رواية مقبرة الاحياء الفصل الخامس عشر 15 بقلم سارة جعفر
البارت الخامس عشر15
بين الفقرات عشقي 
.
.8
ضلي يمي يمچ أشعر بالآمان أيدچ بأيدي لا يضيعنه الزمان..
20
-وردة: صفنت بخوف عليهن هذن المسودنات شنو يردن يسون بيَّ، من خلال كلامهن كلشي ما فهمت بس خفت لأن واضحه نيتهن حيل مو زينه، قطعت سلسلة أفكاري وركزت ويَـ كلامهن لأن رجعن يسولفن
20
عگدت حاجبها بلقيس ولزمت بتها من زندها بقوه
-أنتِ مو تردينه، وتردين تخلصين منها؟
22
هزت راسها إيناس منطتني ظهرها
-أي صح أريد موتها اليوم گبل باچر بس هاي السالفه تخوف حرّ يكتلها تردين؟
20
هزت راسها أمها مبتسمه وجها چنه شيطان لأن أفعالها الشيطانيه مرسومه على ملامحها، ردت أنسحب من المكان بهدوء بدون لا يلاحظني وأروح أسولف لـ حُرّ بس صارت عين بلقيس عليَّ وأول ما شافتني أجت عليَّ تضحك وعيونها تگطر حقد..
15
-ولچ تتسنطين علينا
-لأن جاي تسولفن عليَّ وتردن تذبن مصيبتچن براسي!
11
-أييي شلون مصيبه لو تدرين
-صح أنه ما أدري بيها بس رب العالمين يدري.
4
-أريد حرّ يذبحچ
-هِيَّ هاي مصيبتچ الخابصتني بيها؟
ههههه ضحكتيني والله، يابه أنتِ تخوطين بصف الأستكان حُرّ أصبعه ما رافعه بوجهي مو النوب يطگني ويكتلني لأن أنتِ رايده هيچ؟
29
-ضلي ضلي ثقي بيه لحد ما يوم گدامي يكتلچ
-ههههههههه بلقيس أنتِ خطيه والله
10
-كتل گبلچ يكتلچ بس العب براسه عليچ
-شتلعبين عمي دأسكتي لا يسمعچ ويجيچ
شحده
-ترى هوَّ مو صمد عربانه وبسرعه يندفع!
24
عفتهن ومشيت أضحك والله لو تموت بلقيس عشر مرات حُرّ ما يرفع أيده عليَّ ويطگني، شوف المسودنه النوب مكيفه عبالك راح ينفذ كلامها ولا چن طاگها بعرض الحايط ويفشل بيها..
42
طبيت لجوه وأجت كلارة مبتسمه
-يله تعاي نبدل
-ها خاف بعد وكت؟
-يا بعد وكت الوادم كلها التمت
-هم صدگ..
13
أبتسمت وطبيت وياها لغرفتنا قفلنا الباب وطلعنا ملابسنا، أنه لبست فستان أسود طويل ومخصر من ناحية الخصر مرتب وخالي من التزيين مجرد لون أسود وأحتاريت أفتح شعري لو لا؟
20
بالأخير فتحته وسحبته رغم هوَّ ما يحتاج ناعم بس من شفت البنات كلهن سحبن شعرهن سولي واهس وسويت مثلهن وكلارة هم كشخت وعدها ذوق حيل باللبس وتعرف تختار ملابس حلوه..
2
رشيت روحي عطر هواي وتقربت للمرايه مبتسمه أباوع لروحي أحس الفستان هذا حيل لاگ لشكل جسمي ورهم عليه طولي لا طويله ولا قصيره متوسطة الطول وهم لا سمينه ولا ضعيفه أنه كله بالوسط بس آميل بوزني للضعف.
25
طلعت مكياجي الجديد الوصيت عليه زهراء وبعدهن البنات ما شايفاته خايفه من فجر حطيت كحله لعيوني ومسكاره لرموشي وحمره حمره كلش لشفايفي التفتت أباوع لكلارة الملتهيه بروحها وفجر طبت للغرفه
-شنو رآيچن حلو عليَّ هذا المكياج؟
17
كلارة فكت حلگها وفجر خزرتني
-والله لو يشوفچ حرّ يلعب فلك ما يرضى
-شني قابل حرّ راح يطب بين النسوان؟
15
-لا ولچ لا تشلعين گلبي
-يمعوده حرّ ما يطب لجوه لأن نسوان هنا
-وردة أنتِ عايزه تكبرين عيونچ هنَّ يجيبن التايه!
15
-ههههههه شبيچ فجر خليني فرحانه، أموت على الكحله وأحب دائمًا أحطها لعيوني..
4
-بكيفچ هنا بس نسوان بس مو يشوفچ زلمه.
-لا لا أبد
6
تقربت عليَّ كلارة تضحك
-ولچ گلنا نخرب بس مو هيچ!
-خليني متسودنه
-الحمره تصرخ شوف ألون والنوب الكحله يا يابه..
