رواية عقارب ذوي القربي الفصل الخامس 5 بقلم انين الليل

رواية عقارب ذوي القربي الفصل الخامس 5 بقلم انين الليل

الكل سكت من سمع كلام بيبي وچان اكو تساؤل خصوصا من عمي معين عمي سليم كال

هذا هوه حجيه مثل ما تگولين اسمعني حليم گدام ابو حسين راح انطيك خمسه وعشرين حصتك وحصة امي عدل

بيهن بيتك واشتريلك اثاث

ابوي كله // قليلات سويهن تلاثين

حليم تره حصتك اقل من عشرين بس الخاطر امي وانت هم شغلك خير من الله ولم نفسك

امي جاوبت // شنو شغله ابو سهيل على محل الحداده الي مأجره

عمي هز راسه // اي ام مها تره اجاره فلس ونص يعني شغل يوم يطلع الاجار والباقي عيشه والحمد لله

كلها الناس اماجره وكلها كاعده بالحواسم والناس مدبره نفسها مو كلها زناكيل

امي // وانا شگايله بس مثل ما انته عندك قطعه وبنيتها ومعين همه عنده وان شالله يبنيها هوه هم من حقه تصير

عنده قطعه هوه مو وحد

بيبي ردت // يمه شلكم بالقطعه گاعدين ابيت شكبره عود من اموت وينباع البيت اشترولكم قطعه

امي بدون ما تنتبه كالت // عيش ياحمار

بيبي دنگت وعمي معين گال بعصبيه // انتي شنو قصدج انتبهي الكلامج

امي جاوبت // انا ما قصدي شي كلمه وطلعت انته مو تريدلك بس عركه احنه من حقنا وحق بناتنا نعيش

سليم // والفلوس الي راح انطيهن تعيشكم وتعدل بيتكم ومحد مقصر من حليم

ابوي كال // ابو سهيل محد منطيني من جيبه هذا حق الله

ابو علي // صلو ع النبي وان شالله انتو اخوان وما بيناتكم شي

عمي // ابو علي انا هذا العندي الي يعجبه اهلا وسهلا والي ما يعجبه بكيفه

ابو علي // ها حليم شتكول

ابوي وهوه يفرك اب ايده ويباوع الامي // شگول ابو علي اذا هيه اوراق وباسمه واسم معين وانا ابن البايره

عمي سليم وجهه صارراحمر وگف وحچى بعصبيه // استغفر الله حليم نرجع ونعيد مو ابوي كتبلك محل وانته بعته

هوه شنو كل ساع نعيد الكلام

معين // والله لو ترجعلي انا فلس ما انطيك

امي // اي عيني صيرو على حليم عصابه لان فقير وما يحچي

معين // انچبي انتي لا تتدخلين

الكل اتفاجأ من كلام معين وامي رادتها حجه صارت تعيط وتحجي // انوب انته تغلط عليه خو كلكم سمعتو ها

حليم سمعت اخوك ومحد رده

ابو علي // يمعودين اسكتو كافي لميتو علينه الناس

ابوي // لا هاي ما مقبوله شنو ولك انته وتغلط على مرتي

معين // اغلط ونص هيه شكو متدخله بالنص

ابوي // هيه مرتي

ابو علي وكف ابيناتهم // وهذوله اخوانك كافي ومن كون ما يردون ما ينطونك فلس هم انته ما الك يمهم شي بس

ابو سهيل جاي ايگلك انطيك الخاطر الخوه بعد ليش هالحچي الزايد

ابوي // شنو الخاطر الخوه هذا حقي ابوي موصي بي

ابو علي // وراح تاخذه

سليم // لو اريد اگعد واحاسبك فلس ما يطلع

ابوي بعصبيه // حاسب سليم باالله حاسب

سليم // تمام. ولك حليم شكم مره بمره تجي وتگلي ناوشني ميه ميه وخمسين اريد اودي مرتي للطبيب من تروح مرتك الاهلها شكم مره خذيت مني تلثميه

وشكم مره اخذت خمسميه بابا انا ما مسؤول اذا انت واحد ارعن تضحك عليك النسوان

الكل سكت امي مثل الفشلت راحت للغرفه ابو علي كال // معين ليش هيج حچيت ويه مرت اخوك

