رواية الشيطان اختي كامله وحصريه بقلم انين الليل
اتقرب مني محمد وسجاد وياهم ليث وهمه يكلولي
أبو جعفر يالله خلي نمشي هم ياالله
حسيت بايد تضغط على چتفي باوعت شفت ليث يبچي ويكول
——. عمي امشي راح تصير ليل
وحضني ليث أنا كتله
:: روحو وعوفوني اهنا هيفاء تخاف ابحدها
محمد وهو يمسح دموعه
— شنو ضياء صدك چذب هاي أنت القوي استغفر ربك وهذا حال الدنيا
اتنفست ودموعي ينزلن من وره النظاره :: لا آله الا الله مي خالف روحو انتو وأنا شويه وارجع
محمد گال //يالله خلي نمشي عمكم علي ابحده بقى يسوي الفاتحه
سلمو عليه عرفو اريد شويه خصوصيه وياها سمعت ليث يوصي بأمه وهو يبجي
- - يووم ديري بالج على خاله ربتني وتعبت عليه وما خلتني احتاج احد ديري بالج عليها
وصار ليث يبجي وهو يحچي ويه القبر
- - - خاله الله وياج ما قصرتي شگد تعبتي عليه وما خليتيني احس يتيم وابوي ماله شغل بيه الله يرحمج خاله
ودنك ع التراب وباسه وراحو وانا اسمع نحيب ليث وبچي محمد
وبقيت أنا لازم القران واقرا واصدق واكعد اعاتبها
:: هيفاء مو استعجلتي بروحتج
بعدين استغفر وارجع اقرأ وارش ماي كتلها
:: شكد جنتي هادئة ومؤدبة عمري ما انساج تدرين بيه ما حبيت ولا احب احد غيرج ليش الوكت قسى ويانا
عبالك ما يعرف احد غيرنا شكد احبج وأحب تضحيتج واخلاصج
:: هيفاء بردي گلبي اول مره هيج يصير بيه بردي گلبي هيفا
ما اتحملت بجيت حييل وبصوت عالي لمن ما حسيت بابو منتظر اجاني وهو يگلي
—- شنو هاي أبو نور أفه عليك ياالله اطلب الها الرحمه كلنا على هالطريق
////////////////............//////////////////............//////////////.........//////////
السلام عليكم
انا احد أشخاص هاي القصه وراح اعرفكم على نفسي
اسمي ضياء ولمن وافقت ان أكون سارد لبعض فصول القصه على لساني كان عمري 50سنه لكن بصراحه
ما يبين عليه يعني ابين ازغر من عمري بعشر سنوات إذا مؤ اكثر
انا مربوع وجهي حنطي طولي 178عيوني كبارلونهم عسلي صوتي خشن دائما اتكلم بهدوء
راح تعرفون منو انا وشلون عشت
ملاحظه انا اسمي ضياء تره مو انا البطل الرئيسي بس اعتقد انو انا شي مهم موجود بالقصه وبالأخير الرأي الكم
///////|/////|////|//////|/////|/////|/////|//////|/////|////|/////|///
ولزمني أبو منتظر من چتفي وگلي
ياالله امشينا صار ليل
طلعنا من المقبرة وانا احس تركت روحي هناك صعدت بالسيارة وساق أبو منتظر وأنا بصفه جنت ابچيي بس كلت
لأبو منتظر خلي اروح ازور كبر أمي
وصلت الامي لان هيفاء دفنتها يم اختها واهلها
نزلت القبر أمي قريت الفاتحهرگتلها وانا ابجي //يووم يااعز الناس هيفاء اجتج وأنتي أنتي الي تدرين شگد
احبها وشگد هيه اتحملت
على مودي أنتي حبيبتي يمه ادعيلي بالصبر مو دوم تكولين أنت ضي عيوني ادعيلي يمه
وگعدت بسد الگبر وظليت ابچي ورحت تدرون ما زرت نهايه أم جعفر
مااعرف ردت خصوصيه الي والهيفاء أو يمكن زعلان عليها او حتى يجوز انانيه مني
طلعنا وانا ساكت جاي تمشي السيارة وكفها أبو منتظر ونزل جاب ماي وصعد فتح قرايه وظليت اسمع وابجي
اتصلو على أبو منتظر وكف السياره ورد
الو أهلا أستاذ جعفر
ها ابوك ...وبأوعلي...أنا هزيت راسي يعني ما اريد احجي كله
أي أستاذ عنده اجتماع وشغل الفوك رأسه رايد شئ أكله شئ
ها ايجوز مخلي صامت بس يخلص الاجتماع راح ابلغه
ان شالله تأمر أمر
باوعلي أبو منتظر وهو يكلي
أستاذ جعفر يگول من الصبح نتصل وهو ما يرد
أنا ساكت ما جاوبته مشت السيارة واحنه ساكتين تالي طلعت النقال چنت مخلي صامت فتحته شفت مكالمات من نور
بس اكثر شئ آيه متصله علي أنا اتصلت بنور وسمعت صوت آيه وهي تبجي
ايه وهي تبجي //الو بابا بابا هم تدري ست هيفاء توفت
أنا گوه لزمت نفسي وكتلها
أي بابا سمعت
آيه تبجي وتگلي //عفيه بابا اريد اروح للفاتحه
ما احس الا نور أخذت التلفون وهي حزينه وتگلي
هلو بابا
:: هلا نور
بابا هاي ايه من سمعت بالخبر اليهسه بس تبجي وكل شويه تگول اريد اروح للفاتحه
انا جاوبتها //نور بأجر روحي أنتي وياها أنا عندي شغل ما اگدر اجي مع السلامة
مااعرف ليش هيج حچيت ويه نور وآيه وأنا ادري شكد هنه يحبنها الهيفاء
هيفاء الي تمنت تعيش ويه بناتي واولادي حتى لو ساعات قليله الهسه اتذكر قبل 28سنه لمن راحت أمي وأختي
يخطبولي هيفاء بت جيرانا جنت احبها من احنا بالابتدائية وجانت دائما تسميني الحارس الأمين لان أوصلها يالله
اروح المدرستي وبالرجعه أشوفها تدخل للبيت بعدين ارجع البيتنا
شگد حصلت حجي من أمي وأهانه من أبوي لان عبالهم مخلصها لعب ما يعرفون حتى من شلنه الغير منطقه اطلع
من غبشه على مود الحك أوصلها للمدرسه ومن كملت سادس اعدادي أمي كالت
... يمه ضاوي ناذره بس تخلص السادس اخطبلك مره لان أنا المدلل اجيت على تلث بنات عاشن وخمس أولاد
يوصلون للشهر السابع وامي تجهضهم
جدي أبو والدي گال اريد الأبني ولد لان ابوي هم وحيد على تلث بنات
جانت أمي حامل بيه لمن ما جدي قرر ايزوج أبوي بت اخو حتى ما انتظر امي تولد لان كال نفس كل مره
