رواية مقبرة الاحياء الفصل الخامس والعشرين 25 بقلم سارة جعفر
مقبرة الأحياء
خاف أموت ولسه ما طايبلي خاطر!
وخاف أموت وجبت عمري شامر أحلامي على باچر..
-كلارة: ضليت بحالة صدمه أتلفت بالمكان لا وردة ولا حتى فجر موجودات هنا، گمت بسرعه من فراشي فتحت الباب وطلعت صار گدامي حُرّ يلبس بفانيتله وهوَّ يطلع من الهول لبره مستعجل..
وأنه طلعت وراه للحوش شفت وردة وفجر ثنينهن واگفات بالحوش وبيتنا كلهم ضلو يطلعون من غرفهم مصدومين واحد يسولف ويَـ الثاني مستغربين ويسولفون على الجاي يصير!
فتح حرّ باب الحوش وطلعو وراه الزلم لبره ومحاسن لطمت خدها بقوه
-يمه هذا صوت بلال من بيناتهم!
صوفر وجها ونگلب من الخوف لأن متأكده الجاي مو هين على أبنها، ما تحملت أكتم فضولي من سمعت أصوات الزلم بره صارت عاليه وهوسه تقربت على ثقب بالباب أباوع منه و وردة بصفي متوتره وكل شويه تگلي
-ها ولچ شجاي يصير!
صفنت مستغربه أستوعب، بلال بالسياره وياه ولد أعرفه من ديرتنا وبعد ثنين ولد گاعدين بالسياره وره ما أعرفهم وأعتقد حتى مو منا همَّ، جسام جر بلال صلخه راجدي وعيونه تنگط شرار على منظر أخوه!
جاي للبيت سكران، ولام شلة السكاره أصدقائه وگاعدين بالسياره بباب بيتنا وبطالة العرگ بأيدهم وعالگين الأغاني على أعلى شي وصوت مسجل السياره عالي فـ أكيد الجوارين سمعو وصارت فضيحه تخزي حُرّ نزلهم من السياره واحد واحد يكفخ بيهم راجديات بحرگة گلب ولدنا كلهم شخطو وعقل ما ضل بروسهم..
جسام جر بلال للبيت لجوه طببه وبلال مدنگ يروح منا ويرد منا وجسام كل ما شاف بلال يريد يطيح يكفخه راجدي يصحيه ويفززه
-أبن الچلب شلون يروط چنه قندره!
بسرعه وخرت عن الباب وجسام طب للبيت دفعه لجوه شمره بالگاع وطبو كل زلمنا، الحوش أنترس وبلال على الگاع مو صاحي وضيغم ضل بره طرد أصدقاء بلال كلهم ومحاسن تخبلت راحت على أبنها مفرفحه
-يممممه أبني يمممه
جراها گاطع حاط أصبعه على حلگه بعصبيه
-أشش، أسكتي أبنچ صخم وجهي وخزاني گدام الوادم.
التفت على صوت جسام اليصيح
-چااا غيررر هاي تربيتك الخايسه، شلون تربيه زفره مربيه جاي للبيت سكران الناقص وجايب شلة العرگچيه وياه خايب غير اليوم أگطعه وذر..
ومحاسن بنصهم تصيح وتأشر بأيدها
-مو حگك كل حگ ما الك!

جسام متخبل وهاي زادت حطب على النار
-مو حگي شني؟ مو أنه باچر عگبه أتعير بي جايبتلي أخو مطي وناقص غيره وكل خير ما بي!!
گاطع: نچب لا تضل تحچي عليه أحسن منك هوَّ تروحله فدوه، ماكو زلمه ما شرب والنوب يعقل..
حُرّ: عفيه بيت ولا واحد بي مو أرعن.
صمد: هسه والله دوختونا ياخي أنتَ ما تربي خلفتك شني أحنى مبتلين بيكم يا گاطع؟
حُرّ: غراب يگل لغراب وجهك اسود.
خزره صمد ساكت، وجسام صاير نار تخبل شني بلال يرد للبيت شارب ويتطوطح چنه أرعن ومحاسن وگاطع يحچون عليه ولعبو لعب شلون يحچي ويَـ بلال المدلل مالتهم وأبنهم الأحسن من جسام حسب كلامهم، بشنو ما ندري يمكن بصخام الوجه..
حُرّ طگ أصبع وآشر براسه لجوه يباوع لجسام
-طب ناوشني ماي وثلج اليوم أخليه يتفل سنون.
محاسن خافت على بلال حيل، وگاطع كل ما يريد يتدخل يمنعه صمد جسام بسرعه طب لجوه يجيب الوصاه بي حرّ وهوَّ تصرفن ولأن هوَّ چبير ولد عمامي فـ محد بيهم وگفه أو وگف بدربه..
فُقار: حرّ خله يولي هسه ينام وباچر شتسوي بي حيل وأبو زايد هسه حتى ما يحس مو واعي!
حُرّ: چا الله المن أريد الثلج؟ أريد أچتله وهوَّ واعي.
قادر: بعد أيدي والله خل يتأدب الأدب سزز هذا طلع عن الدرب..
گاطع: صرتو نزييهين براسه!
قادر: مع الأسف أنتَ أبوي شأگدر أسولف وياك؟
جسام جاب الماي والثلج بداه كله على راس بلال الضل يشهگ بالنفس لأن الماي طب بعيونه وخشمه وضل يمسح بوجهه بس جسام جاب هواي ماي وثلج وصحه بلال وشمر السوط لـ حُرّ بلال أول ما شاف السوط جفل وبمكانه جمد..
جلده جلد صحاه على زمانه وكلهم يأيدون حُرّ لأن تخزينا بين الديره الأغاني فززت حتى الموته، وسكاره وصخام بوجه بلال كلهم ما رضو لأن بالأخير هاي سمعتهم وراح تصير عليهم نظره مو حلوه من الناس لحد ما جنزه وخلاه بالحوش مثل الچلب.
ما نمنا هاي الليله الفجر كلمن طلع الشغله بس محاسن تبچي على أبنها وما راضيه لأن طگوه وهوَّ سكران!
