رواية عقارب ذوي القربي الفصل السادس 6 بقلم انين الليل

رواية عقارب ذوي القربي الفصل السادس 6 بقلم انين الليل

مها

نجحت من السادس ورحت للاول متوسط واتذكر بيومها حتى امي ما كالت مبروك النجاح لان ما الها خلكنه

وحتى ما كلفت نفسها تشتريلي ملابس جدد ولان بدينا انا وروان انشب يعني صار اختلاف اب اجسامنا

بيبي اخذتلي صدريه اما روان فداومت بملابسي مالات العام

وعمي معين جاب الرهف ملابس ومن سالته بيبي گال //جنت بالسوك وشفت هذني على كد رهف وجبتهن

بيبي // جان اشتريت المها وروان وياك

معين رفع حواجبه // يمه تره مو يتيمات ابوهن يشتغل وامهن موجوده

صرنا انداوم مدرسه دوامين تلث تيام بيومين يعني اذا انا صباحي روان ورهف ظهري والعكس

وبيبي مقسمه علينه الشغل انظف البيت بالليل ومن اصيرصباحي وارجع الظهر اغسل المواعين

واسوي العشا

واذا روان صباحي هيه بس تغسل المواعين ومن ارجع اسوي العشا وهم تغسل المواعين وانا انظف

اما الملابس فبيبي چانت تغسل ملابسها ابايدها وملابسنه كل خميس اخليهن بالغساله واغسلهن واشرهن وثاني

يوم اصفطهن ودووم اشوف ابوي هوه يغسل ملابسه مالات الشغل ومرات بيبي تغسل التراك الي ايلبسه بالبيت

والدشداشه الي يطلع بيها بالليل

العصر نبدي اندرس رهف الي حياتها عباره عن اكل وتلفزيون ودراسه وچانت تحب تقرا وحريصه كلش

بحيث اذا دوامنه صباحي تكعد الساعه بالسته اتبدل ودووم هيه وروان يتناگرن هاي اتكلها بعد وكت

ورهف اتكلها //راح الوكت

من نكمل دراستنا نروح بغرفة بيبي نباوع للتلفزيون احنه كله يم بيبيتنا وانا خلتني انام يمها

لان دائما بيبي اتامرني اجيب الها ماي اسوي الها چاي ومرات تجي روان ورهف يمنه اما امي

فچانت فووك وصارت تنزل قليل يعني لو اشتهت اتصب الها اكل ولو احنه اكثر الاوقات احنه الي انصبه

ونصعده الها چانت قليل تگعد يمنه وما تسولف ولا تتشاقى ويانه چانت عبالك غريبه يعني ما تسالنه شلونه بالمدرسه

ولا تنتبه شنو لبسنه لو اخذنه مصرف او لا اكثر شي مصرفنا من عمي سليم من يجي چان ينطيني وبيبي تاخذه

اتقسمه علينه ورغم قليل لكن قانعات بي

ابوي اشوفه كلش ضايج ومهموم ولو هوه احسن منها ساعات يسالنه عن دراستنا ودوم ايكللنه

شدن حيلچن حتى تتخرجن وتفيدن نفسجن

بيبي دائما من تنزل امي تحاول تسولف وياها لكن هيه ما تتجاوب وياها ودووم تحجي ويه بيبي من وره خشمها

واروح واسأل بيبي = ليش هيج امي شنو بيها

بيبي تجاوبني // امچ تعبانه من ملاك تبچي وتسهر وياها انتو بس لا اتعبونها وهيه ترجع مثل قبل واحسن

لكن من ابتعد عن بيبي اسمعها تحچي ويه نفسها // والله ما اعرف شبيها ما ادري شتريد ما عاجبها العجب

تقريبا الكل ملتهي بنفسه يعني عمي سليم وزوجته ما صارو يجون مثل قبل يوميه واذا اجو بسرعه يرحون

مجرد يسلمون على بيبي ويگعدون شويه مرات امي تنزل ومرات لا

انا عندي احساس غريب انو اكو شي يريد ايصير چنت بيني وبين نفسي خايفه واترقب خصوصا وانا

