رواية ارواح هائمة الفصل السادس والعشرين 26 بقلم آثر توفيق
الحلقة 26
استيقظت الفتيات باكرا للذهاب للجامعة وارتدت نرمين ثيابها على عجل قائلة
امال :: لا انا جايه معاكم
باسنت :: انتى ما عندكيش محاضرات النهارده
امال :: معلش علشان نطلع بعد كده على عندنا
نرمين :: طيب خلصوا لبسكم على ما اشوف داليا
باسنت :: نرمين تفتكرى هى لسه زعلانه ؟
نرمين :: اكيد دى اول مره اضربها بالقلم واول مره نبات متخاصمين
اسرعت تخرج وقبل ان تصل لباب الشقة سمعت امها تناديها
كوثر :: نرمين رايحه فين ؟ داليا نزلت راحت الجامعه
كان يبدو على صوتها الغضب فاستدارت نرمين ببطء لتجد اثار الارق على وجه امها وامارات غضب مكتوم يوشك ان ينفجر
كوثر :: اول مره تتفرقوا عن بعض وكل واحده تمشى لوحدها كده الموضوع كبير وانا لازم اعرف ايه السبب ايه اللى حصل بينكم يا نرمين ؟
نرمين :: انا ضربتها بالقلم
كوثر :: ايه ازاى ده حصل ايه السبب ؟
نرمين :: اتخانقنا مع بعض والموضوع اتطور وما حسيتش بنفسى
كوثر :: اتخانقتوا والموضوع اتطور ؟ ضربتيها بالقلم ؟ واحنا ولا حس ولا خبر ؟ خلاص احنا متنا ؟ يظهر ان الحريه اللى اديتهالكم كانت زياده يا نرمين انا لازم اعرف دلوقت حالا ايه الحكايه ؟
نرمين :: يا ماما اروح اشوفها واصالحها والله وحاقول على كل حاجه
كوثر :: دلوقت مافيش نزول قبل ما اعرف يا امال يا باسنت تعالوا هنا
خرجت الفتاتان تتخبطان فصاحت كوثر بغضب
كوثر :: انتوا التلاته مافيش نزول الا لما اعرف ايه الحكايه
نظرت امال وباسنت الى نرمين التى قالت
نرمين :: كل ده من تحت راس الكلب اللى اسمه ايمن والحيوان اللى اسمه ثائر
كوثر :: ايمن مين ده ؟ وثائر ده مش سالتك عليه قلتيلى مافيش اى علاقه بينكم هو انتوا رايحين الجامعه ليه ؟
نرمين :: يا ماما والله ثائر مافيش اى علاقه بينى وبينه مش اكتر من انه دافع عننا وشكرناه وبعدها قطعنا علاقتنا بيه اما ايمن ده يبقى الظابط اللى قبض على بابا من غير اى سبب وجه يتقدملى
كوثر :: مش فاهمه انتوا اتخانقتوا بسببهم ليه وايه علاقتهم ببعض ؟
نرمين :: هم اصحاب وداليا بتقول ان ثائر هو اللى مسلط ايمن
كوثر :: ليه ؟
نرمين :: مش عارفه والله ما عارفه ولا قادره افكر والنبى يا ماما سيبينى اروح اشوف داليا ونرجع وحنبقى تحت امرك
كوثر :: يا امال مافيش مرواح عند بابا النهارده تروحوا وترجعوا على هنا
امال :: حاضر يا ماما ولو عاوزه اقعد ما اروحش تحت امرك
كوثر :: لا روحوا وترجعوا مع بعض
_________________
بحثوا عن داليا فلم يجدوها فقالت نرمين مقترحة
نرمين :: تعالوا نشوفها فى المدرج
باسنت :: بس ده لسه ساعه الا ربع على المحاضره
نرمين :: نبص عليها يعنى حتكون راحت فين ؟
صعدوا الى المدرج ليجدوها تجلس وحيدة
نرمين :: داليا انتى جيتى لوحدك ليه وسبتينا ؟
نظرت لها داليا باستنكار واجابت ببرود
