رواية لسنا ابرياء الفصل الثالث 3 بقلم هيلانا
طلعنة من بيتهم سحبت أسوة للمحل بشارعنة مادام طالعين خل نشتري دخلنة اشترينة و وكفنة يم الولد ثنينة ماشايلين فلوس وحدة تباوع للثانية
أسوة: وجع اذا ماعدج فلوس المن اجيتي وساحبتني وراج
دليار: شدراني عبالي انتي شايلة فلوس
أسوة: شسوي شايلتهن اشتري ام يوسف
دليار: عيني سجلهن على أستاذ محمد من يجي يدفعهن
: احنة مانطي دين
ارتكيت على الميز : ترة هذا بيتنة ماتعرفنة بابا بعدين يجي يدفع
: اكو واحد يجي يشتري وماعدة فلوس
ولد يمة ضحكو شگد تافهين و شگد خبيث خفة وهاي اسوة راح تدخل بظهري
دليار: روحي للبيت جيبي فلوس وتعال ركض
عافتني وراحت ارتكيت على الميز و فتحت عصير اشرب هو رفع حاجبة الي: ترة مادافعين فلوسة
دليار: كلة عصير قابل شاربة نفط .. هسة راح ندفع
واحد منهم گال شكد صلفة التفتلة طلع ابن جيرانة من ذاك اليوم حجيت عليه خرب غيرتك
سكتت ماريد اجادل خاف ابعرهة ويوصل لبابا و اروح بيهة
اجت اسوة جابت الفلوس دفعنة و طلعت وهية كوة جر نفس: شبيج رايحة للصين هوة هذا بيتنة
أسوة: يمعودة لزمني بابا كوة رگعت سالفة
دليار: شكتيلة فتحت الباب ودخلت دخلت وراي : كتلة رحنة للمحل و ماشايلين فلوس
لطمت على گصتي : امدااج لان ما تفكرين
أسوة: شسوي والله اخاف منة ..تدرين اخاف من المدرسين
ضربتهة براسهة : ابوج يثول ابوج
حجت بمياعة: ما اجذوب على بابا انييييي
دليار: خاب وجعة گلبي كون
دخلنة جوة ..بابا يصحح بأوراق بأيدة و ماما تباوع ويا وتعترض على تصحيح تكول خطية خل اهلهم يفرحون
شفتهم مندمجين اشرت لأسوة تسكت وجريتهة وراي نريد نصعد
محمد: تعالن تعالن
أسوةراحت طايرة شبكتة : بــابــا حبيبي ..اموت عليك
كعدت على درج فتحت جبس اكل على ما يخلصون غزل
سأل بابا: اعتذرتي ' هزيتلة راسي
بس اسوة گمزت گدامة : لا بابا جذب بقت تلف و تدور على سالفة وسوت روحهة كلش مسكين وعتذروا همة
دليار: هههههه من تكولينهة هيج احس بفخر ... بابا خلينة نتعشة برة ؟
محمد : لا
رند: اي حبيبي خلينة نروح صار هواي ما طالعين
محمد : مو تامرين حبيبتي
أسوة: احم..نحن هنا
محمد: هو شهاجم بيتي غير انتن هنا
كمت و اشرت لأسوة تجي وياي اخذنة حلويات وصعدنة للسطح بعدهي شمس طالعة بس جو بي نسمة باردة
كعدت على كراسي فوك و أسوة راحت تلم ملابسهة
أسوة: اكوول شنلبس بالليل من نطلع
دليار: جفن
اسوة: جفنج ..وجع شكم مرة كايلتلج لا تحجين هيج
دليار: انتي تافهة نلبس ملابس لعد شنلبس علاليك
كعدت بصفي خلت ملابسهة وراهة: فستاني الوردي و انسق ويا شال ابيض وحذاء و جنطة سودة شرأيج
دليار: اممم
ضربت جتفي حيل :شنو اممم تفاعلي ..انتي شتلبسين ..عدي فكرة البسي نفسي جنة قبل نلبس نفس الشيء
دليار: ايييع لاذكريني جنت قبل اكثر كلمة اكررهة" لا اني دليار مو اسوة" جنتي معقدة حياتي ..ماصدگت كبرنة و صرت البس براحة
أسوة: گبر تغارين من جمالي
باوعتلهة بنص عين: ترة وجهج نفس وجهي والحمدلله ثنين مو بالجمال الهائل
أسوة: اني اخبل ..شعري شلون عيوني الزرك شلون غمارتي لتخبل امووووح فدوة للبطن الجابتني
دليار: وگصتج جنهة ساحة التحرير شلون
باوعتلي وضحكنة رغم تشابهنة كلش طبق الاصل بس نبقى نتنمر على بعض وبالحالتين احنة نتنمر على انفسنة
: اول مرة أشوف گمر يشرب عصير نوب طالع العصر
التفتنة لصوت شفت جاهل ابن جيرانة و جهة احمر و اثار اصابع مطبوعة بخدة مرتكي على الحايط الفاصل بينة و يباوع و يتغزل
ضحكت من شفتة : هههههههههههه اويلي يابة وجهك تحفففة
هوة عبس كامتلة أسوة : ياحبيبي هاي شصاير بوجهك منو سوة بيك هيج
دار وجهة عنهة ورجع يباوعلي : معليج ....
