رواية قانون القلب اقوي الفصل الخامس عشر 15 بقلم رسل احمد
لا تنسون التصويت والتعليق ومتابعه حساباتي والقناه تفاعلكم قهر
3
عيونج والبياض البيچ
كسرن عين المراية
شعرج المنثور
هيل وطش بالولايه
3
لشاعرها
+
✨✨✨✨✨✨✨✨✨✨✨✨✨✨✨✨✨
+
—ياقوت—-
+
بحياتي ما حسيت نفسي سعيده مثل هسه كل شويه اكرص روحي حتى اتأكد ياربي اني بحلم لو علم حمدت ربي الف مرة فارس مو مصدك حتى اذا بالدوام يدزلي رساله يعبر عن فرحته والف مرة كرر كلمه راح تصيرين مرتي وحلالي مشتاقتله هوايه صارلي شهور مشايفته من قبل الامتحانات النهائيه الفاتت تقريبا صار ٣ اشهر حلف ما يشوفني الا بيوم الي نعقد فاتت ليالي عليه مبتسمه
1
ليالي:- خاله تكول خل تنزل
هزيت راسي متوترة امه وخواته وبيبته وام ليالي وغفران جوة وكفت كدام المرايه القي نظره اخيرة وكفت ليالي وراي وحطت ايديها على اكتافي تباوعلي بالمرايه
+
- تخبلين تكولين للكمر انزل هذا مكاني اني احلى منك
+
ضحكت بتوتر :-اخاف ما اعجب بيبته الباقين شايفيني
+
ليالي:- متعجبين منو يمه صدك تحجين بعدين عاجبه اهم واحد بيهم شعليج بالباقين بيبي ترا تخبل حبوبه و تصنيف وصاهه الف مرة ما تفضحنا بالحجي كدام امج من تشوفج لان تدعبل الحجايات تدعبل بدون ستوب
+
ابتسمت اباوع لنفسي فستاني وردي بسيط مو مبالغ ساده وطوله تحت الركب بشويه وعالجسم وشعري مفتوح شايله كم خصله ليورا اكتفيت بأحمر خدود وحمرة ورديه وكحل خفيف اخذت ليالي ايدي تشجعني ونزلنه سوة كلبي يرجف واحس بردانه وفرح طفولي مستولي على كلبي ماعرف اوصفه
+
اول ما نزلت لمحتني نورهان ووكفت الضحكه شاكه حلكها تقدمت ناحيتي وحضنتني وباستني من خدي وهمست باذاني:- هالبوسه امانه ووصلتها
سلمت على امه واخته ريم اول مرة اشوفها كانت هادئه وساكته عكس نورهان الحماس واضح عليها واقتربت من بيبته اسلم عليها
+
ام :- هلا هلا تعاي بيبي ابوسج انحنيت عليها كونها كبيرة بالعمر ماكدرت توكف باستني من خدودي وايدها على زنودي ترص بيهن وكعدتني بصفها
+
لبست نظاراتهه المعلكهن بركبتها بسلسله ذهبيه طويله وتباوعلي بتفحص - شو عايني خل اشوفج باوعتلها خجلانه اريد اغرك بهدومي
+
ام ناصر هامسه لنورهان الكاعده بصفها:- ياا فلك وانه اكول شبي الوليد متسودن ساحرته بالعوينات الزرك يدور شگرة ابن حامد
2
نورهان بصفها ندستها تهمس:- بيبي شتفقنه يمعودة امها كاعده.
+
ام ناصر:- ايي هسه شحجينه .
+
اندارت لماما تحجي بصوت واضح :- صلوات صلوات عروستنه شايله الزين كله الله يحفظها بجاه الحسين
+
علويه نهله :- صليتي على نبيج حجيه .
+
اخذت نظرة خاطفه على امه واخته ريم منزويات وابد ما حجن واستغربت هالشي بيبته متوليه الحديث
+
ام ناصر:- يمه انه حفيدي شيخ الزلم شني طول شني جمال زلمه معدل اخو خيته والحمدلله مكون نفسه وترقى بالجديد ورا صوابه سودة بوجهي والي تأمر بي العروسه حاضرين
+
علويه نهله:-الله يخلي لشبابه حجيه الماديات اخر اهتماماتنه احنه نشتري رجال يخاف الله بيها ويداريها
+
ظلن يسولفن بامور الزواج والترتيبات واني مدنكه ما حجيت لحدما وجهتلي ام فارس السؤال:- انتي مطلكه صح؟ شوكت تطلگتي؟
+
عبالك ضربتني بوكس على معدتي ليش تذكر هيج شي بهالطريقه بلعت ريكي بألم ورفعت راسي لماما الي بين الانزعاج عليها من الطريقه الفضه الحجت بيها ام فارس
3
علويه نهله بهدوء:- بنتي مو مطلقه ام فارس يعني معقوله متعرفون شي عن البنيه الجايين تخطبوها ؟ بنتي انخطبت وفسخت علويه ياقوت بنت بيت ما متزوجه حتى تتطلك
2
اباوع للبنات الكل وجوهن توترت ماعجبهن الكلام واني حسيت نفسي اريد ابچي وعيوني ظلت مچلبه بحضني ظليت اعض بشفتي من الداخل بقهر اي سيف انحسبت عليه رجال وزواج وداتعير بيك حاليا
+
ام فارس:- يعني قصدي هي عاقده قبل علمود هيج كلت مطلكه
8
علويه نهله:- وهالشي مو سر وابنكم يعرفه عندج مشكله بي خيه؟
+
سكتت ثواني وتبادلو نظرات غريبه هي وبناتهه:- لا خيه بعد هو رايد هاهيه وداعتج خيه العشيرة كلها بأشاره منه ينطو وشكد خطبوله بناتهم بس هو يتعذر ما يريد
ماما بلكوة لازمه نفسها لان اسلوبها ناشف ومشفتها فرحانه لابنها الوحيد ديتزوج وعبالك جايه غصب
+
علويه نهله:- الله يحفظه لشبابه بنتي هم مو قاصره الله يسلمها داشوفيها كدامج والف من يتمناهه
+
اتدخلت ليالي لاول مرة:- وهو فارس عرف يختار واختار احلاهن واحسنهن عيني هاي علويه ياقوت مو حي الله حتى بالدوام اصدقاء حيدر على السمعه الطيبه والنسب الي يرفع الراس شكد يخطبون منه وهو يتعذر ضامهه للي يستاهلها
+
ام ناصر:- ان شاءالله الطيبون للطيبات ومنلگه احسن منكم ووجهت نظرات لام فارس كأنها تحذرها متحجي شي زايد
+
باوعتلي ماما معاجبهه الصار واشرتلي اكوم كمت وكفت ستأذنت وصعدت لغرفتي الفرحه الي جنت عايشتها قبل شويه انعفست ومدري شصار بيه شبعت قهر ليش دتحجي بهالطريقه وضحت ان هي معاجبهه وجايه لان هو رايد واضح كلشي ديصير من ورا خشمها
+
ظليت كاعدة بغرفتي وكل مزاجي تعكر صارلي اسبوع فرحانه بحجايتين امه عرفت تقهرني وتبدد فرحتي هاي بعدني ماتزوجت ابنها ومفروض هسه غير المجاملات ماكو بينا ليش دتحجي بهالطريقه ليش فارس ابد ما كالي امه معارضه او معاجبهه
دخلت زهراء عليه وكعدت بصفي تحاول تلطف الاجواء:- اي عيني اهل الحب هنا صارت صدك ولج
+
باوعتلها بعيون حزينه:- امه مو راضيه مشفتيها شلون تحجي ؟
+
زهراء:- يمعودة شعليج بيها قابل تتزوجيها ؟ تلكيها تريد تزوجه على مزاجها مثل باقي الامهات وهو صدمها
7
سوت نفسها تصفك وتركص ( وفارس رايد رادته وعايف بنات ولايته)
ابتسمت على سوالفها بس ضوجتي بعدها
4
دخلت ليالي معلنه :- راحو اجه فارس اخذهن اشرت براسي ودرت وجهي لشباك اباوع لشجرة النبك المطله على غرفتي
+
كعدت بصفي تفرك زندي:- توته لا تضوجين هي عمتي هيج مرات عدها طلعات مدري شلونها بس سعاده فارس تهمها صدكي
+
هزيت راسي وهمست :- اي بس مجنت أتوقعها لهلدرجه ما رايده وفارس مگلي امه هيج معاجبهه زواجنه
+
ليالي:- لج هي هيج تحجي عادي راضيه بس لازم تذب حجايه سوالف عمات
ضربتني وحجت بضحكه:- لعد خاله مو جانت متريدني وهسه عادي وحبابه ويايه هن هيج عدهن لازم يثبتن موقف بصمه العمات الشهيرة
+
باوعت عليهن هي وزهراء:- كومن طلعن يلا خل ابدل
+
زهراء:- ديلا عيني العندج عدنه عساس ما مبدله الج اني
8
ضربتها بالكوشه:- انجبي وطلعي ادبسزز
+
كامت وكفت وراحت ناحيه الباب وليالي كامت وياهه تضحك بس اعرفها متسكت وفعلا اندارت يم الباب تحرك حواجبها بخبث؛- كاتلج درد المستحى خل انشوف باجر يم الحبيب تستحين هيج لو تكضيها شخلوعي
+
شهكت لطمت خدي:- عزا لج زهراء اكول لماما والله امشي ولي
+
ليالي كملتها؛- لا عيني ذاك الوكت تختلف
شمرت عليهن المخدة واثنينهن طلعن بسرعه يضحكن وسدن الباب بحياتي مافكرت نوصل اني وفارس لشي حميمي وقشعر جسمي بأنزعاج
+
فتحت الكنتور ومديت ايدي لجانب فستاني فتحت السحاب وبنفس اللحظه انفتح الباب ودخلت هاجر عيونها بكصتها وترعش من الانفعال ووجهها اصفر هي حتى ما ظهرت كدام اهل فارس ولا شافوها حضنت نفسي اغطي جسمي السحاب مفتوح وجسمي من الجانب طالع
+
ضحكت بسخريه واردفت:- ديلا عيني الشريفه عساس اخوي ما لعب بيج طوبه من حصرج هنا
+
فتحت عيوني على وسعهن وفرقت شفايفي احاول استوعب الجاي تنطقه همست واني بعز صدمتي:- تخسين انتي واخوج ردت اذبح روحي وما خليته يتدنالي وكعد مثل الذليل يتوسل بيه ما اذي روحي
+
اقتربت مني وغرست اصبع السبابه بوسط صدري تنقر بي بعنف تلقي سمومها عليه:- دمرتي اخوي وخليتي يهج من العراق واني وامي بحسرة شوفته وفضحتي حتى تتزوجين الگو...د مالج عبالج يسكتلج وداعتج يگلب الدنيا على راسج وراس التاخذي وهلمرة اني وياه بكل خطوة دمرتي حياتي ومحمد من يومها ميباوع بوجهي بسببج الا ادمر حياتج فلا نخليكم تفرحون افرحي هسه افرحي والله الا ابچيج دم
+
لزمت اصبعها ونترته بعيد عني:- من سوء اعمالج ابتعد عنج علويه هاجر بت رسول الله انتي وهاي اخلاقج ياحيف
+
ابتسامه جانبيه ارتسمت على وجهها :- تلعب نفسي من مثالياتج الكاذبه وخليها ترچيه باذانج مراح تتهنين واطلع دمارنه اني وسيف من عيونج
+
ابتسمت بسخريه مراح اسمح الها تنغص عليه فرحتي
همست بهدوء:- اطلعي برا
+
هاجر:- طالعه معاجبني اكابل خلقتج الزفرة.