داليا :: يعنى هو انا سبتك لوحدك ؟ عندك اخواتك اهه بدالى انا بقى جيت لوحدى دى حاجه تخصنى ما تخصش حد انا مرتاحه كده
باسنت :: انتى لسه زعلانه يا داليا ؟ احنا برضه اخواتك
داليا :: انا لا زعلانه ولا انتوا فارقين معايا اصلا كلكوا على بعض كل الحكايه انى خلاص قررت ابقى فى حالى ماليش دعوه بحد وانتوا كمان خليكوا فى حالكم مالكوش دعوه بيا
نرمين :: يا داليا انا اسفه وحياة ربنا انا طول الليل زعلانه من نفسى ومستعده اعمل اى حاجه علشان تسامحينى
داليا :: سهله جدا خليكى فى حالك وخلاص صعبه دى ؟ كل واحده تلزم حدها معايا المره دى انا سكتت انما اى وحده بعد كده تفكر تمد ايدها عليا مالهاش عندى غير الجزمه مهما كانت
بهتت الفتيات من حدة داليا ولكن نرمين ابتلعت الاهانة وحاولت تهدئتها
نرمين :: طيب يا ستى اللى تشوفيه انا استاهل اكتر من كده انما ما ينفعش ننقطع عن بعض احنا اخوات طول عمرنا
ابتسمت داليا بسخرية وقالت
داليا :: المره دى بقى انا اللى باقولها ومش حارجع فيها احنا مش اخوات احنا ولاد خاله وبس ومافيش بيننا اى صفه تانيه
امال :: اذا كنتوا حتخسروا بعض بسببى انا حابعد عنكم خالص
داليا :: بعد ما خربتيها ؟ تبعدى ما تبعديش مش فارقه المهم تبعدى عنى
امال :: طيب بعد اذنكم متشكره يا داليا واسفه
داليا :: فى داهيه وانتوا حصلوها انا عاوزه اقعد لوحدى
نرمين :: يا داليا ارجوكى احنا .....
داليا :: هو انتى ما عندكيش دم ما بتحسيش ؟ مش عاوزه اشوف خلقتك ايه ما عندكيش مخ علشان تعرفى ان الحب والاخوه والصداقه كمان خلاص ؟ يا شيخه يا تغورى من وشى يا اقوم واسيبهالكم
نرمين :: لا خلاص انا حاقوم خليكى انتى احضرى محاضرتك انا مش حاقدر احضر
قامت وهى تشعر بالانكسار والرغبة فى البكاء وبعد انصرافها قالت باسنت
باسنت :: وانا كمان يا داليا مش عاوزانى ؟
ضحكت داليا وقالت بسخرية مريرة
داليا :: هو انا باتكلم هندى ؟ انا مش عاوزه حد فيكم خالص ولا حتى حاصاحب غيركم خلاص حابقى لوحدى احسن مليون مره
باسنت :: انا عملت حاجه زعلتك ؟
داليا :: هو انتى طول عمرك بتعملى حاجه ؟ انتى على طول زى قلتك كمالة عدد وخلاص زيك زى خيال المآته يا شيخه غورى بلاش قرف
قامت ببطء وهى تشعر انها لم تعد ترى شيئا وحاولت ان تقول شيئا ما فلم تجد سوى كلمة واحدة خرجت منها بصوت مبحوح
باسنت :: شكرا
نزلت نرمين وهى عاجزة عن ايقاف سيل الدموع من عينيها لتجد امال عند المكتبة تبكى فى صمت فجلست بجوارها تتشاركان البكاء الصامت حتى نطقت امال اخيرا
امال :: يظهر انى كنت شؤم عليكم دخلت وسطكم فرقتكم عن بعض وانا دلوقت لازم ابعد عنكم علشان ترجعوا لبعض
نرمين :: الغلطه مش غلطتك يا امال المشكله انى قعدت سنين طويله باعامل داليا على انها مسئوله منى زى بنتى او اختى الصغيره بس انا زودتها وكنت باتحكم فيها وامشيها ورايا من غير ما يكون ليها راى فى حاجه مش واخده بالى اننا من سن بعض وانى لازم اعمل اللى هى عاوزاه كمان مش اكون لوحدى صاحبة القرار وهى توافق وبس
