رواية يا اجمل الوحوش الفصل الرابع والثلاثون 34 بقلم رسل فهد

رواية يا اجمل الوحوش الفصل الرابع والثلاثون 34 بقلم رسل فهد 

ودينة الك چم شعر ؟

نص حَرف ما دزيت

اسمر و هيچ أعملت

چا لو عيونك خُضر بأحوالنة شسويت ؟

- رُسل فَهد

....

" جُمارة "

تغريد : خطبچ آمجد و ماكو احسن منه

- شنوووووو ؟

- مثل ما سمعتي ويكول أني اجي اشتريلها بيت هنا

و اخليها تداوم و اني اخذها و أجيبها وين اكو هيج دلال

جُمارة : ليش زنااااد مو هم هيج هيج گالج و بيدة دفعلي فلوس الموازي و حتى المعهد من چان عبالنه يتصدقون علينه

هذيج السنين كلها هو يدفعلي و ما يگول لاحد حتى الي ما گال بس الوهمي كال لروز

امي عافت الحجي كله و انهارت من كبت الوهمي لان شكد

ما تكره زِناد تكره هذا اكثر منه

عضت ايدها و ضربتني على زندي

تغريد : انعل ابوج لابو زِناد لابو الوهمي لابو روز

حشى أبوج

درت وجهي على الدرج آثر صوت روز

روز : جا انتِ تسبين ابوج و ما تسبين رجلج

تغريد : ولجن أنا ما جانية بنات بيوت أنا جانية مستهترات

ما يخافن وعلي وعلي أذبحجن و اطم عارجن

روز : جا انتِ مو تكرهين بيت سرهيد كله

امجد منين جاي من فطر الحايط

تغريد : امجد طالع على خوالة مو عليهم و رجال گول و فعل

ياما وياما وگفلي هو و امه

جُمارة : شوگفلج شسوالج لان شردج من بيت جدة

و انتِ تدرين زِناد لو بحجاية زينة منج يجيبج ويگعدج بالصدر و هو الممنون بس انتِ عجيبة محشية راسج

تغريد : انجبي لج ادبسززز شنو انتِ واكفة عينك عينك تدافعيلة و علي اذبحج إذا تجيبين اسمة على لسانج بعد

جُمارة : لا اجيبة و اني احبة ما اريد غيرة و لو تموتين ما اخذ امجد المريض النفسي شايفة شيسوي بمرته و شلون يضربها يعني انتِ لليعذبني تنطيني و لليدللني ما يعجبج

تغريد : ولج بيمن مدللج شمسوي

جُمارة : والله عاد انتِ تكرهي يعني بعد مية الف سنة إذا يسويلج زين ما يغزر وياج هسة خلي يجي امجد يجيبلج كيلو طماطة تحبي

تغريد : اي امجد يسوه زِناد بقاطات و مرته طبعا إذا هي عرمة و ما تخلف و تتجاوز عليه و على امه وين يلزم اعصابة

مو هذا ولاء شحلاته وي مرته عبنها تحبة

جُمارة : والله ما اقبل بغير زِناد و شتردين تسوين سوي

و زِناد اني احبة افتهميني هو حبيبي يمة حبيبي

حجيتها و صعدت رادت تلزمني بس روز طببتني للغرفة و قفلت الباب

و اني كعدت على الچرباية أبچي و لازمة راسي قوي روز واكفة يمي ايدها على كتفي

روز : كافي لا تبجين هي امج يا يوم جابت النه سالفة بيها خير دومها ملوعة گلوبنه فوك ما هاي ملوّعة

جُمارة : يعني شلون فكرت هيج وهي تدري بية احب زِناد

تريد تزوجني لأمجد وهو يموت من زِناد يريد يتزوجني حتى يقهرة

روز : اني من شفتج هاي الأيام ما تختبري گلت عافتة

جُمارة : لا هذا حبيبي شلون أعيفة

روز : لعد متخابري

- راسي يوجعني و احس روحي مريضة وهو من صوتي يعرفني هسة يجي واني مالي خلگ امي

- اخذتي براسيتول

- ماعدنا و امي كل ما اوصيها ما تجيب عبالك ترتاح من تشوفني شلون أتوجع

روز : لا مو لهاي الدرجة

سكتت فترة و اني سكتت رجعت كالت

اكلج هم زِناد و امجد و لا يتشابهون بالشكل و لا عبالك اخوة هسة ولاء يشبه زِناد مبين الشبه واضح

جُمارة : انجبي زِناد محد يشبهة هذا الوحش مالتي

والله إذا يدري ياكل امي و امجد و عجيبة بسنونة

روز : انهجم بيت الخلفوج لا تسمعج تغريد

ابتسمت و درت وجهي للشباك

روز : ما ادري حضنا وين نايم خايفة على محمد إذا يطلع من السجن و يكتلوه هذولة الهادرين دمة و بنفس الوكت كارهتة ولج يريد يسافر و يعوفني

و تغريد على ساعة تجيبلي خطابة و تزوجني

جُمارة : تعاركي ويا

روز : هو أصلا ما احجي ويا صار يومين تعاركنة

حجيت ويا حچاية گام يصيح عليه يمكن محققين ويا مره ثانية و ضاربي لان من يحچي وياي يون بوجع

جُمارة : كبر جا ترحين تسجني هو يستاهل بس لو مو سجن لو متزوجة غيرة مثلاً و حارگة گلبة

روز : لأ صدك ؟ هاي المرة نصحتيني المرة الثانية لا تعيديها

طلعت من الغرفة و اني راسي يريد ينفجر مخليته على الشباك بس القهر محتلني وين ما اتذكرلي موضوع ينعصر گلبي

نمت و ما كعدت إلا ثاني يوم الصبح على صوت روز تگعدني

- ولج كومي فضة مرت زِناد جوه تريدج

كعدت دايخة و اكول شعجب جايه يعني شتريد مني

نزلت جوه لگيتها كاعدة بالهول امي يمها و عطرها تارس البيت

سلمت عليها بس احس روحي مستحية منها

امي تباوعلي خازرتني و كامت تسوي غده المطبخ متروس مسواگ اكيد هو جايبة اني ساكته و عيني على فضة اديها حلوة تلمع بيها محايس ذهب اثنين كبار حطت ايدها على ظهري مبتسمة

أبتسمت بوجها بس متوترة اباوع لأيدي ترجف

فضة : زعلانة مني شنو

فزيت وبلعت ريكي لزمت ايدها

جُمارة : لا والله لا اني ليش ازعل منج خفت لا انتِ زعلتي مني ما صحتيلي و ما جاوبتج جنت مقهورة لان عمي عمار ضربني قوي

فضة : زِناد طيحلج حَضة و اليوم الصبح أجه يتوسل

حتى يخليهم ينطوه طحين ما عندة سلعة و گاله إذا تريد

اروح إبوس راس جُمارة أبوسة

عضيت شفتي اشرتلها نصي صوتج امي ما تدري

جُمارة : شلونها جدة

فضة: زينة تسلم عليج هي و حفيدها الجبير

- الله يسلمها

جنت ادري بيها تعرف اني اني احب زِناد بس ما أبين گدامها

و لا حتى أحب اسمع تفتح موضوعة يمي لان ما ادري شيدور بعقلها

يجوز تحبة بس ما تكدر تكول

تغدينة و اخذتها يم المغسلة غسلت أيديها كعدنا اني وروز يمها بالهول و اجتي امي ويانة تسولف الها على منطقتنة ناس فقرة و الجيران مثل