اذا ولد راح اتطرحه واذا بقى ابطنها معناتها بنيه
لذلك جدي زوج ابوي بت اخو وابوي كان رافض لكن بضغط من جدي وافق
واتزوج ابوي وراسا حملت زوجته وبحملها ابوي اتبدل على امي ما صار يسال ولا يمر بيها اله كل فتره والمصرف
يقتره اتقتر وبس امي تحجي يسوي مشكله ويضرب امي ويطلع ما يبقى ايمر بينه اله بفترات مبتعده ومن يجي يتعمد
يسوي مشكله حتى يطلع وبعد ما يمر
واجيت اني للحياة امي تگول جدي صار يبچي ونزع اعگاله ولبسه الي وگال (اي هسه اسمي بقى ماراح يضيع )
تدرون من اجيت للدنيا ابوي سبحان الله ولا چني أنا ذاك الي انتظرني على مود يشوفني
خصوصا لمن زوجته الثانيه صار عدها ولد وبقى يومين واتوفه وانوب بقت تقريبا خمس سنوات او اكثر وحملت
وصارن عدها تلث بنات
أمي سمتني ضياء ودوم تسميني ضاوي احب أمي بشكل وأحس أبوي ما جان يحبني جان يتمنى يلزم عليه لزمه
لكن أنا چنت مؤدب وشاطر بالمدرسة اكثر من مره راد أبوي يبطلني من المدرسه لكن أمي ما جانت تقبل
وجنت اشوفه شلون يضربها وياذيها هي چانت تبتسم رغم الألم على مود ما تقهرني
جدي أبو والدي يحبني رغم احس بأمي ما تريده لان هيه تعتقد انو هو السبب بزواج أبوي
وتقريبا أبوي عافنا كله يم زوجته فوزيه يمرنا بس يخلي مصرف ومن يسمع بجدي مخلينا مصرف
ومتسوك أصلا ما يسال دائما اسمع جدي يعاتب بابوي يگله
لطيف بابا ليش ما تسأل على زوجتك وجهالك
ابوي //يابه أنا حملي ثگيل اقلها هاي عدها رجال يدير باله عليها وعلى أخواته بس هاي المسكينه فوزيه هاي
هي وبناتها ياهو الها
جدي//مادري بيك تريد بت عمك ليش ما اخذتها من گلنالك عليها اشو چنت تگول ما أريدها وهسه من اخذتها نستك
ابنك الما شفته الا بألف ياعلي
أبوي //أي يأبه صدگ بس من تزوجت بت عمي عرفت هي تحبني وما قبلت تزوج أي واحد غيري وانتظرتني
وكانت مستعده تبقى العمر كله بدون زواج
جدي /شوف لطيف ليلى أنت اختاريتها وهيه بت اصل واتحملت أعصابك وضيمك صحيح فوزيه بت عمك وهي
بت اخوي لكن مثل ما هذيج مرتك ليلى مرتك وام ابنك
لطيف //يابه لا تخليني هسه أصيح اليلى واگطعها گدامك افهمني
ليلى ما احبها وما أريدها ومبقيها على مود ابني والبنات
أنا سمعت هذا الكلام چنت بوكتها صف رابع ابتدائي بيني وبين نفسي حقدت على أبوي وقررت من اكبر
اصير شي مهم حتى امي واخواتي يتقون بيه ضد ظلم ابوي وجبروته
وبقيت ادرس جانت مخيلتي واسعة وعندي أحلام يقظه خصوصا وأنا اشوف نفسي وحيد
والطلاب الوياي الي عده اخ واثنين كبل جانو يصيرون شقاوه بالمدرسة يشوفون وين الي ابحده يديرون
علي الإخوان والأقارب ويضربونه
ويصير بس يشوفهم يخاف منهم عاد يبدي الابتزاز
يوم المصرف ويوم بوگلنه من اهلك ويوم اكتبلنه الواجبات ويبينون نفسهم على باقي الشقاوات يعني يخلونه ملطشه
چنت اشوف واحد يراقبني هو واخوانه وأصدقائه أنا بيني وبين نفسي خفت عرفت جاي ألدور عليه خصوصا
وأنو جهاد صديقي سمعهم يگولون هذا لازم نربي وما ورا احد وحيد رجعت للبيت وانا خايف ردت اروح
اگل الجدي واعرف يروح ويشتكي ويگلب الدنيا بس بعدين يضمونها الي جان يوم أربعاء من گلي جهاد
رجعت للبيت ما اتغديت احتاريت اتمددت ع الچربايه وحسيت بأمي أجت أنا غمضت عيوني بس أمي عرفت
أنا ما نايم ظلت تمسح على شعري گالت
امي //ضاوي يمه ادري بيك ما نايم اگعد وگلي شبيك
أنا ما جاوبتها هي گلتلي
—- اگعد گلي ما طول أمك سالمه كل شئ ينحل
أنا حسيت براحه من كلام أمي گعدت وگمت ابجي. هي حضنتني وگالت
- - لاتبچي ضاوي احچيلي
أنا سولفت الامي وانا ابچي وخايف هي بقت صافنه وگالت وهيه مبتسمه وتمسح على شعري
- - - ولا يهمك أنت اشجع واحد وسبع نام وارتاح و ما عليك
أنا بليلتها مانمت گلت بس لا تروح وتتعارك وياهم وانوب يضلون يصيحون عليه (زنانه لو النسيواني)
الصبح گعدتني وگالت // ياالله اگعد بدل ويالله
أنا هم كمت اريد اگللها ما اروح لكن شفت اصرار بعيون امي رحت بدلت وامي شربتني كوب حليب
وگفت اخذت الجنطه أمي گالت
- - عوفها اهنأ
وأخذتني واخواتي ويانه جانت دلال ثالث متوسط وسميرة اول متوسط وسكينه سادس ابتدائي أنا خفت كلت شنو رايحات
يهدن بس ما رحنا للمدرسه ركبنا رحنا للنجف وصلنا الظهر للأمام وكانت الزيارة سووا رحنا توضينا أمي گالت
للخواتي روحن زورن كل واحد من عدنا يطلب شي من الله بجاه امير المؤمنين علي وراحن البنات ردت
اروح لزمت ايدي قوي وگالت
- - ضياء قبل لا تلزم الشباك اوكف وگله ياامير المؤمنين عليك بداعة الحسن والحسين وبداعة العباس كفيل زينب
اريد الشجاعة وتركد گلبي وبعدين الزم الشباك وظل سولف شنو ابالك اهنأ (اشرت بابتسامه ) محد يزمخ عليك
محد يگلك دوختنا
محد يگلك انت جبان لو يضحك عليك لو يفشلك اهنا علي يسمعك روح يمه رووح واطلب من الكريم ابن الاجاويد
وفعلا سويت مثل ما أمي كالتلي بعد الزيارة والصلاة حسيت براحه تغدينا بالإمام وره الغدا رحنا الكربلا بتنا
ورجعنا الصبح البغداد لاگانا جدي وسال أمي وين چنتو
كان جوابنا واحد عد بيت جدنا ...أبو امنا...