اندارت وطلعت تهاويت على سريري ايدي على كصتي واسأل نفسي بعد كم مرة راح تنتغص عليه مستحيل افرح فرحه صافيه بدون منغصات تعوذت الشيطان وكمت بدلت وبقيت بغرفتي اذا انزل ماما تستلمني على اسلوب ام فارس واني صدقا مالي قدرة اتحمل شي
+
اتصل فارس عليه وفتحت الخط :- يا هلا
+
فارس:- هلا بريم الفلا
+
ضحكت بغنج :-متبطل سوالفك؟
+
فارس:- تردين ابطل سوالفي ؟
+
همست باحراج:- لا احبهن
+
ضحك بصوت رجولي عالي:- لك احبك يا ضوة احس روحي بحلم
+
احس كلبي تضخم من الفرحه:- لا اطمئن مو حلم صارت صدك؟
+
تنهد بصوت واضح:- اذا ما اكضج بيدي لا امن ولا ارتاح ؟
+
- شنو كالو اهلك؟
+
فارس:- جدة متخبله عليج تمشي وتصيح لعابه لعابه هالمشعول الصفحه فارس صام وخوش راح يفطر ماتدري بحجيها تشعوط بيه وانه ما شايفج من شهور بوستها من عيونها الشافنج
+
ضحكت بخجل:- حبيتها مدام عجبتها
+
همس بهيام:- انت منو الما ينعجب بيك يابعدهم كلهم .
+
نهرته واحس وجهي صخن:- فااارس
+
جاوب بنبره ذايبه:- عله گلبه ودواه لفارس
تنهد وسكت ثواني وسألني :- عندج ثقه بيه؟
+
جاوبته بأستغراب:- شجاب طاري الثقه؟
+
استرسل باصرار:- كليلي عندج ثقه بيه؟
+
قشعرت بخوف وحسيت سؤاله وراه شي جبير:- عندي ثقه بيك بس ليش دتكول هيج لا تخوفني؟ ضام عليه شي
+
فارس بتردد:- اريدج تعرفين بحياتي ماردت مرة غيرج ولا حبيت ولا راح احب غيرج ولا كلبي ولا كلشي بيه يريد غيرج
1
زاد خوفي :- فارس شكو عفيه؟
+
ضحك بتوتر:- شكو يا نظر عيني ارد اشوفج عندج ثقه بيه وبحبي الج شبيج تخربط حالج؟
+
- سوألك وتوقيته غريب انت ضام عليه شي؟
+
فارس:- لا بويه ماكو شي مضموم عليج وانه كلشي بيه مفضوح كدامج شوكي ولهفتي وحبي مثل كتاب مفتوح تقريني وكت الي يعجبج شوكت نعقد وشل صبري كلش
+
همست بأبتسامه:- من ينزلون مجتبى وكرار من الداوم يخابرك حيدر وتتفقون على موعد
+
استرسل بفرح:- والله محضرلك مشيه ماصايرة بكل العراق خلي كل الوادم تعرف اخذت علويتي جبتج بتعب انه .
ربعي عشيرتي وكل دوامي متحزمين وينتظرون بفارغ الصبر يريدون يردون وكفاتي وياهم
+
غطيت وجهي بيدي عبالك راح يشوفني مجاي اتخيل تصير صدك وننجمع بالحلال
+
نادى بأسمي بصوت منخفض:- ياقوت؟
+
- همم
+
فارس:- ولج اجي اكلج هسه لا تتماوعين اصبريلي بس هالجم يوم ؟
+
- هاي شبيك وين متماوعه داحجي عادي
+
تنهد واردف:- هو العادي مالتك مايع وانه رچيچ كدام المايع انتظري وموعي بحضني براحتج
+
سالته اغير الموضوع لان ماعرف اجاوبه :- شنو ردت صحتني
+
ضحك على تغيري للموضوع واسترسل:- شعرج؟
+
- شبي
+
- عوفي مفتوح اريد اشوفه مثلما هو
+
قشعر جسمي لفكرة اكون مكشفه كدامه واكون حلاله وكلبي ارتعد بفرح وصرت ادعي يارب تممها علينه بخير يارب اجمعنا بحلالك وسهل علينا
همست واني اتخيل ايدي بين ايديه لاول مرة شلون راح تكون :- صار
+
نبره صوته تخلي فراشات تتراقص بمعدتي طريقته بالكلام تحسسني اني اغلى واثمن شي عنده وتسحل كلبي سحل وبنفس النبره الي احبها عبرلي عن حبه واشتياقه:- احبج واحب كلشي يخصج وميت شوك اريد اضمج بصدري اريد اضمج بس الي
+
غمضت عيني وقشعريرة لذيذة سرت بجسمي وتنهدت براحه همست:- اني بس الك للموت ما ارهم لغيرك
+
الايام الممتتاليه كانت احلى الايام اتجهز لخطوبتي لحبيب روحي حتى ليالي الي جانت غارقه بحزنها نفسيتها تغيرت وصارت فرحانه وسعيده بالتحضيرات احس روحي صدك عروس وكلشي اسوي بحب وفرح صافي
زهراء وليالي الكاع مو ساعيتهن وتعبني باختيار فستاني اني اريد شي وهن يرفضن يريدن شي اخر حابه ابقى محتشمه وزهراء رافضه رفض قطعي وليالي تأيدها
اتجول بين الفساتين واگلب بيهن وكعت عيني على فستان ابيض حسب توجيهات العلويه نهله متقبل العروس تلبس غير الابيض بعقدها تتفائل بي رفعته كدامي اتفحصه قماشه ساده طويل وردانه طويل وبي حزام كرستال اقتربت مني زهراء وجرته من ايدي ورجعته لمكانه
+
زهراء بأمتعاض:- هذا تروحين بي لزياره تصلين بي مو تنخطبين بي تعاي شوفي هذا
+
جرتني من ايدي لنهايه المحل واشرت على فستان عارضي على منيكانه هم ابيض بس يختلف جريء اكثر وليالي واكفه بصف المنيكانه لازمتها من خصرها تعرضها الي وتأشر بيدها بهذا اوكي
+
هزيت راسي رافضه وهمست من بين اسناني اخاف احد يسمعني :- مستحيل . مستحيل البس هيج صاحيات انتن بأول لقاء اكعد اطلع اكتافي وصدري بهالطريقه
+
اقتربت ليالي مني :- ترا تصيرين مرته حلال بعدين يجنن لبسي وشوفي باللبس شلونه وقرري لا تحكمين گبل بعدين متردين تطلعين باحلى صورة كدامه؟
+
- يعني لازم اتعرى حتى اكون حلوة كدامه هو يشوفني حلوة مثلما اني
+
كرصتني زهراء من زندي بقوة خلتني اطفر من مكاني وافرك بيدي واردفت:- ولج دخلي يشوف الشحم واللحم يحظي من عرفج لليوم انتي مكبعه تكبع محروم سودة عليه
+
- انتي انجبي الادبسزز عينج طالعه ولسانج صاير فالتو محد يضبج غير البالي بالج
+
كشرت وباوعتلي بطرف عينها اخذت جنطتي من ايدي ودفعتني على غرفه القياس :- بس قيسي ترا شلعتي كلوبنه صار كم يوم ندور مخلينه محل وبوتيك يعتب علينه مابقه شي ترا اربع ايام
+
دخلت على مضض وخلعت ملابسي بحذر واني اشتم بيهن بگلبي جابتلي الفستان وساعدتني البسه لمعت عيني باعجاب واني اشوفه بالمرايا المحيطه بيه من ثلاث جهات قماشه يتراقص حولي ردانه طويل لكنه مكشوفه الاكتاف ( اوف شولدر) مرصع بكرستال عند حافه الصدر وقماشه كله يلمع حطيت ايدي على صدري بخجل اغطيه صاحت ليالي مدت راسهه تصفر بأعجاب
+
ليالي :- لا خيه لا نزعي اخاف على ابن عمتي يوكف كلبه توة طالع من قدر ما يتحمل
+
انداريت عليهن الوم بيهن:- اني شحجيت ترا اوفر كلش اجت زهراء نزلت ايدي وتعدل بي منا ومنا
+
زهراء:- ترا يجنن ياقوت وشطالع من صدرج بس شويه بدايته لا تصيرين نحسه انتي عروس لازم تلبسين شي مختلف عن المعتاد الي تلبسي
+
حسيت روحي اريد ابچي:- ما ارتاح ما ارتاح
+
باوعن لبعض معاجبهن
ليالي بخيبه:- هاهيه حبيبتي بلي يريحج اختاري التردي تعاي زهراء عوفيها براحتهه وطلعن اثنينهن من يمي عايفاتني وحدي بغرفه القياس رجعت انداريت للمرايا اتلمسه فعلا يجنن مقسم عالجسم وضيق ومن يم الركب بي كلوش خفيف يتحرك بانوثه ويه كل حركه تبدر مني ولمعته تاخذ العين من جمالها خلعته بحذر ولبست ملابسي وحجابي وطلعت
اثنينهن مادات البوز وكفت كدامهن مكتفه اديه
وكلت مستسلمه:- الله يخلصني منجن هاهيه راح اخذه
باوعن لبعض وانفرجت ملامحهن بانتصار
همست زهراء:- الا هيج يلا تجين بالعافيه حبيبي يوم الي نختار بدله العرس ان شاءالله
+
اشتريناه وكملت باقي الاكسسوارات والملحقات ورجعت للبيت شايله هم شلون راح البسه ويشوفني بي حيل مستصعبه الموضوع
+
مكالماتنه اني وفارس اخر يومين جانت سريعه ومختصره اني متوترة وهو هم ماعرف شبي متوتر اكثر مني ويرتب بالمشيه والناس التجي وياه وكلما اسأله شبيك جوابه واحد ( ما ارتاح ولا كلبي يهدا الا السيد يعقدلنه)
عرفت هواجيس الماضي هاجت عليه وبعد عنده خوف ممكن يصير شي وبالليله المنتظرة ماكدرت انام للصبح اصابني نشاط غريب والنوم هجر عيوني صليت الفجر واخذت حمام طويل احاول اهدي نفسي بدلت ملابسي وخجلت انزل واشوف اخوتي مشطت شعري بيد ترجف توتر فرح خجل كلهن التمن عليه فرد مرة
+
طرقات خفيفه على باب غرفتي وبعد ما اذنت بالدخول تفأجات بدخول محمد الي نادرا يوصل غرفتي
+
بلعت ريگي وابتسمت بضعف
محمد بأبتسامه:- تستقبلين خطار لو لا.