الأهل واحد يوگف للثاني و الجارات مثل الأخوات بحيث التروح اليوم للسوگ يوصنها كلهن تجيب غراضهن و ما تتعاجز

فضة : حلوة الناس البسيطة و على نياتها كل الوادم الما تدخل الفلوس بعلاقتهم

تغريد : انعل ابو الفلوس الله وكيلج الوحدة إذا دكول للثانية دشداشتج حلوة تنزعها و تنطيها الها

فضة : جثير حلو هيج احسن من الاستعراض

كامت الوحدة من تشتري جديد موش لنفسها

بس خاطر تغور بي چم وحدة

تغريد : بس اني اكلج بس بيناتنة هيج احنه الجوره

وي الغير نحسات كلنه نحسات شايلين خشومنا ع العالم

گلت بگلبي صدك اول مرة امي تعترف

من صارت عصرية حطت العباية على راسها امي و گالت شوية و اجي

اول ما طلعت امي اندارت فضة على روز

فضة : ولج ليش تسجنين الولد وهو توه جاي للعراق

روز كامت الدموع تجري عشرة عشرة

روز : هو خلص عمرة يلعب بأعصابي يضحك علية

و لا دكولين ليش سجنتي لان يستاهل بس اني گلبي نذل ما يقبل إنساه و بعده يريدة

ضحكت فضة و هي تمسح بدموع روز

فضة : هو ذولة احفاد رهينة التتعلق

بيهم بعد ما تكدر تهدهم

جُمارة : حتى انتِ

ضحكت و ضربتني على رجلي

فضة : شجلبتي بية ولج أنا أخافن عليه منهم جثير منهم

ما يردونـة و يكرهونة ترى هذا الزلمة خلص عمرة متعوب

حسرة بگلبي ضلت اعاين ضحكته شايل هم الدنيا كلها

و محد شايل همة

جُمارة : ما أسمحلج جا جدة وين راحت

فضة : اي جدة تحبة و تخاف عليه بس ما تگدر تحمي

منهم يعني وادم الترش على ابن آدم تيزاب شواصلة من كره و حقد گلوبها

جُمارة : سولفينه شلون صَـار هيج عليج الله

هزت راسها بمعنى اي و اني و روز كعدنة بالكاع كبالها منتچيات

على رجلينا و روز كامت طفت حتى التلفزيون

فضة : گبل جثير سبع سنين لو سته

چان رايح مشية چبيرة و عمامة كلهم ضدة لان راح لوادم موش صلح وياهم بس الوادم أجوي لعتبة بابة و نخوه

مو مال يردهم

- اي

فضة : اي و چانو عمامة كلهم ما يردوه هو الشيخ مو مثل هسة بس عمار جان حتى فاخر ضدة وهاشم و قاسم

بس هسة تقبلوا السالفة شافوا ما يهدها لو شمهما صار

- اي

فضة : و هو رَاد من المشية و طايح الفصل جوه الفراش

لان ابو مطيح لذولاك الوادم فصل و ما گدروا يردوه

صارت سالفة الديرة كلها المشية الراحلها زِناد

و تتشَيم بي الوادم التحبة و الما يحبة ساكت مايكدر يحجي

- اي احجي النريدة لا تجي امي

فضة : أي تالي وراها بچم يوم الفجر چان طالع للمعمل تريد تجيهم وجبة جديدة و لازم يفتح من وكت وصار عياط جدتة

تارس الديرة و كلها طلعت تعاين شكو گالوا زِناد و هو نازل من السيارة واحد طاش بوجهة بطل تيزاب بس هو مخلي اديه على وجهة

روز : خطية گبر هاي اكيد عمامة بس معقولة

فضة : بس من كثر ما التيزاب جثير ما صار بس على جفوفة

نزل على ايده كلها و حرگها هو الواحد من ينچوي روحة تشيط موش تحترگ اديه اثنينهن

بلعت ريگي و احس روحي نهضمت بس ما اريد ابين

جُمارة : ليش ما عرفوه لسه ؟

فضة : جان بوكتها هو متعارك وي جماعة أخذتهم الشرطة و اخذو عمامة بَس طلعهم كلـهـم گال ما شاك بواحد أنا و ايام العلاج عاشت كلها ويا برعب و حتى طاري الشيخة بعد محد جابة ورا ما طاب الحرگ گام يسافر حتى يعالج الأثر

و كل ما يسافر ويرد كلها داخلة إنذار شوية هاي السنة رَد احسن من گبل

جُمارة : شلون سِكت والله لو اني منه اخيسهم بالسجون

فضة : بعد من كد ما نخاف منه محد فتح ويا هيج موضوع

اهم شي ينسى لان حتى لو لزموه قابل ترجع ايدة

- بس على الأقل ينسجن ينعدم مو يبقى مرتاح

بقت روز تسولف و اني بعالم ثاني أتذكر من شفت ايدة

جُمارة : فضة بس اني من شفت ايدة قبل سند

هم جان الحرگ مالتها قوي

فضة : اي هاي عود عالجها بالليزر تالي الجلد ما تحمل و رد أنفتح ايدة اليسرة موش مثل اليمنة اليسرى جثير متأذية

جُمارة : خطية

حجيتها و احس دموعي تريد تنزل رحت المغسلة غسلت وجهي

و طبيت للمطبخ امسح بعيوني و اهفي لوجهي بأثنين ادية

رجعت كعدت بالهول و روز صعدت نامت

سويت ماعون فواكه بالمطبخ و فضة يمي تسولف وياي

فضة : امس خابرته گتلة اريد اروح لجمارة گال حضري روحج لان هو جاي أعلمود محمد ابن عمار

جُمارة : هواي احبج حتى أني ، لان من

وجهج مبينه شكد حبابة

فضة : بس شبيج شو شكلج متغير تعبانة

- اني ؟ لا بس أفكر يعني خاف هم تخلص العطلة و ما أداوم

و تروح كل أحلامي بالشط

فضة : لا زِناد موجود كلشي تردي يسوي

جُمارة : زين ليش ما تتبنون أطفال و تعيشون حياتكم عادي

باوعتلي مستغربة عقدت حواجبها و اني من أحجي هيج أجلد

بروحي جلد و أدري بنفسي ما أكدر أنسى زِناد

فضة : شبيج ؟ ترى زِناد متكفلني حتى ما ابقى بالشارع

لو اموت لو اطيح بيد وادم ولد حرام هم تاخذ كليتي و تشمرني بالزبالة اني عايشة حياتي مثل ما جنت يم ابوي

و احسن أنا ما أكدر اصيرلة مرة و لا أريد أنا هيج مرتاحة

معززة و محترمة و كلشي اريدة يجيني لان ماعندي حيل

لسوالف ثانية

جُمارة : بس انتِ مرته هو گلي حتى ما ينام بالغرفة يمج

بس هذا الشي من حقج ليش ساكته عنه

فضة : أنا ما اريدة ينام يمي جُمارة أنا ما أحب حياة المتزوجين اريد واحد يتكفلني بس ما يريد مني شي مرة

