رواية يا اجمل الوحوش الفصل الثالث والثلاثون 33 بقلم رسل فهد

رواية يا اجمل الوحوش الفصل الثالث والثلاثون 33 بقلم رسل فهد 

تَعبانات مو ذَني الگبل چَـنهن

حَسافة عيونها الحلوات تالي انتَ الـ تذبلهن

- رُسل فَهد

...

" ورود "

- لدگول اسمي

بقى يعاينلي ما حِچة شي تمددت بلاية غطه و اعاين للبردة

هو نايم بس كل شوية يفز من الوجع و يرد ينام أنا ضليت كاعدة ما نمت و مية الف فكرة تدور براسي

دگت الباب ريحانة الصبح و انطتني صينية الريوگ

هو كاعد منتچي على تاج الجرباية حطيت الصينية گبالـه و اخذت ثوب و طلعت من الغرفة اسمع صوتهن و حچيهن جوه بصوت عالي

طلعت من الحمام لگيته على گعدته بَاوعلي

شراع : تعاي أكلي

ما جاوبته رحت للميز امشط شعري وين ما إندار عينه عليه

راد يگوم سند روحة بأيد وحدة و طلع من الغرفة اكلت شوية و رتبت الغرفة سمعته يصيح ورود كعدت ادور هدومة بالجرارات جثير الغرفة

شكبرها طلعت اريد انطيهن كلهن اله اخذ قطعة و تذكرت هو وين

يكدر يسيطر بأيد وحدة بس ما صاحلي بَعد، كعد على الچرباية

وأمه من جوه صاحت شراع يُمة شونك

الفانيلة و التيشيرت بصفَة منتظرني أجي البسَة بس ما يريد يگلي

و على هاي الحالة بقى لحد ما أستسلم

شراع : ساعديني ابدل اريد أنزل

عاينتلة بطرف عيني و أجيت اساعدة

شراع : ما تحچين وياي ؟ فوگاها

ورود : فوگاها ؟؟ ليش شمسوي انتَ هي طلقة

و انتَ تستاهلها و لوما اخافن على أخوي ما أقبل بيك

بس عادي لعين اخوي كلشي يرخص

شراع : أخوچ

ورود : اي أخوي و شدعوة عليك هي طلقة ترى الزلم تنترس

بارود و ما بيها شي

شراع : اي بس تموت مابيها شي

هيَ طلقة صحيح بس غير مزنجرة سممتني مثل أخوج

ورود : لا تجيب طاري اخوي على لسانك تستاهل

و حيل بيك و حرامات لو جاية بگلبك و انطينة فصل

و خلصنة

شراع : هااااا ، هيج

- هيج و أزيد

خلص تبديل و راد يفتح الباب

شراع : امشي نزلي وياي

خزرته و عدلت شعري و نزلت ويا نص الدرج أنا امشي گبلة

تالي كض ايدي قوي و نزلنه سوه أمه گامت تهلهل هي و نسوان

عمامة و امه تعاينلة بحسرة كلت هسة اكيد تشوفني مو ورود عدنان اخوي الطگ ابنها

راح يم عمامة بالبراني و أنا يمهن مثل الغريبة أخافن عيني بعين

ريحانة بس هي وجهة يضحك اصغر وحدة بيهن

اعاين للبيت مو كلش جبير مثل بيوتنة بس جثير راقي

و عدهم سوالف ما موجودة عدنا و البيت جديد مبين

لان هم چانو گاعدين ايجار بـ بغداد مشاكل وي عمامة يردون خواته

و من تزوجوا ولد عمة و آيسوا منهن تصالحوا

تَالي هَد البيت مال أبو هنا و بنا من جديد

و أجوي هنا ما صارلهن شهر جدة كالت كعد بـ بغداد لان عمك الصغير يمهم

امل : يمة شلون بينه بدون دوام النوب على حضنه شراع گعد بعد ياهو يدورلنه شغل اني ما أعرف ابقى بالبيت يمة

قنعي نرجع لبغداد

فتنة : أنجبي أنا ابقى يومية مفارگة ابني و ما اشوفة غير بالأسبوع مرة والله لو لجهنم اروح ويا

نسوان عمامة يطبخن و امه و أخواته يرتبن ويسون زلاطة و فواكه

ويضحكن بيناتهن ، اجوائهم حلوة هادئة صعدت فوگ احس روحي خجلانة و متوترة المكان مو مكاني شلون راح أتعود مادري

من صبو الغدة نزلت بس الشال على چتفي أخافن لا يطب واحد من عمامة لو ولد عمة اكلت شوية و بالي يم ابوي و امي و اخوتي و زهرة

و لا أنا عندي تليفون اخابرهم و لا كرامتي تسمحلي اخذ تليفونة

وره الغدة رادوا يرحون صاحولي عمامة سلمت عليهم

و الفشلة من يصيحولي ينطوني فلوس ادية ترجف خلصت عمري

يم اهلي و عمامي و اول مرة احجي وي وادم غربة

- مو تاخذهن شراع

شراع : ههههههه لا

- هو الرجال من يتزوج من الله تضل عينة على الذهب

الله ما يهدي مرت عمك تشتريلي بيهن السيارة

هم يضحكون بصوت عالي و مرتة دگول ابد والله شني جبتهن

و مان بية عليهن ، راحو و هوَ گعد يم أمه استغربت شعجب امة ما ذبت حچاية و آمل واگفة تضمدلة

فتنة : على كيفج يمة جاي تتوجع

امل : شراع بعد گلبي ما صار على النقل مالتي شي

شراع : بعد مو هسة بس غفران طلع

كامت تصفگ غفران أخته فرحانة

شراع : خل أشوفلج خط ياخذج و يجيبج بين ما أداوم

حتى أني أخذجن

ريحانة : شراع و اني منو يآخذني أمتحن بعد اسبوع

امتحاناتي و ماما ما ترضى أبات يم بيت عمي حسين

فتنة : هسة كافي لا تدوخنة خل يرتاح

شراع : لا أوديج باتي ايام الامتحانات من تخلص

اجي أخذج

فتنة : أنا ما رضيت گلت خاف انت ما ترضى

شراع : يومية اخذها واجيبها ما اكدر يجوز تاخذنا النومة

يصير قدر خليها هناك تمتحن و تجي

بس أختة شيماء ما حجت ولا هو حِچة وياها هم يحجون و هي توخر الصبغ أظافر من اديها تحاول تلهي روحها و ما تشارك وياهم

