رواية ارواح هائمة الفصل التاسع 9 بقلم آثر توفيق
الحلقة 9
بدات الفتيات فى الاندماج فى المجتمع الجامعى وتكوين صداقات جديدة والانطلاق وكانت نرمين رمزا للجدية والجمال اما داليا فلا زالت هى الدجاجة المرعوبة التى تحتمى دوما بنرمين اما باسنت فقد اصبح وجود صديقتيها بجوارها يحميها من الافراط فى الطعام ويحافظ على رشاقتها التى اكتسبتها بشق الانفس ( انفسهما لا هى ) فهما من تعبا حتى تصبح فتاة رشيقة بعد ان كانت ملكة البدانة المتوجة
وتعرضت نرمين بطبيعة الحال لمعاكسات كثيرة وقد كانت تتغاضى احيانا فاذا انقطع حبل الصبر صدر منها رد فعل لا يمكن توقعه وفوق ذلك كانت تتصدى لمن يعاكس صديقتيها وكانت تتعرض لمحاولات التودد حتى من داخل شلتها من محيى الشاب الميسور صاحب الجسد الرياضى الذى يقضى اغلب اوقاته فى الجيم ويهمل فى الدراسة اعتمادا على الكورسات ولا يحمل للدنيا هما
محيى :: نرمين انا عاوز اتكلم معاكى كلمتين على انفراد
ذهبت لتقف معه منفردين قريبا من الشلة فنظر الى عينيها وقال برقة وصوت يمتلئ عذوبة
محيى :: نرمين انا معجب بيكى قوى انتى اجمل بنت شفتها فى حياتى انا عرفت بنات كتير قبل كده لكن اول مره الاقى نفسى مشدود لواحده بالشكل ده تبقى انتى
اخذت تنظر اليه بلا مبالاة ولم ترد فقال مندهشا
محيى :: نرمين انتى ساكته ليه ؟
نرمين :: انت خلصت ؟
محيى :: خلصت ايه ؟
نرمين :: الاسطوانه مش المفروض تكمل ؟
محيى :: اكمل ايه انتى مش المفروض تتجاوبى معايا ؟
نرمين :: اتجاوب معاك فى ايه وازاى وليه ؟
محيى :: يعنى انتى ايه رايك فيا
نرمين :: هو انت فى سنه كام ؟
محيى :: ايه السؤال الغريب ده انتى عارفه انى معاكى فى سنه اولى
نرمين :: ااه يعنى لسه صغير ولسه داخل الجامعه علشان تحب وكده يعنى
محيى :: طيب ايه المشكله ؟
نرمين :: المشكله عندى انا اصلى جايه الجامعه علشان اتعلم بابا باعتنى الجامعه وهو واثق فى تصرفاتى واخلاقى ولعب العيال ده انا ما اعرفهوش
محيى :: طيب ليه ما يبقاش تعليم وبرضه حب ؟ ايه المانع لما نحب بعض وبعدين لما نخلص ممكن نتخطب ؟
نرمين :: وممكن لا طيب ايه المانع لما نتعلم ونخلص وبعدها لو عاوز تخطبنى تروح تطلبنى من اهلى وبعدها نحب بعض
محيى :: افرضى ما حصلش حب بعد الخطوبه
نرمين :: وافرض ما حصلش خطوبه بعد الحب باقول ايه يا محيى ايه رايك انا ممكن اعتبر انى ما سمعتش حاجه من الكلام الفاضى ده وخلينا اصحاب وسيبك من الكلام ده او على الاقل لو عاوز تتسلى يا ابن الناس يبقى بعيد عنى اصل انا بنت ناس مش بتاعة تسالى
_________________
لم يكن يعرف انه سيضطر للانقطاع عن الكلية لكل تلك الفترة الطويلة ولكنه اضطر للبقاء فى المصنع لتوفير طلبات عديدة التزم بها حتى فى الايام التى يتفرغ فيها احمد للمصنع كان وجود الاثنين ضروريا جدا .