اجه للغرفة و نام يمي بس الصبح من راح دزيتلة رسالة بعد لا تجي أنا أتقيد من يجي يمي خل يجيني يشوف شمحتاجة و يروح بس ما يبقى يمي

اخذتها للصالة و مستغربة من كلامها إذا جان صدك

بقينة نسولف و اجتي امي المغرب أجة حتى ياخذها شاورتني

فضة : راح أدك عليج عود جاوبيني اخذ رقمج منه

جُمارة : لا امي اخذت التليفون مني ماعندي حظ

امي جرتني من ايدي و طببتني للمطبخ حتى ما يشوفني طلعت هي ودعت فضة و راحوا طبت طبگت الباب

تغريد : حسبالة ما أعرف عليمن جاي

جُمارة : ترى جاي على محمد بالسجن و فضة كايلتلة

اريد اروح يم جُمارة

تغريد : ولج هي هاي فضة شعرامتها مرة تعاركت وي عجيبة

جُمارة : اكيد تعاركت على مود زِناد لان هي ما ترضى واحد يحجي عليه

- اي وين لاگيتها فلوس وذهب و سفر كاعدة أميرة

هسة يتزوج و تورشع مرته كلشي اول شي تسوي تخلي يطلگها

جُمارة : لا مستحيل يطلگها كل هاي السنين متكفلها و هسة يطلگها بعدين ليش يطلگها قابل هي اصلاً ما حاسبة روحها مرته دكول ما احب المسؤولية

تغريد : اي غير تلعب روحها منه و من ايدة هو ياهي ترضى

بي حتى فضة المعوقة باعدة روحها عنه مية متر

جمارة : ديالله هسة هو كاتل روحة على وحدة

تغريد : اي كاتلها ليش ما كاتلها

جُمارة : بس عليه و اني هم كاتلة روحي عليه

نزعت نعالها و ضربتني صعدت فوگ

وره يومين دگت جدة على أمي و امي تعاركت وياها نزلنة على صياحها

تغريد : آل سرهيد اهل المصايب يومية جايبين النه مصيبة

- شكو

- متعاركين و متصوب عدنان و هم مصوبين اثنين من ذولاك العالم و دكول راح يجيجن سلام تعالن هنا كلشي يصير

شيصير بعد هو ولد و لحگتوني عليه و اخذتوه

بقينة كاعدين على الدرج و امي تغلط عليهم

تغريد : يالله يالله حضرن هدومجن خل نولي جم يوم و نرد

كيفنة امي و روز لان اختنگنة من البيت صعدنه فوك

جُمارة : خوش انتِ مرتاحة لان رجلج ضامتة بالسجن

روز : اي بس رجلج شلون بي يطلع گدامهم

- سبع ما أخاف عليه

روز : اني أخاف على أحمويني خطية النوب هواي

نحضر بالملابس و نضحك اخذت تليفونها اريد اكتب رقمة و اشوف

شكو كتبت البداية بس و نسيت الرقم كله ضربت راسي مرتين اضحك

جُمارة : اكلج شو ناسية رقمة

روز : اي عادي ما كاتبته

- لا بس اني جنت حافظته كلش

ما اهتمتلي روز كالت الموضوع عادي بس اني احسة مو عادي

كعدت على الجرباية و هي رتبت النه الجنطة ما كفت اللعابة آخر شي شمرتها عليه نزلنه جوه و امي سوت النه لفات نواشف اكلت وحدة و ضميت وحدة للطريق

اجه سلام أخذنه و امي كعدت بالصدر تحجي عليهم و هو يكللها اي والله كلامج صحيح و لحد نص الطريق امي مبينه أرتاحتله كامت تسولفلها على ايام قبل من جان ابوي موجود و سلام ما يكللها الله يرحمة يكول ان شاء الله يرجع

من وصلنه الفرع متروس سيارات و زلم هواي واكفة بره من غير ولد عمي عيوني تدور عليه ما شفتة طبينه للبيت جوه وًجدة تلطم على رجليها

رهينة : يمة وتالي وياكم وين أضمكم يومية گلبي ملوع بواحد شني كبرتكم خاطر أطيكم للگيعان

حياة واكفة تفرفح و يسكتن بيها لان حامل ، نورس صارت بوجهي

جُمارة : عفية شكو ؟

نورس : هذا عمهم عمار بايع لوادم طحين وطالع خربان

و الودام جايته يكلهم تتبلون علية و متعاركين كاتلينه

و ولدة هادين و ذولاك هادين و صارت بالاسلحة

و هسة رامين حتى المعمل مال الشيخ و مأخذين امجد يكولون إذا ما تجيبون الفلوس نكتله

النسوان كلها هنا و كلمن خايفة على ابنها لو رجلها

صوت زِناد بره يصيح منهار عليهم

جُمارة : خل ينطوهم فلوسهم و هاي هي بعد عليمن

حجيت و هن كلهن يباوعن عليه

رهينة : يجدة ما تخلص اخ يعمار دومك ملوع گلبي

ولك گوه تريد تخلي راسك براس زِناد هاي تاليها

ام شريك : چا هم المعمل الجبير ليش يدگوا مكسورين الرگبة

صار صوتهم بالساحة عالي كاعدين يعبون الرشاشات طلق

طلعت جدة تركض و هن كلمن لابسه عبايتها تطبب برجلها

طبت مرت عمي عمار هي و چناينها تبوس بولدها و نسوانهم يبچن

طب علي يركض بـ الزي العسكري سلاحة بيدة و شمرلهم طلق

- يمة لا يتصوب لو يموت

درت وجهي على اثر الصووت لگيت عالية تبچي أنصدمت

و أبتسمت

جدة طلعت بالشارع تبوس بزناد طَببها و ايدة على متنها يضحك

و حتى هُمَ يعبون السلاح مبتسمين هيج السالفة عدّهم عادية

زِناد : محد يرمي طلقة إذا ما أنا أكللكم

رهينة : جدة يبعد جدتك انعل ابو المعمل

لا تروح تنضرب أنا شحصل

زِناد : جدة چا المچان الينضرب تطيح سمعتة ياهو يشتري منه بعد بس هذا ابنج هاي سوالفه دوم يخرب ما يعمر

طب شريك بيدة رشاشتين انطة وحدة لزناد بيها مثل الحزام لبسها

و صارت على صدرة

نسوان ولد عمي عمار كلمن گايدة ابنها لو شايلتة و واگفة يم رجلها

تبجي و تحلف بي ما يروح مرت ولاء و مرت يونس هم واكفات يمهم

زِناد : يالله فضوهـا

گاموا و صوت بجيهن يقهر و هم يسكتون بيهن و يبوسون بجهالهم

ام شريك راحت يم ابنها و عالية مدت ايدها على متني و طلعت

لرجلها شبگها اول ما شافها مسحت دموعي و عيني على زِناد بس هو ما يشوفني صايرة الساحة هوسة

فتح الباب و اشرلهن طبن و هم بدو يطلعون وخرت من الباب وكفت برة يم الشباك جدة وصلت لنص الساحة تريد تطب و هن كلهن بـ باب المطبخ يباوعن باوعلي و تغَير كل كيانة ، عدل سلاحة و أبتسم بوجهي

