رواية ارواح هائمة الفصل الخامس والعشرين 25 بقلم آثر توفيق
الحلقة 25
الفصل ده طويل وكله صراع حاولت اقسمه لقيته لازم ينزل على بعضه
_____________
اول ايام الدراسة دائما هو اجمل ايام السنة كرنفال من الالوان حيث ترتدى الفتيات افخر ثيابهن وتتنوع الموديلات والازياء والشباب ايضا ياتون فى كامل اناقتهم فى ذلك اليوم وجوه اسمرت من البحر بعد قضاء ايام فى المصيف ووجوه اسمرت من الشمس بعد قضاء الصيف فى العمل . وجوه ووجوه ووجوه وكلها فى هذا اليوم باسمة وبعد ذلك اليوم تختلف الاحوال وتظهر ثنائيات بين شباب وبنات وتظهر جروبات جديدة وتختفى جروبات من العام الماضى .
تظهر وجوه طلاب السنة الاولى المنبهرين بهذا العالم الاسطورى الجديد عليهم بينما تظهر فى الصورة وجوه من تخرجوا العام الماضى وحضروا لانهاء اوراقهم وتوديع تلك الفترة السعيدة قبل السقوط فى قلب ماكينة الحياة التى لا ترحم .
وبين كل هؤلاء وهؤلاء وردات اربع يتالقن كنجوم لامعة فى سماء الجامعة ثيابهن محتشمة ولكن جمالهن يبرز نفسه ووسطهن شمس الجامعة الساطعة بقوة شخصيتها واعتدادها بنفسها ورعايتها لاخواتها . جمالها اللافت للنظر يتوارى خلف جمال الروح اللافت للبصيرة الخاطف للقلوب ولكن شهرتها وسط الجامعة تمنع هواء المعاكسة من الاقتراب فهذه الفتاة بالذات مكتوب عليها ممنوع الاقتراب وجوه عديدة صفعتها هذه اليد التى تؤلم رغم نعومتها وشباب كثر فروا من لسانها الذى لا ينطق بسوء ولكنه رغم الفاظها المهذبة يؤلم بقسوة وقادر على وضع حدود امام كل معاكس او مشاكس وفى النهاية الامن موجود اذا تعقدت الامور ووصلت الى طريق مسدود .
فى ذلك اليوم وصلت الفتيات باكرا وذهبن الى كلية الحقوق لنقل جدول محاضرات امال
امال :: ما عنديش محاضرات النهارده يعنى على قلبكم طول النهار
نرمين :: احنا حنسيبك ونحضر
امال :: حاستناكم واللا ليه احضر معاكم
باسنت :: مافيش فايده لزقه لزقه يعنى
داليا :: طيب ياللا نشوف جدولنا احنا كمان يمكن يكون النهارده مافيش رابعه
انطلقوا الى كلية التجارة وهناك
نرمين :: قريتى فيها ؟ اهو مافيش النهارده يعنى جينا على الفاضى
امال :: بصره بس وماله نقعد شويه نشم نفسنا ونروح
نرمين :: طيب تعالوا اسجل اسمى فى جماعة المسرح
داليا :: نرمين السنه دى رابعه برضه حتدخلى جماعة المسرح
نرمين :: اصلى لما باقف على المسرح وامثل باحس باحساس غريب لما بالعب دور مختلف عنى باحس انى عايشه فى الشخصيه وباحس بمتعه مش عاديه حاجه مافيش غير التمثيل اللى بيحسسنى بيها وشعور مهما قلت مش باقدر اوصفه زى ما انا حاسسه بيه
باسنت :: طيب ياللا بينا بس انا حاسجل اسمى معاكى
انطلقوا الى مقر الفرقه المسرحية وهناك
اشرف :: نرمين ازيك اخبارك ايه ؟