عصبت منة عافتة ورجعتلي ..اني انسدحت من ضحك يابوية اضحك عليه و على اسوة الوجهة صار احمر
أسوة: هو مو صوجك صوجي اواسيك
: محد گالج واسيني
دليار : بربج هو وجه واحد يواسي
التفت عليه وطلعت جبس هزيتة گتلة تريد گال اي
كمت تقدمت يمة فتحت ورتكيت على حايط وبقينة ناكل منة : انتة شسمك ؟
: معليج
دليار: تعرف تحجي لو بس تكول معليج
: انتي شسمج ..
دليار: معليك
صاحت اسوة : راح انزل ملابسي وانتي نزلي مو تاخرينة حضري نفسج
سويتلهة اوكي ونزلت رجعت عليه : منو ضربك
:ابوية
سويت روحي متأثرة : عززة ليش
: لان گسرت شباكم ..واجيت جذبت على ابوج ..بس انتي غلطتي علية
دليار: اممم..لعد منو اجة وياك ..سمعت اكو رجال اجة لعد هذا مو ابوك
: لا هذا عمي حيدر
دليار: وعمك رجال طول بعرض يشتكي على بنية
: لان حجيتي علية وهو يحبني مايقبل
دليار: لعد ما دافع عنك وجهك صاير الوان
: جان طالع و لزمني ابوية ..كلة من وراج
دليار: ما كتلي انتة شسمك
: سيفان ..بس يصيحولي سيف
دليار: هههههههه سيفان ..ما خلوهة ٣ سيوف هههههه بوية منو الطلع هذا الاسم ..اكيد عمك حيدر مبين ضارب
سيف: ما اسمحلج تحجين على عمي ..انتي شسمج
: دليار
سيف: دينار ..عود هذا هم اسم
با عتلة بنص عين وسمعت صوت ضحك وراه مديت راسي لكيت
ولدهم كاعدين و ينركلون وناس تلعب مسويلهم گعدة ..بس واحد منهم يباوع علينة
وجهي صخن ..صارلي ساعة اصنف هنا و همة يسمعون ..بعدين استوعبت ما لابسة حجاب
شمرت الجبس على سيف وشردت
.
.
.
نزلت وخليت دليار طاگة ميانة ويا .. جنهة حرباية وين ما تلكة مصلحتة تغير لونهة اكيد تشمت بي هسة
لاكتني ماما محضرة نفسهة گالتلي روحي بدلي و صيحي اختج
رحت بدلت براحتي و تمكيجت وكشخت ذيج كشخة لترد الروح ..خل اكمل وروح لدليار لان هية تبدل بسرعة اني اتأخر
شوية ودفرت الباب ودخلت تحك بشعرهة وعاوجة حلكهة : جفصت جفصات هواي خررب
أسوة: شكو
نمطلت على جرباية: صارلي ساعة داگة ميانة ويه هذا سيفان و اصنف على عمامة اخر شيء طلعوا كاعدين يسمعونة
اسوة: لحظة لحظة شسمة
دليار: هههههه سيفان وابوه اسمة درعان
أسوة: هههههه احلفي
دليار: لا جذب ..بس هوة اسمة سيفان يدلعون سيف
رند: بعد گلبي بعدج بكفشتج گومي بدلي
التفتنة لماما طالعة كيكة بس لو تبطل عصبية
دليار: شعدنة من هسة رايحين ترة بعد وكت ماحب اتعشة هسة
رند: نروح للمول و مناك نروح لمطعم
كمزت عليهة : عليج الله ماما..شنو مناسبة شعدة استاذ محمد مدللنة
رند: ابوج دومة مدللجن بس انتن مابيجن خير ما يصير بعينجن ..' نوب حجت بدلع' بعدين غير اليوم عيد زواجنة
اسوة: اويلي يابة .. مال زواج هسة كون صـ..
