رواية ارواح هائمة الفصل التاسع والعشرين 29 بقلم آثر توفيق
الحلقة 29
نادت عليها كوثر وهى مع البنات فى غرفتهم
باسنت :: ماما هى فين هى جت ؟
كوثر :: لا على التليفون
امسكت السماعة وقلبها يدق انفعالا وسمعت صوت امها
شيرين :: روحى عامله ايه يا روحى يا قلبى يا عمرى كله ؟
باسنت :: انا ... وحشتينى وحشتينى قوى
ورغما عنها بكت باسنت
شيرين :: بتعيطى ليه يا بسبوسه فيه ايه ؟
باسنت :: ما باعيطش ولا حاجه يا حبيبتى بس وحشتينى حتيجى امتى ؟
شيرين :: حاجى بكره ان شاء الله طيارتى توصل الساعه تلاته العصر
باسنت :: بكره مش مصدقه انا حاستناكى فى المطار طبعا
شيرين :: يا ريت يا حبيبتى نفسى اول حاجه اشوفها لما ارجع تبقى انتى
باسنت :: تصدقى لو اقول لك نفسى اروح استنى فى المطار من دلوقت ؟
شيرين :: مصدقه يا حبيبتى مصدقه يا بنتى لا اله الا الله
باسنت :: محمد رسول الله خلى بالك من نفسك
انهت المكالمة والتفتت لباقى البنات
باسنت :: ماما جايه بكره
صاحت البنات فى فرح فدخل حليم على الضوضاء
حليم :: ايه يا بنات الهيصه دى فرحونا معاكم
نرمين :: تانت شيرين راجعه من السفر بكره
حليم :: اخيرا توصل بالسلامه حتوصل امتى ان شاء الله ؟
باسنت :: الساعه تلاته العصر انا حاروح استناها فى المطار
حليم :: هى جايه على مطار ايه ؟
باسنت :: يا نهار اسود انا من الفرحه نسيت اسالها وبعدين
ضحكت كوثر واحتضنتها وقبلت خدها وقالت
كوثر :: ما تخافيش انا سالتها قبل ما اناديكى كنت واثقه ان الفرحه حتنسيكى تسالى جايه على مطار اسكندريه
باسنت :: انا الفرحه نستنى فعلا دى ممكن تنسينى اسمى
حليم :: خلاص يبقى بعد صلاة الجمعه نروح انا وانتى نجيبها من المطار
_________________
جلس ايمن فى مكتبه يفكر فيما حدث هل يستسلم لهذا المدعو صلاح النمر ؟ من يكون واين يكون المكان الذى اختطفه فيه ؟ لا توجد اى دلائل تنير الطريق امامه للبحث وهو يكره ان يعرف احد بالامر لا فائدة لابد ان يعرف .
رفع سماعة الهاتف وطلب رقما وانتظر الرد
ايمن :: اكلم اللواء محسن لو سمحت ؟ نقيب ايمن رشدى
اتاه بعد قليل صوت اللواء محسن
محسن :: خير يا ايمن ؟
ايمن :: يا سيادة اللواء عاوز اقابلك ضرورى
محسن :: انا اللى عاوزك ضرورى ايه حكاية اللى اسمه ثائر والشيخ العطار ؟ وايه اللى انت بتعمله ده يا ايمن ؟
ايمن :: يا سيادة اللواء انا ......
محسن :: انت مجنون فاكر علشان ابن اختى حاقدر احميك ؟ مش فى كل حاجه فيه حاجات اضيع معاك فيها بكره الاقيك عندى فى البيت
ايمن :: تحت امرك يافندم
وضع السماعة وبعد قليل سمع طرقا على الباب ودخل جندى الحراسة
الجندى :: العميد محمود عاوز سيادتك فى مكتبه يافندم
اشار للجندى بالانصراف وقام متثاقلا يبدو ان المصائب لا تاتى فرادى
طرق باب مكتب العميد محمود مدير مكتب الاسكندرية واتاه صوته يدعوه للدخول
ايمن :: سيادتك طلبتنى يافندم ؟
محمود :: اتفضل اقعد يا سيادة النقيب
جلس ايمن وهو يتوقع شرا من وجه رئيسه الغاضب
محمود :: فيه ناس بتسال عليك وعلى تحقيقاتك
ايمن :: مين اللى بيسال ؟
محمود :: المهم بيسالوا على ايه ايه حكاية التنظيم السرى اللى قبضت على الشيخ عبد الحليم العطار بسببه ؟
ايمن :: ده ده بلاغ حققت فيه وطلع كيدى
محمود :: مصدقك هاتلى الملف بتاع الموضوع ده
ايمن :: ملف ايه ؟ باقول لسيادتك البلاغ كان كيدى ومافيش
قاطعه محمود غاضبا
محمود :: مافيش مافيش ايه يا حضرة الظابط ؟ مافيش تحقيق مافيش تحريات مافيش ملف ؟ طيب فيه ايه بالظبط ؟ ولما البلاغ طلع كيدى جبت الراجل وقعدته هنا يومين ليه ؟ وازاى قعد من غير اتهام ولا مذكره ولا اى اجراء ؟ بلاش دى البنت بتاعة الجامعه اللى اسمها هاله عبد الظاهر جبتها قعدتها هنا تلات ايام ليه ؟ وبعد كده عملت فيها ايه ؟ ممكن ترد علشان احس انى ما باكلمش نفسى ؟
ايمن :: يا محمود بيه انا كان عندى معلومات وكنت باتحقق من صحتها الاول قبل ما اجهز ملف و ......
