رواية عقارب ذوي القربي كامله وحصريه بقلم انين الليل

بسم الله الرحمن الرحيم

السلام عليكم

راح ابدي بسرد القصه وحابه انوه

انو انا راح اسرد القصه من البدايه يعني متسلسله وامشي بالاحداث على لسان البطله ما ادخل المستقبل قبل الماضي

والحاضر لان احنه ما جاي نمثل فلم وانما قصه اتمنى ان تروق الكم

//////........./////////

اسمي مها

احنه تلث بنات والرابعه بالطريق عايشين ابيت جدي الابوي بيت چبير كلش بعدين عرفنا البيت

جدي مسجله بااسم بيبي زوجته الي احبها هواي والي علمتني هواي امور فادتني بحياتي وخلتني اعتمد على نفسي

ابوي اسمه حليم يشتغل حداد هوه امأجر محل يمنا بالمنطقه وامي اسمها نهله تصير اقارب بيبيتي من جهة النساء

يعني بيبي ام ابوي وام امي بنات عم امي اصلها من العماره لكن اجدادي اهل امي ساكنين ديالى من زمان امي

ولادتها ديالى

عندي اثنيين عمام عمي الي اكبر من ابوي اسمه سليم عنده معمل مال بلوك مشغل بي عمال وعنده محل كلش چبير

مواد غذائيه جمله هوه الي يشتغل بي ويبيع ويشتري بالعقارات والسيارات شاطر كلش وتاجر وعنده هوااااي فلوس

واموره كلش زينه وعمي سليم متزوج بت عمه اسمها كفايه وعنده اثنين اولاد

سهيل ومجتبى وبنيه اسمها نور

وعمي الثاني الي ازغر من ابوي اسمه (معين ) وهو شاب يدرس بالجامعه ويشتغل ويه عمي سليم بالمعمل بعدين

عرفنا انو المعمل الهم اثنينهم مناصفه

عندي عمه وحده اسمها ( حلا ) اكبر من ابوي وهيه معلمه متزوجه من منطقتهم رجال اسمه رافد وعدها ولد

واحد اسمه احمد

عمتي اتزوجت وره ما اتزوج ابوي يعني فايت وكت

بيبيتي ام ابوي اسمها بدريه ورغم هيه چبيره بالعمر اقصد وعيت عليها چبيره بالعمر بس حلوه كلش

جمالها طاغي ودووم اسمع اقاربنا والجوارين يسولفون عن جمالها واخلاقها وشگد جدي چان ايحبها

ومدللها وشخصيتها كلش قويه من تحجي تحس بيها مسيطره من النوع الي كلامها موزون وتعرف شلون

تتعامل ويه اكبر مشكله وابوي وعمامي يحترمونها وكلمتها هيه الي تمشي على الكل چانت مرتبه ونظيفه

بلبسها وبغرفتها وما تحب تشوف وصاخه او فوضى مرات اشوفها هيه تشتغل واكيد چان الها الاثر الكبير

بتعليمي النظافه والترتيب وكثير امور

وچانت حبابه ويه عمتي كفايه او ويه امي ما تفرقهن عن عمتي حلا اصلا بالعكس جانت مداريه امي وعمتي

اكثر من بتها الي دائما اتگللها تحبين چناينچ اكثر من بتج

بيبي تجاوبها // لان هنه الباقيات وانتي ترحين البيت رجلج

ابوي اسمر حنطي عيونه كبار ملونه طويل وجسمه عبالك رياضي وامي بيضه بياضها ومعانيها كلش حلوه لكن

شويه قصيره ف احنه اخذنا الطول

والعيون الكبار من ابوي والبياض من امي

عمي سليم وعمي معين حلوين كلش يشبهون بيبي بس عمتي حلا مو حلوه يگولون تشبه جدي ابوها الي اتوفه

وانا ما واعيه تقريبا چان عمري اربع سنوات فما اتذكره

حتى مرت عمي سليم كفايه چانت مو هلگد حلوه لكن چانت هادئه كلش وتحاول ترضي الكل خصوصا

بيبي وزوجها الي اشوف اكثر مصرف البيت من عنده ودووم اشوفه ينطي مصرف العمي معين لكن ما ينطي

الابوي واسمع بيبي تگله // يمه سليم انته هم دير بالك على اخوك عنده بنات وشغله مو هلكد

وهو يرد عليها // شترديني اسويله اخوي ارعن ما يعرف يتصرف

بيبي //لا شبي بس هوه حظه قليل شيسوي وابوك الله يرحمه ما نصفه

سليم يحرك اب ايده // هم رجعتي تحچيين على المعمل

بيبي وهيه تهز راسها // اي طبعا احچي انا اتفاجآت من شفت المعمل اباسمك وباسم معين ليش هوه وحد

سليم // شنو يمه نعيد ونصقل بالكلام مو گدامج ابوي گال اكتب المعمل الك والمعين والحليم الي رد على ابوي وگله

