رواية يا اجمل الوحوش الفصل الثلاثون 30 بقلم رسل فهد

رواية يا اجمل الوحوش الفصل الثلاثون 30 بقلم رسل فهد 

لأجل ما نِنلثگ عَنكم مِشينـة

و شَرفكم مَا يجي لـ خيط بعبينة

- رُسل فهَد

....

"عالية "

- معليك

دارو وجهم هو و زِناد و عاينوا علية خفت كضيت چتف جدة من يَم الكشن درت وجهي على الجامة و تحركت السيارة اول ما وصلت البيت طبيت اركض اسبح گبل لا يجون امسح بالكحلة و ما تنمسح

أول ما فرشت الفراش عَاينته طَب للغرفة ينزع الساعة و المحبس

و الحلقة يحطهن على الميز و أنا اسوي روحي مخبوصة اعدل بالغطه

شمر الدشداشة على الچرباية و لَف الخاولي على جسمة

حتى يروح يسبح اذكر شريك أخوي چانت عقدة حياتة الدشداشة البيضة و يمكن كل الزلم هيج بحيث حتى من ينزعها على كيف لا تتوسخ

مديت ايدي على گلبي جسمي بارد بس ليش احس بگلبي حار

مسحت دموعي و اني اردد كافي عالية انتِ متحبي اهلة ميحبوج

لازم ترجعين يم أمج تمددت على الفراش و متغطي نص جسمي

لان احس مختنگة من حسيت باب الحمام انفتح غمضت عيوني قوي

اسمع تحركاته بالغرفة و بكل حركة اغمض عيني اقوى أريدها تتأدب

و تبطل على كل شي يصير تبچي تغطيت و درت وجهي على الجهة الثانية لان صدك ما كدرت أسيطر عليها غطيت راسي و خنكت روحي في سبيل ما أبين أنا جاي ابچي

فزيت الصبح البردة من آمس أنا دنيتها و الضوة تارس الغرفة

عاينت على مكانه كاعد و التليفون بيدة عاينلي و رجع يعاين للتليفون

لميت شعري صاير كفشة لان امس نمت بدون ما امشطة

الغرفة ما بيها ساعة ما اعرف الوكت شكد يومية اعرف الصبح اجة

من صوت امه و هي تلعلع بأسمي حتى انزل اعجن و اخبز اليوم روحي محترگة و أتمناها صدك تجيب طاري الخبز حتى اشمرها بالتنور و اخلص من شرها

طلعت من الغرفة غسلت و جهي و نگعت شعري و طبيت امشطة

على المرايا شكد غسلته امي و لسه بس لمع حتى وجهي و رگبتي كلهن

فرگت شعري نصين و وگفت انعم بي و ظفرته و بقيت واكفة يم المرايا أوخر اللمع من وجهي و ركبتي ما يروح

رجعت گعدت بفراشي و أنا عاقدة حواجبي مدري شمالني

اريد بس واحد يحجي وياي حچاية حتى أكوم اشرب من دمة

أندگ باب الغرفة و اسمع صوت امه تحجي وي رحمة

تمددت بساع و غطيت راسي گام هو يفتح الباب

ام سلام : صباح المبارك يمة علاوي

ان شاء الله يوم الاجيبلك ريوك عرسك لغرفتك بعد گلبي

علي : الله يسلمج يمة

ام سلام : شني ما تريد ريوگ لو مشبعتك هديوة ههههه

علي : لا خلي رحمة تسويلي راسي يوجعني

دزيلي بيدها براسيتول

- صار هسة اخليها تجيبلك ، ماضل وكت طَر الظهر و نسوان اخوتك جاي ينظفن چـا اليوم عالية ما تعجن

علي : لا مريضة خلي يجيبون وياهم خبز

- هاااا لا هسة اخليهن وحدة تعجن و وحدة تخبز

تعال انزل تريك جوه

- لا البنات يشتغلن خل يأخذن راحتهن مرتاح هنا

ام سلام : بكيفك حبيبي براحتك

طلعت و اني رفعت الغطه لان أختنگت هو كاعد بمكانة عاينلي

و رد يعاين للجهاز

شوية و فتحت الباب رحمة عاينتلي كاعدة خزرتني اخذ الصينية منها

و كاللها على مَي نزلت تجيبلة مديت ايدي على صينيته أخذت كوب الچاي و خليته يمي أشربه عَاينلي و ما حِچة شي طلع من الغرفة

صاح من الدرج رَحمة كوب چـاي وياك

رحمة : صبيتلك خوية

علي : اي بعد واحد

اجه رد كعد بمكانه و هي طَبت شايله بيدها كوب الماي و الچاي

و ردت خزرتني أنا هم خزرتها طلعت و سدت الباب مد ايدة

عليه مسويلي لَفة صغيرة اخذتها من أيدة و أنا عاقدة حواجبي

أكلها بعصبية مادري شبية اليوم صايرة مفترسة

ما نزلت حتى من صَبو غده و ادري بيها ما دام هو هنا ما تصيح

بأسمي فتحت باب الغرفة و كلت أنظفها و اسبح ما دامهم ملتهين بالأكل رتبت كلشي بس چربايتة ما عدلتهة عفتها بهوستهـا

فتحت الشباك و مِسحت الگاع و فتحت البنكة ردت اسبح و أعوفنها

بس خفت لا هم أنتهم بسالفة و أنا لا بيها و لا عليها

قفلتها و اخذت المفتاح و طبيت الحمام حتى الصابونه خلصت و أنا اغسل بوجهي حتى يروح اللمع أندك باب الحمام صحت منو