11
تحچي وتغمز بتلاعب طگيتها على چتفها أضحك
-وسم شبيچ تخرعين چنچ زلمه
-والله لو أنه زلمه چا تزوجتچ عمي أنتِ ما تتفوتين
-خاب أسكتي تخرعين
19
ضحكت بصوت عالي وتقربت عليَّ فجر لبستني حزام خصر ذهب صار يموت ويَـ لبستي السوده والفستان المخصر على خصري أبتسمت الها خجلانه وحطت برگع ذهب يكون على الشعر من فوگ مرتب حيل ويزين الشعر التفتت أباوع على روحي بالمرايه..
39
تقربت عليَّ كلارة تباوعلي
-يخبل الذهب عليچ يلوگلچ.
3
ضحكت وتشكرتها والتفتت على فجر وحچيت وياها ما قابله البسهن لأن هذني مالاتها وأستحي أخذ هيچ شي ثمين من عدهم، أشگد حچت وياي وما رضيت أبد وردت أنزعهن بس زعلت عليَّ وجبرتني البسهن ضحكت شلون نقهرت لأن ما لبستهن..
2
ضلت تاكل بروحها مقهوره حيل
-ليش هيچ ولچ أنه أعتبرچ أختي وأنتِ تستحين مني؟ لو تعتبريني صدگ أختچ ما تستحين مني، أنه وياچ واحد وإذا لبستي مني؟
6
نقهرت لأن بهيچ يوم فرحانه بي قهرتها، راضيتها وضحكتها ورجعنا نسولف طبيعي التفتت على المرايه أباوع لروحي مبتسمه وأعدل بشعري والتفتت على صوت فجر تتآملني ونطقت بهدوء
-صدگ من گال حرّ غزالة كلشي بيچ يشبها رشاقتها رقتها، عيونچ سبحان الله حبايه ومگسومه من عيون الغزالة جمالچ يخبل.
21
ضحكت مستحيه وضليت أسولف وياهن بس حيل خجلني بكلامهن وشلون يتغزلن بيَّ وبكل تفاصيلي حيل فرحت بكلامهن لأن يهمني ويعنيلي، طلعنا من الغرفه أنه وكلارة للهول لأن كل النسوان ملتمات وبلش العرس صارت العصريه وفجر راحت للمطبخ تشتغل
طبعًا فجر فعلاً معدله أشگد تعبت بعرسه بس وگفتله وگفه أخواته ما وگفنها اله شالت عرسه كله وما خلته نقص بشي، وهوَّ حيل فرحان بيها وكل ما يشوفها يتشكرها لأن محاسن مرت أبوه وأخواته من أبوه متكترات على صفحه وعرسه لو ما فجر وزهراء چا تبهذل..
7
ما رگصت أنه ضليت واگفه أباوع للنسوان والهوسه والأجواء أغاني عالگه وفرح وعرس عراقي، گولات وهلاهل ورگص عرسه صار حيل حلو وتونسنا هواي أنه وكلارة الاجواء تاخذك لعالم ثاني، ما نسيت فجر كل شويه رايحه الها خاف تحتاج شي بس هِيَّ ما ترضى أمد أيدي على العود، تزمخ بيَّ أول ما تشوفني أريد أساعدها ما ترضى
كضتني مره من أيدي علمود أنتبه الها التفتت عليها عاگده حاجبي بأستغراب
-ها خاله؟
3
أبتسمتلي مره چبيره بالعمر تتأمل ملامحي
-خاله أنتِ بتمن؟
25
صفنت عليها بحيره شنو أگللها بت منو أنه، إذا گلتلها بت طاهر وهجران أو بت أهلي الحقيقين أكيد راح تضل تسألني وتستفسر هواي شعدچ ببيت حُرّ ولازم أسولفلها قصتي كامله علمود تفتهم حياتي..
بدون تردد وبسرعه نطقت
-أنه بت حُرّ.
64
عگدت حاجبها وصفنت تستذكر مستغربه
-خاله حُرّ خريج السجــون؟
2
-أي أي هوَّ خاله
-ولچ يمه الزلمه گضه عمره بالسجن شوكت تزوج؟
3
-لا خاله مخربطه أنتِ أني بت حُرّ
-هم صدگ يمكن مخربطه أنه بعد خالتچ..
12
أبتسمت الها ومشيت مرتبكه هوَّ متحملني ومتحمل كل مصايب حياتي ضلت على هاي خل الوادم تگول بته شبيها، رحت للمطبخ أشوف فجر خاف محتاجه شي لأن طولت جوه
3
-ها فجر محتاجه شي؟
-لا خيه بس بلا آمر عليچ جيبيلي ذيچ الصينيه
-صار.
2
رحت جبت الها الصينيه والتفتت على صوت طفل يركض
-وين عمتي فجر؟
-شتريد منها
-عمي حُرّ يريدها بالحوش
2
هزيت راسي ورحت للمطبخ، ما طب حُرّ لأن البيت متروس نسوان وضل بالحوش لأن فارغ الهوسه كلها بالهول أنطيتها الصينيه وگتلها
-حُرّ يريدچ بالحوش
1
-ما أگدر أعوف الشغل البيدي شوفيه شيريد
-خاف النوب يتعارك وياي؟
9
-عليمن يتعارك شمالچ روحيله چا ياهِيَّ تروحله!
