رواية قانون القلب اقوي الفصل الرابع عشر 14 بقلم رسل احمد
— ليالي—
الخسارة شي موجع ومؤلم كيف اذا كانت خساره روح انوجدت بداخلي روح انشطرت مني ومن احب الناس لگلبي جنيني الي ماشاف النور ولا عرف شنو الحياة راح مني وماكدرت احافظ عليه طريق المستشفى كان حلم بالنسبه الي وطعنات الالم الي بدت تستفحل باحشائي ونزفي الحاد خلتني اعرف اني خسرته بس بداخلي انكر واكول هسه الدكتورة تسمعني نبض بالسونار وتطمني وكل هاي المخاوف تتبدد وبين الوعي واللاوعي حسيت بالجل البارد ينوضع على بطني الي توهه بلشت تكبر وافرح بيها نتوء صغير لكن فرحتي بي جانت كبيرة غابت روحي رافضه اسمع كلام الدكتورة وحسيت على مناديل تمسح بطني باوعت بوهن لخاله الي جانت ماخذة هذة المهمه مسحت بطني ورفعت الغطه عليه باوعتلها بعيون متوسعه ودرت راسي لدكتورة
همست بوهن:- عايش؟
هزت الدكتورة راسهه بأسف وقلعت نظارتهه :- الله يعوضج امي ماكو نبض
صرخاتي طلعت بدون وعي :- لااا لااااااا لاااااااا
ليش ديصير هيج بنص الطريق بارحه اخذت سونار وفرحانه بجنين ذكر صحته ممتازة بعدني حتى مكايله لحيدر ردت اكله بطريقه مميزة ورا الخطوبه من انزرع ببطني واني يوميه اتخيل شكله وريحته واتخيله يشبه حيدر وعنده نفس لون عيونه كمت من مكاني احس الغرفه ضاگت بيه وتخنكني وكرفات الم تطحن بيه ملابسي متلطخه بدم وليدي الماشفته حاولت خاله تلزمني بس اني اريد حيدر وينه عني فتحت الباب ونهض من مكانه عيونه دم مبين باچي اقترب مني وحضني كل قوته ماكدرت ارفع ايدي وابادله واني الالم اخذ حتى انفاسي مو بس حيلي
همست وراسي على كتفه:- تعبانه لمني بحضنك
رجليه رجفن وحيلي باد تهاويت وهو نزل وياي للكاع لامني بحضنه حمويني وعمو كلهم ابتعدوا ينطونه مساحه وعلامات الاسف والشفقه تعتلي وجوههم
اقتربت ياقوت من عدنه ودموعها تجري انحنت علينه تهمس:- ليالي حبيبتي اهم شي سلامتج ربي يعوضج طير بالجنه كومي جاي تنزفين لازم يعالجوج
طلعت الدكتورة باوعتلي بشفقه:- لازم تدخل عمليات نسويلها كورتاج نزفها حاد والانتظار مو لصالحها رحمها يتضرر الطفل كبير بالمرحله الثانيه من الحمل ولازم بنج عام
مسد حيدر وجهي وحزنه مايقل عني:- كومي حبيبي يلا مو زين عليج يتعوض كلشي يتعوض اهم شي انتي بخير
نهض يوكفني واني احس بالنزف قضى عليه حطيت ايدي على بطني والدوخه سيطرت عليه سندني واخذوني لغرفه يحضروني رادت خاله تدخل تنزعني ملابسي وتلبسني رداء العمليات حيدر رفض
بجمله ( اني سترها وغطاها محد يتورج عليها غيري)
دخل وياي زاح حجابي ولم شعري يخلع عني قطع ملابسي وهو يردد بصوت راجف بنغمه بكاء دافنها بصدره
اللهم اجعل جنيننا هذا علَماً لنا إلى الجنة، وشفيعًا لنا يوم نلقى وجهك،
اللهم اجعله في ودائع محمد وآل محمد، وتحت كفالة جده أمير المؤمنين، وأمه الزهراء، وأجداده الأئمة الطاهرين، صلواتك عليهم أجمعين.
اللهم اجعل مصيبتنا هذه كفّارةً لذنوبنا، ورفعةً لدرجاتنا،
اللهم عوضنا من عندك ذريةً طيبةً مباركةً، تكون من محبي محمد وآل محمد، وسائرين على نهجهم، بحق محمد وآل محمد.
وإنا لله وإنا إليه راجعون، رضينا بما قسمت، وسلمنا لأمرك، واحتسبنا ما أخذت عندك، يا أرحم الراحمين
شهكه خرجت منه بعد ما اكمل الدعاء ومسح عيونه المدمعه واخذ وجهي بين ايديه قبل جبيني قبلات متتاليه:- ليش ساكته ليالي احجي شي
غمضت حيل ماعرف شكول القهر رابط لساني اذا افتح حلكي انهار بالبچي
اخذوني لغرفه العمليات وعيي مو كامل ماتذكر حتى شوكت خدروني ورحت بعالم ظلام
—- ياقوت—-
واكفين بالممر نتنظر ليالي تطلع من العمليات اباوع لحيدر ملامحه مدفونه بحزن ووجهه مغيم ولسانه يتحرك بصمت وهو يدعي لمحبوبته
كلشي صار بسرعه والكل مصدوم الولد طلعو برا المستشفى ينتظرون ماما وزهراء راحن ينتظرن بالغرفه الي راح تبات بيها ليالي اقتربت منه وجلست جانبه وحضنته اشاركه حزنه اهمس باذانه:- الله يعوضكم حبيبي الي انطا الكم يعوضكم ميعوفكم هيج مكسورين گلب
هز راسه ورمى ثقله على كتفي هامس:- الحمدلله على كل حال بس خايف عليها وضعها قبل لا تدخل ما يطمن صافنه وما حجت شي
- حقها حيدر شكد انت هسه مقهور هي اضعاف هي الي شايلته باحشائها وتحس بوجودة
كعدنه غارقين بالانتظار واجوي اهل ليالي كلهم يركضون امها واختها واخوانها
الخوف معتلي ملامح امها وكفت استقبلها ولزمت ايديها وسالتني بصوت راجف:- شصار شبيها العصر عفتها مثل الورد
- وكعت من الدرج خاله وصار الي صار العوض بسلامتها ان شاءالله.
نشغت بقهر وكعدت بصف حيدر وطبطبت على كتفه حضنتني غفران حيل
واخوانها سلمو على حيدر وكعدو بصمت
ماطولت نص ساعه وخرجت النه احد الممرضات نهض حيدر والخوف متملكه
- شلون صارت خلصت العمليه
الممرضه:- تحتاج دم النزف مجاي يتوقف
انسحب اللون من وجه حيدر وصار يفتر حوالين نفسه دزيت رساله لكرار حتى يجون
لزمته من ذراعه :- هسه نتبرع الها وتكون بخير على كيفك حيدر راح توكع من طولك
انداريت للممرضه:- شنو فصيله دمها
جاوبني حيدر قبل الممرضه B موجب وبعد التحقق من كل فصائل دمنه اني وكرار نكدر ننطيها لان فصيله دمنه O موجب
رحنا تبرعنا اثنينه لان احتاجت بطلين اجاني حيدر حضني حيل وباس راسي عيونه مدمعه
- افديج بروحي يبعد اخوج مانحرم طيبه گلبج
بادلته الحضن اطبطب على ظهره:- شلون كلام ليالي اختي انطيها روحي مرت الغالي هاي .