+
- حبيبي انت بأي وكت مسموحلك فات وكعد على سريري وكعدت بصفه متوترة
+
باوعلي بحنيه وابتسم:- هلمرة احسج صدك عروس تدرين توته اذكر من امي جابتكم انتي وكرار الدنيا فجر ورحت ويه امي وابوي للجدة انتظرت بالحوش وسمعت اصواتكم واول ما حطو بحضني حطوج انتي صغيره حيل وحمرة وداهمت كلبي مشاعر لليوم ما انساهه احسج بنيتي قبل جهالي واشوفج توته الصغيره ام ظفيره الشگرة التركض بالحوش ورا كرار لان اخذ منها نستلتها واليوم كبرتي و صرتي عروس
+
دمعت عيني واني اشوف محمد لاول مرة يفتحلي گلبه
لزم ايدي ولمعت عيونه بدمع محب واسترسل بحديثه
انتي بنيتي الاخاف عليها من نسمه الهوة الاشوف روحي بيها وافتخر باخلاقها وعفتها وعقلها الچبير لا تظنين بيوم اتمنى اذيج او امنع عنج شي زين الج غلطت بحقج مرة وفرضت عليج انسان جنت اشوفج رافضته بس غطيت عيوني ظنآ مني اختارلج الاحسن واذيتج وانتي لانج بنت باره خضعتي اذا انتي بيوم تنسين انه ما انسه لاني سبب بالصار اتمنى تسامحيني حتى اكدر انه اسامح روحي
2
هزيت راسي ودموعي تهل بسخاء وانكفيت بحضنه هامسه:- ماكو شي اسامحك عليه انت اخوي وابوي الثاني وتاج راسي ما يوم شكيت بحبك وحنيتك عليه الصار قدر ومكتوب
+
رفع وجهي وقبل جبيني :- ربي يسعدج وينور دربج انه رفضته لفارسه اكثر من مرة لان اخاف عليج بس القسمه تلعب دور ومع ذلك لا تظنين اعوفج بيوم انه ظهرج لا تترددين تشكين لاخوج اي شي يضيك خلكج منه ولا تخافين اشمت بيج وما اوكف وياج او اتخلى عنج عندج خمسه بظهرج يطكون ظهر الي يزعلج
+
الفخر والامان الي حسيته بهاي اللحظه ما ابدله بمال الدنيا كلها
همست بصوت متحشرج:- الله لا يحرمني طولكم اني بدونكم ولا شي اتباهى بيكم كدام الدنيا انتو عزوتي وسندي وربحي بهاي الحياة
2
رجع قبل جبيني بحنو:- الله يرضى عليج لانج مرضيه انه ما يحتاج اوصيج لان اعرف اخيتي فص الماس مابي عيبه اعرفها ترفع راسنه باخلاقهه وادبها وما يطلع منها الا الزين
فرك عينه قبل لا تنزل دموعه ونهض يحثني انهض ويا:- يلا نزلي وياي نتريك سوة
+
انصاعيت لامره ونزلت ويا كلهم كاعدين ماعدا بابا وزهراء بعدهم نايمين متجمعين يتريكون صبحت عليهم وكعدت كرار ماد بوزة وداير وجهه عني ادري بي ضايج وغاير عليه كمت كعدت بصفه ضربت كتفي بكتفه:- شبي الحلو زعلان
+
اندار عليه هامس:- كلبج ينطيج تعوفيني صدك ؟
+
ابتسمت وبست كتفه:- بعدني ما رايحه ترا اتخرج يلا اتزوج؟
+
زفر بضيق؛- خاينه ذيج النوبه ولا انقهرت لان عرفتها ما تكمل بس هلمرة جنها صدك وهذا راح ياخذج مني .
3
دسيت ايدي تحت ذراعه اقرب روحي منه:- محد ياخذني منك انت روح الروح بعدين باجر عكبه انت هم تتزوج توته بيش كيلو
+
كرار:- افا انه مرة تنسيني اخيتي لج انتي تكي يبعد چلاي
+
تدخل حيدر يداهر كرار:- شلون احنه ويه المزعطه عوف اختك لا تضوجها
+
كرار:- معليك انت معليك كله منك انت الزوجتها عبالك موغفه على كلبك تريد البيت يفرغ لمرتك
+
ضحكت ليالي غاصه بالچاي:- اي حتى زهراء راح ازوجها اخذ غرفهن لجهالي
+
همست هاجر بخبث:- هم وينهم واحد وما ركد ببطنج
تحنطت ليالي وذبت اللفه من ايدها وتجمعت الدموع بعينها
7
امرها محمد بغضب:- اعتذري فورا؟
+
هاجر :- هسه شحجيت؟
+
محمد:- كلت اعتذري وثمني كلامج
همست هاجر من ورا خشمها:- اسفه
+
اندار محمد لليالي :-مسحيها بوجهي خويه مرات ما تعرف شيطلع من حلكها
+
هزت راسهه ليالي وكامت طلعت من المطبخ صاعده لغرفتها وحيدر مدنك راسه زام شفته بنفاذ صبر تالي كام ولحكها
الكل ساكت بعدما جنه نسولف ونضحك
ضيق عيونه على هاجر واشرلها:- شايفه من احطج هنا وحط ايده على جانب راسه والحسين ادمرج انه بلكوة لازم روحي لخاطر ابوي وهالاثنين الرابطيني بيج لسانج هذا اذا ما يبطل يبخ سم احشه الج الظاهر شفتيني ساكت عنج ونسيتي محمد شنو ومنو
+
همست تبرر:- ترا مجان قصدي شي انتو افتهمتو غلط
3
اشرلها تكوم:- فاركيني اليوم عدنه مشيه وماريد مزاجي يتعكر وتطلع بوجه العالم
+
وجهتلي نظرات ملامه تكلي بيهن انتي سبب تعامل محمد هيج وياي وكامت تنفث بغضب وراحت لغرفتها
+
ضغط محمد جبينه مغطي عيونه هامس:- الله يسامحك بويه على هالورطه
كام طلع للحديقه
لحگته واول مرة اتجرأ اكون بهالقرب منه واكف رافع وجهه لسمه وايديه بجيوب بجامته رفعت ايدي احطها على كتفه من الخلف التفت راسه واختفى التجهم المعتلي ملامحه
+
همست:- لا تضوج محد يحملك ذنب كلامها
+
اطبق جفونه بتعب :- ياقوت انه احب وحده ثانيه .
