رواية عقارب ذوي القربي الفصل الرابع 4 بقلم انين الليل
مها
بدلنه ورحنه البيت عمي سليم بعد ان امي وصتنا من ايسالوچن امكم ليش ما اجت
تكولن تعبانه وراح تروح للمستشفى وبعدين تجي
بيت عمي مو بعيد عنه بالشارع الي ورانه احنه ما شايفينه ولان طريقنا من نروح للمدرسه مو علي
عشر دقايق وصلنه للبيت الساعه بالتسعه ودخلنه الطارمه والكاشي مالته والكراج والحديقه شي ولا بالاحلام
رهف شافت مرجوحه راحت گعدت بيها وانا وروان دخلنه مجتبى من باب المطبخ والي شفنا بالمطبخ
ذهلنه من ناحية الكاونترات والكهربائيات اشوف عمه كفايه وياها اختها ومرت اخوها وجهالهم
وحتى عمتي حلا وصلت سلمت // السلام عليكم
ورحت حضنت عمتي كفايه وانا اكلها // اشلونج عمه
هيه باوعتلي وتعلج وسالتني بدون ما ترد عليه // امج وين ؟
جاوبتها = عمه ماما كلش تعبانه وبدلت على اساس تجي ويانه بس صارت بطنها توجعها عاد راحت
للمستشفى وهسه تجي ورانه
عمتي كفايه باوعت المرت اخوها وعمه حلا وهزت راسها // هاا الله يشافيها
سالتها = عمه وين بيبي
اشرتلي بالغرفه // بذيج الغرفه
طلعنا انا وروان الي چانت ساكته وشفنا الصاله الداخليه والاثاث الجديد والثريات الي ما شايفيهن بس بالافلام
رحت البيبي لگيتها گاعده ويه ام كفايه انا سلمت ورحت على بيبي حضنتها هيه سالتني //. وين رهوفه
= بيبي هياتها جاي تلعب بالمرجوحه
وامج اجت
= بيبي راحت للمستشفى وگالت تجي ورانه
ليش اشبيها
= بطنها اتاذيها كلش
بيبي // اي هوه حملها هذا كلش امتعبها (باوعتلي ) روحي بيبي ساعدي مرت عمج خاف تحتاج شي
ام كفايه // يا تعرف تشتغل
بيبي // اي نادره كل شي تعرف وانا علمتها على كل شي
ام كفايه // ام سليم بنات ابنج عبالك بغداديات
بيبي وهيه تبتسم // ماخذات لهجة خوالهن
ام كفايه // چا همه خوالهن مو كرايبج منين صارو بغاده
بيبي // لا تنسيين صارلهم اربعين سنه بديالى وهمه قريبين على بغداد
ام كفايه // اي هم صدك
رحت انا وروان بالمطبخ وگفنا باوعتلي عمه كفايه سالتها = عمه محتاجه شي اساعدج بي
هزت راسها // لا حبيبتي ما محتاجه روحي انتي واختچ اكعدي يم بيبيتج
اختها // خليهن اينظفن الخضره تعرفين مو
= اي خاله اعرف
انطتني صينيه چبيره وطلعت علاليك خضره اكبار طلبت منها باديه چبيره حتى اخلي بيها الخضره هيه راحت
فتحت باب وجابت باديه چبيره وجديده وخلتها بالگاع عرفت ما تريدني اكعد ع الكرسي مال طاولة الطعام
كملت التنظيف ونكعتها
چان ابيت عمي كل شي جديد حتى استكان الچاي صرت اساعد بالمطبخ واصب چاي من يجي عمي او واحد
من ولده
يردون جاي للخطار الي يجيهم وروان واگفه تباوع بدون ما تشتغل اما نور بت عمي سليم فهيه وبنات خالتها
وبت خالها كل شويه واجن ورجعن صعدن فوك وحتى ما گالن الروان امشي ويانه
تقريبا الساعه اهدعش اجت امي ودخلت من باب المطبخ چانت مبدله ومتكميجه ولابسها ذهب طالعه فذ شي
وبيدها علاگه باوست مرت عمي واخواتها ومرت اخوها بس ما باوست عمتي حلا وشالت العلاكه انطتها المرت
عمي الي گلت الها
- خيه شنو هالزحمه مو حليم جاب خروف
امي جاوبتها // هاي من عندي وشي بسيط شجايبتلكم اني
- مشكوره ان شاالله بالافراح وهاي انتي شطالعه تخبلين
امي وهيه تبتسم // عيونج الحلوات
كفايه اتاشر عليه // لا وهاي مها العوبه اسالها وين امج اتكلي مريضه وراحت للمستشفى
امي تهفي على وجهها // اي كلش تعبانه من الحمل ورحت للمستشفى
اخت كفايه // هاي لو كل وحده مريضه بجمالج چان كل الناس بنت مستشفيات
امي ضحكت // ههههه اكلج ام سهيل وين عمتي
- بالغرفه گاعده يم امي
- من رخصتكم اروح اشوفها
راحت امي يم بيبي وانا رحت وراها وامي باوست بيبي وباوست ام كفايه وكعدت يمهن بيبي سالتها
شخيرج شو مها تكول تعبانه
هزت راسها // اي خاله اليوم منگعدت الصبح بطني حييل توجعني
