رواية يا اجمل الوحوش الفصل الخامس والثلاثون 35 بقلم رسل فهد
خيبتك شَكتب عليها ؟
حِبري دَمر كل أديـة
" أنتَ يا أقسى حنين يمُر عَلية "
- رُسل فَهد
....
" عالية "
ام سلام : عمة زِناد يمة علاوي ما لزمتوه مكسورة الرگبة
هاي عالية هم نهبت مرة ثانية
فتحت عيوني كل وسعهن من الصدمة و هُمَ اثنينهم يعاينولي
چلبت بقميص علي بأثنين ادية و دموعي تجري
زِناد: شوكت شردت بالله
ام سلام : توها و من عاينتني لحگتها أجت يمكم لان درت
بروحها انكشفت و راح تنلزم
تقربت على علي و حجيت بصوت ناصي
عالية : والله لا و روح ابوي علي بَس انتَ تصدگني
خالتك و هدى ضربوني و خالتك رادت تطرحني حسبالها حامل صدك والله والله و بس نوصل للبيت أشوفك الاثار
مسحت دموعي و لزمت ايدة
شردت من البيت حتى اروح لامي لكيتها ماكو و ردت اروح لجدة ركضن وراي تاليها ما اندل غير المعمل انت موجود بي حتى تخلصني
اشهك و دموعي تجري هو هم كاض ايدي و ايدة الثانية على ظهري
زِناد : شعدجن وياها
ام سلام : الله وكيلك عمة جذابة هاي الناهبة ام الدروب يمة عمت عينج ياهي مارة بعرضتج و النوب جذابة موش حامل
هزيت راسي بـ لا و هم يعاينولي
عالية : والله لا والله جذب صدكني بس هاي المرة
والله ما ردت اشرد مو تدري بية احبك و أريدك تعوف هدى
لو اريد اشرد چـا شردت و أنا عند امي
خالتك گطعتني تگطع حجيتها و هديت ايدة
زِناد: وشلون أصدگج أنا هسة
حجاها و عاين لعمتي
ام سلام : هم عوز ما تصدگني يعمة هاي تالي شيباتي تجذبوني اعلمود هاي الفرخة شو إذا على الشردات مشهودتلها
زِناد : علي اخذ السيارة و وصلهن للبيت و إذا وحدة عتبت باب المعمل بعد ما تلوم إلا نفسها
جر ايدي علي و طلعني كلبي يدك سريع مادري شني يدور براسة
صدكني لو صدك امه أعاينها قبلنة كعدت بالصدر و يا جبل ما يهزك ريح
و لا حرف نطق علي و لا أنا بس امه طول الدرب ما سكتت
ام سلام : ولج هاطولج انتِ موش اصغر حتى من رحمة شو لا تنكضين و لا تخافين تدكين دروب محد داگتها و تطبين بعين الواحد دكولين موش أنا
ما جاوبتها بحرف وكف السيارة بالباب و نزلنه كضني من زندي و أنا دموعي ما وكفت عاين لخالته و لهدى و صعدني بلاية حچاية
تأكدت هو صدگهن و تندمت على الساعة الي رحتله بيها
فتح باب الغرفة و هد زندي شفايفي ترجف اعاينله بهضمة
مسحت عيوني و رجعت شعري ليورة لان العباية طايحة على جتافي
علي : بس هدى و خالتي
عالية : و رحمة وياهن بس رحمة ما ضربتني
شمر تليفونه و الجگاير على الميز انفتح الباب و امه تحاچي
ام سلام : ها يمة لا يضل بالك أنا امك هنا الحگها لو وين تطير ما اخليها تنزل راسك و استر الها
- وينج عيني ام سلام يالله احنه رايحين
ام سلام : اوكفن سودة بوجهي اليوم صارت العملة
بوجوهجن ان شاء الله على عرس علاوي نعيدها
- خلي يعاين هاي التفيدة هاي لو هديوة الشريفة
ضليت فاتحة حلگي بصدمة من عاينتة راحلها بعصبية
و امه كاضته توخر بي
علي : موش حسبالجن أعديها ايد التنمد عليها اكسرها
- يا ولك علاوي شمسويتلها أنا فوك ما شردت
- منين شرررردت غير منجن وين تكدرلجن متاكابلات
عليها طفلة بكد بزرجن
ام سلام : ولك يمه علاوي صدك تحجي
هاي خالتك هدها
علي : يالله بررررره برررره و إذا وحدة عتبت باب هذا البيت
اكسر رجلها والله ياااااااالله
- ولك شطشت بوجهك هاي الحية و خلتك هيج ترى أحنه
خالاتك عيب عليك تطردنا بس العتب مو عليك على امك
علي : كتلج برررررره لا وجهج افلشة هسة والله
ام سلام : ولك علاوي شمااااالك والله اليوم اخلي ابوك يأدبك
علي : هددددددى
جانت وره امها تعاين طلعت تقدمت تعدل بشالها و ثوبها
هدى : ها علاوي
- انتِ طالگ طالگ طالگ
امة و امها كامن يعيطن النوب كلهن گلبن على امه يصيحن
عليها وهي تبررلهن بس ما يفيد
- يحرم علينا طبت بيتج بعد منا ليوم الدين
هدى تبجي و اجت دفعت خالتهاالصغيرة قوي
هدى : كلهههه من وراج كله كتلج راح يطلگني
دفعتها و طلعت
- اوييييي عشتو طبكم مرض ناركم تاكل حطبكم
عافتهن و طلعت و ام هدى تعاركت وي عمتي رادن يتضاربن
و رحمة صارت بالنص تالي ام هدى كتلت رحمة
و طلعت من البيت
امه تخربطت و رحمة حايرة بيها تالي اخذها للمستشفى
قفلت باب الغرفة و كعدت مامستوعبة الصدمة ايدي على بطني
شلون داست عليها دوسة و رجلي من طحت بالشارع
حتى دم طالع منها
شوية و صار صياحهم جوه علي و ابو
عمار : والله والله إذا ما تروح تعتذر من ابوها و تعقد عليها أتبرة منك
علي : تبرررررره يابة تبررره امي حاطتلها عصابة هنا
و أنا عالية ماخذها و طالع
عمار : والله والله لو تتزوجهن اثنينهن لو اثنينهن يتطلكن
علي : ما اطلكها ليش أطلكها انا ما امشي براي واحد
- امك متخربطة ولك المرة احسن من امك
علي : بالاخص انت لا تحجي يابة بهذا لموضوع
لو صدك تدري امك شبيها ما بيها جا جاوبتك
فاطمة أخت هدى كانت تدردم و صعدها رجلها فوگ سحل و هو ساد حلگها انفتح باب الغرفة و اندفر الباب طَب و هو عصبي
- انعل ابو العيشة وياكم
نزع القميص شمره و شمر روحة على الجرباية نزعت العباية و كمت