واخيرا بعد ما يقرب من شهرين حصل على يوم اجازة فذهب الى هناك كان يتوق لبعض الراحة والمرح وملاقاة الاصدقاء وكان يمنى النفس ان يراها . لم يستطع نسيانها طوال تلك الفترة برغم انه بالكاد رآها لدقائق دون حتى ان يكلمها ولكن شيئا ما تحرك فى اعماقه من تلك النظرات البريئة دقات فى القلب عزفت لحنا جميلا ظل يصدح فى خياله طوال تلك الفترة وهاجس يحدثه ان تلك القصة لم تنتهى وانها بالكاد تبدا اول فصولها
جلس على احد نوافذ المكتبة مع امانى اعز صديقاته وربما هى الوحيدة التى لم تبدا علاقتهما او تتخللها قصة حب كانت صداقة نظيفة قوية وكانت فيها امانى اكثر من دعمه ووقف بجواره وآمن بقدراته وكانت غاضبة من اهماله للدراسة ولكنه كان لا يبالى كثيرا
ثائر :: انا مش فاضى للمذاكره ورايا حاجات اهم المصنع كله فوق كتافى وخلاص احمد حيخلص السنه دى ويشيل
امانى :: يا ثائر والكليه انت دبلر بتعيد حتسقط السنه دى كمان ؟
ثائر :: يا ستى مره من نفسى انا اللى اسقط كل مره هم اللى يسقطونى السنه دى بقى انا مصمم اسقط بمجهودى
امانى :: انت بتتريق يا روح امك انا حاتشل منك
نسى ما قال لها فجاة وما كان ينوى قوله ونسى ايضا ما قالته بل انه نسى حتى انها بجواره حين رآها مقبلة مع صديقاتها ووجد نفسه حين اقتربت يغنى دون ان يشعر
اين من عينى حبيب ساحر
فيه عز وجلال وحياء
واثق الخطوة يمشى ملكا
ظالم الحسن شجى الكبرياء
عبق السحر كانفاس الربى
ساهم الطرف كاحلام المساء
___________________
كانت تخطو وسط صديقاتها انيقة كعادتها واثقة من نفسها تسير بلا تسرع ولا تمهل بين بين بخطوة جادة لا تعرف التدلل متجهات الى حيث تقف رحمة وباقى الشلة حين لمحت شابا شديد الاناقة يرتدى بذلة كاملة وربطة عنق ويضع على عينيه نظارة شمسية انيقة وبجواره فتاة اقل ما توصف بها انها جميلة وكانا يتحدثان سويا حتى اقتربت منهما لتلاحظ انهما لا يتحدثان بل ان الشاب الانيق يغنى وماذا يغنى ؟ انها رائعة الاطلال التى تعشقها . ابطات الخطو قليلا حتى سبقتها صديقتاها فسمعته يقول
واثق الخطوة يمشى ملكا
ظالم الحسن شجى الكبرياء
توقفت وفتحت حقيبتها تعبث فيها بلا هدف وهو يكمل
عبق السحر كانفاس الربى
ساهم الطرف كاحلام المساء
اكتفت بذلك واتجهت الى الاصدقاء
نرمين :: مين ده يا رحمه ؟
رحمة :: مين ؟
نرمين :: اللى قاعد هناك لابس بدله وكرافت وبيغنى لام كلثوم هو ده معيد ؟
رحمة :: ده اللى هناك ده ؟ ده ثائر انتى نسيتيه ؟
نرمين :: انا اول مره اشوفه
رحمة :: لالا انتى شفتيه قبل كده اللى كنتى فاكراه شحات ايه حكايتك معاه كل مره تسالى عليه ؟
نرمين :: لا حكايه ولا روايه كل الحكايه انه بيغنى الاطلال ودى اجمل اغنيه لام كلثوم وانا باموت فيها
باسنت :: ام كلثوم ؟ هو لسه فيه حد بيسمع ام كلثوم ؟
داليا :: يا جاهله اللى بيفهم فى الفن يسمع ام كلثوم طبعا بس هو صوته جميل ؟
نرمين :: لا ابدا هو صوته مش جميل ولا حاجه بس عنده احساس زى ما يكون الكلام طالع من قلبه وشكله بيحب البنت اللى قاعده جنبه
رحمة :: لا ابده ده كل شويه مع بنت شكل دى حتقوم دلوقت تقعد واحده تانيه مكانها اصل ده الدون جوان بتاع الجامعه
نرمين :: اسمه دون خوان يا جاهله دون خوان دى فالنتينو ساحر النساء اصلى قريت الروايه دى اكتر من عشر مرات وشفتها اكتر من تلات افلام بس كان احلى واحد فيهم بتاع الان ديلون. كان جميل قوى
باسنت :: مين اللى جميل الان ديلون ؟.
