رواية ارواح هائمة الفصل السابع والعشرين 27 بقلم آثر توفيق
الحلقة 27
بحثوا كثيرا ولكن لا اثر لباسنت
نرمين :: نروح نشوفها فى بيتها
داليا :: لا نروح نشوفها الاول فى محطة الرمل اكيد اكيد حتكون فئ تافرنا واللا الحلبى واللا سلطانه
امال :: او يمكن تكون فى تريانون او ديليس
نرمين :: حنلف ندور عليها فى الشوارع ؟
داليا :: ايوه ندور فى الشوارع اومال نروح من غيرها ؟ طيب اقول لماما كوثر ايه اقول لها انا قتلتها ؟
نرمين :: طيب اللى تشوفوه ياللا بينا
نزلوا الى محطة الرمل بحثوا فى كل المحلات محلات طعام وحلويات وايس كريم وعصائر بحثوا كثيرا بلا جدوى حتى وصلوا للمنشية
امال :: جتلى فكره تعالوا معايا
اتجهوا نحو كشك جرائد يضع هاتفا للجمهور
امال :: اصل لو رحنا عندها البيت وهى ما روحتش واخوها فتح لنا حتبقى مصيبه حنقول ايه ساعتها نقول راحت فين ضاعت تاهت ؟
داليا :: صح يا امال بس برضه فى التليفون حنقول ايه ؟
امال :: انا حاتصرف ممكن تليفون لو سمحت ؟
اشار الرجل بالموافقة فرفعت السماعة وطلبت الرقم
امال :: الو ممكن اكلم باسنت لو سمحت ؟
امجد :: مين عاوزها ؟
امال :: انا امنيه زميلتها فى الكليه
امجد :: باسنت مش موجوده هى فى الكليه النهارده عندها محاضرات
امال :: اصلى ما رحتش علشان مامتى تعبانه وكنت عاوزه انقل منها المحاضره ممكن حضرتك تقول لها تتصل بيا او بنرمين وهى تعرف تكلمنى
امجد :: اصلها اليومين دول عند نرمين لان ماما مسافره طالما تعرفى نرمين يبقى حتلاقى باسنت معاها
امال :: طيب شكرا انا حاتصل عند نرمين اسفه لازعاجك
وضعت السماعة وقالت وهى تشعر باحباط
امال :: ما راحتش البيت
نرمين :: المغرب اذن والدنيا ليلت وبعدين حنعمل ايه ؟
امال :: طيب حندور فين ونروح من غيرها ازاى ؟ يا ترى انتى فين يا باسنت
نرمين :: عاوزه اقول حاجه احنا لازم نروح البيت ونقول لبابا كل حاجه وهو يعرف يتصرف او نروح لعمو فؤاد وهو محامى وعنده علاقات ويقدر يدور احسن مننا
داليا :: ماما حتقتلنى بس انا استاهل كل اللى يعملوه فيا يضربونى يحبسونى انشالله حتى يمنعونى من الخروج خالص المهم يلاقوها وترجع
_______________
عثر عليه شريف جالسا على المقهى يدخن الشيشة
شريف :: ايه يا عم ثائر انت فين من الصبح ؟
ثائر :: ازيك يا شريف اقعد .. يا سعيد
شريف :: ما جيتش على العمارة ليه مالك ؟
سعيد :: اؤمر يا باشا
ثائر :: هات قهوه زياده لشريف بيه وهاتلى قهوه
نظر سعيد بدهشة قائلا
سعيد :: انت ما خلصتش قهوتك يا بيه
نظر الى الكوب الذى لم يفرغ بعد ورفعه الى فمه وافرغه دفعة واحدة قائلا
ثائر : اهى خلصت هات بقى اتنين قهوه وخلى قهوتى دوبل
شريف :: فيه ايه انت من امتى بتشرب شيشه ؟
ثائر :: شيشه ؟ انا ما باشربش ......