حسيت بدوخه نتيجه التبرع جابولي عصير واكل وظليت كاعدة تأخروا هوايه وهي عمليه كورتاج مفروض متطول هوايه والخوف بلش يتسلل لگلوب الكل
طلعت الدكتورة تبشرنا وليالي بالافاقه بعدنا ماشفناهه..
بعد ساعه تقريبا طلعوها للغرفه تون بدون كلام ودموعها تجري وبعدها دايخه ومابيها حيل اجت الممرضه شالت المغذي الخلصان وحطتلها جديد وراحت وحيدر كاعد يمها لازم ايدها ماتركها
الكل جان حزين على روح مالحكت تشوف الحياة وليالي انهارت مو نفسها ليالي الي تضحك وتفتر بالبيت صارلها اسبوع ماطلعت من غرفتها وحتى لبيت اهلها مقبلت تروح ترتاح وحيدر حاير بيها عايشه حاله حداد صامت ونفسيتها يوم عن يوم تتراجع
تنهدت بأسى عليها واني اركن سيارتي صعدت للمكتب وشغلت نفسي دك تليفوني من تحت الاوراق والملفات الي كدامي بحثت عنه بينهن والتقطته شفتها نورهان
- يابه اليوم ست نورهان ذاكرتنه.
نورهان بضحكه:- انجبي انتي الي ناسيتنه ووقتج كله لذاك الرجال
ابتسمت وخدودي وردت لطاريه:-شلونج شنو الاخبار
نورهان:- زينه الحمدلله اكلج انتي بالمكتب ؟
- اي بالمكتب محتاجه شي؟
نورهان:- اني قريبه جنت يم استاذ عمار مقابله شغل بس الوضع معجبني وطلعت
- دتعاي انتظرج
نورهان:- يلا جايه دقايق..
نهيت المكالمه وكمت لميت الملفات الكدامي دخل محمد عصبي وشمر جنطه لابتوبه بعصبيه عالتخم الموجود وكعد مورث
- شنو محمد خيرك؟
- تذكرين سالفه منصور؟
هزيت راسي بأيجاب:- شبي؟
-يريد يشمرها براسي الارعن على ابو اسمي موجود بالتوكيل واحنه متفقين هو يلزمها ودخل جلسه اولى من شاف روحه ميدبرها تعال يمحمد استلمها
- هو انتو غير خمسه بالتوكيل عاف الباقين ركض عليك؟
- لانه نذل هو انه اشتغل ويا لوما الجماعه چهبوني عليها ووكعوني بالغيره
طلع تليفونه واردف. اخابر حجي عمران يطلعني من هالورطه مثلما حطني بيها
—— نورهان——-
الفتره الراحت جانت كابوس من اتصوب فارس كلشي تخربط بالبيت امي تعبت وضغطها صاعد اربعه وعشرين ساعه عمامي يوميه يمنه والخطاطير ما وكفت رجلهم حتى جماعته بالدوام كل هذا بكفه واعصابه التعبانه بسبب شغلته هو وياقوت بكفه اهلها مو راضين يرجعون خبر وهو نار وشابه بي ليالي شرحتله كم مرة حيدر ديحاول يقنع استاذ محمد وعلمود هيج مديرجعله القرار النهائي تعب من الانتظار وصوابه زاد عليه
باوعت للافته اسم استاذ محمد بعبوس ودخلت البنايه ضغطت ازرار المصعد وصعدته متوجهه للطابق الاول اكذب اذا اكول ما متوترة لان مزعوجه من استاذ محمد بسبب رفضه الي مأذي اخويه ومأرق نومه
دكيت باب مكتبه ومديت راسي
لكيته هو وياقوت كاعدين يتناقشون عاقد حواجبه بانزعاج فر راسه باتجاهي وانفرجت عقده حواجبه واعتلت ملامحه المفاجئه
كامت ياقوت تستقبلني بحماس باوعت لابتسامتها المشرقه وجمالها الاشقر البريء وبداخلي اكول حقه فارس دايخ وميشوف ولا يريد غيرها اتذكر نفسي شكد تعجبت بشكلها اول ما تعرفت عليها اخذتها بالاحضان من صدك مشتاقه الها
انداريت لاستاذ محمد وابتسمت غصب:- شلونك استاذ محمد
وكف ومسح كصته وشعره بحركه سريعه:- اهلا ست نورهان عاش من شافج
- انت العايش استاذ
- مبروك التخرج هسه صرنه زملاء مهنه رسميآ.
ابتسمت بحرج:- الله يبارك بيك بس بعد وين يلا نصير زملاء مهنه علما اكمل الدورة مال معهد المحاماه هاي اذا طلع اسمي بالوجبه الاولى
حك حاجبه يسترسل:- عندي عرف اذا حابه نطيج دفعه صغيرونه ويطلع اسمج مبقى شي ترة
جاوبته ببرود بدون ما انظر ناحيته:- تسلم استاذ ميحتاج ماريد اتعبك
- لا يابه شمسوين من ينشرون موعد التقديم كولي لياقوت ونشوف شلون ندبرها الج
- صدكني ميحتاج تسلم
باوعلي مستغرب اسلوبي البارد وهز راسه بتفهم وانحناءه اتوجه نحو الباب موجه كلامه لياقوت:- يلا اتركجن تاخذن راحتجن وضيفي صديقتج توته .
ياقوت:- ماشي حبيبي .
طلع وسد الباب وراه انداريت عليها اغمزلها:- اي عيني ذاك الرجال مسويتها صحراء الربع الخالي عليه وواكعه دك لاخوانج حبيبي وحبيبي اخ لو يدري يذبحج.
ضحكت وصارت حمرة :- اشش لا يسمعج محمد ادبسزز بعده ما طلع استلمتيني
كعدنه سوة وظلينه نسولف تقريبا نص ساعه حجتلي وضع ليالي وانعزالها
ياقوت:- اكلج ليش متجين ويايه نسوي كعده بنات تعلوله حلوة نطلعها من حاله الحداد الي هي بيها حتى غفران اليوم يمنه
اعتذرت منها:- اسفه حب ماكدر والله اتمنى اشوفها بس زحمه اجي لبيتكم تعرفين يعني فارس خطبج هسه عبالهم جايه علمود اعرف شي
هزت راسهه بتفهم ونظره ضايعه اعتلت ملامحها
سألتها بفضول:- شوكت يفضوها اهلج هوايه طولت صار شهرين من خطب ياقوت والله هواي
باوعتلي باحراج:- والله اعرف بس شسوي يعني اوكف كدام ابويه واخوتي اكللهم تعالو انطو قرار والله صعبه
هزيت راسي بتفهم:- حقج صعبه الله يهديهم يارب ونفرح بيكم
باوعت لساعتي وكمت من مكاني :- يلا حبيبي اني استأذن هسه السايق وصل اروح هم ماريد اتأخر ابو الفوارس يعلسني
ابتسمت وهمست بخجل:- سلميلي عليه
غمزتلها:- هيج سلام ناشف
ضربتني بخفه على زندي وهمست:- ادبسزز مو بيدج.