استوعبت الخريط خليت ايدي على حلكي وشردت من كدام ماما نزلت جوة
هية بقت ترزل بية نوب بدت ترزل بدليار وتكوم بيهة تبدل
اخذنة شوية كاعدين وشرفت ست الحسن لابسة قميص ابيض لحد ركبة و جيز ازرق ولافة شال ابيض شلون ما جان وطاگة نضارة و صوت كعبهة لشطولة يركع
بابا يموت من صوت كعب خاصة اذا كلش طويل اني البس ناصي واحاول امشي على كيف
بس دليار تدبج دبج ولا يهمهة ..اني اخجل من صوت خصوصاً كلهة تكوم تباوع
باوعلهة بابا: ماعندج غير هاي الحذاء ..صايرة شطولج جنج عمود انارة
دليار: منيلي يحسرة عدي رجل يشتريلي
خزرهة بابا و هية ضحكت طلعنة وصوت حذاءهة يرفز صراحة غيرانة منهة ماتحس ولا الهة شغل بالناس تلبس ليعجبهة
صعدنة بالسيارة ورحنة للمول اشترينة كم شغلة و بعدها رحنة تعشينة ..ماما ماقبلت ترجع للبيت كالت بعد وكت
ركنة لسيارة بمكان و بقبنة نتمشة على كورنيش
همة كدامنة يتمشون واني ودليار وراهم
حطيت ايدي بأيد دليار وملت على جتفهة: شيحسون برأيج هسة
دليار: استاذ محمد مادري عنة..بس امج الحلوة عايشة قصة احلامهة
أسوة: الله شلوون واحد يزوج مثل بابا ..اريد اسأل امي تنطيني الوصفة
دليار: امج زاحوفة ماتلحكينهة بقت ورا لحد ما زوجتة
أسوة: نجبي هوة بابا اصلا يحب ماما ..بس جان خجول وماما جابتة لدرب
دليار: وشبيج حاضنتني هيج راح اطيح دوخري
أسوة : احس بشعور ناس المرتبطة...
شلت راسي من متنهة لان كامت تمشي اعوج وسألتهة: شلون تشوفين الحب برأيج ؟
بقت ساكتة وتباوع ليكدام : احسة شعور خيالي او مجرد مسمى ما افضل الحب لكلة غزل و كلام حلو
اممم مثلا شخص يحترمني و يفتخر بية و يتقبل مزاجي و اخطائي و تفكيري وكلشي و ما يخجل يدافع عني كدام ناس ..وما يسنقص من انجازاتي و عادي عدة اصير شخص متمكن و مستقل
هزيت راسي الهة: هية هاي الافعال تنبع من الحب و المودة اما كلام و الغزل المبالغ بي هذا لعب
انتي اذا تشتركين هيج افعال وية شخص لا أراديا تبديت تسمعينة كلام حلو بين فترة وفترة
دليار: هاي سوالف جيل الطيبين راحت وياهم هسة عدنة العلاقات كلهة اخذ و عطاء كلهة مصالح ومبنية على اهداف تافهة
يا أما جهال او تريد الستر او ناس ما مرتاحة بيتهم وتريد تفتك من معاملة السيئة
أسوة: كل واحد وعدة ضروفة ..وهنا بنات ماعدهم بس بابين يطلعن منهن يا أما دراسة و شهادة و كون تحصل وضيفة ..اما زواج واكثر شيء بنات المنعوهن من دراسة ماعدهن حل بس يزوجن
دليار: درر ما شالله عليج
وخرت منهة وسويلهة هاي حركات النبيلة مال ادنك والزم ايدهة وابوسهة..بس مابستهة دفعتني
: ههههههه عابتلج خليني احس باحاسيس مختلفة و استفاد منج
دليار: نجبي
بقينة نحجي على مواضيع مختلفة بعدهة گال بابا خل نرجع تأخرنة وهو عدة شغل
فتحت الثلاجة طلعت حلويات و ببسي وصعدت فوك ماما و بابا راحو لخوالي بقينة بس اني و دليار
فتخت باب السطح و جاني صوت الاغاني شعلوة
دليار تعاركت وية بابا و شعلتهة فوك السطح عوزهة بس وصلة على خصرهة و تهز نوب مشغلة ساجدة هسة ناس شيكولون
كعدت بصفهة ممطولة على كراويتة فوك معلكة رجليهة وتهز متن وهية نايمة
: جنج دجاجة عدلة بالشوي و ترافس
دليار: نجبي
أسوة: نقصي الصوت عيب منا ناس
دليار: الناس ببيوتهة و اني بيتي شعليهم بية
أسوة: بيت بابا هذا مو بيتج
كعدت على حيلهة اخذت العصير تشرب: واو اكتشاف عظيم ماجنت ادري
گلبت عيوني ونصيت صوت شوية سمعت صوت ضحك وسوالف
دليار : سمعتي صوتهم شعلوة واني اريد اركز ماكو حتى ضجت فوك ضوجتي
أسوة: بيمن تركزين؟
عافت البيدهةو كامت تمشي بتجاه الحايط لجيرانة
: وين
: لجيرانة أكلهم يسكتون
اسوة: خرب عرضج تعاي عيب
رحت وراهة باوعنة من فوك بنات ملتمات ومسويات كعدة شكبرهة وضحكهن تارس الجو
أسوة: اويلي يابة لو عدي اخوات بعد
گلبت عيونهة ليفوك وحجت: هي هاي ام يوسف مو كالت ماعدهم بنات لعد ذني منين طلعن
هزيت امتوني مادري رجعن ضحكن ضحكهن يرن رن وعلي صوت شعلوة شوية واجاهن واحد من الولد صاح عليهن سكتن
