رواية عقارب ذوي القربي الفصل السابع 7 بقلم انين الليل

رواية عقارب ذوي القربي الفصل السابع 7 بقلم انين الليل

هذا البارت نار

اتمنالكم قراءه ممتعه وياريت تضغطون ع النجمه فضلا وليس امرا

///////////. ................../////////////

مها

صارت الساعه ثمانيه ونص وطلعنه انا وبيبي وعمي سليم ركبنا بالسياره عمي ايسوق وبيبي يمه وانا وره

بيبي وعمي يسولفون وانا اباوع من الجامه صار هواي من رحت اخر مره البيت جدي ابو امي

نزلنه بمطعم واتغدينه وشربنه چاي وبعدها كملنه الطريق ما اخفيكم چان اكو خوف بداخلي والاشياء ابالي

مبهمه وما مفهومه

وصلنه مشارف بغداد تقريبا العصر بسبب التفتيش والسيطرات والازدحامات احس حتى الهوى يختلف

فتحت الجامه وصرت اتنفس بقوه واستمر عمي يسوق الى ان وصلنه المغرب البيت جدي نزلنه وعمي سليم

دك الباب وفتحه ابنهم سجاد

عمي سلم علي وكله // صيحلي ابوك

الولد جاوبه // ابوي ما موجود اتفضل عمي هسه اخابره

دخل واجت بيبيتي وهيه ترحب بينه واتباوسن هيه وبيبي بدريه وبعدها بيبي حضنتني وباستني

دخلتنه للصاله وكالت // اتفضلو هلا بيكم

دخلنه للصاله الي چان بيها طخم قنفات مو كلش جديد گعدنا وهيه گعدت وسجاد جاب ماي بيبي گلتله

خابر ابوك خلي يجي

اي بيبي خابرته وگال بالطريق

بيبي سالتها// اشلونج ام علي

- - الحمد لله ام سليم زينه

بيبي تباوع // وين نهله ليش ما تجي تسلم علينه

حمحمت // والله تعبانه شويه

بيبي وكفت وكالت // ياا خلي اروح اشوفها

بيبي ام علي لزمت ايدها وكالت اب امر // اگعدي ام سليم اخوانها على جيه

اتفاجآت بيبيتي وعمي سليم من ردة فعلها واستغربت كلامها بقينه ساكتين الى ان اجو خوالي اثنينهم وياهم

رجال اتذكر شايفته سلمو على عمي سليم وچان سلامهم ابرود الرجال كال البيبي //اشلونج ام سليم

- - الله ايسلمك اشلونك خويه

- - الحمد لله

- - الولد البنات

- - كلنه بخير الله ايحفظج

بيبي باوعت العمي سليم وگلتله // هذا ابن عمي ابو وصفي

عمي سليم // حياك الله خالي

- - الله ايحييك

عمي سليم بقى ساكت ابو وصفي گال // خالي تره انا ابو سجاد وطارق جابوني لان تعرف انا عمهم

سليم // بصراحه احنه جايين انشوفكم وهم حتى ام مها ترجع ويانه

ابو سجاد // لا ابو سهيل نهله ما الها رجعه بعد

عمي سليم // - - وليش

ابو سجاد يفرك بادينه // - - بعد ما الها عيشه وياكم

- - ليش شنو بدر من عدنا

- - منك انته كل شي ما بدر بس الشغله ويه رجلها

سليم رافع حواجبه // شمسوي

طارق // ما مسوي شي بس اختنا ما تريده

سليم // ليش هوه دشداشه عجبتها تلبسها ما عجبتها تنزعها وتذبها الزواج عمر وعيشه وتجارب

