رواية كسرتني امرأه كامله وحصريه بقلم انين الليل

السلام عليكم

هاي القصه أكثر شي يتحدث بيها البطل عكس أكثر القصص

خليني أعرفكم علي انا اسمي- رياض-مواليد 1974 من سكنة محافظة البصره والدي حجي إبراهيم يشتغل بشركة

نفط الشعيبة هو ما مكمل دراسه لكن اشتغل موظف حاله حال الكثيرين بعد أن دخلت الشركات الاجنبيه بالعراق

في منتصف القرن العشرين

احنا تلث إخوان واثنين أخوات

اخوي الچبير عمران وانا بعدين تجي اختي مريم واخوي عباس وأختي زينب امي ربة بيت بس احيانا اشوفها

تخيط ملابس لاخواتي البنات والدي رغم ما كمل دراسته يعني هو واصل للخامس الابتدائي بس بحكم عمله

في ذلك الوقت كان والدي حتى يتكلم انكليزي واخذ اكثر الاشياء ايجابيه وحب ايطبقها ابيته فهو من النوع

الي يحب التعليم فقرر انو لازم الكل يدرس سواءكان ولد لو بنت وفعلا احنه بدينا بدراستنا وكل واحد بينا قرر

ان يكون طريقه الي هو يختاره ومقتنع بي

عمران دخل تربيه وتخصص رياضيات انا قررت ان اصير ضابط بالجيش العراقي مريم معهد معلمات وعباس

كان كل همه يدخل هندسه وزينب كانت تتمنى تصير طبيبه

راح اوصفلكم نفسي انا بشرتي بيضه بس مو كلش يعني ابيض حنطي

وجهي حلو طولي 173 جسمي لا بأس بي انا بالحقيقه محب للحياة ودائما مبتسم وانا بطبيعتي رزن الي يشوفني

يكول عليه متكبر بس انا هادئ

قصتنا تبدي عام 1996 اليوم هو أسعد يوم بحياتي لان اليوم اتخرجت برتبة ضابط وحققت الحلم الي چان ايراودني

نجحت من الأوائل ما اوصف الكم فرحتي وانا اسمع هلاهل ست الحبايب والجكليت الي أنثر فوك رأسي

رجعنا للبيت بعد ان تسلمت شهادتي ولكيت عمران جايب موسيقى واتلكوني الشباب أصدقائي

وإخواني يهوسون مع العلم هذا الشئ الوالد ما قبل علي لان يكول عيب

وزحمه كدام العالم جاييين موسيقى احنا ما متعودين نرادد الوالد چان الاحترام بيناتنا هو الي يربطنا ابعض

احنه عائله متماسكة متحابين واحد يحن ع الثاني واحد يحترم الثاني هيج علمونا الوالد والوالده

ابونه من يگول كلام نحترمه واذا چنا ما مقتنعيين بي اناقشه بكل احترام الى ان نتوصل الى اقناع الطرف الثاني

طلع تعييني ابغداد ورحت اداوم والحمد لله جنت بدوامي ملتزم بشهادة قادتي من حيث الأخلاق والالتزام والقيام

بواجبي بقيت تقريبا سنه وانا اروح وارجع بين بغداد والبصرة ورغم الحصار المفروض على بلدي

چنه مستورين من حيث الناحية الماديه والدي فتح محل لبيع الأخشاب وعمران اخوي يساعده واي واحد بينا

من يرجع من الدوام يروح للمحل الوالد طلع تقاعد وبذاك الوكت التقاعد عبارة عن إفلاس بسيطه لكن الوالد والوالده

كانو من النوع الي يعرفون شلون يسيرون الأمور الماديه لذلك من شافني الوالد اروح وارجع قرر أن يشتريلي

سياره ومن الوالد يقرر خلص لازم التنفيذ

واشترينا السياره وصرت اروح وارجع بيها بعد ان اشتريت السياره بشهرين تم نقلي إلى محافظتي البصره

ورجعت المدينتي طبعا أفضل لان أقلها اكدر ارجع للبيت وأهلي اكيد فرحو علمود الطريق وخطورته وا وا ،،،

وبديت اداوم والحمد لله اتعرفت على أعز صديقين بحياتي طبعا أصدقائي كثير لكن اكيد يصادفك صديق او اثنين

يكونون الك سند وأخوه

أمجد وهو أيضا كان ملازم اول اكبر مني ب 3 سنوات اشوف أمجد من النوع المبتسم دائما عرفت انو هو يتيم الأم