-وردة: گاعده على رحلتي بخمول وملل يوم خميس ونهاية دوام ضل درس واحد وينتهي الدوام صارلي أسابيع أداوم ثالث متوسط والحمدلله دراستي مشت بهدوء وراحه لأن نشغلت بيها هواي من المدرسه للغرفه ومن الغرفه للمدرسه
ردت أبتعد عن حُرّ والتهي بدراستي وفعلاً أبتعدت عنه وصرنا شُبه ما نحچي، هوَّ يشوفني ملتهيه بدراستي فـ ما يحب يشغلني وكل مره نفس الحديث يدور بيناتنا مرات يوميه ومرات بين أيام..
-شلونچ
-الحمدلله
-دراستچ شلونها
-زينه.
نفس الكلام يتكرر، لا نسولف ولا نلتقي مبتعدين عن بعض، وهذا الشي ريحني مو بس أبتعادي عنه، أبتعادي عن البيت كله أرتاحيت من ضليت ما أشوف شجاي يصير ولا حتى يلحگون يسمموني لأن لو نايمه لو أدرس لو بالمدرسه..
لا عندي علاقة صداقه ولا علاقة كره، محد يعرف شخصيتي ما مختلطه وما مقويه علاقتي بالبنات كل وكتي راسي بكتابي أراجع دروسي عندي شغف كلش چبير بالدراسه وجاي أحصل ثمرة تعبي الحمدلله المدرسات كلهن يحبني وزينات وياي حيل، درجاتي كامله وهنَّ دائمًا يحچن بيَّ ويمدحني
بقى آخر درس عدنا درس رياضيات، رحلتي الأولى بصف الباب وبصفي بنات ثنين فاطمه وحنين لا أنه أطيقهن ولا هنَّ يطيقني بس بنفس الرحله گاعدين، بنات حيل مستفزات ومو مؤدبات مستواهن نص ونص، يغشن ويتعاركن أربعه وعشرين ساعه يسون مشاكل..
تقربت حنين دفعت جنطتي
-دوخريها شلون نطب للرحله؟
جريت جنطتي من الگاع أنكثها من التراب
-لا تشمرينها مره ثانيه وأطلبي بأدب.
ضحكت تباوع لفاطمه يتمضحكن بضحكه مستفزه
-وشنو تخوفيني؟
باوعتلها بأستنقاص ونطقت بهدوء
-لا أتعارك ولا أحب المشاكل وسوالف المزعطه هاي مو يمي أثگلي وتأدبي وياي، وإذا ما تأدبتي باب المديره مفتوح أروح أشتكي عليچ وأنتِ عندچ علم مدريتنا شلون صارمه، هاي آخر مره تسولفين وياي بهذا الأسلوب صارلچ فتره وأنه مغلسه..
سكتت تگلب بعيونها وتتأفأف ضايجه گاعدين بالرحله هِيَّ تريد تاكلني نظراتها متروسات حقد وأنه ما أباوعلها حتى ما أنطيتها أهميه، طبت مدرسة الرياضيات بأيدها كتاب وتلفونها وقلم صبوره حطتهن على رحلتنا سلمت وبلش الدرس..
17
گعدت المدرسه بآخر رحله تصحح دفارتنا قبل لا ينتهي الدرس لأن ضل وكت قليل ونرجع لبيوتنا صاحتني يمها تحچي وياي
-روحي لـ ست دلال گليلها تنتظرني لا تطلع، أروح وياها الخط مالتي ما يجيني.
20
هزيت راسي وطلعت من الصف نزلت للأداره سولفت الست دلال ورجعت هستوني وصلت للرحله دگ الجرس، تقربت مدرسة الرياضيات تريد تأخذ غراضها لگت تلفونها مختفي بسرعه قفلت الباب والتفتت علينا
-تلفوني ما هوَّ العدها التلفون خلي تطلعه!
57
أستغربت لأن منو تاخذه مثلاً؟
ضليت گاعده برحلتي أباوع على الوضعيه، باوعتلي المدرسه
-وردة روحي لـ ست دلال خل تتصل على تلفوني.
5
طلعت من الصف حچيت لـ ست دلال، المدرسه تريد التلفون يدگ بجنطة البايگته بس طول الوكت أنه أفكر محد ماخذته أعتقد طايح بمكان رجعت للصف بعدني ما گاعده برحتلي ودگ التلفون بجنطتي!!
33
تخشبت بمكاني رجليَّ ثبتن بالگاع مثل الحديد بعد ما گدرت أتحرك، رفعت راسي على ضحك الطالبات بالصف يباوعن عليَّ صوت ضحكهن ترس الصف، وأكو مدرسات أجن للصف صفنن عليَّ وطالبات من غير مراحل جايات لأخواتهن وصار الضحك بفلس وأنه بس صافنه!
13
نزلن دموعي مقهوره تمنيت الگاع تنشگ وتبلعني على هذا الموقف أنه أستنكف من العود عد غيري مو النوب أبوگ تلفون، نفسي عزيزه ما تدني على كنوز الدنيا، حچيت بغصه وقهر بالگوه طلع صوتي من البچي
-والله العظيم ما أخذته، والله ما أخذت التلفون!
9
أكو مدرسات ضلن يرزلن بيَّ وأنه أحلف وأبچي ما ماخذته مفرفحه وأحلف بس محد صدگني غير مدرسة الرياضيات المسحت على ظهري وبهدوء گالت
-كافي لا تبچين أدري بيچ ما ماخذته.
54
بس شيفيد بعد كلهن يضحكن عليَّ والمدرسات يرزلن بيَّ متت من القهر والبچي، خلن الطالبات يطلعن وأنه أخذت جنطتي وطلعت من المدرسه، الدنيا طالعه من عيني دموعي ما وگفن الموقف هد حيلي خلاني أكره الدنيا..
8
أول ما صعدت بالسياره السايق ضل يصيح
-صدگ چذب شعدچ هلگد بطيتي، شتلتيني هنا ما تستحين والله إذا نعادت بعد أعوفچ وأروح.
هوَّ يحچي وأنه ساكته مالي خلگ حتى أجاوبه بس أبچي هوَّ حقه لأن كلش تأخرت والبنات اللي بالخط أخرتهن وياي بس شبيدي، من شافني أبچي ضلن يتبسبسن بيناتهن عليَّ ويباوعلي متت من القهر وتمنيت بس أوصل للبيت
2
كرهت الدنيا بهذا الموقف، ما أمد أيدي أنه وما ماخذه من واحد صرت بموقف كلش صعب، عيوني طول الدرب ما سكتن دموعي ينزلن وبالگوه كاتمه شهگتي لحد ما وصلت للبيت أنه ما أشوف دربي من الدموع..
