رواية لسنا ابرياء الفصل الثاني 2 بقلم هيلانا
لـيان:
دخلت اصابعي بشعري بعدة مبلل توني طالعة من الحمام وكفت گدام المراية انشف بي
اخذت المشط جمعت شعري على جهة مشطتة ولميتة ..گعدت على جرباية فتحت جهازي اگلب بي
اضيع وقت شوية و اصحصح لان من اسبح احس بنعاس فضيع .. جاي اگلب طلعلي فيديو شرح عن سيارات وهيج
ابتسمت واني اذكر شلون رگعت باب سيارتة و بقة طول اليوم يخوزر بية الزلم سياراتهم اغلى من نسوانهم
گمت طلعت شالي لفيتة عدل ونزلت جوة البيت هدوء الساعة بالثنتين الصبح
احب اكعد هيج وكت و عقلي متبرمج گبل افز بالثنتين خليت القوري على طباخ
وكعدت فتحت لابتوب مالتي اي فكرة تجي ابالي اكتبها..ماعندي شخص اكدر اصرح عن كلشي ويا
اكو افكار و اشياء تبقى حيه بداخلي ابقى اعيد واكرر وافكر بيها اكتبها افضل
: كـاعدة؟
التفت لصوت مصطفى واكف باب المطبخ ومرتكي عليه و بيدة باكيت جكاير
هزيت راسي بأي تقدم وگعد اگبالي ورث جگارتة لازمها بصبعة الابهام و سبابة
اني الي اعرفة الس يدخنون يخلون الجكارة بين اصابعهم شلون يشرب هذا
مصطفى: تردين
ليان: طبعاً لا وين اكو واحد عاقل يدخن قبل الفجر
مصطفى:رحمة الله والديج..كوب جاي اذا ماتصير زحمة
ليان:ثنينهن طبگ
ابتسم نص ابتسامة وحجة بهمس: اموت على على اي ثنين ينطبگن
گمت بنزعاج من حجية يضوج ابالة فكرة ويترجمها بحجي ثاني بحيث اي احجاية تنگال گدامة يفسرهة ميت تفسير
گمت شعلت النار وخليت القوري احمي الجاي نداريت عليه من حجة بتسائل:شعدج گاعدة من غبشة
ليان:اصلي
ارتكة على ايدة وقلص عيونة : هذا رياء لو أيمان
صبيت جاي وباوعتلة بستغراب: مافتهمت
مصطفى: يعني هيج مؤمنة لو كلاوات
ليان:رياء لو ايمان ماعتقد الك علاقة بي هذا شيء بيني و بين ربي
همس بصوت وصلني:فدوة لربج
خليت الكوب گدامة ردت اطلع حجة بسرعة: تعاي كملي گعدتج شعدج انهزمتي ترة ما نخوف
اجيت اگلة الگعدة وياك مزعجة و مارتاح بس استحيت مادري حسيت اذا واحد يگلي هيج فشلة
رجعت گعدت بمكاني مغلسة عنة خلي سوة المطبخ دخانة ويشرب جاي يطلع صوت مزعج
گبل لا احجي فاجئني بسؤالة: ليش مازوجتي
رمشت مستغربة رديت بهدوء:مالگيت شخص المناسب
مصطفى: شنو المناسب الج
ليان: مختلف
حجة وهوة يطفي جگارتة بالكوب : يعني شلون تردينـة
رديت ببتسامة مركزة على شاشة الابتوب ما اباوعلة :يعني واعي و فاهم الحياة حنين مثل بابا اريدة رجال مسؤول
همم وضرب على طاولة بأصبعة رفعت راسي :ماعشتي قصة حب
رديت وعيني بعينة :لا
مصطفى: شعجب دكتورة ومريتي بهواي مراحل
ليان:انت تعرف احنه نعيش بمجتمع شرقي عادي الشاب يحب بس البنية لا يحكمها العيب و الاخلاق لان الاهل يشجعون الابن بس البت تثور القضايا عليها و تطلع الجملة الشهيرة "العار" وناس تحجي عليها دايحة و صايعة
خطيئة مال المرأة ماتنغفر وبنظرهم كل فعل عاطفي حتى لو جان شريف و بريء عيب
مصطفى: يعجبني تفكيرج دكتورة
