رواية كسرتني امرأه الفصل السادس 6 بقلم انين الليل

رواية كسرتني امرأه الفصل السادس 6 بقلم انين الليل

وفي

ثالث يوم الخطبة الظهر جنت انتظرها يم المدرسه مو مثل قبل انتظرها بعيد عن المدرسه هالمرة لا يم المدرسه

لان خطبتها واريد ابين للكل انو انا خطيبها وفرحان بيها حلت الطالبات وشفتها طلعت هي بس شافتني ابتسمت

واجت للسياره جانت وياها بنات وهنه كامن يباوعن علي ويضحكن لان شفتها حجت وياهن أظن كالتلهن

هذا هو خطيبي صعدت بالسياره وانا صعدت هي كلتلي// اشلونك وفي

انا بس سمعتها ذبت ياربي يمكن كل عمري ما سامع مثل هاي النعومه الي بصوتها //هلا حبيبتي مشتاق

شكرا وفي

ما مصدك هي گاعده بصفي جانت مدنكه احس عدها برود من جانبي أخذتها بالسيارة وصلنه يم

الشط اشوفها مرتبكه وخايفه

سالتها // حبيبتي شبيج

ردت عليه بخوف //وفي رجعني عفيه هسه اتأخر ويظل بالهم

:لا حبيبتي لا تخافين مريت عليكم بلغتهم نتغده يالله ارجعج

هي بخوف :ها وخالتي قبلت

شفتها من جابت طاري خالتها امتعضت

:اي حبيبتي طبعا نسيتي انتي هسه مرتي

نزلنه من السياره ما اسولفلكم ع المنظر يخبل ريانه خلت كتبها بالسياره جانت بصف الخامس الاعدادي انا سألتها

:انتي بالخامس علمي

هزت راسها : اي بالخامس

:وشلونج بالدراسة

:يعني زوينه

انا بابتسامه /# ها كسلانه يعني

:لا مو كسلانه بس راسبه 3 سنوات

:هههههه بربج 3 سنوات لعد مو شاطره

:اي صاحباتي مرحله ثانيه كليه

:جا انتي ليش

لأن -وسكتت ما كملت كلامها -

انا باوع الها وسئلتها// كملي ليش سكتي

هي ما جاوبت رجعت عليها لزمتها من حنجها ورفعت راسها وكتلها

:حبيبتي شبيج ليش ضايجه شنو الي ضوجج

هي بحزن :ماكووشي

:ريانه حياتي انتي تحبيني

هي راسا جاوبت :لا ما أحبك وفي

اتعجبت من سرعةردها عبالي تتشاقى بس من باوعت بعيونها حسيت بيها جاي تحجي الحقيقه كوه لزمت نفسي

جنا واكفين كعدت وهي هم كعدت

انا حجيت بغضب //شنو يعني تحبين أحد الج علاقه ويه واحد كولي

هي بتوتر //لا وفي مو هيج افهمني

انا بعصبيه //ريانه شفتهم وانتي أمس خطبتج وعقدت عليج واليوم تكليلي ما أحبك

:اي ما أحبك لان كل شي صار غصب عني

:يعني انتي ما موافقه علي واهلج جبروج.لي...

هي قاطعتني//انطيني مجال وفي مو هيج الحجي

:جا شنو فهميني

هي بهدوء ::اي راح افهمك شوف وفي انا عشت كل حياتي مقهورة ومظلومه امي توفت وانا عمري اربع

سنوات وعود ابوي جان يحبها عشتو وبيت جدي الامي زوجوه خالتي كالو تربي جهال أختها وتحن عليهم

اتزوج ابوي اناما واعيه بس أتذكر شلون جانت تكرص خدودي وتضرب بيه ومن كبرت شويه جنت اشوف

شلون جانت تخلي الشغل على اختي امنه وبس يجي ابوي تبدي تتشكى وتكله علينه جهالك ما يسمعون الكلام

وشوفهم شلون بس يراددوني وبس يوصخون ومايسمعون كلامي ولا جني مثل امهم

: ابوي من يسمع كلامها علينه يضربنا بقساوةلان هي مرته وزغيره بس يجي ادخله للغرفه ويطلع علينه

ورة ساعه وهو عبالك ذيب يريد ياكلنه ويظل يضرب بينا إلى ان تجي هي خالتي وتكله على كيف وياهم

وهو رأسا يسكت وتزوجت آمنه وهي صف ثالث متوسط طبعا بمباركة خالتي وظل الضيم علي اكنس

وأمسح واغسل ملابس واكوي واسوي ممات للزغار ولازم اسكت وفد يوم جانت الدنيا شتا كلتلي طلعي

الزوليه مالت الهول واغسليها

رديت عليها // خاله والله الدنيا بارده والزوليه ثكيله ما اكدر اشيلها خلي الدنيا تدفى واشيلها فد نوب

اتقربت مني ولزمت اذاني وكالت //شنو اكول تسووين

::ااخ اخ خاله ليش هيج تسوين بينا احنا مو من ريحة اختج المرحومه شمسويلج وتكرهينه هالشكل

كالت وهي ترجف من العصبيه عبالك فتحت الها باب

::فوك ما حاملتكم وحامله ابوكم فوك ما جاي أضيع شبابي وياكم أنتم بالنسبه الي أعدائي مو جهال اختي انا اكرهكم

