رواية مقبرة الاحياء الفصل التاسع والعشرين 29 بقلم سارة جعفر
مقبرة الأحياء. البارت 29
بين الفقرات عشقي 
.
.6
مبتعدين بس نتشابه هواي وأحس شيصير بيك يصير وياي ما نختلف منسجمين بالروح مثل الماي من تديره ع ماي..
26
-وردة: بين الضايجين كلش ومغثوثين من الزواج هذا وبين الفرحانين من كل گلبهم وأكيد أنه من ضمنهم ما مصدگه وأخيرًا راح يصيرون لبعض، شهدت على عذابهم وعذاب جسام علمود سمرته تصير مرته.
21
وفجر والمعاناة العانتها تفطر الگلب، والولد أصدقاء جسام الـ همَّ فقار وضيغم وقادر و وائل كلهم فرحانين اله لأن يدرون بي يحبها مفضوح حبه، واگفين يسولفون بالحوش أنه أغسل المواعين وگدامي الشباك أباوعلهم أصواتهم عاليه واصلتني..
5
قادر: الحمدلله من صارت الك شيبت وأنتَ بشبابك..
12
جسام: وعلي خويه لهسه ما مصدگ!
7
وائل: غير صرت دگ حزن وقهر من وره العشگ دوهنك..
6
جسام: شتحچي أنتَ، أنه هسه أفكر شلون أقنع حرّ يرضى باچر العقد وعگبه العرس؟
18
ضيغم: ياااا بوييه هذا الثگيل وهيچ صار حاله من العشگ عمي يخوف الحب يخلي الواحد يصير خفيف!!
28
فقار: تردون الصدگ غير ولا توقعت حرّ يرضى..
5
قادر: عمي لو أدري بي يرضى وهيچ عقليته چا من زمان حاچيته ليش شاب أخوي گلبه وشعره وصار شايب وهوَّ بعز شبابه!
4
ضيغم: چا لا عبالكم جسام كل هذا الوكت خوف من حرّ ساكت عمي أنه أحلفلكم عليه يتحمل لو حرّ يحط بي طلقه بس هوَّ خذه الموافقه من السلطات العليه يله خطب.
ضحكو كلهم يباوعون لجسام مفتهمين قصد ضيغم بكل وضوح، يقصد أخذ الموافقه من فجر، طگ ضيغم بكل قوته يضحك
-نچب زمال.
3
وائل: الحب يأذي، هاي شوفو حتى حاله فرق شلون گبل چان عبالك عنده فاتحه جگايره وهموم وحتى لحيته عاليه ما يزينها وحال الضيم حاله شوفو هسه بعده بس أخذ الموافقه شلون الضحكه ما تفارگ وجهه!
13
ضيغم: ولك أنتَ هم چنك طايح بعشگ وحده كاتلك؟
1
وائل: لا وين أنه، مو ألي الحب..
32
فقار: دنچب لك غير صاير چنك جسام!
1
قادر: إذا تريد نمشيلك عليها؟
5
وائل: ههههه لا وين أنه حتى آمل ماكو مگطوع..
86
سديت الحنفية من كملت غسل مواعين وعفتهم يسولفون مندمجين بسوالفهم سوى، رحت للهول أنشف بأيديَّ من الماي ظهري يطگطگ من الوجع المواعين عليَّ بس هواي كلش وهنَّ يتقصدن يكومن المواعين حتى لو بس يتلفنهن ويخلنهن الي على السنگ علمود يصير عليَّ التعب أضعاف..
2
طبيت للغرفه أرتاحيت شويه والكتاب بأيدي أقرأ وأفكر شلون حظ نحس عندي عطلة الأمتحانات الوزاريه صادفت ويَـ عقد فجر وزواجها، يله حتى لو التهي چم يوم ما يأثر وهم أغير من نفسيتي شويه وأتونس لأن الأمتحانات راح يتعبني وبنفس الوكت خايفه ومتوتره منهن
6
أباوع كلارة ما هِيَّ طلعت من الغرفه أدور عليها وأنتبهت الها واگفه يم الباب تتسنط على الممر هذا اليضيع فجر يلگاها بي طگيتها بخفه على چتفها عاگده حاجبي بأستغراب وبصوت ناصي همست
-عليمن تتسنطين ولچ؟؟؟
2
كلارة: على جسـام وفجر..
3
وردة: والله عيب ولچ!
كلارة: لا لا ولچ سوالفهم تخبل طلعو رومانسيين.
20
كتمت ضحكتي وغميتها كلارة تموت على المسلسلات وهسه متأثره بيهن أم الرومانسيات جرتني من أيدي على كيف وبصوت كلش ناصي همستلي يم أذني تشاورني
-تعاي أسمعي وياي تفوتچ لقطات تخبل..
والله أنه صدگ أستحي بس شو خذاني الفضول أسمعلهم لأن أحس شخصياتهم تجذبني، ركزنا أنه وكلارة نتسنط عليهم والله فشله أول مره تطلع مني..
3
أسمع صوته يسولف وياها الحب ينسمع بنبرة صوته
-مخطط لكلشي صار سنين أنه أتمنى وأخطط لحياتي وياچ وأن شاء الله بهذا الشهر نعقد ونتزوج، لأن أنه مستعجل فد مره صبرت هواي وأريد أنال عوض صبري وأعيش وياچ حياتي الجايه ببيتنا الجديد..