معين // ما تشوفها عبالك ورث ابوها

ابو علي // مي خالف هيه هم اختكم

معين صار ينفخ // استغفر الله انا طالع

سليم وگف واتقرب من معين گله // اوكف معين قبل لا تطلع رووح طيح على مرت اخوك

معين باوع سليم دفعه وكله // رووح طيح عليها ام مها مثل اختنا

راح معين الامي بالغرفه بقى دقايق وبدون ما يحچي فتح باب الحوش وطلع

ابو علي گال // هسه ابو مها فلوسك يمي باچر اجيبهن ضمهن بيتك ما عوزه شي يرادله بس صبغ

واشتريله شكم قطعة اثاث والباقي ضمهن اخذلك بيهن سياره بيوم الما عندك شغل بالمحل اشتغل بيها

وابو سهيل ما يقصر منك

سليم // حليم انته اخوي شنو عبالك اتخلى عنك وعن بناتك بس انته يا اخي هم شويه حرك روحك ولا تخلي

اي احد يتدخل بيناتنا

ابوي // انته قصدك على مرتي تره هيه تحچي المصلحتي ومصلحة البنات وشفتو شلون معين غلط عليها

سليم راد يحچي لكن ابو علي رفع ايده وگال // اي صحيح كلامك وهيه مو غريبه ومعين ايمون هيه هم اخته

ابوي هز راسه وصار الاتفاق يجيبون الفلوس وابوي ايصلح الييت وراح ابو علي وطلع ويا ابوي بقى عمي سليم

الي گلي //روحي جيبيلي ماي

طلعتله من ثلاجة بيبي وكفت بالباب هو گال

- - يمه ليش ما حچيتي ع البيت

بيبي // شحچي يمه المره سانه سنونها تبيعه ثاني يوم وانا وين انطي وجهي عاد من تعرف الكم كلكم البيت ما راح

تسوي شي

سليم // اي هاي بيها كل البلا وبس الله يستر منها فد وحده دايحه وحليم اتورط بيها

بيبي هزت راسها // لا يمه هاي غيرة النسوان شافت مرتك كعدت بالبيت واثاث جديد وهاي غارت وهم تريد

سليم // يمه مو على ايدج كفايه اخذت ورثها من اهلها وساعدتني بالبناء

بيبي هزت راسها //اي صدك انا ادري بس النسوان حتى لو يشوفن ابعينهن ما ايصدگن

سليم وهوه ايفر ابايده //وهاي تبقى تغار هالشكل شتشوف تريد وهيه اول باول تاخذ الي ايحصله

- يمه شنسوي هوه اخوك مدوهن

وكف سليم وكال // الله يخليج يمه منو مدوهنه غيرها هيه ياالله خلي اروح

- الله وياك وهذا معين لا تنطي مجال عيب گدام الناس

- مو شفتيني ما خليته يطلع اله يروح يتسامح منها تره وهيه مو مال احترام

وراح عمي سليم واجه ابوي گعد يم بيبي وامي اجت يمهم وهي تبين نفسها زعلانه ومقهوره بيبي باوعت الها

- يمه حليم اخوك يكول باچر اجيبله الفلوس

امي جاوبت // تره خاله سليم ما ينطينه من جيبه حقنا

- نهله عيب هذا الحچي

امي اتخوصرت // شنو شگايله على كيفج قابل سبيت العنب

- انتي خاله شتردين

- شريد اريد حقنا

بيبي صارت اتحرك اصبعها // اسمعيني خاف تشوفيني ساكته كله الخاطر ابني والبنات بس لهنا وكافي من ساعه

ما استحيتي تكولين عيش ياحمار يعني ترديني اموت وهسه تگولين اريد حقنا شنو انتي وتطالبين اصلا انتي

منيلج الحق هذا الحق الي تردينه ورث رجلي الاولاده مو ورث اهلچ

امي رادت تحچي بيبي رفعت ايدها // اسكتي نهله خلي اكمل اذا انتي تدورين حقوق روحي جيبي ورثج من اهلج

مثل ما سوت مرت سليم لو تدورين على حق چان لميتي رجلج بفلوس المحل الي ما وكفنا عليهن