يم الميز اعاين من آثار الأصابع مال خالته ركبتي و حنچي
من داست عليه اكول ليش من طاحت العباية انهار
التلفزيون مشتغل طفيته و كعدت بالكاع ايدي على خدي و صافنة
علي : تعاي
كمت رحت يمة امشي على كيف من ورة رجلي سوالي مكان يمة
و تمددت شبگني بأثنين ايدة كمت ابجي مسح دموعي
عالية : حسبالي ما راح تصدكني
علي : اصدگج شلون ما اصدگج
- والله داست على بطني بكل قوتها و ملخن شعري
دكلي إذا دكولين لعلاوي اشمر براسج تهمة ما تطلعين منها
علي : ما ضربتيهن جا انتِ بس اللسان و كدرتج عليه أنا
عالية : وين اكدر لخالتك أنا جنها فيل نامت عليه خنگتني
- تنامين لو اجيبلج عشا
غمضت عيوني و ضميت روحي بحضنة
عالية : لا ابقى هنا اريد انام نعسانة
شبگني بأثنين اديه و غفيت بساع ما جنت اضن يجي يوم من الأيام
ما ارتاح غير بحضن الرجال الخلصت عمري اكول ما اريدنه
فزيت الفجر هو نايم بس داير وجهة عني
عبرت من فوگا و نمت بجهة صدرة فَز بساع و عاينلي ابتسم و سوالي مكان و حط راسي على ايدة جريت ايدة الثانية و خليتها فوگاي
ضحك و شبگني بأثنين اديه قوي حتى ايدي طگت
كعدت الصبح بعدني على ايدة نزلت من الجرباية و فتحت الباب
نزلت جوه اسوي ريوگ بس ما خايفة و امه بغرفتها معتزلة
واريج و سلوى يطبخن
عالية : صباح الخير
آريج : هلا بـ العلمتها و صارت احسن مني
سلوى : لا عمي بعد عالية احنه لازم نتعلم منها
عالية : عليمن ترى خالتة ما تدرن شسوت بية
اريج : عااااادي يمعودة المهم هدى تطلكت و خالاته انطردن
و امهم متخربطة و نايمة و فاطمة و عمتي مو صلح
دخيلك يا اللهي موش حجارة طگت عشر عصافير
سلوى : امس مرتضى كتل فاطمة كتله يبووو
تالي دزها لاهلها و عاف جهالة ما خلاهم يرحون
اريج : كلشي جنت أتوقع بحياتي إلا فاطمة و عمتي
يتعاركن دخيلك يا اللهي ماكو شي ما تسوي
عالية : و هسة امه مريضة
اريج : لا مابيها شي عود ما تاكل و هي رحمة تاخذلها اماعين اكل بالختلة خاطر عمي ينهار و وولدها و وكلهم يكبون على علي و ينقهر على امة
عالية : والله زِناد گالي عيشة اهلة ما تنجرع
بس ما ضنيتها مرة هلكد النوب حيلهن كله بس علية
ما يندارن عليجن شني بس أنا هنا
اريج : خايبة انجبي احنه هم انكس منج
خوب أنا كلجن اشوه مني أنا جانت حتى هاي رؤى هنا
و خالاتهم ناصبات اقامة و أنا غريبة كلشي ما اعرف عنهم
بحيث جنت أطب للغرفة الكة المكياج كله مكسر و مشمور على الچرباية و الفرشات ممرودة الحمرة عليها
و اصبر و اكول ميخالف
وراها كل ما تتزوج وحدة يگبن عليها انتِ هسة ما تخلصين إذا مو محمد بو خالد يتزوجون بالله مال محمد يرد بعيدة
خلي عينج بعين خالد بلكي يتزوج
عالية : اكلجن هو شنو شمحصلين أنا اول مرة اعاين ام ما ترضى ولدها يشترون حتى سيارة حتى نسوانهم تبقى مبهذلة يبو كش و غدي
سلوى : اسكتي حسرة السيارة بگلبي راح نگرط فلوسها
و ما اشتريناها والله شنو الأم الحنونة تخاف ولدها لا يندعمون يعني من يهدون للطلايب عادي بس من
يسوقون سيارة لا مو عادي
اريج : مو بالطلابة العدو بعيد و هم رايحيلة بس السيارة
العدو كاعد بالصدر وهي هذا الما تريدة طبعا العدو هو احنه
اخذت الصينة و اني اضحك لكيته يغسل يم المغسلة وهو ياكل اني انظف الغرفة ما جاي اصدك خلصت من هدى
و خايفة لا امه و ابو هم يغيرون قرارة مدري شلون تخلص
علي : امي وين
عالية : بغرفتها ما عاينتها بالهول و لا بالمطبخ
- اكلت ؟
- اي عاينت رحمة ودتلها اكل بس مبينه ما تريد واحد يشوف
زين ليش هي شنو ما تاكل
هز راسة ما جاوبني و سوالي لفة
عالية : ما اريد والله اكلت واني واكفة جوه
علي : بَعد مديت ايدي
رفعت الدشداشة و الماسحة بيدي اخذتها منه
علي : اليوم نشيطة
عالية : طبعاً دام فكت الشراكة اصير نشيطة
ضحك و هو ياكل خابرة زِناد بَدل و راح بس گال نزلي يم اريج لحد ما أنا اجي خبزت وهي صعدت وياي نسولف
صعدت بتها بيدها التليفون
- يمة هذا ابوي يريدج
تحجي و أعاينها تضحك سدته
اريج : يكول جايشين بطلابة هاي الفرخة انتن ما بيجن
وحدة فقيرة حتى التجي فقيرة تنچلب بعدين خافن انتِ تربيهن .. كتلة شلي غرض و بعدين لو ندري هلگد الحلوگ مفككة عليكم چـا ما أخذناكم و تعبنا ارواحنا
عالية : ترى دوم هيج الدنيا السالفة محد بحالها بس نتقرب صوبها تگوم كلها تريدها على حضنه جا هو علي
مو جان يتمنى أرضى بي جا هدى وين جانت ما اخذته
اريج : لا ولج هنا هنا من جانت تريدة انه
يرضى بهدى و هو ما يريد و هي تدعي
عليج و ترد وره عبنه ما يرضى بغيرج
عالية : عزة أتذكر مرة علي اجة لامي و امي صاحتني
گبال امي كال أنا رايدج و مشتريج وأنا اكلة لو تموت
و شريك شكثر هو و امي قنعوني وما رضيت و هسة متحملة كلشي لخاطرة
اريج : هههههه ولج بيج خير كضي فلوس رجلج و سوي سلفة حتى تشترون كاع و تبنوها عسى ما بس غرفة و حمام لان المشوار طويل و امه ما تعديها سلامات
اجوي للغدة و علي ما اكل وياهم صعدتلة و عمي كل ما امر يغلط عليه و على علي و يصيح لمرته و هي زعلانة ما تكول ها كلت بكلبي جا بس انتَ مرتك عزيزة و تريد خاطرها
كعدت يمة اكلت ويا أنا يسراوية وهو يعلمني أكض الخاشوكة باليمنى ما اكدر تضل ايدي ترجف ما أسيطر