اجيت اطلع وضربت كصتي متذكرة :- اني اجيت اعزمج وتالي ردت اروح بدون ما اكلج
ياقوت:- لا تكولين خطوبتج؟
هزيت راسي بأيجاب وابتسمت:- اي حددو موعد الاسبوع الجاي نعقد لوما حادثه فارس جان قبلها
حضنتني تباركلي:- يعمري الف مبارك ياربي حياة سعيده
- الله يبارك بيج يوم الي افرح بيكم انتي وفارس من صدك تصير الفرحه فرحتين
طلعت ويايه برا المكتب ودعتها وصعدت المصعد نزلت شفت استاذ محمد واكف ويحجي بتليفونه بأنفعال حرت اسلم عليه لو اتركه وامشي واختاريت اتركه كونه مشغول بالاتصال .. تبادلنه نظرات واشرتله بمعنى مع السلامه وعبرته كم خطوة اجاني صوته يصيحني
محمد:- ست نورهان اوكفي..
وكفت وانداريت ناحيته:- نعم استاذ
اقترب مني يمشي بهداوة لابس قاط بس نازع الستره والرباط باقي بالقميص والبنطرون قميصه ابيض ناصع منطي مظهر اضخم لعضلاته واعترفت بداخلي وسامته ملفته بس شخصيته مزعجه ماكدر اعرفه حباب لو شرير
صار مقابيلي ورفعت وجهي بأستفهام:- خير استاذ
محمد:- انتي خير ست نورهان مو على بعضج؟
عكدت حواجبي بعدم فهم:- اني؟ لا بالعكس ليش؟
حك شعره من الخلف واردف:- ماعرف يعني احسج متضايقه مني مثلا
بدر مني شي يزعجج؟
التهب وجهي وحسيت بفشله معقوله جان مبين عليه هلكد مزعوجه منه علمود فارس :- لا ابدا ماكو شي شنو الخلاك تظن هيج
- توقعت صرنا معارف او اصدقاء هوايه التقينا وسولفنه بالمحكمه بس اليوم متغيره..
رفعت حواجبي باستغراب وماعرف شنو اجاوبه رمشت اكثر من مرة وهو حاط عينه بعيني وترني :- اعتذر اذا نقلت صورة غلط عن نفسي بس ماكو شي استاذ ماسويت شي مزعج انت حتى اتضايق منك.
هز راسه بتفهم :- ولو متأخر بس الحمدلله على سلامه اخوج شلونه ؟
باغتني بذكر فارس الي ماله علاقه بحديثنه بس كأنو ديوصلي معلومه ان هو يعرف اني مزعوجه علمود اخويه.
- احسن الحمدلله
عم صمت غريب بينا وحسيت بأحراج
تحمحمت :- عن اذنك استاذ لازم اروح السايق ينتظرني
سألني فجاة:- تشتغلين بمكتبي؟
باوعتله متفاجئه:- اني؟
ابتسم ابتسامه طفيفه:- ليش اكو غيرج هنا اسولف ويا ومادري؟
رفعت اكتافي بحيرة:- ماعرف لازم اكول لفارس اليوم اصلا جنت بمقابله عمل يم استاذ عمار
قاطعني قبل لا اكمل كلامي:- خلي يولي عمار عينه زايغه وكلما تشتغل يمه بنيه حلوة تبطل لان يزعجها.
بلعت ريگي بخجل اسأل نفسي هو ديكول عني حلوة بطريقه غير مباشرة لو اني عقلي ضرب لان استاذ محمد ثكيل مستحيل يغازل :- اني اصلا معجبني الوضع ما ارتاحيت لاسئلته كانت شخصيه اكثر من عمليه
محمد:- افهم منج موافقه تشتغلين ويانه؟
هزيت راسي نافيه:- اخويه هو الي يقرر استاذ ما اخطي خطوة بدونه وشكرا لعرضك اقدر هالشي.
غلغل اصابعه بمقدمه شعره ورجعه ليورا لاحظت هذة حركته يسويها دايما:- العرض مفتوح الج شوكت ما تحسين نفسج جاهزة تفضلي للمكتب انتي شاطرة واني محتاج احد شاطر يساعدني لان استاذ منير طلع من عدنه وانتقل لغير محافظه وعندي نقص بالمكتب
هزيت راسي بأمتنان:- اشكرك على ثقتك بيه رغم بعدني بدايه طريقي
باوعت لساعتي اشاره الى تأخري . لازم اروح استاذ كلش تأخرت عن اذنك
- مع السلامه ست نورهان
انداريت امشي وماعرف ليش ظهري قشعر حسيته واكف بمكانه بعده ويباوعلي طلعت من العماره كلها غامرني شعور غريب ومتناقض اتجاه استاذ محمد
—— زهراء——
صرت أتصيد الفرص حتى اشوف حر بعدما التقينه بخطوبه مجتبى خاصه بعد ما كعدو بأجتماع مغلق بابا واخوتي وعمي وطلعو منه كلهم متصافين فهمت موضوع النهوة انسد بطريقه ما بس اني عرفته لحر وشفت مشاعره الي فاضحته عرفته راح يكون صخرة مو حجرة تعثرني بطريقي ومراح يخليني اشوف حياتي ولازم اوكفه عند حده
رتبت نفسي على غير عادتي من اروح لبيت عمي ماهتم لشكلي البس وابدل بصورة عاديه بس اليوم غير طوخت الكحل وزيدت العطر مجتبى ما ينتبه لهاي الامور مثل محمد ومصطفى مررت ايدي على نفنوفي الاحمر طويل وقماشه مثل الكشمير ذاب روحه عالجسم لبست بشت اسود عفته مفتوح ولفيت حجابي وطلعت
لكيت مجتبى يتأفف واكف ينتظرني بباب المطبخ اليوم نزل من الداوم ويريد يروح يتعلل ببيت عمي ويشوف بنين ولزكت روحي بي
صعدت بصفه طريق قريب بعدني بزحمه افكاري وكفت السياره كدام بيت عمي نزلنه سوة ودگينه الباب
فتح منتظر الباب ابن عمي واصغر من حر ب٣ سنوات دخلت من باب المطبخ انزع صايتي اعلكها ورا الباب لكيت عمتي والبنات كاعدات كمزت بنين وخدودها صارن حمر سلمت واخذتها صعدنه فوك فتحت كنتورها اختارلها شي تلبسه حتى تنزل تكعد ويه مجتبى لبست وكشخت ومكياج خفيف ونزلنه
شاورت مرت عمي:- شنو متخلون اخوي يكعد ويه مرته؟
ضحكت وهمست:- روحي انتي كولي لعمج بالعباس اذا احجي يشيب راسي .
