رواية عقارب ذوي القربي الفصل الثاني 2 بقلم انين الليل

رواية عقارب ذوي القربي الفصل الثاني 2 بقلم انين الليل

مها

سمعت الباب يندك بقوه مره جرس ومره بالايد

رحت اركض فتحته واشوف عمتي حلا دخلت ودفعتني وهيه تعيط وينه وينه

راحت الغرفة بيبي

چانت الساعه تقريبا ادعش اله عشره لمن ما عمتي حلا دخلت ومرت عمي سليم وراها اجت الغرفه بيبي الي

گعدت على دگت الجرس ورهف تباوع ع التلفزيون بيبي سالتها وهيه تتثاوب

ها حلا اشو رجعتن على وكت وجايه اتصيحين

عمتي ما جاوبتها باوعتلي وگالت بعصبيه // ولچ مها امچ وين

انا بقيت فاتحه عيوني ما اعرف شجاوب

بيبي تسأل // اي فهميني شصاير شكو

عمتي ما جاوبتها خزرتني وصعدت ع الدرج تركض وسمعن العيطه والغلط على امي الي ترد عليها

انچبي ولا تحچيين زايد ياما تستحيين

عمتي نزلت وهيه تحرك اديها بحركات مو طبيعيه وبصوت عالي

// يمه قرت عينج بچنتچ الي ابيتچ لگيتها ويه رجلي بغرفتها ونايمه بصفه

امي اجت وراها راسا لزمت شعرها وتگلها // اكلي تبن حقيره جاي تتبليني يا طايحة الحظ

عمتي دارت عليها وكمشت شعر امي // انا اتبلاچ شتسوين انتي ورجلي بالغرفه

الكل باوع مستغرب امي مرتبكه لكن اتصنعت القوه

اجه رافد وفكاهن وضرب حلا راشدي // امشي گدامي للبيت اليوم اموتج

حلا لزمت خدها وتكول // ليش اتموتني ها ما خليتك تكمل نومتك وياها

اتقربت منه وكلتله // اله افضحك ياناقص انوب تضربني على مود هاي الگ...

امي // انتي الگ... رافد شفته اجه ولكى امج نايمه وانا گتله الگلوب احترك بلكي تركبلي گلوب للغرفه

وانتي من دخلتي للغرفه مو شفتي روان يمي ياچذابه وانا واكفه بره

حلا // هاا گلوب يركبه او وينه الگلوب

روان جاوبت بسرعه // توني اخذته ذبيته بالزبل هسه اروح اجيبه وتشوفينه

حلا باستهزاء // والي ايركب الها گلوب واكفه ويا ودشداشتها دلع ونص صدرها طالع

امي // ياما تستحيين مو لابسه الكاب گدامج بس انا الج هسه اخابر اخواني ويجون وشوفي شيسوون

حلا // وانتي بكل عين وكحه اتهددين اي خابريهم خابريهم خلي يجون ويشوفون اختهم الشريفه الهايته

امي // انا شريفه غصبن عنج بس انتي فد وحده چذابه وغياره

حلا // وانا اله افضحج ياچلبه

رافد // حلا بسچ وعيب هذا الكلام

حلا بعصبيه //شنو العيب ها فهمني مو من وصلتني گتلي انا رايح عدي شغل (هزت راسها وضحكت )

بس طلع خوش شغل طلع شغلك ويه نهله

رافد لزمها الحلا وراد يخنگها وهوه ايصك على سنونه // انا قبل لاتجيين بدقيقتين اجيت عبالي الكاج لان مفتاح

البيت ناسي وعندي اوراق مهمه اريدهن وشفت البنيه بيدها الگلوب وصعدت ركبته بس انتي فد وحده ما تصيرلج چاره

اتشكيين بكل شي لان انتي وحده عندج احساس بالنقص وتغارين من كل شي

حلا وهيه تعيط // هدني شنو عبالك انا غبيه ما افتهم اتگول توك جاي اتشد گلوب

اندك الباب ورحت فتحته شفت عمي سليم وابوي جايين عمتي لاگتهم //همزين اجيتو تعالو شوفو شلگييت

سليم // شكو حلا شصاير

حلا // هذا رجلي عشتو الناقص لگيته هوه ومرت حليم

اتقرب عليها ابوي وهوه فاتح عيونه // ولچ شتكولين

امي ردت عليها //انچبي توه اجه وانا گتله ركبلي الگلوب وروان چانت وياي واسألو كفايه