علي : أنا وين المفتاح

فتحت الباب شوية و مديتلة ايدي بيها المفتاح

ما ياخذ بس المفتاح لازم يكض چف ايدي كله

خلصت و نشفت شعري أعاين بالمرايا أنا و الخاولي و وجهي كلنه لمع

شكول عليج آريج على هاي السواية طبيت للغرفة لكيته ساد الشباج

و مطفي البنكة و يعدل بچربايتة

جايبلي غده و مخلي على الميز مشطت و حطيت عطر و كعدت اكل

عاجبني دور المرتاحة يصعدولها الاكل لغرفتها و ما تسوي شي

علي : من نظفتي الغرفة ما تعرفين تعدلين الچرباية

عالية : ما تستاهل

علي : طبعاً ما أستاهل لأن أنا ما أخذتج و شردت بيج

لو مسوي هيج وياج چان طلعت استاهل و ما تبچين من أكضج

جنت اريد اخلي اللگمة بحلگي نَزلتها و احس غصيت بدون أكل

شلت عيوني عليه لگيته هو هم يعاين عليه بس كل واحد نظرته تختلف

و كل واحد نظرتة بيها خسارة

عالية : لا تجي يمي خلي هدى ترتبلك چربايتك

اصلاً أنا منتظرة شوكت تتزوج حتى أخذ الچرباية مالتك

بعز نظرته الما تتفسر أبتسم و هز ايدة

رديت آكل شوية و شلت الصينية اول ما اجيت لفراشي اريد انام

علي : تعاي مرغيلي ظهري

عالية : ادية توجعني و ما أمرغ أنا حتى لو ما توجعني

- امشي

تمددت بالفراش و تغطيت و هو يعاينلي

علي : يالله حتى أخذج لامج

فزيت من مكاني وخرت الغطى و رفعت الردانات تدنه و سوالي مكان

نزع التيشيرت و نام على بطنة التليفون بيدة و أنا أعاين ويا

فيديوات حلوة و هو كل شوية يگول اقوى

علي : الـ متون مرغيهن قوي

دگ تليفونه رقم غريب بقى لازم التليفون من تريد تنتهي المكالمة

يالله جاوب لأن أنا كاعدة بصفة و التليفون على أذانه أجاني

صوت هدى تسلم عليه شلت ادية من ظهرة

و نزلت رداني لزم ايدي يأشرلي أوگفي

وخرت ايدة و تمددت بفراشي سَلم عليها و تسألة شوكت يلتحق و ينزل

سَدة من عدها و حاچاني بقيت دايرة وجهي ما جاوبته

گلت حتى العصر ينقهر عليه و يأخذني لامي هو نام و أنا بقيت كاعدة

لحد ما صار العصر يالله غفيت

كعدت هو ما موجود بالغرفة نزلت اركض لكيتهم كاعدين

بالهول بس هو ما موجود صعدت و الغصة ذابحتني ادري بي هسة يجي بالليل وينام و ما يأخذني طبيت. للغرفة أبجي

انفتح الباب طبت آريج

- شمالج يمسودنة

عالية : گالي مرغيلي حتى اخذج لامج و تالي ضحك عليه

آريج : شني طارت الدنيا يجوز بالليل من يجي

- لا مو دگت عليه هدى تَيه حتى دربة

اريج : ها يعالية شحچينه شگلنه

عالية : اكلج ترى أنا ما أغار عليه بس أنا تحز بخاطري

والله هسة لو يطلگني عندي احلى من العسل

آريج : كطنة شيليها من أذانج هنا ماكو شي اسمة طلاگ

عالية : غصباً عليه يطلگني والله هسة تشوفين

إلا أكرهة بعيشته

- خايفة لا هو يكرهج بعيشتج

ضلت تحجي وأنا منهارة لحد ما باستني و طلعت صار العشا و حتى على العشا ما اجة بقيت كاعدة انتظرة وكفت يم الشباك أعاين

ماكو ما اله آثر صارت بـ ١١ و هوَ ماكو كل شوية اسأل اريج على الساعة شلت فراشي خليته على الچرباية و نمت على الچرباية حتى البطانية فرشتها جوه الفراشات حتى يضل لا غطى و لا فراش

تمددت على الچرباية و اغم بروحي عود هذا اقوى انتقام أكدر اسوي

تذكرت شكلي و أنا أمرغلة مثل الخدامة تاليته يضحك عليه

لو تأخر لان يخابرها ما ياخذ راحته بالغرفة

نزلت من الجرباية شلت هدومة المعلگة كلها و شمرتها بالكاع اريد

احرگ گلبة و خايفة منه بحيث القميص اليطيح على الكاع أشيله و ارد اشمرة على الحصير حتى ما يتوسخ من شي

شمرت آخر شي سترة طاحت منها عِلبة بالكاع رحت اخذتها فتحتها

بيها حلقة ذهب ناعمة و حلوة رجعتها بمكانها بالسترة و علگت السترة

سديت باب الكنتور و تغطيت النوب فوك القهر صار الخوف مسيطر عليه

و گلبي يدگ سريع

كلت بلكي انام بس ما كدرت لحد ما سمعت صوت ضحكته يصعد الدرج هو و خالد مد ايدة على اليده يفتح الباب لگا مقفول ضل يحجي ويا خالد وهو يفتح القفل غمضت عيوني و تشاهدت

طَب للغرفة وهو ساكت و اني كل ثانية ابلع ريگي

علي : عَاليـة

بقيت ساكتة ما جاوبتة فتح الكنتور شوية و طبگة صارت خطواتة تتقرب

عليه غمضت عيوني قوي شال الغطه من يم راسي بس ما نطق حرف

ما سمعت غير طگت الجداحة شوية رد يمي كضني من زندي

ورفعني من المخدة كض بأيدة الثانية وجهي و هدَة واجه دخان الجگاير بوجهي وأنا لسه مغمضة عيوني ما فاتحتهن

علي : هاي شمسوية انتِ بالله

حجاها و هز جسمي كله بيدة

حجيت وأنا سادة عيوني

عالية : بكيفي موش مضحك عندك أنا خوش لو لا

علي : و شلون بالله اجاج احساس انتِ مضحك

عالية : كتلي اخذج لامج و عفتني و رحت

علي : كتلج اخذج بس ما كتلج شوكت

بقيت ساكتة ما ادري شجاوب بس احاول أبين أنا مو خايفة

علي : دقيقتين بَس إذا ما عاينت الهدوم

كلها معلگة أعلگج بمكانهن

عالية : ما المهن والله و شتريد تسوي سوي

علي : بابا انتِ من يا طينة

عالية : من نفسسسس طينتك

حجيتها و درت وجهي ما اريدنة يعاين دموعي هَد ايدي و أنا

تمددت ابچي و امسح بدموعي

يعلگ بالهدوم و يغلط طبگ باب الكنتور قوي و اجة حط التليفون على الشحن عرفته من الصوت ، دفعني على الحايط و تمدد بصفي

جريت نفس قوي لو عايفة الفراش بالگاع احسلي النوب أنحصرت بينه و بين الحايط رفع راسي و عَدل المخدة

علي : جاهلة ما عليج عَتب

درت وجهي عليه بعصبية عاينته بلاية حتى فانيلة

و خشمي طَخ بزندة

عالية : إذا جاهلة ما تردني لامي هااا شمستفاد مني هسة

انتَ أنا كلشي ما اسويلك و مرتك راح تجي بعد عليمن حاطني يمك

علي : أتونس عَلـيج

ضربته بصدرة قوي و هو يضحك ضليت احوس اريد أكومن كض ايدي و حِبس رجلية و ايدة الثانية على حلگي

