رواية كسرتني امرأه الفصل الثالث 3 بقلم انين الليل

رواية كسرتني امرأه الفصل الثالث 3 بقلم انين الليل

-رياض

گاعد على نار اريد بس الدوام ينتهي وانا افكر اب ايناس وما يقبل خيالها ايفارگني خلص الدوام وطلعت

بين أمنيات وفي وامجد الي ما تخلو من الاستفزاز والاستهزاء المصحوب بضحك

لكن الي خلاني اسكت عنهم ادري بيهم شكد يحبوني ومستعدين كل شي يسوون علمود راحتي وسعادتي واعرف

يتمنولي الخير ركبت سيارتي الي جنت كلش احبها لان هي السبب خلتني اتعرف علئ ايناس الي نستني طعم الراحه

والي خلتني اعيش باحلام كلها سعاده وفرح صراحه ايناس ملكت علي احاسيسي

وصلت للكليه ولكيتهم بعدهم ما طالعين بقيت أنتظر وانا عيني ما نزلت من ع باب الكليه وبدأو

الطلاب يطلعون وانا اباوع ومهتم وشفتها طلعت هي وياها طلاب وطالبات كانت نفس ما هي تسولف وتضحك

وتحرك باديها جانت حلوى ومرتبه ظليت اباوع عليها وما نزلت عيني إلى ان شافتني بقت بنفس وضعها تسولف

ولا كأنه تشوفني واكف مقابيل الكليه جان اكو محل وصلو يمه واشترو وشفتها فتحت باكيت عصير وصارت

تشرب وهي تباوعلي وبعدين راحت ويه صديقاتها وعافتني انا يمكن ذيج اللحظه لو شنو يمي اكسره بس جنت

بالشارع رحت يم ابو المحل وأخذت عصير بارد وشربت بس علمود اشويه أهدأ

وصعدت بالسياره وظليت افتر ما اعرف وين اروح احس روحي طالعه ما حبيت اروح للبيت وانا بهاي الحاله

لان راح يبدي الاستجواب خصوصا وانا من النوع الي بسرعه يبين علي الراحه والتعب والضوجه ظليت

افتر مقهور شنو هاي قصدها هيج تسوي قصدها تهيني وليش تصرفت هذا التصرف

الساعه اربعه العصر رحت للمطعم الي نلتقي بي وفي وانا وامجد لان تواعدو كدامي أمجد يروح الاهله بالبصره

يسبح ويرتاح ويبدل ويجي لهنا

وفي أهله بالعمارة من ينزل ما ندري وين يروح يجي مبدل وسابح والضحكه ما تفارك وجهه أكثر من مره أمجد كله

تعال اكعد وياي لان امجد بس هو واخو بالبيت وابوهم عازل هو وزوجته وعدهم اخت وحده متزوجه أمهم متوفيه

لكن وفي ما قبل يروح وكال لا انا عندي سكني الخاص بالفندق كعدت بالمطعم وره نص ساعه اجه أمجد شافني

تعجب ما سألني لان يعرف ما راح أجاوب بسرعه شويه واجه وفي من شافني بدون مقدمات

- ها روضي شبيك خير

امجد // انا ما سالته لان اعرف ما راح ايجاوب

وفي // روضي مو عبالك انا أمجد تحجي يعني تحجي ولا تكول ما بيه شي تره الكتاب مبين من عنوانه

أمجد //خلي نطلبله غدا لان مبين ما مأكل

جاوبتهم وانا اجر نفس :: لا ما أشتهي

وفي ايباوع الامجد // من كل وعقلك هذا يكدر يأكل إله يحجي الي بداخله يالله ابو الروض سولف شبيك

انا ساكت ما حجيت

وفي //شوف رياض مال افك ياخه منك من رابع المستحيلات وروح

خالتي ام أمجد ألما شايفها هسه تحجيلنا لا هسه اكوم أشبكك بحبل

واخذك اسهرك سهره ما شايفها بعرس أمك

ضحكنا شويه هدئت سولفت الهم شلون تصرفت وياي

وفي// ولا يهمك عود تبيع ثكل عليك انت هم بيع ثكل عليها

رديت باستهزاء ::.شلون بالله ابو العرييف

أمجد //يعني وفي قصده لا تنطيها وجه ولاتروحلها يم الكليه

وفي //اي والله امجيد هم شويه يفكر

أمجد /هاا شكلولك علي غبي

وفي //مكرم الغبي بس عمي شمالكم نفط وشخاط -بعدين باوعلي -وكلي هسه اتغده وارجع للوحده وهناك راح

