أخذهن شگالولك عليه جوعية مال فلوس
خلاهن بالجنطة مال هدومي و قرب اصبعة لشفته بمعنى اش
فتح باب السيارة يباوعلي و حتى عينه ما ترمش مثل الي يريد يشبع عيونه قبل لا يروح بلعت ريگي و ابتسمت رفعت ايدي اشرتلة بَاي
زِناد : ديري بالج على نفسج
هزيت راسي بـ نعم و حرك السيارة وراح ضلت عيني عليها
ايدي ما تريد حتى تدك باب بيتنه تريد ترجع للعمارة ،
دكيت الباب فتحتة روز وجها ما تتفسر أحوالة حضنتها و اول ما حضنتها الدموع كامت تجري باوعت لمكان امي ما موجودة
جُمارة : شبيج ولج و امي وين
روز : راحت للكاظم تزور اليوم احد
جُمارة : جا شبيج ؟
هزت راسها بمعنى ما بية شي طلعت الها الثياب الدزتهن جدة
تبتسم بس مو كلش فرحانة صعدت الهدوم و نزلت جوه روز بالمطبخ تگلي بيذنجان للغدة
روز : يعني واحد يوكف يسوي اكله ما يطيقها
جُمارة : يالله على أساس شلونه طبخج و بعدين شبيها
مرگة البيذنجان اموت عليها
اندك باب الشارع اخذت السجينه من روز اگلب البيذنجان
و هي راحت تفتح الباب غمضت عيوني من سمعت
تغريد : وعلي اليوم يا رهينة إلا اخزيج انتِ و ال سرهيد
مسويني مضحك و جُمارة إذا لزمتها إلا أذبحها والله هاي المستهترة الادبسز
روز : اجتي جُمارة
طلعت من المطبخ اجيت اسلم على امي خازرتني شلعتني شَلع
تغريد : بعد وكت جان ضليتي هم زين تذكرتي عندج ام
بقيت ساكته اخاف أناقشها و تگب عليه هسة تكتلني
بقت كبريت لحد العصر و روز متغطية ما تكوم من فراشها
نزلت جوه لكيت امي تخابر و منفعلة من سمعت اسم امجد عرفتها هاي عجيبة النوب خفت لا دكللها علية من رحت اخذت فضة
سدت التليفون منها و اني بالمطبخ اسوي جاي و حليب
حتى اكل وياهن بسكت من الحاطتة الي جدة بالجنطة
و السبلت مشتغل كعدت بالهول
تغريد : شلون نسوان مستهترة حتى العدها رجل ما تركد
جُمارة : هو شلون رجل شايفته شيسوي بيها معذبها تعذب
- طبهاااا مرض هو أصلا طلگها شيسوي بيها النوب هاي المودة الجديدة تتعارك هي و رجلها تشرد شو شبعنة
ضيم من الرجولة
جُمارة : يمة لو شبعانة ضيم من أبوية جان اول ما خلصتي العدة تزوجتي ما بقيتي تنتظري هلكد
تغريد : انجبي عود تفتهم هي ولج هو ابوج غير اني جنت احبة و امشي على مايه لو غيري من جان من اول يوم طلگها
راحت للمطبخ بيدها كوب جاي
- ما بقى حليب
جُمارة : لا والله يمة هاج هذا كوبي
شربت اني الجاي و هي اخذت الجاي بحليب بقينه نسولف على بيت
جدة و تنهار امي كل ما أدافع الهم لحد ما هاج عليه راسي صعدت فوك
لكيت روز حاضنه روحها و تبجي
ما سألتها شبيج لان اني هم ما الي خلك
كعدت بالليل على صوت روز تبجي كعدت لازمه راسي افرك بي
جُمارة : شبيج مدكليلي
روز : لج اجاني اجاني و عافني وحدي راح ما ادري
جُمارة : يعني طلع من السجن
روز : اي و تليفوني طافي شاحنتي ما تشتغل
بقيت حايرة و صافنة حتى لو اريد اخابر زِناد و اسأله ماكدر لان تليفونها طافي و ماكو مثل امي من تحط شغله ببالها و تضمها
بحيث حتى من تنام التليفون يختفي من الوجود و من تشحنه كون هي كاعدة يمة
جُمارة : لو تندلين مفتاح غرفة امير بيها فلوسي و شاحنة و تليفون و اي و هايهية
- و شنو بالله
- وياهن غترة زِناد بس اخاف من امي لا تشوفها
تغريد : رووووووز
باوعتلي روز بخوف مسحت دموعها و نزلت جوه نزلت وراها
امي كاعدة بالهول و لابسه جادر الصلاة معناها امي عدها
جبير ما دام كاعدة هاي الكعدة
