رواية ارواح هائمة الفصل الثامن والعشرين 28 بقلم آثر توفيق
الحلقة 28
وقف عادل فى وضع انتباه صارم امام صلاح الذى جلس على مكتبه قائلا
عادل :: كله تمام يافندم بالحرف
صلاح :: والمعلومات اللى طلبتها ؟
اشار الى ملف فى يده
عادل :: كلها موجوده سعادتك ومعلومات وافيه عن الجميع
صلاح :: طيب اطلب لنا قهوه وتعالى لخصلى القصه كلها
قام ليجلس بعيدا عن المكتب بينما طلب عادل القهوة وجلس بجواره حتى حضرت القهوة وخرج جندى الحراسة
صلاح :: قوللى بقى القصه ايه
عادل :: القصه يافندم مش مع الشيخ العطار خالص القصه مع ثائر توفيق النشار اللى معاليك سالت عليه . ثائر ده معاليك شاب طموح بيدرس فى كلية التجارة وسبق فصله من هندسه ودائم الرسوب رغم فهمه العالى للمواد شريك فى مصنع بلاستيك صغير وفيه شكوك انه بيكتب مقالات باسم مستعار بيهاجم بيها فساد الحكم والادارة وبيتكلم فى الاواخر عن توريث الحكم
صلاح :: يعنى ثائر طلع ثائر وايه سبب سقوطه المستمر وفصله من هندسه ؟
عادل :: مقالات فى مجلات حائط والفصل بسبب مشكله مع دكتور فى الكليه بلاك ليست يا فندم
صلاح :: يعنى الشكوك دى ثبتت عليه فعلا ؟
عادل :: الحقيقه يافندم ان ايمن اتعامل معاها على انها حقيقه رغم ان مافيش اى دليل انما ايمن بقى عايش فى دور عيسى الدباغ فاكر نفسه القبضه الحديديه للدوله وعنده طموح يوصل لفوق قوى ومسنود على خاله اللواء محسن الرويعى
صلاح :: ايه عاوز يبقى وزير الداخليه مثلا ؟
عادل :: لو حصل حينيم الناس من المغرب ده دماغه كلها شر
صلاح :: قوللى بقى عمل ايه مع ثائر
عادل :: عرف يسكته يافندم وللابد
صلاح :: ازاى ؟
عادل :: حاربه فى كل اللى حواليه لحد ما سلم لفق قضيه لبنت زميلته صديقه مقربه وكان حيرحل صديقه تانيه اردنيه وقبض على الشيخ عبد الحليم العطار وعمل له قضيه مضروبه و ...
صلاح :: لحظه واحده ايه علاقة الشيخ العطار بثائر ؟
تنحنح عادل وقال بحرج
عادل :: صلاح باشا انا عارف علاقتك بالشيخ عبد الحليم واسرته وابن عمه الشهيد محمود العطار الحقيقه مش عارف اقول ايه انا محرج
صلاح :: اتكلم بدون حرج يا عادل احنا لوحدنا
عادل :: كان فيه تقارب شويه بين ثائر وواحده من بنات الشيخ عبد الحليم
توقف قليلا وتنحنح قائلا
عادل :: الانسه نرمين بنت الشهيد محمود العطار
صلاح :: نرمين دى بنتى وعمرها ما عملت علاقه
عادل :: ما قلتش علاقه يافندم انا قلت تقارب يعنى كان فيه اعجاب متبادل ما وصلش لدرجة علاقه الحقيقه ثائر شاب محترم وكل البنات اللى يعرفوه بيعتبروه هو اخوهم وحاميهم فى الكليه هو كان حصل موقف بين البنات وبين شاب فى الكليه مش متربى وثائر اتدخل ووقف جنبهم بدافع الشهامه فنشا نوع من الاعجاب مش اكتر
صلاح :: طيب ليه ايمن ما اعتقلش ثائر وخلص الموضوع ده كله طالما متاكد ان هو اللى بيكتب ؟