نرمين :: الحمد لله يا استاذ اشرف غريبه انك جاى من اول يوم
اشرف :: قلت اكيد حالاقى بطلة الفرقه جايه من اول يوم اصل عندى ليكى مفاجاة
نرمين :: ده الاستاذ اشرف مخرج الفرقه يا بنات خير يا استاذ اشرف ؟
اشرف :: ازيكوا يا بنات بصى يا ستى السنه دى حنعمل اكتر من عمل اولا حنعمل كليوباترا وانتى طبعا بطلة الفرقه
نرمين :: مش ممكن انا حاعمل دور كليوباترا ؟ ده حلم
اشرف :: مش كده وبس حنعمل كمان مجنون ليلى تفتكرى مين ليلى ؟
نرمين :: لالالا مش مصدقه
اشرف :: لا واكتر من كده عارفه رواية اسد فى الشتاء ؟
نرمين :: بتاعة هنرى الثامن ؟
اشرف :: وان بولين ايه رايك بقى ؟
داليا :: بس يا استاذ ده كتير جدا واحنا السنه دى فى رابعه طيب والمذاكره ؟
اشرف :: اولا احنا حنعمل بروفات ونختار واحده بس للمسابقه والباقى حنعرضه مره واحده فى مسرح الجامعه للطلبه ثانيا انا دايما احدد مواعيد البروفات فى اوقات ما تعطلش الفرقه عن المحاضرات انا طبعا لازم اوازن بين الدراسه والهوايه انا يا انسه راجل تربوى مش فنان وبس لكن اشباع الهوايه بيشجع على الدراسه مش بيعطلها
باسنت :: انا عاوزه اشترك يا استاذ
نرمين :: اديها دور عفراء الجاريه بتاعتى
اشرف :: طيب وفى مسرحية كليوباترا ؟
نرمين :: برضه خليها عفراء
ووسط الضحكات سمعوا صوتا يحييها
طارق :: ازيك يا شجرة الدر قصدى يا مولاتى شجرة الدر
نرمين :: طارق ازيك عامل ايه ؟ ده طارق يا بنات اللى عمل دور قطز
طارق :: ازيكم يا انسات على فكره يا نرمين عندى ليكى خبر يجنن
نرمين :: خير يا طارق ؟
طارق :: طبعا انتى عارفه ان بابا ممثل معروف
نرمين :: طبعا باباك نجم كبير وكوميديان انا شخصيا باشوفه باضحك
طارق :: بابا شاف المسرحيه السنه اللى فاتت ومعجب بيكى جدا
داليا :: ايه عاوز يتقدم لها ؟
طارق :: وتبقى مراة بابا ؟ ياريت لا الحكايه مش كده هو عاوزك تمثلى معاه وطول الصيف بندور عليكى لكن ما عرفناش نوصل لطريقك
نرمين :: امثل معاه فى ايه فى مسرحيه ؟
طارق :: لا فيلم سينما هو موجود معايا بره اصل النهارده اول يوم وصمم ييجى معايا يمكن تيجى اصله قال كل الطلبه بتيجى اول يوم
نرمين :: بس انا ما باحبش الكوميدى
طارق :: انا ما اعرفش الفيلم كوميدى واللا تراجيدى تعالى نقابله وبعدها نشوف ياللا يا بنات علشان تتعرفوا ببابا
خرجوا جميعا لمقابلة النجم الكبير الذى استقبلهم ببشاشة
فريد :: اهلا اهلا ايه الجمال ده يا بختك يا طارق انا من بكره حاقدم ورقى فى الجامعه
طارق :: حترجع تدرس تانى يا بابا ؟
فريد :: لا حاجى اقعد مع الكتاكيت الحلوين دول بس ازيكم يا بنات عاملين ايه ؟
باسنت :: ازيك انت يا فنان يا كبير
امال :: حضرتك تصدق شبه السينما بالظبط قصدى فى الحقيقه