علي : ولج انتِ جاهل اكو واحد ياكل باليسرى حرام بابا
عالية : متعودة جا شسوي
- ماكو متعودة اكلي باليمنى يالله
اكل و نص الاكل يطيح من الخاشوكة قبل لا يوصل حلكي
و كل ما احط الخاشوكة باليسرى يجرها و يخليها باليمنى تنرفزت
عالية : والله ما اكل يالله حتى ما اريد
علي : اي احسن يالله لا تأكلين
كمت غسلت ايدي و طبيت حتى ما صاحلي تعاي اكلي
تمددت على الجرباية زعلانة و دايرة وجهي نزل الصينية و صعد
تمدد بصفي و ورث جگارة
علي : النوب عليه تاكل باليسرى طفلة ، لا عمي
حتى الطفلة احسن منج
عالية : وشدعوة عليك ها يعني ترى هي ايد
علي : ما علمتج امج حرام
- لا و ترى الحرام عليه مو عليك گول انتَ ما تريدني اكل
حتى يبقى الاكل بس الك
ضحك بصوت عالي
جرني من ايدي خلاني على ايدة و اني زعلانة ريحة الجگاير تعط بخشمي و اني دايرة وجهي عَنه رفع شعري و طبع بوسة يم رگبتي
كزبر جسمي و عاينتله بعصبية
علي : بعد شنو عذرك اريد اعرف
دفرت ايدة و درت وجهي عليه شبگته و نمت
كعدت على صوت بيبان الكنتور من ورا
علي : شنو تنمبل مال نوم شكد تنامين
عالية : شوكت تجيبلي غرفة ها شنو لازم نسيت
- لا حبيبي ما نسيت أنا أنسى مو عيب
- اي جا يالله جيبلي
باسني بخدي و نزل نزلت ورا امه بعدها متخربطة و سلوى تسوي جليّ بالطوس كعدنه بالهول ناكل طلعت من الغرفة امه كعدت على الكرويته كامت سلوى جابتلها من الثلاجة طاسة شالتها و شمرتها بالكاع
ام سلام : تتأمرن عليك بعدني ما متت و اخذتن مچاني
اريج : لا عمة منو مآخذ مكانج محفوظ
ام سلام : يالله من باجر همن اديجن حتى تبدن حملات على البيت تنظفنه العرس الخميس
سلوى : جا مو طلگها
ام سلام : يرجعهاااااااا غصبا عليه و على الخلفوه يرجعها
هو المكرود جا مو بوعية اكو من يحش براسة
رحمة : راح يجي الرجال يسوي المري ابوي راح يجيبة
بعدنا نحجي و ندك الباب طب عمي و الرجال صعدنا فوك صعدت وياهن للطابق الثالث
سلوى : جا مو مريضة شو صاحية
اريج : يمة عيونها كلها شر و جنها صدك ترجعها ولج عالية لو بيج خير اخذي الغرفة و خليهم راس يركع راس
حتى رجلج إذا كالج طلعي قفلي الغرفة عليج و عوفي
سوي روحج مخبلة حتى ما يخسرج
يكول تموت إذا ارجع هدى
عالية : لا والله يكتلني
سلوى : انهجم بيتج على أساس ما مخليته انتِ محبس بأصبعج اخذي الغرفة و عاندي خليهم يتسودنون و إذا
صدك رجعها خلي و روحي يم امج احسن
راح الرجال و نزلت طبيت اعاين للغرفة تجنن و جثير بيها سوالف حلوة كلهن جابتهن امه فتحت الكناتير الهدوم مسفطة تخبل و معلگة
رحمة : ها الحية الغوارة هم تردين تكسرين حاجة
عالية : بكيفي
عفتها و طلعت هي تدردم كعدت بالكاع زعلانة لحد ما اجة
علي : شبيك حياتي
درت وجهي ما اريد أعاين وجهة
باس خدي من الجهتين و أنا دايرة وجهي كعد كبالي ركبه و نص
و لزم حنجي مصغر عيونة
علي : يعني منا للمعمل اروح اجي الكاج مطنگرة
شبساع تلحكين تغيرين كل هاي المعاني
عالية : طبعا تعودت تريد يومية وحدة تتلگاك و تشبگك
و تبوسك و تسويلك اكل و انتَ بس المرتاح
علي : هاي كلهن مسويتهن انتِ خرب عرضج شكد جذابة
عالية : و مسوية اكثر بس شنو الفايدة ما يغزر
لا بيك ولا بأهلك
علي : أنجبي أنا چايچ الخفيف مغزر بية
انتِ ما تغزرين حجاها و باس خدي و عضني دفعته
عالية : إذا انتَ طلگت عالية امها شعدها تجهز للعرس
و ابوك سوه حتى المرايات مال الغرفة
باوعلي مستغرب مصغر عيونة ومبتسم
علي : معليج بيهم ابني شلونة
عالية : خالتك طرحتني
كام من يمي و هو جتافة تهتز من الضحك
صاحلة ابو نزل جوه و هم تعاركوا و طلع وضلوا يومية يتعاركون لحد ما اجة يوم الثلاثاء و هو الجمعة يلتحق
اجوي الظهر و صاحت امه اول ما طب
ام سلام : علاوي والله ثم والله ما أرضى عليك
إذا ما تروح تعقد على هدى باجر الحنه وًعكبة العرس ابوك كلشي يتكفل اخذ اجازة اسبوع عشر ايام و روح بعد ما نريد منك شي
علي : چلبتي يمه جاي اكلج ما اريد و أنا حتى يم السيد تمتت الطلاگ و دزيته لاهلها و ابوها خوش رجال
كال أنا من الاول ما رايد هاي القسمة لان عندك مره
و بعد انتِ ليش منهارة
ام سلام : ولك و الصرف و الذهب و التحضيرات الجبتهن
و الغرفة الجابها ابوك ولك ليش وين اوديهن
علي : خليهن يصيرن لعالية و أنا ادفعلج فلوسهن
ام سلام : تدفع الها سم و سررررطان بت خالتك ما تدفع الها و عالية تدفع
علي : امشي عليج ابو فاضل يمة هديني روحي زوجي خالد زوجي ابوي بس جفوني شركم
من اسمع هوسة ما انزل بقيت بغرفتي لحد ما صعد
جايبلي ويا ماعون كعد كبالي
علي : يالله كضي الخاشوكة بيدج اليمنى
كاضة الماعون بيدي اليسرى و اكل باليمنى بالكوه و إذا طاح تمن بالكاع مني يلمهن وحدة وحدة
عالية : شبعت
- لا ما شبعتي بس مابيج تكضين الخاشوكة بعد
- يعني ما اعرف مو متعمدة
- تتعودين
اخذ الماعون من ايدي وهو يوكلني
نام الظهر و العصر قبل لا يكعد أنا نمت فزيت على صوت امه بالغرفة تطلع هدومي من الكنتور و تشمرهن بالكاع
ام سلام : رحمة تعاي كلهن حطيهن بجيس زبالة يالله ما دامة ما يريد هدى هاي هم لو يموت ما تبقى هنا