ابو سجاد // وهيه عاشت ويا وبعد ما تكدر اتكمل

بيبي // هذا شلون حچي خاله علاوي بيتها وبناتها وما صاير بيناتهم شي

علي // خاله مثل ما سمعتي ما الها عيشه خلصت خبزتها

بيبي // هاي انتو بدل ما تحچوون عليها جاي اتشجعونها

ابو سجاد // ما انشجعها ام سليم بس البنيه ما تريده

بيبي // من رخصتكم صيحوها النه

ابو سجاد // والله خاله هذا كلامها علي شنو انصيحها

بيبي هزت راسها // مي خالف خاله صيحها خلي نسمع منها

علي اشر الطارق طلع ما غاب هواي اجه دخل وهيه اجت ورا سلمت // السلام عليكم

شفتها وكفت وباوعت الها لكن هيه ولا كأنه تشوفني ابو وصفي حاچاها

- - عمي نهله هاي عمتج وحماج جايين حتى ترجعين وياهم انتي شتگولين

هزت راسها وما جاوبت

ابو وصفي // لا اريد اسمع

سليم. // ام مها كله سهل والسويتي چان ما يستوجب

ابو سجاد بنتر. // شنو هيه شمسويه

سليم. // اجت من غير احنه ما ندري قشمرتنا كالت رايحه للسوك اتسوك

بيبي // لو تشوفون شصار بينه الف حسبه وحسبه

طارق. // ليش هيه اجت ابحدها غير انتو مانعينها

بيبي وگفت اتقربت منها // نهله احنه مانعينج

امي // خاله هذا الحچي ما منه فايده انا اريد اتطلك

- - وليش شنو صاير وتردين تتطلكين

- - ما صاير شي انا ما اريد ابنكم

- -:ها ومن يمته ما تردينه

امي // من زمااان وانتو كلكم تدرون بيه ما اريده

بيبي // هو هذا شلون حجي الما تريده ما تجيب منه اربع بنات چان عبرتي الشط وهوه ضيگ

امي /. وهسه ما صار شي بناتكم عدكم

بيبي // هيچ صار الحچي

ابو سجاد // اي هيچ وخط طلاگها يوصلها اباسرع وكت ماكو النه تصرف ثاني

سليم وكف // شنو انتو جاي اتهددون

ابو سجاد // والله الي سمعتو اختنا ما تريد ابنكم

بيبي وگفت وباوعت الامي نهله// لاتچفيين نعمتچ ابايدچ

ضحكت باستهزاء وهزت ايدها // نعمتي شنو نعمتي سولفيلي عليها

- - على كيفج نهله هذا مو حچي

امي // خصم الحچي انا ما اريد ابنكم چزت روحي منه

بيبي // خلف الله عليج ما قصرتي

سليم رد عليها // هذا آخر كلام عدچ

- - آخر كلام وغيره ما عندي اريد اتطلگ

سليم // ماشي هذا هوه مثل ما تردين بس يا مرت اخوي عدنا يمچ امانه انريدها

هي باوعت بارتباك // شنو شنوو. من امانه

سليم // العشرين مليون الي انطيتهن الحليم حتى ايعدل بيهن البيت

امي بكل برود // اي اخذهن من حليم

- - لا هنه عندج وفوگهن مليونين ضامهن وياهن

- - ها انوب لبستني تهمه انا بايگه فلوسكم

سليم هز راسه // لا ما بايگتهن انتي جبتيهن وياچ يمكن خفتي ينباگن

- - انا ما جبت شي شوف وين ضيعهن على القمار لو ع العرك

بيبي // خافي ربچ

امي رافعه حواجبها // - - ليش خاله انتي ما تدرين اب ابنچ يشرب عرگ

بيبي // - - ماعلينه بهذا الكلام تحلفين انتي ما اخذتي الفلوس

طارق گام من مكانه // هيي شنو اتريدون اتحلفونها يعني بايكتهن هاي فوگ ما سكتنا عليكم اختنا جايه ابحدها

مهزومه من ضيمكم هسه اتريدون اتحلفونها اسمعني سليم احترمو نفسكم عندكم شاهد دليل اختي ماخذه الفلوس

انفصلك غير هذا الشي احنه انحقكم

ابو وصفي // هسه خالي سمعت عدكم شاهد دليل نرجعهن امربع ما عدكم احنه انحقكم جاي تلبسون بتنه تهمه

وهيه ابيتنا وجايه شارده من ابنكم الي مشبعها ضرب وجوع

سليم جر نفس // ابو سجاد احنه خوان والفلوس فدوه ماخذتهن او لا بس انريدها ترجع البيتها وبناتها

ابو سجاد // والله ابو سهييل هاي هيه گدامك اذا تريد ترجع هسه تلبس عبايتها وترجع محد ابحاچيها

(باوع الامي ) ها نهله تردين ترجعين بكيفج ارجعي تبقيين براحتج محد يضغط عليج

امي بعصبيه // ما ارجع واذا تجبروني هسه گدامكم اذب على روحي نفط واحرگها

ابو وصفي // عمي نهله شنوهالحچي عيب

امي وهيه تبجي // لا عمي مو عيب ما اريده واذا تجبروني گدامكم انهي عمري لان تعبت وكله من اهلي كل ما اجي