اخليك أسبوع ما تنزل وبعدين تاخذ إجازتك وتروح تشوفها راح تلكاها هي المتانيتك

أمجد// وانت رياض بهذا الأسبوع فكر زين شوف انت شتريد من البنيه يعني بين قوسين قرر

حسيت بكلامهم صحيح وطلبو غدا واكلنا وشربنا جاي ورحت خابرت اهلي من التلفون الأرضي وكتلهم

راح أبقى أسبوع أكثر لان عدنا إنذار وبعدين انزل مجاز لا يبقى بالكم

ورحت للوحده وانا اريد الأسبوع يخلص علمود اروح اشوف ايناس الي عرفت اني احبها وما اكدر افاركها

بقيت أسبوع وراها أنطوني اجازه سبع ايام وبين تصنيف وفي وضحك أمجد اخذت الأجازة وطلعت بيني وبين نفسي

كلت ما أمر ع الكليه اروح الاهلي واسبح وارتاح وباجر اروح اشوفها من بعيد ما اخليها اتشوفني لكن ما حسيت

إله السياره تأخذني للكليه اي ما اكدر أكون قريب منها وما اشوفها ورحت وكفت عل صفحه هالمرة ما نزلت

من السياره بقيت بيها وانا اترقب اشوفها وشفتها طلعت انا جنت واكف على السايد الثاني جانت بارده

شهر الواحد انا أراقب بالطلاب وهمه يطلعون وشفتهامن بعيد جانت مو مثل كل مرة تسولف وتضحك لا بس

ابتسامه وعيونها تدور عل شي ضايع باوعت شافتني دارت على صديقاتها وحچت وشفتها إجت ناحيتي وصلت

دارت وفتحت الباب الوره وصعدت وراي بدون لاتسلم كالت

- طبعا ات مو خوش سايق لازم تبطل من هاي الشغله

جان صوتها خليط من الفرح والخجل والمفاجئه

انا رأسا حجيت ::اي هو انا جاي أقدم استقالتي

هي بارتباك //ليش شنو صاير

انا جاوبت وانا ضايج ::لأن مو بس انا الي ما التزم بالمواعيد اكوهواي مثلي

بقت ساكته وشغلت السياره وسقت شويه بعدين وكفت وانداريت عليها حجيت وياها بعصبيه

:: شوفي انا مو سايق عد الخلفوج يعجبج تجين تصعدين اهنا يمي أهلا وسهلا ما يعجبج انزلي من السياره

هي بس سمعت هذا الكلام فتحت باب السياره كان ظني تجي تكعد يمي بس شفتها نزلت وطبكت الباب وبقت

واكفه انا من شفت رد فعلها شغلت السياره ورحت وانا أغلي من القهر كنت اضرب بالاستيرن اباوع عليها

بالمرايه الجانبيه مالت السياره اشوفها واكفه والسيارات الي تمر وتباوعلها ودك الها هورن وهي شلون لبس

وشلون جسم جانت لابسه تنوره قصيره جوة الركبه بشويه وقميص ابيض وكوت بطول التنورة وشفقه ويه الكوت

والشعر صحيح قصير بس خصل منه تتطاير وجانت لابسه بوت قصير والجواريب كد طول البوت وباقيه عضلة

الرجل الحد الركبه بدون لا جواريب ولا ستريج والرجل بيضه مو طبيعيه وهي واكفه والسيارات تمر وتفتر من

شفت الموقف فرت بالزايد درت رجعت بعكس

السير وصلت يمها وفتحت الجامه وحجيت وياها :: تعالي اصعدي لا تبقيين بالشارع حتى لو تكعدين ورة