نرمين :: الفيلم طبعا انا اصلى باحب الافلام التمثيل قوى
داليا :: وانا كمان باحب الافلام قوى
رحمه :: طيب ما تشتركوا فى جماعة المسرح
نرمين :: لا ده حيعطلنا عن الدراسه
رحمه :: ابدا ده ليه مواعيد ما تعطلش عن الدراسه بس لازم تاخدوا اذن بابا الاول
باسنت :: مافيش جماعة المطبخ ؟
_________________
مرت من امامه كالحلم وهى يغنى كالمسحور نسى كل الموجودات ونسى انه فى الجامعة ونسى امانى وحتى نسى نفسه حتى ( اااااااه )
امانى :: انت حيوان يا بنى ادم ؟ قاعده جنبك واحده زى القمر وانت سايبها وعمال تغنى لل .... لل ...... للغزاله اللى تهوس دى ؟ يا لهوى البنت دى حلوه بشكل زى القمر
ثائر :: لا وايه ماشيه واثقه من نفسها فعلا واثق الخطوة يمشى ملكا
امانى :: بس خد بالك يا ثائر البنت دى لسانها طويل وايدها اطول
ثائر :: انتى تعرفيها ؟
امانى :: باشوفها بس مش صاحبتى كل كام يوم تمسك واحد تمسح بيه الارض بنت جد قوى وما بتخافش من حد باباها اظن رتبه جامده ومسنوده مره مسكت ولد ضربته بالقلم وجابت الامن والواد يا عينى اتبهدل وجه اعتذر لها قدام كل الطلبه
ثائر :: بنت جدعه بمليون راجل زيك كده يا امونه
امانى :: ايوه كل بعقلى حلاوه باقول ايه بابا عاوز يشوفك
ثائر :: ايه حيوافق على خطوبتنا ؟
امانى :: خطوبتنا ايه انا متقدملى واحد برقبتك بس بابا عاوزك تسال لنا عليه
ثائر :: على اساس انى فاتح مكتب تحريات واللا اكونش خلفتك وناسى
امانى :: يا واد بابا بيثق فيك ومعتبرك ابنه وانت عارف ان سامح اخويا لسه فى اعدادى وبابا طلع معاش وكبر وصحته على قده مين يعنى اللى يراعينى غير اخويا حبيبى
ثائر :: هو مين اللى بياكل بعقل التانى حلاوه خلاص اتسجدت والامر لله اجيلكم النهارده يا امونه
امانى :: حتيجى امتى
ثائر :: اول ما تحطوا العشا على السفره تلاقونى بارن الجرس
#ارواح_هائمة
اصبحت تراه كل اسبوع تقريبا بعد ان استقرت امور المصنع وكل مرة كانت تراه يغنى دون ان تفطن انه يقصدها وفى كل مرة كانت اغانيه من روائع الفن التى تعشقها وكانت تعود الى منزلها لتنفرد بنفسها فى حجرتها تتذكر ما تغنى به وتكتب كلماته على هوامش اجندتها
يا شعر ليل يا ليل طويل وفارد ضفايرك على القمر
داليا :: بس هو مش امور يعنى
لم تشعر بها حين دخلت تمشى على اطراف اصابعها . كانت نرمين فى فراشها تكتب ما تغنى به فتاها ففاجاتها داليا واطلت من خلال كتفها لتقول ما قالته وتضيف ساخرة
داليا :: هو ما عندوش حاجه عن الشعر الدهبى ؟ اظن كده بانت الرؤيه
نرمين :: رؤية ايه انتى بتتكلمى عن ايه ؟ انا مش فاهمه
داليا :: مش فاهمه عن الدون خوان دى فالنتينو بتاعك اللى كان بيغنيلك الاغنيه دى النهارده وضيع علينا المحاضره تانى قصدى عاشر
اعتدلت نرمين ونظرت لداليا متنمرة وقالت
نرمين :: بت انتى ايه اللى بتقوليه ده ؟ انا ما فيش حد فى دماغى اصلا لا ده ولا غيره وبعدين الدكتور هو اللى غلطان هو اللى قفل المدرج قبل ميعاده
داليا :: الدكتور هو اللى غلطان وثائر بيه ما يغلطش ابدا مش عارفه ايه اللى بيعجب البنات فيه رغم انه مش حلو مش وسيم هو يعنى شيك انما من غير اللبس اللى بيلبسه يبقى عادى جدا
نرمين :: ليه مش فاكره اول يوم لما كان لابس زى الشحاتين وبرضه البنات كانت حتتجنن عليه ؟ يا بنتى القصه مش لبس القصه اسلوب فى الكلام النظرات الابتسامه الواثقه الرجوله ده راجل حقيقى