محمود :: كلام فارغ لو قلته لطفل صغير مش حيصدقك عاوز تضحك بيه على عميد امن دوله ؟ ايه بتشغل المكتب لحسابك ؟ قوللى الملف اللى انت ماسكه عملت فيه ايه ؟
ايمن :: القضيه دى اتقفلت خالص يافندم
محمود :: ازاى انت ناسى انى رئيس المكتب ولازم اعرف ؟
ايمن :: خلاص اللى اسمه كفيف ده بطل كتابه خالص
محمود :: عرفت هو مين فين التحريات فين الملف ؟
ايمن :: يا محمود بيه الشاب نفسه اللى بيكتب المقالات دى اسمه ثائر توفيق النشار واتعهد انه حيبطل كتابه خالص
محمود :: نعم ؟ قوللى هو انت خريج شرطه واللا متعلم على ايدين عصابات المافيا واللا حكايتك ايه بالظبط
ايمن :: انا كنت باحاول احل الموضوع ده بطريقه جديده
ضحك محمود طويلا ونظر لايمن ساخرا
محمود :: وطريقتك نجحت مبروك الف مبروك حضرتك _ واحب انى ابشرك بنفسى _ موقوف عن العمل ومتحول للتحقيق ومش لوحدك كل اللى ساعدوك وداروا عليك ظباط او حتى مجندين متحولين معاك للتحقيق
ثم قام لينهى اللقاء وقال بحدة
محمود :: يوم الحد الجاى تكون فى الشئون القانونيه فى الوزاره الساعه تسعه الصبح التحقيق معاك حيبقى هنا وحظك حيبقى حلو لو اكتفوا بنقلك للصعيد
( ملحوظة :: اعتذر عن الدموع فى هذا البوست )
فى صالة الانتظار بمطار الاسكندرية كانت باسنت تروح وتجئ بين الفرحة والقلق وهى تنتظر وصول الطائرة على احر من الجمر وعيناها تتارجحان بين ساعة يدها والساعة المعلقة فى الصالة
باسنت :: فاضل نص ساعه بحالها ده ايه ده ؟ انا مش قادره استحمل
ضحك حليم وداليا التى اصرت على اصطحابهم
داليا :: يا بنتى اصبرى شويه دى كلها نص ساعه تعدى هوا
باسنت :: نص ساعه يعنى تلاتين دقيقه يعنى الف وتمنميت ثانيه كتير قوى
حليم :: الصبر يا بنتى العمر بيعدى فى ثوانى واللقا قريب ان شاء الله ادعيلها توصل بالسلامه
داليا :: وحشتك يا بسبوسه ؟
باسنت :: وحشتنى ؟ الا وحشتنى دى انا حاقطعها بوس يا لهوى انا مش متخيله انا مش عارفه حاعمل ايه واللا ايه يارب يا ماما توصلى بالف سلامه يا حبيبتى
بعد قليل علت الهمهمات بين المنتظرين واقترب احدهم من الشيخ عبد الحليم قائلا
الرجل :: انتوا مستنيين طيارة باريس ؟
حليم :: ايوه يابنى
الرجل :: احنا سمعنا ان الطياره وقعت فى البحر
التفت حليم لباسنت فى لوعة فجحظت عيناها وقالت بجزع
باسنت :: ايه بيقول ايه ده يا بابا ؟ يعنى ايه الكلام ده ؟ طيارة ايه ؟
حليم :: اصبرى يا بنتى لحد ما نفهم
باسنت :: نفهم ايه طيارة باريس وقعت اللى جايه فيها ماما ؟ مستحيل مش ممكن يعنى ايه يعنى ماما ماتت ؟ طيب ليه ؟
احتضنتها داليا وحاول حليم تهدئتها
حليم :: يا بنتى مش اكيد نتاكد الاول
اقترب رجل يبدو انه احد المسئولين قائلا
المسئول :: مع الاسف يا جماعه الخبر صحيح ولحد دلوقت مافيش اخبار اذا كان فيه ناجيين واللا لا
حليم :: لا حول ولا قوة الا بالله
باسنت :: لا الكلام ده كدب يعنى ايه ؟ يعنى ماما ماتت وهى زعلانه منى ؟ يارب ليه يارب
حليم :: يا بنتى الصبر يا حبيبتى دى ارادة ربنا تعالى يا حبيبتى
باسنت :: اجى فين انا عاوزه ماما
حليم :: شدى حيلك يا بنتى الصبر
بكت باسنت وقالت بصوت مبحوح
باسنت :: طيب اقول لها انا اسفه طيب تسامحنى بلاش تموت وهى غضبانه عليا انا مش مصدقه مش مصدقه مش ..