1
-كلارة: گاعدين أنه وفجر وحُرّ، طبعًا حُرّ من عقد على وردة صار ياخذ راحته من يطب للغرفه عادي بينما قبل لا يعقد عليها أبد ما يجي لهنا وبين الكلام محتارين فجر وحُرّ بَـ وردة لأن منتبهين نفسيتها صايره حيل تعبانه ومالها خلگ راسها بكتابها متانين جيتها لأن هيچ وكت هِيَّ تجي..
4
نفتح الباب وطبت، أختفت ضحكتنا من وجوهنا من شفناها عيونها صايرات دم وحيل حمر چن باچيه هواي، جراها حُرّ من زندها
-شمالچ غزالة؟
15
عيونه متانيه جوابها بلهفه دارت وجها منه مغمضه عيونها نزلن دموعها بقهر وأنه وفجر تقربنا عليها تلاثتنا ميتين من القلق عليها وصافنين على حالها بتوتر وخوف!
حُرّ: شمالچ ما تسولفي؟
فجر: طالبه وياچ مضوجتچ؟
كلارة: خاف مدرسه متعاركه وياها!
حُرّ: غزالة سولفي خل أفتهم شجرآلچ!
11
دنگت عينها مستحيه وتبچي، ما نطقت بس تناشغ وعيونها تصب بدموعها صفنت عليها وحُرّ نمردت روحه جراها بثنين أيديه گدامه يباوعلها
-وردة ياهو غاثچ؟
13
رفعت چف أيدها تمسح بدموعها ويرجعن ينزلن
دارت وجها منه أكثر من مره يكضها وتلفت أيدها من أيده لو يدورها عليه توخر منه ومن يحاچيها ما تردله، فكرت لأن أحنى موجودات تستحي منه جراها لحضنه يمسح بدموعها من وجها يسولف وياها بلهفه
-شمزعلچ يبعد الروح سولفيلي؟
125
ما ترد بس بچيها يزيد جرتها فجر لحضنها ثنينهم يسولفون وياها ما ترضى تحچي غطت وجها بثنين أيديها والغصه تارسه صدرها
-أنتم حالكم حالهم راح تصدگون..
9
جر أيدها حُرّ من وجها خازرها
-سولفي وردة؟
5
گاعد على أعصابه يريد يسمع منها السالفه لأن عرفناها چبيره وناس وخبصه بلعت ريگ دنگت عينها خجلانه وتطگطگ بأصابعها سردت النا الصار وياها بالمدرسه بالتفصيل وأحنى مركزين وياها بچت أكثر من سولفت مقهوره وخجلانه من الصار
رفعت عينها تباوعلنا بخوف
-لا تصدگون والله العظيم أنه ما أسويها ولا حتى باوعت لتلفونها والله نفسي ما تدني الله شاهد عليَّ، أشگد بررت هناك محد صدگني شنو أسوي بالتلفون أبوگه والله ما بگته..
7
غميچــه السالفه المهضـوم راعيها.
59
جرتها فجر لحضنها
عيونها متروسات دموع بس متماسكه وما بچت حضنتها تسولف وياها
-ولچ يرحلچ فدوه طيح الله حظهن على هاي التربيه الزفره تلگين وحده تكرهچ هناك مركبه هاي التهمه براسچ.
1
حُرّ جراها من حضن فجر ما يشوف معمي على عيونه من العصبيه
-گومي وياي خل نولي للمدرسه القندره، أحط النعال بحلوگهن بت خير أنتِ عايزتلهن أفصم ظهره اليحچي عليچ وستر زينب.
76
نزلت أيده منها تحچي بهدوء
-خلص الدوام محد بالمدرسه هسه، واليوم خميس يعني بعد يومين يله يلبش الدوام..
وره ما كملت كلامها دخلت بنوبة بچي طويله متروسه حزن عيونها وميته من القهر، حاولنا أنه وفجر نخفف عنها بالكلام بس ما فاد مبين ملچوم گلبها وحُرّ مفرفح من القهر ومحروگ گلبه
1
-چا ما يجي الأحد، يجي وأريد أفتهم القندره بت الستين قندره يا هي هاي الحطت التلفون بجنطتچ!
21
مسحت دموعها مقهوره ومأيسه
-ما أدري يا هِيَّ ما شفت وحده شاكه بيها.
1
كلارة: تذكري زين، ترى أكو بنات حقارتهن تخوف..
4
فجر: يمكن أكو وحده متعاركه وياها وتكرهچ؟
وردة: أنه هناك ما متعاركه بس ويَـ الگاعده وياهن..
حُرّ: چا هاي هِيَّ مبينه هنَّ.
4
وردة: لا نظلم بختنا ونسيء الظن، أنه ما شفتهن بعيني صحيح هنَّ حيل خبيثات وحقيرات بأكثر من موقف وياي بس بهذا الموقف ما شفتهن أبد كاضات جنطتي..
10
طگاها بخفه على راسها يخزرها
-أكيد ما يخلنه گدام عينچ بجنطتچ يالمهبوله، وين أكو واحد يسويلك مصيبه گدام عينك!
21
وردة: أنتَ تروح وياي الأحد؟
9
حُرّ: أروح وأگلب المدرسه على روسهن وروس الخلفوهن ما مودين بناتنا علمود يبچنهن ويسونهن بواگات شنهي عايزتلهن أنتِ خيرچ يغطيهن.
27
وردة: ما أريد أداوم بعد..
4
فجر: نچبي تثبتين التهمه عليچ ليش!
وردة: أستحي شايفه شلون راح يشيبن راسي؟
حُرّ: شحدهن، أنه أحچي ويَـ المديره، القندره التفك حلگها وياچ أسويلهم طلابه الها أول ما الها تالي..
7
كلارة: أي عفيه بأخوي عفيه، روح وراها وخل يخافن يگولن وراها ظهر ما نگدر نكفخ عليها بكيفنا.
16
حُرّ: حريمه جوه التراب أنه اله واحد يطخها..
30
سكتت وردة تمسح بدموعها مقهوره شمرت الشال والغراض كلهن على صفحه ومدت فراشها جرت حسره فجر تباوع عليها
-راح تنامين بدون أكل!
ردت بصوت مبحوح يرجف
-ما أشتهي.