8
فجر: بيتنا الجديد شو ما مسولفلي عنه؟
جسام: أنه وقادر أشترينا بيت جديد علمود هوَّ وعائلته وأنه وعائلتي ننتقل لذاك البيت نعيش حياتنا بهدوء ملينا وبزعنا من المشاكل والهوسه ومالنا شغل حتى بأبونا وبأهلنا منه نعيش أنه وياه وعوائلنا، أدري بيچ أصيله وتوگفين وياي، أنه تعبت من العيشه هاي وأريد أرتاح وياچ وأن شاء الله ما عندچ مشكله؟
6
فجر: لا أكيد ما عندي مشكله بس أستغربت كل ظني راح أبقى عايشه ويَـ عائلتي نصدمت من گلت نطلع!
جسام: أنه مقرر من أول يوم تنزفين لبيتي، زحمه نظل عايشين ببيت أخوچ أنه مو مثل أبوي نگس وأكل حگوك الوادم البيت هذا لـ حرّ وكلهم مشاركينه بي..
8
فجر: چلاب كل ما يگلهم يابه ما تشترون بيوت تطلعون عوائلكم كبرت، كلهم يضلون يتباچون بيهم يگلوله ما عدنا وبيهم يگلوله منين نجيب البيوت ينراد الها مسؤوليه وأحنى عوائلنا چبيره نتبهذل إذا نطلع!
جسام: المفروض يحمدون ربهم حرّ زلمه شريف وما شمرهم همَّ وغراضهم بالشوارع، بس هوَّ واگفه بعينه عيب هاي العوائل تتبهذل بالشوارع..
+
فجر: أي والله عمت عيني عليه مستغلين نقاط ضعفه يدرون بي ما يگدر يشمر النسوان والأطفال بالشوارع يتبهذلون.
جسام: عوفچ من هذوله الزمايل هسه وخلينا بحياتنا الجديده، فجر يمكن تشوفيني مسودن لو ما شايف بس أنه صدگ متسودن كل عمري أتحسر عليچ وأريدچ، راح أقنع حرّ باچر نعقد مو بعد أربع أيام..
7
-هههههههه مو هواي أربع أيام.
-هواي عليَّ كلش هواي..
-أن شاء الله خير.
-شوكت ما يريد العرس بكيفه ما مستعجل..
-صدگ؟
-لا والله چذب هذني أحچيهن بس يم حرّ أقنعه أچذب عليه والنوب من نعقد الح عليه على العرس، أنه هسه أتمنى تنزفين لبيتي..
4
ما سمعنا صوتها بعد ما ردت مبين أستحت لأن حتى من كمل وياها حچي هِيَّ بالگوه تسولف من المستحى وأنه وكلارة نتبوسم وياهم..
فجر: جسـامي.
47
أتذكر أول مره من گال أسمي
دگات گلبي بكل مكان بجسمي..
5
ضحكت فرحانه على حبهم وأخيرًا أكتمل وراح يعقدون ويتزوجون فرحتهم وكلامهم بهذا الوكت خلاني أطير من الفرح الهم، أبتعدت كم خطوه حاسه على دمي
كلارة: ها وين بعد وكت؟
4
وردة: والله عيب أنه أستحي أتسنط بس خذاني الواهس وما گدرت أكمل، لا تتسنطين الهم عيب خلينا نخليهم وحدهم.
كلارة: أنه ما عندي مسلسل رومانسي أتابعه هاي الفتره فـ مخلصتها أركض وراچ و وراه فجر..
5
وردة: شني تركضين وراي ليش أنه الفقيره شمسويه ولچ؟
3
تهز بشفايفها سريع وتباوعلي بطرف عينها
-أيباه منيه هاي الفقيره أنتِ لو غيرچ الشفتها ويَـ حرّ بالمطبخ شفتكم من البدايه للنهايه..
4
فتحت عيوني على وسعهن وطگيتها على چتفها
-بس لچ أسكتي ونچبي، شني هل حچي عيب شوكت شايفتني بالمطبخ أصلاً ولا نحچي هناك!
1
كلارة: هههههههههه غير أنه أتسنط عليكم ليش تچذبين؟ والنوب هسه مسويه روحچ خجوله عمت عيني ولا چنچ ذيچ المسنحه بحضن أخوي لو ما كاضچ يمكن طايحه بالگاع..
9
وردة: أشگد أدب سزز إذا ما طيحت حظچ حيووووانه!
كلارة: لا عيني ما تسكتيني، حاصرچ حرّ يبوس بيچ أنه بهاااااي عيني شفته يبوسچ..
10
وردة: عزا بعينچ شهرتينا أسكتي لچ صوتچ عالي!!!
3
كلارة: لا ما أسكت.
4
خزرتها أريدها تسكت وأتلفت ميته خوف، صوتها عالي حيل كلارة إذا تحمست تخوف تضل تحچي بصوت عالي كلش وتصيح ما متقصده أبد بس شهرتنا دخيل بختها أريد أسكتها ماكو غميتها أدفع بيها وأگرصها علمود تسكت وهِيَّ بعدها مستمره..
1
كلارة: غير بهاي عيني شفتچ تبچين على حرّ تتراجفين خايفه عليه وهوَّ حضنچ.
2
وردة: التصير سالفته بحلگچ يتصخم..
2
تعاركنا وحده تغلط على الثانيه سحتلها لغرفتنا وأجيت الف شالها على رگبتها وأخنگها وهِيَّ تتغامز وتهز بحواجبها تجر بكلماتها
-ها وردة ها
عفتها وطلعت من الغرفه ميته من المستحى أنه حيل أستحي صحيح صلفه وعرمه، بس چا العرمه هم تستحي وعلي متت من المستحى من سمعتها شايفتنا النوب كلارة الصلفه شهرتني وخزتني..
2
لفيت شالي عدل من شفت كل زلم بيتنا ملتمين بالهول كلهم زلم ونسوان گاعدين، أجيت ببداية حديثهم قادر تحمحم وبصوت هادئ مثل العاده سولف وكلها تسمعله
-الحمدلله جسام لگى بنت الحلال التناسبه بت منه وبينا أخت الحرّ وأن شاء الله على بركة الله هذا الأسبوع عقد زواجهم.