كفايه // انا ما ادري بشي ما عليه

امي وهيه تحرك اباديها //ايي گولن انتي وياها متآمرات عليه (باوعت الابوي ) حليم هسه هسه توديني الاهلي

همه يعرفون يتصرفون وياكم جايات اتذبن عليه تهايم شحال لوما امك بالبيت وبناتي

حلا // بناتچ ام بنات ايغطلج هاي السانها بطول النعال تگول جبت الگلوب ولاگاني رافد

سليم باوع الروان هيه هزت راسها وحچت بدون ما يسالها // اي عمو احترك الگلوب وامي تريد اتخيط بجامة رهف

مشكوكه ورحت اجيب كلوب وشفت عمو رافد نزل من السياره سالني على عمتي وشاف الكلوب ابايدي وامي كلتلي

روحي خلي يجي ايركب الكلوب هس توه ركبه وعمتي اجت تعيط علينه

امي // اسالوها وين الكلوب

روان // عمو توني بس اجت عمتي حلا رحت شمرته بالزباله هسه اروح اجيبه حتى لومكسور الم

الكزاز واجيبه

حلا // والله حابكتها نهله انتي وبناتج

سليم اتقرب عليه // يمته اجه رافد

ما عرفت شجاوب سليم زمخ عليه // جاوبي ولج

انا نزيت وصار كلبي يدك بيبي گالت// ماصارله عشر دقايق هوه اجه گبل ما تجي حلا حتى عبالي اجو سووا بس

هاي الرعنه سوتلها حچايه ما ادري شتريد

حلا بعصبيه // يمه

بيبي // وغمه حتى غمه طاح حظج ما استحيتي من اخوج امدااج ما استحيتي مني شنو انا بالبيت

حلا // يمه انتي چنتي نايمه

بيبي // طاح حظج ظلي گولي انتي نايمه وهو گال عدي شغل شنو رافد اول مره يجينه مو حاله حال الولد

بس انتي فد وحده حماره ما تصيرلج چاره

رافد باوع السليم واتقرب منه // اعذرني سليم اختك بعد ما ينعاش وياها هاي هيه خليها يمكم وخط طلاگها

يوصلها باچر واي شي يترتب عليه بالسالفه الي ذبتها انا حاضر

سليم // اوكف رافد خلي نفتهم

رافد // اي مفاهمه ما كو باجر خط طلاك اختك يوصلها وانا حاضر الكل شي

بيبي وكفت وحچت بعصبيه // اي تستاهل هالچلبه الما تستحي تستاهل كل شي تسوي بيها مو بس اتطلكها

امي تبچي // حليم هسه توديني الاهلي ما ابقى دقيقه اهنا لو شما يصير

ابوي // كافي وانچبي وين رايحه

امي // انوب تغلط عليه بدل ما تكسر راسها الهاي الحقيره ما ابقى لو شما يصير هسه توديني هسه تره احرك

روحي وابليكم

ابوي صار ايعض بايده ويگلها // كافي اصعدي الغرفتج

حلا باستهزاء // اي اصعدي الغرفتج لان ما يعجبها تگعد جوه ابنولي فوك حتى تاخذ راحتها اتصعد

اليعجبها ومحد يدري بيها

اتقرب عليها ابوي وضربها راشدي // انچبي حقيره انتي من اتزوجتها وانتي تغارين منها

حلا وهيه لازمه خدها // عمت عينها هيه منو واغار منها هالساقطه تضربني كدامها اله افضحكم كلكم

امي صارت تبچي // خو سمعتوها هسه تودوني الاهلي ما ابقى دقيقه عندي اهل يجون وياخذون حقي

وصعدت امي سليم حجى ويه حلا // باالله هسه انتي شستفاديتي من سويتي الفضيحه

حلا // اگللكم المره ورجلي اثنينهم فووك وامي اتغطيلها

بيبي // انچبي ياماتستحيين والله ما الومه الرافد لو شيسوي بيج

حلا //سليم اسأل مرتك من دخلنه امي نايمه وهاي مها ما جاوبت من سالتها بس هاي الب...روينه