اگللهم طلگوني خلصوني منه ايگلولي ارجعي يستعدل تالي يزيد اكثر واكثر

بيبي اتقربت منها // خاله نهله محد ايفيدج غير بيتج وبناتج واذا ضايجه من البيت هاي گدام ابو وصفي هوه

يروح ويانه ابيعه واشتري بيت على ذوقج

امي بقت ساكته بيبي سالتها // ها يمه شگلتي

امي لملمت حلكها //موافقه بس شرط تشترين بيت اتسجلينه اب اسمي وانا اخذ بناتي وانتي تگعدين ويانه بس حليم ما يوصل

بيبي ضحكت باستهزاء وهيه تهز اب ايدها // ههههه هذا شلون حچي

- - مو توچ اتكليلي لمي بناتج وارجعي الخاطرهن انا ارجع بهذا شرطي

بيبي هزت راسها // لا اشتري بيت واسجله اب اسمي وانتي والبنات اگعدي بي وما اخلي حليم يوصل شگلتي

امي // گلت لا لو تسجلين البيت اب اسمي لو اتطلك

وكف عمي سليم // ياالله يمه خلي نمشي وانتي خويه ابقي فكري شهر سنه ومن تردين اترجعين رجعي هلا بيج

گلوبنا وبيوتنا مفتوحات الچ

امي جاوبته // ابو سهييل لا اتعب نفسك وهم خالتي مريضه وتتعب انا ما ار جع. انا اريد اتط لك

سليم لم حلگه // مي خالف فكري

امي // لا بدون ما افكر بناتكم عدكم وابنكم عدكم وحتى ملابسي عفتهن

بيبي // بس ذهبج والفلوس اخذتيهن

امي بنتر // ذهبي اتسمين الحديدات المصديات ذهب والفلوس روحي اسالي ابنج عليهن

بيبي باوعت العمي سليم // ياالله يمه خلي نمشي

انا اتقربت منها وحضنتها راسي على بطنها واديه شابگتهن بظهرها وصرت اشهك واگلها

= فدوه ماما ارجعي ولا تعوفينه الله ايخليج

هيه تدفعني وتحجي بعصبيه // روحي ويه اهلچ ما ارجع ولا اريدكم ولا اتحمل مسووليتچن

صرت اشهك وانا حاضنتها = ماما الله يخليج مو احنه بناتج

تدفع بيه // كافي بعد ما الي طاقه روحي ويه بيبيتج وعمج

= ماما ورهف وملاك

سكتت ما جاوبت صرت ابجي واشهك = الله يخليج ارجعي

ما جاوبتني عمي سليم لزمني من ايدي وگلي بعصبيه // بس ولا نفس لا اذبحچ اهنا (باوع البيبي ) ياالله يمه

ابو وصفي // لا ابو سهيل وين رايحيين ليل

سليم // كثر الله خيركم ما قصرتو

ابو وصفي // ابو سهيل امشي وياي باتو عندي

- - لا خالي مشكور نروح

ابو وصفي // خالي باتو والصبح اتوكلو من اصبح افلح

سليم // اي خالي انبات ابغداد فيمان الله

طلعنه ورحنا للسياره واحنا ما التفتنا ورانا ركبنا وابو وصفي اجه وره سليم وكله

= ابو سهيل الدنيا قسمه ونصيب

سليم // صدكني ابو وصفي هيه الي ماخذه الفلوس وذوله اخوتها يعرفون بالشغله واكدر اطلبهم لليمين بس

مو حلوه بحقنا مره تضحك علينه وتستغفلنه واحنه زلم النه اسمنا ابين الناس وانوب انت واخوانها تكولون انحقكم

خليهن عدها تشبع بيهن هيه واهلها مثل ما شبعت بفلوس المحل

چانت هاي اخر مره اشوف بيها امي عمي سليم شخط السياره حتى ما سمع رد ابو وصفي

تمينا ساكتين سليم يسوق ويدخن وبيبي كاعده دايره وجهها ع الجامه وانا مدنگه خاله وجهي على اديه وابجي بسكته

ما اعرف وين وصلنه وشگد مشت بينه السياره لمن ما عمي سليم حچى

- - ياالله يمه انزلو اهنا وانا راح اصف السياره بالكراج

نزلت انا وبيبي الي نزلت العلاكه الي بيها ملابسنا واجه عمي سليم باوع البيبي وكال

- - نروح نزور ابو الجوادين وباچر نرجع للبصره

بيبي هزت راسها صار يمشي ونمشي ورا بخطوات وصلنه للتفتيش وبعدها شفنا القبتين الشريفتين بيبي صارت