وين راحن وشنو سوا بيهن والله يعلم المن انطاهن

امي // شنو خاله جاي اتعيريني بدل ما تحچيين على معين الي غلط عليه گدامكم وانتو محد حچى

بيبي هزت راسها // لا كلنه ما قبلنه على معين بعدين خاله همه زلم ويحچون انتي شدخلج ابيناتهم

امي // انا اريد اضمن حق رجلي

- وشنو رجلج معوق لو اخرس ما شاء الله حاسبها بالفلس

بيبي جرت نفس // هسه هذا الحچي ما منه فايده باچر لو عگبه اخوك يجيبلك الفلوس وجددو البيت

واشترولكم اثاث جديد

امي هزت ايدها وصعدت وابوي بقى گاعد من اتطمن انو امي صعدت هو حچى

- يمه تره معين ما اله حق يغلط على امي

بيبي باوعتله وهيه لامه حلگها // اي صح معين ما اله حق بس راح واعتذر منها وهيه من غلطت وگالت

عيش ياحمار انته ما حاچيتها ولا خليتها تعتذر

ابوي // يمه انتي ما تعرفيها مرات نهله ما تعرف شتحچي بس انتي تدرين بيها شگد گلبها طيب

بيبي هزت راسها // اي صدك كلامك

ابوي دنك على راس بيبي وباسه //. يمه لا تزعلين البيني مكفيني

بيبي جرت نفس وسكتت وثاني يوم ابوي جاب مسواك وامي نزلت سوت الغدا وصعدت وانا صبيت النه والبيبي

وصعدت اصيحها

دكيت الباب // منو

انا ماما تعالي اتغدي

انزلي انا اتاني ابوج

هزيت راسي ونزلت گلت البيبي = ماما اتكول اتغدو

بيبي هزت راسها وصرنا ناكل وانا لميت المواعين وغسلتهن واجه ابوي دخل للغرفه وشاف بيبي نايمه وگلي

وين امج

بابا تعبانه فوگ بغرفتها

روان // بابا حتى ما اتغدت

ها خلي اروح اصعد اشوفها

= بابا انا اروح اصيحها انت غسل لان امي گالت تتغدا هيه وياك

ابوي هز راسه وانا صعدت ولگيت الباب مقفول سمعت امي تسولف وتضحك بس ما فرزنت الكلام

دگيت الباب وحاچيتها // بابا اجه ويريد يتغدا

- ياالله هسه نازله

ونزلت امي وصلت يم ابوي وهيه مبتسمه // الله يساعدك

- هلا نهوله گالو تعبانه

- اي لاتاخذ ابالك تعبانه من الحمل

1

حميت الغدا وصبيته الهم وگعدت تاكل هيه ويا بعدها صعدو للغرفه وبابا نزل العصر وهيه بقت بغرفتها

وانا وروان نظفنا البيت وبالليل سوينه شوربه وكلينه بتيته حسب اوامر بيبي وبالليل اجه ابوي صبيناله العشا

وامي ما نزلت

تقريبا الساعه بالتسعه بالليل اجه عمي سليم ويا عمي معين وابو علي گعدو وبابا گلي //سوي چاي

سويت الچاي وصبيته وقدمته وعمي سليم گال الروان // روحي صيحي الامج

صعدت روان وبعد خمس دقايق نزلت امي سلمت من وره خشمها عمي سليم طلع علاگه وانطاها الابوي وگله

هاك حليم هاي خمسه وعشرين مليون اخذهن عدل بيهن بيتك

بعدين مد ايده على جيبه وطلع فلوس وباوع الامي // هاج ام مها هذا مليون

امي بتساول //شنو هذا

سليم // هذني الفلوس الج ام مها يجوز تحتاجين شي

- لا ابو سهيل مشكور نعم الله عليك

- اخذيهن ام مها احنه اخوان ما بيناتنا فرق اعتبريهن هديه من اخوج

ابوي گال الامي // اخذيهن نهله اخذيهن من سليم

امي اخذتهن واللمعه بعينها وكالت السليم وهيه تباوع المعين // شكرا ابو سهيل

سليم //العفو انتي عزيزه علينه واختنا وما يهون علينه تبقين ماخذه على خاطرج من معين