لا اريد اشتغل ابحدي ما اريد احد ايشاركني بشغلي

وسجله المحل الي بالسوك مال الكهربائيات والي ابنج ضيعه وما نعرف وين ودا فلوسه صحيح لو لا

بيبي // اي صحيح ما انكر هذا الشي بس ابوك وصاك گلك تنطي فرق الارض مالت المعمل لو نسيت

سليم // لا ما نسيت وكله محفوظ وابوي الله يرحمه ما قصر ولا ويه اي احد بينه حتى هذا البيت گلي

الامك والحلا والحليم بس احنه الي اتفاجانه مسجل البيت اباسمج

بيبي هزت راسها // اي سجله وهوه بحيله مثل ما قسم الاملاك عليكم وانتم شفتو الورقه يمته متنازلي عنه بيع وشرا

الله يرحمه گلي الدنيا موت وحياة وما تعرفين باجر شيصير يجوز اتطردوني من البيت شمدريني

سليم باس راس بيبيتي // يمه شلقصه انتي ما تعرفينه منو يطردج او منو يتجرأ ايطردج

بيبي جرت نفس // ما ادري الدنيا تخوف ومثل ما سجلك المعمل وهوه مريض الله العليم شيصير بيه من اتمرض

لو ما هو مسجل البيت اب اسمي وتره المعمل ما قاصر الگاع اكثر من الف متر وموقع تجاري يعني بذاك الحساب

سليم // وانا ما مقصر مسواك البيت وكل شي يريده معين وحلا وانتي جاي يوصلكم

بيبي // بهاي صحيح بس حليم هم دير بالك علي

سليم // يمه حليم يشتغل وما جاي يصرف ع البيت لو فلس والمحل الي هسه يسوى ذاك الحساب ضيعه برمشة عين

وما وكفنه على فلوسه وانتي هم ما مقصره منه ومن بناته اجار المحل وراتب الرعايه كله ابطنه وابطن مرته وبناته

بيبي // شسوي ما تشوفه يوم يشتغل واسبوع گاعد

سليم // مو گدامج گتله اطلع ويه العمال للمعمل وهو ما قبل

بيبي // اي يمه يستهضم يشتغل عامل بحلال اخو

سليم // ليش يستهضم الشغل ما بي عيب مو هذا معين حاله من حال العمال وفوكها يدرس

بيبي // معين يشتغل بحلاله مو عند الناس

سليم // وهوه ليش ضيع حلاله تدرين المحل شگد يسوه وهوه باعه بتراب الفلوس وصرفوهن ما وكفنا عليهن

يمه انا ما اكره حليم بس الى متى يبقى هذا وضعه لو هاي مرته ام خشم اليابس لامنتبهه شيلبس ولا شياكل

وبناته وبهذالهن وهيه من تطلع تگولين مرت باشا

چنت اسمع داىما بيبي وهيه تحاجي سليم ودووم هذا رد سليم عليها

خلي اگللكم منين اسمع كل الكلام او اغلبه

البيت كلش چبير بره ديوان وصاله ناهييك عن الحديقه والكراج الي عمي سليم يخلي بي سيارته ويبقى مكان السياره ثانيه وداخل

بي صاله جبيره ودايرها غرف وغرفة بيبي صايره بالنص وبيها شباك داخلي خالين بصفه كرويته خشب من انا زغيره چنت اكعد

بهدوووء على الكرويته واتصنط الكلام الي يحچونه

بس ما فد يوم فتنت او حچييت بالكلام الي اسمعه فچنت دووم اكعد بهدوء بدون ما احد ينتبه واسمع واعرف شنو

الي يصير بالبيت

عمتي حلا اتزوجت رافد وهذا ولا ارتاح اله احس رغم انا زغيره بس عينه نكسه هوه يشتغل موظف

ودائما تجي زعلانه او بالاحرى هوه يجيبها يدك الباب ويخليها ويروح چانت تبقى يومين تلاثه

اول يووم تحچي وتگول بعد ما ارجع لو شيصير لكن وره يومين ترجع ابحدها وتاخذ وياها اشكال

طبعا من بيبي الفلوس والهدايا حتى عرفت انو هيه عمتي وبيبي مشترياتله السياره

ابوي راد يبني طابق ثاني فووك وعمي سليم جابله بلوك وسمنت وبيومها عمي يحچي ب آنفه وتكبر

ويه ابوي

- - هاي جبتلك بلوك وسمنت وراح اجيبلك شيلمان وكاشي ابنيلك غرفه وحمام فووك وبعد ما عليه لا كل ساع

تجي وتطلب مني

امي جاوبته // بس ذني ما يكفنه ابو سهيل

عمي // والله اذا تريدين غرفه ثانيه ومطبخ خلي رجلج يبنيلج

امي // ابو سهيل البنات جاي ايكبرن وانت عندك جهال واحنه جهال ما ترهم الواحد هم يريد يستقل بحياته