تعجبت ليش أمي چذبت ما گالت الصدك بس أنا بقيت ساكت
ثاني يوم گعدنا الصبح وبدلنا ومن ردت اروح گالت أمي
ضياء اروح وياك
أنا صحيح چنت خايف بس هزيت راسي هي لزمت ايدي بقوه گالتلي
ضياء شلون لزمت ايدك بقوه مو اذتك
انا هزيت راسي هي كلتلي //انت هم صير سبع وقوي الي يضربك اضربه حتى لو چان اكبر منك وشقاوه
المهم اضربه ولا تضيع حقك اضربه ولا تخاف من اكبر واحد أنت رجال وهو رجال وحتى لو يضربونك
وياذونك ويدمونك مي خالف المهم لا تنطي لزمه على نفسك تره تبقى طوول عمرك حقك رايح سمعت يووم
انا هزيت راسي بس امي نترت عليه //لا تهز راسك سمعني صوتك گلي اي سمعت ......حجتها بحزم ......
انا هم كتلها //اي يووم سمعت
وصلت للمدرسه وأول فرصه ما طلعت الفرصه الثانيه تذكرت كلام أمي وطلعت وتلكوني جانو خمسه الشقاوة وأخو
وابن عمه واثنين اصدقائهم أنا چنت امشي ويه جهاد ومحمد جيرانه لمن ما اجه واحد منهم لزمني من يأختي وگلي
اسمع لك تاخذ دفتر الرياضيات والإنكليزي وتكتب الواجبات كلهن وبأجر تجيبهن
أنا ما جاوبته بالفرصة الثالثة طلعت للساحه انطاني إياهن وأشوف الطلاب الي يضحك والي مقهور والي يترقب أنا
من شفت هيج باوعتله چان اسمه ضرار أنا لزمت الدفتر وبكل ثقه باوعتله شگيته ولزمت الدفتر الثاني
حاولت اشگه بس هو صار اسرع مني سحبه واجه ضربني أنا استذكرت كلام أمي وگمت علي وضربته
بوكسي اجه بخشمه صار ينزف دم
كلهم انذهلو من الي شافو اجه اخو واولاد عمه انا حجيت بثقه وايدي ضامها متحضر الهم
:: ضرار لو انت سبع خلينه نتعارك وجه بوجه لا تدخل احد بيناتنا لان راح يسمونك جبان وبوخه
هو من سمع اشر لحد يتقرب وتعاركنا واجه المعلم اخذنا للمدير وگال // كل واحد يجيب أبوو
حلينه جنا أنا وجهاد ومحمد نمشي لمن ما صاح عليه واحد انا باوعت شفته ضرار الي تعاركت ويا بس هالمره
جايب جماعته وجاي وياهم واحد شكبره وشسمنه وأكبر من عدهم يعني بالمتوسطة وهو يگلي
- - لك منو البوخه اليوم نموتك
شفت الشر بعيونهم شمرو كتبهم واجوني جهاد گلي خلي نشرد ضياء
بس انا تذكرت كلام امي هزيت راسي وذبيت الجنطه وحچيت ويه نفسي
:: هاي هي اهم شي اضربهم وخليهم يموتوني اقلها ما يكولون جبان
اجو عليه هذا السمين لزم اديه خلاهن وره ويگل الضرار الي ضربته//اضربه ضرار موته الهذا القزم
جهاد ومحمد حاولو يدافعون عني بس ذولاك هواي أنا حسيت خلاص راح اموت دمعت عيوني وانا اگول بگلبي
:: هسه الا اسمع كلام أمي راح اموت وهي هم تموت وراي
ما احس الا هذا السمين صاح اااخ وهذا اليضربني رأسا وگع وانا اشوف سمره ضربته على رأسه بالجنطه اجني
اخواتي تلاثتهن واشوفهن شلون لزمن هذا السمين ويگللي ضاوي اضربه وانا صار بيه حيل عشرين رجال
وياي جهاد ومحمد وصرنا نضرب وهنه ويانه وانوب اكو رمل كبال البيت الي تعاركنا هذني لزمن ضرار وبالرمل
غطسنا ودلال تگله
- - گول أني جبان گول
اشوف ضرار دايخ بس گال //أني جبان
كلتله دلال //شوف ولك هاي لوية إذن أنت وهذا الجاموسة وذولاالجريديه مره ثانيه لو تفكر تمر من يمه
نوذرك ونثرمكم بمكينة اللحم وعود باجر بالمدرسه كولو دارن علينه بنات طيحن حظنا
همه كامو والدم يجري منهم واحنا رجعنا وانا ودي أبوس اخواتي لان نقذني من هذا السمين رغم ما اعرف بأجر
شيسوولي بالمدرسة وصلت أمي تلكتناوسالت دلال
- - ها ماما سويتن مثل ما فهمتجن
دلال //أي ماما وأكثر
سكينه فرحانه //أنا ترست الجنط طابوك وصرنا نضرب بيهم
أني افتهمت ليش هذا السمين وضرار بس ضربنهم داخوظليت اتخايلهم شلون وگعو واحد وره الثاني أمي گالت
- - وج دلال انا مو كلت اضربنهم بخشبه بحجارة مو طابوك
سمره //حقج ماما ما شفتي هذا واحد چبير عبالك جاموسة چا موته الضياء
أمي نشغت وگالت //اسم الله علي وعلى اسمه هذا اخوج حزام ضهرجن مثل ما وكفتن
ودافعتن عنه يجي اليوم الي يدافع عني وعنجن
وامي گلتلي //رووح يمه گل الجدك خلي يروح ويانه باجر للمدير بس سولفله كل السالفه مال ذول الهتليه
ورحت الجدي احنه بنفس البيت بس هو قسمه لان وره وفاة بيبيتي جدي اتزوج وقسم البيت گال احسن
زوجته ما حصل منها اطفال رغم من اتزوجها جانت بعدهي مو كلش جبيره وهي بطبيعة الحال خوش