دخلهن جوة سرب شطولة دليار ماكالت باطل رفعت راسهة وحجت بصوت عليه : رحمة الله والديك وعلي سويت فضل نزرفت طبلة اذني من صوت
فكيت عيوني عليهة لتف علينة و رفع حاجبة : مو عيب تباوعين لبيوت ناس
دليار: ما مباوعة اجيت اكللهن ينقصن صوت ضحكهن
وحدة من بنات التفتت عليهة وحطت ايدهة على خصرهة وهزتة: وصوت ساجدة جان يرج ابيتكم بس احنة ما صعدنة كلنالكم نقصو لو هية لكافة
دليار: حبي صوت ساجدة مقبول واحد ينطرب عليه مو ضحتج تسوي تسوف بالامعاء
طگيته بضحكة وذيج دارت وجهة ودخلت دليار هم وخرت من سياج انتبهت على الولد يباوعلي و مبتسم
خجلت ونزلت ورة دليار
أسوة:صخام فاضحتنة گدام جيران انتي شسوين اذا اجو لبابا باجر
دليار: بعد ٣ ايام نتائجنة
ركضت عليهة وبطني مغصتني من سمعت بنتائج بعدني ما طالعة من تعب السادس : احلفيييي
دليار: وداعة استاذ محمد
ضجت حيل احس اختنكت من خوف اكره هاي الحالة احاول انسى نتائج بس دليار كل ما تشوفني ذكرني
اوف كون عدي برودهة
أسوة: هسة شلون بينة
دليار: نهج
أسوة: اني مصخمة كلش فد مرة
صغرت عيونهة علية و دفرتني وكعت بالگاع
أسوة: وسم و مرض شبيج
دليار: لاتحجين عن تصخيم انتي اخر وحدة تحجي
أسوة : بابا يعدمني اذا ما جبت معدل
صفكت بديهة : اييي هيج ابقى بس اني
كرصتهة برجلهة و رجعت گعدت
أسوة: اكلج اني خايفة
دليار: منين
أسوة: من نتائج
دليار: اسكتي رحمة لهلج لو ادري ما حاجية
بقينة نسولف هواي احجيلهة على سوالف صديقاتي و مواقف هية بس تهز راسهة
دليار ماعدهة اصدقاء هواي بس سجى وماعرف يمتة تعرفن فجأة بس هية ماتحب تصادق تكول سوالف والتزامات وتعال اسأل و مدري شنو مالي واهس
اجو ماما و بابا صعدو فوك كعدو يمنة بابا جايب بيتزا لديار لان تعاركو قبل العشة و ماكلت گوة راضهة ورة ما حصلت فوائد من الزعلة
دليار: شعدكم يم اخوالي
رند: عمت عيني غير خالج اندعم بدراجتة
دليار: هو اخوج هم يلعب شايب صاعد دراجة مايستقر ابيتة
گرصتهة ماما وحجت: ولا تستحين مو عيب هذا خالج
أسوة: وهسة شلونة
رند: مابي شيء حبيبتي بس رجلة مكسورة
دليار: و الدراجة بس لا تأذت
صحنة عليه سكتت ..ندستة : مو عيب ماتشوفين ماما ضايجة على خالو حسي شوية
دليار: توني جنت ضايجة كل ساعة هية ..بعدين خالج ما شايفتة بس بالاعياد و ماسلم عليه هم
أسوة: نجبي خوالي يحبونة
دليار: يحبونج الج مو اني
اسوة: ايي غير انتة مصيبة السانج اطول منج
دليار: ما علينة نارهم تاكل حطبهم ...تردين
رفعت قطعة الية وخرتهة باوعت لماما ضايجة عيونهة مغروگة و بابا يحجي وياهة
ضجت من شفتهة خطية خالو الحمدلله مو شيء قوي گالو حادث خفيف ..بقينة تقريبا ل2 ونزلنة كل واحد لغرفتة
____________
ليان::
نزلت گاشخة ومكفكفة
أردان البلوزة لاگتني عمة بصالة مجهزة نفسها
تروح لبيتهم مصطفى مشتري ومكملة
ومخابره حتى يمر عليه صاحت عليه وگفت مرتگية على درج
-: ماتجين ويانه يمة
ليان: أتمنى أجي بس تعرفين الازم اروح على عيادة عمه
جان بودي أروح وياها اساعده بس اخترعت حجة ومارحت استحي من مصطفى احس نظراته وراي
ومن اشوفة انيهم مدري شبيه عيني صايرة منفلتة ابقى اباوعله الطش
هزت راسها بقبول وبقت كعدت بالصالة وبيدهة مسبحة تسبح بيها
مشيت لمطبخ سويت جاي أخضر دخلت يارا شعرها كوشة وتتتمغط توها كاعدة من نوم
كعدت وخلت أيدها على ميز نامت عليهن
: وعبالك شاربة مخدر ولا اشبع نوم
ليان: هذا كسل
همهمت وبقت مصجعة نايمة أجيت بصفه ندستها من جتفها رفعت راسها
: يارا الازم اروح لعيادة
يارا: روحي اني شعلية
ليان: انتي عليج ترحين ويا عمة خطية ساعديه
عفست وجهه بنزعاج: بودي اساعدها بس تعرفين اني هاي الفعاليات والشطارة ما تكعد وياي
أستعدلت بكعدتها وهي تحك شعرها بتفكير
:- غير كالو يبقون هل شهر كله هنا ليش اشتروا بيت
ليان: هسه موزين وبعد كل شخص ما يرتاح الا بيتة
يارا: اشوفج مكيفة
ليان: لأمانة فرحانه لان استحي منهم صح همة حبابين بس يبقون محرمين
:-وين الحجية خلى تجي؟
لتفتنة على صوت مصطفى مرتگي على باب وجگارتة بيدة باوعت لصالة ماكو وين راحت غير جانت هنا