صعدت فوگ و هو صعد وراي فتح الكنتور شمر تليفوني على الچرباية

ما أخذته و ساعدته ينام تمددت على الكرويته و هو ميت من القهر

نمت و النومة نومة كعدت المغرب لگيت روحي متغطية انفتح الباب

رفعت راسي طَب هو بأيدة هدايا خلاهن على الميز و كعد يستغفر

كعدت عدل اباوعلة الردن هم بي دَم قهرني بس بنفس الوكت

احسة يستاهل

اجيت أنزعة التيشيرت و درت وجهي لزم ايدي

شراع : ضمديها اني أعلمج شلون

عاينتلة بحيرة ما أعرف بس ما ادري ليش قبلت

شراع : فتحي الشاش .. شيلي الگطن

غمضت عيوني حيل من عاينت الجرح و ايدة شلون محفورة حفر

درت وجهي و أنا لازمة ايدة بلعت ريكي امسحها و ايدي ترجف

و كلساع أطخ الجرح و يستغفر

شديتها و خلصت مد رجله حتى ينام دگ تليفونة

عرفتها جدة من سلم عليها انطانيا حاجيتها و انطتني امي تحجي وياي و تبجي و أنا ابجي وياها سديته منها و امسح دموعي

شراع : حطي أرقامهم بتليفونچ و دگي عليهم يومية

ورود : انتَ مالك غرض

هز راسة و هو سَاكت خله ايدة على عيوني اعاين عليه كاتلني القهر

و يومية يجون اصدقائة جايبين هدايا ايدة صارلها يومين ما نزفت

بعد ما ادري بأيدي هيج سحرية و تگطع الدم

و أنا واكفة أحط عطر كبال المرايا طَب هو بيدة كوب چـاي يشرب خلاه على الميز و وگف يمي عاينتله بطرف عيني و حطيت القراصة ام السنون بطرف ثوبي حتى اول ما الم الشعر اخليها

رفعت شعري و لميته بقت بس القراصة اريد اخليها

حاوطني. بأيد وحدة صارت شفايفة رگبتي طاح شعري من ايدي

و تغطى حتى وجهة بشعري

دفعتة و اني گوة واكفة ما أندفع و لا وخر مني و لأبية ادفع ايدة الثانية و الچمة صارت لمساتة اقوى ردت أطيح و لزمني قوي

أخذني على الچرباية و صحيت على روحي دفعته و وخرت

ورود : انتَ ليش ما تحس على روحك ترى أنا ما اريدنك

شراع : ما تريدني ولك ليش

ورود : لان أنا ما ادري بيك جنت شنو حسبالي الوادم كلها مثلي ما ادري بيك تمثل عليه تخطبني حتى تنسى وحدة ثانية بية أنا مو سلعة عندك

شراع : و أني مو مُنحط علمود اخذج حتى أنسى بيج وحدة

اني ورود من ردتچ ردت وحدة تناسبني و ماكو احسن منج

ورود : اي أنا اناسبك لان حسبالك على گد إيدك

تضل تاخذ راحتك لان حياتك كلها نسوان و تريد وحدة تشوف كلشي و تسكت يجوز زمرد ما عجبها الوضع و عافتك حقها ما ألومها والله ما الومها

شراع : لتذكرين اسمها الوسخ على لسانج

ورود : لااااا ليش وسخخخ لان عافتك و ضربتك عرض الحايط و ما أهتمتلك تريد تغطي عمايلك بيها

شراع : لج كاااااااافي انتِ غبية كاعد اكلج عوفيها ليش چلبتي بيها اني وياج فاتح صفحة جديدة و كلشي من الماضي عوفي عوووووفي ورود

ورود : لان متريد تتذكرها انتَ لو متحبهااا جان

مر اسمها عليك عادي بس انتَ متريد تسمعة لان گلبك ملچوم

منها بعدك تحبها بعددددك و اني ما أتقبل واحد يحب وحدة غيري

شراع : احبهاااااا شنوووووو لج تيزاب أدير عليها إذا اشوفهااااااا انتِ شتحجييييين عقلج هذا ليش متكبري

ورود : ما أكبرة لان انتَ عقلك صغير و عبالك راح أرضى بالموجود و اصيرلك مرة بسسسس لو تموت اني هنا اجيت علمود اخوية و كل مكروه يصيبك هو مي بارد ينزل على گلبي منا لحد ما تموت

شراع : أني ما مسويلج شي يخليج تكرهيني هذا الكره

بَس اني طبعي ما أبرر لاحد و بررتلج و ما صدگتيني

وإذا هيج شوفتي تغثج امشي بدلي اوديج لاهلج

ورود : ما أروح علمود توديني و تسجن عدنان هو توه مرته حامل و أحرمة من هاي الفرحة انتَ اختيار غلط و أنا اختاريتك ليش اخوي يتعاقب بدالي

شراع : لا ما أسجـنة و كلشي ينتهي بگاعة يالله گومي

ورود : لا ما اروحن أعرفنك چذاب لوصدگ بيك خير

چا سويتها من يوم الگتلك على العقد

شراع : انتِ لو ما غبية جان عرفتي شگد بقيت متمسك بيج

بَس انتِ تدورين الزلات طول عمرج ما راح تشوفين بية

شي إيجابي

ورود : مو ما أعاين بس هو من الأصل ماكووووو

ماكوووو شي زين حتى أعاينة

شراع : ما جاي تنطيني فرصة انتِ نافرتني و مبتعدة

بعد السما عن الكاع شسويلج

ورود : لتسويلي عوفني بحالي و بس أنا ما أريدنك

وإذا تريد تخطب زمرد اروح وياك لان انتَ طلعت من گلبي

و مستحيل أرجعنك بعد

شراع : هواي لحيتي و أني مستخطيچ ما اريد

أتصرف وياج بغير أسلوب و انا لو اريد أخطبها ما راح أجي أخطبچ ترى الگلب ما يوسع اثنين بنفس الوكت

ورود : مستخطيني عليمن ترى ما خايفة منك أنا و أخوتي

إذا تمس شعرة مني تعرف شيعملون بحالك

شراع : وردة صايرة جاهلة كلش فد مرة ياريت تكبرين عقلج

- أنا مو يمك انت تتحرش بية وتخليني أجرحك بالكلام

- ما تجرحيني عليمن كلامج كله فارغ

ورود : لا تتقرب مني

شراع : مـرتي و بكيفي

ورود : شحجي وياك ما عندك أحساس

خزرني و أني سكتت طلع من الغرفة و عاف الچاي

شوية و صار صوت وحدة من أخواته جوه عالي طلعت من الغرفة اباوع

من فوك ما شفت شي سمعت صوته يصيح بصوت عالي

نزلت جوه وكفت يم الدرج الصياح طالع من غرفة امهم

شراع : اذبحج والله اذبحج إذا ما تأدبتي

شيماء : ما ابقى هنا ما ابقى اني اريد شغلي هناك

ما تجبرني انتَ هاي حياتي

شراع : اكسر راسج والله

كامت تصيح على امها وهو گام الها طلعت من الغرفة تركض و امه

لازمة ايدة تهدأ بي هد أمه و صعد لأخته فوگ طلع خواته كلهن من الغرفة و قفل الباب و بس صوت بچيها طالع من الغرفة وهي تبررلة

حچي ما أفهمة بس خواتها حاطات اديهن على حلگهن

امل : كبر حتى كبر راح تخلينا علج بحلگ التسوه و المتسوه

غفران : بعد تعلمت على الكتل هسة شنو متخاف

ريحانة : كبر هسة متشوف شراع مريض تريدة يموت

امهن اجتي تغلط عليهن صعدت فوك للغرفة و سديت الباب

صار صوت بجيها عالي و اخواتها يدكن بالباب حتى يفتحة

ما طلعت لان ما اريد أتدخل بمشاكلهم طب للغرفة أعصاب

اول مرة بحياتي اعاينة هيج منهار صاح بوجهي

شراع : امشي حضريلي ملابس اريد اولي

عاينتلة بطرف عيني

و مشيت للكنتور حتى اجيبلة هدوم من مريت من يمة كض ايدي قوي

شراع : عيونچ لا افگسهن ترى

ورود : شحدك تمد أيدك ترى أنا ما تايهتلك والله

- مستخطيج

ورود : شني تخوفني مستخطيني لو رجال صدك مد أيدك

خـا....