ماردت عليه رجعت حجيت :: ايناس ارجوج تعالي اركبي

شفت بعينها دمعه بدون اي كلمه باوعتلي وفتحت باب السياره و كعدت بصفي

وهي ساكته وانا عين ع الطريق وعين اباوع اللبسها واناقتها وبياض رجليها مشينا شويه

وكفت السياره وباوعت الها جريت نفس وكتلها

:: انا آسف

هي بقت ساكته

رديت حجيت ::اعرف مطعم يقدم اكل يجنن شنو رايج نروح نتغده تره انا ميت من الجوع

هي باوعت علي وكالت //لا ما اكدر لان يحاسبوني بالقسم لازم ارجع ما اريد تجيني حجايه

:بس انا اريد احجي وياج

-وانا اسمعك بس عفيه ما اريد اتأخر

:لازم نكعد ونحجي شلون اشوفج

ليش تريد تشوفني مو هياتني كدامك

اتنفست قوي ::ايناس اريد اكعد واحجي وياج ارجوج

هي باوعتلي وصمت شفايفها //-أمم اوكي باجر تعال اباب الكليه

الساعه تسعه الصبح وانا اطلع وانت احجي كل الي ابالك وهسه رجعني للقسم ما اريد اتأخر

:: ليش مو هسه

هزت راسها // ما اگدر اتاخر ايحاسبوني

هي تحجي وياي لكن ابد ما باوعتلي ورجعتها نزلت يم القسم ورفعت ايدها الي بدون ما تحجي ولا تبتسم

يمكن مقهورة من تصرفي الي ما اله مبرر

رجعت للبيت وانا فرحان واتمنى أغمض وافتح ويجي باجر وصلت تلكوني مريم

**هله الله يساعدك روضي

:هله بيج

ودخلت الهول لكيت امي كاعده فاتحه المكينه مال الخياط دنكت عليها وبستها برأسها

:شنو هاي ام عمران وين بيج وكعدةالمكينه تكسر الظهر

-هله بيك يمه الله يساعدك لا والله هيج عدي شغلات للبيت جاي اكظي وكت (بعدين حاجت مريم )

صبي لاخوج غدا مبين علي جوعان

:اي والله جوعان بس بالبدايه خلي أخذ حمام

حمامنا فوك مشترك انا وعباس وحمام عمران بغرفته بنينا من اتزوج

دخلت الغرفتي وأخذت ملابسي ورحت للحمام سبحت وبدلت ونزلت اتغديت ومريم كالت اصبلك جاي

انا كتلها :: لا ما اريد هسه اتمدد شويه وبعدين اگعد اشرب چاي

مريم // براحتك روضي

ورحت الغرفتي اتمددت وانا كل شويه أتذكر الي صار واشوف صورتها كبالي وتعجبت هيه ليش ما عاتبتني

ولا تنرفزت علي بالعكس جانت هادئه بقيت أفكر بيها بين الفرحان والضايج من نفسي ليش نزلتها شنو

هالتصرف الي انا سويته وياها بيني وبين نفسي كلت باجر بس اشوفها أعتذر الها عن كل شي

ما ادري شوكت نمت بس صحيت على صوت عباس وهو يندهني

- - رياض رياض اكعد اتعشى

كعدت وغسلت وجهي ونزلت ولكيت اهلي كاعدين وحاطين العشا وبينهم قوري الجاي انا ما اشتهي بس امي

كالت //مي خالف اكل لو شويه الليل طويل والدنيا بارده وخاف تجوع وتتعاجز تكوم تكل الاخواتك

عباس //الله ربك رياض الوالده بس تفكر بيك واحنه ولا موجودين

امي //ها ولك عباس اليسمعك يكول اموتك من الجوع انت كبال عيني بس رياض سوده علي مرة خفر مره

يرجع العصر وهل أداري بي

مريم// يمه لا جاع عود اكو دبس وراشي بالثلاجة ويطلعله خبزه ويأكل

بابا //شكوو سويتوها قصة عنتر امه وتحجي ويا إلا الكل يشارك وانت عباس

ما تشوف عمران ساكت وهو الجبير

عباس //عموري من اتزوج وهو ومرته ساكتين سلامه لو نسمعه لوماكو

عمران بنتر//شنو عباس خلصت من رياض واستلمتني بعدين شنو هاي من اتزوجتو وانتم ساكتين لا تتجاوز

بعد مااسمحلك

وخله عمران وكام وزوجته راحت وراه حسيت بعباس اتفشل من رد عمران لكن ما بين بقه يسولف ويضحك