ابتسمت بخبث واني استغل فرصتي ادخل عليهم الصاله
:- يلا هم ادخل اسلم على عمو واسوي فرصه لاخوي المسكين
كمت وكفت اباوع لبنين وجهها كام ينطي الوان وتفرك بيدها حيل مستحيه من عمي واخوانها توجهت لباب الصاله الي عالبيت وكفت بيها كلبي صار يدك باذاني احسني مكشوفه كدامه دكيت الباب وانتضرت ثواني وفتحته بابتسامه واسعه لمحت حر يذب تليفونه وكل انتباهه صار وياي
- السلام عليكم
ردو كلهم السلام
ضحك اشرلي اتقرب منه كاعد عالتخم انحنيت عليه بوسته حضن راسي بوسني ورجع باسني من راسي
ابو حر:- هلا بشيخه العلويات وعليكم السلام
ضحكت بخجل :- حبيبي عمو شلونك
ابو حر:- بخير بنيتي وحدج وين توته ؟
- بقت بالبيت تعبانه تداوم بالمكتب ويه محمد
هز راسه بتفهم وباوع لمجتبى:- شصار على سالفه اختك؟
حك مجتبى حاجبه بأرتباك عرفته ما يريد يحجي كدامي :- هاليومين ان شاءالله
شلعو گلب توته وفارس خو بالبيت الكل مغلس ولا يجيبون طاري وبابا اصلا ما دز عليها يسالها فكرتي لو لا اني اعرف بسبب محمد الما مقتنع
بابا ميتجاوز محمد واختي واكعه بيها نفسيتها تعبت كاعده على نار
باوعت لعمو حايرة شلون اكومهم منا حتى بنين ومجتبى يكعدون سوة
باوعت لحر بنظرة خاطفه رفرفت رموشي مرات متتاليه رفع حاجبه معنى شكو كمت وكفت
- يلا عمو اروح يم البنات وطلعت عرفته راح يجي وراي
طبيت للمطبخ وهتفت :- يا نسيت تليفوني بغرفه بنونه اصعد اجيبه عفتهن كاعدات مكابلات المسلسل وكفت بنص الدرج اباوع لباب الصاله انفتح لمحته قبل لا يلمحني وركضت اصعد الدرج عالسريع واحس روحي مسويه مكسورة
طبيت غرفه بنين وطلعت تليفوني شمرته عالسرير جوا حافه اللحاف يم المخدة وصرت ادور عليه عالميز تواليت
انفتح باب الغرفه ورايه ابتسمت بخبث وانداريت بسرعه حاطه ايدي على صدري ادعي التفاجىء
مرتچي على الچرجوبه الباب ومصغر عيونه عليه
همست :- هاي شبيك جفلتني.
جاوبني بسخريه:- تجفلين عشيرة شيجفلج انتي؟
كتفت اديه لصدري:- ليش ماعندي احساس
فرقع لسانه وهز راسه ليفوك نافي:- تؤ مشيول منج من زمان.
قوست شفتي ادعي الزعل:- ليش دايما تذمني وتوصفني بأشياء مو صدك يعني اني ماعندي احساس
لمعت عينه وهو يباوع لشفايفي بجرائه وهمس:- شجاي تسوين؟
انداريت اكمل بحثي:- تليفوني مدري وين شمرته هنا
انداريت لسرير اكمل بحثي وشلت اللحاف رفعت تليفوني وهتفت بحماس :- هياته لكيته
اتقدمت عالباب حتى اطلع حط ايده بطريقي يمنعني حسيت بالحرارة والغضب تصعد براسي :- خير خليني اطلع يم البنات؟
نزل نفسه لمستواي وحط وجهه مقابيل وجهي:- شجاي تسوين يبنيه؟
رمشت بجهل :- شجاي اسوي انزل؟
حر:- تعرفين قصدي ؟
بلعت ريكي وترني قربه وريحه عطرة صارت بخشمي وكلشي بداخلي استنكر قربه بس تماسكت:- شبيك حر عوفني اطلع
هز راسه رافض:- شردتي بالصاله ؟
- شردت؟
- ترفرفين هالرموش بوجهي شرايده ولج؟
- اذا اطلب منك تسوي الاريدة؟
هز راسه بأي وتفاحه ادم الي برقبته صعدت ونزلت ببطيء جاي اشوف تأثيري عليه
ابتسمت هامسه:- خلي مجتبى يكعد ويه مرته شويه ترا حلاله
كشت ملامحه معاجبه:- لا تلعبين روحي شعدهم قابل؟ بعدني ما مستوعب مجتبى نسيبي
:- يعني لو انت خاطب متريد تكعد انت وخطيبتك شويه وحدكم بعدين حلال حلال عاقدين
قلب عينه بملل:- افتهمنا وعلي افتهمنا
- وخر خل اطلع عاد
همس بذوبان:- وخريني انتي.
فتحت عيني وضعه تخربط وخفت يتمادى صوتي طلع مهزوز :- حر شبيك وخر دتخوفني
ضحك ونظره جال على طولي :- الشكل لبوة بس الشخصيه بزون
ابتعد فاسحلي مجال واني كل لشتي ترجف اريد املخه
طلعت الباب وانداريت عليه ياريت لو بس لساني يسكت اقتربت منه وكفت بوجهه بتحدي حطيت عيني بعينه وهمست بدلع:- لبوة بزون كتكوت شلون ما اكون مدوختك
رخت عينه الصارت تجول على ملامحي بنهم وصوته خفيض :- ولاعنه سلفه سلفاي بعد
ابتسمت بانتصار :- صير حباب وياي ولا تضوجني اذا تريد احبك
بنفس النبره والنظره همس:- ما مرتاحلج وعقلج هذا بي لعبه زهرتي واعرفها
اختفت ابتسامتي وحجيت بجديه:- تغيرت وداعتك وبعد ماعندي طاقه لكل حرب
حسرة جبيرة فلتت مني وحسيت روحي راح ابجي انداريت اهرب منه وانزل مستحيل اضعف كدامه
اجاني صوته من خلفي:- حتى اذا عندج لعبه مستعد العب وياج لو اكضج لو نحترك سوة
ماجاوبته ونزلت لكيتهن على صفنتهن عالمسلسل وكعدت وياهن ربع ساعه ودخل للمطبخ صاح بنين
حر:- رجلج بصاله كومي وديله چاي شفت عمو دخل غرفته ومنتظر اجه اخذ السويج من التعلاكه بالمطبخ طفر من البيت كامت بنين صبت چاي بأيد ترجف ودخلت للصاله وسدت الباب ابتسمت وعيني صارت بعينه اشرلي على عيونه بمعنى من هاي العين وهاي العين لان اني طلبت يكعدون سوة
تعلكت عيني بعينه وتذكرت كل عركاتنه والمداهر الجنت احبه واتونس عليه وغصه تجمعت بزردومي اريده مثل قبل ورافضه هاي المشاعر الدخيله الي صدمني بيها كمت بسرعه وصعدت لغرفه بنين وانهارت دموعي مثل فيضان ليش سوة هيج بيه ليش اذاني واني جنت اعتبره اخويه وصديقي ورغم كل عركاتي واسوي نفسي ضايجه منه بس جنت احبهن لان الوحيد متحمل خبالي وجفصاتي مسحت وجهي ورحت للحمام غسلت طلعت لكيته واكف بباب غرفه بنين المفتوح ماردته يشوفني وجهي مبين باچيه اندار عليه
واقترب مني عاكد حواحبه باستغراب شاف ملامحي وبهتت ملامحه :- شبيج باچيه تعبانه ؟
هزيت راسي نافيه بدون ما احجي لان اذا احجي راح ابجي
- شبيج بزون
حمحمت انقي صوتي:- راسي حيفجر اريد انام
باوعلي باهتمام- دخلي بغرفه بنين نامي وهسه اجيبلج مسكن .