ماكدرت اسيطر على ملامحي جحضت عيوني وتفرقت شفايفي بصدمه وهمست:- شنو؟
11
تمشى ناحيه المرجوحه كعد عليها شابك ايديه وحاني جسمه للامام اقتربت واكفه كدامه احجب الشمس عنه :- يعني شنو تحب وحدة ثانيه محمد انت متزوج؟ عندك اطفال
+
ظل ساكت ومنزل راسه هذا اليوم بي هوايه اول مرة ويه محمد الكثير من الحقائق الصادمه محمد عاقل راشد مشاعره من عقله بعمره ما استخدم گلبه حتى من تزوج هاجر كان عن قناعه مو حب هي جانت تحبه هو جان يحب دراسته وطموحه ومن عرض عليه بابا يتزوج هاجر وافق على مضض لاكمال نص الدين وتكوين اسرة
كررت سؤالي بألحاح مستميت:- عندك علاقه بيها شلون بادلتك تعرف متزوج
+
جاوبتي بنبره يأس خافته:- ما تحبني . تعرف متزوج وماتفكر بيه انه الي سمحت لنفسي اتمادى بمشاعري بلع ريگه وانكمشت ملامحه بالم لاول مرة محمد مكشوف المشاعر متعري من قناع البرود والجديه واسترسل:- لا تحبني ولا تعرف بحبي بس ماكدر امنع نفسي حرام؟
شعور بيني وبين نفسي وحسيت روحي محتاج الفضه خارج گلبي؟
+
صافنه عليه وسيم انيق وثگيل ورزن من يمشي تهتز الكاع لدوسه رجله بس حاليا مهزوز بمشاعر كاتمهه بگلبه همست:- شراح تسوي
+
ضرب على فخذه بلحظه صحوة من ضعفه ووكف كارص خدي:- اليوم هواي حصلتي اعترافات لا يظل بالج اخوج جبل ما تهزة ريح ما يضيع عياله علمود هذا واشر على گلبه دارني من اكتافي يمشيني كدامه هامس باذني:- الي انگال ما يطلع ويبقى للموت بيني وبينج خصوصي زهراء هزيت راسي بأيجاب دفعني بخفه يلا روحي حضري روحج مو وراج روحه لصالون حر يجيب بنين وياخذجن استاذ كرار مطنكر
+
توجهت لغرفتي دايخه ومسطورة محمد.. محمد يحب وحدة ثانيه ؟شعرت بالشفقه اتجاه هاجر مهما يكون هي انثى وما اتمنى تنجرح انوثتها بهيج طريقه وبنفس الوقت گلبي واجعني على اخوي وحبه الخافي ماكدر الومه المشاعر مو بالايد ولا نكدر نتحكم بيها وهو اكتفى بمشاعر وما اتمادى ودخل بعلاقه غرگت بحيرة الها اول مالها تالي فستاني معلك داخل كيس قماش الخاص بالفساتين وكل تحضيراتي داخل جنطه سفر صغيره حضرتها من الليل حاولت ازيح كل الافكار واركز بفكرة وحدة اليوم هو اليوم الي ماجنت اظن يصير بيوم خليني افرح صارلي هواي الفرح مادك بابي
دكيت على فارس جاوبني وهو يصيح بأمجد:- لك مناك مناك لا تصير اغم ..انتبهلي صباح الخير يا وجه الخير
+
- صباح الخيرات اشو هوسه يمك؟
+
فارس:- جاي انحضر للغده اليوم كل اليجون وياي غداهم يمي والامر والقاده يمعودة السريه كلها تريد تجي بس ضبيتهم كلتلهم عالعرس يابه لا تشهرونه عبالهم جايين مداهمه
+
امتلى صدري بالفخر والفرحه وفرحته الي بصوته تشرح بدون ما يحجي همس بحب:- ياقوت كلها كم ساعه بس وعيونك يصيرن مالاتي بويه شيكضيهن
+
عضيت شفتي بفرح وكلبي ينبض بعنف: ب١٢ اروح لصالون احتمال انشغل عنك لا يظل بالك
+
فارس :- انه هم شوي انشغل زحمه الزم تليفوني ،،ياقوت مثلما وصيتج لا يلطخون وجهج مدري شلون يول انت ما محتاج مكياج هو المكياج يحتاجك
+
ضحكت بغنج - كم مرة وصيتني ؟
+
فارس:- ميخالف الاعاده للافاده روحي هسه اشوفج وانتي مرتي استودعتج الله حبيبه.
+
- مع السلامه . سديته حاضنه التليفون على گلبي فتحت باب البلكونه
احس حتى العصافير الي تزقزق فرحانه ويايه ووزني اخف من الريشه طايفه على مرجوحه حبالها نازله من السمه
طبيت على زهراء نايمه كعدتها واول ما فتحت هزت كتفها :- هاي الرادهه وهاي التمناهه بنت الساده لابن الشيخ جبناهه هلا هلا هلا
+
ضحكت على حماسهه كامت حضنتني حيل وتكمز بمشيتها طبت سبحت ونزلت تتريك دكيت الباب على ليالي لكيتها مبدله
+
ابتسمت بخفوت اقتربت منها وحضنتها امسد ظهرها:- هسه انتي ضايجه على الغرفه عمي امري لله انطيج غرفتي لجهالج بس من اجي لاهلي اطردهم منها
+
ضحكت وبعدتني عنها:- لا خلفله عليج جهالي على كلبي
+
لزمت ايدها:- ليالي لا تضوجين هاجر هلكد ما محمد هاملها تطلع ضوجتها بالكل وداعتج حتى اني غثتني لا تهتمين الها
+
هزت راسهه :- لا عادي هاهيه شويه ضجت وراحت اكلج منو يودينه حيدر ومجتبى راح يطلعون شوي انوب يجيبون الضيافه والكراسي والترتيبات
+
باوعتلهه وقوست شفتي:- حر؟
+
ضحكت مصفكه:- لا بشرفج يبووو شراح يسكت زهراء؟
+
هزيت راسي بيأس:- مي وزيت اذا ينجمعون يسوون حريق كرار افندي مطنكر وساكن غرفته
+
ليالي:- خطيه يغار عليج حقه ترا انتو ما تفترقون واجاه فارس مثل الضره
2
اخذتها ونزلنه لكيت بنين بالمطبخ ومجتبى كاعد بصفها ويتهامسون وبنين خدودها طماطه من الخجل
+
طلعنه صعدنه بالسياره وزهراء اجت ورانه هي شافت سياره حر وجهها انطعن وبوزت بس ماكدرت تحجي محمد واكف بالباب حرك حر السياره وزهراء فتحت حلكها:- عدنا خمسه مابيهم واحد يعرف يوصلنه .
+
خزرها حر بالمرايه:- مو بعينج انه ولج
+
لوت شفايفها:- لا خويه انت سادسهم يلا ماكو فرق.
7
هتف بعصبيه:- لا تلوين حلكج من خفت هالحلك مو افركه الج اخليج تبطلين هالحركه مال عايقات
+
ليالي بلكوة لازمه روحها حتى متضحك
+
هتفت اخفف التوتر:- ممكن نهدي ياجماعه
وكرصت زهراء وشاورتها:- سدي بوزج مراح تموتين اذا وصلنه كافي عاد
+
ذبنا بباب الصالون وانتظرنه ندخل بعدنه بباب الصالون وضربت كصتها عايفه جنطتها بالسياره مدري صدك نستها مدري متعمده طلعت تركض حتى تلحك عليه
+
طولت اكثر من عشر دقايق ورجعت وجهها مصبوغ دم وترجف من العصبيه وما تتحاجى فوك الساعه يلا فكت
+
اختاريت كلشي بعنايه مكياج برونزي خفيف مع لمعه بسيطه على جفوني وكحل اسود حتى يبرز لون عيوني كلبي يرفرف وما نبض طبيعي قشعريرة تصبيني بين الحين والاخر وتجيني لحظه ادراك اني داتجهز واتزين لحبيبي باوعت لنفسي برضا والشال مغطي اكتافي وصدري وحسيت بندم لاختيار هالفستان
شعري منسدل على ظهري واكتفيت بلفه خفيفه عند الاطراف طوله ويه حد خصري كذلتي مقلوبه على جهه واحده ومصففه بعنايه رادو اسوي تسريحه واني رفضت
+
عطرتني ليالي وهي تردد المعوذات حضنتني بفرح هامسه:- الي جمعني بحبيبي اليوم ينجمع بحبيبته ربي يسعدكم ويهنينكم ويبعد عنكم العين راح تطلعون تخبلون سوة خايفه عليكم تنحسدون
1
كملنا كلنا واجه مجتبى هلمرة اخذنه وكرار ما بين حيل مقهور رجعنه للبيت قبل المشيه بساعه وكضيتها اخذ صور اني والبنات الكوشه جاهزة لونها ابيض والبيت متروس خوالي وعمامي حتى بيبي اسينات وخالو علي جايين صارلهم يومين ببيت خالو
هاجر كاشخه لكن وجهها مايكصه السيف اتجاهلتها مستحيل اخليها تنغص احلى يوم بحياتي
+
لحظات مهيبه بحياة كل بنيه كيف اذا كانت من انسان تحبه وتحملت الكثير علمود حبه انسان ظنيت حتى الاحلام ما تجمعني بي سديت دفتري وضميته وداهمت زهراء الغرفه تحجي بأنفاس متقطعه:- لج ياقوت باعي من الشباك جايب كل الدنيا الرتب والعكل تتراكع ما اوكعلي برتبه منا منا ربييي
+
ارتعدت واطرافي بردت اصوات الزلم صارت عاليه بالسلام والاستقبال واصوات سيارات وصافرات حكوميه الي تشبه صوت سياره الشرطه من توتري رجليه بادن وماكدرت اتقرب من الشباك اباوع طلع الديصير صدك مو حلم صرت اتنفس بصعوبه وصدري يعلى ويهبط بعنف غمتني زهراء بابتسامه وراحت للميزتواليت جابت قطع كاكاو تفتح وتحط بحلكي كمت ابلعهن بدون ما اتذوقهن بس حتى ما يهبط سكري من التوتر
همست وغصه بكاء تجمعت بزردومها:- توته يمكن هذا اسعد يوم بحياتي اشوفج فرحانه ويه الانسان الي تحبي انتي تعبتي وتستاهلين حب مثل حب فارس الج
تجمعت دموعي بعيني ورفعت اصبعها تحذرني:- لا عفيه لا تبچين مكياجج يسيح خلي يشوفج وراهه كعدي ودكي ولطمي لا تخربيها هسه
+
ظليت فوك النص ساعه كاعده والسلام بين الضيوف ما خلص شكد جايين عالم ويا لعد ؟دخلت ماما عليه طالعه تخبل بالهاشمي الازرك ابتسمت
+
واقتربت مني هامسه:- الله يسعدج امي وينور حياتج يلا كومي راح يبلشون حطيت شال المهر الابيض على اكتافي ونزلت وياهه
+
استقبلوني بالهلاهل كعدتني ماما بالكوشه والكل صار يقترب مني يسلم عليه من اهلي واهله بفضول ونظرات اعجاب اتقدمت امه وهالمرة ملامحها ارق والين ابتسمت وبوستني وكعدت مسافه قريبه عني وبيبته كل شويه تصلي عالنبي
+
اشرت لليالي اقتربت مني شاورتها ( انطيتي الحلقات لنورهان) همستلي بأي وباستني بحماس من خدي وبنفس اللحظه اقتربت نورهان وفتحت علبه الحلقات الي اشتراهن فارس من زمان وحطتهن بصينيه الحلقات كعدنه كلنه نستمع لكلام الزلم نورهان بصفي تشرحلي عن كل شخص حجه هذا شيخهم هذا عمهم الفلاني هذا فلان كلهم تكلموا بطريقه لبقه تبعث القشعريرة سمعت صوته وهو يستأذن الكل يتكلم قبل لا ينطي والدي الموافقه كدام الكل
غمضت عيني اتلذذ بصوته والابتسامه انرسمت على وجهي يمكن غيري يسمعه كلام عادي لعريس بس اني اسمع كل كلمه يكولها احبج
+
همست نورهان باذاني:- سمعي ابو الفوارس
+
—- في الصاله الرجال—-
+
استقام بطوله الفارع ودكم سترته ابتسم وهو يرفع صوته حتى الكل ينتبه اله
فارس:- من بعد اذن الجميع من رخصه الساده قبل لا يردون الجواب رايد احجي كلمتين من بعد اذن عمامي وقادتي الي ماقصروا بالحديث ولا صغرن بيهم مقامهم جبير وعلى راسي بس كوني صاحب الحاجه المقصودة من هذة الجمعه المباركه الي جمعت كل هاي الوجوه الطيبه حبيت احجي عن نفسي
وجه انظاره ناحيه سيد حسن واخوانها الي جالسين جنبه
واسترسل اليوم انه جاي ووياي كل اهلي وعشيرتي وقادتي وزملائي واخوتي بالمهنه الي افتخر بيهم طارق باب الساده بالحلال التمس منكم المصاهرة والنسب بأبنتكم العلويه صاحبه النسب العلوي الشريف الي رفع الله ذكرهم وشرف مقامهم واسأل الله ان يرزقنا بركته
انه ابن المرحوم العقيد حامد ال... ربيت على قيمه ومبادئه وما انا الا امتداد لتاريخه المشرف المليء بالتضحيات والشجاعه هو غير موجود بجسده اليوم لكنه موجود بروحه واخلاق الي غرسها بيه
اتشرف بطلب ابنتكم ليكون بيني وبينكم رباطا حلالا شرعيا ببركه الصلاه على محمد وال محمد
صلى الجميع على محمد وال محمد بصوت وقور واحد
+
ابتسم السيد حسن ابتسامه رضى وهو يشوف لباقته والحضور المهيب لاهله ومحبيه حتى يشاركوه الفرحه
نهض واكف واتقدم من فارس وحط ايده بيده مسترسل:- اشكر جميع الحاضرين على جيتهم على العين والراس
الاب لا يطلب في الدنيا الا زوجا صالحا يصون ابنته كما تستحق وابنتي العلويه هي الاحب الى قلبي من بين جميع ذريتي ولا اتمنى لها الا شخصا يخاف الله بها
والرسول الكريم عليه افضل الصلاة والسلام قال (من ترضون دينه وخلقه فزوجوه، إلا تفعلوا تكن فتنة في الأرض وفساد كبير.)