وحتى اكره امكم الي ماتت وخلتني اتحمل ضيمكم ياريت من اندعمت اختي انتم جنتو وياها لان لو ما أنتم انا

هسه غير شكل

انا ما افتهمت منها شي بس بوكتها عصام اخوي سمعها رد عليها

::شنو خاله انتي ما تحبين ابوي جا ليش أخذتي هاا خاله جاوبي لا لا تجاوبين انا اكلج ليش لان

جدي وبيبيتي جبروج تاخذين ابوي على مودنا خاف يجيبلنه مرت أب تعذبنا وباعتبار انتي خالتنا

واكيد تحبينا لان احنه جهال اختج خطيه راح ادارينه وتديرين بالج علينه مو

بس انا اكلج خاله انتي جان عدج حبيب ومن ورانا عفتي وجاي تطلعين ضيمج بينه وبريانه هاي المسكينة

ما كفاج ظلمج الامنه الي زوجتيها هسه درتي على ريانه

خاله انا يجي ابوي وأكله وأخلي يطلكج وروحي أخذي صاحبج

هي جاوبته بعصبيه //ولك هيج تحجي وياي وانا الي حطمت شبابي على مودكم

وقبلت أخذ ابوكم واشوف كل أحلامي ضاعت بالهوى

عصام //خاله وندري ما تردين ابوي بس مو ذنبنا أمنا ماتت واحنا زغار وانتي صح أخذتي ابونا بس اذيتينا

وجاي تعذبينا بشي ما النه بي ذنب شنو ما شفتج شسويتي اب اختي امنه على ما زوجتيها وحتى مهرها

بجيبج اشتريتي بي ذهب الج وجبتيلها شغلات ما ينلبسن خلف الله على عمي اجه من بغداد وراح اشترالها من

جيبه ذهب وملابس وهسه جاي تفترين على ريانه تره مو ذنبنا تزوجتي ابونه همه اجدادي همه الي ظلموج

ولو ماخذه حبيبج يمكن ما ارتاحيتي مثل ما مرتاحه هسه أقلها عدج خدامات اثنين وانا النهار كله يا روح جيب

وياروح حط وما تخليني ألفي ع البيت واذا اجيت وشافني ابوي عبالك عدو اله مو ابنه يريد بس كلمه تطلع

مني حتى يكفر بيه

هي سكتت ما حجت بس عضت شفايفها بحركه وانا طلعت الزوليه ساعدني بيها عصام وكلي انتظري

لان هيه طلعت وگلتله اخذ بايسكل علاوي انفخه وابقى على ما يكملونه ومو تركبه لان اتكسره

عصام طلع اخذ البايسكل انا بيومها ردت اكسر الشر رحت غسلتها ابحدي وانا ارجف من البرد

ودخلت سبحت

تعرف جمعه وعطله ابوي بالسوك واجه وجايب مسواك هي

تلكته من الباب وتكله وتبجي

::بعد ما أبقى ولا دقيقه بالبيت لو انا لو ابنك

:خير على كيفج شبي وياج

::أنا من الصبح مكسور ظهري بالبيت واخر شي شلت الزوليه واغسل بيها ومن كملتها صحت الريانه وج

يمه تعايساعديني ظهري انكسر وهذا ابنك اجاني ويصيح عليه يكلي

هيي اختي مو خدامه علمود تامرينها

:جا انا الخدامه

ابنك يكلي //اي انتي ابوي جابج علمود تخدمينه اصلا ابوي لا يحبج ولايريدج

هي صارت تبجي وكالت //اذا ابوك جايبني اخدمكم واخدمه وهو ما يحبني ولايريدني انا ما أبقى اروح لأهلي

تدري ابنك شنوكلي يجي ابوي وأكله هي ما تريدك جبروها جدادي وجانت تحب لها واحد

( هي تبجي وتصيح وتلطم على خدها وتكول )

انا بعد ما اتحمل ابقى هنا هاي وانت عدل وبحيلك وعود هو ابن اختي هم زين ما اخذتو غريبه جان جاب

رجال وكال لكيتها ويا

بقيت بالحمام ما اگدر اطلع اگل الابوي مرتك اتچذب راح يضربني وانا ما بيه حييل لبست واريد اطلع اجه

عصام جايب البايسكل جان برابع اعدادي لزمه ابوي من الباب وبخشبه يضرب بي وكطعه وخله خشمه

ينزف دم أوشك الشفه من جوه وراح ابوي يجيب المسدس يريد يرمي العصام راسا طلعت من الحمام كتله

عصام انهزم فدوه ابوي لا يرميك

طلع عصام قميصه مشكوك وعينه مورمه طلع وانا بقيت ابجي ما اعرف شسوي ابوي لزمني موتني من الكتل

وهي ولا يمها حتى ما فكتني لليل ابوي طلع راح الامنه سئلها عنه انا عبالي راح يطمئن علي هو شيكلها

اريد اموته وافتك منه العار يذب على مرتي سالفه إله اموته يالله ارتاح

امنه حلفت الأبوي ما شايفته اصلا عصام ما يجي لان يستحي من عيال امنه همه عائله جبيره يعني مو