هزيت راسي بايجاب ودخلت طفيت الضوة فتحت حجابي بس عفته على راسي وغطيت روحي
اطحن بروحي والوم بيها كلام ياقوت صح ليش داسوي هيج وارجع اتذكر شسوة واسترجع ذكريات ذاك اليوم واحقد واكول لا الا اندمه الا اكسر گلبه مثلما كسر كلبي غفيت بنص تفكيري وغطيت بالنوم حسيت على ايد تنوضع على جبيني بس قفلت ونمت ماعرف شكد مر وقت بس صوت بنين اخترق نومي فتحت واتمنى ارجع انام
بنين:- كومي ولج مجتبى يريدج تروحون
كمت دايخه شكد اكره هيج نومه راسي مسطور لفيت حجابي بعيون مغمضه ونزلت سلمت عليهم بالاشاره وهم يضحكون عليه طلعت للباب حر ومجتبى واكفين بلكوة مفتحه اريد انام فتحت باب السياره واريد اصعد حسيت بالم قوي بجانب راسي ودخت انسحنت روحي ضربت راسي بسياره ما منزله روحي زين
سمعتهم يصيحون عليه اثنينهم بصوت واحد:-الله الله .. واني مدري شصار بيه من الفشله دخت اكثر وماعت روحي ظليت مرجعه راسي ومغمضه صعد مجتبى وانطلقنه للبيت
باوعلي بقلق:- شبيج زهراء دختي؟
همهمت:- هممم بس اريد انام نعسانه.
- غير تنتبهين ركعتي راسج هالركعه ما جاوبته دقايق وطبك كدام بابنه نزلت بوجهي للغرفه شمرت الحجاب والصايه ونمت چفي عود رحت انتقم منه كضيتها نوم وسطرت راسي بالسياره يشور سيد حر دخيل بخته
كعدت الصبح صفحه راسي بيها الم فضيع مكان الضربه عقجت وجهي متألمه باوعت لساعه ب١٢ الظهر تفاجأت شكد نايمه هاي شبيه غسلت ونزلت بعدني عالدرج اسمع صوت منتهى هسه هاي شجابهه دخلت للمطبخ وصبحت عالكل
ام مثنى:- يا صبح يمه الدنيا الظهر
ابتسمت بتكلف:- بالنسبه الي صبح توني كاعدة
منتهى:- قابل بس هي يمه عود ذيج المعلكه فوك اجينه نسلم عليها ولسه ما شفناهه ولا نزلت
جاوبتهه ياقوت مبتسمه وهادئه فورت دمي بهدوئها اكثر من سم منتهى:- حبيبتي ترا تعبانه ومالها خلك واحنه مصحناهه
لوت ام مثنى حلكها معاجبهه:- هي طروحه قابل شكو چا احنه على وكتنه نجيب منا نكوم نركب الغده منا موهي لحمه هلكدودتها الطرحتها
علويه نهله:- لا تأذت والله الطروحه تأذي اكثر وهي تعبت هواي حتى الدكتورة كالت انتظرو فتره يلا فكرو تسوون طفل اخر رحمها تعب ونزفت هواي
هتفت منتهى بشماته:- ياا بعد متخلف
عطت بيها:- اسم الله انتي شبيج شهالكلام
دخلت ليالي المطبخ سلمت بخفوت وكعدت تتصفن مالهه واهس بشي صارلهه فوك الاسبوعين هاي حالتها
ام مثنى:- شني بطلتي من الوظيفه
هزت ليالي راسهه نافيه:- لا خاله مجازة باجر ارجع لدوام
كامت ياقوت كعدت بصف ليالي تحجي وياهه همس واثنينهن كامن صعدن تريكت وصار عندي فضول لحكتهن لكيت ليالي سابحه وياقوت تنشف شعرها وتمشط بي عرفتها تريد ليالي تطلع من هالجو وترجع نفس الترتيب والاناقه خاصه لان منتهى موجودة ساعدتها وشسورت شعرها واني مددت على السرير مقابيلهن تذكرت تليفوني ورحت لغرفتي
شلت تليفوني لكيت رسايل من حر
استغربت هاي شنو هو اني غير راكعته حظر بطعم النعناع
دازلي
شلون صرتي؟
تأذيتي؟
ها بزون بعدك نايم
معقوله لاعب بتليفوني واني نايمه بغرفه بنين ماكو غير هيج الحقير دگيت عليه كبل جاوبني
- صح النوم تمبل
- شلون طلعت من الحظر
- قدرة قادر لكيت روحي مشيول الحظر عني توقعت انتي
- سوبهان الله موهمد صلوات
ضحك بصوت عالي واردف:- لا صدك شلونج اني گلت الركعه الركعتي راسج بيها سطرتج وشلتي الحظر
- حظرتك تشمت بيه والله تأذيت لحد هسه مكان الضربه يوجعني
همس باستهزاء:- اني انقهرت عالسياره خطيه احتمال اتفلشت من راسج المصلبخ
صحت بي:- دكافي شبيك روح يلا باي.
- تعاي اشاقيج لا تصيرين رعنه .
- انت الارعن
صاح بيه بتحذير:- لج لسانج لسانج لا اجي اكصه
- خفت خفت كمت ارجف يمه يمه
ضحك مرة ثانيه:- اي هاي زهراء الاعرفها
ضحكت غصب:- مشايفه واحد يحب العركه والمناگر
تنهد وكال بصوت راخي:- بس وياج احبهن كلشي منج احبه
امتنعت عن الاجابه كلما يذكر مشاعره يصيبني غضب ماردت احجي الي بكلبي هسه واهجم عليه خليني ساده حلكي ومسيطرة على اعصابي
همس يطلب مني:- اعرفج ليهسه مو مسامحتني انطيني فرصه اشوفج حبي
ذبيت حسرة:- خليها لزمن حر ولا تحجي بشي اني اريد انساه عفيه
حر:- يجرالج بويه هاهيه انسي
- خلي اروح هسه انزل جوة يلا باي
- الله وياج.