امي // لا لا ما زعلانه اصلا هوه اجه واعتذر

ابو علي // هذا هوه الحمد لله والشكر ياالله حليم وديلنه على عصير بارد

ابوي وهو فرحان // تستاهلون تعاي بابا مها روحي جيبي عصير

سليم // روح انته معين جيب شيطلع مها بالليل

راح معين وغاب شويه واجه جايب عصير وكرزات وزعهن علينه الكل حس براحه من راحو وبقينا ابوي اخذ

الفلوس وصعد فووك هوه وامي ومر شكم يوم لمن ما احنه جاي نتعشى وبيبي سالت ابوي //شراح تسوي بالفلوس

ابوي جاوبها بعدم اهتمام //غير اعدل بيهن البيت واشتري اثاث

بيبي //تره البيت ما يرادله هواي شغل صار سنتين لمن سليم صبغه

ابوي هز راسه // ايي اشوف

- استعجل كون گبل لا تجيب مرتك وحتى اليبقى من الفلوس ايفيدنك اتضمهن تلم عليهن بلكي تحصلك سياره

تشتغل بيها

ابوي هز راسه // - اي ان شالله

امي جاوبت // خاله هسه كل شي ما نسوي بالفلوس اجيب واگوم بالسلامه بعدين نتصرف بيهن

بيبي هزت راسها // چي اشوفكم كتلتو روحكم على الفلوس كلت ليش يتطشرن تستفادون منهن

- اي خاله بس تعرفين انا ثكيله والعمال يراد الهم وكفه

بيبي // هم صحيح كلامج

ومرن الشهرين وانا وروان يوميه نترقب امي تجيبلنه فد شي ملابس او احذيه او حتى العاب لكن هيه اي شي

ما شفنه منها رغم يوميه تطلع تجيب علاليك وتدخل للغرفه ويا ويلنه اذا سالناها شجايبه

1

بيبي تروح البيت عمي سليم وتبات ليله ومرات تبقى يومين وترجع

ومره رحنه وياها وشفت وجه عمه كفايه ثگيل وبيومها بيبي حست گالت // اگعدن بالغرفه يمي ولا تگومن منا ابقن بمكانچن

احنه رحنه وره الظهر وعلى اساس نبقى نتعشى لكن بيبي گالت نرجع

وفعلا المغرب طلعنه وسالتها كفايه// شنو عمه ليش رايحه

يمه جايه اشوفكم وشفتكم

يا وهسه رايحه

اي هم ياالله اروح اصلي وارتاح ولو ما اجه سليم حتى اشوفه

اي عده شغل

سلميلي علي

الله يسلمج

اتعجبت من تصرف كفايه حتى ما لزمت بيها مثل كل مره وحتى من رجعت عمي سليم ما خابرها اشوف بيبي

ضايجه لكن هيه كاتمه بداخلها

عمي معين فبدا يبني بالقطعه مالته وچانت جياته للبيت كلش قليله

امي بيها وما جاي تثگل من الحمل وابوي نفس الشي اهم شي عنده انو يرضي امي وانا وروان علينه شغل

البيت وبيبي صارت كل شي اتعلمني الطبخ الترتيب التدبير صدكوني حتى الثقافه والكلام اتعلمته منها

وبدت المدارس رهف بصف الاول وروان بالخامس وانا بالسادس

روان راحت الامي طلبت منها تشتريلنه ملابس للمدرسه ردت عليها من يجي ابوج اطلبي منه

ورجعت روان وانتظرنه ابوي الي اجه وره الظهر وصبيناله غدا وروان حچت ويا

- 0 بابا المدارس اسبوع الجاي ونريد ملابس وجنط

هو هز راسه وگال // بابا روحي الامج واطلبي منها

روان // بابا رحت وردت عليه نفس ردك گالت روحي الابوج يشتريلچن ملابس

ابوي باوعلي // - هيه هيچ گالت

هزيت راسي // اي بابا

روحي صيحيها بسرعه

رحت الامي وهيه نزلت وكفت على الدرج // ها حليم شكو

- - وين وديتي الفلوس الي انطاهن الج سليم والفلوس الي خليتهن عندج للبنات

امي بعصبيه // ضامتهن الولادتي هواي احتاج

- شتحتاجين شنو شصار

امي // انا مريضه وهواي يرادلي فلوس

ودارت وجهه وصعدت الغرفتها ابوي لحگها وسمعنا غلط وعياط وابوي نزل بسرعه وهوه يگول

- - يمه نهله وگعت وما جاي تتحرك

بيبي // ياستار شسويتلها

- ما سويت شي دفعتها

- عزا العزاك مو هاي ايامها بسرعه اطلع وكفلك تكسي

بيبي اخذت عباتها وراحت ويه ابوي الي صعد ونزل شايل امي روان ورهف صارن يبچن وبيبي دارت علينه