رجُل يحمُل ملوحة مياه الانهار التي في مُحافظته

بينما يصوغ القلائد على صدر النساء التي براعيته

لا ينسى أن يصوغ قلادة بارود السلاح على صدره

بلعت ريگي و مسحت عيوني صاح بصوت عالي

زِناد : جددددة ديري بالج عليها

احس روحي أنهضمت ، الحلال شكد صعب كل هذا الحب

و اني ما أكدر أحـضنة باوعت لجدة و رجعت باوعتلة طلع يسد الباب

راد يطبگة و انفتح أشرلي بأيدة تعاي ، عفت كلشي و رحت أركض

رغم ادري امي بالمطبخ و يجوز تضربني

وصلت يم الباب هو مغطي المكان المفتوح بظهرة و منطيني مگفاه

يوجههم يصعدون بالسيارات

زِناد : ليش تبچين حبيبتي ، لك علي اصعد يمي انتَ وشريك

جمارة : خلي يولي المعمل لتموت

زِناد : هههه أوصيچ وصية موش تتزوجين إذا متت

لا تخلين تعبي يروح على الخالي بلاش

ضربته على ايدة

جُمارة : لا تحجي هيج مستحيل أتزوج غيرك لا و انتَ عدل

و لا انتَ و تموت اني بَس الك

زِناد : ما دامني عدل ضامن هاي السالفة بس يا خوفي من أموت يحلى بعينج واحد غيري

جان يحجي وهو يضحك و اني روحي تحترگ

جُمارة : ما يحلى بعيني وحش غيرك

- يالله زنااااد

زِناد : جَـاي ، دار وجهة عليه مبتسم

مو جاي أحچي ويَ آغاتكم

ابتسمت بوجهة و اشرلي بعيونة طبي و سَد الباب

لكيت دمعة و رقية و عجيبة و لارا و عالية كلهن بعدهن بالباب مال المطبخ

يباوعن ضلينه كاعدين و امي خازرتني بس الأجواء ما تساعدها تضربني لان كلها متوترة جدة تدك و تنوح

اني گلبي مطمئن بَس صار الليل و ما أجوي گامن يلوبن شفت عالية

تفتر بالساحة رحت يمها

جُمارة : تحبينه علي ؟

كامت تبجي و تهزلي راسها بـ اي

طبت وياي لغرفة جدة روز كاعدة بعالم ثاني وحدها

عالية : هو توه جاي من العسكرية وشريك فوگ الضيم امس عاف الدوام و اجة لان شمعة كاتليها اخوتها و ولد عمها حتى امها امس أجتنة باست ايدة دگلة عوف بتي

جُمارة : خطية هو هم شنو ذنبة

عالية : كاللها كليلي أنطيني روحك انحرها گبالج بس لا دكولين عوفها أحنه نعيش سوة و نموت سوة

روز : يعني ليش مينطوها

عالية : شبيج اخوها الجبير خطب رحمة حماتي الحية و ما انطوها و اهل شمعة هم عاندوا من خطبنا منهم مرة

روز : حماتك حية ؟

عالية : يا ام سبع روس لو متزوجة و خلصانين منها حرامات

جُمارة : لا هو ابو شمعة شيخ عشيرة يعني جان رحمة صارت شيخة لان رجلها شيخ وره ابو طبعا اني ما شايفتها

بس مصدكة بيج عالية

عالية : امها ما تطلعها مو تخاف عليها من العين

لا تخاف على العالم منها لا تلدغهم

ضحكنه اني و روز و اني اباوع لروز بشماته

فزينة على اصواتهن برة طلعنه لگيناهم جايين و اني صرت مثل جدة احسب بيهم واحد واحد بَس زِناد ماكو و جدة طلعت للشارع تدور عليه

طبت ويا تبوس بي اباوع لحور من شافت امجد بلعت ريگ و ضمت روحها وره النسوان حتى ما يشوفها

كلمن اخذ عائلتة و راح و زِناد اخذ جدة للمستشفى تشوف عدنان

تغريد : وين الجنط جيبنها نبات يم عجيبة حتى الصبح نرد

جُمارة : ما اروح

جرتني من شعري و روز خافت شالت الجنط بساع

و عجيبة واكفة النه بالباب امجد لازم حور من زندها قوي و مبينه من وجها متوجعة منتظر امه تطلع و من طلعنة سوة وًشاف امي سلم

عليها وهد حور خلاها تجي ويانة وهو يمشي كدامنه

جُمارة : شبي وياج

حور : يامن يوصلة للبيت خاطر يطلع حرگة گلبة بية

- وهو ليش ضايج مو عافوه

حور : اي عافوه بزود زِناد و تخيلي

جُمارة : جا انتِ شعليج

حور : خلصت عمري ويا أتحمل سوالف موش أنا المسويتهن

طبينة لبيتهم و عيني على بيت زِناد گامن يطبخن عشاء

و فضة بالغرفة ما اجتي لبيت جدة تطمنت من گلنالها ماكو شي

بيدها كتاب تقره

صار صوت صيحة فوگ و انكتمت بساع باوعت لامي سوت روحها ما منتبهة من صبوا العشاء امه كامت تصيح حور شوية و نزلت

لازمة الدرج و تمشي گوه وجهة مابي اي اثر بس شاحب ويقهر مدت ايدها تاكل و كلساع تطيح الخاشوگة

نزل هو مبدل كعد وراها كاللها سويلي لفة سوتلة بالكوة اخذها و طلع

خلصنا الاكل و كعدنا بالهول

عجيبة : عدنا فوك غرفة للخطار نامن بيها

ردت أكوم لزمت ايدي فضة

فضة: جُمارة تنام يمي

تغريد : لا يم خالتها

فضة : هي و خالتها ينامن يمي

اباوع لعجيبة و فضة وحدة خازرة الثانية حتى خفت

أندگ باب المطبخ و عدلن حجاباتهن درت وجهي على باب المطبخ

ابتسمت من شفته زِناد هدت ايدي فضة اشرتلي عليه روحي وياه

زِناد : السلام ، يالله جُمارة جدتي تريدج

تغريد : احنه جايين هنا ما تروح لهناك

- ابقي انتِ هنا بس جُمارة تروح يم جدة

اجتي امي لزمت ايدي تريد تجرني و فضة رجعت لزمت ايدي

وهو أجة و كف يم فضة أشر لروز يالله

زِناد : فضيها عاد

كرصت ايدي امي قوي و جرتني هديت فضة و وكفت وره امي

تغريد : و انتَ شنوووو بيها

زِناد : تعرفين كلش زين أنا شنو

تغريد : بتي جاييها خطابة و هي موافقة و الأحلام الـ براسك كلهن ما يصيرن

باوعلي عاقد حواجبة أشرتلة بعيني لا بسرعة أطمئن

اشرلي بأيدة تعاي و هدتني امي على اثر الكلمات الگالهن

زِناد : اسم عمي يعقوب طلع وي الاسره العايشين

تغرير : شنووووووووووو ؟

صدگ و تفرها دنيانة

و يرد العافنة ويانة ؟

....