سديته ورحت للبنات ليالي شلون كاشخه ومتمكيجه وشعرها الاسود يلمع على ظهرها طالعه تجنن
صفكت ايد بيد اتغزل بيها:- عمي هاي النسوان الحلوة ولا بلاش
ياقوت:- يلا ننزل ترا حيدر على وصول خلي يشوفج جوة شويه يرتاح ويتطمن
هزت راسهه بأيجاب ونزلنه شفت عيون منتهى تنط من مكانهه وهي تشوف ليالي شلون كاشخه رغم منتهى حلوة بس ليالي شكلها يجذب ملامحها وطولها تلفت الانتباه
انطتهه امي مهمتها المعروفه تنظيف الخضرة وكعدت تنظف بيها بصمت وياقوت وياهه تنظف وكعدت بصفهن
منتهى ماخذة زاويه هي وهاجر وامي ومرت خالي كاعدات سوة
اندارت مرت خالي على ليالي عرفتها تريد تذب حجايه:- اكلج حبوبه شدي حيلج وسويلج طفل بدل هذا الطيحتي الزلم ما تكضهم غير الجهال
غمضت ليالي حيل وايدها صارت ترجف :- طيحته؟ خاله اني اندفعت وابنكم وكعني من الدرج وخسرني وليدي.
ضربت ام مثنى على صدرها شاهكه:- يا يا يا شوف طلع الحجي خايبه هو انتي الوكعتي الوليد جا كسرتي حفيدي بعدين شني ماعرفتي تكضين روحج وتكربستي
باوعتلها بخزرة:- حفيدج بكد البغل ويزاكط كلنا شفنا شلون اجه يركض ودفعها وصار فوكاهه مفروض امه ابو يجون يتعذرون بالجذب
ام مثنى:- انتي سكتي ام لسان
علويه نهله:- زهراء كافي وانتي خيه سدي السالفه ماله داعي هالسوالف بعد الصار صار
ام مثنى:- جا ما تكولين لبتج لسانهه اطول منها قليله الادب
وكفت منتفضه:- هاي منو قليله الادب اني؟
علويه نهله بتحذير:- زهراء نصي صوتج
باوعت لماما بقهر:- مداشوفين شلون تحجي فوك حكه دگه يعني حاطه ليالي بين عيونج وتسمعيها كلام يسم بدل ما تواسيها حفيدج وكعها وخسرها ضناهه قبل لا تشوفه اجت تموت وهسه تكولين عليه قليله ادب عمه كافي كلما تجين تسوين سالفه ابتلينه قسمه وماصارت الله يدز لبنتج عريس يسر خاطرها ويفكنا
كامت ليالي طلعت من المطبخ تبجي وراهه ياقوت وامي ظلت تخوزر وتحجي عليه حتى اسكت
ومرت خالي سوت نفسها المظلومه وكامت تدردم وتسوي نفسها تبجي الخبيثه
كمت اني صعدت لغرفتي شايطه وروحي طافرة ولزمت تليفوني دكيت على حيدر
-ها حيدرو شلونك
حيدر- هلا حبيبتي الحمدلله
- وين انت ؟
حيدر - بالطريق نص ساعه واوصل
- اذا متشوف حل ويه خالي لمرته وبنته بالعباس اطردهن
حيدر:- شكو يمعودة شكو؟
حجيتله الصار بالحرف ورزلني لان اردد واضيع حقي بس كال اجي ويصير خير ،
سديته منه وكلبي يفور ودي اركعهن راس براس بس حيدر يعرف شلون يرزل بأدب وهي كلشي ولا حيدر يحاجيها تنكرص هي وبتها
ظليت انتظره وكعدت فوك يم الدرج سمعته طب للمطبخ سلم
حيدر:- هاي منو اليوم عدنه مرت الخال كل الهلا ؟
ام مثنى:- بلمهلي يمه الله يساعدك ؟
-و يساعدج حجيه خابرتني ليالي وگلتلي عمتي جايه وتتعذر علمود عبود كتلها هي هيج مرت خالي صاحبه واجب جيتج على العين والراس بعد الحمدلله قضاء وقدر ادعيلنه بالعوض حجيه
ماسمعتلها صوت ظلت ساكتها داتخيل وجهها ينبلع بالفشله
افتهمت البسمار زين اترخص منهم وصعد شافني هز راسه عليه وهمس:- لسانج ام الفواين مرة اكبر من امج عيب ترادديها حتى لو غلط
- خلي تطير تس تس تس تبخبخ بهالسم ورفعت ايدي ليفوك الحمدلله ربي ماخذت بتها يباااوو اتهجولنه والحسين خاف هاجر مقصرة تجي منتهى يطشرونه بالليله ظلمه
كفخني بخفه يضحك وتوجه لغرفته دخل وطلعت ياقوت جانت يم ليالي اجت عليه كادتني من ايدي اخذتني لغرفتها سدت الباب واندارت عليه تهفي على وجهها دموعها متجمعه بعيونها
-شبيج يمعودة؟؟
وكعت دموعها وملامحها اتعقجت وصوتها يرجف:- ليالي گلتلي هاليومين يرجعون خبر لفارس متفقين
باوعتلها بأستغراب:- بس بابا ما حجه وياج شلون يردون خبر
شهكت وكعدت على جربايتها مغطيه وجهها وترجف :- مبين ميحتاج محمد مراضي بابا ليش يسالني هم راح يرفضون وبما ان الولد كلهم موجودين قرروا
اقتربت منها حضنتها :- توته على كيفج اهدي
حطت راسهه على كتفي تحجي من بين دموعها:- ليش هالرفض هذا كلتله موافقه لمحمد زهراء اموت والله احبه ماكدر اعوفه ماكدر
- انتي گلتيله لفارس؟
- توني عرفت من ليالي وما اتجرأ اكله اصلا صاير اعصاب فدمرة مل من الانتظار
مددت بفراشهه وغطت راسهه خنكت روحها بالبجي وتليفونها يدك وهي متجاوب عرفته فارس اخذت التليفون منها وهي تصيح عوفي لا تجاوبي
- زين جاوبي انتي الرجال الف مرة دك
جاوبتني من بين شهكاتهه:- ما اجاوبه يعرف بيه شي كبل ويظل يلح حتى يعرف شكو
- زين خليني اجاوبه اكله نايمه
سكتت ثواني رفعت الغطا عن وجهها ومسحت دموعها واشرتلي:- جاوبي
فتحت الخط اجاني صوته الاذاعي الشگاگي
فارس:- يالحبيب ليش متجاوب مو شلعته لكلبي اليموت عليك
استحيت يالله شلون افتح حلكي
تحمحمت اجاوبه:- احم اني زهراء مو الحبيب الشالع كلبك
جاوبني باحراج:- هلا خويه عذريني مادري انتي تجاوبين
-لا عادي مصار شي بس شفتك تتصل هواي كلت اجاوبك لان توته نايمه
جاوبني بأستغراب :- نايمه هالوكت؟ ونبرته تحولت لقلق:- علويه شبيها ياقوت ؟ مريضه ؟ تعبانه؟ صاير شي ما تنام هيج وكت هي؟
باوعت لتوته الي تباوعلي بحزن جاوبته:- مبيها شي والله بس هيج عجبها تنام قبل الغده يعني لو بيها شي هيج اني عادي اجاوبك
- ديري بالج عليها شريان الگلب هاي
ابتسمت بفرح ياقوت تستاهل احد هيج يحبها:- افا اختي هاي لا توصي
- يلا خويه اودعناج من تكعد خل تحاجيني .
