رواية عقارب ذوي القربي الفصل الثالث 3 بقلم انين الليل

رواية عقارب ذوي القربي الفصل الثالث 3 بقلم انين الليل

مها

تقريبا وره يومين اجه عمي معين بالليل بوكتها ابوي گاعد يم بيبي بالغرفه عمي گعد بعد ان گال //السلام عليكم

عليكم السلام ( بيبي ) وين اخوك شو مو وياك

راح

وين راح

ليش ام سهيل ما گلتلج راح يرجع ست الحسن

شفت ابوي لمعت عيونه باوع المعين وكله بعصبيه //انت ليش دووم الي يسالك تستهزأ بي

معين جاوب // ما استهزأ امي سالت وانا جاوبتها

ابوي بعتب // اي بس انت تكول ست الحسن

معين // نعتذر منك (باوع البيبي ) يمه سليم راح ايرجع الملكه فكتوريا يعجبك هسه

بيبي بنتر // دي كافي انتو ما تستحون يمته ما تگعدوون تتناگرون

ابوي // يمه ما تشوفين كلامه كله استهزاء شبيها مرتي ويقلد عليها

- - ما بيها شي اخوك يتشاقى

ابوي // اي يتشاقى وحلا هم تتشاقى من تهمتها كلكم تتشاقون بس نهله اذا حچت ما تتشاقى والكل يسل سچينته عليها

معين بضحك ويحچي باستهزاء //عليمن انسل سچينتنا على نهله خاف تتشاقى

ابوي //شقصدك

معين //قصدي خلي نستر على نفسنا منها

ابوي // ولك شمسويتلك

- - ما مسويه عمي ما مسويه ( وگف معين وشاف كفايه واكفه) ام سهيل ماكو لگمه رحمه الابوج تعبان واريد انام

بيبي // وچم دووب انت هم شد حيلك واتزوج

معين غمز بعينه // اي بس اكمل هالسنه اتزوج احسن ولا منيت الچناين

اجت كفايه وكالت // هسه انا ابيش مانه عليك معين اشو حالك من حالنه

معين // مشكوره ما قصرتي ام سهيل

بيبي // نعم الله عليج عمه

كفايه //لا ما مسويه شي حالكم من حالنه قابل طابخه الخاطير احد هو طبخنا مال يوميه

راحت للمطبخ اتقرب معين من ابوي ودنگ وكله // شوف هذا الفرق الي بين مرتك وبين كفايه حتى لو خبيثه فما تبين خباثتها

ابوي ما جاوبه و عمي معين شال الصينيه من عمه كفايه وراح الغرفته

ابوي بقى يباوع البيبي الي هزت راسها وگلتله // اي يمه حليم صدك كلام اخوك كفايه هاي شكم سنه عدنا

وندري بسليم من اتزوجها ما يريدها قبل حتى يرضي ابوك بس هيه شفتها شلوناتها حوتنا كلنه وهسه الله يوفقها

راح تطلع ابيت ابحدها

ابوي دنك وبقى ساكت بيبي گلتله // لا تدنك انته من ترجع مرتك احچي وياها خلي تدير بالها عليك وعلى بناتك

ابوي // يمه بس انتي تقبلين بكلام حلا عليها

بيبي //لا ما اقبل وشفتنا كلنه طيحنه حظها وهسه حتى من تريد تجي انا ما اقبل انته يمه احچي ويه مرتك وانت

هم لم نفسك وخليلك شكم فلس جوه ايدك

ابوي // يمه منين مو انتي تدرين البير وغطا

بيبي // اي ادري بس بصراحه نهله مبذره وانت هم

ابوي باستغراب // انا

بيبي // اي من راحت مرتك الهسه انته ليليه تجي شارب وتتطوطح فوك من الناس ليش يمه

ابوي // يمه من قهري من الي صار اختي تتهم مرتي ويه رجلها وبحضور امي وبناتي وتالي شنو الي صار مرتي

اخذت البنات وراحت الاهلها وانا محتار ما اعرف شسوي

بيبي بترجي // يمه ابني اترك هذا السم الي تتزقنبه ولم نفسك عندك بنات وبلكي الله يرزقك بولد عاد يشيل كبرتك

ابوي رفع راسه للسما وكال بحسره //ان شالله

شفت ابوي الليله ما طلع صعد للغرفه وعرفت هوه فرحان لان عمي راح ايرجع امي اجه معين يم بيبي وكلها