- - لاتخافن هسه تجيب وتجي وانتي ديري بالج على اخواتج

انا بقيت بالبيت ما اعرف شسوي تقريبا نص ساعه واندك الباب اجت مرت عمي كفايه وياهه نور وسالتني

- شنو شصاير شبيها امج

= ما اعرف عمه ابوي صعد ونزل راح جاب سياره واخذها للمستشفى

هزت راسها // ان شالله ماكو شي انا راح اروح للمستشفى نور انتي ابقي يم بنات عمج

وراحت عمه كفايه وبقت نور گاعده ع الكرويته مالت الصاله وهيه ضايجه گالت الها روان

- نور حبيبتي شبيج عادي اخذي راحتج قابل انتي خطار

نور وهيه تعوج بحلكها // شكرا بس احس نفسي خطار ما ادري ليش

بعدها وكفت وراحت الغرفتهم باوعت وطلعت // هاي شنو ليش ما جايبين چربايات وكنتور مو ابوي انطى

الابوج فلوس وگله يشتريلكم اثاث

هزيت راسي = اي صحيح بس بعد تعرفين امي تعبانه وما تگدر تروح للسوك وتشتري

- اي هم صحيح خلي من تطيب تشتري الكم مثل غرفتي كلش چبيره وحلوه

= ان شالله

- ولا صابغين البيت

= ان شالله بس امي تگوم بالسلامه ابوي يجيب عمال ويبدي ايصلح بالبيت

نور // - اي بيتكم قديم كلش

ما جاوبتها بعدين سالتني // اشتريتو ملابس للمدرسه خلي اشوفهن

= لا بعد ما اشترينه

- مو اسبوع الجاي المدرسه

= ان شالله نشتري

- انا اشترتلي امي صداري اثنين وقمصان اثنين وجنطتين وحذائيين

روان // اي حبيبتي انتي وحده واحنه تلاثه يعني اذا ابوي يشتري اثنين اثنين شگد راح يصرف

واحنه هم تلاثه ناسيه سهيل ومجتبى

باوعتلي وكالت // مها انا عندي الصداري مالتي مالات العام اذا يصير اخذيهن

ما جاوبتها رغم حسيت بكلامها بي تشفي انقهرت لكن ما بينت الها بقيت ساكته وهيه حست على نفسها وسكتت

بقينه گاعدات منتظرات اي احد يجي صارت الساعه بالتسعه لمن ما اجت بيبي وعمي سليم تلگيناها سالتها

= بيبي شلون ماما

ابتسمت بوجهي وگالت // زينه لا تخافين عليها جابت بنوته حلوه تشبهج

وحده صارت تباوع للثانيه وتبتسم بيبي سالت

-اتعشيتن

هزيت راسي بالنفي

طلعت من جيبها فلوس وگالت الروان روحي جيبي جبن وانتي مها سوي چاي وطلعي صمون من الثلاجه

انا رحت وسمعت بيبي تكل العمي سليم //ابقى اتعشى انته ونور

سليم //لا يمه تعبان اروح اغسل واتمدد

نور // بابا وين ماما

- بقت بالمستشفى ويه مرت عمج

بيبي كالت // نور ابقي اهنا ويه بنات عمج على ما امج تجي من المستشفى

هيه هزت راسها بالنفي وباوعت الابوها الي گال // لا نور تروح وياي ما تعرف تنام اله بغرفتها