واليوم نحن رضينا بالرائد فارس لما يملكه من خلق عالي ونتشرف برباط المصاهرة داعي الله عز وجل ان يبارك لهما هذا الرباط المقدس داعين لهم بالتوفيق والسعاده تعالت الصلوات المحمديه وتبادلوا السيد حسن وفارس الاحضان وبلش السيد يعقدلهم
4
——ياقوت—-
رفعت ماما شال المهر فوك راسي وغطت وجهي وحطت على اكتافي غترة الساده الخضرة انغمرت رجليه بماء الورد واوراق الورد انفتح القرأن بحضني وبلشت تحط الهيل بين اصابعي وهي تردد بصوت راجف متأثر والكل سكت يسمع
+
إلهي بالميامين هداتي من بني هاشم بخاتم النبين أخي الوحي ابي القاسم بمن صــــام بمن صلى بمن صدق بالخاتم من اثر بالقرص ثلاث وطوى صائم بمن ردت لهُ الشمسُ ببابل والملا عالم بحق البضعة الزهراء وهي ست النساء فاطم وبالمسموم والمقتول ظلماً فالعن الظالم وبالسجاد والباقر والصادق والكاظم وبالمدفون في طوسٍ علياً وابنه العالم بحق العسكريين مع المنتظر القائم اللهم بارك لهما وبارك عليهما واجمع بينهما بالخير اللهم صل على محمد وال محمد
3
صارت تفرك القند فوك راسي ويه بدأ العقد
رددن جميع النسوان صلوات واحنه نسمع صيغه العقد بابا وكيلي دموعي نزلت غصب عني واني اسمع المباركه
صدحت هلاهل النساء اجت ليالي شالت طاسه المي من تحت اقدامي ودفعت حذائي كدامي حتى البسه تهافت عليه التبريكات والاحضان من الكل واني احس روحي بعالم الطيف مو بالواقع معقوله اني هسه مرته وكل الخوف اللي عشته صار ماضي
اخذت ماما الهيل من بين اصابعي وحضنتني بعيون مدمعه صوت الهلاهل عالي لدرجه طرشني بيبي اسينات مغطيه وجهها بشيلتها وتبجي متأثرة
بلشت الملايه تقرة هوسات وكولات وزهراء ونورهان فقدن متگابلات يهزن
فچي كام يوجعني من كميه البوس والاحضان وكل النسوان من جهه فارس ماعرفهن يباركن ويصلن عالنبي بوجهي واني بالي مو وياهن اوزع ابتسامات وعقلي وبالي وفكري وكلبي يمه انتظر اشوفه اجتني ليالي تهمس بأذاني :- شويه يتأخر بالدخله امجد الخبل محضرله فرقه ولازم يسلم عالكل بعدها تحجي واسمع فرقه مزاهر بغداديه صوتها صدح جاي من برا فتحت عيوني لليالي
الي ضحكت وهمست :- الولد راح ينجلطون
+
توجهن البنات كلهن للمطبخ يباوعن من الشباك تجمهر جبير بالحوش واصل لشارع وباب الحوش الطلاكتين مفتوحه زهراء تصور همزين الجام مظلل جان اترزلنه اخذتني ليالي اصعد فوك البنات بالمطبخ يركصن على صوت الفرقه
+
صعدنه غسلت ايديه وطبينه غرفتي فتحت ليالي باب البلكونه وعافت البرده مسدوده كامت تضحك وجهتلي الكلام :- سمعي امجد وجماعه فارس متخبلين
+
وكفت بصفها اباوع والابتسامه شاكه حلكي من فرحتي احس كلبي راح يوكف
+
امجد بصوت عالي :- اسمعوني . اسمعوني
+
اليوم الخوة اوافيها واشد حزام ها وها وها
اخوي ولو وعليه ضاكت بعد ما انام ها وها وها
ولو ميت وحشمني اجيله عظام ها وهاوهاً
اعوف الدنيا والبيها اي اي
صبابه الخوة مصبوبه العضيد الزين بي حوبه
وروحي بساط اسويها للخوش زلام والكل يردد ورا
+
صوت الفرقه حماسي والكل يركص عدا فارس واكف بصف واحد لابس عسكري ورتبه جبيرة مبتسم وكل شويه يحط ايده على صدره وراسه علامه للامتنان
+
ليالي:- فارس لو تموتي ميركص خرب بيومك هاي لو اني هسه متمدده بنصهم ازاكط
2
همست بخجل مبتسمه:- لا احسن ما احب الرجال اليركص الثكل حلو
+
حضنتني بفرح:- ياربي اكرطكم اكرطكم يلا ننزل هسه يفوت وكفت كدام المرايه جددت حمرتي وعطري
رجعت ليالي الشال على راسي :- خلي هو ينزله عن راسج احلى
+
نزلت جوة البنات كلها تركص والملايه ماقصرت شعلت الجو كل شويه زهراء تجر بيه واني اخزر بيها وماما كل شويه تكرصها موتت روحها بالركص ولا مهتمه لرزايل ماما وتضحك الفطيرة
+
صاحت ام فارس :- عيني تغطن العريس راح يفوت..
+
كلبي وكع بالكاع مدري شصار بيه قشعرت رجفت وكلبي صار يدك بعنف وصوته ارتفع بأذاني مشاعري تبعثرت انفاسي اضطربت
الي لبست حجاب والي لبست صايه والي حطت عبايه على راسهه اشرت للليالي تجيني
+
ليالي:- ها توته
+
همستلها بتوتر:- لا يفوت عليج الله راح اموت لا يفوت
1
باوعتلي بصدمه:- انجبي شنو لا يفوت ولج
+
لزمت الشال بقوة على صدري:- بس خل ابدل عليج الله ولج اني ليش سمعت كلامجن الله يطيح حظي ماكدر ماكدر اطلع كدامه هيج مفرعه
+
ضحكت وفركت زندي :- لج توته شبيج صار رجلج حلال والله حلال
+
باوعتلها بتوسل:- ادري حلال بس بعدني مو متعودة ..