-خوش رايحه
7
جريت شال من غرفة زهراء حطيته على راسي وطلعت أتمشى للحوش أول ما صارت عيني بعينه من بعيد فتح عينه ورحتله مبتسمه لازمه الشال من ناحية رگبتي وفستاني ما طالع منه أي جزء من جسمي محتشم بس ضيگ فـ عفت الشال مفتوح على كبره وما گدرت البس شي ثاني لأن هوسه حيل وفجر قافله غرفتنه لأسباب ما أدري بيهن بس ما تقبل نفتحها هسه
ا ولچ غزالة شنهي الفلك هذا؟
42
-شني غير أنتَ وديت على فجر أجيتك أنه
-ليش هِيَّ وينها بيها شي؟
-لا ما بيها بس جاي تشتغل ودتني بدالها، شتريد أنتَ؟
-لاعبه فلك اليوم شنهي الفلم
-چا غير أكشخ شلون تريدني أطلع للوادم
-على كيفچ بويه ما حچينا شي أكشخي أكشخي
7
-ههههههه والله أصلاً كشختي بسيطه
-المعاريس ثنين والمجانين الفين
13
ضحكت لأن صدگ أنه وكلارة متحمسين وفرحانين أكثر من العريس نفسه عدلت شالي وهوَّ فر أيده
-ستـر صخول.
10
-ليش؟
-شعرچ يخط وراچ..
5
-يا يا چا أنه عود فتحت الشال علمود ما تشوفني!!
4
رجعت لوره فتحت باب الهول لزمت بأيد وطلعت منه بس راسي أسولف وياه علمود ما يشوفني وهوَّ مبتسم يباوعلي ويتبع كل حركه أسويها
-أي عيني شتريد وديت على فجر شرايد منها؟
باوع بالفراغ يفكر وهز راسه
-ما أتذكر..
32
-هههههه يا يا شجاك!
-جيبيلي سويج السياره من غرفتي أريد أطلع.
-وين رايح خطيه عرس صاحبك؟
-أجيب شغله محتاجينها وأرد.
هزيت راسي وسديت الباب بوجهه سمعته يگول
-مهبوله
2
لأن رگعته رگع گدام وجهه ضحكت على روحي من الخبصه نسيت وسديت الباب قوي رحت بسرعه لغرفته جبت منها السويج ورجعت للحوش مستعجله بس هل مره لفيت الشال عدل عليَّ قدمتله أيدي مبتسمه
ضيگ عيونه صافن على عيوني
-الكحله تلوگلچ غزالة.
21
أبتسمتله أعدل بشالي
-أنه حيل أحبها أموت على شي أسمه كحله..
1
-أجيبلچ منها؟
-لا عندي شكرًا أنه أشتريت مكياج
-ولچ أنتِ فرخه ياهل وينچ وين المكياج؟؟؟
-منيلي فرخه ياهل صرت ١٦
-بعدچ صغيره بعدچ
ضيگت عيوني عود هذا ليش دوم يحب يصغرني هيچ
-أگلك صدگ مو تنصدم من تعرف عدك بت.
-شنهي؟
-وحده من النسوان سألتني بت منو أنه..
3
رفع حاجبه حط السويج بجيبه ضايج
-شنهي بتمن تريد تسويلچ جنسيه؟
5
حسيته حيل ضاج وحيل أختنگ من سمع هذا الكلام حسيت قهرته وأنه ما حچيت شي كلامي عادي تحمحمت وكملتله وزاد قهره
-گلتلها أنه بت حُرّ.
5
تنهد يفر بأيده يباوع لجهه ثانيه
-هم حظي هذا، شوكت خلفتچ بالسجن؟
36
-چا شگلها ما عدي أهل وأعتبرك أنتَ والبنات أهلي!
-أي على عيني وراسي أهلچ وشتردي أصير بس شنهي بتي شوكت خلفتچ ما تگليلي؟
3
-يله چا الحايط يطيح على أهله
-هم صدگ..
4
أبتسمتله بادلني الأبتسامه بلطف ضيگت عيوني من تذكرت وبتردد نطقت
-حُرّ هم بيوم من الأيام تتغير عليَّ وتنوي على كتلي؟
-أخسى حريمه يا وردة.
10
-محد يگدر يغيرك عليَّ؟
-محد وستر زينب.
6
أبتسمت مرتاحه وفرحانه لأن أعرف حُرّ ما يثني حچايته وهمَّ كلهم چانو يصيحون يكتلها وهوَّ چتالها وأبد ما تأثر بحچيهم وما جرحني بحچايه مطمئنه وفرحانه لأن واثقه بي مجربته بأفعاله وأدري ما يخذلني..
10
طبت للحوش مره چبيره وياها ثنين بنات شابات سلمت على حُرّ والتفتت شافتني واگفه وياه نسولف ضحكت وهِيَّ تمشي تريد تطب لجوه
-الحرّ خوش صايدله صيده.
11
طبت لجوه وبناتها يضحكن وياها التفتت عليه أضحك
-باع الناس شلون يفكرون!
1
-شبيهم؟
-الناس عقولهم ما بيها بس حب شمالهم؟
1
سكت يباوعلي بتركيز وأنه مندمجه أسولف
-عدهم واحد يساعد حب، زين حب، خوش آدمي حب، عمي ما أدري شمالهم وين أنه وأنتَ وين!