ام كفايه //خاف ماكله شي بالليل
ردت وهيه تهز براسها //لا حجيه انا كله هذا حملي دووم كاتلني الوجع
الله يسهل عليج
بيبي // روحي يمه يم مرت حماج خاف تحتاج شي
كفايه چانت واكفه جاوبت بيبي // لاعمه كل شي كملنه انا واخواتي وحلا خلي ام مها كاعده خطيه تعبانه
امي باوعت الكفايه وما ردت بقت كاعده وبعدين جابت عمتي كفايه الغدا الي چان عباره عن صواني بيهن
تمن وفوكهن لحم ومركه وخضره وخبز
واتغدينه كلنه بعدها شلنه المواعين وراحت امي للمطبخ وصارت تغسل هيه واخت كفايه المواعين
عمتي حلا دز عليها رافد واخذت ابنها وسلمت على بيبي وراحت
من كملت امي المواعين رجعت يم بيبي للغرفه وصارت تشرب چاي واجه عمي سليم ومعين وابوي وسلمو
وكعدو يم بيبي وام كفايه واخواتها ومرت اخوها استاذنن يرحن البيتهن لان حسب كلامهن هنه جايات صار يومين
وامي باوعت الابوي وكالت
- ياالله مهاوي جيبي اخواتج وخلي نروح
سليم // وين رايحين ابقو
امي // لا انتم هم تعبانين نروح وانتو اخذو راحتكم
سليم // ابقو اتعشو وبالليل روحو
عمي سليم باوع المرته // راويتي ام مها البيت
امي وهيه تجر بكلامها // ان شاالله دايم البيت واهله مو اله انشوفه
عمي خزر مرته الي جاوبت // هسه اراويها قابل نهله غريبه هوه بيتها وهم چنت ملتهيه
وكف عمي سليم وكال // راح نروح للمعمل وانتو شنو تشتهون نجيب الكم عشا
بيبي // شنو يمه وره هذا الغدا هم تجيب عشا
سليم // اي حجيه شتشتهيين
- والله يمه شبعانه
- زين راح اوديلكم مشكل
روان // عمو همبرگر
- صار تدلل رونه الحلوه
امي خزرتها الروان وطلعو ابوي وعمامي بعدها عمه كفايه گالت الامي //گومي نهله شوفي بيتنا انتي مو خطار
امي // تسلمين حبيبتي ام سهيل بس تره احنه شايفين
كفايه عكدت گصتها // شكو داعي الهلكلام
امي // انتي اصلا مو ابالچ تراويني البيت لو ما سليم حاچي وحتى بتج نور ما صاحت الوحده من بناتي وراوتها
غرفتها مثل ما صعدت بنات اختج وبت اخوج
بيبي // هسه شلچ بهالحچي هذا كفايه ملتهيه ومشلوشه بالعزيمه والناس الي تجي ياالله گومي وياها
كفايه // شنو هاي منج نهله انا ما اقصد شي وبيت حماچ بيتج تجين انتي وبناتج وتگعدن والبنات يصعدن ويدخلن
الغرفة بت عمهن بدون ما هيه اتگللهن
- مشكوره حبيبتي بس من انتي اتراوينه يصير النه تقدير
- نهله شفتيني شكد ملتهيه بالعزيمه والخطار
بيبي // الله يديم البيت وراعيه
كفايه / / اي والله عمه الله يطول عمر سليم ياالله نهله دكومي شنو انتي زعلانه
وراحت امي ويه عمه كفايه واحنه رحنه وراها شفنه الصاله الداخليه والديوان الاثاث كله جديد وبعدها صعدنا
للطابق الثاني وشفنه غرفة عمي چانت چبيره بحيث عمي مخلي بيها غرفة نوم وطخم قنفات ويمها حمام
وبعدها راوتنا غرف الاولاد يعني تلث غرف الكل واحد غرفه وماثثه وحمام
وكل واحد عمي مخليله ميز وكرسي للدراسه
انبهرنا بكل شي واتمنينا يصير عدنا مثل ما عدهم وصرت اشوف بعيون امي الحسد الي ما بينته بس
انا ادري بيها هيه تغلي من داخل وجاب عمي العشا والتمينه بالمطبخ وصرنا ناكل وعمي جاب ببسي
وعصير بعدها رجعنا بعد ما ابوي گال البيبي
- هايمه هم ياالله نرجع
عمي سليم // حليم خلي امي شكم يوم يمنه
بيبي // يمه اروح الغرفتي
كفايه // وهنا هم غرفتج عمه
سليم // يمه ابقي ناس تجي تبارك ع البيت اقلها انتي موجوده
وبقت بيبي ورجعنا واحنه فرحانيين لكن بمجرد ما دخلنه للبيت امي صارت تحجي اتسمع اب ابوي
- مرت اخوك ما راوتني البيت اله من گللها رجلها عبالها نحسدها لو ما شايفين مثلها
- حتى ما كالت البتها اخذي بنات عمج وياج الغرفتج
- وبعدين شدعوه اخوك هيج باني وما ناسي اي شي هذا منيله الفلوس
ابوي ساكت ما جاوبها وهيه بقت تحچي وره اربع تيام اجت بيبي ورجعنا مثل قبل الشي الي صار