- ان شاءالله مع السلامه
سديت الخط وهي رجعت تبچي غطت راسهه وهمست :- اريد ابقى وحدي زهراء ولا تصيحوني عالغده اريد انام
مسدت ظهرها من خلف الغطا وتركت تليفونها يمها وطلعت اعرفها راح تنام فعلا هي هيج من تنقهر هروبها النوم
صار الغده والكل نزل عداهه كلتلهم نايمه تركوها للعصر بيت خالي راحو ابوي واخوتي كلهم دخلو الصاله وبعد نص ساعه طلع كرار وجهه معقوج وجهلي الكلام
كرار:- صعدي كعدي توته خل تنزل وتدخل وحدها يمنه ابوي رايدها بكلمه راس
صعدت اركض سويت الدرج شبختين وداهمت غرفتها شلت الغطا كله عنها وذبيته بالكاع بحركه سريعه وهزيتها :- توته .. لج توته كومي
فزت مخترعه توخر شعرها من وجهها :- شكو شش شكوو منو مات
- فال الله ولا فالج يمعودة ابوي يريدج بالصاله يريد يحاجيج ولج يمكن راح بسألج عن قرارج
وجهها انبلع وانكمشت ملامحها بتوتر جريتها اوكفها ادفعها لباب الغرفه روحي غسلي وجهج ونزلي
— ياقوت—-
نزلت الدرج واحس كلبي يريد يوكف وادعي بداخلي يارب والله حبنا نظيف اوكف ويانه يارب مايوم طلب مني شي حرام لا طخ ايدي لا شاف مني شعره حتى صورة ماطلب مني منتظرني اصير حلاله وبيد ترجف فتحت مقبض باب الصاله الي يصل برودة مدري اني حرارتي مرتفعه من التوتر
توجهت انظارهم ناحيتي وشفت ماما هم كاعده
صاحني بابا:- سدي الباب بابا وتعاي سويت مثلما كال ورحت كعدت بصفه صرت بينه وبين ماما
مد ايده مسد شعري على طوله وابتسم بحنيه:- اليوم ماكو ضفيرة نبوسها
ضحكت وحطيت ايدي على شعري:- جنت نايمه ونزلت لان زهراء كالت تردوني مالحكت اضفرة
جر راسي وباسني من جانب شعري :- بابا الموضوع الحجيت بي وياج نوبه الفاتت فكرتي بي
رفعت عيني بتوتر وصارت بعين محمد ملامحه جامدة بلعت ريگي
حجه بابا:- احجي بابا ؟
دنكت اباوع لايدي بحضني شابكتهن واحرك بيهن بتوتر لساني رافض ينطق وهم كل انظارهم عليه
مصطفى:- خويه تظلين ساكته احجي
باوعت لمحمد:- ماريد احجي شي يضوج اخوي الجبير يعز عليه اخالفه
ابتسم وغمض عينه براحه ورجع يباوعلي برضا
ابو محمد:- بغض النظر عن اخوج انتي موافقه لو لا ؟
هزيت راسي بأيجاب بدون ما انطق وكمت طلعت من الصاله صعدت غرفتي ابچي للمرة الثانيه كسرو كلبي برفض فارس وشلت همه شلون راح يستقبل الخبر
بيومها ما جاوبته ولا طلعت من غرفتي انزويت على روحي اصارع احزاني اخذت حبايه فاليوم ونمت مثل الاموات انگلبت الدنيا واني مادري
— نورهان—
اليوم خطوبتي ماعرف احساسي متضارب باسم خوش رجال محترم وخلوق واهله ناس لطيفين مصار بينا تواصل لحد الان واني فضلت هالشي بيتنا هوسه والكل موجود عمامي خوالي بيبي موجودة
كاعدة بالكوشه البسيطه الكل انظاره عليه اقتربت غفران مني تهمس بأذاني:- ليالي راح تجي بالطريق
ابتسمت بفرح:- واخيرا خفت متجي
غفران:- لا يابه شلون متجي بس هي اليوم اول يوم دوام ورا الاجازه علمود هيج تأخرت
وفعلا اقل الربع ساعه ودخلت ليالي لابسه فستان اسود منثور عليه كرستال ناعم طويل وكاشخه
اقتربت مني وكفت احضنها حيل وهمست باذانها:- فرحتي بجيتج تسوة الدنيا
ابتسمت :- انتي الغاليه اخت الغالي شلون ما اجي طالعه تخبلين فدوة لعيونج الحلوات ..
نورهان:- بعد عمري تمنيت البنات وياج يجن
- صعبه تعرفين ليش .. اجينه بس اني وحيدر .
هزيت راسي بتفهم وراحت سلمت عالباقين وكعدت بم عمتي بلشت مراسيم العقد وعقدنه وكالو العريس حيدخل دخنت خجل واطرافي بردت
فات باسم لابس قاط بيجي طويل وضعيف ووسيم ملامحه معكودة واقترب مني باس كصتي وهو يسالني باذاني :- ولد عمج عادي هيج يدخلون ويطبون
بهتت ملامحي وظليت صافنه عليه لا بارك لا باوعلي عدل يسالني عن ولد عمي ؟ حزت بخاطري وتفشلت
بعد ما لبسنه حلقات باس راسي مرة اخرى وبارك وابتسم وكأن هسه انتبه عليه همس باذاني ( طالعه كمر )
ابتسمت رغم ماعجبني اسلوبه اول ما دخل بس كلت يلا هم متوتر مثلي وكل هاي النسوان حوالي
نبهو البنات ولبسن حجابات ودخل فارس عيني جالت بطوله الهيبه ودعيت الله يفرحه بمحبوبته باس راسي وباركلي بعين مغوركه وسلم على باسم وكدام الكل حجه ويا بنبره ممازحه
فارس:- انطيتك مدللتي وعزيزتي اذا بيوم تفكر تاذيها محد يخلصك مني
الكل ضحك وفارس طبطب على كتف باسم رجع اندار عليه باسني من خدودي :- بالمبارك ياعين اخوج .
حضنته وحسيت روحي حاضنه ابوي مو اخوي . فارس صارلي اب رغم من مات بابا جان بعده مراهق بس اخذ دور الاب نزلت دمعتي واني اتذكر كل موقف احتاجيت بي اب فارس جان موجود بي
همست:- الله لا يحرمني طولك بعد حيلي وافرح بيك
ابتسم بعطف ومسد خدي يمسح دمعتي وطلع . خلصت الحفله وراحو باسم واهله
الكل راح وليالي وزوجها بقو للعشه تعشينا وصبينا چاي للولد امجد هم بقه ووكفنه نغسل مواعين ريم طبت هي وامي للغرفتها تنوم زيون
اقل النص ساعه وانفتح باب الصاله الداخلي طلع منه فارس الصدمه معتليه ملامحه عرفت رفضو وحيدر انطاه علم :- ليالي يلا رجلج يكول تروحون .