بعدني احجي وصدحت الهلال عرفته دخل وكفتني عدل حسيت روحي راح اتخربط
+
شفته يضحك وهو يدخل احد يدفعه من الباب اندار عليه وايده الشايله بوكيه الورد نزلها لجانبه ووكف بمكانه وصدره ارتفع وهبط وزفر من بين شفايفه نفس يعبر عن راحته
+
عيني تعلگت بعينه واثنينه رافضين نرمش ونخسر ثانيه كل الاصوات تلاشت والناس اختفوا ما جان اكو غيري اني ويا بالمكان احنه وحبنا واصوات گلوبنا الي تنبض بعنف وشريط علاقتي بي من اول يوم عرفته لحد هاي اللحظه مر كدامي ابتسم ابتسامه انتصار وهو يقترب مني قاطه بلونه الفاتح وقميصه الابيض بدون رباط رصعته الحافرة بخدة تهافتن عليه امه واخواته واقاربه يسلمن عليه ويباركن اله وهو عينه بعيني ما نزلها بعد كم خطوة عني مشتاقتله مشتاقه لكلشي بيه صوته ضحكته عيونه الي تباوعلي بهيام مررت لساني على شفتي ارطبها انتهى من سلامهن واتقدم سلم على ماما وصار مقابيلي اثنينه مانطقنه حرف مايحتاج ننطق حجينه كلشي بالعيون من توترة ترك الورد على ميز المهر الكدامنه وما انطاه الي ابتسمت وهو يمسح قطرات العرق المزينه جبينه اقترب مني وقبل جبيني قبله طويله وايديه صارت على راسي ينزل الشال ببطئ غمضت ودموعي هلت غصب ابتعد عني يباوعلي وعيونه تفتر على وجهي وشعري ماعرف منو تقدمت وطلعت شعري من جوا الشال من وراي
حط ايده على جانب شعري وخدي ورجع شفته على جبيني هامس
:- هسه ردت الروح الي يا روح الروح بالمبارك علويه گلبي المرمرتني
مرر ايده على طول شعري
+
هامس بنبره متخدرة :- نهر ذهب مو شعر
+
ابتسم وبسط ايديه اثنينهن كدامي يحثني احط ايدي بيده رفعت ايديه الترجف وحطيتهن بيده ومثل صعقه كهربائيه لسعتني حرارة ايده قبضهن بقوة هامس :- ما تحضنين رجلج علويه ؟وجرني من ايديه حطهن ورا ظهره تحت سترته وحضني بقوة خلاني اشهك بخجل لدرجه نسيت نفسي وغرست اظافري بظهرة
1
همسلي باذاني:- اي ولج هيج حضنيني حيل
ضعت بحضنه عطره تسرب لكل خليه بيه خدي على گلبه الي مسوي معركه داخل صدره حرارة جسمه ضد البرودة المحتلتني خلتني اذوب بين ايديه رفعت وجهي مبتعده عنه مبتسمه بفرح وگلبي يتراقص على انغام حبه
+
- فارس عيب الكل يباوع
+
ابتعد عني بس ما ترك اديه عاصرهن حيل بين ايديه نظراته تاكل بيه اكل يحير وين يباوع عيونه ذايبه بحب جبير
+
فارس:- مرتي يابشر مرتي و مالتي محد اله شي عندي.
+
كعدنه اثنينه واني متمسكه بالشال اخاف يفلت اجتي نورهان تتشاورني
+
نورهان:- ياقوت وخري الشال حتى تلبسون حلقات خما تظلين هيج حتى الصور تطلع حلوة
+
باوعتلها بيأس :- بشرفج عوفيني هسه انجلط
+
ضحكت على توتري:- بس اول ثواني تستحين وراهه عادي يلا حبابه
باوعت لفارس امه بصفه تتهامس ويا وشابك ايدي بيده عاصرها وايدي الثانيه لازمه بيها الشال على صدري استغليت انشغاله بالحديث ويه امه وصبيت تركيزي ويه صوت الملايه والدفوف حتى ما اركز شجعت روحي وهديت ايدي عن الشال ونورهان ما صدكت اخذته مني قشعر جسمي وموجهه انظاري ليكدام لو اباوع صفح ماريد اباوعله
عدل كعدته واندارلي فتح عينه مبهوت ورفع حواجبه على فستاني المكشوف اقترب يهمس بأذاني وكتفي طاخ بنص صدره:- اشتعلو عدوينج علويه وين انطي وجهي هسه ولج شني هذا الظيم بهداي عليي
تخربطت اوضاعه وكل شويه يمسح كصته بالكلينكس
1
اشرتله بعيوني حتى يقترب مني حنى راسه يمي شاورته باكثر كلمه يتمنى يسمعها مني:- احبك
2
رفع راسه باوعلي بعيون لامعه وجهه حيل قريب من وجهي وانفاسه الحارة ومضطربه تلفحني :- يا ويل كلبي وانه اموتن بيج وعليج عيديها كوليها بعد اريد اشبع منها
+
ضحكت بغنج:- تؤ مرة وحدة كافي لا تصير طماع
+
عينه على شفايفي ونسه روحه راد يقترب اكثر فتحت عيني مرجعه روحي ليورا نهارته:- فاارس يمعود شبيك النسوان
1
ضحك باحراج معدل كعدته :- اذا ما اطلع منا باقرب فرصه اسويلي مكسورة كدام النساوين
2
وكفنه اثنينه وامه طلعت الحلقات انطته حلقتي لزم ايدي ودس الحلقه باصبعي ورفعها لشفايفه باس اصابيعي واحد ورا الثاني
وكلبي يريد ينفجر بفرح چنا بعالمنا فاصلين عن الحوالينا ولا يمهم
اخذت حلقته بأيد ترجف ولبستهه اله
+
فارس:- مبروك يا تعب سنيني الجنيته
+
نصيت راسي بخجل لزمني من حنجي ورفع راسي ولثم كصتي مرة اخرى شاورني:- وعدت ووفيت مقصر بشي علويتي ؟
+
هزيت راسي:- كد الوعد حبيبي
+
ضحك بغبطه:- اشتعل جد حبيبج خل اطلع لا اسويلي كارثه
5
وقبل لا يطلع لثم كصتي للمرة المليون وشاورني:- لازم اطلع الزلم برا ينتظرون يردون يروحون انتظريني ارجعلج ولا تغيرين هذا الضيم الي لابسته ابقي بي
عينه صارت عالورد وعض شفته ضاحك :- سطرتيني سطر شال الورد وحطه بين ايدي
+
فارس:- الجوري الاحمر يطفى يمك يا ضواي
+
ابتعد يطلع وعينه عليه طلع وسد الباب وراه واني رجعت للواقع صرت اسمع الهوسات والاغاني والهلاهل كأني كنت فاقده حواسي وهسه رجعتلي حطيت ايدي على خدي مشتعل حضنت الورد عبالك راح يطير والبنات ما صدكن فارس طلع ذبن العبي وكلهن يركصن
+
والملايه تردد
حرز للبيت جبنالك العلويه والبنات يرددن وراهه جرتني نورهان بالنص وياهن تمايلت بدون مبالغه الكل نظره عليه وهالشي يوترني والبوكيه بين ايديه على بطني حجمه كبير بس متمسكه بي عاجبني وماريد اذبه من ايدي
ماريد هذا اليوم يخلص ماريد هاي اللحظات تنتهي وماريده يتبعد اريده يرجع يمي
بعد مرور وقت بلشوا المعازيم يروحون من الجهتين بقو بس امه وخواته وام ليالي وغفران بيت عمي ابو حر وبيبي اسينات
+
اجت زهراء :- هاج شالج بابا والولد يردون يشوفوج لفيت الشال على رقبتي وانفتح باب الصاله فاتو بابا واخوتي كلهم حسيت بخجل ومشاعر جمه داهمتني ارتميت بحضن بابا الي مسد على شعري
+
سيد حسن بتأثر:- بالمبارك ياقوته ابوها وعزيزته الله يسعدج بابا
+
كل اخواني باركولي وعيونهم تلمع بدموع ممزوجه بين الفرح والزعل وكرار واكف بباب الصاله والحزن معتلي ملامحه اقتربت منه وحضنته بقوة وهو بادلني يبوس براسي
+
صوته يرجف :- مبروك يا شريكتي بالروح بالمبارك يبعد چلاي
+
نزلت دموعي على صدره بصمت طبطب على ظهري وابتعد عني وطلع من البيت بعده متأثر
+
سيد حسن:- جم يوم ويتعود لا تضوجين من اخوج مايكدر ينطيج
+
هزيت راسي:- ازعل من الدنيا وما ازعل منه ادري بي من غلاتي عنده زعلان
+
رجعو دخلو الصاله وسدو الباب اجت زهراء شايطه من المطبخ وكعدت محتقنه مدري شبيها ورا شويه راحو بيت عمي ابو حر
ونزلت غفران هي وليالي من غرفتها :- يلا ماما اجه امجد يرجعنه كامت بيبته وام ليالي وام فارس وريم اخته الي انتبهت الهه ما اقتربت مني ولا باركتلي سلمو وطلعو ونورهان بقت حسب طلب فارس
+
هبن البنات ينظفن ونورهان حبت تساعدهن صعدت غرفتي افتر بيها بسعاده واشم بالورد رميت نفسي على سريري واني استذكر كل لحظه النه سوة جوة رفعت ايدي كدامي اباوع لحلقتي التلمع وبستها اهمس صرت مرته اني مرته لفارس
اتصل عليه فتحت الخط طلب مني بلهفة :- كولي احبك
+
- احبك.
+
فارس:- بعد
+
- احبك
+
تنهد:- احوي يا عشكي انه بالباب
+
تحمست وكمت طلعت للبلكونه :- وينك؟
+
رفع راسه يباوعلي وفتح عينه بغضب :- طبي جوة ولج طبي مفرعه يا غضب تطشر عرضي
3
شهكت اباوع لروحي وتراجعت ليوراة وعثرت ووكعت كعده ليورا :- مو قصدي والله مو قصدي نسيت نسيت
+
همس:- صدك تحجين شلون تطلعين هيج ؟
+
اختنكت ردت ابچي:- نسيت والله نسيت
+
- هذا الباب تقفلي لا فديوم الكاج منشورة عالفيس وتصيبني جلطه
يلا نزلي ارد اشوفج
+
سديته والدمعه بعيني اتخيل احد شافني بهالمنظر شجاني واستخفيت نسيت روحي .
+
نزلت جوة لا ابوي ولا اخواني سألت زهراء وينهم
+
ضحكت:- فارس افندي طلب يكعد وياج وهم وجوهم صارت تنطي الوان وكلهم طفرو من البيت وبابا ختل بالغرفه غمزت يلا بعد احسن طلعو.
دفعتني لباب الصاله فتحت الباب لكيت فارس كاعد نازع سترته حاطها على يده التخم وبصفه نورهان الي بس شافتني كامت والضحكه شاركه حلكها غمزتلي وطلعت وسدت الباب ظليت واكفه يم الباب ارجف باوعلي بخبث مصغر عيونه واشرلي بأثنين ايديه هامس؛- تعالي
1
هزيت راسي رافضه:- ما خليني هنا
+
عض شفته بتلاعب؛- تعالي ولج ترا اجيج..
+
قوست شفتي بعبوس والله اخاف اتقرب منه احسه مو امان .