بعدني ما مكملة و أندفعت على الچرباية تعورت رجلي وهو خله و طلع

اجتي ريحانة اخذتله هدوم و نزلت اجه بالليل ما يحجي وياي

من فتحت تليفوني لكيته مخلي رقم جدة و من عدها خابرت و ضلت امي يومية تدك عليه و تحاجيني هي و زهرة و ابوي

كالتلي امي الجمعة معزومين هاي من عاداتنا لازم اول اسبوع عند الأهل

و انا ويا ما نحتاجة ما ادري شلون راح اكلة و فوكاها مشتاگة لاهلي

بقيت افتر بالغرفة طب بأيدة أوراق و لابتوب و كعد على الچرباية

نزلت جوه لان مليت من الغرفة لكيتهن كاعدات بالهول

شيماء : كبر حتى كبر

فتنة : تأدبي لا اخلي ينزل يگطعج

ما عبالي عليه شفتهن يسولفن رحت للمطبخ

غسلت وجهي و كلت اصعد احسن امهن تأشرلهن اسكتن

شيماء : شنو من وره هاي الحية رجعنه احنه نريد نبقى هناك بس ابنج ما عنده كرامة شتسويلة

ضربتها امها و أنا خزرتها و صعدت

لگيته يخابر رجال واخيراً بقى فاتح الضوة و يقره الكلام الي بالورقة اكثر من مرة و كل شوية يخابر احد ياخذ منهم معلومات

نعست و ما اعرف انام و الضوة مشتعل وره ساعة سَد اللابتوب

و طفة الضوة و طلع

مثل كل يوم لازم يسبح قبل لا ينام و من يكعد و الظهر

لو بعز الشتاء شفت الأوراق و اللابتوب بعدهن بمكانهن على اللحاف

أخذت القلم الجاف و كتبت على الورقة

باجر اهلي عازمينة على غده و شمرت القلم

و تغطيت بمكاني

كعدت الصبح هو يبدل و الغرفة مخبوصة الطگطگة بكل مكان

بس اليوم جمعة مو مال محكمة اندك الباب و كال فوت

طبت ريحانة كاشخة جابتله كوب چـاي

ريحانة : دكول ماما خاف متكدر

أبتسم ما جاوبها

طلعت من الغرفة و هو اخذ التليفون و الجگاير و طلع

اعاين على الأوراق على حطتهن من آمس انجلطت و امي كلساع تدگ عليه اخافن أكللها ما نتحاچة دزيتله رساله على الخط

- اليوم اهلي عازمينة

ما جاوبني

نزلت يمهن سويت ريوگ الي بس روحي تلوب كل شويه اعاين للتليفون ليش ما جاوبني كعدت امه و سويت الها ريوگ وياي

و كعدت وياها بالهول خلصت قبلها و گلت خلي اصعد

انظف الغرفة اول ما صعت اسمع صياح آمل دگول لامها ليش تأكلين منها

اخذت هدومة و هدومي غسلتهن و فتحت شباك الغرفة

أجتني رسالة على الخط رحت للتليفون اركض لگيته كاتب

- مَـا أروح

أنقهرت چثير و گلت بلكي من يجي يغير راية لان بقى عندي امل

كلت لامي ما يرضى و كالت عوفي براحته لا تلحين

هي ما تدري لو اكضة انام بخوانيگة مسحت دموعي لان صدك مشتاقتلهم صارت بـ ١٢ الظهر وهو اجة كلت هسة يصيحلي و يكول

يالله بس لحد ما شفته گعد ياكل بالهول آيست

صَاحولي على الغده ما نزلت و حطيت مخدتي على الكرويته غطيت راسي و أنا أبچي لحد ما تعبت و گلت لو يموت بعد ما أحجي ويا

هو يفتر يخابر بالغرفة و يحاول ما يعلي صوته لأن أنا نايمة

بس يحجي ويـَ بنية

شراع : هسة اني باچر جـاي انتِ بس تأكدي من الأدلة العدها حتى اذا خفيفة خليها الج ثگيلة اني اخذها

كمت ردت أفتح الباب صارت ايده على عيوني و ما اكدر احجي لان فاتح اتصال مشاني ويا و أنا مغمضة وخر ايدة من عيوني

عاينتلة بعصبية خازرته و رديت عاينت على الي بأيدة

مِـن گتلك أعوضك ، مو حچي لسـان

......

" عالية "

شبگته و غمضت عيوني غفيت و فزيت ويا من گعد يوخر ايدة من جوه ظهري عاينت للساعة بالخمسة العصر هو يومية هيج وكت يطلع وياهم للمعمل گام يبدل هدوم طلعة و حَط من العطر مالتي الجديد راد يفتح الباب و ابتسم أشرلي بأيدة على المفتاح مديت ايدي على ثوبي طلعتهن

علي : خوش مضمام هذا

عاينتلة بطرف عيني و انطيته واحد فتح الباب بي

و الثاني رجعة بمحفظته

علي : شتردين أجيبلج وياي

عالية : أنا أريد حلويات بس مو التجيبهن انتَ

أريد أنا أختـار

عاينلي مصغر عيونة مبتسم

سويت روحي ما مفتهمة

علي : يالله بالليل من أجي اخذج بس إذا لگيت قطرة كحلة بو حمرة بحلگج يحرم عليج باب الشارع

عالية : ما يحتاج ترى هو أنا حلوة من گاعي

ضحك و طلع سد الباب ورا شو بديت احس الدنيا حلوة ..