قطع عبارته وهو ينظر للشيشة بدهشة ثم وضعها جانبا بلا مبالاة
شريف :: لا ومولع كمان يعنى شيشه وسجاير ؟ انت بتموت نفسك ايه اللى حصل ؟
ثائر :: مافيش
شريف :: لا ده انا عاوز امانى ايه رايك نروح البيت عندى نتعشى مع بعض واللا اقول لك نخرج نروح القلعه واللا المعموره نفك شويه
ثائر :: معلش يا شريف انا عاوز اروح
شريف :: لا كله الا كده واللا عاوزنى اجيبهالك هنا علشان تشدك من ودانك
ثائر :: لا وعلى ايه الطيب احسن الامر لله على الاقل اشوف امل حبيبتى
شريف :: ايوه كده انت عارف ماما امانى بتحب الولاد الشاطرين اللى بيقولوا حاضر وانت عارفنى فتان حاقول لها ما رضيش ييجى معايا وسامحنى يارب انا ما باحبش افتن ابدا انما دى ماما امانى ما اقدرش اكدب عليها
ضحك شريف ولكنه كتم ضحكته حين وجد انه يضحك وحده وتابع
شريف :: لا كده بانت احنا نشرب القهوه ونقوم
___________________
وصلت البنات للمنزل وهن يتخبطن فى سيرهن وافكارهن
داليا :: حنقول لبابا ايه يا نرمين ؟
نرمين :: حنقول كل حاجه من طأطأ لسلام عليكم
داليا :: طيب وباسنت
نرمين :: بابا حيعرف يدور عليها احسن مننا
امال :: وحتى لو زعلت ورجعت بيتها ماما كوثر حتقدر ترجعها
فتحت نرمين باب الشقة فوجدت كوثر وثريا وحليم فى الصالة ودخلوا ثلاثتهم مضطربين مبلبلين
كوثر :: اتاخرتوا ليه لغاية دلوقت ؟
نرمين :: يا ماما كان عندنا النهارده مشاكل كتير قوى وباسنت سابتنا ومشيت ودورنا عليها كتير قوى مش لاقيينها
حليم :: مشاكل ؟ وبرضه المشاكل دى حتفضلوا عايشين فيها لوحدكم خلاص كبرتوا وبقيتوا قادرين تحلوا مشاكلكم من غير اهلكم ؟
نرمين :: لا احنا مش قادرين احنا لسه صغيرين وما نقدرش على المشاكل دى من غيركم احنا جايين كلنا تعبانين لاجئين لكم تساعدونا
كوثر :: كلكم ؟ انا مش شايفاكم كلكم انت شايفهم كلهم يا حليم واللا ناقصين ؟
حليم :: لا ناقصين مش كلهم
كوثر :: وانتى يا ثريا يمكن احنا مش شايفين
ثريا :: لا مش كلهم يا كوثر وناقصين اهم حاجه
داليا :: احنا دورنا على باسنت فى كل حته مش لاقيينها
كوثر :: يبقى ما ترجعوش من غيرها
نرمين :: يا ماما ....
هوت بالصفعة على وجهها وهى تهتف بحدة
كوثر :: اخرسى
حليم :: كوثر لا مش كده ايه اللى بتعمليه ده
اسرعت داليا تقف بين كوثر ونرمين وهى تبكى
داليا :: لا يا ماما مش نرمين اللى غلطانه انا اللى غلطانه اضربينى انا انا السبب فى كل المشاكل انا اللى زعلت باسنت وخليتها تمشى وانا اللى زعلت امال امبارح وخليتها تمشى مش عارفه باعمل كده ليه مريضه ؟ اه عالجونى لو مريضه قليلة الادب ؟ عاقبونى وربونى من اول وجديد
نرمين :: كلنا غلطانين وكلنا عاوزين نتعاقب ونتربى من اول وجديد
كوثر :: انتى الكبيره العاقله اللى وثقنا فيكى وسبنالك اخواتك تضللى عليهم وتراعيهم
نرمين :: انا مش الكبيره احنا كلنا من سن بعض اشمعنى انا اللى ابقى الكبيره اشمعنى انا اللى اشيل المسئولية لوحدى ؟
حليم :: قدرك لانك انتى اللى تقدرى ودول اخواتك
كوثر :: دورتوا على اختكم كويس ؟
داليا :: دورنا فى كل حته حتى فى المحلات فى محطة الرمل مالهاش اثر
كوثر :: لو دورتوا عليها فى بيتها كنتوا لقيتوها
امال :: احنا خفنا نروح هناك اخوها يقلق بس اتصلت بالتليفون اخوها قاللى انها هنا