اسمع يوميه بالليل امي وابوي يتعاركون وبعدها ابوي يطلع ويرجع ينام بالصاله لان امي تقفل الباب

واحنه لان اتعودنه فما نتدخل وحتى بيبي ما صارت تتدخل چانت تكتفي تباوع وبالليل تنتظر ابوي

تحچي ويا وتخلي اينام وترجع لو تتوضا وتبقى تسبح وتصلي لو ترجع تنام او وكت ما اياذن تگعد للصلا

چان يوم سبت عطله وانا نايمه يم بيبي وروان ورهف يمنا لان هالايام عمي معين يجي للبيت لان جاي

ايعدلون بالغرفتين الي بالمعمل بس يجي فايت وكت وينام بغرفتنا الي انطونه اياها بيت عمي سليم

يعني ترك غرفته والغرفه الثانيه وما يعجبه اله بهاي الغرفه وما اعرف السبب الي اعرفه انو بدا يبني ابيته

وبعدها راح يخطب ويتزوج وهذا البيت راح نبقى بي بس احنه

وچنه الجمعه والسبت شويه نتاخر بعدين نكعد

ابوي يطلع من الصبح وبيبي هيه الي تسويله الريوك وعمي معين يطلع ما يتريك لان صار متعود يتريك بالمعمل

ويه العمال تقريبا الساعه بثمانيه ونص نزلت امي بايدها ملاك انا چنت توني كاعده باوعت وكالت //صباح الخير

بيبي اخذت ملاك منها وردت عليها // صباح النور

بيبي صارت اتناغي الملاك وتكلها //ملكه شنو هالثكل والجمال

امي // منيلها امتعبتني الليل كله

لا نهله ملاك ما ينسمع الها صوت هادئه مثل مها

اي خاله بس دووم تريد ممه ما تشوفيني فطمتها

بيبي تضحك بملاك // اي غير تريد تصير مدنفشه وحلوه

انا جبت صينية الريوك هيه شفتها اخذت نص صمونه وخلت بيها قطعة جبن اكلتها وشربت چاي

وراحت غسلت من رجعت للغرفه بيبي گلتلها //اشو ما تريگتي

- - الحمد لله شبعت صدك خاله انا راح اروح للسوك اتسوك

- - روحي خاله شنو اتجيبين مسواك للبيت

هزت راسها // اي وهم شغلات اليه خاف منا وهيج اروح الاهلي

- - ترحين للعشار تتسوگين

- - اي يكولون جايه بي بضاعه تخبل

بيبي // منو تروح وياج

- - محد مها وروان يلزمن اختهن ويرتبن البيت

بيبي // ازدحام خاله شلون ترحين ابحدج

امي لملمت حلكها // اي هم صدك راح امر على ام سهيل تروح وياي واذا ما تقبل منا اتسوك وارجع

بيبي هزت راسها // اي مري عليها ما تكول شي

- رايده اجيبلج شي وياي

- - سلامتج

اتقربت عليها = ماما جنطتي انكطعت ورايده جنطه

هيه باوعتلي وكالت // ليش ما وديتيها للسراج ايخيطها

= ماما هيه مالت العام وعتگت كلش وانشلعت يعني بعد ما تفي...

قاطعتني وهيه تحرك بايدها // بس كافي افتهمت عود اجيبلج جنطه

روان // وانا

امي بقلة صبر //انتي الثانيه شتردين

- - حذاء فدوه ماما جيبيلي حذاء

هزت راسها // خوش لو ادري ما كلت اريد امر على السوك ياالله انا راح اروح ابدل وانزل وانتن ديرن بالچن

على اختچن روان تعاي اخذي حليبها والممه

راحت روان ونزلت قوطية الحليب وممة ملاك وبعدها بشويه سمعنا الباب انفتح وانسد يعني امي طلعت

خليت ملاك يم بيبي ورحت انا وروان نشتغل انظف ونغسل الصحون مالت الريوك وبعدها اجيت البيبي

شفت ملاك نايمه بحضنها سالتها = بيبي شنو نطبخ

- - اكو طبخة لحم سلكيها نسوي مركة عدس

=اي بيبي صار

رحت سلكت اللحمه وانا ما مستقره بالي مشدوه ما اعرف ليش خايفه احس راح يصير شي خلطت الطماطه واجت