+
حُرّ: مو حلوه منچ هاي غزالة، شي ما مسويته عليمن راحت روحچ وتدهورت حالتچ هاي بدل ما تحطي أصابعچ بنص عيونهن وتنعلي والديهن؟
وردة: تعبت وين ما أولي بهل دنيا الغبره تطيح المصايب على راسي مو بت فگر..
26
ما خلتنا حتى نرد الها بسرعه نامت وغطت راسها بمعنى ما تريد أصلاً نقاش وياها، من شفناها هيچ تعبانه ومالها خلگ خليناها على راحتها علمود بغير وكت نسولف وياها الموضوع حيل آثر عليها وعلى نفسيتها
2
أنتبهت بآخر فتره إيناس حيل ضلت تتودد الحُرّ بشكل كلش ألحاحي، بس حُرّ كالعاده ما ينطي عين غير لغزالته يمها تضيع كل أعلومه وأحس صدگ تطلع مشاعره وأحاسيسه بس يم غيرها حجر وجلمود ما يرف گلبه غير على أم عيون الريم..
112
ضل بالي وياها وتركيزي كله عليها، طول الوكت تتعمد ما تخلي وردة تنجمع بَـ حُرّ، وردة دائمًا من يغيب حُرّ فترات بره البيت ويجي تصبله فجر عشى أو غده يكون البيت فارغ وكلهم بغرفهم فـ تگعد يمه وردة ويسولفون بس بآخر فتره إيناس وحنان كل ما يشوفن حُرّ و وردة بمكان لازم يگعدن بهذا المكان كأنما يخربن عليهم!
12
وبنفس الوكت تسولف ويَـ أختها ويشغلن التلفزيون عود يعني الوضع طبيعي وأحنى ما جايين علمودكم گاعدين بالهول سوى نسولف، حُرّ ما منتبه لهاي الحركات كلهن لأن لو منتبه ما يسكت بس هوَّ حيل مشغول بوردته التغيرت وذبلت حيل..
9
ملت وردة لأن تدري حُرّ قليل يرجع للبيت وتستغل هذا الوكت القليل تبقى وياه ويجن إيناس وأختها يخربن عليها الگعده وتضل مقيده ومستحيه لأن تدري بيهن يتسنطن الها وهِيَّ مناه تعبانه فـ ملت وضلت من تشوفهن بالمكان تلعب روحها منه وتطلع.
-وردة: بأيدي كتابي متربعه بصف فجر بس هِيَّ منزعجه وأحس بيها شي هاي الفتره؟؟
بلقيس نترت متململه وتباوع لـ فجر بغيض
-شو مغلسه؟
رفعتلها فجر حاجبها بعدم فهم
-عليمن؟
بلقيس: مو تدرين أبن ميسون رجع خطبچ!
26
فجر: وجوابي نفسه.
كوثر: أوع شماله هذا ما عنده كرامه!
1
حنان : عشتو غير يحبها..
إيناس: شعجب عمتي ميسون رجعت خطبتها وره الصار؟
5
بلقيس: مو هِيَّ خطبتها أبنها رجع حچه ويَـ صمد.
كلارة: جوابها وأضح، وصمد مستحيل يتدخل بَـ فجر..
بلقيس: ما يتدخل گال مالي غرض، بس يمكن گال يسولف لـ حرّ يشوف رآيه.
كلارة: يعني من كل عقلكم حرّ يسوي شي ما يعجب فجر لا يعني صاحيه أنتِ لو لا؟
2
إيناس: صحيح ما تطلع من حرّ، أصلاً هوَّ ما يجبر أخواته.
16
أيدي على خدي صافنه على هاي الگعده المتجمعات بيها كل نسوان بيتنا، وينطن رآيهن بلقيس باوعت على فجر بطرف عينها
-خطاطيبچ هواي ليش ما ترضين تعرسين؟
9
صحيح هواي لاحظت يخطبون فجر بس هِيَّ بدون تفكير ترفض، وأتذكر مره كلارة سولفلتي فجر چانو يخطبونها من چانت مراهقه صغيره لحد هذا العمر وما رضت بواحد منهم، ما ردت عليها فجر ولا چن سمعت كلامها..
1
بس ردت وحده ثانيه ببدالها، محاسن تباوع لفجر بنظرات شماته ونبرة صوت أبد مو مريحه مبتسمه أبتسامه شيطانيه
-خيه تلگينها معيوبه.
36
ضيگت عيونها بلقيس صافنه على فجر تفكر، بينما فجر أنگلب حالها وجها صوفر بلعت ريگ من حسيت خوف فجر وراه مصيبه أبد ما أشوفها تخاف ولا يوم أهتزت شامخه بس اليوم حسيت بضعفها من تباوع لمحاسن وكاتمه حزنها وخوفها بگلبها مكسوره!
8
كلارة شاطت من القهر ترجف وتصيح
-لچ أكليييي تببببن ترحيلها فدوه!
2
أول ما كملت كلامها ما أنتظرت تسمع رد محاسن
بكل گلب مفرفح وروح محترگه طگت محامسن وملختها بالكتل بحيث خلت محاسن من كل كتر تخر دم وتصيح
-ترحييييلههها فدوه ترحين فدوه لعفتها.
69
تحچي وتملخ بيها ما مهتمه لبنات محاسن الأول ما كلارة طگت أمهن هنَّ دارن عليها وفجر بأيد تحامي لكلارة وبأيد تجرها بس كلارة ما أهتمت لكل الهوسه الصارت وچلبت بَـ محاسن گطعتها تگطع محروگ گلبها وصوتها يرجف وتغلط
12
-بت النعال لا تحچين على فجر، لو بيچ خير ما تزوجتي زلمه متزوج ودمرتي حياة جسام بأفعالچ النگسه، كل خير ما بيچن ترحن فدوه لشرف فجر وعفتها.
وأنه باقيه بمكاني مبنجه حرفيًا ما گدرت أرفع أيدي أو حتى صوتي وأصيح لكلارة، صرت من أشوف مشكله لو عركه حتى لو بس هوسه ينقبض گلبي وما أگدر أتحرك من مكاني بينما گبل چنت أنه أتعارك وياهن هسه أريد أگوم وأدافع لكلارة ما أگدر أحس جسمي ثگيل
13
بالگوه فجر وخرتها عن محاسن اللي وجها ضل ما ينشاف من الدم والجروح، وتصيح بآلم ووجع صريخها يفزز الميتين وبناتها هواي كتلن كلارة وبين الحواجيز والهوسه بس كلارة ما أهتمت لكل هذا..