كوثر :: علشان تعرفوا انكوا ما بتفكروش حارجع واقول لو دورتوا عليها فى بيتها كنتوا لقيتوها لكن انتوا مش فاهمين
داليا :: يعنى قصدك انها فى البيت ورافضه تقول لنا ؟
كوثر :: لا قصدى انكوا مادورتوش عليها فى بيتها
نرمين :: طيب نروح ندور عليها هناك
حليم :: هناك فين ؟
نرمين :: فى بيتها فى بيت تانت شيرين
حليم :: هى مالهاش بيت غير ده هو ده بس بيتها ؟
ثريا :: هنا برضه بيتها انتوا دورتوا هنا ؟
كوثر :: باسنت نايمه فى اوضتى
اسرعوا نحو الغرفة فرحين فاوقفتهم
كوثر :: ايه خلاص المشكله اتحلت فرحانين انكوا لقيتوها ونسيتوا انكوا ضيعتوها ؟ هو المهم عندكم انها رجعت واللا لازم تعرفوا مشيت ليه ؟ تعالوا هنا
عادوا يقفون امامهم وهم ينظرون فى الارض وكلهم شعور بالذنب وخرجت باسنت من الغرفة لتقف بجوار كوثر وعيناها دامعتان فنظر حليم لداليا بحزم قائلا
حليم :: داليا عاوزه تقولى حاجه ؟
داليا :: عاوزه اقول انا اسفه يا باسنت انا دورت عليكى كتير علشان بجد انتى مهمه بالنسبه لى مش مهمه بس لا مهمه قوى وغاليه عندى قوى قوى اللى قلته ده كان لحظة جنون مافيش كلمه منه من قلبى والله انا اسفه
كفكفت دموعها واضافت
داليا :: وعاوزه اقول انا اسفه يا امال انا عارفه ان كل الكلام اللى قلته مالوش اساس كان هبل طيش غيرة بنات مش عارفه اسميه ايه لكن بجد ندمانه عليه وباقول من جوه قلبى انا اسفه
كوثر :: انتى مسامحاها يا بسبوسه ؟
باسنت :: اصلها جرحتنى فى لحظة جنون يا ماما واللحظه دى تسوى ايه جنب سنين سعاده وحب طبعا مسامحاها جرحتنى ؟ وماله حتى لو قتلتنى برضه مسامحاها علشان السنين الحلوه اللى عشناها مع بعض مسامحاها
طوقت كوثر عنقها بذراعها واحتضنتها وقبلتها قائلة
كوثر :: يسلم فمك يا بت يا بسبوسه طول عمر لسانك بينقط عسل وقلبك ابيض حبيبتى وساكنه جوه قلبى وانتى يا امال مسامحاها ؟
امال :: انا من اول ما عرفتهم وانا عارفه ان داليا ما بتحبنيش انما انا باحبها وعلشان باحبها مسامحاها مش قادره ازعل منها
داليا :: والله يا امال باحبك وعمرى ما كرهتك بس انا .....
وسكتت داليا فقالت ثريا تستحثها
ثريا :: اتكلمى يا داليا طلعى كل اللى فى قلبك
داليا :: نرمين هى السبب
نرمين :: انا ؟
داليا :: اه انا قعدت لحد اعدادى ما اعرفش غير نرمين ولا اشوفش غير نرمين اتناشر سنه من عمرى بقت هى كل اصحابى وهى كل حياتى وكل عمرى اختى وصاحبتى وكل حاجه ليا ولما جيتوا غصب عنى ساعات باحس بالغيره بس والله انا باحبكم انما مش عارفه احيانا باصدق انى مريضه وعاوزه اتعالج واحيانا باحس انكوا عاوزين تاخدوها منى وانا
اختنقت بالعبرات فكفت عن الكلام فاسرعت نرمين تحتضنها وتقبلها قائلة
نرمين :: يا حبيبتى انتى مجنونه ؟ مافيش حد فى الدنيا يقدر يفرقنا عن بعض امال وباسنت دول اخواتنا بيزودونا وعمرهم ما يفكروا يفرقونا عن بعض وازاى يفرقونا وانا طول عمرى عايشه وحاسسه ان نرمين هى داليا وداليا هى نرمين
كوثر :: علشان كده مديتى ايدك عليها ؟ عرفتى بقى ضربتك بالقلم ليه ؟ لانك انتى دورك تحمى اخواتك مش تضربيهم
نرمين :: انا مش عارفه عملت كده ازاى من ساعتها وانا ايدى منمله وبتوجعنى وباقول يارب كانت اتقطعت قبل ما ...