فريد :: اومال عاوزانى اطلع فى السينما شكل وفى الحقيقه شبه ابن خالتى ؟
امال :: لا مش قصدى اصلنا بنسمع انكم بتحطوا مكياج يغير شكلكوا خالص وفى الحقيقه بتبقوا غير كده
فريد :: مبالغات المبالغات كتير انما الحقيقه ابسط من كده انا مثلا باحط ماكياج علشان بشرتى تتحمل الاضاءه لكن ما انكرش ان فيه فنانين وفنانات بيحطوا مكياج يبينهم اصغر من سنهم انما الملامح هى هى ازيك يا نرمين
نرمين :: مبهوره مش مصدقه انى واقفه قدام الفنان الكبير فريد كامل
فريد :: انا اللى مش مصدق انى واقف قدام الملكه شجرة الدر الحقيقه انتى كنتى مبدعه هايله فنانه بجد وعملتى الدور احسن من تحيه كاريوكا
نرمين :: لالالا طبعا انا فين والست تحيه كاريوكا فين دى اسطوره وبالذات فى الدور ده كانت ملكه حقيقيه
فريد :: وانتى كمان كنتى ملكه بجد وده اللى خلانى ادور عليكى طول الصيف لكن ما عرفتش اوصل لطريقك
نرمين :: طارق قاللى بس مش عارفه الكوميدى يعنى
فريد :: الكوميدى ؟ ده اصعب حاجه فى التمثيل ده اللى محتاج براعه بجد انك تقدرى تطلعى الضحكه من قلب مجروح وترسميها على وشوش ناس شقيانه ومشتاقه لضحكه من القلب ده حتى ليها ثواب كبير بس انا عاوزك تجربى وحتى لو الفيلم مش قد كده اعتبرى ان دى فترة انتشار علشان الناس تعرفك خدى يا بنتى
نرمين :: ايه ده
فريد :: ده السيناريو بتاع الفيلم اقريه وقولى رايك براحتك ولعلمك انا حاديكى اجر فى الفيلم ده مليون جنيه المنتج اصله معايا من زمان
نرمين :: بس السينما والتصوير يعنى ده كله حيبقى امتى وفين ؟
فريد :: وافقى انتى بس ومواعيد التصوير تتظبط مع مواعيد الجامعه وحتى لو التصوير فى القاهره انتى حتبقى معايا وفى عينيا وتحت حمايتى زى بنتى بالظبط
_________________
كوثر :: ايه القرف ده يا نرمين ده كلام فارغ هو ده الفن ؟
نرمين :: انا مش متخيله بصراحه مش شايفه قصه شوية كلام فارغ وخلاص
كوثر :: يا نرمين احنا وافقنا على مسرح الجامعه على اساس انه هوايه وبيعملوا اعمال جاده ومن غير فلوس القصه مش قصة فلوس
نرمين :: انا عارفه يا ماما انا اصلا رفضت قبل ما اقرا الورق لكن فريد كامل صمم انى اقراه الاول بس بعد ما قريته لقيت ان رايى زى ما هو وبصراحه انا مش مرتاحه للسينما اصلا
كوثر :: ولا اى شغل انتى بعد ما تخلصى خالص تتجوزى وتراعى بيتك وربنا يكرمك وتخلفى يبقى ولادك اولى بيكى
نرمين :: صحيح يا ماما هو الزفت الظابط ده كان اسمه ايه ؟
كوثر :: ظابط مين اللى كان اتقدملك ؟ اوعى تكونى بتفكرى
نرمين :: انا افكر فى ده ؟ لو اخر بنى ادم فى الدنيا مستحيل كفايه اللى عمله فى بابا
كوثر :: ربنا قادر ينتقم منه بتسالى عن اسمه ليه ؟
نرمين :: اصلى يا ماما متاكده انى شفته قبل كده
كوثر :: اظن كان اسمه ايمن شكرى او حاجه زى كده لالا ايمن رشدى