تدعي اما انا فدموعي تنزل وانا اسمع عمي سليم يگول // السلام عليك يا ابا الجوادين

قبل ما نوصل چان اكو فندق عمي سليم حچى ويه بيبي// يمه روحن زورن انا راح احجز غرفه بهذا الفندق

بيبي هزت راسها وجاوبته // لو زايرين ورايحين البيت خالك مو احسن

- - لا يمه الدنيا ليل او ولد خالي شفتيهم يجون للبصره ما يمرون بينه

- - هم صدك وره ما اتوفى ابوهم لا اجو ولا سألو

- - هاج يمه (مد ايده وطلع فلوس ) هاج خاف يعجبج تشترين شي

اخذتهن بيبي ودرنا نمشي هوه كلي // مها ديري بالج على امي

رحنا وصلنه انا لازمه ايد بيبي زرنا وهناك لزمت الشباك وبس ابچي چانت عندي هواي اشياء اريد اطلبها

لكن موقف امي نساني كل شي او طغى على كل شي صلينه انا وبيبي وبعدها طلعنه صرنا نتمشى ابين المحلات

بيبي سالتني //شنو تردين اشتريلج

جاوبتها = بيبي ما اريد شي

- - امشي حبيبتي امشي

شفت بيبي كل شويه توكف كبال محل وتعامله اخذت حذاء وجنطه مالت مدرسه وباوعتلي وكالت

- - الحذاء الروان والجنطه الج

واخذت شكالات الرهف وبدله الملاك وصلت يم محل واخذت ملابس داخليه مختلف القياسات عرفت ذني النه بيني

وبين نفسي گلت المفروض امنه تشتري هاي الاشياء

حسيت بغصه ودي اصرخ وانا اشوف الامهات شلون يباعن بحب وشغف البناتهن وشلون لازمات اديهن ويسالن

بيهن شنو يردن وهاي الاشياء عاجبتهن او لا

شافتني بيبي سالتني // ياالله نمشي ؟

هزيت راسي وانا ساكته لزمت العلاليك وايد الثانيه لزمت بيبي شفت بمحل معلك مقانع مال صلاة طلبت من بيبي

تشتريلي واحد هيه اشترت ودفعت وانطتني ايا وهيه تكلي

- - الله يرضى عليج ويكملج بعقلج

صرنا نمشي راجعين للفندق لمن ما عمي سليم اتصل

- ها يمه انتن وين

- راجعين للفندق انته وين

- قريب عليجن

واحنه نمشي باوعت العمي داخل محل ذهب گلت البيبي //ذاك هوه

بيبي جاوبته // يمه شفتك اجيت

عمي ارتبك وهو يحسب الفلوس وخلى علبة الذهب داخل چاكيته طلع وابتسم //ها زرتن

بيبي // - - اي الحمد لله

- - ياالله خلي نتعشى

- - لا يمه تعبانه ناكل اي شي بالفندق

- - شنو يمه هذا المطعم نتعشى ونروح للفندق

- - فايت الوكت وانا ما اشتهي

ما رد عليها وصلنه المطعم ودخلنه اخذ طاوله بيها اربع كراسي وطلب عشا كباب اكلنه ورغم انا مقهوره لكن جوعانه

اكلت وانا ساكته عمي سليم طلب چاي وبيبي ما قبلت تشرب وانا طلبلي ببسي

سال بيبي وهو يباوع للجنطه يمه اتسوگتي

بيبي // اي اشتريت شغلات اليه واخذت هاي الجنطه المهاوي

- - زين تسوين انا كل شي ما اشتريت

- - هوه الي يشتري ذهب بعد شله بالتواميل

عمي انقصف جاوبها وهوه مرتبك //هذني فلوس كفايه مجمعتهن ومن خابرتها وگتلها احنه بالكاظميه كلتلي جيبلي

وياك قطعة ذهب

- - عفيه عليها كفايه سباعيه

انا ساكته واصلا مو يم الكلام هوه باوعلي وگلي

- - عمو مها لاتزعلين مني لان زمخت عليج ولزمت ايدچ قوي ردت اضغط على امچ بلكي ترجع

ما جاوبته لكن دموعي وكعن على خدي هو كلي // كافي بابا لاتبچيين امج راح ترجع

ادري هذا مجرد كلام بيبي باوعت اله مستفسره هوه هز راسه //اي خلي نعوفها شكم يووم وبعدها نروح ونرجعها

بيبي // ان شاالله

رجعنه للفندق قريب الساعه 12 وصعدنا نمنا بيبي مجرد ما غسلت وخلت راسها ع المخده نامت وحتى عمي