وامسكت راسها بيديها واحست ان الارض تميد من تحتها وسقطت مغشيا عليها
كان الغضب واضحا على ملامح اللواء محسن الرويعى وهو يدخل الى حجرة مكتبه مع ابن اخته ويغلق الباب عليهما
محسن :: ايه بقى الحكايه قوللى كده من الاول وواحده واحده
ايمن :: الاول يا خالى قوللى ايه حكاية صلاح ال ......
محسن :: خال ايه وزفت ايه ؟ انت جاى هنا علشان تتكلم وتقول كل البلاوى اللى عملتها انت حتحقق معايا ؟
بهت ايمن من ثورة خاله فانكمش فى مقعده ولاذ بالصمت فاضاف اللواء محسن
محسن :: يابنى انطق ما تخلينيش انسى انى خالك احسن ودينى اوريك حاجات عمرك ما شفتها ولا سمعت عنها
ايمن :: يا باشا انا مش عارف حضرتك عاوز تعرف ايه
زفر اللواء محسن بغضب وقال بنفاذ صبر
محسن :: الامر لله ايه حكاية الشيخ عبد الحميد العطار ؟
ايمن :: اسمه عبد الحليم العطار سعادتك ومالوش حكايه ولا حاجه انا كان عندى معلومات انه منضم لتنظيم سرى وطلعت مش صحيحه
محسن :: يعنى مش بلاغ كيدى ؟ طيب فين محضر التحريات ومين مصدر المعلومات وليه قبضت عليه وانت لسه بتتحرى ؟
سكت ايمن فقال اللواء محسن محذرا
محسن :: لاخر مره باقول لك خليك صريح معايا انا ظابط امن دوله قديم مش عيل صغير تضحك عليه بكلمتين
انكمش ايمن فى مقعده اكثر ثم قال
ايمن :: يا باشا كل ده مرتبط بملف المقالات وكفيف الاطرش
محسن :: ايوه تعالالى دوغرى ايه بقى العلاقه بين كل ده وبعضه ؟
ايمن :: حضرتك انا استلمت الملف وقريت التحريات السابقه وقدرت اتوصل من الخمسه المشتبه فيهم ان طالب فى الجامعه هو اللى بيكتب المقالات دى واسمه ثائر توفيق النشار وانا اتعاملت مع الهدف و ....
محسن :: يابنى اتكلم عادى احنا مش فى حرب
ايمن :: قصدى انى اتعرفت بالشاب ده وكلمته ايه يبطل كتابه وعلشان اضغط عليه اخدت عندى الشيخ عبد الحليم والبنت اللى اسمها هاله كام يوم لحد ما اتراجع وبطل كتابه
محسن :: طيب انا جبت ملف القضيه مافيش ورقه ولا محضر تحريات ولا اى معلومه عن الكلام الفاضى ده انت عرفت منين ان هو كفيف ؟ اعترف مثلا ؟
ايمن :: الحقيقه لا ولاخر وقت كان بينكر انما ...
محسن :: طيب اتحريت واتاكدت ازاى ؟
ايمن :: عن طريق مطابقة اسلوب الكتابه بمقالات نشرها فى مجلات حائط فى الجامعه وفى ثانوى وخطب فى مظاهرات
محسن :: كويس جدا تعمل محضر تحريات مش ده اللى اتعلمته ؟
سكت ايمن واطرق براسه فقال اللواء محسن بنفاذ صبر
محسن :: ما علينا ايه علاقته بالشيخ العطار والبنت دى اسمها ..... اسمها ....