ليش شبينا؟
-ما موالمين أبد، النوب يعني حتى ما أتخيلنا سوى شني السالفه أنتَ واحد من أهلي وهذوله شوف شيفكرون ههههههههه ناس غريبه والله..
64
التفتت عليه بعد ما كملت أندماجي بالكلام وركزت أكثر بردة فعله وجهه باهت وعاگد حاجبه ضايج تنهد بنبرة قهر بصوته يسولف
-روحي طبي وردة.
20
-ليش شو حسيتك ضجت؟
-طبي وردة آخرتچ على العرس وأنه وراي شغل.
-خوش
6
طبيت لجوه بس ضلت عيني وراه، لحد ما طبيت وسديت الباب وضليت محتاره بردة فعله حسيته حيل حيل تغير مزاجه چان يضحك متونس ومندمج وياي بالكلام وبعد آخر موضوع حچيته وياه حيل ضاج ونقهر
3
منتبها لكلشي جاي يدور حولي، ومركزه زين شلون حُرّ يعاملني بأختلاف ومعامله تختلف عن الناس كلهم معاملته حيل حنونه ولطيفه وبيها نكهه حب واضحه ومبينه بس بكل مره أستحي من روحي من أفكر هيچ وأحس روحي تماديت الرجال ساعدني خوما أبتلى على روحه وأنقهر من تفكيري لأن هيچ فكرت..
8
بس بنفس الوكت دائمًا أگول چا إذا ما يحبني ليش هيچ يعاملني معامله متروسه حب، وبنفس الوكت الشي المخليني متردده أحس حُرّ ما يحبني وباعده الفكره من بالي تصرفات الموجودين فجر وكلارة دائمًا يشوفون معاملته ولا يحچن حرف وعبالك الموضوع طبيعي وأبد ما لمحو تلميح أنُ شاكين بحب حُرّ أتجاهي؟
7
ونفس الشي كل الموجودين بالبيت اليحبوني واليكرهوني واليردون عليَّ الزله، محد حچه بالموضوع ورغم أحنى عدنا السالفه تنتشر بسرعه البرق بس كلهم محد نطق حرف بخصوص هل موضوع لهذا السبب باعده الفكره نهائيًا من راسي لأن ما معقوله كل هاي الناس ما لاحظو وأنه وحدي لاحظت..
3
وإذا فعلاً حُرّ يحبني، فـ أني حيل مو بالي الحب والزواج صحيح أحبه كـ فرد من عائلتي وأنقهر وأخاف عليه وأحس بضوجه إذا أحسه يتغير بس حاله حال فجر وكلارة معتبرتهم عائلتي أنه وما أريد هاي الفكره مو بسبب حُرّ لا بالعكس هوَّ خوش رجال وفعلاً شريك صالح ما ينرفض بس بسببي أنه.
11
أحس روحي صغيره على الحب، رغم أدري هوايه بنات بعمري متزوجات ومخلفات وممكن أكو أصغر مني ومفكرات بفكرة الزواج بس أنه شايلتها نهائيًا من بالي أحس روحي حيل بعيده عن هاي السوالف بهل وكت هم فشله بعدني "فرخه ياهل" وهم عدي دراسه وحايره بضيمي ومصايبي ما الحگ أتمعشگ..
3
جرتني كلارة تباوعلي بأستغراب
-وين چنتي؟
-حُرّ راد فجر بس مشغوله رحت بدالها
-تعاي چا شوفي الأجواء تجنن..
أبتسمت ورحنا أنه وياها، حرفيًا أجواء العرس تجنن الأغاني والرگص والهلاهل عرس عراقي أصيل أحلى عرس شافته عيني حيل حلو ومرتب وبي ونسه تاخذك لغير عالم بحيث ما أدري شوكت صار الليل..
3
أخذت گلاص ماي لـ فجر وشفت جسام واگف بصفها مبتسم وضيغم على جهه يسولف وياه تقربت أنطيتها الماي وهوَّ التفت عليها يباوعلها
-أن شاء الله المناسبه الجايه إلنا.
15
فتحت عيني بصدمه وهِيَّ التفتت عليه بأيدها الچفچير طگته على ظهره بكل قوتها، أبد ما ضحكتله ولا نصدمت وطگته حيل وهوَّ خرب ضحك مستحي..
8
أبتسمت فرحانه لأن چنت متأكده حيل يحبها جسام رجعت للعرس ويَـ كلارة اليضوج بيها ضيغم وهِيَّ مطنشته أبد ما ردت عليه، العروسه تخيل حرفيًا من كلشي بدله وترتيب ونزاگه
1
أمشي وأضحك على محاسن وبلقيس تنمرن على البنيه تنمر يبچي الصخر أشگد غيورات وحاسودات أنتبهت الهن هنَّ وبناتهن بيهن فد طبع حيل مو حلو من يشوفن بنيه حلوه بأي مكان أو بنيه نمدحت گدامهن ينگرصن ويضلن يطلعن عيوب بالبنيه
5
گولات وهلاهل وزفه وضحك ونسه وتعب حيل تعبنا بحيث تبدل الفرح للتعب أجيت أبچي حتى نمنا أنه وكلارة بدون عشى من التعب وگعدنا ثاني يوم من الصبح هم عبالك عدنا عرس لأن صباحية عرسان هواي خطار يجون وبنفس الوكت البيت خبصه وهوسه..