ساكنه ابحدها وظليت بالليل اشوف ابوي وخالتي كاعدين يسولفون ويضحكون ولا ابالهم وانا بس ابجي على

اخوي الي ما اعرف وين راح

ثاني يوم رحت للمدرسه الدمعه بعيني وظليت أكثر من عشر تيام انا بس ابجي واكرب شغل وهي تذل

بيه تحتار شتسوي جانت تساعد بالطبخ صرت لازم اكعد غبشه اطبخ وأحضر الريوك ابوي يكلها

:ريانه زغيرة لا تعبيها

هي تكل الأبوي

::أريدها تتعلم علمود من تأخذ العيال ما تتاذى وانا بس أشبع مسبه شكلك مرت أبوها ما علمتها

ابوي يرد عليها // شنو مرت ابوها انتي امها الي ربيتيها

— لا عيني خالتها ومرت ابوها شنو نسيت شسوا بيه ابنك لوهيه

ابوي سكت ما جاوبها وانا عيني ع الباب بلكي يجي عصام واشوفه وره اسبوعين اجانه ابو المحل

جيرانه وكال صيحي الا بوج وانتي بابا هم تعاي ويا رايدج

رحت انا وابوي جان واكف بالباب ما قبل يدخل باوع الابوي وكله

—ذاك اليوم من ضربت عصام انا شفته شلون امرعده تمرعد ولا عبالك ابنك

ابوي راد يحجي بس الحجي قاطعه كله

— خلي اكمل ابو عصام شفت خشمه ينزف وقميصه مشكوك انا دخلته للمحل غسل وجهه وشرب ماي وجبتله

قميص من ابني وشلت فلوس انطيته على مود يروح العمه

اليوم عصام خابرني ويكول انا ابغداد عد بيت عمي |وباعلي الحجي |

وانتي بابا ريانه يكول خلي تدير بالها على روحها ودراستها هاي المخابره على مود ريانه ادري بيها بس

تبجي علي وگلبها مثل النار وبس أستقر اجي اخذها يمي خليها تطمن

انا كمت ابجي وابوي شفته ضايج ومستحي واتشكر من الحجي رغم عدنا تلفون بس عصام راد يوصل

رساله بعد ما إله شغل ولا ارتباط بأي واحد اهنا رجع ابوي واتصل بيت عمي كامل جان ساكن ابغداد كله

اي اجه واشتغل وياي

بالمحل وما اخلي يرجع الك انت خليك مرتاح ويه مرتك

وبقى عصام يشتغل ويدرس مسائي ساعات اعرف بي جاي الامنه ويدزلي مصرف ومرتين اجاني للمدرسه

وشفته وابد ما وصل البيت ايوي وبقيت انا بس أخدم ما بطلت من المدرسه صرت أخلص السنه بسنتين لان

ما الحك دراسه وبيت والمصيبه هي خالتي ما تقبل أبطل بعدين عرفت انو عصام مخابرها ومهددها اذا بطلت

راح تشوف منه شي ما صاير

ودنكت ريانه لزمت حنجها ورفعت رأسها واشوف الدموع تلآلي بعيونها كمت عليها وحضنتها وكتلها

— حبيبتي يا روحي كافي هسه نتزوج واخليج أسعد وحده شنو تردين يجرالج وهاي مرت ابوج ما عليج

بيها انتي مرتي وانا مسؤول منج شنو تردين تحتاجين تاخذينه مني وشغل بعد لا تشتغلبن واذا حاجتج كليلها

شهر واروح منج خليني ارتاح وانطيني رقم بيت عمج خلي اخابرهم بس بالاول خلي نتغدا ياالله باباتي

هي من سمعت فرحت ودموعها تنزل وانطتني الرقم واتغدينا ورحت انا وياها الدائرة البريد

واتصلنةابيت عمها

الو

—الو السلام عليكم

اهلا وسهلا منو

— العفو مو بيت ابو محمد

اي نعم منو حضرتك

— عمي انا ملازم وفي خطيب بت اخوك ريانه

الرجال رحب من خلال كلامه // اهلا وسهلا بيك هو ابو عصام خابرني وكلي

— عمي الي الشرف ريانه هواي سولفتلي عنكم وعن عصام اذا موجود اتمنى أسلم علي

— اي هو توه اجه من الشغل تعرف هو السنه اتخرج بس بعده ما متوظف هسه دقيقه واصيحه

سمعته يكله عصام هذا خطيب اختك يريد يحجي وياك

الو

— الو السلام عليكم اشلونك عصام

اهلا حياك الله (كان بكلامه برود )

— طبعا انت ما تعرفني بس انا من كثر ما حجتلي ريانه عنك عرفتك

جاوبني بتوتر // ريانه اشلونها

— هاي هي يمي احجي وياها

— شنو طالعين مو عدها مدرسه ؟

باوعت الها وابتسمت // اي توني مريت عليها تره عصام انا عاقد عليها يعني هي زوجتي هاك هاي وياك

هي صارت تحجي ويا وترجف وتبجي بعدين كالت عصام يريدك

— ها عصومي

جر نفس قوي // وفي ما اوصيك دير بالك عليها تره ثق هي النفس الي اتنفسه ولو ما انت خاطبهاجان بنيتي