بيبي طبخت المرك وبعدها طبخت التمن انا واكفه اباوع الها وروان يم ملاك ورهف من كملنه الغدا أذن الصلاة

الظهر ورحنا اتوضينا وصلينه من كملنه صلاة

سالت بيبي = امي اتاخرت

- - هسه تجي سووك وازدحام انتي صبيلنه غدا

رحت اصب غدا وكعدنا تتغدا بعد ان نيمت ملاك وره الغدا بيبي خابرت امي ما ردت سالتها // ها بيبي

- - بيبي مبين بعدهي بالسوك لان تلفونها يرن فما اتسمعه

بقيت لازمه ملاك وعيني على الباب صارت الساعه بالوحده ونص اندك الباب راحت روان فتحته اجه ابوي

وسلم على بيبي وشاف ملاك بحضني سال // اءو ملوكه بحضنج وين امج

بيبي جاوبت // راحت للسوك تشتري غراض محتاجتهن

ابوي // بس بعده وكت ما صاير العصر

بيبي // لا يمه راحت الضحى يمكن للعشار

- - شو ما كالت ومنو راحت وياها

- - كالت اتمر على ام سهيل

- - بس اتاخرن هواي اذا رايحه الضحى

بيبي تهز اب ايدها // انته شايف السوك والهوسه جي شويه رخيص وهيه يمكن تريد تروح الاهلها ومحتاجه

شغلات وصوغه هسه توني خابرتها

بيبي باوعتلي // انطيني اختج وروحي حمي الغدا وصبي الابوج

ابوي گال // خلي اسبح وانزل اتغدا

بيبي // يمه روح للمغسله غسل اديك او وجهك واتغدا واشرب چاي وبعدين اصعد اسبح وارتاح شويه

ابوي هز راسه // اي هوه هيچ عندي شغل بالمحل

بيبي // الله يفتحها بوجهك

راح ابوي غسل بالمغسله وانا حميتله الغدا وجبته اله اتغدا وشرب چاي والكل احس بي مترقب امي ابوي اتصل

بيها باوع البيبي هذا تلفونها يرن وما تجاوب

بيبي // انته شايف الازدحام اكيد ما تسمع هسه على جيه

ابوي اتمدد بالغرفه وصار يدخن جگاره ورجع اتصل ابامي الي هالمره شغلته ابوي گال // جايه شغلت الخط

بيبي // ايي لو جايه لو بالهوسه ما تگدر اتردد

بيبي حچت ويه ابوي // ما تگوم تسبح وترتاح بغرفتك

ابوي يتمغط // بعد ما بيه تعبان هسه شويه ارتاح وارجع للمحل عود من ارجع بالليل اسبح

انا كاعده ما مرتاحه ويمكن بيبي نفس احساسي شفت ابوي غفه رحت انطيت ملاك الروان وكتلها

= خليها يمج لان ابوي خطيه تعبان وغفى وهاي خاف تبچي وتگعده

روان خلتها بحضنها وسالتني // اگلج مها امي مو اتاخرت

هزيت راسي وجاوبتها = اي اتاخرت هواي بس يمكن على گولة بيبي راحت للعشار وازدحام

روان رفعت امتونها وگالت // يمكن

رحت للمطبخ وشفت ابوي نايم وبيبي گاعده على چربايتها رجعت يمها وشفتها تتصل مره مرتين امي جاوبتها