عادل :: اولا مافيش اى دليل يربط ثائر بالمقالات كلها شواهد ثانيا ايمن كان عاوز يستعرض قوته ويخلى ثائر عبره بوظ كل اللى حواليه لحد ما خلاه رفع الرايه البيضه كان بيلاعبه قط وفار وبيبين نفسه انه عديم الرحمه مع اى شخص يخالف النظام
صلاح :: اسباب مش كفايه عنده الطوارئ مش مقتنع
عادل :: اهو تحت ايدينا وحننطقه يافندم
صلاح :: وثائر بقى رفع الرايه البيضه ازاى ؟
عادل :: الاول خلاه صفى من المصنع خالص وسابه لشريكه ثانيا البنت اللى معاليك سالت عليها هاله عبد الظاهر دى بنت محترمه الاب متوفى والام ليبيه وسمعتها كانت كويسه جدا لحد ما ايمن لبسها فى قضية اداب
انتفض صلاح غاضبا
صلاح :: ايه ؟ انت متاكد من الكلام ده ؟
عادل :: تمام يافندم ايمن خدها بعربيته من عند بيتها وحبسها عنده فى المكتب تلات ايام لحد ما لقى ظبطية اداب على بيت فى الابراهيميه سلمها لظابط الاداب اسمه بدر السايح وسلمه البنت وقعدت فى قسم باب شرقى يومين وخرجها لعدم كفاية الادله لدرجة ان البنت واهلها سابوا بيتهم وعزلوا من المنطقه كلها
صلاح :: عندهم حق طبعا ده مش بنى ادم طيب والتانيه
عادل :: التانيه دى بنت اردنيه بتدرس فى مصر اسمها رحاب ماجد لغى اقامتها و ...
صلاح :: يعنى ايه لغى اقامتها ؟
عادل :: بيستغل نفوذ خاله فى الضغط على الظباط يافندم
صلاح :: هو خاله ده فوق القانون ؟ وهو على علم بكده
عادل :: دى نقطه ما قدرتش اتوصل لها يافندم
صلاح :: وحصل ايه مع البنت دى ؟
عادل :: بعتلها عربية شرطه تقبض عليها لكن استخبت عند واحده صاحبتها الوحيده اللى ايمن ما قربش منها خطيبته السابقه اسمها مها سعيد اقدم اصدقاء ثائر
صلاح :: هو ثائر خاطب ؟
عادل :: خطيبة ايمن يافندم لكن فسخت الخطوبه اول ما كشفت حقيقته وخبت رحاب فى بيتها لحد ما ثائر اعلن استسلامه ووقف الحرب دى
صلاح :: والمصنع
عادل :: فتح بعد خروج ثائر منه لكن ما بقاش زى الاول والحقيقه هو عمل لهم تلفيات وخساير كتير جدا
صلاح :: يعنى المقالات دى تستاهل كل ده ؟
عادل :: انا قدرت اجيب لحضرتك نماذج من بعض مقالاته ومنها المقال الاخير اهم واخطر مقالاته
اخرج من الملف عدة اوراق ناولها لصلاح فاخذ يقرا فيها متوقفا عند بعض الفقرات وهو يبدى اعجابه قائلا
صلاح :: اسلوب حماسى وكلام يشعلل انما كلام فى الجون ولو تاخد بالك عامل بصمه قريت العبارة دى ( انا لا اخشى فى الحق لومة لائم او غضبة حاكم ) موجوده فى كل مقال واكيد ايمن عرفه منها انت ايه رايك فى الكلام ده ؟
لم يرد عادل فساله صلاح ثانية
صلاح :: انت رايك ان ثائر هو فعلا اللى كتب الكلام ده ؟
لم يرد ايضا
صلاح :: هو انتوا اصحاب من زمان ؟
عادل :: الحقيقه هو شاب كويس طموح صبور مكافح مثقف ووطنى مخلص
صلاح :: واضح فعلا من كتاباته انه وطنى مخلص قلبه على البلد ومصادر معلوماته قويه جدا لكن اسلوبه حاد شويه وصادم كان ممكن تنصحه يخفف اسلوبه شويه
عادل :: هو فعلا اسلوبه كان حاد وصادم وقوى
صلاح :: يعنى انت عارف ان هو اللى بيكتب