ها شو ابنج ما طلع اليوم ايكع (وياشر اب ايده على حلگه )

بيبي خزرته المعين //صدك ما تستحي عود انت جاي تدرس بالكليه لاعتب على العربنچيه

معين //يمه انا شگلت سالتج اليوم ابنج ما راح يشرب

بيبي // هسه ما تكلي شتريد منه

معين هز ايده واتقرب //ما اريد منه شي اصلا هوه شنو عنده حتى انا اريد منه

اذا هالشكل حامل همه وتسال دير بالك علي هوه هم اخوك

معين هز راسه // اي مو اخوي اعمى ومكرم ومرته خطيه كاعده ويانه بلكمتها يمه الله يخليج شي ما

تعرفينه لا تحچيين بي

بيبي باستهزاء //. وانته التعرف

هز راسه // اي انا الاعرف (جر نفس وكال ) اروح انام باجر عندي كليه وشغل

ثاني يوم عمي سليم مارجع لكن اشوف الكل مطمن بس انا عيني على الباب بالليل اجت كفايه وكالت البيبي

عمه سليم خابرني ايگول باجر ياالله يجي لان لزمو بي اهل نهله

بيبي هزت راسها وكالت //يوصلون بالسلامه ان شاالله

بيومها بيبي حاچتني // اصعدي نظفي غرفة امج وامسحي الاخشاب

انا بسرعه صعدت واجت وراي نور بت عمي الي بقت واگفه منتچيه على ميز تواليت وهيه اتگلي

- - لو تشوفين بيتنا يامها قصر ايخبل مو هذا الخرابه

= ههههه

— اشو تضحكيين

= هاي بعدچ ما رحتي وصرتي اتكولين على بيت جدي خرابه

نور //. ههههه حقچ ما شايفه بيتنا شكبره وشكده وشلون بناء يخبل وبابا انطى الامي فلوس گلها اشتري

كله جديد واهم شي غرفه جديده النور وغرفه للاولاد

اكتفييت ابتسم لكن احچي ويه نفسي = هنيالج ملابسج جدد وبيت جديد وحتى امچ مهتمه بيچ ما تخليج

تلزمين عود الشخاط

نزلت كعدت يم بيبي وبعدها نمت والصبح گعدنا سويت الريوك وغسلت المواعين ونظفت الصاله

ومرت عمي سوت الغدا

صار الظهر وعيني على الباب فرشت السجاده البيبي وصلت وانا صليت وراها لان بيبي علمتني الصلاة

وبدت اتعلمني هواي اشياء وانا طبعي ما ارادد اسمع وانفذ كل شي

مرت عمي جابت صحن تمن وطاسة مرگه بتيته وخاله بيها لحمتين وشويه خضره وخبزه اتغدينه انا وبيبي

الخبزه كلتها بيبيتي وانا اكلت التمن وبيبي من كملنا گالت

گومي بيبي سويلي چاي

بيومها عمي معين ما اجه ع الغدا رحت خدرت الچاي وجبته البيبي وبقيت ساكته اترقب احد ايدك الباب الساعه

بالثنتين اجه ابوي وصعد غسل نزل انا صبيتله غدا لگيت بالجدر شويه تمن وشويه مرك جبتهن هوا اكل وكلي

جيبيلي چاي

وهم رحت صبيتله الچاي وانا اغسل بالمواعين اندك الباب راح ابوي وسمعت صوت عمي سليم وروان

تسال ابوي // وين مها

طلعت شفت روان ورهف وراهم امي جايه ركضت عليهن حضنتهن وصرت ابچي وهنه هم صارن ايبوسن بيه

وراحن البيبي وانا رحت على امي حضنتها هيه باستني بخدي وگلتلي //. اشو حييل متغيره شبيج ما تاكلين

محد عقب على كلام امي عمي سليم دخل سلم على بيبيتي وبعدها راح الغرفته وامي اجت باوست بيبي

وابوي واكف وادري الدنيا ما واسعته من الفرح

امي // شلونج خاله

بيبي وهيه خاله رهف بحضنها // الله يسلمج

امي وهي تبوس خد بيبي // خاله لاتزعلين عليه بس الصار مو شويه

بيبي // هسه مو وكت العتب كومي مها جيبي الامج شي تاكله هي واخواتج

بقيت صافنه لان ما بقى شي من الغدا

امي // لا خاله ابو سهيل غدانه

بيبي هزت راسها // روحي اصعدي الغرفتج ارتاحي الطريق طويل وانتي حامل روحي اتمددي

هيه هزت راسها وصعدت وابوي صعد وراها وانا واخواتي بقينه عد بيبي الي حچت ويانه

- - نامن بيبي عيب من عمكم سليم جاي تعبان

اتمددنا تلاثتنا انا بحضني رهف ويمي روان يعني انا بالوسطه ما نمت ولا حتى روان الي شاورتني وكالت