كعدت روز و اني رحت للمطبخ اشرب مي و ادور
بالكاونتر بلكي اكو براسيتول بقيت واكفة بمكاني من سمعتها كالت
تغريد : اثنينجن اجوجن خطابة و اني اريد ازوججن
هم يالله تشوفن حياتجن و تخلفن
روز : هم رجعنه تغريد لنفس القوانة مو كتلج اني ما اتزوج
تغريد : ليشششش شنو بكيفج السالفة اني امشي بمزاجج
انتِ و ذيج
جُمارة : حتى اني يمه ما اريد اتزوج ترى و لا مفكرة
تغريد : انتِ بالاخص تنجبين و تسكتين اجتج خوش قسمة
راح ياخذج يسفرج و تكملين دارسة بالخارج هسة شحصلنا
احنه من العراق
جُمارة : مو خطبني زِناد ليش ما قبلتي
تغريد : هم كالت زِناد هم كااااالت
حجتها و اجت عليه منهارة جرتني من شعري
- انسيييي انسيييي جاي اكلج انسي زِناد لا تجيبين طاري اسمه
جُمارة : ليش يمه ليش احبه
ضربتني راشدي و انضرب راسي بالحايط شالتني روز و هي تصيح على امي و تغسل وجهي تمددت على الكرويته و روز يم راسي
روز : مو كلشي ضرري ضرررب و شبي زِناد مو يحبها
و تحبة و اجه خطبها و لغة حتى النهوة بعد شتردين
تغريد : انتِ تنجبين و تاكلين نعل تتزوجين و اكفج النوب أزوجها و الله اذبحها التفتح حلگها و تعارض اديسزيات
ما يرد روسجن إلا احفاد سرهيد
لبست عبايتها و طلعت من البيت
صعدت روز بيدها سچينه تحاول تفتح القفل مال غرفة امير
بس اني مأيسة تفتحه لحد ما سمعت صوت الباب انفتح
صعدت الها اركض وهي تدور على التليفون و الشاحنه
طلعتهن و اخذت الجنطة الي جانت بيها فلوس و فترته ضميتها بهدومي
سدت الباب و شحنت التليفون طلع حتى تليفونها نفس الشاحنة
روز : والله والله إذا ما يجي يأخذني اتزوج
جُمارة : متشوفين بقى عاقد عليج و انتِ مضحك قبلتي
لان يدري إذا يتأخر تتزوجين كال الزمها بعقد حتى ما تتزوج
بقت تباوعلي صافنة
روز : وعلي اكول لتغريد اخليها تذبحة
جُمارة : تذبحة و تذبحج
سمعنا صوت طبكت الباب ضمت روز التليفونات و الشاحنة
صعدت النه انطتنا لفات و تحجي بهدوء على جاراتها و وهذا الضابط الي من خطب روز خطفها محمد الخميس العرس مالته
تغريد : خيولي لو يعرف الأصول يكول مرتي ما ينام الليل
إذا ما يرجعها مو ثاني يوم يشيلون أديهم
جُمارة : حقة يعني اكيد اكو واحد يحبها و ما يرديها تتزوج
تغريد : خيولي راح اجيبلها إغاته
روز : منو بالله
- ابن ام تحسين الصغير
- ايييييييع هذا ابو شعر المصبوغ بنفسجي
تغريد : ولج لا صبغ البنفسجي و هسة شعرة اسود و صاير خوش ولد
روز : كبل ثلاث ايام من فتحتلج الباب لكيته مميش شعره تحجين صدددك
اني مبتسمة و اباوع لروز امي من عرفتها شايفته خلت و نزلت
جُمارة : ديالله هسة الوهمي شلونه
روز : يجننن احلى آل سرهيد كلهم غير إذا يوكف وياهم
يطلعهم كلهم كسر من زِناد لأصغر واحد بيهم
جُمارة : اش لا تقارنين زِناد وياهم صمي حلگج
على گولة جدة كلهم بچف و زِناد وحدة بچف
روز : تريدني ابدل محمد بهذا الوصخ ولج يمكن
حتى اني اكبر منه جنه عصفور هالسين ريشاته
جُمارة : ليش شنو محمد ملك جمال العالم
روز : إذا يقدم والله يجوز ما يخسر العيون لو الشگار لو البياض لو الطول اصلاً شنو اللي مو حلو
جُمارة : اخلاقة
- اي صحيح
- لا عود صدك حلو لو هاي بس لان تحبي و تشوفي
بعيونج حلو يشك شك
روز : لا والله يجنن هسة يشحن تليفوني و اخابرة اخلي يدز صورته و تشوفي اصلاً ما تگولين ذوله اخوته و لا هذا ابو
و لا هاي امه
جُمارة : جا هسة تطلع مرت عمي عمار مصخمة وجووهم بي