سليم خزرني // تعاي ولچ

رحت يمه وانا ابلع ريگي = هاا عمو

من اجت حلا وسالتج وين امچ ليش سكتي

بلعت ريگي هو زمخ عليه // احچي ليش ساكته

انا فزيت وعيوني انملت دموع = عمو هيه دگت الباب والجرس وانا خفت ومن فتحت الباب صارت تعيط وتسالني

وين امج وصعدت ما خلتني اجاوبها

حلا // هسه صرتو اتصدگون بالزعاطيط

حليم // كافي حلا امي تكول توه اجه وصعد كدامها وياهن روان ومن حچت چذبتيها ومن سالنه مها چذبتيها

بس انتي الصداگه

نزلت امي وبيدها جنطه وعلاگه وهيه تبچي وتگل الابوي// ياالله هسه توديني لو ماكو اطلع ابحدي

عمي سليم گلها // نهله وين رايحه

امي //اروح الاهلي يسوولي چاره يجوز صدك انا مو زينه ومواعده رافد

سليم // عيب خويه شنو هالحجي

امي // اروح واگللهم اجتني وانا لابسه حجابي وكابي وبتي يمي وانا جنت بالسطح واگفه اصلا بره مو بالغرفه

وهاي حلفها كلها وين شافتني بالغرفه لو بالسطح

سليم جر نفس // ابقي اليوم وباچر انا اوديج

امي تبچي وتهز براسها وتباوع الابوي // حليم اذا ما توديني هسه والله اطلع واروح ابحدي

باوعت النه وگالت //ياالله امشن

ابوي وكف وكال // ياالله بابا خلي نروح

بيبي // نهله خاله استهدي بالرحمن

امي وهي تضرب على وجهها وتبجي // خاله بعد ما الي عيشه مليت خلوني ارووح بعد ما الي كعده لايسمعون

اخواني وتصير بالشغله كاتل ومكتول

بيبي صارت تنفخ بقهر // حليم يمه اخذ روان ورهف وخلي مها يمي

ابوي ما جاوب وامي ردت // اذا تردين خليهن تلاثتهن يمج المهم انا بعد ما ابقى وهاي كدامكم حليم لو تطلگني لو

اتسويلي جاره

حلا // اي بقيهن حتى يخلالج الجو هناك تاخذين راحتج اكثر

امي // انا ما ارد عليج محترمه وجود ابو سهييل

سليم // ولج حلا كافي طلعتيها من ماعونها

حلا // ههههه والله عمي نسوان تعرف شلون تتمسكن

طلع ابوي وامي بقت واگفه وروان لازمه ايد رهف وانا ساكته بس اراقب غاب ابوي ربع ساعه

ورجع گلها // ياالله امشي

وراحت امي واخذت اخواتي وانا بقيت ما اعرف شسوي عيوني غركن بالدموع

واشوف شلون سليم يخزرني وحلا واگفه ونظراتها الي كلها توعد

باوعتلي بيبي من شفتها نزلن دموعي وشهگت اجت حضنتني

وگالت //لاتبچيين بيبي كلها شكم يووم وترجع هم من زمان ما رايحه البيت جدج

سليم گعد على القنفه ويضرب ايده برجله ويگول // حلا هسه ارتاحيتي

حلا جاوبت بهدوء // سليم صدگني رافد وهيه چانو بالغرفه سوا وهاي (اتاشر عليه ) تدري بيهم

بيبي // ولج انتي ما تستحيين مخبله تغارين على ارويفد امدااج گوه مسلكتج ويا وانتي ظلي بخبالج

حلا // بعد شحچي اذا امي هيچ تحچي وتغلط عليه لاعتب ع الغريب

سليم // كافي حلا وبعد لاتحچيين بهذا الموضوع ولا واحد يحچي بي خلص

وطلع نقاله واتصل // الو حليم فهم مرتك لاتحچي يم اهلها شي مو عوزنا جيبو الگعده وردو الگعده وفصل

وسوالف تعبانه

سكت صار يسمع الابوي بعدين جاوبه //ابقى وياها يومين تلاثه وبعدين قنعها ترجع وياك

باوع سليم الحلا // اسمعي لاتخابرين رجلج ولا تحچيين ويا لو كلمه وحده

حلا // لا ما اخابره ايولي شنو ميته علي

سليم ايهز براسه // هسه تگولين لا ما اخابره بعد نص ساعه تگعدين على نار اذا ما تحچيين ويا

حلا سكتت سليم گلها // هسه ما اريدج تحچيين على ما باچر اروح واشوف شلون اتصرف

حلا وهيه تعض بشفتها // مو خاف ايطلگني

بيبي // چا ما دام تعرفين بي ايطلگج ليش سويتي هاي المصيبه

حلا /. يمه انا ...