اجيبها يمي

كتله واباوع الها وابتسم //امن عصام ريانتي بعيوني

خلصنا المكالمه شفت بعيونها فرحه الله شكد تحب اخوها خطيه فعلا متاذيه من واقعها

ورجعتها البيتهم بعد ان اخذتها للسوك اشتريت الها شغلات ورة شهر اجت الموافقه وانا اسبوعين وقررت اتزوج

حب روحي ريانه رغم امي وابوي كلولي راح نخطب كلثومةبس انا كتلهم اصطبرو لا تنسوون توها الموافقه

جايه وخاف ادخل بسين وجيم واجه صباح قنعهم سوولي عرس وزفه حلوة وجان صباح وياي فرحان على فرحتي

بس هو الي احسه فرحان واخذت ريانه وجانت اسعد لحظات حياتي وانا امتلك هاي الحوريه الجميله لكن بنفس

الوقت جنت خايف من رد فعل اهلي خصوصا امي وابوي

ثاني يوم هم اجو ناس وعزيمه ع الغدا رغم حصار بس اهلي جانو يمتلكون كيعان وحلال فكانت مناسباتنا مضرب

مثل بالكرم والناس والشيوخ التجي انا فرحان جنت كل ساع اروح يم ريانه واردن للزلم ما اريد افاركها بالليل

ديوان وناس تجي تبارك ورحت نمت يم اجمل ملاك جنت فرحان بيها وهي أحسها مرتاحه وهم فرحانه ما اعرف

لان افتكت من خالتها او لان عبالها تعيش الراحه الي افتقدتها ابيت ابوها الصبح تقريبا الساعه بالخمسهراندك باب

غرفتنا هي نايمه لابسه سيت نوم أحمر وانا جنت لابس بس الشورت وهي بحضني مثل الظفل فزينا كتلها انتي

ابقي بفراشج وانا أفتح باب الغرفه لكيت امي

افرك بعيوني //ها حجيه سلامات

امي تباوع وتعوج بحلكها //ماكو شي بس خلي مريتك تكعد تسويلنا ريوك انا وأبوك جا انت مو كلت جبتها

الراحتكم وتشوفنا شنريد شعوزنا

::اي يمه تامرين أمر بس تره اول البارحه البنيه عرست واشوف بعد وكت الدنيا فجر

:يا بعد وكت رأيك شنهي نظل يكتلنا الجوع

::لا يمه تتدللين هسه شويه و اكعدها

:اي يا بعد أمك احنا ناس عايله وعدنا هواي شغل

::صار حجيه صار

ورجعت لكيتها سامعه كل شي وتساؤل بعيونها انا لزمتها وكعدتها

فهمتها انا شكد أحبها وأهلي يردولي بت عمي وانا اختاريتها الها لان احبها وما اشوف بت عمي اله اخت الي

وكتلها // اصبري اذا تحبيني

هي ما حجت بس هزت راسها بالموافقه كمت وحضنتها وانا اشم شعرها اليخبل

واخذت ملابس وكلتلي شوف خاف أحد جاي يستخدم

الحمام علمود اسبح لان الحمام مشترك

جان الوكت نص الشهر الثالث طلعت من الحمام ترجف كالت

:وفي لكيت الماي بارد ثلج واتورطت بس اضطريت اسبح

انا ما عرفت اجاوبها ماينه دوم حار بس ليش اليوم بارد

خطيه نشفت شعرها وهي بعدهي ترجف وراحت تسوي الريوك وحضرته انا رحت لكيت السخان طافي كمت

شعلته عرفت بدت الحرب وياي علمود أعقد على كلثوم بس انا ما اريد إلا ريانه حبيبتي ما اخذ اي وحده غيرها

انتظرت الماي يحمى ورحت سبحت وهي كملت الريوك وجابته انا لكيتها محضرة الصينيه ابوي كلها صبيلي

جاي صبته اشو بس ضاكه باوع الها ويخزر ويحچي بتهكم

— عمي شنهي عد اهلج ما تخدرين جاي هم شفتي عبالك ماي وخالتله صبغ

هي بس تباوع وما تجاوب امي ما قصرت تهز بايدها وحاچتها بنتره

— اكلج حبوبه من باجر تكعدين غبشه و تخبزين

هي تباوعلي وتباوع الامي وردت //خاله ما اعرف اخبز والله

— أتعلمين يمه أتعلمين محد اجه من بطن امه يعرف

انا جاوبت //يمه مو يوميه مرت أمين تخبز وتودي

امي //مرت أمين مو خدامه نعم الله عليها كافي حطينالنا جنه بالبيت

ريانه //والله خاله ما اعرف لا اعجن ولا اخبز

امي //عود تجي خلود تعلمج ومرت أمين همه

جانت ريانه تباوعلي واشوف بعيونها استعطاف وعتب (يعني هذا وعدك )