" ورود "

فتحت عيوني من عاينت الكتب على الچرباية و رجعت عاينتلة وهو

التليفون بعدة بأذانة گرص خدي و حرك ايدة على شعري

بقيت واكفة بمكاني ما مستوعبة الصدمة و الفرحة

مديت ايدي على الكتب افتحهن

سد التليفون و وگف يم الميز

شراع : اقري وكلشي صعب أني أدرسج و إذا كلش ما افتهمتي حتى أدخلج خصوصي

درت وجهي عليه ما ادري شأحجي

اريد اكلة شكرا بس ما جاي تطلع من حلكي

نزل جوه و بقيت اعاين بالكتب ما مصدكة أتلمس بالأوراق تعشيت

و صعدت هو بدل و طلع سفطت الكتب على الكومدي يم راسي

و افتح بيهن واحد واحد لحد ما نمت و كتاب من الكتب بيدي

فزيت عليه و هو يوخر الكتاب من حضني و غطاني عدل

اجه تمدد بصفي بقيت كاعدة اعاين بالغرفة مدلي ايدة

الما مضروبة

شراع : بس شوية مرغيها

مديت ايدي امرغها و انا مطفية ما ادري شوكت نمت بس فزيت الفجر نايمة علي ايدة وخرت على كيف و نمت على مخدتي

أعاين لوجهة شكثر جنت اتخيل يجي يوم و انا ويا بنفس الغرفة

مرت اكثر من ساعة دگ المنبه مالته غمضت عيوني طَفة المنبه و گام اخذ هدومة و طلع من الغرفة يسبح شوية وطَب يعدل بالحزام دكت الباب

غفران انطته قميصة وگف يبدل كدام المرايا كعدت اعاينله

شراع : صباح الخير

ورود : صباح النور

رش العطر و لزم بيدة الروب و الجنطة مالته و أوراق ثانية

شراع : دزلي مسج إذا احتاجيت شي

فتح الباب و نزل نزلت ورا كلهن كاعدات

غفران و شيماء كاشخات ملابسهن حلوة و كشخة و مكياج خفيف غفران فرحانة بس شيماء لا و آمل منهارة

امل جابتله الريوك هو و امه يأكلون

شراع : تعاي ورود تريگي

مديت راسي من المطبخ ردت أكلة ما اريد بس اشرلي

على الكرويته و سوالي مكان ما كدرت اكله لا

كعدت بصفة امة احسها حبابة فرحانة بي بس تخاف من بناتها

خلص الريموك و گام للساحة شغل السيارة هن صعدن و هو اجة يغسل مره ثانية مديت ايدي للماعين حتى اغسلهن صاحت امل من الهول

امل : عوفيهن الماعين عفية ما نستنظف إلا من أدينة

هديت الماعون و هو بساع دار وجهة عليه عصبي راح للهول

اخذ آمل لغرفة امه وطلع عصبي

فتنة : ورود تعاي

غسلت ايدي و رحت يمها بيدها قماشين حلوات كالت ياهو الأحلى

اشترلها هلى قطعة بنفسجي و بيها ابيض

فتنة : هاج أخذيها العصر تروح مرت عمج للخياطة

روحي وياها خل تفصلها و تفصل قطعتي وياها

هزيت الها راسي بـ اي و بقيت ساكته انا حتى ما اعرف احجي

وي الخياطة جانت امي تسولف لنورس و تفصلي

عزلت الهدايا تخبل كلها عطور و تحفيات حلوة نظفت الغرفة

و نزلت امل شكد مكروهة و غثيثة نظفت البراني ولو هو نظيف بس مسحت الأخشاب ما التخم و الطبلات و امل تطبخ

الظهر اجوي كلهم سَلموا و صعدوا

نزل كعد يم أمه و اني واكفة اسوي زلاطة و غفران نزلت تسوي فواكه

يكعدون على طبلة شوية ارفع من الگاع جبيرة و يرتبون عليها الاكل بالغدة بس الريوگ و العشاء أقسام مو كلها تاكل سوه

هو كاعد بالنص و من جهة امه و الجهة الثاني فارغة حطيت طاسة الزلاطة و أجت امل كعدت يمه

كعدت بين غفران و شيماء اكلت شوية و صعدت للغرفة شوية و هو صعد

تمدد راد ينام و دك تليفونة عوجت حلگي و درت وجهي ما جاوب الاتصال شوية و حسيت روحي انسحبت لحضنك

درت وجهي عليه بعصبية

شراع : هذا خشمك اليابس ما اله نية يلين

- لا

شراع : مخبلة من كاتبة بأوراق القضية مالتي معزوم عند اهلي اليوم القاضي لزم عليه لزمه راح ينصب بيها عليه منا لسنة

ورود : على أساس شلون أخذتني

شراع : ما أطب بيت أهلج تردين أخذج عادي أوصلج بس

انا ما اروح و لا أطب كسرت كلمتي مرة و طبيت علمودج

بقيت ساكتة ما جاوبته بالليل گلت لازم أكسر هذا الحاجز و أعيش حياتي ويا بسلام لان هو هم جثير تعب و خلي أنطي فرصة

احس بكلامة صدگ مو بس يقنعني

بَدلت و وكفت أرتب شعري و أتعطر و تمددت بفراشي

التليفون بيدي احس صوت امي مدري شبي بس مثل كل مرة خلصت المكالمة دكلي ديري بالج على رجلج ، سديته منها وردت أتمدد

انفتح الباب و طَب هو بيدة حلويات خلاهن على الچرباية

عاينلي مصغر عيونة اجه باسني و طلع

شوية و طب هم سابح حتى البطة بكدك ما تسبح

وكف يتعطر و حط تليفونة على الشحن

شراع : الأسبوع الجاي أسافر حضري روحج ترحين وياي

- انا ؟

- ماكو غيرج بالغرفة

طَفة كل الاضوية و أجة يمي باس راسي

شراع : راحن طناگيرك

ورود : لا بس گلت خلي أنطي فرصة يجوز يطلع گدها و ما يخذلني هاي المرة

- والله لسانچ مال محامية شدي الهمة

صارت بوساتة تنطبع على كل مكان وهو شابگني

بأيد و الايد الثانية على شعري

شراع : مو بس أعوضك و داعتك أنسيك كلشي شفته

ورود : منك لان بس انتَ أعرفك

- طبعا بس اني

ورود : تحب أهلي مثل ما تحبني لان ما

أحب اعاين علاقتكم هيج

شراع : احاول

ضربته على صدرة ابتسم

شراع : ما اريد اي شي من المواضيع السابقة ينفتح لان

لا انتِ تستفادين ولا انا

بقيت ساكته شوية وصارت ايده جريئة غمضت عيوني

من شَخص أحبة بـس على شكوك ما اعرف شوكت يتقين بگلبي

هوو هذا الشخص الصح و يستحق كل هذا التعب

بَاس خدي و راسي على چتفة

شراع : أنخصمت القضية لصالح لشراع

ضميت بية عِشگ من الطفولة يفور

بحرورته عادلت نيران الف تَنور

.....