نرمين :: نفسى افتكر شفته فين قبل كده
#ارواح_هائمة
اجتمعت الفتيات الاربع لمحاولة التذكر
امال :: اسمه ايه اسمه ايه ؟
نرمين :: ايمن رشدى انتى تعرفيه ؟
امال :: بيتهيالى الاسم مش غريب بس مش فاكره باحاول افتكر
داليا :: يعنى تعرفيه واللا لا ؟
امال :: يوووه انا باحاول افتكر اهه سيبونى اركز طيب هو شكله ايه ؟
نرمين :: هو طويل ومليان شويه وعنده شنب كبير قوى ويعنى قمحاوى كده مش اسمر وشكله مقبول صحيح انما يقبض مش مريح
امال :: طويل ومليان وبشنب وظابط واسمه ايمن رشدى بيلبس نضارة شمس كبيره ؟
نرمين :: احنا شفناه بالليل معقول يلبس نضارة شمس بالليل
امال :: بيتهيالى ده خطيب صاحبة ثائر المحجبه اللى اسمها ... يووه من يوم ماما بقيت بانسى كتير مش فاكره
باسنت :: بيتهيالى اسمها امانى
داليا :: لالا امانى دى اللى شعرها كاريه التانيه دى اسمها ايه
باسنت :: لا ما هى اتحجبت بعد الجواز
داليا :: يا ستى مش هى دى حاجه والتانيه حاجه التانيه اسمها ايه ؟ اه اسمها مها دى كانت محجبه من الاول فاكره لما قابلتنا وهزقتك ؟
باسنت :: لا بس هى اعتذرت بعد كده ونرمين صالحتها مش كده يا نرمين ؟
امال :: ايه مالك يا نرمين ؟
نرمين :: انتى تعرفى واحده اسمها هاله عبد الظاهر ؟
امال :: اه هاله دى صاحبة ثائر من زمان بس دى اتخرجت من السنه اللى فاتت مالها دى ؟
نرمين :: كان قال اسمها لبابا حليم بس ما فسرش حاجه هى البنت دى ايه ظروفها ؟
امال :: مالهاش ظروف بنت عاديه وكويسه لو كنتى لاحظتى فيه بنتين تلاقيهم على طول قاعدين على جنب بيسمعوا ويضحكوا معاهم وما يتكلموش كتير منهم واحده محجبه
داليا :: يعنى كل البلاوى دى من تحت راس اللى اسمه ثائر ؟
نرمين :: قصدك ايه ؟
داليا :: قصدى ان هو اللى مسلطه هو مش صاحبه
امال :: لالا مش ممكن ثائر ما يعملش كده انا عارفاه كويس
داليا :: انتى لسه حتدافعى عنه ؟ ما كل حاجه بانت اهيه
امال :: كل حاجه ايه انا عارفه ثائر كويس مستحيل يكون مسلطه وليه ؟
داليا :: اساليه هو مش صاحبك ؟
امال :: صاحبى ؟ اولا هو صاحب اخويا وثانيا من يوم ما غلط فى نرمين وفيا وانا قاطعته نهائى
داليا :: هو مش كان عندكم فى العزا ؟
نرمين :: هو كان عندكم فى العزا يا امال ؟
امال :: والله ما اعرف انا كنت فى ايه واللا فى ايه لو جه اكيد كان فى الشادر
داليا :: انا شفته عندكم واحنا طالعين
امال :: والله ما شفته ولا كلمته من يوم ما بابا حليم خدوه وكنت انا وباسنت
باسنت :: هو جه سالنا وزعق معانا وما كنناش عاوزين نقول حاجه وكان معاه صاحبته دى اللى اسمها مها
داليا :: اه خطيبة الباشا الظابط يعنى يسلط على بابا وييجى يسال فيه ايه يعنى يقتل القتيل ويمشى فى جنازته
امال :: يا جماعه والله ثائر ....