ليان : هذا الواقع الماينكر بالحقيقة بشرع الحب كلنة يهود
سديت شاشة الابتوب خليت ايدي عل طاولة ورتكيت عليها : تعرف اكو نوعين من البنات الاهلها موفريلها كلشي و مخلين ثقتهم بيها بس تنجرف للخطأ
صفنت وابالي يارا ليش اجيب مثال بعيد اختي خير مثال وشكد حاولت امنعها بس ما تنرد
بللت شفتي بتوتر رجعت كملت بسرحان : و العايشة بسجن وكلشي ممنوع عليه هاي الاشياء تجبرها تعيش علاقات حب بسر
وتضم اسرار بالغرف مظلمة عن اهلها وبعدين اتغلط وممكن هل شي ينتهي بموتها
رد برود و كأن ليگولة شيء مسلم بي و بقناعة: بس البنية شما يكون تحتاج عاطفة
ليان: مو مبرر العاطفة التجي عن طريق حرام و غلط هلاك مو علاج
مصطفى: اكو بيهن الاهل يجرونهن لهيج اماكن بسبيل المصلحة و الفلوس
عگدت حواجبي بستغراب:"يعني شنو ما نوصل لهيج شي ماكو اهل هيج يسون
مصطفى: لا اكو واصلين تشوفين ظاهر المجتمع بس القاع اوسخ
نداريت عليه حجيت بفضول : يعني شلون احجيلي ماصدك
ابتسم بتساع وگام :لا بعدج عنونه موزينه هيج مواضيع عليج اني اروح انام
عبست الخبيث عيني ضلت وراه وفضولي زاد اندار فجأة توترت
جانت عينة على الكوب گدامي حجة بخبث:" عنـدمـا ترتشفين الشـاي مـن الذي يقول اه اولاً
الـكوب ام الشـاي"
صفنت شوية افكر بالجملة حسيت بالة وصخ وعينة على شفايفي
گمت برتباك اخذت جهازي ومريت منة بسرعة صاعدة فوگ
مر الوقت بسرعة اليوم جمعة ولان عطلة تحسها مستعجلة تمشي بسرعة و بسرعة يخلص الوقت
مبايلي بيدي الساعة بـ11 الظهر صوت الجامع مسموع بالبيت لان قريب بابا راح يصلي هوة وسلام
ومصطفى مدد بالصالة ويلعب ببجي ومغلس عن صلاة شلون يگدر يسمع الاذان و مايگوم راگبة شيطان مبين
فتحت باب الغرفة عيني عليها نايمة رحت للشباك فتحت البردة و تعبت الغرفة بالضوء
وكفت يمها ندستها: يارا ياراا اكعدي صار الظهر
حاست بمكانها ولفت راسها بالبطانية سحبتها منها
: اكعدي لجج كافي نوم
گعدت گالبة جهرتها :شبيج شلون ما انام بعد هسه غير عطله نام ننطمر
گامت تحجي وتأشر بأيدها :تدرين اني حتى اذا اموت هم تجين يم گبري دگولين كافي كسل اكعدي حتى بموتي ما تخليني ارتاح
ليان :اي على طاري الموت كومي صلي
يارا :صلاة ايش ساعه بـ11ما صارت بـ12بعد وقت
ليان :لعد وصلاة صبح ماخذة أجازة ما تصلينه
حجت وهية داخلة الحمام : يمعودة يا صبح اذا أصليها هسه حتى شيطان يعفط الي
ليان :لا إلاله إلا الله وتالي وياج بطلي هاي المفردات
طلعت تنشف بوجها باوعتلي بنص عين اخذت مبايلها تأففت اول ما فتحتة
يارا: هذا العار ليث من وقت ما حضرته وهو ولا راسلني
ليان : وين يراسلج على اقمار اذا انتي حاضرته
يارا : ااي شسوي وجه البعير اخلاقه زفت
ليان :على اساس اخلاقج شلونها؟
يارا:خرب يومج محسستني مايا خليفه شبيه هاا
يعني يعني مثلا مثلا اني اسأل ليث شنو لون ملابسك داخليه ..لو لباسك حلو هااا؟؟
خزرتها وحجيت بنزعاج :هذا تفكير وحدة ..