يوميه نسمع ابوي وامي يتعاركون فوك ومرات ابوي يضرب امي ومرات يظل بس ايعيط عليها
وهي تحجي وتسب وتغلط وتدعي وصوتها عالي
ومن يطلع ابوي بيبي تصعد الها او هيه مرات تنزل وتسالها // ليش تتعاركون على شنو
يكون جواب امي //اسالي ابنج
صار ابوي يجي فايت وكت بالليل مرات ينام بالصاله ومرات ينام بغرفة بيبي والصبح يطلع ومن يرجع الظهر
ايصير العياط احنه نبقى گاعدين بغرفة بيبي نخاف يجي ابوي ويضربنه
ومره ضربها الامي وصارت تصرخ بيبي صعدت وراها وابوي ايگلها نصي صوتج فضحتينه
واجه عمي معين وسمعهم وهمه يتعاوكون ومن نزل ابوي ساله // ليش تتعاركون شبيكم شصاير
ابوي يسكت ما يجاوب
عمي معين كلي // روحي صيحي الامج
رحت وانا خايفه منها كلت الها // ماما عمو معين رايدج
هيه متمدده على ظهرها دارت على صفحتها رجعت گتلهم بيبي كالت المعين //. اصعد شوف مرت اخوك
معين // مو دزيت عليها وما قبلت تنزل شسويلها
بيبي اتاشر براسها الابوي الي كاعد ومخلي ادينه على راسه وصعد عمي وره شويه نزل وامي نزلت ورا
چانت مبينه تبچي من شافتها بيبي ظلت تحجي على ابوي // ولك اشلون تضربها وهيه حامل انت تبقى مخبل وارعن
ابوي // يمه راح اتخبل منها تريد اتموتني
- كافي واسكت وانتي خاله استهدي بالرحمن يوميه الناس ملمومه علينه والله صرت استحي اطلع الجوارين
يسالوني ام سليم شبيكم ليش الصياح ابيتكم اول تالي
امي ساكته وتحرك برجلها وتخزر اب ابوي الي طلع وما رجع اله نص الليل ونام بالصاله
تقريبا بقينا على هاذي الحاله اسبوعين امي مخلصتها نوم ومن يجي ابوي تتعارك ويا وانا وروان انظف ونرتب
البيت وحتى نغسل ملابس ابوي وبيبي تطبخ الغدا وانا اسوي العشا الي يقتصر على قوري چاي واكلي بتيته
او طماطه ومرات جبن
عمي معين اكثر وكته من يرجع من الكليه يروح للمعمل ويبقى الوره المغرب ومرات يتاخر ياالله يجي
ومن تساله بيبي وين اكلت يجاوبها ابيت سليم
بيومها ابوي طلع الصبح ما اجه ع الغدا وامي نايمه طبعا ما تگعد اله وره الغدا اتصب الها صحن تاكل ومن
اتكمل اتعوفه وتصعد حتى بطلت تگعد يم بيبي لو حتى تسالنه شنريد شمحتاجات لو حتى اكلتن شربتن
ولا كانه احنه بناتها وهيه امنا الي مسووله علينه
عمتي حلا من يوم الي رجعت امي ما اجت للبيت ومن تريد تشوف بيبي اتخابرها وتگللها انا ابيت سليم وبيبي
يجي عليها سهيل لو عمي معين ياخذوها
رجع ابوي وره المغرب وچان غدانا تمن ومرك باميه وانا مگليه بتيته هو اجه جايب ويا فلافل حاره وگلي
بابا مها صبيلنه عشا
وباوع الروان// اصعدي صيحي الامج
روان راحت ورجعت كالت // هسه تجي
ونزلت امي بهدوء سلمت وگعدت ويانه ع العشا انا صبيت چاي وصرنا ناكل واحنه مترقبات لان ما متعودات على
هيج هدوء من امي ومن كملنه شلت الصينيه وابوي دخن جگاره وهو يباوع البيبي وكال
يمه اريد تحچيين ويه سليم اريد حصتي
بيبي مستغربه // ياحصه هاي
- حصتي من ورث ابوي
بيبي تفر اب ايدها //شنو انته اتغشم نفسك مو اخذت حصتك محل الكهرباىيات لو نسيت
- لا يمه شنو اخذتها اريد حصتي من المعمل
- يا حليم انت تحچي صدك انته بوعيك
امي جاوبت // اي خاله يحچي صدك شنو احنه وحد كفايه گاعده بقصر واحنه حسره علينه نشتري چربايه
الوحده من بناتنا
بيبي // والله خاله سليم يشتغل هوه اولده ما ينعرف ليلهم من نهارهم ما باكو ولا فرهدو
امي // واحنه ما عدنا ولد شنو. ينوكل حقنا
بيبي // منو ياخذ حقكم وانتو شعدكم بالاساس
ابوي بقلة صبر // يمه خصم الحچي اتودين على سليم وتگليله حليم ايريد حصته كافي ما شبع هوه ومعين
هاي سنين وانا اباوع وساكت
بيبي // انوب خليت معين بالوسطه
ابوي // اي اخلي ونص شنو يردون ياكلوني ترحين اتفهمينه الابنج ينطيني حقي ماكو اودي علي ناس
واعرف شلون اخذه من عيونه