-روحي يا محاسن دعوه بگلب محروگ كون تطلع ببناتچ الدايحات مثلچ، يا تربيه سزز كون الوادم تحچي بشرفچ مثل ما جاي تطعنين بشرف أختي يا أم الزلم يا دايحه.
75
فجر بالگوه جرتها وأخذتها للغرفه قفلت الغرفه عليها وكلارة مفرفحه تبچي وتدعي وتغلط، رحت وراها حيلي كله مهدود وأحس بثگل الدنيا كله على ظهري، فجر تسمع محاسن تگلها
-سهله فجر سهله..
6
التفتت على محاسن أباوعلها لعبانه روحي منها وهِيَّ تعدل بشعرها لأن كلارة خلته يتطاير ويَـ الهوى وتهز براسها وعيونها تنگط حقد وشر، خفت على فجر من نظراتها خفت عليها هواي محاسن شيطانه
5
كلارة گاعده بالغرفه مقهوره ركزت على أيديها متروسات بشعر محاسن شعر بأيدها كله شيب شعرها مشيب وما تايبه چا شوكت تخاف الله، فجر ما ضلت بالغرفه عافتنا هنا وطلعت أدري بيها كتومه ويا خوفي محاسن تدري بماضي فجر ولازمها من أيدها التوجعها..
10
أجه يوم الأحد اللازم أداوم بي بس ما جاي أتقبل أرجع أداوم، ضايجه وبنفس الوكت ممرود گلبي على السمعه الطلعت عليَّ وقررت ما أداوم بعد لأن مو هين عليَّ الصار وأدري البنات هناك راح يعيروني هواي وإذا صار شي يذبونه براسي ويسولي هواي مشاكل..
فجر واگفه طاحت وذره من لسانها تحاچيني
-عود صدگ يعني ما ترحين؟
هزيت راسي بمعنى أي، گالت بآمر
-مو بكيفچ، گومي يله.
صوتي مبحوح من البچي ومغطيه راسي بالغطا
-ما أداوم..
تقربت جرت الغطا من راسي بعصبيه
-ما تداومين شني؟ والأيام الراحت من عمرچ تدرسين بيها علمود ياهو تعوفينها!
-فجر فدوه لا تضغطين عليَّ گتلچ ما أروح..
-ترحين.
بس هل چم يوم خليني أرتاح
-وردة إذا ما رحتي تثبتين التهمه عليچ!
1
-خل تثبت على أساس بعد أكو واحد راح يصدگني..
-أي يصدگونچ بت خير أنتِ ما معتازتلهم.
-هناك يدورون الزله علمود يعيرون الواحد
-ترى حرّ گالي أگعدچ لأن راح يروح وياچ هوَّ ياخذ حگچ من نص عيونهم ما وراچ سند وياكلونچ؟
گعدت لامه رجليَّ لصدري ميته قهر ودموعي تنزل وأمسحهن مقهوره، ندگ الباب بالسويج وأجه من وراه صوت حُرّ بنتر وعصبيه خوفتني
-تطلع لو أطب؟
15
التفتت فجر على الباب
-طب.
13
فتح الباب وطب متعصب حيل، حُرّ عنده برگبته شريان إذا تعصب يبرز ضلت عيني عليه بلعت ريگ وأباوعله شلون يخنزر بوجهي تقرب عليَّ دنگ وعتني من أيدي
-ليش ما ترضي ترحي؟
25
رفعت عيني أباوعله بلعت ريگ متنهده
-ما أريد أداوم..
هدني صافن عليَّ وأشر على عقلي
-من كل عگلچ أنتِ صاحيه لو مسودنه؟
11
سكتت مقهوره وهوَّ رجع نتر بعصبيه
-گومي يله.
بالگوه طلع صوتي
-گتلك ما أريد أداوم لا تلح عليَّ!
كضني من چتافي ثنينهن مقربني عليه صافن بعيني
-والله محتار وياچ تردي تدمري سنه من عمرچ؟ لا ترضي ترحي وياي ولا ترضي تسكتي شنهي تريدي أنتِ؟
8
-ما أريد أروح للمدرسه بعد ما أريد أداوم أنتَ شايف البنات شلون ضلن يضحكن عليَّ؟
2
حطيت أيديَّ ثنينهن على وجهي أبچي من كل گلبي جرني لصدره وأيده لافها عليَّ تنهد بحسره مقهور باسني براسي الصاير على صدره
-بسچ هيدي، لا تبچي غزالة أخذ حگچ لو من حلگ السبع.
مغمضه عيوني أبچي وبعدهن أيديَّ على وجهي رغم حاضني بس ما بادلته الحضن جر أيديَّ من وجهي وهوَّ صاير گدامي لزم فكي بين چفوف أيديه ومسح الدموع من وجهي بأصابعه الأبهام
-أشششش.
1
يمسح بدموعي ويسولف وياي بهدوء
-ما لگو بالورد عيب گالو أحمر الخدين.
126
دنگت عيني ومسحت دموعي
أنتبهت فجر ماكو عافتنا وحدنا رفعتله راسي بصوت مبحوح
-أنتَ المن رايح؟
1
-أخذ حگچ
-لا تروح..
-ليش كبد شنهي تستنكفي مني؟
-لا مو هيچ بس أنتَ تتعارك والنوب تصير مشكله چبيره..
-ما أتعارك أحچي وياهم وأرد حگچ.
7
-لا ما أريد
-صدگ فرخه ياهل، إذا ما رحت وراچ اليوم يضيع حگچ وتتركب التهمه براسچ وكلها تضل تعيرچ يا جحشه.
19
سكتت صافنه وأطگطگ بأصابعي
حط چف أيده على گصتي وبين أصابعه جگاره
-غاديه نار، گومي يله گومي خل نروح وأطلبلچ أجازه
-خل ما أروح ومن أداوم أگلهم مريضه؟
-تهذي وتمسلتي چثير يبعد طوايف هلي.
-ليش تحچي عليَّ!
16
ما رد وأنه بالگوه أطلع الحچايه من حلگي أجرها جر مسح دموعي خازرني
-بسچ دموعچ ما يخلصن؟
2
سكتت وهوَّ گام وأنتبهت اله مبدل ومخلص
-أنه راح أتانيچ بالسياره لمن تطلعي.
-خوش..
-إذا ما طلعتي أطب أطلعچ سحل.
-خوش..