علي : شو أنجلبتي من آمس اليوم

أنا احجي و محترك گلبي بس ما ينفهم مني حرف من وره ايدة

السادة حلگي

لا هو مَل و هدني و لا أنا تعبت و سكتت لحد ما طَر الفجر آيست و نمت

و كعدت على صوت أمه بالغرفة

ام سلام : ها يمة خو ما بيك شي اليوم لسه ما كعدت

علي : لا والله نمت الفجر

- تعال أنزل يالله شوية و نصب غده

- نعسان بعدني من تصبون دزيلي واحد

طلعت و قفل الباب و رَد نام على الچرباية

مد ايدة على خدي و گصتي احس روحي متكسرة من النومة من كد ما المكان ضيگ بس ما بية حيل أكوم بعدني نعسانة

علي : نعسانة لو النومة حلوة

شلت الغطة و ضربته و عبرت من فوگا مردت مصارينه

عالية : شلون ما گعدتني اليوم شيخلصك من أمك

ضحك و گعد عدل

علي : اي والله شيخصلني

لميت شعري خازرتة و نزلت آريج تطبخ هو شوية و نزل اجه للمطبخ

صب ماعون من الغدة و كعد وي امه بالصالة يسولفون

آريج : شگايل لامه فوگ شو نزلت تزبد و ترعد عليج

عالية : ما گاللها بس عاينتني نايمة على الچرباية يمة

آريج : هسة يالله صار بيج خير عگبيش

عالية : لا يا خير اصلاً راد يطگني بس يمكن انقهر عليه

اريج : عايني إذا التحق شلون راح تطلع ضيم ذني الايام منج هسة هي كاعدة على أعصابها

عالية : فوگ ما زوجتة شني شتريد مني

آريج : ما تهدج إذا ما تشردج بـ لليلة ظلمة ، صدگ انتِ ليش ما تخلي يشتريلج غرفة عود شني وحد والله لو دكليلة من الصبح يروح يجيبلج أصلا هاي الغرفة و الملچة و المخاسير كلها على امه ما رادت منه شي غير يوافق بس فلوس الحلقة

سمعت ماخذتهن منه

عالية : ما يهمني لا هو و لا فلوسة

آريج : شالفايدة من الفلوس ولج ولدها ما تخليهم سيارة يشترون تفكر شلون نسوانهم تگعد بصدر السيارة

عالية : و عود هم ليش هلكد يسمعون كلامها

آريج : انتِ ما شايفتها هاي الحيالة تكضهم بالغرفة و تضل دموعها تتجارى تخلي الولد يطلعون من الغرفة حسبة تجيبهم و حسبة توديهم

شوية و طَبوا كلهم بَس إسلام مدري شبي صعد فوگ يركض

دقايق و صار العياط اله اول ما اله تالي و عمتي تغلط على سلوى

ام سلام : مرمرت ابني هاي مكسورة الرگبة ولج شني

بس انتِ صار عندج ولد وشختي بي

فتيتي گلبة لهالرجال

شوية و نِزل أعصاب بيدة ابنة كعد على الكرويته يبوس بي و آريج صعدت تشوفها صعدت وياها للطابق الثالث

و سلوى تلم هدومها و تبجي

آريج : خايبة شمالج ما صارلج عشر ايام من اجيتي

رجلج خطية ششاف منج و من ابنة

سلوى : ما أريدنة لا هو و لا أبنـة امس وأنا نازلة بالليل أعاينة اجة لو بعدة لگيت امه كاعدة تقنع بي تزوجة

آريج : امداج على هاي خايبة أنا كبال عيني وكفت كالتلي أزوجة و ما همتني هم هيج دوم يسمعولها بس ما يسوون التريلة

سلوى : لا يسون مو هذا علي شكثر جان مستقتل على عالية و ما يريد غيرها تالي ضحكت عليه امه و زوجته

آريج : لا خية مرتة خوثة و غبية ما تريدة هو لو يعاينها

تحبة و تگله لوتموت ما تتزوج والله ما يتزوج

سلوى : أنا ما اريدن ابقى هنا خلي تفيدة امـه

آريج : جان زوجته و انتِ زعلانة بس غير هو ما يريد غيرج

حاولت وياها آريج بكل طريقة بس هي معصبة و تبجي

أعاين لغرفتها شكد حلوة و مرتبة و صورة عرسهم على الحايط

نزلت وي آريج و عمتي تحشي عمي عمار على سلوى

ام سلام : ولج ما صارلج جم يوم من اجيتي بس طبعاً هنا ما يصرفلها تريد تروح يم اهلها خاطر تضل سايبة

أسلام : يمة وين تطلع ترى حتى وهي زعلانة ما تعتب باب الحوش إذا ما امهة تدك عليه و أنا اكللها اي لو لا

ام سلام : ضل انتَ ضل دافع شطلع عيونهن غيركم

والله إلا أزوجك و أدبها إلا أخليها تمشي على السراط

أسلام : يمة ما تچفيني شر الزواج مو كرهت حتى حياتي

أنا عائلتي نفرين و ما ملحگ عليهم ويني و وين الزواج

نزلت سلوى تمسح بدموعها و عبايتها على راسها بيدها جنطتها

و تعاين على أبنها و رجلها

عمار : وين ان شاء الله

سلوى : عمي رايحة لبيت اهلي اخوي جايني

عمار : بابا انتن تردن تهجمن بيوتجن گوه

سلوى : لا والله عمتي تريد تهجم بيوتنة

حجتها و طلعت من باب المطبخ راد يگوم امه كضت ايده ما عاينلها

طلع وراها و ابنـه بأيده هن ملتهيات يصبن و أنا أعاينلهم من شباج المطبخ هو شابگها يبوس بيها و يقنعها وهي معاندة و تبجي

صبوا الغدة و أجت آريج تاخذ أخر ماعون للسفرة

علي : عاااااالية

فزيت و حتى آريج فزت

آريج : امشي امشي كعدي ويانة خلي امه تنجلط

راحت آريج كعدت و أنا طلعت من المطبخ الشال كاضته بيدي

عالية : ها

علي : تعاي تغدي يالله

عاينت لآريج تأشرلي بعيونها تعاي و رحمة تعاين لامها بعصبية

هزيت راسي و آريج سوتلي مكان يمها كعدت بس بالگوة أكلت

من المستحى

ام سلام : هادي ما تعاين اخوك وين برد الاكل لازم تطين عيشته مكسورة الرگبة

خالد : جا غير تردين تزوجين رجلها يمة ترضين جدة

تزوج أبوي

ام سلام : ليش ما رادت تسويها جدتك من قنعتة يتزوج تغريد مرت يعقوب بس همزين ما رضت چان من زمان زوجته رهينة