ابو متزوج وعازل بيت ابحده وعنده أخت متزوجه وأخ ازغر منه كاعد هو ويا انا سألته ليش ما بقى ويه والده كال

احسن يبقى بينا احترام وهم زوجة ابوي تاخذ راحتها وصرنا انا وامجد اكثر من الاصدقاء

بعدين اجه ولد نقيب كان اكبر من عدنا اسمه- وفي -هو من أهل ميسان (العماره ) اهله ساكنين بالريف وعمه

اخو ابو هو شيخ عشيره معروف -وفي- من النوع الي يحب ينكت ويضحك بس بوقت العمل كان هو الرئيس

واحنا المرؤسيين وطبعا الصداقه ما تحلى اذا مو وياها أطباق ام عمران الوالده دائما تكعد من الفجر

والكاها طابخه الي ولاصدقائي وجبه وانا ما أقبل هي تكلي

شنو يمه شايلها عل كلبك اشو بالسياره

وأكثر من مرة عزمنا وفي وامجد البيتنا وهذا الشي كان بأمر من والدي خصوصا عرف-بوفي -بعيد عن أهله

كان دائما يكلي

بابا خلي يجي وياك حتى لو يبات اهنا بالديوانيه حاله حالك

طبعا انا وأصدقائي أكثر من الإخوان لمن ننزل مجازين نحاول قدر الإمكان أن تكون أجايزنا سوو

ونكضيها نفتر ونكعد بالكهوه ومرتين رحنا للعماره ويه وفي

فد يوم الصبح طلعت رحت للدوام لابس كامل قيافتي جاي أسوق السياره وكان الكثير من طلاب وطالبات

الكليات يمشون بسرعه وبعضهم يسولفون ويضحكون انا اباوع الهم ساعات احسدهم لان ما عشت أجواء

الجامعه وأقصد الجامعه الي بيها بنات

انا احس أصدقائي وفي وامجد عدهم سوالف مو خوش سوالف لان أكثر من مرة كلولي شنو انت ما عايش بالدنيا

ويسولفولي على بطولاتهم مو الي يحمون بيها الوطن لا بطولاتهم النسائية مرة سألني

أمجد كلي //شنو رياض انت ماعندك علاقه ما تحب لك وحده

انا جاوبت بدون اهتمام :: لا بالوقت الحاضر ما عندي علاقه بس الحب كان ايام المراهقه

أمجد //اي سولف خلي نتفهم غرامياتك

باوعتله :: ياغراميات كنت رابع اعدادي وهي ثاني متوسط جانت جيرانه وجنا ما نلتقي بس بالعيون

والرسايل لكن فجأه صبحو شايلين الغير محافظه صرت ابجي عليها اشو يومين تلاثه نسيتها

أمجد //وهسه ما تفكر ترتبط

هزيت راسي :: الله كريم ليش لا من الكه الانسانه الي افهمها وتفهمني اكيد ما راح اضيعها من ايدي

أمجد //بس يا صاحبي لازم تاخذ دورة تدريبيه عن كيفية معاملة النساء وأشكال المعامله

انا باوعتله بتك عين ::مخلي الدورة الك انت او هذا وفي أنتم صدك ما تستحوون هاي وانتم تعرفون شكد

وضع الضابط صعب ومحسوبه علي كل حركه

اهنا تدخل وفي //ها شباب سمعت اسمي

أمجد //لك وفي جاي احجي ويه هذا القافل بس لا حياة لمن تنادي

وفي //خاب شنو لا حياة لمن تنادي انت لح علي لح علي وهو ما تحسه إلا اذعن للأمر الواقع

جاوبتهم :: انا مو مثلكم ما استحي أنتم ظلو صايعييين ولا عبالك ضباط احترمو نفسكم والرتبه الي لابسيها

وفي //بالله رياض هسه الي يسمعك شيكول احنه شمسووين

بعد شتسوون بابا احترمو نفسكم احترمو وضعكم

أمجد //هاي شبيك روضي ما سامع المثل الي يكول ساعه الربك وساعه النفسك

هاي الأمثال قنع بيها روحك وبالله خلي نشوف شغلنه لا يجي الأمر ويخلينا بس الربنا

وقرر اخوي عمران ان يتزوج هو مدرس رياضيات واتعرف على بنيه مدرسة أحياء اسمها ليلى من عائله

معروفه بالبصره وراحت امي وأخواتي شافتها طبعا ما حجن عل اعتبار همه متفقين وبعد تلث تيام رجعولنه خبر