وامي احسها ضاجت من تصرف عمران بس بقت ساكته مريم جابت الجاي وصبت انا شربت وباوعت الامي

تاشر الأبوي الي بادرها وكلها = هذا ابنج واحجي ويا

انا التفتت على امي أسئلتها

:خير يمه صاير شي شنو تردين تكليلي

-لا يمه أن شالله كل خير بس خالك اليوم اجه علينه وسئل عليك راد يشوفك يكول مشتاقلك

:والله يمه انا هم مشتاقله وانتي تعرفين مشاغلي ودوام عندي ما الحك اروح اشوفه أن شالله خلال هاليومين

اروح اشوفه وأسلم علي

- أن شالله يمه رياض هو خالك اجه وكلي جايينةعلى سلمى خوش ناس بس خالك يكول اخاف أنتم تريدوها

لو رياض إله نفس بيها تره ما تنعز عليكم

انا بانزعاج ::يمه انا مو كتلج بنات خالي مثل أخواتي

-رياض وليدي الي تعرفه احسن من الي ما تعرفه وسلمى خوش بنيه ما عايزها شي

:ادري يمه بس ما جاي أفكر حاليا بالزواج

-منو كلك هسه فكر احنه بس نحجي علمود شكلك لابن خالها

اهنا ابوي تدخل

...هاي شنو منج حليمه شنوه بس نحجي وبعدين ابنج كال ما أريدها شنو موقفنا اذا رياض ما يفكر وحاسبها مثل

أخته لا تضغطين علي

ابوي باوعلي = وانت يابه فكر تكمل نص دينك نريد نشوف جهالك

انا جاوبت ابوي ابرود ::الله كريم بابا يالله تصبحون على خير

...وانت من أهل الخير

ورحت نمت كعدت الصبح قريب الساعه ثمانيه اعرف محد بالبيت كلهم طالعين للدوام غسلت بالمغسله ورحت

للمطبخ علمود اتريك مريت بالهول اسمع امي تحجي ويه مرت خالي بالارضي

الام //هلا خيه ام سامي شلونكم أخباركم

-والله خيه رياض يكول بت خالي ما كو مثلها بس هو هسه يريد يكمل دراسات بالكليه الحربيه وتعرفين انتي دوام

والتزام احبيبه ام سامي اذا الولد المتقدم السلمى خوش انسان انطوها ما نريد نكسر بخت البنيه الله يسعدها تستاهل

سلمى كل خير وتدرين بيه امنية عمري بت اخوي تنور بيتي بس شسوي الوكت مو مناسب

واجت امي صبت إلريوك وهي بعيونها آسف وعتب آسف لان امي جانت تريد سلمى زوجه الي وعتب علي لان

ما قبلت اخذها وخشنت خاطرها بس ما تدري امي بيه انو كل شي صار ويصير مو بيدي اصلا انا ما اعرف شبيه

انا تريكت وانا ساكت ورحت غسلت وفرشت أسناني وبدلت ورشيت عطر وطلعت ركبت سيارتي للكليه وصلت

الساعه تسعه ظبط وما اشوف إله ايناس واكفه منتظرتني هي بس شافتني رأسا صعدت بالسياره جانت لابسه تنورة

سوده ضيقه وقميص ابيض وكوت ابيض ولا بسه بوت اسود قصير وحاطه على رأسها شفقه فرو جانت انيقه

بمعنى الكلمه ومكياجها وردي مخلي وجها طفولي كعدت بصفي باوعتلي وابتسمت

- صباح الخير

:صباح النور اشلونج

هي بنفس ابتسامتها

-ماشي الحال امم ات مظبوط اجيت ع الموعد

جان الوقت ضحى كلتلها ::خلي نروح للمطعم اخاف ما متريكه

هي ما قبلت رحنا ع الكورنيش كانت هناك حديقه

رحنا كعدنا على مصطبه وبقينا ساكتين يجي أكثر من عشر دقائق واحد يباوع للثاني انا انتبهت النفسي لان كنت