بعد ما خلصنا الريوك شألت المواعين وراحت للمطبخ وانا ظليت يم اهلي باوعتلهم وحجيت

—عود ليش هيج تسوون هاي البنيه شنو ذنبها خطيه هاي وبعدها عروس

امي// عروس خلص العرس جا شنهي تريدها تكعد واحنا نخدمها

—يمه الله يخليج مالي خاطر عدكم يوميه الماي البسخان حار اليوم بارد ثلج رحت لكيت

السخان طافي ليش انا ابنكم لو لاكيني بالشارع

امي //جا ما كعدت الصبح وحمت ماي ع الطباخ بالحطب

—يمه البنيه عروس مو فصليه صدك جذب عاد الخاطري

ابوي بعصبيه وهو يهز بايده //ولك انت خليت بيها خاطر خايب شلدالك تضحك علينا ونعوفها الك

سالته // يأبه بيش ضحكت عليكم

أبوي //انشد روحك بس اخطبها وبيوم ال اعقد عليها انوب أخذ بت عمي وتالي طلعتتي

جاهل كدام اخواني

— لا بويه مو هيج الحجي

—جا شنهي الحجي

—بويه انا ضابط ومن كون أخطب لازم موافقه هم يكولون أمس تزوج واليوم خطب راح تصيربيها شغلة تحقيق

وروح وتعال وانت تدري بالحكومة ما ترحم

—ها الحكومه تكلك تبطل من أبنية عمك

— لا بويه شنو ابطل بس يراد وكت

—اي جا بويه انت عنيلت إلا هاي بالله شعوزها كلثوم

— ماعوزها شي هي بت اخوك وانا ابنك شصاير

وخليت وكمت وصحت على ريانه واجتني للغرفه وبس شافتني كامت تبجي كمت حظنتها وكتلها

—لا تبجين يا بعد رويحتي اسكتي

هي بس تشاهك والدموع ينزلن وما سكتت انا محترك كلبي لزمتها وصحت عليها بصوت عالي

— كافي ريانه كافي ما اسمع لج صوت

هي صارت ترجف من الخوف لان زمخت عليها رجعت حضنتها وحجيت وياها

— انت عروس لا تبجين مو فهمتج كل شي راح ينصلح بس انطيني مجال تدرين بيه اموت عليج

يالله روحي بدلي ورتبي الغرفه شويه وارجعلك يا حلو

بستها وطلعت ورحت البيت صباح تلكاني حظني وكام يهوسلي ويكلي (هله بالمعرس )

و كعدت وسألني صباح

:ها وفي شعدك جاي ولك واحد ماخذ حلم حياته وجاي يمي شتسوي

انى باوعت الصباح وصحت على خلود

— خلود خلود

خلود اجت وحضنتني وتگلي // هلا وفي مبارك بعد أختك منك المال ومنها العيال اأمر خويه

— ما اريد شي بس روحيلنا للبيت واتشكلي للشغل وأعجني واخبزي واطبخي لان امج وابوج

سوو جبهه ضدي

خلود //اوووف ياربي شيردون منك شعدهم وياك انا رايحه

واناضليت يم صباح سئلني //شصايروفي

جاوبته بعصبيه // شصاير من ورة عمك وخالتك وكلوني تبن من الصبح ولا جني ابنهم وتوني أمس معرس

ولك صباح امي مطفيه السخان علمود نسبح بماي بارد وصبح ابوي كب على ريانه على بو ما تعرفين

تسوين جاي والله من شربته ما بي شي واحتاريت وياهم شسوي وهاي بس تبجي و تباوعلي

صباح //على كيفك وفي كل شي يتصلح

هزيت راسي // لا صباح ما شوف وراهم بس الطلايب

صباح //اسمع والبس وفهم مرتك هم تسمع وتغلس

— تتصور اذا غلست امي وخالاتي يعوفنها لا والله امي وخالاتي يلزمنها يكتلنها وينسنها الحليب الرضعته

ما اعرف شكلك صباح راح احجي وياها لا وانوب أسبوع الجاي لازم اتداوم بالمدرسه

صباح //اي خليها تداوم شنو المشكله السنه مخلصه شهرين بعد وكل شي يخلص واذا ع الشغل

ما عليك خلود تكضي عنها

— والله يا صباح ما اعرف شكلك

صباح //لا اكلك ولا تكلي احنه ينطبق علينه المثل انت هس وانا هس ونكسم بالنص

— ها وشلون دبرتها هاي

صباح //خاب شبيك انا معرس عل خلود وانت اخوها وانت عفت كلثوم وانا اخوها

—بس والله صباح مو عبالك أري...

ما خلاني اكمل قاطعني//خاب ادري ادري هذا العشك هيج لعب بينا روح خويه روح يم مرتك خاب

هاي عشك روحك لاتهم بشي تونس وافرح ونسيها كل شي خليها تفكر بس بيك

— أه يا بو علي خويه اتدوهنت وشلون بيه

صباح //خاب شعدك يمي كوم يم مرتك وما لك شغل بالحجي

ورحت لكيت ريانه بالغرفه متمدده انا شفتها كل جسمي رجف ولكم غصن بأن وطري

اجيت يمها وحظنتها ورفعت حنجها وبديت أتلمس بخدها وهي بعد روحي تخبل جمال وخجل

ووداعه وبهاي الأثناء

اندك الباب وقبل ما كول منو اجاني صوت امي //وفي ابوك يكول خلي يجي بساع يلبس دشداشته ويجي