مشت يارا تشوفها وين واني رگيت أيدي على طاولة وخليت راسي عليها متگية وعيني عليه
جان بيدة مبايلة ويگلب بي لابس قميص ابيض مفتوح كم دكمة من صدر
واكو وشم راس افعى على رگبتة بودي اشوف الوشم كامل بس شكلة انزع ملابسك خل اشوف استغفرالله بعدين شدعوة هيج
مركزة ويا كسرت نظرتي من شفته انتبة عليه
وكـال
-: ما تجين ويانا
توترت من نتبه عليه شكد عيب فركت أديه مرتبكة هو مركز ويا حرگتي
ليان-: ها اني لا عندي شغل اسفة اصلا منتظرة بابا حتى اروح لدوامي
أبتسم بطريقة غريبة ملفته بطرف شفته
مصطفى: على راحتج
كالها وطلع لسيارته بالحديقة رحت اباوع ورا من شباك المطبخ ما احس الا ضربة على كتفي كمزت بسرعه لتفتت تضحك
ليان: وكعتي گلبي شبيج
حرگت حواجبها بخبث وهي تغامز
: ليش هو كلبج ما واكع
ليان: ما فهمت
باوعت لمصطفى وغمزت ضربت گصتي بضوجة
يارا : لا تشوفج عمة وننفضح
ليان: سدي حلكج شنو هل كلام
يارا: هو اني شعلية غير انتي اگلتي الولد بس الصراحة ذوقج حلوو
ليان: اي وذوقج خايس انتي
يارا: اني ادري ذوقي زبالة من حبيت ليث العار
سكتنتنة من نزلت مرة عمي سلمت علينا وراحت
همه مصطفى وسلام جهزو بس خالة تختار تخم وهاي اغراض البيت والمفروشات
يارا كعدت تاكل بقلاوة يمي وتاشر بديه-: صدوك عيد ميلادج السبت خلى نطلع نتعشة برة
ليان: وين الجديد هو بكل عيد ميلاد نتعشة برة
يارا: زين شتكولين نغيره بدل عشاء سفرة لسليمانية بابا اكيد ما يكول لا
كعدت مكابلتها وهي تحضر لميلادي أكثر مني تكيف على هركزة
:- لا مااريد بعدين شكو مهتمه محسستني عيد ميلادج
يارا: هاي بدل ما شكريني
ليان: على شنو اشكرج على اساس جايب الي هدية هو باقية ادورين اماكن علمود تتفرفرين
حجت بملل: عمي اجيب الج هدية لا تاكلين گلبي
ليان: اممم اريد هدية اني اختارها الان ذوقج محلو
يارا: تصدكين حتى اني ما يعجبني ذوقي
ليان: هو انتي لو عدج ذوق ما حبيتي ليث
حركت راسه بنزعاج : ياا شبيج مو هل ثخن
ليان: عذريني ابقى دائما اذكرج بختياراتج الخايسة
ياراا: بشرفج دا احاول انسة الان كلما اذكر اتفل على نفسي
ليان: طبج طوب
كامت وهي تاخذ صحن غسلتة ورجعت لفتت شعرها كعكة
:- راح اتصل بسراء تمر بيه الاحد نروح سوة لمول نحضر مشتريات الدوام
هزيت راسي وهي مشت بقيت بس اني بالمطبخ سويت تبسي دجاج وتمن ورجعت غسلت خضرة وحضرت بذنجانية جانت الساعه ب_11ونص
رجعت ظهري على كاونتر وفتحت تليفوني شفت رساله من بسام كاتب
:-ليش ماجاية اليوم؟
ليان: شوي مريضة
گبل رد جان متصل: سلامتج شبيج
ليان: ما بيه شي شوي تعبانه ماخذة برد
بسام: تحتاجيني اجي
ليان: لا شكراا ما بيه شي
بسام: الله عليج كولي
ليان: لا والله بسام تسلملي
سكتتت وانوب رجع كتب:- عندي عملية اكمل واتصل بيج
-: اوك بالتوفيق
طفيت تليفون وكعدت وايدي على خدي اني اعز بسام احسه انسان مودب واخلاق
وگلبة طيب بس مشكلة احبه گ زميل عمل بس هيج
دائما اهتمامة يربگني احسه يگن الي مشاعر حب مدري اتخيل
شعندج صافنة وايدج على الخد اضنج عاشكة وابالج احد رفعت راسي الها واكفة على درج وتغمز
ليان: بله طيري
حجت بتوسل: فدوة بشنو تفكرين صايرة هواي تصفنين
ليان: ماافكر بشي ريحي بالج
يارا: دا ضلي عود ردت اشيل عنج همج
ليان: شيلي عني شغل البيت وأگضي واجبج وكثر الله خيرج
يارا: لا اني ماحب هيج اني صدري وسيع اتحمل اهمومج واسمع اشبيج بس شغل البيت مااكدر
تدرين اضافري يتكسرن ورب وهمات اني مقبلة على جامعة الازم اصير حلوة
ليان: اي ومن تزوجين عود هم هيج ضلي
ضحكت وراحت كعدت تدرس بالصالة لضهر أجة بابا
گامت هي فتحت حضنتة قبلي علوة هي صغيرة واني وراها
عاد رجعت جهزت السفرة بين ما رجعو وعمة ومصطفى وسلام ويارا كالعادة راحت يم سلام
ووضحك وتحشيش بقيت وحدي انقل الاكل حسيت بشخص وراي لتفتت حجة برود
-: تحتاجين مساعدة
بتسمت بداخلي مفروض هاي اختي ثولة تجي ساعدني مو مصطفى: اها لا ما يحتاج
كفكف اردان القميص واتقرب وكام ينقل بالاكل وياي
اخر شي جبت الكرسي وسوالي مكان بصفه كعدت
ويارا تباوع النا وتمزمز تافهه همس بصوت خافت.