ارتبك عادل ولم يرد فاضاف صلاح مطمئنا
صلاح :: شوف يا عادل يابنى انا فيه حاجات كتير فى الكلام ده موافق عليها انا شخصيا فيه حاجات فى البلد مش عاجبانى لكن فيه خطوط حمراء وفيه اسلوب ينبه بدون اثاره احنا بنحاول نحافظ على البلد احنا فى حالة حرب ونبقى غلطانين لو فكرنا اننا عايشين فى سلام انما البلد عباره عن الشعب وده واحد من الشعب ومش لوحده هو وانت والبنت المسكينه هاله دى حتى ايمن واحد من الشعب انما يطغى ويظلم ويتجبر ابدا مش حنسمح له
سكت قليلا وانهى قهوته الباردة قائلا
صلاح :: اطلبلى قهوه كمان من فضلك
وبعد حضور القهوة قال صلاح
صلاح :: هو ثائر اخباره ايه بعد ما ساب المصنع ؟
عادل :: شغال فى المقاولات بس مع الاسف شمال بيبنى من غير رخصه
لم يكن عادل ممن يمكن استشفاف شعورهم الداخلى من ملامحه الصلبة ولن صلاح لم يكن سهلا وقد ادرك خوف عادل على صديقه واضطراره للافصاح حتى لا يتهمه صلاح بالتستر عليه
صلاح :: ده كده ممكن يعرض نفسه لمخاطر جامده لو مافيش حد فى ضهره يحميه
ثم رفع فنجان القهوة الى فمه ليفرغه دفعة واحدة ويضيف
صلاح :: لو انا كنت احميه وماحدش يعرف يعمل معاه حاجه لكن يا خساره انا مش صاحبه ولا اعرفه
ابتسم صلاح بخبث وهو يلمح الطمانينة فى عيون عادل الذى تساءل مغيرا الموضوع
عادل :: بالنسبه للتانى قصدى ايمن اجيبه دلوقت ؟
صلاح :: لا مش دلوقت بس المهم يفضل نايم مش عاوزه يعرف قعد كام يوم ولما ترجعوه تاخدوه لحد الريست وتفوقوه فى العربيه وانتوا راجعين عاوزه يفتكر نفسه كان بره اسكندريه خالص
عادل :: ممكن اسال ليه يافندم ؟
صلاح :: قط وفار هو مش بيلعب قط وفار ؟ عاوز احسسه انه صغير . فار
ابتسم ثم نهض مضيفا
صلاح :: انا حاقوم علشان حاتغدى عند حليم فى البيت وبكره اشوف الحيوان ده وضب القعده على الساعه اتناشر ما يصحاش قبل كده
بعد الغذاء فى منزل حليم
حليم :: منور بيتك يا صلاح
منور بيك يا مولانا ازيك يا مراة اخويا ازيكوا يا بنات
نرمين :: الحمد لله يا عمو صلاح كويسين
صلاح :: المحشى بتاعك يجنن يا دوللى
داليا :: الف هنا وشفا يا عمو صلاح
باسنت :: انا عملت معاها يا عمو صلاح انا وامال
صلاح :: تسلم ايديكوا انتوا التلاته ستات بيوت على حق
نرمين :: وانا يا عمو صلاح مافيش تسلم ايدك ؟
صلاح :: على ايه هو انا شفت منك حاجه ؟ فين الرز بلبن ؟
نرمين :: جاهز والله فى التلاجه حاجيبه حالا
صلاح :: بعد اذنك يا حليم بعد اذنك يا كوثر حاكل الرز فى اوضة نرمين اصلى وحشتنى صورة الغالى
حليم :: اتفضل يا صلاح ده بيتك
احضرت نرمين طبقا من الارز باللبن واضافت عليه المكسرات وجوز الهند واقتادت صلاح الى غرفتها وعندما دخل توجه نحو صورة محمود التى تحتل جدارا كاملا من الغرفة بالزى العسكرى ووقف امامها فى وضع انتباه صارم ورفع يده بجوار راسه بتحية عسكرية ثم اراحها وضم قبضته الى صدره
صلاح :: وحشتنى وحشتنى قوى
نرمين :: كنت بتحبه ؟