15
باوعتله بطرف عيني گمت من مكاني طلعت هدوم المدرسه وهوَّ طلع من الغرفه لبست بالگوه حيل تعبانه وعندي خمول أصلاً مالي خلگ، طلعت لسيارته لگيته ينتظرني صعدت بالصدر وهوَّ تقرب فتح باب السياره وسده لأنّ ما مسدود عدل
10
وگبل لا يرجع لمكانه باوعلي عگد حاجبه بضوجه
-العيون عميانه..
13
التفتت على الجامه أباوع منها
-البارحه كل الليل أبچي واليوم هم
-عليمن على شيب الخلفوچ؟
يعني الصار هين؟
-مو هين بس أنه تعرفيني أعوف حگچ؟
1
صفنت أفكر ساكته فك عينه مصدوم
-ها شو تفكري!
21
-ها
-وزقنبوت
-لا ما تعوفه
-بعد وكت
-شمالك وياي
23
ما رد عليَّ أيده على الستيرن يدردم
-فرخه ياهل.
3
التفتت عليه بخوف
-مو تصير أعصاب وتبقى تغلط وتفشر!
-لا عد عيناچ.
17
-أنه راح أضل واگفه وراك بس أسمعك تعصبت أگرصك
-لا شنهي السالفه أستهدي بالرحمن.
65
-چا والله تسويها إذا تعصبت ما تشوف گدامك
-ما أغلط مؤدب وحباب أنه.
31
-أي عمت عيني تخرخر أدب وأخلاق..
45
لحد ما وصلنا للمدرسه أنه مية فكرة أجت ببالي أخاف حُرّ يتعارك عركه چبيره وتكبر السالفه لأن هوَّ ما يلزم أعصابه وبنفس الوكت خايفه أدخل وشنو نظرات الناس الي وشلون راح يستقبلوني أكيد راح يأذوني بكلامهم أو بنظراتهم حچه ويَـ الحارس وطبينا لجوه بس ما أخذني لصفي أخذني للأداره سلم وأستقبلته المديره هِيَّ ومدرسة الرياضيات سولف وياهم شويه وأنه أسمعله..
حُرّ: بتنا ما تبوگ بت خير وعينها متروسه وحشاها من هيچ سالفه، أنه الجاي عليه أريد تطلعولي البت الذبت هاي السالفه براسها أريد أشوف عدها أهل لو لا لأن ما أظن أكو وحده منطينها تربيه تسوي هيچ سوايه زفره.
17
وگفت مدرسة الرياضيات گدامه وحچت وياه بهدوء
-أنه كلش زين أدري وردة ما تسويها وأصلاً حتى من طلعوه من جنطتها ما حچيت وياها أبد..
3
حُرّ: وردة بنيه مؤدبه وشاطره جايه لهنا تدرس مو تسوي مشاكل وتذب تهم بروس الوادم، بنيه محترمه المدرسه ومحترمه روحها ومحترمه مدرساتها بهيچ تتجازه؟
المفروض من مديرة المدرسه تحل السالفه وما تخلي الطالبه بهيچ موقف گدام البنات الوادم ما ترحم!
أشگد يحاول يهدئ روحه وينصي صوته، بس ما يگدر يحچي بعصبيه محروگ دمه وأنه واگفه بصفه أباوعله ساكته من گد ما محروگ گلبه چن ذابين التهمه براسه متعصب وبالگوه ضاب لسانه لأن الگدامه نسوان
5
حُرّ: أنه ما جاي لهنا علمود أتعارك، أريد شي بسيط منكم والمفروض أنتم تسوونه تطلعون يا هي الذابه هاي التهمه براسها علمود أتفاهم ويَـ أهلها..
6
المديره واگفه تسولف وياه بهدوء ما تريد المشكله تكبر
-ليش تكبر السالفه، خلينا نحلها بهدوء
-وليش ما أكبرها شنهي بتنا هينه علينا؟
3
-لا أكيد حقكم وعلينا هم مو هينه
-أنه حتى مشكله وياكم ما عدي أريد أهل البنيه.
+
-لو نعرف منو هِيَّ أحنى تصرفنا وما قصرنا وياكم!
-صيحو البنات الگاعدات وياها بنفس الرحله.
-ليش؟
-هنَّ وياها بنفس الرحله فـ أكيد شايفات الأجت ذبت التلفون بجنطتها، نسألهن ونستفسر.
-نسألهن مو مشكله..
11
أكو مدرسات واگفات بالأداره يباوعن للموقف ومستغربات لأن ما يعرفن بالسالفه راحت مدرسة الرياضيات شويه وأجت وياها حنين وفاطمه وجوهن مصوفره ويتراجفن بحيث أول ما شفتهن عرفت هنَّ ذابات هاي السالفه براسي واضحات وضوح الشمس!!
17
وهنَّ چانن متعاركات ما أدري متزاعلات من بعض فـ وحده طلعت أسرار الثانيه وثنينهن أعترفن على بعض هاي تگول فاطمه شمرت التلفون بجنطها وهاي تگول لا حنين هِيَّ شمرت التلفون بجنطتها المديره رزلتهن رزاله غسل ولبس وطيحت حظهن..
8
بس حُرّ چان مصر يريد يحچي ويَـ أهلهن
-ياريت لو تخابري أهالي الطالبات هذني، خل نشوف شنهي فلمهم يخلفون ويشمرون بدون تربيه لأن هاي أخلاق بنات ما شامات ريحة التربيه شني.
ماتن من الخوف بالزايد من حُرّ راد يوصلها لأهلهن بحيث ضلن يبچن خايفات ما يردن أهلهن يعرفون ما دام ما رادن فـ أهلهن صارمين وراح يطيحون حظهن والمديره أشگد حاولت تحچي ويَـ حُرّ منا ويسد السالفه ما قبل فاير من العصبيه..
1
باوع عليهن خازرهن بعصبيه
-أعمارچن ١٥ ما أدري ١٦ وسويتن هيچ مصيبه چا إذا تكبرن شنهي تسون؟
21
التفت على المديره وكمل كلامه
-وردة نفسيتها تعبت من الموقف الصار وياها، أن شاء الله تنحل المشكله من حضرتچ تسوي اصطفاف وتسولفي السالفه وتفهمي البنات الوياها عدها صديقات ذبن تهمه براسها لأن بتنا تريد تكمل دراستها وإذا تضل بصفها العارات تضل تتراگع وما مجبوره تتحمل ذنب هِيَّ ما مسويته، ولا تذكري أسماء البنات هنَّ مو مؤدبات خوما كلنا نصير بدون تربيه ما أريد هم يتفشلن بين الأوادم ويعرفون بسوالفهن المهم تطلعي وردة بالصوره التليق بيها.