خالد : اي جا منو ترضى رجلها يتزوج عليها

ام سلام : اششش مالك غرض يالله لا تدخل بسوالف النسوان

أبتسمت من عاينت اسلام طَب هو و سلوى و أبنهم

شايل جنطتها صَعدها فوگ و ما نزل حتى على الغده عمتي تاكل لگمة و تغلط على سلوى نظفت الماعين وي آريج و صعدت هو بعدة وي اخوته يشرب چـاي لگيت الغرفة مقفولة نزلت اخذت المفتاح منه

و أنا أعاينلة بعصبية

سبحت و طلعت. فراشي افرشة و تمددت و هو ما صعد

عاينت تليفونه يدگ النغمة قراية بَاسم اجيت شلته رَقم نفس نهاية الرقم الدگ عليه امس يعني هاي هدى فتحت خط جاوبتها

- الووو

هدى : چا وين علاوي

- جوة

هدى : گليلة هدى تريدك

- أي عادي

ط

طلعت من الغرفة و مديت راسي من الدرج صحت علي

علي : ها ها ولج

عالية : خطيبتك تدگ عليك تريدك

اسمع خالد يصيح لاااا يمعودة لاااا و علي يگلة صم حلگك و اسكت

صعد للغرفة وره شوية بس ما خابرها مرت الايام و علي بعد اله يومين

و يلتحق بالليل كاعدة و اجه جايب ويا تلفزيون علگة بالحايط

و سوة الإشارة و أنا واكفة بنص الهول الفوگ أكله من تجي الإشارة و تروح لحد ما ضبطت

كعدت بفراشي فرحانة ما مصدگة و أنا أعاين القنوات

اجه خالد يم الباب يحاچي علمود يرحون يلعبون طوبة

علي : يالله فضوها

خالد : دگ على شريك يجي ويانة

علي : ما يجاوبني و لا راح يجي يلعب

خالد : يعني حتى ما راح تروح ويا عگبة للدوام

علي : لا أروح وحدي

خالد : اغسل اللمع البوجهك زين لا تفشلنه

اول ما راح خالد درت وجهي عليه اسأله ليش

علي : متعاركيـن

هز راسة بـ لا

ما عولته يروح حتى ابقى أدير براحتي اجوي بنص الليل و اني بعدني كاعدة وهو نام و فَز و اني لسه كاعدة مثل الجاهل من يجيبولة لعبة جديدة تالي اخذ الريمونت من ايدي و طفة التلفزيون

عوجت حلگي و نِمت

كعدت لگيته بصفي نايم و شعري مفتوح و هو نَايم

راسة صاير على شعري هزيته حتى يوخر جر ايدي و رجعني على المخدة و غطاني سمعت صوت امه تصيح عالية جريت الغطة اكثر و غمضت عيوني

علي : كلاوچية

عالية : أتحملك و ما أتحمل امك تصخرني

ضحك و لمن تعبت ما گلت ها بعد ما جابت طاري أسمي لحد الظهر يالله طلعت من الغرفة لان صرت اشوف الساعة بالتلفزيون أول ما فتحت الباب صارت بوجهي هدى نزيت حتى ما سَلمت ولا حجت

طبت الغرفة أنا واكفة بالباب

أتذكر من قبل لا يعقد عليها يستحي تشوفة بلا تيشيرت

هسة ما بدرت منه اي ردة فعل و هي عاينته نايم بالفراش سَلمت عليه

ودنگت تبوسة عفتهم و رحت أغسل وجهي احس وجهي حار يفور

اسمع هوستهم جوه يعني بيت خالته هنا أكول أمه تصيحني حتى اخبز طبيت للغرفة هي كاعدة على الچرباية تسولف ويا و هو يبدل اخذت هدومي من الكنتور و طلعت اني يومية مو هيج وكت اسبح

اليوم شبية طبيت للغرفة محد بيها رتبتها و اسمع ضحكهم جوه

جريت كحلة و لبست من القراصات الجابتهن آريج و حطيت شوية حمره بقيت واكفة گبال المرايا ليش جاي اسوي هيج و أنا ادري هاي

مو أنا ليش جاي اجبر روحي اسوي هيج علمود شنو ..

چان الثوب وردي حطيت عطر و طلعت باب غرفتة الجديدة مفتوح

رحمة و هدى يسولفن اول ما سمعن صوت الباب صاحن عليه

عالية : هـا

اجت يمي هدى مخنزرة

هدى : عود شني معناها من تخلي ينام يمج لو هاي لان سمعتي بينه من آمس راح نجي

رحمة : دعوفيها هاي الحية يگومها بكتلة و يكعدها بكتلة

فوك ما أنا روحي محترگة و كارهتها هذن گبالي يحرگن بية

عدلت گذلتي و رجعتها ليورة

عالية : اصلاً ما ادري بيكم هنا و شسويلة إذا هو

لازگ بشعري و ما يخليني اگوم

اجتي هدى تضربني نزلت من الدرج اركض أنلطخت بآريج

غمزتلي و صعدت رحت للمطبخ لگيت سلوى تعجن بس ما سلمت على خالتة و هو چان كاعد يمها

بس امه ما موجودة

سلوى : امداج إذا تخلين رجلج يروح من ايدج

عالية : يالله انتِ مو امس تبجين هو راد يروح

ضحكت و غمتني

- انجبي أنا اسوي هيج متعمدة حتى اخليها تشحط

و تعرف هو ما يكدر بدوني قابل مثلج ثولة

أجة للمطبخ راد يطلع بالگراج وصاحلي طلعت و أنا اعاينلة بطرف عين

علي : ليش ما سلمتي على خالتي

عالية : بكيفي شعليك لو خاف هدى تزعل عليك

علي : طالع أنا اجيب لبن شتردين أجيبلج

عالية : ما اريد غير تتزوج و تچفيني شرك

جر ايدي و صارت ايده وره ظهري وهو يوخر اللمع من وجهي

علي : هذا اللمع بعد إذا حطيتي منه افلش وجهج

عالية : لا تلزگ بيه خاطر ما تتدمر

علي : لج انتِ منو لازگ بيج

يحجيها و يضحك أنفتح باب المطبخ و هدى و رحمة واگفات وَخر أيدة

هدى : علي خلي أروحن وياك أشتري

- لا هوسة عود غير مرة

اسمع صوت امها اجتي

- اخذها وياك يبعد خالتك خبصتني و اخوتها ما يرضون

ام سلام : اخذها جا غير مرتك

درت وجهي عليه و صعدت فوگ للغرفة اركض قفلت الباب أعاين من البردة من أخذها لحد ما جابها و أنا عيوني تجي دموع و الكحلة سالت