داليا :: علشان كده بيعاكسك ومبسوطه وبتقعدى قريب منه لحد ما يخلص الاغانى اللى بيعاكسك بيها بس بصراحه اسلوبه فى المعاكسه يجنن واحد غيره كان ابو ورده طرقع على وشه شكلك وقعت يا جميل
احمر وجه نرمين خجلا ورغما عنها ابتسمت واشاحت بوجهها
نرمين :: عيب كده يا داليا الله انا عمرى ما فكرت فى الحاجات دى احنا لسه صغيرين
داليا :: اااه طالما ابتديتى تتكسفى من دوللى حبيبتك يبقى الموضوع كبير وماله هو عيب لما يكون جد ؟ مش بابا محمود حب ماما كوثر وهى لسه طالبه ؟
نرمين :: بابا راح على البيت على طول دخله من بابه زى ما بيقولوا وبعدين ايش عرفك انه قصده عليا انا يمكن يكون قصده عليكى واللا بيغنى وخلاص
داليا :: هو انا شعرى ليل وفارد ضفايره على القمر ؟ انا شعرى تاج من الذهب طيب ايه رايك احنا نعمل خطه نعرف بيها انا وانتى وباسنت احنا نقعد قريب منه ندردش عن الاغانى والمطربين وكل واحده تختار مطرب من القدام اللى مش معروفين قوى اكيد بعد يومين حتلاقيه بيغنى اغنيه للمطرب بتاعك
نرمين :: مش فاهمه
داليا :: افهمك يعنى مثلا مثلا انتى تقولى انك معجبه بعبد المطلب وانا اقول على واحد تانى مش كل الناس عارفاه حتلاقيه يومين تلاته بالكتير حيدور على اغانى المطرب اللى انتى قلتى عليه ويغنيها يبقى بانت انه دور عليها مخصوص علشانك فهمتى ؟
وفى الصباح جلست تشرح خطتها
داليا :: فهمتوا حنعمل ايه ؟ انا فكرت اننا نختار مطربين شعبيين علشان تبقى اصعب والبرنس اياه شكله مالوش فى الشعبى انما علشان الورد
نرمين :: ايوه بس الشعبى ده فيه اختلاف الشعبى اللى انا اعرفه غير اللى انتوا تعرفوه الشعبى بالنسبه لى قنديل كارم العزبى رشدى انما انتوا بقر اكيد بتسمعوا حاجات تانيه ومش فاهمين انا باقول ايه
داليا :: يا سلام هو انتى لوحدك اللى بتفهمى ؟ انا كمان باموت فى العزبى
نرمين :: اكيد انتى يا بسبوسه بتموتى فى الهمبرجر بالبيض
وقبل ان ترد باسنت ردا لاذعا هتفت داليا
داليا :: خلاص اهه جه
حضر ثائر ومعه احدى صديقاته وجلس يشرب قهوته قريبا منهم وبدا يغنى دون ان يبدو انه رآهم اغنية عيون القلب لنجاة وتوقف ليلتقط انفاسه فقالت نرمين
نرمين :: انا الاغانى الجديده دى حتشلنى مش عارفه مافيش فن خالص
داليا :: مافيش احلى من القديم حتى الشعبى
باسنت :: قوليلى انتى اكتر واحد بتحبيه مين فى الشعبى بتاع زمان
نرمين :: قنديل طبعا ده الحنجره الذهبيه
باسنت :: مين قنديل ده ما اعرفهوش هو ده ابو محمد قنديل
نرمين :: هو محمد قنديل يا جاهله وانتى يا داليا
داليا :: انا بقى باموت فى المواويل وبالذات العزبى فنان
نرمين :: الله عليه لما يرتجل بس برضه قنديل احلى
باسنت :: انا بقى باحب الجديد ده اسمع عبده الاسكندرانى
نرمين :: شيلوا البت دى من جنبى
سمعوا بعدها بلا انتظار ثائر يغنى رائعة الفنان محمد قنديل
سحب رمشه ورد الباب كحيل الاهداب
نسيت اعمل لقلبى حجاب وقلبى داب
وبعد ان انتهى نظرت له باسنت متنمرة وقالت
باسنت :: صوتك وحش
ابتسم ولم يعقب او يهتم هو او رفيقته التى ابتسمت بلا مبالاة بينما لكزت نرمين باسنت بكوعها فى جنبها بقوة وقالت محالة تلطيف الجو
نرمين :: لا بس عندك احساس زى ما يكون الكلام طالع من قلبك
ثائر :: ميرسى يا انسه
طالت النظرة بينهما وساد صمت قطعته باسنت قائلة بمرح
باسنت :: انا كمان عندى احساس قوى احساس بالجوع