عمي // كلامج صحيح بس البناء ايكلف وانا ساعدتكم بالي اگدر علي فااذا تردون تكبرون البناء طلعو من جيوبكم

امي // واحنه منيلنه

بيبي // لويش تبنون فووك مو البيت مليان غرف وكل غرفه تطارد بيها الخيل

امي متخصره وتهز اب ايدها //. هنه وينهن الغرف مو الج غرفه وخلف الله عليج تنيمين البنات يمج وسليم

اخذ غرفتين ومعين غرفه

وانا بهاي الغرفه حسره عليه اتحرك

بيبي // مي خالف اول وتالي سليم يكمل بيته ويشيل وانتي تبقيين اهنا

امي باستهزاء // عيش ياحمار عود من ايشيل ذاك الوكت يصير خيير والغرفه ما تخسر تبقى المعين يتزوج بيها

بيبي // تره الملافظ سعد نهله شنو عيش ياحمار

امي // خاله بس هاي الغرفه ما تكفي خلي نبني فوك وهيه ما تخسر

چنت اشوف ابوي وامي دووم يتعاركون وابوي يضرب امي وهيه ما تقصر تبقى تعيط وتسب وتغلط

ودائما بيبي تصير ابيناتهم ابوي ياخذ زاويه وامي تبقى تغلط وتحجي بصوت عالي رغم ابوي ما مقصر

وياها بالضرب يعني مرات حتى يخلي خشمها ينزف لو حلكها لكن هيه تبقى تعيط بصوت عالي وتحجي وتهدد

— هسه اخابر اهلي يجون ياخذوني

— على شنو باقيه وياك

— على الفقر والضيم ما تحمد ربك باقيه وياك وصابره ما تشوف اخوك شيجيب وشيخلي وانت كل شي ماكو

ابوي يرجف ويكلها //اسكتي

لكن امي بيها وما تزيد وتبقى اتدعي على ابوي وبيبي تهدي بيها وابوي لو يبقى يتهدد عليها لو

يضرب بنفسه لو يشوف اي وحده من عدنا يكفر بيها لذلك بس يتعاركون اخذ اخواتي وانضم نفسنا بغرفة بيبي

لمن ما ابوي يطلع ويرجع تالي ليل وهوه سكران وبيبي تلاگي وتدخله الغرفتها ينام يمنا

وهوه يبچي ويعاتب نفسه // ليش انا هالشكل شمسوي

- ليش نهله هيج تسوي وياي لان احبها

- انا ما مقصر وياها وهيه ولا معتبرتني

چنت اسوي روحي نايمه وانا اسمع كلام ابوي ما اعرف ليش ابچي ما ادري على ابوي لو علينه احنه البنات

وانا اسمع ابوي يبچي وبيبي تهدي بي وتصبر علي الى ان ينام والصبح يكعد ويلگى بيبي محضرتله الريوك

وامي هم تگعد ويتريگون ولا كانه شي صاير ومن يطلع ابوي يبوسها وينطيها فلوس تاخذهن وتطلع للسوك الصبح

ما ترجع اله فايت وكت وهيه مشتريه ملابس ومكياج وعطور وانا اعرف هاي الفلوس من بيبي حتى امي ما

تبقى تتعارك ويه ابوي

ابوي الي اشوفه يحب امي ومستعد كل شي ايسويلها لكن ما يكدر ايسوي اي شي فهي ترجع تتعارك وتعيط وهوه

يرجع يشرب وما يرجع اله نص الليل

احنه بيبي تشتريلنه بالعيد وبالشتا وبلصيف ودووم مرت عمي سليم تجيب ملابس بتها نور القديمات

وتنطيهن البيبي الي تاخذهن وتلبسهن النه

نسيت اگللكم انا مواليد 95وروان مواليد 97 ورهف . مواليد 2000

سجلنه بالمدرسه چنت مو كلش شاطره لان محد ايقريني ومستواي وسط ومن سجلت روان صرت انا اقريها

وهيه بسرعه تستوعب لذلك چانت تنجح الاولى بس ابد ما تحب المدرسه

من صرت بصف الخامس صرت اعرف اقرا واكتب بطلاقه لذلك اعتمدت اكثر على نفسي وصرت انجح

بيبي هيه الي لازمه البيت يعني هيه بايدها كل شي بس بدون ما تبين هيه مسيطره خلي نگول اتسايس الكل

ومرضيه الكل

مرت عمي سليم چانت هادئه ومنطويه على نفسها تخلص شغلها وتروح الغرفتها اسمع امي تسولف على بيبي تگلها

خاله ليش كفايه ما تجي تگعد يمنا وتسولف ويانه

بيبي // خاله ملتهيه بجهالها وانتي تعرفين سليم شگد حار وما ينجرع وشفتيها شگد حاملته

امي // خاله شنو حار وما ينجرع ما تشوفينه يباوع الحلگها والي تريده يجيبه گبل لا تطلبه