انا اتنفست حييل وكأنما جبل على صدري وانزاح بيبي // ها خاله انتي وين

- - لان اتاخرتي

- - اي صدك ازدحام

- - لان اتاخرتي وما تجاوبين ظل بالنه وحتى حليم هم خابرج

- - زين

- - مع السلامه

بقيت اباوع البيبي الي ابتسمت وطمنتني // تگول جايه

انا ابتسمت ابوي سالها وهوه مغمض // شنو ردة عليج

- - تگول ازدحام وما سمعت التلفون وهسه جايه

ابوي جر نفس قوي وبعدها گعد واخذ باكيته وموبايله وكال البيبي // انا رايح للمحل

- - الله وياك

رحت للغرفه الثانيه دخلت وشفت ملاك نايمه وروان تتمشى بالغرفه وهيه متخوصره سالتها

= شبيج هيج تمشين وتحچين ويه نفسج عبالك مخبله

روان // ولج جاي اتصور نفسي وانا باچر لابسه الحذاء الجديد وامشي بزودي

ابتسمت وگتلها = لا تتصرفين هالشكل وهيج تمشين تره البنات ايگولن علينه ما شايفات

باوعتلي روان وجرت حسره وهيه اتگلي // ليش مها احنه شنو شايفات

1

سكتت ما رديت عليها لان فعلا احنه كل شي ما شايفات وبقيت گاعده انا وروان اما رهف فنامت ومر

وكت وامي ما اجت رحت الغرفة بيبي شفتها متمدده يمكن هم نامت رجعت للصاله وانا عيني على الباب

دخلت للمطبخ واخذت الجكايه الستيل مالت بيبي مليتها ماي حلو واخذتها الثلاجتها فتحت الفريز بيبي گعدت

سالتني وهيه منعسه //شنو امج ما اجت

هزيت راسي = لا بيبي بعدهي

طلعت الموبايل وگلتلي بيش الساعه

= بيبي اربعه الا عشره

- - شنو لو جايه من بغداد چان وصلت

رفعت اكتافي = ما ادري بعد

بيبي گعدت انطيتها ماي وبقت اتسبح بالسبحه مالتها لمن ما صارت بالاربعه ونص اتصلت اب امي

رجعت اتصلت باوعتلي بتساؤل // شو نقالها مغلق

رجعت اتصلت نفس الشي وصارت تحچي ويه نفسها //مو گبل ساعه گالت انا جايه وينها والنقال مغلق

روان اجت وگالت //يجوز خلص شحن

- - يجوز بس من يمته من كالت جايه

انا وروان بقينا انباوع البيبي وبعيونه تساؤل رجعت بيبي هم اتصلت ونفس الشي مغلق اهنا بيبي اتصلت

اب ابوي هوه جاوب // الو ها يمه

بيبي // اگلك حليم مرتك الهسه ما اجت

ابوي // تحچيين صدك

- - اي يمه وجاي اتصل عليها شو مغلق تلفونها

- - انا عبالي اجت او وصلت

- - لا يمه ما اجت خلي انتاني يجوز السياره عطلت يجوز نست شي ورجعت علي

سدته وصرنا انا وروان وحده تباوع للثانيه واحنا خايفات اجت رهف وشغلت التلفزيون وگعدت والكل مترقب

سمعنا ملاك تبچي راحت روان شالتها وسوينالها ممه اندك الباب رحت اركض شفت ابوي اجه دخل وهوه ايگول

- - جاي اتصل عليها ونقالها مغلق

بيبي// يمه هسه تجي وين تروح

ابوي صعد فووك للغرفه وانا گلت البيبيتي // هيه مو گالت تروح ويه عمه كفايه

بيبي // اي شلون نسوه شمالني ما خابرتها

راسا اتصلت بعمتي كفايه واشوف ايدها شلون ترجف جاوبتها فتحت السبيكر // الو هلا عمه

- - هلا بيچ ام سهيل اگلج مرت حليم گالت اتمر عليج حتى ترحون للسوك

- - اي عمه اجتني وگالت تروح للعشار وانا ما رحت وياها

بيبي باستغراب //ها وليش

كفايه //لان هيه گالت تااخر وتشتري شغلات للبيت وللبنات وانتي تعرفين انا ما اكدر اتاخر عن البيت

فما رحت شنو صاير شي

بيبي /عمه المره الهسه ما اجت

كفايه باستغراب //شتكولين الهسه

- اي م...