مبهور بالملاك الي كاعد يمي بادرتها

:احم فرصه سعيده وشكرا الج لان قبلتي نتشاوف

-العفو

:اسمج ايناس مو

-بلي

:وانا اسمي رياض انا ملازم بالجيش

-اي انتبهت الك لان اشوفك دائما لابس قيافتك بس اليوم مبدل

:مو دوامي ع الطريق يعني ما متعمد اجي لابسهن

-لا انا مدا اقصد شي

:انتي مو من البصره

-لا اني من بغداد

:ها وداوميين اهنا

-اي مرحله ثالثه طب

:وكاعده قسم

-يعني

انا باستغراب ::شنو يعني

-يعني ساعات اروح البيت صديقتي رانيه او لقاء وأبقى يمهن يومين أكثر

:هاا

-اي تعرف اضوج ابقى بالقسم

:زين ما يصير تنقلين

هزت راسها // لا ما يصير واني مرتاحة اهنا

بعدين صرت اسولف الها عن نفسي وعن بيتنا وعن وفي وامجد ورحنا للمطعم واتغدينا كانت تصرف عادي

وبكل ثقه يعني كأنما تعرفني من زمان هي انيقه بكل شي بكلامها واكلها بلزمتها للكلنس وهي تمسح شفايفها

ويه كل لكمه تأكلها اما ضحكتها فهاي بحد ذاتها مشكله لان تاسر الشخص

انا ما حجيت وياها بأي موضوع بقيت بس اباوع الها وهي ما سئلتني قريب الساعه ثنتين كالت يالله وصلني يم الكليه

ورحنا قبل لا تنزل حاجيتها

:يمته اشوفج

حسيت بيها متضايقه // خليها للظروف

ودارت وجهه وراحت

ظلت واكفه بالموقف مال الكليه وانا بقيت اباوع الها ورى فتره طلعو الطلاب واجن صديقاتها وبقن يسولفن وهي تباوعلي وتحجي وياهن بس حسيت هالمرة تحجي وهي حزينه لان ما شفت الابتسامه ع وجهها

ورحت شفت أمجد بنفس المطعم وصاحب المطعم كله انو انا اليوم تغديت ويه بنيه وصلت يمه وبدأ وياي اسئله

لان وفي اليوم عنده خفاره وانا سولفتله كام أمجد وكلي // رياض انت شكد غبي

:ليش شسويت

هز ايده // بعد شتسوي

:هاا بالله فهمني

- - لك شفهمك بنيه ضاربه الدوام وطالعه وياك وانت أمس منزلها نص الطريق كاعد تنطيها عدد أفراد الأسره

وأعمالهم شنو انت تشتغل بالتعداد العام

:اي يعني شكلها

- يعني ما تعرف ؟

:لا أعرف بس اريد اتأكد من مشاعرها اتجاهي

امجد دخن جكاره // وشلون تتأكد وانت نازل وجاي اتسولف الها على أخوك ومرته ما تكلي هي شلها

غرض بيهم الحمد لله والشكر ما عافتك بالمطعم وراحت ذبت روحها بشط العرب اكلك صدك قبل ما

انسى انطيتها اسم شيخ عشيرتكم لو لا خاب روضي الصدك يرادلك دوره

انا بقيت ساكت ليش انا هيج شبيه شنو الي صار مو أنتظر تجي بأي لحظه ليش من كعدت وياها ضاع كل الكلام الي

محضره الها مجرد ما شفتها نسيت كل شي

رجعت للبيت سلمت وصعدت الغرفتي كت الهم ما اريد عشا وبقيت اتكلب ما كدرت أنام

وقررت لازم باجر اصارحها بس بشنو اصارحها إعجاب لو حب ما ادري

ثاني يوم صادف الإثنين رحت الصبح ما شفتها كنت افتر بالسياره رجعت يم الكليه بالوقت الي تطلع بي بدو

الطلاب يحلون وانا واكف بره السياره اباوع شفتها طلعت هي ومجموعه من الطلاب والطالبات وهي تسولف

شافتني كبالها اشو هاي راسا دارت وجهه وبقت تسولف وتضحك ولا كأن تشوفني

بعدين واحد من الطلاب أشر السياره كوستر وصعدو بيها هي صعدت و كعدت يم الجامه مال السياره

جانت تباوعلي عبالك ما تعرفني انا ركبت السياره ومشيت اشوفها تسولف تباوعلي كأنما تتحداني بس هاي ما