انهم موافقين ورحنا وتممنا الخطبه لكن امي من رجعت جانت ضايجه من سئلها والدي كالت

أمها كدام البنات واخواتي وعمات الولد حطت رجل على رجل وكالت انريد بيت البتنا خاص

واذا ما عندكم امكانيه أبوها ايخليلها

عماتي واخواتي أيدن كلام امي

ابوي كال //يصير خير عادي

عمران بس سمع لزم التلفون الأرضي لان بذاك الوكت ما كان اكو موبايل واتصل گدامنا //الوو ليلى

اكيد لان كان اكو كاشف

ليلى //هلو عموري اشلونك لحكت تشتاق

عمران //والله انا كل لحظه اشتاقلج بس ليش امج هيج حجت كدام امي وكرايبي شنو ليلى ما تدرين بأحوالنا

ظميت عليج شي انا جذبت عليج

ليلى // عموري لا تأخذ الأمور بحساسية امي رادت لي بيت وكالت بابا يساعدهم ما بيها شي

عمران بعصبيه //اسمعي ليلى يجوز قبل أرضى ابوج يساعدنه بس هسه لا تفكرين شوفي يا بنت الناس

عاجبج تعيشين وياي وبيت اهلي وبغرفتي أهلا وسهلا ما عاجبج بعدنا ع البر ولا تناقشيني

ليلى //على كيفك ليش عصبي امي ما تقصد

عمران بعصبيه //لا ليلى تقصد والا جان كالت هذا الكلام من راحت امي واخواتي اول مره

شوفي ليلى هذا العندي ما اضغط عليج وانتي بكيفج اليوم فكري وباجر رجعيلي الخبر

وهمينه بلغي اهلج بكلامي

وسد عمران التلفون واحنا كلنه نسمع ابوي كله //ليش بابا قسيت ويه البنيه يجوز فعلا مو قصدهم

عمران بعصبيه // مي خالف ما طولنه ع البر مو لان أهلها تجار تركب فوك رؤوسنا

ودخل عمران للغرفه شفته انقهرت علي لان المفروض يكون أسعد واحد بس اتنغصت فرحته ثاني يوم جان

جمعه ما اتصلت ليلى وعمران بالغرفه والسبت جان دوام رسمي عمران ما داوم بحجة ما عنده دروس

الظهر جنه كاعدين نتغدى وانا توني جاي من الفوج واتصلت ليلى ردت مريم كلتله //عموري ليلى رايده تحاجيك

لزم عمران التلفون بس بلا نفس //الو

لا ماكو شي تأخرت بالسهر وما كدرت اداوم

عادي خلي يكتب لي انقطاع

اي وشنو رايج النهائي

صدك -شفت ابتسامه على وجهه-

وانا اوعدج ما راح تتندمين واخليج أميرتي العصر يمك يا حلو

ورجع عمران شفنا الفرحه بعيونه يمكن حس انو فعلا خطب عرفنا رد ليلى أنها موافقه تعيش ويا هي كايلتله

لو بكن دجاج على حد كلامها ورى ما كملنه الغدا كامت امي وجرتها هلاهل

وابوي باوع العمران وكله

بابا اليش استعجلت بالحكم على الناس هاي البنيه طلع معدنها أصيل الله يهنيك

وابتدت التحضيرات العرس بيتنا طابقين مو جديد بس مرتب ونظيف الطابق الثاني أربع غرف وجوة غرفتين

ابوي قرر ياخذ غرفتي وغرفة عمران ويفتحهن على بعض وانا اخذت غرفة البنات أخواتي نزلن

بالغرفه الجوه طبعا جان اكو حمام فوك بس ابوي كال لا نسويلهم حمام داخل الغرفه

وبدينا نصبغ بالغرفه ابوي كله هاي فلوس تروح انت و خطيبتك تختارون الغرفه والفرش وانا تبرعت الهم

بثلاجه وتلفزيون ورى شهرين كان الزواج عمران رادها زفه للفندق بسبب ظروف الحصار بس والدي كال

ما يصير انت اول فرحتي وكل شي محسوب احسابه وفعلا ابوي سووة عزيمه جبيره ومولود

والنساء سوون حفله ومولود

طبعا انا عزمت الفوج كله والأمر والضباط وجانت ليله حلوة اكيد كانو نجوم العرس وفي وامجد ما شاء الله

ردحو وهوسو بعرس أمهاتهم ما سووا هيج

بعد الزفه وراحو المعازيم جنت تعبان دخلت اريد أرتاح بالديوانيه إجت امي وكلتلي

روضي ماما اكعد مرت خالك ام سامي تريد تسلم عليك

انا كمت وسلمت على مرة خالي اشو امي كلتلي

يا رياض شبيك يمه غير تسلم على بنات خالك سلمى ورجاء شوفهن شلون صايرات كبرانات ويخبلن