بيبي تهز راسها //. اي مثل ما تكولين لان هيه شيگلها تگله صار عمرها ما عاتبته لو حاسبته لو رفعت صوتها

امي // عليمن تعاتبه وتحاسبه هيه شناقصها

بيبي // تره كفايه ما الها حچايه ويا سليم هيه ساكته على سوالفه وابني ابد مو هين

امي // خاله انتي تدرين بي هوه ما يحبها لويش زوجتو

بيبي // بعد المرحوم عمج راد بت اخو وزوجه وسليم ما كسر كلمة ابو

امي // بس خاله ما سمعتي حلا من گلتلج اخو الرافد شايفه مصعد ويا وحده وهاي مو اول مره

بيبي تهز براسها // حتى هيه تدري وساكته تدرين ليش لان اتگلج خلي شيسوي خلي يسوي اول وتالي يجي

البيته وينام يم مرته وعلى فراشه

امي // مو بس هيچ خاله تگلج هوه مليان وعنده واول وتالي هذا الخير الي والجهالي خو مو مثلي

بيبي // وانتي شعايزج تره حليم ما مقصر بشي

امي اتهز بايدها // ليش هوه ابنج شعنده

بيبي //. العنده كله بايدج من غير الي انا انطيهن الج

امي // ها خاله ونسيتي شرب العرك

بيبي تخزر اب امي وتحچي // يمته يشرب من تتعاركين ويا وتعيرينه شوف النسوان شلون عايشات شلون وانا بالضيم حسره عليه كل شي

امي // وانا ما مچذبه

بيبي // وحليم ما مقصر مدللج والي يحصله الج تره ولو نرجع للصدك انتي امدللى اكثر من كفايه

امي // الي يسمعج يگول هوه يحصل ملايين خاله جاي اتعيريني بلافلاس الي يحصلهن

بيبي هزت راسها // ما اعيرج بس الي يگدر علي جاي ايسوي

امي // خاله انا شنو الي اريده منه اريده مثل باقي الرياجيل يشتغل ويكد مو يروح للمحل يوم ايحصل ويوم لا

بيبي // وانتي ما قاصرج شي غيرج ميتات جوع وصابرات

امي توگف تروح الغرفتها // انا ما مجبوره اصبر ويه ابنج هوه مجبور ايعيشني مثل اخو واكثر

وهاي حياتنا وهذا روتينه عمي سليم دووم بالشغل مايجي اله بالليل ومرته هادئه وملتهيه بجهالها وتنظيف غرفتها وترتيبها

وحتى ملتهيه بروحها وامي دووم تتناگر وتتعارك ويه ابوي ودووم تقارن نفسها بالناس ومخلصتها صبغ ولبس

ومكياج وطلعات للسوك لو يم صديقاتها وبيبي تحاول ترضي الكل

عمي سليم دائما بالشغل وكله يجي بالليل ذاك اليوم اجه بالنهار ودخل الغرفة بيبي سالها

وين حليم

ابالمحل ليش

باوعلي وگلي // روحي صيحي الامج

انا رحت گتلها // ماما عمي رايدج

طلعت امي واجت الغرفة بيبي وكفت اباب الغرفه // ها ابو سهيل رايدني

اي رايدج استريحي

لا واگفه لان اريد اروح ارتاح بغرفتي خير

عمي سليم لملم حلكه // نهله شويه قللي من طلعاتج ومن تطلعين لاتلبسين كاب ضيك البسي عباية راس

امي عكفت حواجبها وجاوبته بعصبيه // شنو قصدك اقلل من طلعاتي ليش انا وين طالعه

سليم // اقصد مو يوميه ت...

امي قاطعته // والله ابو سهيل انت ما مسؤول عني انا عندي رجل ويحاسبني انت تقبل رجلي يحاسب مرتك

سليم هز. راسه // اي اقبل اذا مرتي غلطانه اقبل

امي ابرود // يجوز انت تقبل لان مرتك تصير بت عمكم بس انا ما اقبل بعدين انا بشنو غلطانه

سليم // جاي اگلج قللي طلعاتج ومن تطلعين اعتني بلبسج

امي لمت حلگها وگالت // وانا وين طالعه اجيب شغلات الي ولبناتي لو حرام ما يصير لان احنه فقره ما عدنا لازم نتحاسب ع

اللگمه الي ناكلها

سليم // شجاب الفقر بالنص

بيبي // على كيفج نهله سليم ما حچى شي

امي بعصبيه // لا حچى وانتي سمعتي شنو انا وين طالعه

سليم بنتر // انتي ليش تصيحين انا نبهتج

امي //ما يحتاج اتنبهني انا من اطلع رجلي يدري بيه وبالنسبه البسي انا ما اعرف البس عبايه راس