1
صار هدوء رهيب بالمكان خصوصًا عد النسوان يخنزرن بعيونهن ويسولفن حچيهن بنظراتهن، يمه يا يمه محاسن أحسها تريد تشرب من دم جسام وهِيَّ تشوفه فرحان ومرتاح أخذ حب حياته ضلو يتباركون الهم بين المن كل گلبهم وبين المن كل حقدهم..
5
صمد: أي عمي على الخير والبركه
بس شالقضيه بويه حرّ ما لگيت غير جسام تناسبه؟
12
حُرّ: شنهي أكو أحسن من جسام حتى ما أناسبه؟
2
صمد: ما أدري شگلك والله يا عمي بس أخيتك خوش مره معدله تستاهلها زلمه خير أبن أصل وأوادم ما لگيت غير جسام أبن العايبه تناسبه بله عمي باچر عگبه من تريد تعاتب تعاتبمن شو حتى أبوه عفطي؟
13
قادر: ما مقبوله منك هاي عمي ثگيله الحچايه!
1
صمد: الصدگ مر يا عمي..
1
حُرّ: والله يا عمي ما تعلمني أنتَ، چثير عدك سوالف مالها لزوم تسولفها ياريت تسكت لو شفت روحك راح تضل تمسلت.
14
صمد: هذا اليريد الكم الخير مو صوچكم والله..
2
جسام: خير ومنك ما مريود.
1
صمد: چا غير تاخذلها واحد أبن أصل وأدمي وعنده أهل!
حُرّ: حچيهم بحر وأفعالهم ما تترس أگلاص.
6
فر أيده صمد متربع ومدنگ صافن وجسام گاعد بصفه التفت عليه بسرعه جراه من أيده يحچي وياه مهامس بس سمعنا صوته
صمد: أنتَ شمالك ما لگيت غير أخت المسودن خريج السجون تاخذها ولك هاي النسوان ضاله، تاخذ فجر أخت حرّ ياهو يناسبه هذا الوادم ما رايده رواحتهم يناسبون خريج سجون؟؟
7
جسام: عمي إذا شقه فـ شقاك ماصخ وإذا صدگ وعلي أگلبها عليك فاتحه شني هتليه أحنى ونسكتلك من تسولف عن عرضنا!
صمد: شمالكم عمي ما تتحاچون ناركم تاكل حطبكم شحاط بجيبي أنه؟
حُرّ: چا ما تسكت، أول مره أشوفلي زلمه بر***!
39
عفتهم وصعدت لفوگ هدومنا باقيه على الحبل، لميتهن كلهن بالسله ومن لمحت هدوم حُرّ أبتسمت وخليت هدومه ويانا أنزلهن الغرفته، التفتت على صوت ضيغم وراي يحاچيني
-وين كلارة؟
-ما أدري والله آخر شي عفتها بالغرفه..
2
هز راسه ونزل لجوه يدور عليها وأنه لميت كل الهدوم وردت أنزل بس نفتح باب وحده من الغرف وصارت عيني بعين وائل لازم يده باب غرفته
-ويامن چنتي تحچين؟
1
-ليش؟
-سمعت صوتچ تسولفين!
-أحچي ويَـ ضيغم.
-مو تبطين الشمس طالعه نزلي جوه..
-عادي مو كلش قويه.
-خدودچ صايرات دم شلون مو قويه؟
2
-لا تعيدها بعد هاي الحچايه وائل!
-ليش أستحيتي؟
-لا.
5
بهت وجهه وطفت الأبتسامه الچانت تارسه وجهه تحمحم ساكت وأنه جريت دشداشتي من الحبل خليتها بالسله التفتت عليه خازرته ونزلت ضايجه منتبهه لسوالف وائل يحاول يفتح وياي سالفه بالگوه وأنه هذا الموضوع مضوجني بحيث مرات حتى ما أرد عليه
تحضيرات عقد فجر كلها حضرناها وياها، لارا وزهراء وخاله آمل واگفات الها وگفه وجهزن الها كلشي حتى جدتها خاتون فرحانه ورغم كبرها بس هواي حضرت أشياء لعقد فجر وجسام نحضر كلشي بفرحه وحماس
+
وأخيرًا أجه يوم العقد گعدنا من الصبح فرحانين ومتحمسين وبنص هاي الفوضى أنتبهت لتوتر فجر ومستحاها من تباوع لروحها بالمرايه وهِيَّ لابسه حجاب وفستان بسيط ردن باللون الأبيض وقطعة الفستان الثانية عبارة عن عباية حلوه مرتبه كل لبستها باللون الأبيض تخبل تفاصيل لبستها كلش بسيطه ومحتشمه وبنفس الوكت حلوه..
صلينا على محمد من شفناها فرحانين بيها، وبلش مهامس النسوان الحيايه بلقيس تگلب بعيونها وتباوع لفجر بأستنقاص
-زرگه تلعب الروح منيلها لحلاه!
4
ميسون: أندري عليمن كتل روحه عليها أشو زرگههه ولونها يسد النفس!
2
محاسن: خيه ندري شمسويه وهيچ باوعلها وهِيَّ تلعب سبع أروح..