سليم بس انا بقيت افكر شلون بينه اذا امي ما راح ترجع شنو راح يصير بقيت استرجع احداث اليوم وما اعرف

يمته غفيت ما حسيت اله على صوت بيبي وهيه اتكلي

- - اگعدي بيبي حتى الصلاة فاتتنا

گعدت ورحت اتوضيت وصليت وبعدها غيرت ملابسي وكعدت يم بيبي الي كالتلي

- الزمي الجنطه هسه يجي عمج سليم

واجه عمي الي سالنه جاهزات

هزيت راسي وطلعنه من الفندق وكال خلي نتريك

وطلبنه ريوك كيمر عرب وجاي وصمون حار اكلنه وطلعنه للبصره ركبنه بالسياره والظهر نزلنه يم دار استراحه

اتغدينه او واصلنه طريقنا واحنه تقريبا ساكتين الى ان وصلنه البيتنا وفتحت الباب النه روان وتلگتنا مرت عمي كفايه

انا رحت اشوف ملاك لكيتها نايمه ورهف گاعده تباوع ع التلفزيون شفتهن سابحات ومشطات وبيبي سالت روان

- وين ابوج

روان // بيبي طلع من الصبح واجه اتغدا ورجع طلع

كفايه // عمه نظفت البيت وطبخت وغديت البنات وسبحتهن

بيبي // مشكوره الله يخلي جهالج

اشوف روان عينها على الجنطه تريد تعرف شجايبين يعني حتى ما سالتني على امي كفايه سالت بيبي

- - عمه تتغدين

هزت راسها // الحمد لله اتغدينه وشربنه چاي بس هم اريدلي چاي دايخه من السياره

- الله يساعدج

روان //بيبي شجبتيلنه

كفايه //شنو هيه وين راحت وشجابتلج

روان // - عمه مو كلتي راحو للزياره

بيبي اخذت الجنطه وطلعت حذاء روان وگلت الها //هاج جبتلج هذا الحذاء

اخذته وهيه اللمعه بعينها وبيبي انطت المقنعه والشكالات العمتي كفايه وكالت //هذني الج والنور

- تسلمين عمه ليش كلفتي نفسج

- - ماكو كل تكلفه رجلج اشترالج ذهب

كفايه فلت وجهها صارت تضحك وتكول //عمتي دومج تتشاقين انتو رايحين لديالى ترجعون نهله انوب

رحتو للكاظم تزورون وهسه تگولين مشترين ذهب

بيبي // مو مشترين رجلج اشترالج يكول انتي موصيته

- - ها اي اي صدك

اندك الباب روان راحت تفتحه وبيبي كالتلي// هاي الاجت حلا اخذي غراضج وضميهن جوه چربايتي

اخذتهن وكفايه تسال بيبي // شلقصه عمه اتضمين غراضج من حلا

- - كفايه ذني البنات صارن يتيمات وتشوفين الجنطه هاي بيهن الباسات الهن لان محد راح يصير بحالهن

دخلت حلا وهيه تكول // شنو نايمات ساعه ياالله اتفتحن الباب ها امي اهنا رجعتي

- اي رجعت

حلا بتساؤل //شو ابحدج چا ست الحسن وين

بيبي هزت ايدها وسكتت حلا رجعت سالت بيبي //يمه عن الشقا نهله ما رجعت

- - لا ما رجعت

- - وليش

بيبي بقلة صبر // اكلج حلا احنه من امس لليوم السياره اتدك بينه اتكسرنه اريد اروح اتمدد وانام (باوعتلي )

وانتي مها روحي نامي يم اختج انتي هم تعبتي

بيبي راحت الغرفتها وطفت الگلوب وانا رحت للغرفه وباوعت الاخواتي چانت فرحة روان بالحذاء اهم

من ان تعرف امي ترجع او لا وباوعت الملاك وهيه نايمه اتمددت وغفيت ما گعدت اله وانا اسمع

ابوي يعيط ويگول //اله اروح اكتلها خلاص بت الكلب باگتني وتتهمني

سليم //اي حل بيك رخيت الها الحبل ركبتك وما چانت تشوف احد گدامها

ابوي // سليم انا اطلگها بس خلي ترجع الفلوس

سليم باستهزاء //ههههههي انته شتحچي هاي بعد ما ترجعهن انسى حليم

- - چا ما اطلگها

سليم // اي لا تطلگها وهم ما ترجع بعد

ابوي وكف وصعد للغرفه وراها نزل وبايده مسدس يلوح بي كلنه خفنا وابوي يتهدد

- - والله اروح اكتلها ولا تضحك عليه

سليم // كافي حليم لاتتهور شنو اذا كتلتها منو يرحمك لا اهلها ولا القانون انطيني المسدس واگعد خلي نفكر