انتم جبتوني من اهلي وانا سفور لابسه بس حجاب على راسي وانا

ما طالعه اتونس طالعه اتسوك الي ولبناتي وارجع ومحد اله دخل بيه لان عندي رجال ويحاسبني

سليم // صدك انتي ما تستحيين انا شگتلج وانتي هيج گبيتي بوجهج

امي // انا ما استحي (باوعت البيبي ) خو گدامج سمعتي شگلي وانتي ساكته

بيبي وكفت // استهدو بالرحمن وانتي نهله سليم اخوج الچبير واله الحشيمه ما كال شي

امي تبجي // خاله انتي بس تدافعين على ابنج وتكليلي اخوي الچبير

بيبي // اي اخوچ الچبير ام مها

امي // واخوي الچبير ليش ما يخليني بصدر السياره وياخذني للسوك ويصرف عليه وعلى بناتي

من جيبه ذاك الوكت اله حق يحچي بس يجي ويتأمر عليه وتالي ايگلي انتي ما تستحيين لا هاي ما مقبوله

طلعت امي وهيه تدعي وتحجي كلام عن الفقر والكره وتحاول تسمع صوتها

بيبي باوعت العمي سليم // يمه شكو شصاير

سليم وهو يتنفس قوي // هاي الادب سزز تعيط وتدعي عليمن شگتلها انا

بيبي // يمه عوفها

- شنو اعوفها شسويتلها نبهتها گتلها لا تطلعين يوميه

- يمه تروح تتسوك البناتها

شتتسوك مو انا ادز المسواك وانتي تقسمينه لو لا وكل ما نسالها رايحه اجيب غراض الي ولبناتي مو هذني بناتها

انتي تشتريلهن مو ذاك اليوم من اشترت كفايه النورملابس هيه سوت مشكله ولزمت بناتها وكفرت بيهن وهيه

تحجي وتسمع بنات الفگور لو بيجن حظ الله ما انطاجن الي انا مو مسعده مثل النسوان

مو من سمعتها وانتي گلتيلي انطيني خلي اشتري للبنات عاندت ما انطيتج

رحتي للبالات جبتيلهن ملابس لبسنهن بدون ما تغسلهن الخاتون

بيبي // وشنو الصار يمه واجيت متحمل عليها

سليم // يمه طلعتها بدون معنى كل ساع خاله الكاب ولافه الشال ونص شعرها طالع والمكياج حدث ولا حرج

والعلج بحلگها وكل شويه يارايحه ياراده تره عيب وفشله

بيبي عضت شفايفها // انته هم على كيفك هيه وين رايحه

سليم // حجيه الناس ما ترحم

بيبي // اسكت يمه شنو هالحچي كافي لحد ايسمعك

وكف سليم ايهز بايده // اندري من يازباله جبتيها البصره كلها مابيها وحده تخطبينها الابنج رحتيلي على گرايبج

بيبي بنتر // اي ما بيها وحده مو خطبناله بت حجي عبد الواحد واملونه الكم والكم وتالي زوجوها البغداد

وانوب عمك كال اله بتي وتالي اتزوجت واحد غريب ومن سالنه عمك كال ما اجبر بتي رحت وشفتها وخوش ناس

وانت شفتها اول ما اجت شلوناتها بعدين ما ادري شجرالها

سليم // صحيح مولگت اخوي لا يحل ولا يربط

بيبي //يمه تره نهله ما مسويه شي مثل ما مرتك تطلع هيه تطلع

سليم //يمه مرتي يوميه وصبح وعصر مرتي تطلع بالاسبوع مره مرتين احتياجات الجهال واحد مريض تروح الاهلها

بيبي // انته گلتها تروح الاهلها يم اخواتها واخوانها تسولف تتونس هاي وين تطلع لو تروح للسوك لو مرات يم بشرى

جارتنا تروح اتحف

سليم // يمه وماكو غير بشرى انتي مو تعرفينها

يمه هيه تروح تحف وترجع شلها غرض

طلع عمي سليم وما عاجبه الحجي رجع للمحل وامي بقت بغرفتها ما نزلت سوت النه غدا

بيبي راحت للمطبخ وانا وروان ورهف

كاعدات نباوع للتلفزيون بغرفة بيبي لمن ما جابت الصينيه وگلتلي

- - روحي بيبي صيحي الامج خلي تنزل تتغدا

رحت الامي لگيتها لابسه بدله دلعه وخاله مكياج ومتمدده بالغرفه انا اتقربت منها

= ماما

باوعتلي ونترت بيه // شرايده ؟

= بيبي تكول خلي تنزل تتغدا

- - ما اريد روحي اريد انام لو اسمع نفس اكسر راسج انتي واخواتج

چنه نخاف من امي لان اذا لزمتنا تموتنه من الضرب ناهيك عن المسبه واذا ضربتنا محد يوكف بوجهها