بيبي اتفر ابايدها // هاا هسه عرفت صياحكم وعرايكم ثاري لان سليم عزل وكعدله ابيت
ابوي //. اي مثل ما كالت نهله احنه مو وحد
بيبي // على كيفك حليم على كيفك باچر اروح واخلي اخوك يجي وتتفاهم ويا
ابوي // اي يمه روحيله وفهمي انا الي حصه بالمعمل
بيبي وهيه تهز براسها //. عمن مرتك صار اسبوعين لاتنزل لاتطبخ ولا تسال على بناتها ولا تكعد يمنا
اثاري صار بعينها بيت سليم
امي // ها خاله رجعتي عليه زين لعد مثل ما كفايه گعدت ابقصر انا هم اريد اگعد بقصر حالي من حالها
بيبي لملمت حلكها وگالت // ليش انتي هسه گاعده بالشارع مو بيت شگده وشكبره
امي باستهزاء // تجيبين هذا الخرابه البيت كفايه بس انتي خاله من زمان اتفرقين ابيناتنا عبالك بس سليم ومعين
ولدج عبالك حليم مو ابنج
بيبي //هسه انا صرت افرق بعد شحچي تردين اتوججينها ( امي رادت تحچي وبيبي سكتتها )
ان شاالله يمه حليم باچر اروح ويصير خير
راحت امي وابوي الغرفتهم واول مره ما نسمعهم يتعاركون وروان فرشت هيه ورهف بغرفة بيت
عمي سليم طبعا الغرفه فارغه ما بيها شي بس جودليات ينامن عليهن البنات
بقيت عدلت فراش بيبي الي اشوفها ضايجه ومقهوره واعرف او خلي نگول عندي احساس انو بيبي
ضايجه من امي وتصرفاتها
بالليل حسيت بحركه طلعت من الغرفه شفت ابوي نزل من الدرج وطلع وسد الباب ورا
وبعدها حسيت بحركه بس ما كمت لان اعرف لو امي نزلت تريد تاخذ شي لو ابوي رجع
ثاني يوم ابوي طلع من الصبح وبيبي ما گعدت سوت ريوك شفت عمي معين اجه وگف بالباب شفته
مبدل سال بيبي
- شنو اليوم امي نايمه عفيه بيت بي خمس نسوان حسره علينه نشرب بي استكان چاي
بيبي ما جاوبته وهوه هز ايده وطلع
من سمعت سدت الباب انا رحت للمطبخ خليت القوري ع النار ورجعت فتحت ثلاجة بيبي اخذت بيضتين وسلگتهن
بعدها حميت الخبزه وجبت الريوك البيبي وندهتها هيه باوعتلي وگعدت صارت تاكل وسالتني
انتي تريكتي
هزيت راسي
تعالي تريكي وياي فتحي الثلاجه وطلعي جبن لو تردين سويلج بيضه
= لا بيبي راح اكل جبن
اخواتج نايمات
= اي بيبي نايمات
صرنا ناكل ومن كملنه الريوك شلت الصينيه واخذتها للمطبخ وغسلت الصحون وشفت بيبي تغسل وجهها بالمغسله
رحت يمها باوعتلي وكالت // امشي وياي
=وين
نروح للسوك نتسوك
= اي بيبي هسه
لبست تنوره وقميص ولفيت الشال على شعري وطلعت انا وبيبي وهيه طول الطريق اتگلي
- بيبي امشي وباعي گدامج لا تلتفتين وما عليج باالي يسمعج كلمه
- وديري بالج تضحكين تره البنيه الخفيفه محد يحترمها ومحد ايريدها
اتسوگت بيبي وانا اشيل بالعلاليك هيه وگفت اشترت بطل عصير نومي بصره بارد ودارت وجهها وغطته بالعبايه
وصارت تشرب
بوكتها احترمت امهاتنا الكبار شلون حتى اذا تعبن وعطشن ما يحاولن ايبينن هذا الشي رغم كبر السن والي ايسونه
ما بي شي مخجل لكن هنه ايعلمنه الخجل والمستحى
هيه اشترتلي بطل انا بقيت لازمته ما شربت لان استحييت من بيبي خليته بالعلاكه وصرنا نمشي سالتني
- ليش ما شربتي العصير
= بيبي مو انتي گلتي عيب البنيه كل شي محسوب عليها
- عفيه بتي بس هذا ما يمنع اذا عطشتي او تعبتي اتشربين يعني حاولي تشوفين مكان ما يشوفج بي احد واشربي
= اي بيبي صار
- وهسه امشي خلي انمر ابيت عمج سليم خلي نشوف ربابة ابوج وامج شيردون
وصلنه البيت عمي وفتحت الباب عمه كفايه ومن گعدنا جابت ماي وسالت بيبي
- عمه متريگه
- اي عمه متريگه من الصبح
- بالعافيه شعجب نهله صارت تگعد وتسوي ريوك
- لا هيه من يمته تكعد تدرين لو انا لو مها نسوي ريوك ونتريك سووا
- تدرين عمه مها عبالك بنيتج الزغيره ما چنها بت نهله
بيبي سالتها // اكلج كفايه وين نور ؟
- بعدها نايمه
- علميها تكعد تساعدج انتي ابحدج والبيت چبير
- عمه ما عندي شي وانا احب شغلي على ايدي ما احب المطمطه