سليم قاطعها // شگلنه نرجع من جده وجديد كافي (باوع المرته ) ياالله بين ما اصلي صبي غدا

كفايه // ياا ابو سهيل مو گتلك اتغدا ابيت اهلي بس مرت علي اخوي ابوها بالانعاش وكلهم راحو

وهل رجعنا

هز راسه // مو مشكله هسه يجي معين ويجيب غدا وذكريني اروح للمستشفى عيب من ولد الحجي

كفايه // اي ان شاالله

راحت بيبي تتوضا وهيه تحچي // استغفر الله ياربي هسه اخذت البنات وراحت الدرب بعيد والدنيا حاره

انا گعدت ع الچربايه وخاله اديه على خدودي ودخلت حلا وهيه تخزرني اتقربت مني وحچت

شوفي ولچ ادري بيچ انتي وروينه گح...مثل امچن وهذا الچذب مو عبالج انسا انا الج وين ترحين مني

انا الج اظل وراچن الحد ما اندمج انتي وامج واختج

انا ظليت اباوع الها بخوف بيبي اجت وانا فرشت الها السجاده وحلا تگلي // اي اي تلوگي عفيه

عليچن تعرفن تعيشن

بيبي جاوبتها // حلا كافي البنيه شرچ واخذي ابنج وروحي الغرفة معين لو تگعدين بالهول اريد اصلي

حلا صارت اتدردم // اي خافت على مشاعر بت نهله العاهر

بيبي صارت تصلي وانا اتمددت ع الچربايه ودرت وجهي وانا امسح بدموعي والف تساؤل ابالي

ثاني يووم بالليل اجه عمي سليم ودخل الغرفة بيبي وصاح على عمه حلا الي چانت بالمطبخ هيه ومرته اجت

ها ابو سهيل

سليم آشر الحلا //اگعدي (باوعلي ) روحي جيبيلي ماي

رحت جبتله گلاص ماي اخذه وشربه باوع الها // اسمعي حلا توني چنت يم رافد وحچيت ويا وهوه قافل

بيبي // شلون يعني

سليم // يمه الرجال ما يريدها ايگول ما الها خبزه وياي

حلا وهيه ترجف // اي طبعا هيج يكول لان ناقص بس اله افضحه

بيبي باوعت الحلا // ولچ دنجبي يارعنه شتفضجيين منه انتي شلازمه علي

حلا // يم...

قاطعها سليم // هسه هذا الحچي ما يفيد اسمعيني حلا اتگعدين اهنا بدون مشاكل وابد لاتخابرينه خلي يبرد

وتالي يصير خير

حلا // اي طبعا ابقى اهنا وهوه ايخلصها ويه النسوان

بيبي // دي كافي استحي عاد من اخوج كافي شنو هالحچي

سليم وگف // هسه شتفتهمتي لا تخابرين ومن احد يجي گولي رجلي مسافر

بيبي // وليش هيچ خو تكول زعلانه تره مو اول مره تزعل وكل الناس تدري

سليم // اي صحيح بس من يسالون ليش زعلانه شنگول (سليم باوع الحلا )حلا اگعدي وسكتي وبعدين ايحلها الحلال

(باوع المرته ) وانتي كفايه مو تسولفين يم اهلج مو عوزنا فضايح

كفايه // ياا انا شعليه واسولف

بيبي بعتب // ليش مو انتي الخابرتي امس

كفايه // اي عمه لو ما مخابره جان شفتي شصار من فضيحه

طلع عمي سليم وراح الغرفته وعمتي حلا صارت تحچي // الله لا ينطيج نهله خبلتي الرجال

بيبي // ولچ كافي ما سمعتي شگال اخوج

حلا // سمعت بس كله منها خلت رافد ما يشوفني بعينه اصلا ولا حاسبني مره وانتي يمه تدرين بيها بس

ما ادري ليش ساكته

بيبي // انچبي ولچ شنو ادري بيها ترديني اظلم بختي واگول شي ما شفته

حلا // لو بس ادري ليش تحبينها النهله وتمصلحين الها

بيبي // ايي امصلح الها مثل ما امصلح الرافد واشتريتلج بيت لو نسيتي

حلا // انتي يمه كل ساع اتذكريني اشتريتيلي بيت شنو نسيتي شرطج وكتبتي عليه ورقه ولا چني بتچ

بيبي // حلا الورقه حلال وحرام ان...