نرمين :: هو انا لو قتلتك اتحاكم ؟ اظن اخد نيشان
داليا :: انا بقى اللى عندى احساس رهيب خايفه اقول عليه
نرمين :: حاسسه بايه انتى كمان الله يخرب بيوتكم
داليا :: حاسسه ان المحاضره ضاعت علينا
انطلقوا بسرعة بينما نظر ثائر لساعته وانطلق مسرعا وسبقهم فى الصعود وحين وصلوا وجدوه واقفا مع الفراش وباب المدرج مفتوح
ثائر :: بسرعه انا خليت جمعه يفتح لكم الباب بس من غير صوت علشان الدكتور ابتدى
___________________
انتهى العام الدراسى ونجحت الفتيات بتقديرات جيد جدا وان اختلفت الدرجات وجاءت نرمين فى المقدمة طبعا ولكنه كان صيفا قاسيا قضت كوثر اغلبه فى المستشفى تدخل وتخرج لتعود ثانية وعند بداية العام التالى كانت كوثر ملازمة للفراش بعد مغادرتها المستشفى منذ يومين فلازمتها نرمين وحاولت داليا ايضا البقاء
نرمين :: حنقعد احنا الاتنين ؟ لازم تروحى تشوفى الجدول ولو فيه محاضرات احضريها ونذاكرها مع بعض
داليا :: لكن انا عاوزه اتطمن على ماما كوثر طيب روحى انتى وانا استنى
نرمين :: وبعدين .. روحى بقى بلاش دلع ولو ماما كوثر حتفضل تعبانه حنمشيها مع بعض يوم ويوم
وهكذا ذهبت داليا وحيدة لاول مرة وهناك التقت باسنت ومعها صديقة جديدة
باسنت :: اعرفك يا ستى بواحده من اعز اصحابى داليا العطار ودى بقى جارتنا من سيدى بشر بس حقوق امال فؤاد
امال :: تشرفنا انا كنت باشوفكم السنه اللى فاتت بس ما كانش فيه فرصه نتعرف على بعض
باسنت :: تصورى يا داليا امال ساكنه فى العماره اللى جنبى وما اعرفهاش لحد ما قابلتها صدفه على الترام النهارده
داليا :: فرصه سعيده قوى يا امال معلش انا متلخبطه شويه
باسنت :: مالك صحيح اومال فين نرمين ؟
داليا :: ما قدرتش تيجى علشان قاعده مع ماما كوثر
باسنت :: صاحبك مش على بعضه من الصبح رايح جاى رايح جاى وعينيه حتطلع احسن انا فرحانه فيه
داليا :: انا اللى مش على بعضى قلقانه على ماما كوثر
باسنت :: ليه ما كانت كويسه امبارح
داليا :: تعبت تانى الفجر
باسنت :: يبقى نروح ننقل الجدول ونروح نتطمن عليها وانتى تيجى معانا يا امال علشان تتعرفى بنرمين حتحبيها قوى هى ومامتها وبابا حليم
__________________
كان قلقا يروح ويجئ ناظرا فى كل الوجوه لقد حضر اليوم خصيصا ليراها كعادة الطلاب فى الحضور فى اليوم الاول احتفالا ببدء العام الدراسى وملاقاة اصدقائهم بعد اجازة صيف طويلة وبالمرة ينقلون جدول المحاضرات
التقى بصديقته مها تلك الفتاة الجميلة المحجبة التى تعانى مشاكل اسرية مع ام دائمة المرض والتى لا يحلو لها المرض الا ايام الامتحانات مما تسبب فى رسوبها كثيرا فاصبحت لا تجد رفيقا اقرب منه لها
مها :: يابنى مالك خيلتنى ؟
ثائر :: ولا حاجه اصلى كنت عاوز اتطمن على ناس لكن الظاهر ما حضروش النهارده غريبه كل الناس بتيجى اول يوم تعرف الجداول الا دول
مها :: ناس مين دول المهمين قوى كده اوعى تكون البنت بتاعة السنه اللى فاتت
قبل ان يرد اقبلت امانى
امانى :: صباح الخير يا مها صباح الخير يا ثائر
مها :: امونه صباح الفل اخبارك ايه ؟ عامله ايه مع شريف
امانى :: تمام زى الفل وانت يا شخص عامل ايه ؟
ثائر :: كويس الحمد لله ادينى فضيت للجامعه احمد خلاص خلص واستلم الحمل منى كنت لسه باقول لمها
امانى :: طيب كويس يارب تفلح
ثائر :: باقول يا امانى ما شفتيش وانتى جايه الانسه اللى كانت على طول بتقعد عند المكتبه ؟