- - شنفكر هاي حطمتني ظلت اتگلي لا اتجدد البيت على ما اجيب واگوم بالسلامه وبعدها خلي اطلع الاربعينيه

وجيب شنو تحصل ضمه عندي حتى تشتري سياره اثاري مبيته النيه تبوكني وتطلب الطلاك خلوني اروح اكتلها

وانعدم اقلها افتك من حياتي

شفت الكسره بكلام ابوي وشگد هوه محبط بيبي صارت تبچي وتگله //ومن تنعدم منو البناتك

ابوي //الهن الله

بيبي وكفت ولزمت ابوي //يمه استهدى بالرحمن وبعد چم يووم اخوك ياخذ جماعه ويرجعها

سليم // يمه شترجع مو سمعتيها اله تبيعين البيت وتشترين بيت اباسمها ياالله ترجع وحليم ما يوصل

حلا // اي حتى تجيلها يومين وبعدها تبيع البيت وتسربت البنات

سليم ///تخسى منو ايسجل بيت اب اسمها

بيبي //. مي خالف وهم نرجع واذا اصرت ابيع هذا البيت واشتري بيت جديد اسجله ابااسم حليم لو اب اسم البنات

حلا باستهزاء // اي حتى تضحك عليهم وتاخذه منهم انتم ليش ما تريدون تعرفون هاي مو مره هاي حيه

سليم // اگعد حليم وخلينه نفكر شنسوي

- - شنسوي. اطلگها بس ترجع الفلوس

اندك الباب اجه ابو علي اخو كفايه // السلام عليكم

عليكم السلام

سال عمي // ها ابو سهيل بشر

بيبي باوعت العمي الي هز راسه وكال // شبشر ابو علي المره واهلها طابخينها وتريد تتطلك

ابو علي // شنو بكيفها

هز راسه // والله المره مسيطره ومو بعينها اي احد

ابوي // اطلگها بس اترجع فلوسي

سليم // حتى لو ما ترجعهن المهم ترجع البيتها وبناتها

حلا.وهيه تهز اب ايدها // يابيت يابنات هيه الي تسوي هيج تفكر ابيت وبنات

سليم // كافي مو كل ساع واحد منطي رأي كفايه گومي صبي عشا الحليم

ابوي // لا ما اشتهي اريد اطلع اشم شوية هوا

سليم // وين طالع اكعد ولا تتهور انوب تضيع نفسك وكل شي ما تحصل

ابو علي وهوه يغمز العمي // امشي وياي حليم خلي نطلع شويه نفتر بالسياره

طلع ابوي هوه وابو علي وادري بي مكسور ومقهور وادري شگد ايحب امي بس هيه ما تحبه واصلا ما تحبنه

عمه كفايه راحت للمطبخ وصبت عشا چانت مسويه حميسة لحم وزلاطه وصمون ولبن

جابت الصينيه وخلتها گدام بيبي وعمامي وهيه هم كعدت وحلا انا واكفه بيبي كالت

- - مها صيحي الاخواتج وتعالي اتعشي

عمه كفايه //تعالي عمه عبالي بعدج نايمه

= لا انا راح اسوي الاخواتي لفات وناكل بالغرفه

ما اعرف ليش هالشكل جاوبت يمكن حسيت انو انا مسؤوله عن البنات بغياب امي

اخذت صحن خليت بي شويه حميسه وزلاطه ورحت سويت لفات وكعدنا ناكل روان سالتني

- - صدك امي ما تريد ترجع الابوي

ما جاوبتها هيه ردت عليه نفس السؤال جريت نفس وهزيت راسي = بعدين اسولف الج من يرحون

كملت لفتي ورحت للصاله شافتني بيبي گالت //ها بيبي شبعتي

هزيت راسي كفايه كالت روحي عمه للمطبخ خاله القوري شوفي الماي اذا فار خدري چاي

رحت للمطبخ وشفت الماي توه يغلي خليت چاي وطفيته وحضرت الاستكانات من كملو جابت الصينيه حلا