48
قبلت المديره وهوَّ كل ما يعلى صوته أكض أيده علمود ينتبه لأن حيل تعصب وفار دمه من سمعهن يعترفن بلسنتهن گدامه والمديره هواي سولفت وياه وخلتهن يعتذرن مني وحُرّ أخذني لصفي وقبل لا أطب أنطاني فلوس وشاف دموع بعيني
-ليش تبچي غزالة؟
12
-هيچ ما بيه شي
-ترجعي وياي للييت؟
-لا لا أريد أداوم..
2
-بس أنتِ مريضه؟
-لا ما بيه شي الحمدلله صرت أحسن.
-تردي شي كبد
-لا سلامتك
3
أنطاني الجنطه مالتي لأن لازمها بأيده ما رضى أنه اشيلها وطلع من المدرسه وفعلاً المديره سوت اصطفاف وسوت بالضبط مثل ما راد حُرّ ومدحت هواي بيَّ هِيَّ ومدرسة الرياضيات وفهمت البنات على كل السالفه بدون ما تجيب طاري السون هيچ بطلب من حُرّ، والمدرسه نقلتهن من الرحله وخلت بصفي غير بنات..
11
-فجر: بالگوه حابسه غصتي، وعيوني أحسهن راح ينفجرن گد ما حبست دموعي واگفه وأريد أسيطر على خنگتي ماكو أحس روحي راح تطلع المره الأولى وذيچ الذكرى التعيسه بسبب صالح وماهر دمرت حياتي بس ضغطت على روحي وكملت دربي وعشت
والمره الثانيه من ردني صالح لذاك اليوم المشؤم والتقى بيَّ يعيرني ويتشمت، وطحت طيحة موت أيست من روحي وتمنيت الموت بس للمره للثانيه گمت على حيلي وعشت لخاطر البنات وحُرّ لأجلهم دست على روحي وتعايشت، بس هاي الثالثه وتعبت ما أظن ينصلح حالي بعد
2
محاسن: تعاي فجر عندي وياچ حچايتين.
3
التفتت على صوتها
واگفه من بعيد تباوعلي وتخزرني بنظرات متروسه غل وحقد
-عيشتچ سوده على أيدي..
مسحت وجهي وزفرت نفس أهدي روحي لا أنفجر وأخرب الأول والتالي جريت نفس وبهدوء نطقت
-شتردين؟
1
بنبرة صوت ناويتلي شر نترت
-گتلچ گبل أنه أعرف عنچ اليهد عمرچ، بس ما جريتي عدل وما نكسرت عينچ يالمعيوبه يمكن ظنچ أنه بس حچي وأشوفچ اليوم بعينچ..
6
عگدت حاجبي بخوف وملت راسي بخفه مستغربه
-شنو، ترى كلشي ما أفتهمت شتردين مني شمسويتلچ!
-أريد منچ هواي..
-ما أنفذ حچايه من حچيچ.
-چا تضحين بَـ حرّ للموت لو للسجن؟
4
خزرتها فاتحه عيوني علمود ما يطيحن دموعي
-الله لا يوفقچ
-لا تضلين تدعين وتدوخيني أسمعي مني وركزي.
-شتردين مني أنتِ شتردين؟
-أريدچ ترحين لـ جسام وتگليله بالضبط نفس الحچي الراح أگوله الچ أنه..
3
بلعت ريگ عاگده حاجبي بأستغراب ومركزه وياها وبكل حرف يطلع من حلگها گلبي يدگ بقوه لأن متأكده الجاي مو سهل فاجعه وصدمه..
-أدري بي يريدچ، ويريد بس الموافقه منچ وما يهتم للدنيا بعد كلها أهم شي عنده يضمنچ أنتِ وياه وتحبينه وگتلچ من گبل أنه عدي الموت ولا سعادة جسام، فرحته ما أريد أشوفها بدنيتي ترحين وتگليله كلامي بالضبط أنه ما أريدك ولا أحبك ولا يوم راح أحبك.
جريت حسره حابسه نفسي وفاتحه عيوني مركزه وياها
-أنتَ ياهِيّ تحبك؟ لا أهل لا صحبان عندك، محد يريدك تريدني أنه أرضى بيك لا عندك فلوس ولا بيوم راح تعيشني مثل ما أريد أنه، محد يحبك ومحد يريدك أنه أحبلي واحد وراضيه بي وأريده وأنتَ الگه وحده ترضى بيك ولو محد تگلبك..
63
شهگت شهگه طلعت من نص گلبي ودموعي يتسابقن كلامها يگص مثل السچين، أناشغ وأبچي من سمعت حچيها على جسام شلون ينطيني گلبي أحچيهن اله والله ينشل لساني وما أگدر!!
4
وهِيَّ مبتسمه ورافعه حاجبها
-ها ترحين تسولفيله هذني الحچايات، لو أطشچ على الديره كلها وأخليچ على كل لسان وتروح حياة حرّ؟
37
گلبي يرجف وعيوني يحرگني رفعت أيديَّ ثنينهن حاوطت رگبتها بيهن وخنگتها بحرگة گلب ضاغطه على أسناني وأصيح فاقده
-لچ الله لا يوفقچ لا دنيا ولا آخره..
7
بالگوه وخرت أيديَّ من رگبتها تشهگ بالنفس وأنه أرجف وأدعي عليها وأتحسب وأبچي ميته من القهر، گد ما أيديَّ قويه على رگبتها ضال عليهن طبع تمسح على رگبتها بدون خوف وتباوعلي بجساره
-تماديتي هواي فجر تماديتي وتدرين أنه شگدر أسوي وفنچ ما تسوين الگتلچ عليه وشوفي شسوي بيچ سهله.
23
عافتني وراحت تغلط عليَّ وتتذمر، لزمت راسي بثنين أيديَّ وگعدت بالگاع أبچي منهاره وبچف أيدي ضاغطه على حلگي أكتم صوتي لأن راح تنفجر حنجرتي من الكتمان نحطيت بموقف مصيري وچبير ويغير كل حياتي..