+
ابتسم هامس:- تعالي ولج حضني يريدج يالبخيله رجلج انه
+
الم لذيذ اصاب معدتي ويه اخر كلمه منه واقتربت وعيونه ملتهبه تنتقل لكل شبر بيه عبالك اول مرة يشوفني وكف من صرت قريبه عليه وجرني لحضنه يمسد بخصل شعري على طوله ويضغطني على صدره بقوة حسيت نفسي انقطع حاوطت خصره وبادلته الحضن تمنيت الوكت يوكف ونظل هيج طول العمر همس وهو يبوس قمه راسي :- ما قصرت يبو الحسنين
+
بعدني عنه وجر الشال مني وشمرة وايدي ارتفعت لا ارادي اغطي روحي
+
لزم ادي يبعدها رفعها وفرني حوالين نفسي بلع ريكه ببطيء :- وين ضامه كل هالضمايم عني ربي صبرني للعرس
+
تراجع يكعد ولزمني من خصري بقوة وجذبني كعدني على رجله واني مثل دميه بيده مرر ايده على طول ظهري وعامودي الفقري ينزلها ببطيء قشعرني لزمتها قبل لا يتمادى اكثر بعدتها عني باوعتله بترجي :- كافي عفيه
+
حسيته مو بوعيه وملامحه متخدرة صرت اتنفس بالكوة وصدري ينزل ويصعد بعنف ردت اكوم من حضنه ثبتني اكثر هامس:- اششش ابقي بحضني هذا مكانج منا وهيج
+
اقترب وباسني من رمانه كتفي خلاني انتفض ابتعد عنه :- فارس كافي
الله يخليك خل استوعب بالاول
+
جرني من ايدي كعدني بصفه :- عذريني دايخ سنين احلم بهاليوم
+
مسح وجهه كمحاوله حتى يصحي روحه شبك ايدي بيده وباسها حطيت راسي على كتفه وهو حاوط خصري يقربني اكثر اله اثنينه ساكتين
بقينا هيج ماعرف شكد سمعت صوت التقاط صورة رفعت راسي اباوعله ابتسم يشوفني الصورة مبتسم للكاميرا واني راسي على كتفه حاضنه ذراعه مو منتبهه
همست:- دزلياهه اشر على عيونه بمعنى من عيوني
+
ظلينا نباوع بعيون بعض رفع ايده وببطئ شديد مررها على وجهي يرسم ملامحي بأبهامه :- حلم عمري الصار صدك انتي قدري الغيرت القدر علمودها
+
سألته بدلال:- تحبني فارس؟
+
ابتسامه رقيقه اعتلت ملامحه وعيونه فاضت بكلام فهمته قبل لا ينطق لسانه:- احس كلمه احبج نقطه ببحر الاحسنه الج تسأليني تحبني وانه الي سنين مزاعل النوم متلوع عليج . تسأليني وانه بكل مرة تصديني ارجع اجيج اشحذ حبج واحبج اكثر
تمشين بالدم تنزلين وتصعدين ويه النفس بدونج اموت
انه ماكو بدون حبج
+
مخيط اخياط ويه روحي شلون اهدك؟(عريان)
+
ابتسمت على البيت الشعري الي القاه وهلمرة اني ذبيت روحي بحضنه وحضنته بقوة:- احبك
3
شم شعري هامس بذوبان:- افيش يا نسمه هوة وجايه من الجنه وانه عابر الحب وياج انه عاشك علويتي
+
ابتعدت عنه مبتسمه وهو يرتب بشعري ورا اذاني
:- حضري روحج نروح نزور بس اخذ نورهان نروح نبدل واجيج
+
- هسه؟
+
هزلي راسه بأيجاب:- عندي نذر ما يمر عليه ليل اذا ما اخذج للامير
+
- بابا والولد؟
+
- كلتله لسيد حسن حيدر وليالي ونورهان ويانه .
+
وكفنه اثنينه مقابيل بعض ودس ايده بشعري يمشطه باصابعه عيونه جريئه فاضحه الي بباله بس تصرف بتعقل وياي وما اتجرأ اكثر واحتوى شخصيتي الخجوله
ابتسم هامس:- نصبر بويه نصبر صبرت كل هاي السنين ما اصبرلي بعد شوي روحي يلا وخلي نورهان تطلعلي
اجيت ابتعد سحبني اكثر اله وباس خدي بعمق :- ماينشبع منج عطشان وانتي زمزم
+
دوخني بكلامه وحركاته ابتعدت عنه امشي للباب صاحني:-وين ؟
+
انداريت رافعه حواجبي بأستفهام التقط شالي المشمور باهمال عالتخم واقترب منه يلفه على اكتافي :- حلالي ولج طشرتي تطشر اليوم
+
ابتسمت محرجه:- هو انت خليت عقل براسي دوختني ؟
+
باس خدي:- لا دخيل بختج ركزي وضمي الي يخصني بس لعيوني علويه الله لا يشوفج غيرتي خليها هاجدة فارس قبل اليوم انسي من اليوم انه امتلك حتى انفاسج كلشي بيج الي دارني يدفعني للباب الداخلي
:-روحي ياغضب ورانه زياره
قهقهت بخفوت امشي بسرعه
فارس:- يا حبيبي اكلنا هوا
+
طلعت بدون ما اجاوبه وصحت نورهان ودعتني وبابا طلع لفارس للباب وراحو صعدت لغرفتي وزهراء اجت وراي :- من هسه رجلي على رجلكم
+
ضحكت امسح مكياجي كدام المرايه:- اصلا مستحيل اروح وانتي مو وياي
+
زهراء:- اي عفيه خل اشوف نسيبي احجي ويا اوصي
+
حذرتها:- زهراء لسانج مو يصير فالتو دخيلج هذا مو حر مو تنسين
+
كشرت :- انتي شبيج كل سالفه والثانيه ولزكتي هذا الثور بسالفه ترا توني من شوي متمالخه ويا رادت تصير من الروس بينا
+
باوعتلها بحيرة شلون بيهم ذوله الاثنين وين راح تصفى بيهم :- البزون يحب خناكه انتي تندكين بي عوفي اختي
+
باوعت ناحيه الشباك بضياع:- اذا ما اخلي يتوسل بيه اني مو زهراء اذا ما اندمه عالسواه واضيعه الا اهججه من العراق مرة ثانيه
+
اقتربت منها لزمتها من اكتافهه:- صدكيني محد يخسر غيرج راح تأذين نفسج ولج اتركي سوالف الانتقام الدتسوي حرام.
+
غوركت عيونها:- ماكدر انسى اذيته مابقه شي لدوام شلون احط عيني بعين حمزة بعد الصار
+
- دكتور حمزة مايدرس مرحله ثالثه.
+
نترت ودموعها نزلت:- يعني مراح اشوفه بالقسم ؟ ليش تضحكين على روحج وعليه ياقوت تعرفين زين راح اشوفه ويشوفني ولج حر دمرني دمرني تردين اعوفه ولا كأن مسوي شي لا فدنوب كولي اتزوجيه
+
حضنتها حيل:- كافي لا تحركين كلبي عليج .
+
ابتعدت تمسح وجهها وتضحك:- يلا خل اروح اتحضر طالعين ويه النسيب
طلعت من الغرفه واني فتحت كنتوري طلعت فستان ابيض وعبايه راس الحرير البيضه الي خيطتها الي ماما اطرافها كلها بيها شغل يجنن رتبتهن على السرير
دخلت ماما عليه وبعيونها نظره غريبه حسيتها مزعوجه
+
-خير ماما محتاجه شي؟
كعدت على الكرسي واشرتلي اكعد مقابيلها عكدت حواجبي مستغربه وسويت مثلما تريد
+
علويه نهله:- ياقوت انتي بينج وبين فارس شي ؟
1
بلعت ريكي وابتسمت بتوتر:- غير خطيبي ماما.
+
هزت راسهه:- لا قبل اليوم بينج وبينه شي؟
+
ارتبكت لسؤالها:- ليش هالسؤال؟
+
باوعت بعيني تدرسني واسترسلت:- لهفته ضحكته وجرائته مال واحد يحب ومنتظر من زمان يحضن بيج كدام النسوان ولا چن احد موجود وانتي عيونج فاضحتج وما مستغربه قربه علويه ياقوت عندج علاقه بي؟
+
ارتجفت اوصالي لهلدرجه چنة مفضوحين :- ماما اني .
قاطعتني :- لا تكذبين عليه انتي ما تعرفين تكذبين عدل
كمت اقتربت منها وكعدت بالكاع كدامها ولزمت ايديها:- ماما والله والله ماصار شي يغضب رب العالمين بينا والله
باوعتلي متفاجئه :- اتوقعها من زهراء مو منج .
+
دمعت عيوني :- والله ماما مو مثل ما مفكرة والله والله سنين اكتم بگلبي واجاهد مشاعري حتى ارضيكم بس القدر خلاه بطريقي اكثر من مرة
+
علويه نهله:- من شوكت؟
+
باوعتلها مستفهمه:- من شوكت شنو ؟
+
علويه نهله:- من شوكت تحبي وعندج علاقه بي
+
باوعتلها مستصعبه اجاوبها
حثتني بهدوء رغم اعرفها خلف هدوئها غضب :- احجي لا تخافين بعد صرتي مرته .
+
همست منزله راسي:- من وكت كسرة ايدي.
لطمت خدها شاهكه:- كل هذا الوكت ولج كل هذا الوكت فتحت عينها ولج جنتي تحاحي وانتي على ذمه رجال
+
هزيت راسي بعنف:- لا لا والله لا ماما انتي متعرفين بنتج والله ما حاجيته بس احبه ويحبني ابتعدت والله وتركت حتى الدوام ابد ما لمحني
+
هدأت شي :- ولج ماجاي اعرفج شنو من جرائه .
+
- خليني احجيلج كلشي بس لا تباوعين هيج الله يخليج مستحيل اسوي شي ينزل راسكم
+
زمت شفايفهه محتقنه:- احجي.