مصطفى: عاشت ايدج طيب الاكل
دنكت وبلللت شفتي بخجل: الف عافيه
مصطفى: فدوه يبعد العافيه واهله
احس خجلت من كلامه غصيت هو بتسم وصب ماي بالكلاص وقدمة الي كمزت يارا حجت من يمها
يارا: موستفا اضربها على ظهره خل تطلع الغصة
خزرتها سكتت ورجعت تاكل
العصر تفقنة نروح لمول المنصور الان اريد احضر لعيد ميلادي رحنا اني وياها ومصطفى وخرب الحظه علينا
بسام من اتصل كال اكو اجتماع ضروري تجين
المدير حيل مستجلب اليوم ماعرف شعده ينعل يومة صار عدي مغص
هذا المدير مال مستشفى فد واحد غثيث مكروه ومحد. يكدر يحجي ويا كلمة الان مسنود بالدولة
صدك وصلوني ومصطفى كال انزل وياج بس اني ما قبلت كتلة شغلة نص ساعه ومرو علية
اول ما وصلت لكيت بسام منتظرني دخلنة سوة
طبعا كل دكاترة الكبار موجودين بالإضافة لبعض
المسؤلين بالمستشفى وهو المدير واستلمنه ليش مقصرين وليش وليش هو اكو بوك جاي يصير وادوية
دا تنباع وتنخمط وكل هل شي بعلمه فواحد من الدكاترة ما راضي وصاير نقاش قوي عاد المدير نفخ
ريشاتة علينا خاف نروح انصير ضدة واكو لجنة جاية المهم ما ندخل نارهم تاكل حطبهم همه اثنينهم
مسنودين احنا ناس فقررة طلعنه من جتماع بعد لغوة طويلة
بسام : اوصلج
ليان: لا تسلم انتظر يارا ومصطفى هسه يجون
تغيرت ملامحة وحسيتة ضاج: تمام بالسلامه رايح
خلة وراح واني بقيت انتظر مرت ساعه وهو ماكوو
اخر شي قررت اتصل بـ يارا سالها
اول ما اتصلت اجاني صوتها الغاص والضوضاء الي يمه
يارا : هلاوو حوب
ليان: وين انتي شنو هل هوسه يمج
عوجت حلكها وهي دكول:- اني ويا موستفا
ليان: لا اتعوجين حلكج أحجي عدل بعدين انتم وين هو غير يجي ياخذني على اساس
يارا: اي هو مفروض نجي الج بس موستفاا طلع عندة شغله هسه نكمل ونجي انتظري يروح منج نص
ليان: وين انتم بلة
يارا: احنه بفندق...