ابوي نزل وهوه يرجف ويحچي بعصبيه // يمه نهله طالعه وماخذه كل شي وياها

بيبي اتقربت سالته // شماخذه

- - الفلوس الفلوس كلهن وذهبها وجنسيتها يمه نهله انهزمت

بيبي لطمت خدها // على كيفك حليم وين انهزمت

ابوي بتوتر // حتى حتى انا ضام عدها مليونيين گلت من اكمل البيت اشتريلي سياره حتى ذني ماخذتهن

بيبي اتقربت على ابوي ولزمته من ايده // على كيفك يمه خاف ضامتهن بغير مكان انا صاعده ادور عليهن

- - يمه ماخذه كل شي انا انا طالع ادور عليها

- - وين اتدور عليها حليم اگعد وين اتدور عليها

- - يمه شكعد المره باكتني وانهزمت

- - على كيفك خلي نفتهم

اندك الباب بقوه وكلنه ركضنا للباب اله ابوي فتحته شفت عمي سليم ومعين وكفايه وياهم سهيل

سليم باوع الابوي وخزره // مرتك وين

بيبي جاوبت // يمه گالت رايحه للسوك وتمر على مرتك

- - وانتي حجيه هسه ياالله خابرتي مرتي

- - يمه المره نتصل بيها وتجاوب وكبل ساعه كالت كملت وراح اجي

كفايه // سليم على كيفك عمتي شمدريها موجاي اتگلك اتصل عليها وتجاوبني

معين // يعني وين راحت

ابوي وهوه مدنك // ماخذه الفلوس ورايحه

سليم |/ يافلوس

بيبي // الفلوس الي انطيتوهن اله

سليم ومعين اتقرب. من ابوي وساله سليم // حليم صدك الي سمعته

ابوي رفع راسه وعض شفته واكتفى هز راسه

سليم سال // وين ممكن تروح

بيبي // وين راحت اكيد الاهلها

معين // ويجوز الغير مكان

بيبي بعصبيه // معين الزم السانك

جاوبها // شگلنه ما سبينه العنب المره مچذبه وگايله رايحه للسوك واتبينت بايكه الفلوس والذهب وين راحت

كفايه // وجنسيتها وشهادة الجنسيه

ابوي // ماخذتهن وياها

باوعت البيبي شفايفها صارن بيض ونفسها ارتفع وصارت ترجف رحت اخذت الها ماي لزمت الكلاص وكع منها

شافتها عمه كفايه حچت بصوت عالي// اسكتو امكم راح تموت

الكل اتقرب على بيبي وانا رجعت جبت ماي شربوها وشالها معين مددها على چربايتها صرنا نبچي حتى

ملاك ويانه تبچي واحنه نشوف دموع ابوي الي سبقتنا ونشوف الخذلان بعيونه

عمتي طلعت علاج بيبي وانطته الها ومعين كال اخذها للمستشفى لكن بيبي هزت راسها ما قبلت بهاي الاثناء

رن تلفون عمي سليم شافه گال بتعجب // هذا ابو سجاد اخو نهله

الكل باوع السليم حتى بيبي نهضت من چربايتها عمي خله اصبعه على حلگه يعني لحد يحچي

- - الو هلا ابو سجاد اشلونك عاش من سمع صوتك

- - ليش شصاير على كيفك خلي افتهم

- - هاا يعني ام مها عدكم

- - لا بعدني بالگراج ما ادري محد گلي

- - يعني اجت ابحدها ليش ما رجلها جابها

- - ابو سجاد خويه على كيفك انا رايح البيت حليم واستفسر منهم

- - فيمان الله

عمي سليم سد النقال وكعد وكال // اخوها يكول اجتنا وبعد ما الها رجعه لان هيه متعذبه وعايشه بالضيم وحليم يوميه يكتلها

معين // والفلوس الباكتهن

سليم ايهز ابايده // يمعود اخوها ابو الراهي يكول بعد ما ترجع لو شما يصير

باوع الابوي وسأله // حليم انت متأكد مرتك هيه الماخذه الفلوس

ابوي // چا منو قابل حرامي نزل ع البيت ويندل ابمكانهن

سليم باوع المرته وگلها // اصعدي انتي ومها ودورن زين

ابوي // اگلك حتى جنسيتها وشهادة جنسيتها ماخذتهن وياهه

سليم // - - مي خالف اصعدي كفايه ودوري بكل مكان

صعدت عمتي وانا صعدت وياها ما شفنه شي مو طبيعي الغرفه نظيفه ومرتبه بس باب الكنتور مفتوح