طبعا ست الحبايب لازم تخلي بهار ع المركه اشو بنات خالي هنه هنه ما متغيرات من اول ماشفتهن وهنه

زغار الحد هسه صحيح هنه كبرانات بس جمالهن عادي انا هم سلمت ومرت خالي كالت

خلي نعوفه تعبان خطيه

امي كالتلها //شبيج خيه ما نعوفه إلا نزوجه قابل بعده زغير

اي صدك خاله رياض شد حيلك واتزوج انريد نفرح بيك

رديت وانا تعبان //ان شالله خاله

واجه عباس وابوي واولاد عمي اثنين اجو من بغداد وبقى سامي بات يمنا ومرت خالي وبناتها وخالاتي باتن

بالبيت علمود الصبح يساعدن البنات بالشغل

ثاني يوم كعدنا وجابو إلريوك للزلم وابوي ذبح خرفان اثنين للغدا امي وخالاتي هنه الي طبخن العصر تقريبا راحو

وصار تجي الناس الي يباركون اشوف امي إجت جنت كاعد انا وعباس باوعتلي وكالت

الحمد لله والشكر فضت على خير يوم الافرح بيك يمه روضي

اتثاوبت :: لا يمه بعد وكت

امي // شنو بعد وكت لا تحجي هيج اريد ازوجك واشوف جهالك

هزيت راسي :: أن شالله حجيه بس الكه بت الحلال

- - موجوده وانا أمك

عباس //مبين ام عمران منيشنه مره الرياض

:: اسكت عباس شنو تكول منيشنه ما تستحي

امي // يمه اوليدي صدك مثل ما كال اخوك شفت سلمى بت خالك جمال وأخلاق

والسنه مرحله ثالثه ترجمه وبت خالك مو غريبه باجر. اقلها اتشيلنا من نكبر امون عليها واامرها

عباس //ها يمه جا انتي تريدوها مره الرياض لو تخدمج

امي //خاب اثاري ما ينلام بيك رياض من يغلط عليك ويرزلك امشي اطلع ما لك غرض

عباس//ها يمه انا شكلت

انا رديت بعدم مبالاة ::لا حجيه ولا يمي ما أفكر بالزواج ومن أفكر اكلج بس سلمى اعتبرها مثل اختي

ومستحيل افكر ارتبط بيها

امي هزت ايدها //شوف هاي الموده كل الي تحاجي مثل اختي لا يمه إخواتكم غير وهاي بت خالك

:: حجيه من أفكر اكلج يصير خير ليش مستعجله

امي باستعطاف وابتسامه //اي يمه رياض انت شعايزك اشو تخبل ورتبه وعين الباردة عليك وألف وحده تتمناك

بس انا اشوف سلمى تناسبك

انا اريد بس امي تفك مني ياخه :: يمه أفكر وانطيج خبر

امي //الله يكملك بعقلك انا اكول رياض أهدأ اخوانه ويسمع الكلمه ويريد رضانا انا وأبو

وراها طلعت من البيت والتقيت الثنائي المرح وكعدنابالكهوه واشوفهم بيناتهم نظرات وبوجههم كلام انا رأسا بادرت

:: خير شبيكم واحد يباوع الثاني شعدكم خير ياطير

امجد//أبو الروض حبيبي رايديك بخدمه ونعرف انت أبو الأصول وما تردنا

وفي //والمثل يكول لا تطلب الحاجات إلا من أهلها

لملمت حلكي :: اي اي اصبغو وبعد الوين توصلون

أمجد //بعد اخوك روح بمكاني الليله خفر لان شغل ما يتحمل تأخير

انا :... شنو من شغل بالله هذا

وفي //شبيك رياض عدنا شغل مهم ما يتحمل تأخير

باوعت الهم :: ولكم ما تستحوون مو عيب عليكم بالله أحد شافكم وعرفكم شيكولون

وفي //يأبه وخلي يشوفونا باستراحتنا محد إله شغل بينا وبعدين احنا نروح لابسين مدني

أمجد //ها رياض اعتمد راح اكول عمي توفى

انا باستهزاء واباوع الهم صفح :: بالله يا عم منهم ما تستحي بس شسويلكم بيكم مرض وانت وفي