— صار هسه اجي

وكمت احجي //هسه وكتك شتريد

هي تبتسم

— ها ضحكتي متشمته جي ما حصلت شي هسه شويه وارجعلج واعلمج

فعلا بدلت ولبست الدشداشه وطلعت وانا احس بنفسي اختنكت

— ها بويه خير كالو تريدني

ابوي //اي أريدك تمشي وياي البيت ابو يوسف اوليد يوسف طلع من المستشفى وهو بيوم عرسك عاف ابنه

بالمستشفى واجانه وبقى ويانه ومعزب ويه خوانك

أمين //بويه انا اروح وياك وخلي وفي اهنا خاف يجي أحد يبارك عاد يلكا موجود

ابوي //خاب أمين تحجي صدك بس ندور وجوهنا تلكا ختل يم مرته

ابتسمت // جا بويه غير مريتي

اهنا اجه صباح //ها عمي عل خير وين رايح

ابوي //والله على بيت ابو يوسف ابن يوسف طلع من المستشفى وأخذ وفي واروح

صباح //جا ليش تاخذ وفي أخذ ابوي وأمين وروح شنو جاي ع العريس

ابوي هز ايده // هو انا وين شايفه العريس كاعد يم مرته

صباح //جا وحد عاد هو البارحه عرس شو انت وابوي شياب وكارصين يم نسوانكم

ابوي //خاب صباح استح انا عمك

صباح //وانا شكايل جا انت وابوي مكابلين نسوانكم مجذب انا دروح شوف ابوي تلكاه

هو وامي تكول قيس وليلى (باوعلي )

روح خويه وفي روح يم مرتك انا اروح ويه عمي انا وأمين

ورحت يم ريانه لكيتها نايمه انا اتمددت يمها وحضنتها وانا حاضنها عبالك حاضن طفله زغيرونه ريانه

مزيج من طفوله بريئه وشباب صاخب بلحظه تحسها طفله بعددين حبيبه مثاليه بكل معنى الحب ونمت

وانا حاضنها الظهر كعدتناخلود جابتلنه غدا ومن خلصنا رحت اغسل وريانه شالت الصينيه جانت

تريد تغسل المواعين كالت خلود // لا حبيبتي ذكرى تغسلهن وانتي سوي العشا ومواعين العشا

الوالده سمعت لان خلود تتعمد اتسمع امي

امي ردت بعصبيه // شنهي بكيفج توزعين الشغل ذكرى عدها دراسة

رديت على امي // يمه وريانه عدها دراسه أسبوع الجاي تداوم

امي باستغراب // هاا شني تداوم مره معرسه شني تداوم

— يمه هنه أقل الشهرين ما بيها شي

امي تهز بايدها //تريدنه نصير مضحك للعالم جنتهم تداوم

—شنو يمه مرتي تداوم مو تشتغل بالملهى

امي بعصبيه // بسك كافي وفي لا تفك حلكك ولك هذا اول برو وش حال تاليها

— يمه انا قررت ومرتي تداوم ريانه جيبيلي جاي للغرفه

امي صارت تحجي وخلود تهدي بيها

وداومت ريانه ونقلتها للمدرسه الي بمنطقتنا وامي كالت لازم تلبس عباية رأس هي ما تعرف كتلها

— حجيه هي محجبة سنة التجي اخليها تلبس عباية على ما تتعلم عليها

ومشت أمورنا انا اروح اداوم وارجع الكه امي بس تحجي على ريانه وريانه تشكي من تصرفات امي انا

اخلي واطلع اروح اشرب وارجع نص الليل وبس تحجي وياي ريانه صرت الزمها واضربها حييل والصبح

أعتذر منها وهي بس دموعها تجاوبني ومن تعرف امي انا اضربها احس تفرح وره اربع تشهر حملت ريانه

وهي نجحت الصف السادس صادف حملها صعب كتلها

— أجلي السنه على ما تجيبين هي ما عارضت لان فعلا حملها متعب

وبنفس الوكت امي وخالاتي ما شاء الله ما قصرن وياها وانا موصيها تسمع وتدوس

مشت أمورنا وانا بعيد عنها بس احس بيها وبمعاناتها اكول اصبر على ما شويه يصيرون

عدنا اثنين اطفال اكدر اطلع بيها واخذها وياي وين ما أكون

جنت نازل مجاز وريانه حامل نهاية الشهر السابع وامي تلكتني تتشكى من ريانه وهيج مرتك وهيج سوت

وهي هم بقت تحجي وتشتكي من امي انا بعدني بملابس الجيش واكل الامي مي خالف يمه واباوع الريانه

اكلها اسكتي انا اتصرف هي تبجي وامي تشكي وتحجي كمت على ريانه لزمتها كتلها

اسكتي لا تبجيين كافي

امي //عليمن تتبكبك شبعد الها

ريانه وهي تبجي //خاله انا شمسويه انتي ليش تكرهيني

انا //يمه الخاطر الله اسكتي وانتي ولج روحي من يمي

ريانه بنفاذ صبر /وين ارووح وين مليت انا

امي تصيح وتدعي انقهرت احترك كلبي وانا تعبان كمت على مرتي وظربتها بصفحتها من ضربتها وكعت