كعدت بلعت ريكي خايفة و أعاين عليها اجت عليه بعصبية
جرت شعري و ضربتني راشدي
ام سلام : ولج أنا امه يجذبني و يصدكج يـ ام الدروب
يا عار يا الناهبة
رحمة : يمة ختولي اخوتي على جية هدى كالتلي خوش فكرة مو كتلج عليها
ام سلام : ختولييييي هاي الثانية هي من كتلة شاردة ما صدكني مو النوب اكلة رادة لرفيجها خاطر حتى أنا يتبرى مني
بقيت خايفة من افكارهن يعني هذّني كلهن يكدرن يسونهن
و حتى روحتي لامي خفت منها اكيد هم عمتي اكو برأسها شي ثاني طلعت من الغرفة اركض طبيت لغرفة هدى و أنا و رحمة معاتت
بالباب لحد ما صرت اقوى منها و طبگته و قفلته
كسرن الباب بالدك و ما فتحتة بقيت كاعدة على الجرباية اعاين للغرفة لحد ما سمعت صوته المغرب هو و امه فوك
ام سلام : لو أنا لو هي خالاتك كلهن خابرني يبجن يكولن إلا علاوي ما ضنيناها منه هيج يسوي بينه
علي : لا اسوي الانكس و بالاخص هاي تلعتج الصغيرة
كليلها حسابي وياج ما خلص
طب لهذيج الغرفة وهو يصيح وين عالية فتحت باب هاي الغرفة و طب
يگلي شعندج هنا ليش خاتلة طببته و قفلت الباب اسولفلة
احجي وهو يستغفر
علي : ديالله تعاي وياي
عالية : لا ما ارد خليني هنا روح نام وحدك أنا هسة شمحصلة اعلمودك غير الضرب
رفعت دشداشتي طلعت رجلي و بطني و فتحت شعري
عالية : عاين عاين آثار ضربهن عاين حتى شعري من كثر ما يملخني كله طاح جنت انتَ يومية تطكني و هسةً من صرت زين ستلمني امك و خالاتك
أنا احجي و منهارة وهو صافن عليه بغير عالم
طلع و راح يسبح طب للغرفة يبدل و أنا كاعدة على طرف الجرباية
علي : شتردين عشا لان رايح اريد اجيب جم شغلة للدوام
عالية : للدوام لو للعرس
- هههههه ولج اي حتى اعرس عليج
درت وجهي عنة ضايجة وهو راح قفلت الباب ورا عاينت للميز ناسي تليفونة رحت اخذته ردت انزل انطيه اله كلت لا خل اعاين شبي ما بي
فتحتة و عاينت على الرسايل الجاية شكد ضليت فاكة حلكي
طبيت لكيته كروب جايه منة ألفين رسالة و كلهن ما فاتحهن
طبيت عليهن قريتهن من اول رسالة لآخر رسالة و روحي شايطة
و محتركة دموعي تجري على خدي وًامسح بيهن
خالاتة كلهن و ضايفات هدى وياهن و يسولفلة أنا شلون ما يصير يصدگني و يأمن بية بعد و خالتة الأكبر من الصغيرة تسولفلة على قصص نسوان تخون رجلها بزلم عاشكاتهم من قبل الزواج
و هدى تكتب والله أنا معليه بيها شعندي وياها دامة ستر عليها
و هي بت عمة
احس روحي و ضليت افتر بس اريد أفكر بشغلة حتى اقهرهن
بيها ليش عالية غلطتي غلط خليتي الدنيا كلها لازمته ضدج
شمرت التليفون و تغطيت وره ساعة دگ الباب كنت فتحتة و رجعت لمكاني انطاني لفة و فتحلي الببسي و أنا كاعدة اكل
علي : شلون ذاكرة وصلت هناك يالله تذكرت التليفون
كملي اكل يالله و كومي هناك ما مرتاح بهاي الغرفة
عالية : والله ما اطلع يالله
- هاي هيَ بس اسكتي
اكل و أنا عاقدة حواجبي كلساع يطيح شي من اللفة وهو يشيلة
رحت غسلت و اجيت و هو متمدد لان مأكل قبل لايجي
دك عليه خالد و طلع للغرفة مال اخوته يلعبون طوبة بـ البليّ
رحت جبت دشداشتي لبستها و فتحت شعري و جبت عطري
و حمرتي و الكحلة حطيت و أنا عيني على الباب لا يفوت توست روحي عطر من هذا الي يحبه و طوخت الحمرة نثرت شعري
و كعدت على الچرباية أنتظرة اعاين للفرشة من خلتني امه أفرشها
طب وأنا غطيت حتى راسي من حمار الحمرة اول مرة احط هلكد
قوية الحمرة و شعري كل يوم لو كصيبة لو گصايب اثنين
ما فاتحتة هيج كدامة
علي : ولك خبلتني شوكت تثبت على راي
ما جاوبته بقيت خانسة و هو ينزع بالتيشيرت اجة تمدد بصفي
و أنا مغمضة عيني قوي رفع الغطة من وجهي و خلاني بحضنه
وخر شعري من وجهي و يعاين سرحان من عيوني لحد رگبتي
علي : جـثير حِسنج يدوخ
ضميت وجهي بصدره و هو ضحك
- موش تقشمرني كل مره بهاي شبگتك خاطر أهدك
عالية : جثير أنا مقهورة بَس ما ادري شلون متحملة
علي : كله يخلص ويصير سوالف بس مالك غرض بغيري
غطاني و أنا على أيدة صار يتفنن بالبوس و أنا هم سرحانة
علي : خايب انتَ تموع بساع
عالية : ليش تحجي حسبالك أنا ولد
- والله هذا محمد أخوي مشعول الصفحة عودني
عالية : خايفة لا صدك ترد هدى
علي : طلگتها البِت ما ترد بعد و امي تحجي و تسكت
جثير راد يقنعني و ما رضيت أحس أعلة اي ساعة كابوس هدى يرد و اخسر الاول و التالي ما ارتاح لحد ما يتحلق
عافني و نام و أنا ضليت كاعدة
كمت من الفراش على كيف و رحت جبت التليفون من الشحن
عدلت ايدة و نمت عليها شبگني و حط راسة برگبتي نثرت شعري
و على كيف رفعت ايدي طگيت صورة
وي ما أيدي مرفوعة طبيت للگروب دزيتها و طلعت منه و مسحتة
كلبي يدك سريع جثير جثير خايفة و فرحانة من أتخيل وجوههن تعاين الصورة جانت الصورة نص وجهي و ايدي و زندي طالعات بس هو كلشي منه مبين وجهة و ايدة و صدرة و خليت تاج الجرباية يبين ، خفت أكوم حطيت التليفون جوه المخدة و نمت و أنا اسأل روحي شلون ما يكعد من صوت دگة گلبي
أعاين نار تطلع من هذاك الصوب
شنهو الصار ؟
- اضن المحترگ نثية أعلى زلمتها جثير تغار
.....