داليا :: بعد الشر ما تقليش كده بعد الشر عنك الايد دى ياما حمتنى تتقطع ازاى ؟
نرمين :: انا اسفه سامحينى
داليا :: انا اللى اسفه انا اللى غلطانه حقك عليا
حليم :: خلاص كلكوا اتصالحتوا وصافى يا لبن ؟ تعالوا بقى اقعدوا احكولى كل حاجه من طاطا لسلام عليكم
كوثر :: تعالى جنبى يا بسبوسه تعالى يا قمر اطيب واحده فيكوا يا كلاب
نرمين :: انتى مش قلتى حتروحى بيتكم ؟
باسنت :: ما هنا بيتنا
كوثر :: طبعا يا روحى بيتك وماحدش يقدر يمشيكى منه
حليم :: خلصنا حواديت خلينا فى الجد اتكلمى يا نرمين
حكت نرمين كل شئ من البداية واعترفت انها حملت لثائر شعورا بريئا وانها صدمت فيه وحكت كل ما مروا به حتى وصلت لليوم وحكت انها صفعته وعن ذهابهم لمكتب الامن فقاطعتها ثريا قائلة بدهشة
ثريا :: يعنى انتى رحتى كلمتيه على حكاية ايمن ؟ ايش عرفك ان هو اللى مسلطه ؟
حليم :: وحتى لو هو اللى مسلطه ولو انها حاجه ما تعقلش تروحى وتضربيه بالقلم ؟ واللا تسيبى الموضوع ده ليا وانا قلت انى حاتصرف فيه انتى مش عارفه نتيجة تصرفك حتبقى ايه ؟ كان ممكن تضيع سنه من عمرك لا يا نرمين انتى غلطانه ده تهور
داليا :: انا اللى غلطانه يا بابا انا اللى فضلت ازن على دماغها لحد ما خليتها عملت كده
نرمين :: لا يا بابا انا اللى غلطانه انا اللى من يوم ما هاننى وانا مش ناسياها وكان نفسى اشفى غليلى وارد له القلم
كوثر :: واديكى رديتى القلم وكنتى حتضيعى نفسك او تضيعيه
ثريا :: الحمد لله ان الولد طلع شهم واتحمل المسئوليه كلها وكان ممكن مستقبله يضيع
داليا :: انتوا برضه شايفين انه شهم؟ طيب والتليفون اللى جه لمدير الامن وخلاه قفل الموضوع كله صدفه ؟ وايمن اللى وصل بعدها بدقايق برضه صدفه ؟ كل حاجه بتقول انهم مرتبين مع بعض وان ثائر ده بيمثل دور الشهم وهو اللى بيزق صاحبه
حليم :: ايه حكاية ايمن دى كمان هو ايمن جه الكليه ؟
نرمين :: ايوه يا بابا
حليم :: جه امتى بالظبط وانتوا فى مكتب الامن واللا قبلها؟
نرمين :: لالا بعد كده اول ما خرجنا على طول كان جاى يهدد بيقوللى فكرى فيا او حتندمى
حليم :: لا احكيلى بقى كلمه كلمه
حكت ما دار بينها وبين ايمن فانتفض حليم واقفا وقال بغضب
حليم :: لالالا الموضوع ده كده ما يتسكتش عليه
اتجه الى الهاتف ورفع السماعة وطلب رقما مباشرا
حليم :: الو سلام عليكم اكلم اللواء صلاح لو سمحت
استمع قليلا ثم قال
حليم :: طيب لو سمحت بلغه ان الشيخ عبد الحليم العطار اتصل بيه وعاوزه ضرورى للاهميه
اغلق الخط وعاود الجلوس وكانت كوثر تقول
كوثر :: انا احساسى ان ثائر ده مظلوم
داليا :: وانا متاكده من اللى باقوله فكروا فيها كده
حليم :: يا بنتى ان بعض الظن اثم اتقى الله ما تظلميش حد الظلم ظلمات يوم القيامة وربنا سبحانه وتعالى قال فى حديث قدسى ( انى حرمت الظلم على نفسى وجعلته بين عبادى مذموما ) والكلام اللى بتقوليه ده عايم ومش منطقى