- - ما نعسانه نمت بالسياره

= مي خالف اتمددي بس تنام رهوفه نسولف

بقيت امسد بشعر رهف الي غفت وانا درت على روان شاورتها = اشلونج رونه

زينه ومشتاقتلج هوااي

= وانا هم

كومي مها خلي نگعد بالصاله ما بيها احد

طلعنه وردينه الباب وانا فرحانه بجية اختي يمكن اكثر من جية امي گعدنا ع القنفه وگتلها بعتب

= هناك اتونستي مو

هزت راسها وهي تبتسم // اي رحنا البيت خالتي خالده بقينه يومين بعدها خاله اتعاركت ويه امي ورجعنا

=ليش

- - بس لاتكولين الاحد امي كالت الها ابد ما ارجع راح اتطلك من حليم وخالتي ما قبلت

= يعني خاله خالده ما قبلت امي تتطلك

- - ايي وكالت الها ولج تردين اتثبتين التهمه عليج

امي ردت عليها // انا ما اريده الحليم طالعه روحي منه

وخالتي جاوبتها // وبس يعرف ابو سجاد صدگي ايذبحج وما يسال عنج فااحترمي نفسج وعيشي ويه الناس

وبيومها امي صارت تعيط على خاله و رجعتنه البيت جدو

= يعني بعد ما طلعتو

- - لا اخذنا خالي طارق ورحنه للحديقه وركبنا بالالعاب وعشانه بره ورجعنه

انا جريت نفس وضجت لان ما رحت روان جاوبتني // بس انا چنت كلش ضايجه لان انتي مو ويانه

= مي خالف ان شالله من تروح امي مره ثانيه اروح وياها

روان هزت راسها وكالت // لا حتى انا بعد ما تاخذني اتگول كبرتن ما يقبلن اهلچن تجن

بقت تسولفلي على بيت خالي وعلى مزرعة زوج خالتي وشنو بيها من اشجار برتقال وعنب والجو هناك

شكد حلو مو مثل اهنا حار ورطوبه وانا كل هذا الشي اتخيله صار المغرب وطلعت بيبي وشافت ضوه الصاله

مطفي باوعتلي // مها ليش ما فاتحه الضوه دنيا غروب

= نسيت بيبي

هيه ابتسمت // طبعا نسيتي بعد اجن اخواتج

رحت فتحت الگلوبات وخليت السجاده مالت الصلاة البيبي الي گالت اصلي بالصاله وانا رحت اتوضيت

وصليت وبس روان بقت گاعده لاابوي وامي نزلو ولابيت عمي سليم طلعو من غرفهم ورهف نايمه

من كملنه بيبي طلعت فلوس وكالت الروان

- - هاچ بيبي روحي على ابو علي گليله يسويلنه كيلو كباب ودجاجه مشويه انطي الفلوس وانا اخلي سهيل

يروح ايجيبهن وانتي بطريقج جيبي صمون

اتقربت من بيبي وگلت = ببسي وياج

بيبي ابتسمت وگالت // جيبي بطلين ببسي تستاهل مهاوي الحلوه

روان // وانا هم استاهل

هزت راسها وضحكت // ههههه وانتي هم تستاهلين

دخلت بيبي وانا رحت وراها شفت رهف بعدهي نايمه يمكن ربع ساعه واجت روان گالت

انطيت الابو علي الفلوس وگلي انا اوديهن للبيت وهذا الببسي والصمون

بيبي // عفيه رجعتي بسرعه

- - اي بيبي ما لكيت احد على ابو الصمون

- - عفيه (باوعتلي )ضمي الببسي بالثلاجه

اخذت البطلين وضميتهن بالثلاجه مالتها وبيبي سالت روان //شلونها بيبيتج

روان // الحمد لله زينه

وخوالج

زينين يسلمون عليج

عبالي امج ما ترجع

روان رفعت اچتافها وگالت // هيه اول مره ما قبلت ترجع بس بعدين من عرفت عمتي حلا ما راح تجي للبيت رجعت