داليا :: ماله ثائر ؟ دافعى عنه كمان مش تعرفيه من سنين وانتى اللى عرفتيه بنرمين وتلاقيكى انتى اللى بتعرفيه اخبارنا ويمكن كمان انتى اللى عرفتيهم عنواننا ؟
امال :: انا يا داليا فى الاخر بقيت جاسوسه ؟ متشكره انا ماشيه
قامت لتنصرف فامسكت داليا ذراعها بقسوة قائلة
داليا :: تمشى تروحى فين مش حتمشى الا لما نعرف منك كل حاجه
فبكت امال وهتفت فى ذعر
امال :: سيبى ايدى ااه انا عمرى ما عملت حاجه تضركم عمرى
باسنت :: عيب كده يا داليا احنا خلاص حنشك فى بعض ؟
امال :: هى من الاول ما بتحبنيش وانا حاسسه بكده رغم انى باحبها زيكم
امسكت باسنت يد داليا لتطلق ذراع امال التى ارتمت على مقعد تبكى بحرقة وتقول بصوت متقطع
امال :: من يوم ما عرفتكم وانا حاسسه ان بقالى اخوات بنات وما بقيتش وحيده حبيتكم واخلصت لكم وفى الاخر تشكوا فيا ؟
داليا :: لسه حتمثلى ؟
نرمين :: بس كفايه كفايه
صرخت بصوت عالى قبل ان تنخرط فى البكاء بحرارة
امال ::: نرمين انا مظلومه والله انا مظلومه
واندفعت الى خارج الغرفة وغادرت الشقة وهى تبكى وحاولت كوثر اللحاق بها وهى قادمة من الشقة الاخرى بعد سماع صرخة نرمين وخلفها ثريا ولكنهما لم يلحقا بها فاسرعا الى غرفة البنات
كوثر :: فيه ايه يا نرمين مالكم يا بنات مالها امال ؟
نرمين :: مافيش يا ماما
كوثر :: اومال هى نزلت معيطه ليه وازاى تسيبيها تنزل معيطه ؟ انا لازم انزل اروح لها ما اسيبش بنتى تنزل من بيتى معيطه ابدا
وهرعت الى خارج الغرفة وخلفها نرمين
نرمين :: يا ماما ابوس ايدك انتى لسه تعبانه علشان خاطرى انا حانزل لها ومش حارجع الا بيها وانتى يا داليا بيننا وبين بعض حساب كبير
#ارواح_هائمة
نزلت نرمين مسرعة لتبحث عن امال فسمعت صوت بكاء فى غرفة حسين فطرقت الباب وفتحت لها كوثر الصغيرة
كوثر ص :: صاحبتك هنا تعالى ماما ما رضيتش تسيبها تروح
نرمين :: الحمد لله
دخلت لتسمع امال تقول
امال :: مافيش حاجه والله يا ابله نعمه ولا حد زعلنى انا بس افتكرت ماما وحشتنى ونفسى اروح اوضتها وانام فى سريرها واحس بحضنها
نعمة :: تقومى تمشى متاخر كده لوحدك ونازله معيطه لا انا مش حاسيبك ييجى حسين يوصلك
امال :: والنبى سيبينى يا ابله نعمه والله مخنوقه عاوزه اروح
نرمين :: واللى مخنوقه وعاوزه تروح تسيب امها واخواتها كده قلقانين عليها ؟
امال :: نرمين ؟
نرمين :: ايوه نرمين اختك اللى بتحبك وما تستغناش عنك ابدا خليتينى نزلت بالبيجامه والشبشب ادور عليكى فى الشوارع
وقفت امال وهى تشعر بالخجل وقالت محاولة تبرئة نفسها
امال :: نرمين صدقينى والله انا عمرى ....