كوثر :: انتى ايه رايك يا امال انتى مش تعرفيه كويس ؟
امال :: انا خايفه اقول رايى تقولوا بادافع عنه لكن رغم انى فعلا مش طايقاه من يوم ما غلط فى نرمين لكن والله طول عمره راجل وشهم وخدوم
حليم :: عموما كل حاجه حتبان
كوثر :: هو انت اتصلت بصلاح ليه ؟
حليم :: مين غيره يقدر يلم اللى اسمه ايمن ده ويخلص الموضوع ده
نرمين :: هو مش عمو صلاح طلع معاش وشغال اعمال حره ؟
نظر حليم وكوثر لبعضهما ورن جرس الهاتف فقام ليرد
حليم :: الو ايوه يا صلاح انا عاوزك ضرورى
صلاح :: انا عارف معلش انا اسف جدا يا حليم لكن صدقنى ظروف هنا غصب عنى خلتنى ما قدرتش انزل انما كل حاجه تحت سيطرتى ما تقلقش
حليم :: ما اقلقش ازاى انت مش عارف اللى حصل النهارده
صلاح :: عيب يا حليم تقول كده ده انا صلاح اومال فاكر مين اللى اتصل بالعميد شرابى خلاه قفل الموضوع واللا انت فاكر ان ابو نضاره ده فرد امن فى الجامعه ؟
حليم :: يخرب عقلك هو تبعك ؟
صلاح :: وقبل ما يوصلوا لمكتب الامن كان هو فى السويتش بتاع الجامعه بيدينى التقرير واديته الاذن لو حصل اى حاجه يتدخل حتى لو كشف نفسه ولو نزلت حتلاقى واحد قاعد فى الكافيتيريا اللى جنب السوبر ماركت الى فى وش البيت انتوا اهلى يا حليم ونرمين وداليا دول بناتى وانا جاى قريب
حليم :: تيجى بالسلامه يا صلاح كلهم هنا بيسلموا عليك وبيقولولك وحشتنا قوى يا عمو صلاح
صلاح :: وانتوا كلكم وحشتونى جدا حضرولى بقى محشى من ايد دوللى وخلوا نونو تعمل رز بلبن بالقرفه وجيلى بالكاسترد
خرجوا للنزهة فى بحرى لمحاولة الترفيه عنه كانوا اصدقاءه المقربون شريف وامانى وابنتهما ومها ومعها شقيقها محمود
شريف :: تاكلوا ترمس ؟
امانى :: انا عاوزه فول بس يكتر الشطه ويعصر ليمونه بحالها
مها :: لالا انا خلينى فى الترمس بس برضه ليمون
محمود :: انا حاجى معاك شوف ثائر ايه حتاخد ايه ؟
امانى :: هاتله فول زيى
ثائر :: بس بلاش شطه
امانى :: كتر له الشطه هو حياكل على مزاجه ؟
ساد الصمت بعد انصراف محمود وشريف حتى قطعته مها
مها :: ثائر فكها بقى هو ايه اللى حصل ؟
ثائر :: ما حصلش حاجه
امانى :: اتكلم يا واد بدل ما اقوم املص ودانك حصل ايه ؟
صاح بثورة مفاجئة
ثائر :: قلت ما حصلش حاجه انتى ايه هزار هزار فيه ايه ؟
عاد شريف سريعا عندما سمع صياحه ونظر نحوه ثم نظر لزوجته بغضب وتمالك نفسه وقال معاتبا زوجته
شريف :: امانى ايه ؟ الزمى حدودك شويه
امانى :: انا اسفه كنت باحاول ... لكن لا انا غلطانه انا اسفه يا ثائر
اعتصر راسه بيديه واغمض عينيه بالم
ثائر :: انا اللى اسف ليكوا كلكوا انا اسف جدا يا شريف اسف جدا يا امانى مش قصدى ازعق لكن انفعلت غصب عنى انما مش بسببك والله
امانى :: ما حصلش حاجه احنا اخوات احنا كلنا عاوزين نتطمن عليك
شريف :: حصل خير يا ثائر المهم احنا حنستاذن انا وامانى علشان انا افتكرت مشوار ضرورى حاوصلها البيت واروحه ياللا يا امانى
امانى :: يا شريف ....