2
ضليت صافنه على كلامهن يعني حتى بوكت فرحها يكسرن بخاطرها، أبتسمت فجر بهدوء بدون ولا نقطه ضوجه بينت عليها
-الحمدلله راضيه بالخلقه النطانياها رب العالمين ومقتنعه وفرحانه بيها سماري يخبل ولايگ عليَّ، والقاضي راضي هوَّ عاجبه سماري شني المضوجچن أنتن؟
4
تحچي بكل هدوء، لا ضاجت ولا نقهرت من كلامهن الحمدلله لأن فجر منتبهه الها من زمان حيل تحب سمارها تعشقه وهِيَّ فعلاً سمارها يجنن جذاب وحيل لايگ لملامحها.
حطينا الها كرسي بصف الباب والسيد وراه، هدوء الكل ساكتين منتظرين يسمعون العقد طلب السيد موافقة فجر وجسام وصارو زوج وزوجه أرتفعت أصوات الهلاهل بصوت عالي والأغاني والگولات..
4
أخذناها للكوشه گعدت مستحيه والكل يتباركون الها من ضمنهم جدتها باستها وباركت الها هواي فرحانه ولارا وزهراء ما قصرن بالهلاهل والگولات والوگفه الحلوه، لحد ما سمعنا صوت زهراء تگول للنسوان
-بعد روحي حطن شي على راسچن خل يطب العريس يلبسها الحلقه.
1
نخبصن النسوان كل وحده تحط شالها على راسها ورجليهن طالعات من الفساتين الگصيره بيهن الخلن عبيهن على رجليهن وبيهن عبيهن مو يمهن أصلاً فـ مغطيات روسهن ورجليهن طالعه..
11
وگفت على صفحه مبتسمه من شفته طب مستحي يكت عرگ وتلگنه من الباب خاله آمل وزهراء بالگولات والهوسات وخاتون من مكانها تهلي وترحب بي وفجر مدنگه راسها خجلانه، أول ما وصل يمها باسها براسها وگعد بصفها مبتسم ويهمس الها بحچي ما سمعناه بيناتهم، لارا لازمه الهم الحلقات وهوَّ لبس فجر الحلقه وأكيد الهلاهل بهيچ لحظه أرتفعن وهِيَّ هم لبسته.
صورتهم كلارة للذكرى وأم ضيغم تحچيله گولات والنسوان وياها
+
آمل: تعاي تباركي يا من تحبين
خضر عودنا اليابس من سنين
2
زهراء: بنت عمنا وأختنا تصير چنتنا
وما نريد الغريبه تدوس عتبتنا..
4
آمل: ألف على خير يبنيه يمزيونه
أخذتيلچ سبع من فدوه لعيونه
5
زهراء: وأخوها خير ما يتعب بالحچي وأخوها خير..
گولات وضحكات وفرح وهلاهل لحظات حلوه ما تنسي لأن فرحة فجر وجسام ترست المكان فرحته وتنهيداته وهوَّ يباوعلها ما مصدگ صارت اله يغازلها بعيون متروسه حب، باسها بجبينها وطلع..
تلگوه ولد عمامه وأصدقائه بالحوش ومن ضمهن ضيغم يهوسله
-جسام بطل السرسره وبشاربك صارت مره.
11
ضحكهم بره عالي وهوَّ أسمعه يطگ بضيغم وهذاك مستمر كل شويه يگول گوله أقوى من الگبلها
-زفيناه الچان ملطلط ما يلفي اله بنص الليل.
11
بعد ما سمعت أصواتهم رغم ضلو هواي بره لأن هوسه ونسوان والتهيت بفجر والحمدلله مر العقد على خير ومتأملين العرس يصير بهيچ حلاه وتكمل فرحتهم..
2
صار وكت أمتحاناتي الوزاريه وأني الخوف مسيطر عليَّ بس كلام حُرّ يبرد گلبي ويخليني مرتاحه بتشجيعه من أول يوم أمتحانات لآخر يوم هوَّ ياخذني ويرجعني يبقى منتظرني گدام باب المدرسه لحد ما أخلص أمتحان وأطلع أشوفه منتظرني بكل مره أشوفه أبتسمله من بعيد وأروحله بلهفه مشاعر الدنيا كلها تصير بگلبي وأنه أشوفه عايف كل شغله وحياته وملتهي وياي
وأنه أضغط على روحي علمود أطلع درجات حلوه وعاليه وأنجح لخاطره وتعبه، لأن هواي سولفلي عنه أخواته يحب الدراسه چان رغم تعبه وشغله وهوسة حياته بس مستمر بدراسته وچان حيل شاطر والسجن حرمه من دراسته ما بطل ولا كرها بس نحرم منها..
طلعت بآخر يوم من الأمتحانات علمود أبشره أول ما وصلت للسياره فتحلي الباب من جوه صعدت بصفه والتفتت عليه بحماس
-جاوبت كلششش زين..
-الحمدلله كبد، ذيبه أنتِ أعرفچ گدها.
أبتسمت وهوَّ أشترالي بطل ماي من المحل وحلويات رغم متريگه بس هذني يريدني أكلهن هسه، هوَّ يسوق وأنه أسولفله عن أجوبتي بحماس وشلون سهله وجاوبت وهوَّ يهزلي راسه مبتسم وگال
-أن شاء الله ما ضل وكت چثير وتخلصي سادس ونتزوج.
1
بعد تلث سنين
-لااا شو چثيــرات!
2
-لا منيلهن هواي!
-أنه مفكر تخلصي سادس ونتزوج بس صعبه بعد تلث سنين چثير..
باوعتله بطرف عيني ساكته ومستحيه
من فكرة نصير زوج وزوجه گدام الناس ويسويلي عرس چبير وأخلف وأصير أم صفنت أفكر وهوَّ لاف الستيرن بأيد يباوع لگدام
-أنه أريد خمس فروخ يهــال.
6
-خمسسسسه!
-چا أنه ما عدي أهل أريدچ تسويلي عايله چبيره.
1
-بس خمسه هواي!