كله من وراك انت الي طلعت عين أمجد بهاي السوالف المكسره

وفي //وداعتك رياض وانت واكف بالسره اطلع عينك اطلعها بس اصطبرلي

هزيت ايدي :: اي مو هي بكيفك حبيبي هاي مسألة مبدأ وأخلاق وداعتك

وفي //هسه خلي وداعتي ويالله علمود خطيه أمجد يطلب اجازه يلحك على عمه كبل لا يدفنونه

رحت للدوام ولزمت خفاره ثاني يوم جنت كلش تعبان ورجعت للبيت احس عندي حراره بجسمي وبداية فلاونزا

وانا بالفلاونزا اتعب كلش

جانت الشوارع مزدحمة طلاب وطالبات وأطفال وسيارات انا وجاي أسوق والازدحام باوجه وراسي يوجعني بشكل

قريب ع المستشفى ال،، واسوق على كيف وما احس إلا ابنيه صارت كدامي وحاولت تدفع السياره بايدها شفتها

وكعت انا لزمت بريك والناس كلها التمت

كمت نزلت بسرعه من السياره وشفت الناس ملتمه وابنيه واكفه تنكت بتنورتها مبين عليها الخوف

وياها صديقتها ساندتها

انا نزلت اريد احجي صديقتها كالت

انت أعمى ما تشوف جا موتتها

انا رأسا وجهت كلامي للبنيه :: اسف بيج شي امشي اخذج للمستشفى

هي باوعت علي وكالت بخوف بس كوه تحجي //لا ما كو داعي -

صديقتها //تريد تأخذها للمستشفى وهي بالأساس تداوم بالمستشفى --اجو طلاب وسالوها--

إيناس بيج شي يحتاج نسعفج

هي سكتت اكتفت هزت راسها بلا

قبل لا تروح بادرت بالكلام :: آسف مرة ثانيه واتحمل كامل المسؤوليه وحاضر الكل شي يترتب علي

هي جاوبت بهدوء //لا مابيه شي --وهي باوعتلي --مرة ثانيه انتبه للطريق

شويه إجت النجده ومن شافوني الشرطه اخذولي تحيه سئلوها اذا تشتكي هي جاوبت لا ما بيه شي

صديقتها كلتلها //يالله إيناس بيج تمشين لو نرجع للقسم

إيناس //لا اكدر امشي

:: اوصلكم اذا تحبون

إيناس // لا ماكو داعي وصلنه

:: انسه انا أعتذر مرة ثانيه -باوعتلي وابتسمت --

ركبت بسيارتي ورجعت للبيت وانا صورة البنيه الي ردت ادعمها ما تروح من بالي رغم احس انو الفلاونزا

ثقلت علي أكثر لكن جمالها ونعومتها سحرتني جانت رشيقه وطويلة وبيضه عيونهاكبار ملونات شعرها كان

قصير مدرج مائل للاحمر الغامق

وجانت لابسه تنورة وقميص بدون حجاب وكعب بدون جواريب كانت مغريه بشكل وصوتها كان ناعم وتجر

كلامها بدلال لايك الها من أتذكر كلامها ابتسامتها كانت تسبب الي قشعريره بكل جسمي ما اعرف منها

او من الفلاونزا المهم ست الحبايب جابت بطانيات ودثرتني وانوب جابولي علاج الفلاونزا

ثاني يوم احس بجسمي كلش تعبان وراسي ثكيل لكن كعدت من الصبح رغم انو انا مجاز اخذت حمام ونزلت

سألوني اهلي وين رايح مو مجاز ومريض جاوبتهم

:: لا مو مجاز لازم اروح للطبابه ويكتبولي إجازة

ابوي كلي // اخذ عباس وياك مبين عليك تعبان

هزيت راسي :: لا بابا ما يحتاج اروح بسرعه وارجع

طبعا جذبت لان ردت اروح واشوف البنيه الي حاولت ادعمها ورحت النفس المكان لكن ماشفتها بقيت واكف

مقابيل المستشفى ما شفتها مليت صرت احجي ويه روحي

:: انا متأكد سمعت صديقتها تكول انو هنه يداومن بالمستشفى

ظليت واكف لكن ما شفتها بصراحه ضجت بس شلون وانا ما اعرف وين تداوم وما اعرف بس اسمها

قررت ارجع ثاني يوم بنفس الوقت ونفس المكان ورجعت بنفس الوقت بس هم ما شفتها صرت متوتر

وضايج كلش وانا أفكر بيها ولازم اشوفها وهم ما اعرف شنو سبب هذا الاصرار وليش خيالها ما يروح

من بالي

الثاني من هنا

تعديل المقال

مدونة مكتبة حـــواء

رواية كسرتني امرأه كامله وحصريه بقلم انين الليل