شريف :: امانى ياللا
قامت متثاقلة بينما ثائر يحاول الاعتذار
ثائر :: شريف انا اسف
شريف :: مافيش حاجه بس اصلها زودتها شويه قوللى انت امتحان الماده بتاعتك امتى
ثائر :: بعد بكره
شريف :: يا ريت نقعد مع بعض بعدها نشوف الشغل
انصرف شريف وامانى وساد صمت ثقيل حتى قالت مها
مها :: تعالوا نتمشى شويه وبعد كده نروح الترمس خلاص مالوش لازمه
قاموا للتمشية على البحر ولم يشعروا بمرور الوقت حتى وصلوا الى محطة الرمل وعندئذ تنبهت مها انهم قطعوا كل تلك المسافة سيرا وقد تاخر الوقت
مها :: تصوروا الساعه حداشر وما حسيناش بالوقت ياااه مشينا كل ده ؟
محمود :: انا تعبت بس قلت ماشى اسيبهم يمشوا علشان يفكوا
مها :: مش انا هو اللى محتاج يفك وانا مش حاكلمه خالص حاسيبه براحته وهو لما يحتاج يتكلم حيلاقينى اظن انت عارف كده كويس
المشكلة انه يحتاج للكلام بشدة ولكن غصة فى حلقه تجعله يصمت ويبتلع كلماته المرة ابتلاعا الا ان صمته يورثه كآبة يريد ان يخرج منها بالفضفضة فلا يستطيع ومن غير مها يمكن ان تنصت لاناته ؟ مها التى كانت دوما موجودة حين يحتاجها وهى موجودة الان . كانت هناك امانى ايضا رغم ميلها للدعابة الثقيلة الا انا كانت تجيد الانصات وله بالذات ولكنه اغضب زوجها وهو يعترف بخطئه ولكن كيف يصلحه ؟
ثائر :: يا مها انا مش عارف عاوز اتكلم لكن مش قادر انما المهم دلوقت ياريت تحاولى بكره تروحى لامانى وتفهمى شريف انى ما كانش قصدى فهميه انى تعبان ومش فى وعيى
مها :: من غير ما تقول انا عامله حسابى حاروح اتغدى بكره معاهم واصلح الحكايه دى
محمود :: ياللا نركب ونروح وبعدين نبقى نتكلم
مها :: انا حاجيلك الكليه بعد امتحانك ونقضى اليوم هناك
ثائر :: لا انا حاخلص وامشى على طول مش حاقعد فى الكليه ولا دقيقه
اوقف محمود تاكسى ليركبوه فقالت مها
مها :: طيب ياللا نكمل كلامنا فى التاكسى
ثائر :: لا اركبوا انتوا روحوا انا حاتمشى . سلام
_________________
عدة ايام رتب فيها صلاح اموره واتصل بمكتب الاسكندرية ليخبر عادل بوصوله
صلاح :: ادينى الرائد عادل عز الدين
بعد قليل اتاه صوت عادل
عادل :: تحت امرك يا صلاح باشا
صلاح :: ايه اللى عرفك ان انا اللى طالبك ؟
عادل :: كنت متوقع الاتصال ومنتظره من يوم الجامعه
صلاح :: جهزت كل حاجه زى ما قلت ؟
عادل :: على موعد التنفيذ يافندم
صلاح :: الليله انا جاى بكره وعاوز السفره تكون جاهزه
عادل :: تمام يا فندم
__________________
فى العمارة المجاورة لمقر اقامة ايمن استاجر مدرس قادم من الصعيد حديثا شقة مفروشة بصفة مؤقتة . لم يكن قد قضى ليلتين فى الشقة بعد ولم يكن يخالط احدا كان طويلا نوعا بدينا نوعا وسيم بعض الشئ يلبس نظارة طبية تحفظ النظر وتضفى وجاهة لا اكثر ملامحه عادية جدا لا تعلق بالذاكرة .