امانى :: اسمها ايه دى مش فاكره
ثائر :: ما اعرفش اسمها
مها :: يخرب بيتك قاعد مستنى واحده وطول السنه اللى فاتت تعاكسها وما تعرفش حتى اسمها ؟
امانى :: يكونش قصدك على البنت اللى بتضرب اللى بيعاكسوها دى ؟
ثائر :: ايه يا امانى اللى يسمعك يفتكرك بتتكلمى عن امنا الغوله
امانى :: لا ما شفتهاش مش قلتلك ابعد عن البنت دى خدها نصيحه من اختك البنت دى مش بتاعة علاقات وكمان لسانها طويل وايدها اطول
مها :: عرفتها بلاش يا ثائر البنت دى بالذات ما بتخافش من حد يعنى ممكن تقل ادبها عليك واللا تجيبلك الامن اسمع كلامنا
ثائر :: ايه يا جماعه هو انا داخل حرب ؟ انا بجد اول مره ابقى مشدود لواحده بالشكل ده بس بجد البنت مش عاديه البنت مميزه جدا
امانى :: يا ثائر انا قلبى عليك البنت دى اللى حتطلع على جتتك القديم والجديد دى اللى حتوريك الويل وسواد الليل
مها :: يابنى البنت دى حتعملك القرد ابو صديرى بتاعها
ثائر :: بنت انتى وهى انتوا اتجننتوا مش انا يا ماما اللى ابقى قرد بصديرى انا ثائر مش سوسو
مها :: خلاص انت حر اصل لو جبنا للمجنون الف عقل على عقله ما يعجبوش غير عقله
امانى :: مش اللى هناك دى قريبتها ؟ ممكن تسالها عليها
ثائر :: فين دى قصدكم على مين ؟
امانى :: اللى واقفه مع صاحبتك هناك دى شايف البنت ام شعر طويل وناعم ولونه دهبى دى قريبتها كانت معاها على طول السنه اللى فاتت
ثائر :: هى دى امال اخت واحد صاحبى انما الاتنين التانيين دول ما شفتهمش قبل كده
امانى :: يا نهار اسود دول يابنى كانوا مع بعض على طول ييجوا مع بعض ويقفوا مع بعض ويحضروا مع بعض
ثائر :: بيتهيالى انها كانت على طول لوحدها او انا ما كنتش باشوف حد غيرها
نظرت امانى ومها كلتاهما للاخرى بدهشة واستغرقتا فى ضحك طويل حتى قالت مها ساخرة
مها :: يا عينى يابنى خلاص وقعت ما بقيتش شايف غيرها ؟
شرد ثائر وعلت وجهه ابتسامه وهو يقول
ثائر :: انتوا عاوزين الحق ؟ انا فعلا مش شايف فى الدنيا كلها غيرها
#ارواح_هائمة
ذهبت الفتيات للجامعة باكرا وحضرن المحاضرة الاولى والغى الاستاذ المحاضرة الثانية فنزلن لملاقاة باقى الاصدقاء عند المكتبة وحضر محيى لاول مرة منذ بداية العام الدراسى فلم يكن يهتم بالدراسة كثيرا ولم يكن ينتظر العمل بعد التخرج وكان كل اعتماده على الكورسات
محيى :: ازيكوا يا بنات عاملين ايه عملتوا ايه فى الصيف
نرمين :: الحمد لله كويسين انت اخبارك ايه
محيى :: كويس الصيف كله قضيته فى الساحل وانتوا
داليا :: فى البيت كان عندنا ظروف ما عرفناش نصيف بس مش مهم عادى
نرمين :: تعالى معايا نروح الحمام
داليا :: لا روحى انتى انا حاستنى باسنت
انصرفت نرمين فاقترب محيى من داليا قائلا بهمس
محيى :: ما تيجى نتمشى شويه عاوز اتكلم معاكى لوحدنا
داليا :: ليه ؟
محيى :: كلام ما ينفعش قدام الشله ياللا قبل ما تيجى العسكرى نرمين
قامت معه مترددة وحين ابتعدوا ليجلسوا خلف مبنى الفصول نظر اليها بهيام وقال بنعومة
محيى :: انتى جميله قوى ازاى ما اخدتش بالى انك بالجمال ده
داليا :: نعم ؟
محيى :: انا اول مره فى حياتى اشوف شعر ناعم وجميل كده وتدويرة وشك اللى زى القمر انا معجب بيكى من السنه اللى فاتت وكل يوم اعجابى بيكى بيزيد وفى الصيف كنت حاسس ان فيه حاجه ناقصانى وما كنتش عارف ايه هى لحد ما شفتك النهارده و .....