مره وما تتدخل وتحبنا
ورحت ثاني يوم الصبح طلعت للمدرسه وجدي وامي راحو وياي وصلنه لگيت أبو ضرار جايب ابنه وعينه زرگه
وجهه مورم أنا من شفت هيج استذكرت دلال وابتسمت وخليت عيني بعينه كانما اتحدا
دخلنه ع المدير وصار حجي وسؤال وجواب جدي گل للمدير خلي نسمع من ضياء توك تگول المعلمين يگولون مؤدب
المدير سالني وانا سولفتله وكتله شلون ضرار مسوي عصابه هو ومجموعه وشلون من طلعت اجه ويا ولد چبير ما اعرفه
المدير گال //بس أنت ما مقصر ويا
الظاهر ما گايللهم ع البنات المهم صالحونه
الي عرفته من أمي انو جدي گل الأبو ضرار //هذا الولد الجابه ابنك اريد اعرف ابن من
وامي تگول أبو ضرار دلا على بيتهم بعد ما استفسر من ابنه وبس وصل أمي راح وهدد أهل الولد وگلهم لو حجاره توگع
من السما على ضياء نگول انتو وهذا الشئ كبر جدي بنظر أمي لان دافع عني وصرت اروح للمدرسه وانا واثق بنفسي
وصار الكل يحسبلي حساب حسيت انو الإمام علي ساعدني أصير قوي هيج احساس طفولي وخلاني احبه واتمسك
بي ودائما احب اقرأ عنه وعن بطولاته وحلمه وصبره
وصرت بالأول متوسط لمن شفت هيفاء بت جيرانه حاله ويه بنات واجو وراهن اثنين ولد واحد منهم شمر ورقه على هيفاء
ما اتمالكت نفسي ركضت على الولد شبعته كتل چنت احبها وأدري بيها هي تبادلني نفس الشعور وصرت يوميه امشي وره هيفاءللمدرسه چنت احبها بجنون وهي تحبني
اتذكر عدهم تنور طين فوك السطح اروح واختل بسده وهي تصعد بحجة تشر الملابس وتشوفني احجي وياها كلمتين
أو انطيها رساله أو اشتريلها هديه بسيطه ابساطة أحلامنا
اتوفه جدي أبو أمي وره الفاتحه خوالي دزو على أمي وگلولها ألج حصه بالورث أبوي بوكتها چان شايل ايده
من عدنا واحنا عايشين براتب جدي التقاعدي وخوالي اهل امي دائما ينطوها مصرف ويشترونه ملابس
ابوي چان كل ما يجي يتعارك ويه أمي على مود ابطل واشتغل ويه صاحبه فيترچي يكول تعبت والحمل زاد
عليه لكن أمي تگله
لا والله لطيف لو ادري اگدي واموت من الجوع ما ابطل ضياء وأخواته احنا شمكلفينك
وأبوي يلزم أمي ويضربها والبنات اخواتي يبجن اما انا اصعد فوك السطح اظل احاول اتنفس
بعمق وانا ضام اديه ودي اروح اضرب ابوي
وره ما اتوفه جدي أبو أمي اجه أبوي وظل يحجي ويه أمي بهدوء ويكلها
- - أم ضياء أنا تعبت والحمل زاد عليه وأنتي هالتشوفين الدنيا وانا اريدج وتوكفين وياي
أمي /بس احنا بالطيف ما مكلفينك شي ابوك وأهلي وانا شلون ما كان مدبره العيشه
ابتسم بتعب // أي صحيح بس أنا اخوات البنات بعدهن زغار وهلتشوفين الوكت شلوناته خاف روحه
من الروحات للعسكريه وما ارجع شلون اضمن مستقبلهن
جان أبوي بوكتها عسكري والحرب بين العراق وإيران على أوجها
أمي جاوبته بهدوء وابتسامه//يا لطيف اسم الله عليك بس إذا ما ترجع هي تحصل راتب وبيت وسياره
هو من سمع كلامها لزمها الامي موتها من الكتل وصار يسبها ويسب جدي وهو توه صار اله شهرين
يگلها // بت الكلب ترديني اموت على مود تتسربتين انتي وبناتج اليوم اموتج واشوف منو يطلعلج
من شفت أبوي وهو يضرب باأمي ما اتمالكت نفسي لان بلحظتها شفت واحد ظالم طاغي مستقوي
اجيت صرت اگباله ولزمته من چتفهرهو رأسا ضربني گلي
ها ولك جاي تفكها مني بس الموت يفكها مني
ودفعني
أنا صرت اجر نفس عالي وخزرته هو گلي
وخر منا لا اموتك
انا ما جاوبته بس وكفت كبال أمي واخزر بي
هو گلي //ولك ضياء وخر والله اموتك وأحسبك ما صاير
انا جاوبته كتله ابرود
:: منو أنت وتموتني ؟
رد عليه بعصبيه // انا ابوك ياحقير
هزيت راسي وبنفس الهدوء :: أنت أبوي والله ضحكتني من يمته تذكرت انا ابنك
هو رفع ايده راد يضربني انا لزمتها ويمكن لويتها شفت أبوي لأول مره يرجف
صار يعيط ويتوعدني ويگول
اليوم أنت وأمك اموتكم وانصب فاتحتكم سووا
راحت دلال الجدي واجه يركض
جدي //ولك لطيف شتريد كل ما تجي تسويلك عركه ما تگلي شتريد
ابوي وهو يرجف // اريد اموت هذا السگط هو وأمه
جدي //وليش شسوالك
انا بقيت اخزر بابوي وجدي يگله //فوك ما عايفهم وملتهي ما تگول عندي ولد عندي بنات عندي
مره خلي اسال عنهم وانوب كل ماتجي تصير غضب على هل المسكينه بس كله مني انا الي زوجتك