قطعت گلمتي ماريد اوسخ السـاني باوعتلي وحجت بضحكة :احجيي ليش سكتي
ليان : دنزلي يالة مو ترجعين تنامين
.
.
يـارا
طلعت ليان مزعوجة لميت شعري رتبتة وبدلت ملابس نوم و نزلت جوة ليان بالمطبخ تسوي غدة
واني گعدت بالصالة اباوع لمصطفى ممطول ويلعب ببجي نايم على بطنة
همزين جنت احس روحي الكافرة الوحيدة و الطالعة عن الطريق هنا نوب اجة ابن عمي طلعني كسر هو اضرب مني
گعدت بعيد عنة شوية حجيت ببتسامة: صباحوو صوفي
رفع راسة مبتسم : صباح النور
حجيت بضحكة:شو ما رايح للجامع
مصطفى:الجامع مال شيوخ وناس خيرة مو مال عفطية
ضحكت عليه :صراحتك ضيم ابد ما تجذب
نصة وهو يلعب گالهم نزلو حاويات ويا هوسة مدري عرب يمكن مو عراقين
حجة وهوة مندمج باللعبة: قابل اني اغشج بت عمي
يارا:ههههههه همزين نفس التفكير احنه
حجة ليان من المطبخ:شبيه الشي منجذب اليه
سمعها وضحك أشر عليها : هاي اختج تاكل كتب لو تقرة على كل شيء تذب مثال
يارا:اي ليان تمشي وتشمر حكم ماكو واحد
اخو خيتة يخلصنه من فلسفته الزايدة
مصطفى : ولا يهمج براشدي افرمت مخها
يارا:اسكت لا اسمعك ههههههه
ضلينة گاعدين شوية نوب گمت ساعدت ليان بالغدة ورة ما اجة بابا وسلام
هوة سلام صدك سلام فلك طرة يطگ بالگاع الله يرحمك عمي على هذا الانتاج الحلقومي الي خلفتة بس مشكلتة متكبر خفة
كعدنه بالصالة نتغدة و سالفة منا وسالفة منا لحد ما گملنة لمينة الماعين
ليان گالت اريد اروح للمول تشتري كم شغلة ومصطفى جان طالع فگالها بدربي نروح سوة
جانت تريد تروح وية بابا بس تعبان كالهة ابن عمج ياخذج نعفست ملامحها بس مشت ويا
ضليت بالمطبخ انظف بي و بابا راح ينام كملت وطلعت سلام گاعد بالصالة يراسل
كل شوية ومبتسم بأتساع وما شال عينة ابد عن الشاشة بس لا عاشگ الاخ عابت عاشگ منو
اوف عزة اني عجبني ولا اخلي يصير لغيري والله حتى لو اسويها
دم انهي عليه قابل شكوو بيها
يعني بس ابن العم ينهة على بت عمة انيهم اريد انهي على ابن عمي
بس مو هسه خل بالاول اتاكد منه خاف ماعدة شي يجوز
لازم ابلش اخطط وأتكتك لحد ماوكعه بحبي
عفته ورحت لغرفة فتحت تليفوني أشوف ليث النذل حتى ولا مراسلني
السافل جان يكول احبج الجذاب وجهه الكيزر
كعدت اتصفح برنامج مال كتابه بس اني انشر واعلق بي وعندي صديقات بي حتى ليث الجلب اتعرفت عليه هنا
.
.