صلاح :: كنت ؟ انا لسه باحبه محمود ده عايش جوايا محمود بالنسبه لى صلاح اقرب من اخويا التوأم زى كده انتى وداليا وده اللى جابنى اصل مش معقول الاقى كلب بيتعرض لبنت اخويا وبنتى واقف اتفرج انا امحيه من على وش الدنيا تعالى اقعدى
جلس صلاح على مكتبها وجلست هى على مقعد بجواره فسالها
صلاح :: قوليلى بقى ايه حكاية ثائر النشار ؟
نرمين :: مافيش حكايه ولا حاجه ده واحد فى الكليه كان وقف معانا موقف كويس وشكرناه واتكلمت معاه بعدها مرتين تلاته لقيته اتغير بعدت عنه
صلاح :: ايوه بس انتى ضربتيه بالقلم فى الكليه وكنتى حتعملى مشكله
نرمين :: علشان هو اللى سلط الزفت ايمن ده على بابا وعمل فيها شهم عند مكتب الامن وهو متفق معاه يكلم رئيس الامن ويحفظ الموضوع واول ما اخرج الاقى ايمن فى وشى
صلاح :: انتى فاهمه الموضوع غلط انا اللى اتصلت بشرابى اصل ابو نضاره اللى كان ملازمكم على طول ده من رجالتى مهمته الوحيده انه يحافظ عليكم وما يتدخلش الا لو حد اتعرض لكم بصوره تجبره يكشف نفسه زى ما حصل بعد كده واول ما دخلتوا مكتب الامن نزل على السويتش كلمنى
نرمين :: برضه هو اللى مسلط الزفت ده وهو السبب فى كل البلاوى اللى ....
صلاح :: نونو حبيبة عمو صلاح حتكدب عليه ؟
نرمين :: لا طبعا يا عمو حضرتك عارف انى مش باكدب اصلا وعلى حضرتك بالذات يبقى مستحيل اعملها
صلاح :: خلاص قوليلى بصراحه انا عندى معلومات ان كان فيه اعجاب متبادل او استلطاف لكن مافيش اى علاقه ولا قصه ولا كلام من ده الكلام ده صحيح
نرمين :: لا هو ما كانش متبادل
صلاح :: يعنى هو كان معجب بيكى فعلا ؟
اجابت بحزن والدموع تلتمع فى عينيها
نرمين :: لا يا عمو انا اللى كنت معجبه بيه
تنهدت وارتعدت ذقنها واضافت
نرمين :: اول ما دخلت الجامعه لقيته شاب مكافح اخلاقه عاليه خدوم شهم مثقف اعجبت بيه كانت اول مره وانا كنت صغيره وعمرى ما اختلطت قبل الجامعه واتعرفنا انما كان رايه فيا انى ....
سالت دمعة لم تشعر بها وهى تسقط
نرمين :: بارده ودمى تقيل وعايشه فى الدور وبعد كده سلط صاحبه يقبض على بابا بتهمه باطله وبعدها سلطه ييجى يخطبنى برغم ان صاحبه ده خطيب واحده صاحبته مش فاهمه ازاى يعنى كانت لعبه
صلاح :: وهو ده اللى خلاكى ضربتيه بالقلم فى الجامعه ؟
نرمين :: ممكن يكون فعلا هو ده السبب مش حانكر انى مجروحه
صلاح :: تقومى تتسببى انه يضيع مستقبله لولا انا اتدخلت ولحقته
نرمين :: كان ممكن يضيع مستقبلى انا ويقول انى
صلاح :: مستحيل . مستحيل كان يقول كلمه ممكن تسئ لك ابدا انتى لسه مش فاهمه قوليلى هو قال امتى انك بارده والكلام ده مش قبل ما بابا يتقبض عليه ؟
نرمين :: فعلا
صلاح :: فى الوقت ده كان ايمن بيحاربه فى كل اللى حواليه ويحاول انه يجبره انه يرجع عن اللى فى دماغه
نرمين :: مش فاهمه يعنى ايه هم مش اصحاب ؟