+
- بيوم الي مني وبيه اذاني هو وكف بوجهه ودافع عني بأستماته حبني من بعيد بدون ما يأذيني ما اتجاوز حده وياي ورفضته والله رفضته اكثر من مرة رغم مابي شي ينرفض ردت رضاكم ودست كلبي سكتت مشاعري والله مو بيدي ماما من حبيته مو بيدي ومن . من انخطبت لسيف صنته رغم كرهي اله كعدت بالبيت وخسرت سنه من دراستي حتى ما اضعف واوكع بالغلط
+
غمضت عينها هامسه
علويه نهله:- علمود هيج تمرضتي؟
+
مجاوبتهه ماكدر احجيلها عن الابتزاز الي جنت اتعرض اله بلعت غصه جرحت زردومي :- شسوي اذا القدر رجعني لطريقه رفعت ايديها ابوسهن
ماما والله يحبني وماغلط وياي بحرف ما شايف مني شعره قبل اليوم ولا سامع مني كلمه غلط وسعى حتى اكون ويا بالحلال اني تربيتج ماسوي شي حرام
+
كامت وكفت تباوعلي جرتني لحضنها :- ولج اخاف عليج وما اتخيلج تغلطين غروري وشوفه نفسي بيج انتي
+
بعدتني عنها واردفت:- مسحي دموعج كافي انتي عروس بس ردت اعرف حسيتج مستغفلتني وماعرفج تفاجئت بي واسلوبه النسوان كلها صافنه على جرائته ضربتني على زندي :- گليله خل يثكل شهرنا شهيرة
الماحجت بلسانهه حجت بعيونها من النسوان حتى امه ماعجبهه الصار عيب بنتي اني غير ماعندي ميانه ويا جان رزلته
بعد انتي حاجي مو يتسوفل كدام اخوتج بلكوة كاضين رواحهم هجو من البيت من كعد وياج
+
- صار هاهيه غلطه ما تتكرر
+
فاتت زهراء تنشف شعرها:- يمه عوفي النسيب رجاءا ما اقبل على نسيبي
+
باوعت ماما حواليها تريد شي تركع زهراء بي شالت المشط من الميز تواليت شمرته عليها:- ولج كم مرة كايلتلج بطلي عاده التسمع عالبيبان انتي منو مربيج حشى اذا انتي تربيتي .
+
زهراء:- رحم الله والديج علويه عالمشط اختصرتي عليه وكامت تمشط وتضحك
هزت ماما راسهه بيأس ضامه ابتسامتها وطلعت من الغرفه
+
باوعت لزهراء:- سمعتي ؟
+
زهراء:- اي. هو نوعا ما حقها فارس بس شويه ويمطلج بنص النسوان اتحمس سودة عليه كل شويه يبوس عبالك البوس اول طيحته
+
- اشش دخيل الله انتي ليش ماعندج ستوب
+
اجت فتحت سحاب فستاني:- طالعه على نسيبي ماعندة ستوب يلا طبي سبحي وبدلي راح يجون وحيدر اجه اصلا جوة
+
سبحت بسرعه وحضرت نفسي ونزلت شايله العبايه بيدي وادك على كرار
اسمع صوت تليفونه من الصاله ولمحت نورهان بالمطبخ الظاهر جايين هي وفارس وامي وليالي وزهراء يحضرن عشه
+
نورهان:- شهالجمال عيوني مرت اخوي
+
بوستها :- جمال عيونج ام عيون حلوة.
+
باوعتلي ليالي:- طلعي من المطبخ لا هدومج تاخذ ريحه طبخ اليوم عروس ما نكرب عليج نتعشه ونطلع عمو ماقبل نطلع هيج وكت بدون عشه
+
اخذت نورهان نصعد لغرفتي
نورهان:- راح اشتغل يمكم بالمكتب
+
باوعتلها فرحانه:-كذاااابه .
+
نورهان:- بلي والله فارس الا صارت خطوبتكم يلا قبل وباسم مطنكر بس فارس رزله بادب كاله متفق وياك اختي تشتغل لحدما تتعين
استاذ محمد هواي ساعدني والله افضاله هواي ويه حجايتهه صارت هاجر بوجهنه براس الدرج
+
عكدت حواجبها تباوع لنورهان بطرف عينها:- شبي محمد.
+
جاوبتهه:- مبي شي بس راح تشتغل نورهان ويانه بالمكتب
+
همست وهي تعبرنه:- بسم الله توهم اول يوم بقه بس يعيشون يمنه
+
دخنت من الفشله :- نورهان بشرفج معليج بيها مريضه نفسيا
+
نورهان:- ولا يهمج يمعودة ترا ماناسيه هي اخت سيف اكيد مراح تحبنه
+
كملو عشه وشربو چاي بسرعه دك عليه فارس جاوبته
+
فارس:- وينها مرتي عني صار ساعه ماتكول رجلي كاعد جوة اطب اسلم عليه
+
ضحكت :- غير ضحكتك واصله راس الفرع ويه الولد اني بيش كيلو
+
قهقه بخفوت:- افا انت الكل بالكل يا بعدهم كلهم
يلا تحضري نطلع راح تصيّر بالعشره وراي دوام الصبح يادوب نروح ونرجع
+
- كرار وين ترا مزاعلني من وراك
+
فارس:- شتردين منه كاعد يسولف جوة عوفي
+
هتفت منزعجه:- ماااا شنو عوفي اريد اخوي ماطلع اذا ما اراضي
+
فارس:- انه شلون ويه اخوج انوب طلعلي صفح كلهم بجفه وسيد كرار بچفه
+
- طبعا هذا كروري
+
عيب عليه يقلد:- طبعا هذا كروري مو افركه لحلكج روحي يلا روحي
+
سديته اضحك من هسه واضح هو وكرار واحد يغار من الثاني دخل كرار من باب الصاله ورحت عليه ابوس واحضن بي يلا فك شويه
عافني وطفر للدرج:- خل اروح لا ياخذج ويا كدامي لزيارة گلبي يوكف والحسين
+
ضحكت وطلعنه للباب اني والبنات فارس وحيدر واكفين يم سياره فارس يسولفون ومحمد يتمشى عنهم مسافه ويحجي بالتليفون كعادته احس محمد حتى وهو نايم يترافع بالمحكمة باحلامه
سد المكالمه من شافنه واقترب من فارس وحيدر واحنه يم الباب واكفات مثل الهبلات فارس منطينه ظهره اباوع لظهره وطوله واكول بگلبي هذا حبيبي هذا الرجال مالتي وكدام اهلي واكفه قريب منه بدون ما اخاف
1
استأذن محمد واقترب يدخل سلم على نورهان بسرعه ودخل
والولد اندارو علينه ابتسم فارس يباوع لملابسي لابسه ابيض حتى عباتي بيضه مطرزة بفضي عالحاشيه حسيت روحي بطل حليب بس بعد سوالف ماما ولا تبطلهن
+
همست لزهراء:- بله بشرفج علويه نهله شوكت تبطل سوالفها جني ثلاجه بهالابيض مو لبست ابيض بالعقد هسه هم الا ابيض
+
ضحكت مغطيه حلكها:- والقران حلو امداج خليتيها براسي كلما اباوعلج اضحك
+
خزرنه حيدر:- شعدجن واكفات بالباب لو تطبن لو تصعدن
+
وفارس يتسوفل يغمزلي بتلاعب توجهنه اني وزهراء وليالي لسياره حيدر
+
صاح فارس:- وين علويه وين ؟
+
ارتبكت وكفت بمكاني اباوع لحيدر عيونه بكصته انداريت على فارس فاتحه عيوني حيل احذرة ورجعت انداريت لحيدر احس وجهي كام ينطي الوان
+
اباوع ليالي اقتربت من حيدر:- خلي تصعد ويا
رفعلها حواجبه ماعجبه الكلام
ليالي:- شكو تباوع هيج ترا مرته صارت خلي يسولف وياهه ترا سياره وبشارع شراح يسوي
+
حيدر بتحذير:- ليالي!!!
+
شاورته وجهه صار احمر وبلكوة سيطر على ابتسامته يخفيها :- اشرلي من ورا خشمه روحي قبل لا يطكن كروني
+
ظليت واكفه يربي شهالاحراج صاحت ليالي نورهان:- نورهان تعاي ويانه انتي وزهراء سوة تسولفن
+
خزرها حيدر يعض بشفته بتوعد وهي تشاور بي مدري شتگله ويسكت صار عندي فضول اعرف شلازمه عليه وقنع هيج بسرعه
+
احس رجليه بادن واني اقترب منه حط ايده على ظهري يدفعني بخفه يفرني لجهه الثانيه فتح الباب وصعدت سده واشر لحيدر وصعد حرك السياره لزكت روحي بالباب مستغربه الوضع كله وكلبي يدك
+
باوعلي وضحك هاز راسه:- لا ربحت يفارس . شبيج بويه لازكه بالباب
+
- شبيه عادي كاعده شمسويه؟
+
ضحك اكثر
فارس:- افتحلچ الجامه تكمزين منها ؟ حتى المخطوفه مو مثلج
+
بوزت بوجهه :- شتريد اكعد بحضنك .شهكت لاطمه حلكي هاي شبيه اليوم شكد جفصت
+
ضحك وعض شفته بخبث:- دتعاي تسوين فضل ؟
+
درت وجهي عنه ماريده يشوف ضحكتي مد ايده وجر ايدي من حضني وشبكهن سوة ورفع ايدي لشفته باسهه وعينه عالطريق
ساكت وشكله يفكر يمكن مثلي ما مستوعب وضعنه الحالي غمضت عيني براحه وايدي بيده ورجعت راسي ليورة ظلمه بس ضوة الشارع خفيف يشرك علينه والتبريد بوجهي حسيت روحي نعست واني صارلي يومين ما نايمه مدري شكد مر وقت وغفيت
+
حسيت على صوت مو غريب يصيح اسمي فتحت عيني بنعاس وشفته كدامي مبتسم ابتسامته الحقيرة فزيت اباوع حوالين نفسي بعدني بسياره فارس بس طابكين ببانزين خانه وفارس ماكو
+
سيف بخبث:- صح النوم علويه ....
28
✨✨✨✨✨✨✨✨✨✨✨✨✨✨✨✨✨✨
7
بارت طويل يستحق تتفاعلون وتصوتون لان تصويتكم وتفاعلكم دمر نفسيتي
+
نلتقي البارت الجاي الاحد اذا التفاعل صعد يجوز انزل قبل الاحد
+