سليم واكف اباب الغرفه // يابيت ياورقه

بيبي ارتبكت وجاوبت سليم // بيت حلا الگاعد بي رافد انا اشتريته الها

سليم باوع البيبي // شو ما ادري

بيبي // مو اله تدري يمه

سليم // ليش الفلوس مو مالات ابوي

بيبي // لا الفلوس فلوسي وذهبي بعته واشتريت الها بيت وكتبت ورقه بعد ما تداعي حليم بهذا البيت

سليم // ها وانتي بكيفج تشترين بيوت وانا ولا چني موجود

بيبي // اي بكيفي ما ماخذه من الورث وانته ما قصرت

سليم // هاا يمه شبيه انا شمسوي

بيبي ما جاوبت واكتفت تباوع السليم وحلا اخذت ابنها وطلعت راحت للغرفه الثانيه

سليم راح الغرفته غاب شويه ورجع انا درت وجهي عبالهم نايمه اجه يم بيبي وبيده كوب چاي وحچى

ويه بيبي بعتب // يمه ليش هيج تحچيين انا شمسوي

بيبي // سليم انته تعرف شمسوي

سليم // لا ما اعرف يعني من اسال واحچي لويش تشترين للغريب بيت تزعلين وتگولين انت ما عليك فلوسي وبكيفي

بيبي // مو للغريب الاختك

سليم // وباچر حلا ما راح اتطالب بالورث

- ليش انته شخليت من ورث خلف الله على ابوك سجل البيت باسمي او وصا بي الحليم وحلا

سليم // وانتي اشتريتي الحلا بيت وهذا يبقى الحليم ابحده

بيبي // ايي مثل ما انت اخذت الورث الك ابحدك

سليم // ما اخذت شي الگراج كلكم الكم حصه بي بس الحصه الاكبر الي ولمعين لان احنه اشتغلنه بي

وكبرنا نسيتي معين من الاول متوسط وهو يشيل ويحط ويحمل وينزل

بيبي // اي تنطينه حق الله

سليم هز راسه // ما ناكر انطيكم بس مو من تعبي وتعب معين

بيبي // والاسواق ؟

سليم // الاسواق ابوي كتبها باسمي وانتي تدرين

بيبي هزت راسها // ما ادري ولا گالي

سليم // لاتدرين مثل ما كتبلج البيت باسمج

بيبي // كتبه گدامك وگلي هوه منطيك قطعه حقك الك والمعين القطعه الي جاي تبنيها وگدام الناس تكول

اشتريتها وهوه سجلي البيت الي والحلا والحليم وانا اشتريت الحلا بيت يبقى البيت هذا الحليم وحصتي هم الحليم

وانا مذممه ناس تخاف الله ابوك من كتب القطعه الك والمعين حتى يضمن البيت الحليم وگدامك گال تره البيت

الحليم وحصة امك هم الحليم

سليم // صحيح والاسواق كال الك تبني بيها بيتك وانطى المعين محل مثل ما انطى الحليم محل بس مو مشكلتي

ابنج ضيع المحل والغراض ومن اساله ايكلي خسرت

شفت عمتي حلا واگفه اباب غرفة بيبي وتتصنط ثاني يوم اجه ابوي العصر اجه تعبان وصعد من غير ما يمر

على احد او يحچي بالليل اجه عمي سليم وعرف انو ابوي اجه هوه باوعلي وگلي

اصعدي اندهي ابوج وگليله ينزل يتعشى

انا صعدت واسمع عمتي حلا // اجه حتى ما سلم ولا مر على امي گبل صعد خوش مقري براسه

انا رحت لگيت ابوي متمدد على الچربايه ويدخن گتله = بابا عمي سليم ايصيحك يگول خلي ينزل يتعشى

ابوي گعد وهز راسه يعني جاي وانا نزلت = هسه يجي

نزل ابوي والكل كاعد بالصاله هوه سلم وباس راس بيبي وگعدنا نتعشى والكل ساكت بعدها لمت عمتي المواعين