مرت الأيام حلوه وسعيده علينا مخبوصين بلش بيتنا يستقر وخفو الخطار، گعدنا على بايات الدرج نسولف أنه وكلارة وأنتبهت لـ ضيغم و وائل واگفين بالهول يتهامسون بس لأن قريبين منا گدرنا نسمع صوتهم التفتت كلارة ركزت وياي
ضيغم: خايب خل ناخذ السوط مالته ونحرگه.
1
وائل: غير يحرگنا وراه مستعز بي..
1
ضيغم: چا أحسن ما يكتلنا بي أصلاً هوّ متحلف بينا، شمدري أحنى حارگينا خل يختفي ونحرگ گلبه؟
4
ضحك وائل صافن يفكر بالفكره
-أييي أحسن خل نحرگه علمود يحترگ گلبه.
2
التفتو على شهگة كلارة وأنتبهو لوجودنا
-يممممه يتأمرووون على أخوووي!!!
2
ضحكت أباوعلها شلون تكبر المواضيع ضلت تدگ وتلطم
-يمممه يا يمه يردون يحرگون گلب أخوي
1
ضيغم: ماخذين ورثه أخوچ؟
كلارة: خايب وعلي أله أگله
عافتهم وراحت بسرعه مستعجله تدور حُرّ و وائل وضيغم ضاع بيهم المشراد ما يعرفون وين ينطون وجوهم وأنه ميته من الضحك عليهم يردن يوصلولها ماكو طارت
4
تدور على حرّ وتصيح
-وييينه حرّ وييينه خل يشوف المصيبه هاي
رحتلها أضحك طبت لحُرّ جاي يشرب چاي بغرفته گاعد وبأيده تلفونه
-حُرّ الحگ وائل وضيغم يردون يسوون بيك مصيبه.
3
باوعلها بأستغراب عگد حاجبه وعاف الچاي
-شكو خير يا ستار؟
1
فحطانه تقربت يمه تسولف بحماس
-سمعت بهاي آذني وشفتهم بهاي عيني باچر ياكلها الدود وائل وضيغم يخططون عليك يردون يحرگون تراثك وعزيز گلبك "السبعه وسبعين"..
11
رفع حاجب وگام من مكانه
-ليش يحرگونه؟
-يگولون علمود نحرگ گلبه لأن يحبه ومعتز بي!
-أيا نواقيص
-ترضاها خويه ترضاها عساهم بالحمس يردون يحرگون گلبك يا بعد گلبي..
13
-وينهم همَّ؟
-بالهول أشگد حاولو يمنعوني بس ما رضيت شلون أرضى گدام عيني يقهرونك!
1
أبتسم على كلامها وحرگة گلبها تتونس من تكبر المواضيع جر السوط معلگه ورا الباب ونكثه يهز براسه
-بيهم خير ويدللون.
5
كتمت ضحكتها كلارة فرحانه لأن راح ينكتلون وطبعًا أنتبهت ما شاء الله بيناتهم ميانه كلش حلوه ولا واحد يستنكف من الثاني، طلعت وره حُرّ وكلارة جاي تعيش أحلى مراحل السعاده حُرّ يطگ بَـ وائل بالسوط وائل ميت من الضحك محتار منين يشرد لأن بين حُرّ وبين الحايط
-ناقص تريد تحرگ گلبي؟
وائل وجهه صار أحمر من الضحك وبأيده يصد ضربات السوط
-لا وعلي لا أشاقه عمي أشاقه..
8
وحُرّ يخزر بي بس طيف الأبتسامه أشگد ما حاول يخفيه ضل مبين على وجهه طلع ضيغم يركض من الهول وحُرّ من شافه طفر طلع وراه مستعجل وضيغم صوت ضحكه شعلاته شهرنا
حُرّ: تعال لك قندره
ضيغم: لو تموت گدامي هسه ما أجي صدگ چذب
جسام واگف بالحوش يدخن حُرّ بسرعه آشرله
-كضه.
+
بهت وجهه ضيغم من التفت وشاف جسام وراه شمر الجگاره وعت ضيغم من ياخة ملابسه جره عليه وحضنه من ظهره بثنين أيديه لازمه بقوه وما فلته أبد رغم ضيغم ضل يغلط ويحاول يتملص من أيد جسام بس ما عافه وضل مچلب بي
2
بحيث ضيغم من خوفته يركض وجسام مچلب بي ضحكت على ضيغم وهوَّ يصيح
-خرب بيك جسام ولك صاحبك أنه صاحبك
2
وحُرّ راح عليه مبتسم بشماته والسبعه وسبعين بأيده
-عبالك ما أكضك؟
ضيغم هز راسه يجر روحه من جسام
-لا حرّ لا مو أنه صاحب الفكره
-أنه مو بس على هاي السالفه، صارلي هواي ساكت عنك وعن ذاك السگط ماكو سالفه زفره ما سويتوها وغلست وبلأخير تسوون سوالفكم الخايسه عليَّ؟
ضيغم فر راسه لجسام وزمخ
-خااااب هدني وخر عني شچلبت چنك علچ بطانيه!!