- - وخوالج هم حچو شي ويه عمج سليم

هزت راسها // لا بيبي بس گلوله كل ما تجي اختك تتعارك ويه نهله وهذا الشي ما يصيروما نقبل بي

بيبي // چا لويش ما اجيتو امس

روان // بيبي عمي سليم راح هو وخالي كاظم للمزرعه وهناك ما اعرف سمعتهم رايحين ويه رجل خالتي يشترون

بيبي // شيشترون

روان رفعت اكتافها ولمت حلكها // ما اعرف بس يردون ايجيبونه للبصره

- - هاا

هزت راسها // اي بيبي عمي سليم هوه وخالي ابو سجاد

- - بيها الخير

گعد عمي سليم وهوه يتثاوب واشوفه توضا وصار يصلي واجه على بيبي بالغرفه

ها يمه كاعده

اي من يمته

انا نمت ما دريت بنفسي

تعبان من السفر الله يساعدك

اجت كفايه باوع الها // سويلنه عشا

كفايه //. خلي يجون الولد وادزهم ايجيبولنه بيض

بيبي // لا يمه انا وديت على ابو علي يجيب كباب ودجاج

سليم رفع حواجبه // ها شعجب

شلقصه دووم انا اجيب شنو نسيت

سليم // اي حجيه تجيبين ثواب الابوي من تقبضيين اجار المحل لو من تقبضيين راتب الرعايه

بس هسه الراتب والاجار بعدلهن وكت

كفايه وهيه تبتسم // سليم انا هم راح ازعل وخلي معين ايرجعني وهم عمتي تجيبلنه كباب ودجاج شوي

بيبي // هسه فوكها اذا الهسه انتي نايمه وما عندج شي تسوينه

كفايه ردت //لا عمه شنو ما عندي شي اسوي بجال ابو سهيل ثلاجتي مليانه بس انتي تعرفين سليم ما

يحب الكبه ومخلصه بورك خو ما اگليله طماطه گلت يجي سهيل ويجيبلي بيض

بيبي // اي خلي البيض للصبح (باوعت العمي ) خو من رحت ما ضوجوك اخوان نهله

سليم هز راسه // لا يمه الولد خوش ولد ونهله گايلتلهم زعلانه لان حلا كل ما تجي تتعارك وياي

بيبي // اي همه خوش ولد الله يخليهم

سليم حك خده // ابو سجاد يكول يفكر يشيل للعماره

-شعجب

-والله ما ادري بس جاي ايعامله على بيت ويمكن طارق هم يشيل

- چا ليش ما يجون لهنا

- يگولون العيشه غاليه بالبصره وبالعماره يردون اشوفولهم بستان

- تكلي روان رحت انت وابو سجاد ورجل اختهم ما ادري شمشتري

سليم هز راسه // اي صدك حجيه اشتريت معدات انا وابو سجاد بالنص

- چا ليش هوه ما اخذهن

- هناك ماكو سوك الهن ما يمشن مثل اهنا

رفعت اديها // الله يرزقكم

اندك الباب وراحت عمتي كفايه جاب الولد الكباب گالت // شنو سليم اصبلك لو اتاني معين وحليم

عمي // لا يابه صبيلنه عود همه من يجون يتعشون

روان // ابوي اهنا ما طلع

باوعتلي كفايه // روحي عمه صيحي الابوج وامج خلي ينزلون يتعشون

بيبي // ام سهيل صبيلنه عود من يگعدون كلمن ايصب النفسه

جبنه العشا واجت نور وصرنا ناكل اندك الباب راحت نور اجه سهيل ومجتبى ويه عمي معين الي سلم

ومرت عمي باوعتلي // گومي مها افتحي الاوفن جيبي البلم وخلي الماعون الابوج وامج

رحت جبته وياي جبت كلاصات عمي معين // شنو شرفت الليدي ديانه

كفايه // اي شرفت

-وينها اشو ما اشوفها

- نايمه

بيبي // ها كفايه انتي مو توج كعدتي

عمه شكلت گلت نايمه

معين // شلونك ابو سهيل

زين انته شلونك

تمام اجه ابو مصطفى وجابلك فلوس

وينهن

عدي هسه انطيك اياهن

اي زين وابو حارث ما جابلك شي

خابرني وكلي باچر يجيبهن تعرفه زين ابو حارث ما ياكل شي ايجيبهن

اي مثل ما تكول بس محتاجهن لان راح تجي معدات ولازم اسلم فلوس

ايدبرن عود انا انطيك

معين هاي الشغله ما بيها هلكد ربح يادوب انطلع كروتها وانا وابو سجاد بالنص

ياخي اداينك شلقصه ما اريد ربح

اذا دين مشكور

تتدلل

سليم // كفايه سويلي چاي

اي

راحت واجت امي وابوي الي الفرحه ما واسعته وامي مبدله ولابسه دشداشه جديده ومخليه مكياج