ومرت عمي جابت الچاي عمي سليم بايده الكوب وباوع الابوي الي جاي يدخن والكوب گدامه

ليش ما تشرب چايك

ابوي هز راسه // ايي

سليم // عبالي من اتاخرت تجيب مرتك وبناتك وياك

ابوي // لا هيه گالت تعبانه تريد تبقى

سليم هز راسه // اي خليها تبقى

معين // ههههه منين تعبانه بس لا جانت تكرب

ابوي // مو چنك تستهزأ

معين // على كيفك شگلنه وصرت عصبي

ابوي بقلة صبر //مو صوچك صوچ اليگعد وياك

وگف ويريد يوصل الباب الصاله يمكن يريد يطلع سليم گله //اوگف حليم

راح اتقرب منه وسأله // مرتك ليش ما اجت وياك

ابوي بعصبيه // ياخي تكول ما ارجع اذا حلا بالبيت ما الي رجعه

حلا // والله خوش فوگ شينها گواات عينها انوب ما تقبل نهله خانم تجي اله انا اطلع ناسيه انا ما كاعده ابيت الخلفها گاعده ابيت ابوي

ابوي // احترمي نفسج ولا تغلطيين

حلا باستهزاء //شنو ما اغلط تريدني اطلع من بيت ابوي وما اجي وتكلي لا تغلطيين اغلط واطيح حظ حظها

سليم اندار على حلا وكلها // بس كافي اسكتي وانت حليم خليها براحتها يمته ما تريد تجي خلي تجي

ابوي // هو هل امخليها براحتها قابل انا شمسوي

طلع ابوي وحلا اجت گعدت وهيه تباوع البيبي //شفتي بت الكلب شتگول ما تريدني ادخل البيت ابوي

وهوه مقهور وضايج عليها ايريدها ترجع

بيبي // اي طبعا مرته وبناته

معين // وانتي يمه قابله على كلامها

حلا باوعت المعين // امي لو بيدها تطردني اليوم گبل باچر

سليم // شنو هالحچي كافي خليها تبقى يم اهلها ويصير خيير

سليم راح للغرفه ولحگته كفايه وبيبي هم دخلت الغرفتها وانا رحت وراها دخلت حلا ومعين گعدو يمها

حلا // يمه شو ساكته ما تحچيين

معين // صدك حجيه انتي قابله على شروط ست الحسن

بيبي بنفاذ صبر // ما اتگلولي انتو شتردون فهموني

معين // يمه خلي حليم ايطلگها وتولي

حلا باوعتلي وزمخت عليه // هيي انتي گومي اطلعي بالهول مو فاتحه اذاناتج شنگول اتنقلينه الامج

انا صرت اباوع البيبي الي خزرت حلا وگالت // اكلج انتي وين ما ترحين تشمرين سمج كافي اهمدي شويه

حلا // هنوب انا امشي واذب سمي

بيبي هزت راسها // اي كافي ما شبعتي فهميني شنو عداوتج ويه هاي المسكينه

حلا باستهزاء اتأشر عليه // هاي مسكينه حقج هاي حيه تگرص وتضم راسها

بيبي // بيش گارصتج

حلا // يمه انا بعيني شفتج نايمه وفزيتي من سمعتيني اعيط وهيه من سالتها على امها بقت ساكته

بيبي // لا انا سهيت شويه وهاي حقها تسكت لان خافت منج ما شفتي روحج شلون دخلتي وانتي صوتج

يجيب سابع جارعبالك مخبله

حلا // اي لان ادري برافد جاي على مود انهيله

بيبي // شنو انتي ما تستحيين انتي اشايفه عليهم

حلا // كل شي شايفه بس ما بايدي دليل لمن ما كمشتهم وهم محد صدگني

معين // امدااج حلا ما تفتهميين المفروض اذا شاكه برجلج تجيين بسكته اتدخلين وتصعدين اتباغتينهم