11
وجسام يضحك على حرگة گلب ضيغم تقرب عليه حرّ يكتل بي، وضيغم يحلفه وميت من الضحك بس يريد يفلت روحه من بينهم جسام كاضه بقوه بثنين أيديه وحرّ يكتل بي..
3
-فجر: طفيت الطباخ وغسلت گلاص صبيت بي چاي ورحت لغرفة حرّ الباب مفتوح على النص وبدون لا أدگ الباب گدرت أشوفه وأشوف غرفته گاعد ومنتچي على الحايط الوراه وبصفه باكيت جگايره يدخن
2
عگدت حاجبي وركزت عليه يرفع أيده ينش گدام وجهه
-أستغفر الله
5
أستغربت تصرفه ماكو گدامه شي ليش عبالك يريد يوخر شي من گدامه، بس من ركزت زين يصفن والنوب ينش گدام وجهه عبالك يوخر شي من باله، منظر زاعجه وما يريد يضل عالگ باله!
8
ضيگت عيوني وفتحت الباب وطبيت للغرفه رفع عينه وتحمح قدمتله الچاي عيني بعينه
-شتنش؟
-ما أنش هيچ.
أخذ الچاي من أيدي حطاه گدامه وآشرلي على جهه
-أگعدي
گعدت وهوَّ شرب الچاي صافن
-الذهب الابسته غزالة منين؟
-ذهبنا.
-چا ليش هِيَّ لابسته؟
-ما فهمت يعني أنتَ ما راضي تلبس منا؟
-لا شنهي الحچي هذا شلي غرض، بس أستغربت هِيَّ مو عدها ذهب شو ما شفتها لابسته ليش؟
-لا خويه منيلها ذهب خطيه كلشي ما عدها..
-لا صدگ!
خويه چا أنتَ مو تدري بيت رياض شسوو بيها؟
-أدري بس چانت خاتون تسولفلي أهلها المربينها طاهر وهجران خوش چانو مدللينها وتسولفلي چانت هجران ما مقصره بيها بشي والچنت أظنه ذهب أمها وفلوس أبوها عدها ما چنت أدري رياض الخسيس ماخذهن.
+
-خطيه چانو يعاملونها خدامه رغم نص الجاي يعيشونه بخير أهلها گبل لا يموتون هجران چانت تجمع شكثر ذهب وكله لـ وردة وطاهر حارب علمود دراستها لأن يدري بيها تنوكل خلافهم، وفلوسه وماله كله چان يگول كل مالي وحلالي وتعبي لوردة خلافي..
-لا يا سگط يا رياض، چا تعبهم هذا كله علمودها تالي ياخذونه من أيديها البني آدم شلون ينطيه گلبه ياخذ تعب غيره؟
نمرد گلبي من رجعنا فتحنا قصة حياتها، جر حسره متنهد ومقهور شرب چايه وضلينا نسولف عن حياتنا وسولفلي عن شغله خلص الگلاص أخذته ورجعت للمطبخ غسلته وطلعت
هل أيام كلها أحس جسام متغير مو لأولي، ومنعزل على روحه لا يطلع ولا يطب ملتهي دوم وحده وأغلب الوكت الگاه گاعد وحده ساكت وصافن ويدخن مهموم ودوم بالليل أشوفه ما ينام وأحس بي قهر وغصه..
1
قادر أنطاني علاگه سوده ما أعرف شنو بيها
-بلا آمر عليچ خويه وديها لجسام.
هزيت راسي وأخذتها من أيده، قليل كلش أنه وجسام هل فتره نحچي ما أدري شبي أحسه مكسور وحيل متعوب دگيت باب غرفته وأجاني صوته
-تعال
فتحت الباب وأول ما صارت عيني عليه متمدد على فراشه ويباوع للسگف يدخن ويجر حسرات، التفت على الباب بعيونه بدون ما يدير راسه بنظرات متروسه ملل أول ما شافني عدل گعدته مبتسم
-هلا
أبتسمتله وهوَّ گام من الفراش يحچي بلهفه
-عبالي قادر ما أدري أنتِ..
قدمتله العلاگه وحچيت بهدوء
-هوَّ قادر وداني لغرفتك، بأيدي هاي العلاگه الك.
+
أبتسم وأخذها من أيدي وبنبره متروسه سعاده رد
-مشكوره فجر
-ههههه من قادر هاي مو مني
-أي چا هم لازم نتشكرچ غير جبتيها.
أبتسمتله وصفنت على ملامحه مركزه بيهن صاير عده لون اسود جوه عيونه من التعب وعيونه ذبلانه جر حسره بتعب أحس حالته كسرت خاطري الحزن تارس ملامحه بلعت ريگ وهمست
-محتاج شي أنه راح أروح؟
صفن بالفراغ هز راسه وتنهد
-ما محتاج شي، بس فجر..
1
رفعت عيني أباوعله منتظرته يسولف مسح وجهه بتعب
-أنه تعبان فجر هواي أنه تعبان!
2
صفنت عليه أعصر أيدي بأيدي الثانيه متوتره أدري بمشاعر جسام الي بس چنت دوم مغلسه سكتت وهوَّ تنهد بقهر
-سمرتي شوكت تصيرين مرتي؟
11
صفنت عليه ودگ گلبي من أعترافه دنگت عيني وبهدوء نطقت
-تلگه التستاهلك
-أريدچ أنتِ.