والعطر ملا المكان دخلوابوي كال // السلام عليكم

وامي گالت // مساء الخير

معين ياكل رد على ابوي الي گعد گابله ع الصينيه // عليكم السلام

امي بعدهي ما گاعده // شلونك معين

هو بدون ما يباوع // هلا ام مها الحمد لله ع السلامه

- - الله يسلمك (باوعت السهيل ومجتبى ) اشلونكم عمه

ردو // هلا عمه انتي شلونج

الحمد لله

ابوي // تعاي اگعدي اتعشي

بيبي // روحي مهاوي جيبي عشا ابوج وامج

سليم // اليوم امي جابت العشا على حسابها

معين // اي امي دومها كريمه اكلك ابو سهيل خلي انبدل اسمها من بدريه الى كريمه

بيبي // اتعشى ولا تسربت

الكل ضحك هوه جاوبها // يمه احسن شلج اب اسم بدور هذا صار قديم عاد كريمه اسم على مسمى

بيبي هزت ايدها وكالت // كمل اكلك عود من تتزوج بدل اسم مرتك

بعد ان كملو عشا رحت صبيت چاي الابوي وامي وعمي معين واجيت يمهم چانت غرفة بيبي كلنه بيها ملتميين

وابوي الفرحه ما سايعته اتقربت كفايه وسالت امي // شلونج ويه الحمل

امي // اسكتي وخليها كلش متعبني

- - بعد شتسوين لازم تتحملين على ما الله ينطيج ايده

- 0 ان شالله

- - ما شفتي بالسونار

- - لا انتي تدرين بيه. انا حتى من اروح للدكتور ابو السونار قبل لا ياخذلي اگله مااريد اعرف جنس الجنين

كفايه // بس ليش تره كلش عادي

امي ردت // ام سهيل هيه المره شتجيب لو وليد لو بنيه

كفايه // نريد الحليم ولد

- - ان شاالله يجي انتو بس ادعولي صدك وانتو يمته تشيلون ان شالله لان ابو سهيل سمعته يسولف على

اخوي ايگله عن قريب

كفايه // بعدنا ما ادري انا يمته ما يكلي سليم انا حاضره

امي تفر اب ايدها // شنو حاضره ناسيه الشيله شكد هوسه وتنظيف البيت وتجميع الاغراض

انا كلت // لا ماما نور تكول ناخذ بس الملابس الي نريدها عمي اشترا كل شي جديد

امي بلعت ريكها جاوبت // اي بالخير ليش العنده ما يشتري

كفايه ماجاوبت وراحت الغرفتها وامي بقت كاعده اجت يمها رهف رادت تگعد بحضنها امي دفعتها بعصبيه

وخري ما الي خلكج

بيبي جاوبت بعتب //تعالي بيبي حبيبتي شتردين (باوعتلي ) طلعيلها نستله من الثلاجه

روان // وانا هم بيبي

وطلعي الروان وياج وشوفي امج اذا تريد

امي هزت راسها // لا خاله مو توني اتعشيت

بيبي ما ردت عليها امي لمت حلگها وعظت شفتها عضات متواصله بعدها كالت البيبي

خاله انتي زعلانه عليه بس مازعلانه على بتج الي ذبت عليه تهيمه شكبرها

بيبي // خاله بتي طردناها وبعد ما تجي مو انتي هذا شرطج حتى ترجعيين

امي هزت راسها // اي طبعا يعني لو واصل حچيها الاخوتي چان شنو سوو اكيد يكتلوني ويكتلون رجلها

بيبي هزت راسها // اي بتي خبله ما تفتهم

امي // خاله انا حتى من رحت وسالوني اهلي گلت حلا كل ما تجي تسوي مشاكل وتتعارك وياي ماكبرت الموضوع

بيبي هزت راسها // ادري سولفلي سليم ونعم الله عليج ماكبرتي الموضوع

امي // خاله اشو تحچيين وياي من وره خشمج

بيبي بنتر/ /. يمه انتي رجعتي هذا هوه وحلا بعد ما توصل العتبة البيت عاد انتي ديري بالج على رجلج وبناتج