ليان: وشسون بالفندق
يارا: مااعرف اسئلي موستفاا هل سوال
ليان: هو يمج
يارا: لا وين اني كاعدة بالبوفي مال فندق دا اكل شلون اكل يرد نفس احسن من طبخج المحترگ
نزعجت كلش رجعت داخل المستشفى
كعدت بالكفتريا
:- الصمي ام بطن عوفج من الاكل مصطفى وينه
يارا: مصطفى حاجز غرفة واجت بنية شكرة تجلط من الجمال جنها سكرر يبوو من شفتها حسيت نفسي دبة مال غاز خصرها يكتل كال عدهم اجتماع
بعد اجتماع ايش مااعرف وانتي تعرفين الاجتماعات انواع
ليان : يعني ماعرفتي شكوو
يارا : لا
ليان: زين لييش ما رحتي وياهم شكوو باقية وحدج
يارا:-حوبي يجوز الاجتماع بي لحظات حميمية دفرات رفسات بوستات اني شكوو داخله وياهم
ليان: شهل كلام مو عيب
يارا: مااعرف اذا عيب بس اليشوف البنية ابليس يكعد بصفه المهم ابن عمج طلع خل أقفل الخط باي
ينعل حظي هذا شبي مصطفى بقيت منتظرة فوك النص ساعه لحد مااتصلت يارا كالت ننتظرج بالباب
طلعت شفتهم واكفين صعدت بصفه و يارا ورانا وكاعد تشرب عصير حجة برود
:-وين سلامج
ليان:- نسيتة بالعيادة
باوعلي وضحك حرك هو صح سلام لـ الله بس ضوجوني صار فوك ساعه ونص شاتليني هنا
رجع حجة بهدوؤء نداريت عليه
:- شلونج بت عمي
تنهدت بضوجة حجيت وأني دايرة وجهي على جامة :- تمام اني مصطفى شكرا على سوال
مصطفى:- تنكطين گياتة وأدب
يارا تباوع من جامة وحجت بغباء:- تنكط من جميع الجهات
باوع الها وحجة بشك:من يا جهه بضبط
فهيت بوجهه وهو طكها ضحكة وهي هم شكلت ويا هو ملعب وياخذ الكلام
بغير شي والله أكص أيدي اذا ما يفسره بغير سالفه خزرتة
-: انت ليش عدك سقوط بالثقافة الذاتيه
سكت وجر نفس حجة بجمود:- شنو هذا ينوكل ينشرب
ياربي شكد مستفز وبارد گام دم يفور بعروكي عضيت شفتي گاتمة عصبيتي ماأحب أجاوز رجعت حجت يارا
يارا:- غلس احنه كلنا ساقطين بنظر ليان
مصطفى:- تتفلسف زايد
ضحكوو أثنينهم درت وجهي لجامة ساكته
انوب شغل موسيقى تركية حزينه وياها شعر شلون شعر من هذا الطايحظه مااعرف من وين يجيب هل
اشعار المبتذلة ذوقة خايس وصلنة نزلت قبلهم گبل لغرفة صعدت صار عندي جالي من ورة تلميحاته لا أخلاقية
.
.
يارا
ثاني يوم الصبح مشطت شعري وجمعته على جهة سويته ضفيرة صفح هو قصير بس أتصير بي ضفاير حلوة
فتحت البردة تعبت الغرفة بضوء الشمس وحضرت حبشكلات بين ما تجي أسراء
شغلت تلفزيون وگعدت أكلب بي طلعت فلم رعب من هذا اليخوف أسمه ضياع في صحراء
سمعت الباب أندك لا والله مو أندك أتفلش نزلت بسرعه راح ننهب وگفت على درج من شفت ليان
فتحت قبلي دخلت طك بعلجها مطكت ليان بوسه وهي هم سلمت بهدوؤء لاگيته شبكته
: شلونكم يا قوم
ليان سحبت نفسها لمطبخ وأني أخذتها من ايدها نصعد قبل لا نترزل ليان ما تحبها تحسسها خفيفه
دخلت ودخلت وراه بسطت وكعدت تاكل جبس أجيت تمددت بصفه: شو ماخذة راحتج
اسراء: بيت رجلي المستقبلي
يارا: اسم الله حتى أخو ماعدنه ونكول جنتنه
اسراء: جا فاهم وين رايح
يارا: فاهم يدور صاكات ماياخذ جكمات مثلج
طكتها ضحكة من هاي مال المستهترات حجت بمرح:هم سمعتي بالخبر
يارا:شنو شكوو
اسراء: عمو حسن يريد يجي يخطبج يا حلوة
گمزت فكيت حلكي بصدمة مدت ايدها سدته وتضحك
يار :لا تشاقين بشرفج اذ عدج شرف
اسراء: كبر جا شمالني هي هاي هم حجاية
يارا: لا ددققين على حجاية هو شرف مثل العمر اذا يروح ما يرجع
اسراء:-دولي نغثيت اروح يم أختج المتدينة أحسن
يارا-: اهوو گمتي تخرخرين شرف
اسراء:- والله جا شني شرف يمي ويگطع
يارا-: الله ونبي كرفوج
اسراء:- يكرفونه سوة سافلة
يارا-: المهم منو جاي يخطبني ولمنو
اسراء-: عمو كال يخطبج لابنة مأمون
طبگت ايدية على بعض بضحكة: مأمون ونسوانه ابن عمييي تابرررني
اسراء:- حمس لا صيرين سافلة
يارا:-اووف مشاعري تتطشر من هل كلمة بدليها بعدين اني صغيرة أهلي ما يقبلون وعلى فرض قبلوو اني ما اقبل ايع على حورة هو شاربة جنة شدة كرفص