" ورود "
كعدت الصبح على صوت صياح شراع جوه نزلت اركض لكيت
شراع يصيح على امه منهار و امه تهدي بي
صعد فوك و امهن أخذتهن للغرفة عصبية
رجعت صعدت لكيته يبدل
شراع : سويلي ريوك على السريع اريد اروح
نزلت اسويله و بس امه بالصالة حبست بناتها بالغرفة و هن يدكن الباب
نزل بيدة جنطته و اوراقة يأكلون هو و امه بدون و لا حرف
شرب آخر ما بقى بالجاي و صاح
شراع : والله والله يحرم عليجن عتبة باب الشارع
الكل والجميع
حجاها و طلع ما اخذ ولا وحدة ويا سويت لفة و وكفت اكل و امهن راحت فتحت الباب طلعت كلهن يصيحن بصوت عالي ما تنفهم حجاية من كل وحدة
شيماء : هو شعليه هاااا هو شعليه بيه مو خطبني بعد
شيريد لو. يطلب ثارات براسي
فتنة : ولج الما تشيلها الغيرة على اخوها لا. خير البيها
والله وكل خير ما بيجن
امل : اي بس الولد اجه خطبها هو شكو شنو إذا دخل بعلاقة فاشلة لازم كلها مثلة ما ترتاح
غفران : هسة من وراج اني حتى حرمني من الدوام
تعاركن بصوت عالي تالي وحدة ضربت الثانية و اني صعدت
فوك لغرفتي
الي عرفتة شيماء تحب واحد بس شراع رافضة زين
ليش رافض إذا يدري بأخته تحبة
اجه الظهر هم أعصاب و كلهن يخافن يحجن ويا
ورود : تريد لبن لو وره الغده
شراع : لا صبيلي
صبيتله و كعدت يمه من خلص الاكل صعد قبل حتى الجاي اخذت كوبة و صعدت و هو يتعارك بالمكالمة
راح لغرفة اخواتة سحب التليفونات كلها و ضمها بالكنتور شوية
نزلت العصر هن جوه يلوبن
امل : وين تليفوناتنا الحية اجيتي و هجمتي البيت
ورود : ترى اكول جبيرة مو مال أتعارك وياج
امل : تعاركي حتى ارفس بـ بطنج
عفتهن و صعدت فوك هو كعد بدل اخذ التليفونات ويا و راح
بالليل نزلت جوه لكيته يحاجي امه بعصبية
شراع : بنتج مستهترة مستهتررررةً
فتنة : أخيتك و انتَ اخوها و ابوها
شيماء : شراع ليش توكف بقسمتي اني شعلية
ادفع ثمن علاقتك الفاشلة
دار وجهة عليه اشرلي صعدي فوك صعدت بس بقيت واكفة يم الدرج اسمعلهم
شراع : الولد مو خوش ولدد افتهمييييي عاد
شيماء : لا شراع اخته مو زينه هو شعليه
اخذها للغرفة بس صوتهم مسموع و هو محترك دمه
شراع : لج عفتيهااااا كلها إلا هذاااا لج أناسب اني
اخوووووو زمرد الساقطة
شيماء : يعني زمررررد خانتك شراع اني شعليه شعليهههه
بقيت مصدومة من الكلمات الاسمعهن طبيت للغرفة لكيت على الميز ورقة
كلت شعجب نزلت و صعدت ما عاينتها
اخذتها فتحتها و احس روحي فارت هذا خطة اعرفة
مكتوب على الورقة شراع .. زُمرد .. للابد
لزمت راسي باثنين ادية بعصبية
شلون أصدگهن وعودك
و أنا ماضيّك بأدية
ولك چا شلك علية ؟
....
" جُمارة "
زِناد : اسم عمي يعقوب طلع وي الاسره العايشين
تغرير : شنووووووووووو ؟
المسافة البينه و بين امي وگفت بيها اباوعله بصدمة
ابتسم بوجهي و رحت يمه
جُمارة : صدك ؟
- اي والله صدك و هسة بدينه ندور
درت وجهي على امي ما مصدكة و كل ملامح الصدمة على وجههة واضحة فضة ابتسمت و روز تضحك الفاهية
تغريد : يعقووووب يعقووووب عايش
معقوووولة زِناد ما تضحك عليه
زِناد : شني ضاحك عليج گبل يالله جُمارة
تغريد : لا أنا اروح وياكم
أخذنا الجنط و رجعنة و امي مچلبة بزناد تسأل بي و عجيبة و امجد
وجوههم صارت تضخ السم ليبرة
رجعنة مشي لان هو البيت حيل قريب و زِناد عايف سيارتة
بـ باب بيت جدة اني امشي ما مصدكة لكيت جدة كالبتها مناحة
و تدعي بحرگة گلب
رهينة : دخيلك يا ابو خيمة الزرگة ما تقصر هچي و تفرح گلبي يمههههه يمه و يردلي يعگوب يمههههه جا شكثر بختي ينزار لو رديت يمه
فاخر : ان شاء الله يرد و ترد كل أيامنه الحلوة
حياة : عمي شلون صار عدنان
- زين زين عمي ان شاء الله
تغريد : مو كتلج أنا گلبي يحس هو عايش مو گتلج
رهينة : اي والله كتيلي اي والله ان شاء يجي اليوم الاعاين
بي طولك يبعد امك واكفلي بالباب
جُمارة : جدة يعني أبوية عايش راح يجينة
حجيتها و بجيت و روز حضنتني
امي و جدة وحدة حضنت الثانية و هن يبجن
رقية عاوجة حلگها و اندك باب المطبخ طبت ربيعة
لجدة تهلهل من الباب و تهوس
ربيعة : خَبر موتة .. نهيبة و عيب نحچيها
كامت جدة على حيلها تصفگ بأثنين اديها وتهوس يمكن هسة
من الفرح لو يوگع صاروخ بنص بيوتنا ما يهمها
رهينة : مَـامور و يرد للجيش .. ميت لا تسجلونة
يهوسن اثنينهن تگابلن و ساعة يلطمن و ساعة يصفگن امي تضحك و دموعها تجري و اني صافنة عليهن و أتخيل الساعة اليطب بيها علينة شلون راح اروح احضنة و إذا عرف بأمير شيسوي
زِناد راح و بقينه كاعدين بالهول و جدة كل شوية تفز ترفع ايدها
تدعي و تكعد فرشنا اني و روز بالغرفة وامي نامت على جربايتي
بقينا كاعدات و امي نامت طلعنه بالهول لكينه دمعة كاعدة وجهة
كله شر بالهول
دمعة : شكو شو تفترن
جُمارة : بيت ابوي انتِ شعليج
- اييييييع و انتِ صدكتي يرجع هسة إذا ما يطلع عندة مرة وجهال كومة قابل يضل بحالكم و يضل هناك شعندة راجع