امي // وشبيهن بناتي منرحت اخذتهن وياي

بيبي اتاشر عليه // ومها لو تشوفينها عبالك يتيمه

امي باستهزاء // ليش مو يمج وابوها يمها بعد لويش چنها يتيمه

هزت راسها وگالت // بس تبقى مو مثل الام

امي // ان شالله (باوعت النه ) تنامن يم بيبي انا تعبانه صاعده ارتاح

صعدت واسمع بيبي تهمس ويه نفسها // استغفر الله عود توني اگول بتج عبالك يتيمه حتى ما كالت تعالي نامي

بحضني مشتاقتلج هذني اشلون امهات دخيلك ربي

بقينه گاعدات انا وروان ورهف نباوع تلفزيون بيبي سالت روان

اشو رهف ما الها غرض بامج شنو هناك وين تخليچن

روان // بيبي رهف كله عندي وياي واصلا احنه انام ويه خالتي آمال بالغرفه

وامج

امي تنام بالديوان ابحدها

يا ليش

تكول اريح الي

واذا اجه خطار

بيبي اذا يجي الخطار يروح البيت خالي ابو سجاد

شنو ابو سجاد مو ويه بيت جدج

بيبي خالي ابو سجاد عنده بيت شكبره يم بيت جدي شويه عنهم

-وخوالج

-خالي عارف بالطابق الثاني والجوه الخالي طارق وبيبي وخالتي

-هاا

هزت راسها // اي بيبي وحتى سمعت من بيبيتي تحچي ويه امي انو خالي طارق راح يتزوج مره على مرته

- ياا راح يتزوج ثانيه

- اي بيبي ويا بالدوام -

- ومرته

- مرته ما تدري وهو يوميه يجي البيبي ويگلها روحي اخطبيلي وبيبي ما تقبل

- وانتي شو متغيره ورهوفه همه

- لا بيبي ماكو شي بس جهال خالي طارق يتعاركون ويانه وفوكاها امي تلزمنه وتضربنه

اتحسرت // ياالله بيبي ما عليچن رجعتن البيت ابوجن نامن وارتاحن

وره اسبوع من رجعة امي اجو عمال للبيت شالو غرفة الاخشاب مال بيت عمي سليم وشالو الچرابي

مال نور وسهيل ومجتبى وكنتور اولاده وشغلات ثانيه وعمتي كفايه اجت وياها اختها ومرت اخوها

وراحن للبيت وبالليل اجت وياها عمي سليم

بيومها امي سوت العشا وصبينه العشا بالصاله وكلنه گعدنا بيبي سالت عمي

- - اليوم العمال اجو اخذو الاخشاب والجرابي شنو حطيت ابيتك وما ندري

سليم هز راسه // لا يمه شلون اشيل وما اكلج بس ذني بعتهن هم بيهن شكم فلس ايفيدني

بيبي // حتى المجمده والثلاجه بعتهنو

- لا المجمده اخذتها للبيت الثلاجه وديتها للمعمل

بيبي // يا چا وتبقون بدون ثلاجه

كفايه //لا عمه اخذنه اثنين جدد

بيبي // بالعافيه چان خليت الاخشاب البيت اخوك للبنات وانا انطيك فلوسهن

بعده محد جاوب وامي كالت //على شنو قابل نستجدي شبينه اذا نريد نشتري جدد

كفايه // تره غرفة الجهال جديده ما صار سنتين من اخذتها

امي // اذا جديده ليش ما اخذتيها البيتج

كفايه // مو اشترينه وحده النور واخذنا للولد هم وحده

امي // اي عيني بالعافيه واحنه اذا نريد هم نشتري جدد ما نريد الزبايل

وراحت امي صعدت فووك عمي سليم باوع البيبي // هااي شبيها

بيبي // ما عليك يمه

كفايه // ما ادري شبيها من رجعت وهيه تسمعني كلام

سليم // شتكول

بيبي تخزر بعمه كفايه // يمه ما تكول شي ما تعرف غيرة نسوان

سليم بعصبيه // عليمن تغار تره ماكو احد احسن من احد اذا تريد تشتري البناتها محد لازمها