ليـان
نزلت من سيارتة ماعرف ليش بس اريد اشرد ابد ما ارتاح من اكعد ويا
صاح علية گبل لا اعبر شارع نداريت حجة ببتسامة
: رايح بشغلة اكمل وارجعلج
هزيت راسي و مشيت دخلت للمول احب اجي لوحدي حتى اخذ الاريدة وارجع بسرعة بدون تجرجر
شتريت كل الي احتاجة و فتريت بالمحلات الاحبها اخذت كهوة من الكافتيريا و افتر و ارفه عن نفسي
لحد ما اجة مصطفى گال خل نروح ناكل و راهة نرجع للبيت ماعترضت اني ماتغديت عدل وهسة من التفرفر جعت
رحنة للمطعم گعدت گبالة و هوة يحجي وية الويتر طلب باجة
ضليت صافنة عليه اني كلشي اكل بس باجة وبالمطعم لو اموت ما أكلها شلون
شوية وجابو الطلب خلو بالنص نوب جايب راس واسنونه طالعه ومكشر بوجهي احسه ناصبة عليه شنهاي
باوعت عليه بصدمه : شنو هذا مصطفى
باوعلي ورجع باوع لباجة : اكل شنو يعني
ليان :تحجي صدوك مااكدر أكول هنا اصلا هي شلون تنوكل هيج
كفكف اردان قميصة وحجة بضحكة:خليها بالجنطة وبالبيت اتفاهمي وياها
عرفتة دا ينكت بقيت ساكتة بس اتأفف واخوزر بي نوب حس على دمة رجع طلب كباب والباجة حولها لجهتة
كملنة ودفع الحساب وطلعنه اجينه بالطريق وهو مشغل شعر لنزار قباني بس شنو من شعر خادش لحياة
كله ارفعي ثيابك اريني فخديك وتأوهي
استغفرالله اني عرگت من الخجل حتى الماعدهة شي من تسمع هيج شعر تنسحل سحل روحه دايرة وجهي على جامة وساكتة
وهو ولا عبالك بايع ومخلص لا مستحه ولا خجل حتى طريق صار شطولة بس اريد يخلص
شوية وصلنة نزلت قبلة بسرعة دخلت جوة لگيت يارا تغسل ملابس بالحمام تفاجأة
ارتكيت على باب حجيت بضحكة:منج من شيطان شكو تغسلين
ردت بنزعاج:ترا لا عبالج الشطارة كاتلتني بس بابا كال غسلي ملابسي وكتله دقايق واكوم جنت ارسل باليث العار انوب طف الراوتر عليه كال كملي وارجعي كنكي قطع لحظه عليه هستوني جنت ارزل بهذا العار
باوعتلها بستغراب :هو مو حاضرته شلون راسلتي
يارا:مو اني هو مسوي حساب وارسلني وكاتب طلعتي سلبيه يارا ما توقعتج هيج فأني منا محملة عليه نهديت لج عليه
كتلـة :يا ابو نسوان يا عار انت على اساس ايجابي صلعتك جنه صلعه امون وخشمك صبانه عشرة مدري، شلون حبيتك بس ها لعلمك اصلا مااحبيتك هو انت تنحب جنك يربوع مهلووس همزين الله خلصني منك ابو كرش
جانت تحجي بعصبية وتصفط نوب وكفت وحجت
:-بس شنو بابا خرب لحضه عليه ومااخلاني اكمل خرا بحضي
ليان:ليش انتي شخليتي برجال هاي حتى اذا عدة نية يراضيج بعد مستحيل
يارا-:طيط دا خلي يطير هسه اكمل وارجع اطيح حظه
ليان:حبيبتي وين تلكي هسه تلكي منهزم واحتمال مالحك يلبس نعاله وعافة بالمحادثة من سرعه
يارا:احطه بحلكه هو اصلا نعال وهم نعال قديم كافي اريد اجدد بعد ما طول ريحت بالي منة
ليان:اكول لبابا عليج بطلي هل سوالف
يارا:اي عادي كولي اصلا اريد اگبل ويا سلاموو
ليان:هااا عزلتي المواقع ورجعتي على واقع
يارا:اهووو حسستيني حابة ميت واحد همه بس ليث العار ومحمد طلع مطي كل خير مابي ومرتضى مهتلف مايفيد وباقي مااذكرهم بس اكيد مابيهم خير اني دوم حضي يجيب زبايل عليه
ليان:مو حضج حبيبي بس الان الي دا سوي غلط فهيج دا يصير وياج اي علاقة بدايتها ما ترضي الله نهايته سلبيه
ردت بدون مبلاة ولا مهتمة
-:مممم موو مهم خل اشر الملابس
عفتها ماتنصلح صعدت لغرفتي رتبت ملابسي الجديدة و غسلت و لبست لبس بيت مريح
خليت مرطب لوجهي وگعدت على جرباية فتحت الابتوب دخلت على مدونات لدكاترة و معلومات عامة اقرة و استفاد احب انشط عقلي
.
.
.
دلــيار::
طلعت للشارع واكفة بالباب ..شفت الجاهل من مساع واكف يباوعلي و يغمز ..