لبست ليالي عالسريع بوستنه وطلعت من باب المطبخ وطلعو حيدر وفارس وامجد للحوش اباوع لفارس بلكوة مسيطر على اعصابه سلمو وصعدو سيارتهم وراحو ظل فارس واكف وايديه بجيوبه بباب البيت ينتظرهم يبتعدون رجع دخل وسد الباب
غمض عيونه حيل وضغطعن باصابعه رفع وجهه لسمه وشفايفه تتحرك ماعرف شنو يردد وامجد يضحك طبطب على كتفه وحضنه
امجد:- مبروك نسيب الساده راح تاخذ علويتك
شهكت بفرحه وباوعت لغفران اثنينه مو مصدكين طلعت باب المطبخ وطكيتها هلهوله ناصيه اخاف يرزلني ابتسم والفرحه تارسه وجهه وعيونه تلمع ركضت حضنته وابوس چتفه محد يعرف بكدي شكد انتظر هاليوم وطلع تليفونه ادري بي يدك على ياقوت وابتعد للحديقه يفتر بيها ويدك
غفران واكفه بباب المطبخ وامجد اقترب منها هامس:- وانتي شوكت تحنين الساده حنو وانتي لا
بوزت بوجهه وطبت جوة بدون متجاوب
همست :- عوفها بعدها زعلانه
امجد بزهكه:- عمي بالعباس ماعرفها ماعرفها شلون طلابه شافتني لا مجاوب ولا مصخم
كتفت ايديه :- لعد شكو ضايفها وصديقتك عالفيس؟
ضرب كصته بنفاذ صبر:- بالقران بالفرقان ماعرف حتى شلون ضايفها بعدين انه لو عندي شي اخلي مدام عيونها هيج .اخاف منها بالحسين لا تشوفيها هلكدودتها ترا توكف عشيرة تك رجل
ضحكت وطبيت جوة :- هيج يلا تكدرلك
دخل امجد الصاله واقتربت من فارس اندار عليه بنفس اللحظه؛- ماتخابرين اختها ترا صارلها يومين مختفيه شيبت كلبي ماتجاوب ظل بالي
عكدت حواجبي باستغراب ودكيت على زهراء..
—- ياقوت——
غركانه بنومه عميقه مريحه حتى احلام مابيها وحسيت زهراء تهز بيه
حتى اكعد اسمعها بس عيوني مترضى تفتح نعسانه حيل اجت ماما تكومني واني راسي بثكل الجبال وارجف من الجوع
باوعتلي بقلق:- لج انتي مخبله ماخذه فاليوم من بارحه ما ماكله شي
جاوبتهه بلسان ثكيل :- اريد انااااام
سحلتني زهراء للحمام تغسل وجهي بمي بارد عالمغسله
وامي تدردم :- تدرين كم مرة نكعد بيج هاي سوايه ولج باوعي وجهج وجه موته صومي وموتي روحج
مابيه اجاوبها احس دايخه وطبل يدك براسي دك تليفون زهراء طلعته من جيبها وحطته بين كتفها واذانها
زهراء:- هلو نورهان شلونج سكتت تسمع نورهان واردفت . مابيها شي ماخذه فاليوم العوبه من بارحه نايمه نكعد بيها ومتكعد عود ردت اخابرج اني اباركلج تالي انتي دكيتي الف مبروك حبيبتي تستاهلين كل الخير
باوعتلي تفتح عيونها :- نورهان من بارحه تدك عليج وانتي ماكو فهمت قصدها فارس
ابتعدت عنها اريد ارجع للغرفه امي نزلت وهي تحجي:- رايحه احميلج الاكل خمس دقايق اذا ما نزلتي اصعد كرار عليج يسحلج
طبيت الغرفه وزهراء طبت مبهوته فاتحه عيونها والتليفون على اذانها
همست مصدومه:- ياقوت مرجعين خبر لفارس حيدر كايله موافقين
رمشت بدوخه الي داسمعه مستحيل محمد ما موافق شنو الصار كلبي صار يدك سريع والرؤيه بلشت تصير ضبابيه والصداع موتني اخر شي سمعته صرخه زهراء باسمي وبعد ما حسيت بشي
اول ما فتحت عيوني عرفت نفسي بالمستشفى رفعت ايديه اثنينهن بيهن كانيولات ومغذيات من الجهتين راسي راح يطير من الالم وموجه غثيان داهمتني
دخلت ماما عليه تباوعلي بخزرة وراهه بابا وكرار ومصطفى
علويه نهله:- ها كعدتي خاتون
ابو محمد:- على كيفج علويه شسالفه ما تشوفيها تعبانه
علويه نهله:- جا سوايتهه صح
اجه كرار بصفي وباس كصتي:- خبله ام الهبوط ردتي تموتين اكو وحدة تاخذ فاليوم وكلشي ما ماكله وانتي تعرفين روحج سكرج ينزل هواي ليش هيج تكي
همست بتعب:- بس ردت انام شويه ماتوقعت هيج قوي .
ابو محمد:- ممنوع بعد تاخذين شي بكيفج بابا صحتج على كدج مايصير
خلصن المغذيات وحطولي بعد ما طلعنه لل٢ بالليل بالسيارة الكل ساكت راسي على كتف كرار
كرار بضحكه:- عود نريد نزوجها وهي سكراب عمي يرجعها علينه من اول اسبوع فوكاهه حبه مسك كل شوي تموع روحها
رفعت راسي اباوعله مستغربه همس وبعينه حزن:- راح تتزوجين ولج وتعوفيني صارت صدك
همست بوهن:- شتزوج شبيك حلمان
هز ايده:- لا ربحنه سيد حسن بتك فاقده الذاكرة
رجع باوعلي شبيج توته غير وافقتي انتي .
صفنت بوجهه اعصر ذاكرتي وتذكرت زهراء من كلتلي حيدر مرجع خبر لفارس موافقين يعني هاي صدك مو حلم رجعت راسي على كتفه وغمضت حيل ودموعي صارت تجري بفرحه مداصدك معقوله اني وفارس نكون سوة معقوله محمد وافق
رجعنه للبيت لكيت زهراء تنتظرني بغرفتي حضنتي حيل :- دغمه خوفتينا ولج ياقوت وافقو وافقو راح تتزوجون انتي وفارس
ابتسمت بفرح واحس الكاع مو سايعتني وحضنتها حيل :- زهراء احس روحي بحلم شلون وافق محمد خاف حيدر مخربط
كرصتني من زندي :- هاي حتى تتاكدين مو حلم شبيج حيدر غبي حتى ينطي اخته بالغلط شنو فلم هندي يلا خابري ولج اجه ينجلط لان نورهان عالخط وانتي العوبه تكومتي بالكاع انوب صرتي شثگلج انطتني تليفوني
ودكيت عليه كبل جاوبتي بلهفه