بيبي // براحتها بس لان ابحدها اذا تريد خلي روان ورهف يرحن وياها

نور جاوبت // لابيبي هسه بابا يتصل بخالتي اخلاص تجي يمنا

سليم // اي حتى تطبخ النه وتدير بالها على نور

بيبي // بكيفكم يمه وهم انته ما قصرت مرتك ويه نهله وانته هم من الشغل واجيت

سليم // غير اريد افتهم شبيها وشالها مغمي عليها اتعاركو مو

- اي اتعاركو

- عليمن

- ما اشترت ملابس مدرسه للبنات

نور // بابا انا گلت المها تجي تاخذ ملابسي مالات العام بعدهن جديدات

سليم بنتر // لا بابا شنو هالحچي قابل هنه عايزات ابوهن عنده فلوس ويشتريلهن

بيبي باوعت العمي سليم // اي يمه حتى هوه كدامي انطاها فلوس وگللها ترحين تشترين ملابس للبنات

سليم // والفلوس الي كتل روحه عليهن ويوميه متعاركه ويا حتى يجدد البيت وينهن

بيبي // - اخوك گال وره ما تولد وتكوم بالسلامه يبلش شغل

- ان شالله نشوف انا اروح محتاجه شي

- لا يمه سالم الله وياك

- ياالله بابا نور خلي نروح حدي تعبان تصبحون على خير

وراح عمي سليم وانا واخواتي وبيبي اتعشينه وبعدها نمنه يم بيبي حسينا على ابوي اجه الساعه بالثنتين وبيبي لاگته

وهو يريد يصعد للغرفه //وين چنت

هوه ما جاوبها ردت كالتله // شارب مو

بيبي بعصبيه // شبيك ولك ليش هيج بيك وما يطيح حظك

ابوي بالكگوه يحچي ولسانه ثگيل // يمه خليني كله منها معذبتني وهسه كلمه والثانيه ما اريدك طلكني ليش انا بيش مقصر وياها

- خليها تولي ما تعرفها هيه تدلع عليك وانت بعد كف نفسك حملك بي وما يثگل صارت عندك بنيه رابعه يعني

استغفر الله ياريت ولد چان شال حملك

- شسوي يمه شبيدي اريدها بس ترضى

بيبي تهدي بي // ترضى يمه هسه من تطلع روح اشتريلها قطعة ذهب وراضيها وبس يغدي شرها ابدي

رمم بالبيت واشتريلها اثاث وبطل الشرب يابني

- اي هوه هيچ

- وهذا السم بعد لاتشربه

- يمه والله من قهري

- مي خالف كل شي سهل ويهون

وطلعت امي ثاني يوم بيبي گالتلي نزليلها فراش بالغرفه الجوه نظفنا الغرفه وعطرناها وفرشنالها ونزلنه الكاريكوت

مال الطفله وكلنه متحمسين نشوفها واجت امي وهيه مبين عليها التعب اجت وابوي لازمها ايمشي بيها على كيف

وعمتي كفايه شايله الطفله مغطيتها اجت امي وراحت للغرفه وكلنه وراها بوسناها ونريد نشوف البنيه الي

عمتي كفايه خلتها بحضن بيبي

وكفنا نشوفها چانت حلوه كلش عمه كالت شنسميها بيبي خلتها بحضني وسالتني // شنسميها

لزمتها ورجفت وعيوني دمعت ما اعرف ليش بستها وگلت= خلي نسميها ملاك

عمه كفايه // الله يخبل هذا الاسم والله انتي ذواقه ملاك اسم حلو

انا شهگت من البچي الكل باوعلي بتساؤل يعني ليش ابجي

بيبي اخذت البنيه وانطتها العمه كفايه خلتها بسريرها وبيبي حضنتني وكالت // ليش تبچيين شنو غرتي

كفايه // هههه مها صدك تبچيين غيرانه المفروض رهف تغار مو انتي

بيبي // گومي حبيبتي اعصري الامج برتقال بردي وجيبي

هزيت راسي ورحت لحگتني روان // شبيچ مها ليش بچيتي شنو صدگ غرتي ما اصدگ

بقيت ساكته وانا اقطع بالبرتقال صارت گدامي وتاشر اب ايدها //شبيچ تبچيين غير اتفهميني

= ما بيه شي خفت على امي

اتقربت مني وحضنتني // مها شبيها امي وخفتي عليها

= ما بيها شي بس من شفتها ما ادري ليش بچييت خلي اخذ الها العصير وانتي جيبي الماي

اخذت كوب العصير الامي الي گلتلي // ليش بس مسويه واحد غير اتسوين المرت عمج

كفايه // لاما اريد عصير سويلي چاي

رحت خدرت چاي وشفت بيبي اجت وراي للمطبخ وراها ابوي الي گلتله //جيب عشا المرتك ومرت اخوك