صلاح :: اصحاب مين ؟ لو فيه وصف اكبر من اعداء قوليه لالا شوفى اصل ثائر تقريبا كتب شوية مقالات ضد الدولة والمقالات دى كانت شديدة الخطوره وايمن هو اللى كان بيحقق فيها وبيتهم ثائر بكتابتها
نرمين :: فعلا هو اسلوبه جريء جدا
صلاح :: يعنى انتى عارفه انه بيكتب فى السياسه ؟
ادركت خطورة كلماتها فلزمت الصمت فقال يستحثها
صلاح :: يا بنتى انا عمو صلاح اتكلمى معايا بصراحه والكلام مش حيطلع بره الاوضه
نرمين :: اصلى قريت مقال كان ملزقه على الترام بس كان مقال جامد قوى
صلاح :: هو الترام وبس ؟ ده لزقه فى كل حته فى اسكندريه مش كان اسمه السلطان الجائر ؟ بس انتى عرفتى منين ان هو اللى كتبه هو اللى قال لك ؟
نرمين :: لا اصل ... اصله ادانى شوية مقالات كاتبها فى الاداره بيهاجم فيها الدكاتره والفساد الادارى فى الدوله ولقيت انه نفس الاسلوب
صلاح :: ممكن اشوفها ؟
نظرت له محذرة وقالت
نرمين :: عمو صلاح
صلاح :: خايفه عليه يا بيضه ؟ ما تخافيش حاقراها وارجعها
قامت لتحضر المقالات وناولتها له فاخذ يقراها باعجاب
صلاح :: فعلا نفس الاسلوب
نرمين :: نفس الاسلوب والحده والمفردات نفس الصراحه والوضوح والاندفاع
صلاح :: فعلا هو كان مندفع بس خلاص اهو بطل كتابه خالص
تنهد باسى واضاف
صلاح :: فى الفتره دى ايمن باشا بتاع امن الدوله كان بيحقق فى الموضوع ده وقرر انه يجبر ثائر انه يبطل كتابه ويحط لسانه جوه بقه يعمل ايه ؟ حاربه فى كل اللى حواليه كان عنده صاحبته اردنيه لغى اقامتها وكان حيرحلها ورغم ان ثائر قال اللى قاله لصاحبتك علشان توصله ليكى تقومى تبعدى عنه لكن ايمن ما بلعهاش قبض على بابا حليم لانه عارف ان ثائر معجب بيكى و ...
نرمين :: يعنى قصدك ان ايمن قبض على بابا علشان يضغط على ثائر ؟ وان الكلام اللى قاله كان قصده انه ...
صلاح :: يحميكى من شر ايمن لكن للاسف ما جابش نتيجه بس لعلمك اللى حصل مع بابا حليم كان هين انتى تعرفى واحده اسمها هاله عبد الظاهر ؟
نرمين :: ماليش علاقه بيها لكن لما قال اسمها لبابا سالت عنها قالولى بنت كويسه وفى حالها
صلاح :: كويسه وفى حالها ويتيمه كمان ابوها متوفى وكمان امها ليبيه ومالهاش حد تصورى واحده زى دى بتقول يا حيطه دارينى الباشا بتاع امن الدوله لفق لها قضية اداب
شعرت بالفزع واخفت وجهها بكفيها وصاحت
نرمين :: يا ساتر يارب ايه ده هو ما عندوش دين ما بيخافش من ربنا ؟
صلاح :: لا يا بنتى ما بيخافش من ربنا وده اللى خلى ثائر يرفع الرايه البيضه ويسلم علشان يطلعوا بابا حليم وهاله ويجددوا الاقامه للبنت بتاعة الاردن اللى كان فاضل لها كام شهر ده غير المصنع اللى قفله واجبره انه يسيبه علشان يرجع يشتغل
نرمين :: المصنع كمان ايه كل ده ؟ ده افتراء
صلاح :: فعلا انما تقولى ايه المسكين خسر المصنع واصحابه وانتى علشان بيحب بلده وعلى كلامه قال كلمة حق فى حضرة سلطان جائر
نرمين :: يعنى انا ظلمته ؟
صلاح :: فعلا ومش لوحدك مع الاسف واديكى شفتى بتضربيه بالقلم وبيدافع عنك باستماتة هو مش كان رافض تروحى مكتب الامن ؟