والله لو طيح بيدي بعدك بگد الفصمة و هيج اويلي يابة حقدت عليك والحمزة
حجة مرتكي على حايط مسوي روحة جبير: ها يلحلوة واكفة بالشارع ياهو لمتانيتة
دليار: منتظرة لخلفوك اكلهم يربوك من جديد
اجة صوت من جهتة :وشبيهم الخلفوا
درت وجهي بنزعاج وحجيت بگلبي " اشتعلو"
حيدر: شو سكتي ولا جن صوتج يلعلع على طفل
هو ركض لبد بسدة و سوة روحة الملاك الرحيم توني اريد ارد شفت سيارة بابا تحركت بسرعة الة بعدة ما واكف فتحت باب وصعدت
محمد:دصبري يا بابا طايرة صديقتج
حجيت بصوت عالي حتى اسمعة : لا بابا اكو شگول تغث غثتني بهل ضهرية
دار وجهة حرك سيارة :اعصابج عليمن تصيحين ؟
تقربت عليه مغيرة الموضوع : اني اموت عليك اعشقك
بوست خدة دفعني بنزعاج: وخري وخري انتهازية ام المصالح
دليار: اعصابك استاذ فوگ ما احبك
محمد: زعلان عليج ماعجبني مستواج بالمتحان
دليار: لا حباب لاتركز والله قريت بس همة يجيبون من خارج كتاب
باوعلي بنص عين: مشيهن على غيري ذني سوالف
ابتسمت بتوتر و سكتت وصلني لبيت سجى توني اريد انزل وكفني انطاني فلوس
محمد: اخذي بابا انطيهن الهة خاف محتاجة ..لاتقصرين وياهة
دليار: بابا سجى عزيزة نفس والله ما تقبل
محمد:گليلهة هدية من استاذج لان خلصتي امتحانات
طبعا بابا مدرس واخذانة مادة بالخامس ..
اخذتهم حطيتهم بجيزداني و نزلت دگيت الباب محد فتح دگيتة حيل
طلعتلي سجى عيونهة مغمضة وكفشتهة منفوشة رجعت نامت الثولة
دليار:شدعوة ياب قابل داكة البيت الابيض سنة يلة تفتحون
ضربت متني وجرتني وراهة:والبيت الابيض احسن من بيتنة ..لو تعايرينة بت الاستاذ
دليار:اووي فديتني و فديت الاستاذ
دخلت جوة لكيت امهة كاعدة تاكل رگي سلمت عليهة ..امهة مقعدة و مريضة خطية وهية شلون مرة وردة مال الله فد حبابة كلش
شمرت جنطتي و گابلتهة : جيبيلي سجينة حب خل اكل
سجى : انتي ماتعرفين تصرفين كـ ضيفة محترمة
دليار : اعرفج مو مضيافة كلت عليمن اتعب روحي
عفتهة و لتفتت لأمهة :اي خالة شخبارج خو ما سجى شالعة گلبج
ام سجى : لا خالة جا هية دليار و تشلع گلبي
سجى: هييهييي عشتي ماما خوش تقصفين
شمرت عليهة الگشر :ومرض لهل ضحكة جنج رگاصة
گامت تهز بمتنهة وتضحك باوعتلها بطرف عيني : الحمدلله وشكر ..جنج غسالة خربانة
سجى: سم ماتقدرين المواهب
أم سجى: سجى ما يصير تغلطين على خطار
دليار : بعديش خالة وصلتي جبهتي للمجرة
كعدت بصفي: منو الجابج
دليار : الحب
سجى : عليج الله منيلج انتي ليش ماتگولين
دليار: لا اني احب اخلي اسرارنة بيناتنة
سجى:دروحي هوة انتي ياهو لمگلبج
دليار:ماتدرين الناس اسرار
سجى:لاصدك ضامة علية عدج
دليار: منيلي ..محمد حبيبي جابني .. ويسلم عليج
سجى: اويلييي ابوج صاك ..اليوم يسلم..انشالله باجر يخطب
كرصتهة خالة بيدهة: انتي لا مستحة ولا خجل
سجى: اخخخخ ماما شسالفة نشاقة ..شمالني مزوجة شايب
كرصتهة بيدهة ثانية: ولج منو شايب
سجى : اهووو كيفتن لكيتن واحد تگرصنة
بقينة نضحك عليهة شلون گالتلة روحة تريد تزوج طبعا بس حجي هية شاطرة و تريد تعتمد