امال :: برضه انا اللى فتحت الجراح دى كلها انا السبب
نرمين :: لو انتى اللى فتحتيها يبقى كتر خيرك لانها كان لازم تفتح انما لا بصراحه احنا غلطانين كان لازم نعرف اننا لسه صغيرين وما عندناش خبره ولازم نسال اهالينا علشان يدلونا على الصح بدل ما نفكر بدماغنا ونغلط
قامت امال لتنصرف قائلة
امال :: انا حاروح اشوف وشك بخير بس رغم كل حاجه يا نرمين حتى لو كنا غلط انا حبيتك قوى وكمان ماما كوثر قصدى تانت كوثر لو سمحتلى بعد كده اقول تانت
نرمين :: ما تبقيش عبيطه يا امال مش لازم نخسر بعض علشان مشكله مهما كانت انا كل اللى باقوله وده رايى ان المشكله دى اكبر من اننا نحلها لوحدنا احنا نروح لماما كوثر تساعدنا وحتفضل ماما كوثر غصب عنك او نروح لبابا حليم ولو عاوزه نروح لعمو فؤاد نروح له اى حد كبير يقول لنا نعمل ايه ونرجع ازاى زى ما كنا اى حد من اهلنا ياخد بايدنا ويوصلنا لبر الامان
بعد قليل حضرت باسنت وهى تحمل كيسا من السندوتشات وكوب كولا كبير وجلست بجوارهم تاكل بلا مبالاة
امال :: ايه ده يا باسنت ؟
باسنت :: الدكتور لغى المحاضره نزلت جبت سندوتشات وكولا
نرمين :: بس كل دى سندوتشات مش كتير ؟
باسنت :: كتير شويه مش مهم انا عاوزه كده وحاعمل اللى انا عاوزاه
نرمين :: يا حبيبتى اعملى اللى انتى عاوزاه بس بالعقل علشان تحافظى على وزنك
انفعلت باسنت وصاحت بحدة
باسنت :: هو وزنى انا واللا وزنكوا انتوا ؟ انا حره انا مش دلدوله ولا خيال مآته يا نرمين ولا حد بيتحكم فيا ولا حد بيسحبنى وراه
امال :: فيه ايه يا باسنت ؟ ما حدش قال عليكى كده
باسنت :: لا اتقالت انما خلاص ما بقاش ينفع تتقال تانى انا ماشيه
نرمين :: مش حتروحى معانا ؟
باسنت :: ليه عددكم ناقص عاوزين واحده كمالة عدد ؟ شوفوا واحده غيرى انا حاروح بيتنا واقعد لوحدى لحد ما ماما ترجع من السفر ومش حابقى كمالة عدد ولا دلدوله ما لهاش لازمه لحد
نظرت امال ونرمين لبعضهما بدهشة وقالت نرمين فى حيرة
نرمين :: هو فيه ايه ؟
امال :: مش عارفه ومش فاهمه اى حاجه ايه اللى بيحصل ؟
باسنت :: مالكم متلخبطين كده ليه عاوزين تفهمونى انكم بتحبونى بجد ؟
ارتعدت ذقنها وهى تقاوم دموعها التى سالت رغما عنها وهى تضيف
باسنت :: واللا صعبان عليكم ما تغرسوش سكينتكم فى قلبى زى داليا ؟
نرمين :: داليا ؟ هى داليا عملت ايه ؟
باسنت :: فوقتنى وعرفتنى حقيقتى بالنسبه لكم ابقوا قولوا لماما كوثر انى باحبها قوى . سلام
وهمت بالانصراف ولكنها استدارت نحوهم قبل ان تنصرف
باسنت :: اه على فكره انا شفت اللى اسمه ثائر عند مبنى شئون الطلاب
كان قد استعاد كثيرا من رونقه السابق ظاهريا فقط كان قد نجح فى عالم المقاولات وانهى اول اعماله فى بيت ام هالة وحضر اليوم فقط ليعرف موعد امتحان دور اكتوبر فى المادة التى رسب فيها وهى كالعادة مادة الادارة للعام الاول سوف يحضر الامتحان الحادى عشر دون جدوى .