داليا :: محيى محيى بص انا اصل .... ممكن ثانيه واحده
وانطلقت من امامه بسرعة قبل ان يرد الى حيث تقف الشلة فوجدت نرمين قد عادت فاندفعت نحوها هاتفة بذعر
داليا :: الحقينى يا نرمين
نرمين :: ايه فيه ايه ؟
داليا :: الواد اللى اسمه محيى بيقوللى كلام عيب
نرمين :: بيقول ايه ؟
حكت لها ما قاله فاستشاطت نرمين غضبا وقالت لائمة
نرمين :: انتى ايه اللى مشاكى معاه ؟
داليا :: خفت اقول لا ما كنتش عارفه انه حيقوللى كلام حب وقلة ادب
نرمين :: يعنى ايه خفتى امتى حيكون عندك شخصيه انا زهقت منك
بكت داليا ورفعت يديها تدارى وجهها
داليا :: يا نرمين انتى عارفه انا باخاف من يوم ما ....
رق قلب نرمين لدموعها فاحتضنتها برفق قائلة
نرمين :: طيب خلاص ما تعيطيش معلش مش قصدى ازعق انا حاتصرف معاه هو راح فى انهى داهيه تاخده
ولكن محيى لم يعد فقد ولى هاربا
_________________
عاد محيى للجامعة بعد فترة انقطاع وحين اقبل علي الجميع مسلما كعادته ردت نرمين بجفاء قائلة
نرمين :: انت فاكر يا محيى السنه اللى فاتت لما قلتلى عاوزين نحب بعض واللا مش عارفه نعمل ايه كده ؟
محيى :: انا ؟ لا انا مش فاكر يمكن كان هزار يا نوننا
نرمين :: اسمى نرمين
قالتها بحدة وصوت عالى جعل كثيرا يلتفتون وهى تتابع
نرمين :: باقول ايه شغل الاسطوانات ده مش عليا ولا على اختى انت فاهم واللا مش فاهم ومن هنا ورايح تبعد عنا
محيى :: اسطوانات ايه باقول ايه هو رمى جتت البنت دى بتتبلى عليا انا ما كلمتهاش
نرمين :: كلمتها واللا لا من الاخر اقسم بالله ودينى وما اعبد لو مره اشوفك معدى بس من قدامنا مش حتلاقى غير الجزمه على وشك
محيى :: نعم ؟ لا بقى مش انا اللى يتقاللى الكلام ده بسبب بنت وقاعه زى دى انا لازم اعلمها الادب
اختبات داليا خلف نرمين وهى تشعر بالفزع ومحيى يندفع نحوها ويمد يده ليمسك شعرها فامسكت نرمين بيده ودفعتها بقوة وهتفت بحدة
نرمين :: اوعى تمد ايدك عليها وكلمنى انا
محيى :: لا اكلمك ولا اكلمها انتوا بنات صايعه بتلقح جتتها عليا
وقبل ان ينطق بالمزيد كانت يد نرمين تهوى على وجهه بصفعة مدوية جعلت كل الطلبة تتوقف مشدوهة تتابع ما يحدث وشعر محيى بالاهانة ورفع يده ليرد الصفعة ولكن يده توقفت حين اطبقت عليها قبضة قوية من الخلف فالتفت ليرى ثائر الذى قال بغضب مكبوت
ثائر :: عيب اللى كنت حتعمله ده عيب لو كنت عملتها كنت دفنتك مكانك
كان محيى رغم جسده الضخم وعضلاته البارزة ومواظبته على الذهاب للجيم جبانا بينما كان ثائر الذى بدا ضئيلا مقارنة به يمتلك قلبا جسورا لا يهاب الموت فارتجف محيى وتراجع لينتزع يده من قبضة ثائر قائلا
محيى :: ودينى لاوريكى انتوا ما تعرفوش انا ابن مين
ولكن ثائر سارع بامساك ملابسه وخنق عنقه بيده قائلا بحدة