بيبي اتحامينه بس هيه ما تنردع تظل تعيط

بناتي ما عليكم بيهن شنو اتحبوهن اكثر مني

بناتي محد يتدخل الي يتدخل خلي ايدللهن مو حالهن حال المجديات

لحد الان ما اعرف امي ليش هيج تسوي وما لكيت جواب السؤالي

اجيت وبيبي باوعتلي انا جاوبتها = بيبي ماما تكول ما اشتهي اريد انام

اتغدينا واخذت المواعين غسلتهن ورجعت للغرفه اتمددت بالكاع وخليت رهف بصفي وصرنا نباوع على افلام كارتون

روان اتقربت يمي وسالتني// شبيج مها

= مابيه شي بس ماما كالت اذا تسمع نفس تموتنا كتل

نامت بيبي على جربايتها ورهف وروان هم نامن بالكاع تقريبا الساعه بالثنتين وربع اجه ابوي فتحت اله باب الحوش

وصعد فووك للغرفه غاب تقريبا ساعه ونزل اجه للغرفه ونده بيبي

اگعدي حجيه

بيبي فتحت عيونها وبعدها منعسه // هاا يمه

شفت امي اجت وابوي بعصبيه يحچي // سليم شعلي بمرتي تطب تطلع هوه ما اله شغل

بيبي // على كيفك سمي بالرحمن

ابوي // جاي افهمج (وصار يعيط ) عود من اتدخل بمرته وجهاله خلي يتدخل بمرتي هوه ما اله غرض انا سامح

الها تطلع وبعد اي واحد ما يفك حلگه

بيبي // يمه هوه ما گللها شي بس

امي / بس شنو خاله مو گدامج رزلني

بيبي // يمه هوه گلج كابج

امي // شبي كابي هذا الموجود عندي اشتريتولي كاب وانا ما لبسته جبتولي

معين طلع // شكو ياستار شنو هالعياط

ابوي // ما الك دخل

معين //شصاير غير افتهم

بيبي // يمه اخوك حچى ويه نهله گلها لا تطلعين هواي والبسي عباية راس من تطلعين

امي // انا ما اعرف البس عباية الراس

ابوي بعصبيه // مو بكيفه ما اله شغل بمرتي او وين ما تطلع تطلع

معين // على كيفك حليم اعصابك مو زين عليك لا يرتفع ضغطك

ابوي // شنو انته تتكنى عليه انا مو بعينك

معين // لا بعيني بس يبقى سليم اخونه الچبير واحترامه واجب

ابوي // اي خلي يحترم مرتي وما يزمخ عليها وانا اخلي فووك راسي ومثل ما انا ما متدخل بمرته وجهاله هوه

لا يتدخل بمرتي

معين حك خده // حقك ما طلبت اله حقك وام مها هم حقها

طلع ابوي وبيبي تعاتب اب امي //هسه راح يتعاركون من وراچ

امي وهيه ترفع اكتافها // انا ما عليه هوه شافني ابچي وسالني وسولفتله

بيبي // بس تره سليم ما گلج شي ورجلج يكول شنو يتدخل وسليم ما مقصر

امي اتخصرت وحجت ويه بيبي // بشنو ما مقصر بالطماطيه والبيتنجانه الي ايجيبها ويظل يرجف عبالك

جايب النه قوزي شوفي شنو ينگل على مرته وجهاله ما صارت طبقة بيض ومخضر يجيبهن شيبتونه طلعن زقنبوت

طلعت كفايه // عيني بدل ما تحسبيلنه هم عندج رجال يطلع من الصبح ما يرجع اله بالليل خلي يتسوگلج اذا

ما عاجبج مسواك سليم

امي باوعت البيبي // شوفي خاله جاي تسمعيلها تعيرنا وساكته

كفايه // لا ما اعيرج بس هوه يشتغل وينطيهن الج وانتي مخلصتها مكياج وملابس الج وطلعات علوا اتسوكي

وجيبي لحم ودجاج وسمج بدل ما اتانون راتب عمتي وهيه اتجيب الكم

امي // انتي مو كاتلج راتب عمتي انتي غيرانه مني لان انا احلى منج طبعا هالشكل تحچيين

بيبي بعصبيه // دا كافي وحدتچن السانها بطول النعال استحن شويه شتردن تره وحده انكس من الثانيه ولدي يشتغلون

ويكدون عليچن وانتن وحده محتاره بروحها والثانيه تگرص وتضم راسها

كفايه // عمه هاي انا مو التكرص وتضم راسها

امي // ههههه الي بعبه صخل ايمعمع

بيبي // انچبن يجون زلمچن وسهله

كفايه صارت تبچي وتتوعد بس يجي سليم اتگله وامي هزت ايدها مستهزئه وراحت وهي تدندن اب اغنيه

وبيبي صاحت عليه // جيبيلي ماي

رحت اركض جبت البيبي ماي وهيه تشرب وتحتسب وتستغفر بعدها ابوي اجه جاب علاگه وصعد عرفنا جايب كباب الامي