وضعت راحتها على جبهتها وبكت قائلة
نرمين :: طيب انا ممكن اعمل ايه علشان اصلح غلطتى ؟
صلاح :: انا ما عنديش اعتراض على الحب الشريف النضيف والولد نضيف حاولى تفهميه انك عرفتى بتضحيته وتخليكى جنبه وانا حاعرف ازاى اخلى الكلب اللى اسمه ايمن يبطل افتراء ويندم على اللى عمله فى بنت الناس المسكينه وفى بابا حليم
نرمين :: متشكره يا عمو ربنا يخليك لينا
صلاح :: ياللا بقى نطلع نقعد معاهم علشان ادوق الجيلى
__________________
دارت اطباق الجيلى على الجميع وكان صلاح يلتهم طبقه وهو يحكى لهم ما فعله فى موضوع ايمن
صلاح :: انا حاخليه يفتكر انه اتخطف وراح القاهره
حليم :: اشمعنى
صلاح :: اصله بنى ادم بيستعرض قوته على الضعيف انا بقى حاعرفه انه ضعيف وصغير فار سيبكوا من الموضوع ده اعتبروه خلص وما تشغلوش بالكم بيه خلونا فى الاهم انتوا نويتوا على ايه فى عملية كوثر ؟
سقط الطبق من يد حليم وتبادلت البنات النظرات بينما نظرت ثريا وكوثر لحليم وقالت كوثر
كوثر :: عمليه ايه دى
حليم :: لالالا ولا حاجه دى ده ... ده لسه مجرد تفكير
ادرك صلاح انه تسرع وان حليم لم يخبرهم بشئ بعد لذلك استاذن متعللا بالارهاق ليصحبه حليم للغرفة التى خصصها له
فى غرفة عادية مسدلة الستائر بها طقم انتريه بسيط لا يدل على شئ جلس اللواء صلاح النمر وبجواره وقف رجلان بملابس عادية وان كان الثلاثة يمتازون بالصلابة الظاهرة للعيان احدهما هو الرائد عادل عز الدين فى حين جلس امامه على مقعد خشبى النقيب ايمن رشدى مقيد اليدين والقدمين وقد عصبت عيناه حتى افاق وسمع صوت صلاح يقول
صلاح :: شيلوا الغمامه من على عينيه
رفعت الغمامة فاغمض عينيه حتى اعتاد الضوء واجال البصر فى ارجاء الغرفة والجالسين فلم يستدل على شئ
ايمن :: انا فين ؟
صلاح :: مش قادر تعرف ؟ ايه مش عمال بتحلق فى الاوضه
ايمن :: الستاير نازله مش شايف حاجه بره ده بيتك ؟ طيب مين سيادتك ؟
صلاح :: انا بابا وجايبك هنا علشان انا اسال وانت تجاوب
ايمن :: بابا مين بقى واحد من اللى حققت معاهم ؟ طيب قوللى انت تبع مين دينى واللا يسارى ؟ مش خايف بعد ما اخرج من هنا اجيبك وادفعك تمن عملتك واللا ناوى تخلص عليا ؟
ضحك صلاح ساخرا ودنا بوجهه من ايمن قائلا
صلاح :: لا اتطمن حتخرج وحتعرف انا مين ومش حتعرف تعمل معايا حاجه دلوقت كفايه اسئله دورى اسال انا بقى ايه حكاية ثائر النشار ؟
ايمن :: اااه انت بقى اللى سانده وبتموله ؟
صلاح :: قلتلك لما اسال
واطبق بيديه على خدى ايمن بصفعة مزدوجة قوية جعلت عينا ايمن تدوران فى محجريهما وصلاح يهتف بحدة
صلاح :: تجاوب . انطق
ضغط على اسنانه واغمض عينيه متالما قبل ان يقول
ايمن :: الايد دى حكومه ماشى ثائر ده ولد مشاغب عاوز يخبط فى الحكومه والبلد والريس وكنت مكلف انى اخليه يتراجع ويحط لسانه فى بقه
صلاح :: وايه علاقة هاله عبد الظاهر بيه