جُمارة : عادي حبي هلا شلون ما يرجع بالعكس أكيف عندي اخوان و اخوات الله
دمعة : اي ما تنقهرين على امج خلصت عمرها تنتظر تالي يجي متزوج عليها
جُمارة : جان انقهرتي من تزوجتي واحد متزوج حتى تقهرين واحد هم متزوج ، ايع
دمعة : اويييي على أساس انتِ ما حاطة عينج على واحد متزوج ، ايع
روز : ديالله أنجبي ع الأقل هو كاتل روحة عليها و المره الي عندة امانة مو مرتة و قايمتلة بالواجب و صابر عليها علمود الجهال و اني اجي اخرب حياتهم
دمعة : هم تحجي ام المخابرات البايرة ايع حتى محد يمر بعرضتج و يكول نريد نخطبها
جُمارة : المنخل يعيب ع الابرة شنو
ولج بابا اناِ لا تحجين متزوجة واحد اكبر منج بـ ٣٠
سنة و شامرج مو بحالج اصحي على زمانج و تطلگي
دمعة : أتطلگ ؟ لا مو حلوة راح انتظر لان اول و تالي صايرة آرملة حتى أجي ضره عليج إيابة شكد راح يشفى غليلي
جُمارة : انتِ ياخذج زِناد ؟؟؟؟ لو تموتين
عاد احلمي بشي اسهل
دمعة : لااا قفلت على زِناد شنو فضة معوقة و عايشة احسن مني مدللها دلال اريد اصير مثلها وداعتج اخلي مو بس ينسى حب الطفولة حتى طفولته ينساها
دفعتها بأثنين اديه بعصبية و هي ضحكت
جُمارة : ما يگلب هيج شكول وسخة هو يحب الأشياء
المتعوب عليها و محد جايسها
- هههههههه هسة نتلاگة بعدين
شحطتني عفتها و رحت للمطبخ روز كالت خلي نسوي معكرونة
مديت راسي للديوان مفتوح يعني هو هنا وكفت يم روز وهي تحط المي شفت شريك راح و هو طلع يقفل باب الديوان
عباته والعگال و الشماغ بيدة واكف يلبس الشحاطة
مديت راسي مبتسمة شافني ضحك اشرلي تعاي
جُمارة : روز إذا امي اجت كليلها جُمارة ماتت
روز : اي ماتت بحب زِناد
ضحكت و طلعتله اضحك هو واكف منتظرني
زِناد : هلا بالطبيب
جُمارة : هههه اني الطبيبة مالتك بعدين تحتاجني
بس لا تكيف آخذ منك كشفة حالك حال المراجعين
زِناد : هههههههههه روحي تأخذها انتَ مو بس الكشفة
جُمارة : همزين راح اتزوج شيخ حتى إذا اموت واحد بالعمليات يجونك گبل
يضحك بصوت عالي ما يهتم لاحد واني اتخيل حتى السعف الي بالنخل وجه امي حطيت ايدي على حلگي بمعنى اسكت
جُمارة : ادري بيك متعمد تعلي صوتك حتى امي تجي و تكتلني قابل راح تكتلك
زِناد : جا انتِ إذا من هسة حاسبة حساب تكتلين الوادم بالعملية بطلي عمي لا تداومين
جُمارة : هههههه بس بشرط اول عملية أسويها الك
عض شفته و هو يضحك
زِناد : سويلي حبيبي و ياريت بدون بنج حتى اول ما احسك تريد تكتلني احط المگص بگلبك و أخليك تموت وراي
جُمارة : يمة يمة باع التفكير همزين گالي حتى اخذ احتياطاتي منك انتَ تخوف
زِناد : شعندج لسه كاعدة
جُمارة : والله جوعانين من الفرح جاي احس روحي
اسعد إنسانة بالدنيا يرجع أبوية والله ما اصدك
زِناد : يرجع و يخلصني من أمج خرررب يومها
مرمرتني تمرمر والله
جُمارة : يالله اني أستاهل أستاهل
زِناد : طبعاً حبيبتي يالله روحي نامي لا تضلين كاعدة
جُمارة : ما تجيبلي ببسي راح أتحملك هواي بالمستقبل
و اربي جهالك و أتحمل حياتك الصعبة
زِناد : هههه كافي انهجم بيت امج هسة أجيبلج
جُمارة : اممم عرفت ليش دكول انهجم بيت امج حتى من ينهجم نجي و نعيش هنا و نصير گبالك
ضحك و هو يفتح باب الشارع حط الي بأيدة بالسيارة و صعد
اشرلي طبي رفعتلة حواجبي اثنينهن حرك السيارة و هو يضحك
طبيت يم روز بعدها تطبخ
جُمارة : ما طلعت هاي معكرونة لو باجة جان استوت
روز : انجبي و سدي حلگج مو ضاله برة تتمضحكين و هسة جاية تتأمرين
جُمارة : اوي شبيج كبر حاسدتني على الأقل انتِ عاقد عليج و ما متزوج
روز : و انتِ موجود مو مسجون و لا دمه مهدور
واكفة انتظر المعكرونة سوتها روز قصة عنتر و احنه اثنينه متأكدين تطلع مو طيبة لان روز و لا مرة بحياتها سوت اكلة وًضبطت
صاحلي زِناد من الباب جايب النه حلويات شكد
جُمارة : مخجلنا بكرمك شيخ
زِناد : هههه اخ من لسانج بس حلو مو مال گص
جُمارة : شيخ انتَ ما تگدرلي وين تگدرلي
زِناد : شنو ما أكدرلج لج أنا غير متهونين عليه
و إلا والله والله والله
جان يحاجيني و رافع إصبعك السبابة بوجهي ويضحك
و اني أضحك و اباوعلة
جُمارة : اي بالله ؟ .. شتسوي
زِناد : مو هسة بعدين
السيارة مشتغلة بعدها صعد و اني طبيت جوه لكيت روز منتظرتني خازرتني طبينة للغرفة طلعت المعكرونة ماصخة عفناها ما تسوه التعب و كعدنا ناكل حلويات
روز : ولج يمكن عدهم وراثة بهاي العلاكة الوهمي جان خاطفني و بعدني ما ادري بي محمد و يومية يجيبلي علاكة مال حلويات
جُمارة : نصي صوتج لا تكعد إمي هسة تسويج وهمية
أكلنه و انترست الغرفة زبالة لميناهن و نمنه كعدت الصبح على صوت امي و جدة صايرات حبايب يسولفن و يتريكن يا الله
جُمارة : العمة و الچنة اليوم صافات يا الله
روز : الخالة و الجنة
تغريد : هاي شنو المزابل شوكت نايمات و منو جابلجن