كان يرتدى ثيابا مهندمة ونظارة شمسية انيقة وقد صفف شعره بعناية وحلق لحيته وهذب شاربه ولكن الشحوب والهزال صارا من ملامحه الجديدة
خرج من المبنى بعد ان حصل على موعد الامتحان
نرمين :: ثائر
كانت تنادى عليه بصوت عالى مفعم بالغضب فاستدار نحوها راسما على وجهه شبح ابتسامة
ثائر :: انسه نرمين ازيك مالك ؟ شكلك حد مضايقك
نرمين :: انت عاوز منى ايه انت وصاحبك الحيوان ده ؟
ثائر :: صاحبى ؟ صاحبى مين ده ؟ ازيك يا امال
امال :: ازيك يا ثائر نرمين ياللا بلاش مشاكل
نرمين :: اسكتى يا امال . باقول لك ايه ابعد عنى انت وصاحبك احسن ودينى وما اعبد حتلاقوا واحده تانيه خالص بتتعامل معاكم
ثائر :: يا انسه انا مش عارف انتى بتتكلمى عن مين
نرمين :: عن الحيوان اللى اسمه ايمن زفت رشدى
التمعت عيناه غضبا وقال وهو يضغط على اسنانه
ثائر :: هو عمل ايه معاكم ؟
لاحظت امال شخصا طويل القامة له شارب رفيع وجسد رياضى ممشوق ويضع على عينيه نظارة سوداء ويبدو فى منتصف العقد الرابع من العمر يقف على مقربة يترقب ويتاهب للتدخل فامسكت بذراع نرمين تحاول ان تجذبها بعيدا ولكنها خلصت ذراعها منها بعصبية قائلة لثائر
نرمين :: يعنى انت مش عارف هو عمل ايه ؟
ثائر :: عارف مع الاسف لكن ...
نرمين :: مش انت اللى مسلطه ؟
ثائر :: لا طبعا ايمن رشدى ده ....
نرمين :: عارفاه خطيب صاحبتك الانسه مها ويمكن هى اللى سلطته مش مهم المهم مهما كان امن دوله واللا غير امن دوله انا ما باخافش
ثائر :: صدقينى يا انسه لا انا ولا مها لينا دعوه بالموضوع ده ايمن ده .....
نرمين :: اسمع قول له ان نجوم السما اقربله منى انت فاهم ؟ وانت كمان نفس الكلام لازم تعرف انى اقدر احمى نفسى كويس من امثالك انت وهو
ثائر :: نرمين انا .....