يجوز ابوي فاتحه

دورنه بكل مكان وچان اكو صندوق داخل الكنتور شفنا مفتوح وبي جناسينه انا واخواتي وما بي اي شي ثاني

نزلنه وكعدت عمتي كفايه وهيه تلملم بحلگها سالها عمي سليم // ها شلكيتي

هزت راسها وجاوبت // اي شي ما لگيت والغرفه نظيفه ومرتبه مو مال واحد فايت ويدور

باوعت الابوي // حليم انته الفاتح الكنتور

ابوي هز راسه / / اي شفت الصندوك

سليم // ياصندووك

- - الظام بي الفلوس والجناسي

عمه كفايه هزت راسها // اي شفته شلون بس هو مفتوح وبس جنسيتها ماكو

معين // هذا هوه المره مبيته النيه

سليم بعصبيه // اسكت معين يانيه

معين بعصبيه // مبينه ليش تزمخ مبينه تاخذ الفلوس وتروح

- - كافي باجر اروح واشوف

ابوي // بعد ما ارجعها لو شنو ما يصير

معين ابتسم باستهزاء // هاي عوود اذا قبلت ترجع ذاك الوكت لاترجعها

ابوي // شقصدك

معين //. قصدي السوت هيج هاي طالعه وما تلتفت وراها طالعه وبعد ما ترجع افهمو كافي تضحكون على نفسكم

ابوي جر نفس وعيونه صارن حمر لان غوركن دموع وراح صعد للغرفه عمي سليم سال معين

- - انته شتقصد بكلامك تعرف شي

- - كل شي ما اعرف التعرفه انته انا اعرفه

سليم // مو وكت هذا الحچي اصعد يم حليم طيب خاطره بكلمتين وانت بابا سهيل اخذ امك وروحو للبيت

عمه كفايه // وانته سليم

- - انا ابقى اهنا. عود حضري ملابسي الصبح اجي واروح اشوف باالله شيحچون

راحت عمتي وبقى عمي سليم گاعد بالصاله نزل معين باوعله بتساؤل // تركته امدد على چربايته

سليم // الله لا يوفقها الادب سزز

معين // بت الكلب سكتتها مو ال الله چانت مخططه الكل شي

باوعله سليم // معين انت شبيك لاتغلط يا اخي

معين بعصبيه //اغلط وانعل والديها الساقطه (باوع البيبي ) ها يمه شفتي گرايبج شسوت

بيبي // شو رديت عليه

- - ليش ما تدرين مو انتي اجيتي برجلج وطالبتي الحليم انطو من المعمل وهذا اخوكم

بيبي // طالبت حق الله

سليم. // كافي معين امي ما اخذت شي الروحها اصلا امي هيه الفاهمتها وخايفه منها

بيبي هزت راسها واتحسرت // اي والله خايفه منها من لمن شلت ابيتك وهيه المره ما ادري شبيها

كتلتها الغيره عبالك ماخذين ورثها من ابوها ما تشوفني ما سمعتها على البيت وگلت بيتي والنه كلنه

والله لو تدري بالبيت چان خلته ايبيعه واخذت كل الفلوس وشردت

معين // وهوه شدعوا مرخيلها الحبل ع الاخر

بيبي // هوه شمدري يشوفها بالبيت وكاعده بغرفتها وحتى من ايگللها امشي نطلع ما تقبل

(باوعت السليم ) باچر اروح وياك يمه

سليم هز راسه // لا شياخذج

- - مي خالف اروح اشوف شتريد

- - يمه انتي تعبانه وما تحملين السفر

بيبي // عود اخذ مها ويانه

- - يمه ومنو يبقى بالبيت وهاي الطفله

- - خليها يم مرتك هوه نص يوم نروح ونرجع

سليم // زين انتي نامي وارتاحي وباچر يصير خير

بيبي بحسره // ياهو يجي نووم

اتمددت واشرت الي // تعاي بيبي غطيني وجيبي فراش العمج اهنا

سليم // لا انا انام بالصاله

- - ليش يمه

هز راسه سليم وكال // احسن (باوعلي ) خليلي فراش الي والعمج معين

رحت جبت فراش معين وفرشته ونزلت من نضيدة بيبي فراش العمي سليم اجتني رهف // آيه جوعانه