جُمارة : جدة اطتنة فلوس و دزينه غسان بالليل
باوعت لجدة بسرعة و غمزتلها
رهينة : اي امس اطيتهن غسان شوكت راح ما اجاني
جُمارة : والله ما ادري جدة سألي
- أنا أعلمة
كعدنه وياهن أكلنه و طلعت من الغرفة لكيت حياة بالهول تبجي
و عمتها تسكت بيها أخذهن يونس و راحن للمستشفى
الظهر اجه زِناد يتغده و حتى امي كعدت وياهم على السفرة
رهينة : إذا تضلين تغريد حتى اجيبلجن
چرابي و تلفزيون للبنيات
تغريد : لا اروح
زِناد : اليوم رايح لبيت الشيخ رَماح عمي وحگ ابن البدوية إذا هم گال اردلكم خبر أرمي و ارمي شريك ورا
حتى افتك منّهم اثنينهن
رهينة : ما يطي عمي والله لو تنگلب الدنيا مبين ذاك هو ما يريد يناسبنا الزلمة يگول جا بس هم بناتهم عزيزات انا هم
زِناد : والله عمي هم خوش وادم لو منطيهم مرة ما نخسر
رؤى : ابوي يكول ما انطيها لغير ولد عمها عسى ما تضل
رهينة : اي مو ابوج بكيفة المن يريدها كلها متزوجة و غسان صغير عليها ما يخلي البت تروح بفالها
اني اباوع لروز لان عالية سولفت النه عليها
رهينة : لا تروح يجدة أجلها سالفة شريك امس انتو طالعين من الموت ما بينه حيل الطلايب بعد
زِناد : ان شاء الله ماكو طلايب ابوها يكول كلما اسوي خيرة تطلع مو زينة اليوم ابن ابنج المسودن مأخذ ويا سيد
يسوي خيرة
رهينة : اخ من شريكان هذا حتى امه راح تموت من ورا دمة ينگز ما شفت هيج ولد بحياتي خبلني
زِناد : يحبها جا غير يحبها و هي هم تحبة تحملت أعله موده كتل يابو كتل
العصر اجه شريك يبوس بجدة يكللها ادعيلي وهو كاشخ
منتظر زناد و عمامي يخلصون اني من الحماس اتمنى اختل وره عباية زِناد و اشوف شيصير هناك
راحوا و جدة كلبها نار كلساع تدك على زِناد و ينطيها رفض
لحد ما أجوي طلعت الهم للساحة ووجوهم مو مال قابلين مبينه السالفة رفض شريك بيدة بطل مي فارغ من كد ما يعصر بي
البطل صار شكدوته
رهينة : ها بشر يجدة
زِناد: نفس كل مرة جدة يكول اردلكم
خبر إذا الكم نصيب يمنه
شريك : ما رميته و رميتيني و خلصتني هااا ما خلصتني
أنا شمسويلة هذا الچلب
زِناد : ترى منين ما تصفنلها حگة الزلمة يدري بته انتَ وياها علاقة چا شني تريدة يكول گبع و اخذ
شريك : بس جثير صار جثيرررر و أنا انتظر
زِناد : أنا أعاين هاي المرة مو مثل كل مرة چنة يريد
ينطي بس خايف من ولدة ما عاينت وجووهم كلها شر
رهينة : يالله بلكي على ساعة و لنه مخابرنة
زِناد : يعني شسويلك بعد فهمني والله تعبتني انتَ
شريك : رايح أنا ملتحق يالله اخلص مني
زِناد : انجب لك لتصير زعطوط شنو مقصر وياك أنا
دنك راسة و بقى ساكت عمامي طَبوا و زِناد عرفة يريد يبچي
حضنه و طَلعة بره طبت جدة تغلط على أهلها و عمامي يحجون على زِناد لان أخذهم يكولون يومية رايحين و متفشلين
رهينة : جا شيسوي اخية و عضيدة و ابن عمة شلون ما يوكف وياه و تراه هذا ابن اخيكم موش تنسون
هاشم : ما ناسين يمة بس شني هاي المذلة خلصت النسوان
رهينة : الظاهر ما عاشك انتَ و لاتعرف العشك شنو
اليريد محبوبة يصبر على الحلوة و المرة ويا
بالليل امي كالت الهم باجر نرجع محد عارض
رهينة : روحي باجر بالليل لان الظهر اريد اسوي ثواب لأمير خاطر انتِ تطبخيله
امي كيفت و ثاني يوم جابوا الصبح المسواك و اجتنا عجيبة من غبشة من اباوعلها مدري ليش تصيبني كآبة و كلهن بالمخزن يطبخن سوه اني و روز و حور نسوي الفواكه
رهينة : امشي جُمارة جدة تعاي أشاورج
اجيت يمها قربت اذاني كالتلي جدة روحي كولي لزناد يخابر بيت اهل حياة يجون يتغدون و يجيبلهم مسواگ يأخذونه وياهم
عفتهم و طلعت للساحة موجودين هو و علي و ولاء
جُمارة : شيخ
كاملي و هم يسولفون وكف يم الباب حاجيته هز راسة بـ نعم و طبيت
روز تاكل بالفواكه اكثر من ما تسفط أعاين على الهوسة مال البيت
و اكول يعني امير شوكت مات و هسة مشغولين نسويلة ثواب
راحت روز و بقينه اني و حور بالغرفةً
جُمارة : ضل بالي عليج اول بارحة شسوالج هذا النذل
حور : چواني برجلي
- عزه شلل بيدة
حور : ديري بالج منه ترى حاط عينه عليج
جُمارة : ادري بس لو يموت هذا الجلب مو يدري بيه احب زِناد و زِناد يحبني
حور : اي هو لان يدري يريدج
جُمارة : صدك اكلج مو احس امه زينه وياج
حور : هي مو قصة زينة بس إذا ما يطلع حركته بية يطلعها بيها تصير زينه وياي حتى ما اشرد
جُمارة : شلون يطلع حرگتة بـ امه كبر
قابل هم يچويها و يعذبها
حور : اي و أنگس بعد حتى ضرب يضربها و هي متحجي
بقيت صافنة على حجيها
جُمارة : اشردي والله احسلج
حور : يلگاني والله لو وين اروح يلگاني هو و اخوتي
سوو بية رعب و بعد ما شردت من ضربهم
الله ينتقم منهم
جُمارة : يعني شلون تبقين هيج ؟ ترى روحي تفور عليج
حور : بلكي يموت و اخلص منه چم نذر بركبتي إذا مات
و إذا أنا متت بعد هذا يومي