النذله خلتني بين خيارات تكسر الظهر، بين شرفي وسمعتي الماكو أغلى منها أموت لو واحد عرف والله العظيم أموت بساعة التطش الخبر، وخيرتني بين حرّ الوحيد الضل من عائلتي من ذاك الدمار لو صار بي شي من وراي أتسودن وعقلي أفقده ما صدگت طلع علمود يعيش حياته وأجي أصخمها أنه!
9
عندي أستعداد تگلي موتي أموت، ولا يرجع حرّ يطب سجن لو يموت وإذا سولفت لجسام نفس الشي ماكو حل ولا أكو خيار ثاني غير أن أسوي التريده محاسن بس صعبه عليَّ حيل موت ثاني هذا، محبوبي هذا شلون هيچ أحاچيه صعبه وما تطلع من حلگي..
ما عنده غيري أنه كل أهله وحياته وأخذله يا ربي شنو من أختبار صعب، أحس وصلت لحالة يأس وتعب تبچي عليَّ الحيطان مرت أيامي مثل اليعيشونه بلاه نفس مخنوگ كلشي ما حاسه بهاي الدنيا تعبت حيل تعبت وما جاي أگدر أسولفله لو أحچيله التريده محاسن هوَّ ما عنده غيري من ينخذل مني وين يروح!
5
عندي أستعداد أموت وما أأذي جسام، بهيچ أجازيه بعد كل الوگفات والسنين الصارلي بيهن سند أجي أدمره وأسوي التريده محاسن مستحيل، وبنفس الوكت كل بت صعبه عليها ينجاب شرفها بالطاري وأدري لو حچت محاسن تصير مجزره..
4
أجت على بالي فكره وأريد أنفذها صحيح صعبه عليَّ بس راح أسولف لـ حرّ كلشي وهوَّ يتصرف.
249
مو أنه الأنذل ولا أخلي روحي بأيد محاسن تخسي تمشيني على مزاجها كل ظنها أنه فقيره ومن أهل الله ما تدري أغطها بالشط وأطلعها عطشانه، وحرّ مو واحد يسوى عشيره من أزامط بي أدري أنه وراي أزلمه يهد الدنيا
78
ما نمت ليلي الوب وأفكر شلون أسولفله، البنات نايمات صارلهن هواي بس أنه هجر عيني النوم ومتانيه حرّ يجي وأول ما أجه وسمعته يطب لغرفته گمت من مكاني وأنه أسمي بأسم الله أن شاء الله يمشي كلشي مثل ما أريد..
3
دگيت الباب على كيف البيت هدوء
وكله أظلم لأن نص الليل وكلهم نايمين أجاني صوته مستغرب
-ياهو؟
-أنه فجر.
أسمع خطواته بأتجاه الباب فتحه وصفن عليَّ
-خيرچ خويه شمگعدچ لهذا الوكت؟
-عندي وياك سالفه ما تتأجل..
2
عگد حاجبه توتر وضل بقلق بسرعه فتحلي مجال علمود أفوت للغرفه طبيت سد الباب والتفت عليَّ رافع حاجبه
-شكو؟
1
تنهدت بحسره وعيوني متروسه قهر
تعال خويه خل أسولفلك، سالفه لا تتأجل ولا تنگال بس أنه أدري وراي أزلمه ما يعوف حگه وبنفس الوكت ذكي وما تفوته فايته راح أحچيلك كلشي لأن أنتَ حلال مشاكلي وحياتي واگفه بأيدك وكل ما تريد تسوي شي تذكر شيصير بيك يصير بيَّ أنه وراك..
25
علامات تعجب وذهول ترست ملامحه
بلع ريگ تقرب گعد گدامي ومركز كل باله وياي
-سولفيلي؟
1
جريت حسره طويله صعبه السالفه شلون أسولفله بس حاولت أنقله السالفه بأكثر طريقه ما تجرحه ولا تجرحني حچيتله بالمختصر كل السوته محاسن وكلشي لأن إذا أسولفله شلون حچت وياي يموت بمچانه ما يتحمل الحچايه ما يحملها علينا مو العارات والتجريح
5
-أنتَ وحيدي وأجيتك تاخذ حگي وتحلي مشكلتي، بس بلايه ما تاخذ روحك لدرب بي موتك هِيَّ كضتني من أيدي التوجعني وتهددني وتضغط عليَّ بتهديد حرّ للسجن لو للموت حلها بالهداوه..
17
أنه أسولفله وأعصر بثوبي أضغط على روحي أكمل بس كل كلمه أحچيها تخبله بالزايد رغم أشگد حاولت أبسط الموضوع وما أخليه يثير أعصابه بس السالفه تقهر وتمرد الگلب وما سولفلته عن جسام ولا جبته بالطاري
2
على منظره وعصبيته لو يشرب من دم محاسن ما يرتوي ولا أستغرب، شرآين رگبته كلهن نطن وفچه يرجف من العصبيه وعيونه تخنزر طگ أيده بالگاع وصاح
-وستر زينب أچتلها.
21
أنترسن عيوني بدموعي وباوعتله بخذلان
-چا والحچي الگبل شويه حچيته لا تخذلني حرّ خويه!
6
هدئ من سمع نبرة صوتي والدموع اليهملن على وجهي شاف حالتي شلون متعوبه، مسح وجهه يريد يهدي روحه ضل يستغفر ويمسح وجهه بقوه يحاول يحبس عصبيته وغضبه بس ماكو..
2
مسحت الدموع من عيوني وحچيت بقلة حيله
-أنه لو واحد دره بالجرالي أموت وما أگدر أعيش، أنه بلايه عار مسمميني وادم ما تنگحم مو النوب يلزمون عار عليَّ!
12
خزرني بعصبيه خنست ساكته
واراجع بكلامي لزمني من چتافي بثنين أيديه يهزني وينتر
-لا تحچي على روحچ عار عليچ شنهي؟
أحچي بنبرة هدوء وصوت ناصي كلش لأن صوت الليل مسموع وكلهم نايمين أذب الأبره هسه ينسمع صوتها وخر أيديه يمسح بوجهه ويغلط على محاسن ميت من العصبيه وحرگان الدم لحد ما جر نفس ونتر
-أسمعيني زين..
5
چنت متأكده منه راح يحل السالفه بس ما چنت متوقعه شلون وشني من طريقه، صدمني حرّ بالسواه ونصدمت أكثر بالشي الصار گدام عيني ما گدرت أصدگه ولا عقلي گدر يتحمله من بشاعته...