على نفسهة لان ابوهة قدملهة نموذج على زوج مشالله يخبل ومهة وحدها املها بيهة
وراه گمت ساعدتها نسوي عشة خليت طاوة ونداريت الها: انتو تستعملون زيت مثلنة
سجى: لا نگلي بدهن گريز
ضحكت طلعت زيت من خانة نداريت عليها: شو بطل الزيت مالتكم اصفر
سجى:خااب شو نجبي احترگت الطاوة وهية محترگة من گاعهة
دليار:صدك على الطاري ابوج المحترگ هم يطلع
سجى:كش فال الله ولا فالج بعون الله كون لايطلع ولايرجع
دليار:انشالله مايرجع عود اذا رجع تعاي علينة ازوجج
سجى:دزوجي روحج بالبداية
دليار:لا عيني ماحب العلاقات العاطفية ماتناسبني
غمتني تلقد عليه شمرت عليها الكشر مال البتيتة ماصدگت فتحتلها ساحة حرب
اخذتنة سوالف لحد ما أذن صلينة و رحنة صبينة العشة
مشت تصيح اختها واني گعدت بصف امها ساعدتها تنزل لان جانت تصلي على كرسي
احبها بس واحد يساعدها لو شيء تدعيلة گبل واحس دعوتها من الگلب تريح
ضلينة نسولف و نتعارك لحد ما صارت ب9 اتصل علية بابا گال واكفلج بالباب
گمت وصلتني سجى سلمت عليها و وطلعت صعدت بسيار ة بابا ..عاگد الحواجب و يخزر بية
دليار: ها استاذ محمد ليش معصب
محمد: خلينة نوصل للبيت و تعرفين
دليار: شكو صاير شيء
محمد: لا سلامتج ..بس تالي عمري تجيني ناس شگاية من بتي ودگ بابي
باوعتلة بستغراب بس لا اسوة مسوية شيء شو هاي فاهية وحبابة ما تاذي وحتى ماتطلع
دليار : ليش اسوة شمسوية
خزرني وحجة بعصبية: ياهو جاب طاري اسوة..احجي على الفلك الثانية العدي
لتفتت علية وصار مقابيلي حجيت بصدمة: عزززة يممة انييي والله اليوم كلشي ما مسوية
خزرني بلعت ريگي وبديت اذكر شمسوية اليوم شريط ذكرياتي كلة مر علية بس متأكدة ما مسوية مصيبة
حجيت بسرعة ادافع عن نفسي :كلشي ما مسوية بس كعدت صبح للامتحان كملت و
طلعنة نوب حجيت نكتة و ضحكت سجى و وتفشلنة نوب طلعت للبيت كسرت لكلاص و انتة رزلتني ونوب نمت وكعدت على ابن جيرانة كسر شباكي ورزلتة و ...
محمد : و مديت راسج للشارع و صوتج يلعلع و شمرتي حجار على جاهل و شگدج و شطولج مخلية عقلج بعقلة..
دليار: بابا غير كسر الجام و فززني و فوك كل هذا يتغزل بية وهو شطولة و لا متربي و لسانة اطـ..
زفر بعصبية وقاطعني: ماعدج ابو تگليلة ويطلع لو ماتعرفين ..بس تعرفين تلعلعين بصوتج بشارع
رديت بعناد: هو البدة
التفتلي مستغرب و ما قابل : اسكتي دليار خلينة نوصل و اعرف احجي وياج عدل
وصلنة للبيت اني نزلت و بابا طبگ السيارة فتحت باب دخلت هدوء كلش
اخذت نفس ما دام بابا معصب اكيد ماما صايرة بركان لان بابا بطبعة هادئ ومايعصب هواي بس ماما عصبية وماتتفاهم
اول ما دخلت المطبخ لمزمت ماما ايدي و كرصتهة حيل و بقت مجلبة بيهة حسيت جلدي نشلع
حجت بوجع: اخخخ ماما شسالفة اييي ماما
حجة اسوة بضحكة و شماتة: حل وياج
دليار: نجبي انتي
رند : اني ماعرفت اربي ..اليوم اموتج دليوة اني الج
گوة خلصت روحي منها شردت لبدت و رة بابا التوة دخل : بابا احجي وياهة و ماما لا تشوهين اسمي
دفعني عليهة و حضن أسوة : وخري وخري اني هاي بتي الحلوة جنهة ماي بارد بالصيف و ...