- يعني شجيب

- هيه الطبيبه كالت تاكل عادي

- اي

روح جيب عشا من المطعم

ابوي بقى واكف وبيبيتي طلعت من جيبها فلوس ونطته // هاك ولا يوم گتلك جيبلك شي وطلع عندك فلوس

اخذ ابوي الفلوس وراح غاب تقريبا ساعه او اكثر اجه جايب ويا عشا وانا وروان صبينه اخذنا الامي وبيبي

ومرت عمي والباقي النه ويانه ابوي اتعشينه وانا سويت چاي وبعدها اجه عمي سليم وعمي معين وكعدو بالصاله

ومن رادو ايطلعون گلولي روحي جيبي البنيه انا رحت شلتها وانطيتها العمي سليم الي من شافها صلى على النبي

وشال فلوس وخلاهن بحضينتها وعمي معين باسها وهم شال فلوس بعدها رجعتها واجه وراي سليم وگف اباب

الغرفه وسلم على امي واتحمد الها السلامه

وعمي معين سلم لكن سلامه بي برود بيبي طلعت وراهم وسالت معين

- شنو هم رايح البيت اخوك

- اي حجيه اروح وبعدها اروح للمعمل ابات يم الحارس

- وليش عوود

سليم جاوب // يمه هاي كدامج الغرفه الجوه فارغه هوه ما يجي يگعد بيها

بيبي //. وليش ما تجي اهنا اذا ما تريد تبقى ابيت اخوك

- يمه احسن الي اصلا انا وكتي كله بالمعمل اجي من الكليه بوجهي للمعمل وبعدها اروح البيت سليم شويه

ارجع انام واكعد الفجر ادرس

سليم // اي هم من تجي بالليل نام على وكت واكعد ادرس

- لا بالمعمل احسن الي ما اريد اثقل على احد

سليم // وهوه هذا هم حجي عليمن اتثقل

بيبي // خلي براحته سليم

- هوه انا مخلي براحته

وبقت عمه كفايه يومين ويه امي وبعدها رجعت للبيت وصارت تجينه بالليل تبقى ساعه وتروح اما عمتي

حلا فااجت وامي من شافتها ضاجت لكن هيه رغم الكره والحقد الي مبين بعيونها اتجاه امي واتجاهنه كلنه بصوره

عامه لكن اجت واتحمدت السلامه وباست امي الي ردت عليها السلام ابرود وعمتي بيومها بقت ساعه وراحت

بيبي عطلتها هيه گالت

- لا يمه انا معزه بحليم اجيت

بيبي // انتي تجين بكل وكت والحچي الزايد بلا منه

عمتي بوكتها ما جاوبت وراحت وشفت بعيون بيبي حزن وقهر بيبيتي عاتبت امي

- - ليش خاله هيه اجتج يعني عرفت غلطتها ليش ما انطيتيها وجه

امي // والله انتي سمعتيها گالت اجيت الخاطر حليم فاانا مو طرف بالموضوع بعدين انا شرطت هيه ما تدخل بيتي

بيبي ردت // بس هذا البيت بيت الكل مو بيت احد

امي // ما طول انا بي يبقى بيتي وانا الي اقرر استقبل منو بي واطرد منو منه

بيبي // نهله عدلي كلامج واحچي عدل انا موجوده البيت بيتي عود من اموت ذاك الوكت استقبلي التردينه واطردي الما تردينه وحلا