- بكيفج اكلج خابريلي سليم خلي يجي رايدته
- خير عمه شكو
ماكو شي رايدته
خابرت كفايه وفتحت الحاكيه
- الو شلونك سليم
- هلا بيج خير
- هاي عمتي عدنا تكول خلي يجي اريده
- امي جايتنا
- لا چانت بالسوك ومرت بينه
- انطيني اياها
انطت كفايه التلفون // الو
- هلا يمه اشلونج
- هلا بيك انت شلونك
- زين الحمد لله شو كفايه تكول رايدتني
- اي والله بلكي تجي
- ابقي عدنا ع الغدا وانا اجي خير خو ماكو شي
- لا ماكو شي رايدتك بشغله اسولفها واروح
- يمه ابقي اتغدي وانا اجي وره الغدا انطيني كفايه
اخذت الموبايل من بيبي // ها ابو سهيل
- اگلج طلعي سمچه چبيره واشويها واخبزي خبز حار
- تدلل من عيوني
- سالمه عيونج
- الله وياك
باوعت البيبي // سمعتي عمه ابو سهيل يكول تبقيين عدنا ومها اذا تريد تاخذ المسواك وتروح
بيبي // لا ما تروح تبقى وياي
- خليها عمه هلا بيها من رخصتج اروح اطلع السمج
اتقربت من بيبي وسالتها // بيبي ليش ما تخليني اروح البيتنا
- لا تبقيين يمي نرجع سوا
دنگت بيبي باعتلي = لا تضوجين بيبي نتغدا ونرجع وانا اريدج وياي
بقيت ساكته بيبي حچت // روحي للمطبخ ويه مرت عمج ساعديها
رحت للمطبخ شفت مرت عمي مطلعه سمج وجاي تنكع بالتمن سالتها = عمه محتاجه مساعده
- لا ما عندي شي
بقيت واكفه من كملت غسل التمن اكو كوبين وصينيه رحت غسلتهن ومسحت الطباخ وباوعت من باب المطبخ الي
يطل ع الكراج شفت تراب مال تايرات سيارة عمي گتلها
- راح اغسل الكراج
هيه ما جاوبتني طلعت وفتحت الصونده وصرت اغسل بالكراج وبعدها الطارمه ورشيت الحديقه ودخلت للمطبخ
مسحته لمن ما سمعت الاذان اياذن اجيت شفت بيبي جاي تتوضا انا فرشت الها السجاده ورحت اتوضيت وبدينه
انصلي من كملت رجعت للمطبخ شفت مرت عمي جاي اتكمل بالطبخ واكو شكم ماعون ع السنك انا غسلتهن
ورجعت يم بيبي الي اجتها مرت عمي وسالتها // عمه اخاف جعتي اصب ونخلي للولد من يجون
- لا ما جعت اتانيهم
- بكيفج يمته ما تردين اصب گليلي
بيبي هزت راسها // اي اكلج كفايه هاي نور من عدنا مو هلگد تنام
- عمه اهنا لان هدوء تبقى نايمه ولاتنسيين عطله
- اي بس مي خالف علميها
- عمه هيه من تگعد العصر اتساعدني اترتب البيت وتشر الملابس بتي شاطره بس انا اريدها ترتاح حتى من تداوم
ما تداوم وهيه تعبانه
- اي هم صحيح
كفايه // عمه تره جهالنه الهم حق علينه خو ما جبناهم ومنينه عليهم
- شلون
- يعني اذا جهال من حقهم ايلعبون ما شفتيني انا من چان سهيل ومجتبى زغار شلون دللتهم ما شاء الله بس صارو
بالمتوسطه شفتيهم ما گامو ايفارگون ابوهم وحتى نور كل شي تعرف تسوي لان انا مو من النوع الي اجبرها على
الشغل لا اخليها تتمنى تساعدني وهيه هالوحده خليها تدلل وتشوفينها من تكبر شلون راح اتشيلني
- الله يخليها الكم ويطول عمركم
حسيت الكلام عمتي متقصده بي امي اجت عمه كفايه على عمتي وباستها وهيه اتگللها
- هوه انا منو الي صبرني على ضيم سليم غير كلامج ودعائج
ابتسمت بيبي ورفعت ايديها للسما // الله يسعدكم ويهنيكم
تقريبا الساعه بالثنتين اجه عمي سليم ويا سهيل سلم على بيبي وباس راسها وسهيل حضنها وراحو للمغسله غسلو اديهم
ومن رجعو عمه كفايه گالت السهيل //روح ماما اصعد انده اختك
عمي گعد يم بيبي وسالها //اشلونج يمه
- الحمد لله انت شلونك
- زين اتعذريني هالايام مشغول هواي ما مريت عليج
- الله يساعدك
- تگلي كفايه جايه للسوك ومتسوگه ليش انتي تتسوكين مو حليم لو مرته
– يمه حليم هم مثلك بالشغل ومرته حامل ما بيها تشيل المسواك
عمي كال // ياالله كفايه وين الغدا
اجت عمه // ابو سهيل اصب بالمطبخ
- لا جيبي اهنا يم امي
بيبي |/لا يمه كلنه ناكل بالمطبخ سمج وزفر ما يصير
— بكيفج يمه ياالله خلي نكوم