جا أنا أكله أخذني لامي صار چم شهر ما يأخذني

نزعت القراصات و مسحت من وجهي كلشي و كعدت بفراشي

شوية و أندگ الباب حتى يطب شافة مقفول دگة اكثر من مرة ما فتحته

تالي هو فتحة خله علاكة الحلويات على الميز و أجة يمي كعد على الچرباية

علي : مو ادگ الباب ليش متفتحي

أعاين للتلفزيون وأنا أنفت من الحرگة و القهر دگت الباب هيَ و طبت

درت وجهي عليها خازرتها

هدى : علاوي خالة تريدك

- اي جاي

بقت واكفة بالباب و هو يحاچيني دفعت ايدة قوي

علي : جبتلج حلويات گومي شوفيهن

رحت للميز و شمرتهن عليه هن و العلاگة و اشرتلة على الباب

عالية : اطلع بررررررررره

هدى مخليه ايدها على حلگها عود مصدومة

و هو غمض عيونه و رجع عَاينلي گام يريد يهدأني ضربته لزم ايدي

علي : بس سمعيني تخبلتي

حطيت ايدي على طرف الدشداشة وعاينت للشباك

عالية : كونك تروح للعسكرية و ما ترد بجاه كل من عنده جاه

ما دامك تتعمد تحرگ بگلبي

يَالعيشتني قَلق

ايام حَرب الحِشد و القاعدة السودة

...

" جُمارة "

بقيت خاتلة وره زِناد لمن راح آمجد طبيت نمت يم جدة بس حسبة تجيبني و حسبة توديني أحب زِناد بس خايفة من العيشة ويا

أخافن لا يجي يوم أحس روحي غلطت و اظلم فضة وياي

و من يجي على بالي يتبخرن كل هذن السوالف و ما يهمني احد

ما نمت الفجر و لا كدرت أنام راسي يوجعني بشكل مو طبيعي

كعدت جدة و صبت الها ورود ريوگ و انا كاعدة اكلت شوية وي جدة حتى تنطيني حباية لزمت راسي جدة تقرالي ايات

و أندگ الباب غطيت شعري طَب هو عقد حواجبة من عاينلي

زِناد : السلام جدة ، شبيها جُمارة

رهينة : راسها شوية يوجعها

جُمارة : مو شوية هواية

زِناد : ليش حبيبتي

حجاها و كعد على چربايتي سابقاً جانت چرباية شريك

صبتلة جدة چـاي و اجت تسويلة لفة كال الها متريگ طنگرت

رهينة : وليش تتريگ مو تدري بية محضرتلك الريوك

زِناد : مو صاحبي بَايت يمي و أخذته نتريگ باچة

رهينة : بالعافية صاحبك مختار ؟

- اي جدة

جُمارة : ابو العرگ ؟

ضحك و مِسح شواربة و جدة شهگت و لطمت على صدرها

رهينة : يمة يمة يا عرگ هذا ولك زِناد

زِناد : ها جدة لا مو سولفتلچ على أمة فـ اجته فترة

يشرب هسة لا أدبته و جاي يشتغل يمي

رهينة : يمة لا يقشمرك ويگلك مرة جربة

ترى اليجربة مرة بعد ما يهدة

زِناد : صدك تحجين جدة شنو أنا قشمر بعدين

هاي حفيدتج مجربته

باوعتلي جدة و لطمت على خدها

جُمارة : جذب جدة والله بس اشتميته وضليت

دايخة الطريق كله

رهينة : جا من جرمن راسج يوجعج من العرك

عوجت حلگي و طنكرت لان جدة بعد ولزمت الها سالفة

زِناد : يالله كومي بدلي امج تريدج

رهينة : يمة صدك تروح شوكت ترد

- شوف هي بكيفها من تريد تجي تخابرني

كمت ابدل مشتاقة لامي بس ما اريد اروح منا اريد ابقى يم جدة و زِناد احس روحي هنا مرتاحة اخذت هدومي و رحت يم ورود البسهن

ورود هم حالها حال تضرب صفنات بدلت و بستها وطلعت لگيته واكف منتظرني بـ باب الغرفة جدة حاضنتني ما ترضى تهدني

النوب كامت تبجي و اني ما أتحمل بجيت وياها

رهينة : جا تخليني وحدي أنا هنا منو مونسني غيرج

جُمارة : جدة طبعاً ضالة تغوريني بزناد و تحرگين گلبي

ضربتني على جتفي

رهينة : انجبي ولج أنا اليوم كبل باجر اتمنى اعاينج بحضنة و تجون تسيرون عليه بس احب أتقشمر

جُمارة : لا ما نسير عليج أنا اجيبج لبيتي عينج عليه

لان تدرين أداوم الصبح و ما الحگ

رهينة : بيتج شني بيت حفيدي و ما دامه

بيت زِناد يعني بيتي

جُمارة : جدة لا تعيشين زمانج و زمان غيرج هسة انتِ شيخة علينه باجر اني شيخة عليكم

ردت اطلع صاحتلي و هي تفتح الجوزدان

زِناد : هسة عوفيها انا أطيها هناك

رجعت الفلوس

رهينة : يالله جا هو يطيج اكثر مني

جُمارة : هو انتِ تاخذيهن منه و تنطيهن الي

- و انتِ شنو تعيريني ولج هو ما معيرني

ضحكنه و طلعت ويا الجو زين بدة يروح الشتا و راح ننسمط بالحر

صعدت قبلة بالسيارة و هو واكف يحجي وي يونس على التعيين

و من مشينه قبل لا نطلع من الفرع وگف السيارة و اجة شريك

باسة و بيدة مسواگ

زِناد : متطلعهن فلوسك و تشتري سيارة

شريك : مو هسة خلي اشوف ابوها شگد يطلب مهر

مشعول الصفحة

- ليش متحجي وي علي

شريك : خلي يولي چا شبيها عالية و يتزوج عليها

من يمك گلة شريك گبل لا يلتحق يجي ياخذها

زِناد : شنو أنا مرسال بينكم فد مندلة انتو طبكم الف مرض

شريك : اي مو أمي تروح تريد تشوفها و امه تطردها

مو فد شخصية هيَ خاطر تطرد امي أنا ما ادري توني دريت

و هسة امي مريضة ما اريد أضوجها بس أنا أعلمهم

عمار و ولدة

زِناد : النوب صار العرك بيناتكم

شريك : اي و بكيفك تهد وياي تهد وياهم

- ههههههههه لا طبعا وياك ولد عمار شنو

ضحك شريك

زِناد : لتدفع ديزل دفعتلك لوتي صار شهرين مدافع

شريك : صدك ، لا والله هسة أرجعهن مو ذاك الشهر دفعت سلفة و جنت مطلوب گتله اطبگهن سوه