قاطعتها نرمين بهدوء
نرمين :: من غير ما تقولى حاجه انا عارفه والله ومستحيل اصدق انك ممكن تعملى اى حاجه تضرنا انتى اختى وانا باحبك وعارفه انك بتحبينى
امال :: باحبكم كلكم والله انتى وماما كوثر وبابا حليم وتانت ثريا وتانت شيرين وباسنت حتى داليا اللى ...
نرمين :: داليا انا عارفه هو بتعمل كده ليه وليا حساب معاها ويا ستى اعتبرينى انا اللى غلطت فيكى وانا اسفه
احتضنت وجه امال بكفيها وقبلت راسها واضافت
نرمين :: ممكن نطلع بقى علشان ماما كوثر قلقانه عليكى ؟
امال :: انا عاوزه اروح بيتنا
نرمين :: فوق برضه بيتك ولو مشيتى كده ماما كوثر حيحصل لها حاجه خلينا نبات هنا النهارده ونستاذن من بابا وبكره بعد الجامعه اروح معاكى علشان نروق البيت هناك
امال :: هى ماما كوثر زعلانه منى علشان مشيت ؟
نرمين :: ماما كوثر خايفه عليكى وقلقانه وانا وعدتها انى مش حارجع غير بيكى
__________________
احتضنتها كوثر بحنان لتبث فى نفسها اكبر قدر من الطمانينة
كوثر :: معقول فى بنت تنزل من بيتها معيطه بالليل كده من غير حتى ما تقول لامها ؟ قوليلى مين اللى زعلتك وانا اقطم رقبتها
امال :: ما حدش زعلنى يا ماما بس مخنوقه وماما وحشتنى
كوثر :: الله يرحمها يا حبيبتى هى فى دار الحق لكن استنى بابا حليم يوصلك او نتصل ببابا فؤاد ييجى ياخدك
نرمين :: يا ماما خلاص احنا اتفقنا نستاذن من بابا ونرجع بكره من الجامعه على هناك علشان نروق الشقه اللى بقالها مده ماحدش روقها ونعمل لهم اى اكل
كوثر :: والله يا بنتى لو مش تعبانه كنت جيت معاكم
نرمين :: معلش يا ماما احنا عارفين خليكى لما تشدى حيلك ودلوقت بعد اذنك علشان عاوزين نقعد مع بعض شويه
كوثر :: من غير ما اعرف فيه ايه ؟
نرمين :: حتعرفى هو انا عمرى خبيت عليكى حاجه
كوثر :: يعنى حافضل قلقانه كده يا نرمين ؟
ركعت نرمين على ركبتيها وقبلت يد كوثر قائلة
نرمين :: ياست الكل ما تقلقيش ابدا دى كلها شده عاديه بس امال خدت على خاطرها وصعبت عليها نفسها وانا لازم اصالحها مش حاسيبها تنام وهى زعلانه ابدا
نظرت كوثر لامال متفرسة وقالت
كوثر :: هو انتى زعلانه من نرمين واللا .... من داليا ؟
امال :: لا من دى ولا من دى دول اخواتى ومش ممكن نزعل من بعض بس والله انا افتكرت ماما وصعبت عليا نفسى انا اسفه ليكى وليهم انا حادخل اقعد فى وسط اخواتى وابات فى وسطهم ونتصالح واللى غلطت مننا فى حق واحده اكيد التانيه مسامحه من غير كلام
________________
دخلت الفتاتان الى الغرفة لتجدا باسنت وحيدة تضع يدها على خدها وتبكى فى صمت
نرمين :: مالك يا بسبوسه بتعيطى ليه ؟
اقتربتا منها وجلستا على مسندى المقعد فامسكت ايديهما بيديها وقالت بصوت مبحوح