بيبي // وهسه انا شطلبت منك وانت صرت عصبي

سليم // يمه ما شفتيها حتى اسلوب ما عدها

بيبي // سليم يمه خلي المكيف بالغرفه اذا مشتري جديد

كفايه // يا عمه عود اريده للمطبخ

بيبي // هذا هوه يمه اخذي

سليم // انتي يمه المن تردينه مو غرفتج بيها مكيف

بيبي // يمه البنات حليم خطيه هم يردن غرفه ايدرسن بيها وينامن هنه هم كبرن

كفايه // عمه شنو زعلتي انتي همه شدعوه عليج مو خلينه الثلاجه الي بالمطبخ

بيبي // نعم الله عليكم اذا تردون اخذوها تره سليم ما خلا بالبيت من موتة ابو الهذا يوم الله بس

الثلاجه وما جابها لمن ما عطلت القديمه وهالشلتو المجمده تره المطبخ والكرويتات مال الصاله وحتى فراش الديوان

البراني كله مشتري الحجي الله يرحمه

سليم // يمه لاتزعلين البناء نهبني

بيبي // اي صحيح البناء ينهب وانته بحاجة الفلس

اشوف سليم خزر كفايه الي دنكت وراحت وهوه بقى شويه وراح نام ثاني يوم راحت مرت عمي سليم هيه

ونور وبعدها اجو عمال شالو جنط ملابس وفراشات بس ما شالو المكيف بيبي كالت

- - يالله بناتي روحن نظفن الغرفه ورتبنها حتى اتدرسن بيها وانا بس اقبض راتبي اجيب الچن چرابي وع الراتب

الثاني اجيب كنتور

ما تعرفون شنو شعوري وانا انظف الغرفه عبالك كل اموري ومشاكلي انحلت

وراحو بيت عمي سليم وبيبي اول يوم صارت تبجي عليهم لان حسينه بوحشه واجه ابوي ع العشا وبيبي سالته

- - حليم هم رحت البيت اخوك

ابوي // اي حجيه رحت على اساس اساعدهم بالغراض بس سليم كله جايبه جديد والعمال همه الي شالو الغراض

وشدو الاخشاب وهيه واخواتها يرتبن بالبيت

بابا باوع الامي // نهله مو الاصول تسويلهم غدا عشا وتودينه الهم

امي وهيه خاله رجل على رجل // لا عيني عليمن هيه حتى من طلعت ما سلمت علينه بعدين مو تگول اخواتها

ومرت اخوها واختك ايساعدنها عود هنه ايطبخن الها

بيبي جاوبتها // وشكو بيها اذا طبختي البيت حماج هل من شال عاف المكيف البناتج والثلاجه

امي // والله خاله محد گايله شنو حليم انته طلبت من عنده يعوفلنه شي

بابا // لا ما طلبت هوه خلاهن

امي تباوع البيبي // سمعتي خاله يعني احنه ما طالبين منه شي ولا محتاجينه

وراحت امي وهيه تسمع ابيبي// عوزي اطبخلي غدا الكفايه واخواتها وحلا

شفت على وجه بيبي حزن وقهر لكن هيه ما تبينه رجعت امي وهيه تمسح بحلگها وگفت بالباب

بيبي سالت ابوي // شراح تاخذ البيت اخوك هديه

- - والله يمه ما ادري محتار ما شاء الله كل شي عدهم

- - مي خالف يمه لازم تاخذ الهم شي زحمه من اخوك

ابوي يباوع الامي ويگلها // ان شاالله يمه

امي سالت بيبي // وانتي خاله شتاخذين الهم

بيبي // انا راح اخذ الهم خروف ان شالله

امي جاوبتها // اي احنه وياج

رفعت حواجبها // شلون وياي ؟

- يعني خاله ندفع قسم من الفلوس ونگلهم هذا من عدنا

بيبي هزت راسها // لا ما يصير هيج

- خاله يصير مو سمعتي ابنج يگول كلشي عدهم خلص

بابا // كلام نهله صحيح يمه اشتري الخروف وانا انطيج نص فلوسه عود (باوع الامي )

وانتي نهله اخذيلهم خلاط طماطه

امي // اي ان شالله اگلك ومعين شراح ياخذ الهم ؟

ابوي // ما ادري

امي // هم صحيح انته شمدريك همه تجاار وشغلهم سوا

بيبي جاوبتها // تره مو اليوم شغلهم سووا من همه زغار يشتغلون سوا

امي // ما گلت شي اگول شغلهم سووا واكيد معين ياخذلهم هديه قويه ما تشوفينه صارله يومين بايت