اجيت يم المرايا اضحك رتبت شعري و طوخت الحمرة حطيت الشال على راسي طلعت و قفلت الباب نزلت بالهول انصدمت من لكيت خالتة بعدها هنا

ضليت عيني تدور هدى ما لگيتها رحت للمطبخ اخذت لالنگية من العلاگة و گشرتها امه خازرتني و رحمة لا تعاين بشماتة

احس گلبي نغزني من عاينت اريج و سلوى بعدهن ما نازلات كلت خل اصعد

اجيت افتح باب الغرفة اسمع صوت هدى تضحك بغرفتها

حسيت بي موجود بالغرفة بس ما اريد اصدك هزيت راسي بـ لا

اكو صوت بداخلي يكول عالية جا انتِ شحسبالج هي غير مرته الثانية

بس احسة صوت بعيد ما يتحكم بية أنا هسة ما اعرف غير اخلي يعوفها لان هي ليش تتعمد تحرگ كلبي أنا هم إلا احرك گلبها

من فتحت الباب سمعت صوتها تضحك ادية ترجف و أنا كاضة اليدة

درت وجهي على الباب ما مطبوگ لا مفتوح شوية مدري شمالني اجيت

للباب فتحتة و طبيت بدون حتى لا أدگة لكيته واكف و هي واگفة گبالي لابسة بتوت يخرخشن كل ما تحرك أيدها

عاينتلة فاتحة عيوني مصدومة

هدى : اي ما كملتلي

حجتها و حَطت ايدها على خاصرته عود تنكث قميصة

وخر ايدها راد يطلع ركضت للغرفة اخذت عباتي من الكنتور

و هو اجه وراي شابگني يريد يحجي وياي و أنا اصرخ يسد حلگي

علي : شبيج بابا شبيج

عالية : وخرررر يالله وخرررر اريد اروح لاهلي

علي : اوكفي سمعيني

- ما أسمعك انتَ لو تموت ما أسمعك يالله روحلها

حسبالك هاي رجولة من تسوي هيج

- انجبي بس انجبي خل أفهمج

هدى واكفة بالباب تضحك و صعدت رحمة و امة تسألة شكو

- ماكو شي يمة

هدى : عاينته يمي مدري شمالها تسودنت

ام سلام : عمت عينج كون جا شنو بس الج

دفعتة و رد لزمني سد الباب شبگني و ساد حلگي بأيدة

عالية : والله والله إلا اروحن لجدة صگارتك انا صوجي ما طاوعتها و رضيت بالمرة الخطبتني والله إلا اعوفك

و اتزوج

علي : ليش لكيتي احسن مني

عالية : كلها احسن منك موش حسبالك حلوة من تحرگ بگلبي و تسوي روحك ما راضي و انت من عيونك مبين مكيف و راضي

ام سلام : شو اطلع يالله انزل انزل روح لاخوتك

سالبة راحتك هاي الزعطوطة ام الفواين

امسح بدموعي و اعاينلة صدك عود يحرگن بگلبي احس النار مشتعلة

بية

علي : رادت تحجي وياي شلون يعني اكللها ما احجي وياج

عالية : و شكو جبتها و انت متزوج هاااااا هي شلون رضت و تعرف بيك متزوج ترى أنا گلبي تعبان ما بية حيل

علي : شمدريني هيج بيج عمي

حجاها و صفگ ايدة

جان ما ورطت روحي

ام سلام : علاوي يمة تعال شو تعال

فتحت باب الغرفة صارت بوجهي امي رفعت ايدي و اشرت على هدى

عالية : ترى ما يريدج والله شنو ما عندج احساس

عوفينه بحالنه

ام سلام : و انتِ شنو هي الأصل من شوكت حبيتي

عالية : من اليوم من امس مالجن غرض بية

و أصلا انااااااا حامل

ام سلام : شنهاااااااااااو

اجه جرني من الباب يطببني و كوة ضام ضحكتة حِجة بصوت ناصي

علي : انهجم بيتج كون

هدى كامت تبجي و رحمة تسكت بيها

ام سلام : جذابة والله ولج هديوة لا تبجين تريد تقهرج

عالية : و عليكم اقهرها منو ماخذة رجل منو هي حرامية

و بدون كرامة

ام سلام : ولج ام الفواين الناهبة طلع حسج بس مو صوجج صوج ابني الما يردج أنا أعلمة خل يجي ابو

دفعتهن و نزلت اركض و هو يركض وراي بنص الهول لزمني و جرني من ايدي يريد يصعدني

عالية : ما ابقى يمك والله ما ابقى أنا اروح يم أمي

ام سلام : يالله ولي روحة بلا ردة ان شاء الله

علي : امشي صعدي كافي انفضحنه

عالية : ما أضل وياك والله تختار لو أنا لو بت خالتك يالله

ام سلام : طبعا هديوة انتِ شني

بأثنين اديه جعصني و رفعني من الكاع وصعدني و أنا ارافس

هن واكفات كلهن على الدرج طببني للغرفة و قفل الباب وراح

انهاريت

امه كامت تدعي وتغلط هو صاح كاااافي يالله

و هدى تبجي بالممر و رحمة تسكتها و أنا اكسر الباب بأثنين ادية

ام سلام : هدى نزلي علاوي يريدج امشي

رحمة : زعلانة عوفيها يمة

أنا ادري بيهن يحرگن بگلبي حتى أشحط

ام سلام : ولج المهتلفة هسة صرتي براسي مرة و تدللين

ولج مايريدج كوه شني ما معتبرج حتى غرفة حالج حال النسوان ما جابلج بعد عليمن شايلة روحج و راگعتها

عالية : يالله على أساس هو جاب هاي الغرفة همزين انتو تبرعتوا بكلشي حتى يرضى بهدى ايع

هدى : لج اني تاج راسج المهم اجوني كلهم مو جابوج سحل

عالية : اش كافي اششش ابني گام يدفر ما يحب هيج أصوات

ام سلام : ولجن مو اكلجن جذابه جا هو شوكت صار خاطر

يكوم يدفر حتى جذب ما تعرف تجذب هاي الحوية

عفتهن و بقيت كاعدة انتظرة شوكت يجي اليوم الا أندمة على عمرة ما تأخر أجة قبل العشاء حتى جايب ويا ثلاجة صغيرة خلاها بالغرفة بده يفتح بيها و أنا كاعدة على الجرباية مسوية روحي مريضة

خلاها جوه التلفزيون لان معلگ قفل الباب و اجة يمي

علي : گومي يالله اشتري شيعجبج

عالية : ما يعجبني شيط

- إذا مو لخاطرج لخاطر أبني

درت وجهي عليه بعصبية لگيته يضحك اني هم حصرتني الضحكة

علي : عمي انتِ شلولو ما تنكضين

عالية : ما أريدن هدى طلگها لو تطلگني

- عمي لو ادري بيج هيج نعلعلة والدية إذا ملچت

بس خايف النوب يطلع هذا تمثيل

عالية : لا ما جاي أمثل انا اريد ابقى وحدي

علي : ديالله كومي بدلي

كمت البس بالشال و العباية و أنا مسوية روحي مطنگرة

قبل لا يطلع كض وجهي بأيدة يعاين خاف حاطة شي

نزل و نزلت ورا هم گاعدين بالهول كلهم فتح باب المطبخ طلعت قبلة وهو يورث جگارة اباوع للشارع الله المنظر حلو و عيني على بيت أهلي