-أحسن نصير عايله چبيره شحلاتها، ضلت حسره بگلبي تصير عدي عايله..
2
-عمت عيني
-تدري شريد أسميهم؟
-مقرر أسماهم!
-وره ما تزوجنا فكرت بأسماهم كلهم.
1
-هههههه وشنو أسمائهم الفروخ اليهال؟
-الفضل، عباس، زينب، ريم، غزالة.
13
صفنت عليه أفكر بالأسماء يخبلن كلش عجبني أبتسمت
-وشمدريك نجيب هيچ خلفه؟
-بعد شيجي من رب العالمين هلا بي، بس أنه بنفسي يصير عدي تلث بنات وثنين ولد وهيچ أسمائهم..
1
-تحب البنات؟
-أي والله روحي من الدنيا، يجن بعد تلاثه يصير عدي ست بنات شحلاتهن محليات الدنيا.
1
ضحكت صافنه أفكر صدگ حلو لو هيچ تصير خلفتنا بس لهسه أفكر خمسه هواي، أنه حتى ما مفكره أشگد أخلف بالمستقبل ولا كلشي عن حياتي الجايه ردت أوكله من أكلي بس ما رضى ياكل، وگف السياره بالسوگ والتفت عليَّ دايس بريك
-أنزلي كبد أشتري التردينه طلعه سريعه لأن خلصتي أمتحاناتچ.
1
هزيت راسي مبتسمه ونزلنا أنه وياه أشتريت أشياء قليله لأن فجر كل فتره تروح تشتريلنا كلشي نحتاجه وهوَّ أشترالنا أكل الي ولأخواته وجاب چم شغله شافها لأخواته
قبل لا نرجع للسياره مرينا بأزدحام چبير بي هواي ناس فـ هوَّ خله أيده عليَّ محاوطني بيها مانع زلمه يطخني ضحكت على حركته فرحانه
-تغار؟
-أحترگ.
7
-كلارة: نگلب العقد هذا جحيم علينا، كل ظني فجر راح تعيش مرتاحه بعد ما نجمعت بَـ جسام بس من طلع جسام قبل أيام من البيت بعد ما رد!!
5
ضل يومين بره البيت رايح لغير محافظه عنده شغل والموضوع بسيط دائمًا همَّ يرحون لغير محافظات بشغل بس هاي المره جسام تعدى وكت رجعته وماكو خبر منه..
فجر واگفه تعصر بأيديها مستحيه تريد تروح تحچي لـ حرّ ومستصعبه السالفه لأن مستحيه وبنفس الوكت ميته خوف أول مره جسام هيچ يغيب، حتى لو يغيب يبقى على تواصل ويانا وما تنگطع أخباره هيچ..
طب قادر يحچي ويَـ حرّ بخوف وتوتر
-أگلك خويه شني جسام ما حچه وياك؟
حُرّ: لا والله، من طلع من الناصريه بعد ما حچينا.
قادر: فجر خويه جسام حچه وياچ؟
هزت راسها بقهر لا، وبينت علامات الخوف والرهبه علينا
گال فقار يحاول يهدأ الوضع ويخفف من توترنا وخوفنا على جسام
-أستهدو بالرحمن خل نفتهم يمكن تلفونه عاطل مخلص شحن حتى مو هواي يومين يمكن عنده شغل ما خلاه يخابركم!
1
ضيغم: خويه حتى لو عنده شغل لفوگ راسه يسولف وياي كل مره على الأقل ينطيني خبر، وإذا تلفونه بي شي يخابر من أي تلفون ينطينا خبر ما معقوله فقار!
توتر الجو وكلهم واگفين يسولفون ويتناقشون وكلهم خابرو من تلفوناتهم بس ماكو منه خبر حتى فجر أشگد لحت عليه بالأتصالات وماكو منه خبر مختفي..
طلعو الولد من البيت محتارين ما يعرفون يدورون لو يرحون للمحافظه السافر الها لو شيسوون، وفجر تبچي ومسحونه روحها من القهر وأنه و وردة نهدي بيها بس هِيَّ ميته من الخوف وأحنى مثلها لأن أكيد حياة جسام هسه مو بخير ما دام هيچ صار
گاعدين على نار منتظرين خبر يفرح گلوبنا بس ماكو للأسف اليوم خلص وأحنى مخبوصين ندور عليه حرّ أتصل على هواي من أصدقائه وحاول يلگه ولو خبر عنه ماكو اله آثر ولا حتى عرفو شي واحد عنه، والقهر زاد والخوف الأكبر أنترش من رجعو وگالو
-جسام ماكو مفقود..
فجر حالتها ساءت وتدهورت بس تبچي وعيونها متروسات دموع طول الوكت وحمر ومالها خلگ كلش رغم بقية بيتنا عايشين حياتهم ولا چن جسام ماكو حتى گاطع أبوه بكل عين صلفه عايش حياته الملچومين عليه من أهله قادر وفجر
+
قادر: ولكم شني من أب، أنتَ منين جايبنا من الشارع وما يرف گلبك على أبنك!!!
گاطع: خل يولي كلشي ما بي واحد عاق.
قادر: عاق لأن ما يرضى على الباطل التسويههه؟؟
مفرفح الوكت كله يفتر يدور على جسام، حتى البيت ما يطبله يتراجف وضغطه هابط وفجر يا فجر حالتها تبچي الصخر ضايعه وروحها منتهيه، دورو عليه هواي وبيتنا ليل نار هوسه أول شي سووه گالو يدورون بالناصريه لأن ما يعرفون وين أنفقد بالضبط والنوب يصعدون لغير محافظات يدورون عليه وهذا يتطلب وكت وجهد وتعب بحيث أنتهو وأحنى عدنا معارف هواي ماكو واحد ما سألناه وأستفسرنا الوادم كلها تدور ويانا وماكو..