ورحت انا ويه عمه اساعدها هي دلتني ع السفره وفرشتها واجه عمي وبيبي وسهيل وگعدت نور بعده النعاس
بعيونها سلمت // السلام عليكم هلو بيبي
واجت وباستها
بيبي ردت // هلا نور اشلونج حبيبتي
- الحمد لله مشتاقتلج
- - لو مشتاقتلي چان اجيتي وسالتي عليه
— بيبي ما عندي مجال
سليم // اي يمه ملتهيه تنام وتكعد
ضحكنا وعمي سليم گال // يمه والله حقج اتعتبين علينه بعد ناس تجي وتبارك وانا مشغول ان شاالله نجيكم
هوه احنه وين ربينه غير بذاك البيت
سهيل // اي بيبي ساعات اگعد واتذكره
— ويبقى بيتكم الله لا يفرقكم
سهيل ومچتبى ونور هادئيين كلش وما يتدخلون اب اشياء ما تخصهم ويسمعون كلام عمي سليم ويحبون امهم
بشكل وعمه كفايه تخاف عليهم من الهوا الهاب
اتغدينه ومن كملنه راحت بيبي غسلت وعمي سليم وراها وانا لميت المواعين وخليتهن بالسنك وصرت اغسل بيهن
عمه كفايه كالت // عوفيهن عمه انا اغسلهن
= لا عمه كملتهن هنه مو هواي
بيبي راحت للغرفه وعمتي كفايه كالت صبيلنه چاي وجيبي
انا صبيت الچاي واخذته للغرفه وعمه بس شربت الاستكان استاذنت من بيبي وكالت
عمه البيت بيتج نامي وارتاحي انا اصعد ارتاح شويه تعبانه
بيبي // اصعدي عمه انا شويه واروح
سليم // لا يمه وين وانتي كفايه شنو ما تكدرين اتگعدين
بيبي // يمه شلقصه مو تكولون بيتي روحي عمه اصعدي ماالج غرض بي
عمتي ابتسمت وصعدت ونور هم صعدت وراها بقت بيبي وعمي سليم الي سالها
خير يمه شصاير
كل الخير اجيت اشوفك
وبعد حجيه
ماكو شي
بهاي الاثناء اندك الباب رحت گلت منو سمعت صوت عمي معين // انا افتحي
فتحتله الباب باوعلي وهو عاكف حواجبه // ها اليوم اهنا
ابتسمت = اي اجيت ويه بيبي
وامي هم جايه
دخل وسلم وگال // ميت من الجوع
بيبي // روح غداك بالاوفن
باوعلي وكال // روحي جيبي اهنا
بيبي // دروح اتغده بالمطبخ
- - ما بيه حييل مها روحي جيبي
رحت خليته بصينيه وجبته صار ياكل رجع عمي سليم سال بيبي
- - ها يمه ما جاوبتيني
— يمه همزين اجه معين لان اريد احچي وياكم
معين // خير شكو شصاير
- - ماكو بس الخير ان شالله
عمي سليم گلي // روحي عمو اخذي الكوابه وحمي الچاي العمج
ردت اروح بيبي گالت // لا يمه خليها گاعده مها خوش بنيه وما تچذب حتى يصير الحچي واضح
- - يمه شصاير قلقتيني
حليم
شبي
يريد حصته
سليم باستغراب // ياحصه
حصته بالمعمل
عمي معين شرك وبيبي اتدك على ظهره وانا شلت الگلاص قدمته اله سليم جاوب //يمه هذا ابنج عاقل لو مخبل
- - يمه اسمعني
سليم بعصبيه // لا حجيه انتي اسمعيني تتذكرين من گال اريد المحل وانته ومعين الكم الگراج او وينه المحل راح
على ابو خسرت البضاعه وتالي طلع بايعه واحنه ما ندري صدك لو لا
- صدك بس هم ابوكم من انطا المحل گالك هوه اله بالگراج حق الله
- - اي يمه گال بس انتي ما تحسبين مصاريفه ومصرف البيت حليم صار عشر سنين ما جابله علاكة مسواك لو نسيتي
هزت راسها // لا ما نسيت بس حق الله ابوك وصى
- - اي ما انكر وصى لمن ما چان بس گاع محد بحاله يسواله ستين سبعين مليون مو هسه
بيبي // ليش هسه شنو الفرق
- - يمه المعمل چان بس گاع هسه معمل شگده وشكبره تردين تعبي انا ومعين ننطي الحليم
معين // لاتنسى تنطي اله يصرفه على نهله
بيبي عضت شفتها واتنفست بعتب // عيب هيج تحچي
معين بعصبيه // لا يمه مو عيب تنكرين صارلهم شهر ليل ونهار عرايك هيه ويا
بيبي // معين انت ما الك شغل جاي احچي ويه سليم
معين // حجيه انا الي بالكراج مثل سليم انتي موجوده من ابوي قسم الورث
بيبي // وهم وصاكم تنطون حصه الحليم
سليم // ونسيتي من كناله تعال اشتغل ويانه شكال انا ما اشتغل ويه احد اريد اشتغل ابحدي واخذ المحل لو نسيتي
بيبي // ما نسيت وهم انطاكم القطعه الك والاخوك وهلبنيتها بيت وان شالله معين يبنيله بيت
سليم يمه وهم البيت ابوي ...