7
مسحت وجهي مستحيه بالگوه حچيت
-ياريت ما نفتح الموضوع هذا بعد.
5
كملت كلامي وطلعت بدون لا أشوف ردة فعله الليله كلها ما نمتها ضليت أتگلب بفراشي مكسور گلبي على جسام أحس يستاهل وحده تموت عليه، أتگلب بفراشي ميته قهر عليه وگعدت ثاني يوم حيل مالي خلگ وبالي شارد وره العصر صاحني حُرّ
فتحت باب غرفته
-ها خويه
-تعاي فجر أريد أطيچ شي ودي لغزالة.
أبتسمت من شفته طلع علبة ذهب وزادت أبتسامتي من شفته برگع وجه من ذهب تطلع من عنده بس العيون يخبل حيل حلو ذهبي ويخبل على الوجه قدمه الي مبتسم
-أنطي الها وأن شاء الله هاي مو آخر مره أجيبلها.
6
-عمت عيني حنين ما توقعت تضل هيچ تفكر بالموضوع!
-ضليت أفكر شلون ما عدها ذهب مثل البنات ورحت أشتريت الها حسيت هذا يلوگلها.
4
-ههههههه علمود عيونها مو؟
1
ضحك ودنگ عينه مستحي
-أي يلوگلها.
أبتسمت وأخذته لوردة وهوَّ هواي حلفني أگللها من عندي بالبدايه ما قبلت تاخذه لحد ما لحيت عليها هواي فرحت بي حيل لبسته وتشوفه لكلارة والي أستعزت بي وتشكرت مني هواي.
+
-وردة: لازمته بأيدي أباوع عليه فرحانه أستعزيت بي حيل وحسيته شي ثمين عليَّ لأن أول هديه تجيني بحياتي..
من حاچاني حُرّ على الدراسه وجابلي كتب تشكرت منه هواي وراويته اله فرحانه
-شوف هذا البرگع مال الوجه فجر جابته الي.
2
أبتسم يباوع عليَّ وهز راسه
-حبيتيه؟
-متت عليه حيل حلو..
1
أبتسم ساكت مره طلعت للهول أباوع لـ بلقيس مقهوره من خبثها وحقارتها وشلون تشمر كل الشغل براس فجر، رغم فجر أبد ما تسكت وشخصيتها حيل قويه بس بلقيس تموت على المشاكل بحيث فجر جزعت وبلقيس ما جزعت
عگدت حاجبي مقهوره وأفتر وره فجر
-ليش تخلينها تخلي الشغل براسچ؟
-تعبت ومليت من الحچي
-تعاركي وياها هيچ بشر ما يفيد وياهم غير بنفس المعامله.
عافت كلشي من أيدها والتفتت عليَّ تسولف وياي
-وردة مليت، مليت من كلشي صارلي سنين على هاي الأسطوانه ما تجزع ما تمل من المشاكل وهنَّ وحده ثنين تعبت من المشاكل ومالي خلگ أبد باليوم تصير خمس ست مشاكل جزعت..
-هيچ يتمادن!
-تخيلي ضليت أفضل الكراب والشغل ولا المشاكل، راح أتخبل عمري كله گضيته مشاكل من فتحت عيني للدنيا..
-الله يساعدچ خلي أشتغل وياچ أنه
-لا روحي كملي دراسه.
تنهدت بضوجه، حُرّ قبل چم يوم جابلي كتب الثالث متوسط وحيل فرحانه ومتحمسه أقرا وأرجع لوره عسا ولعل تفيدني بوكت الدوام، طلعت للحوش واگفه على صفحه أباوع على النسوان
بلقيس: كلارة ولي جيبي مواعين من المخزن الوره البيت.
1
كلارة: رجلي طابه بيها گزازه ما أگدر أمشي..
قيس: قندره گومي گومي وبطلي هاي السوالف
1
وردة: ما تشتغل عدچ، تآمري على بناتچ مو علينا
1
بلقيس: خايبه أشگد صلفه أنتِ، روحي إيناس صيحي لفجر خل تجي تطلع المواعين من المخزن.
1
وردة: فجر جاي تشتغل كافيچ خبث وحقاره
بلقيس: چا ولي أنتِ جيبيهن
2
وردة: رايحه علمود فجر مو علمودچ أنتِ!
6
ما أهتمت تفر بأيدها وكملت شغل، نار أشتعلت بگلبي من القهر تمنيت أملخها بس أحنى بالگوه نريد نبعد المشاكل عنه فـ تغاضيت وگلت هنَّ ماعونين أحسن من الهوسه والخبصه أجيبهن وأسد حلگها..
المخزن صاير وره البيت ومفصول منه راكنينه على جهه وحاطين بي كل الغراض اليردونها، لمن وصلت للمخزن طلعت المواعين التريدهن بلقيس وماكو غلطه ما غلطتها عليها بگلبي مقهوره
1
فزيت وطاحت الصينيه من أيدي على صوت
-يبنيه
التفتت مستغربه وعاگده حاجبي زلمه غريب واگف بصف باب المخزن ويباوع عليَّ همست بصوت بيني وبين روحي أباوع عليه عاگده حاجبي
-دخيلك ربي
2
أبتسم وأتلفت بالمكان يباوع خاف يجي أحد، رغم المخزن هذا معزول عن البيت صاير خلفه
-بس خل أسألچ سؤال
2
خزرته مخنوگه وخايفه أتراجف
-أمشي ولي لا أصيح عليك حُرّ أخليه يطيح حظك.