باسنت :: مش عارفه مش عارفه ايه اللى حصل لنا حاسسه ان فيه حاجه غلط فى حياتنا احنا ما كنناش كده ايه اللى حصل تقدروا تقولولى ؟
نرمين :: كل حاجه حتتصلح يا بسبوستى وحنرجع احسن من الاول دى ازمه وحتعدى ولازم الدنيا كده يوم حلو ويوم مر هى فين داليا ؟
باسنت :: راحت اوضتها ومش عاوزه تكلم حد
نرمين :: طيب استنونى هنا يا بنات
امال :: نرمين نرمين والنبى خلاص انا مش زعلانه علشان خاطرى
نرمين :: الموضوع ده مالوش علاقه بيكى ياامال انا لازم اتكلم معاها علشان هى كده زودتها قوى ولازم تفوق
امال :: علشان خاطرى والنبى هى اصلها بتخاف عليكى قوى
نرمين :: اكتر من اللزوم ده كده مرض اتطمنوا انا حاروح اتكلم معاها وحارجع
امال :: طيب والنبى بالراحه عليها بلاش خناق
نرمين :: اتطمنى دى اختى ومش ممكن اسيبها لوحدها لازم اجيبها تقعد معانا واللا ايه عاوزين اسيبها لوحدها ؟
باسنت :: لا بس بالراحه عليها طيب اجى معاكى
نرمين :: لا خليكوا انتوا وما تخافوش دى مهما كانت برضه داليا
#ارواح_هائمة
طرقت نرمين باب غرفة داليا فلم ترد اعادت الطرق بقوة اكبر فلم ترد ايضا فصاحت وهى تدق الباب بقبضتها
نرمين :: افتحى يا داليا كلمينى
ولكن داليا لم ترد ايضا فقالت بغضب
نرمين :: يا داليا ودينى وما اعبد لو ما فتحتى اكسر الباب عليكى
ثريا :: فيه ايه يا نرمين ؟
نرمين :: بنتك مش عاوزه تفتح الباب يا ماما ثريا
ثريا :: هو انتوا اتخانقتوا واللا ايه ؟ ايه حكايتكم بالظبط احوالكم مش مظبوطه ليه ؟
نرمين :: مافيش حاجه والله احنا كويسين ده دلع بنات مع بعض بس هى تفتح وكل حاجه تتحل
ثريا :: يا نرمين انا لو ما عرفتش دلوقت حالا فيه ايه حاخلى بابا هو اللى يتصرف معاكم بطريقته
كوثر :: سيبيهم يا ثريا بناتك كبروا وبقوا بيعرفوا الصح من الغلط
ثريا :: قلقانه عليهم يا كوثر دول بنات
كوثر :: انا كمان قلقانه عليهم لكن صابره لحد ما ييجوا لوحدهم ويقولوا فيه ايه
نرمين :: حنيجى يا ماما وحنقول كل حاجه بس ادونا فرصه نحل مشاكلنا . افتحى يا داليا
فتحت داليا الباب وهى تبكى
داليا :: عاوزه ايه يا نرمين ؟ انا مش عاوزه اتكلم مع حد
ازاحتها نرمين عن الباب ودخلت الغرفة قائلة بتهكم
نرمين :: ولا انا عاوزه اتكلم معاكى انا بادور على داليا اختى اللى عايشه معايا بقالها واحد وعشرين سنه هى فين وانتى مين ؟
اغلقت داليا الباب وقالت بتحدى
داليا :: انتى مجنونه ؟ انا داليا انتى بقى بتدورى على مين على ضلك اللى ماشى وراكى ؟ على وصيفتك اللى بتطيع كل اوامرك يا مولاتى الملكه نرمين ؟
نرمين :: اه هى الحكايه كده كل ده جواكى وكاتمه وعامله نفسك بتحبينى وانا مصدقه ؟
داليا :: باحبك ؟ ده انا ما باحبش حد فى الدنيا اكتر منك وكان عندى استعداد اعيش لاخر يوم فى عمرى جنبك انتى اللى دخلتى الشيطان اللى اسمه ثائر ده فى حياتنا خربها ووقع بيننا وفى الاخر طلع اللى حصل لبابا من تحت راسه