لكنها قاطعته بحدة وهوت بصفعة على وجهه هاتفة بغضب
نرمين :: ما تجيبش اسمى على لسانك يا حيوان
امال :: نرمين
هتفت امال بخوف وهى ترى الرجل الغامض يتحرك مقتربا ومن الجهة الاخرى يتحرك احد افراد الامن بصحبة احد الطلاب بينما وقف محيى بعيدا يترقب وهو يبتسم بشماتة
هانى :: فيه ايه ؟ ايه اللى بيحصل هنا ده ؟
كان هانى فرد الامن قد اقترب منهم فتوقف الرجل الغامض يترقب بينما صاح الطالب
سامح :: اديك شفت بنفسك يا هانى ماحدش قادر عليها نازله فيه تهزيق وقدام عينك ضربته من غير ما يكلمها
قال ثائر بصوت مكظوم وهو يحاول تمالك نفسه
ثائر :: فيه ايه يا هانى ؟
هانى :: اتفضلوا معايا على مكتب الامن العميد محمد شرابى عاوزكم
ثائر :: انا اجى معاك ماشى انما الانسه عاوز منها ايه ؟
هانى :: هى مش بتتهجم عليك وضربتك بالقلم قدام عينى ؟
ثائر :: من حقها تعمل كده واكتر كمان
نظرت له نرمين بدهشة ونظرت له امال بامتنان بينما الرجل الغامض يترقب بحذر مستعدا للتدخل وثائر يتابع وعضلات وجهه تختلج بقوة
ثائر :: انا اصلى عاكستها وزودتها قوى ومن حقها تدافع عن نفسها وتوقفنى عند حدى والحقيقه هى فوقتنى قبل ما اسوق فيها
سامح :: مش ده اللى حصل دى قلت ادبها عليه من غير سبب وانا شاهد
قال منفعلا
ثائر :: الانسه من البنات المحترمين جدا فى الجامعه ومش قليلة الادب انا اللى غلطان يا هانى وحاجى معاك انما مالوش لزوم الانسه تروح مكتب الامن
هانى :: لا لازم انتوا الاتنين مطلوبين هناك ولازم تيجوا وهناك عند محمد بيه قولوا اللى انتوا عاوزينه
___________________
استمع رئيس الامن لثائر الذى دافع عن نرمين قائلا
ثائر :: انا عاكستها كتير وزودتها قوى ومن حقها تعمل اكتر من كده
شرابى :: كان ممكن تيجى تشتكيه يا انسه
نرمين :: انا مش حاشتكيه من فضلك اعتبر الموضوع كأنه ما حصلش
شرابى :: ازاى يعنى ؟ شتيمه وزعيق وضرب اقلام فى الجامعه يا اما تشتكيه وساعتها يبقى بيتهجم عليكى وممكن يترفد من الجامعه وهو قدامه سنه
نرمين :: لا طبعا مستحيل حاعمل شكوى
ثائر :: ما تفرقش معايا مش حتبقى اكتر من اللى خسرته
شرابى :: ومن غير شكوى يبقى حضرتك اتهجمتى عليه من غير سبب وساعتها ممكن تتفصلى سنه وما تدخليش الامتحان وتضيع عليكى سنه
ثائر :: ازاى الكلام ده ؟ انا معترف انى عاكستها حتى من غير شكوى ومعترف انى غلطان واستاهل وانها عندها حق فى اللى عملته
نرمين :: شوف حضرتك عاوز تعمل ايه مش مهم انا مش حاقدم شكوى
قبل ان يجيب دق جرس الهاتف فرفع السماعة قائلا
شرابى :: الو ... اهلا اهلا يافندم .... ايوه يافندم مين يافندم ؟ اه قدامى اهم .... افندم ؟ ........ تمام حاضر تحت امر سعادتك
وضع السماعة ونظر اليهما طويلا ثم قال مشيرا بيديه الى الباب
شرابى :: اتفضلوا اعتبروا الموضوع منتهى بس ما يتكررش
ثائر :: عن نفسى مش حاجى تانى غير للامتحان وامشى بعده على طول
وخرج الاثنان وعند الباب توقف ثائر وترددت نرمين قليلا ثم مضت مع امال فمضى ثائر بعد انصرافها الى الاتجاه الاخر نحو الباب الخارجى للجامعة