بت اخوي وخوش سوون بيك خلنك اعمى من مرتك وبيتك وبناتك وابنك الي جنت تتمنى تشوفه
أبوي اشر عليه وهو يرجف //وهذا عسا لا صار النذل ما يشفي غليلي الا اموته هو وأمه
جدي صار يعيط على ابوي //شحدك عار نذل فنك تلزم شعره من عنده صدك ادفنك اهنا وهسه اطلع من بيتي
وكافيني شرك
أبوي /تريدني اكافيكم شري صار بس بشرط بيع البيت وأنطوني حصتي
جدي بتعجب //يابيت ولك
أبوي //هذا البيت بيعه وأنطوني فلوسه
جدي //ولك لطيف مو هذا البيت ساتر مرتك وبناتك
أبوي//وبناتي ذنيج ومرتي
جدي //ولك مو كل شهر انا ادفعلك الاجار
أبوي وكف وياشر باصبعه // هي حجايه وحده البيت ينباع اريد اشتري البيت الكاعدين بي
جدي//ومرتك وابنك وبناتك
أبوي //يأبه أهلها راح ينطونها بيت من حصتها
جدي //الله يطيح حظك ما تخاف من الله حاط عينك على ورث المسكينه
أبوي //هذا العندي لو صدكني أموتها هي وابنها واحسب الله ما خلقهم انا راح اروح وانتم فكرو لو ماكو
والله اسوي حياتهم جحيم گبل لا التحق اريد ترجعولي خبر
وخله وطلع وامي بقت تبچي ثاني يوم رحنا للمدرسه والظهر أجينا لگينا أمي مسويتلنه غدا طماطه تگلا وخبز
وهذا الشئ نعرفه إذا أمي تطلع وترجع لان ما تلحگ تطبخ نتغدا طماطه وخبز واحنا ساكتين بس سكينه
زعلت لان ماكو تمن
ماحجت راحت البيت جدي جابت صحن تمن وأكلته بعدين مثل يوميه رحنا نرتاح أمي العصر صاحتني
چنت اقرأ وگالت // ضياء ماما روح صيح الجدك
ورحت شويه واجينا انا وجدي سلم وطلعت أمي باوعتله وحجت
امي //عمي انا اليوم رحت البيت اهلي وهناك اخوتي گلولي راح ينطوني بيت هو كل حصتي من ورث أبوي
وانا وافقت وهسه عمي تگدر تعلن البيت للبيع حتى تنطي ابنك حصته
جدي /أنتي شتحجين بابا يولي بيتي شنو لطيف يريد يستارثني بالحياة
أمي /بعد عمي ابنك وتعرفه
جدي /بابا ليلى اسمعيني هذا بيتي وانا بكيفي
أمي بقلة صبر //عمي تدري اليوم من راحو الجهال اجاني لطيف شنو گلي گلي اسمعي ولج تعوفين البيت
وترحين البيت اهلج وانا اخذ البنات الا اخليهن خدامات الفوزيه وبناتها وانوب ابطلهن من المدرسه وازوجهن
وأخذ ضياء ومااخليج تشوفينه وأنت تعرفه إذا راد شي يسوي عمي على مود بناتي وابني انا أخذهم وأروح اگعد ابيتي
جدي //على كيفج بابا اشوفه واحاچي شنو بكيفه
جدي انقهر لكن ما بين هذا الشي الامي صاحني وانطاني مصرف للمدرسه انا واخواتي وهو يبتسم ويكلي
انت السبع ورفعة راسي شحده لطيف يوصلك
البنات اخواتي بالمدرسه دلال انقبلت
دار المعلمات من الثالث وسمره وسكينه بالثاني متوسط لان سمره تأخرت سنتين سجلت متأخره وامي تگول
بصف رابع ابتدائي تمرضت بالحصبة وما كدرت اتداوم لذلك صارت هي وسكينه بنفس الصف
ثاني يووم اجه أبوي چان جدي سابقه للبيت سلم وگعد جدي گله
بابا لطيف أم ضياء وافقت تفرغلك البيت وانا لان ما اگدر افارك ضياء راح اگعدهم اهنأ وياي ابيتي
وأنت جيب مرتك وبناتك وتعالو اگعدو اهنا وهذا البيت الك
أبوي جاوب جدي وگله //لا يأبه انا اريد اشتري البيت الگاعد بي أنت تريد تگعدهم عدك بكيفك انا ما اريد
هذا البيت
جدي /هذا رأيك لو رأي مرتك
أبوي بعصبيته //شنو رأي مرتي شحال لو مثل هاي ......واشر على امي......ليل ونهار مگابلتك چا شسويت وبعد
تريدني أجيبها واجي اگعد اگابل هاي وبس المشاكل
جدي /لا والله يأبه هذا فنها وفن أمها أخذت اخوي وما عرفنا ولا شفنه بزره لمن ما بقت بتهم على گلبهم وتالي
اني الما افتهم زوجتك إياها وزين سوون وهسه ربي يحاسبني الولد الطلعت بي من الدنيا أخذته مرته وهو راح
يحرمني من ابنه
أبوي //خصم الحجي يأبه بيع البيت وأنطوني حصتي وما عليكم بيه
جدي /ولك ومرتك وابنك والبنات
أبوي/شبيها احسن مني عدها بيت خومو مثلي
أمي//هذا هو عمي ما طول هذا رأيه انا موافقه بس اسمعني عمي أنت وابنك
باوعو الامي هيه كالت //. شوف عمي انت من لحيت على ابنك وزوجته على مود الولد انا كرهتك وضجت منك
بس من اجه ضياء وشفت فرحتك ودلالك الا
والله نسيت كل شي ومن شفتك شلون مداري وتدافع عنه حسبتك أبوي وهسه احبك اكثر واحترمك لان زوجت لطيف
وعرفت شنو معدنه عمي بيع البيت وانا اروح البيت أبوي