- دروح يالله أنا طالع لبغداد من أجي نتفاهم

حَرك السيارة و أني اجتني النعسة عدلت گعدتي و نمت

فزيت على صوت هورن مال لوري يخليك تشوف شريط حياتك

زِناد : أشتعلوووووا

مسحت وجهي بأثنين ادية و كعدت عدل

زِناد : هاي صار مرتين بالسريع يفززج ابو لوري

جُمارة : هو حظي ويامن كعد حتى يكعد وي ابو اللوري

زِناد : كاعد وياي شتسوين بالبقية

جُمارة : سكتتني عاشت أيدك

ابتسم و هوَ يسوق

فتح تليفونه و گالي أختاري

اخذت التليفون من ايدة و اني عيني على چفوفة شوكت أشوفك نازعهن

اباوع للتليفون شكل واجهية البيت و صورة احلى من صورة

وراها أشكال الكاونتر و التخم و الغرفة ، رفعت عيني اباوعلة

- هذا

زِناد : بيتـچ

خليت التليفون على رجلية و أباوع للطريق و السيارات

احس مشاعر حلوة و غريبة تمر عليه ، ليش بَس يمة احس روحي أميرة

و ياخذ رأيي بكلشي و ما يخلي شي بنفسي أبد

هو ليش ما جنت اعرفة قبل

جُمارة : زِناد

- ها حبيبتي

- انتَ ليش ما خليتنا نعرفك من زمان

زِناد : مو مهم المهم اني أعرفج

جُمارة : و لا أتذكرك من جنت صغيرة

- طبعا إذا بس السادس نمتي بي ٤ سنين وين يبقى عقل

ضحكت و خليت ايدي على راسة صدك متوجعة مو وجع عادي

خلة ايدة على گصتي و رفع وجهي يباوعلي

زِناد : شبيج جُمارتي

من گال جمارتي احس الفراشات تطلع من حلگي

جُمارة : لا بس من اكعد من النوم يوجعني و بعدين يروح

- اخذج للطبيب

- لا والله مابية شي

مد ايدة على الچكمچة فتحها و طَلع تليفون كال خلي يمج من تحتاجين شي دكي عليه لان اكيد امج ما راح تنطيج التليفون بَعد

فتحت الجنطة اريد ردت اخلي التليفون

ما بيها غير غترته و الفلوس الي ينطيهن الي

جُمارة : شوف شگد أحبك

حجيتها و فتحت الجنطة

أنرسمت الابتسامة على وجهة و أنا متأكدة لو ما شوية لازم روحة

چان دعمنه اريد ابقى ويا ما اريد اوصل لبيتنه

وگف اخذ النة مسواگ و اني اباوعله اتأمل طولة و ضخامتة

هو صحيح بالشكل يشبه الوحوش بَس بالكلام و الأسلوب يختلف

صعد و شغل السيارة

زِناد : باعي امج لترادديها دگي ناعم بين ما أجي

جُمارة : لا راح اصير لوكيه

- هههههههههه

وصلنه للباب نزلت و القهرة بداخلي ما تنوصف ضليت واكفة ما اريد ادك الباب و ينفتح رغم شكد مشتاقة لامي و عطشانة لشوفة روز

مد ايده يريد ينطيني فلوس

جُمارة : ترى جنطتي متروسة فلوس منك واني اكبر بخيلة

ما أصرف

مد ايدة بيها الفلوس

زِناد : صرفي ما دام أنا موجود

جُمارة : اي الحرمة بشارب الخيّر الله يساعد شاربك شكم حرمة مچلبة بي

فتح جنطة السيارة و أجتافة تهتز من الضحك

سمعنه العياط من البيت سد الجنطة و دگيت الباب بقيت واكفة انتظر اول ما فتحت الباب امي الدرج يصير كبال العين طاحت روز رحتلها اركض دموعها على خدها و فاقدة الوعي المغسلة يمي بسرعة

رشيت مي على وجهة گعدت اول ما شافتني حضنتني بأثنين اديها

روز : تغريد تريد تفضحني فضيحة خلصيني منها

تغريد : اكلي نعل خايفة تنفضحين ع شنو شمسوية انتِ خلي تعرف الناس عمايلهم و شلون يضحكون على بنات العالم

جُمارة : هسة كافي شبيجن بعدنا ما طبينه

نزل علاليگ المسواك مدري شعجب امي كالتله مشكور

راد يروح اجيت اسد الباب امي ما خلتني اشرتلي طبي

من وراها سويتله بوسة بالهوى مسح شواربة و دار وجهة امي طبگت الباب ، نقطة ضعفي صدگ من يمسح شواربة

تغريد : ليش ما اجيتي امس وي امجد لو ما

يعجبج غير هذا الوحش امجد لان زين ما تردي

ما جاوبتها لان ادري بيها تريد تتعارك اخذ روز و صعدتها فوك اني مو علمود روز بس اريد اضم الغترة و التليفون قبل لا تشوفهن امي

طفرت هدومنا كلها و خليت الجنطة بنصهن و كعدت يم روز هي كل شوية تحضني و تبوسني و تبجي تشكيلي من أمي