واحد أفتر على كل المراكز، واحد أنطه أسمه لكل السيطرات، وأحد أفتر على كل المستشفيات، نشرو أسمه الكامل على كل الأمكان المهمه بالمحافظه وما وصلنا خبر.
وفجر تسودنت النوب من يأسو يلگونه بالناصريه، دورو عليه بغير محافظات المحافظه الراح الها وكل محافظه مر عليها وهم نشرو أسمه بكل مكان ودورو بنفسهم عليه وماكو منه خبر يأسنا وكل ما أروح لغرفة فجر أشوفها شلون طريحة فراش وتبچي ليل ونهار عليه أنقهر
عبرت من الهول للحمام تتراجف وعيونها ذبلانات وحمر مبينه هواي باچيه منعدمات من الدموع وبلقيس ومحاسن وميسون گاعدات بالهول أول ما شافنها چن ما صدگن ذبن كل سمهن عليها
بلقيس: يمه يمه منچ عبالك صارلها وياه عشر سنين ولا چن صارله چم يوم من خاطبها راح تموت!
ميسون: يمه الحمدلله ما خذتها لأبني چا فگرته.
محاسن: حوبتي هاي طلعت بي وما خلته يتنهى..
حچايات سم طلعن على فجر وحده وره الثانيه تطلع سمها وهِيَّ ميته من القهر بالگوه واگفه على رجليها التفتت عليهن عيونها حمر وزمخت
-عساچن بحرگه گلبي وازيد.
طبت للغرفه حتى ما راحت وحالتها زادت سوء وكل ما يمر يوم نفقد الآمل وماكو خبر عن جسام وهِيَّ تتدهور بالزايد أول ما واحد يطب لغرفتها تفز
-ها ماكو خبر عن جسام؟
هب الحنين الماله رداد
وعليك الشـوگ أكثر من أمس زاد..
+
يوم وره يوم تتمرض فجر على فراگ جسام، والبحث مستمر وجسام مفقود..
"في مكان آخــر"..
هدوء الليل وظلامه يحبس الأنفاس طلعت أمشي على أطراف أصابعي خايفه وأتلفت لا يشوفني ويرجع يعاقبني مثل كل مره، فتحت الباب القديم المزنجر طلع صوت قوي مزعج توترت وأحس بالعرگ بدأ ينزل من جبيني
-موج!
6
التفتت شاهگه وفاتحه عيوني على وسعهن، هديت الباب من أيدي من شفته وراي واگف والبيت أغلبيته أظلم ما مبين من ملامح وجهه الطافيه والباهته بس عيونه الخابطات حمر رجعت لوره بخوف
-وين رايحه؟
هزيت راسي أبلع بريگي بخوف نبرة صوته ما تطمن
-لا لا ما طالعه أجيت أسد الباب..
أبتسم أبتسامة شر وهز راسه ما مقتنع وماخذني على گد عقلي أكثر شي يخوفني بهاي الدنيا أبقى وياه بنفس المكان يتعاطى المُخدرات ومو بوعيه تصرفاته تخوف وغريبه بسرعه حاولت أروح لغرفتي بس وگف گدامي وضربني راشدي شمرني بالگاع!
وجهي أحس نار أشتعلت بي، وهوَّ يصرخ بصوت عالي غير مُبالي بالنايمين بالبيت يصيح يصيح لحد ما أختفى صوته من الصياح وأنه أرجع لوره بخوف لحد ما طخ ظهري بالحايط الوراي ورافعه عيوني أباوعله أتراجف..
طلعت أمي من غرفتها فازه ولامه أخوي الصغير وأختي بحضنها لأن يبچون بسبب صياح أبوي وتكسيره حتى الأطفال من گد ما متعودين على صياحه وراه مصيبه بقو يبچون خايفين وأمي تتوسل بي
-كافي فدوه أروحلك كافي شهرتنا أسكت!
التفت عليها ما چن گدامه أمي چن شياطين، ضربها بكل قوته وأخواني صرخو لأن جنز أمي كل ضربه يضربها الها تموت من الوجع كتلني أنه وياها، يضربنا ضرب عدو ما چن أحنى من أهل بيته ما أدري الگاع نترست بدمي لو بدم أمي..
لحد ما طاح من طوله بالصاله فاقد هوَّ كل ما يتعاطى مخدرات تصير بي قوه عجيبه غريبه، بحيث لو يتعاونون عليه زلم ثنين ما يگدرون يكضونه ومن ما يتعاطه يصير أنسان هش ضعيف الى أبعد الحدود، بحيث إذا أني أدفعه لوره يوگع من طوله، بس ما أگدر أرفع أيدي حتى بوجهه لأن بالأخير يبقى أبوي وتخوف فكرة تضرب أبوك وتصير عاق.
من نام وراح لغير عالم يفقد إذا ينام بعد ما يحس لو يصير رمي جوه راسه، أمي جرت أخواني اليصرخون بالگاع ويبچون والدموع تتطافر من عيونهم وأخذتهم للغرفه تريد تنومهم وبصوت مبحوح گالت
-روحي لغرفتچ نامي.
ضحكت بأستهزاء وأني بنص دمي، أمي تعاملت ويَـ الموضوع بكل سلاسه عبالك الموضوع عادي ويصير يوميه ويانا وهوَّ فعلاً هذا جزء من روتين حياتنا، ما سويت كل غلط بس هوَّ يطلع عليَّ تهم باطله..