ثائر :: ولا يا ننوس عين امك ودينى وما اعبد لو تبصلهم بعينيك او تجيب سيرتهم بكلمه غلط حاقلع عينيك واقطع لسانك انت فاهم ؟
ودفعه لينطلق هاربا بينما التفتت نرمين لداليا التى كانت تبكى وجسدها كله يرتجف فاحتضنتها واعانتها على الجلوس على حافة النافذة بينما اسرع ثائر الى كشك المرطبات ليجلب كوبا من الكولا ناوله لنرمين التى سقت داليا بعضا منه وسال
ثائر :: انتى كويسه ؟ تحبى اخدك لدكتور ؟
نرمين :: لالالا مافيش داعى لدكتور انا عارف علاجها احنا حنروح ميرسى
احنى لها راسه باناقة وانصرف فاندفعت امال خلفه هاتفة
امال :: ثائر استنى
استدار يواجهها فمدت اليه يدها قائلة
امال :: احنا مش عارفين نشكرك ازاى طول عمرك راجل وجدع
ثائر :: سلميلى على احمد ولو اى حد ضايقكم انا موجود على طول
___________________
احضروا طبيبا للكشف على داليا فاعطاها مهدئا ونامت وخرجت باقى البنات مع الشيخ حليم الى غرفة. مكتبه حيث روت نرمين كل ما حدث من العام السابق وقالت
نرمين :: والله يا بابا هو ده كل اللى حصل لا زايد كلمه ولا ناقص كلمه حتى اسال باسنت وامال
حليم :: انا مش حاسال لا باسنت ولا امال طبعا انتوا بناتى لكن لازم تعرفوا وانتى كمان يا نرمين انى باخد كلامك ثقه وعارف انك مستحيل تكذبى على بابا حليم ومستحيل تكذبى اصلا
نرمين :: انا حكيت كل اللى حصل ولو حضرتك شايف انى غلطانه انا او داليا تحت امرك
باسنت :: واحنا كمان بناتك يا عمو ولو شايف عندنا اى غلط احنا حنسمع كلامك مش كده يا امال ؟
امال :: كده والله انا يا عمو حبيتك قوى من اول يوم دخلت فيه بيتكم ويشرفنى انك تعتبرنى بنتك مش حضرتك لوحدك وكمان تانت كوثر وتانت ثريا
حليم :: طيب انا واثق ان اللى حكيتوه هو اللى حصل لكن انا شايف برضه انكم غلطانين يا بنات الاختلاط اصلا غلط وحتى لو فرضنا ان زمالة الكليه بنيه سليمه وصداقه بريئه انما لازم التعامل مع الزماله دى بحرص وتحطوا حدود لزمايلكم ما يتخطوهاش لكن بوجه عام مع انى واثق ان نيتكم سليمه وضميركم نضيف انما الغلط انكم للاسف اساتم اختيار اصدقاؤكم والدليل اهه الولد السافل ده اتكلم معاكى يانرمين السنه اللى فاتت وبدل ما توقفيه عندحده وتقوليله مالوش اى صله بيكم سبتيه وقلتيله حاعتبر انك ما قلتش حاجه . لا ده غلط واحد زى ده لازم يقف عند حده وتقطعوا اى صله بيه حتى السلام العادى
نرمين :: حضرتك عندك حق وانا غلطانه ومافيش اى صداقات مع شباب خالص ده بالنسبه لى انا وداليا لكن انتوا طبعا احرار
باسنت :: اى كلمه يقولها عمو حليم بالنسبه لى امر واجب النفاذ ايه رايك يا امال
امال :: انا موافقه طبعا وعمو حليم بابا بيصلى وراه ويسمع كلامه حضرتك عارف بابا فؤاد مسعود المحامى
حليم :: بسم الله ما شاء الله يعنى اصيله بنت اصول