باوعت الحايط سألتها هاي شنو سولفتلي كلشي فوگ ما راسي يوجعني دخت و اني اسمعلها

جُمارة : و هسة ؟؟؟

روز : طلگني وبس

- طلگج ؟ شو ما مبين عليج مطلگة

- ترى هو يعني فسخ الخطوبة

سوت النه امي غده و نزلنه و هي لازم ترعد و تحجي على آل سرهيد

تتمنى بس وحدة من عدنا تجاوبها حتى تخنگها و تكتلها

من صار الظهر أكول يومية زِناد يجي يمنه بالغرفة شكد حلو

صعدت فوگ قفلت الباب و اني اسولف لروز

روز : ولج بس لا تحبين زِناد ؟

جُمارة : وليش ما أحبة شبي

روز : هسة اني ادري هو يحبج بس ما عبالي تحبي

انتِ وين و هو وين ما تتوالمون و لا تغريد راح ترضى

و انتِ وين تگدرين تعيشين ويا

جُمارة : بالعكس أعيش اسعد إنسانة هو اصلاً

مدللني دلال و يتمنى بس اطلب منه شي

روز : جُمارة لا تغرج فلوسة ترى كلها تسولف هو شكد قاسي و ما يرحم وهسة زين وياج حتى تقبلين بي بعدين

منو يكول يخليج تداومين راح يحبسج بالبيت حالج حال البقية الي ببيت رهينة

جُمارة : لا اصلاً هو اكثر واحد يريدني أداوم

روز : باعي مادري إذا گايلج لو لا محمد گالي حتى قصد المعهد چان هو يدفعة و احنه عبالنه ابو المعهد يتصدق عليج بس اني متأكدة إذا يتزوجج ما يخليج تداومين

هو مبين كلش يغار

جُمارة : ترى متعرفي بگدي هو يموت عليه و مستحيل

يزعلني لو يضوجني

روز : ما ادري اني اكول هو خوش رجال بس مو مال تتزوجي هو شيخ و يرادله وحدة تعرف بسوالف الشيوخ

و تقبل بكلشي يصير و انتِ وينج و وين هاي السوالف

إذا يتزوج عليج تنجلطين

جُمارة : لا أتزوجة مستحيل أضيع هذا انتظارة الي على الفاضي و حتى امي علمودة أوكف بوجها

روز : تركعج بمية نعال

نثرت الهدوم و اخذت جنطتي و طلعت من الغرفة طبيت لغرفة آمير

راح يصير سنة و ريحته لسه موجودة بالغرفة بقيت أبجي لحد ما نمت كعدت المغرب نزلت اسبح و امي تسويلنا

تغريد : شعجب عافتج رهينة

جُمارة : لا هي أصلا كالت روحي لامج خطية

تغريد : أنا عدلة و انتن عدلات من هاي اللحظة إذا سمعت اسم واحد من احفاد رهينة بالبيت أذبحجن والله اذبحجن

نزلت روز سارحة بعالم تاكل و تبقى باللگمة ربع ساعة امي گوه لازمه نفسها عنها

بقيت كاعدة انتظرت امي تنام و روز صعدت تنام صعدت وراها فتحت باب الغرفة لكيتها كاعدة و صافنة على اسم روز و الاسم المشخوط

سديت الباب و رحت لغرفة امير كعدت على الچرباية

طلعت التليفون فتحته دخلت على الأرقام بس رقمة موجود

و رقم جدة

باوعت للساعة هسة جدة نايمة دگيت عليه و عدلت كعدتي

فتح عليه خَط و هو يصيح

زِناد : بابا اصلخ جلدة اصلخة و عاتبني إذا ما مشه عدل

بلعت ريگي و گلت الو

- گولي جدة

- ترى اني جُمارة

زِناد : الله يسلمج شونج

جُمارة : شبيك

- ها حبيبتي شونچ چنت يم جماعتي

- خفت لا تنساني

- ههههههههه لاااااه

جُمارة : اني زينة شونك

زِناد : زين بَس مشتاقلچ أدبسز ماخذة البيت كله وياج

جُمارة : زين انتَ انطيتني التليفون ترى مابي شاحنه

زِناد : صدك ، خرب غير تذكريني

- مادري نسيت

- و لا يهمج اني باجر عگبة أشوف شلون ادزها الج

جُمارة : مو كلت أجي

زِناد : مشتاق لازم

- طبعا ههههه

زِناد : شلون صارت هاي خالتج

- صدك ليش هيج تسوون بيها هذا ميستحي ابن عمار

- ترى جثير يحبها لحد هسة و ما يرضى يطي بيها

- ترى يستاهل حيل

زِناد : يعني عندج استعداد هيج تسوين بيه

جُمارة : اممممم لا خطية انتَ انتظرت كل هاي السنين النوب أغدرك شيصير بيك

- حتى لو أبقى عايش بَس أنحسب ع الميتين

جُمارة : لا جُمارتك ما تسويها

زِناد : متسويها أكسر راسها إذا تسويها

جُمارة : جدة شلونها

زِناد : تلهج بأسمج دگول يومية تغيضني بيك

- ههههه لو انتَ حلال على جدة جان من زمان تزوجتك

- ههههههههههههه

- تريد تروح يم جماعتك ؟

- لا يمچ أنا

جُمارة : كلها تريد تبعدني عنك و تگول ما يوالمج و أني أشوفك أحسـن واحد

زِناد : حسبالهم أعاملچ مثلهم

جُمارة : بس حتى انتَ وياهم زين

زِناد : لخاطرچ زين

- امممم حتى أرضى بيك و هاي و من أتزوجك أنصدم

تطلع مثل أمجد يعذب زوجته مثل الوحش لااااااااا

ايع ما تلوگلة كلمة وحش حلوة بس عليك

زِناد : يعني أنا وحش

جُمارة : أحلى وحش بالدنيا ...

زِناد : لا تحچين هيج هسة أكلج

ضحكت بصوت ناصي و ما اريد أسدة أبد

زِناد : يالله روحي نامي و دگي عليه باجر

اجه صوتهم من يمة يگلولة حتى الشيخ صار يدور ختلات

جُمارة : تعوفني علمودهم

- انعل والديهم

- والديمن شيخخ شو گلبي رجف چنها السَبة علينه

زِناد: هههههههه عفية

جُمارة : يالله مع السلامة

- الله وياج

سديته و بست التليفون ضميته جوه الفراشات و فتحت باب الغرفة

من القفل و بقيت نايمة بيها ما رحت يم روز ادري تريد تنوح براحتها

ثاني يوم امي كانت تصيح لان كل وحدة نايمة بغرفة و قفلت غرفة امير و ضمت المفتاح و أني ما كدرت حتى اطلع التليفون بقيت النهار كله افتر وراها اشوف وين تخلي بس ما كدرت لحد ما نامت