+
بچيت هواي بقهر أباوع للسگف نفس التساؤلات ينعادن ببالي يوميه ليش أني هيچ حياتي، وليش أني ما عندي شي ولو شي واحد حلو بهاي الدنيا يصبرني، ليش أني مو مثل البنات أبوي بهذا المنظر المخزي البنات يتباهون بأبائهم عزوه وسند اله أني أستحي من سوالفه وتصرفاته دربه أعوج وكل شي يسويه يغضب رب العالمين
1
تنهدت وگمت أجر بروحي للغرفه أحنى بيتنا أيجار وصغير كلش بحيث يخنگ غرفتين وصاله صغير وحمام، أني وأخواني ننام بنفس الغرفه أباوع لأمي تبچي بخنسه..
تمددت على فراشي وغفيت، بدون ما أحس بالوجع لأن يوميه أني أنكتل مو شي جديد متعود جسمي على الكتل گعدت من وكت على صوت أمي تگعد بيَّ بهدوء
-گومي ماما خالتچ وأولادها وبناتها عدنا.
گمت من مكاني رحت سبحت ولبست تراك طويل وحتى چف أيدي عليه كدمات بقية الكدمات گدرت أخفيهن بس هذني ما گدرت ضليت أضم بأيديَّ مستحيه ما أريد يشوفوني شلون متشوهه من الكتل رغم الكل يعرفون بمعاملة أبوي وشنو هوَّ والكل ما يحچون ويانا ويحسسونه أحنى فد شي مريب محد لازم يتقربله..
سلمت عليهم كلهم وصلت لـ قيصر أبن خالتي أبتسمتله من شفته يبتسملي
-شلونچ موج؟
-الحمدلله بخير أنتَ شلونك؟
-حالي ممتاز، شبيها عينچ؟
صفنت بوجهه وهوَّ مركز على عيوني دنگت وطلعت من يمهم رحت غسلت وجهي، وأسمع صوت خالتي تعاتب أمي من الصاله گدام ولدها وبناتها
-ليش هيچ يا غُفران ليش راضيه وگاعده؟
-يا ريت والله يا داده يا ريت لو أگدر أعوفه بس شوفة عينچ لا أم ولا أبو عندي، والأخوان ما بيهم خير..
تنهدت خالتي مقهوره وطگت فخذها بحسره، الوحيده من بيت أخوالي تحبنه وتريدنا والبقيه متعاركين ويَـ أمي حتى ما يردونها وأبوي هذا حاله صارله سنين ما يصحى ولا رجع طبيعي يوميه يتعاطى نوع مخدرات جديد بحيث من گد ما يجيبهن للبيت حفظت حتى أسمائهن
شفت بالصاله على جهه بالزاويه علاگه أعرفها هاي اله بسرعه رحت أخذتها وطلعت بدون ما أباوعلهم رحت للغرفه مالتي وفتحتها متروسه مخدرات وأنبولات تنهدت مقهوره وعفتهن على صفحه لأن هسه إذا ألعب بيهن لو أذبهن يمكن إذا يكتلني موت قليل..
رحت أحضر الغده ويَـ أمي وصبيناه وكلنا گعدنا ناكل ود بت خالتي بأيدها أسوارات ذهب أمي أبتسمت بلطف تباوعلها
-بالعافيه خاله مشتريتهن جديد؟
-أي خاله بابا جابهن الي بالجديد هدية نجاحي.
+
دنگت عيني أبلع بلگمتي من باوعتلي ود بطرف عينها بنظره متروسه غرور وأمي تباوعلي متحسره عليَّ ومقهوره بس الأيد گصيره والعين بصيره، لميت السفره وغسلت المواعين وأجه الليل وكلنا ملتمين بالصاله سوالف وضحك وطلع أبوي من غرفة أمي هسه أنتبهت هوَّ چان نايم بالصاله أكيد أمي أخذته للغرفه علمود تستقبل خالتي هنا..
طلع من شافهم باوعلهم بطرف عينه
ومشى لبره يغسل بدون سلام شويه وأسمع صوته يصيحني
-موج.
بلعت ريگ ورحت وراه لگيته مدنگ يغسل بالمغسله
-شوفي هذيچ المره شتسوي هناك.
بأصابعه أشرلي على مكان أظلم ببيتنا
بلعت ريگ خايفه والتفتت عليه ضحكت بخوف
-يا مره؟
-ما أدري وجها ما مبين هناك واگفه منيه هاي؟
-ما أعرف بابا!
-شوفيها شنو تريد؟
يحچي مستغرب بعصبيه وضياع هوَّ ما يعرف ماكو شي هناك مجرد هلوسات وتخيلات يتخيلهن عقله بسبب كثرة الأدمان..
مسحت وجهي وبلعت ريگ متوتره
-أني راح أدخل لجوه تريد شي؟
-خالتچ أشگد تضل عدنا؟
-ما أعرف والله.
-إذا تتأخر أطردها.
-ليش خليهم أني أتونس وياهم!
-أنعل أبوكم كلكم..
غلست دخلت للصاله ساكته وهادئه خالتي عگدت حاجبها
-شيريد منچ أبوچ؟
-سألني على الصابون يريدله صابونه.
-ها الحمدلله عبالي يريد يضربچ..
سكتت وگعدت التفتت على قيصر يباوعلي أبتسملي من شافني أباوعله تنهدت دايره وجهي، أكثر من مره أشوفه يباوعلي ويعاملني معامله حلوه تقربت عليَّ لينا بنت خالتي مبتسمه لزمت چف أيدي تلعب بأصابعي وتسولف وياي بصوت ناصي بس أنه أسمعه
-لا تنقهرين كلشي يجي فتره ويعدي..
-الحمدلله على كل حال.
-أنتِ مؤمنه، وأكيد بيوم من الأيام رب العالمين راح يعوضچ..