دليار: وبطانية بالبرد .. ادري بنية لو خدمات إجتماعية
أسوة : غيرانة
دليار : صدقة للشعب العراقي عليمن اغار يمة
رند : تعاي تعاي مو تأخذينة بحجيج تعاي اجر اذنج و اطلعلج گلب
دليار: ماما فدوة والله ما مسوية شيء
رند: راس البلة انتي راس البلة لو جايبة صخلة ولا بنية مثلج
بابا و اسوة ضحكو و يباوعولي بشماتة حجيت بقهر: شبيكم وياي ..تمام اعتذر لان طلعت راسي من الصخام بس هوة البدة هوة الغلطان
محمد: جاهل وشمر حجارة على بيت نطلع نگتلة هية جهال هذا لعبها
دليار: طفرني من نومي طيح گلبي
رند:وانتي هم زعطوطة شامرة حجارة عليه و مشتمتة ولد اني يمة عقلي شنو هاي تصرفات
دليار:عزززة ولا شتمتة ابد ولا حجيت
گعد باب سحب الحب يكرز بي وحجة بأمر: باجر ترحين تعتذرين منهم
باوعتلة بصدمة و تخصرت: هلو ووو وليش اعتذر يمة
محمد: گايل لهلة شتمتني و صيحت علية بالشارع و الجهال ضلو يضحكون علية
فكيت عيوني فلك فلكة شكد جذاب : وعلي جذاااب أسوة شتمت لو لا عليج الله
أسوة: الصراحة ما سمعتج شتمتي ..بس حساسي كـ تؤام يكول شتمتي بداخلج و حركتي عشيرتة
ضحك بابا و باسهة براسهة يكول محققة انجاز
حركت حواجبهة تحنص بية
حجة بابا بجدية : تعتذين منهم و خلينة نكفي شرهم مالنة خلق مشاكل وهذا تصرف بعد ماينعاد
سكتت وكتلة تمام اعتذر والله الة ما اعبرهة اني الة يجذب و يتبلة علية ما اصير دليار اذا اعتذرت بسيطة
رحت بدلت ورجعت گعدت يمهم بالاستقبال اسوة مسوية كيك بارد و مخلية جاي
وگعدة بنصهم تتدلع و تلم عاطفة و مشاعر و بوسات وحضنات
سحبت تراكي وگعدت گدامهم بالگاع : جاي اسوة ليش ماتحسبيني عود
اسوة: خباثة
اشرتلهة تروح تأففت وگامت ..ضربني بابا برجلة : اسحبي تراكج وين كاعدين
عدلت روحي و گمت على ركبي دنيت يمة حجيت ببتسامة: بابا اليوم مو رحت لبيت سجى
استعدل انتبهلي عاگد حواجبة خفت : ها شكو
رند:شمصخمة ولج بعد گولي
نزعجت حيل حجيت بضوجة: شبيكم وياي عود اسولفلكم عن يومي وهيج خوفتوني
محمد: احنة خفنة اكول شعجب دليار تسولف
دليار: بعد ما اسولف يالة
دخلت اسوة انطتني جاي رفعتة بنزعاج:وين اكو واحد يصب جاي بكلاص نايلون
اسوة:حتى ما تكسرينة
باوعتلهة بنزعاج اخذت كيكة وكعدت اكل وعيني عليهم بابا كل شوية متغزل برند خانم
واسوة تصور و مندمجة كشمت شهل ملل احس روحي گاعدة على فلم هندي
دليار: عوزكم بس ربابيييي و عشق هيييي وتكمل
أسوة:اسكتي الجافة مخربة اللحظات
گمت شلت جاي و كيك :تصبحون على خير اروح انخمد
بس بابا رد علية ابتسمت و طلعت لغرفتي گعدت خليتهن بالگاع سويتلي جو
وفتحت مبايلي اللعب ببجي خليت هيتفون بابا يكره صوتة وخاف يسمعني
مددت ومنطلقة كوة خلصت امتحانات علمود اللعب هاي لعبة انفجارية كلش عجبتني
.
.