ضليت الوب افتر منا ومنا لحد ما نمت

الصبح امي راحت للسوك لان ماعدنا هدوم كلت الها أنطيني المفتاح ارتب الغرفة عاطت بوجهي كالت من اجي اني ما اريد كبالهالان حتى إذا طلعت الجنطة راح تگول فتحيها

جابتلي تراكات و روز دشاديش لان روز جسمها مفصل تفصال

و أمي من زمان دگول الها الدشاديش احلالج بس اني مسلوعة من ورة السادس كلشي البس عادي هاي الفترة يالله سمنت من دلال جدة

بدلت العصر أحس گلبي يگول راح يجي و بنفس الوقت خايفة من امي

رتبت البيت و أمي تباوعلي بأستغراب

- شكو اليوم

- ماكو شي يمة لازم نضحك للحياة حتى تضحكلنا

تغريد : أنشگت حلوگنا و ما ضحكت تالي ضلينا نبچي

جُمارة : يمة زِناد ليش

بعدني أني احجي و أندگ الباب كامت أمي تفتحة وكفت اشغل بالتلفزيون فزيت مبتسمة من شفت جدة و زِناد و ولاء و عمي فاخر

و مرته و عمي عمار و مرته و شريك و أمه

ما عبالي يجون هلگد صعدت أركض لبست صاية مفتوحة و كعدت روز

جُمارة : كومي ولج عيالج هنا

فزت ما مفتهمة شحجي حطيت الشال على راسي و نزلت سلمت على جدة و عمامي و زِناد و امي تخوزر بيـة

نزلت روز كالت السلام و طبت للمطبخ رحت يمها

روز : ذوله شكد حتى ستكاين على عددهم ما عدنا

جُمارة : صبي اول شي للكبار و بعدين للصغار

كفختني على راسي

جدة صاحتني كعدت يمها زِناد عطرة من بينهم يفوح ترس البيت و السبحة بيدة من يحركها اسمع صوتها و ما اسمع هوستهم

امي اشرتلي گومي رحت للمطبخ و النوب المتكلم عمي عمار

و امي مدري شلون لسه ما كامت خنگتة

رهينة : عايني تغريد تدرين بينة من زمان نريد جُمارة

تردين تعيشين وياها لان بتج بيتها وحدها تردين بصفها

تردين تبقين هنا بكيفج أحنه فوگ ما أهلها جايين نشريها منج

زِناد : البنية بِتج و لا حسبالچ أنا كاض سالفة النهوة حتى أخذها غَصب هاي گبالج أنا أبن عَمها لا ناهي عليها و لا أوگف بقسمتها بَس تدرين بيه هاوي بِتچ و الشور شورج

و شورها

رهينة : خلينا نصفي الگلوب و نبدي بداية خير

أنا وياج راح نتناسب

زِناد : إذا تردين تسأليها شوفي شورها

جبت الهم الچاي الاستكاين أشكال و الوان بعدني ما واصلة المطبخ

و الصينية بيدي باوعت لروز مبتسمة ..

أجـينة و ندري من نردّ ، نرد خَالـين

بَس ضحكاتكم تسوه ..

...

" ورود "

سلام : عدنان ابنج طَگ شراع جيلة

امي لطمت على خدها و جدة تخربطت و اني أحس گلبي نمرد

بقيت صافنة اعاين بالوجوه

وره المغرب طب زِناد و شريك و علي زِناد دشداشتة كلها دَم

عاين لولد عمي عمار و للتواثي

زِناد : ولية مال مخانيث رايحين عشرة على واحد

ترى عندة ولد عَم ما يدرون بالصار ساعة و يهدون عليكم

سلام : محد طگة هو بعدنه تونة نزلنه

هو و عدنان يتمالخون و أمـه تعيط تالي شراع طگ عدنان

و طاح بالگاع رحنه نفزعلة و طَگ شراع چيلة

زِناد : يابة عدنان إذا لِفة للبيت اسوي عبرة لمن أعتبر والله

انااااا لكم تردون تعيدون بية عملة اميرررر ولكم دورة

سنتة بعدها ما طلعت

ام عدنان : خو ما مات الولد يمة بشرني

- بأيدة بس لو يكدر يحركها بعد لو ما يگدر

عافهم و راح يعاين جدة يطمنها مابي شي عفتهم كلهم و صعدت بالغرفة أبچي رغم كل السواه و عمايلة بس احس روحي محترگة عليه بقيت للصبح ما نمت و لا نزلت جوه ماريد خبر يصدمني بعد و وزهرة طردتها

متصوب و طَلعوه وره يومين و عدنان رد البيت بدون ما يدري

زِناد بس ما چنها تخلص هيج عمام شراع ما يتفاهمون و أبوي

و امي خايفين على عدنان

فتحت باب غرفة جدة نمت بحضنها أبجي خلت ايدها على راسي

رهينة : شبيدي يجدة كلجن گلوبچن ما مرتاحة

و أنا وي كل وحدة منجن روحي تلوب

ورود : جدة ما اريدنه بس ما اريد يموت

لو هيج يصير بي

رهينة: غير أخوج المچلوب يريد يغلط على الوادم و كون الوادم ما تغلط عليه

لحد ما شبعت نوح طلعت من غرفتها لاگتني دمعة

دمعة : كش عميتي على الرجال كتلتي

ورود : خاف عينج عليه حتى تخنسين ويا وره البيت

- صح اصلاً ما تلوگيله انتِ

غميتها و صعدت للغرفة افرفح هاي ليش هيچ گلبي نذل و هلگد يحبة

فزيت و أنا اسوي الريوك ثاني يوم

زِناد : حضروا روحكم اليوم العصر نروح مَشية

لعمام شراع لان رد الولد بالمستشفى ايدة منتهية

فاخر : و إذا ما رضوا بالصلح و رادوها بالقانون

زِناد : لا ماكو هيج حچي لو رايدين القانون جا تصرفوا من زمان بس ما دامهم سكتوا يعني يردون نحلها

حطيت دمي بشيشة و بالي يمة من گال ايدة منتهية

أجت الشيوخ ترست الساحة و اجه عمي عمار و راحو بس زِناد و عمامي محد من الولد راح لحد المغرب يالله اجو جدة شايلة هم فتنة

تدري بيها شكد تحب ابنها حتى ما راحت اله

رهينة : بشر يَـ جدة

قاسم : ترى أحنه ولدچ

- بشرني زِناد

فاخر : لو ينسجن عدنان لو ورود تروح تداري رجلها

ما أضنها تفض وياك سَالفتك ، زعل عـِرسان

الحادي والثلاثون من هنا

تعديل المقال