كامت قفلت الباب و طلعت عصارة دهن رفعت دشداشته و كامت تحط لرجليها أباوع الها دمعت عيوني تحط و هي متوجعة اثر جويات جگاير كملت اني الترتيب و خليتها كاعدة
طلعت و لكيته مثل الشر يدور بالوجوه و يسأل امه اشرتلة عليه
عود يعني وياهن طلع ما حِجة شي صبوا غده و وزعوا
و كلهن ملتمات بالمطبخ ينظفن و يصبن چاي
لارا : طب و الله كتير حلوة عاداتكُن يا ريتني هون من زمان
رقية : لا هلا و لا مرحبا بيج
لارا : على مهلك ضرتي لا تخسريني بكرى تجينا الثالثة
و تتمني نصير أنا وياكِ رفقات
رقية : اطم روحي بساعة الأصادقج بيها
لو يبقى يوم بعمري
غسان : خمس چايات و انتِ مرت عمي اللبنانية
ما تسوينا هاي الكبة الشوي اليسووها بيت ابو عصام باب الحارة و بيوم ام زكي تجيهم حتى تاكل
لارا : ههههههه تدلل بكرى أكتب الكم المقادير و اسويلكن احلى كبة مشوية
غسان : و ياللي بدو يتحدى هايدي الحارة من قدا
نضحك و هو اخذ الچاي
لارا : ميلي ام خصر منحوت بدي روح نظف غرفتي
وخرت مبتسمة و زِناد گال اوصل اهل حياة و ارد أوصلكم لان ما أفرغ بعد احضر بالجنطة و اني ضايجة يعني خلي نبقى هنا والله احلى من البييت
اجه أخذنا بس هاي المرة شايلين فرحة رجعة أبوية ويانة
شلون تكدر كلمة تغير حياة أشخاص هواي رجعنه للبيت و نفس الروتين بس امي صايرة مهتمة بنفسها
نزلت من فوك لازمة المحجر
جُمارة : يمة ليش اكثر شي هنا راسي يريد ينفجر فهميني
ليش جاي أنسى كلشي بساع ترى اني بية شي
تغريد : ما بيج شي هاي لان مقهورة على امير
- يا اميررررررر يمة هو اني اتذكرة والله حتى شكلة جاي أنسى اخذيني للطبيب مرة الگة روحي صاحية و مرة مخبلة
تغريد : كلشي ما بيج لا توهوسين تعاي اكعدي هنا يالله
نزلت كعدت يمها بالكاع تمرغلي راسي
تغريد : كتلج عوفي زِناد لا تتقربيلة إذا ما يطلع حاطلج سحر أنا كلشي ما أفتهم والله
جُمارة : يمة شعليه زِناد براسي انتِ ما تدرين شكد هو يخاف عليه
تغريد : هسة يرد ابوج ان شاء الله و تعرفين حقيقة زِناد
لان اني ما تصدكيني
جُمارة : مابي شي و كلش حباب
صارت قاسية على كصتي وخرت منها و رحت على الجرباية
و نسيت من اروح يمهم اخذ رقمة و امي حتى من تسبح
تاخذ تليفونها وياها
روز : راح يطگ گلبي محمد ماكو من تعاركنا لليوم
جُمارة : امي ضاله تتحضر لابوي من هسة و حارمتنة
روز : هي امج حالفة ما تزوجنه إلا يرجع ابوج
وره شكم يوم اجتي عجيبة غيرت كيان امي كله كانت
تنام و تكعد تغلط على زِناد
تغريد : جذاب حسبالة ما أدري بي طلع سالفة يعقوب حجة حتى أرضه ياخذ جُمارة والله لو يموت ما اخلي ياخذها
صارت دورة السنة مال آمير و جدة دكت على امي نروح امي ما قبلت كالت من ترحون للنجف خل يجي واحد ياخذنه
روز : شلون ما ترحين غير انتِ ام الولد و هناك قراية و عشا ترى كلش واكفة ما ترحين
جُمارة : هي امج دوم هيج
تغريد : اش و لا صوت اسمع
عفناها و صعدنا اني متمددة على الجرباية و ما ادري بروحي شتريد و شبيها اليوم كله راسي يريد ينفجر و لحظات هيج تمر احس روحي مشتاقة لزناد و اريدة يمي
رحنه للنجف اجه أخذنا سلام و هناك ملتمين كوستر و سيارتين كلها راحت ويانة كاعدة يم روز وامي بالكوستر بس اني بغير عالم
الدنيا حارة و اني مختنكة اكثر من الجو ما اكلت ابد لان ما الي نفس و اول ما وصلنه المكبرة و بدو ينزلون بقيت آخر وحدة لان احس روحي دايخة كملت بعدني اول ما نزلت و باوعت لامي تلطم على رأسها طحت بالكاع فزيت على روحي بحضن روز و زِناد فوك راسي و جدة و امي بجيها يفطر الحياطين
رجعنا لبيت جدة و امي دكت رجلها إلا هسة نرجع لبغداد
زِناد : بس خلي ننطمر النه ساعتين و سلام اخلي يوديج
رهينة : تعبانين الطريق طويل
تغريد : ما عاتبة عليكم هسة اخذ تكسي و اروح
سلام و ولاء رفعوا أديهم كالولة نعسانين و يصير قدر نندعم ما نكدر
و امي ابد ما قبلت تقنع تالي شغل سيارته وهو رجعنة اني الطريق
كله نايمة وره يومين كالت روز دك عليج زِناد مأخذ رقم روز من محمد
بس ما حجيت ويا احس بروحي بهذا العالم و امي ٢٤ ساعة
تحشي و تحجي على زِناد و وحشيته الي خلصت عمري بس اسمعها منها ما شفتها فد يوم
مرت هواي إيام و اني بعيدة عن زِناد و جدة بالاتصال و بالشوف
نايمة على چربايتي و البردة مفتوحة اباوع للفرع و البي
صغرت عيوني و اني اشوف سيارة زِناد طبت للفرع و نزل هو و جدة
و طلع الكرسي من الباب الورة و فتح الباب شال فضة
و حطها على الكرسي
دكو الباب و نزلت اعدل بالشال فتحتة امي سلمت عليهم و كعدت يم فضة وهي مكيفة بية
فضة : مشتاقتلج ما تدكين عليه من امج
تغريد : حارمة عليهن التليفون ما اريد عيونهن تطلع
فضة : خطية هم على كيفج وياهن طلعيهن ونسيهن
تغريد : لا هم اطلعهن اني
رحت للمطبخ اطلع الكلاصات حتى اصبلهم عصير لكيت علاكة سودة فوك الكاونتر جريت الكرسي و صعدت لحتها فتحتها
مشدودة مية شدة و بقيت فاتحة حلگي من فتحتها