هي صاحت// الحكني وفي اااخ و ف ي الح اااخ

انا ما اعرف شسوي امي من شافتها هيج صاحت على سلطان يروح يجيب ال جده ام علي وانا ظليت لازم ريانه

هي بعدهي متمدده بالكاع بالحديقه انا شفتها واخذتها للغرفه واكلها

—ريانه بعد رويحتي لا تخافين

هي تبجي وتتلوه //راح أموت وفي ليش ضربتني اني والله من الصبح عدي وجع وأمك بس تشغلني

انا كمت ابجي وياها واكلها //ريانه حبيبتي لا تكولين اموت انتي كل شي بالنسبه الي

وهي تصيح وتكلي// عذبتني وفي الله لا يسامحك (وترجع تصرخ )

إجت الولادة شافتها كالت انقلها للمستشفى ما اكدر الهاواخذتها بالسياره وياي خلود ومرت أمين ورحنا وصلنا

للمستشفى وانا بقيافتي بذاك الوكت دارونا وبسرعه سوولها عمليه رغم الطفل ما كامل واجه ولد

خلوو بالخدج وهي خلوها بغرفه جانت نايمه ما تدري والتعب مبين على وجهها بقيت يمها على ما صحت و

باوعتلي وكوه تحجي //وفي شنو صار وين ابني

حبيبتي الحمد لله ع سلامتج يا روحي البطل بالخدج لا تخافين علي

تحچي بعتب // مو انت الي ضربتني

—تنكسر أيدي اذا أمدها عليج

هي دارت وجهها واشوف دموع على الخد حقها والله حقها كل مره اكول بعد ما اضربها

بس امي وابوي الله يهديهم كل ما اجي لازم يسمموني بكلامهم

اجه أبوها وخالتها وأمنه اختها بقت يمها بالمستشفى وانا خابرت عصام بس سمع اجاها من شافته بقت تبجي

عبالك ابنيه بصف اول ابتدائي وضايع كتابها وتخاف من المعلمه شفتها تبجي وحاضنته وتشم بي وهو

هم يبجي وياها

اسمعه يكللها //ريانه بيج شي أحد ماذيج تره انا اخوج مو مثل كبل هسه كل شي اكدر اسوي

هي جاوبته //لا عصومي اطمن انا مرتاحه وفي يموت علي وعيالي يحبوني

عصام //زين ما طول هيج جا ليش تبجيين

ريانه //ما تدري عصام ابجي عليك جي مفاركتك

وصارت تبجي وهو وياها حاضنها ويكلها //امشي وياي ارتاحي

ريانه //لا خطيه وفي توه نازل مجاز

عصام //مو انتي الحركه مو زينه عليج دى امشي وياي

ريانه //مي خالف حتى لو ما اتحرك المهم أشوفه

من سمعت هيج كبر حبها بكلبي وهي سبحان الله عكس الناس الضيم والشغل والقهر يزيدنها جمال وانوثه

طبعا عصام ما شاء الله صار محامي بس بعده يشتغل ويه عمه بالورشه وجاي يكون

نفسه علمود ياخذ بت عمه

ورة أسبوع طلعنا الولد وابوي وعمي ذبحوله وعزيمة السلف وهو بحضن خالته آمنه الي اجت وياهه

ريانه فرحانه بمصطفى متعجبه بي انا رجعت للوحده جنت اداوم ابغداد وانطاني الأمر اجازه ثانيه لان سولفتله

وضع ابني وزوجتي

من رجعت للعمارة مريت يم الصائغ اخذت سوار لأم مصطفى حبيبتي وأخذت محبس كلش حلو الامنه اختها

لان خطيه عافت جهالها اثنين واجت يمها

من وصلت كالعاده اكيد امي وابوي كالبين وجوههم سلمت بوجهي للغرفه ابوي يكل الأمي

كارص يمها نمونه بس هي جابت ولد

امي //اي نسوان ما ادري شتسوي للزلم تعمي حتى من اهله

انا ولا جني اسمعهم دخلت لكيتها متمدده شافتني آمنه كامت بوجهي سلمت عليها وانوب رحت شفت صطوفي جان

نايم عبالك ملك وهي نايمه اجيت يمها وبستها فتحت عيونها وابتسمت كتلها

— اشلونج اليوم

هي جاوبتني //الحمد زينه من شفتك انت شلونك

كمت طلعت السوار وادنيت يمها آمنه رادت تطلع كتلها

—لا خويه رايدج

لبستها السوار طبعا ما اعرف شنو اوصف الايد الي لبست السوار بس خلي اكول حليب وكسر علي ذهب شيصير

اي هيج ايد ريانه

بعدين طلعت المحبس وانطيته الامنه الي رفضت تأخذه وكالت انو خدمة أختها واجب عليها بس انا كتلها

انا مثل عصام وعجبني اشوفه بايدج هي اتشكرت واشوف فرحه بعيون ريانه الي حضنتني وهي تشمني حييل

انا كتلها //احتركت عشيرتي ما طول كل قطعة ذهب وراها هيج شبكه بيج خير تتدللين

بقيت انزل بالاجازه واشوف صطوفي الحمد لله بده يكبر حالته زينه وبعد هي امي تحجي على مرتي ومرتي

تشكيلي وانا اروح أشرب واطلع قهر كلبي بمرتي الي كتلها بعد ما اضربج بس انا ما كنت عد كلمتي بالعكس

اضربها وهي تبجي وارجع اصالحها وانا متندم وهي تقبل

تدرون فد مره اجيت الدنيا بارده اتلكتني امي

— مرتك كاعده وبعدنا بدون عشا

ريانه //خاله انتو كلتو أنريد حليب وجاي وسويته وخليته كدامكم

امي بعصبيه //ها ولج اتجذبيني

ريانه // خاله انتي كلتي لا تسوين نريد بس حليب او ...