طبيت للأسواق و أنا من عهد ما امي جانت تأخذني وياها للسوگ طابتلة

اشتريت كلشي يعجبني هاي عود أنا ضايجة جا لو فرحانة شسويت

دفع الحساب و شال العلاليگ

عالية : خلي نمر على امي

علي : تــؤ

من طبينه للفرع عبرنه بيت اهلي ضجت طلع الشيخ من بيته راد يصعد السيارة و سَلم على علي بقو يسولفون

زِناد : اليوم طالعة

بقيت ساكته دنگت راسي عمت عين التاخذك وتغلط الها غلطة

علي : يالله روحي شوفي أمج دقايق أنا وأكفلج بالباب

ابتسمت بوجهة و رحت للبيت اركض دكيت الباب درت وجهي

عليهم اثنينهم يعاينولي لحد ما صاح شريك منو خفت أكول أنا

رجعت دكيت الباب

شريك : جاي جاي

كل ما يتقرب للباب اكثر گلبي يريد يطلع من صدري من كثر ما يدك

انفتح الباب غمضت عيوني قوي و من الخوف و الشوگ گمت أبچي

شريك : منو وياچ

حجاها وحط ايدة على چتفي طلع برة عاين علي و زِناد

عالية : لا والله محد أنا أجيت

شبگني و انا شبگتة بأثنين اديه دموعي تجري

شريك : شونك شيخ

سلم عليه و طببني للبيت ايدة بعدها على چتفي احس روحي

اسعد وحدة بالكون باس راسي و طببني للبيت

لكيت امي كاعدة تلف دولمة شهگت من الفرحة من عاينتني أنا و شريك

بستها و كعدت يمها

ام شريك : خو ما طگوج يمة

عالية : لا يمة والله چان علي ماخذني اشتري و گتلة خل اروح اشوف امي گالي يالله و هو برة يحچي وي زِناد

ام شريك : الله يهدي سركم ان شاء الله دوم

شريك : إذا يتزوج تردين هنا

- اي اي والله

اندك الباب و گمت عدلت عباتي طلعت امي وياي

ام شريك : خو ما بعدج

عالية :يمة شمالج لو يموت والله إذا ما يطلگ هدى

- كونج بيج حظ وتخلي يطلگها

فتحت الباب امي تسلم عليه و توصي عليه

ما تدري أنا حابسته بالغرفة و مخليته يبچي إلا شوية

ردينه للبيت رتبت الغرفة و الثلاجة و لبست دشداشتي الدلعة

هو جوه يم أهله

طفيت الاضوية و فتحت التلفزيون وگعدت أكل و اكرز حَب

انفتح الباب و من عاينته طَب كعدت بفراشي و عفتلة الچرباية

نزع تيشيرته و اجه تمدد بصفي

عالية : تنام هنا لو على الچرباية خاطر أشوف وين انام

علي : وين ما ينام ابني أنا انام

عالية : اهوووو لا تچلب و ترى لا عبالك شريك گالي بيوم اليتزوج رجلج اجي اخذج گتله طبعاً

- شلون زلمة يجي ياخذج

- زلمة و نص و يكسرك

علي : يكسرمن ولج

عالية : يكسرك ترى ما أخاف منك بعد لا عبالك گلبي مات

مد ايدة على بطني كرصني و قرقرني گمت اضحك بصوت عالي فحطت و مد ايدة يكرز وياي

علي : بس لليلة باچر موجود عگبة الفجر ملتحق

عالية : خاطر تلحگ تطلب اجازة مو

- هههههه لا والله ماكو اجازة اروح اسبوع و اجي

- شنو ههههههه يعني انت صدگ تتزوج

علي : يوم العلم ما تغارين

حجاها و جرني لحضنة باس خدي

عالية : هسة انتَ متغار عليه

- شلون ما أغار أنا الهوى التشتمة أستحسف يشمة

واحد ثاني

عالية : اليوم أمك تگلي المهتلفة أنا مهتلفة

علي : احلى مهتلفة بالدنيا

ضربته على صدرة و نَيمني يدگدگ على ظهري مثل الجهال

من تنيمهم امهم لحد ما غفيت كعدت الصبح و اني بحضنه

مو بس هو شابگني حتى أنا شابگته

كعدت على كيف و نزلت جوه اسويلة ريوگ

اريج : والله وما راح تعبج يـ آريج

عالية : كله من وراج انتِ و امي تحشن براسي

- غير نريد نسويج مرة بيها خيرر

طبت سلوى تصفگ بأديها و تعض اصبعها

سلوى : تعاي يـ اريج عايني حالي

- يا ستار

- ولج المطلگة بت خالتهم الثانية آمس دگت على إسلام

و دزتلة صورهم و هم صغار دگلة ما تجينه

آريج : يمهههه

سلوى : اي والله و أنا ويا البارحة معارگ كتلني و كتلته

اريج : وهسة بس لا متعاركين

- لا وين يگدر الفجر أنا نايمة فزيت عليه يبوس بية

يگلي أنا لو يحطون بيدي حورية ما يرف گلبي عليها

عالية : إذا دكت انتِ جاوبيها

سلوى : تعالن ليه ولجن إذا هيج بنات خالاتهم يردنهم

ما أخذتهن الهم من البداية و خلصتنا

آريج : يمههههه عشتو أنا أفرط برجلي لهاي الخلق العايبة

كش و بِره لو يموتن أنا رجلي لو مأخذ وحدة غيري جا ضليت احسدها

سلوى : انهجمممم كوخج كون أكول ليش ما تتعاركون

على هذا لسانج يا زلمة يقاوم

آريج : شعبالج جا والله ذيج المرة تعاركت ويا عركة أخت الچذب و صار عصبي گال يالله لمي هدومج بساع

جريت الجنطة گتله موش صوچك بس صوچ گلبي الما رضى

يخليني بحضن غيرك حضنك مغزر وياي بس الظاهر

أنا حضني ما مغزر بيك

شال الجنطة و شمرها بالگاع و گام يشبگ بية وأنا چافصة بمصارين الخلفوه

سلوى : لا عمي تربيتج طالعة بعالية كله ريوگ و ترتيب

ارتب بالصينية و هن ناصبات عليه صعدت أضحك لگيته بعده نايم

حطيت الصينية و فتحت البردة و أجيت أكعدة

كعدت يباوعلي مصدوم و مبتسم مد ايده ياكل و اني اكل ويا

كل ما أرفع عيني الگا مبتسم و صافن علية

برد الجاي وهو مخلصها صفنات

نزلت الصينية و صعدت لگيته يبدل

عالية : عود صدك الفجر تروح شبساع

علي : اسبوع و أجي و انزل ١٣ يوم

عاينتله بطرف عيني أبتسم

علي : مو أجازة والله

عالية : توديني لامي ترى

- اي

مد ايدة على ظهري بَاسني بخدي و طلع

عجنت و صعدت اخبز گلت ما دام باجر اروح لامي

نزلت طبيت اسبح طلعت بيدي ثوبي غاسلته و سمعت جام غرفة

هدى تفلش غمضت عيوني من قوة الصوت فتحت باب غرفتي و صعدت امه تركض تلطم فتحت الباب و اجتني