" عالية "

من حيرة شريك و شمعة الراد بيها يروح يهد على أخوتها وحدة

لزمة زِناد كِتلة بالبراني يالله صحى على زمانة النوب زِناد دز جماعتة

عود آخر محاولة هاي احنه دوم كل محاولة نكول هاي آخر محاولة

و ابوها يكللهم ما عندي شي وياهم أنا كل ما اخذ خيرة تطلع مو زينة

و ثاني يوم صارت عملة عمي عمار و أنخبصنا نمت الليل كلة مقهورة

حسبالي علي نزل و ما اجاني وهو حتى لو جاي أنا ما ارد ويا

بس المهم يجي يعني

تالي من رَد من مصيبة أبو و اجوي أخذونا گال يالله للبيت

عالية : غراضي يم امي

علي : يالله جيبيهن واكفلج أنا

طبيت وي امي كلت خاف أكلة ما اريد و لَنه مفرغ الشاجور براسي

رديت ويا للبيت وهم كلهم ضايجين من وره أبوهم و تعاركوا ويا جوه

ما يرضى يعترف بغلطتة

صعدوا كلهم چَنهم بارود يرگعون بالبيبان من شفته طب للغرفة طبيت اسبح يبو يعني اليوم عصبي اني احبة بس من مرتاح

طبيت للغرفة أمشط و اخلي مرطب لأيدي اجيت أشغل التلفزيون

علي : أنطيني وياج سَفن

فتحت الثلاجة و درت وجهي لگيته يباوعلي حتى و هو عصبي

ما ينسى وظيفته

صرت المره النادرة لان امي تفرمت بيه كل روحة فتحتله القوطية ومديت

ايدي باوعلي و رجع باوع لأيدي اخذها مني و كعد عَدل

حجة وهو ضايج عود يعني لا تناقشين وره حچايتي

علي : لبسي ذيج الدشداشة

ابتسمت و اني بية ضحكة قوية بَس اخاف منه درت وجهي وطلعتها من الكنتور شمرتها على الچرباية

عالية : مو هسة من تطلع لان استحي

باوعلي صَفح و رد يلعب بالتليفون و دار وجهة عود ضاج

بدلت و خَليت عطر طفيت التلفزيون و اخذت نستلة من الثلاجة

عبرت من فوگا على الچرباية بدون ما يشوف حتى شلابسة فتح ايدة لان الغرفة ظلمة خطية رچيج ما يتحمل رفع الغطى و تمددت

علي : اثبتي بَس لتحوصين

عالية : عفية شمالك وياي قابل أنا الهادة على ابوك

رفع حواجبة يعاينلي بَس ما حجة وياي شي

علي : شلونج عند اهلج

عالية : أشوفنك سألت

علي : ما أسأل اريدج شوية تتأدبين

عالية : شني لان ما اريدنك تروح لهدى و لا حسبالك ترى اهلي ما يرضون أرد بس كتلهم خطية لا هو باللسانة

كالي راح اطلگها

علي : أنا گتلج هيج ؟ شو انتِ فد مرة صايرة

رفعت روحي وًكعدت گبالـه اكلت لكمة من النستلة وًهو يعاين الي

يريد اكمل اللكمة حتى احجي رجعت كذلتي و عقدت حواجبي

عالية : يعني شني تريدها والله أعمل ما أعمل

علي : شتسوين بالله و إذا ردتها

عاينتلة بعصبية بس ما بيدي شي اسوي درت وجهي تذكرت مواقف حزينة من طگوني شريك و زِناد و من ذاك العار باگ الذهب و عافني

حصرتني البچية اول ما نزلت دمعتين درت وجهي عليه

عالية : ما اسوي شي هاي حياتك و انتَ بكيفك أخذ هدومي و أروحن يم أمي أداريها

من عاين دموعي جر ايدي عليه و مسحهن يضحك

علي : هسة أنا شمحصل منچ بالله ضالة بس للجوايش

و المعارك استاذة

عالية : دوم أنا ساكتة و ما احجي و إشكال امك سوت بية ما حجيت هسة من صرت احس روحي اريدنك بس الي و مامش وحدة تشاركني بيك صرت اعاارك چا الما تعارك إعله

رجلها ما تحبة

علي : ولج هاي ياهي انتِ عالية لو مبدلينج

عالية : لا أنا عالية مرتك چفيني شر هدى و طلگها و شتريد

أنا أسوي

ضحك و خلاني على أيدة باس خدي

علي : بسيطة تخلص ، أبني شلونة

عضيت شفتي و ضربته على ايدة خفيف

عالية : هسة كافي لا تضل تعير بية

علي : ههههههه عمي مشتاگ لابني

عالية : چانك تريد ولد تدلل طلگ هدى و اترسلك البيت

جهال

دار وجهي عليه يعاينلي بصدمة ويضحك صدك أنا صايرة فد مرة

علي : لا كلهم ما يجون لمعزة هذا

حجاها و حط ايدة على بطني و أنا أشيل روحي و اركعها

من اتذكر الچذبة الچذبتها النوب هو مسوي روحة مصدكها

عَدل ايدة و خلة راسي على صدره شوية و صارت أيدة تمشي على جسمي وخرتها و شبگته

عالية : من تطلگ هدى

علي : شَلولو ما ينگدرلج

نمت و كعدت الصبح على صوت امه فوگ

ام سلام : يالله يمة علاوي حتى من تكعد تسوي المري

مال غرفتك الله مسلط عليك وحدة مسودنه هم هاي قسمتك

يلعب بالتليفون لگيته و يضحك باوعلي

كعدت رحت يم المراية الم شعري و فتحت بردات الغرفة هو گام طلع من الغرفة بدلت بسرعة و نزلت اسويلة اني ريوگ حطيت البيض

و اجتي رحمة

رحمة : منو كالج عود تسويلة ترى متعودة أنا اسويلةً

عالية : والله هو گالي ما اريد من غيرج خلي تعبج لرجلج

لو لاخوتج الممتزوجين علي اني اسويلة

رحمة : يمة يلوك لام شلوگ لبس الدندشة و أنا هسة إلا اروح اكلة ليش هيج يگول عليه مو تردين انتِ الحية تجين تخربين

علاقتي بأخوي

ما جاوبتها لان خفت لا صدك تگلة و يرزلني كدامهن

وديت الصينية اله للهول عاينلي مبتسم امه كاعدة يمة

علي : تعاي أكلي

كعدت يمة من شفت رحمة اجتي ردت اكوم لزم ايدي

ام سلام : جيب ابو المري خلي ياخذ القياسات وًيسويهن عيب العرس بعد اسبوع خو ما تجي هدى ما تلگة مرايا تعاين عليها

علي : أبوي وين أنا اريد احجي ويا

ام سلام : راح يم امجد عليمن تحجي ويا

علي : ما أعرس أنا ما بية حيل نسوان اثنين يمة

خلي هدى تشوف حياتها ليش أجيبها و اظلمها

رحمة : صدك علاوي عليك الحسين اريد اسألك انتَ كايل

لعالية ما اريد رحمة تسويلي ريوك بعد بس من ايدج

دار وجهة علية خازرني دنگت راسي غصيت باللگمة

ام سلام : يمهههه تطلگ بت خالتك ياااااااع غير اموت

ولك علاوي صدك تقشمرت

اكل لگمة و گام طلع بره و اني ركضت للغرفة قفلتها لان ادري بيها امه راح تعلن الحرب عليه