حلا // اي انا باغتتهم بس ذيج الحقيره روان صعدت گبلي

بيبي // خافي ربج حلا

حلا // يمه خايفه ربي انتم ليش محد مصدگني

كامت عمتي وهيه تمشي تگول // عمي رجال غريب ومره ابحدهم شيسوون

معين باستهزاء // ايشكل الها الگلوب والشاهد بتها الزعطوطه

طلعت حلا وبقى عمي معين وكال البيبي //يمه شبيج

بيبي بعصبيه // ما بيه شي بس راسي دايخ وما ادري انتو شتردون

ما نريد شي على كيفج شعدنا غيرج. ( باوعلي )روحي صبيلي استكان چاي

رحت لگيت حلا بالمطبخ باوعتلي // ها شتردين

= عمي معين يريد استكان چاي

صبتلي حلا الاستكان واخذته قدمته گدامه باوعلي وكال // روحي عمو اگعدي بالهول ع التلفزيون بيبي راسها يوجعها

رحت گعدت ع القنفه وانا مو ابالي اي شي بس عندي عتب على امي الي ما اخذتني وياها چان شباك غرفة بيبي

مفتوح وبس البرده مردوده وصرت اسمع معين وبيبي يحچون

معين // يمه تره كل كلام حلا صدك

بيبي // ياكلام

معين // يمه لاتغشميين روحج حلا لگت رجلها ويه نهله

بيبي بعصبيه // شنو هالحچي هذا استغفر ربك انت شاب ومو زين عليك هذا الكلام

معين باستهزاء// يمه احنه ابختج رجال غريب شيسوي فوك وياها

بيبي // يمته صار رافد رجال غريب مو تگعدونه بنصكم ياكل ويشرب وينام ويضحك هسه صار غريب

معين // صحيح يجي ياكل ويشرب بس ويا حلا واحنه موجودين

بيبي هزت راسها // لا حتى لو مو حلا ويا هم نفس الشي هاي اختك مخبله وتغار ويتراوالها

معين // بكيفج حجيه بس تره الگدامچ مو گرن واحنه نعرف بالنسوان

بيبي بقلة صبر // شتعرف معين والله اذيتوني

معين // يمه نهله لاعبه بحليم لعب مدوهنته ما مخليته يندل دربه

بيبي // هاي كل مره يحبها رجلها ينكال عليها لاعبه بحاله

معين نفخ // لا مو كل مره ابنج كلش مرخيلها الحبل

بيبي // شنو نهله وحد مو هاي كفايه ما تگعد ابيتها اسمها طالعه وين يم اهلي وين البيت اخوي لو حلا الي

ما تعرف تگعد ساعه ابيتها خلف الله على رافد حاملها

معين // بس هم مو مثل نهله

بيبي // معين لاتلف ولاتدور اذا تعرف شي گوله بلا هالحچي الزايد

سكت وره شويه طلع هوه حتى ما انتبهلي انا گاعده واسمع رحت يم بيبي الي لكيتها متمدده على جربايتها

وصرت اعصر برجليها باوعتلي وكالت //الله يرضى عليج

وره اسبوعين او اكثر اجه عمي سليم بالليل تقريبا الساعه بالتسعه لاگته كفايه // الله يساعدك شو اتاخرت

هو جر نفس وگال // حلا حلا

طلعت عمتي // ها ابو سهيل

- - لمي ملابسج وملابس ابنج ياالله خلي اوديج البيتج

شفت لمعه بعيون عمتي ويمكن فرحه حاولت تخفيها گالت // لا ابو سهيل ما اروح اله هوه يجي يتسامح مني

وياخذني شنو قابل ذابه نفسي علي

سليم // لا مو هيج انا چنت يمه وحچيت ويا واعتذرت منه

حلا باستغراب // انوب انته اعتذرت منه وليش

سليم // شنو ليش انتي اتهمتي الرجال ولو مو هوه خوش ولد يمكن طلگج الف انعم الله علي وقبل اترجعيين

حلا // انا م...

قاطعها سليم // حلا ارجعي البيتج وديري بالج على ابنج ورجلج وما عليج بكل احد

هزت راسها // مي خالف بس فهمه مره ثانيه من ازعل انا ابقى ابيتي وهوه اليطلع

سليم // حلا شلج بهالحچي لاتزعلين ولاكل ساع معيره الرجال بيتي وبيتي تره هوه من حقه ياخذج وتكعدين

ويه اهله انتي ما تتحملين وامي ما قصرت اشترتلج بيت فاحترمي نفسج واگعدي وديري بالج على بيتج

مو يارايحه ياراده

حلا شفت بعينها دمعه وصارت تعاتب بسليم // حتى انته ابو سهيل هيج تحچي وياي تره بعدني ما جايه البيتك