أبتسمت الها دائمًا تطبطب عليَّ بكلامها وتشجيعها الي بس هِيَّ تعرف وأني أعرف ما راح ينتهي هذا العذاب، لأن من المدرسه هوَّ مبطلني ومستحيل أتزوج لأن منبوذه والعالم كلها تحچي علينا بسبب أبوي يا عاقل يناسبه؟
نامو هاي الليله يمنا بيت خالتي چانت رايده تبقى أكثر وأنه أتمنى لأن لينا الوحيده صديقتي والمقربه الي أتونس بالسوالف وياها بس راحو من الصبح لأن خالتي أنغثت من أبوي ساعات ما گدرت تتحمله وأحنى متحملينه سنين وساكتين..
گاعده أوكل بأخوي الصغير بالليل وأنتبهت لأختي ما موجوده گمت بسرعه أدور عليها شهگت من دخلت لغرفة أهلي وشفتها تبحوش بعلاگه وأجت تخلي حبايه بحلگها صرخت وجريتها من الگاع مغمضه عيوني بخوف وما أسمع بس صوت بچيها
التفتت عليها أرجف خليتها بالگاع أصيح
-ليشششششش تشربييييين الحبووووب هذااااا؟؟؟
صفنت بوجهي بخوف
-ما شربت ما شربت..
مسحت جبيني وزفرت نفس لميت العلاگه بأيدين ترجف وشمرتها فوگ الكنتور، يعني لو ما شفتها أني حطت بحلگها حبوب مخدرات هوَّ عنده كل أنواع الحبوب، والشم، وبعد هواااايه أنواع
نزلن دموعي أبچي بقهر يعني لو هاي الطفله شاربتها ياخي شنو من أب مهمل وما يفكر، دخل للغرفه وما لمح العلاگه فك عيونه على كبرهم وصاير ضعيف كلش كلش من گد التعاطي صاير هيكل عظمي ركض عليَّ يضرب بيَّ
-ويييين وديتيههههههن بت الكلب؟؟؟
بسرعه أشرتله على الكنتور أتراجف
-هناك هناااك، رفعتهن من الگاع لأن زمرد أجت تخلي حبايه بحلگها!
سكت عني وركض للكنتور يجر بيهن خايف على المخدرات أكثر ما خايف على بنته، تنهدت وطلعت من الغرفه للساحه مال البيت مختنگه وأنتبهت لأنبولة المخدرات واگعه بالگاع بصف المغسله بسرعه أخذتها من الگاع صافنه عليها رحت شمرتها بالزباله ورحت للمغسله فركت أيديَّ خايفه لأن الأنبوله أستعمالها يخلون بيها مخدرات..
مرت الأيام بطيئه وأني گعدت أباوع للسما بالليل وأيدي جوه خدي، أسمع صوته يفتر بالبيت ويخابر هواي وبنص مخابراته توسل علمود المتصل ينطيه مخدرات لأن خلصن العنده بس المتصل رافض لأن أبوي ما عنده فلوس بعد وما يرضى ينطيه اله فلوس..
شويه وهدئ ضل ما يخابر وطلع من البيت بَـ ٢ بالليل بلعت ريگ بخوف وفتحت باب البيت وراه أباوعله بس أريد أشوف وين رايح بهل وكت وأنتبهتله ما طالع من الفرع حتى صفنت من شفته گعد يم حاوية الزبل مدنگ ينبش بالتراب بثنين أيديه!!
أحس گلبي نمرد مرد وأني أشوف هذا حال أبوي، الشارع يصوصي الوادم كلهم ببيوتهم بس هوَّ يبحوش يم الزباله هذا لحد ما لگه مخدرات مدفونه دافنها جيرانه أبو المخدرات اليبيع لأبوي يم الحاويه علمود ياخذها بدون شبهات..
نفجرت بالبواچي بسرعه دخلت للغرفه ركض خاف يشوفني وهم يضربني، بس منظره هشم گلبي وخلاني بذل دوم ما مرفوعه راس كل ما أتذكر منظره وهوَّ ذل روحه زلمه چبير بشيباته يحفر بالگاع علمود المخدرات!!
حياة بطيئه وبأسه متروسه حزن، يوميه أتمنى الموت ويومي ينعاد نفس الشي ضرب وأهانه وجوع وحرمان بسبب الفقر حالتنا الماديه مو زينه ومحد يريدنا بالمنطقه لأن أبوي يسوي مشاكل وهم الناس يخافون من عنده..
+
الليل كله ما أنامه أني بس أفتر بالبيت لأن مو بوعيه أخاف منه على ليله يجي يكتلنا كلنا باقيه بقلق على نفسي وأخواني وأمي، محرومه حتى من نومة الليل
سمعت صوته يصيحني التفتت عليه بتردد وخوف، أباوعله من بعيد واگف باب الصاله عيونه حمر كل ظني نايم فجأه أشوفه گدامي
تعالي بابا.
+
مشيت خطواتي بتردد وخوف وكل شويه تتردد بالي راح يكتلني، راح أموت لحد ما وصلت لباب الصاله تمنيت ما واصله ولا عرفت ليش صاحني، تمنيت كاتلني ولا الشي السواه وياي...
4
-كلارة: الوضع متوتر ببيتنا ضيغم ما يرجع للبيت أبد ولا أشوف خلقته وحتى أخوي حُرّ وبقية ولدنا، وفجر يوم بعد يوم حالتها تسوء أكثر وتتمرض بالزايد
تنهدت مقهوره وطب ضيغم للبيت بوحده حچالنا خبر طيح فجر من طولها، تمنيت جسام باقي مفقود ولا سمعنا الشي الصار وياه...
15
يتبـــع..