جدي //. هذا شلون حچي
امي بابتسامه //. هذا الحجي عمي ( باوعت الابوي واول مره اشوفها ما خايفه ) اسمع يالطيف من اليوم مالك أي شغل
لا بيه ولا بضياءولا ابناتي كل شي بيناتنا انتهى ولو أنت من زمان ما آلك شغل بينا بس گبل أنت ما تريدنا اليوم (هزت راسها )
اليوم لا يالطيفاحنا الي ما نريدك وذوله جهالك يمك كلهم اكبار وگدامك هسه يختارون لو انا لو أنت
احنا تلقائيا بدون ما نحچي رحنا كعدنا يم أمي وره أسبوعين جمعنا غراضنا وانتقلنا يم بيت جدي الامي جان آلبيت
الي گعدنا بي عكس بيت جدي الي جنا كاعدين بي جان غرفتين ومطبخ جبير وصاله وجان بي گراج امي سوته حديقه
زغيره تزرع بيها خضره وتربي بيها دجاج
لكن هذا البيت الي هو ورث امي من ابوها قديم وزغير بي غرفتين ومطبخ وحمام بينما بيت أهل أمي اقصد خوالي
عباره عن قصر وسيارات ومحلات
چنا كلش ضايجين لان البيت قديم ولان بعد ما راح نشوف جدي انا چنت مقهور وابچي بوحدي لان فارگت هيفاء
و قررت يوميه اطلع من وكت وأوصلها للمدرسه وبالرجعه هم أرجعها يالله اروح للبيت هذا الشئ چان احسن الي
لان أمي سوتلنا نقل يعني ما راح أبقى أداوم ويه اخوها محمد
احنا نشوف امي شلون حزينه ومقهوره عبالنه على مود أبوي بس أمي طلعت ضايجه ومحتاره بالعيشه شلون تدبرها
وره أسبوعين اجانه جدي وجابلنه مسواك وگعد وهو يگل الامي
عمي بعت البيت واشتريت البيت الگاعد بي لطيف
أمي سكتت ما جاوبت جدي مد ايده على جيب الستره چان لابس دشداشة وستره مد ايده وطلع علاكه نايلون ملفوفة وگل الامي
هاج عمي هذني الي بقن من فلوس البيت اخذيهن هذني حقج
بعدين جدي جر حسره وكال //شسويله ال لطيف أنتي سمعتي بإذنج وانا خفت على ضياء
سامحيني يابتي ظلمتج من زوجت ابني الوحدة حيه ماتخاف من الله وهسه ظلمتج لمن ما بعت البيت
ولطيف اشترى البيت الي ماجره عبالي كتبه باسمه طلع كاتبه باسم مرته عاد ذني البقن حقج أنتي وجهالج
واريدج يابا ياليلى تسامحيني ع السويته وياج وتبريني الذمه
أمي باوعت الجدي واخذت الفلوس بدون ما تحجي ثاني يوم جابت عمال وبنو مثل السياج الوحدة من الغرف وفتحو شباك خارجي عرفت أمي فتحت دكان زغير على مود تدبر العيشه وهذا الشئ رفضو خوالي بس أمي گالت إذا ما تقبلون أبيع البيت وأروح الغير مكان وفعلا اشترو خوالي البيت من أمي وشافت النه بيت بمنطقه شعبيه واشترته وطلعت منه دكان وصارت أمي تبيع بالدكان ومن ارجع من المدرسه انا أبيع بي وبنفس السنه نجحت دلال وصارت ثاني دار معلمات والسنه الي بعدها سميره دخلت دار معلمات بس سكينه گالت اريد اكمل وجدي ما قبل بس أمي گلتله
عمي خليها تسوي الي يعجبها ما طول ما مسويه شي غلط وظلينه على حالنه ونجحت دلال من دار المعلمات
جانت سنة1982 تعينت وراها بسنه اتخرجت سميره أما سكينه عادت السادس وصرنا انا وياها سادس علمي
وامتحنه انا طلعت 88وهي طلعت 94وانقبلت كلية صيدله أما انا قدمت على كلية الضباط
أمي ما قبلت گالت ابني وحيدي لكن انا چان أبالي شي أني اروح القسم ًظليت من لمن ضربني ضرار افكر ان أوصله
(ما اريد اذكر اسمه ) المهم قنعت أمي بس هي گلتلي انها ناذره بس اكمل السادس تخطبلي وتزوجني وسألتني گالت
ها ضاوي شتگول اروح اخطب هيفاء
انا بدون تردد //أي يمه روحي اخطبيها
هي ضحكت وراحت هي ودلال وسكينه وانا الدنيا ما وأسعتني من الفرحة واحلامي وياها بمخيلتي اسويهن الها
لكن من رجعن والحزن مبين عليهن عرفت ابوها ما وافق يزوجها انا انقهرت ودخلت الغرفتي أمي أجت وراي
وطيبت خاطري وگالت راح ارجع اخطبها الك ودزت على جدي الي بين علي الكبر وخصوصا بعد ما أبوي عافه
واحنا شلنه عنه رغم ما تركته ودائما اروح واسال عنه واخذه للطبيب
وراح جدي وحجى ويه ابوها الي عاند بالزايد وكايل الجدي // ما أزوجها الضياء لو شما يصير ولو تبقى طوول عمرها
بدون زواج ما انطيها ابضياء
جدي گله /ليش شبي ضياء انت تعرفه والمنطقه كلها تشهد باخلاقه
أبو هيفاء//مابي شي بس مااريد انطي بتي
ورجع جدي هو وامي مكسورين الخاطر وسمع أبوي الي اجانه بعد كل هاي السنين وگال بشماته
ء - - أكيد أبو محمد سامع شي عنك وما قبل ينطيك بنته