وگاعده ابيت ابوي يمكن لان امي موجوده بس تغمض عينها يمكن تطردوني وانا بالاساس ما اصير اجي

سليم // من اگعد ابيتي هلا بيچ تعاي واگعدي وباتي بس ما يصير عايفه بيتج ياالله بابا روحي جيبي ملابسج

وملابس ابنج وخلي اوديج البيتج كافي عناد ومشاكل

حلا // هوه انا منيلي ملابس كل شي ما جبت وياي وابني خلف الله على ملابس ولدك

سليم // ياالله امشي ومثل ما وصيتج تسكتين وما تحچيين شي ولا كأنه صاير شي

هزت راسها وراحت على بيبي باستها وطلعت ويه عمي سليم الي طلع ورجع بسرعه دخل الغرفة بيبي وصاح

على مرته // كفايه جيبي عشاي اهنا

معين گال الها // وانا هم ام سهيل

بيبي باوعت العمي سليم وگالت // وصلتها

سليم هز راسه //اي يمه وصلتها شفتها دخلت للبيت وانا رجعت

بيبي سالته // شنو انت رحت على رافد

سليم // اي رحت وحچيت ويا والولد كلش مقهور من بتچ عاد هيه كون تلزم السانها

معين // تره حلا حقها واي وحده بمكانها تسوي اكثر شنو ابو سهيل يعني قابل على تصرف رافد ونهله

سليم // لا ما قابل وادري برافد مو تمام وعينه زايغه وما يحترم بس شنسوي نريد انلفلف الموضوع

معين // ونهله نسيتها

سليم هز راسه //. لا ما نسيتها لكن بوجود امي وبناتها ما نگدر نحچي

معين // وانت تتصور حلا تچذب

بيبي بعصبيه // اي اكبر چذابه وتغار على رجلها عدها وبالها الي تسلم علي تريده

معين راد يحچي سليم گال // كافي بعد سدو الموضوع انا اروح وارجع نهله وكل شي يگعد بمكانه

بيبي // يعني انت تروح تجيبها

سليم هز راسه // شسوي حجيه مو تشوفين ابنج ما اله خلك روحه وادري بي يجي شارب نص الليل

بيبي // يريد مرته يمه

- عگب باچر اروح واجيبها ويصير خيير

اتعشى عمي بعدها صاح على كفايه // تعاي كفايه شيلي الصينيه

اجت نور // بابا امي جاي اتشر ملابس بالطارمه

وراحت وسليم هز راسه وانا شلت الصينيه هوه گلي // جيبيلي چاي وياچ

رحت بسرعه جبت كوبين جاي خليتهن كدامهم

معين // شگد صار الحليم من متزوج ما شفت مرته بيوم شرت ملابس بالليل كله تكودهن وتطلعهن تغسلهن

بحيث يومين تشغل الغساله من غير التشمرهن

بيبي // انت وين شايفها تلمهن وتشمرهن

- - شايفها يمه وانتي شايفتها بس اتسدسديلها

بيبي گالتله //يمه ابو سهيل جيب مرت اخوك الخاطر مها والله مكسور خاطرها على امها

- - الله كريم اروح ونشوف وهذا ابنج ضبي تره عيب يجي سكران ويطوطح نص الليل فووك من العالم

خلي ايبطل هاي السوالف التعبانه شكده بعد يصير

معين باستهزاء // ما سامع من الحب ما قتل

بيبي // انت بس رجعله مرته وهو يجوز

سليم اتثاوب واخذ باكيته والسويج وراح الغرفته وبقى عمي معين بيبي حچت ويا بعتب

- - ليش هيچ تحچي على مرت اخوك

- - شنو يمه حاچي چذب

- - ما عليك بيها انت باچر عكبه تتزوج وتلتهي بمرتك وجهالك ما عليك انتبه النفسك

معين // اروح الغرفتي باجر وراي طلعه من الصبح للمعمل

راح وانا اجيت يم بيبي بقيت اباوع للتلفزيون لكن تفكيري بهواي اشياء اتساءل بيني وبين نفسي ليش عمامي

ايكرهون امي و بس بيبي وابوي ايحبوها ليش شنو السبب

/////////////............///////////............//////////

يتبع

الثالث من هنا

تعديل المقال