انا ما خليتها كبل بملابسي مال الدوام طلعت من البيت ورحت شربت ورجعت عليها جانت الدنيا بارده

بشكل لگيتها گاعده منتظرتني لزمتها ضربتها وطلعتها بره بطرك الثوب وحافيه بجى مصطفى كمت شلته

وبقيت ابجي ويا وظليت أدعي على روحي واگول

- الله ياخذني

- الله يموتني

هي سمعت فتحت الباب واجتني وحظنتني كالت

— وفي انا اروح لك فدوه لا تبجي گوم اضربني موتني وما أريدك تبجي وتدعي على روحك

انا جاوبتها //انتي ليش باقيه عدي روحي الاخوج شكو باقيه عد واحد حيوان مثلي

هي حضنتني وتبجي //باقيه لان انت روحي والهوى الي اتنفسه انت امي الي ما شبعت منها وابوي الي ما

شفت حنيته واخوي الي احبه وغصبن عليه فارگته انت كل شي انت عمري وحياتي وروحي

صرنا نبجي ا ثنينه وانوب خلت راسها على صدري وهي كاعده تشهك غفت عرفت رغم الي اسوي

وياها بس من اجي تحس بالامان

والتحقت وشافني رياض وسألني وانا سولفتله على مشاكل امي ويه مرتي رياض كلي

::ليش ما تعزل بيها

:رياض أعزل بيها وامي وابوي بعدين ريانه شابه وانا اخاف عليها

:: ابنيلك بيت يم أهلك

— تدري رياض ما عندي فلوس بناء

::زين اذا انت هلكد تحبها لعد هاي سوالفك المكسره ليش ما تجوز منها

—ولك رياض صحيح انا احب النسوان بس ولا مرة تشبه ريانه انا من اروح اروح علمود انسى

تدري رياض انا زلم ترجف مني وهناك من اوصل يمها اصير عبالك مراهق بس ما اكدر احجي لان

امي وابوي يفضحوني ويظلون يحجون على مرتي

:: بس وفي حرام عليك شنو ذنبها وهي يتيمه وخالتها معذبتها واخوها بعيد خطيه

—ادري حرام وما يصير بس شسوي بلكي رب العالمين يسويلي جاره

. :: والنعم بالله هم انت لازم تتحرك يا اخي اخذلك قطعه أرض حتى لو تبنيها شويه شويه حتى لو تبنيلك

غرفه وحمام فكر وفي زوجتك وابنك

— اي هو لازم هيج لازم اتحرك خطيه وعدتها وما طلعت كد كلمتي

رياض لزمني من چتفي :: لا وفي بس هذا الشئ مفروض عليك

وبقى وفي ما بدل حاله ابو رفض ينطي قطعة أرض وهو بقى على سوالفه بحجة تعبان ويريد ينسى وانا بقيت

يمته ما يصير عندي مجال اروح ال حبيبتي بعد ما خلصت امتحانات نصف السنه وقررت تسافر لأهلها انا خليت

إجازتي تبدي اول يوم التطلع بوجهي اخذتها وسافرت انا وهيه

ايناس ما وافقت نسافر سووا بس انا طمنتها كتلها خلي صديقاتج يجن وياج بس هي كالت شكلهم

— كتلها كليلهم خطيبي حبيبي

ردت عليه وهي تبتسم // لا حبيبي انا واثقه بيك انت حبيبي وخطيبي وكل شي الي بالدنيا

وفعلا سافرنا انا وياها ونزلنا بالطريق أكلنه الطريق كله وهي لازمه أيدي عبالك راح اطير منها وانا كل شويه

اباوع الها

:: تدرين شكد احبج ايناس

هزت راسها // اي ادري ( وهي تضحك ) بكد طريق بغداد والبصرة

:: لا وداعتج أكثر واكثر

:لا رياض انا أكثر

:: ها انوسه صرتي تحچين مثلنا تكولين انا مو اني

اي شسوي غير احبك واحب كلامك وكل شي بيك

::بوياااي هسه انتحر اكلج استري علينه خلي اوصلج الاهلج سلامات

قبل لا نوصل أنطتني رقم تلفون البيت وكلتلي يوميه الساعه تسعه الصبح خابرني

وصلتها يم البيت وصلنه العصر وصرت اخابرها يوميه وطلعنا مرتين انا وياها بحجةةصديقاتها مرة المدينة

الألعاب ومرة طلعت ويه صديقاتها وانا رحت وراهم واشتريت الها ملابس طبعا اهلها حجزولها بالقطار

اضطريت ارجع ابحدي للبصره كان اجمل أسبوع يمر بحياتي

السابع من هنا

تعديل المقال