- ليششش يمكسورة الرگبة ليش شلج على البنية حتى غرفتها ما سلمت رحمة طلعت من الغرفة وكفت وره امها و كامت تكح بصوت عالي

اجوي من الشغل ولدها كلهم صعدوا

ام سلام : الغرفة جديدة ليش فلشتي المري شلج علينه

طب علي و سلام عاينوها

عالية : يعني و شراح استفاد إذا كسرت الجام مو اني والله

ام سلام : النوب والله ولج راح تهجمين بيتنه من الحلفان الجذب ولو انتِ الحلفتي بالقرآن جذب و ما خفتي

عالية : ما احلف جذب اني و شتردون تسوون سوو ما اخاف

سلام : يالله بسيطة هسة تصير تصير

نزلوا و طَب هو يبدل ما حاجاني شي راح يسبح

و رحمة تلم بالگزاز و تدعي

طب للغرفة و اني واكفة

عالية : لازم صدگت امك

علي : كافي عاد

عالية : ترى هي مسرحية مسويتها امك مبينة حتى تضربني

علي : ضربتج ؟ يالله كافي

- ضايج عرفتك راح تضوج و تنقهر لان كسرو غرفة مرتك

الجديدة و تخاف على مشاعرها مو

علي : امشي نزلي اكلي يالله

عالية : لااااا ما اريدددد و هسة لو تطلگني لو تطلگ هدى ما أضل وقف الك و لأهلك افتهمت لو لااااا

علي : شبيج بابا مريضة

عالية : اي مريضة مو أخدمك أنا و اتعب روحي و تاليتك تنام بحضن هدى و تصير هي مرتك

- شخادمتني انتِ شمسوية

- متحملة اهلك و متحملة سمكم و حقدكم هذا كافي

و يالله كول تطلكني لو لا

- لا

عالية : جا يالله طلگ هدى ما تبقيها

علي : هسة دكافي امشي ادري مو انتٍ كسرتيها

- يالله و كسرتها أنا شتسوي مثلاً تذبحني

لا والله تذبحني

- جاهلة شحجي وياج

عالية : لا مو جااااهلة أنا أوديك للشط و أرجعك عطشان

علي : والله والنعم اول مرة تحجين حجاية بيها خير

- اي يالله فضها

- كاااااااااافي عاد چلبتي

رفع إيدة راد يضربني و نزلها

عالية : تصيح عليه و تضربني؟ علمود المرايا

استغفر و ما جاوبني هز أيدة راد يطلع رحت للغرفة مالتها و هو طب وراي لزمت بيدي مزهرية موجهتها على مراية الكنتور

علي : بدون تزعطط امشي عااااااد

عالية : تخاف عليها مو

ما جاوبني اجه عليه بعصبية عَت ايدي قوي شلت المزهرية و شمرتها

على جامة الكنتور تفلشت بقى يعاينلي بصدمة حتى ايدي هدها

عالية : موش أنا كسرت هاي بس أنا كسرت هاي و اريد

أعاينك شتسوي بالله

صعدت امه تركض و تلطم رادت تضربني جرني من ايدها

و تعارك هو وياها دفعني للغرفة ، طب و قفل الباب

علي : جاااااااهلة انتِ جااااااهلة متكبرين

عالية : جاهلة بس احسن منك ما أحرك بگلب وحدة

علمود وحدة ثانية لو علمود أعيش اللحظة

ضليت احجي بصوت عالي حط المخدة على وجهي من أختنگت يالله وخرها خنست و سكتت نمت بعيد عنه كعدت ورايحة الخبالات من راسي هو ما يحجي وياي صار مثلي عازل ياكل من الحلويات مو من أكلهم فتح الكنتور يحضر الجنطة

اباوعلة بس ما حچيت شي أجة تمدد على چربايته و نام و أنا النوم طار من عيوني لحد نص الليل و ما كدرت أنام وهو غَافي

عبرت من فوگا و طبيت جوه الغطه هوَ كعد عاينلي مستغرب

رجع غمض عيونه بَس ما قاوم دقايق و دخل ايدة جوه راسي و غطاني

سحبني اله اكثر بس ما حِچة وياي ، مزاعلنـي

كعدت على صوته الصبح يبدل كمت بدلت بساع و أخذني ويا بس ما يحاجيني ضجت رحت لامي شريك فتحلي الباب ما سألني شعجب

يمكن يدري بي عندة أنذار صحيح رحت لاهلي بس أحسن روحي ضايجة وهو حتى ما دگ و سأل عليه طول الأسبوع

شريك التحق ورا بچم يوم أندگ الباب و گلت لامي

إذا هو كليلة ما ترجع عالية إذا ما تطلگ هدى من عاينته مو هوَ طلعت

مرة چبيرة اكبر من امي

- ولج يختي أبنچ ما تزوجي و تخلصيني بتي راح يذبحوها

ابوها و أخوتها

ام شريك : والله يخية ما يرضى چـا أنا ما أكيف اعاينة عريس

- تعاليلي راح يتصخم راسي بتي طبوا كتلوها

اخوتها و ولد عمها توافق على العريس و ما ترضى ذيج سباحة و ممدودة بالفراش منين الله سلط علينه ابنج

ام شريك : ليش ما تنطوها اله ابني شعايزة و تدرون

بتكم عاشگـته بعد شنهي

بعدها تحجي المرة و ما نعاين غير سيارة وگفت بالباب و طب شريك ما يشوف گبالة شمر چنطته بالساحة و دار وجهة يريد يروح

بقى واكف مصدوم من عاين امها

لا تحچي بـ عشگ و دگول ما ينعاد

فَقط عشگ الجنوب الما اله رداد

......

" جُمارة "

بلعت ريگي و رجعت ليورة شفايفي ترجف

و گوة رفعت ايدي لزمت الشال يباوعلي مستغرب و فضة بدون حجاب

كاعدة على الكرسي تخيط دگمة دشداشتة

زِناد : شبيج منو وياج

ما جاوبته درت وجهي

فضة : تعاي جُمارة حبيبتي

رجعت درت وجهي عليها مبتسمة و مهضومة بس ما أريد أبين اجيت اطلع طَبوا عمار و هاشم يدورون عليه الراشدي ما هضمني هلگد فتت من يمهم لزمني عمي عمار قوي من ايدي اجاني صوت زِناد من وره

زِناد : هد اديهااااا

هاشم : تتجاوز ختولي

عمي عمار عود ما يحجي وي زِناد وما يجاوبة راد يضربني گدامة

و زِناد جرّني من ايدة تلازموا زِناد و عمي عمار

عمي هاشم صار حاجوز بيناتهم

هاشم : زِناد شمالك هذا عمك

عمار : أنا مو دزيتلك تحذير تهد الشيخة و تمشي

زِناد : و ليش أنا من شوكت امشي برايك

عفتهم و مشيت طلعت من البيت و هو يصيح أوكفي جايج

بس ما سمعته عبالة راح اوكف انتظرة بالساحة بس اني وصلت للبيت وًهم بعدهم يتعاركون جدة بالباب واكفة تنتظرني