اسراء:- يااا شمالة يخبل بس متعافية تعرفين غيداء ماتتت عليه ومااقبل بيها وانتي رافسة نعمة
يارا:-وهي غيداء على حورها يدهددة الجدر ويطيح على غلگه نفس البجم همه ليش ما يأأخذها
اسراء: دولي كله ما عاجبتج غير حلوة والله دگل لشمس كومي واني مگانج اني بنية ومكرشة عليه
يارا: مسكاره فوتشوب يناير واقي دهن خبطه سمنت جص لبخ منو تحطهن اتصير شمس هاهيه
لميت حلكي بملل خربت مزاجي وهي تغيرت ملامحه وهم: شبيج نگلبتي
اسراء: تدرين بابا وافق على موتمن
يارا: وامج شكالت
اسراء: ماما اي شي بابا يوافق عليه هي هم توافق
يارا: زين انتي ليش ما تردي شو الولد كامل مكمل والكمال الله سبحانه وتعالى
اسراء: مااادري مشاعري باردة تجاهاا أحسة حجارة
يارا: اي عادي حسي بقلاوة هو موضوع حسحسة يااختي واذ كلش كنافة أنوب عليه گرعية تتلامع
اسراء:-انجببي
يارا-: شبيج فكري لبعيد هاي كرعية موتمن تصير زحليكه لطفالكم رجال بي خدمه العاب شتردين بعد
اسرء:- راح اغلط عليج والله
يارا:- أغلطي حلالج بس اسمعي هسه صاير السوگ لكرعان يمعودة أخذي وأسكتي
أسراء-: على اساس هو اني الي رائي بكل الاحوال اهلي موافقين واني لازم اوفق
يارا:-وأفقي شبيه الدنيا هي بس سيارتة تاهوو من يزوجج احتمال المهرر غواصة ودگ فلوس
اسراء:-الفلوس ما اجيب الفرح ولا السعادة وصخ دنيا
يارا: وعلي بطرانة السفر الدياحة المشتريات عبارة عن سعادة هاي سعادة منو أجيبه الفلوس وعوفي سعادة على صفحة اهم شي الفلوس
اسراء: گبر أنتي همج وعمرج الفلوس حياتج خسارة
يارا:- اتنفس المصاري احبهن أكثر من اهلي أريد اصير أمراة غنية واديح براحتي المايحب الفلوس لو يروح لتواليت أحسله
اسراء-: أني أكول تعوفين هل احلام وتاخذين مأمون احسلج الان ساحل روحة عليج روحة رجعة
فتحت جبس وكمت أكرط:- شلون راح أسحلج روحة رجعة بابا ماأحبه جنه تيل مال گهرباء
بقينه سالفة منا ومنا لعصر الا راحت هي متعودة تجيني دوم بس اني ماروح أحنه صديقات من زمان
وهذا عمو حسن واحد بمنطقتنه كم مره خطبني لابنة بس رفضت وبابا وياي أصلا كالهم بعدها طفلة
بس هو لاطش يشوفني الصبح من أمشي لدوام ولازگ علج مو مأمون
نمطلت وغفيت والنومة نومة بثمانية الا فزيت على ليان تحوس فتحت عيني لگيته تعزل بالغرفة
گشرت بوجهه پتسمت وحجت برود
:-الابتسامة بوجه أخيك المسلم صدقة والا أنتي مال رفسة
يارا: ليش شمسوية
ليان: شنو هاي الغرفة دشوفية صايرة مزبلة
گشيت وجهي بضحكه مصطنعة وطفرت جوة اذا أبقى ترزلني لكيت بابا بالصالة رحت يمة نمت على رجلة
يمرر أصابعه بفروة راسي أنعس بزايد أغفي:- وين جنتي ما شفتج اليوم
يارا: نايمة حبيبي
دنگ طبع بوسة على شعري حجة بهدوؤء: شلونها دراستج
يارا: زينه بابا بس لا تتتأمل بمعدل زين
فاهم: جا شصخمين اذا ماكو معدل زين
يارا: والله بابا شنو يطلع حياه الله
فاهم: اريدج دكتورة مثل أختج
وخرت من حضنه أستعدلت بكعدتي: شوف بابا حبيبي اني ماأحب طبية تمام يجوز عاجبني أصير فراشه
ليان: هي هاي أقصى طموحاتج
أبتسم بابا وهي من المطبخ وتحجي طبعا المطبخ مفتوح على صالة كولش
-: شعليج بـ طموحاتي
فاهم: عوفيه بابا أني هم مأيس
يارا: ايي رحمة الله ولديك فاهم حتى أني مأيسة من نفسي
باوعلي بعدم رضا: ما مقبول هل ميانة عيب
ليان: انت مدلله زيادة
گلبت عيوني بملل عفية ولا يخلون الواحد ياخذ راحته اني ما أحب الگلفات بين الاهل قابل غربة
يارا: أرجع انام احسن
ليان: مو هستوج كعدتي ولج
يارا: اي وقررت ارجع انام هو مزاجي هيح اني ماعرف غير شي بحياتي لو انام لو اكل
فاهم: تنبل مال نوم
ليان: عاد ساعديني كولي اختي خطية وبعد شوي عمة و ولدها يجون من بيتهم
يارا: خلي بابا يجيب لج بنكلاديشة اني شكوو بعدين فاهم وين مخلصها وين يودي فلوسه خل يدللج شوي
أثنينهم ضحكووو وعفتهم ورحت لغرفتي فتحت تليفون نمطلت على جرباية وأخذت مصاصة خليته
بحلگي أتصفح بالمبايل