ايمن :: دى بنت ماشيه على حل شعرها
هوت صفعة قوية على وجهه وهتف صلاح بغضب
صلاح :: لما تتكلم معايا تقول الحقيقه مش تحاول تبرر وساختك انت فاهم ؟
تردد ايمن وبدا يفقد رباطة جاشه ويتملكه الخوف وقال
ايمن :: دى كانت ورقة ضغط علشان يرجع عن اللى فى دماغه
صلاح :: تقوم تتهمها فى شرفها طيب اقبض عليه حاكمه اعتقله حتى بتهمه زور اشمعنى البنت
ايمن :: كده حاعمله بطل الهدف كان انه يكتب ان افكاره كانت غلط واللا اللى مش مصدقه النهارده حيصدقه بكره
نظر صلاح نحو عادل ولمعت عيناهما هذا هو السبب الحقيقى وراء ما يفعله ايمن الخوف من ان يصبح ثائر بطلا ويتسبب القبض عليه فى ذيوع افكاره بين الناس اكثر
صلاح :: ااااه طيب ورحاب كانت برضه ورقة ضغط ؟ ماشى طيب والشيخ العطار دول حتى ما يعرفوش بعض
ايمن :: بنته تعرفه وكانت ماشيه معاه راجل امام جامع ومش عارف يربى بناته
وعندها لم تهوى على وجهه اى صفعات وانما ركل صلاح الكرسى بقدمه ليسقطه ارضا ثم ينهال عليه ركلا وضربا وسبا وهو يهتف بغضب شديد
صلاح :: كلب حقير . خدوه وضبوه وهاتوه كمان ساعه
حرره احد الرجلين من الكرسى ورفعه واصطحبه فيما قال الاخر مهدئا
عادل :: اهدى يا صلاح باشا واحنا حننفذ كل اوامرك
صلاح :: البنت دى بنتى بنت محمود العطار عارف مين محمود العطار ؟
عادل :: عارف يا باشا وعارف ان البنت محترمه جدا ايمن ده كلب ولو عاوزنا ننسيه اسمه انا مستعد تشرب قهوه سعادتك
سارع عادل بطلب القهوة وعاد يقول مهدئا
عادل :: يا باشا ده جبان بيتحامى فى سلطته قلمين ويعيط
وبعد ساعة احضروا ايمن وهو بادى الاعياء ووضعوه فوق الكرسى الخشبى امام صلاح الذى نظر نحوه بغضب قائلا
صلاح :: اسمع يا كلب انت الشيخ عبد الحليم ده خط احمر انت عارف انا لو طبقت ايدى عليك كده
وصفق بكفيه وابقاهما مضمومين لبعضهما واضاف
صلاح :: حانفيك من الدنيا خالص ومش حاقول لك اهلك مش حيعرفوا طريقك لا اهلك حينسوا انهم جابوك اصلا
ايمن :: اوامرك انا قلت كل حاجه عاوزنى اعمل ايه
ضحك صلاح بسخرية ونظر نحوه باحتقار قائلا
صلاح :: ايه الادب ده عامل دكر وما خدتش غلوه ؟ انت ما شفتش غير القشره بس . اسمع يالا انت عارف انا مين ؟
اقترب بوجهه اكثر من ايمن وقال مضيقا عينيه
صلاح :: انا صلاح النمر صلاح احمد النمر لو ما سمعتش عنى اسال . ممنوع عليك تمشى فى شارع خالد ابن الوليد كله انت فاهم ؟
ايمن :: حاضر مش حادخل الشارع خالص اى اوامر تانيه ؟
صلاح :: وانسى موضوع ثائر خالص اهو بطل كتابه خالص
اعاد ظهره الى الخلف ونظر اليه باحتقار قائلا
صلاح :: انا مش متخيل وساختك واللى عملته فى بنت الناس المسكينه اللى شوهت سمعتها وخليتها عزلت من بيتها كمان عاوز تجيب سيرة بنتى ؟
ايمن :: بنتك ؟
صلاح :: ايوه يا حيوان الشيخ العطار ده اخويا وبناته دول بناتى
ايمن :: اناحابعد عنهم خالص سعادتك مش حاقرب منهم نهائى
صلاح :: من مصلحتك لانك لو شافوك صدفه حاقتلك