رهينة : يمة جُمارة شمالج جدة هم طگج بعد

عفتها و رحت للغرفة

هي تمشي وراي ما جاوبتها تمددت و غطيت راسي يعني جُمارة شعبالج اكيد راح يروح يمها و يسولف وياها هي هم مرته و هذا حقها

شبيج محترگة حرگ ريگي ناشف كل شوية ابلع ريگ

وحدة حجت وياي لحد ما آيست ما جاوبتها

كعدت الظهر و محد بالغرفة بقيت كاعدة بمكاني و اباوع للبردة

انفتح الباب و طبت جدة بيدها لفة

رهينة : عود اجيت اكعدج تأكلين شمالج يحبيبة

تنكسر الايد التنمد عليج بس هو هذا عمج مسودن

جُمارة : خلي ارجع لبغداد

- لا أنا خابرت امج كلت الها يومين و أردها

- ما اريد ابقى هنا

رهينة : ولج جُمارة چا يجدة شلون ما يروح يعاين شمحتاجة ما محتاجة بعد هي امانة وبرگبتة

جُمارة :شعليه اني

رهينة : شسوة و شعمل من دره بعمار طاگج

يمة لا ينجرع و لا ينگحم

رادت تضحكني لو تخليني ابتسم شوية آيست مني و نامت

العصر من سمعت صوته اجه تعطيت و غمضت عيوني فتح

الباب و عاين أني و جدة نايمات راح و اني عقلي يخلق أشكال المشاهد يخليني أشيل روح و اركعها بالكاع

اكلت شوية من اللفة الجابتها جدة و كاعدة وحدي

احس روحي هواي أبالغ بهذا الموضوع مادري لان صرت اخاف على الناس الاحبهم يعوفوني و يرحون صرت انانية ماريد احد يشاركني

بِت ولاء لسه ما أطيقها من يوم العرفت هي هواي تحبه ومدللها

هي فضة حتى رحمها شاايلي و انا أتخيلها تطلع حامل

تليفون صامت جوه المخدة لكيته داك عليه أربع مرات مكلف نفسة

كعدت جدة رادت تروح للهول

رهينة : امشي وياي شعندج حابسة روحج هنا شمالج

جُمارة : جدة عوفيني بحالي ترى اطلع حرگة گلبي بيج

رهينة : ولج عليمن جا شتردين كله الج

- أصلا ما اريدة اخذنه الجن

حجيتها ورجعت تمددت كامت جدة كلساع تدزلي وحدة من البنات

و ما اروح بطني كامت توجعني مدري من القهر لو من الجوع لحد ما تقيأت اللفة الشوية الاكلتها و جدة تسودنت

جُمارة : مابية شي جدة ترى دوم هيج و هي معدتي توجعني

رهينة : امشي اكليلج فاكهة حتى انطيج دوة

جُمارة : ما اشتهي اريد انام

عفتها و طبيت للغرفة سويت روحي نايمة حتى ما تحاجيني لان صدك احس روحي مالي خلگ و اسمعها تخابر زِناد أنجلطت

رهينة : ها يجدة شوكت تجي .. تعال لَيه هاي گامت تزوع

لا آكل و لا الشرب من الصبح لسه بس نايمة ..

اي تعال مو ما تجي

أني متأكدة جدة ما كاتلتها اني بكد ما تريد زِناد يجي يمها

و اني مغطية راسي حطيت الشال على شعري لان ادري

بس ما عندة محرمات

مو هواي ربع ساعة و صار صوتة فوگ راسي يحجي وي جدة

غمضت عيوني قوي و شال الغطة من راسي ، درت وجهي

زِناد : تعاي جدة جيسيها مصخنة أنا الجفوف ما تخليني

اجت حطت ايدها على گصتي كالتله شوية مصخنه تعال اكعد هنا يمي

زِناد : ابنج وعلي وعلي امص دمة إذا تجرأ بعد و مد ايدة عليها أنا اليوم كطعت عليه البضاعة مني كلها خل يروح يدور منين يجيب

رهينة : عمك يجدة على كيفك ويا هو مسودن الله مسودنه

شتسويله

زِناد : أنا مسودن اكثر منه و بالاخص بالأخص إذا الموضوع يخص جُمارة يدري بية كلش زين ليش يتقرب

لنقاطي الحمر إذا ما يريد يشوف شيني

رهينة : يعني بس هاي العرمة نقطتك الحمرة

زِناد : لا مو بس هواي عندي نقاط حمر بس هي نقطة ضعفي لان لسه ما خليتها بأسمي عايش بخوف الله وكيلج

هاي السنين كلها

رهينة : هي أولها و تاليها الك جا وين تروح اليوم هو ليش تسودن گالتله الشيخة ما تلوگ لغيرة

زِناد : جُمارة هاي بَعد تعبي هاي تعبي

رهينة : تعبك ما أضنها تعديها على خير مسودنة

اليوم حابسة روحها

زِناد : هسة أنا شوكت ما أجيها اليوم نايمة

- اي مو گتلك

بقى ساكت وجدة تسولف غير موضوع

زِناد : مخليها تطلع بطرگ الدشداشة أبنج العوود أنا أعلمة

يطگها و يخليها تدگدگ بالبيان و حگ ابن البدوية إلا أبجي

رهينة : هي راحتلك لبيتك

- لو لاچحهاااا واحد بالله لو حتى الغيرة نزعوها

- ديالله خلي يولون

شوية و أجة يمي يگعدني و اني دايرة وجهي ما جاوبته

زِناد : گومي عاد ما تعبتي من التمثيل

باوعتلة بعصبية ابتسم بوجهي كعدت و غطيت شعري عدل

زِناد : گومي خل أخذج أعشيچ أحنه ما تصير بيناتنا لغوة

بقيت ساكتة و عاضة طرف شفتي بعصبية و اباوع للتلفزيون ما جاوبته

كعد يم جدة و كلساع يگول كومي يالله و ما جاوبته و لا نطقت حرف

رهينة : عوفها أمشي أنا وياك نروح و نجيبلها

زِناد : يالله گومي بابا ما ضل وكت

جدة طلعت من الغرفة و اني كاعدة بمكاني اجة وكف يم الچرباية

زِناد : يعني اروح ؟ ولچ جُمارة ما بية حيلچ تتمرضين أنا من يمي أنهد چا فضة هم لازم أعاينها أكعد وياها

وحيدة و ما الها غيري

جُمارة : معلية بيك واني احبها فضة بس اريد ارجع لامي

زِناد: تعلميني بيج ؟

درت وجهي على الجهة الثانية أمسح دموعي بأثنين ادية

زِناد : گومي شو گومي حسبالج ما أعرفج

جُمارة : اني انضرب من وراك وانتَ تطلع نايم يم فضة

- ولج ما نايم صخام بعينچ أجيتها الصبح جايب وياي دشداشتي لان هي دوم تخيطلي الدگم مو خايف منج بس أنا ما أنام يمها أدري بيها ما تاخذ راحتها وياي وهي متعلمة وحدها