عدهم عبالك هوه ابو البيت

بابا // تره حتى انا سليم گلي ابقى بات بس انا ما قبلت

امي باستهزاء // هههه مو على سواد عيونك حتى تساعدهم بالبيت

بيبي // وشكو بيها اذا ساعدهم اخو مابيها شي

امي // يا وانا شگايله اروح انام احسنلي لان عمتي عبالها انا طارده سليم ومرته مو همه شالولهم القصر شگده وشكيره

بيبي // الله يرزقهم ويرزقكم بعرق جبينه حسره علي نومة الليل

امي // اي خاله الله يرزقهم ( باوعتلي ) وانتي مها اغسلي المواعين ورتبي المطبخ وروان اكنسي الصاله وغسلن

الطارمه اريدها تلج لج افتهمتن وصوت ما اسمع تره اكفر بيچن

جاوبناها بخوف // اي ماما

امي راحت صعدت فووك ولحكها ابوي واحنه نظفنا البيت ورتبنا واجينه نمنا ثاني يوم بالليل چنا جاي نتعشى

وامي وابوي ويانه اندك الباب رحت فتحته اجه عمي سليم وكال // السلام عليكم

ودخل على بيبي سلم عليها وباس راسها

- اشلونج يمه

- الحمد لله امهنايين بالبيت وشايفين الف خير

سليم بعتب // يمه ليش ما اجيتينه

- اي ان شالله اجي گلت تعبانيين وملتهيين وانا ما بيه فايده اشتغل واساعدكم

سليم // شنو هالحچي هذا انتي الخير والبركه

- كملو شغلكم وارتاحو واجيكم

سليم //- حجيه شنو انتي خطار انكمل شغلنه وتجيين لا شو تجيين وتبقيين تره خاليلج غرفه الج فارشها وماثثها

- تسلم يمه الله يخليك

- باچر عدنا عزيمه طبعا ام مها ما يحتاج الها عزيمه

بابا // لا نهله تجي من الصبح اتساعد ام سهيل

امي هزت راسها // اي ان شالله اجي

- - ياالله يمه گومي امشي وياي

بيبي // ما تخليني الباچر اجي

- لا هسه حتى الجهال ايگلولي جيب بيبي

- يمه تعبانين خلوني الباجر

- يمه هسه امشي

بيبي جرت نفس //اي هسه اجي بس خلي اغير دشداشتي

طلعنه للصاله وبقت بيبيتي من كملت عمي سليم طلع وگلها انتظرج بالباب

بيبي طلعت فلوس وانطتهن الابوي // هاك باچر جيب خروف زين وتعال گدام الناس گول من امي ومني

- اي يمه وانا بس يصير عندي انطيج

- والله ما اشوف يصير عدك فلوس (باوعت النه وگالت ) نهله عود جيبي البنات وتعاي من وكت ساعدي مرت

سليم اكيد العزيمه چبيره

امي // اي ان شاالله

وراحت بيبي وثاني يوم الصبح طلع بابا وگال الامي // اروح اجيب الخروف وامر عليج نروح حضري

نفسج والبنات

امي جاوبته // لا رووح انته گدامي انا بعدين اجي

اتقرب منها // شلقصه نهله زحمه من سليم

- ماكو زحمه حامل وتعبانه اجي على كيفي شنو العزيمه متوقفه عليه

- زين ودي البنات من وكت وانتي تعالي براحتج

امي //- مو خاف احتاجهن

- شنو عندج وتحتاجيهن وديهن واذا ما بيج حييل لا تجيين انا اخلي سهييل يجيبلج غدا لهنا

- زين مثل ما تريد ياالله ماما روحن بدلن وروحن البيت عمجن

هزينه راسنه وبدلنه ورحنه وسط توصيات امي اذا سالوچن ليش امچن ما اجت تگولن تعبانه كلش

وصلت انا واخواتي وتقريبا الساعه بهدعش اجت امي ورادت ترجع وره الغدا لكن عمي سليم گال تبقون للعشا

تتعشون وترحون

بالليل بقت بيبي عد بيت عمي واحنه رجعنا لكن اشوف امي عباره عن مفخخه باي لحظه تنفجر

چنا نسمع عياط امي وابوي الي دووم يرجع نص الليل وهو ما يعرف شنو يحجي وامي الي صارت ما تتحمل كلمه

بقينا بهاي الدوامه تقريبا اسبوعين واجه ابوي وگال البيبي

انا اريد حقي من ورث ابوي

///////////////////////////يتبع

الرابع من هنا

تعديل المقال