بيبي قاطعت عمي سليم /// اششش ولا كلمه البيت باسمي عود ذاك الوكت انا اوصي وكلمن ياخذ حقه
اتعجبو عمامي من ردة فعل بيبي عمي سليم سالها //يمه يعني تردين اتقنعيني حليم ومرته مايدرون
معين // على كيفك ابو سهيل لو يدرون شتتصور نهله خلته ما يبيع البيت انته شبيك
سليم // يمه (وصار اياشر ابحاجبه يعني انا موجوده بيبي بدون اهتمام ) هسه يمه انته شتگول
- يمه شگول انتي شتشوفين
- والله محتاره ومليت من گد ما يتعاركون
- عوفيهم وتعالي اهنا شعدج باقيه يمهم
بيبي هزت راسها //لا سليم ما اعوف بيتي
نفخ وكال //حجيه لو نجي للحلال والحرام حليم اي شي ما عنده يمي بس انا الخاطر جيتج اجي واتفاهم ويا
معين وكف وگال // والله سليم فلس احمر ما ننطي شنو انته صرفت قليل
بيبي // معين انا واخوك النحچي (دارت على عمي سليم ) شوف يمه ابو سهيل ما انكر انته هواي صرفت ودووم
عينك على اخوك بس ياابني انا هم الي بالمعمل من چان يسوه سبعين انا ما اريد شي يمه بس رضي اخوك
سليم // وداعتج حجيه بس ارضي تسمع حلا وهم تريد حصه
بيبي // حلا كل شي ما الها اشتريت الها بيت وچملت على سيارة رجلها انته ما عليك بحلا المهم رضي اخوك
سليم //مي خالف اجي وارضي صارحجيه بس. ...
— يمه لا بس ولا ابد اكعد ويا واتفاهم
- - صار تدللين الخاطرج والا لا هوه ولا مرته يستاهلون نعال مگطع
اول مره اشوف بيبي تسكت وما تجاوب رجعنا انا وياهه ولگينه البنات گاعدات ع التلفزيون بغرفة بيبي الي سالتهن
- - شنو اتغديتن بعدجن
روان بيبي// سويت طماطه وجبت من الفرن صمون واتغدينه انا ورهف
وامج
روان //امي بس نزلت سالت عليج ورجعت صعدت
بيبي گلتلي //روحي صيحيها
صعدت وشفت الباب مردود فتحته شفتها لابسه دشداشه دلعه وشعرها مبلل رافعته بالخاولي ويمها صحن بي كرزات
ونستله وببسي وتباوع ع التلفزيون هيه باوعتلي وسالتني //ها اجيتو
= اي ماما وبيبي تريدج
نزلت انا وصلت قبلها هيه اجت وراي وسلمت //. اشلونج خاله
هلا بيج
مها اتگلي ترديني
- - اي ليش الهسه البنات ما متغديات
خزرت روان وحچت // ولچ اروينه مو گليتي طما...
بيبي قاطعتها // خاله ليش روان تكلي طماطه غير اتطبخين غداج
اني //شنو ما تشوفيني شگد تعبانه
بيبي // حقج من الدرج تعبانه انزلي هواي غرف بعد لا تصعدين صرتي ثگيله
امي بدون اهتمام // عود يصير خير انتي شسويتي
- - بالليل لو باچر يجي سليم
- هاا زين
باوعتلي وراحت وهيه ع الدرج گالت // مها جيبيلي ماي بارد
بيبي // روحي بيبي شنو ماكو بالثلاجه مالتها ماي بس تريد اتسالج
هزيت راسي واخذت ماي ورحت قدمته الها هيه سالتني // شنو صار سولفيلي
راسا جاوبتها = بيبي حچت ويه عمي وگال اجي بالليل واتفاهم ويه حليم
اتقربت عليه ولووت اذاني وكالت // خوش مدرستج بيبيتج بس انا اعلمج ياالله انزلي ونفس ما اسمع
نزلت ورحت للغرفه يم اخواتي وانا مقهوره واقارن بين عمه كفايه وشلون مداريه جهالها وبين امي وشلون
تتصرف ويانه بعدها بساعه نزلت امي وسلگت دجاجه وسوت النه عشا تشريب وانا خدرت چاي
اجه ابوي واتعشينا وبقى ابوي كاعد يم بيبي لمن ما اندك الباب وراح فتحه اجه عمي سليم ويا ابنه سهيل
وعمي معين الي جان يخزر اب ابوي وياهم اخو كفايه (علي ) سلمو واجت امي سلمت عليهم هالمره
اجت لابسه دشداشه عريضه وحجاب وما مخليه مكياج
انا صبيت الهم چاي
ابو علي گال // ابو مها سليم جابني گال حتى الحچي يصير گدام الكل
ابوي // هلا بيك ابو علي انته مو غريب اخوي
ابو علي // طال عمرك ابو مها وهسه نريد نفتهم انته شتريد
ابوي // اريد حقي من الگراج
سليم باوع البيبي وگال // ابو حسين انته وعمي الله يرحمه موجودين لمن ما ابوي انطه المحل الحليم
لان حليم گال انا اريد اشتغل ابحدي صحيح لو لا
ابوي // اي صحيح