اجت تتحمدلج السلامه ولو كاتله ابوج وجايه البيتج الاصول تستقبلينها

امي // وانا ما سويت شي الخاطرج سكتت

اندك الباب واجه ابوي سلم وشاف بيبي وامي ضايجات هوسأل امي // خير نهله شصاير

امي بنرفزه // ما صاير شي

- شنو ما صاير شي گليلي شكو

- اسأل امك

اتقرب من بيبي وسألها // يمه شكو

- - خلي مرتك اتسولفلك مو هيه ام البيت

وراحت بيبي الغرفتها ابوي رجع سالها الامي //شكو شصاير شو وحده اتذبها ع الثانيه

روان // بابا ما صار شي اجت عمتي حلا تتحمد السلامه الامي وامي ما قبلت

ابوي بصوت عالي وتهجم // وهاي شتسوي جايه شعدها بعد من تهيمه تريد اتذبها علينه

امي // اي حليم وخالتي زعلت عليه ليش ما رحبتي بيها عوزها اتگلي بوسي ايدها

ابوي // اتبوسين ايد من ايد حلا الچلبه لو انا چنت موجود چان طردتها من الباب

بيبي طلعت // بس يمه هيه جايه البيت ابوها ما تنطرد منه

ابوي // حجيه السوته مو شويه

بيبي وكفت بالصاله وحچت بصوت مسموع بي حده

- هم صدك حقكم شتحچون بس شي واحد لاتنسونه البيت هذا ما طولني انا عايشه بي الي يريد يجي هلا بي

حتى لو مرتك ما تريده عود لاتسلم من اموت وتتبايعون علي وكلمن ياخذ حقه ذاك الوكت بكيفها شتريد اتسوي

خلي اتسوي بكيفها تطرد من وتخلي من

امي // حليم خو سمعت تره البيت مو بيتنا

بيبي // اي سمع شنو اطرش هوه سمع البيت بيتي وكلمن يلزم حدوده

امي بنتر // تعاي ولج مها اخذي الفراش للغرفه الفوك خلي اصعد

انا اخذت فراشها ورحت فرشته بالغرفه وصرت ارتب بيها وبعدين صعدت روان الكريكوت مال الطفله وابوي اجه

يمشي اب امي على كيف من گعدت گالت الابوي // روح صعدلي البنيه

نزلت قبل ابوي شفت بيبي گاعده بغرفتها بس مبين عليها شگد ضايجه اخذت ملاك بحضني واجه ابوي انا كتله

بابا بيبي ضايجه ومقهوره روح طيب خاطرها

ابوي باوعلي وهز راسه وراح البيبي الي شافها تبچي گلها // يمه لاتزعلين مني ومن نهله تره الي سوته حلا مو شويه

بيبي ما جاوبته هوه اتقرب عليها وباس ايدها هيه جاوبته //حليم هذا بيت ابوها ما امنعها منه

هز راسه // هم صحيح بس يمه هيه ما سوت زين انتي لاتنقهرين

هزت راسها وهوه اخذ البنيه وصعد وبيبي جرت نفس وگلتلي //جيبيلي ماي

رحت صبيتلها ماي وانطيته الها هيه اخذته وشربت وسالتني // انتي كلتي الابوج يجيني مو

انا حضنتها وجاوبت = بيبي ما يهون عليه زعلج

هيه جرت نفس وگالت // الله يرضى عليج والله انتي نطفة رحمن

وبقت امي فووك واحنه كل شويه وحده تروح يمها ونلبي طلباتها وبيبي راحت للسوك حتى تشتريلنه

ملابس للمدارس چان اهم شي عدنا تشتري الرهف لان صف اول ابتدائي وفعلا بيبي جهزت رهف من كل شي

اما انا وروان جابت الكل وحده من عدنه صدريه وقميص وبقينه بجنط واحذيه العام

وداومنا انا سادس وروان خامس ورهف اول ابتدائي وطلعت امي من الاربعين واجه عمي سليم ومعين وياهم

عمتي كفايه وسالو ابوي يمته ايجدد البيت وسالو يمته ايبلش

ابوي باوع الامي وجاوبهم // مو هسه خلي الشتا يطلع

سليم باستهزاء// ياشتا هذا هو تجديد مو بناء

معين // وحتى لو بناء شنو واذا شتا مو انا جاي ابني بقطعتي ما اله دخل الشتا بس الصبا شويه تتاثر اذا مطر

ابوي هز راسه وگال // ان شاالله اسبوع الجاي ابلش شغل

وصرنا نسمع امي وابوي دائما يتعاركون وابوي يطلع يرجع فايت وكت چان ما يصعد اينام بالصاله

وبيوم عادي مثل كل يوم گعدنا وشفنا امنا طلعت گدامنا طلعت من البيت وبعد ابد ما رجعت

////////////////////////////يتبع

السادس من هنا

تعديل المقال