فى نفس يوم وصوله سافر بواب العمارة فى اجازة وحل محله قريب له صموت لا يتكلم الا على قدر المطلوب يلف وجهه بلاسة صعيدى تخفى نصف وجهه وله شارب ضخم يخفى النصف الاخر
صعد المدرس الصعيدى الى شقته بعد المغرب فى وقت كثرت فيه الزيارات لسكان العمارة اكثر من المعتاد
وعند منتصف الليل صعدت الى السطح ثلاثة اشباح تتشح بالسواد واجتازت السور الفاصل بين المبنيين لتهبط على سلم الخدم حتى الطابق الثالث الذى يقيم فيه ايمن تقدم احدهم وعالج قفل باب المطبخ وفتحه بصمت ودخل الثلاثة الى المطبخ ومنه الى الصالة حيث توجه احدهم الى حجرة الام بينما اختبا الثانى خلف ستارة تؤدى الى ممر يصل لغرفة نوم ايمن ووضع الثلاثة اقنعة تخفى انوفهم ثم اسقط الثالث عمدا مزهرية من الخزف احدثت دويا ايقظ ايمن الذى حمل سلاحه وخرج مترقبا ليجد الشخص الثالث يقف فى الصالة غير مبالى فتوقف فى الممر قائلا
ايمن :: انت مين ؟
الثالث :: ضيف
ايمن :: طيب ارفع ايدك وقرب هنا
رفع الرجل يديه مستسلما ولكنه بقى فى الصالة قائلا
الثالث :: انا مافيش معايا سلاح دى طريقه تستقبل بيها ضيوفك ؟
ايمن :: انا ممكن اضربك طلقه اخلص عليك لكن مش قبل ما اعرف دخلت هنا ازاى وعاوز ايه
الثالث :: ليه ده كله انا واقف مستنيك علشان اقول لك دخلت ازاى وعاوز ايه تعالى علشان نعرف نتكلم وصدقنى حترتاح
اقترب ايمن بحرص حتى جاوز الممر واصبحت الستارة خلفه فبرز منها الشخص الثانى حاملا علبة اسبراى رشها فى الجو وفى ثوانى كان ايمن قد سقط ارضا بينما قال الثالث
الثالث :: مش قلتلك حترتاح ؟ نوم العوافى
خرج الاول معلنا
الاول :: انا وقفت الانذار نقدر نخرج من باب الشقه
الثانى :: طيب ياللا بسرعه قدامنا ربع ساعه على ما تيجى الاسعاف
وفى المصعد المتجه للسطح
الثالث :: انت متاكد ان مافيش اى انذار تانى فى الشقه ؟
الاول :: انا اتصدمت وانا بافتح باب المطبخ ان مافيش انذار طيب عامل على باب الشقه ليه فلوس على الفاضى ؟
صعدوا به الى السطح واجتازوا لسطح العمارة الثانية ليلاقوا عمال الاسعاف عند شقة المدرس ونزلوا الى الباب حاملين محفة والبواب البديل يقف بين السكان قائلا
سعد :: لا حول الله يارب الراجل جاى من الصعيد يموت هنا ؟ ده تانى يوم ليه فى العماره
ساكن :: اومال فين عبد المقصود ؟
سعد :: سافر الصعيد يا بيه عنده عمه اتوفى انا سعد بداله اسبوع لحد ما يرجع اى خدمه يا بيه ؟
الساكن :: انت تعرف حاجه عن الراجل ده ؟
سعد :: طبعا يا بيه اصله واصل العمارة اول امبارح معايا وانا اللى مطلعله الشنط ده مدرس تاريخ من اسيوط لسه منقول وواخد الشقه اللى فى السابع شهر لحد ما يدور على سكن
الساكن :: اومال ايه اللى حصل له ؟
سعد :: بتاع الاسعاف بيقول شكلها جلطه وربنا يستر عليه