وانا ومعين اخذنا الگراج خو چان المحل احسن من الگراج عشر مرات متوجه وع الشارع ومليان بضاعه
علي // وانا اشهد
سليم //وبعدين انا ومعين اخذنا الكراج بس ابوي گال حليم هم اله حصه بالكاع وقيمتو بذاك الوكت بسبعين مليون
بس ابوي كال لا بتسعين
ابوي گال // شنو تريد اتحاسبني على ذاك الوكت
سليم رد // بكيفك حليم تريد بهذا الوكت تريد بذاك الوكت انا حاضر
معين گله // انته شتحچي سليم
سليم باوع المعين وخزره // شوف حليم تريد بهذا الوكت الكاع تسوى 300والمحل الي بعته كسر بعشر ملايين
لان طلعت مطلوب هسه يسوى 250 من غير البضاعه الي بي يمكن 150 مليون خو
ما وگفنا عليها انته شوف شكد تطلع حصتنا وننطيك حصتك من كاع المعمل
ابوي جاوب // المحل ابوي انطا اليه مثل ما انطاك انته ومعين الكراج
سليم // ها يعني انت تدري ابوي انطاك المحل مقابل الكراج
ابوي // بس مو گال الي حصه بالگراج
سليم //ونسيت شگد سديت عنك دين
علي // ياجماعه وهسه
سليم //انا هذا العندي
حليم // يعني انتو تردون تاكلوني
معين // شنو تريدنا ننطيك تعبنا روح شوف المن انطيت فلوس المحل وروح جيبهن منه
ابوي // شتقصد
معين // انت تعرف قصدي
سليم // انچب معين لا تفك حلگك وانت حليم عيب عليك من اتكول تاكلوني
علي // انتم اخوان حلوها ابيناتكم
سليم // علي تدرون بيه انا ومعين شگد تعبنا ياالله سوينه المعمل
امي // مو بس المعمل ابو سهيل والكاع الي بنيت عليها بيتك هم من عمي
سليم // ام مها هاي شغلات بيني وبين اخوي انتي لا تتدخلين
امي بنتر // ها يعني اشوفكم تاكلون حقنا واسكت
سليم خزر بيبي وصار ينفخ باوع العلي // شوف ابو حسين انا اكراما الابوي بگبره وكلامه والخاطر
امي واكراما الك انا راح انطي حليم عشرين مليون مو اله (هز ايده بالنفي ) لا حتى ايرمم بيته ويشتري اثاث
انا هذا العندي واذا غلطان گولو
علي // لا ابو سهيل عداك العيب ماكو كل غلط
ابوي // شلون حچي هذا الگراج انا سالت يسوى اكثر منر350
سليم //. لا غلطان الگراج يسوا اكثر هوه والمعدات بس هم سالت نفسك شلون منو بنا منو اشتغل منو
سهر الليالي انا ومعين نشتغل عماله بالنهار وبالليل انگص بلوك وانته نايم وما عليك بشي هسه تريد اتحاسبنا
تدري انته لو باقي ابمحلك مال الكهربائيات چان هسه تشتري گراجين مثل العدنا لكن انته حليم
ابوي قاطع سليم // ها ابو حسين شو ساكت
علي // والله ابو مها الصدك انته حتى العشرين مليون مو الك
ابوي اتفاجأ // ليش ابوحسين حرام عليك صرت وياهم الخاطر اختك
علي // لا ما مقبول كلامك وتدري بيه ما ادور هيج سليم اخوي وابن عمي وانت اخوي وابن عمي بس الحق حق
ابوي // والحق يگول سليم گاعد بقصر ويلعب بالفلوس لعب هوه ومعين وانا حسره عليه كل شي ويا ساعه البيت
يطيح على راسي وراس بناتي
بيبي // البيت بعد مية سنه ما يطيح
علي //شوف ابو سهيل تنطي الحليم خمسه وعشرين مليون اتريد اتزيدهن نعم الله عليك بس ما مقبول يتقصن لو فلس
سليم // شلون حجي هذا ابو حسين
اي تنطي حصته بگاع الگراج على السعر القديم وانتي كتلي حلا ما الها وعمتي انطت حصتها الحليم
تنطونه خمسه وعشرين وهذا هوه
عمي سليم هز راسه ودنك وبيبي رفعت ايدها للسما ودعت // الله لا يشن لبنكم يمه ويخليكم اريدكم كلب واحد محد يغيركم
سليم // هذا هوه بس گدامك ابو حسين الفلوس ايرمم البيت ويشتري اثاث والباقي ياخذله سياره يشتغل بيها بيوم الماكو شغل بمحل الحداده
امي ردت // بس احنه ما مجبورين انرمم البيت وباچر معين وسليم وحلا ياخذون حالهم حالنه
بيبي // لا خاله گدام ابو علي ينطوكم كل فلس تصرفونه ع البيت
امي // خو ليش احنه ناخذ الفلوس وانتو بيعو البيت وكل واحد ياخذ حصته ونشتريلنه بيت جديد على گدنا
بيبي جاوبتها بحده // البيت بيتي ما ينباع منا لمن اموت
////////////////////////يتبع