الي گالت // عود اغسلي المواعين ونظفي المطبخ

كفايه // ام احمد تره مها وروان شاطرات ما يحتاج احد ايذكرهن بالشغل

حلا باستهزاء // اي شاطرات ايطلعن على امهن

كفايه امتعضت وحلا هزت ايدها وراحت وانا جبت الچاي صبيته وقدمته الهم كفايه ما شربت

كالت العمي سليم // اكلك اذا انته باقي انا راح اروح للبيت من اول امس عايفته

حلا //مو اختج هناك

- - اي اختي هم عدها بيتها وجهالها بس لان بتها چبيره تبقى بمكانها

سليم // روحي وانا اجي وراج خلي اشوف حليم

حلا //سليم انته لويش حامل همه ما بي شي وهيه يومين تلاثه وترجع بس تنطي الفلوس الاهلها

بيبي // حلا مو مرت اخوج راح تروح انتي روحي وياها

- - اي يمه انا تره رايحه واساسا ما جايه بس سمعت المصيبه واجيت

بيبي //حلا تره حالنه ما يتحمل حچي وانتي رجلج مانعج تجيين وخاف يسمع ويحچي عليچ

حلا // وهوه منين منعني مو من وره ست الحسن لو نسيتي وبعدين رافد رايح ايفاد البغداد وباچر

يجي (دارت وجهها ) ياالله حمودي خلي نروح لان بيبيتك ضاجت من عدنا

سليم بعصبيه // حلا تره صدك الموقف ما يتحمل حچي زايد احنه بيا حال

حلا // كله من عدكم ومن هذاك اخوي الي مسويته مرته نعال تلبسه يمته ما يعجبها وتعوفه يمته ما يعجبها

وهسه عن قريب شوفو اذا ما شمرته

كفايه وهيه تباوعلي // دا كافي

حلا // ليش تباعولي لان مها موجوده تره مثل امهن ما يفرقن ويجوز اتعس

وگفت وكالت الكفايه //ترحين لو تبقيين

كفايه //ياالله جايه باوعت البيبي وكالت تصبحون على خير

بيبي // وانتي من اهل الخير مشكوره ام سهيل

يا عمه شمسويه صدگ چذب بالخدمه

وطلعت حلا وكفايه عمي سليم باوع البيبي وهو ينفخ //يمه انتي ليش هيچ تحچيين ويه حلا

بيبي // ما تسمعها اشلون تحچي گدامنا تگول متشمته

وراحت بيبي الغرفتها معين اجه ودخل وراها وسليم كلي جيبيلي چاي

رحت جبت چاي وصلت يم الغرفه معين يحچي // يعني ما قبلت ترجع

سليم // اي شكم يوم واخذ ناس ونروح (سليم گلي ) // روحي عمي يم اخواتج

طلعت بس ما رحت الغرفة اخواتي رحت گعدت ع الكرويته اسمع شنو يحچون

معين // صدك تحجي راح تودون ناس عليها حتى ترجع

سليم // اي ما تشوفه شلون متخبل عليها

بيبي. // شنو متخبل ما شفته يكول اروح ارميها وانعدم

سليم بنترر// كله چذب يرمي نفسه وما يرميها اصطبرو يومين تلاثه وشوفو اذا ما اجاج يتوسل بس رجعوها

بيبي // يمه ايحبها

سليم تفخ وكال // يومين بعد اخذ ابو علي واروح

معين //ما ترجع سليم لا تروح ولا اتعب نفسك

سليم // شنو ما تعرفها النهله تسويلها زعله اذا تريد شي وهسه هيه زعلت حتى تاخذ الفلوس

معين // واخذتهن سليم اخذتهن بعد ما ترجع

سليم // اشو تحجي وانت متاكد ما ترجع

معين //اي لان ادب سزز وحقيره وساقطه

سليم زمخ على معين // - - شبيك معين شنو هالحچي هذا

- هوه هذا الحچي

سليم // ولك معين انت اشايف عليها

معين وهوه يبتسم //صدكوني حتى حلا الها حق بالي تگوله وصدك عدها علاقه ويه رافد

بيبي // كافي استغفر ربك

- مستغفر ربي وما احچي اذا مو شايف بعيني

سليم // اشايف معين

معين // - - ما شايف شي

سليم // - - كوول مو حچييت وتبترها ع النص

معين جر نفس // سليم هاي المره چلبه واخوك حمار بس تضحك بوجهه ما يدري بالدنيا طشت لو رشت