نزلت يم القسم عرفت اليوم راح تنام أبيت صديقتها

رجعت وانا أغلي من القهر ليش هيج سوت وياي ليش شنو انا بالنسبه الها وبقيت على هاي حالتي ثاني يوم

ما شفتها ولا شفت صديقاتها تذكرت اليوم دوامها بالمستشفى رحت يم باب المستشفى واطلعو الساعه ثنتين

بعد الظهر شفتها تمشي ويه البنات هي شافتني بقت تسولف ويه صديقاتها اجيت يمها وحجيت بهدوء

:ايناس ممكن شويه من وكتج

هي باوعت ومشت عن البنات مسافه واتكلمت بدون نفس

-تفضل

:اريد اشوفج واكعد وياج

-اسفه ما عندي مجال

:مو اليوم ايناس باجر الصبح لا اداوميين

هزت راسها // ما اكدر باجر اداوم لان العصر اروح الاهلي أسافر

انا تنرفزت ما احس إلا صكيت أسناني وحجيت

:شنو تسافرين العصر انتي بكيفج ما كو سفر وباجر الصبح اشوفج يم باب الكليه افتهمتي واذا ما شفتج ادخل

اطلعج من الكليه صار معلوم لو أعيد

بعدهي ما جاوبتني اجه طالب وياها الظاهر شافني وانا احجي وياها بعصبيه

ايناس خو ماكو شي منو الاخ

قبل ما تجاوب انا حجيت

:وانت شعليك ابو الشباب يالله حباب روح منا

كلي //وانت منو وياك انا جاي احجي ويه زميلتي

:زميلتك ما تريد تجاوب اكو شي

وما احس إلا انا دافع الولد وهو رجع علي دفعني والتمو طلاب يفاككونه وطالبات يباوعن

واحنا واحد زانك الثاني والشباب ملتمين فاككونه وهي شفتها راحت ويه صديقاتها والطلاب اخذو الولد

وانا ركبت السياره والعصبيه واصله وياي فوول ما حسيت نفسي إلا وانا بالمطعم كاعد شويه اجو وفي وامجد

و شافوني سألوني بالبدايه ما قبلت احجي بعدين سولفت الهم

وفي //يعني تصرفك رياض ويه البنيه شتسمي خجل شنو والله ما اعرف طالع ويه بنيه وما محاجيها حقها كل

شي تتصرف وياك

أمجد //بعدين شنو تمنعها من أهلها بأي حق تدري بنيه محتاجه مصرف ملابس شغلات وهي بعيده وانت جاي

تكلها ماكو سفر باي حق تمنعها شنو بينك وبينها

:: ما اخليها تسافر بالليل البغداد

امجد //شنو تمنعها تريد تسافر يجوز مجموعه يجوز بالقطار والله انت رياض ما ادري شلونك

وفي //وبعدين شلون تتعارك ويه طالب ناسي انت ظابط يعني لو ما الله ستر واستدعى الأمن

شتسوي دير بالك رياض الحجي مو هيج

::انا من شفته جاي ويتمسئل فأر دمي ما كدرت الزم نفسي

امجد بضحك //خاب عليمن فار دمك انت ما كدرت اصارحها انوب تتعارك

::شنو قصدك امجد تره كلش ما الي خلك

وفي //ما قصده شي امشي ياالله خلي نعطيك اول درس بالجرأة

جاوبتهم باستغراب ::اوكفو وين تردون تاخذوني

وفي //دا امشي وما عليك ابن الاوادم الي يشوفك بالوحدة وع الجنود ما يكول طفله لاعبه بطواريكه

::ما اروح

امجد //والله تروح لو تريدنا نشيلك هسه كدام الناس

:: گلت ما اروح انا مو مثلكم

وفي // امشي ارويض لا صدگني نشيلك مثل ما كال امجد

واخذوني رحنا بسيارتي لان أمجد بايع سيارته أووفي خله السيارة بالمطعم صاحب المطعم صديقنا ورحنا

بالبدايه افترينا وفي نزل جاب شغلات بعلاگه واجه ساق تقريبا الساعه سبعه بالليل وصلنا يم بيت ونزلنا ودك