وهاي مو اول مره كل ما امي تزعل لو تتعارك ريا اذا ما يروح يشرب يجي وهو جايب الها لو كباب لو دجاج شوي

ابوي طلع وبالليل اجه عمي سليم ودخل الغرفته بعد ما اجه سلم على بيبي وراح الغرفته وشفت مرته راحت

حضرتله العشا هيه كل مره تجيب عشا البيبي بس هالمره ما جابت بقينه كاعدين بيبي طلعت الفين وگالت الروان

روحي جيبي فلافل بالف وصمون اب الف وانتي خدري چاي

رحت اخدر چاي وامي ما نزلت واجت روان جابت الصمون والفلافل وانا رحت حضرت الصينيه وخليت

بيها الفلافل والصمون ورحت جبت الچاي وصارت بيبي تسويلنه لفات وهيه اكلت بس صمونه فارغه

وشربت جاي وخلت الي بقى العمي معين الي چان طالع اجه ابوي وصعد فوك بدون ما يمر بينه واجه عمي

معين وبيبي گلتلي // حمي الچاي العمج

رحت حميته واجيت صبيتله كوب چاي هوه سال بيبي //شعجب اليوم فلافل

روان جاوبته //لان محد جاب البيبي عشا (تقصد على مرت عمي سليم )

هوه وگف وطلع من الغرفه وراح دك الباب على غرفة عمي سليم وگله // شنو ابو سهيل نبقى تمشينا النسوان

سليم // شبيك معين شكو

- - اسأل مرتك ليش ما صابه عشا الامي

سليم باوع المرته هيه جاوبت بخوف // انا بعد ما عليه خلي الي تدافع الها هيه تصبلها

سليم //ليش شصاير

كفايه // اسأل امك واخوك

عمي سليم // لا انا اسالج

كفايه // اجه اخوك وصار ايعيط وليش سليم هيچ يحچي على مرتي وهوه ماله شغل وطلع بعدها اجت مرته

اتعيب عليه وعمتي سكتت ما ردتها

اجه سليم سأل بيبي // يمه صدك هذا الحچي

كفايه اجت ورا // اي صدگ شنو اچذب عليك

سليم // بس هذا ما يمنع تصبين عشا الامي

كفايه هزت راسها // انا اصبلها بعيوني بس بنات اخوك الهن ام وابو وياكلن ويه اهلهن مو امهن رادت عزال خلص هيه تتحمل بناتها

بيبي // هسه انتي تضايگتي من لگمتي ما لازم

سليم // يمه احنه ابختج لا تغيرين الحجي نهله ليش تعيب على مرتي

بيبي // حچي نسوان

كفايه // لا عمه شنو حچي نسوان مو صار رجلها يغلط ويعيط وانتي تسمعيله

بيبي بعصبيه // كفايه انتي شتردين

كفايه رادت تحجي وسليم رفع ايده وكال //اوگفي لاتحچيين رجلها عليمن يعيط ويغلط ( وگف بوسط الصاله )

حليم حليم انزل رايدك

نزل ابوي وهوه ايگله// خيير ليش اتصيح

سليم // انا اسالك انت العصر تغلط وتعيط عليه

ابوي هز راسه // اي

سليم //. وليش باالله فهمنا

ابوي // انت شكو وتحاسب مرتي ماعليك بيها

سليم // لا باالله شنو حضرت جنابها سبيناها

ابوي // اي سبيتها ما الك كل حق تحاسبها عود من اتدخل بيك وبمرتك ذاك الوكت حاسبها

سليم بعصبيه // انجب انا احاسب الكل ناسي انا الچبير

ابوي // على نفسك مو عليه ما عليك بيها تدخل تطلع ما يهمك انته عليك بمرتك وبس

سليم // هاا

ابوي هز راسه // اي مثل ما سمعت واذا مان بالعزاله الي تجيبها بعد لا تجيب شي وكل واحد حر بنفسه

سليم // ولك انت ...

بيبي وگفت وگالت بعصبيه // بس ولا واحد ايفك حلگه سليم ما جايب العلاگه من جيبه النه حصه بشغله وغصبن

ما علي ايجيب ومثل ما تتسوك البيتك ومرتك تتسوك النه

(باوعت الابوي ) وانت كافي مو شتگلك نهله اتگلها صار انتم اخوان تتعاركون على مود نسوان وقال وقلت

سليم هز راسه // لا حجيه اعذريني من باچر مسواگ بس الج وهذا كل شي ما اله عندي خلي مرته تتسوگله

ابوي // اي تتسوگلي انطيها وتجيبلنه ما محتاجينك

ومن يومها اتبدلت معاملة سليم النه ما صار ايصيح النه وينطينه نشتري من المحل بربع وابوي ينطي الامي

مصرف وهيه تروح تجيبلنه بس مخضر اما الدجاج واللحم والسمج ما نضوكه اله لمن بيبي تقبض راتب الرعايه