— ليش شصاير فهمنا

بقى معين ساكت سليم رجع حچى ويا سليم // معين احچي لا تسكت فهمنا

معين صار ينفخ نفخات متواصله // تتذكر لمن رحت اعتذر منها

- يمته ؟

- من شلتو لمن غلطت عليها وانت گتلي روح المرت اخوك اعتذر

- اي شبيها

دخلت عليها وانا اكلها ام مها اعذريني انا عصبت عليج

هيه اتقربت مني وقفلت الباب سليم متفاجئ //اي وشنو صار

معين سكت وهو يعض بشفايفه سليم // معين مو مال سكته احچي يمعود

جر نفس وكال //اتصلخت راسا اتصلخت گدامي وتكلي احبك يوميه تعال اغلط واضرب وتعال اعتذر وانا

ارضيك بطريقتي

سليم بعصبيه // ولك انت شتحچي

بيبي نشغت وهيه تگول // استغفر الله حرام عليك هيج تذب تهايم على بت الناس انت من زمان تكرهها

معين // وما سالتي نفسج ليش اكرهها

سليم //. ولك معين تحچي الصدك

- - اي احچي الصدك ومو اول مره وكل مره اگللها عيب عليج انتي مرت اخوي

وهيه تضحك باستهزاء وتكلي // يا اخوك هذا انتو هم معتبرينه رجال

جاوبتها وانا داير وجهي //انچبي واستري نفسج

دارت عليه وحضنتني وتكلي //. وداعتك مو رجال ما بي خير انا باقيه الخاطرك اريدك مو بايدي

تدري انا بالبدايه شاك بتصرفاتها داىما تحاول تلزم ايدي تدنك ويبين صدرها اكثر من مره صاحتني للغرفه بحجه

بس حتى اشوفها وهيه لابسه ومتمكيجه وخاله عطر واغلس واكول مو قصدها

لكن توصل يمي وهيج تسوي وانا اخو زوجها صعبه وانا رجال لذلك انا صرت ابات بالمعمل وما اجي

للبيت لان كل ما اجي الگاها گدامي بالغرفه

سليم بعصبيه // ولك معين هاي وراها كص ركاب انته متأكد

معين // ليش اچذب وشنو مصلحتي يوميه تدزلي مقاطع تعرفون شنو مقاطع

بيبي بعصبيه // انچب معين انا اعرفك انته فاسد وتكرهها ولفقت عليها هذا الكلام

معين // اكرهها مو

اخذ موبايله وكلهم ما اسمع نفس اتصل وفتح الحاكيه سمعت صوت امي //. ال وو

معين بثگل //. ليش ما رجعتي ويه سليم

- - بكيفي ما ارجع

معين // هاا

امي // انت شتريد

معين // ليش اخذتي الفلوس

- - بكيفي

- - انچبي شو كله بكيفي وبكيفي انا بالگراج اجاني هسه سهيل وهوه ايكلي ابوي توه وصل وانتي ما راجعه ويا ليش

- - والمن ارجع

- - الرجلج والبناتج

- - هههه رجلي لو رجلي (الرجل الي تمشي عليها ) جاي اكلك هذا اخوك مو رجال مو رجال

معين // - ولج انتي شتردين

امي بدلال // - - انته تعرف شريد اريدك انته اذا تريدني ارجع ارجع على مودك واصير خدامه جوه رجليك وشتريد اسويلك

معين // ولچ بت الكلب ال...

قاطعته // اي سب واغلط واضرب بس خليني وياك حسسني اب انوثتي ولك انا جاي اموت من القهر من عرفت بيك

تريد تتزوج انا اريدك تعرف شنو اريدك

- - نهله ما اخون اخوي لو شيصير

- - هههههههه ظل يم اخوك خلله سوي طرشي

- - وانتي تبقيين على حل شعرج

- - ماعليك

- - يعني تردين اتفهميني انتي هسه يم اهلج مريم العذراء لو خالتلج شكم واحد جوه ابطج

امي وهيه تجر بكلامها // ما علييك بكيفي

وسدت التلفون بوجه معين الي كال العمي وبيبي // ها صدگتو

سليم // يابت الكلب الحقيره

معين // وانوب بلتنه اب بنات الله اعلم منين جايبتهن

بيبي وهيه ترجف // استغفر الله يمه

معين // لا صدك حجيه المره الي تكول هوه مو رجال هاي كلشي مسويه واخرهن باكت وسمعتيها هسه هناك الله اليعلم شجاي تسوي

من يومها نظرة عمي سليم اتبدلت اتجاهنا اتبدل الحب والعطف الى كره واضطهاد وما خفي كان اعظم

//////////////////////////==/=////يتبع

الثامن من هنا

تعديل المقال