حچيت كلامي وبدون ما أناقشه ولا أسمع جوابه طلعت من المخزن بسرعه گلبي راح يوگف من الخوف أريد أرجع للبيت وهوَّ بعده مكمل حچي وراي
-ما ردت منچ شي، ردتچ تدليني أنه ضايع!
1
التفتت عليه بأستغراب المخزن بعيد چم متر عن بيتنا وأنه محتشمه وما طالع مني شي، خزرته ورديت التفتت علمود أمشي للبيت طبك مرض وضيعتهم شلي غرض أنه چا ماكو واحد بالديره تسأله غير وردة ضل ضايع..
التفتت على صوت عالي وراي على ركض جمدت بمكاني من شفته راح لغير جهه يركض بكل حيله وبخوف وطب بين البساتين ما ينشاف، رجعت أباوع لجهة البيت على صوت صمد واگف بالباب مخنزر يباوع عليَّ عيونه ينگط منهن شرار
شبعني مسبه وهوَّ يمشي بأتجاهي، ولده راحو يركضون وره الزلمه الغريب أجاني صمد ورافع أيده يسب بيَّ وأنه كلشي ما مفتهمه، ما أدري شوكت طاحن المواعين من أيدي وباقيه بس فاكه عيوني وجامده ما فاهمه شجاي يصير كلشي ما مسويه أنه؟؟
+
ولده أول ما ركض الولد الغريب ركضو وراه جراني من أيدي صمد ومشى بي للبيت صاير بركان يغلط ويسب بيَّ وبأهلي هوَّ يمشي بس عبالك يركض ويجر بي لحد ما طب للبيت وأجه يطلع من الباب الرأيسي وبيتنا كلهم واگفين يتفرجون
جرتني فجر من أيده مرعوبه
-ها عمي خير؟؟؟
صمد يأشر عليَّ مفرفح وجهه صاير دم گد ما أحترگ
-السـ*** شفتها واگفه ويَـ زلمه وره البيت الولد ركضو وراه وأنه جبت العايقه هاي أربيها أخوچ ما أنطاها تربيه.
4
يحچي مفرفح وأنه جامده من الصدمه نسيت عندي لسان وما نطقت بحرف واحد لحظه مرعبه مرت عليَّ جراني من دشداشتي يسحل بيَّ وطلع من البيت وفجر تركض وراه تريد تجرني منه ما ملحگه طاير لحد ما وصلنا لباب الحوش أيده زرفت زندي
فجر تصيح وراه وأجت بسرعه تلهث وجها عرگان وگفت گدام الباب
-عوفههههها لا وحگ علي الم الوادم عليييك
عتها من أيدها بقوه ودفعها من الباب على جهه
-رايح أغطها بالشط وأخنگها هناك چدام الوادم علمود الديره كلها تعرف تربات حرّ خيسه..
5
-كلارة: يحچي بعصبيه وصوت عالي شهرنا شهيره ويجر بوردة ويكفخ بيها على راسها وهِيَّ مدنگه تريد تحمي روحها من طگاته الظالمه ماكو طلع بيها من البيت لأن ما گدرتله فجر بلقيس تكضها وتعت بيها كل ما تروح لوردة تفرغها
طبت لجوه للبيت تدور على عبايتها مفرفحه وصمد طلع بوردة وصوته شعلاته يسب ويكفخ بيها فكيت الباب أباوعلهم وأبچي، يجر بَـ وردة من ياخة هدومها من وره وراسها ما تگدر ترفعه لأن يجرها جر وكل كفخه يطگها على راسها روحها تشوغ وتتوسل بي علمود يعوفها مو لأن راح يشمرها بالشط لأن رجليها طالعه لأن يسحل بثوبها ويجر بي
يجر بيها للشط ويغلط ويسب بتربية حرّ، ورجليها طالعات وينرفع الثوب كل ما جراه يجرجر بيها فرفحت بس تريد تجر روحها منه وتستر روحها بشي ماكو ما هدها ولا لحظه لحد ما أخذها للشط الگدام بيتنه بعيد شوية مو هواي
صرخت مرعوبه أبچي
-رااااحححح يشمرررررههها بالشط!!!
التفتت على فجر حاطه العبايه على راسها بأستعجال وتريد تطلع من البيت تلحگهم، وگف گدامها لؤي أبن صمد كاض الباب
-أكسر رجلچ لو طلعتي
1
فجر إذا تعصبت ما تشوف گدامها وهذا الفايخ يهدد بيها زمخت بوجهه بعصبيه
-خايب توخر من وجهي لا اليوم أگلب الصوبين عليكم؟؟؟
-حسچ ما أسمعه لا أوديچ وراها يغطچ بالشط، تربيه زفره مربينچن مالچن رداد عايقات ودايحات.
تخشبنا بمكانا من سمعنا صوت صرخه بس مو صوت وردة الچنه متوقعينه صوت صمد وهوَّ يصرخ بصوت عالي يخوف