أسـوة:
ثاني يوم طلعت وية دليار و رحنة نعتذر من الجيران المبجلين على گولتها
أسوة : بالة شنسوي هنا بعز الظهر
دليار: ساعة ب5 يمج ظهر وجو مو كلش حار و ابوج گالي أعتذر
أسوة: اعتذري باجر الصبح مو هسة والله حارة وناس نايمة
دليار: محد گالج تعاي
أسوة : غير اني حزام ظهرج اعوفج وحدج
دارت وجهة عني ودگت الجرس وبقت حاطة ايدهة ضربتهة وخرتهة من جرس: وجع ناس نايمة هسة
انفتح الباب طلع رجال خرب غيرتة غير يسطل نوب مالبس تشيرت گبر اكو واحد يفتح باب هيج
استحيت ودنگت بس دليار اخذتلهة نضرة من رجلي لراسة وحجت بدون اهتمام : مساء الخير ..اتمنى ما سوينة ازعاج
هشام: مساء نور .. تفضلي
حسيت روحي بطة لان مدنكة رفعت راسي كتلة: احم ..ممكن تلبس تشيرت حتى نكدر نلبسـ.. قصدي نحجي عدل
هشام: ليش حجيج مكتوب على تشيرتي
گبر شبيك تفشل الواحد ..خزرتة دليار وحجت مغيرة الموضوع: خالة موجودة ..ممكن تصيحهة
عافنة ودخل للبيت يصيح على أمة ارتكيت على متن دليار : يخرب
دليار: صح يخرب الذوق
ضربتهة على جتفهة:انتي ماعدج ذوق
شفت امة اجت سكتنة : هلا خالة تفضلن
دليار: هلة بيج خالة.. مشكورة بس اجيت اعتذر من ابنكم لان البارحة گال لبابا اني غلطت عليه
حطيت ايدهة على خدهة : عزة هذا راحلكم ..شكد عيب خالة عوفي جاهل مايعرف
أسوة: مو ابوه مدري اخو مدري منو اجة ويا لبابا وخطية اختي حصلتلهة رزالة غسل و لبس
ام يوسف : يا خالة والله مادري بي ..تفضلن جوة نحجي و اني اربي الج
حجت دليار بصوت مال وحدة تمسكن: لا عادي خالة يجوز حزت بخاطرة لهيج اجة لبابا وهوة بعدة جديد بالمنطقة اكيد ضاج
باوعتلهة بستغراب يمة شبيهة هاي الحمدلله الله يستر ضامتلهة مصيبة
ام يوسف: لا يمة هوة الغلطان وحقكم علينة ..لا ظلن واكفات على باب دخلن
توهة تريد تعترض جريتهة ودخلتة ..اريد اشوف ولدهة تسعة اني شفت واحد ونشليت هية ام يوسف هم حلوة بس جبيرة لعد ولدهة شلون
دخلتنة لصالة وطلعت تصيح ابنهم اخذت نظرة للمكان ولتفت لدليار: گلبي گام يدك
دليار: ليش جان واكف
أسوة: عدهة تسع ولد مو
دليار: اممم
اسوة : يعني تسعة اذا تحطينهم بعلبة جكليت يصير نفس العدد ..ادري بطن لو مصنع حلويات
دليار: هو انتي شفتي بس هذا الرجل العاري
أسوة: ههههههه اموت الرجل العاري هههههه
باوعتلي بنص عين سكتت ..مفسدة لحظات شوية واجانة ابنهم ساكت مبين محصلة رزالة على كفخة
دليار ماگالت باطل سوت روحة كلش ندم ينكط و كلام معسول بفلس بس ابد ما كالت اعتذر لو اسفة
تفتر تفتر على موضوع اخر شيء هو اعتذر و حبوبتة هم طلع ابن ابنها حرامات خسرنة واحد من العلبة
سلمنة عليهم و طلعنة اخذت نفس وگفت بالباب:خلصنة من هاي سالفة
أسوة: خطية خليتي اهلة يگتلونة ترة انتي هم زوديتها وتصرفاتج كلش موحلوة
باوعتلي بطرف عينها ومشت لزمتها:وين منا لبيت تيهتي من كثر الجذب
لزمت ايدي وسحبتني:تعاي ادري اكو واحد مايندل بينة