وبيبي دووم تكول // هواي اسمع انتي عايزه وتقبضيين راتب رعايه ما يدرون اقبضه الهلمسكينات الي محد بحالهن

چان عمي سليم يبني ابيته اشترى بيت قديم بالمنطقه ومساحته چبيره قسمه بالنص بعدين عرفنه النص مشتريها منه

معين وصار يبني بي وامي بقت نفس ما هيه احس الكل ما يريدها ولا يحبها حتى بيبي لكن ساكتين الخاطر ابوي وهيه

ولا مهتمه ولا ابالها اهم شي عدها شلون تعتني بنفسها

وبلبسها واحنه عبالك اغراب عليها اي اهتمام ما النه

ونجحت من الخامس للسادس وسهيل نجح الصف الثالث متوسط بيومها محد فرحلي بس بيبيتي انطتني خمس تالاف

وهاي تعتبر بالنسبه الي ثروه ويمكن راح تنحل كل مشاكلي

بيومها اجت عمتي حلا جابها زوجها وراح دخلت باوست بيبي وسئلت على امي بيبي گلتلها بعدهي نايمه

حلا باستهزاء // هاا يمه وانتي تسرحين ابناتها

بيبي // انتي شتردين من عدهن والله شايلاتني ما تشوفين غرفتي شكد مرتبه وهنه ما بيهن اذيه

حلا // انتي دومج اتدافعين عنهن

بيبي غيرت الموضوع // شعجب جايه مو اول البارحه عدنا

حلا // جايه على ام سهيل نروح البيت اخوها

-خير خو ما كو شي

- مرت اخوها گالتلها اهلها عدهم ذهبات وغراض گلت اروح اشوفهن اذا يعجبني اخذهن

بيبي // شنو عندج فلوس

حلا بخبث // عندي وانتي يمه ما تقصرين

بيبي // انا منيلي مو كافي الجاي انطي الج بعد منيلي

حلا وهيه تضحك // يمه انتي كريمه وانا استاهل

بيبي // روحي وشوفيهن والله كريم

حلا وكفت وحجت بصوت عالي //ياالله كفايه وينج

بيبي // البارحه رجعت متاخره هيه واخوج

حلا // اي كلتلي راحت حجزتلها كاونترات وفراش للديوان

بيبي // اي الله يستر عليهم ان شالله

حلا // خو مو مثلي ظاله على البيت ما ادري يمته تبيعينه

بيبي // شبيج حلا

- يمه شنو شبيه بيت شگد ايجيب بيعي وقسمي وكلمن ياخذ حقه

بيبي // ما ابيعه من اموت عود ذاك الوكت بيعو واتقاسمو

عمتي عوجت حلگها بيبي شافتها (لاتدعيين عليه اموت او اورثيني )

مو هذا قصدي يمه بس ان...

بيبي قاطعتها // والبيت الكاعده بي مو طوبته اب اسمج هذا ما تحسبينه

حلا // يمه تعتبرين السبعين متر هم بيت

بيبي // والله غيرج ما لاكيته بيت ومبني وعلى شارع اشتريته الج وگتلج بعد ما الج حصه ابيت ابوج اشو يوم وثاني وكلتي

بيعي البيت

حلا // يمه تدرين رافد يگول بيت اهلج شكد يجيب لان على شارع تجاري

بيبي لملمت حلگها // ها اهنا الحجي رافد يگول وانتي كل ظنج ابيعه وانطيج

حلا // اي قابل انا وحد

-بسج لاتحجيين انا لا امشي بكيفج ولا بكيف رافد

حلا // اي تردينه الحليم حتى نهله ثاني يوم تبيعه وتخلصه

وطلعت عمتي واخذت ابنها وياها ومرت عمي اخذت نور لان ولدها طالعين ويه ابوهم نزلت امي

- ها خاله صباح الخير

-هلا خاله

-اتريگن البنات

-اي تريگن

-وانتي

-اتريگت وياهن

-زين راح اتريك اجيبلج چاي

-اي جيبيلي

راحت امي للمطبخ وجابت چاي البيبي شربته وامي تريگت بالمطبخ صاحت عليه مها جيبي الكوب

اخذته الها سالتني// بيبيتج شتسوي

-اتمددت على جربايتها

-زين اخذي رهف وروحي يمها خاف تحتاج شي ونصي التلفزيون

-اي ماما

شفت امي گعدت بالصاله روان چانت بالدكان دخلت وما اعرف شنو حچت ويه امي دخلت روان تريد تحجي

وياي انا كتلها = اسكتي بيبي نايمه لا تگعديها

روان باوعت طلعت للصاله

تقريبا ساعه اكثر سمعت جرس الباب احترك رحت افتحه دخلت حلا وهيه تكول

وينه وينه

///////////////////////////يتبع

الثاني من هنا

تعديل المقال

مدونة مكتبة حـــواء

رواية عقارب ذوي القربي كامله وحصريه بقلم انين الليل