جلست الفتاتان على دكة رخامية عند ملعب الكرة الخماسية ظهرهما للملعب ينظران للساحة بعيون لا تريان وعلى مسافة غير بعيدة او قريبة منهم وقف الرجل الغامض يرقبهما ويرقب محيى الذى وقف ينظر اليهما مغتاظا من مسافة اقل بينما من الجهة الاخرى كانت تختبئ بين الاشجار عينان غارقتان فى الدموع ترقبانهما فى سكون
كانت نرمين تبكى بلوعة وهى تدير راسها فى ذهول
نرمين :: ايه اللى بيحصل ده انا ما بقيتش فاهمه حاجه اخواتى بيبعدوا عنى ليه ؟ ليه يا امال فهمينى كلكوا بتروحوا منى ليه انا عملت ايه وحش ؟
امال :: اهدى يا نرمين انتى ما عملتيش حاجه غلط فى حد
نرمين :: انا غلطت انى حاولت احافظ عليكم ؟ عملت من نفسى الكبيره وشلت المسئوليه على كتفى رغم ان باسنت اكبر منى بشهرين عملت نفسى اخت اكبر وام فى اوقات ليكم واصغر واحده فيكم اصغر منى بشهر واحد ورغم كده فشلت احافظ عليكم وعقدنا انفرط بعد ما حافظت عليه كل ده ليه فشلت ؟ ليه ما قدرتش ؟ انا غلطت ؟ مش عارفه ومش فاهمه حاتجنن
امال :: نرمين نرمين اسمعينى انتى مش غلطانه لكن بصراحه داليا زودتها قوى
نرمين :: داليا اللى عشت معاها واحد وعشرين سنه عمرنا كله تكرهنى ليه وانا باحبها اكتر من روحى ؟ مش قادره اقول زيكم زيها بصراحه ما عنديش حد زيها هى اغلى انسانه فى عمرى كله
امال :: وانتى كمان اغلى انسانه عندها بس اصل يعنى حبها ليكى زياده شويه انا قصدى انها يعنى اللى عملته النهارده مش كره ليكى بالعكس ده حب زياده بس زياده قوى زياده عن اللزوم .... غيره
نرمين :: انا عارفه بس مش عارفه اعمل ايه يمكن انا السبب ؟ يمكن كونى حطيتها تحت جناحى وحميتها طول السنين اللى فاتوا هو اللى خلاها كده ؟ يمكن كوننا فضلنا لوحدنا لحد اعدادى هو ده السبب ؟ مش عارفه
ايمن :: صباح الخير يا انسه نرمين
نرمين :: يادى النهار الاسود على الصبح عاوز ايه انت كمان ؟
ايمن :: انتى فاكرانى ؟ انا ايمن رشدى
نرمين :: خير . بشرنى . قول . هات اللى عندك خليها تكمل
امال :: بالراحه يا نرمين كفايه اللى احنا فيه
ايمن :: يا انسه نرمين انا جاى علشان مصلحتك
نرمين :: وايه بقى مصلحتى ان شاء الله انى اتجوزك انت ؟
ايمن :: انتى شايفه انى مش مناسب ليكى ؟
هبت نرمين واقفة وهتفت بغضب وتحدى
نرمين :: لو انت اخر انسان فى الكون اموت نفسى بايدى وما تطولش ضفرى
ايمن :: يستحسن يا انسه تفكرى فى الموضوع ده بهدوء
نرمين :: ايه البرود المستفز ده ؟ تعرف لو بعد مليون سنه مستحيل افكر انى ارتبط بكلب مسعور زيك
جحظت عينا ايمن ولمعتا ببريق مخيف وبدا على وجهه الغضب وقال وهو يضغط على اسنانه
ايمن :: على فكره انا ما باحبش اللى يغلط فيا واسالى عنى الاول
نرمين :: ما باخافش اللى تقدر تعمله اعمله
ايمن :: اللى اقدر اعمله كتير اسالى هاله عبد الظاهر لو تغرفيها تقول لك اقدر اعمل ايه
داليا :: انت مالك ومال اخواتى
كانت ترقبهما باكية من مكان قريب وهى تتوارى خلف الاشجار حتى سمعت تهديده فاندفعت تقف بينه وبينهما
داليا :: لو قربت منهم انا حاقتلك
ضحك ايمن بصوت عالى وقال ساخرا
ايمن :: داليا اللى بتخاف من خيالها بتهددنى ؟
داليا :: ايوه انا باخاف من خيالى وجبانه بس لو حد قرب من واحده من اخواتى