هزيت راسي وجاوبتها // روحي حبيبتي هسه اسويلج لفه

بيبي رفعت راسها للسما // ياربي شنو ذنبهن هالبنات هيچ يصير بيهن

معين // ذنبهن عدهن ام مثل نهله

رحت سويت لفه الرهف ولفه الروان واخذت ملاك غسلت الها وبدلت حفاظتها وانطيتها ممه

ملاك هادئه بطبعها يعني اذا تبجي بس انطيها ممه تاخذها وتنام ومن تكعد هم انطيها ممه وتنام ونومها عميق

بيبي صاحت عليه // مها تعاي

رحت وكفت بالباب = ها بيبي

- - بيبي سويلج لفه واتعشي

انا بقهر والعبره بصدري هزيت راسي = لا بيبي ما اشتهي

- - مو زين عليج تبقيين بدون اكل

= ما اشتهي

- - زين جيبي ملوكه وتعاي نامي اهنا

= لا بيبي تكعد وتاذيج انا توني سويت الها ممه ونامت خليها

بيبي ///خاف بالليل تگعد وتبجي

= عود اجيبها الج انتي ترديني اسويلج شي

- -لا انا هم ما اشتهي ومن اجوع اكل اي شي

=زين من تحتاجيني بس صيحيني انا اسمعج

ورحت للغرفه وادري كلنه ما نايميين بس رهف وملاك صرت افكر ليش امي عافتنا وراحت احنه ما ماذياتها

ولا فد يوم زعلناها وابوي ايحبها هيه ليش هالشكل سوت بينه

صارن دموعي اينزلن لا اراديا وانا اشوف اخواتي شلون نايمات وصرت ادعي ربي كون امي باجر ترجع

ما اعرف يمته نمت او بيش الساعه كل الي اعرفه سمعت عمي سليم يحچي ويه ابوي انا فزيت على صوتهم

سليم // انت ابقى انا اروح واشوف شصاير وياها

بيبي //وحتى انا اروح

ابوي // لا يمه لاترحين

- - مي خالف اروح وارجعها انته ما عليك

طلعت وگتلهم // صباح الخير

بيبي // صباح النور خو ملوكه ما عذبتج

هزيت راسي // لا بيبي كعدت مرتين انطيتها ممه ورجعت نامت

سليم جر نفس // يعني مبيته النيه حتى فاطمتها من صدرها

بيبي // من يمته فطمتها من صدرها من جان عمرها شهرين (باوعتلي ) ياالله بببي سوي ريوك حتى نروح

دخلت للمطبخ واسمع عمي سليم ينده بمعين// اگعد جيب النه صمون من الفرن

معين مغلس ابوي گله //انا رايح خلي اينام

وراح ابوي بيبي تحچي ويه عمي سليم // الله ايساعده جاي ايكابر

سليم // بس هوه صوجه ماخذها وما مصدك لمن ما هسه شوفي شلون حاله

بيبي // الله يهديها وترجع

- - والله حجيه ما اشوفها ترجع هاي وحده برعه وكل شي تسوي

خليت القوري ع النار وسلكت بيض ورحت اتوضيت وصليت واجه ابوي وانا حضرت الريوك بيبي

گالت العمي // خابر مرتك وگلها راح نجيب البنات يمج

ابوي //ليش يمه

- - اريد اخذ مها وياي خاف اتخربط احتاج شي

ابوي // انا ابقى يم البنات

- - وشغلك

—يا شغل انا بيا حال

لميت الصحون وصبيت الروان ورهف ورحت ندهتها

= روان اكعدي

رهف گعدت //ها مها ابدل وتمشطيلي

هزيت راسي = لا اليوم ماكو مدرسه

روان فتحت عيونها // همزين خلي نرتاح

= اگعدي غسلي وتريكي وديري بالج على ملاك

- - ليش وانتي وين رايحه

= انا راح اروح ويه بيبي وعمي سليم

روان باستفهام // وين ؟

اتقربت عليها وشاورتها = نروح الامي انتي بس ديري بالج على ملوكه

روان بقلة صبر //اوو يا مها مو تدرين اضوج ما اغير حفاظتها

= هسه انا اغير الها واغسل الها وانتي ديري بالج عليها اتحملي بس هاليوم

روان جرت نفس // اكلج مها واذا امي ما رجعت احنه شلون بينا وملاك منو يربيها

ابتسمت وحاجيتها = لا ان شاالله ترجع

اخذت ملاك رغم ما كاعده غسلت الها هيه فتحت عيونها وابتسمت الي انا بوستها واخذتها غيرت ملابسها