ما تشوفين مشردي و ما يردونه
روز : انجبي اكيد عدهم احد هيج من جهة امهم طبعا
و بعدين هو لان ابيض تحسي مختلف عنهم طبعا إذا خلص
عمرة بتركيا
رجعت تشحن التليفون انفتح و رادت تدك عليه طلعت وكفت الها
يم الدرج أراقب الها الجو لحد ما حسيت راسي راح ينفجر طبيت للغر لكيتها تبجي ، شمرت روحي على الحرباية
جُمارة : ها
- ما يجاوب
غطيت راسي و بعد ما ادري شصار بالدنيا كعدت على صوت امي
تكول لروز قنعي جُمارة على امجد خوش رجال و روز تشرح الها شكد اني احب زِناد و امي منهارة تغلط علية
تغريد : شحبت منه ولج شحبت منه
بقيت ساكته ما كمت لحد ما امي نزلت قفلت الباب و روز جانت شاحنه تليفوني دكيت عليه ما جاوبني انقهرت ضميت التليفون جوه المخدة
و راسي هم رجع يوجعني بشكل مخيف صرت أضرب بي بالحايط
مديت ايدي للتليفون لكيته داك عليه مرتين
بس ما اكدر أحاجي من الوجع نزلت جوه الوب روز تسبح و امي يم جاراتها
اكول هسة يهيد راسي هسة يهيد و ماكو لحد ما ضربته قوي بالحايط
و حسيت برودة تنزل بيين عيوني و على خشمي مسحتها بأصابيعي
لكيته دم خفت و رحت للمطبخ اريد اغسل قبل لا اوصل السنك
بعد ما حسيت بروحي
غير روز ترش على وجهي مي و تمسح وجهي
اندك الباب و راحت تركض فتحته لامي و اجت كومتني
تغريد : شنو هذا الدم شبيها جُمارة
روز : شمدريني لكيت الدم يجري من گصتها و طايحة بالكاع لا من ايد و لا من رجل
تغريد : سويلها لفة اي شي خل تأكلها
و تطب تسبح شوفي شعرها متروس دم
عفتهن و طبيت اسبح روز جابتلي هدوم بس اريد اصعد و أحاجي
النوب امي ما خلتني اصعد
تغريد : ولج والله ما يفيدج أنا ادري هذا غيارج كله لان اجيتي و عفتي جدتج و زِناد لاگيج جاهل ع گد ايدة تتحملين
مصايبة لان و لا غريبة تريدة اكو شيخ و صيته عابر ديرتهم ما يتزوج و لا يشتهي الجهال إلا إذا محد تريدة
بقيت ساكته لان ما بية حيل أجاوبها
تغريد : أني امج و ادره بمصلحتج و محد يدور راحتج بكدي لا عبالج اكرهج و ما اريدج ترتاحين بس اني أفكر لبعيد تعبتي بدراستج و شفتي الضيم تاليها يكعدج بالبيت
يخليج خدامه
هزيت راسي بـ اي و صعدت فوك لكيت روز تصلي اخذت التليفون لكيته داك بعد خمس مرات بقيت انتظر روز تخلص و تطلع حتى احاچي
لحد ما خلصت صاحتلها امي تسوي عشه اشرتلها سدي الباب
دكيت عليه و ايدي ترحف عيني على الباب كمت قفلته
من أجاني صوته نسيت كلشي مو حلو
زِناد : جُمارة
- شونك
- هلا حبيبتي انتِ شونج بالي يمج والله
مسحت دموعي لان احس روحي مهضومة
جُمارة : مشتاقتلك
- اخخخ يابة موش بگدي وداعتج، هسة والله أخذج تجين
- لا امي متقبل
زِناد : امج منين راح تتلگاها جهنم باچر اريد اعرف
جُمارة : تعال بحجة المسواگ خلي أشوفك
- صار تأمرين أمر بس ليش أهيس صوتج تعبان
- لا ما بية شي بس ضايجة
زِناد : لا تضوجين جُمارتي هاي كلها تصير سوالف و ما دامني اشتم الهوى ماريد اعاين وجهج بدون ضحكة
جُمارة : كل يوم كره امي الك يزيد و اني هاي السالفة
تضوجني
زِناد : هسة كرهتني ولهَ حبتني بالحالتين أنا ماخذج ماخذج
جُمارة : اليوم وگعت على راسي
- صدددددك ؟ غير تديرين بالج شلون وياج بابا
- مادري بعد وكعت
حجيت هيج حتى إذا اجه و شاف الأثر يدري بيها هاي الوگعة
و ما يسألني
زِناد : رحتي للطبيب لو اجي اخذج
- لا مابية شي صرت زينه
- بابا ترى جبيرة انتِ يعني شنو عثرتي و طحتي على راسج لو تنزلين تركضين من الدرج فهميني