وفي الباب وفتحته وحده تقريبا عمرها 30 سنه يمكن اكثر سلمت على وفي وامجد وسئلته وهي تاشر عليه

- - منو هذا

امجد // وانتي شنو يفرق وياج زبون

وفي غمز الها // هذا بعده ما شايف الحياةا والحب

هي كلتله // وداعتك أستاذ وفي إلا أعلمه الحب بأنواعه وأدخله مدرسة الحياة

وطكتها ضحكه

اهنا وفي كلي// رياض روح خابر أهلك وطلع الك عذر اخاف تتأخر تبات

جاوبته بعصبيه ::لا شنو اتأخر هسه ارجع اطلع من هذا المكان الموبوء

وفي //دروح خابر عود وانوب اطلع من هذا المكان اذا انت رجال روح

هناك التلفون (واشر على غرفه )

انا دخلت للغرفه لكيت بيها جربايه وقنفه وميز علي تلفون طبعا اتقززت احس بقذارة المكان

واتصلت طلع عباس

:هلا عبوسي

-هلا رياض شنو اليوم وين

:اليوم عزمني أمجد وبقينه انسولف اشو هسه خابرنه وفي وكال هو تعبان راح نأخذه للمستشفى لا تقلقون علي

خاف اتأخر لان مثل ما تعرفون هو بعيد عن أهله

عباس //هاي هي هم زين من انطيتنا خبر تدري امي تكلي روح دورعلى اخوك عبالك اخوي بالروضه

انا ضحكت وكتله ::بعد امي ما تعرفها

عباس باستهزاء // انا الي اعرفها

وسديت التلفون والتفتت اريد اكوم وشفت كدامي وحده لحد الآن من أتذكرها أظل ارجف من جمالها اريد اكوم

هي حضنتني بايديها اثنينهن و كعدت بحظني انا صرت ارجف من جراتها

جان اسمها جانيت هادئه وحلوة كلش عيون وشعر وجسم ياخذ العقل كانت مو بس حلوه ومريحة جدا

كلامها تجره بهدوء ويا نوع من الدلع الي يلوك ويه جمالها لكن ما يلوك ويه عملها بليلتها فعلا دللتني بحيث

انا ما اعرف شنو صار بيه بذاك الوكت نسيت نفسي ونسيت موعدي ويه ايناس نمت يم جانيت ما حسيت على

روحي إلا قريب الساعه ثمانيه الصبح وانا نزيت اتذكرت موعدي ويه ايناس فزيت ما اعرف شلون لبست ملابسي

وطلعت لكيتهم كاعدين ويتشاقون وانا بس أخزر بيهم وأصيح عليهم

// بسرعه كومو سر،، لا اروح واخليكم

وفي /على كيفك ايو الروض الدنيا ما طايره تلحك

امجد وهو يغمزلي // ما طول ارتاحيت رياض خليك اهنا واخذ بعد دروس اهنا فعلا الدروس يخلن الواحد يحس

بنفسه ملك زمانه

جاوبته ::لا يحس بنفسه حمار وهسه تمشون لو اروح ابحدي

وفي //نروح عمي احنه اصحابك بالسراء والضراء

وطلعنا وصعدو بالسياره وانا اسوق بيها أسرع ما يكون نزلت وفي يم المطعم وأخذت أمجد واحجي ويا

:شوف امجد بس اوصلك ع البيت اجي وياك أخذ حمام وتنطيني ملابس نظيفات لان متقزز من روحي من هاي القذاره

وامجد بس يضحك ويكلي // ياقذاره هاي بس تدري طلعت مو هين ياصاحبي

انا ::دا أنجب ياما تستحوون

أمجد /ننجب ما ننجب المهم ياصاحبي اخذت اول درس ونجحت بي بامتياز

انا ::امداكم وامده درسكم الطايح حظه فرحانين باسوايتكم

امجد //شوف هاي اسواياتنا هسه بس اتشوفها الايناس راح تكللها وبدون مقدمات ولا اذا تسمحين او ممكن

راسا بس تشوفها راح تكللها (احبج)

هزيت ايدي على كلامه وانا أسوق وامجد يضحك ويتشاقى إلى أن وصلنا البيتهم

الرابع من هنا

تعديل المقال