وفردت ذراعيها امامهما وقالت بتاكيد
داليا :: حاقتله بايديا
الغامض :: مش محتاجه يا انسه
كان يرى ان هذا هو الوقت المناسب للتدخل فخلع نظارته السوداء لتبدو تحتهما عينان نافذتان كعينى الصقر
نرمين :: انت مين ؟
الغامض :: امن الجامعه يا انسه تحت امرك
داليا :: بس احنا اول مره نشوفك
امال :: وشكلك مراقبنا من الصبح
الغامض :: انا فى خدمتكم يا انسه انا جديد لسه اول اسبوع
ايمن :: ده مش موضوعنا انت اسمك ايه ؟
الغامض :: سيادة الرائد ايمن اعتقد مش شغلك ودلوقت تسمح معايا بهدوء ؟
ايمن :: انت تعرفنى ؟
الغامض :: اعرفك كويس تسمح تتفضل معايا بهدوء ؟
مد ايمن يده بعجرفة يدفعه فى صدره قائلا
ايمن :: طيب ابعد من هنا احسنلك طالما تعرفنى
ولكن الرجل امسك بذراع ايمن بقبضة حديدية قائلا
الغامض :: بيتهيالى احسنلك انت تتفضل معايا
كانت قبضته قوية حقا حتى ان ايمن بوغت وضاقت عيناه وهو يقول
ايمن :: انت مش امن الايد دى .... انت مين ؟
الغامض :: مش شغلك حتمشى بهدوء واللا فيه اسلوب تانى
نظر ايمن الى البنات المرتعبات بحقد قائلا
ايمن :: انا حاجى تانى يا نرمين واحسنلك تفكرى كويس
الغامض :: لو جيت تانى حتلاقينى برضه والمره الجايه اسلوبى مش حيعجبك
ابتعد ايمن فاستدار الرجل الغامض قائلا بابتسامة مطمئنة
الغامض :: اى حد يضايقكم حتلاقونى موجود على طول
نرمين :: انت مين ؟ انت مش تبع الامن
دنا الرجل منها وقال هامسا
الغامض :: عمو صلاح بيسلم عليكم
وقبل ان تنطق احداهن وضع اصبعه على فمه محذرا
الغامض :: انا تبع امن الجامعه اتفقنا ؟
ولحظتها بدا لهما ما كان فى البداية وحشا كاسرا حين ابتسم مطمئنا كملاك حارس ثم وضع الرجل نظارته على عينيه وانصرف ولكنه وقف غير بعيد عنهم يرقب فى صمت
التفتت داليا تواجههم وعيناها غارقتان بالدموع
داليا :: انا اسفه سامحونى ما قدرتش ابعد عنكم
امال :: ولا احنا كمان نقدر نبعد عنك صدقينى انا عمرى ما قلت لثائر حاجه عنكم مش حادافع عنه تانى بس والله من يوم ما غلط فى نرمين وانا قطعت معاه خالص وما شفتهوش من يومها
وضعت نرمين ذراعيها على كتفى الاثنتين وضمتهما اليها قائلة
نرمين :: خلاص والنبى بلاش نفتح فى الموضوع ده تانى خلونا ننساه
داليا :: على فكره انا عملت حاجه وحشه حتزعلوا منى قوى
نظروا اليها فبكت قائلة
داليا :: انا قليت ادبى على باسنت وقلتلها كلام وحش قوى قوى مش عارفه ازاى قلت كده ولا عارفه ازاى عملت كده لكن انا ندمانه قوى قوى
نرمين :: انتى قلتى ايه لباسنت ؟
داليا :: قلتلها انها مالهاش لازمه وكمالة عدد معانا وانها زى خيال المآته
امال :: اسمعوا بقى انا عندى راى ياريت توافقونى عليه
داليا :: قولى
امال :: احنا لازم ندور على باسنت ونصالحها وننسى كل اللى فات ونبدا كلنا مع بعض صفحه جديده
داليا :: انا ما اقدرش اروح البيت من غيرها انا موافقه
نرمين :: وانا موافقه بس عاوزه اقول حاجه
امال :: عاوزه تقولى ايه ؟
نرمين :: احنا لازم نقول لاهلنا كل حاجه علشان انا خايفه وحاسسه ان المشاكل دى اكبر مننا بكتير واحنا لوحدنا مش حنقدر نحلها . بجد اول مره فى حياتى اخاف