انا رديت علي كتله
هو والنعال اذا انطاها الي او لا و من باچر اخلي أمي تخطبلي وأنت ( اشرت باصبعي وبتحدي ) ما اريدك لاتجي ولا توصل
هو زنكني وگلي وهو يبتسم باستهزاء
- - اني أجي واخطب الواحد مثلك اصلا ولا معترف بيك احس بيك انت مو ابني
أمي سمعت هيج تخبلت كالتله //لطيف لهنا وكافي وهسه تطلع منا لا هسه وروح أبوي اخلي هذا الي تكول علي مو ابنك
يكطعك ويخليك فرجه الامة محمد ويطلع صدك مو ابنك
أبوي //تسوينها اعرفج
أمي //ما طول تعرفني اطلع من بيتي
ابوي اتفاجأ من كلام امي واصرارها وهيه ما خايفه منه طلع وأشوف أمي شلون ترجف من القهر ومن كلام
أبوي الي مثل السم
جنت مكسور وانا اشوف الشماتة بعيون ابوي الي يكول عليه احس بيك مو ابني
وره يومين أمي راحت البيت خالي عايش خطبت بتهم نهايه بيت خالي وافقو وبنفس الوكت رادو دلال الابنهم تحسين
وتمت خطبتي على بت خالي - نهايه - وامي رادتني اتزوج بس انا گتلها على ما اتخرج وفعلا مادزينه على أبوي وبس
جدي حضر خطبتي لكن خالي راح الأبوي وخطب دلال وأبوي رد عليهم // الأمر الاخوها وجدها
وتم زواج اختي دلال وابن خالي وبعدها بفتره تزوجت اختي سميره من ولد اسمه فريد جانو اهله تجار وانا ما وافقت
علي لان من سالت عنه كالو الا علاقات نسائيه وانا حاچيتها لكن هي اصرت تاخذه
أمي دائما تكلي // يالله ما ان الأوان تتزوج بت خالك
انا احاول أعطلها بحجة اكون نفسي لكن عندي امل تصير معجزه وأبو هيفاء يوافق لكن هو ابد ما قبل
من اتخرجت ما بقالي عذر اتزوجت بت خالي نهايه والي حاولت بشتى الأساليب تنسيني هيفاء لان كانت هيه واخوها
يعرفون بعلاقتي وعشقي الهيفاء الي ما @گدرت أنساها حتى لمن نهايه جابت اول فرحه الي بالدنيا الي هي نور بنتي
انا كنت أتمنى تكون هيفاء هي الي جابتلي نور
انا ما گدرت أنساها ولا أنسى وعدها الي انو مستحيل تتزوج واحد غيري لو تدري تموت
سكينه صارت صيدلانية أما أبوي مانعرف عنه أي شي بس الي نسمعه من جدي من اروح الهم
من تزوجت ما تركت هيفاء الي تخرجت وصارت مدرسة كيميا والي رفضت كل الخطاب الي تقدمو الها واعرف شلون
تحملت اهانه وضرب من ابوها بسبب رفضها بس هي عاهدتني وبقت محافظه على عهدها سمعت مره انها انخطبت المدرس
وياهم وأبوها جبرها لكن فجاة الولد انسحب وعرفت بمن اختي سكينه انها مفهمه الولد على علاقتنا ولا يمكن تخون الوعد
والولد طلع عد كلمته وانسحب وهذا الشي خله ابو هيفاء بيومها يكفر بيها من الضرب والاهانه
وره 12 سنه من زواجي صار عندي اربع جهال نور بعدين اجاني ولد امي سمته جعفر وبعدها صار توام نائل وايه
هيفاء اختها الجبيره توفت وعافت ولد اسمه ليث جان عمره 4 هي ربته ودارت بالها علي
ابو هيفاء اتوفى بحادث سياره وانا رحت للفاتحه بحكم الجوره وصداقتي لمحمد وره شهرين خطبت هيفاء وافق محمد
بس علي اخوها چان عنده تحفظ لكن بالاخير وافق اتفقت وياهم ان يبقى زواجي بالسر على ما يصير عدنا طفل ما ردت
صورتي تهتز أمام أولادي وما حبيت نهايه تسوي مشاكل ويه هيفاء
وهيفاء وافقت بهذا الشئ وتزوجنا انا ما صدكت هيفاء صارت حلالي وبين اديه وهي من صعدت وياي بالسيارة إلى
ان وصلنه الفندق وهي بس تبجي سالتها
:: وليش البجي
جاوبتني بوجهها الطفولي // ما مصدكه ضاوي انا وانت تزوجنا
بقيت ويه هيفاء الي ردتلها طفل بس رب العالمين ما قسم بقيت عشر سنوات أو شويه اكثر نهايه توفت قبل هيفاء
بخمس سنوات ارتفع عدها الضغط والسكر وانجلطت وماتت
قبل وفاة هيفاء وهيه على فراش المرض كالت بان نهايه أجت وضربتها الهيفاء لان عرفت هي زوجتي وطالبه منها
ان تبتعد عني هيفاء مجاوبتها
إذا ضياء يقبل يطلگني انا اتطلك وفعلا بليلتها واجهتني نهايه بدون أي احد من الأولاد يدري وگالت اختار لو هي لو انا
رغم ما كلتلي رحت وضربت هيفاء رديت عليها
اثنينجن أنتي وهي
لكن نهايه بقت تعيط وتكول // لو انا لو هي
انا جاوبتها بدون تفكير :: هي نهايه هي انا مستعد اتخلى عن كل شي على مودها لان دفنت شبابها وضحت بأعز
شي تتمنا المره الأمومة وجانت تجيها بدل الفرصه ميه بس هي رفضت هسه بكل سهوله تريديني أتخلى عنها ابد ولا تفكرين