صعدت وره شوية كسرت الباب حتى افتحة ما فتحتة الظهر اجه أبوه

و صار صياحهم عالي فتحت الباب و طلعت اسمع امه و ابو عليه

وهو هم يصيح عليهم و خالد اخو ويا

عمار : موش مضحك الوادم عندك غصبا أعليك تتزوج و راسك يتكسر و حتى من العسكرية أبطلك ضحكت عليك

فرخة بطول زرك

علي : شني ضحكت عليه أنا مضحك جاي اكلك ما اكدر أتحمل أحط عائلتين برگبتي و انا بطرگ الراتب

ام سلام : طلگ عالية ام الفواين و وديها لاهلها

هي رهينة أصلا تريد تزوجها بملچتك خطبوها مني

علي : شني اطلگها و أزوجها شني مگرررررن انا

ما عندي غيرة صدك تحجين

عمار : جا شني وين شغلك هاي السنين كلها احنه يمتى ماخذين منك فلس وين جاي تودي يومياتك

علي : محد اله غرض يمي و هدى خابر ابوها انتَ

حتى اطلگها يم السيد

ام سلام : جا هاي شني مو هم إذا طلگتها راح تروح لغريب

وين غيرتك على بت خالتك

علي : ما كاشف عليها انا و عالية حَامل

عمار : انعل ابوك لابو عالية لابو هدى

امشي اطلع بررررررره يالله ما الك ضلة بالبيت

علي : يالله انا طالع وانتو هم انسوا عدكم ولد

مثل ما نسيتوا محمد

صعد فوك يركض و امه صعدت للغرفة تبوس بي

ام سلام : لا يمة وين رايح خليك وين اكدر بدونكم

تريد تلحك اخيك تردوني أخسركم واحد وره الثاني

علي : يمة ما توالمني البت اظلمها وياي و انتِ تدرين بگلبي

ام سلام : لا يمة تتعود والله هديوة تحبك يمة عالية مو من مزاويجك لا تخليها تضحك عليك هاي النهبت و صخمت راس اخوها ما تصخم راسك

علي : لا جانت طفلة و هسة جاي تكبر انا يمها و اعرف شلون اعلمها ما تصخم راسي خلي ايدج بثلج

ام سلام : لا لا تتزوج هدى ولك وين أنطي وجهي من خالتك

ولك علاووووي ولك

ما جاوبها اخذ تليفونه و محفظته وطلع هي تقنع بي كبل قفلت باب الغرفة و صعدلي عمي عمار كسر باب الغرفة و ما فتحتة

عمار : يالله لج يالله بساع امشي ولي لبيت اهلج

صوجي انا ما ذبحتج و غسلت عارج

بقيت ساكته ما جاوبته حرف و ولدة ينزلوه ضليت لحد الليل وحدي بالغرفة اخاف اطلع ولا عندي تليفون اخابرة منه النوب خفت عليه بعد

لنص الليل و انا كاعدة ابجي كمت اتخيل أشكال و الوان

انفتح باب الغرفة فزيت و وگفت

طب و قفل الباب أجة جايبلي ويا عَشة شبگته بأثنين اديه و أنا أبجي

عالية : من تروح غير تأخذني وياك شلون تعوفني وحدي

هنا متخاف عليه يضربوني كسروا الباب عليه تكسر

علي : لا ما اخاف عليج أبني وياج

شالني من الگاع يبوس بية و انا مچلبة بي ما أهده

خلاني بحضنه وهو ياكل و يوكلني ويا

علي : هاي السالفة شراح يخلصها بعد

عالية : تخلص هسة يتعبون و يأيسون منك

كملت اكل و هو راح غسل و اجه شبگني و نام فزيت الصبح هو بعدة نايم ردت انزل بس اخافن ضليت افتر لحد ما گعد

- شبيج ؟

- اريد انزل بس اخافن

- ابقي هنا شعندج نازلة

فتحت الباب و بديت انظف الغرفة بس عيني على الدرج لا تصعد امه ريحة الطبخ تارسة البيت ترس

هو نزل جوه شوية و صعد يسبح كل شوية

جايته رساله فتحتهن من هدى

- عيب عليك هيج تسوي و ابوي دزلك هذا الحجي يكول

إذا ما تجي اشوف شلازم على بتي ما تطلگها ترى انا هدى موش عالية ام الفواين بس هو دوم حظ الساقطات ينزار

و حظ الشريفات نايم جوه الحجار

و مع الأسف عليك

بلعت ريكي واني اعاين الحجي دگت النوب جاوبتها بساع

من سمعت صوتي أنهارت

هدى : ولج الساقطة ام الفواين فريتي عقلة

عالية : موش جاهل هو حتى افر عقلة انتِ تدرين شكثر يحبني

هدى : ولج شيحب منچ رايدچ للخلفة لان بساع تشيلين و انا ما اخرب روحي أعلمود البزر راح اخليج تخلفين

لحد ما اكول كافي و اني اربي وانتِ خدامة النه

عالية : والله هذا الحجي اضحكي بس على روحج

ورقة طلاگج بأي ساعة تجيج ايع شلون عالم

حجيتها و طبكت التليفون بوجهها

ضلت تدك ما جاوبتها طَب للغرفة سويت روحي ضايجة

هو گبل راح للتليفون طبيت اسبح و طلع لكيت امه يمه بالغرفة تبوس

بي و تبجي طلعت من الغرفة وهو نزل جوه قفلت الغرفة و نزلت ورا

شوية و طبت الفيالق كل جوق بجوق و الجهال شكثر خالاته خمستهن هن و بناتهن و ولدهن و جهالهن الصغار بدون رجولتهن

اريج و سلوى وحدة كامت تعاين بوجه الثانية

سلوى : وحگ فاطمة الزهرة اكض هاي المطلگة إذا حجت وفكت حلگها بأسلام انام عليها و اخنگها