وغسلت ممتها وسويت الها ممه هي رضعت ورجعت نامت والبنات يتريگن اندك الباب راح ابوي فتحه

سمعت صوت مرت عمي كفايه وهيه تسلم وجايبه بايدها علاگه

صباح الخير

الكل رد عليها وصلت يم بيبي كالت// اشلونج عمه

- على الله الحمد لله

- كلنه على الله

سليم //شنو هاي

- هذني ملابسك جبتهن واجيت ابقى يم البنات

- ونور وين

- راحت للدوام ومن تجي وصيتها تروح البيت اهلي

بيبي // ليش ما گتيلها اهنا تجي

- لا عمه ترتاح يم بنات خالها انا راح ابقى اهنا وسهيل ومجتبى يبقى يمهم معين

- يجوز الله يسهل علينه ونرجع

- ان شاالله

سليم //ياالله انا راح اسبح وابدل وانتن اتحضرن

كفايه // عمه اخذي ملاك وياج بلكي من تشوفها تقبل ترجع

بيبي //يمه الطريق بعيد ومها ماخذتها وياي حتى تدير بالها عليه

- - بس اگول من تشوف الزغيره ايحن كلبها

معين رفع راسه // انتي شتحچيين المره مبيته النيه نضحك على روحنه

كفايه // چا اذا هيج المن رايحين

بيبي //. نروح انشوف شنو حچيها واجيب فلوس ابني

رحت ابدل لبست فستان اصفر وبي ورد ابيض طويل وجوا بنطلون اسود وشال اسود اندك الباب

وراح معين فتحه شفت عمتي حلا دخلت وسلمت وهيه اتكل الامي

- - ها يمه هسه صدگتي من اخذت كل شي وانهزمت

بيبي ردت عليها //صبحي حلا وكافي حچي

- - اي انا ما احچي لان اعرفها مو انتو الطردتوني على مودها زين سووت بيكم

ابوي بعصبيه // شنو انتي جايه تتشمتين ومنو مودي عليج

حلا بنتر //والله انا جايه البيت ابوي والما عاجبه هوه يطلع

سليم بغرفة بيبي يبدل وطلع وكال // حلا انتي منو گلج واجيتي مغبشه

- - ليش هذا الشي مضموم

- - لا ما مضموم بس الحد هسه محد يدري منو گلج

- - كفايه خابرتني وگلتلي

الكل باوع االكفايه الي ما عقبت ولا حچت ولا كأنه الكلام يمها عمي سليم گال // هذا الصار ما اريد احد يسمع بي

بيبي //وصي مرتك يمه

كفايه //عمه انا خابرت حلا وفهمتها گلت خاف تسمع كلام منا منا

حلا // شسمع محد صدگني من حچييت وبقيتو ساكتين والكل ايدافع الها هسه من وكع الفاس بالراس تكولون اسكتو

سليم // حلا كافي (ويأشر بعيونه على ابوي ) ان شالله اروح وترجع ويانه وكل مره ورجال يصير بيناتهم سوء تفاهم

حلا باستهزاء // اي ان شالله ترجع

/////////////////////////////////////////يتبع

القصه متسلسله تتكلم عن بنات من هنه زغار عانن بسبب امهن وابوهن

هيه حقيقيه وجاي انقلها بلا اي رتوش

يمكن تضوجون من الاطاله لكن ما اكدر امحي سنوات من القهر والحزن

ابقو وياي وشجعوني

اما الضغط على اللايك فما اتصور راح تتكهربون هذا تقدير الجهودي

تحياتي

السابع من هنا

تعديل المقال