ايمن :: هاله يا فندم هاله عبد الظاهر دى بنت زميلته والعلاقه بينهم قويه وانا استخدمتها ورقة ضغط من غير اى ايذاء
محسن :: اللى عرفته انك لبستها قضية اداب
ايمن :: لا مش صحيح
هوت صفعة على وجه ايمن اتبعها اللواء بقوله
محسن :: ما تكدبش عليا انا صبرى قرب ينفذ منك
ايمن :: يا باشا الموضوع كله اخدتها المكتب كام يوم وسلمتها لظابط الاداب وهو بيعمل ظبطيه واتفقت معاه لا تدخل مع الممسوكين حجز ولا حد يقرب لها خالص
محسن :: لكن اتعمل لها محضر علشان تبات فى القسم واى حد من عندها كان بيسال بيقولوله ممسوكه اداب وجيرانها كلهم عرفوا كده وحتى لما طلعتها كان لعدم كفاية الادلة عارف ده معناه ايه ؟ معناه انها لسه فى عيون الناس متهمه انت دمرت البنت المسكينه دى هى كانت خطيبته واللا بيحبوا بعض واللا ايه علاقتهم بالظبط
ايمن :: لا مش خطيبته ولا حبيبته هى صديقه انما قريبه منه جدا وكانت بتوديله المحاضرات علشان يذاكر وهو فى المصنع
محسن :: المصنع اللى قفلته كان ورقة ضغط برضه ؟
ايمن :: المصنع شغال بس انا اجبرته يسيبه يافندم الولد ده طول ما هو شغال ومعاه فلوس ما كانش حيبطل كلام
محسن : طيب ليه ما قبضتش عليه هو ؟ عندك قانون الطوارئ انما ليه اللفه دى ؟
ايمن : يا سيادة اللواء الولد ده لو كنا اعتقلناه كان حيبقى بطل فى عيون الناس دلوقت نص اللى تابعوا مقالاته صدقوه والنص التانى كذبوه لو اتقبض عليه حتى اللى كذبوه حيصدقوه انا كنت باحاول اخليه هو اللى يكتب عكس كلامه ويكذب نفسه
محسن : وقدرت تعمل كده ؟
سكت ايمن ولم يرد فتابع محسن فى ضيق
محسن :: طيب والشيخ العطار كان يعرفه ؟ ايه علاقته بيه ؟
ايمن :: اصل ثائر كان بيحب بنت الشيخ العطار يعنى كان بينهم علاقه وديه
محسن :: البنت اللى انت رحت تتقدملها وده كان حب بقى واللا بسبب ثائر برضه
غامت عينا ايمن وقال بغل
ايمن :: هى خطيبتى لما سابتنى مش كان بسبب ثائر ؟
محسن :: اه يعنى بتخلص تارك تقوم ما تلاقيش غير الشيخ العطار ويا ترى ايه الاجراء اللى عملته معاه ؟
ايمن :: ولا حاجه يافندم ولا اى مخلوق اتكلم معاه خالص
مسح اللواء محسن وجهه بكفيه وقال بهدوء
محسن :: طيب يا ايمن علشان انا راجل مريض بالضغط ومش ناقصك انا حاقول لك الشيخ العطار ده يبقى مين . ده يبقى ابن عم الشهيد عقيد اركان حرب محمود العطار دفعة اللواء صلاح النمر وحبيبه واللى استشهد قدام عينه
بهت ايمن وقال بذهول
ايمن :: لواء ؟
ضحك محسن بمرارة وقال
محسن :: ايوه لواء ياسى ايمن ومش لواء عادى دى كلها ايام وتطلع الحركه ويبقى فريق لا وفين بقى مش حاقول لك اعلى جهه امنيه فى مصر عارف ده ممكن يعمل فيك وفيا ايه ؟ خصوصا وده مدير الجهه دى كمان ؟
قال ايمن بصوت مبحوح
ايمن :: عارف
محسن :: سعادتك تروح يوم الحد الشئون القانونيه وانا عملت كل اللى اقدر عليه علشانك ترقيتك حتتاخر وتتحط نقطه سوده فى ملفك وتتنقل شرطة المسطحات
ايمن :: فى اسكندريه ؟
محسن :: لا فى اسوان اسكندريه دى ما تفكرش تروحها اجازه امك حتيجى تعيش معايا هنا وانت لما تاخد اجازه تيجى على هنا وحاجتك امك حتبعتهالك بالشحن على اسوان لانك حتطلع من الوزاره على هناك مفهوم ؟
___________________
فضل السفر بالقطار واوصى احد المكاتب الخاصة بارسال سائق خاص يسافر بسيارته الى هناك .
انتصف الليل فوقف امام النافذة يتطلع الى الليل الحالك السواد خارج القطار فلمح نقطة بيضاء فى الظلام اخذت تقترب وتكبر حتى اصبحت وجها معروفا !!! ثائر
ايها الملعون لقد حطمت كل طموحاتى وهائنذا اسافر الى اقاصى الصعيد وحيدا منبوذا مثار سخرية وتندر الجميع ( لولا خاله لنقل الى موسيقى الشرطة او ربما طرد من الداخلية طردا ) سمع باذنيه محقق الوزارة يقولها لزميله ساخرا والضحكات كانها سهام تخترق قلبه وكل هذا بسبب ذلك الملعون
ثائر !!!!
لابد ان اعود يوما لانتقم وسوف يكون انتقامى رهيبا