اريد استفاد من هذا السمن

كعدن ترسن الهول و احنه نصب و نرد ليوره حتى هدى البدون كرامة

- كلنهههه هسة تواعدنا بيوم عرس علاوي نجي نبات

ام سلام : هلا بيجن بعد كلبي

- يمة هداوي صدك مبينة بيها نشعة العروس تلمع لمع

رحمة : عوفـن مرت اخوي لا تنحسد اكو ناس راح تموت حتى تخرب عرسها

- ياهم دليني بيهم حتى ارفس ببطونهم و اطلع الطفل

من حلگها و اخنگها

كامن يضحكن و اني احس روحي خايفة و مختنگة منهن

شكولهن من تباوعلي تخليني شاكة بروحي

كعدنا ناكل و انا مجلبة بأريج احس بس هي تحميني

وكفنا ننظف المطبخ و هدى و رحمة يسون بالچاي

- هديوة خالة لا تتعبين ولج خلي حيلج لعلاوي ينرادلة

حيل ما مدشن

هدى : ههههه خالة والله عندج سوالف

اعاين لأريج تعضلي شفتها بمعنى اسكتي

لحد ما خلصنه الماعين انا روحي شايطة

طبو الولد يردون يصعدون لغرفهم وگفو بالصالة يسلمون على خالاتهم

اكو وحدة من خالاتهم الصغيرة اكثر وحدة مسمومة وعود صديقة الكل

- سلام شلونك عيني شلونها الحياة وياك

سلام : الحمدلله عايشين ولله

اريج نشفت اديها و راحت يمة

- ولج آريج انتِ بعد ما تفيدين شنو جبتيلة اثنين و كعدتي

راح ازوجة خلي يعيد شبابة

آريج : والله سألي إذا يقبل بغيري انا أروحن أخطبلة بيدي

و الجهال ان شاء الله من نطلع بيت وحدنه هسة ماكو مكان

- يقبل ليش ما يقبل وين لاگيها

سلام : لا عمي أنا ام حمودي عندي تسوالها الف مرة

أخذته اريج وصعدت و هن أنجلطن النوب استلمن إسلام

بس سلوى مو مثل آريج تتفاهم سلوى گبل تتعارك

اول ما جابن طاري الزواج عاطت

سلوى : شنو عود انتن كل وحدة رجلها جوه أباطها و تركضن وره رجولتنه عشتوو

- عمت عينج وانتِ شنو بي احنه امهاتة

سلوى : امشي اصعد يالله حضرتلك الحمام التعب مبين عليك اخذ ابنه وصعد يضحك صعدت وراهم للغرفة

من سمعت صاحن هلا بالعريس بقيت واكفة على الدرج اشرتلة تعال

- علاوي ولك طولته عرسك يالله نريد نفرح بيك اصعد اصعد

هسة جاييات نسويلك خوش زفة بغرفتك

ام سلام: لا تقفل عليه الباب ما تخلي يطلع

صعدت الدرج و صحت علاووووووي گال ها

عالية : وينك تعال

شوية و صعد يعاينلي مصغر عيونة كعدت زعلانة اجة يمي باس خدي

علي : ولو زعلان عليج بس اكول تكبرين

عالية : يعني اني اريد اسويلك ريوك هي شعليها

علي : قابل هي ضالة اول و تالي تتزوج و تروح

عالية : انتَ كلهم تدافعلهم بس انا لا

شبگني يبوس بخدي و رگبتي و يطول من يسحب النفس

علي : جثير صايرة تتزعططين بس لايگ والله

عالية : ترى هاي شخصيتي الحقيقة بدت تطلع وياك گبل چنت اخاف منك و ما أحجي شي

أخذ صفنة و مسح وجهة بس تغير كل كيانة أحسة

بينه و بين نفسة يگول هاي السوالف كلهن چانن وي هذاك العار

نمت يمة شبگته شبگني بس ما باسني يعني صدگ أحساسي

قَربت شفتي و طبعت بوسة بخدة باوعلي مبتسم باسني مرتين

و أندگ الباب صاحت خالته علاوي استغفر و ما گال ها

رجعت دكت الباب و صاحت علاوي شال الغطة بعصبية و گام

فتح الباب گامن يصفگن و يگولن گولات

- كض ايد هداوي كضها

احس روحي فارت فور كامت تغلي وگفت و الباب مفتوح و هن يسولفن و يضحكن ويا بالغرفة كلهن مسحت دموعي و رحت يم باب الغرفة

أعاين هدى كاعدة يمة وكلهن ملتمات عليه وهو يمسح بوجهة

من شافني واگفة گام أجة عليه يمسح بدموعي ويطببني للغرفة

حتى و بهاي حالتي هم يصفگن و يهلهلن ويغنن فوگا

- يمة يساعد گلبك علاوي على اثنين يخالة

يالله راح نسوي گروب انا وخالاتك أضيفك بي حتى نسولف

طب و قفل الباب يبوّس براسي و شابگني

علي : والله مَا أعرس لا تخافين وداعت عيونج أفضها

درت وجهي عنة زعلانة كعدت من يريد يروح العصر نزلت ويا

شابگني بأيد ويحاول يقنعني طلعت ويا للگراج

علي : شجيبلج وياي

عالية : ورقة الطلاگ لو طلاگي لو طلاگ هدى

طبيت وهن يغيضن بية يسولفن بالعرس

صعدت فوگ طلعت هدى و خالتها الصغيرة من الغرفة جرت شعري

هدى : ليش تكسرين مري غرفتي الحية الغوارة چيف ما عندج غرفة ها

مديت ايدي اريد اجر شعرها خالتها عضت ايدي حيل و حطت ايدها على حلگي النوب لزمتني من اذاني

- عايني ولج الناهبة إذا حشيتي راس علاوي على هديوة

اذبحج والله اخليج مخبلة بالشوارع موش دكولين ما گلت

دفعتها وطلعت اركض اريد افتح باب غرفتي اول ما طبيت طبت وراي و طبن هدى ورحمة وياي دفعتني على الجرباية و بيدها لازمة حلگي

ثنت رجلها و كعدت على بطني حسبالها حامل النوب هي شسمنها احس مصاريني راح تطلع

ادفع بيها ماكو و هي كل شوية ترفع ثوبي تريد تعاين اكو دم لو لا

عالية : مو حامل والله مو حامل

كفختني على راسي و غمتني و غمت هدى

- مو كتلجن مو حامل أنا اعرف الحبلة من عيونها

مدت ايدها خنگتني

- إذا جبتي طاري لكلشي صار أنيم براسج تهمة اخليج صدك يذبحوج غسل عار و محد يتشفعلج

كمت أكح عافتني و طلعت لزمت رگبتي بأثنين ادية افرفح غسلت وجهي

و نزلت للمطبخ عباية عمتي دوم معلگة بالباب لبستها و طلعت اركض ركضت وراي رحمة بس ما لحگت بية لان ما لابسة حجاب ما طلعت الشارع

دموعي على خدي تجري دكيت باب بيت اهلي كسرته امي ما فتحت الباب و زِناد اكيد ما موجود ماكو غير اروح لبيت جدة رهينة

ركضت و اعاين طلعت من البيت عمتي و خواتها اثنين يردن يلزمني

بعد ما اكدر اروحن لبيت جدة لازم اطلع گبل

ما اندل غير المعمل رحتله اركض وهن يركضن وراي يردن يلزمني

بس هن سمينات بالكوة يركضن و يا خوفي يلزمني كبل لا اوصل

صار الدرب شطولة و الوادم تعاين عليه اركض و اني ارجف و دموعي تجري عثرت بالعباية لان طويلة عليه و رفعت راسي صارن قريبات

كلش عليه لملمت روحي كوه و كمت

صار گبالي المعمل و علي يم زِناد واكف بالباب و هن لسه يركضن وراي

دار وجهه من بعيد شافني ضل يعاينلي ما مصدك هاي انا

لحد ما شمرت روحي بحضنه طببني للمعمل وره الگواني و زِناد ورا

أتنفس سريع حرف ما اكدر انطق و دموعي تجري واكفين اثنينهم

كبالي منتظريني احجي على نار و اسمع صوت عمتي صاحت

ام سلام : عمة زِناد يمة علاوي ما لزمتوه مكسورة الرگبة

هاي عالية هم نهبت مرة ثانية

فتحت عيوني كل وسعهن من الصدمة

عشاير تنصلح و تهيد و دول نيرانهم بردت

قضايا التهد روس جبال اجاهن يوم و أنحلت

بس الما الة چـارة

حريم گلوبهن حقدت

الخامس والثلاثون من هنا

تعديل المقال