تتذكرين نهاية لمن كتلج بيوم زواجنا انا ما احبج وانتي تعرفين بحبي الهيفاء لان ابوج واحد من الناس راح ويه جدي يخطبها
نهايه تبجي وتحجي بعصبيه //ضياء انا زوجتك ام اولادك
هزيت راسي :: اي انتي زوجتي وام اولادي وبت خالي وما ابدل اضفرج بكل نساء العالم لكن توصل يم هيفاء لا
نهايه //ها ضياء يعني تعوفني وتعوف جهالك على مود هيفاء
::الله عليج نهايه شكد صار متزوجها الهيفاء هم حسيتي بيوم انا متغير عليكم لو قصرت من يمكم
جاوبتني وهي تهز برجلها //ما اعرف هسه تختار
جاوبتها بحده :: ما اريد اسمع هاي الحجايه هسه تختار انتي ما تامريني عيب عليج
نهايه //يا هيج تنرفزت راح اعيدها ضياء وهسه تختار لو انا لو هاي الساقطه هيفاء
انا من سمعت غلطت نهايه على هيفاء لزمتها من شعرها وصكيت اسناني عليها وهاي اول مره اسويها
:: والله لو ما ليل والاولاد نايمين چا عرفت اربيج على هذا الغلط وهسه ما اسمعلج نفس صدكي اموتج
نهايه نامت على فراشها وانا بقيت كاعد ونزلت للمكتبه لان اول مره امد ايدي على نهايه الصبح صعدت ردت اعتذر
منها لكيتها مجلوطه بقت بالمستشفى أسبوع قبل وفاتها لزمت ايدي وكوه كالتلي
سامحني
وتوفت وحزنت عليها واتاسفتها لان مانت نعم الزوجه بقيت يم اولادي ما تركتهم وكنت امر بهيفاء ساعات متباعده
وارجع الهم وبعد مرور شهرين قررت أعلن زواجنا لكن هيه رفضت وكالت
خطيه قبل شكم يوم امهم توفت يتفاجئون ابوهم متزوج لا تفكر لو بالحلم هم ما اقبل
:: زين الى متى
ابتسمت وحضنتني // نبقى هالشكل اشو انت ما مقصر من الكل راضيها كلها
آيه مو شاطره باالكيميا وقررت اجيب هيفاء تدرسها وتتعرف على أولادي وفعلا أجت ودرست ايه او وائل
ودخلت وما بين عليها شي إلى ان اصيبت بال ====وبعدين توفت
ضمت عليه مرضها الآخر شهر يالله عرفت كان مستحوذ عليها من سالتها گالت
- - ماردتك تشيل همي يكفي اشوفك مرتاح وياي
دموعي ما بطلن عليها ماگدرت حتى امنعهن وليش امنعهن هيفا عمرها ما سمعتني كلمه مو حلوه لو حاولت تزعلني
جانت دائما مخليه نفسها رقم سته بقائمتي وانا رقم واحد بحياتها اشوف بعيونها كلام وشكوى واذيه لكن بس تشوفني
تبتسم وتعيشني احلى لحظه
حتى من اسافر انا ونهايه والجهال عمرها ما حاولت تعطلني أو تسوي مشكله أو تگلي انا هم رايده اسافر
ااه ياهيفاء تعذبتي وانجرحتي بس كل شي تحملتي بسكته من سالتها //ليش هيفاء
ترد عليه // لان اتذكر دموعك لمن شلتو الغير بيت لو قهرتك لمن خطبوني اهلك وأبوي ما وافق اكو واحد يحب
واحد ويعذبه لو يزعل علي
اتذكر كلامها وضحكاتها وسوالفها وتصرفاتها لمن ما أبو منتظر قطع عني حبل ذكرياتي وگلي
أبو نور وصلنا وين تريد نروح
انا باوعتله كتله //وديني للشط
يعرف طبعي أبو منتظر من اريد شي ما يناقشني وصلنا للشط نزلت كتله
مهدي رووح ارتاح وعوف السيارة
بس هالمرة ناقشني گلي //أنت لا تعتبرني موجود انا راح أبقى بعيد والعباس لو هسه ترميني طلقه انا ما اروح
عفته وظليت واگف وآباوع تمشيت شويه اعرف هو وراي اتمشيت وانا ودي اصرخ ابجي اضرب على راسي
جريت نفس احس بروحي فارغه عيوني ما بطلن دموع وانا احس بهيفاء راحت تعبانه مهمومه مقهوره راحت
وهي عبالها بالنسبة الي شي احتياط ما تدري هي روحي ونفسي وعشقي وحياتي ما تدري أتمنى اموت وأروح يمها
ما تعرف يعني شنو هي بالنسبة الي عبرتي بصدري واحچي وياها بصوت متقطع
:: عيفا ليش عفتيني
حياتي من بعدج عدم ما كلتي شلون راح اعيش
هيفا شلون حعيش بدون ابتسامتج منو يلاگيني ويزيح كول التعب
هيف
التفت شنو هذا الصوت وهاي الحركة باوعت رغم الظلام شفت ظل أتحرك وراح صوب الماي بس سمعت شهگة البجي
رحت ورا لزمته حسيت هيه مره مو رجال لزمتها وهي تريد تروح تغرگ نفسها انا لزمتها بكل قوتي وضربتها راشدي
قوي هي نشغت وفقدت الوعي وصحت مهدي افتحلي السيارة
بقيت بالغرفة وانا افكر بسوسن بكلامها بدموعها بالفقر الي مرت بي
صحيح كلنه مرينا بهاي الظروف لكن الشئ الي مرت بي سوسن أكيد وراها سر وسرچبير
هاي لمحه من بارت قادم /يا ترى منو هاي الي نقذهاضياء وشنو قصتها
أرجو ان تطولون بالكم أكيد. راح تتوضح الصورة