نرمين :: يا داليا يا حبيبتى افهمى بكره انتى تتجوزى وانا اتجوز وكل واحده تروح لبيتها اللى بيننا حب اخوات لبعض ما ينفعش فيه الغيره
داليا :: انتى بتقولى ايه ؟ ايه اللى دخل ده فى انى اخاف عليكى ؟
نرمين :: اصل الخوف ده مرض احيانا باحس ان حبك ليا زايد عن حب الاخوات لبعض باحس انك بتغيرى لو لقيتى حد بيكلمنى
داليا :: كمان طلعتينى مريضه نفسيا ومجنونه ؟ كل ده من تحت راس الكلب ده ؟
نرمين :: ايه اللى دخله هو فى الموضوع ده احنا بنتكلم عنك
داليا :: هو السبب هو السبب فى كل حاجه لسه حتنكرى بعد كل اللى عرفتيه وشفتيه بعينك ؟ حتنكرى ان هو السبب فى اللى حصل مع بابا ؟ بلاش دى حتنكرى انه السبب فى الخناقه اللى حصلت بيننا وخلتك الضغط على عندك لاول مره وجتلك غيبوبه كنتى حتموتى فيها ؟ تنكرى ان من يوم ما ظهر فى حياتنا واحنا بعدنا عن بعض ؟ وبعد كل ده لسه بتدافعى عنه وتفكرى فيه ؟
نرمين :: انا ما بافكرش فيه
داليا :: لا بتفكرى فيه ومش قادره تنسيه
نرمين :: اسكتى يا داليا كفايه
داليا :: لا مش حاسكت انا اللى كنت قاعده تحت رجليكى وانتى بين الحياه والموت فى الوقت اللى بيقول عليكى بارده ودمك تقيل ومع ذلك بتفكرى فيه ومش قادره تنسيه وبتسيبينى انا علشانه
نرمين :: كفايه يا داليا ارجوكى كفايه كفايه
داليا :: لا مش كفايه مش كفايه مالك تعبانه ؟ الحقيقه بتوجع استحملى الحقيقة اللى كل الناس عارفاها ان ده واحد بتاع بنات كله عارف ان ده بتاع بنات مافيش غير امال هى اللى بتدافع عنه هى اللى دخلت بيننا وعرفتك بيه ولما اتعرف بيكى ما عجبتيهوش قال عليكى بارده ودمك تقيل وعايشه فى الدور ويمكن هو ده السبب اللى خلاكى لحد دلوقت مش قادره تنسيه
نرمين :: كفايه كفايه كفايه
داليا :: وبعد كده يخلى صاحبه يقبض على بابا بتهمه باطله ويطلعه وييجى بعد كل ده يطلب ايدك ليه مش فاهمه عاوز يوصل لايه ؟
نرمين :: ارجوكى يا داليا اسكتى
داليا :: مش حاسكت لحد ما تصدقى انه تعبان دخل حياتنا يدمرها لازم تفوقى من الوهم ده لازم تنسيه وكفايه انه هانك ورفضك
نرمين :: قلتلك كفايه اسكتى
ودون ان تشعر رفعت يدها وهوت بصفعة قوية على وجه داليا وساد الصمت بينهما لفترة طالت بعض الشئ وفى النهاية قالت داليا وعيناها تتقدان شررا وهى تتحسس وجهها
داليا :: واخرتها خلاكى تمدى ايدك عليا ولسه وتيجى بعد شويه تقولى انا اسفه مش قصدى سامحينى . لا يا نرمين مش مسامحاكى
وخطت نحو الباب لتفتحه وتقف عند الباب تنتظر خروج نرمين
نرمين :: انا مش عارفه عملت كده ازاى انا ....
داليا :: مش عاوزه اسمع ولا كلمه واحده اتفضلى
نرمين :: يا داليا انا ....
ولكن داليا قاطعتها بعصبية وهى تدفعها بغلظة
داليا :: اطلعى امشى