جُمارة : نام عادي شعليه بيك هي مرتك

زِناد : و انتِ هم مرتي لو ما تغريد

- أني بعد ما أريدك مو بس أمي اكيد الي يمر بيه

راح يصير بفضة و تنقهر

زِناد : ما تنقهر فضة گبل لا أعقد عليها تدري بية احبج

طبت جدة تخوصرت كبالي

رهينة : ولج خايبة شني يامن تعب يامن شگه يا من على الحاظر لگه تردين تتورشعي وحدج و تخلينا

جُمارة : أخـذنة ما اريدة اني

زِناد : لااااااه ما توقعتها منج

تمددت و غطيت راسي لحد ما آيس و عافني و راح جدة ضلت ترزل بية

ليش خليته يروح ما سمعت الها و اني أكول شلون فضة ما تحبة و تغار وين اكو وحدة واحد يقدملها كلشي تريدة و تتبرع بي لوحدة ثانية

بالعكس المفروض تصير انانية مثلي بس يجوز خطية هي ما تبين

النوب راحت الغيرة أحتلني تأنيب الضمير جاب النة اكل و راح

الصبح من گعدت صدك ما اكدر أشيل راسي من المخدة

جدة تحجي عليه حتى اصير زينة

رهينه : صيري زينة يالله العصر معزومة

على عرس حتى اخذج

الضحى كلش صخنت و جدة تسودنت تغلط على عمي عمار

- و انتِ يالله كافي گومي و گولي يالله إذا تضلين هيج اول شهر من العرس تموتين من الغيرة

جُمارة : جدة فضة هم تحب زِناد

رهينة: ولج راح تكتلين روحج عليمن مو تدرين بكلشي انتِ شنو جديدة عليج السالفة يجمارة

جُمارة : اني ردته بس الي وحيدي

الظهر من اجه يتغده أخذني هو وجدة للطبيب حطولي بس براستيول

بالكانونة و علگة بالسيارة سَد الجام حتى أعرگ و تروح الصخونة

رهينة : عود ردت اخذها للسوگ بس ما بيها حيل راح اخلي ام عدنان تروح العصر تجيبلها هدوم لان لازم ترد تغريد كلساع داگة علية لا النوب تقسي وياها

زِناد : اخذج ويانة حاچيها مرة ثانية بلكي الله هاديها

حتى لو بس عقد خلي العرس شوكت ما تريد

رهينة : يالله اروح وياك صار تدلل

بالليل جابتلي مرت عمي فاخر أشكال غراض حتى لروز و امي و الصبح كعدتني جدة حتى نروح لامي ضميت التليفون و هو اخدنه

جدة سوت روحها ما ترتاح بالصدر حتى اكعد يمة

رهينة : أنا عليمن الومج بجدة و أنا جنت أضرب منج

جُمارة : ما بية شي جدة

- اي بعديش عگب ما أخذناج للطبيب

بقيت ساكتة و جدة نص الطريق و نامت

زِناد: يالله شوفي امج شدگول خاطر اجيبج يمي

تسافرين و تكملين دراستچ و عوفي كل هاي السوالف على صفحة ترى هذا الگلب ما دگ لغيرج

جُمارة : ما راح ترضى امي و اعرفها هي تحاول بكل طريقة تخليني اخاف منك ترى و اعوفك

زِناد : و إذا عفتيني أنا ما اعوفج رَب الي جنت احبج

و انتِ ما تدرين بية موجود أصلا تردين هسة اعوفج

جُمارة : دكول امي إذا يجيبون اله هدية لو فصلية لازم تأخذها غصبا ما عليك و اخاف لا تطلع حوبة فضة بيه

زِناد : ما أخذ هدايا و بعدين الفصلية من جثير عدنا انلغت

جُمارة : خلصت البيت لو بعدك

زِناد : لا صدك أختاري

اختار و كل شوية امد راسي الجامة اخذ هوى قوي ر ارجع أطب

اختار و اني احلم بجمال البيت ، طلع مشتريلي حلويات علاگة جبيرة مخليها يم جدة ليورة وگفنه بأزدحامات و أجة ولد يبيع ورد بقى واگف يم الجامة يأشرلة فتح الجامة و أشترالي وردة خلاها بحضني و يمسح بشواربة

زِناد : هاي اول مرة بحياتي أكض وردة

جُمارة : طبعاً إيدك متعودة بس على الأسلحة

حتى راعي السلاح عندما كان يرمي يسقط الرصاص الذي في شاجورهِ أرضاً كانت الأرض بدورها تمتص الرصاص

و تخرج الورد ، فقط لان حامل السلاح كان عاشقاً

جُمارة : أيدك هم تطيب و تنزع الچفوف بيوم ؟

زِناد : لا

حچاها و باوع لعيوني وراها بقى ساكت بعد ما حِچة لحد ما وصلنة

جُمارة : ضجت مني ؟ ترى حتى لو طبت ما أخليك تنزع الجفوف لان حلوات عليك

زِناد : اخاف عليج من شكلهن

- لتحجي هيج ما اقبل

وصلنه و جدة نزلت و نزلنه الغراض و هو ما طب بقى بالسيارة

رهينة : ها شگلتي يجنتي و بت اختي

تغريد : بعد لا تحجين بهذا الموضووع بعد إذا

تردون تحافظون على ماي وجوهكم

تعاركن هي و جدة و امي طاحتلي دگ غلط إذا رحت بعد بيدي الجنطة ردت اصعد جرتها من ايدي واني اجر بيها تالي عضت ايدي

واخذتها مني شهكت من لكت تليفون فتحته و فاتت على المكالمات و الأرقام كامت تلطم اخذته و ضمته و گطعتني لحد ما روز خلصتني

منها ضليت اسبوع كامل راسي يريد ينفجر و امي تشوفني ابجي و ما تأخذني للطبيب و دوة من الصيدلية لازمة راسي بأثنين اديه

و افتر بالبيت منا و منا

روز أنكس مني هم مريضة بس هي على فراگ محمد تريد هسة

تتمنى يسجنوها ويا عدها عادي تليفونها اندلة بس ما الي خلگ

اخابر حتى نوم ما انام اقوى شي ساعتين باليوم

نزلت العصر امجد و عجيبة عدنا امي تبسبس وياها

من راحت بقو علاكة سودة صعدت امي ضمتها و نزلت

اني بالكاع يم التلفزيون و روز نزلت تسحل بروحها

تغريد : والله يجمارة اجتج احلى قسمه أنا اموتن عليه

باوعتلها باستغراب ادري ما تحب زِناد

جُمارة : يمه راسي

تغريد : خطبچ آمجد و ماكو احسن منه

و تنسيـن الجَـرى وياي ؟

بَـاچر كلش تعطشين

و مَا مش مثلي يحَصل مـاي

الرابع والثلاثون من هنا

تعديل المقال