جُمارة : اي اطفر من الدرج
زناد : غيري اختصاصج بابا أنا اول مرة أعاين
هيج دكتورة
- تغار مني لان ما صرت دكتور
زِناد : هسة أنا صحيح مو دكتور بس أطيب چثير وادم
جُمارة : صحيح والله كلامك شيخ صحيح شكد عالم شكد
و الله يعلم بالمضموم شكد
- ههههههههههه ، احبج اموت عليج
- لا ما اريد تحبني من حسيت روحك راح تنكشف
زِناد : لج جمااااارة تعاي هنا وين رايحة
- اني ؟
- لا عيني
شوية و سمعت صوت طفلة يمة عرفتها بنت ولاء
- ها عمي حبيبي أنا والله جوعانة و محد هنا يشتريلي
گلت اروحن بساع و ارد ما ادري انتَ هنا چا رحت وياك
زِناد : اي و أنا سايق عندج مو
- لا بعد عمري انتَ الشيخ بس أنا چيف أحبنك اروح وياك
جُمارة : عمت عينج كون
زِناد : ههههههه ، هاج احجي وياها
- هاي ياهي عمي صاير تخوف
جُمارة : الو
- انتِ ياهي
اباوع لروحي هي ترعد بالحجي و اني مصدومة من لسانها حتى اخاف احجي وياها لا تفشلني
- شو هاي ما تحجي ياهي هاي
جُمارة : هاي اني جُمارة الجبيرة
- اممممممممممم هلا
تحجي مال وحدة عاوجة حلگها
زناد : شنو بس هلا سولفي وياها
- عمي الصراااحة لو بت عمها أنا هاي ما اطيقنها هاك التليفون كل ما تعاينلي تخزرني
جُمارة : اي اخزرج طبعا لان انتِ تخبثين
- شني مخبثة شمسوية چيف شبگت عمي و انتِ شلج غرض بينه عمي و أحبنه و اشبگنه و ابوسنه ياهو حامي حمامج
زِناد : ولج عيب
جُمارة : تدرين شكم مرة راد يجيبلج حلويات و اني اخذتهن
كومة أصلا ما ينحسبن
- جا آمرلج عبن حاطة راسج من راسي بعدني جاهل و تغارين مني جا لو كبرت شتسوين
جُمارة : هسة اجي يمكم و اصير جيرانكم حتى ما اخليج
تشوفي و من تجين تدكين الباب اطردج
- جا وإذا طردتيني شني شحسبالج عندي احساس اعبر من فوك الباب و انامن بحضن عمي و اخليج تتگلين بنار حامية
زِناد : عيب يالله تصالحن انتن كبار
- والله ما أصالحها حتى لو صالحتها اضل اكرها و ما اطيقنها
جُمارة : طبج مرض و اني شنو بحالج والله لو تدرين
شكد بطات و غزالات جابلي و حلويات يومية اصلاً
بعد شنو خل اتذكر هااا حتى علبة خرز اسوي بيها سوارات
سكتت شوية و سمعتها تبجي وهو يبوس بيها يسكتها يكللها بالليل اجيبلج و خلَه هادي ابن عمي عمار ياخذها
زِناد : هاي عود انتٍ الجبيرة
جُمارة : ما سمعتها شلون تحاجيني حلفت إلا ابچيها
- ههههههههههه يالله ديري بالج على نفسج أنا طالع
بعزيمة و باجر اجيج العصر
جُمارة : هنيالك كلساع معزوم
- هههههه كافي ولج
سديته و اني الابتسامة تارسة وجهي عندي الكلام كله بجهة و من اسمع صوت ضحكته اسلطن أكثر لان ضحكته صدگ حلوة
نزلت تعشيت مبتسمه امي و روز يباوعن عليه مستغربات احاول ما ابين راحتي و فرحتي بس ما اكدر احبة اني احبة
نمت من وكت و حضرت ثوب باچر من الليل ، غترتة جوه المخدة مالتي
طلعت بس الطرف مالتها و قربتها لـ خشمي كعدت راسي يريد
ينفجر من الوجع بس اصبر نفسي كل ما اتذكر هو يجي سبحت
و كشخت و بقيت جوه ما صعدت امي راحت لجاراتها و بقيت انتظر كل شوية اكول هسة يجي هسة يدگ الباب ظلمت الدنيا و اجتي امي و هو ماكو
تليفون امي كل شوية يدك رقم عجيبة و امي تسبح قبل الصلاة
فتحت خط كلت خل اشوفها شتريد روز واكفة يمي تثرم زلاطة
عجيبة : ولج يَـتغريد فضة أنتحرت ...
يا ترى ماذا سيحصُل عندما
يدخل الثأر بين فصيلة الدم الواحدة ؟
- عُذراً ، الفصائل غير مُتطابقة .
